\id 2TH - Kanasi NT [soq] -Papua New Guinea 1996 (DBL 2014) 
\h 2 Tesalonaika 
\toc1 2 Tesalonaika Paul letawa natawa sumanailala Tesalonaika bedewe waimoia mampo girumalena 
\toc2 2 Tesalonaika 
\mt1 2 Tesalonaika  
\mt2 Paul letawa natawa sumanailala Tesalonaika bedewe waimoia mampo girumalena  
\c 1  
\p
\v 1 \x + \xo 1.1 \xt Aposel 17.1\x*Ne Paul, sosona Sailas ita Timoti do leta ema girumantitana e ekelesia Tesalonaika bedewe wanwanlala manlawo, e God mida no Mamamba ita Tatamba Iesu Keriso do deaitene wainilana.   
\p
\v 2 Nuawadawada amonawa ita wanwan euda Mamamba God ita Tatamba Iesu Keriso mampoa e manlawo winompa, niapo!   
\s1 Keriso wiwisawa walamawa gagalowa  
\p
\v 3 Sumanai sosomba, no inseitana eulena walama uduudu e baila God mampe auwantonta. \bd Ipawa e sumanaila inilene odene debamaidaleide, ita e eda nuawadawadala sumanai sosola mampo do debamaleide.\bd*  
\v 4 E epe dewaitilana baiwa no God ekelesiawa uduudu bedeuwo e asola waite umanala diamoitana. Tane \bd e poka eteile ita apana e kadileia bedewe badowa eneile aitilana mai sumanaila eipona, dia.\bd* Sa baiwa do no e asola waitana.   
\p
\v 5 E poka bedewainta badowa eneile aitilana. Ita poka daitada sa sabamosadie euwanede God ipa dodomana os kotuleide: Me ando e mainila ewedia osowe dialepie wapiase, \bd “E ipa dodomanaida, God gonaawa bedewe odana rua.”\bd* God gonaawa ipa sa baiwa e tauma poka eteilana.  
\v 6 God ipa dodomanaida, sa baiwa mo mida e kadileia sipoa me ando kadimopi.  
\v 7 Tane mo mampo poka eteilana bedewe God e saulepi ita wadaaubalepie no do osombo sai wadepiaubepi. Tatamba Iesu me enseliwa mukamukaua ita ia iilala epawa do uboe sabamolepie wisepio dewa ema uduudu segantopu.  
\v 8 God apana mida mai me insaisawantoipe waimoipona ita do Gagalo euda Tatamba Iesu umanawa adiananasaia walama sawo matangelamopi.  
\v 9-10 Tatamba iompa walamawe mo matangela kadiwaida winakasala donsapu. Sa ipa Tatamba, ita do me mukawa sapawaida mo epue nambeidontopue ita me ibuwa mai ewapu, dia. Walama sawo \bd Iesu wisepie me meba apanawaida kakaibu bedeuwo sapawaida donsapi, ita mo mida sumanaiwantoiena uduudu me ewapue asosapu.\bd* Tane e do mo bedeuwoitana, ipawa Gagalo euda no e benemaletano etale sumanaiwaitena baiwa.   
\p
\v 11 Sa baiwa no walama uduudu e baila rauparintitana God e dewalepio wanwan euda dodomana e apalena rua wanlempa. Do rauparintitana dima euwa e baiwaitilana, ita do e sumanaila nolawa me mukawa mampe dewasampo ulaipalempa.  
\v 12 \bd Ne epe rauparintedina no Tatamba Iesu ebowa e bedelawo sapaidalepie debamalepio edawa e me bedewe sapaidaitane debamaitana.\bd* Dewa ema uduudu no Godimba ita Tatamba Iesu Keriso nuawadawadau amonawa bopawa wadatana bedewe segalepie sabamolepi.   
\c 2  
\s1 God anaanawa ampuialala apanawa gagalowa  
\p
\v 1-2 \x + \xo 2.1-2 \xt 1 Tesal 4.15-17\x*Sumanai sosomba, Tatamba Iesu Keriso wiwisawa ita no me do awodeantataa umanawa ema epe dialeitana: Apana isiwa God aiawa amonantoia bedewe, ba Aleu kakaiwa mo diamoipona rua gagalontoie benemantoia mampe, ba leta bedewe girumantono e manlawo wisedia bedewe waie waiase, “Tatamba wiwisawa walamawa aitamana wisen.” Tane leta sa mai no mainimboe wisepona, apana isiwa waia rua. Sa dia! No e iririleitana e gagalo inainambu ema ruau etamonune, mai tauwadea insaisala dodomana wadeile wainilana ena, ba nuala surakausapi, dia.  
\v 3 Mai mida da aia ema bedewe banlakadisalepi. Bauta apana uduudu God adiananasapua walamawa debama segalepi ita God anaanawa ampuialala apanawa, mida ando bolawa kadiwaida bedewe alepia, sabamolepio aupe Tatamba walamawa wisepia rua.  
\v 4 Tane God anaanawa ampuialala kadiwa wisepie Godida, ita dima apana god rua wadaposimoia, me enabodamopie ituaisimopi, meba ionoidolepia baiwa. Do me God duwaida bedewe bola wadepie wampi, ita asowawalepie wapiase, “Ne ipa God.”   
\p
\v 5 Walamaipa ne e do wainite nitu ema uduudu umanawa dialena e inseilana, ba dia?  
\v 6 E atenla nitu dainea God anaanawa ampuialala tauma segalepona walamawa wadaitusade. Sa ipa me walamawa itutula bedewe segalepia baiwa.  
\v 7 God anaanawa ampuialala mukawa weregala aitamana apana bedeuwo nolaleide, tane ando os sabamoidolepi. Dewa dainea nitu kadiwa ema segaidalepona walamawa wadaitusadia winompo ideita God dewa sa inta enabodasadia wadepiaubepi.  
\v 8 \x + \xo 2.8 \xt Aisaia 11.4\x*Ema aupe God anaanawa ampuialala sabamoidolepi wisepie nolalepi. \bd Tane Tatamba me nonaupa moawe nosedia mampe anaana ampuialala nanausapi. Ita meida uboe iompaa sapawaida debama sa me kadisapio dialepi.\bd*  
\v 9 \x + \xo 2.9 \xt Matiu 24.24\x*Tane walamaipa God anaanawa ampuialala wisepie nolalempe Seitan mukawa mampe ginasa, eueuwa ita dewa mukamukaua lagawaa daitada dewamopi.  
\v 10 Ita do me kadi uara mampe apana mo mida kadi donsapua lagamopi. Mo kadi donsapu, ipawa mo ulaipa gagalowa dabuasaiena, mai nuawadawadasape wadape mamposapona inantopona baiwa.  
\v 11 Ema osowe God mo mampo banlakadisa mukawa debama wapiaubepi, mo laga sa bedewe sumanaintopua baiwa.  
\v 12 Inta ema bedewe mo mida kadiwaida dewawa nuawadawadasane ita ulaipa gagalowa mai sumanaiwantopona kotuntopue kadiwa donsapu.   
\s1 Ulaipa waeuwa bedewe badowa enonuna!  
\p
\v 13 No walama uduudu God auwasanta e sumanai sosomba baila, e mida Tatamba nuawadawadaledia. God e bautalene sonabalena, me Aleupa kakaiwa e bedelawolepie inalepie dewalepio meba apanawaida kakaiwa segaitana baiwa. Ema ipa e sumanaila ulaipa gagalowa bedewe ituilana mampe segaleide.  
\v 14 God e sonabalene apalena, Tatamba Iesu Keriso sapawaida sumanailala isiwa wadeiena rua e do wadana baiwa. E dewa eubu ema dommolana, sa ipa Gagalo euda e manlawo no amonantena bedewee wisen.  
\v 15 Sa baiwa no sumanai sosomba ulaipa waeuwa no moambo ba letamba bedewe dialetana wadaitumone bedeuwo badowa enonuna.  
\v 16 Do Tatamba Iesu Keriso me meba ita Mamamba God, mida no nuawadawadanene mo saubu amonawa euwa mampe nuamba badosaiena winakasalepia baiwa,  
\v 17 do e wasaulepuo badowa enana ita muka enalepuo nolala ita gagalola bedewe euda os dewasanuna.   
\c 3  
\s1 Paul raupari iririwaleide  
\p
\v 1 Tane do no gagalomba da wataa menanede. Sumanai sosomba no baimba \bd rauparitonuna Gagalo euda Tatamba Iesu umanawa ideita debamalepie alepio apana uduudu etapue sapasapu,\bd* e bedelawo segalena rua.  
\v 2 Do rauparitonuna God no apana dewa kadiwa rebareba dewalala mampo oniadewasanempa. Ipawa apana isiwa Gagalo euda mai sumanaiwantoipona, dia.   
\p
\v 3 Tane Tatamba, mida dewa dodomana ulaipa os dewasadia, e do muka enalepie gonaalempa, kadi mamba kadilepia sawa.  
\v 4 Ita no Tatamba bedewe sumanaintite e baila badowa inseitana dima no e dialetano dewasailana ideita dewakasaitana.  
\v 5 Tane no e baila rauparintitana Tatamba saulepie banlalepio e God nuawadawadawa ipawaida ateitana. Ita poka eteilana bedewe Keriso mukawa mampe badowa enonuna, mai dabuaitana, dia.   
\s1 Nola etedabualala wasaubu gagalowa  
\p
\v 6 Sumanai sosomba, e bedelawo sosola isiwa nola etedabuantoie di waimoie, ita do no waeuwamba e dialetana mai eteipe ruawantoipona, dia. Sa baiwa no Tatamba Iesu Keriso ebowe badowa dialeitana mo mida epe dewantoia emona, mai do deaitana, dia.  
\v 7 Ipawa e ateiten dima no dewasatano ewalana e dewasana rua. No e do wainitana walamawe mai nola sawantepe etedabuantepona,  
\v 8 ita do apana nanau mai di nakoantepona, dia. Tane no tadina ita walama nuamba pokaida do badowa nolanten, mai mida e bedelawo no saimba da wadapona, dia.  
\v 9 No Gagalo euda amonantena baiwa dima osowe wampona saiwa e osolawo itupona rua. Tane no mai epe dewasapona, ipawa no menanena eueuwa euda dewasato e ewane ruawaitana baiwa.  
\v 10 Walamaipa no e do wainite no ema epe dialeite waitanase, “Apana mida nola etedabualempa, me mai nana da wanapuo napi, dia.”   
\p
\v 11 No etatana sumanai sosola isiwa e bedelawo nola sawantoie mai dima dewasaipona, di antoie sosou nolau bedewe surakaumoie lai. Sa baiwa no epe waitana.  
\v 12 Apana inainambu ema ruau no Tatamba Iesu Keriso ebowa mampe badowa waite nuau ituitana \bd mo wanwan rebareba epue ita dima mo muba osowe waimompaa baiwa nolawantompa.\bd*  
\v 13 Tane e sumanai sosomba mai dewa euwa dodomana nolawa etedabuaitane ena, dia.   
\p
\v 14 Naita mida no waeuwamba leta ema bedewe ituite dialeitana mai etepie ruawalepia, me ewanadoe enaiana, mai do deaitana. Epe dewasano me ewepie malalepi.  
\v 15 Ita e mai me wenawenala rua dewasana, tane sumanai sosola isiwa ruau me wasausana.   
\p
\v 16 Tatamba, mida wanwan euwa bumpaida walama uduudu ita do dewa uduudu bedewe wanwan euda enalempa. Tatamba Iesu e do wanlempa!   
\p
\v 17 Ne Paul auwana ema neba witanawo girumantedina. Ema epe inta ne letana uduudu bedewe ebona girumantedina ne letana ulaipalempaa baiwa.   
\p
\v 18 No Tatamba Iesu Keriso me nuawadawadawa amonawa e manlawo winompa, niapo!