\id 1TI - 1 Timothy - SANIYO-HIYEWE - Ron Lewis; 7-June-2004 
\h 1 TIMOTI 
\toc1 1 TIMOTI  Pol One Towe Tutawe eite Timoti ma'e Lese Ausawi 
\toc2 1 TIMOTI 
\mt1 1 TIMOTI  
\mt2 Pol One Towe Tutawe eite Timoti ma'e Lese Ausawi  
\is1 1 Timoti Peri Tutawe  
\ip Meni ape Timoti omo pani Esia ma'e fai. Aite lo omo pani Akaia ma'e fai. Ahowa, mai lo Juda lo menitani. Nowe to'uresi Pol lai lu taune ma'e Jisas lo peri au te'e fiyariteye su, le meni yo'orei ta le ma'e au pati ta'aneyei ne ariariyeye. Pol, sosu Timoti lowesi lu taune ma'e omo pani Galesia, omo pani Masedonia, sosu omo pani Akaia sahe au te'e fiyariteye. Nowe me'iye su, Pol meni Timoti omo Efesus ma'e si tame eimawesawi. Lu taune omo Efesus sahe tote tawesiyei lowe lo pere'eyeye. Timoti omo ape ma'e tote tawesiyei lowe lo au kairefiyeyei ne fi. One towe eite sahe, Pol lai Timoti ma'e peri wisere a'i au te'eteye. Lu Timoti ma'e apou te'eye, “Ne lu tamo yo seni aseyaro a'i au te'e ariariyere. Sosu lowe lai lu taune werese a'i au noweinoweiteye.”  
\c 1  
\p
\v 1 Ane Pol, Owane Sitewi lai ane ariariyeyewe, lu taune ma'e au te'eyei ne eimawesawi. Jisas Krais lo iyape se ane kairefi a'i au te'e fiyarisawi. Owane Sitewi lai yo seni luwaru a'i nomo lo au ani sasari pamoweye ape, sosu Jisas Krais nomo werese si tame aiyerowa ape, nomo lai ninawesiya.   
\p
\v 2 Ane ne, Timoti, ma'e lese ausawiyei. Ne Owane Sitewi lo peri wanu tote tawesi umasiye su, ne a'i lai meni eime wiyeme ano wou henerai. Owane Sitewi, Tai nomo lo, le a'i lai ne ma'e ferafereiyei lo auwei. Le Meni Owane nomo lo, Jisas Krais, aiwawe a'i, ne ma'e marepi fetane a'i auwei. Lowesi ne ne ferafereiyei erasi teritesiya. \it [Ap 16:1-3; Ta 1:4]\it*   
\s1 Nomo werese peri wawero hi ani ararote.  
\p
\v 3 Tu naifa ane ne mase omo Efesus iroteye su, ane ne ma'e peri kairefi a'i se apou te'eye, “Ne Omo Efesus saro irote. Ane Pani Masedonia ma'e iyei ne toteye.” Sosu ane ne ma'e tame eisiya, ne omo ape saro irote. Lu tamo omo Efesus sahe peri wawero au te'e fiyarinamisiya. Ne lai lu ape mo peri wawero lowe lo einamire.  
\v 4 Lowe ya'ariyei peri yahowa'i au te'e fiyariyei su, ne peri lowe lo einamire. Lowe ya'ariyei lo iyape ne totenamiye su, peri ape marepi lowe lo au luwaruwesiya. Lu taune tere'e peri wawero lowe lo wanuwei su, lowe marepi lowe lo meremereye a'i irowei. Peri wawero ape Owane Sitewi lo wiyawi einamisiya. Owane Sitewi lo wiyawi ape apou a'i ne, lu taune Owane Sitewi ne tote tawesiyei. Nomo Owane Sitewi lo wiyawi ta'aneyei su, nomo Owane Sitewi lo wiyawi tote tawesiyei se ta'aneyei. \it [1 Ti 4:7; Ta 1:14]\it*  
\v 5 Peri kairefi a'i ano ape lo sitewi apou a'i te'esiya, Lu taune marepi erasi a'i tote wawesiyenamiyei su, lowe marepi wara'i a'i ironamite. Lowe yo seni aseyaro ironamite. Sosu lowe Owane Sitewi ne tote tawesi umasinamite.  
\v 6 Lu taune tamo peri wawero ape wanuwe su, lowe etiri werese wara'i a'i awera'iyenati. Sosu lowe peri meremereye a'i umasiteye. Serai lowe Owane Sitewi lo marepi nehi siyerowata.  
\v 7 Lu ape mo lowe Owane Sitewi lo marepi au te'e atuatu siye lu heneraiyei ne totesiya. Ahowa, lowe peri towafi lowe lo so'oru ta'ama. Lowe peri kairefi a'i au te'e fiyariye su, lowe peri lowe lo sitewi ape so'oru ta'ama.   
\p
\v 8 Owane Sitewi lo yo peri, Moses ma'e auwe ape, lu taune tamo yo peri ape umasiyei su, yo peri ape wisere a'i tene! \it [Ro 7:12,16]\it*  
\v 9 Sosu a'i pe peri ano wanu etire. Owane Sitewi lo yo werese lu taune werese ma'e au te'e atuatuwei su, Owane Sitewi lo yo peri ape lu taune ma'e, yo seni wara'i a'i irosiya ape, au te'e ta'ame. Ahowa, Owane Sitewi lo yo peri werese lu taune ma'e au te'e atuatuwe su, lu taune yo peri werese me'iyeni ma'e atati aruwe ape, lu taune Owane Sitewi lo peri arisisiya ape, lu taune Owane Sitewi lo yo peri umasi ta'ame ape, lu taune yo seni luwaru a'i umasisiya ape, Owane Sitewi lo yo peri lowe ma'e au te'e atuatuwei. Sosu lu taune Owane Sitewi lo marepi tote tawesi ta'ame ape mo, Owane Sitewi lo yo peri werese lowe ma'e au te'e atuatuwei. Lu taune tai mai lowe lo aine tera'eye su, Owane Sitewi lo yo peri ape lowe ma'e au te'e atuatuwei. Sosu aiwawe lu taune, lu tere'e aine tera'eye, yo peri ape lowe ma'e au te'e atuatuwei.  
\v 10 Sosu lu tamo lai taune tafa'e yo seni luwaru a'i irowe su, Owane Sitewi yo peri lowe ma'e au te'e atuatuwei. Meni ta meni tere'e se tafa'e yo seni irowe su, yo seni lowe lo luwaru a'i ne. Sosu lu tamo lai lu tere'e ma'e au te'e arearesiya ape, sosu lu tamo Owane Sitewi lo peri ma'e au te'e luwaruwsiya ape, serai Owane Sitewi lai yo peri lowe ma'e au te'e atuatusiya. Sosu peri wawero au te'esiya ape, Owane Sitewi lo yo peri lowe ma'e au te'e atuatusiya.  
\v 11 Lu taune ape mo, yo seni luwaru a'i ironamisiya ape, lowe Owane Sitewi lo peri heneruwe wiyeme a'i arisinamisiya. Owane Sitewi yo seni aseyaro wara'i a'i ironamisiya ape, le peri werese lo ane ma'e au te'e fiyariyei ne auwe.   
\s1 Pol Owane Sitewi ma'e au te'e wisereyeye.  
\p
\v 12 Sosu a'i pe ane Jisas Krais Meni Owane nomo lo ma'e au te'e wisereyesiya. Ane wiyawi lo ta'aneyei su, le a'i lai ane ma'e au kairefiyeyei. Le a'i lai ane wiyawi lo ane ma'e au ta'aneyei ne ariariyeye. Sosu le ane ma'e marepi erasi a'i toteye. Serai le ane ma'e eiye, “Ne mi mi werese marepi ano umasinamiteye.” \it [Ap 9:15; Ga 1:15-16; 1 Ko 15:9-10]\it*  
\v 13 Wiyeme a'i! Tu naifa ane nowe tomu ne'ese Owane Sitewi ma'e te'e naruwe. Mi mi tomu ne'ese ane Owane Sitewi lo lu feni aine naye, sosu ane lowe kalabus wesi ma'e heneti. Ane meni ai a'i pefine a'i ne. Ane etiri luwaru a'i ape Owane Sitewi ma'e irowe su, ahowa, le a'i lai marepi erasi a'i ane ne tote wawesiyenamiye. Ane Owane Sitewi lo marepi so'oru ta'ama. Ane marepi wisere a'i umasi ta'ame. Ane Owane Sitewi lo etiri lo sitewi so'oru ta'ama. \it [Ap 8:3; 9:1-5]\it*  
\v 14 Ahowa, Owane Sitewi ferafereiyei lo ane ma'e erasi pefine a'i auwe. Ferafereiyei lo se, ane Krais Jisas ne tote tawesi umasiteye. Ane Krais Jisas tote tawesiye su, ane lu taune werese ne marepi erasi a'i tote wawesiyenamisiya.   
\p
\v 15 Serai ane ne ma'e peri wiyeme a'i au te'eyei. Ne peri ape wanuwei su, ne peri ape tote anite tawesire. Peri ape apou a'i te'esiya, Krais Jisas hi awei sato itorai. Awei sato itorai su, le lu taune werese lo yo seni luwaru a'i au ani sasari pamoweyei ne fai. Etiri luwaru a'i werese ane irowe ape, lu taune werese lo yo seni luwaru a'i hi ani ararowe. Ane meni luwaru a'i pefine a'i ne. \it [Lu 19:10]\it*  
\v 16 Sosu peri ape lo sitewi apou a'i te'eye. Ane meni luwaru pefine a'i ne. Jisas yo seni luwaru werese a'i ano au ani sasari pamoweye su, le ane marepi erasi a'i tote wawesiyesiya. Sosu le a'i lai ane ne marepi momotei a'i toteye. Ane meni luwaru a'i pefine a'i ne. Lu taune tere'e lai Owane Sitewi lo marepi wisere a'i siyeyei su, lowe fara'u Jisas lo marepi umasiyei. Lowe Jisas lo marepi umasiyei su, Owane Sitewi lai marepi hepene he'i a'i mi mi pasi pasi weriyei aunamirowa.  
\v 17 Sosu ane Owane Sitewi ma'e au te'esiya. Ne a'i lai Meni Owane Pefine a'i ne. Ne mi mi pasi pasi ironamitorowa. Ne a'i lai temeniyerowata. Lu taune werese nihari no siyerowata. Ne woto a'i lai Owane Sitewi pefine a'i ne. Ane iyape no ei ani arowesiya. Ane mi mi werese ne ma'e au te'e wisereyesiya. Wiyeme a'i ne!   
\p
\v 18 Sosu a'i pe Timoti ne peri ano wanure. Ne meni eime ano wou a'i ne. Tu naifa meni ta peri wiyeme a'i ne ne au te'eye. Ne peri wiyeme ape wanu umasire. Ne peri ape umasiyei su, ne fara'u tote tawesiyei no se tei kairefiyeyei.  
\v 19 Ne Owane Sitewi lo marepi tote tawesinamite. Sosu ne yo seni aseyaro a'i ironamite. Lu taune tamo etiri ape mo awera'iyenati. Lowe etiri ape mo awera'iyenati su, lowe Owane Sitewi ne marepi lowe lo meremereye a'i henerai. Marepi lowe lo apou a'i wai erasi tapiye se aine perati arauwiye. Sosu aine aporuwe. Aiwawe a'i tote tawesiyei lowe lo au luwaruweyei.  
\v 20 Lu hesi etiri wisere a'i ape awera'iyenati. Lowesi lo iyape Himeneus, sosu aiwawe Aleksander. Ane lowesi sepei Satan lo kairefi ma'e ani arosawi. Serai lowesi etiri siye so'oruweyei su, lowesi Owane Sitewi ma'e te'e narurowata. \it [2 Ti 4:14-15; 1 Ko 5:5]\it*   
\c 2  
\s1 Ne Owane Sitewi ma'e au te'e wisereye nine'ite.  
\p
\v 1 Sosu a'i pe ane peri erasi ne ma'e au te'esiya. Tutawe ne Owane Sitewi ma'e te'e tiyatire. Sosu le ma'e ei towerire, sosu ne au te'e wisereye nine'iyei su, ne lu taune werese ne Owane Sitewi ma'e au te'e tiyatiyei.  
\v 2 Ne Owane Sitewi ma'e au te'eyei su, ne awei lo lu owane tutawe nomo lo ne, sosu lu owane werese nomo lo ne, Owane Sitewi ma'e au te'ere. Serai nomo werese marepi fetane a'i ironamiteyei. Serai nomo werese Owane Sitewi lo Marepi umasiyei. Sosu marepi hepene nomo lo wara'i a'i ironamiteyei.  
\v 3 Nomo etiri ape mo umasiyei su, Owane Sitewi lai marepi hepene he'i a'i, nomo ma'e auwei ape, nihe lo se nomo ne au te'e wisereyesiya. Etiri ape wisere a'i ne.  
\v 4 Owane Sitewi nomo lo lu taune werese yo seni luwaru a'i lowe lo au sasariyei ne totesiya. Sosu marepi hepene he'i a'i lowe ma'e aureme. Sosu aiwawe le nomo werese ma'e apou au te'eyei, “Ane peri wiyeme a'i ne. Serai fene ane siye so'oruwete.”  
\v 5 Meni ta, menitani ta Owane Sitewi ma'e aiyeyei ne totesiya su, le meni ta'i a'i se Owane Sitewi ma'e aiyerowa. Meni ape iyape Krais Jisas.  
\v 6 Meni ape lai Owane Sitewi ma'e tahe pa'are lo au hese ereiye. Serai le tahe pa'are lo au hese ereiye su, Owane Sitewi lai yo seni luwaru werese a'i nomo lo le ma'e fu arosawi. Nowe ape wiyeme a'i henerai. Apou a'i nowe wiyeme ape se Owane Sitewi lai lu taune werese marepi hepene he'i a'i auwei ne totesiya. \it [Ro 3:29-30; Ga 1:4]\it*  
\v 7 Serene Owane Sitewi lai ane peri heneruwe wisere a'i lo au te'e fiyariyei ne ariariyeye. Le ane meni Aposel ta ariariyeye. Ane ne ma'e peri wiyeme a'i au te'esiya. Ane peri wawero au te'e ta'ame. Lu taune tere'e Juda lo marepi umasi ta'ame ape ne, ane lowe ma'e Meni Owane Jisas ne tote tawesiyei ne au te'e atuatusiya. Lowe Jisas ne tote tawesiyei su, lowe peri pefine a'i wanu so'oruwerowa. \it [Ap 9:15; Ga 2:7-8; 2 Ti 1:11]\it*   
\p
\v 8 Sosu ane lu werese omo omo werese sahe Owane Sitewi ma'e au te'e tiyatiyei ne totesiya. Sosu lu taune ape mo, Owane Sitewi ma'e au te'e tiyatiyei ape, lowe marepi wara'i umasinamirowa. Lowe ai marepi owe ape totete. Sosu lowe lu taune tere'e ma'e ai peri owe ape te'e tiyatinamite.   
\s1 Pol taune werese ma'e au te'eteye.  
\p
\v 9 Ane taune werese ma'e, Owane Sitewi ne tote tawesiye ape, au te'esiya. Fene Owane Sitewi ipari tahe ani asiyei su, fene marepi eresene a'i tote etite. Fene mato towe asiyei su, fene etiri erasi a'i mato towe sahe leserowata. Fene tahe fene lo leseyei su, fene tahe erasi a'i owe ape lesete. Fene Owane Sitewi tahe ma'aru tomu ne'ese se owe ape etete. Fene nihari fene lo owe ape lese wisereyete. \it [1 Pi 3:3-5]\it*  
\v 10 Taune werese Owane Sitewi lo marepi umasiye ape, lowe taune lo wiyawi wisere a'i au ta'anete. Lowe wiyawi wisere a'i ta'aneyei su, lu taune werese lowe ne au te'e wisereyeyei \it [1 Ti 5:10]\it*  
\v 11 Taune ape mo Owane Sitewi lo peri wanuwei su, lowe peri erasi owe ape te'ete. Lowe marepi towafi fene lo hi ani ararote. Sosu lowe lu owane lowe lo unahi irote.  
\v 12 Taune werese ape mo lu werese owe ape au te'e atuatute. Sosu lowe lu tamo ma'e owe ape au te'e kairefiyete. Ahowa, lu taune ta'uweyei su, taune werese owe ape te'ete. \it [1 Ko 14:34]\it*  
\v 13 Wiyeme a'i. Tu naifa weriyei Owane Sitewi lai meni ta, iyape Adam, tu ta'aneye. Sosu mo'o tani lo, iyape Iv, ta'aneye. Serai taune werese lai lu werese lowe lo unahi ironamite. \it [Stt 2:7,21-22; 1 Ko 11:8-9]\it*  
\v 14 Sosu lowesi Owane Sitewi lo awei pani tewi wisere a'i irowe su, Adam peri wawero ape wanu ta'ame. Ahowa, tani lo Satan lo peri wawero wanu umasiye. Sosu tani lo peri wawero wanuwe su, le yo seni luwaru a'i irowe. \it [2 Ko 11:3; Ga 3:1-6]\it*  
\v 15 Serai taune werese Jisas Krais ne tote tawesiyei su, lowe fara'u eimane lowe lo auteirowa. Lowe yo seni werese aseyaro a'i irowei su, lowe lu taune werese ne marepi erasi a'i tote wawesiyeyei, sosu lowe etiri werese ape ne marepi momotei a'i irowei su, lowe marepi hepene he'i a'i anirowa.   
\c 3  
\s1 Ne Owane Sitewi lo wesi lu owane tamo ariariyere.  
\p
\v 1 Sosu a'i pe ane peri wiyeme a'i au te'esiya. Meni ta Owane Sitewi lo wesi meni owane erasi heneraiyei ne totesiya su, etiri wisere a'i ne. \it [Ap 20:28]\it*  
\v 2 Sosu Owane Sitewi lo wesi meni owane, le yo seni werese aseyaro a'i irote. Le tani ta'i naiture. Le sa'i meremereye a'i owe ape ate, ai peri werese owe ape te'ete. Lu taune werese meni ape ne erasi a'i toteyei. Lu taune wesi lo sewiyeyei ne aiyeyei su, le lowe ma'e ayei tamo au ene are. Meni ape lu taune werese fara'u au te'e atuatute. \it [Ta 1:6-9]\it*  
\v 3 Meni ape sa'i meremereye a'i owe ape ate. Le a'i lai owe ape ai atu tiyatite. Ahowa, le lu taune werese ne marepi eresene a'i pei irote. Sosu aiwawe a'i lu taune ma'e ai peri owe ape te'e tiyatite. Le ma'aru werese topo lo erasi a'i owe ape totenamite.  
\v 4 Le nohuweripi awaripi lo wisere a'i au noweinoweite. Eimane werese lo peri lo fa umasinamite. Le tai mai topo lo au wisereyete.  
\v 5 Sosu meni ta nohuweripi awaripi lo luwaruwe noweinoweiyei su, le Owane Sitewi lo wesi etiri aiwawe a'i au luwaruwe noweinoweirowa.  
\v 6 Meni ape he'i a'i Owane Sitewi lo marepi tote tawesi ta'ame. Tu naifa le Owane Sitewi lo marepi tote tawesiye. Meni ape he'i a'i tote tawesiyei su, le marepi tote kuseriyei henerairowa. Serai Owane Sitewi lai meni ape ani fu arosawiyei, apou aiwawe a'i tu naifa le sepei Satan omo hire ma'e ani fu arosai.  
\v 7 Sosu lu tewi tere'e, Owane Sitewi ne tote umasi ta'ame ape, lowe meni ape marepi wisere a'i pei totete. Lowe marepi luwaru a'i le ne au toteyei su, le a'i lai Owane Sitewi lo wiyawi au luwaruwe ta'anerowa. Meni ape etiri apou ape irowei su, le Satan lo mino se ti tawesirowa. \it [2 Ko 8:21]\it*   
\p
\v 8 Sosu a'i pe ane Owane Sitewi lo wesi lu owane tere'e ne au te'esiya. Lowe Owane Sitewi lo wesi au noweinoweiyei. Lu ape mo lu tewi tere'e lai, lowe ne marepi wisere a'i totete. Lowe Owane Sitewi lo wesi sahe wiyawi ani tohotete. Lowe sa'i meremereye a'i owe ape ene ate. Sosu lowe lu tere'e lo ma'aru ta'arei aniyei ne owe ape totete.  
\v 9 Lowe marepi wara'i a'i pei irote. Sosu lowe Owane Sitewi lo marepi wiyeme kairefi a'i se tote anite tawesite.  
\v 10 Ne lu ape mo yo seni lowe lo siye etite. Yo seni lowe lo aseyaro wisere a'i siyeyei su, marepi lowe lo, lowe fara'u Owane Sitewi lo wesi au noweinoweirowa.   
\p
\v 11 Sosu aiwawe a'i tani lowe lo ne, lu taune tere'e lowe ne marepi wisere a'i totenamite. Lowe lu taune werese ma'e peri luwaru a'i owe ape te'e narute. Yo seni werese lowe lo, lowe irosiya ape, apou a'i pei ironamite. Lowe etiri werese, lowe irowei ape, lowe marepi momotei a'i au ta'anerowa. \it [Ta 2:3]\it*  
\v 12 Owane Sitewi lo wesi au noweinowei siye lu, lowe tani ta'i a'i naiture. Lowe nohuweripi awaripi au wisereye noweinoweite.  
\v 13 Lu ape mo Owane Sitewi lo wesi au noweinoweiteyei su, lowe Jisas Krais ne tote tawesi umasinamiyei. Lu taune iyape towafi lowe lo au te'e wisereyerowa. Lowe Jisas Krais lo marepi tote tawesiyei su, lowe Owane Sitewi lo peri kairefi a'i se au te'e fiyarirowa.   
\p
\v 14-15 Sosu a'i pe marepi ano apou a'i totesiya. Nowe ataheyeyei su, Timoti, ane ne ma'e sewiyeyei ne totesiya. Ahowa, ane aiye ta'ame su, ane peri eite ne ma'e lese ausawisiya. Ne peri ano wanu umasiyei su, ne yo seni wara'i a'i lu taune lo nihe se ironamite. Lu taune werese, Owane Sitewi lo marepi umasiye ape, lowe werese apou a'i Owane Sitewi lo wesi tene! Owane Sitewi lai mi mi pasi pasi weriyei ironamitorowa. Lu taune ape mo lowe apou a'i wesi me tou wou a'i opo teinamirowa. Lowe werese Owane Sitewi lo marepi sitewi wiyeme a'i henerai tepa'asiye.  
\v 16 Wiyeme a'i! Peri fareyare a'i henerai.  
\q1 Yo seni wara'i a'i lo sitewi nomo ma'e amerame a'i henerai. Owane Sitewi lo marepi Jisas ne apou a'i toteteye ape, meni ape hi awei ma'e tahe pa'are mase itorai. Sosu lu taune werese le siyeye. Owane Sitewi lo ipari wisere a'i meni ape siyeye. Serai lu taune tamo omo omo werese meni ape lo peri au te'e fiyariye. Lu taune tamo omo omo werese sahe meni ape lo peri wanu umasiye. Sosu wiyawi lo tepa'asiye su, Owane Sitewi lai meni ape kairefi a'i se omo hire ma'e hene ani wiye.” \it [Jo 1:14; 2 Pi 3:3; 1 Jo 2:18]\it*   
\c 4  
\s1 Pol Timoti ma'e peri ta ausawisiya.  
\p
\v 1 Sosu a'i pe Owane Sitewi lo Hepene Wara'i a'i apou te'e areiyeye, “Nowe me'iye su lu taune tamo Owane Sitewi lo marepi ne tote arosawirowa. Sosu lowe sepei luwaru a'i tamo peri wawero te'esiya ape, wanurowa. Sosu lowe Satan lo sepei luwaru a'i lo marepi umasinamirowa.”  
\v 2 Peri ape, lu ape mo lu taune ma'e au te'eyei ape, Satan lo marepi wou a'i ne. Lowe peri wawero au te'enamisiya. Lowe marepi hesi a'i au totenamisiya. Lowe yo seni farere a'i siye so'oruwe ta'ame. Yo seni lowe lo luwaruwe po'utesiya.  
\v 3 Lu ape mo lu taune ma'e apou te'esiya. “Fene tani ta owe ape naiture. Sosu fene ayei tamo au siyenamite.” Ahowa, ayei ape mo Owane Sitewi lai ta'aneye. Sosu le a'i lai lu taune werese ma'e apou au eiye, “Wiyeme a'i fene ayei tamo, lowe siyenamisiya ape, fara'u ene arowa.” Ayei tamo ne, lowe siyenamisiya ape, fene, Owane Sitewi lo marepi wiyeme a'i umasiteye ape, Owane Sitewi ma'e au te'e wisereyete. \it [Stt 9:3; Ro 14:6; 1 Ko 10:30-31]\it*  
\v 4 Wanure! Etiri werese, Owane Sitewi lai ta'aneye ape, wisere a'i tene! Fene ayei amou tamo aniyei su, sosu Owane Sitewi ma'e au te'e wisereyeyei su, fene fara'u ene arowa.  
\v 5 Serai fene ayei tamo ne Owane Sitewi ma'e au te'e wisereyeyei su, Owane Sitewi lai peri lo se etiri ape aseyaro au irorowa.   
\p
\v 6 Sosu a'i pe ne Jisas lo lu feni ma'e etiri ape mo ne au te'eyei su, ne Krais Jisas lo wiyawi ani siye lu wisere a'i henerairowa. Ne a'i lai Owane Sitewi lo peri wiyeme a'i wanu tote tawesi umasiye. Sosu aiwawe a'i ne a'i lai Owane Sitewi lo marepi wiyeme a'i umasiteye.  
\v 7 Ne ya'ariyei peri luwaru a'i owe ape wanu umasite. Ya'ariyei peri werese ape ne, ya'ariyei taune wanu umasinamisiya. Ahowa! Ne lai Owane Sitewi lo yo seni wara'i a'i irowei ne tohotete. \it [1 Ti 1:4]\it*  
\v 8 Apou a'i ne tahe pa'are no kairefiyeyei su, etiri yahowa'i a'i ne. Ahowa! Ne yo seni wara'i a'i irowei su, etiri werese ne wisere a'i tene! Ne yo seni wara'i irowei su, etiri werese pereye a'i wisere a'i irorowa. Sosu aiwawe, ne temeniyeyei su, sosu si tame sineyei su, etiri werese mi mi pasi pasi wisere a'i ironamitorowa.   
\p
\v 9-10 Peri ape, ane ne ma'e au te'esiya ape wiyeme a'i tene. Ne peri werese ape mo wanu umasite. Peri ape wisere a'i ne. Peri ape apou a'i te'esiya, sosu Owane Sitewi lai mi mi pasi pasi ironamitorowa. Serai nomo werese marepi lo tote tawesi umasisiya. Sosu nomo Jisas si tame itorairowa ape, ninawesiya. Owane Sitewi nomo lo lu taune werese lo yo seni luwaru a'i fara'u au sasari pamowerowa. Sosu lu taune marepi lo umasirowa ape, Owane Sitewi lai marepi hepene he'i a'i lowe ma'e aurowa. \it [1 Ti 2:3-4]\it*  
\v 11 Serai ane ne ma'e peri ape kairefi a'i se au te'esiya. Sosu ne peri ape lu taune ma'e au te'e atuatute.   
\p
\v 12 Sosu a'i pe Timoti, ne yo'orei meni ne. Lu tamo ne ne yahowa'i meni owe ape te'ete. Ahowa! Ne a'i lai yo seni wara'i a'i ironamite. Sosu ne yo seni wara'i a'i irowei su, Jisas lo lu taune yo seni no siyerowa. Sosu lowe yo seni wara'i a'i no aiwawe a'i umasiyei. Yo seni wara'i a'i no apou a'i peri wara'i a'i au te'esiya, ne lu taune ma'e marepi erasi a'i tote wawesiyete. Ne Owane Sitewi ne tote tawesisiya su, ne lu taune ma'e tote tawesiyei no au te'e atuatute. Aiwawe a'i ne lowe ma'e yo seni wara'i a'i no au atuatute. \it [Ta 2:15]\it*  
\v 13 Ne ane ne owe ape ninawete. Ahowa, ne Owane Sitewi lo wiyawi erasi a'i ta'ane tohotete. Ne lu taune ma'e Owane Sitewi lo peri siye te'ete. Ne Owane Sitewi lo marepi au te'e fiyarite. Sosu ne Owane Sitewi lo marepi he'i a'i lu taune ma'e au te'e atuatute.  
\v 14 Sosu aiwawe a'i ne Owane Sitewi lo kairefi, le ne ma'e auwe ape, ne me'iyeni ma'e owe ape atati arute. Owane Sitewi lo wesi lu owane tamo lowe ne hire ma'e ereti se au hetesi fuwe su, Owane Sitewi lai kairefi lo ne ma'e auwe. Lowe ereti ne ma'e isawe hetesiyeye su, Owane Sitewi lo Hepene Wara'i a'i ne ma'e wiyawi no au kairefiyeye. \it [2 Ti 1:6]\it*   
\p
\v 15 Serai ane ne ma'e au te'esiya. Ne wiyawi ape ta'ane tohotete. Mi mi werese ne wiyawi ape au noweinoweite. Serai ne wiyawi ape au noweinoweiyei su, lu taune werese wiyawi no siye wisereyerowa.  
\v 16 Owane Sitewi lai ne ma'e kairefi wisere a'i lo auwe. Ne Owane Sitewi lo peri au te'e fiyariyei su, ne Owane Sitewi lo kairefi se au te'e fiyarite. Ne yo seni werese no siye etite. Ne yo seni aseyaro a'i fu irore. Owane Sitewi lo peri, ne au te'e fiyariyei ape, ne peri ape siye etite. Peri no ape Owane Sitewi lo marepi fu umasinamite. Mi mi werese ne wiyawi no ta'ane tohotete. Ne marepi owe ape onota'ano irote. Ne peri ano umasiyei su, Owane Sitewi lai ne ma'e marepi hepene he'i a'i aurowa. Aiwawe a'i ne Owane Sitewi lo peri lu taune ma'e au te'e fiyariyei su, lowe peri no wanu umasirowa. Sosu Owane Sitewi lai lowe ma'e marepi hepene he'i a'i aurowa.   
\c 5  
\s1 Taune weiname lo peri te'esiya.  
\p
\v 1 Ne ya'ariyei lu taune werese ma'e ai peri erasi owe ape te'e tiyatite. Ahowa! Ne yo seni lowe lo au fareraiyeyei ne toteyei su, ne yo seni lowe lo peri eresene a'i se au fareraiyete. Apou wou a'i ne tai no au noweinoweinamiye. Ne yo'orei lu yo seni lowe lo au fareraiyeyei su, ne yo seni lowe lo au fareraiyete. Pa'ise no aiwawe a'i.  
\v 2 Ya'ariyei taune naihe werese marepi wara'i a'i se au te'e erese fareraiyete. Mai no aiwawe a'i. Sosu aiwawe taune wati'are werese ne lai yo seni luwaru werese a'i lowe lo au fareraiyete. Aiwawe a'i eine no yo seni luwaru a'i irowei su, ne einei no au te'e eresiye fareraiyeyei.   
\p
\v 3 Sosu a'i pe taune weiname au noweinoweite. Taune weiname tamo mi mi werese le ta'i a'i irosiya. Taune weiname tamo, eimane tamo irosiya.  
\v 4 Sosu menitani weiname ta, eimane tamo, sosu eimane tape tamo irosiya su, eimane, eimane tape ape mo lowe Owane Sitewi lo marepi tote umasite. Sosu tai no temeniyeyei su, eiwerai mai no au noweinoweiyei awere? Menitani weiname lo eimane, lowe lai mai lowe lo fa au noweinoweite. Lowe mai au noweinoweiyei su, lowe lai tai mai itiya'u au noweinoweiyei. Owane Sitewi lai yo seni lowe lo ne au wisereyeyei.  
\v 5 Sosu menitani weiname ta ta'i a'i irosiya su, menitani ape Owane Sitewi lo ereti ma'e marepi lo au fuwe. Serai mi mi pasi pasi menitani weiname ape Owane Sitewi ma'e au te'esiya. Le Owane Sitewi ma'e pati aniyei ne ei towerisiya. Owane Sitewi lo wesi lu owane lowe lai taune weiname apou ape au noweinoweite.  
\v 6 Sosu a'i pe menitani weiname ta yo seni luwaru a'i irowei su, le marepi hepene lo apou a'i temeniyeye. Le irosiya su, hepene lo apou a'i temeniyeye.  
\v 7 Serai ane ne ma'e te'esiya. Ne peri ano ape lu taune ma'e au te'ere. Serai lu taune werese peri ape wanuwei su, lowe taune weiname ape mo au noweinoweiyei. Sosu lu taune tere'e yo seni lowe lo owe ape te'e luwaruweyei.  
\v 8 Sosu aiwawe a'i meni ta, menitani ta lu feni lo au noweinowei ta'ame su, sosu nohuweripi awaripi au noweinowei ta'ame su, le a'i lai meni, menitani luwaru a'i tene! Wiyeme! Meni ape Owane Sitewi lo marepi awera'iyenati.   
\p
\v 9 Sosu a'i pe Owane Sitewi lo wesi lu owane lai taune weiname tamo au noweinoweiyei su, lowe iyape lowe lo one towe sahe lesere. Ahowa! Ne taune weiname lo iyape leseyei su, weiname ape iyu menei, lu hesi heta werese (60) iroteye, iyape lowe lo one towe sahe fara'u lesere. Sosu aiwawe meni tere'e weiname ape naitu ta'ame.  
\v 10 Menitani weiname ape lu taune werese lai marepi lowe lo wisere a'i toteye. Weiname ape lai eimane lo wisere a'i au noweinoweiye. Le aiwawe lu taune werese sewiyeyei ne fai ape, ayei au ene aye. Lu taune, Owane Sitewi lo marepi tote umasiye ape, le lowe ma'e au noweinoweiteye. Lu taune tamo etiri orese a'i teriteye su, weiname ape marepi wisere a'i lowe ma'e au te'e ferafereiteye. Mi mi werese weiname ape etiri wisere a'i au ironamiteye. Serai weiname apou ape ne fara'u Owane Sitewi lo wesi lo one towe sahe iyape lo lesere. Taune wati'are weiname Owane Sitewi ma'e te'e naneiteye. Lowe apou au te'eyei, “Ane Owane Sitewi lo wiyawi ta'anenamiyei. Ane meni ta si tame naiturowata.” Serai lowe iyape ano Owane Sitewi lo wesi lo one towe sahe au leseyei.   
\p
\v 11 Sosu aiwawe ane wati'are weiname ma'e au te'esiya. Taune wati'are weiname Owane Sitewi ma'e te'e naneiteye. Lowe apou au te'eyei, ane Owane Sitewi lo wiyawi ta'anenamiyei. Ane meni ta si tame naiturowata. Serai lowe iyape ano Owane Sitewi lo wesi lo one towe sahe au leseyei. Ne Owane Sitewi lo wesi one towe iyape lowe lo owe ape lesete. Sosu lowe naituwei lo marepi erasi a'i toteyei su, lowe Krais lo wiyawi awera'iyenatiyei. Serai lowe meni ta naituwei ne totesiya.  
\v 12 Apou a'i wati'are weiname lo iyape leseye su, sosu meni ta le naituwe su, Owane Sitewi le ma'e ai marepi toteyei. Piyene awere? Serai le Owane Sitewi ma'e peri te'e naneiyei tutawe lo arisiye.  
\v 13 Sosu aiwawe lowe onota'ano a'i iroteye. Lowe wesi tere'e tere'e yahowa'i onutiteye. Lowe yo seni onota'ano a'i irowe. Sosu lowe peri luwaru a'i ta taune tere'e ma'e au te'e fiyariye. Lowe yo seni luwaru a'i tote umasititeye. Lowe yo seni luwaru a'i iroteye su, lowe peri luwaru au te'e fiyariye. Peri apou ape amou a'i tene! \it [2 Te 3:11]\it*  
\v 14 Serai ane menitani wati'are weiname ma'e au te'esiya. Fene werese meni ta lai si tame naiture. Fenesi meni eime auteire. Fene nohuweripi awaripi fene lo au noweinoweite. Fene nohuweripi awaripi wisere a'i au noweinoweiyei su, serai lu taune tere'e fene ne owe au te'e narurowata. \it [1 Ko 7:9]\it*  
\v 15 Wanure! Taune wati'are weiname tamo lowe Owane Sitewi lo marepi arunatiyei su, lowe Satan lo marepi umasinamirowa.  
\v 16 Serai menitani ta, Owane Sitewi lo marepi umasiteye ape, menitani weiname lu feni lo sahe irosiya su, menitani ape weiname werese au noweinoweite. Sosu menitani weiname ape au noweinoweiyei su, serai lowe marepi orese a'i Owane Sitewi lo wesi lu owane ma'e owe ape auwei. Sosu lu feni ta weiname werese lo au noweinoweiyei su, serai Owane Sitewi lo wesi lu owane weiname ape mo, lu feni lo iro ta'ame ape, fara'u au noweinoweiyei.   
\p
\v 17 Sosu ane Owane Sitewi lo wesi lu owane ma'e au te'esiya. Sosu meni owane ape Owane Sitewi lo wesi lo etiri au noweinoweiyei su, marepi ano apou a'i totesiya. Ne lu ape mo ma'e ma'aru tomu ne'ese a'i pei luwaru a'i fu aute. Serai lowe mi mi werese Owane Sitewi lo peri au te'e fiyarisiya, sosu aiwawe lowe lu taune werese ma'e Owane Sitewi lo marepi au te'e atuatusiya.  
\v 18 Wanure! Tu naifa Owane Sitewi lo peri apou te'eye,  
\q1 “Ne fe bulmakau lo ahi owe ape tawesite. Fe bulmakau wiyawi no ta'aneyei su, fe bulmakau fara'u kewi so tewi tamo tomu tou ayei.” \rq Lo 25:4\rq*  
\m Sosu Owane Sitewi lo peri tere'e apou te'eye, “Wiyawi ta'ane meni wiyawi ta ta'aneyei su, meni ape ma'aru wisere a'i pei anite.” \it [1 Ko 9:9; Mt 10:10]\it*  
\v 19 Sosu meni ta'i a'i Owane Sitewi lo wesi meni owane ne apou eiye, “Meni owane ape yo seni luwaru a'i irowe.” Ne peri lo ape owe ape wanute. Ahowa! Lu hesi, lu hesi heta le ne peri apou ape ahi ta'i a'i se au te'eyei su, ne peri lowe lo ape wanure. \it [2 Ko 13:1]\it*  
\v 20 Serai Owane Sitewi lo wesi meni owane yo seni luwaru irowei su, ne a'i lai yo seni ape ne lu taune werese lo nihe se au te'ere. Sosu lu taune werese yo seni luwaru siyeyei su, lowe atoweiye irorowa. Serai lowe werese yo seni wara'i a'i irorowa. \it [Ef 5:11]\it*   
\p
\v 21 Sosu ane Owane Sitewi lo nihe se sosu aiwawe Krais Jisas lo nihe se, sosu Owane Sitewi ipari wisere a'i tamo, le lai ariariyeye ape, ane nihe lowe lo se ne ma'e peri erasi au te'esiya. Ne a'i lai peri ano umasi noweinoweite. Ne yereme no tewi erasi a'i owe ape nonetire. Ahowa ne lu taune werese tewi a'i tewi a'i au nonetire.  
\v 22 Ne meni ta Owane Sitewi lo wesi meni owane ariariyeyei su, ne yo seni werese lo siye eti areiyere. Ne yo seni werese lo siye eti ereiyei su, ne fara'u meni ape ereti se mato hire ma'e isawe hetesiye. Ereti isawe hetesiye su, ne meni ape ne Owane Sitewi ma'e au te'ere. Sosu ne meni ta ereti hire ma'e isawe hetesiyei su, sosu meni ape yo seni luwaru a'i irowei su, ne lai yo seni luwaru a'i lo tewi aiwawe a'i irowei.   
\p
\v 23 Ne nowe mi mi tomu ne'ese lire no u se. Serai mi mi werese sa'i wara'i a'i owe ape are. Ahowa ne wain sa'i oso a'i fara'u are. Ne wain sa'i ayei su, wain sa'i ape lai lire no au fareraiyeyei.   
\p
\v 24 Lu taune tamo lo yo seni luwaru a'i irowei su, lu taune tomu ne'ese yo seni lowe lo amerame a'i siyeyei. Owane Sitewi lai pereye a'i yo seni luwaru a'i lowe lo au hese ereiyei. Ahowa, lu taune tere'e yo seni luwaru a'i irowei su, lowe yo seni luwaru a'i fareyare a'i ne. Nowe ye'ewi su, Owane Sitewi lai yo seni luwaru a'i lowe lo au hese ereirowa.  
\v 25 Sosu aiwawe a'i, lu taune yo seni aseyaro a'i irowei su, lu taune werese lai yo seni aseyaro a'i lowe lo amerame a'i siyeyei. Aiwawe a'i yo seni aseyaro a'i irowei su, lowe yo seni aseyaro a'i lowe lo fareyare a'i ne. Serai Owane Sitewi lai yo seni aseyaro a'i lowe lo amerame a'i atuatu areiyeyei.   
\c 6  
\s1 Owane Sitewi lo au te'e siye lu ma'e lo peri.  
\p
\v 1 Sosu a'i pe ane wiyawi lu yahowa'i a'i ma'e au te'esiya. Lu feni ape lowe meni owane lowe lo ma'e marepi wisere a'i totere. Lowe meni owane lowe lo ma'e marepi wisere a'i au toteyei su, lu taune tamo Owane Sitewi lo iyape te'e narurowata. Sosu aiwawe lu taune tamo Jisas ma'e au te'e narurowata. \it [Ef 6:5]\it*  
\v 2 Ne wiyawi yahowa'i siye lu ma'e apou te'ere. “Wiyawi meni owane no Owane Sitewi lo marepi umasinamiteye ape, ne wiyawi lo ta'ane tohotete. Ne peri lo owe ape arisite.” Le Jisas lo peri umasinamisiya. Ne aiwawe a'i. Ne meni owane no lo wiyawi ta'aneyei su, ne meni owane no Owane Sitewi lo marepi umasiye ape, ani pati ta'aneyei. Wanure! Owane Sitewi lai lowe ne marepi erasi a'i tote wawesiyenamisiya. Serai ne, Timoti, ne peri ano lu taune werese ma'e au te'e atuatute. \it [Fm 16]\it*   
\s1 Ne ma'aru ape ne erasi a'i owe ape totete.  
\p
\v 3-4 Sosu ane peri tere'e ne ma'e au te'esiya. Meni ta peri wawero au te'e atuatusiya su, le Owane Jisas Krais lo peri wiyeme marepi ta'i a'i tote ta'ame. Sosu aiwawe le Owane Sitewi lo yo seni aseyaro ta'i a'i tote ta'ame su, marepi lo yahowa'i a'i irosiya. Sosu aiwawe le Owane Sitewi lo marepi wanu so'oru ta'ama. Awei meni ape lo marepi apou a'i irosiya. Le mi mi werese ai peri a'i te'e tiyatiyei ne totesiya. Sosu ai marepi erasi tote tiyatisiya. Sosu ai peri te'e tiyatinamisiya su, serai le lu taune lo etiri tamo siye wisereyesiya. Sosu ai peri erasi irosiya. Sosu le lu taune ma'e te'e narusiya, lu taune ma'e peri luwaru a'i te'esiya. \it [Ga 1:6-9]\it*  
\v 5 Sosu lu tamo, marepi luwaru a'i ironamisiya ape, lowe mi mi werese ai peri te'e tiyatinamisiya. Lu feni ape Owane Sitewi lo peri wiyeme a'i awera'iyenati su, lowe marepi lowe lo apou totesiya, “Owane Sitewi lo marepi wara'i apou a'i te'esiya. Nomo ma'aru tomu ne'ese ta'uwe anisiya.” Owane Sitewi lo marepi ne lowe lai apou a'i totesiya. \it [2 Ti 3:8; 4:4; Ta 1:14]\it*  
\v 6 Wiyeme a'i, ne Owane Sitewi lo marepi wara'i a'i umasiyei su, ne etiri tomu ne'ese anirowa. Ahowa, ne marepi fetane a'i irowei su, marepi no teme'eriyeyei. Marepi fetane a'i, marepi wisere a'i, marepi momotei a'i ne. \it [1 Ti 4:8; Fl 4:11-12; Hi 13:5]\it*   
\p
\v 7 Apou a'i mai no auteiye su, ne etiri werese aiwawe autei ta'ame. Sosu aiwawe, ne temeniyeyei su, hepene no etiri werese aiwawe aitirowata. \it [Jop 1:21]\it*  
\v 8 Serai nomo ayei tamo, sosu ipari tahe tamo irosiya su, nomo marepi wisere a'i pei ironamite.  
\v 9 Wiyeme a'i, lu taune etiri ma'aru aiwawe ta'uwe aniyei ne totesiya su, lowe marepi luwaru a'i toteyei. Fe fisiye yo apou wou ma'e wiyeinerowa. Lowe marepi luwaru a'i toteteye su, lowe yo seni meremereye a'i iroreme, sosu marepi towafi lowe lo au luwaruweyei. Serai lu taune ape mo apou a'i irowei su, lowe tahe pa'are, sosu hepene lowe lo aiwawe a'i au luwaruweyei. Sosu lowe temeniyerowa.  
\v 10 Sosu wanure! Lu taune ta ma'aru tomu ne'ese ta'uwe aniyei ne totesiya su, yo seni apou ape etiri luwaru a'i werese lo sitewi ne. Lu taune tamo ma'aru tomu ne'ese aniyei ne totesiya su, lowe Owane Sitewi lo marepi awera'iyenati. Sosu lowe Owane Sitewi lo marepi awera'iyenatiye su, lowe etiri luwaru a'i tahe pa'are lowe lo sahe fofowei erasi teriteye. \it [Ef 5:5]\it*   
\s1 Pol peri ta Timoti ma'e au te'esiya.  
\p
\v 11 Sosu a'i pe ane peri ta ne ma'e au te'esiya. Ne Owane Sitewi lo meni eime ne. Yo seni luwaru werese a'i ane tu au te'eye ape, ne etiri werese ape mo me'iyeni ma'e atati arunatire. Sosu yo seni wisere a'i umasi anire. Sosu aiwawe a'i ne Owane Sitewi lo marepi umasire. Ne Owane Sitewi lo yo seni tote anite tawesite. Lu taune werese ma'e marepi erasi a'i tote wawesiyenamite. Ne yo seni wisere a'i ani tohotete. Sosu lu taune werese ma'e marepi eresene a'i au irore. \it [2 Ti 2:22]\it*  
\v 12 Owane Sitewi lo yo seni werese ne lai kairefi a'i se anite tawesire. Ne kairefi a'i se tote anite tawesiyei su, ne fara'u marepi hepene he'i a'i mi mi pasi pasi ironamirowa. Lu taune tomu ne'ese lo nihe se yo seni aseyaro a'i no au atuatu areiyeye. \it [1 Ko 9:25-26; 2 Ti 4:7]\it*  
\v 13 Owane Sitewi lai hepene norohu a'i, ayei etiri werese ma'e auwe ape, Owane Sitewi lo nihe se, sosu Krais Jisas lo nihe se, ane ne ma'e peri kairefi a'i au te'esiya. Krais Jisas le meni Pontius Pailat ma'e teiye su, le meni ape ma'e peri farere a'i au te'eye. Peri ape ne apou a'i te'eye, Krais Jisas, Owane Sitewi lo meni eime. Sosu mo'o le lu taune werese ne au temeniyeye. \it [Jo 18:36-37]\it*  
\v 14 Krais Jisas si tame itorairowa su, ne mi mi weriyei Owane Sitewi lo peri werese umasinamirowa. Ne peri ape owe ape afofowere. Sosu ne yo seni wisere a'i lu taune werese ma'e au iro areiyere.  
\v 15 Owane Sitewi lai, Krais Jisas si tame itorairowa ape, nowe ape au ariariyeye. Owane Sitewi lai wisereyeyei lo sitewi. Le a'i lai kairefi a'i wiyeme ta'i a'i irosiya. Le a'i lai lu owane erasi werese lo Meni Owane. Sosu aiwawe le a'i lai meni owane tutawe werese lo Meni Owane tutawe pefine a'i ne. \it [KTH 17:14]\it*  
\v 16 Owane Sitewi, Meni Owane nomo lo le a'i lai mi mi pasi pasi ironamitorowa. Mitaiyeyei erasi pefine a'i sahe le sato ironamisiya. Serai lu taune werese le ma'e aiyerowata. Lu taune werese Owane Sitewi lo nihari siye ta'ame. Ahowa! Lowe werese nihari lo siyerowata. Nomo werese marepi wisere a'i sosu kairefi a'i le ma'e au te'esiya.   
\p
\v 17 Sosu ne ma'e lu taune ma'aru tomu ne'ese irosiya ape, ne lowe ma'e au te'esiya, “Lu taune werese fene ma'aru fene lo ne marepi erasi a'i owe ape totere. Fene ma'aru fene lo ne marepi erasi a'i toteyei su, fene Owane Sitewi lo peri arisiyei. Ma'aru werese kairefi se ta'ama. Fene ma'aru owe ape anite tawesite.” Ahowa! Fene werese Owane Sitewi lo marepi tote anite tawesite. Owane Sitewi lai etiri werese wisere a'i nomo ma'e ausai. Serai nomo werese fara'u marepi wisere a'i ironamisiya. \it [Lu 12:20]\it*  
\v 18 Ne lu feni ape ma'e au te'ere. “Lowe yo seni aseyaro a'i irote. Lowe wiyawi wisere a'i tomu ne'ese ta'anere. Lowe ma'aru lowe lo, lu taune ma'e ariye a'i irosiya ape, nonetire. Sosu aiwawe lowe marepi wisere a'i se etiri lowe lo nonetire.”  
\v 19 Lowe etiri lowe lo, lu taune werese ariye a'i ape ma'e nonetiyei su, Owane Sitewi lai lowe ne etiri wisere a'i tomu ne'ese ta'uwe ani fuwei. Etiri ape mo Owane Sitewi lai, ta'uweyei ape, etiri ape Owane Sitewi lo marepi lo sitewi a'i ne. Nowe ye'ewi etiri werese ape mo henerairowa. Serai lowe etiri lowe lo nonetiyei su, lowe marepi hepene he'i a'i tote anite tawesiyei. Marepi hepene ape wiyeme a'i tene! \it [Mt 6:20]\it*   
\p
\v 20 Sosu ane ne ma'e te'esiya. Timoti, ne peri wisere a'i, Owane Sitewi lai ne ma'e auwe ape, ne au noweinoweite. Ne peri yahowa'i werese a'i me'iyeni ma'e atati arunatire. Sosu aiwawe ne ai marepi werese owe ape tote tiyatite. Ai peri tiyati ape ne lu tamo areareye a'i apou eiye, peri ape yo seni wanu so'oruwesiya.  
\v 21 Lu feni ape lai apou eiye, “Nomo etiri werese so'oruwe tene!” Lowe peri wawero a'i tene! Lowe peri wawero a'i umasiyei su, lowe Owane Sitewi lo marepi awera'iyenatiyei. Sosu ane Owane Sitewi lo marepi wisere a'i ne ma'e auwei ne totesiya. One towe eite lese tepa'asiye. \it [1 Ti 1:6; 2 Ti 2:18]\it*