\id 2TH - Siane (Komongu dialect -snpK) NT [snp] -Papua New Guinea 1991 (DBL 2014) \h 2 Tesalonaika \toc1 Polokafo mono wenena Tesalonaika numudo minamo ya lufuwa kofa aiga wi fulo gedami ka \toc2 2 Tesalonaika \toc3 2 Te \mt1 2 Tesalonaika \mt2 Polokafo mono wenena Tesalonaika numudo minamo ya lufuwa kofa aiga wi fulo gedami ka \imt1 Komu Ka \ip Polo ya Kolinti numudo minomo wimo kamenalo ya Yesu koli kikito umuti monolo mau wi-wi amo wenena Tesalonaika numudo minamo ya lufuwa kofa aiga wi fulo gedami ka ama ya ne. Wenenawa yauti maleka yate Yesu Kilisto moda itibito otaiye, loti kani kiti lo-lo amo yamu Polo ya kawa kolito lufuwa ama wi fulo gedaigu ya kamena fuli lenagolido neta ma o fedenami ka, ido Wekola kiyabala o minoto mona efe loto melenumo ka ya auma wito api gilibinae, loto lufuwa ama ya wi fulo gedami ne. \c 1 \s1 Lo oloto melami ka \p \v 1 Aiyo, linate Metefo Goti ido Wekola Yesu Kilisto lunigu mino gedeti Tesalonaika numudo monolo mau wi-wi amo wenenao, lamo Polole, Sailasile, Timotile lufuwa ama ya wi fulo gedoge. Eyalo. \p \v 2 Metefo Gotidokati ido Wekola Yesu Kilistodokati ya nasafili mona ido you amene mona ya linatedoka mino gedenaiye. \s1 Polokafo wenenawa yamu kolito Goti loumami ka \p \v 3 Mono wenenate-motao, lamo linatemu kolito Goti loumonimo, ya koli kikitamo mona nabanaba dimo uto, ido linate muki seti-muludi gimigimi o minamo mona yaki u naba dimo wimo yamu kolito ya siyane, lalole, loto kamenakamena loumu-umu onimo ya moda efe loto loumumo idone. \v 4 Yamu lalimo ya Goti wenenala numudo-namado monolo mau wi-wi agu ya linate gebotina logimonimo, ya mono kuwolafo kaila fi gedato, keina naba-naba koli minamo ya luti-kati efilámaito, ilulu kuti auma witi koli kikitoti mino-mino amo monatina yamamu gebotina logimi-gimi o minone. \s1 Gotikafo monate iya meleto lifima meina efe loto itibito lomami ka \p \v 5 Keina naba o fede gimami yamakafo kepa mele gimaito, ya Goti wekudite kiyaba o ledami kilalau ya moda ogofuti dinawamo wenenane ona kula minae, loto geyami, ya efe lotoko iya mele ledami mona ya lilibami ne. Ena aya kilalamu kolamo yamu oiya ama ya moda keinawa naba ya koli minae. \v 6 Moda kolafe? Aiga ya Gotikafo efe limoko nemo monala ya meyalo meleto, kaila fi gedamo wenenawa ya lifima itibito gimito kaila fi gedeto, \v 7 ido linate keinawa koli minamo wenena ya lamoki lakoina olu you lo ledenagoliye. \p Eti enami, ya Wekola Yesu ya enisolela auma wiyamo yaki kosinauti yo famula naba-naba ligu yau oloto pinami kamenalo, yalo ya \v 8 Gotiki kutifina ámamo wenena ido Wekolate Yesu kala kuwa lalo koliti golo ádamo wenena ya lifima ka naba itibito giminagoliye. \v 9 Lifimawa itibito giminami, Wekola kola-welalo ido aumala lamenalalo yati fulo faiga o gedageto, u kopa unawamo kanu ya lifima meinawa itibito gimageto, yalo ya minowa-minowa oti minenagilae. \p \v 10 Ido enami kamenawalo ya felegaga wenenala, koli kikito umamo wenena muki yate eyeti eleigiti aiyo-koiyo loti kuliya olu faka lomo dinawae. Ido linate ya lo oloto gimonimo ka koli kikitamo yamu aya kamenalo ya linate ya lamoki ido wenenawa muki yaki lakoina minenagolone. \s1 Wenenawa yamu koliti Goti loumamo ka \p \v 11 Netawa muki o fedenami yamu ya moda kamena-kamena linatemu kolito Goti loumonimo, ya Gotite yakafo auma wi gedageto, ya mona laloko melenune, loti lalo koliti, ido koli kikitoti lono kula muki olunune, loti kolamo mona ya etiti melenawae, loto luti fiyami monawa ya linatedoka olu oloto pi gedeto, lalo geyenagoliye, loto loumu-umu o minone. \v 12 Eti enawamo ya Wekolate Yesu lamena kuliya ya linate minagu u naba dimo unaiye. Ido linate yaki amo lulau mino edamo ya lamena kulitina naba giminami ne. Gotite ido Wekola Yesu Kilisto nasafili o gedami monawa yakafo netawa ya olu oloto pinagoliye. \c 2 \s1 Nosa naba ámami we oloto pinami ka \p \v 1 Ena mono wenenate-motao, Wekolate Yesu Kilisto kofa itibito ageto, amodoka olu mau winumo yamu ka ama kati oluto logiminagologe. Kolalo. \v 2 Wenena liligalekate Wekola kamenala moda otaiye, loti Ounakafo wetelo melaito lone, lenawamofe, ido wenena mate lolomato lone, lenawamofe, ido Polo lufuwa wiyaiguti lone, lenawamo, ya linate alako kati ligi-ligi kiti setimuludi fou ádaneyo. \v 3 Koti witi olu yaidaamaida ka logiminawamo ya kolámalo. \p Kolafe? Kamena fuli lenagolido, komu ya mono kula meni umunawamo kanuwa naba oloto pinami, ido ka kolito kolámoto o-o imo we, u kopa unami we ya oloto pinami ne. \v 4 Aya we ya wenena neta-mata koli umuti gotite ne, loti kouba-naba o ede minamo neta muki ya olu fulo gedeto minenae, loto fina fi ginito, Goti felegaga kuliyai numuna nabau ya dito amedoto minoto, namoko ya goti minowe, loto aimola yamu eti loto lenami ne. \p \v 5 Netawa yamu komu linatedoka minoto logimitomo yama kati melaife? \v 6 Ido aimola kamenalalo ya oloto pinaiye, loto oiya kanula ku edami mona ya moda koli minae. \v 7 Yamu kolalo. Ka kolito kolámoto imo aumala yakafo oiya lonowa falukuto olu minaifa, ido kanula oiya ama ku edemo idami mona ya wenena minaguti wageto, ayalo ya moda oloto pinagoliye. \v 8 Aya kamenalo ya ka kolito kolámoto o-o imo wewa ya oloto piyageto, Wekola Yesukafo wela-muladuna ofo fulunami ne. Amo oloto pito enami lamenala yakafo moda ofo lilika winagoliye. \p \v 9 Ka kolito kolámoto o-o imo wewa ya Satani aumala mino edageto ya aumala mona-monaki oloto pito, neta kofawa aumala gilibageto eyeti eleiginawamo suki neta naba-naba olu oloto piyageto, \v 10 wenena liliga u kopa unawamo ya ka ona kula, olu omuni kenami ka ya senimuluni umunawamo mona ya fulitanako, wewa ya nosámami monawa suki neta muki olu oloto pinami yakafo luni ya kola winagoliye. \v 11-12 Etito ya ka ona kula ya koli kiki ádoti, nosámami mona yamu seni-mulunigu lalo kolamo wenenawa muki ya Gotikafo inanimo luni-kani auma wito kola winawamo kanu olu oloto pi gedoneto, suki kawa koli kikitato ya olu kalo mele gedeto lifima ka naba itibito giminae, loto eti o gedaiye. \s1 Gotikafo iyaina o ledami ka \p \v 13 Wenena maleka ya eti enawafa, ido linate Wekola siya-muluna gimami mono wenenatemotao, kana akaimati Gotikafo namo wenenane minenawae, loto Ounakafo olu felegaga o gedaito ka ona kula koli kikitenawamo ya olu omudi kenae, loto iyaina o gedami yamu siyane, lalole, loto kamena-kamena loumu-umu onimo ya moda efe loto loumumo idone. \v 14 Etiti minenawae, loto linatemu kolami, ya kala kuwa lalo logimogeto ya koliti Wekolate Yesu Kilisto ekeina lamenala olunawae, loto Gotikafo luti fiyami ne. \v 15 Yamu mono wenenate-motao, linate auma witi minalo. Ido api gilibonimo ka ya wetekafo lonimofe, ido adekafo lufuwa wiyonimo, muki ya olu kiki loti meyalo meleti minalo. \p \v 16 Ena Yesu Kilisto, Wekolate nemo we, ido Metefo Goti, siya-muluna lomami we, nasafilila yakafo sete-mulude olu aila wi ledami mona minowa-minowa oto minenami mona ido lalo kolito kiyabala minonimo mona lomami we yate \v 17 seti-muludi olu aila wi gedeti, lagi fi gedaito, ka kula lenawamo mona ido lono kula olunawamo mona ya linate auma witi melemo dinawae. \c 3 \s1 Wekolakafo ade olu faka lo ledami ka \p \v 1 Ena mono wenenate-motao, ka ma nemo ya kolalo. Wekola kalakafo ufe loto upatito linatedoka kuliya naba oloto pimo idami yamaidana oto oloto pimo dinaiye, loti ya lamomu koliti Goti loumalo. \v 2 Ido wenena ma koli kiki ádamo yamu wenena luni-kani nosámami ido monani nosámami wenena ya aniguti olu fulo gedo, loti yaki lamomu koliti Goti loumalo. \p \v 3 Ido mona efe lotoko melami we Wekolakafo linate ya olu auma wi gedeto, nosámami aboga ika o gedetenaiye, loto kiyaba o gede minenaiye. \v 4 Linate kati oluto ka logimonimo ya oiya moda golodoti minoti, ido ayaidanako oti golodoti kolimo dinawae, loto Wekola lulau mino edeto linatemu kolito kate lawoko ki minone. \p \v 5 Wekolakafo luti-kati ya ilibageto, Goti monala, sete-mulude gimi-gimi enumo monala, ido Kilisto monala, keina kolonigu ya auma wito mino kolinumo monala ya meyalo melemo unawae, loto linatemu kolito ya Goti loumone. \s1 Lono auma witi olalo, loto logimami ka \p \v 6 Ena mono wenenate-motao, Wekolate Yesu Kilisto kuliyalo ya kati oluto logimoge. Kolalo. Mono kolamo wenena maleka yate ka api gilibonimo ya koli fulititi, lono olámoti faifa moni minamo wenenawa ya ekena o gedalo. \v 7 Linate ya lamo monate yaidana oti monatina melenawamo ya moda efe lenagoliye, loti koli minae. Lamo ya linatedoka minonimo kamenalo yama fa kanu moinámoto, lonoguko minonimo yama linate moda kama ne. \p \v 8 Ido linatedokati weti-neta yama faifa ánonima ne. E’e, konuma-kobina aefa fi gimitenune, loto leda lunaga kamena-kamena adekafo lono auma wito oluto koiya fi-fi onima ne. \v 9 Etito minoba, ido lamo ya mono kiyabatina we minoninako, linate wete-neta faifa lomamo neko, ya efe lagi ne. Moda efe lenagolifa, ido linate ya lamo onimo yaidana enawae, loto auma wito monawa gilibonima ne. \p \v 10 Etito linatedoka minonimo kamenaloma yaki ya lono olámenawamo wenena ya weni-neta faifa gimámalo, loto kati oluto logimitonima ne. \v 11 Ena ama ya linate yauti maleka lono olámoti, faifa minoti wenena ma monanina yamu lo yaleka waka oti moni minamo kawa ya aito kolone. \v 12 Yaidana amo wenena ya Wekola Yesu Kilisto lulau mino edeto kani oluto eti loto logimoge. Kolalo. Lononina sodoti oluti, ya wenineta inanimo lononidokatiko ya noti minalo, loto auma wito logimonimo ka ya fulo gedone. \p \v 13 Ena mono wenenate-motao, linate mona lalo mele minamo ya seti-muludigu eleka fi umámalo. \v 14 Ido lufuwa wi fulonimo ka ya meyalo melámenawamo wenena ya geyefe loti geyeti, ya ukanido kolinawamo ne, loti wenenawaki ya koina wi gedámalo. \v 15 Eti o gedeti ya kuwotefole, loti koli gimámalo. E’e, mono wenenatele, loti kolife lenawamo ka ya auma witi logimalo. \s1 Onowaleka ka \p \v 16 Ena you amene mona aboga Wekola aimola yakafo kamena-kamena neta-mata muki oti meleti enawado ya you amene monala mele gede minenaiye. Wekola ya linateguka mino gedemo dinaiye. \p \v 17 Namo Polo aiyo-koiyo ka fulo gedomo ya lufuwa onowaleka ama ya nanimo anekafo wiyowe. Lufuwa wi-wi omo ane lebona imo ya etito ya wi-wi owe. \p \v 18 Wekolate Yesu Kilisto nasafilila ya linate muki mino gedenaiye. Modae.