\id 1JN - Kanasi NT [soq] -Papua New Guinea 1996 (DBL 2014) 
\h 1 Ion 
\toc1 1 Ion Leta bautaa Ion sumanailala mampo girumalena 
\toc2 1 Ion 
\mt1 1 Ion  
\mt2 Leta bautaa Ion sumanailala mampo girumalena  
\c 1  
\p
\v 1-2 \x + \xo 1.1-2 \xt Ion 1.1\x*\x + \xo 1.1-2 \xt Ion 1.14\x*Iesu Keriso bedewe inaida winede. Me bumpeido wandio danawe nitu uduudu segalentuwan. \bd Tane tauma inaida sa God mampe winedia Iesu Keriso bedewe no mainimbo sabamosano wisen.\bd* No me gagalowa wamodio asimboido etatana. Tane do no emamboido me ibuwa ewaidasate ita do me dewawa ewate atenten. Tane mai sa os! No witamboido me etepa wadeite me do wainite leite. Me bedewe inaida winakasala winede.  
\v 3 Sa baiwa dima no e manlawo benemawantitana, sa ipa inaida gagalowa no emambo ewate do asimbo etatana rua waitana. Gagalo ema no benemaleitana e etane no bedemboitano sumanai dea bedewe wantaa baiwa. \bd Tane sumanai bedewe deantata, sa ipa Mamamba God ita Otopa Iesu Keriso do deaidanten.\bd*  
\v 4 No ina gagalowa ema e manlawo girumantitana ewane ateitano no do awodea nuaeu nopeidonempaa baiwa.   
\p
\v 5 Tane benema no God Otopa mampe etate benemaleitana ipa ema epe: \bd God ipa sapa, me bedewe mai dubawa da wineipona, dia.\bd*  
\v 6 Naita no wantaase, “God ipa sapa, ita no me do deaidantene wainitana,” tane dubawa bedewainta antonta, sa ipa no lagantitana ita mai ulaipa dewasaipe eueuwa osowe ituipona, dia.  
\v 7 \bd Tane no sapa bedewainta antonta God sapa bedewe wandia rua, sa ipa no sumanai sosomba do deaidantitana, ita God Otopa Iesu osinawa no kadiwamba uduudu mitaaubamodie eunede.\bd*   
\p
\v 8 Naita no wantaase, “No bedembo mai kadiwa da wineipona,” sa ipa no nuba lagamba waite banlakadisantitana ita ulaipa no bedembo dia.  
\v 9 \bd Tane naita no kadiwamba sabamosate God mampe wawiantata, me sauawa wadepiaitue dewa euwa dodomana dewasapie no kadiwamba insadabuamopi ita dewamba kiokiou mitaaubamopie eunepi.\bd*  
\v 10 Naita no wantaase, “No mai kadiwa da dewasaipe wainipona,” sa ipa no dewasaitana ewaewawa abo God lagawaa rua, do me aiawa mai no bedembo bolawa da wadape wineipona, dia.   
\c 2  
\p
\v 1 Obaina, ne e manlawo letana ema girumantedina e kadiwa mai dewasana baiwa. Tane naita mida kadiwa dewasapia \bd no saumba Iesu Keriso me mida dodomanaida wande. Ita me Mamamba danawe enedie no baimba gagaloleide.\bd*  
\v 2 Iesu Keriso me meba etepa no kadiwamba malesawa itune bolen. \bd Tane mai sa os, dia, me ipa tawo uduudu kadiu malesawa do meba etepa itune en.\bd*   
\p
\v 3 Inta dainea asiasi no atentata no God atenten? Sa ipa \bd no God anaanawa ruawantite onieitadewantitana bedewe sabamosaite atentitana no God ateinimba.\bd*  
\v 4 Tane mida wapiase, “Ne God ateina,” ita God anaanawa wadia mai ruawaleipona, apana sa ipa lagawaa, me bedewe ulaipa mai wineipona, diaida.  
\v 5-6 Tane mida God aiawa ruawaleidia, apana sa ipa God nuawadawadaidasade. Tane apana dainea wapiase, \bd “Ne Keriso nata deantene me bedewe wainedina,” mida epe wampa me ideita Iesu Keriso waina ruawa waimpa.\bd* Ema epe inta no atenten no ipa me bedewentene wainitana.   
\s1 Nuawadawada tontawa sanaaleidia gagalowa  
\p
\v 7 \x + \xo 2.7 \xt Ion 13.34\x*Nuana sosowa, ne mai anaana sanaa e etasiala girumanteipona, dia, tane anaana tontawa girumantedina e manlawo. Anaana ema ipa Gagalo euda e sumanaila bumpeido etale ateitena bedewe winede.  
\v 8 Tane ne ideita anaana ema sanaasadine e manlawo girumantedina. Anaana ne umanawa wadina ipa tontawa, tane Iesu Keriso anaana sa ipawaida sabamosane sanaasan. Anaana ema ipa Keriso bedewe ita do tauma e bedelawo sabamo nolaleidio eweitana, ipawa \bd dubawa lawosalene dialeide, ita sapa aitamana sabamolene sapa wade.\bd*   
\p
\v 9 Apana mida wadiase, “Ne sapa bedewe wainedina,” tane sumanai sosowa nibuamompa, me mapo ita tauma dubawa bedewe wande.  
\v 10 \bd Tane mida sosowaida nuawadawadamompa, me ipa sapa bedewe wande, ita me bedewe mai kadiwa da wineipona sowa da banlepi kadisapio omepi.\bd*  
\v 11 Tane mida sosowa nibuamodia, me dubawa bedewe wandie leide ita mai atenleipona naepe aleide, ipawa dubawa me emawa boden, mai inta ewepia rua, dia.   
\p
\v 12 Obaina, e mida tauma sanaa sumanai bedewe odale wainilana manlawo girumantedina, ipawa e kadila Iesu ebowa mampe insendabuasane mitenauben.   
\p
\v 13 Gomba, e mida sumanaila bedewe badowa eneilana manlawo girumantedina, ipawa me mida bumpeido wandia e ateiten.  
\p Apana sanaa, e mida sumanai intawa awa ateitena manlawo girumantedina, ipawa e kadi mamba Seitan nanausalana.  
\p Obaina, ne girumantedina e manlawo, ipawa e Mamamba ateiten.   
\p
\v 14 Gomba, ne girumantedina e manlawo, ipawa me mida bumpeido wandia e ateiten.  
\p Apana sanaa, ne girumantedina e manlawo, ipawa e mukawaa ita God aiawa e bedelawo winompe nolalempa, ita do e kadi mamba Seitan nanausalana.   
\s1 Mai tawo nuawadawadasane nuala wadepi!  
\p
\v 15 Sumanai sosona, \bd mai tawo ba tawo nituwa da nuawadawadasane nuala wadepi, dia. Ne epe wadina, ipawa mida tawo nuawadawadasampa, me mai Mamamba nuawadawadasaipona, dia.\bd*  
\v 16 Mai tawo nuawadawadasana, ipawa tawo dewawa uduudu, sa ipa ete ewanuauwa, emamba ewanuauwa ita di segarakoakoa ipa mai Mamamba mampea, tane tawo ema mampea.  
\v 17 \bd Tawo ita ewanuauwa nua teiteinala do lawosantone diantoi, tane me mida God insaisawa dewasadia, me inawinakasalawo wankasalepi.\bd*   
\s1 Keriso onawa gagalowa  
\p
\v 18 Obaina, tauma ipa walama ompaida mampentitana. E etale ateiten Keriso onawa iede, tane ne dialedina \bd Keriso onawa uara aitamana seganton. Ema mampe no atentata tauma ipa walama ompaida mampentitana.\bd*  
\v 19 Keriso onawa apanawa ema mai ulaipa mampe no do deantepona, dia, sa baiwa no bedembo nomone antoiena. Naita mo no sosombaidaewo no do wankasantepona, mai nomope antopona, dia. Tane mo bedembo nomone antoiena baiwa eueuwau mampe sabamonton mo uduudu ipa mai no do dea, dia.   
\p
\v 20 Tane e sumanailala ipa mai mo ruau, dia. E God Aleupa kakaiwa Keriso mampe wadale wainilana. Sa baiwa e uduudu ulaipa intawa ateiten.  
\v 21 Ne mai girumanteipona, ipawa e mai ulaipa ateitapona. Sa dia. Ne atenten e ulaipa intawa ateitene wainilana, sa baiwa ne manlawo ema epe girumantedina. Ita do girumantedina, ipawa ulaipa gagalowa bedewe mai laga waeuwa da wineipe noseipona, dia.   
\p
\v 22 Apana inainamba dainea ipa waeuwa lagawaa apanawa? \bd Sa ipa me mida waeuwaleidie wadiase, “Iesu, mida tawo osowe wisena, me ipa mai Keriso God sauawalena, dia, me ipa apanaida os.” Me mida epe wadia, me ipa sa lagawaaida ita Keriso onawa apanawa wande.\bd* Me epe waeuwaleidie mampe Mamamba God ita Otopa do wakoau wadie ipasiamode.  
\v 23 Mida Otopa lagawa wadie wadiase, “Iesu, me ipa mai God Otopa,” me ipa Mamamba do mai wadape mampesapona, dia. \bd Tane mida Otopa wasabamosadie wadiase, “Iesu ipa God Otopa,” me ipa Mamamba do wadene mampesan.\bd*   
\p
\v 24 Sa baiwa e sumanailala ewanadewaitana gagalo inainamba dainea e bumpeido etale wadalana ideita nualawo ituno winompa, mai enaiana! Naita gagalo ema e bedelawo winompa, sa ipa e Otopa ita Mamba do deaitene wainilana.  
\v 25 Tane Keriso no inawinakasala nenepia sauawalena insenuna.   
\p
\v 26 Apana mida e lagalepue banlakadisalepua baiwantoia umanau ema girumantedina e manlawo.  
\v 27 Tane Iesu Keriso Aleu kakaiwa e enalen, ita tauma me e bedelawo wande. Sa baiwa mai apana da waeuwalepia intawa da wineipona, dia, ipawa Aleu kakaiwa dewa uduudu waeuwalempa. Tane dima me e waeuwalempa ipa ulaipa os, mai laga da bedewe wineipona, dia. Sa baiwa Keriso bedewe wanlempa Aleu kakaiwa waeuwalena rua.   
\p
\v 28 \bd Obaina, ne wasauledina e Keriso bedewe wankasaitana, mai ene waeuwa da lagawaa bedeweitana.\bd* E epe dewaitonuna Keriso wiwisa walamawe no mai sa ba mala do me nambanepe enata, dia.  
\v 29 Tane e ateiten Keriso ipa dodomanaida, sa baiwa e do atenla mida dodomana dewasadia, me ipa God otopa wanalene me mampea wande.   
\c 3  
\s1 God obampa mai kadi dewasampa!  
\p
\v 1 \x + \xo 3.1 \xt Ion 1.12\x*God no Mamamba nuawadawada inainamba dainea no baimba dewasana insene asowaida wana! Me nuawadawada ema bedewe no ebomba wane wanase, “Ne obaina!” Me epe wana, sa ipa mai aia os wapona, dia, no ipa me obampaida wainitana! Tane tawo ema osowe no ware rua wainitana, ita tawo no mai ateineipona no apa aitamana God obampa wanantene wainitana. Tawo Keriso mai ewape atensapona baiwa no do ewakoanei.  
\v 2 Nuana sosowa, no aitamana God obampa wanantene wainitana, tane no inainanimba dainea ando wadate uboo wanta, sa ipa tauma walama bedewe mai sabamolepona, dia. \bd No atenten walamaipa Keriso wisepio no meida ruawaidantata, ipawa walama sawo no ibuwaida ewata!\bd*  
\v 3 No insaisamba me bedewe ituitana, sa baiwa no uduudu mida insaisamba epe rua wadeitana kadi uduudu miteitaaubeite euntitana, Keriso meba euda os wandia rua.   
\p
\v 4 Apana mida kadi dewasadia, me ipa God anaanawa ampuiasade. Ne epe wadina, ipawa kadi, sa ipa God anaanawa ampuialala.  
\v 5 \x + \xo 3.5 \xt Ion 1.29\x*E ateiten Keriso tawo osowe wisena apana kadiu awanaaubamopia baiwa, tane me meba bedewe mai kadi da wineipona, diaida.  
\v 6 Sa baiwa me mida Iesu bedewe wandia mai kadi dewasampe waimpa, dia.Tane mida kadi dewasadia, me Iesu mai ewapona ba atensapona, diaida.   
\p
\v 7 Obaina, mai mida eno lagalepie banlakadisalepi! \bd Mida dodomana dewasadia, me ipa dodomanaida wande, Keriso meba dodomanaida wandia rua.\bd*  
\v 8 Apana mida kadi dewasadia, me bumpawa ipa Seitan bedewe winede, ipawa Seitan bumpeido ita tauma kadi dewasade. \bd Tane God Otopa iene wisena Seitan nolawa ipusiamopie diamopia baiwa.\bd*   
\p
\v 9 Sa baiwa apana mida God segasano ina sanaa bedewe mulena me mai kadi dewasampa. Me epe dewalempa, ipawa me God inawawaida waden, ita ina sanaa ema me bedewe winakasalepi. Me mai kadi dewasampaa rua, ipawa God me segasane ina sanaa wanen.  
\v 10 Ema mampe no sabamoido eweitana mida God obampa ita mida Seitan obampa: Apana mida mai dodomana dewasaipona ba sumanai sowaida mai nuawadawadasaipona, me ipa mai God mampea wainipona, dia.   
\s1 Nuwadawadamba ipawaida do dewasantaa gagalowa  
\p
\v 11 \x + \xo 3.11 \xt Ion 13.34\x*Benema ema e bumpeido Gagalo euda benemantoio bedewe etalana ipa ema epe: \bd No sumanai sosomba do eda nuawadawadantipe wainipona!\bd*  
\v 12 \x + \xo 3.12 \xt Bumpai 4.8\x*Mai apana ebowa Kein dewawa ruawaitana, dia. Me bumpawa Seitan bedewe enene meba wambaida obusane epenbolen. Tane dima baiwa Kein ema epe dewalen? Me epe dewalena, ipawa me meba dewawa kadiwa, ita me wamba, mida apana dodomana euda, di bosan.   
\p
\v 13 Sosona, Kein me wamba Abel nibuasana rua tawo ema e nibualempo mai memesaitana, ipawa tawo dewawa winawinapa deawaa dewasade.  
\v 14 \x + \xo 3.14 \xt Ion 5.24\x*Tane no sumanailala ipa mai tawo ema dewawa rua dewasaipe wainipona, dia. \bd No sumanai sosomba nuawadawadamoitana, sa baiwa no atenten no bo etaiate inaida bedewe winene wainitana.\bd* Tane apana mida me sowa mai nuawadawadasaipona, me mapo ita tauma bo bedewe wande.  
\v 15 Apana mida sowaida nibuasadia, sa ipa mida witape sowa bosadia rua. Tane e ateiten mida apana epediboleidia me bedewe mai inawinakasala wineipona, diaida!  
\v 16 Eueuwa ema mampe no nuawadawada ipawaida atentata: \bd Iesu Keriso inawawa no baimba nanalene ene bolen. Deawaa no do inawamba sosomba baibu nanantate eta.\bd*  
\v 17 Tane apana mida tawo puraiwawa mampe wineio ita sowa nuaparelala ewedie, tane nuawa anatedie mai sauwa inseipona, God nuawadawadawa me bedewe tauma ambi winede?  
\v 18 Obaina, no nuawadawadamba mai aia ita gagalo os wanta, tane nuawadawadamba ipawaida do dewasante wainenta!   
\s1 Ambi God danawe enataa gagalowa  
\p
\v 19-20 Sosona, no nuawadawadamba ipawaida do dewasantaa bedewe ewate atentata no ulaipa bedewe wainitana. Naita no kadi mai dewasapona, tane di nuamba wawunempa, no mai ingugurantate nuamba pola wapi, dia. Tane nuamba aiaisiwa God danawe badowa enata, ipawa no atenten no ulaipa bedewe wainitana. No epe dewantonta, ipawa no God sumanaiwantitana. Me dewa uduudu atemba, mai no nuamba rua.  
\v 21 \bd Nuana sosowa, naita nuamba mai wawunempa no dodomana badowa enata God danawe.\bd*  
\v 22 \bd Ita dima uduudu no iririwantata me no nenepio wadata, ipawa me anaanawa wadia no ruawantitana, ita do dima me nuawa eusadia no dewasaitana.\bd*  
\v 23 \x + \xo 3.23 \xt Ion 13.34; 15.12,17\x*\bd Tane God anaanawa ipa ema epe: No me Otopa Iesu Keriso ebowe sumanaintipona ita me wadia rua sosomba da do nuawadawadantipona.\bd*  
\v 24 Apana mida God anaanawa ruawaleidia me ipa God bedewelene wande ita God me bedewe wande. God me Aleupa nenen, sa baiwa no atenten God no bedembolena wankasalepi.   
\c 4  
\s1 Aleu dainea ulaipa ita dainea lagawaa rubumote ewate atenmota  
\p
\v 1 Nuana sosowa, apana uara wimopue wapuase, “No God Aleupa kakaiwa banlanedio me gagalowa waite leitana.” Mo epe wampo, mai tauwadea memesaitane sumanaibuitana, dia. Tane bauta e mo rubumone ewane ateitana, mo ide ulaipa Aleu God mampe wadane gagalontoie lai, ba dia. Ne ema epe wadina, ipawa peroweta lagawaau uara aitamana nomone tawo uduudu bedewe antonatuwaiena.  
\v 2 E mo rubumone ewane ateitana aleu apana bedewe waine banledio gagaloleidia ulaipa God mampea, ba dia. E banuitane donsanadewaitana, ipawa apana ulaipa Aleu God mampe wadena me wasabamoleidie wadiase, “Ne Iesu sumanaiwantedina, me ipa Keriso Inawamba God wanaubeno wisene apanaida etemba wadene no ruambalen.” Apana mida wasabamoleidie epe wadia, me ipa sa Aleu God mampea wadene ulaipa gagalowa benemaleidie leide.  
\v 3 Tane apana mida Iesu wakoasadie wadiase, “Iesu, me mai Keriso Inawamba God wapaaubepono apanaida etemba wadapona, dia,” apana sa mai aleu God mampea wadape nolaleipona, dia. Tane me bedewe aleu da waine banledio nolaleidia, aleu sa ipa Keriso onawa. E etalana wadiase, “Keriso onawa aleupa ando wisepi,” tane aleu sa aitamana tawo osowe wisene nolaleide.   
\p
\v 4 Tane e ne obaina, e bumpala ipa God bedewe winede, ita e mai peroweta ema lagawaau sumanaibuitipona, dia. \bd Tane e mo nanaumolana, ipawa Aleu kakaiwa mida e bedelawo wandia, me ipa mukawaaida, mai aleu lagawaa tawo ema mampea rua.\bd*  
\v 5 Waeuwa apanawa lagawaau mo bumpau ipa tawo ema bedewe winede, sa baiwa mo gagalou uduudu tawo ema mampea waie lai. Ita ema baiwa tawo ema apanawa mo gagalou eteie tauwadea os sumanaibuntoie wauwo antoi.  
\v 6 Tane no aposel, mida Iesu ibuwa ewate do wankasantene me waaubanena, no bumpamba ipa God bedewe winede. Eueuwa ema no ewate atentata mida bedewe ulaipa aleupa wande ita mida bedewe Keriso onawa aleupa wande: Apana mida God atemba me no waeuwamba asisusadie mampesade, tane me mida mai God mampea, me mai no asisuneipona, dia.   
\s1 God ipa nuawadawada  
\p
\v 7 \bd Nuana sosowa, no sumanailala ideita nuawadawadantonta, ipawa nuawadawada bumpawa ipa God bedewe winede.\bd* Sa baiwa mida nuawadawada bedewe wandia, me bumpawa ipa God bedewe, ita me God atemba.  
\v 8 God, me ipa nuawadawada. Sa baiwa apana mida mai nuawadawada bedewe wainipona, me mai God atensapona, dia.  
\v 9 Tane God me nuawadawadawa inta ema inta no baimba sabamosan: \bd Me Otopaida wanaubeno tawo osowe wisene inawawa itune ene bolen, no me bedewe inaida winakasala donsataa baiwa.\bd*  
\v 10 Tane God nuawadawadawa ipawaida ipa ema epe: \bd No mai bauta God nuawadawadasapona, dia, tane me no di nuawadawadanene me Otopa wanaubena bolepi pulo eudida no kadiwamba malesawa ita ema bedewe no dodomananepio God sosowaida wanantataa baiwa.\bd*   
\p
\v 11 Nuana sosowa mida ne nuawadawadaledina, ema insenadewaitana: \bd God nuawa uduudu mampe nuawadawadanen, sa baiwa no do eda nuawadawadantipona.\bd*  
\v 12 \x + \xo 4.12 \xt Ion 1.18\x*Mai mida da God ibuwa ewapona, dia. Tane naita no nuawadawadantonta, ema mampe no sabamosaitana God no bedembolene wande ita me nuawadawadawa no bedembo nolaleide. Ema bedewe God nuawadawadawa ipawaida sabamoleidie sapaidaleidio apana ewei. Sa baiwa no ideita nuawadawadantonte wainenta.   
\p
\v 13 God Aleupa kakaiwa no neneno wadatana mampe no eweite atentitana no aitamana God do deanten ita me bedewe wankasantata, ita God no bedembo wankasalepi.  
\v 14 Tane no aposel Iesu emamboido ewate ita benemawantite waitanase, \bd “God, no Mamamba, me Otopa deaida wanauben tawo ema kadi bedewe inasapie euwa osowe itupia baiwa.”\bd*  
\v 15 Apana mida wasabamoleidie wadiase, “Iesu, me ipa God Otopaida,” me sabamoleide God me bedewe wande ita apana sa God bedewe wande.  
\v 16 Tane no nubaida winene God nuawadawadawa atentene sumanaiwanten. \bd God ipa nuawadawada. Sa baiwa apana mida nuawadawada bedewe wandia, me nuawadawada sa mampe sabamosade me God bedewe wande ita God me bedewe.\bd*   
\p
\v 17 No nuawadawada bedewe wainenta God kotuwa walamawa wisepio mai sawantata, dia. Tane no badowa God danawe enata, ipawa tawo ema osowe no Keriso waina rua wainitana. Ema bedewe no ewate atentata nuawadawada no bedembo inilene ipuipua debamalene sapaidaleide.  
\v 18 Nuawadawada bedewe mai sa da wineipona, dia. Tane nuawadawadaida nuasasana tanedio nosedie aleide. Matangela donsataa baiwa no nuamba saleide. Ita mida nuawa bedewe sa winedia, sa ipa sabamosade me bedewe God nuawadawadawa mai inileipe debamaleipona, dia.   
\p
\v 19 \bd No nuawadawadantitana, ipawa God bauta no nuawadawadanen.\bd*  
\v 20 Tane apana mida wadiase, “Ne God nuawadawadasadina,” tane sowaida nibuasadia, me ipa lagawaaida. Ambi me God ewasiawaia nuawadawadasapi, ipawa me sowaida emawe sabamo ewedia mai nuawadawadasaipona?  
\v 21 \bd Keriso anaana ema no witambosano wadatana: “Me mida God nuawadawadasadia me sowaida do nuawadawadasampe waimpa.”\bd*   
\c 5  
\s1 Ambi tawo nanausataa gagalowa  
\p
\v 1 Mo mida sumanaintoie waiase, “Iesu ipa Keriso God sauawalena,” mo ipa God segamono me obampa wanantona apanawa. Mo mida God obampa wanantona mo Mambu God nuawadawadasai. Tane mo mida me nuawadawadasaia God obampa do nuawadawadamompa.  
\v 2 \bd No God nuawadawadasaitana ita do me anaanawa ruawantitana bedewe ewate atenten no God obampa do nuawadawadamoitana. \bd*  
\v 3 \x + \xo 5.3 \xt Ion 14.15\x*Tane naita no God nuawadawadasanta, sa ipa no me anaanawa ruawantitana bedewe sabamosaitana. Ita me anaanawa ipa mai saibusaibua, dia.  
\v 4 No muka wadatana me anaanawa onietadewantataa baiwa. Ne ema epe wadina, ipawa apana mida God segasano ina sanaa bedewe mulena tawo ema me nanausapia rua. \bd Tane no sumanaimba mampe tawo nanausaitana, mai dima da, dia.\bd*  
\v 5 Mida tawo nanausapia rua? Sa ipa me mida sumanaileidie wadiase, “Iesu me ipa God Otopa.”   
\s1 Nitu natadea benemantoie sabamosai Iesu ipa Keriso  
\p
\v 6 Iesu Keriso me tawo osowe wisene esa mampe babatutulen ita me boleno osinawa do nosen. Sa baiwa me mai esa os do wisepona, dia, tane esa ita osina do wisen. Do God Aleupa meba benemawaleide Iesu me ipa Keriso. Aleu kakaiwa ipa ulaipa, sa baiwa dima Aleu kakaiwa Iesu umanawa benemaleidia bedewe mai laga da wineipona, dia.  
\v 7-8 God Aleupa benemaleide Iesu me ipa Keriso, ita do Iesu Keriso esa mampe babatutulena benemawa, ita do me koros osowe osinawa memenaubena benemawa deawaa waie ulaipasai. Gagalo ema natadea benemau waia ipa dea, mai nambenambe.  
\v 9 No apanaida benemau sumanaiwantitana, tane benema sa mai mukawaa. \bd Tane God meba benemalene sabamosan Iesu ipa me Otopaida. Ita dima God meba benemawaleidia, sa ipa ulaipa pokawaaida, mai apanaida benemau rua.\bd*   
\p
\v 10 Me mida God Otopa bedewe sumanaileidia me meba nuawa bedewe dauwa etedie atenleide Iesu benemawa ema ipa ulaipaida. Apana mida benema ema mai sumanaiwaleipona me dewasadia ewaewawa abo God lagawaa, ipawa dima God me Otopa umanawa benemawalena me mai sumanaiwaleipona, dia.  
\v 11 \x + \xo 5.11 \xt Ion 3.36\x*Benema me wana ipa ema: God no inawinakasala neneno wadate wainitana. \bd Ita inaida ema me Otopa bedewe winede.\bd*   
\p
\v 12 \bd Sa baiwa apana mida God Otopa wadene mampesana, me ipa inaida wadene mampesan.\bd* Tane me mida God Otopa mai wadape mampesapona, me inaida mai wadape mampesapona, diaida.   
\s1 Inawinakasalala gagalowa  
\p
\v 13 E mida God Otopa ebowe sumanaitilana me bedewe inawinakasala wadale manlawosalana, dewa ema e atendewaitana baiwa ne letana ema manlawo girumantedina.  
\v 14 Tane mai sa os, do no raupari baiwa God danawe badowa enonta, ipawa no atenten dima me insaisawa ruawa no iririwantonta me etepie sipoasapi.  
\v 15 Ita no atenten dima no iririwantitana me etede, sa baiwa do ateinimba dima no iririwantena me rua os nenepi.   
\p
\v 16 Naita e soa kadi dewasapio ewaa, tane kadi sa mai soa banlepio bo bedewe alepi, me baiwa God mampe rauparitaa. Ita God me inaida wanepi, ipawa me kadiwa mai banlepio bo bedewe alepi, dia. Tane kadi da apana banlamodio bo bedewe antoi, ne mai waiponase kadi inainamba sa baiwa God mampe rauparitana, dia.  
\v 17 Dewa rebareba kadiwa uduudu ipa kadi. Ita kadi isiwa os apana banlamopuo bo bedewe antopu, tane isiwa dia.   
\p
\v 18 \bd No atenten God obampa uduudu ipa mai kadi dewasampa, ipawa God Otopa mo oniamodie gonaamode ita kadi mamba Seitan mai mo ibubu wadepia rua, dia.\bd*  
\v 19 Do atenten no sumanailala bumpamba ipa God bedewe winede, tane tawo uduudu ipa kadi mamba Seitan atowe winedio oniede.   
\p
\v 20 No atenten God Otopa wisene aten insaisawa euda nenen, sa baiwa no God mida ulaipaida wandia no ewate atensatana. \bd Tane no Godida ita me Otopa Iesu Keriso do deaidantene mo bedeuwontene wainitana. Me ipa Godida ita inawinakasalala.\bd*   
\p
\v 21 Ne obaina mida ne nuawadawadaledina, god lagawaau mampo ewanadewaitana, mai nuala teinepuo wauwoitana, ena.  
\p Ne gagalona kampaida mape dialen, niapo.