\id 1PE - 1 Peter Saniyo-Hiyewe; Ron & Sandy Lewis; 8-June-2004 
\h 1 PITA 
\toc1 1 Pita  One Towe Tutawe eite Pita lai Lese Ausawi 
\toc2 1 PITA 
\mt1 1 Pita  
\mt2 One Towe Tutawe eite Pita lai Lese Ausawi  
\is1 1 Pita Peri Tutawe  
\ip Pita one towe eite lu taune ma'e omo omo tere'e sahe iroteye ape, lese ausawi. Pita omo Rom sahe iroteye su, le one towe eite leseye. Rom lo lu owane tamo lai lu taune, Jisas ne tote tawesi umasiteye ape, au luwaruweteye su, Pita lowe ma'e marepi lowe lo au pati kairefiyeyei ne toteteye. Le lowe ma'e apou te'eye. “Jisas, hi awei sahe iroteye ape, le fofowei erasi a'i teriteteye.” Le lowe ma'e Jisas lo hi awei ma'e si tame itoraiyei ne au te'eteye. Le tote tawesiyei lowe lo au kairefiyeyei ne toteye.  
\c 1  
\s1 Pita lu taune werese eriteye.  
\p
\v 1 Ane Pita Jisas Krais lo wiyawi ta'ane siye meni. Tu naifa le lai ane ariariyeye. Le lai ane peri lo au te'eyei ne eimawesawi. Ane one towe eite Owane Sitewi lo lu taune fene omo sitewi towafi lowe lo arunatiyewe, omo tere'e tere'e sahe faiyewe, irosiya. Fene lu taune omo pani Pontus sahe, sosu pani Galesia sahe, sosu pani Kapadosia sahe, sosu pani Esia sahe, sosu pani Bitinia sahe, ane fene ma'e one towe eite ausawisiya.  
\v 2 Tu naifa weriyei Owane Sitewi lai fene werese siye so'oruweteye. Le fene te'i lu taune aseyaro wara'i a'i fa heneraiyei ne ariariyeye. Owane Sitewi lo Hepene Wara'i a'i wiyawi ape ironamisiya. Fene Jisas Krais lo peri wanu tote tawesi umasiteye su, le fene ma'e fisa'i topo lo se sa'i ani tanipase fiyariye. Yo seni luwaru werese a'i fene lo au sasari tepa'asiye su, serai fene Jisas Krais lo marepi fu umasinamite. Owane Sitewi lai fene ma'e marepi ferafereiyei lo, aiwawe a'i fetane a'i lo erasi wiyeme a'i aurowa. \it [Ro 8:29; 2 Te 2:13]\it*   
\s1 Marepi hepene he'i wiyeme a'i nomo ne hire omo se yaro ninawesiya.  
\p
\v 3 Owane Sitewi lai nomo werese ma'e seremareyeyei lo aunamiteye. Serai nomo marepi hepene norohu he'i a'i henerai. Le Jisas Krais tapiye fisiye sahe si tame ta'ane norohuwe sineye su, le nomo ma'e marepi hepene he'i a'i auwewe, nomo le ne ninawenamisiya. Serai nomo werese Owane Sitewi, nomo lo ne Owane Jisas Krais lo tai nomo lo iyape lo pei ei ani arowete.  
\v 4 Owane Sitewi lai nomo au ariariye tepa'asiye. Sosu le nomo ma'e marepi hepene he'i a'i auwe. Le nomo omo hire ma'e hene anirowa. Nomo omo hire ma'e wirowa su, nomo, etiri werese ape le te'e naneiye ape, nomo ma'e aurowa. Etiri ape mo aseyaro wara'i a'i ne. Lowe uwaserowata. Ahowa, etiri werese ape mo mi mi pasi pasi tei ironamitorowa. \it [Kl 1:12]\it*  
\v 5 Fene lai Krais ne tote tawesi umasisiya. Serai Owane Sitewi lai fene kairefi lo se au noweinoweisiya. Le lai fene mi mi pasi pasi au noweinoweiteyei. Serai nowe ye'ewi su, Owane Sitewi lai lu taune werese ma'e amerame a'i au atuaturowa. Le lu taune, le ne tote tawesiteye ape, omo hire ma'e hene ani wirowa. \it [Jo 10:28; 17:11]\it*  
\v 6 Serai fene werese marepi wisere a'i irore. Fene awei sato irosiya su, fene marepi orese a'i teritesiya. Ahowa, fene nowe oso a'i se, marepi orese a'i teritesiya. Fene marepi orese a'i teritesiya su, fene Owane Sitewi ne totenamite. Serai fene marepi wisere a'i ironamirowa. \it [1 Pi 5:10; Je 1:2]\it*  
\v 7 Piyene fene marepi orese a'i teritesiya awere? Owane Sitewi lai tote tawesiyei fene lo siye so'oruwesiya. Tote tawesiyei fene lo kairefi a'i irosiya awere? Marepi orese a'i fene ma'e heneraiyei su, fene Owane Sitewi ne tote tawesiyei fene lo ape awera'iyenatiyei awere? Apou wou a'i gol totere. Meni ta gol yehe sahe leiyei su, le gol wiyeme a'i siye so'oruweyei. Ahowa, lu tamo gol werese fara'u au ani luwaruwe po'uterowa. Tote tawesiyei fene lo gol hi ani fu ararosiya. Tote tawesiyei fene lo mi mi pasi pasi tei uwateyenamitorowa. Nowe ye'ewi se, Owane Sitewi lai Jisas lu taune ma'e amerame a'i au atuaturowa. Nowe ape se le fene ma'e iyape erasi a'i aurowa. Le fene ma'e au eirowa, “Yo seni fene lo aseyaro wara'i a'i ironamiteye.” Le fene ma'e mi erasi a'i aurowa. \it [Sek 13:9; Mal 3:3; Je 1:3]\it*  
\v 8 Fene Owane Jisas Krais siye ta'ame. Ahowa, fene le ne marepi erasi a'i tote wawesiyenamisiya. Fene pereye nowe eite se, fene le siye se ta'ame. Ahowa, fene le ne tote tawesi umasinamisiya. Serai fene nine'iyei erasi a'i le ne totesiya. Nine'iyei erasi a'i fene lo erasi wiyeme a'i irosiya. Fene ahi se eiwerou au te'erowata. Nine'iyei ape Owane Sitewi lo mi erasi a'i teme'eriyesiya. \it [Jo 20:29; 2 Ko 5:7]\it*  
\v 9 Fene le ne tote tawesisiya su, le lai fene omo hire lo ma'e hene wirowa. Serai fene le mase mi mi pasi pasi ironamitorowa.  
\v 10 Marepi hepene he'i a'i Owane Sitewi lai fene ma'e auwe ape ne, Owane Sitewi lo peri au te'e siye lu werese peri ape ne au te'eye. Lowe apou leseye, “Nowe tase Owane Sitewi lai awei sahe itorairowa. Le yo seni luwaru a'i fene lo au ani sasari pamowerowa. Sosu lowe ma'e marepi hepene he'i norohu a'i aurowa.” Owane Sitewi lo peri au te'esiye lu ape mo Owane Sitewi ma'e apou te'eye, “Ne peri no ape nomo ma'e au atuatu areiyere.” \it [Mt 13:16-17]\it*  
\v 11 Tu naifa weriyei Krais itorai ta'ame su, Krais lo hepene lu ape mo ma'e peri lo ape au te'e areiyeteye. Le apou au te'eteye, “Meni Krais nowe tase awei sahe itorairowa su, le fofowei erasi teriterowa. Sosu le Krais ma'e iyape erasi a'i ei ani arowerowa.” Lu tewi ape mo lowe apou te'e toweriteye, “Eiwerou su etiri ape henerairowa awere? Meni ape Krais le eiwerai awere?” \it [Sng 22; Ais 53; Lu 24:26-27]\it*  
\v 12 Owane Sitewi lai lowe ma'e au te'eye, “Peri ano ape fene au te'eye ape, fene etiri ape henerai siyerowata. Ahowa, peri ano ape nowe me'iye su henerairowa. Lu taune tamo peri ano ape wanurowa su, lowe Krais ne wanu so'oruwerowa. Peri ano ape lai lowe au pati anirowa.” Owane Sitewi lai Hepene Wara'i a'i lo awei hi ma'e eimawe arosai. Sosu Owane Sitewi lo wiyawi ani siye lu ape fene ma'e peri heneruwe ape au te'e areiyeteye. Peri ape Owane Sitewi lai hi ma'e au te'e arosai ape, Owane Sitewi lo ipari wisere a'i ape mo, lowe peri ape wanu so'oruwereme. Ahowa, lowe peri ape wanu so'oruwerowata.   
\s1 Fene lu taune werese yo seni wara'i a'i irote.  
\p
\v 13 Serai nowe weriyei weriyei marepi fene lo ta'uwe naneite. Fene yo seni fene lo siye etite. Ferafereiyei lo etiri werese Owane Sitewi lai fene ma'e aurowa ape, fene marepi tote eti tawesite. Nowe ye'ewi se Owane Sitewi lai Jisas lu taune ma'e amerame a'i au atuaturowa su, fene etiri werese ape mo aniyei ne ninawenamite.  
\v 14 Tu naifa fene awei lo yo seni umasiteye. Fene awei lo yo seni umasiteye su, fene marepi aseyaro a'i ape so'oru ta'ama. Ahowa, pereye nowe eite se fene Jisas Krais lo yo seni umasinamisiya. Fene Owane Sitewi lo eimane ne. Serai fene Owane Sitewi lo peri werese fu wanu umasite. Fene awei lo yo seni werese si owe umasite. \it [Ro 12:2; Ef 2:3; 4:17-18]\it*  
\v 15 Owane Sitewi lai fene ariariyeye ape, le meni wara'i a'i wiyeme a'i ne. Serai fene etiri werese irorowa ape, fene yo seni aseyaro irote.  
\v 16 Piyene awere? Wanure! Tu naifa meni ta Owane Sitewi lo one towe sahe apou leseye,  
\q1 “Owane Sitewi apou eiye, Yo seni marepi werese ano wara'i wiyeme a'i ne. Serai fene aiwawe a'i yo seni marepi aseyaro fu ironamite.” \rq Wkp 11:44-45; 19:2; 20:7\rq*   
\m
\v 17 Fene Owane Sitewi pefine ne apou au te'esiya, “Ne Tai Pefine nomo lo ne.” Owane Sitewi lai lu taune ta'i ta'i a'i lo yo seni werese aiwawe a'i siye eti ereiyei. Serai fene awei sato irosiya su, fene yo seni fene lo ne marepi erasi a'i tote etire. Fene Tai fene lo ne atoweiye a'i ironamite. \it [Ro 2:11; KTH 2:23]\it*  
\v 18 Fene peri eite so'oruwesiya! Tu naifa ya'ariyei fene lo awei lo yo seni umasinamiteye. Lowe awei lo yo seni umasiteye su, lowe marepi hepene he'i ani ta'ame. Awei lo yo seni yahowa'i a'i lowe lo fene ma'e henerai. Serai Jisas Krais hi awei ma'e itorai su, le yo seni luwaru a'i fene lo ma'aru se ete ta'ame. Ma'aru werese uwase po'uterowa.  
\v 19 Ahowa, Jisas Krais me tape'i sahe temeniyeye su, Owane Sitewi lai yo seni luwaru a'i fene lo Jisas lo fisa'i se eteye. Fisa'i lo ma'aru werese ani fu arowei. Owane Sitewi lai Jisas lo fisa'i wisere a'i aniye su, le fisa'i lo se lu taune werese lo yo seni luwaru a'i eteye. Jisas le yo seni luwaru a'i iro ta'ame. Serai le fe sipsip wara'i a'i wou a'i ne. \it [Ap 20:28; Hi 9:12-14]\it* \f + \fr 1:19 \ft 19 Juda lo lu tamo Owane Sitewi ma'e ayei ta au heseteye su, lowe fe sipsip wara'i siyeyei ne nehiteye. Fe sipsip ape enite werese ariye, enite tahe yaru ariye, tahe lo wara'i ne. Lowe fe sipsip wara'i a'i nehi siyeye su, lowe fara'u Owane Sitewi ma'e au heseye. Jisas Krais fe sipsip wara'i a'i wou a'i ne.\f*  
\v 20 Tu naifa weriyei weriyei Owane Sitewi awei pani werese ta'ane ta'ame su, Owane Sitewi Meni Krais lu taune lo yo seni luwaru a'i ete aniyei ne ariariyeye. Pereye nowe eite se le hi awei ma'e amerame a'i fene au pati ferafereiyei ne itorai. \it [Ef 1:4]\it*  
\v 21 Fene peri lo wanu umasinamiteye su, fene Owane Sitewi ne tote anite tawesi umasinamiteye. Owane Sitewi lai Jisas fisiye sahe si tame ta'ane norohuwe hene aniye. Le le ma'e iyape erasi a'i auwe. Serai fene Jisas lo yo seni umasiteye su, fene Owane Sitewi ne tote tawesiteye. Sosu fene le ne ninawesiya. Le fene omo hire lo ma'e hene wirowa. \it [Jo 14:6; Ro 5:1-2]\it*   
\p
\v 22 Fene Owane Sitewi lo peri wanu umasiye su, marepi hepene fene lo aseyaro a'i henerai. Serai fene ahi yahowa'i se lu taune ma'e apou owe ape te'ere, “Ane ne marepi erasi a'i tote wawesiyenamisiya.” Ahowa, fene lu taune werese marepi fene lo se marepi erasi a'i tote wawesiyenamite. \it [Jo 13:34; Ro 12:10]\it*  
\v 23 Mai fene lo fene auteiye su, fene temeniyerowa. Ahowa, Owane Sitewi lai marepi hepene he'i norohu a'i auwe su, hepene he'i a'i ape temeniyerowata. Ahowa, fene mi mi pasi pasi weriyei tei ironamitorowa. Marepi hepene he'i a'i fene lo Owane Sitewi lo peri pefine a'i ma'e fai. Owane Sitewi lo peri pefine a'i ape lai mi mi pasi pasi weriyei tei ironamisiya. Aiwawe a'i peri ape lai marepi hepene fene lo papu ironamisiya.  
\v 24 Tu naifa Owane Sitewi lai one towe sahe apou te'eye,  
\q1 “Lu taune werese senarepe wou a'i ne. Yo seni wisere a'i lowe lo senarepe su wou a'i ne. Senarepe werese foro'oweyei. Senarepe su aiwawe a'i winetaiyei.   
\q1
\v 25 Ahowa, Meni Owane Pefine a'i lo peri werese mi mi pasi pasi weriyei ironamisiya.” \rq Ais 40:6-8\rq*  
\m Owane Sitewi lo peri pefine a'i ape lu tamo fene ma'e au te'e areiyeteye ape, peri ape lai Krais lo peri heneruwe wisere a'i ne.   
\c 2  
\p
\v 1 Meni Owane wiyeme lo peri mi mi pasi pasi ironamisiya. Serai nomo yo seni luwaru werese a'i fu arosawire. Fene peri wawero owe ape te'ete. Fene marepi owe ape arearete. Fene marepi hesi a'i owe ape totete. Aiwawe a'i fene apou eiye, “Ane meni wisere a'i ne.” Sosu nowe me'iye su, fene yo seni luwaru a'i irowei. Marepi fene lo tote arearesiya. Fene etiri ta owe ape siye wisereyete. Sosu fene lu taune ma'e owe ape te'e narute. \it [Ef 4:22; Je 1:21]\it*  
\v 2 Fene meni owane Jisas lo peri wanu umasiye su, fene eimane osu wou a'i henerai. Mai meni eime ta auteiyei su, meni eime ape lai mo'u ayei ne lu tatai eteyei. Fene eimane osu aiwawe a'i ne. Fene Jisas lo peri he'i a'i wanu umasisiya su, fene Owane Sitewi lo peri mai lo mo'u wou a'i ayei ne lu tataisiya. Fene Owane Sitewi lo peri wanuwei su, fene lu taune erasi a'i henerai. Sosu le nowe mo'o su nomo omo hire lo ma'e hene wirowa.  
\v 3 Peri ape wiyeme a'i ne. Fene meni owane wiyeme lo ferafereiyei teriteye su, fene Owane Sitewi lo peri werese ape mo tote umasinamite. \it [Sng 34:8]\it*   
\s1 Krais tapiye norohu aiwawe a'i ne. Sosu lu taune ariariyeye ape.  
\p
\v 4 Fene Meni Owane Jisas ma'e fa aiyere! Le wesi me tou tutawe wou a'i ne. Le hepene se mi mi pasi pasi weriyei ironamisiya. Lu taune tomu ne'ese le ne apou te'eye, “Meni ape luwaru a'i ne. Nomo le ani fu arosawiyei.” Ahowa, Owane Sitewi lai meni ape ariariyeye. Le Owane Sitewi lo nihe se meni tutawe henerai.  
\v 5 Fene lai le aiwawe a'i ne. Fene wesi me tou kairefi wou a'i henerai. Owane Sitewi lai fene anirowawe, Owane Sitewi lo wesi wisere a'i ta'anerowa. Fene meni au hese erei siye meni aseyaro henerairowa. Serai fene Jisas lo iyape se marepi hepene fene lo Owane Sitewi ma'e au hese ereirowa. Owane Sitewi lai marepi hepene fene lo, fene au hese ereirowa ape, le marepi wisere a'i se ani nine'irowa. \it [Ef 2:21-22; KTH 1:6]\it*  
\v 6 Tu naifa weriyei meni ta Owane Sitewi lo peri one towe sahe leseye. Wanure!  
\q1 “Ane meni ta ariariyeye. Le wesi me tou tutawe wou a'i ne. Ane omo ano hire sahe wesi ta ta'anerowa. Omo ape iyape eiyei Saion. Wesi me tou ape wisere a'i ne, le wesi me tou tutawe heneraiyei. Lu taune tamo meni ape ne wanu tote tawesiyei su, lowe le ne neritase a'i iro ta'ame. Marepi lowe lo wisere a'i totenamiyei.” \rq Ais 28:16\rq*   
\p
\v 7 Le lai meni wisere pefine a'i ne. Fene Owane Sitewi lo peri pefine a'i tote tawesisiya ape, le lai fene ne au pati ferafereiyei ne itorai. Ahowa, lu taune tamo le ne tote tawesi ta'ame ape, le me tou luwaru wou a'i henerai.  
\q1 “Wesi ta'ane siye lu lai, wesi me tou luwaru a'i siyeye su, lowe wesi me tou ape ani fusawi. Ahowa, meni ta me tou kairefi a'i siyeye su, le me tou tutawe henerai.” \rq Sng 118:22\rq*   
\m
\v 8 Sosu meni tere'e Owane Sitewi lo peri one towe sahe leseye,  
\q1 “Meni ape Owane Sitewi lai ariariyeye ape le wesi me tou kairefi wou a'i ne. Lu taune tamo me tou kairefi a'i ape se lowe apine ato tewiye awei sahe winetaiyei. Lowe le siyeyei su, lowe le ne neritaseyeye.” \rq Ais 8:14-15\rq*  
\m Piyene awere? Lowe Owane Sitewi lo peri wanuwe su, lowe Owane Sitewi lo peri arisinamisiya. Winetaiyei lowe lo ape, Owane Sitewi lai lo ne ariariyeye.  
\v 9 Ahowa, fene lu tewi ape mo wou ta'ama. Fene werese Owane Sitewi lai lu tewi lo ariariyeye. Fene meni owane tutawe lo wiyawi siye lu taune tewi ne. Owane Sitewi lo au heseyei lu taune ne. Fene lu tewi wara'i a'i ne. Fene Owane Sitewi lo lu tewi henerai tepa'asiye. Fene Owane Sitewi lo lu tewi ironamisiya su, fene lu taune werese ma'e Owane Sitewi lo marepi wisere a'i fu au te'e fiyarire. Tu naifa fene pasi a'i ironamiteye. Fene yo seni luwaru a'i ironamiteye. Ahowa, Owane Sitewi lai fene pasi lo yo seni luwaru a'i nowe ma'e ei aniye. Le lai fene mitaiyeyei lo yo seni aseyaro a'i irowei ne ei aniye. \it [Ais 9:2; Ta 2:14; Ef 5:8]\it*  
\v 10 Tu naifa fene werese lu tewi yahowa'i ne. Ahowa, pereye nowe eite se fene Owane Sitewi lo lu tewi henerai. Tu naifa Owane Sitewi fene ma'e au seremareye ta'ame. Pereye nowe eite se Owane Sitewi lai fene ma'e au seremareyeye. \it [Hos 2:23]\it*   
\p
\v 11 Kaiyemo, ane fene ma'e peri kairefi a'i au te'esiya. Fene lu taune omo eyeri ma'e fai wou a'i ne. Serai lu taune tomu ne'ese yo seni fene lo so'oru ta'ama. Serai ane fene ma'e peri kairefi a'i au te'esiya. Fene tafa'e yo seni owe ape irote. Yo seni ape tahe pa'are marepi fene lo au luwaruweteyei. \it [Ga 5:17,24]\it*  
\v 12 Lu taune tomu ne'ese Jisas lo yo umasi ta'ame. Lowe yo seni fene lo peri luwaru a'i te'e naruwei su, fene yo seni aseyaro a'i fu irote. Sosu lowe yo seni wara'i a'i fene lo siyeyei su, lowe yo seni wara'i a'i fene lo marepi se tote tawesi umasiyei. Jisas hi awei ma'e itorairowa su, lowe Owane Sitewi lo iyape ei ani arowerowa. \it [Mt 5:16]\it*   
\p
\v 13 Wanure! Fene awei lo lu owane werese lo peri wanu umasite. Fene awei lo lu owane lo peri wanu umasiyei su, fene meni owane pefine nomo lo iyape ei ani aroweyei. Ei, awei lo meni owane tutawe, fene peri lo fu wanu umasite. Le meni erasi kairefi a'i ne. Le lu taune werese au noweinoweisiya. \it [Ta 3:1]\it*  
\v 14 Awei lo lu owane tere'e lowe awei pani tewi a'i tewi a'i au noweinoweisiya. Awei lo meni owane tutawe lu taune ma'e eimawesawi. Lu taune tamo yo seni luwaru a'i irowei su, le meni owane ta yo seni luwaru a'i lowe lo au fareraiyeyei ne eimawesawiyei. Lu taune tamo yo seni aseyaro a'i irowei su, le lowe ma'e peri wisere a'i ausawiyei.  
\v 15 Sosu fene yo seni aseyaro a'i irowei su, fene Owane Sitewi lo marepi umasiyei. Fene yo seni aseyaro a'i irowei su, fene lu meremereye a'i lo peri einamiyei. Serai lowe fene ne te'e narurowata. \it [1 Pi 3:16]\it*  
\v 16 Owane Jisas Krais yo seni luwaru a'i fene lo si ete hene aniye. Serai fene Owane Sitewi lo lu taune tewi henerai. Fene yo seni luwaru a'i unahi owe ape irote. Fene apou owe ape te'ere, “Ane Owane Sitewi lo lu tewi a'i ne. Serai ane fara'u yo seni luwaru a'i irowei.” Ahowa, fene apou owe ape te'ere. Fene Owane Sitewi lo wiyawi yahowa'i siye lu taune ne.  
\v 17 Fene marepi wisere a'i lu taune werese ma'e totete. Lu taune werese Jisas lo yo umasisiya ape, fene lai lowe ne marepi erasi a'i tote wawesiyenamite. Aiwawe a'i fene Owane Sitewi ne marepi wisere a'i se atoweiyete. Awei lo meni owane tutawe, fene le ne marepi wisere a'i totete. \it [Ro 12:10]\it*   
\p
\v 18 Ane wiyawi yahowa'i siye lu taune ma'e au te'esiya. Fene wiyawi meni owane fene lo lo peri wanu umasite. Fene peri lowe lo wanu umasiyei su, fene marepi wisere a'i lowe ma'e totete. Wiyawi lu owane tamo wisere a'i ne. Lowe tamo fene ma'e marepi fetane a'i au iroteye. Aiwawe a'i wiyawi lu owane tamo marepi orese a'i fene ma'e au irowe. Serai ane fene ma'e tame te'esiya. Fene wiyawi lu owane werese ma'e marepi wisere a'i totete. \it [Ef 6:5]\it*  
\v 19 Fene yo seni aseyaro a'i ironamiyei su, sosu meni owane fene lo feni ma'e au luwaruweyei su, fene Owane Sitewi lo marepi tote umasite. Wiyawi meni owane lai fene ma'e au luwaruweyei su, fene kairefi a'i teite. Fene le ma'e etiri luwaru a'i ta itiya'u owe ape irore. Owane Sitewi lai yo seni wisere a'i fene lo siyeye su, le fene ne au ei wisereyeyei.  
\v 20 Fene yo seni luwaru a'i irowewe, le tahe fene lo sahe wafei se aineyei su, fene le ma'e etiri ta luwaru a'i itiya'u au ta'ame. Ahowa, Owane Sitewi fene ma'e au wisereyeyei awere? Fene yo seni wisere a'i irowei su, sosu wiyawi meni owane fene ma'e wafei se aineyei su, fene marepi fetane a'i iroteyei. Yo seni luwaru a'i ape, le fene ma'e au irowe ape, Owane Sitewi siyeye. Sosu le fene ma'e au ei wisereyeyei. \it [1 Pi 3:14,17]\it*  
\v 21 Krais Jisas lo yo seni aseyaro wa'ari a'i ne. Sosu le fofowei erasi a'i fene ne teriteye. Serai fene Krais lo fofowei erasi aiwawe a'i terite umasite. Ei, Owane Sitewi lai fene yo seni apou ape lo umasiyei ne ei aniye. \it [Mt 16:24; Jo 13:15]\it*   
\q1
\v 22 “Le yo seni luwaru a'i iro ta'ame. Aiwawe a'i le peri wawero a'i ahi lo se au te'e ta'ame.” \rq Ais 53:9\rq*   
\m
\v 23 Lu tamo le au te'e naruwe su, le lowe ma'e etiri luwaru a'i itiya'u au te'e naru ta'ame. Le tahe sahe fofowei erasi a'i teriteye su, le ai peri luwaru a'i lowe ma'e au te'e ta'ame. Ahowa, le tahe pa'are hepene topo lo Owane Sitewi ereti se ma'e auwe. Ei, Owane Sitewi lai etiri werese wiyeme a'i se au hese ereirowa. Le yo seni lo wara'i a'i ne. \it [Ais 53:7; 1 Pi 3:9]\it*  
\v 24 Ei, Jisas Krais me tape'i sahe temeniyeye su, le yo seni luwaru werese a'i nomo lo tahe pa'are lo sahe eteye. Piyene awere? Nomo le ne tote tawesi umasinamisiya su, nomo yo seni luwaru werese a'i fa fu arosawinamire. Ei, nomo yo seni aseyaro wara'i a'i fu ironamire. Jisas me tape'i sahe fofowei erasi teriteye su, fene lu taune aseyaro a'i henerai. \it [Ro 6:11; Ais 53:5-6]\it*  
\v 25 Nowe tomu ne'ese fene Owane Sitewi lo yo ma'e meremereye uweiteye. Fene fe sipsip wou a'i ne. Meni ta fe sipsip au noweinoweiyei su, fe sipsip yo amerame a'i sahe uweiteyei. Ahowa, fe sipsip au noweinowei siye meni ariye su, fe sipsip yo amerame a'i siyerowata. Lowe yo ma'e ta'i ta'i a'i meremereyeti fiyari howeiyei. Tu naifa fene fe sipsip lo yo seni aiwawe a'i iroteye. Pereye nowe eite se fene fe sipsip au noweinowei siye meni pefine a'i ma'e si tame fai. Le marepi hepene fene lo mi mi pasi pasi au noweinoweinamisiya. \it [Ese 34:5-6; Jo 10:14]\it*   
\c 3  
\s1 Lu taune naituwei lo peri.  
\p
\v 1 Sosu a'i pe ane taune meni se ape ma'e au te'esiya. Fene, meni fene lo, lo peri wanu umasite. Wanure! Meni no Owane Sitewi lo peri umasi ta'ame su, le yo seni wisere a'i no siyeyei su, le yo seni no ne apou a'i toteyei, “Tani ano lo yo seni wisere a'i irosiya. Piyene le yo seni wisere a'i irowe awere? Ane marepi lo siye etiyei. Ane Jisas lo yo aiwawe a'i umasiyei awere?” Serai menitani ape peri eresene a'i su le meni lowe lo Jisas ma'e henetiyei. \it [Ef 5:22]\it*  
\v 2 Le yo seni wara'i a'i no siyeyei su, le ne ne marepi wisere a'i toteyei. Ne meni fene lo unahi iroteyei su, meni fene lo Jisas ma'e wanu umasirowa.  
\v 3 Taune, fene tahe werese owe ape lesere! Mato towe fene lo fene etiri tomu ne'ese sahe owe ape ti tawesire! Fene ni'aripe, ma'aru tomu ne'ese owe ape ani lesere! Ipari tahe wisere a'i owe ape ani asire! \it [1 Ti 2:9]\it*  
\v 4 Ahowa, marepi hepene fene lo wisere a'i papu irosiya ape, fene yo seni aseyaro a'i au lesere. Fene ai marepi owe ape totenamite! Yo seni fene lo momotei a'i irote! Etiri wisere ape mo luwaru po'uterowata. Peri werese fene lo aiwawe a'i momotei a'i irote! Fene etiri werese ape mo irowei su, Owane Sitewi lo nihe se etiri ape mo ne, le tote wisereyeyei.  
\v 5 Tu naifa weriyei taune tamo Owane Sitewi lo te'e naneiyei ape ninawenamiteye, lowe yo seni werese lowe lo aseyaro a'i iroteye. Lowe meni lowe lo peri wanu umasiteye. Lowe meni lowe lo unahi iroteye. Lowe yo seni aseyaro apou ape marepi hepene lowe lo au lesenamiteye. Yo seni werese lowe lo aseyaro a'i ironamiteye.  
\v 6 Menitani ta'i iyape Sara, le meni lo, Abraham lo peri werese wanu umasiteye. Le Abraham ma'e apou eiye, “Ne meni owane ano ne.” Fene yo seni aseyaro apou ape irowei su, sosu etiri tamo atoweiye ta'ame su, fene Sara lo eimane wou heneraiyei. \it [Stt 18:12]\it*   
\p
\v 7 Sosu a'i pe ane lu taune ma'e au te'esiya. Tani fene lo kairefi se ta'ame. Kairefi no erasi a'i irosiya. Serai fene tani fene lo ma'e peri momotei a'i au te'ete! Tani fene lo Owane Sitewi lo yo umasiteye su, fene iyape lo ei ani arowete! Owane Sitewi lai fenesi marepi hepene he'i a'i auwe. Sosu fenesi mi mi pasi pasi ironamisiya. Fene tani fene lo au wisereye nine'iyei su Owane Sitewi lai etiri ape mo fene te'e toweriyei ape, fene ma'e itiya'u wanurowawe, aurowa. \it [Ef 5:25]\it*   
\p
\v 8 Ane etiri tamo fene werese ma'e au te'esiya. Nomo werese marepi ta'i a'i tote tawesite! Meni ta, menitani ta marepi orese a'i teriteyei su, fene marepi ferafereiyei lowe ma'e au irote. Fene lu werese ne kaiyemo aiwawe a'i au irote! Fene lu taune werese au pati ferafereite! Sosu fene iyape towafi fene lo owe ape ei ani arowete! Fene etiri apou ape irowei su, Owane Sitewi lai fene ne au te'e wisereyeyei.  
\v 9 Meni ta fene ma'e au luwaruweyei su, fene etiri luwaru a'i itiya'u owe ape irote! Meni ta peri luwaru a'i fene ma'e au te'eyei su, fene peri luwaru a'i itiya'u owe ape te'ete! Ahowa, meni ta peri luwaru a'i fene ma'e au te'eyei su, fene peri wisere a'i le ma'e itiya'u au te'ere! Piyene awere? Owane Sitewi lai fene etiri ape irowei ne ei aniye ape fene ma'e apou eiye, “Ane fene au pati ferafereiyei. Ane etiri wisere tomu ne'ese fene ma'e auwei.” Serai fene lu ape mo ma'e peri wisere a'i itiya'u au te'ete!  
\v 10 Meni ta Owane Sitewi lo peri one towe sahe leseye,  
\q1 “Meni apou toteyei su, ‘Ane marepi hepene he'i a'i fu aniyei. Ane marepi wisere a'i mi mi weriyei ironamirowa.’ Fene marepi apou ape toteyei su, fene peri luwaru a'i owe ape au te'ete! Aiwawe a'i fene peri wawero a'i owe ape au te'ete!   
\q1
\v 11 Le yo seni luwaru werese a'i me'iyeni ma'e atati awetote! Sosu yo seni wisere a'i fu irote! Lowe lu taune werese ma'e marepi erasi a'i tote wawesiyenamite! Sosu lowe ma'e marepi fetane a'i aure! Lowe yo seni apou ape umasi irote!   
\q1
\v 12 Piyene awere? Owane Sitewi lai lu taune werese yo seni wara'i a'i irosiya ape, le lai lowe siyesiya. Lowe Owane Sitewi ma'e etiri ta ei toweriyei su, le lai ei toweriyei lowe lo wanurowawe, etiri ape lowe ma'e aurowa. Lu taune yo seni luwaru a'i irowei su, Owane Sitewi lowe siye eti areiyeyei. Lowe ma'e ai marepi erasi a'i toterowa.” \rq Sng 34:12-16\rq*   
\p
\v 13 Fene yo seni wara'i a'i ironamiyei su, eiwerai fene ma'e au luwaruweyei awere? Fene yo seni wara'i a'i ironamiyei su, lu tamo tere'e fene ma'e etiri tamo au luwaruwerowata.  
\v 14 Fene yo seni aseyaro a'i ironamirowa su, sosu lu tamo fene ma'e au luwaruweyei su, Owane Sitewi lai fene ma'e marepi wisere a'i auwei. Lowe fene ma'e au luwaruweyei ne toteyei su, “Fene lowe ne owe ape atoweiyere! Aiwawe a'i fene marepi orese a'i owe ape totere!” \it [Ais 8:12-13]\it*  
\v 15 Meni Owane Krais marepi fene lo papu ironamite. Fene apou totere, “Meni Owane Krais le Owane tutawe nomo lo ne.” Fene mi mi werese Owane Sitewi lo peri totenamite. Serai lu tamo fene ma'e apou ei toweriyei su, “Piyene ne Owane Sitewi ne au pati ferafereiyei ne ninawenamisiya.” Ne fara'u Owane Sitewi lo peri lowe ma'e itiya'u au te'ere! Fene lowe ma'e Owane Sitewi lo marepi au te'eyei su, fene peri momotei a'i se lowe ma'e au te'ere! Fene yo seni wara'i a'i lowe ma'e au atuatute!  
\v 16 Lu tamo Krais lo yo seni wara'i a'i, fene papu irosiya ape, au te'e naruwei su, fene marepi aseyaro wara'i a'i tote anite tawesinamite! Lu tamo yo seni aseyaro fene lo ne te'e naruwei su, Owane Sitewi lai lowe ma'e au neritaseyeyei. \it [1 Pi 2:12]\it*  
\v 17 Fene yo seni aseyaro wara'i a'i irowei su, Owane Sitewi lo marepi fene ne apou totesiya, fara'u fene fofowei erasi teriteyei. Ape wiyeme a'i ne. Ahowa, fene yo seni luwaru a'i irorowawe, fofowei erasi teriteyei su, Owane Sitewi ate fene ne au wisereyerowata.  
\v 18 Krais nowe ta'i a'i se yo seni luwaru werese a'i ani sasari pamoweyei ne temeniyeye. Serai nomo mi mi pasi pasi temeniyerowata. Le yo seni aseyaro wara'i a'i ironamiteye. Nomo werese yo seni luwaru a'i ironamiteye. Serai le yo seni luwaru werese nomo lo ani sasari pamowe po'utesawi. Sosu le nomo werese Owane Sitewi ma'e heneti. Lu tamo tahe pa'are me tape'i sahe aine tera'e ti tawesiye. Ahowa, Owane Sitewi lai hepene lo fisiye papu si tame ta'ane norohuwe sineye. Pereye le mi mi pasi pasi hepene se ironamisiya.  
\v 19 Krais lo hepene lai lu taune lo Hepene werese a'i ma'e kalabus wesi iroteye ape, peri lo au te'e areiyeyei ne fi.  
\v 20 Lu taune lo Hepene ape mo ne, tu naifa weriyei meni Noa awei sahe iroteye ape, lu taune werese mi mi weriyei Owane Sitewi lo peri arisiteye. Sosu Owane Sitewi lai lowe marepi towafi lo fa irowei ne au arunamiteye. Sosu Noa wai erasi ta'aneye su, lowe Noa ma'e te'e naruteye. Wai erasi ape ta'ane tepa'asiye su, Owane Sitewi lai meni Noa nohuweripi awaripi wai ape papu hene wiye. Lu taune ereti feni werese feni hesi heta (8) wai ape papu hene wiye. Sa'i erasi ni'arawe ma'e itorai su, lu taune werese awei sahe iroteye ape, sa'i lai ani aporuwe. Noa lo lu feni wai ape papu wisere a'i onu ereteye. \it [Stt 6-7]\it*  
\v 21 Sa'i ape apou wou a'i ne. Meni ta sa'i au huwei su, fene Owane Sitewi ma'e apou eiyei, “Ane yo seni luwaru werese a'i ano atati aresaiyeye. Ne marepi ano wara'i a'i au irote.” Sa'i ape awei peperi tahe nomo lo sahe iroteye ape, au hu ta'ame. Ahowa, marepi wara'i a'i se nomo Owane Sitewi ma'e apou te'e toweriye, “Ne nomo au pati ferafereite.” Owane Sitewi peri ta nomo ma'e au te'e naneiye. Jisas me tape'i sahe temeniyeye su, Owane Sitewi lai le fisiye papu si tame ta'ane norohuwe sineye. Serai le nomo werese aiwawe a'i fisiye papu si tame ta'ane norohuwe sinerowa.  
\v 22 Jisas si tame sineye su, le Owane Sitewi lo omo hire ma'e wiye. Le Owane Sitewi lo ereti eyate feni ma'e onunamisiya. Owane Sitewi lai etiri werese Jisas unahi ma'e fuwe. Owane Sitewi lo ipari wisere a'i, ipari lo owane werese, sosu etiri werese kairefi a'i hire ma'e irosiya ape, Owane Sitewi lai lowe werese Jisas unahi ma'e funamiteye.   
\c 4  
\s1 Fene Owane Sitewi lo peri wanu tote tawesite!  
\p
\v 1 Lu tamo owane Krais ma'e fofowei erasi au irowe su, serai fene yo seni lo erasi a'i totere! Fene yo seni lo apou ape umasinamite! Lu taune tamo Krais lo wiyawi ta'anerowawe, tahe pa'are lowe lo ma'e fofowei erasi a'i teriteyei su, lowe yo seni luwaru a'i marepi hepene towafi lowe lo papu iro ta'ame. \it [Ro 6:2,7]\it*  
\v 2 Lowe Krais lo yo seni aiwawe a'i umasinamiyei su, lowe mi mi, awei sato iroteyei ape, lowe awei lo yo seni werese a'i owe ape irote. Ahowa, lowe Owane Sitewi lo marepi fa wanu tawesi umasinamite.  
\v 3 Nowe tu naifa fene owane Krais lo marepi tote tawesi ta'ame su, lu taune tomu ne'ese yo seni luwaru a'i ironamiteye. Fene aiwawe a'i yo seni luwaru a'i lowe lo umasinamiteye. Fene tafa'e yo seni lo marepi toteteye. Fene taune siye wisereyeteye. Sa'i meremereye a'i ateye. Fene sa'i meremereye a'i ateye su, fene yo seni meremereye a'i iroteye. Fene lu taune tomu ne'ese ta'uwe hereiyei ta ei aniye. Lowe ta'uwe hereiyei ape ma'e ta'uwerai su, lowe sa'i meremereye a'i anamiteye. Serai lowe yo seni meremereye a'i ironamiteye. Fene god wawero ne'ese a'i ta'aneteye su, fene iyape lowe lo ei ani aroweteye. Yo seni ape luwaru a'i tene! Tu naifa fene yo seni apou ape umasinamiteye. Pereye nowe eite se fene yo seni luwaru a'i atati aresaiye arunatiyewe, Owane Sitewi lo marepi umasinamisiya. \it [Ef 2:2-3]\it*  
\v 4 Serai fene Owane Sitewi lo marepi ma'e atati aresaiye umasinamiye su, lu taune tomu ne'ese fene ne hepene se su'ariteye. Lowe apou a'i toteye. Fene piyene yo seni luwaru a'i nomo mase iro ta'ame awere? Lowe fene ma'e ai marepi se tote luwaruweteye.  
\v 5 Nowe ye'ewi se, lu taune ape mo Owane Sitewi lo nihe sahe teirowa su, lowe yo seni luwaru werese a'i le ma'e au te'erowa. Owane Sitewi lu taune etiyei nowe ape ta'uwe tepa'asiye. Lu taune werese temeniyeye ape, lu taune norohu irosiya ape, le yo seni luwaru a'i lowe lo au hese eti ereirowa. \it [Ap 10:42]\it*  
\v 6 Lu tamo Jisas lo peri lu taune ma'e tu temeniyeye ape, au te'e areiye fiyariteye. Piyene awere? Aiwawe a'i ne. Tu naifa Owane Sitewi lai yo seni luwaru wou a'i lowe lo au hese ereiteye. Serai lowe temeniyeye. Lu taune werese aiwawe ne. Lowe Jisas lo peri wanuwe su, lowe Jisas ne tote tawesi umasiteye. Serai lowe temeniyeye su, hepene lowe lo Owane Sitewi mase mi mi pasi pasi ironamitorowa.   
\s1 Nowe ye'ewi ataheyewa! Fene yo seni aseyaro ironamite!  
\p
\v 7 Nowe ye'ewi ataheyewa. Serai fene marepi wisere a'i tote etire. Fene yo seni wara'i a'i irote! Fene marepi wisere a'i toteyei su, fene fara'u Owane Sitewi ma'e au te'e tiyatiteyei. \it [Ro 13:11-12]\it*  
\v 8 Etiri tutawe fene tote anite tawesite! Fene lu taune, Jisas lo marepi umasiteye ape, fene lowe ma'e marepi erasi a'i tote wawesiye tiyatinamite! Fene lu taune ma'e marepi erasi a'i tote wawesiye tiyatinamiyei su, yo seni luwaru a'i lowe fene ma'e au irowe ape, fene lai yo seni luwaru a'i lowe lo ape, tote i'anenamite. \it [1 Pi 1:22]\it*  
\v 9 Lu taune tamo fene ma'e sewiyeyei ne aiyeyei su, fene etiri tamo lu taune ape mo ma'e isafiye tiyatire! Fene lowe ma'e marepi luwaru owe ape totere! \it [Hi 13:2]\it*  
\v 10 Owane Sitewi lai lu taune werese ma'e Jisas lo marepi umasiteye ape, le lowe ma'e kairefi tere'e tere'e tamo lu taune ma'e au pati ferafereiyei ne auwe. Owane Sitewi lai fene ma'e ferafereiyei erasi lo auwe su, fene kairefi ape se lu taune ma'e au pati ferafereite! Fene lu taune au pati ferafereiyei su, fene Owane Sitewi lo marepi umasiyei. \it [Ro 12:6-8]\it*  
\v 11 Owane Sitewi lai meni ta ma'e kairefi au te'e areiye fiyariyei ne auwe su, le Owane Sitewi lo peri wou a'i lu taune ma'e fu au te'e areiye fiyarite! Owane Sitewi lai meni tere'e ta ma'e lu taune au pati ferafereiyei lo kairefi auwe su, le lu taune Owane Sitewi lo kairefi se fu au pati ferafereire! Serai fene lu taune ma'e Krais Jisas lo iyape se au pati ferafereiyei su, fene Owane Sitewi lo iyape erasi a'i ei ani aroweyei. Owane Sitewi lo kairefi mi mi pasi pasi weriyei ironamisiya. Nomo Owane Sitewi lo iyape mi mi pasi pasi weriyei te'e ani arowete. Peri ape mo wiyeme a'i tene!   
\p
\v 12 Peri ano wanu etire! Lu taune tamo fene ma'e fofowei erasi a'i au luwaruweteye. Etiri luwaru a'i ape fene ma'e henerai su, Owane Sitewi lai tote tawesiyei fene lo siye areiyeyei ne totesiya. Tote tawesiyei fene lo kairefi teisiya awere? Piyete awere? Fene hepene se su'ariye owe ape totere! Etiri ape mo lu taune werese ma'e aiwawe henerainamisiya ape, fene ma'e henerairowa. Serai fene owe ape hepene se su'arire.  
\v 13 Fene Jisas lo wiyawi ta'aneyei su, fene fofowei ta'i ta'i a'i, fofowei le aiwawe a'i teriteyei. Lu taune tamo fofowei erasi a'i teriteyei. Lu taune tamo fofowei oso a'i teriteyei. Fene fofowei teriteye su, fene marepi wisere a'i totenamire. Serai nowe ye'ewi se Jisas Krais mitaiyeyei erasi mase pani awei amerame a'i ma'e itorairowa su, fene marepi wisere erasi a'i toterowa. Sosu fene Jisas lo iyape te'e ani arowerowa. \it [Ap 5:41; Je 1:2; 1 Pi 1:6-7]\it*  
\v 14 Fene Jisas lo wiyawi ta'ane su, sosu lu tamo fene ma'e au luwaruweyei su, Owane Sitewi lai marepi fene lo au wisereye irowei. Fene Jisas lo peri wanu tote tawesi umasiyei su, Owane Sitewi lo Hepene Wara'i a'i mitaiyeyei fene ma'e napetuwei. \it [1 Pi 2:20]\it*  
\v 15 Wanure! Fene yo seni luwaru a'i irowei su, apou a'i fene meni ta aine tera'eyei, etiri ta ta'arei aniyei, yo seni luwaru a'i ironamiyei, lu taune ma'e au luwaruweyei. Fene yo seni owe ape irowei su, fene fofowei erasi a'i teriteyei. Fofowei ape ne Owane Sitewi lo nihe se luwaru a'i ne. Serai yo seni apou ape owe ape irote.  
\v 16 Ahowa, fene, Krais lo marepi umasisiya ape, fofowei erasi a'i teriteyei su, fene marepi neritase a'i owe ape totere. Fene Krais lo iyape, marepi fene lo papu irosiya ape, fene Owane Sitewi lo iyape au te'e ani arowete.  
\v 17 Nowe ataheyewa. Owane Sitewi lai yo seni werese au hese ereirowa. Nomo Jisas lo peri wanu tote tawesi umasisiya ape, pereye nowe eite se le yo seni nomo lo tu au hese ereisiya. Serai nomo fofowei oso a'i teritesiya. Lu taune tere'e, Owane Sitewi lo peri heneruwe me'iyeni ma'e atati awetowei ape, le yo seni lowe lo mo'o au hese ereirowa. Le lowe au hese erei tepa'asirowa su, le lowe ma'e fofowei erasi a'i au irowei.  
\v 18 Meni ta Owane Sitewi lo peri one towe sahe apou leseye,  
\q1 “Lu taune yo seni wara'i a'i ironamisiya ape, sasarisawirowa. Ei, lowe awei sahe fofowei erasi teritesiya. Sosu mo'o lowe Owane Sitewi lo omo hire ma'e wirowa. Sosu lu taune Owane Sitewi lo peri arisiteye ape, sosu yo seni luwaru a'i ironamiteye ape, Owane Sitewi lai eiwerou lowe ma'e au irorowa awere? Le lai lowe ma'e fofowei erasi a'i tahe lowe lo sahe aunamitorowa.” \rq Snd 11:31\rq*   
\p
\v 19 Serai Owane Sitewi lo marepi apou a'i toteyei su, lu taune ta'i ta'i a'i fofowei erasi tahe towafi lowe lo sahe teriteyei. Fene fofowei erasi teriteyei su, fene kairefi teite! Fene yo seni wara'i a'i owe ape arunatire. Ahowa, fene marepi hepene fene lo Owane Sitewi lo ereti ma'e au fure! Le tahe pa'are hepene fene lo au ta'aneye su, serai le fene mi mi pasi pasi au noweinoweinamirowa.   
\c 5  
\s1 Owane Sitewi lo wesi lu owane lai lu taune au noweinoweite.  
\p
\v 1 Sosu a'i pe ane Owane Sitewi lo wesi lu owane ma'e au te'esiya. Ane, fene aiwawe a'i, Owane Sitewi lo wesi lu owane ne. Ane, fene aiwawe a'i, lu tamo Meni Owane Krais lo tahe sahe fofowei erasi auwe su, ane lai fofowei werese lo ape siyeteye. Sosu Jisas awei amerame a'i sahe si tame itorairowa su, le ane ma'e kairefi lo mitaiyeyei erasi se au atuaturowa.  
\v 2 Ane fene ma'e au te'esiya. Lu taune werese Owane Sitewi lo marepi tote umasinamiteye ape, fene lowe ma'e au noweinoweite! Ane peri kairefi a'i fene ma'e apou te'e ta'ame, “Fene lu taune werese au noweinoweite.” Ahowa, Owane Sitewi lo marepi fene ne apou toteyei, “Fene lu taune tewi ano au noweinoweite!” Fene lai marepi fene lo umasite! Marepi fene lo apou toteyei su, “Ei, ane fara'u lu taune ma'e au noweinoweiyei.” Eite wisere a'i ne. Fene lu taune au noweinoweiyei su, fene apou owe ape totere, “Ane lu taune au noweinoweiyei su, ane ma'aru tomu ne'ese aniyei.” Ahowa, fene apou owe totere! Fene lu taune au noweinoweiyei su, fene marepi wisere a'i se totere! \it [Jo 21:15-17; Ap 20:28]\it*  
\v 3 Lu taune Owane Sitewi lai fene ma'e au noweinoweiyei ne auwei. Fene lu taune au noweinoweiyei su, fene lu owane kairefi wou owe ape irote! Sosu fene lu taune ape mo owe ape hi ani fu arore! Ahowa, lowe yo seni wara'i a'i fene lo siyeyei su, lowe yo seni fene lo umasirowa. \it [2 Ko 1:24; Fl 3:17; Ta 2:7]\it*  
\v 4 Fene lu taune au noweinoweite. Meni Owane tutawe lu taune werese au noweinoweisiya ape, si tame itorairowa su, le fene ma'e iyape wisere a'i mitaiyeyei erasi se ta aurowa. Iyape erasi ape le fene ma'e aurowa ape mi mi pasi pasi ironamitorowa.   
\s1 Nomo marepi wisere a'i lu taune ma'e totere!  
\p
\v 5 Ane yo'orei lu ma'e te'eyei, fene aiwawe a'i lu owane lo peri wanu umasite! Sosu fene werese marepi towafi lo ani fu arore! Fene kuseriye marepi fene lo erasi a'i owe ape totere! \it [Ef 5:21; Je 4:6]\it*  
\q1 “Meni ta kuseriye marepi erasi a'i totenamiteyei su, Owane Sitewi lai meni ape hi ani fu arowei. Ahowa, lu taune tamo marepi towafi lowe lo ani fu arosiya ape, le marepi ferafereiyei lo lowe ma'e auwei.” \rq Snd 3:34\rq*   
\p
\v 6 Fene marepi towafi fene lo hi ani fu arote. Sosu fene Owane Sitewi lo kairefi unahi irote. Serai nowe me'iye su Owane Sitewi lai, fene ariariyeye ape, le iyape fene lo ei ani aroweyei. \it [Mt 23:12; Lu 14:11; Je 4:10]\it*  
\v 7 Fene marepi orese a'i teriteyei su, fene Owane Sitewi ma'e au te'ere! Le lai fene marepi erasi a'i tote wawesiyenamisiya. Sosu le fene au noweinoweinamisiya. \it [Mt 6:25-30]\it*  
\v 8 Fene marepi hepene amerame a'i totere. Mi mi werese fene etiri werese siye etite! Meni airame luwaru fene lo ape, sepei Satan, le omo omo werese ma'e itero ani nehi uwei siya. Le yo pusi erauwe no'u erasi wou a'i ne. Yo pusi erauwe erasi ape fe tamo mo'o ani umasisiya. Le fe ape tomu tera'e ayei ne totesiya. Sepei Satan aiwawe a'i ne. Le lu taune lo tote tawesiyei au luwaruweyei ne totesiya. \it [1 Te 5:6]\it*  
\v 9 Sepei Satan fene ma'e heneraiyei su, fene le ne kairefi a'i se teite! Fene Owane Sitewi ne tote tawesi teinamite! Wanure! Fene etiri ape so'oruwe tepa'asiye. Lu taune omo omo werese sahe Satan lai tote tawesiyei lowe lo au luwaruweyei ne totesiya. Lu taune tomu ne'ese fofowei erasi a'i teritesiya. Fene aiwawe a'i ne. \it [Ef 6:11-13; Je 4:7]\it*   
\p
\v 10 Owane Sitewi lai fene ei aniyewe, fene Krais mitaiyeyei erasi mase mi mi pasi pasi ironamiyei ne ariariyeye. Nowe pereye a'i fene fofowei erasi terite. Fofowei ape nowe oso a'i teriterowa. Fofowei fene lo i tepa'asiyei su, Owane Sitewi lai ferafereiyei werese a'i sitewi ape, le lai fene ma'e yo seni aseyaro a'i au irowei. Le marepi fene lo au kairefiyeyei. Tote tawesiyei ape lo lai au kairefiyeyei. Sosu le fene ma'e au tei kairefiyeyei.  
\v 11 Kairefi erasi a'i lo mi mi pasi pasi ironamitorowa. Wiyeme a'i tene!   
\p
\v 12 Ane one towe te'i a'i fene ma'e ausawiyei. Meni Sailas peri ano leseye. Meni ape le kaiyemo wiyeme a'i ne. Marepi ano apou a'i totesiya, “Fene one towe eite aniyei su, fene siye eti te'ere! Ane fene ma'e peri kairefi a'i se au te'e areiyeye. Ane Owane Sitewi lo peri fene ma'e apou au te'e areiye fiyariye. Owane Sitewi lo ferafereiyei fene ma'e wiyeme a'i tene! Fene Owane Sitewi lo ferafereiyei sahe tei kairefiyenamite! \it [Ap 15:22,37-40; Ap 12:2,25; 13:13]\it*  
\v 13 Lu taune tomu ne'ese sato ahe irosiya ape, yo seni luwaru a'i ironamisiya. Lowe omo Babilon lo lu taune aiwawe a'i ne. Ahowa, ponei sahe irosiya ape, lu taune tamo fene aiwawe a'i ne. Lowe Owane Sitewi lo marepi umasinamisiya. Lowe ane mase irosiya ape, fene ma'e eriteyei ausawisiya. Meni tere'e iyape Mak, le aiwawe a'i fene ma'e eriteyei ausawisiya. Le meni eime ano wou a'i ne. \it [2 Ti 4:11]\it*  
\v 14 Fene lai lu taune Krais lo yo umasisiya ape, marepi erasi a'i tote wawesiyenamite! Fene lowe ta'i ta'i a'i eritere!” Owane Sitewi lai marepi fetane a'i lo fene ma'e auwei. Serai fene marepi fetane a'i ironamisiya.