\id EPH - Kanasi NT [soq] -Papua New Guinea 1996 (DBL 2014) 
\h Epesus 
\toc1 Epesus Paul letawa sumanailala Epesus bedewe waimoia mampo girumalena 
\toc2 Epesus 
\mt1 Epesus  
\mt2 Paul letawa sumanailala Epesus bedewe waimoia mampo girumalena  
\c 1  
\p
\v 1 \x + \xo 1.1 \xt Aposel 18.19-21; 19.1\x*Ne Paul God insaisawa rua sonabanene Keriso Iesu aposeliwa itunen. Ne letana ema girumantedina e God apanawaida kakaibu Keriso Iesu sumanaiwalala Epesus bedewe wainilana manlawo.  
\v 2 Mamamba God ita Tatamba Iesu Keriso nuawadawadau amonawa ita nuaeuwau enalempo wanwanla euwa obasa wanlempa.   
\s1 God sauwa eubu Iesu Keriso bedewe nenen  
\p
\v 3 God, me mida Tatamba Iesu Keriso Mamba, wadaposisaitana, ipawa me \bd sauidanene Keriso bedewe sauwa amonawa uduudu me mampe uboo wineia no neneno wadatana.\bd*  
\v 4 God sauwa euwa neneno wadatana ipa ema: Bumpeido tawo segasia walamawe \bd God Keriso bedewe no sonabanene dewaneno mebaawaida wananteno kadi bedewe eunene nambenene teanen.\bd* Me epe dewasana no kakaiwaida me emawe mai wawu da do wainentaa baiwa.  
\v 5-6 \bd God bauta insaisawa ituna rua me no dewaneno obampaida wananten Iesu Keriso bedewe.\bd* Sa ipa dima euwa me menasana rua nuawadawadawa mampe dewasano segalen. No mai dima euda dewasapona, dia, tane God no di nuawadawadanene sonabanen. \bd Ita me nuawa Otopaida Iesu Keriso bedewe nuawadawadawa amonawa di neneno inanten.\bd* Me epe dewasana God meba sapaidalepie ionolepia baiwa.   
\p
\v 7-8 \x + \xo 1.7-8 \xt Kolosi 1.14\x*God nuawadawada osowe mauraidalena baiwa nuaparembalene me Otopa wanaubeno wisen. \bd Ita osinawa mampe kadi taiwa taunedia lotonaubene inanene kadiwamba insendabuasan. No mai dima euda dewasapona, dia. Tane God nuaparembalene nuawadawadawa amonawa debamawa, insaisa euwa, ita atenida do di memenaubeno unu rua osombo ieno wadatana.\bd*   
\p
\v 9-10 God menasana Keriso mampe me insaisawa dewasape diasapona. Ita me insaisawa sa bauta wadenitudeno apana mai atentopona, dia. Tane God me atemba debamaia mampe menasana dima wadenitudena walamawa euwa ituna osowe segalepono no atentepona. Sa baiwa me insaisawa no mainimbo sabamoidosano atenten. God insaisawa sabamosana ipa ema epe: \bd Me ipa nitu uduudu uboo ita tawo osowe wineia awodeamopio uwau nepa dea, sa ipa Keriso, atowentopuo oniamompa.\bd*   
\p
\v 11 God bauta insaisawa ituna rua dewa uduudu dewasadio segaleide, mai di segaleipona, dia. \bd Ita God bauta insaisawa ituna rua no sonabanene dewaneno me apanawaida wananten.\bd* Sa ipa God menasana rua segalen.  
\v 12 Uwa daitada apanawa bedeuwo no Iuswa os bauta Keriso wisepe inanepona insaisawantite wainite. God no sonabanene dewaneno me apanawaida wananten, ita no bedemboe me sapawaida sabamolepono me ebowa wadaposisaipe ionoidosaipona.  
\v 13 Deawaa, e uwa daitada apanawa ulaipa benemawa, sa ipa Gagalo euda inaida enaledia umanawa etale God dewaleno Keriso bedewe me apanawaida wanaiten. Ita e etale sumanaiteno God lomi mampe makasalena me mampea wainilana. Tane God makasalena lomiwa, sa ipa Aleu kakaiwa God saualena rua enalen.  
\v 14 \bd God no Aleu kakaiwa nenena, sa ipa amonamba uduudu wineia bedeuwo dea bautaa wadatana.\bd* Ita Aleu kakaiwa nenena mampe inseite atentitana God dima uduudu sauanena wadapona ando nenepio wadata. \bd Do Aleu kakaiwa wadatana inseite atentitana walama ompe no inaidantate inawinakasalawo wankasantata, God meba apanawaida sauamona rua.\bd* Tane God no apanawaida wananene makasanena meba ebowa sapaidalepie debamalepia baiwa.   
\s1 Paul Epesus ekelesiawa baibu rauparileide  
\p
\v 15-17 God dewa eubu ema dewasana baiwa ne walama uduudu e baila God, me mida Tatamba Iesu Keriso Godiwa, auwasadina ita me mampe rauparintedina e baila. E Tatamba Iesu bedewe badowa sumanaitile ita God apanawa uduudu do nuawadawadamoilana umanawa ne etana walamawe ita tauma ne epe dewasadina. Ne iririntedina God, mida sapaida mamba, e insadewasa ita insaisala wadaaubala enalepio me insaisawa manlawosadia e dauwa etane mampeitana ita ema mampe e God atendewaidaitana.  
\v 18 Do ne rauparintedina \bd God e nualawo sapawa itupio ateitana dima baiwa God e sonabalena. Sa ipa dima enalepono wadapona onioniawaitile wainilana atendewaidaitana.\bd* Ne iririntedina God sauwa amonawa eubuida, mai wisia rua, mampe wineia me apanawa kakaibu sauamona wanamopia e ateitanatuwapi.  
\v 19-20 \x + \xo 1.19-20 \xt Sam 110.1\x*Do rauparintedina \bd God mukawa debama pokawaaida, mai wataa rua, sumanailala bedembo nolaleidia dauwa etape ateitapona.\bd* Mukawa debamaia sa mampe God Keriso bo bedewe inasano enenwiseno me witapa on deneuwe ituno uboo wande. Ita me mukawa debamaia sa deawaa no bedembo nolaleide.  
\v 21 \bd God Keriso uboo ituno waino me uboo ita tawo osowe muka wadeia uduudu osouwolene ionoidolen.\bd* Sa ipa ensel mukamukaua, aleu kadiu mukawaau, ita onioniala apanawa eboeboua daitada tauma oniamoia ita mo uduudu mida ando ita ando oniamompa me atowenton.  
\v 22 \x + \xo 1.22 \xt Kolosi 1.18\x*\bd Ita God Keriso dewasano nitu uduudu uwau nepa segalene wande ita nitu uduudu me wawa atowemontuwan.\bd* God Keriso mida nitu uduudu uwau nepa ituno ekelesiawa do uwau nepa wanalen.  
\v 23 Tane ekelesia ipa Keriso etepaida waimoi ita mo bedeuwo wanditue me os uduuduleide. Tane me ipa nitu uduudu bedewe wandituwadio me os uduuduleide.   
\c 2  
\s1 God ina sanaa nenena gagalowa  
\p
\v 1 \x + \xo 2.1 \xt Kolosi 2.13\x*Mapo e aleu bedewe bobopa wainile, e mai God do, dia. E God anaanawa ampuiasaile kadi dewasaile nambeido wainile.  
\v 2 Walama sawo e tawo ema dewawa kadiwa daitada dewamoile Seitan waweitile wainile. Me gonaawa ipa uba tampe sawano wanwanlala, sape me wandie aleu kadiu oniamode. Do apana uduudu mida God dabuasaie aiawa mai ruawantoipona bedeuwo me nolaleidie oniamode.  
\v 3 No mapo mo mida God dabuasaia do wanwanlala, ita no uduudu dima mo dewasaia rua dewasaite. No ete ewanuauwa kadiwa daitada teinanedie banlanedio insaisamba sape os ituite dewasaite wainite. No duba apanawa uduudu dewantoia rua dewantite, sa baiwa no God nuasigasigawa donsapona duba apanawa donsapua rua.  
\v 4-5 No kadi dewasaite aleu bedewe bobopa wainite, sa baiwa God nuasigasigawa donsapona. \bd Tane me nuaparewa debamawaida ita me no nuawadawadaidanene baiwa no Keriso do deanene bo bedewe inaneno ina sanaa wadatana.\bd* No mai dima euda dewasapono me inanepona, dia, tane me di inanen. Ema ipa God nuawadawadawa amonawa di neneno wadatana.  
\v 6 \bd No aleu bedewe bobopa wainitano God Keriso bo bedewe inasano enenwisena bedewe no do inaneno Keriso do enatawinen.\bd* Sa ipa God ina sanaa nenen. Ita God no Keriso Iesu do uboo teaneno wainitana.   
\p
\v 7 God epe dewasana, ipawa me menasadia me nuawadawadawa ita nuaparewa debamawaida, mai wataa rua, sabamosapio winakasalepi ando ita ando bedewe. Ita God me nuawadawadawa ita nuaparewa debamawaida dima euda Keriso Iesu bedewe no mainimbo dewasana mampe euwanene ipawanasan.  
\v 8-9 E inaitena, sa ipa e mai anaana ruawaitile simbiaitilana mampee inaitapona, diaida. \bd Tane God nuawadawadawa amonawa euwa mampe e sumanaila bedewe inalen.\bd* E mai dima euwa dewasapona, diaida, tane God e di inalen. Sa ipa God amonawa di neneno wadatana. Me epe dewasana, apana muba segarau wapua sawa.   
\p
\v 10 No God seganena wainitana. Ita tauma Keriso Iesu bedewe dewaneno sanaanten dewa eubu me bautaido insamona rua dewamonte wainentaa baiwa.   
\s1 Keriso osinawa mampe God Iuswa ita uwa daitada apanawa deamon  
\p
\v 11-12 Apana uduudu bedeuwo no Iuswa os ete nonowa dewawa dewasaite segarantite waitanase, “No ipa ide God apanawaida wainitana.” No uwa daitada apanawa ituaisimoite ebou waite waitanase, “E ete nosiawaia apanawa.” Ebo sa ipawaida ipa e mai God mampea, nambeido wanwanlala. Insenadewaitana e mapo ambi wainile. E mai Iuswaida Israel bedewe muitapona, dia, tane e uwa daitada apanawa nambeaido muiten. \bd E Keriso mai ateitapona, dia, nambeido wainile.\bd* Ita saua eubuida uduudu God no Iuswa mida me apanawaida os sauanena nenepi, tane mai e umanala wapona enalepia baiwa, dia. E mai dima da euwa donsapona insaisawaitipe anuwa wanleipe, do Inawala wisepie inalepia mai insaisawaitipe wanleipe, dia. E mai God do, tawo osowe di wankoaitile.  
\v 13 \bd E mapo nambeido wainile, mai God do, tane tauma Keriso Iesu bedewe me osinawa mampe God mampeiten.\bd*  
\v 14-16 \x + \xo 2.14-16 \xt Kolosi 2.14\x*\x + \xo 2.14-16 \xt Kolosi 1.20\x*No Iuswa e uwa daitada apanawa do emalawoantite wainite. No sawanambo bela enabodanedio wainite, mai deantepona rua, dia. Tane bela, sa ipa God anaanawa Moses wanena dewanedio nibunibuantitee. No Iuswa God anaanawa wadatana, tane mai oniepadewantepona, dia. No God sonabaneno do wainitee, tane me mampe mai dodomanantepona, dia. Ita e uwa daitada apanawa God mai atensapona baiwa me mampe mai dodomanaitapona, dia. Tane no Iuswa e do mai dodomananteipe wainipee. \bd No sawanambo bela enabodanedia Keriso bowa mampe epentewan.\bd* Sa ipa me etepa nanalena mampe God anaanawa Moses wanena ipasiasano diaidalen. No ipa empuempula wainite, tane Keriso menasana me bedewe deantate uwa dea sanaa segantata. Sa baiwa me bowa mampe bela sa epentewan. Ema mampe no nibunibuantitana wadenaubene diaidasan. Ita uwa nata wainitana me dewaneno nubaida dodomanantene me bedewe deantene ete dea seganten. \bd Ita me koros osowe boleidie mampe dewaneno e ita no do God mampe dodomananten. Keriso ipa no dodomanamba, do wanwanimba euwa obasa bumpa ipa me.\bd*   
\p
\v 17 Keriso wisene Gagalo euda apana God mampe dodomanantopue deantopua umanawa e uwa daitada apanawa, mida mai God do tane nambeido wanwanlala, benemalen. Do no Iuswa mida God do wainitana Gagalo euda sa mainimbo benemawaleidie.  
\v 18 \bd Keriso ipa apana uduudu baibu bolene inta wadenauben. Me bedewe no Iuswa ita e do Aleu kakaiwa dea bedewe Mamamba God mampe winetaa rua os.\bd*  
\v 19 Sa baiwa tauma e mai bola da nambea apanawa mapo wainilana rua wainipona, dia. \bd E tauma God apanawaida, sa ipa ekelesia bedeuwoitene apanauida wanaiten. Ita e God duwaida apanawa segaitene wainilana.\bd*   
\p
\v 20 God duwaida seu sonabamodia mampe wadede. Me bauta seu debamau teamona, sa ipa me aposeliwa ita perowetawa. Ita seu sa debamau osouwo seu isiwa uaraia teamodio duwa debamaleide. \bd Ita seu uduudu bedeuwo dea ipa pokawaaida du uduudu awanediposidede, sa ipa Keriso Iesu.\bd*  
\v 21 Ita me seu uduudu dewamodio badowa winei, mai daberarantopue nomopua rua, diaida. Ita God seu da teamodio du odedi aleidie debamaleide ita Tatamba bedewe du kakaiwa segaleidie enede.  
\v 22 \bd Tane Keriso bedewe e do du sa bedeweiten. Ita Aleu kakaiwa mampe God du sa bedewe wande.\bd*   
\c 3  
\s1 Paul ipa Gagalo euda amonalala uwa daitada apanawa mampo  
\p
\v 1 Ne Keriso Iesu nolawantedine uwa daitada apanawa manlawo Gagalo euda amonantedine, sa baiwa ne diburaneieno wainedina.  
\v 2 Ne ateina e etale ateiten ne Gagalo euda e manlawo amonantepina amonawa God nen.  
\v 3 God insaisawa meba wadenitudena me tauma ne mainawo sabamosan. \bd Sa ipa e uwa daitada apanawa do, mai no Iuswa os, Keriso bedewe God apanawaida wanantataa rua.\bd* Ema umanawa kampakampa os girumamona gagalona bautasane wana bedewe.  
\v 4 \x + \xo 3.4 \xt Kolosi 1.26,27\x*E gagalo sa wisiaitonune ateitana ne Gagalo euda Keriso umanawa God wadenitudeno winedia tauma sabamosano ne atenten.  
\v 5 Mapo ita tauma gagalo sa apana mampo mai sabamolepona, dia. Tane tauma God Aleu kakaiwa mampee me aposeliwa kakaibu ita perowetawa mampo sabamosan.  
\v 6 Ita God insaisawa sabamosana ema epe: \bd Uwa daitada apanawa Gagalo euda etapue sumanaintopue Keriso do deantopu ita God gonaawa bedewentopue Ius apanawa do awodeantopu.\bd* God Iuswa sau euda osouwo itupia rua deawaa mo osouwo itupi. Ita mo Iuswa do awodea Keriso Iesu bedewe God sauawa mapoido wana rua wadapu.  
\v 7 God ne sonabanene me nuaeuwawa mainawo dewasane Gagalo euda ema amonantepina nolawa nen. Ema ipa ne amonana God mukawa nedia bedewe wadana ita muka sa ne bedenawo nolaleide.  
\v 8 God meba apanawaida kakaibu bedeuwo ne ipa diapanaida, mai mo ruau. \bd Tane God amonana nena uwa daitada apanawa mampo Keriso maurawa eubuida uaraia mampe wineia benemawantepina.\bd*  
\v 9 God, mida nitu uduudu dewamona, nolawa nena insaisawa dima me mapo ita tauma wadenitudeno winedia ne tauma apana uduudu mampo wasabamosapina. Do God insaisawa wadenitudena tauma ekelesia bedeuwoe dewasadio segaleidia benemawantepina.   
\p
\v 10 God menasana ensel mukamukaua uboo waimoia ekelesia iniwa ewompe atentompa God ipa atemba debamaia intawa daitada mampe sabamosade.  
\v 11 God bautaido nitu uduudu segasia walamawe insaisawa ema insen. Ita tauma me dewasano Tatamba Keriso Iesu bedewe segalen.  
\v 12 \bd No Keriso do deantene ita sumanaimba me bedewe ituitana baiwa me mampe awa mai ingugurala, tane no rua os walama uduudu dewa uduudu baiwa God mampentonta, mai mala ba sa do, dia.\bd*  
\v 13 Sa baiwa ne badowa dialedina e baila poka etedina baiwa nuala mai omempa, dia, poka sa ipa e euwala baiwa.   
\s1 Paul Epesus ekelesiawa baibu rauparileide  
\p
\v 14 God e dewaleno inaida bedeweiten, sa baiwa ne kainokaino imina emmisintedine Mamamba God auwasadine wadaposisadina.  
\v 15 Me ipa uboo wanwanlala ita tawo osowe wanwanlala mambuida, mo uduudu bumpau me bedewe winede.  
\v 16 Ne rauparintedina Aleu kakaiwa mampe God mukawa enalepio nuala badosane sumanai mampe badowa enana. Ne iririntedina \bd God maurawa eubuida mampe wineia mukawa sa enalempo wadonuna.\bd*  
\v 17 Ne kena God mampe odedia \bd sumanaila mampe Keriso nualawo bola wadepie wankasalepi. \bd* Do baila rauparintedina \bd e dewa uduudu nuawadawada mampe dewasanuna, sa ipa e waapala.\bd*  
\v 18 Tane iririntedina God mukawa enalepio e ita God meba apanawaida kakaibu uduudu do Keriso nuawadawadawa debamawaida dauwa etaidasane ateitana.  
\v 19 \bd Me nuawadawadawa debamaia apana mai atentoputuwapia rua, diaida. Tane ne rauparintedina e me nuawadawadawa atenidaitana. Inta ema inta uduudu dima God mampea e enalempe nopeidolempo dauwa etaidasanuna.\bd*  
\v 20 \bd God mukawa ipa debamaia no bedembo nolaleide. Dima uduudu no menanedio inseitana iririwantonto me eiasampe debamaia nenompaa rua.\bd* Me mukawa mampe rua os dewa uduudu dewamopituwapi, tane no mai atentatatuwapia rua, dia.  
\v 21 Dima God ekelesia bedewe ita do Keriso Iesu bedewe dewamodia baiwa apana tauma waimoia ita do mo uduudu mida ando waimompa God sapasampe wadaposisampa! Ne epe menanede, amen.   
\c 4  
\s1 Keriso amonawa daitada sumanailala wanamode  
\p
\v 1 Ne Tatamba simbiasadina baiwa mo ne diburaneieno wainedina, sa baiwa dima ne wapaa baiwantedina e etane ruawaitana. \bd God e sonabalene apalena me apanawaida kakaibu wanaitene wainilana, sa baiwa ne badowaida iririledina e wanwanla kakaiwa dodomana God menasadia rua wanlempa.\bd*  
\v 2 \x + \xo 4.2 \xt Kolosi 3.12,13\x*Asowawa ene eba ituaisitonune ita nuala bibia mampe wanlempa. Nuaewaewa uduudu bedewe nuawadawada mampe eda sauitonune saila awanenuna ita etela aiaisiwa mamoo wanlempa.  
\v 3 E Aleu kakaiwa bedewe deaiten ita wanwan obasa euwa bedeweitene wainilana. Sa baiwa nuala uduudu mampe nolaitonune wanlempa, deaitene wainilana kadisana sawa.  
\v 4 God apanawa mai empuempula bedewe waimoipona, dia, mo uwa dea, sa ipa ete dea rua waimoi. Ita Aleu kakaiwa dea os mo bedeuwo nolaleide. \bd God e apalena e insaisala Keriso os mampe ituna baiwa, mai insaisala ituna intawa da wineipona, dia.\bd*  
\v 5 God apanawaida Tatau dea, mai da, ita sumanaibu dea os, mai sumanai da, dia, do babatutu dea os.   
\p
\v 6 Mo Godiu dea os, mai da, me ipa apana uduudu Mambu, ita apana, do nitu uduudu me atowentoputuwapio oniamompa. Ita dewa uduudu ipa sa me bedewe nolaleidituwade ita me os uduuduleide.  
\v 7 Tane Keriso dima menasana ruawalene no deadea amonawa neneno wadatana.  
\v 8 Sa baiwa buka bedewe wadi wadiase,  
\q1 “Me onawa nanausimone banlamone do odene alen. Ita sape waine apana amonau daitada wanamon.”   
\m
\v 9 Buka bedewe epe wade, “Me odene alen.” Ema dima umanawa wade? Sa ipa Keriso bauta sue tawo osowe iena baiwa leulene bolawe odene alena umanawa wade.  
\v 10 Me mida iena deawaa leulene odene alene uboo wain. Me epe dewalena nitu uduudu mampe me os uduudulepia baiwa.   
\p
\v 11 Keriso amonawa daitada apanawa wanamodio mampe nolantoi. Mo isiwa aposeliwa, isiwa perowetawa, isiwa Gagalo euda amonalala, do isiwa ekelesia onionialala, ita isiwa waeuwa apanawa teamon.  
\v 12 Keriso amona sa God apanawaida wanamona muka wadapue imaantopue rua me nolawantopu. \bd Keriso menasadia amonawa nolawa daitada mampee me etepa, sa ipa ekelesiawa, inilepie badolepi.\bd*  
\v 13 Do menasadia me amonawa nolawa dewasante wainenta ita no uduudu sumanaimba bedewe deaidantate God Otopa dauwa etate atenidantata. \bd No nolantonte wainenta Keriso bedewe debamantate sumanaimba badoidalepi ita dima uduudu dewasanta mampe Keriso insaisawa uduudu bedembolepio ruawaidantata.\bd*   
\p
\v 14 No Keriso bedewe muntate debamantata ando sumanaimba bedewe mai seda kerakera ruau wainenta, dia. Ita no Keriso bedewe sumanaimba badolepio laga apanawa mainimbo wimopue menamodia gagalo sanaa daitada mampe, ba laga kadiwaida mampe banlakadisanempo no mai tauwadea ulaipa sumanai intawa ete mo gagalou sanaa sa bedewe sumanaimba itute waroromota, dia. No mai ina lanunu wisedie sudio leusaituleidia, ba kaisaka abaia awanedie leusaitusadia rua dewantonte wainenta, dia.  
\v 15 Tane no nuawadawada mampe ulaipa gagalowa baiwa badowa enonte wasabamosante apana diamonta. \bd Ita no Keriso bedewe debamantate dewa uduudu dewasantaa mampe me mida no uwamba nepa bedewentate ruawaidantata.\bd*  
\v 16 \x + \xo 4.16 \xt Kolosi 2.19\x*No uduudu me etepa wainitana ita ete moawa uduudu me oniamodio nolauwonolauwo dewasaio ete dealeide. Tane ete moawa uduudu Keriso mukawa wadeiena rua nolauwonolauwo dewasampo ete inilepie debamalepi, ita nuawadawada mampe eda sauntompo badolempa.   
\s1 Duba apanawa dewau eidasataa gagalowa  
\p
\v 17 Epe wana baiwa Tatamba ebowe ne badowaida dialedina \bd e wanwanla bedewe mai duba apanawa dewantoia rua dewaitonuna, diaida!\bd* E bauta ipa epe wainile, tane tauma ne badowa dialedina mai wanwanla bauta wainilana rua wanlempa, eidasana! Duba apanawa waimoia bedewe insaisa diapanau insamoie dewamoi.  
\v 18 Mo uwau dubawa bodedio insaisau kiokioleidio mai dima atentoipona, dia. Ipawa mo nuau badoidaleno God mai atensaipona, dia, ita ina sanaa God nanaleidia mo mai wadeipona, nambeido waimoi.  
\v 19 Mapo kadi dewasaie malawantoie, tane tauma mo nuau badoidalena baiwa kadi dewasaie mai malawantoipe sawantoipona, dia. Mo insaisau uduudu ete ewanuauwa kadiwa daitada mampe ituie dewasai. Mo kadi uduudu dewasaie mai pokamoipono eipona, dia, tane osoweosowe dewasampaa menaidamode.  
\v 20 Keriso mo mida me aiawa amonantoia bedeuwoe mai dewa kadiwa ema waeuwalepona, diaida!   
\p
\v 21 Mo Keriso benemawa dodomana diadewasaleiena ita ulaipaida Iesu mampea waeuwaleieno etale wadalana. Ema ipa ne ateinaida.  
\v 22 \x + \xo 4.22 \xt Kolosi 3.9\x*Keriso waeuwa intawa ipa ema epe: E mapo nuala insaisawa tontawa bedewe eba ewanuaula rua duba dewawa daitada dewamoile. Tane e nuala insaisawa ita dewala tontawa uduudu tauma riasane eidasana, e insaisala ita dewala tontawa ete ewanuauwa daitada banlakadisasane kadiidasan.  
\v 23 \bd Sa baiwa e wanwanla tontawa bedewe wainilana dewawa ena. Tane Aleu kakaiwa e nuala ita insaisala leusapio sanaaidalepi\bd*  
\v 24 \x + \xo 4.24 \xt Kolosi 3.10; Bumpai 1.26\x*\bd ita nuala insaisawa sanaa nopelepi. E tauma apana sanaa segaitene wainilana. Sa ipa God me inainamba rua dewalena banlalepie dewalepio dewa eubu dodomana kakaibuida dewamonuna.\bd*  
\v 25 Sa baiwa laga dewawa uduudu eidasana! No God obampa dan dea rua wainitana, sa baiwa sosola mampo ulaipa gagalowa os wanuna.  
\v 26 E nuala kadilepia nuakadila sa mai banlalepio kadi dewasana, dia. Ita nuala kadilepio e mai nuakadi do wanlempo omo pamepi, dia, tane tauwadea nuala dodomanasana.  
\v 27 \bd Naita nuasigasiga bedelawo winompa, sa ipa du moawa wadeilaaubeilana Seitan odepia baiwa. E mai epe dewaitana, dia!\bd*  
\v 28 Mo mida pointoia poi dewawa eidasapue dewa euda dewasapue muba simbiantopue osowe waimompa. Tane mo nuaparelala saumompaa baiwa nolawantompa, mai muba os insaisau wadompe nolawantompa, dia.  
\v 29 Gagalo kadiwa mai wanuna, diaida. \bd Tane gagalo euda os wanuno apana dima menamodio kewa waia etalepue insaisau badolepio sau euda wadapu.\bd*   
\p
\v 30 E God Aleupa kakaiwa mai dewasano nuaparelepi, dia. God Aleupa kakaiwa enalena, sa ipa e makasalen me mebaawaida tauma ita ando inaida ipawanalempa walamawe do baiwa.  
\v 31 Nuakadilala uduudu, nuasigasiga ita ete gedarala, aia badobado mampe rasala, ituaisi gagalowa, warebasa, ita dewa rebareba daitada emonatuwapi.  
\v 32 \x + \xo 4.32 \xt Kolosi 3.13\x*Tane e euda dewasanuna ita sosola nuapareuitane saumonuna. \bd Sosola kadileia kadiu insadabuamonuna God e kadila Keriso bedewe insadabuamona rua.\bd*   
\c 5  
\s1 E sapa apanawa rua wanlempa!  
\p
\v 1 E ipa God nuawadawadaledia obampa, sa baiwa dewa uduudu bedewe me ruawaitonune wanlempa.  
\v 2 \bd E eda nuawadawadaitonuna Keriso nuawadawadaledia rua.\bd* Keriso nuawadawadanene meba inawawa no baimba itune en. Sa ipa pulo amonawa euda God mampe nitu uwatauwa bonabonaua rua me ewene nuawa eulen.  
\v 3 Nina rebareba, ete ewanuauwa kadiwa daitada ita anaanata dewawa mai dewamona, eidamona! Dewa ema mai eubu ita God apanawaida kakaibu mai dewamompa, dia.  
\v 4 Do ula kadiwa malawala, gagalo rebareba, ba wasi rebareba mai wanuna, diaida. Sa ipa mai euda dodomana e baila, eidamona! Tane euda ipa e God auwasanune wanlempa.  
\v 5 Ema ipa ulaipa, insenadewaitana: \bd Apana ninala, ba mo mida ete ewanuauwa kadiwa daitada dewamoia mo mai Keriso ita God gonaau mampea, mo bolau inta sa dia. Deawaa mo mida anaanata dewawa dewasaia mampo.\bd* Apana epe dewantompa sumanaibu mane ita puraiwa osowe itui, mai Godida inseipona, dia.  
\v 6 Apana isiwa manlawo wimopue menamodia banlakadisalepue lagalepue wapuase, “Dewa sa mai kadiwa, e dewamonuna rua.” Mo dima waia e mai etamone ruauitana, diaida! Apana kadi sa dewasaia baiwa God nuasigasigawa debama iepi mo mida God dabuasaie aiawa mai ruawantoipona mampo.  
\v 7 Sa baiwa mai mo mida dewa sa dewamoia do deaitana, dia.  
\v 8 E bauta ipa duba apanawaida, tane \bd tauma Tatamba bedewe e ipa sapa apanawaida wanaiten, sa baiwa e sapa dewawa dewasanune wanlempa.\bd*  
\v 9 Sapa apanawa eueuwau sabamosaie dewasaia ipa euda dodomana ita ulaipa mampe, mai kadi da ba laga do, diaida.  
\v 10 Dima uduudu dewasailana bedewe ateitonuna dainea dewasailano God ewedie nuawa euleide.  
\v 11-12 \bd E mai kadi dewawa daitada ipusiawaia duba apanawa dewasaia bedeweitana, diaida!\bd* Tane e mo kadiu wasabamosane wanase, “Dima e dewamoilana ipa kadiwa.” Dima mo weregainta dewamoia ipa malawalaida, mai wataa rua.  
\v 13 Tane God sapawa apana dima dewasaia osouwo iompo mo atentopu God emawe dima dewamoia euda ba kadiwa.  
\v 14 Ipawa sapa nitu uduudu sabamosadia ewaewala. Sa baiwa no waite waitanase,  
\q1 \bd “E bo ituwa ituitilana enanawilena ita Keriso sapawa osolawo iepi.”\bd*   
\m
\v 15 E mai apana insarebasala dewau ruauitana, dia. Tane insadewasala apanawa ruau wanlempa. Sa baiwa wanwanla bedewe emodewaitonuna!  
\v 16 \x + \xo 5.16 \xt Kolosi 4.5\x*No walama kadiwa bedewe wainitana, sa baiwa mai walamala di diasanuna. \bd Tane God walama enaledia bedewe dima menasadia ruawa uduudu dewasana, mai da ena.\bd* Nola dainea nanlanepelempa nuala uduudu mampe ideita dewasana.  
\v 17 Walama kadiwa bedewe wainitana baiwa e mai apana di wankoantoie mai dima atentoipona rua wanlempa, dia. Tane God insaisawa banusane ateitana.  
\v 18 E mai esa badowa nano uwala koakoalepio dewa rebareba dewamone wanwanla kadilepi. \bd Tane Aleu kakaiwa bedelawolempe banlalempa, mai dima da.\bd*  
\v 19 \x + \xo 5.19 \xt Kolosi 3.16,17\x*Wadapos sasawa ita Aleu sasawa daitada wamonuna bedewe eda sauitonuna, ita nuala uduudu mampe sasaitonune Tatamba wadaposisanuna.  
\v 20 Tane walama uduudu dewa uduudu baiwa Mamamba God auwasanuna Tatamba Iesu Keriso ebowe.   
\s1 Apana nainailala gagalou  
\p
\v 21 E sumanai sosola atouwoitane dima mo waia etane ruawaitana. E Keriso sawaitile nuawadawadasailana baiwa epe dewaitonuna.   
\p
\v 22 \x + \xo 5.22 \xt Kolosi 3.18; 1 Pita 3.1\x*Ioto nainailala babadala atouwoitana ita atenidaitana sa ipa Tatamba baiwa dewasailana.  
\v 23 Epe dewaitonuna, ipawa \bd God apana mona ituna me nainai uwa nepa.\bd* Apana mona nainai uwa nepa Keriso ekelesia uwau nepa rua. Keriso ekelesia Inawau ita mo ipa me etepaida waimoi.  
\v 24 \bd Ekelesia Keriso atowentona rua ioto babadau atouwontompa dewa uduudu bedewe.\bd*  
\v 25 \x + \xo 5.25 \xt Kolosi 3.19; 1 Pita 3.7\x*\bd Apana nainailala manamanaila nuawadawadamonuna Keriso ekelesia nuawadawadamodia rua. Me ekelesia nuawadawadamone meba inawawa mo baibu itune en,\bd*  
\v 26 ipawa me menasana ekelesia mebaawa apanawaida kakaibuida segantopu. Ita menasana ekelesia apanawa esa mampe mitamopie eumopi, sa ipa God aiawa mampe eumopi.  
\v 27 Do menasana ekelesia apanawa i nainai baiwa benalene imaalene wandia rua epe mo imaantompe me baiwa waimompa. Me menasana ekelesia apanawa sapa eudida waimompa, mai pin, ba mira, ba kadiwa da do waimompa, dia. Keriso do menasana ekelesia kakaibuida dodomana waimompa, mai wawu da do, dia.  
\v 28 \bd Keriso ekelesia nuawadawadamodia rua apana nainailala manamanaila nuawadawadamonune oniadewasamonuna eba etela nuawadawadasaile onieiladewaitilana rua.\bd* Me mida manainapa nuawadawadasadia, sa ipa me meba nuawadawadaleide.  
\v 29 Mai apana da meba etepa dabuasaipona, dia, tane deaitopa oniedidewaleide dima menasadia mampe, Keriso ekelesiawa oniadewasamodia rua.   
\p
\v 30 Keriso ekelesiawa oniadewasamodia, ipawa mo ipa me etepaida waimoi.  
\v 31 \x + \xo 5.31 \xt Bumpai 2.24\x*Buka bedewe ema epe girumalena wadi wadiase,  
\q1 “Apana mona manainapa do wampona baiwa me mamba ita inawa emopie alepie manainapa nata ete deaida wanantopue wankasantopu.”   
\m
\v 32 Ema ipa gagalo debamaia, bedewe ipawa nata winei. Ipawaida dea debamaia mapo weregalen, tane tauma God ne mainawo sabamosano atenten. Gagalo sa ipa Keriso ita ekelesiawa umanau wade. Tane ipawaida da ipa nainai umanawa wade.  
\v 33 Apana nainailala manamanaila nuawadawadamonuna eba nuawadawadaitilana rua. Tane ioto nainailala e do babadala wiwira mampe oniadewasamonuna.   
\c 6  
\s1 Seda gombau do gagalou  
\p
\v 1-3 \x + \xo 6.1-3 \xt Kolosi 3.20\x*\x + \xo 6.1-3 \xt Ekisod 20.12\x*\bd Seda, gombala aiau etonune ruauitonune simbiamonuna Tatamba ebowa baiwa, sa ipa euda dodomana.\bd* E epe dewaitonuna God saualena rua e wanwanla euda wankasaitana ita wanwanla daumalepi bola emawo. God anaanawa 10 Moses wanena bedeuwo isiwa no ruauntonte dewamonte sau euda donsataa sauawalen. Tane gombamba atouwontonte oniadewasamontaa anaanawa osowe God bauta me sauawa itun.   
\p
\v 4 \x + \xo 6.4 \xt Kolosi 3.21\x*Gomba, obanla nuau mai di kadisana, dia. \bd Mo kadiwa dewasampo e nuawadawada mampe anaanamonune ita Tatamba waeuwa asiasi oniamono muntopu.\bd*   
\s1 Apana debamau ita mo mida atouwo nolantoia gagalou  
\p
\v 5 \x + \xo 6.5 \xt Kolosi 3.22-25\x*E mida apana debamau atouwo nolaitilana aiau etonune ruawaitonuna. E mo wiwira mampe oniadewasamonune simbiamonuna, mai emona! Epe dewaitonune bedewe insene ateitana e Keriso baiwa epe dewasailana.  
\v 6 E nolaitonune bedewe mai insenunase, “Ne debamana ewanedia baiwa oniadewasasapine simbiasapina, tane enepie alepio aupe di wankoantepina.” Tane God menasadia e nolaitonune bedewe insenunase, \bd “Ne Keriso mebaawaida nolawa dewalala ita nuana uduudu mampe menanedia God insaisawa dewasapa, sa baiwa ne noladewanteapa.”\bd*  
\v 7 E nuala uduudu mampe nolaitonune bedewe insena e ipa Tatamba baiwa nolaitilana, mai apanaida, dia.   
\p
\v 8 E epe nolaitonune atenidaitana Tatamba apana uduudu, eboeboua ita mo mida baibu nolantoia dima euda dewasaia ruawalepie uneu wanamopi.  
\v 9 \x + \xo 6.9 \xt Kolosi 4.1; Kolosi 3.25\x*Tane e apana debamau mo mida atolawo nolantoia do oniadewasamonuna. E mai mo wasanamonuna, wasana dewawa eidasana. Insene atendewaitana Tatamba uboo wandia ipa mo ita e do Tatala. Me apana uduudu, eboeboua ita diapanau dima dewasaia ruawaidalepie sipoa wanamopi.   
\s1 Ona puraiwawa otaimaamone wanlempaa gagalowa  
\p
\v 10 Ne gagalona ompa wapa. \bd E Tatamba ita me mukawa debamaia do bedeweitena mukawa sa wadane badoidaitana!\bd*  
\v 11 Seitan lagawa kadiwa daitada mampe inta banusadia e kadilepia baiwa. \bd Sa baiwa ona puraiwawa uduudu God mampea otaimaamone wanlempa. Ema mampe e rua os badowa enonuno ona iompo nanausana.\bd*  
\v 12 Ona puraiwawa uduudu God mampea otaimaamone wanlempa, ipawa no mai apanaida do onantipona, dia. No aleu kadiu uaraia wisiasiawaia bolau uba tampe sawano waimoie laia do onantitana. Ita mo uwaantoia uduudu muka badowaida wadeia dubawa gonaawa, sa ipa tawo ema, onieia do onantitana.  
\v 13 Sa baiwa ona puraiwawa uduudu God mampea tauma otaimaamone wanlempa ita walamaipa onala iompo e rua os onaitana. Ita ona dialepio e badowa enane enakasaitana.   
\p
\v 14 \x + \xo 6.14 \xt Aisaia 11.5\x*\bd E ulaipa dewasanune do gagalowaitonune wanlempa,\bd* sa ipa e igala wadane nolawo taune leununa. \bd God e dewaleno me do dodomanaiten,\bd* sa ipa e danala ita adila enabodawa euda badowaida taune enonuna.   
\p
\v 15 \x + \xo 6.15 \xt Aisaia 52.7\x*\bd E walama uduudu no God do deantena gagalowa euda amonawa baiwa menaidalempo imaaitonune wanlempa.\bd* Sa ipa e butila, walawo taumonune leununa.  
\v 16 \bd E walama uduudu sumanaitonune wanlempa.\bd* Sa ipa etela enabodawa witalawo wadonune enonuna, mai itune ena, dia. Ema wadonune Seitan ewa iilala uduudu manlawo ieia e rua os bodamono diaidantopu.  
\v 17 \bd God e inalene inawinakasala enalena insenune os wanlempa.\bd* Sa ipa uwala enabodawa, wadane uwalawo aine enonuna. \bd Ita God aiawa mampe Seitan onawaitonuna,\bd* sa ipa e isimala moamoaua Aleu kakaiwa enalede, wadane mampe onaitonuna. Ona puraiwawa ema uduudu otamone badowa enonuna.  
\v 18 \bd Aleu kakaiwa insaisa enalempe banlalempaa rua walama uduudu dewa uduudu bedewe rauparitonuna\bd* ita dima menaledia mampe kela odompa. \bd Onioniadewaitonune insaisala wadaaubala wanlempa,\bd* ita God meba apanawaida kakaibu uduudu baibu rauparitonuna, mai walama da ena, dia.   
\p
\v 19 Tane ne baina do rauparitonuna ita gagalontepina bedewe God insaisawa bedenawosampo rua Gagalo euda mai mala do badowa benemantepina. Ita do Gagalo euda God mapo wadenitudeno winedia ne wasabamosapo apana atentopu.  
\v 20 Ne Gagalo euda benemalala apanawa dibura bedewe seni mampe tauneieno wainedina. \bd Ne baina rauparitonuno God saunepio Gagalo euda mai sa do badowa gagalontepina, God menasadia rua.\bd*   
\s1 Paul sumanai sosowa auwamode  
\p
\v 21 \x + \xo 6.21 \xt Aposel 20.4; 2 Timoti 4.12\x*\x + \xo 6.21 \xt Kolosi 4.7,8\x*Ne sumanai sonaida Tikikas e manlawo wapaaubepo wisepi. Me ipa ne sauna walama uduudu Tatamba bedewe simbianedia. Ita me ne umanana uduudu benemalepio ateitana ne nolana dainea os dewamodine wainedina.  
\v 22 Ne me wapaaubepo manlawo wimpie no ambi wainitana benemawalepio ateitana do wasaulepie nuala badosapi.  
\v 23 Sumanai sosona, Mako God ita Tatamba Iesu Keriso nuawadawada ita sumanai enalempe saulempo wanwanla euda obasa wanlempa.  
\v 24 Mako God amonawa euda e uduudu osolawo winompa, e mida Tatamba Iesu Keriso mai nuala obasa mampe tane nuala uduudu mampe nuawadawadasailana manlawo! Amen.