\id 2PE - 2 Peter Saniyo-Hiyewe; Ron Lewis; 8-June-2004 
\h 2 PITA 
\toc1 2 Pita  One Towe To'uresi eite Pita lai Lese Ausawi 
\toc2 2 PITA 
\mt1 2 Pita  
\mt2 One Towe To'uresi eite Pita lai Lese Ausawi  
\is1 2 Pita Peri Tutawe  
\ip One towe to'uresi Pita lai lu taune ma'e omo omo tere'e sahe iroteye ape, lese ausawi. Lu taune ape mo Jisas ne tote tawesi umasiteye. Lu tomu ne'ese a'i peri wawero lowe ma'e au te'e fiyariteye. Lowe apou au te'e atuatuteye. “Yo seni luwaru a'i, etiri ape mo wisere wiyeme a'i ne.” Lowe lowe ma'e au te'eye, “Jisas nowe me'iye su, si tame itorairowata.” Ahowa, Pita peri wiyeme a'i lowe ma'e au te'e areiyeteye. Lowe peri wiyeme a'i wanu so'oruweteye su, lowe mi mi weriyei tei kairefiyerowa. Nowe me'iye su Jisas lai hi awei ma'e itorairowa. Ahowa, nowe eite henerai ta'ama. Piyene awere? Le lu taune werese yo seni luwaru a'i towafi lowe lo fa atati arunati ne ninawesiya. Sosu nowe me'iye su, le hi awei ma'e itorairowa.  
\c 1  
\p
\v 1 Ane, Saimon Pita, owane Jisas Krais lo wiyawi yahowa'i ta'ane siye meni. Le lai ane peri lo lu taune ma'e au te'e fiyariyei ne ariariyeye. Ane one towe eite fene ma'e, Jisas ne tote tawesi umasisiya ape, ausawiyei. Tote tawesiyei nomo lo sosu tote tawesi fene lo Owane Sitewi lo nihe se aiwawe a'i ne. Jisas Krais, Owane Sitewi nomo lo sosu meni ape yo seni luwaru a'i au sasari pamoweteye. Marepi hepene he'i a'i auwe ape yo seni wara'i a'i ironamiteye su, fene tote tawesiyei ape aniye.  
\v 2 Fene lai Owane Sitewi, Meni Owane Jisas lowesi aiwawe a'i wanu so'oruwe tepa'asiye su, serai le marepi ferafereiyei lo sosu marepi fetane a'i lo fene ma'e erasi a'i aurowa.   
\s1 Owane Sitewi lai nomo lu tewi lo ariariyeye.  
\p
\v 3 Owane Sitewi lo kairefi wisere erasi a'i ne. Marepi werese lo wara'i a'i sosu wisere a'i ne. Le lai nomo yo seni aseyaro irowei ne ariariyeye. Serai nomo Owane Sitewi lo marepi tote tawesi umasinamiteye. Nowe mi mi werese nomo le ne wanu so'oruweteye. Sosu lu taune werese le ne tote tawesiyei ape, lowe yo seni lo aiwawe a'i irote. Le lai kairefi wisere erasi a'i lo nomo ma'e auwe. Nomo kairefi lo se aniyei su, nomo fara'u yo seni aseyaro ironamiteyei.  
\v 4 Owane Sitewi marepi wara'i wisere a'i ironamitorowa ape, le marepi wara'i wisere a'i lo se le te'e naneiyei erasi pefine a'i lo nomo ma'e auwe. Nomo te'e naneiyei lo ape mo wanu aniyei su, nomo Owane Sitewi mase lefeifonamisiya. Nomo marepi lo apou a'i totenamisiya. Serai awei lo marepi luwaru a'i fene ma'e au luwaruwe po'uterowata.  
\v 5 Fene Owane Sitewi lo marepi wara'i a'i umasisiya su, fene Owane Sitewi ne tote tawesi kairefiye irote. Owane Sitewi ne tote tawesiyei fene lo kairefiye irowei su, fene yo seni wara'i a'i irote. Fene yo seni wara'i a'i irowei su, fene Owane Sitewi lo marepi wanu tote so'oruwete.  
\v 6 Fene Owane Sitewi lo marepi wanu tote so'oruweyei su, fene marepi wisere a'i tote anite tawesite. Sosu fene marepi wisere a'i tote anite tawesirowa su, marepi hepene fene lo kairefi a'i irote. Sosu marepi hepene fene lo kairefi a'i irowei su, fene Owane Sitewi lo yo seni wara'i a'i ironamite. \it [Ga 5:22-23]\it*  
\v 7 Fene Owane Sitewi lo yo seni wara'i a'i umasinamirowa su, fene lu taune werese, Krais ne tote tawesisiya ape, marepi erasi a'i totenamite. Sosu fene lu taune Krais ne tote wawesiyerowa ape, werese marepi erasi a'i totenamirowa su, fene lu taune tere'e werese marepi erasi a'i tote wawesiyenamite.  
\v 8 Yo seni werese ape mo ane fene ma'e au te'eye ape, marepi hepene fene lo papu irosiya su, Owane Sitewi lai etiri ape mo erasi a'i au iro henerairowa. Yo seni apou ape fene papu irosiya ape, marepi fene yahowa'i irorowata. Ahowa, fene wiyawi lo erasi a'i henerairowa. Fene yo seni ape mo umasiyei su, fene Meni Owane Jisas Krais lo yo seni wanu tote so'oruweyei.  
\v 9 Ahowa, lu taune tamo yo seni aseyaro ape mo umasi ta'ame su, lowe meni nihe pokoweyei wou a'i ne. Lowe Owane Sitewi yo seni luwaru a'i lowe lo aseyaro a'i irowe ape, tote i'aneye. Lowe awei lo yo seni luwaru a'i umasinamiteye.   
\p
\v 10 Serai kaiyemo mo ano, fene werese yo seni aseyaro irowei ne irote. Peri ano wanure! Le a'i lai fene ariariyeye. Sosu aiwawe le fene ma'e wiyawi lo aniyei ne ei aniye. Serai fene lu taune ma'e, Owane Sitewi fene ei ariariyeyei ape, au atuatuwei ne tohotete. Fene Owane Sitewi lo marepi wara'i a'i umasiyei su, tote tawesiyei fene lo mi mi werese kairefi a'i ironamirowa.  
\v 11 Aiwawe a'i fene Owane Sitewi lo marepi tote umasinamiyei su, Owane Sitewi lai fene omo hire ma'e hene wiyei. Owane Jisas Krais lai yo seni luwaru werese a'i nomo lo ani pamowe sasariye. Sosu le marepi hepene he'i a'i nomo ma'e auwe. Le a'i lai omo hire ma'e au noweinoweinamirowa.   
\p
\v 12 Sosu a'i pe le fene mase mi mi pasi pasi ironamisiya. Peri ape ane fene ma'e au te'eye ape, fene so'oruwe tepa'asiye. Fene peri wiyeme a'i ape wanu tote tawesi umasinamiteye. Fene peri ape se marepi hepene fene lo kairefi ironamisiya. Ahowa, ane mi mi werese se peri wiyeme a'i ape lo tame te'ereme. Piyene awere? Mi mi weriyei fene peri ape ne marepi erasi a'i totenamite! Serai ane fene ma'e tame te'esiya.  
\v 13 Ane awei sahe hepene se irosiya su, ane mi mi werese fene ma'e peri lo tame au te'eyei. Owane Sitewi lai wiyawi ape ane ma'e auwe. Serai ane marepi lo wanu umasi irote. Ane fene ma'e tame au te'esiya. Serai fene marepi lo tote umasinamite.  
\v 14 Nowe ta ataheyewa. Ane temeniyeyei. Meni Owane Jisas Krais lai ane ma'e temeniyeyei ano ne au te'e atuatu areiyeye. \it [2 Ko 5:1; Jo 21:18-19]\it*  
\v 15 Ane temeniyeyei su, fene peri lo ape tote anite tawesinamite. Serai ane fene ma'e peri lo ape au te'eyei ne ani tohoteyei ne. Fene Jisas lo peri ape fa wanu tote tawesinamite.   
\s1 Nomo Krais lo mitaiyeyei erasi a'i siyeteye  
\p
\v 16 Tu naifa nomo fene ma'e Jisas lo kairefi au te'eteye su, nomo fene ma'e peri wawero, lu tamo te'eteye ape, au te'e ta'ame. Ahowa, nomo Owane Jisas lo si tame itorairowa ape, fene ma'e au te'eye su, nomo fene ma'e au te'e areare se ta'ame. Ahowa, nomo nihe nomo lo se Jisas lo kairefi siyeteye. Owane Sitewi lai Jisas ma'e meni owane tutawe au irowe. Sosu nomo meni owane tutawe ape siye tepa'asiye. \it [Mt 17:1-5]\it*  
\v 17-18 Tu naifa Jisas nomo hesi heta omo wara'i a'i ape hire ma'e heneti. Nomo omo hire sahe onuteye su, Owane Sitewi tai Meni Owane wisere pefine lai meni eime lo iyape erasi wisere a'i ei ani arowewe, peri no'u erasi se apou eiye, “Siyere! Meni eime ano ne. Ane lai le ne marepi erasi a'i tote wawesiyenamisiya. Ane lai le ne marepi wisere a'i totesiya.” Nomo hesi heta omo sahe onuteye su, Owane Sitewi lai peri ape lo au te'eye. Le peri lo ape au te'eye su, nomo hesi heta wanuwe. \it [Mt 17:5]\it*  
\v 19 Nomo etiri ape siyeye su, nomo Owane Sitewi lo peri au te'e siye lu tamo tu naifa weriyei leseye ape, tote anite tawesiye. Nomo fene ma'e peri lo ape au te'esiya. Fene peri lo ape wanu tote tawesire. Peri lo ape yehe erei lo mi erasi wou a'i ne. Fene nowe pasi se yehe erei ereti aniteyei su, fene yo amerame siye umasiyei. Peri lo ape marepi fene lo papu iroteyei su, peri lo ape Owane Sitewi lo yo seni werese ne fene ma'e au pati ferafereiyei. Serai fene peri lo tote umasite. Nowe me'iye su, le si tame itorairowa su, le nowe mitaiyeyei wou a'i ne. Le Owane Sitewi lo marepi fene ma'e au atuatu areiyeyei. Apou wou poweiye wirai su, le pasi a'i fiyari po'uteye. Peri lo ape nomo mi mi werese au pati aniyei. Jisas si tame itorairowa su, nomo le mase mi mi pasi pasi ironamitorowa.  
\v 20-21 Peri ano wanure! Peri ta Owane Sitewi lo au te'e siye lu leseye ape, lowe marepi towafi lowe lo se lese ta'ame. Ahowa, lowe Owane Sitewi lo marepi ape one towe sahe leseye. Serai lu tamo marepi towafi lowe lo au te'erowata. Lowe Owane Sitewi lo marepi fu au te'e fiyariteye. Owane Sitewi lo Hepene Wara'i a'i lowe ma'e Owane Sitewi lo marepi au te'eteye. Lowe Owane Sitewi lo marepi wanuwe su, lowe one towe sahe leseye. \it [2 Ti 3:16; 1 Pi 1:11-12]\it*   
\c 2  
\s1 Lu tamo lai Owane Sitewi lo peri au te'e arearesiya.  
\p
\v 1 Tu naifa Owane Sitewi lo peri au te'e siye lu tamo peri wiyeme a'i au te'eye su, areareyei lu tamo henerai. Lowe god wawero a'i lo peri Israel lo lu taune ma'e au te'eteye. Aiwawe pereye a'i god wawero lo peri au te'e siye lu fene mase heneraiyei. Lowe peri wawero eresene a'i au te'e fareyare atuatusiya. Peri wawero lowe lo Owane Sitewi ne tote tawesiyei fene lo au luwaruweyei. Lowe Meni Owane Pefine a'i me'iyeni ma'e atati tei awetowe. Meni Owane Pefine a'i lai lowe itiya'u au ete tepa'asiye. Ahowa, lowe Meni Owane Pefine a'i me'iyeni ma'e atati awetowe. Lowe yo seni luwaru a'i apou ape iroteye su, nowe ye'ewi se Owane Sitewi lai witane a'i yehe omo ma'e eimawe arosawirowa. \it [Mt 24:11; Ju 4]\it*  
\v 2 Lu taune tomu ne'ese peri wawero lowe lo wanu umasinamiyei. Lowe lu taune ma'e apou au te'e atuatuwei, “Fene tafa'e yo seni fara'u umasi irore.” Lu taune peri lowe lo wanu umasiyei su, marepi lowe lo meremereye a'i heneraiyei. Lu taune tere'e tamo yo seni lowe lo siyeye su, lowe Owane Sitewi lo peri wiyeme hi ani ararorowa.  
\v 3 Lu areare ape mo apou a'i totesiya, “Nomo ma'aru fene lo aniyei ne totesiya.” Lowe fene ma'e peri wawero, marepi topo lo sahe iroteye ape, au te'eyei su, lowe fene ma'e ma'aru ei aniyei. Tu naifa weriyei Owane Sitewi lai marepi apou ape siye so'oruwe tepa'asiye. Le yo seni lowe lo ne apou a'i te'eye. “Lowe yo seni luwaru a'i apou ape irowei su, ane lai yehe omo ma'e eimawe arosawirowa.” Nowe ye'ewi su, le lowe yehe omo ma'e eimawe arosawirowa. Owane Sitewi lai peri te'e nanei au te'e tepa'asiye.   
\p
\v 4 Tu naifa weriyei weriyei Owane Sitewi lo ipari tamo yo seni luwaru a'i Owane Sitewi ma'e irowe. Lowe yo seni luwaru a'i irowe su, Owane Sitewi lai lowe yehe omo ani fu arosawi ereye. Nowe ye'ewi su Owane Sitewi lai sepei luwaru werese a'i au hese ereirowa. \it [Ju 6]\it*  
\v 5 Tu naifa weriyei lu taune werese yo seni luwaru a'i ironamiteye. Meni ta'i iyape Noa, yo seni aseyaro a'i ironamiteye. Le Owane Sitewi lo yo seni wara'i a'i lu taune ma'e au te'e fiyarinamiteye. Lu taune werese Noa lo peri wanu ta'ame su, Owane Sitewi lai lowe werese sa'i sahe atenise tera'e ereye. Owane Sitewi lai Noa ma'e apou eiye, “Ane lu taune werese sa'i sahe ani aporu atenise tera'e ereyei. Ne tani no eimane hesi heta no, eimane lo tani hesi heta ane lai hene ani ferafereirowa.” Owane Sitewi lai sa'i erasi lu taune werese ani aporu atenise temeniyeye su, lu taune ereti feni werese feni hesi heta (8) hene ani ferafereiye. \it [Stt 6-8; 2 Pi 3:6]\it*  
\v 6-7 Aiwawe a'i tu naifa weriyei nowe mo'o tere'e se omo hesi a'i Sodom, sosu Gomora sahe lu taune werese yo seni luwaru a'i ironamiteye. Lowe yo seni luwaru a'i ironamiteye su, Owane Sitewi lai omo hesi ape ma'e yehe erasi a'i eimawe arosai. Yehe erasi ape lu taune werese werese a'i ti sero'o po'uteye. Meni ta'i a'i Owane Sitewi lai omo ape ma'e ei ani hene arosai. Lu taune, omo tere'e tere'e iroteye ape, siyeye su, lowe Owane Sitewi ne atoweiyeye. Serai lowe yo seni luwaru a'i apou ape iro ta'ame. Lowe apou toteye, “Nomo yo seni luwaru a'i irowei su, Owane Sitewi lai nomo aiwawe a'i yehe se ti sero'o po'uteyei.” Meni Lot yo seni aseyaro iroteye ape, lu taune lo tafa'e yo seni luwaru a'i siyeye su, le marepi orese a'i teriteteye. Serai Owane Sitewi lai meni ape omo Sodom nowe ma'e ei hene ani arosai. \it [Stt 19:24; Ju 7; Stt 19:1-16]\it*  
\v 8 Owane Sitewi lai meni ta'i ape yo seni aseyaro ironamiteye ape siyeye. Lu werese yo seni luwaru a'i mi mi werese au ironamiteye. Meni ape, yo peri arisiyei lowe lo ape siyeye su, le marepi orese erasi a'i teritenamiteye. Serai Owane Sitewi lai meni aseyaro ape omo ma'e sahe ei hene ani arosai.  
\v 9 Owane Sitewi Noa sosu Lot hene ani pati ferafereiye su, nomo etiri ta siye so'oruweye. Le fara'u lu taune Owane Sitewi lo marepi umasiteye ape, Owane Sitewi lai lowe au pati ferafereiyei. Lu tamo lowe ma'e au luwaruweyei ne toteyei su, Owane Sitewi lai lowe hene ani pati ferafereirowa. Ahowa, lu taune tere'e yo seni luwaru a'i ironamiteyei ape, sosu lowe Owane Sitewi ne me'iyeni ma'e atati tei awetowei su, le lai lowe ma'e pereye nowe eite se marepi orese a'i ausiya. Sosu nowe ye'ewi se, le lowe yehe omo ma'e eimawe arosawirowa.  
\v 10 Lu taune ape mo tafa'e yo seni mi mi werese ironamisiya su, Owane Sitewi lai ai marepi erasi a'i lowe ne totenamisiya. Aiwawe a'i lowe awei lu owane lo peri arisisiya ape, le lowe ne aiwawe a'i yehe omo ma'e ani fu arosawirowa. Lu taune ape mo apou a'i totesiya, “Owane Sitewi lo peri yahowa'i ne. Ane fara'u peri lo arisiyei.” Lowe marepi towafi lowe lo umasiyei su, lowe tafa'e yo seni mi mi pasi pasi ironamiyei.  
\p Lowe kuseriyei marepi totenamiteye. Lowe Owane Sitewi ne atoweiye ta'ame. Lowe Owane Sitewi lo ipari wisere a'i ma'e peri luwaru a'i te'e naruwei su, lowe Owane Sitewi ne atoweiye ta'ame. \it [Ju 7-8,16]\it*  
\v 11 Lowe Owane Sitewi lo ipari wisere a'i ma'e peri luwaru te'e naruwe su, Owane Sitewi lo ipari lai Meni Owane wiyeme ma'e apou te'e ta'ame, “Lu ape mo luwaru a'i ne.” Lowe te'e ta'ame. Ahowa, Owane Sitewi lo ipari ape mo kairefi a'i ne. Sosu lowe werese lu taune hi ani ararowe. \it [Ju 9]\it*  
\v 12 Peri ano wanure! God wawero peri au te'e siye lu, lowe peri luwaru a'i au te'esiya su, lowe peri sitewi so'oru ta'ama. Lowe fe erauwe wou a'i ne. Lowe lu aiheiye a'i ne. Etiri ape Owane Sitewi lai lowe ma'e irorowa ape, apou wou a'i meni ta ipo ma'e iyei su lowe fe erauwe nehirowawe, eine se nei tera'e temeniyerowa. Aiwawe a'i le peri wawero au te'e siye lu werese a'i nehirowawe, lowe aine tera'e ererowa. \it [Ju 10]\it*   
\p
\v 13 Yo seni luwaru a'i ne, lowe lai lu taune ma'e irowe ape, Owane Sitewi lai etiri fofowei luwaru a'i lowe ma'e itiya'u aurowa. Lu ape mo apou a'i totesiya. “Nomo yo seni luwaru a'i irowei su, nomo nowe mi sahe aiwawe a'i ironamiyei. Nomo yo seni apou ape ne nine'isiya.” Lowe yo seni luwaru a'i irowei su, lu taune tomu ne'ese siyerowawe, iyape fene lo hi ani ararorowa. Lu werese ape mo luwaru a'i ne. Lowe lu taune ma'e peri wawero au te'eyei su, lowe marepi tote nine'iteyei. Lowe fene mase ene ayei su, lowe tote tawesiyei fene lo tatai aniyei ne toteyei.  
\v 14 Lu tewi god wawero lo peri au te'e siye lu, lowe taune werese siye wisereyesiya. Lowe yo seni luwaru a'i mi mi pasi pasi ironamisiya. Lu taune tamo marepi afofoweteye ape, lu areareyei a'i lai marepi lowe lo tatai aninamisiya. Ei, lu tewi ape mo ma'aru lo marepi erasi a'i totenamisiya. Wanure! Lu tewi ape mo luwaru a'i tene. Owane Sitewi lai lowe yehe omo ma'e ani fu arosawirowa.  
\v 15 Lu tewi ape mo Owane Sitewi lo yo wiyeme a'i me'iyeni ma'e atati awetowewe, yo seni luwaru a'i umasinamiteye. Lu tewi ape mo meni Balam apou wou a'i ne. Le Beor lo meni eime ne. Le ma'aru tamo aniteye. Serai tu naifa weriyei meni ape yo seni luwaru a'i ironamiteye su, le luwaru a'i ne nine'iteye. Lu tewi tere'e ape mo yo seni apou ape umasinamiteye. \it [Nam 22:7; Ju 11; KTH 2:14]\it*  
\v 16 Ahowa, meni ape yo seni luwaru a'i ironamiteye su, Owane Sitewi lai fe donki peri te'e ta'ame ape, le ma'e yo seni lo au fareraiyeyei ne eimawesawi. Fe donki ape lai meni lo peri ahi wou a'i le ma'e au te'eye. Fe donki ape apou eiye, “Yo seni no luwaru a'i ne.” Fe donki ape peri lo au te'eye su, meni ape peri lo wanuwe. Le yo seni luwaru a'i arunati. \it [Nam 22:28-35]\it*  
\v 17 Lu tewi ape mo apou a'i sa'i pitomuwe awei sahe heneraisiya. Lowe sa'i pitomuwe, sa'i ariye wou a'i ne. Peri lowe lo lu taune au pati anirowata. Aiwawe a'i lowe sa'i nihari wou a'i ne. Fene sa'i tomu ne'ese hire ma'e siyesiya. Sosu fiyaru erasi heneraiyei su, sa'i nihari fiyari po'uteye. Sa'i itowei ta'ama. Sa'i ape lu taune werese au pati anirowata. Aiwawe a'i peri lowe lo lu taune ma'e au pati anirowata. Owane Sitewi lai lowe ne apou au te'eye, “Nowe ye'ewi su, ane lai lowe yehe omo ma'e ani fu arosawirowa. Sosu lowe omo pasi a'i ma'e mi mi pasi pasi ironamitorowa.” Owane Sitewi omo ape lowe ne au ta'ane naneiye. \it [Ju 12-13]\it*  
\v 18 Lowe peri kuseriyei a'i lu taune ma'e peri ahi a'i se au te'esiya. Lowe lu taune lo marepi tafa'e yo seni ma'e tatai anisiya. Lowe lu taune au te'e pere'eye hawihawiyeteye. Lu taune ape mo tote tawesiyei lowe lo kairefi se ta'ame. Lowe he'i a'i se lu taune yo seni luwaru a'i me'iyeni ma'e atati arunatiteye ape, ahowa, lu tewi areareyei ape mo marepi lowe lo tatai aniteye.  
\v 19 Lowe lu taune ma'e apou te'e naneiteye, “Fene peri nomo lo wanu umasiyei su, nomo marepi fetane a'i fene ma'e auwei.” Peri lowe lo wawero a'i ne. Marepi hepene lowe lo uwase po'ute tepa'asiye. Yo seni luwaru a'i ta meni lo marepi ani fu arowei su, meni ape yo seni luwaru a'i ape awera'iyenatirowata.  
\v 20 Lu taune Meni Owane Jisas Krais lo peri wanu tote tawesiyei su, le lai yo seni luwaru a'i ani sasari pamoweyei. Sosu mo'o lu tewi areareyei ape mo lowe ma'e peri wawero au te'eyei su, lowe yo seni luwaru a'i si tame umasinamiteyei. Lu taune ape mo marepi towafi lowe lo luwaruwe po'uteyei. Pereye marepi lowe lo yo seni luwaru a'i, tu naifa lowe yo seni luwaru a'i umasiteye ape, hi ani ararowe. \it [Mt 12:45]\it*  
\v 21 Lu taune tamo Jisas lo yo seni wara'i a'i so'oru ta'ama ape, Owane Sitewi lai lowe ma'e fofowei oso a'i auwei. Ahowa, lu taune tamo Jisas lo peri lu feni lowe lo ma'e au te'eteye ape, wanuwe su, Lowe mi mi werese Jisas lo yo seni wara'i a'i me'iyeni ma'e atati arunati. Owane Sitewi lai lowe ma'e fofowei erasi luwaru a'i auwei. \it [Lu 12:47-48]\it*  
\v 22 Tu naifa meni ta'i peri wiyeme a'i au te'eye. Le lu tewi ape mo ne toteye. “You ta oriyei su, nowe me'iye su, le oriyei ape ma'e si tame ayei ne aiyerowa.” Sosu peri wiyeme a'i tere'e apou te'esiya.  
\q1 “Meni ta fe neiye sa'i se au huwei su, fe neiye ape lai fe wi sa'i si tame howei apareteye.” \rq Snd 26:11\rq*  
\m Serai lowe yo seni luwaru a'i towafi lowe lo ne marepi erasi a'i nine'inamisiya.   
\c 3  
\s1 Meni Owane wiyeme si tame itorairowa.  
\p
\v 1 Sosu a'i pe kaiyemo mo ano, one towe eite ane fene ma'e au lesesiya ape, one towe to'uresi ne. Marepi sitewi ano apou a'i totesiya. Fene marepi erasi a'i yo seni wara'i a'i ape ne tote etinamite. Ane tu fene ma'e apou au te'eye. Sosu ane fene ma'e tame au te'esiya. Fene peri ano wanu tote tawesi umasite.  
\v 2 Tu naifa weriyei Owane Sitewi lo peri au te'e siye lu aseyaro a'i, lowe Owane Sitewi lo peri lu taune ma'e au te'e fiyariye. Fene Owane Sitewi lo peri ape wanu tepa'asiye. Serai fene peri lowe lo ape tote anite tawesite. Aiwawe a'i lu ape mo, Owane Sitewi ariariyeye ape, le lai lowe Meni Owane Pefine a'i lo peri lu taune ma'e au te'e fiyariyei ne eimawesawi. Fene peri lowe lo wanuwe su, fene Jisas ne tote tawesi umasinamiteye. Serai fene peri lowe lo fu tote anite tawesite. \it [Ju 17]\it*  
\v 3 Wanure! Fene etiri ape wanu so'oruwete. Nowe ye'ewi se lu tamo Owane Sitewi ne peri te'e naruwei ne henerairowa. Lowe marepi luwaru a'i towafi lowe lo tote umasirowa. \it [1 Ti 4:1; Ju 18]\it*  
\v 4 Lowe apou te'erowa, “Krais lai peri te'e naneiyei ta lu taune ma'e au te'eye. Le apou au te'eye, ‘Nowe me'iye su ane meni ta hi awei ma'e si tame itorairowa.’ Lowe apou ei towerisiya. ‘Eiwerou su meni ape itorairowa awere? Krais lai peri wawero nomo ma'e au te'eye. Meni ape hi awei ma'e itorairowata. Tu naifa weriyei Owane Sitewi awei etiri werese au ta'aneye. Nowe mo'o ape se Owane Sitewi lai wiyawi werese ani ta'ame. Sosu pereye nowe eite se awei aite werese nomo lo temeniyeye ape, le aiwawe a'i wiyawi ta'ane ta'ame.’” \it [Mt 24:48]\it*  
\v 5 Peri ape lowe mi mi werese au te'eteye su, lowe etiri tamo marepi tote i'aneye. Tu naifa weriyei weriyei Owane Sitewi lai peri ta au te'eye. Le lai peri te'eye su, sosu etiri werese hire ma'e henerai. Aiwawe a'i le peri ta tame au te'eye su, le awei werese ta'aneye. Le sa'i ei apuweyewe, awei pani wirai. \it [Stt 1:6-9]\it*  
\v 6 Sosu nowe me'iye ta se, lu taune werese yo seni luwaru a'i ironamiteye. Serai Owane Sitewi lai sa'i erasi eimawe arosai. Lu taune werese etiri werese ape mo sa'i papu au luwaruwe po'uterowa. \it [Stt 7:11; 2 Pi 2:5]\it*  
\v 7 Sa'i werese here foro'oweye su, Owane Sitewi apou eiye, “Ane lu taune werese sa'i se tame ani aporu temeniyerowata. Ahowa, etiri werese, hire ma'e irosiya ape, sosu etiri werese awei sahe irosiya ape, ane lai etiri werese ape mo yehe se taiso fu ti sero'o po'uterowa. Nowe ye'ewi su, ane lu taune werese yo seni luwaru a'i ironamiteye ape, yehe se etiri werese ape mo taiso fu ti sero'o po'uterowa.”   
\p
\v 8 Kaiyemo fene peri ano wanu tote tawesire! Owane Pefine a'i lo marepi se nowe ta'i a'i ne iyu menei tomu ne'ese, 1000 aiwawe a'i ne. Sosu iyu menei tomu ne'ese nowe ta'i a'i aiwawe a'i ne. Owane Pefine a'i lo marepi apou a'i totesiya. \it [Sng 90:4]\it*  
\v 9 Lu taune tamo apou totesiya, “Owane Sitewi lo peri te'e naneiyei ape, ‘Ane meni Jisas hi awei ma'e si tame eimawe arosawirowa.’ Le peri ape au te'eye. Ahowa, Le meni ape witane a'i se si tame eimawe arosai ta'ama. Le ninawe momoteiyesiya.” Ahowa, meni Owane Pefine a'i lai fene ne marepi momotei a'i ne. Le lu taune werese ma'e marepi ferafereiyei a'i se au iro ninawe momoteiyesiya. Lu taune yehe omo ma'e irowa su, etiri luwaru a'i ne. Ane lowe yehe omo ma'e iyei wou ta'ama. Le apou eiye, “Ane lowe ne ninawe ninaweteyei. Lowe yo seni luwaru a'i lowe me'iyeni ma'e atati awetowei su, ane lowe ma'e marepi hepene he'i a'i aurowa.” \it [Hab 2:3; 1 Ti 2:4]\it*   
\p
\v 10 Peri ano wanure! Nowe Meni Owane Pefine a'i lu taune au hese ereirowa ape, witane a'i henerairowa. Apou wou a'i ta'arei meni ta pasi etiri fareyare ta'areiyei. Nowe ape henerairowa su, etiri werese ni'arawe hire ma'e irosiya ape, no'u erasi se perati po'uterowa. Sosu awei pani werese yehe ti sero'o po'uterowa. Awei pani werese, etiri werese awei sahe irosiya ape, ti sero'o po'uterowa. \it [Lu 12:39; 1 Te 5:2; Mt 24:29,35]\it*   
\p
\v 11 Owane Sitewi lai etiri werese yehe taiso ti sero'o po'uterowa su, fene piye yo seni, fene lo irosiya ape, totesiya awere? Fene yo seni luwaru a'i ironamiyei su, Owane Sitewi lai fene aiwawe yehe taiso ti sero'o po'uterowa. Serai fene yo seni aseyaro wara'i a'i fu ironamite. Sosu Owane Sitewi lo marepi wara'i a'i umasinamite.  
\v 12 Nowe ape Owane Sitewi ariariyeye ape, Jisas si tame itorairowa ape ne, fene erasi a'i totete. Le witane a'i fu aiyerowa. Fene lai Owane Sitewi lo wiyawi aninamiyei su, Jisas si tame itoraiyei ape, witane a'i aiyerowa. Nowe ape se etiri werese hire ma'e irosiya ape, Owane Sitewi lai yehe taiso ti sero'o po'uterowa. Ni'arawe, yame, eiwariyemi werese lowe taiso fu ti sero'o po'uterowa. Awei etiri werese hi ma'e irorowa ape, yehe taiso fu ti sero'o po'uterowa. Sa'i wou a'i henerairowa.  
\v 13 Tu naifa weriyei Owane Sitewi peri te'e naneiyei ta au te'eye. Le apou eiye, “Ane omo hire ma'e he'i a'i ta'anerowa. Aiwawe a'i ane awei pani hi ma'e he'i a'i ta'anerowa. Omo he'i a'i, hire ta'anerowa ape, sosu awei pani he'i a'i, hi sahe ta'anerowa ape, lu taune yo seni aseyaro ironamirowa ape, saro ironamitorowa.” Nomo nowe ape ne ninawe ninawesiya. \it [Ais 65:17; 66:22; KTH 21:1,27]\it*   
\p
\v 14 Serai kaiyemo mo, fene nowe ape ne ninawesiya su, fene Owane Sitewi ne tote tawesiyei fene lo kairefi a'i teite. Fene yo seni werese fene lo aseyaro wara'i a'i fu ironamite. Fene Krais lo marepi fetane a'i kairefi teite. Meni Owane Pefine a'i si tame itorairowa su, le fene ne marepi wisere a'i totenamirowa.  
\v 15 Wanure! Meni Owane Wiyeme a'i nomo lo lu taune werese ne eresene momotei a'i se ninawesiya. Le lu taune au luwaruwe po'ute wou ta'ama. Ahowa, le lu taune werese marepi hepene he'i a'i aureme. Serai le lowe ne eresene momotei a'i se ninawesiya. Lowe yo seni luwaru a'i me'iyeni ma'e atati tei awetowei su, le lowe ma'e marepi hepene he'i a'i aurowa. Kaiyemo nomo lo, iyape Pol, one towe tamo fene ma'e aiwawe a'i leseye. Owane Sitewi lai le ma'e marepi wisere a'i auwe. \it [Ro 2:4]\it*  
\v 16 Pol fene ma'e apou lese ausawi, “Peri ano ape ane fene ma'e lesesiya. Jisas si tame itorairowa. Fene yo seni luwaru a'i me'iyeni ma'e atati arunatite. Fene Owane Sitewi lo marepi werese tote tawesi umasite.” Pol peri ape mo one towe sahe leseye su, peri lo eti kairefi a'i ne. Peri tamo erasi lo nomo lai wanu so'oruwerowata. Lu taune tamo Pol lo peri, sosu Owane Sitewi lo peri tere'e, atati ani te'e areareteye. Lu taune Owane Sitewi lo marepi siye so'oru ta'ama. Sosu lowe Owane Sitewi ne tote tawesiyei towafi lowe lo kairefi se ta'ama. Serai Owane Sitewi lai lowe werese yehe omo ma'e ani fu arosawirowa.   
\p
\v 17 Sosu kaiyemo mo ano, fene werese peri ano wanure! Fene weiyai! Fene etiri ape mo wanu so'oruwe tepa'asiye. Lu taune tamo fene ma'e peri wawero a'i au te'eyei. Fene peri wawero a'i lowe lo owe ape wanute. Fene peri wawero lowe lo wanu umasiyei su, fene marepi fene lo au luwaruweyei. Fene peri wawero lowe lo ape wanu umasiyei su, tote tawesiyei fene lo winetairowa. Lu taune ape mo, Owane Sitewi lo yo peri he'i a'i tote umasi ta'ame. \it [Mk 13:33; 1 Ko 10:12]\it*  
\v 18 Ahowa, fene Owane Sitewi lo ferafereiyei werese siye etite. Fene Owane Sitewi lo ferafereiye siye te'e etiyei su, fene kairefi a'i teinamirowa. Fene Meni Owane Jisas Krais, nomo ne ani hene anirowa ape, lo yo seni wanu so'oruweyei. Nomo werese le ma'e iyape erasi a'i pei ei ani arowete. Nomo mi mi pasi pasi weriyei iyape lo ei ani arowete. Peri ape wiyeme a'i tene!