\id EPH - Ephesians Saniyo-Hiyewe; Ron Lewis; 4-Jun-2004 
\h EFESUS 
\toc1 EFESUS  Pol One Towe eite Omo Efesus ma'e Lese Ausawi 
\toc2 EFESUS 
\mt1 EFESUS  
\mt2 Pol One Towe eite Omo Efesus ma'e Lese Ausawi  
\is1 Efesus Peri Tutawe  
\ip Pol Rom lo kalabus wesi sahe iroteye su, le one towe hesiyo hesiyo lu taune ma'e lese ausawi. Lu taune omo Efesus iroteye ape mo ma'e, lu taune omo Filipai sahe iroteye ape mo ma'e, lu taune omo Kolosi sahe iroteye ape mo ma'e, sosu le meni Filemon ma'e one towe ta'i lese ausawi.  
\ip Omo Efesus sahe lu taune tomu ne'ese iroteye. Lowe ma'aru, etiri tomu ne'ese iroteye. Omo ape sahe, lu taune ape mo lai menitani god wawero ma'e, iyape Diana au te'e wisereye nine'iteye.  
\ip Omo ape sahe Juda lo lu taune tomu ne'ese iroteye. Sosu aiwawe a'i Grik lo lu taune tomu ne'ese iroteye. Serai Pol lowe werese ma'e au te'e atuatuteye. “Lowe Krais ne tote tawesiyei su, lowe werese Krais lo tahe pa'are ta'i a'i henerairowa. Meni ape Krais, le Meni Owane pihatu henerai. Nomo werese tahe pa'are lo tewi a'i tewi a'i heneraiyei.  
\c 1  
\s1 Peri Tutawe.  
\p
\v 1 Ane Pol, Owane Sitewi lo marepi se, le ane peri lo au te'e fiyariyei ne eimawesawi. Ane lu taune Krais Jisas ne tote tawesisiya su, sosu Krais Jisas lo peri tote umasinamisiya ape, lowe ma'e, omo Efesus sahe irosiya ape, one towe eite fene ma'e lese ausawiyei. \it [Ap 18:19-21; 19:1]\it*  
\v 2 Marepi ano apou ne, sosu Owane Sitewi Owane Sitewi Tai Pefine a'i nomo lo sosu Meni Owane Jisas Krais lai fene ma'e ferafereiyei, sosu marepi fetane a'i lowesi lo aurowa.   
\s1 Nomo Owane Sitewi ma'e au te'e nine'i wisereyete.  
\p
\v 3 Owane Sitewi Pefine a'i, Owane Jisas Krais lo tai, nomo le ma'e au te'e wisereye nine'ite. Krais le nomo ma'e etiri wisere wara'i a'i lo omo hire ma'e irosiya ape, aunamiteye. \it [Ef 2:6]\it*  
\v 4 Tu naifa weriyei weriyei etiri awei pani ariye a'i su, le nomo ta'i ta'i a'i Jisas umasiyei ne ariariyeye. Serene nomo Krais lo marepi tote wawesiyeyei se yo seni aseyaro wara'i a'i umasinamirowa. \it [Jo 15:16]\it*  
\v 5 Le nomo eimane pefine a'i lo heneraiyei ne ariariyeye. Serai le Jisas Krais hi awei ma'e nomo ne eteyei ne eimawesai. Le nomo Owane Sitewi Tai Pefine a'i lo ma'e henetirowa. Le Tai Pefine a'i lo marepi wisere a'i lo umasiyei ne toteye. \it [Jo 1:12]\it*  
\v 6 Sosu nomo Owane Sitewi ma'e au te'e wisereyenamite. Owane Sitewi lai meni eime lo marepi tote wawesiyenamisiya ape, nomo ma'e ferafereiyei lo ape aitai. Le ferafereiyei lo ape nomo ma'e neri a'i auwe.   
\p
\v 7 Krais me tape'i sahe temeniyeye su, le nomo ne ete hene aniyewe, yo seni luwaru a'i nomo lo au ani sasari pamoweye. Serai le nomo ma'e aseyaro a'i au irowe. Serai Owane Sitewi nomo ma'e ferafereiyei pefine a'i lo auwe su, le yo seni luwaru a'i nomo lo tote i'anenamiteye. \it [Ef 2:7; Kl 1:14]\it*  
\v 8-9 Le ferafereiyei lo ape nomo ma'e erasi pefine neri a'i auwe su, le marepi wisere a'i lo se sosu marepi tote so'oruweyei se, le nomo ma'e, marepi fareyareye ape, au atuatu areiyeteye. Tu naifa weriyei le Krais se marepi werese lo nomo ma'e atuatuwei ne toteye. Serai le meni eime lo nomo ne temeniyeyei ne eimawesai. \it [Ro 16:25]\it*  
\v 10 Serai marepi sitewi lo apou a'i ne, Nowe pefine a'i henerairowa su, le marepi werese lo lu taune atuatu areiyerowa. Marepi pefine a'i lo apou a'i ne. Etiri werese hire ma'e irosiya ape, sosu etiri werese hi awei sahe irosiya ape, etiri werese werese lefeifo ta'uwerairowa. Serai Owane Sitewi lai Krais etiri werese lo sitewi pefine a'i au iro henerairowawe, etiri werese au noweinoweirowa. \it [Kl 1:16,20]\it*   
\p
\v 11 Sosu a'i pe Krais se Owane Sitewi lai nomo ariariyeyewe, lu tewi pefine lo henerairowa. Marepi lo apou wou a'i totenamiteye. Sosu Owane Sitewi lai etiri werese marepi ta'i a'i lo umasiyei ne au irowe. \it [Ro 8:28-29]\it*  
\v 12 Serai nomo lu tewi tutawe Owane Sitewi nomo ma'e te'e naneiteye ape, Krais ne ninaweteye. Owane Sitewi lai nomo mitaiyeyei erasi lo ma'e au te'e nine'inamiyei ne ariariyeye.   
\p
\v 13 Fene aiwawe a'i, omo Efesus sahe irosiya ape, fene peri heneruwe wisere a'i ape wanu tote tawesi umasiye su, fene lu tewi pefine lo henerai. Serai Krais fene papu wiye su, Owane Sitewi lai fene ma'e yaru pefine a'i ta au te'e naneiye. Le Hepene Wara'i a'i lo fene ma'e eimawesai.  
\v 14 Sosu fene, Juda lo lu tewi ta'ama ape, fene lu tewi pefine a'i lo ne. Etiri werese ape mo Owane Sitewi lai lu tewi werese lo ma'e au te'e naneiye ape, Hepene Wara'i a'i lo ape lai nomo ma'e peri te'e naneiyei ape mo pefine wiyeme a'i henerairowa ape, au atuaturowa. Serai Hepene Wara'i a'i lo nomo papu wiyei su, nomo Owane Sitewi lo lu tewi pefine henerai ape, nomo yaru amerame a'i sahe mitaiyeyei pefine a'i lo ma'e au te'e wisereyeyei ne aitairowa. \it [2 Ko 1:22]\it*   
\s1 Pol lowe ne Owane Sitewi ma'e ei toweriteye.  
\p
\v 15-16 Fene Owane Sitewi lo lu tewi pefine a'i su, serene ane fene werese ne le ma'e au ei towerinamisiya. Ane le ma'e fene ne au te'e wisereyenamisiya. Fene Meni Owane Jisas ne tote tawesiye su, fene Owane Sitewi lo lu tewi werese tote wawesiyenamiteye. Ane tote tawesiyei fene lo, sosu tote wawesiyeyei fene lo wanuwe su, ane mi mi weriyei fene ne Owane Sitewi ma'e au te'enamiteye.  
\v 17 Mi mi weriyei ane Owane Jisas Krais lo Owane Sitewi pefine ma'e, sosu mitaiyeyei pefine a'i lo sitewi ma'e au ei towerinamisiya. Ane le fene ma'e Hepene Wara'i a'i lo auwei ne ei towerisiya. Le fene ma'e aiyerowa su, le marepi wisere a'i, Owane Sitewi lo marepi siye so'oruweyei ne aurowa. Le marepi werese lo fene ma'e au atuatu tepa'asiye. \it [Kl 1:9]\it*  
\v 18 Ane le ma'e fene lo siye so'oruwenamiyei ape auwei ne ei towerisiya. Sosu fene te'e naneiyei lo ape mo le nomo ma'e auwei ne ariariyeye ape siye so'oruwerowa. Peri te'e naneiyei lo ape mo nomo mi mi weriyei ninawenamisiya. Etiri werese Owane Sitewi lai lu tewi aseyaro lo ma'e aurowa ape, lowe wisere pefine a'i tene. Ane le ma'e apou ei towerinamisiya. Fene etiri ape mo marepi fene lo se siye so'oruwerowa.  
\v 19-20 Ane le ma'e apou ei towerisiya, Nomo le ne tote tawesisiya ape, le kairefiyei lo nomo ne erasi pefine a'i au atuatunamirowa. Owane Sitewi lai Jisas si tame ta'ane norohuwe sineye su, le kairefiyei erasi pefine a'i se au ta'aneye. Kairefiyeyei lo ape aiwawe a'i nomo ma'e au atuatusiya. Kairefiyeyei lo ape se le Meni Owane Jisas yaru eyate feni lo hire ma'e fu onuri. \it [Kl 1:11; Sng 110:1; 2 Ko 13:4; Kl 2:12; Kl 1:16; 2:10]\it*  
\v 21 Owane Sitewi lai Krais meni Owane tutawe iro henerai. Awei lu owane, awei lu owane tutawe, ya'ariyei lu owane werese, lu kairefi a'i se le lai lowe werese hi ani araronamisiya. Etiri werese hi awei sahe irosiya ape, etiri werese mo'o henerairowa ape, Krais lai meni tutawe pefine a'i lowe werese ani araronamitorowa.  
\v 22 Owane Sitewi lai etiri werese werese Krais lo kairefiyei unahi funati. Owane Sitewi aiwawe a'i meni tutawe Krais, etiri werese lo meni tutawe irosiya ape, lu tewi lo ma'e auwe. \it [Sng 8:6]\it*  
\v 23 Lu tewi lo apou a'i ne. Lu taune werese Owane Sitewi lo marepi wanu tote umasisiya ape, lowe Krais lo tahe pa'are henerai. Serai le meni tutawe lowe lo henerai. Krais lai lu taune werese lo marepi hepene papu wi teme'eriyenamisiya. \it [Ef 4:10,15; Ro 12:5; Kl 1:18]\it*   
\c 2  
\s1 Owane Sitewi lai Krais lo hepene norohu a'i nomo ma'e aurowa.  
\p
\v 1 Tu fene yo seni luwaru a'i Owane Sitewi ma'e ironamiteye. Aiwawe a'i yo seni luwaru werese, fene Owane Sitewi ma'e iroteye ape, serai marepi hepene fene lo temeniyeteye.  
\v 2 Ei, tu naifa fene awei lo yo seni umasinamiteye. Fene sepei luwaru a'i tutawe iyape Satan umasinamiteye. Sepei luwaru Satan lai lu taune, Owane Sitewi lo peri arisisiya ape, papu ironamisiya. \it [Kl 3:7; Ta 3:3]\it*  
\v 3 Tu naifa nomo werese marepi arisiyei lowe lo apou ape tote umasiteye. Nomo marepi luwaru a'i nomo lo nine'iyei ne umasinamiteye. Marepi luwaru a'i towafi nomo lo umasiye su, sosu aiwawe a'i tahe pa'are nomo lo yo seni toteye su, nomo yo seni luwaru a'i apou ape umasiteye. Nomo yo seni luwaru a'i apou ape umasiteye su, Owane Sitewi lai nomo ne ai marepi totenamiteye. Nomo lu taune tere'e werese Owane Sitewi lo peri arisiteye ape aiwawe a'i ne! \it [Kl 3:6]\it*  
\v 4 Ahowa, Owane Sitewi lo ferafereiyei wisere erasi a'i tene. Le nomo werese ne marepi erasi a'i tote wawesiyenamisiya.  
\v 5 Nomo yo seni luwaru a'i Owane Sitewi ma'e iroteye su, marepi hepene nomo lo temeniyeye. Ahowa, nomo Krais ne tote tawesi umasiteye su, Owane Sitewi lai marepi hepene he'i a'i nomo ma'e auwe. Owane Sitewi fene ma'e ferafereiyei lo au atuatuwe su, fene marepi hepene temeniyeteye ape, awera'iyenatiyewe, sosu le fene ma'e marepi hepene he'i a'i aunamiye. \it [Kl 1:21; 2:13; Ro 6:13]\it*  
\v 6 Owane Sitewi lai Krais si tame au ani ta'ane norohuwe sineye su, le nomo aiwawe si tame au ani ta'ane norohuwe sineyewe, marepi hepene he'i a'i nomo ma'e auwe. Nomo Krais Jisas papu ironamisiya ape, le nomo yaru Krais mase omo hire ma'e au fu onuwe. \it [Kl 2:12]\it*  
\v 7 Serene mi mi pasi pasi weriyei Owane Sitewi lo ferafereiyei lo erasi pefine wisere a'i au atuatunamitorowa. Le nomo ma'e marepi wisere a'i lo au atuaturowawe, ferafereiyei lo atuatu fiyari areiyenamirowa.  
\v 8 Fene Krais Jisas ne tote tawesi umasisiya su, Owane Sitewi lai fene ma'e ferafereiyei lo ape au atuatuwe. Sosu fene marepi hepene temeniyeteye ape awera'iyenatiyewe, le nomo ma'e marepi hepene he'i a'i aunamiye. Fene marepi hepene he'i aniyei ne ta'anerowata. Ahowa, fene Krais Jisas ne tote tawesi umasisiya su, Owane Sitewi lai fene ma'e neri a'i auwe.  
\v 9-10 Owane Sitewi lai nomo werese au ta'aneye. Nomo Krais Jisas ne tote tawesi umasiyei su, Owane Sitewi lai nomo lu taune he'i a'i au ironamiteye. Serai nomo yo seni wisere aseyaro a'i fa ironamite. Tu naifa le yo seni wisere aseyaro a'i ape mo nomo irorowa ape, le marepi lo se ariariyeyei ne toteye. Nomo ne marepi lo se le apou toteye. Nomo mi mi werese yo seni wisere a'i ape mo fa ironamite. Fene peri ta apou te'erowata. “Ane yo seni aseyaro a'i ironamiteyei su, ane meni aseyaro a'i ne. Ane marepi hepene he'i a'i aniye.” Serai fene marepi kuseriyei owe ape totete. Serai fene iyape towafi fene lo owe ape ei ani arowete. Fene Krais Jisas ne tote tawesiyei su, Owane Sitewi lai marepi hepene he'i a'i fene ma'e neri a'i aurowa. \it [1 Ko 1:29-31; 2 Ti 1:9; Ta 2:14]\it*   
\s1 Krais sahe nomo werese ta'i a'i ne.  
\p
\v 11 Serai etiri ape tote tawesire, mai fene lo auteiye su, fene lu tewi tere'e ma'e fai. Fene Juda lo lu tewi ta'ama. Lu Juda werese lowe mene'e se tahe lowe lo yaru tewi touwe. Serai lowe fene ma'e apou te'eye, “Fene lu tahe yaru tewi tou ta'ame su, fene Juda lo lu ta'ama. Serai fene Owane Sitewi lo lu tewi pefine a'i ta'ama.”  
\v 12 Tu naifa fene Krais eyeri ma'e iroteye. Pani Israel lai omo pani sitewi fene lo ta'ama. Owane Sitewi lai fene ma'e peri te'e naneiyei lo au te'e nanei ta'ame. Ahowa, le Juda lo lu tewi ma'e peri te'e naneiyei werese au te'e naneiteye. Tu naifa fene te'e naneiyei lo ninawe te ta'ame. Tu naifa fene hi awei sahe iroteye ape, fene Owane Sitewi pefine so'oru ta'ama. \it [Kl 1:21; Ro 9:4]\it*  
\v 13 Ahowa, pereye nowe eite se fene Krais Jisas ne nate tawesisiya. Krais me tape'i sahe temeniyeye su, Owane Sitewi lai fene le ma'e atahe a'i henetai. \it [Kl 1:20]\it*  
\v 14 Juda lo lu tewi, sosu lu tewi tere'e lowe ai marepi tote tiyatiteye. Krais a'i lai marepi fetaneyeyei nomo lo ne. Le Juda lo lu tewi, sosu lu tewi tere'e marepi ta'i a'i hene ta'uwe aniye. Fisahe ape peri anowe apou wou a'i, ai marepi totenamiteye. Serai fisahe ape lu tewi werese werese ponei sahe erauwiteye ape, le lai ani erau tapeti fiyarisawi. \it [1 Ko 12:13]\it*  
\v 15 Juda lo yo peri sahe, Moses leseye ape, peri amou tomu ne'ese iroteye. Peri tere'e tomu ne'ese, lu werese fa wanu umasite. Ahowa, Krais yo peri werese ape iro po'utesawi. Krais lo marepi sitewi apou a'i ne. “Ane Juda lo lu tewi sosu lu tewi tere'e lowe lu tewi pefine ta'i he'i a'i hene ta'uwe anirowa.” Serai Krais lai lowe werese ma'e marepi fetane a'i aitairowa. \it [Kl 2:14]\it*  
\v 16 Krais me tape'i sahe temeniyeye su, le lu tewi hesi lo ai marepi tote tiyatinamiteye ape, iro po'utenamiteye. Sosu mo'o le lu tewi hesi a'i ape lu tewi he'i pefine ta'i a'i iro henerai. Le lowesi Owane Sitewi ma'e si henetaiyei ne toteye. Serai le me tape'i sahe temeniyeye su, le lu tewi hesi werese Owane Sitewi ma'e si henetai. \it [Sek 9:10; Kl 1:20,22]\it*  
\v 17 Serene le marepi fetaneyeyei lo peri fene ma'e Owane Sitewi eyeri ma'e iroteye ape, au te'e fiyari areiyeyei ne fai. Sosu aiwawe a'i le marepi fetaneyeyei lo peri Juda lo lu tewi ma'e, Owane Sitewi atahe a'i iroteye ape, au te'e fiyari areiyeyei ne fai. \it [Ais 57:19]\it*  
\v 18 Serene nomo Krais ne tote tawesiyei su, nomo, lu tewi hesi a'i Owane Sitewi lo hepene ta'i se a'i fara'u Owane Sitewi Tai Pefine a'i ma'e aiyerowa.  
\v 19 Serai Owane Sitewi lo nihe se fene ipari lu omo eyeri ma'e fai ape ta'ame ne. Ahowa, fene lu tewi ta'i a'i, lu taune Krais ne tote tawesiteye ape, aiwawe a'i henerai. Fene Owane Sitewi lo lu tewi pefine a'i henerai. \it [Ef 3:6]\it*  
\v 20 Fene Owane Sitewi lo wesi tewi a'i wou henerai. Owane Sitewi lo wesi ape sahe Krais Jisas lai me tou sitewi a'i ne. Sosu lu tamo tu Krais lo peri au te'eteye ape, sosu lu feni pefine a'i lo lowe wesi ape lo me tou tere'e tere'e henerai. \it [1 Ko 3:11]\it*  
\v 21 Serai nomo werese Owane Sitewi lo wesi ape tewi a'i tewi a'i henerai. Owane Sitewi lai nomo werese wesi lo sahe funati. Nomo werese Krais ne tote tawesi umasisiya ape, ta'uweraiyei su, nomo Owane pefine sahe wesi tutawe aseyaro wara'i a'i henerai tepa'asirowa. \it [1 Ko 3:16]\it*  
\v 22 Sosu aiwawe a'i fene, Krais sahe irosiya ape, sosu Juda lo lu tewi Krais sahe irosiya ape, Owane Sitewi lai wesi pefine lo ta'uwe ta'anerowa. Serai le wesi pefine lo ape sahe Hepene Wara'i a'i lo se ironamitorowa. \it [1 Pi 2:5]\it*   
\c 3  
\s1 Owane Sitewi lai Pol lu tewi tere'e ma'e au te'eyei ne eimawesawi.  
\p
\v 1 Sosu a'i pe ane Pol Krais Jisas lo peri ta te'eteye su, lowe ane kalabus wesi ma'e ti tawesisiya. Serai ane fene ma'e, Juda lo yo seni umasi ta'ame ape, au te'esiya. Ane kalabus wesi sahe fene ne au ferafereiyei ne irosiya. \it [Fl 1:7,13]\it*  
\v 2 Fene peri wiyeme a'i eite wanu so'oruwe tepa'asiye. Owane Sitewi lo ferafereiyei se le lai ane wiyawi ape fene ne au pati aniyei ne auwe. \it [Kl 1:25]\it*  
\v 3 Owane Sitewi lai marepi fareyareye a'i lo ane ma'e au atuatu areiyeye. Ane tu fene ma'e marepi tewi a'i lo lese tepa'asiye. \it [Ef 1:9-10; Kl 1:26]\it*  
\v 4 Sosu fene peri ape, ane tu leseye ape, siye te'eye su, sosu fene etiri ape siye so'oruweye. Ane Krais lo marepi pefine a'i, fareyareteye ape, siye so'oruwe tepa'asiye. Peri ano ape wiyeme a'i tene.  
\v 5 Lu taune tu naifa awei sahe iroteye ape, Owane Sitewi lowe ma'e marepi fareyare a'i lo atuatu ta'ame. Ahowa, pereye nowe eite se Owane Sitewi lai Hepene Wara'i a'i lo se au te'eye ape, Krais lo lu feni pefine a'i ma'e sosu lu tamo tu Krais lo peri au te'eteye ape, ma'e marepi fareyare a'i lo au atuatu areiyeteye.  
\v 6 Owane Sitewi lo marepi pefine, fareyareteye ape, apou a'i ne. Lu tewi tere'e Juda lo yo peri umasi ta'ame ape, lowe Krais ne tote tawesirowa su, Owane Sitewi lai lowe ma'e peri te'e naneiyei werese lo aurowawe, lowe ma'e marepi hepene he'i a'i aurowa. Tu naifa le peri te'e naneiyei lo Juda lo lu tewi ma'e auwe. Serai Krais Jisas lo peri heneruwe pefine a'i lowe ma'e au te'e areiyeteye su, lowe lu tewi ta'i pefine a'i Juda lo lu tewi mase aiwawe a'i henerairowa. \it [Ef 2:13,16-19]\it*   
\p
\v 7 Sosu a'i pe Owane Sitewi lai ane ma'e ferafereiyei pefine lo au atuatuwe su, ane wiyawi meni lo peri heneruwe wisere a'i ape au te'eyei ne henerai. Kairefi lo se le ane ma'e ferafereiyei pefine a'i lo ape auwe. \it [Kl 1:25]\it*  
\v 8 Owane Sitewi lo lu tewi werese ne, ane wiyawi meni lowe werese unahi sahe irosiya. Ahowa, Le lai ferafereiyei lo ane ma'e auwe. Wiyawi lo ape, ane le ma'e auwe ape, apou wou a'i ne. Ane lu tewi tere'e ma'e Juda lo yo seni umasi ta'ame ape, au te'e areiyerowa. Krais lo peri heneruwe wisere a'i. Etiri erasi pefine a'i ape ne, nomo siye so'oruwerowata. \it [1 Ko 15:9-10]\it*  
\v 9 Sosu Owane Sitewi lai ane ma'e marepi sitewi fareyare a'i lo lu taune werese ma'e au te'e areiyeyei ne auwe. Nowe tu naifa weriyei weriyei ape se le marepi sitewi pefine a'i lo ape fareyarenamiteye. Owane Sitewi lai awei etiri werese werese a'i ta'aneye.  
\v 10 Marepi lo apou wou a'i ne. “Ane, Owane Sitewi, lu taune werese Krais ne tote tawesi umasirowa ape ne, wiyawi erasi pefine a'i ta'aneteye.” Serai sepei Owane wisere a'i ape mo, sosu lowe werese kairefiyei se hire ma'e irosiya ape, lowe Owane Sitewi lo marepi wisere pefine a'i ape siye so'oruwerowa.  
\v 11 Marepi sitewi lo tu naifa weriyei weriyei iroteye ape, marepi lo pereye nowe eite se irosiya ape, apou aiwawe a'i tene. Krais Jisas Meni Owane Pefine a'i nomo lo hi awei ma'e itorai su, le Owane Sitewi lo marepi pefine a'i ta'ane ironamiteye.  
\v 12 Nomo Krais ne tote tawesi umasiyei su, nomo fara'u Owane Sitewi ma'e aiyerowa. Nomo le ne atoweiyerowata. Sosu nomo so'oruwe tepa'asiye. Le peri werese nomo lo wanu etirowa. \it [Jo 14:6; Ro 5:2]\it*  
\v 13 Sosu ane fene ma'e te'esiya. Ane Krais lo wiyawi fene ne au iroteye. Ane kalabus wesi sahe irosiya su, ane fofowei erasi a'i teriteteye. Serai fene marepi orese a'i ane ne owe ape teritete. Ane fofowei erasi fene ne teriteyei su, ane Owane Sitewi lo iyape ei ani arowerowawe, fene le ne au nine'inamirowa.   
\s1 Pol lu taune ne Owane Sitewi ma'e au te'e towerinamisiya.  
\p
\v 14 Serene, peri ape mo ane tu fene ma'e te'eye ape, ane Owane Sitewi Tai Pefine a'i ma'e lowe uporo ape'i onusiya.  
\v 15 Lu tewi werese omo hire sahe iroteye ape sosu hi awei sahe iroteye ape, lowe iyape towafi lowe lo tai ma'e aniye.  
\v 16 Ane Owane Sitewi Tai Pefine a'i nomo lo ma'e mitaiyeyei pefine a'i irosiya ape, ei towerisiya. Le fene ma'e kairefi lo aurowa. Serai fene marepi kairefi a'i teinamirowa. Le marepi hepene fene lo papu ma'e kairefi lo ape Hepene Wara'i a'i se aurowa.  
\v 17 Aiwawe a'i ane peri tere'e ta le ma'e ei towerisiya. Fene le ne tote tawesi umasisiya su, Krais lai marepi hepene fene lo papu ironamitorowa. Sosu marepi hepene lo sitewi fene lo fa heneraire. Fene lu taune tere'e ne tote wawesiye tiyatinamite. \it [Jo 14:23; Kl 1:23; 2:7]\it*  
\v 18 Sosu ane le ma'e apou ei towerisiya. Fene sosu lu taune werese Krais ne tote tawesisiya ape, aiwawe a'i, Owane Sitewi lai fene werese ma'e kairefiyeyei lo aurowawe, serai fene lai Krais lo tote wawesiyeyei erasi pefine a'i siye so'oruwe areiyenamitorowa. Tote wawesiyeyei lo lai hire pefine ma'e, hi pefine ma'e, Pite a'i pefine ma'e, sosu feni potu hesi pefine ma'e ironamisiya. Ane le ma'e apou ei towerisiya. Fene tote wawesiyeyei lo ape siye so'oruwerowa.  
\v 19 Krais lo marepi tote wawesiyeyei ape lai erasi pefine a'i ironamisiya. Owe meni ta lai tote wawesiyeyei apou ape siye so'oruwerowata. Ahowa, ane le ne apou ei towerisiya. Fene marepi tote wawesiyeyei lo ape siye so'oruwenamitorowa. Fene marepi tote wawesiyeyei lo siye so'oruwerowa su, Owane Sitewi lai fene ma'e marepi werese pefine a'i lo au teme'eriyerowa.   
\p
\v 20-21 Ane Owane Sitewi ma'e au te'e wisereye nine'inamitorowa. Owane Sitewi lo kairefiyeyei marepi hepene nomo lo papu ironamisiya. Etiri werese le irosiya ape, erasi pefine a'i tene. Etiri werese ape mo ne nomo toterowata. Sosu aiwawe a'i etiri werese nomo le ma'e te'e toweriyei su, le erasi pefine a'i ta'anerowa. Nomo kairefi erasi a'i lo ape siye so'oruwerowata. Serai lu taune werese tu naifa Krais ne tote tawesiteye ape, sosu nomo werese le ne tote tawesi umasisiya ape, nomo Krais Jisas lo kairefi se Owane Sitewi lo iyape pefine ape mi mi pasi pasi weriyei se te'e ani arowenamitorowa. Serai ane le ne au te'e nine'i wisereyerowa. Peri ape wiyeme a'i tene!   
\c 4  
\s1 Nomo Krais lo tahe pa'are ta'i a'i ironamisiya.  
\p
\v 1 Ane Meni Owane Pefine ne tote tawesi umasiteye su, lu tamo ane kalabus wesi sahe fu arowe. Serai Owane Sitewi lai fene lu tewi pefine a'i lo heneraiyei ne ariariyeye su, ane fene ma'e eisiya, fene Owane Sitewi lo yo seni wara'i a'i pei umasinamite. \it [Kl 1:10]\it*  
\v 2 Iyape towafi fene lo owe ape ei ani arowete. Ahowa, fene etiri werese sahe eresene a'i ironamite. Lu taune ma'e marepi momotei a'i iro tiyatinamite. Fene Krais lo wawesiyeyei se lu taune werese ma'e au atuatunamite. \it [Kl 3:12-13]\it*  
\v 3 Owane Sitewi lo Hepene Wara'i a'i lai fene werese marepi ta'i a'i au ironamiteye. Serai fene marepi fetane a'i iro tiyatinamite. Marepi fetane a'i ape lai fene werese nate tawesi tiyatinamisiya. \it [Kl 3:14-15]\it*  
\v 4 Owane Sitewi lo lu tewi pefine lo tahe pa'are ta'i a'i tene. Owane Sitewi lo Hepene Wara'i ta'i a'i lai tahe pa'are ape papu ironamisiya. Sosu Owane Sitewi lai fene Krais lo si tame itorairowa ape, ninaweteyei ne ei ariariyeye. Ninaweteyei ape ta'i a'i ne.  
\v 5 Meni Owane Pefine ta'i a'i ne. Nomo werese le ne a'i tote tawesiyei ta'i a'i umasinamiteyei. Sosu aiwawe a'i nomo sa'i se ani huwei su, nomo sa'i se ta'i a'i ani huwei.  
\v 6 Owane Sitewi ta'i a'i ne. Le lu taune werese lo Owane Sitewi Tai Pefine a'i ne. Le etiri werese werese lo sitewi ne. Aiwawe a'i le etiri werese au noweinoweinamisiya. Le etiri werese papu ironamisiya. Serai nomo werese werese marepi ta'i a'i totenamite. \it [1 Ko 12:6]\it*  
\v 7 Krais lai nomo ta'i ta'i ma'e ferafereiyei pefine lo neri a'i auwe. Le marepi lo se nomo ta'i ta'i ma'e etiri tewi a'i ape noneyei ne ariariyeye. \it [Ro 12:3,6]\it*  
\v 8 Serai Owane Sitewi lo one towe sahe apou te'esiya,  
\q1 “Le omo ni'arawe hire ma'e wiye su, le airame tomu ne'ese lo wafei se ereti ti tawesisiya ape, amerame a'i hene aitai. Le lu taune ma'e etiri wisere a'i neri a'i auwe.” \rq Sng 68:18\rq*   
\m
\v 9 Peri ape te'esiya su, “Le omo ni'arawe hire ma'e wiye” peri lo eti piye te'esiya awere? Apou a'i te'esiya, Le tu hi awei ma'e itorai. \it [Jo 3:13]\it*  
\v 10 Serai Jisas hi awei ma'e itorai. Sosu aiwawe a'i meni ape omo ni'arawe hire ma'e wiye ape, le a'i meni ape ne. Le ni'arawe hire ma'e awera'iyenatiyewe, omo hire pefine ma'e wiye. Le hire pefine ma'e wiye su, le etiri werese werese papu wi teme'eriyenamirowa.  
\v 11 Sosu Krais lu taune ma'e etiri wisere a'i ape mo neri a'i auwe. Etiri wisere a'i ape mo kairefi a'i apou a'i ne. Le lu tamo Owane Sitewi lo peri lu taune ma'e au te'e fiyariyei ne ariariyeye (Aposel). Le lu tamo, etiri nowe me'iye su henerairowa ape, au te'e areiyeyei ne ariariyeye (Profet). Le lu tamo, lu feni lo au atuatu ferafereirowa ape, ariariyeye (Pasta). Le, lu taune tamo Owane Sitewi lo peri wiyeme a'i au te'e atuaturowa ape, ariariyeye. \it [1 Ko 12:28]\it*   
\p
\v 12 Krais lai kairefi lo ape lu taune ma'e le ne tote tawesisiya ape, auwe. Kairefi lo ape se, lowe lu taune ma'e au pati ani tiyatiteye. Aiwawe a'i lowe kairefi lo ape se lu taune, le ne tote tawesisiya ape, au kairefiyerowa.  
\v 13 Kairefi lo ape, le nomo ma'e auwe ape, nomo mase ironamirowa. Nowe ape se lu taune werese tote tawesi towafi lowe lo eito aiwawe a'i henerai tepa'asirowa. Lowe werese Owane Sitewi lo meni eime ne eito aiwawe a'i siye so'oruwerowa su, nomo werese ta'i ta'i a'i tote tawesiyei towafi nomo lo erasi pefine a'i henerairowa. Sosu yo seni aseyaro wara'i pefine a'i, Krais papu iro teme'eriyesiya ape, nomo siye umasirowa. Serai nomo Krais aiwawe pefine a'i henerairowa. \it [Kl 1:28]\it*   
\p
\v 14 Serai nomo Krais aiwawe pefine a'i henerairowa su, nomo eimane osu wou ta'ama. Tote tawesiyei nomo lo wai erasi wou ta'ama. Fiyaru lai wai erasi ape ani awetu awetosiya. Peri heneruwe yahowa'i ta lu tamo lai nomo ma'e au atuatu areiyeyei su, nomo fara'u tei kairefiyerowa. Lu ape mo peri heneruwe yahowa'i tote tawesisiya ape, lowe marepi wawero lowe lo lu taune marepi au te'e tatai anirowa. Apou wou fiyaru lai wai erasi ani aweto awetuteye. Sosu lowe marepi wawero a'i lu taune ma'e au te'e arearerowa.  
\v 15 Ahowa, nomo peri wiyeme a'i lo lu taune ne tote wawesiyeyei se au te'e fiyarirowa. Nomo Krais aiwawe a'i henerairowa. Meni ape Krais, le a'i lai sitewi pefine nomo lo ne.  
\v 16 Nomo werese Krais ne tote tawesi umasisiya ape, kairefi lo unahi sahe ironamisiya. Nomo werese ta'i ta'i a'i ta'uwe nate tawesi tiyatisiya. Nomo ta'i ta'i a'i lai lu taune ani pati tiyatisiya. Nomo wiyawi towafi nomo lo irowei su, Owane Sitewi lo lu feni pefine a'i kairefi erasi a'i henerairowa. Sosu nomo werese marepi tote wawesiye tiyatirowa. \it [Kl 1:18; 2:19]\it*   
\s1 Yo seni aseyaro a'i umasinamite.  
\p
\v 17 Ane fene ma'e Meni Owane Pefine lo iyape se au te'esiya. Fene werese weiyai! Lu taune Jisas ne tote tawesiteye ta'ame ape, lowe yo seni luwaru ironamisiya. Serai fene yo seni luwaru a'i apou ape lowe lo owe ape umasite. Marepi lowe lo yahowa'i totesiya. \it [1 Pi 1:14; Ro 1:21]\it*  
\v 18 Lowe Krais lo marepi siye so'oru ta'ama. Lowe apaniye towafi lowe lo au anite tawesisiya. Marepi lowe lo au anite tawesisiya. Serene lowe Krais lo peri wiyeme a'i wanurowata. Serai lowe marepi hepene he'i a'i Owane Sitewi lai ausiya ape, anirowata.  
\v 19 Lowe marepi atoweiye neritaseye te ta'ame. Sosu lowe marepi lowe lo se tafa'e yo seni luwaru a'i ironamisiya. Mi mi weriyei weriyei lowe yo seni luwaru a'i apou ape iroteyei ne totenamisiya. Lowe etiri ma'aru siye wisereyenamisiya.  
\v 20 Ahowa, fene yo seni apou ape tote umasiteye.  
\v 21 Fene peri pefine a'i, Jisas sahe ironamisiya ape, wanu umasiye su, lu tamo fene ma'e yo seni wara'i a'i lo au te'e atuatuwe su, fene Krais ne tote tawesinamisiya.  
\v 22 Lowe fene ma'e peri pefine a'i au atuatuwe su, fene marepi hepene weriyei fa arunatire. Fene aiwawe a'i yo seni luwaru a'i, fene tu naifa ironamiteye ape, fa arunatire. Fene yo seni luwaru a'i ironamiyei su, marepi hepene weriyei aiwawe a'i luwaru erasi pefine a'i henerairowa. Yo seni luwaru a'i lu taune werese ironamisiya ape, yo seni ape lai marepi towafi lowe lo arearenamiteye. \it [Ro 8:13; Kl 3:9]\it*  
\v 23 Ahowa, lu tamo Krais lo peri heneruwe wisere a'i fene ma'e au atuatuteyei su, fene marepi seni fene lo he'i a'i fa heneraire. \it [Ro 12:2]\it*  
\v 24 Marepi hepene he'i a'i, Owane Sitewi lai ta'ane ape, fene ma'e fa heneraire. Marepi hepene he'i a'i ape Owane Sitewi pefine aiwawe wou a'i ne. Le a'i lai meni aseyaro wara'i a'i ne. Yo seni lo wisere a'i tene. Serai fene aiwawe a'i yo seni aseyaro wisere a'i fa heneraire. \it [Stt 1:26; Kl 3:10]\it*   
\p
\v 25 Serene fene mi mi weriyei peri wawero owe ape au te'ete. Nomo werese ta'i ta'i a'i Krais lo lu tewi ta'i a'i ne. Sosu tahe pa'are tewi a'i lo ne. Serai fene peri wiyeme a'i lu taune tere'e ma'e te'e tiyatite. \it [Kl 3:8-9; Sek 8:16]\it*   
\q1
\v 26 “Fene ai marepi toteyei su, yo seni luwaru a'i owe ape irote.” \rq Sng 4:4\rq*  
\m Poweiye itoweriyei su, ai marepi fene lo tote i'ane arunatire. Ai marepi fene lo mase owe ape tote howeite. \it [Je 1:19-20]\it*  
\v 27 Sepei luwaru a'i, iyape Satan, fene au ani luwaruweyei ne totenamisiya. Serene fene yo ta le ma'e fene au luwaruweyei ne owe ape aure!  
\v 28 Meni ta etiri tamo ta'arei aniyei su, le ta'arei lo yo seni fa arunatite. Sosu le wiyawi farere a'i fu ironamite. Le ereti lo se wiyawi ta'anerowa su, le fara'u etiri tamo lu taune ariye a'i ma'e fara'u au isafiye nonetorowa.  
\v 29 Fene peri te'eyei su, peri luwaru a'i owe ape te'ete. Ahowa, lu taune marepi orese se fene peri wisere a'i lowe ma'e au te'ere. Fene peri wisere a'i au te'eyei su, fene tote tawesiyei lowe lo au kairefiyerowa. Sosu lu taune fene lo peri wanuwei su, fene lo peri ape lowe ma'e au pati ferafereirowa. \it [Kl 4:6]\it*  
\v 30 Fene Owane Sitewi lo Hepene Wara'i a'i ape ma'e marepi orese se owe aute. Le fene papu ironamisiya. Fene Krais ne tote tawesiye su, fene Krais mase natenamiteye. Owane Sitewi lai Hepene Wara'i a'i lo fene ma'e auwe. Serai le fene werese mase mi mi weriyei weriyei ironamitorowa. Le lai fene Krais mase wafei wou ti nate tawesinamisiya. Serai nowe ye'ewi se, Jisas si tame itorairowa su, lu taune le fisa'i lo se eteye ape, le omo hire ma'e hene wirowa. \it [Ais 63:10; 1 Te 5:19; Ef 1:13-14]\it*  
\v 31 Fene ai marepi orese a'i owe ape totenamite. Aiwawe fene ai peri erasi owe ape au te'ete. Fene lu taune ma'e ai marepi fene lo owe ape au atuatunamite. Fene peri erasi ai marepi se owe ape hare te'ete. Fene peri luwaru a'i lu taune ma'e au luwaruweyei ne owe ape te'ete. Sosu aiwawe a'i fene yo seni luwaru a'i owe ape ironamite. \it [Kl 3:8]\it*  
\v 32 Fene marepi wisere a'i Owane Sitewi lo lu taune ma'e iro tiyatinamite. Lowe ma'e marepi tote wawesiye tiyatinamite. Owane Sitewi lai Krais se yo seni luwaru a'i fene lo tote i'aneyewe, ani sasarisawi. Serene lu taune tamo fene ma'e au luwaruweyei su, fene yo seni luwaru a'i lowe lo fa tote i'anenamite. \it [Mt 6:14; 18:22-35; Kl 3:12-13]\it*   
\c 5  
\s1 Mi mi werese Owane Sitewi lo yo seni wara'i a'i umasinamite.  
\p
\v 1 Fene Owane Sitewi lo eimane pefine a'i ne. Le fene marepi erasi a'i tote wawesiyenamisiya. Serene Owane Sitewi lo yo seni werese ne, fene lai yo seni apou aiwawe umasinamite. \it [Mt 5:48]\it*  
\v 2 Mi mi weriyei lu taune ma'e marepi wawesiyeyei au atuatunamite. Krais nomo ma'e marepi erasi a'i tote wawesiyeteye su, fene lu taune tere'e ma'e tote wawesiyenamite. Krais lai nomo ne au temeniyeye. Le me tape'i sahe temeniyeye su, le Owane Sitewi lo au heseyei heneri wisere a'i le ma'e henerai. Serai Owane Sitewi le ne marepi wisereye nine'inamisiya. \it [Hi 10:10; Kis 29:18]\it*  
\v 3 Tafa'e yo seni luwaru a'i fene mase owe ape ironamite. Aiwawe a'i fene yo seni unou a'i apou ape owe ironamite. Fene etiri werese owe ape siye wisereyenamite. Owane Sitewi lo lu tewi pefine a'i etiri werese apou ape mo, lowe fa owe ape irote. Etiri werese ape mo luwaru a'i tene.  
\v 4 Aiwawe a'i fene peri luwaru a'i owe ape te'enamite. Fene peri meremereye a'i owe ape te'ete. Peri neritase luwaru a'i owe ape te'ete. Ahowa, fene mi mi weriyei Owane Sitewi ma'e au te'e wisereyenamite.  
\v 5 Peri ano wanu etite. Peri ano wiyeme a'i tene. Owe meni ta tafa'e yo seni luwaru a'i irowei su, le Krais, sosu Owane Sitewi lo omo sahe yaru topo lo wi onurowata. Aiwawe a'i lu taune ta yo seni unou a'i irowei su, etiri ma'aru siye wisereyeyei su, lowe Owane Sitewi lo omo hire ma'e siyerirowata. Meni ta etiri ma'aru siye wisereyeyei su, le god wawero ne au te'e nine'i wisereyerowa. \it [1 Ko 6:9-10; Kl 3:5]\it*  
\v 6 Lu tamo peri yahowa'i fene ma'e owe ape te'e arearete. Peri yahowa'i a'i ape mo ne, Owane Sitewi lo ai peri erasi lu taune ma'e, peri lowe lo umasisiya ape, itorai. \it [Kl 2:4,8; Ro 1:18]\it*  
\v 7 Serai fene peri wawero werese a'i lowe lo owe ape wanu umasinamite.  
\v 8 Tu naifa fene yo seni luwaru a'i ironamiteye.  
\m Serene fene pasi a'i marepi hepene fene lo papu teme'eriyeteye. Ahowa, pereye fene meni owane pefine ne tote tawesi umasisiya su, Owane Sitewi lo mitaiyeyei erasi marepi hepene fene lo papu au teme'eriyenamisiya. Serene fene yo seni aseyaro a'i fa umasinamite. Fene Owane Sitewi lo eimane pefine a'i mitaiyeyei lo umasisiya ape wou heneraire. \it [Kl 1:13; 1 Pi 2:9; Jo 12:36]\it*  
\v 9 Mitaiyeyei ape papu etiri hesi heta irosiya. Etiri wisere werese a'i ne, sosu yo seni wara'i a'i ne, sosu peri wiyeme a'i ne.  
\v 10 Etiri werese ape ne fene Meni Owane Pefine marepi au nine'isiya ape, fene siye so'oruwete. Serai fene etiri ape mo ironamite.  
\v 11 Yo seni luwaru a'i ape mo lu taune pasi a'i se irosiya ape, fene owe ape ironamite. Ahowa, fene yo seni luwaru a'i ape mo amerame a'i au te'e areiyete.  
\v 12 Yo seni luwaru a'i ape mo ne, lu taune eresene a'i fareyare irosiya ape, fene owe ape te'e tiyatite. Peri apou ape neritase a'i tene!  
\v 13 Ahowa, mitaiyeyei ape henerairowa su, etiri werese amerame a'i henerairowa. Etiri werese fene siyesiya ape, mitaiyeyei ape sahe heneraisiya. \it [Jo 3:20-21]\it*  
\v 14 Serene Owane Sitewi lo peri apou te'esiya,  
\q1 “Fene nihe howeisiya ape, nihe petenere. Fene temeniyesiya ape, si norohuwe sinere! Sosu Krais fene ma'e tei mitaiyerowa.” \rq Ais 26:19\rq*   
\m
\v 15 Serai etiri werese fene irowei ape, Weiyai! Etiri ape mo lu taune marepi luwaru a'i se irosiya ape, fene etiri apou ape owe ape ironamite. Ahowa, fene yo seni farere a'i tote umasinamite. Lu taune marepi wisere a'i totesiya ape, lowe yo seni aseyaro wara'i a'i ironamisiya.  
\v 16 Nowe mi mi werese lu taune yo seni luwaru a'i ironamisiya. Serene fene yo seni luwaru werese a'i fa arunatite. Sosu yo seni aseyaro a'i ironamite. \it [Kl 4:5]\it*  
\v 17 Serai fene marepi meremereye a'i owe ape irote. Ahowa, Meni Owane Pefine lo marepi werese a'i fene lai fa siye so'oruwete.  
\v 18 Sa'i meremereye a'i owe ape a teme'eriyenamite. Fene sa'i meremereye a'i anamiyei su, yo seni fene lo aiwawe a'i meremereye a'i henerairowa. Sa'i meremereye a'i lai marepi hepene fene lo au luwaruwerowa. Ahowa, fene Owane Sitewi lo Hepene Wara'i a'i marepi hepene fene lo papu fa wi teme'eriyenamite. \it [Lu 21:34]\it*  
\v 19 Fene yakowei ahi apou ape au te'e nine'i tiyatite. Peri nine'i ape mo meni owane tutawe, Devit, Owane Sitewi ma'e leseye ape, au te'e nine'ite. Yakowei ahi tamo marepi hepene aseyaro a'i papu irosiya ape, te'e tiyatite. Aiwawe a'i yakowei ahi Owane Sitewi lo Hepene fene ma'e auwe ape, au te'e tiyatite. Fene no'u nine'iyei ape marepi fene lo papu Meni Owane Pefine ma'e au te'enamite. \it [Kl 3:16]\it*  
\v 20 Meni Owane Jisas Krais lo iyape se, mi mi weriyei Owane Sitewi Owane Sitewi Tai Pefine a'i ma'e etiri werese werese au te'e wisereyenamite. \it [Kl 3:17]\it*  
\v 21 Fene Krais ne marepi erasi a'i tote wisereyesiya. Serene fene lu taune marepi ta'i a'i totenamite. \it [1 Pi 5:5]\it*   
\s1 Lu taune ma'e naitusiya ape, ane fene ma'e te'esiya.  
\p
\v 22 Taune, fene Meni Owane Pefine tote umasisiya ape, fene meni towafi fene lo saro unahi ironamite. \it [Kl 3:18; 1 Pi 3:1]\it*  
\v 23 Krais lai lu tewi pefine a'i lo sitewi ironamisiya. Apou aiwawe a'i meni ta tani lo sitewi ironamisiya. Lu tewi pefine a'i lo lai Krais lo tahe pa'are ne. Le lu tewi pefine a'i lo marepi hepene he'i a'i auwe. \it [1 Ko 11:3; Ef 1:22]\it*  
\v 24 Lu taune Krais ne tote tawesisiya ape lowe kairefi lo unahi ironamisiya. Serene aiwawe a'i taune, fene meni towafi fene lo etiri werese se saro unahi ironamite.   
\p
\v 25 Ane lu ma'e taune naitusiya ape, au te'esiya. Krais lai lu tewi pefine a'i ne au temeniyeye. Serene le lowe ne marepi erasi a'i tote wawesiyenamisiya. Fene taune fene lo ne a'i marepi tote wawesiyenamite. \it [Kl 3:19; 1 Pi 3:7]\it*  
\v 26 Le lu tewi pefine lo ne aseyaro wara'i a'i irowei ne temeniyeye. Serene nomo yo seni luwaru a'i arunatiyewe, yo seni aseyaro a'i ironamisiya. Krais lai Owane Sitewi lo peri pefine a'i se lu tewi pefine lo au ani aseyaroweye. Apou wou a'i meni ta sa'i se ani huwe. \it [Ta 3:5]\it*  
\v 27 Krais lu tewi pefine lo ne temeniyeye su, le lu taune le ne tote tawesisiya ape, le ma'e ta'uwe hene anirowa. Lu tewi pefine a'i lo tani naituwei lo wou a'i ne. Tani naituwei lo mitaiyeyei erasi a'i henerairowa. Le yo seni marepi luwaru a'i apou ape irorowata. Ahowa, le yo seni marepi aseyaro wara'i a'i ironamitorowa. \it [2 Ko 11:2; Kl 1:22]\it*  
\v 28 Serene lu werese taune towafi lowe lo ma'e marepi erasi a'i apou aiwawe a'i tote wawesiyenamite. Lowe taune towafi lowe lo ma'e tahe pa'are towafi lowe lo aiwawe a'i tote wawesiyesiya. Meni ta ape tani lo tote wawesiyesiya ape, le tahe pa'are topo lo aiwawe a'i tote wawesiyesiya.  
\v 29 Owe meni ta lai tahe pa'are topo lo ai marepi totenamirowata. Ahowa, le tahe pa'are topo lo au noweinoweinamirowa. Le aiwawe a'i ayei ta tahe pa'are au ene arowa. Sosu apou aiwawe a'i Krais lai lu tewi pefine a'i lo ma'e au noweinoweinamirowa.  
\v 30 Serai nomo werese ta'i ta'i tewi a'i tahe pa'are lo irosiya su, le nomo ne au noweinoweinamisiya.  
\v 31 Owane Sitewi lo one towe apou te'esiya.  
\q1 “Serai meni ta tai mai topo lo arunatirowawe, tani topo lo ma'e nate tawesi naiturowa. Lowesi tahe pa'are ta'i a'i henerairowa.” \rq Stt 2:24\rq*   
\m
\v 32 Peri ape fareyareteye ape erasi pefine a'i henerai. Wanu etire! Peri pefine a'i ape ane fene ma'e au te'esiya ape apou a'i ne. Lu tewi pefine a'i lo, lowe Krais lo tahe pa'are pefine a'i ne. \it [KTH 19:7]\it*  
\v 33 Ahowa, fene werese ta'i ta'i tani towafi fene lo ma'e marepi erasi a'i tote wawesiyenamite. Le tahe pa'are topo lo ma'e tote wawesiyesiya ape aiwawe a'i ne. Sosu aiwawe a'i tani lo lai meni topo lo ne erasi a'i fa tote wisereyenamite.   
\c 6  
\s1 Ane eimane, mai tai aiwawe a'i ma'e te'esiya.  
\p
\v 1 Ane eimane werese ma'e te'esiya. Fene Meni Owane Pefine tote tawesisiya ape, tai mai fene lo, lo peri wanu umasite. Fene peri lowesi lo wanu umasiyei su, yo seni fene lo farere a'i ne. \it [Kl 3:20]\it*  
\v 2 Owane Sitewi lo yo peri wiyeme a'i Moses leseye ape apou te'esiya.  
\q1 “Tai mai fene lo, fene iyape lowe lo ei ani arowete.” \rq Kis 20:12\rq*  
\m Owane Sitewi lai yo peri lo ape au te'eye su, le peri te'e naneiyei ta aiwawe te'eye. Le yo peri tutawe lo ape, peri te'e naneiyei ta iroteye ape, au te'eye.  
\v 3 Te'e naneiyei ape apou aiwawe a'i ne.  
\q1 “Fene tai mai lo peri wanu umasiyei su, etiri werese fene irowei ape, wisere a'i henerairowa. Sosu fene iyu menei tomu ne'ese hi awei sato ironamirowa.” \rq Lo 5:16\rq*   
\p
\v 4 Ane tai ma'e te'esiya. Yo seni luwaru a'i eimane fene lo ma'e owe ape irote. Serai lowe fene ma'e ai marepi toterowa. Ahowa, fene meni owane pefine lo marepi umasinamite. Fene Meni Owane Pefine lo marepi umasiyei su, fene eimane fene lo ma'e yo seni aseyaro a'i au atuatu areiyerowa. Fene lowe ma'e yo seni aseyaro a'i atuatuteyei su, lowe yo seni aseyaro a'i fene lo siye tote umasirowa. \it [Kl 3:21; Sng 78:4; Snd 22:6]\it*   
\s1 Ane wiyawi yahowa'i lu ma'e au te'esiya.  
\p
\v 5 Ane wiyawi yahowa'i ta'ane siye lu ma'e te'esiya. Fene hi awei sato irosiya su, fene meni owane fene lo, lo peri wanu umasinamite. Fene peri lowe lo arisiyei su, lowe fene ne ai marepi toterowa. Serai fene lowe ne erasi a'i auseriye atoweiyerowa. Fene wiyawi lowe lo ta'aneyei su, fene wiyawi lowe lo ape marepi pefine a'i se fa ta'anete. Apou aiwawe a'i fene Krais lo wiyawi ta'anerowa. \it [Kl 3:22-23; Ta 2:9-10; 1 Pi 2:18]\it*  
\v 6 Wiyawi werese ape fene meni owane fene lo ne, irowei ape, wiyawi wisere pefine a'i ironamite. Le fene siyeteyei su, fene wiyawi wisere a'i irote. Aiwawe a'i le eyeri ma'e iyei su, ne wiyawi onota'ano a'i owe ape ironamite. Fene Krais lo peri wanu umasisiya su, fene Krais lo wiyawi yahowa'i ta'ane siye lu henerai. Serai fene Owane Sitewi lo marepi wanu umasite. Marepi kairefi a'i fene lo se, fene Owane Sitewi lo marepi umasinamite.  
\v 7 Fene wiyawi fene lo ta'aneteyei su, fene marepi nine'i wisereyete. Fene wiyawi ta'aneteyei su, fene apou totete. “Ane Meni Owane Pefine ne wiyawi ape au ta'aneteyei. Ane wiyawi ta'aneteyei su, ane wiyawi ape lu tamo ma'e au nine'iyei ne ta'anerowata.”  
\v 8 Fene etiri ape apou siye so'oruwesiya. Meni Owane Pefine lai lu taune werese ma'e wiyawi wisere a'i iroteye ape, le etiri wisere a'i ta lowe ma'e itiya'u aurowa. Wiyawi yahowa'i ta'ane siye lu, sosu lu taune tere'e ma'e le lowe ma'e aiwawe a'i aurowa. \it [2 Ko 5:10; Kl 3:24-25]\it*   
\s1 Wiyawi yahowa'i siye lu lo owane ma'e au te'esiya.  
\p
\v 9 Lu owane, ane peri ta fene ma'e te'esiya. Apou aiwawe a'i fene wiyawi yahowa'i ta'ane siye lu fene lo ma'e yo seni wisere a'i ironamite. Fene lowe ma'e owe ape au te'e atoweiyete. Fene peri ape so'oruwe tepa'asiye. Meni owane fene lo omo hire ma'e irosiya. Sosu wiyawi yahowa'i ta'ane siye lu lo Meni Owane Pefine aiwawe a'i omo hire ma'e irosiya. Meni Owane Pefine ape lu taune werese werese a'i ma'e yo seni ta'i aiwawe a'i au atuatunamisiya. \it [Kl 4:1; Ro 2:11]\it*   
\s1 Fene ai atu lo ipari tahe kairefi a'i ani asite.  
\p
\v 10 Peri ye'ewi ane fene ma'e eisiya. Meni Owane Pefine sahe tei kairefiyete. Kairefi erasi pefine a'i lo se, fene tei kairefiyete.  
\v 11 Owane Sitewi lo ai atuwei lo ipari tahe werese ani asire. Fene Owane Sitewi lo ai atuwei lo ipari tahe ani asiyei su, fene fara'u sepei Satan lo marepi areareye ape ma'e ai atu tiyatirowa. \it [Ro 13:12; 2 Ko 10:4]\it*  
\v 12 Nomo ai atuwei su, nomo awei lo lu se ai atu tiyati ta'ame. Ahowa, nomo sepei kairefi luwaru werese a'i mo ma'e ai atu tiyatinamisiya. Sosu sepei Satan lo lu feni pasi a'i ironamisiya ape, nomo lowe ma'e ai atu tiyatisiya. Aiwawe a'i nomo sepei kairefi werese a'i ma'e, marepi luwaru a'i ironamisiya ape, ai atu tiyatinamisiya. \it [1 Pi 5:8-9]\it*  
\v 13 Serene fene Owane Sitewi lo ai atuwei lo ipari tahe kairefi werese a'i fa ani asinamite. Serai nowe luwaru a'i ape henerairowa su, fene fara'u tei kairefiyenamirowa. Sosu fene ai atuwei ape tepa'asiyei su, fene saro a'i tei kairefiyenamirowa.  
\v 14 Serai fene tei kairefiyenamite. Lire fene lo lire wafei se ti tawesire. Lire wafei ape apou aiwawe a'i peri pefine a'i ne. Metete fene lo sahe uperi ta ani asire. Uperi ape apou aiwawe a'i yo seni aseyaro a'i ne. \it [Ais 11:5; 59:17; 1 Te 5:8]\it*  
\v 15 Lowe tahe lowe fene lo sahe ani asire. Lowe tahe ape apou aiwawe a'i ne. Owane Sitewi lo marepi fetane a'i lo peri heneruwe ape lai fene Owane Sitewi lo peri au te'eyei ne au pati anirowa. \it [Ro 10:15]\it*  
\v 16 Ereti fene lo se tiye kairefi a'i anite teite. Tiye ape apou aiwawe a'i ne. Owane Sitewi ne tote tawesiyei ne. Fene tiye ereti fene lo se anite teiyei su, sepei Satan luwaru a'i lai fene ma'e eine yehe werese a'i nei tawesirowata.  
\v 17 Fene Krais ne tote tawesi umasisiya su, Owane Sitewi lai yo seni luwaru werese a'i fene lo au sasari po'utesawi. Marepi hepene he'i a'i fene lo ape, mato sahe ani asire. Mato tuhe kairefi aiwawe a'i ne. Ereti fene lo sahe Owane Sitewi lo Hepene Wara'i a'i lo ipari mene'e pite a'i anitete. Ipari mene'e ape apou aiwawe a'i, Owane Sitewi lo peri pefine werese a'i ne. \it [Hi 4:12]\it*  
\v 18 Mi mi weriyei weriyei Owane Sitewi lo Hepene Wara'i a'i se, fene Owane Sitewi ma'e te'e tiyatinamite. Fene Owane Sitewi ma'e te'e tiyatirowa su, peri tere'e tere'e se au te'e towerite. Etiri ta fene po'uteyei su, fene Owane Sitewi ma'e te'e towerire. Mi mi weriyei fene sepei Satan, weiyai! Fene mi mi weriyei fene owe ape ta'orete. Mi mi weriyei fene Owane Sitewi lo lu tewi pefine a'i ne Owane Sitewi ma'e au te'e towerinamite. \it [Lu 18:1; Kl 4:2; 1 Te 5:17]\it*   
\p
\v 19 Sosu a'i pe fene ane ne Owane Sitewi ma'e te'e towerinamite. Ane Owane Sitewi lo peri au te'e fiyarirowa su, le lai peri wiyeme a'i lo ane ma'e au te'eyei ne aurowa. Serai ane lu taune ma'e Owane Sitewi lo peri heneruwe Krais ne, au te'e areiyerowa. Peri heneruwe lo ape ane au te'erowa su, ane tote atoweiyerowata. \it [Kl 4:3-4; 2 Te 3:1]\it*  
\v 20 Owane Sitewi lai ane ma'e peri heneruwe lo ape au te'e fiyariyei ne ariariyeye. Pereye ane kalabus wesi sahe irosiya. Sosu ane lu taune ma'e Owane Sitewi lo peri au te'esiya. Serai fene ane ne Owane Sitewi ma'e te'e towerite. Sosu ane Owane Sitewi lo peri au te'e fiyariyei su, ane tote atoweiyerowata. Ahowa, ane peri lo au te'e fiyari areiyerowa. \it [2 Ko 5:20; Fm 9]\it*   
\s1 Pol lu taune ma'e au te'e eritesawi.  
\p
\v 21 Ane fene ma'e meni Tikikus eimawesawirowa. Nomo le ne marepi erasi a'i tote wawesiyesiya. Le aiwawe a'i Krais lo lu feni pefine a'i ne. Le mi mi weriyei Meni Owane Pefine lo wiyawi ta'anenamisiya. Le fene ma'e heneriyei su, le etiri werese ne, ane ma'e henerai ape, fene ma'e au te'erowa. Sosu etiri werese ane ta'aneteye ape, fene wanu tote so'oruwerowa. \it [Ap 20:4; Kl 4:7-8; 2 Ti 4:12]\it*  
\v 22 Serene ane meni ape fene ma'e eimawesawirowa. Serai fene etiri werese ane sosu lu feni ano, sahe henerai ape, wanu so'oruwerowa. Aiwawe a'i le lai marepi fene lo ma'e marepi wisere fetane a'i au te'erowa.   
\p
\v 23 Sosu a'i pe ane Owane Sitewi ma'e apou ei towerisiya. Tai, sosu Meni Owane Jisas Krais, lowesi fene ma'e le ne tote tawesisiya ape, marepi fetane a'i sosu tote wawesiyeyei lowesi lo fene ma'e aurowa.  
\v 24 Owane Sitewi lo ferafereiyei lu taune ma'e Owane Jisas Krais nomo lo ne tote wawesiyenamisiya ape, ironamitorowa. Tote wawesiyeyei ape mi mi pasi pasi weriyei luwaruwe po'uterowata. Ane, Pol, one towe eite fene ma'e lese ausawiyei.