\id 1PE - Shikilagar
\ide UTF-8
\h 1 ಪೆತ್ರಾ
\toc3 1 ಪೆತ್ರಾ
\toc2 1 ಪೆತ್ರಾ
\toc1 1 ಪೆತ್ರಾ ಬರ್ದಲ ಪೈಲಾ ಪತ್ರ
\mt2 ಪೆತ್ರಾನು ಬರೆದ ಮೊದಲನೆಯ ಪತ್ರಿಕೆ
\mt1 1 ಪೆತ್ರಾ ಬರ್ದಲ ಪೈಲಾ ಪತ್ರ
\imt ವಳಕ
\ip ಪೆತ್ರಾ ಬರ್ಪಲ ಪೈಲಾ. ಪತ್ರ ಅಪೊಸ್ತಲ ಥಯಲ ಪೆತ್ರಾ ಲಿಕ್ಯೊಸ. ಪೆತ್ರಾ ಆ ಪತ್ರ ಬರದತಾ ಕ್ಹು ಕುನ್ನ ವ್ಹೈ ವರಿ ಕಿನೆ ಲಿಕ್ಕಾಡೊಸ ಕೈನ ಕವಸ. ತೆ ಆ ಪತ್ರ ವಳಕ ನೈಸೊ ವಾಲಾವೊನೆ ಕೈನ ತೆ ಲಿಕ್ಕಾನು ಕ್ಹಾರಾ ಕ್ರಿಸ್ತ ವಿಸ್ವಾಸಿಯೊನೆ ಬರ್ದ್ಯೊಸ. \xt 1:11-17—2:11\xt* ತೆ ತಿನು ಪತ್ರ ಕುನ್ನ ಓದಸ ತ್ಯುನೊನೆ ಘನ್ನಿ ಸಲಾ ಅಮ್ಮ ಲಿಕ್ಯೊಸ ಕಾಕದ್ಯಾಮ ತ್ಯುನೊನೆ ಬಿಜಾ-ಬಿಜಾ ದೆಶೊಮಾ ಫೈಲಿ ಗಯಾತಾ. ಕಾಕದ್ಯಾಮ ಆ ಪತ್ರ ಪೌಲಾ ಎಫೆಸನಾ ಸಬೆವಾಲಾವೊನೆ ಬರ್ದಲ ಪತ್ರಾನಾ ಲಿಂಗತ ಘನ್ನಾ ವಿಷಯ ಅಮಾ ಛೆ. ಘನ್ನಾ ಮನಕ್ಹೊ ಪತ್ರಾ ಬರ್ದಲ ಪೈಲಾ ಪತ್ರ ಎಫೆಸ ಸಭೆನೆ ಬರ್ದಲ ಪತ್ರ ಥಯಲ್ಪರ ಕದ್ಯಾಮ ಕ್ರಿಸ್ತ ಹುಟಲ್ಪರ ಜಾಸ್ತ ಕಮ್ಮ ಕದ್ಯಾಮ 65 ವರಕ್ಹ ಮಾ ಬರ್ದ್ಯಾಸ ಕೈನ ಬರೊಕ್ಹೊ ಕರಸ ಪೆತ್ರಾ ಆ ಪತ್ರ ತೆ ಬಾಬಿಲೊನ ಕವಾನಾ ರೊಮಾ ಗಾಮಮಾ ಬರ್ದ್ಯೊಸ. ಪೆತ್ರಾ ತುಮೊನೆ ಪ್ರೊತ್ಸಾಹ ಕರಾನೆ ವರಿ ಆ ಕ್ಹರಿನು ಕ್ಹುದಾನಾ ಕೃಪಾ ಕೈನ ಸಾಕ್ಷಿ ದಿವಾನೆ ವ್ಹೈ ಕೈನ ಕವಾನಾ ಮುಲಕ ತೆ ಲಿಕ್ಕಲ ಪತ್ರನು ಉದ್ದೆಶ ದೆಕಾಡಿನ ದಿವಸ
\iot ಪಿಠಿಕೆ
\io1 1) ಪೆತ್ರಾ ತೆ ಕುನ್ನ ವ್ಹೈ ವರಿ ತೆ ಕಿನಾಹುತಿ ಆ ಪತ್ರ ಬರ್ದಾಡ್ಯೊಸ ಕೈನ ಕವಸ \ior 1:1-2\ior*
\io1 2) ವರಿ ತೆ ತಿಮ್ಮ ಮಳಿನ ರ‍್ಹವಾನಾ ಹುತಿ ವರಿ ರಕ್ಷಣೆನಾ ಹುತಿ ಕ್ಹುದಾನೆ ಧನ್ಯವಾದ ಕರಸ \ior 1:3—2:10\ior*
\io1 3) ತೆ ಥಯಲ್ಪರ ಆ ಲೊಕಮಾ ವಿಶ್ವಾಸಿಯೊ ಕಿಮ್ಮ ರ‍್ಹೌ ವರಿ ಅಪ್ನಾ ಸಂಬದೊನಾ ವಿಷಯಮಾ ಕದ್ಯಾಮ ಮ್ಹೊಟಿ ಬೈಕೊ ಕಾಮವಾಲೊ ಮಾಲಕನಾ ವಿಷಯಮಾ ಕವಸ \ior 2:11—4:11\ior*
\io1 4) ತೆ ಥಯಲ್ಪರ ಪೆತ್ರಾ ಕಷ್ಟ ಆತಾಮಾ ಕಿಮ ತಡದಿಲಿನ ರ‍್ಹವೊ ಕೈನ ಕವಸ \ior 4:12\ior* \ior 5:11\ior*)
\io1 5) ತೆಳಾಮಾ ತೆ ತಿನು ಪತ್ರ ಕ್ಹರಾವಸ \ior 5:12\ior*
\c 1
\p
\v 1 ಯೆಸು ಕ್ರಿಸ್ತನೊ ಅಪೊಸ್ತಲ ಥಯಲ ಪೆತ್ರಾ, ಪೊಂತ ಗಲಾತ್ಯ, ಕಪ್ಪದೊಕ್ಯ, ಎಶ್ಯಾ, ಬಿಥುನಿಯ ಕವಾನಾ ಭಾರಲ್ಯಾ ಗಾಮೊಮಾ ಜು಼ದಾ ಥೈಗೈಯಲ ಕ್ಹುದಾನಾ ಮನಕ್ಹೊನೆ ಬರ್ದಾನು ಪತ್ರ. 
\v 2 ಕ್ಹುದಾ ತುಮೊನೆ ಪರಿಶುದ್ಧ ಕರಾನಾ ಹುತಿ ಘನ್ನಾ ದಿನ್ನ ಪಾಚೊ಼ ವಿಚಾರ ಕರಲಿದ್ಯೊತೊ. ತುಮೊನೆ ಪರಿಶುದ್ದ ಕರಾನೆ ಪರಿಶುದ್ದ ಆತ್ಮಾನು ತುಮೆ ಯೆಸು ಕ್ರಿಸ್ತನಾ ರಗತಕ್ಹು ಪರಿಶುದ್ದ ಥೈನ ತಿನೆ ವಧೆಯ ಥೌ ಕೈನ ಕ್ಹುದಾನಿ ವಿಚಾರ ವ್ಹತಿ. ಮರ್ಗಾ ವರಿ ಶಾಂತಿ ತುಮೊನೆ ಜಾಸ್ತಿ ಥಾವಾದೆ.
\s ಜಿವ್ತಿ ನಿರಿಕ್ಷೆ
\p
\v 3 ಅಪ್ನೊ ಪ್ರಭು ಥಯಲ ಯೆಸು ಬಾ ಥಯಲ ಕ್ಹುದಾನೆ ಸ್ತೊತ್ರಾ. ಕ್ಹುದಾ ಮ್ಹೊಟೊ ಮರಗಾಲೊ ವ್ಹೈ. ತೆ ತಿನಿ ಮರಗಾ ಕ್ಹು ಅಪೊನೆ ನವೊ ಜ಼ಲಮ ದಿದ್ಯೊಸ. ಮರಲವಾಲಾವೊಮಾತೊ ಉಟಿನ ಆಯಲ ಯೆಸು ಕ್ರಿಸ್ತನಾ ಮುಕಾಂತರ ತೆ ಅಪೊನೆ ವಾಚಾ಼ನೊ ಜ಼ಲಮ ದೆಕಾಡಿನ ದಿವಸ. 
\v 4 ಕ್ಹುದಾ ತಿನಾ ಬಚ್ಚಾವೊನೆ ದಿವಾನೊ ಆಶಿರ್ವಾದಮಾ ಆಸ ಛೆ. ತೆ ತುಮಾರಾ ಹುತಿ ಪರಲೊಕಮಾ ಮುಕ್ಕಲ ಛೆ. ತೆ ಹಾಳ ನೈ ಥಾತು ವರಿ ನಾಶ ಥಾತು ನೈ. ತಿನಿ ಸುಂದರ್ತಾ ಜವೈಲೆತು ನೈ. 
\v 5 ಕ್ಹುದಾನಿ ತಾಕತ ತುಮಾರಾ ಬರೊಕ್ಹಾನಾ ಹುತಿ ಕೈದಸ. ತುಮೊನೆ ರಕ್ಷಣೆ ಥಾಯೆ ಲಕ್ಕಾ ತುಮೊನೆ ಚೊ಼ಕಿತರಾ ಮುಕ್ಕಸ. ತಯ್ಯಾರ ರ‍್ಹಯಲ ಲಾಸ್ಟನಾ ದಿನ್ಮಾ ತುಮೊನೆ ಮಳಸ. 
\v 6 ಎ ತುಮೊನೆ ಘನ್ನಿ ಖುಶಿ ದಿವಸ. ತೆನೈಸೊ ತುಮೊನೆ ದಕ್ಹಾದಿನ್ನ ಘನ್ನಿತರಾನಿಯೊ ತ್ರಾಸೊ ಆವಸ ವರಿ ತೆ ತುಮೊನೆ ಘನ್ನು ದುಖ ದಿವಸ. 
\v 7 ತುಮಾರೊ ಬರೊಕ್ಹೊ ಘನ್ನೊ ಶುದ್ಧ ಛೆ ಕೈನ ದೆಕಾಡಾನಾ ಹುತಿ ತೆ ತ್ರಾಸ ಆವಸ. ತುಮಾರೊ ಬರೊಕ್ಹೊ ಚೊ಼ಕಾ ಕ್ಹೊನಾತಿ ಘನ್ನು ಮೊಗು ವ್ಹೈ. ಕ್ಹೊನು ಹಾಳ ಥೈ ಜಾ಼ವಸ ರ‍್ಹೈತಬಿ ತಿನೆ ಆಗ್ಮಾ ಕರಗೈನ ತಿನೆ ಸುಂದರತಾ ದೆಕಾಡಸ. ಯೆಸು ಕ್ರಿಸ್ತ ಅಪೊನೆ ದಿಖ್ತಾಮಾ, ತುಮಾರೊ ಬರೊಕ್ಹೊ ತುಮೊನೆ ಮರ್ಯಾದಿ ದಿಲಾವಸ. 
\v 8 ತುಮೆ ಕ್ರಿಸ್ತನೆ ನೈ ದೆಕ್ಯಾತಬಿ ತುಮೆ ತಿನೆ ಮಯಾ ಕರೊಶಿ. ಹಮ್ನಾ ತುಮೆ ತಿನೆ ನೈ ದೆಕ್ಯಾತಬಿ ತಿಪರ ಬರೊಕ್ಹೊ ಮ್ಹೆಲ್ಯಾಸ. ತುಮೊಮಾ ನೈ ಕವಾನಾ ಯಕ್ಕಲಿ ಖುಶಿ ಛೆ. ತೆ ಖುಶಿ ದೆಕಾಡಾನೆ ವ್ಹೈ. 
\v 9 ಯಾಕೆಂದರೆ ತುಮರಾ ಬರೊಕ್ಹೊನಾಹುತಿ ತುಮಾರಾ ಬರೊಕ್ಹಾನೆ ಯಕ್ಕ ಗುರಿ ಛೆ. ತಮಾರಿ ಆತ್ಮಾ ವಚಾ಼ಡು ಕವಾನಿ ತೆ ಗುರಿ ವ್ಹೈ. ತುಮಾರಿ ಗುರಿ ಥಯಲ ರಕ್ಷಣೆ ಹೊಂದಿಲಿವೊಸಿ. 
\v 10 ಪ್ರವಾದಿ ಎ ರಕ್ಷಣೆನಾ ಹುತಿ ಚೊ಼ಕಿ ತರಾ ಹುಡ್ಕಿನ ಪರಿಕ್ಷಾ ಕರಾನೆ ಕೊಶಿಶ ಕರ‍್ಯಾ. ತುಮೊನೆ ಅಗಿ ಮಳಾನಿ ಮರಗಾನೆ ಹುತಿ ತ್ಯುನೆ ಬೊಲ್ಯಾ. 
\v 11 ಕ್ರಿಸ್ತನಿ ಆತ್ಮಾ ತ್ಯುನೊಕನ ವ್ಹತಿ. ತೆ ಆತ್ಮಾ ಕ್ರಿಸ್ತನೆ ಥಾವಾನಿ ಕಷ್ಟ ವರಿ ತೆ ಥಯಲಪರ ತಿನೆ ತಿನಿ ಥಾವಾನಿ ಮಹಿಮಾನಾ ಹುತಿ ಕತಿತಿ. ತೆ ಪ್ರವಾದಿಯೊ ಆತ್ಮಾ ದೆಕಾಡಾನು ತಿಳ್ದಿಲಿವಾನೆ ಕೊಶಿಶಿ ಕರತಾತಾ. ತೆ ಕ್ಹಾರು ಕೆಳಾಮಾ ಥಾವಸ ವರಿ ತೆ ಟೈಮ್ಮಾ ಜಗತ್ತ ಕಿಮ ರ‍್ಹವಸ ಕೈನ ತಿಳ್ದಿಲಿವಾನೆ ಕೊಶಿಶ ಕರ‍್ಯಾತಾ. 
\v 12 ತೆ ಪ್ರವಾದಿಯೊ ಕರಲ ಸೆವಾ ತುಮಾರಾ ಹೊರತಾಗಿ ತಿವ್ನಾ ಹುತಿ ನ್ಹವೈ. ತ್ಯುನೊನೆ ಗ್ವತ್ತ ಥಯು. ಹಮ್ನಾ ತುಮೆ ಐಕಲ ಸಂಗತಿಯೊ ತ್ಯುನೆ ಕತಾಮಾ ತ್ಯುನೆ ತುಮಾರಿ ಸೆವೆ ಕರಾಡಾತಾ. ಸ್ವರಗಾತಾ ಮೊಕ್ಲಲ ಪವಿತ್ರ ಆತ್ಮಾ ಆಸ್ರಾಕ್ಹು ಸುವಾರ್ತೆ ಕದಲ ವಾಲಾಜ಼ ಎ ಸಂಗತಿಯೊ ಕದ್ಯಾ. ತ್ಯುನೊನೆ ತೀಳಸಲ ಸಂಗತಿಯೊನಾ ಹುತಿ ತಿಳದಿಲಿವಾಹುತಿ ದೆವ ದುತೊ ಕೈದಾಡ್ಯಾಸ.
\s ಪರಿಶುದ್ದ ಜಿವಿತನೆ ಬಲಾವಾನು
\p
\v 13 ತಿನಾಹುತಿ ತುಮೆ ತುಮಾರು ಮನಸ ಸೆವೆನಾ ಹುತಿ ತಯ್ಯಾರ ಕರಿಲಿವೊ. ತೆನೈಸೊ ತುಮೊನೆ ತುಮಾರಿ ಹತೊಟಿಮಾ ಮ್ಹೆಲ್ಲಿವೊ. ಯೆಸು ಕ್ರಿಸ್ತ ಅಪೊನೆ ದಿಕ್ಹಾನಾ ಟೈಮ್ಮಾ ತುಮೊನೆ ಮಳಾನಿ ಮರಗಾ ವರಿ ಮಳಾನಿ ವರಾ ಪರ ತುಮಾರಿ ಆಸ ಪುರಾ ರ‍್ಹೌ. 
\v 14 ತುಮೆ ಪೈಲಾ ಎ ಸಂಗತಿಯೊನಾ ಹುತಿ ನೈ ತಿಳದಿಲಿದಲ ಹುತಿ, ತುಮೆ ತುಮಾರಾ ಮನಸೆ ಆಯಲ ತಿಮ್ಮಜ಼ ಕೆಟ್ಟ ಕಾಮೊ ಕರ‍್ಯಾ. ಹಮ್ನಾ ತುಮೆ ವಿಧೆಯ ಥಯಲ ಕ್ಹುದಾನಾ ಬಚ್ಚಾ಼ ವ್ಹೈ. ತಿನಾಹುತಿ ತುಮೆ ಪೈಲಾ ಜಿವ್ನಾ ಕರಲ ತಿಮ್ಮಜ಼ ಹಮ್ನಾ ಕರೊ ನಕೊ. 
\v 15 ಕ್ಹುದಾ ಪರಿಶುದ್ಧ ರ‍್ಹಯಲಹುತಿ ತುಮೆ ಬೊಲಾನು ವರಿ ರ‍್ಹವಾನೊ ತರಿಕೊ ಶುದ್ಧ ರ‍್ಹವಾದೆ. ತುಮೊನೆ ಬಲಾಯಲವಾಲೊ ಕ್ಹುದಾಜ಼ ವ್ಹೈ. 
\v 16 "ಮಿ ಪರಿಶುದ್ಧ ರ‍್ಹಯಲಕ್ಹು ತುಮೆಬಿ ಪರಿಶುದ್ಧ ಥೈನ ರ‍್ಹೌ "ಕವಾನು ಪವಿತ್ರ ಬುಕ್ಕ ಕವಸ. 
\v 17 ತುಮೆ ಕ್ಹುದಾಕನ ಪ್ರಾಥನಾ ಕರತಾಮಾ ತಿನೆ ಬಾ ಕೈನ ಬಲಾವೊಶಿ. ಕ್ಹುದಾ ಹರಯಕ್ಲಾವೊನೆ ತ್ಯುನಾ-ತ್ಯುನಾ ಕಾಮೊಲಿಂಗತ ಪೈಸ್ಲೊ ಕರಸ. ತುಮೆ ಎ ದುನಿಯಾಮಾ ರ‍್ಹವಾಲಾ ವ್ಹೈ ಕೈನ ಕ್ಹುದಾನೆ ಭುಚಿ಼ಕಿನ ಜಿ಼ವ್ಸೊ. 
\v 18 ಪೈಲಾ ತುಮೆ ತುಮಾರಾ ಮನಸೆ ಆಯಲ ತಿಮ್ಮ ಜಿವ್ನಾ ಕರ‍್ಯಾತಾ ಕರತಾ ವ್ಹತ್ತಾ ತುಮೊನೆ ಗ್ವತ್ತ ಛೆ. ತುಮೊತೆ ಪೈಲಾ ಜಿವ್ನಾ ಕರಲವಾಲಾ ತ್ಯುನೊಕ್ಹು ತುಮೆ ಸಿಕ್ಯಾ. ತಿನಾಹುತಿ ತುಮೊನೆ ಬಿಡುಗಡೆ ಥಾವಾನು ಹಾಳಥಾವಾನು ಕ್ಹೊನಾ ರುಪ್ಪಕ್ಹು ನ್ಹವೈ. 
\v 19 ಪುರಾ ಅಂಗಥಯಲ ವರಿ ಪರಿಶುದ್ಧ ಥಯಲ ಬಕ್ರಾನು ಬಚ್ಚು಼ಥಯಲ ಯೆಸುನಾ ರಗತಕ್ಹು ತುಮೊನೆ ಮುಕ್ತಿ ಮಳಿ. 
\v 20 ಎ ಜಗತ್ತ ರಡಿ ಥಾವಾತಿ ಅಗ್ದುರಜ಼ ಯೆಸು ಇನೈಲಿದ್ಯೊ. ತೆನೈಸೊ ಎ ಜಗತ ಅಂತೆ ಥಾವಾನಾ ಟೈಮ್ಮಾ ತುಮೊನೆ ದಿಕ್ಹ್ಯೊಯೊ. 
\v 21 ತುಮೆ ಕ್ರಿಸ್ತನಾ ಮುಲಕ ಕ್ಹುದಾನೆ ವಳಕ್ಯಾ. ಕ್ಹುದಾ ಕ್ರಿಸ್ತನೆ ಮರಲವಾಲಾವೊಮಾತೊ ಜಿವ್ತೊ ಕರಿನ ಉಟಾಡ್ಯೊ. ಪಾಚಲ್ತೊ ಕ್ಹುದಾ ತಿನೆ ತಾಕತ ದಿದ್ಯೊ. ತಿನಾಹುತಿ ತುಮಾರೊ ಬರೊಕ್ಹೊ ವರಿ ಆಸ ಕ್ಹುಹುದಾಪರ ರ‍್ಹವಾದೆ. 
\v 22 ತುಮೆ ಕ್ಹರಿನೆ ವಿಧೆಯ ಥಾವಾನಾ ಮುಲಕ ತುಮೊನೆ ಪರಿಶುದ್ಧ ಕರಲಿದ್ಯಾ. ಹಮ್ನಾ ತುಮೆ ತುಮಾರಾ ಭಾಯೊ ಭೆನೊನೆ ಕ್ಹರಿಮಾಜ಼ ಮಯಾ ಕರಾಲಾ ಥಯಾಸ. ತಿನಾಹುತಿ ಯಕ್ಲಾಪರ ಯಕ್ಲೊ ಮನಸೆ ಮಯಾ ಕರೊ. 
\v 23 ತುಮೆ ನವೊ ಜ಼ಲಮ ಲಿನ ಹುಟ್ಟಲ ಲಿಂಗತ ವ್ಹೈ. ಎ ನವೊ ಜ಼ಲಮ ಹಾಳಥಾವಾನೊ ಜ಼ಲಮಕ್ಹು ನತ್ತಿ ಲಿದ್ಯಾ. ತೆ ಜ಼ಲಮ ಹಾಳ ನೈ ಥಾವಾನು ಜ಼ಲಮಕ್ಹು ಲಿದ್ಯಾಸ. ಜ಼ಲಮ ರ‍್ಹಯಲ ಹಮೆಶಾ ರ‍್ಹಯಲ ಕ್ಹುದಾನಿಯೊ ವಾತೊಕ್ಹು ತುಮೆ ನವೊ ಜ಼ಲಮ ಲಿದ್ಯಾಸ. 
\v 24 ಕ್ಹುದಾನು ಬುಕ್ಕ ಸು ಕವಸ ಕದ್ಯಾಮ ಕ್ಹಾರಾ ಮನಕ್ಹೊ ಚಾ಼ರಾ ಲಿಂಗತ ಛೆ. ತ್ಯುನೆ ಕರಾನು ಕ್ಹಾರು ಶೊಕ ಚಾ಼ರಾನಾ ಪ್ಹುಲ್ಲೊ ಲಿಂಗತ ಛೆ. ಚಾ಼ರೊ ವರೈಜಾ಼ವಸ. ಪ್ಹುಲ್ಲೊ ಉದ್ರಿ ಜಾ಼ವಸ. 
\v 25 ತೆನೈಸೊ ಕ್ಹುದಾನಿಯೊ ವಾತೊ ಹಮೆಶಾ ಜಿವ್ತಿಯೊ ರ‍್ಹವಸ. ತೆ ವಾತೊ ಸುವೈ ಕದ್ಯಾಮ ತಮನೊನೆ ಕದಲ ಸುವಾರ್ತಾನಿ ವಾಕ್ಯ ವ್ಹೈ. ಯೆಶಾಯ 40:6-8
\c 2
\s ಜಿವ್ತೊ ದಗಡೊ ವರಿ ಪವಿತ್ರ ಜನಾಂಗ
\p
\v 1 ತಿನಾಹುತಿ ಬಿಜಾ಼ ಮನಕ್ಹೊನೆ ಕೆಟ್ಟ ಕರೊನಕೊ. ಸುಳ್ಳ ಬೊಲೊ ನಕೊ, ಮೊಸಕರೊ ನಕೊ, ಸಂಗಟ ಘಾಲ್ಲಿವೊನಕೊ, ಮನಕ್ಹೊನಾ ಹುತಿ ಕೆಟ್ಟವಾತೊ ಬೊಲೊ ನಕೊ. ಎ ಕ್ಹಾರು ತುಮಾರಿ ಜಿವಿತಮಾತಾ ಭಾರಾ ಘಾಲೊ. 
\v 2 ಹಮ್ನಾ ಹುಟ್ಟಲ ಬಚ್ಚಾ಼ವೊ ಲಿಂಗತ ರ‍್ಹವೊ. ತುಮಾರಿ ಆತ್ಮಾ ಜ಼ತ್ತನ ಕರಲ ಲಿಂಗತ ಶುದ್ಧ ದುದ್ದನೆ (ಕ್ಹುದಾನಿಯೊ ವಾತೊ) ಆಸ ಕರೊ. ತುಮೆ ತೆ ಪಿದ್ಯಾಮ ಬೆಳ್ದಿನ ರಕ್ಷಣೆ ವ್ಹಂದೊಶಿ 
\v 3 ತುಮೆ ಹಮ್ನಾಜ಼ ಕ್ಹುದಾನಿ ಚೊ಼ಕಿತನಾನೆ ಸವಾದ ದೆಕ್ಯಾಸ. 
\v 4 ಪ್ರಭು ಥಯಲ ಯೆಸುನೆ ಜ಼ಲಮ ರ‍್ಹಯಲ "ದಗ್ಡೊ ವ್ಹೈ" ಎ ಜಗತ್ನಾ ಮನಕ್ಹೊ ತ್ಯುನೊನೆ ತೆ "ದಗ್ಡೊ" ನಕೊ ಕೈನ ಫೈಸಲೊ ಕರ‍್ಯಾ. ತೆನೈಸೊ ತೆ ಕ್ಹುದಾ ಇನಿಲಿದಲ "ದಗ್ಡೊ" ವ್ಹೈ ತೆ ಕ್ಹುದಾನಿ ನಜ಼ರಮಾ ಚೊ಼ಕೊ ವ್ಹೈ. ತಿನಾಹುತಿ ತಿನಾ ನಜಿಕ ಆವೊ. 
\v 5 ತುಮೆಬಿ ಜ಼ಲಮ ರ‍್ಹಯಲ ಮಂಗಾಳಾ ವ್ಹೈ. ಆತ್ಮಾನೆ ಸಂಬಂದ ಥಯಲ ದೆವಾಲಯ ಥಾವಾಹುತಿ ತುಮೆಜ಼ ತಯ್ಯಾರ ಥಾವಾಡ್ಯಾಸ; ಕ್ಹುದಾಕ್ಹು ಒಪ್ಪಿಲಿದ್ಯಲ ಆತ್ಮಿಕಕ್ಹು ಬಲಿಯೊ ದಿವಾನೆ ಯೆಸು ಕ್ರಿಸ್ತಕ್ಹು ಕ್ಹುದಾನೆ ದಿವಾನು ಪವಿತ್ರ ಯಾಜಕೊ ಥಯಾಸ. 
\v 6 ಪವಿತ್ರ ಗ್ರಂಥ ಸು ಕವಸ ಕದ್ಯಾಮ"ಮಿ ಚೊ಼ಕು ರ‍್ಹಯಲ ಮುಲಾಮಾ ಪಡ್ಯಲ ದಗ್ಡಾನೆ ಇನಿಲಿದ್ಯೊಸ. ಮಿ ತೆ ದಗಡಾನೆ ಚಿಯೊನಮಾ ಮ್ಹೆಲ್ಯೊಸ; ತುನೆ ಬರೊಕ್ಹೊ ಕರಾಲೊ ಕೆಳಾಮಾಬಿ ನಿರಾಸ ನೈ ಥಾತೊ "ಯೆಶಾಯ 28:16 
\v 7 ಬರೊಕ್ಹೊ ರ‍್ಹಯಲ ಮನಕ್ಹೊ ಥಯಲ ತುಮೊನೆ ತೆ ದಗ್ಡೊ (ಯೆಸು) ಘನ್ನೊ ಮೊಗಾನೊ ವ್ಹೈ. ತೆನೈಸೊ ನೈ ಬರೊಕ್ಹೊ ಕರಾಲಾ ಮನಕ್ಹೊನೆ ತೆ ಅಮ ಕದ್ಯೊಸ; "ಭಾಂದಾವಾಲಾ ನಕೊ ಕೈನ ಛೊಡಲ ದಗ್ಡೊಜ಼ ಮುಲಾನೊ ದಗ್ಡೊ ಥಯೊ" ಕಿರ್ತನೆ. 118:22 
\v 8 ನೈ ಬರೊಕ್ಹೊ ಕರಾಲಾವೊನೆ ತೆ; "ಮನಕ್ಹೊನೆ ಟೆಕ್ಹ ಲಾಗಾನೊ ದಗ್ಡೊ ಮನಕ್ಹೊನೆ ಪಾಡಾನೊ ದಗ್ಡೊ ಥಯೊಸ" ಯೆಶಾಯ 8:14 ಕ್ಹುದಾನಿ ವಾತ ನೈ ಐಕಾಕ್ಹು ಮನಕ್ಹೊ ಟೆಕ್ಹ ಲಗಾಡ್ಲಿನ್ ಪಡಸ. ತೆ ಮನಕ್ಹೊನೆ ಇಮ್ಮಥೌ ಕೈನ ಕ್ಹುದಾನಿ ವಿಚಾ಼ರ ವ್ಹತ್ತಿ. 
\v 9 ತುಮೆತುಬಿ ಕ್ಹುದಾ ಇನಿಲಿದ್ಯಲ ಜನಾಂಗ ರಾಜಾ಼ನಾ ಖಾಂದಾನನಾ ಯಾಜಕೊ ನೆಮಿಸಲ ಮನಕ್ಹೊ ಕ್ಹುದಾನಾ ಸ್ವಂತ ಮನಕ್ಹೊ ಥಯಾಸ. ಕ್ಹುದಾ ತೆ ಕರ‍ಲ ಘನ್ನಾ ಘಾಬ್ರಾಥಾವಾನಾ ಸಂಗತಿಯೊ ತಿಳಸಾನೆ ತುಮೊನೆ ಅಂದಾರಾಕ್ಹು (ಪಾಪಕ್ಹು) ತಿನಿ ಅದ್ಭುತ ಥಯಲ ಉಜಾ಼ಲಾಮಾ ಬಲೈನ ಲಾಯೊ. 
\v 10 ಯಕ್ಕ ಕಾಲಮಾ, ತುಮೆ ಕ್ಹುದಾನಾ ಮನಕ್ಹೊ ನ್ಹೊತಾ. ತೆನೈಸೊ ಹಮ್ನಾ ತುಮೆ ಕ್ಹುದಾನಾ ಮನಕ್ಹೊ ಥಯಾಸ. ಪೈಲಾ ತುಮೆ ಮರಗಾ ಮಳಿ ನ್ಹೊತಿ. ತೆನೈಸೊ ಹಮ್ನಾ ತುಮೆ ಕ್ಹುದಾನಿ ಮರಗಾ ಮಳಿಸ್.
\s ಕ್ಹುದಾನಾ ಆಳೊ
\p
\v 11 ಮಯಾನಾ ದೊಸ್ತೊ, ತುಮೆ ಎ ದುನಿಯಾಮಾ ಫರಾಲಾ ವರಿ ಬಿಜಾ಼ ಗಾಮವಾಲಾ ಲಿಂಗತ ಛೆ. ತಿನಾಹುತಿ ತುಮಾರಾ ಅಂಗೊನೆ ಪಸಂದ ರ‍್ಹಯಲ ಕೆಟ್ಟ ಸಂಗತಿಯೊಕ್ಹು ದುರ ರ‍್ಹೆ. ಎ ತುಮಾರಾ ಜ಼ಲಮನಾ ಆತ್ಮಾನೆ ವಿರುದ್ದ ಥೈನ ಲಡಸ. 
\v 12 ಬರೊಕ್ಹೊ ನೈಸೊ ಮನಕ್ಹೊ ಸುತ್ತೆ ಮುತ್ತೆ ಛೆ. ತುಮೆ ತಪ್ಪ ಕರಾಡಾಸ ಕೈನ ತ್ಯುನೆ ಕಸ. ತಿನಾಹುತಿ ಚೊ಼ಕಾ ಥೈನ ರ‍್ಹವೊ. ತುಮೆ ಕರಾನಾ ಚೊ಼ಕಾ ಕಾಮೊ ತ್ಯುನೆ ದೆಕಸ ವರಿ ಕ್ಹುದಾ ಆವಾನು ದಿನೆ ತಿನೆ ಸ್ತುತಿ ಕರಸ. 
\v 13 ಎ ಜಗತ್ನಾ ಅದಿಕಾರಿಯೊನೆ ವಿಧೆಯ ಥೈನ ರ‍್ಹವೊ. ಪ್ರಭುನಾ ಹುತಿ ಎ ಕ್ಹಾರು ಕರೊ. ಕ್ಹಾರು ಅದಿಕಾರ ರ‍್ಹಯಲ ರಾಜಾ಼ನೆ ವಿಧೆಯ ಥಾವೊ. 
\v 14 ರಾಜೊ಼ ಮೊಕ್ಲಾನಾ ಅದಿಕಾರಿಯೊನೆ ವಿಧೆಯ ಥಾವೊ. ತಪ್ಪ ಕರಾಲಾವೊನೆ ಶಿಕ್ಷಾ ದಿವಾನೆ ಚೊ಼ಕು ಕರಾಲಾವೊನೆ ಚೊ಼ಕಾ ವ್ಹೈ ಕೈನ ಕವಾಹುತಿ ತ್ಯುನೊನೆ ವಳಾಯೊಸ. 
\v 15 ತುಮೆ ಚೊ಼ಕು ಕರತಾಮಾ ತುಮಾರಾಹುತಿ ಕೆಟ್ಟ ವಾತೊ ಬೊಲಾಲಾವೊನೆ ಥಾತು ನೈ. ಕ್ಹುದನಿ ಮರ್ಜಿ ಎಜ಼ ವ್ಹೈ. 
\v 16 ಸ್ವತಂತ್ರ ಮಳಲವಾಲಾವೊಲಿಂಗತ ಜಿವ್ನಾ ಕರೊ. ತೆನೈಸೊ ತುಮೆ ಕರಾನು ಕೆಟ್ಟ ಕಾಮೊ ಝಾಕಾಹುತಿ ತೆ ಸ್ವತಂತ್ರ ಉಪಯೊಗ ಕರೊನಕೊ. ತುಮೆ ಕ್ಹುದಾನಿ ಸೆವೆ ಕರತಾ ಜಿವ್ತಾ ರ‍್ಹವೊ. 
\v 17 ಕ್ಹಾರಾ ಮನಕ್ಹೊನೆ ಮರ್ಯಾದಿ ದಿವೊ. ಕ್ಹುದಾನಾ ಘರವಾಲಾ ಭಾಯೊನೆ ಭೆನೊನೆ ಮಯಾಕರೊ. ಕ್ಹುದಾ ಕ್ಹು ಭುಚ಼ಕೊ ವರಿ ರಾಜಾ಼ನೆ ಮರ್ಯಾದಿ ದಿವೊ.
\s ಕ್ರಿಸ್ತನಿ ಶ್ರಮಾನಿ ಉದಾಹರಣೆ
\p
\v 18 ಸೆವೆ ಕರಾಲಾವೊ, ತುಮಾರಾ ಮಾಲಕೊನೆ ರ‍್ಹಯಲ ಅದಿಕಾರ ತುಮೆ ವಪ್ಪಿಲಿವೊ. ಎ ಕ್ಹಾರು ತುಮೆ ಘನ್ನಿ ಮರಯಾದಿಕ್ಹು ಕರೊ. ಚೊ಼ಕಾ ರ‍್ಹಯಲ ವರಿ ಮರಗಾಲಾ ಮಾಲಕೊನೆ ತುಮೆ ವಿಧೆಯ ಥೌ ವರಿ ಕೆಟ್ಟ ರ‍್ಹಯಲ ಮಾಲಕೊನೆಬಿ ವಿಧೆಯ ಥೈನ ರ‍್ಹೌ. 
\v 19 ಯಕ್ಲಾನೆ ಅನ್ಯಾಯಾ ಥಾತಿ ರ‍್ಹೈಮ ಕ್ಹುದಾನಾಹುತಿ ತಡ್ದಿಲಿನ ಗಯೊಮ ಕ್ಹುದಾ ತಿನೆ ಮೆಚ್ಚೆಸ. 
\v 20 ತೆನೈಸೊ ತುಮೊನೆ ತುಮೆ ತಪ್ಪ ಕರಿನ ಮಾರ ಖಾದ್ಯಾಮ ತುಮೊನೆ ಸು ಫೈದೊ? ತೆನೈಸೊ ಚೊ಼ಕು ಕರಿನ ತುಮೆ ಮಾರಾ ಖಾದ್ಯಾಮ ತೆ ಕ್ಹುದಾನಾ ಕ್ಹಾಮು ಚೊ಼ಕು ವ್ಹೈ. 
\v 21 ಇನಾಹುತಿ ತುಮೊನೆ ಬಲಾಯಾಸ. ತುಮೊನೆ ರ‍್ಹವಾನೊ ತರಿಕೊ ಯೆಸು ಕ್ರಿಸ್ತಜ಼ ವ್ಹೈ. ತೆ ಕರಲ ಲಿಂಗತಜ಼ ತುಮೆ ಕರೊ. ತುಮೊನೆ ತ್ರಾಸ ಆತಾಮಾ ತಡ್ದಿಲಿನ ರ‍್ಹೌ. ಕಾಕದ್ಯಾಮ ಕ್ಕರಿಸ್ತಬಿ ತ್ರಾಸ ಖಾದ್ಯೊ. 
\v 22 "ತೆ ಕಯುಜ಼ ಪಾಪ ಕರ‍್ಯೊನೈ. ತಿನಾ ಮ್ಹೊಡಾಮಾತು ಕೈಜ಼ ಸುಳ್ಳ ವಾತ ಐ ನೈ" \rq ಯೆಶಾಯ 53:9\rq* 
\v 23 ಮನಕ್ಹೊ ಕ್ರಿಸ್ತನೆ ಗಾಳೊ ದಿದ್ಯಾತಬಿ ತ್ಯುನೊನೆ ತೆ ಗಾಳೊ ದಿದ್ಯೊ ನೈ. ತೆ ತ್ರಾಸ ಖಾದ್ಯೊತಬಿ ಮನಕ್ಹೊನೆ ಭುಚ್ಕಾ಼ಡ್ಯೊ ನೈ. ತೆ ತಿನು ಕಾಮ ಕ್ಹುದಾಪರ ಛೊಡ್ಯೊ. ಕ್ಹರಿನೊ ಫೈಸಲೊ ಕರಾಲೊ ಕ್ಹುದಾ ಯಕ್ಕಲೊಜ಼ ವ್ಹೈ. 
\v 24 ಕ್ರಿಸ್ತ ಅಪ್ನಾ ಪಾಪೊ ತಿನಾ ಅಂಗಪರ ಉಚೈಲಿನ ಶಿಲುಬಿರ ಚ಼ಡ್ಯೊ. ಅಪೆ ಪಾಪನಾ ಹುತಿ ಜಿವ್ತಾ ರ‍್ಹಯಾವಾಚಿ಼. ಕ್ಹರಿಕ್ಹು ಜಿವ್ತಾ ರ‍್ಹೌ ಕೈನ ಮನಸ ವ್ಹತ್ತು. ತಿನಾ (ಕ್ರಿಸ್ತನಾ) ದುಕೊಕ್ಹು ತುಮೊನೆ ಅರಾಮ ಥಯು. 
\v 25 ತುಮೆ ವಾಟ ಚು಼ಕಲ ಬಕ್ರಾವೊ ಲಿಂಗತ ಛೆ. ವರಿಬಿ ತುಮಾರೊ ಕುರುಬುರ‍್ಯಾಕನ ಕದ್ಯಾಮ ತುಮಾರಿ ಆತ್ಮಾನೆ ವಚಾ಼ಡಾಲಾಕನ ಫರಿನ ಆಯಾಸ.
\c 3
\s ಮಾಟಿ ಬೈಕೊ
\p
\v 1 ಹೆಣ ಮನಕ್ಹೊ, ಇನಾಲಿಂಗತಜ಼ ತುಮಾರಾ ಮಾಟಿಯೊನೆ ಅಧಿನ ಥೈನ ರ‍್ಹವೊ. ತ್ಯುನೊಮಾ ದಕ್ಹಾಜ಼಼ನಾ ಕ್ಹುದಾನಿ ವಾಕ್ಯಾನೆ ಅವಿಧೆಯ ರ‍್ಹಯಾತಬಿ 
\v 2 ತುಮೆ ಕ್ಹುದಾನಿ ಭಯ ಭಕ್ತಿಮಾ ರ‍್ಹೈನ ಸುಜ಼ ಕಳಂಕ ನೈಸೊ ಜಿವ್ನಾ ಕರಾನು ತುಮೊನೆ ದೆಕಿನ ಕ್ಹುದಾನಿ ವಾಕ್ಯಾ ನೈ ಗ್ವತ್ತ ರ‍್ಹಯುತಬಿ ಕ್ಹುದಾನಿ ವಾಕ್ಯಾಪರ ತುಮೆ ಬರೊಕ್ಹೊ ಮ್ಹೆಲಲ ದೆಕಿನ ತುಮೆ ರ‍್ಹವಾನು ದೆಕಿನ ತ್ಯುನೊನೆ ಶಿಕ್ಕಸ. 
\v 3 ಮಾತಾನಾ ಬಾಲೊ ಚೊ಼ಕಿ ತರಾ ವಳ್ಳಿವಾನು ರ‍್ಹೈನೆಕಾ ಕ್ಹೊನಾನು ಸಾಮನ ಚೊ಼ಕಾ ವಣ್ಣಾ ರ‍್ಹೈನೆಕಾ ತುಮಾರಿ ಸುಂದರ್ತಾನೆ ತೆ ಸಾಮನ ಖಾಸ ಥಯನ ರ‍್ಹೌ 
\v 4 ತುಮೆ ರ‍್ಹವಾನೊ ತರಿಕೊ ಶಾಂತಿ ಸಮಾದಾನ ಥಯಲ ತುಮಾರಿ ಅಂತರಯಜ಼ ಚೊ಼ಕು ದಿಕ್ಹಾನು ರ‍್ಹೌ. ತೆ ಸುಂದರತಾ ಹಾಳಥಾತಿ ನೈ. ತೆ ಕ್ಹುದಾನೆ ಘನ್ನು ಮೊಗು ವ್ಹೈ. 
\v 5 ಘನ್ನಾ ದಿನ್ನಪಾಚಾ಼ ಜಿವ್ತಾ ರ‍್ಹಯಲವಾಲಾ ಕ್ಹುದಾನಿ ವಾಟ್ಮಾ ಚಾ಼ಲಿನ ಪರಿಶುದ್ಧ ಥಯಲ ಹೆಣ ಮನಕ್ಹೊ ಇನಾಲಿಂಗತಜ಼ ತಯ್ಯಾರ ಥೈನ. ತ್ಯುನೆ ತಿವ್ನಾ ಮಾಟಿಯೊನೆ ಅಧಿನ ಥಯ್ಯೊತಿಯೊ. 
\v 6 ಮಿ ಸಾರಾಳಾ ಲಿಂಗತ ರ‍್ಹಯಲ ಹೆಣ ಮನಕ್ಹೊನಾ ಹುತಿ ಕವಾಡ್ಯೊಸ. ತೆ ತಿನಾ ಮಾಟಿ ರ‍್ಹಯಲ ಅಬ್ರಹಾಮನೆ ವಿಧೆಯ ಥೈನ ವ್ಹತ್ತಿ, ತಿನೆ ತೆ ಮಾರೊ ಮಾಲಕ ಕೈನ ಕತಿತಿ. ಹೆಣ ಮನಕ್ಹೊ ಥಯಲ ತುಮೆ ಭುಚಕ್ಯಾವಾಚಿ ಕೆಳಾಮಾಬಿ ಚೊ಼ಕು ರ‍್ಹಯಲಜ಼ ಕರಿಯೊಮ, ತುಮೆ ಸಾರಳನಾ ಕ್ಹರಿನಾ ಬಚ್ಚಾ಼ ಥಾವೊಸಿ. 
\v 7 ದಾಣ್ಗಾವೊ, ಇನಾಲಿಂಗತಜ಼ ತುಮೆ ತುಮಾರಿ ಬೈಕೊವೊನೆ ಕಳೈಲಿನ ತುನಾ ಕ್ಹಾತೆ ಜಿವ್ನಾ ಕರು. ತುಮೆ ತುಮಾರಿ ಬೈಕೊವೊನೆ ಮರ್ಯಾದಿ ದ್ಯು. ತ್ಯುನೆ ತುಮೊತಿ ತಾಕತ ಕಮ ರ‍್ಹಯಲವಾಲಿಯೊ ವ್ಹೈ. ತೆನೈಸೊ ಕ್ಹುದಾ ತುಮೊನೆ ದಿವಾನೊ ಆಶಿರವಾದಜ಼ ಕದ್ಯಾಮ ಕ್ಹರಿನೊ ಜ಼ಲಮ ದಿವಾನು ಮರಗಾ ತುಮಾರಿ ಬೈಕೊವೊನೆಬಿ ದಿವಸ. ತುಮೆ ಅಮ ಜಿವ್ನಾ ಕರತಾ ರ‍್ಹಯಾಮ ಪ್ರಾಥನಾ ಕರಾನೆ ತುಮೊನೆ ಅಡು ಥಾತು ನೈ.
\s ನಿತಿನಾ ಹುತಿ ಅನುಭೊಸಾನು ತ್ರಾಸ
\p
\v 8 ತಿನಾಹುತಿ ತುಮೆ ಕ್ಹಾರಾಜ಼ನಾ ಮಳಿನ ಶಾಂತಿಕ್ಹು ರ‍್ಹವೊ. ಯಕ್ನೆ ಯಕ್ಕ ಕಳೈಲಿವಾನು ಕೊಶಿಶ ಕರೊ. ಯಕ್ನೆ ಯಕ್ಕ ಭಾಯೊ ಲಿಂಗತ ಮಯಾ ಕರು. ಮರಗಾ ದೆಕಾಡಾಲಾ ವರಿ ಸಮಾದಾನ ರ‍್ಹಯಲವಾಲಾ ಥೌ. 
\v 9 ಕೆಟ್ಟ ಕರಲವಾಲಾವೊನೆ ಕೆಟ್ಟ ಕರ‍್ಯಾವಾಚಿ, ಮನಸ ದುಖ ಕರಲವಾನಲಾವೊನೆ ಮನಸ ದುಖ ಕರ‍್ಯಾವಚಿ, ತ್ಯುನೊನೆ ಆಶಿವ್ರಾದ ಕರಕೈನ ಕ್ಹುದಾಕನ ಮಾಂಗಿಲಿವೊ ಕಾಕದ್ಯಾಮ ಆಶಿವ್ರಾ ವ್ಹಂದಿಲಿವಾನೆ ತುಮೆ ಬಲೈಲಿದಲವಾಲಾ ಥಯಾಸ. 
\v 10 ಕ್ಹುದಾನು ಬುಕ್ಕ ಸು ಕವಸ ಕದ್ಯಾಮ" ಎ ಜಿವಿತ್ಮಾ ಖುಶಿ ರ‍್ಹತಾ ಚೊ಼ಕಾ ದಿನ್ನೊ ಆಸ ಕರಾಲಾ ಕೆಟ್ಟ ವಾತೊ ನೈ ಕವಾಲಾ ಥಾವೊ. ಸುಳ್ಳ ಬೊಲೊ ನಕೊ. 
\v 11 ತೆ ಕೆಟ್ಟ ಕರ‍್ಯಾವಾಚಿ ಚೊ಼ಕುಜ಼ ಕರೆನಕಾ. ತೆ ಸಮಾದಾನ ಮಳಾನು ದೆಕ್ತೊ ತಿನಾಹುತಿ ತೆ ಮಳಾದೆ ಕೈನ ಕೊಶಿಶ ಕರಾದೆ. 
\v 12 ಕ್ಹರಿಕ್ಹು ರ‍್ಹಯಲವಾಲಾವೊನಾ ಪ್ರಭು ಕೈದಸ. ತ್ಯುನಿ ಪ್ರಾಥನಾ ಐಕಸ. ತೆನೈಸೊ ಕೆಟ್ಟ ಕರಾಲಾ ಮನಕ್ಹೊನೆ ಪ್ರಭು ವಿರೊದ ಕರಸ. \rq ಕಿರ್ತನೆ 34:12-16\rq* 
\v 13 ತುಮೆ ಕೆಳಾಮಾಬಿ ಚೊ಼ಕೊಜ಼ ಕರಾನು ಕೊಶಿಶ ಕರತಾ ರ‍್ಹಯಾಮ, ಕುನ್ನಜ಼ ತುಮೊನೆ ಕೆಟ್ಟ ನೈ ಕರತು. 
\v 14 ತೆನೈಸೊ ಚೊ಼ಕು ಕರತಾಮಾ ತುಮೆ ತ್ರಾಸ ಖಾ ಸಕೊಶಿ. ತೆನೈಸೊ "ತುಮೊನೆ ತ್ರಾಸಮಾ ಘಾಲಾನಾ ಮನಕ್ಹೊನೆ ಭುಚ಼ಕೊ ನಕೊ ವರಿ ಚಿಂತಾ ಕರೊ ನಕೊ" 
\v 15 ತ್ಯುನಾ ಧಮ್ಕಿಯೊನೆ ಬುಚ್ಕ್ಯಾ ಬಗರ ತುಮಾರಾ ಮನಸೊಮಾ ಕ್ರಿಸ್ತಜ಼ ಪ್ರಭು ಥೈನ ರ‍್ಹವಾದೆ. ತುಮೊಮಾ ಯಕ್ಕ ಆಸನೆ ಸು ಆದಾರ ಛೆ ಕೈನ ತುಮೊನೆ ಪುಚ್ಚಾ಼ಲಾ ಹರಿಯಕ್ಕಲಾನೆ ಜವಾಬ ದಿವಾನೆ ಕೆಳಾಮಾಬಿ ತಯಾರ ಥೈನ ರ‍್ಹವೊ. ತೆನೈಸೊ ಸಾತ್ವಿಕತೆಕ್ಹು ಮರಯಾದಿಕ್ಹು ತ್ಯುನೊನೆ ಜವಾಬ ದಿವೊ. 
\v 16 ತೆನೈಸೊ ಸಾತ್ವಿಕತೆಕ್ಹು ಮರಯಾದಿಕ್ಹು ತ್ಯುನೊನೆ ಜವಾಬ ದಿವೊ. ತುಮೆ ಕರಾನು ಚೊ಼ಕು ವ್ಹೈ ಕದ್ಯಾಮ ತುಮೊನೆ ಕೆಳಾಮಾಬಿ ತಿಳ್ದಾದಾದೆ ತೆಳಾಮ ತುಮೆ ಕ್ರಿಸ್ತಮಾ ಚೊ಼ಕಾ ಥೈನ ಜಿವ್ನಾ ಕರಾನು ದೆಕಿನ ತುಮಾರಾ ಹುತಿ ಕೆಟ್ಟ ಬೊಲಾಲಾ ತ್ಯುನೆ ಕದಲ ಕೆಟ್ಟ ಕಾಮೊನಾ ಹುತಿ ಸರಮಾವಸ. 
\v 17 ಕೆಟ್ಟ ರ‍್ಹಯಲ ಕರಿ ತ್ರಾಸ ಖಾವಾತಿ ಚೊ಼ಕು ಕರಿನ ತ್ರಾಸ ಖಾವಾನು ಚೊ಼ಕು ವ್ಹೈ. ಹೊ ತೆ ಕ್ಹುದಾನಿ ಆಸ ರ‍್ಹೈಮ ತೆಜ಼ ಚೊ಼ಕು ವ್ಹೈ. 
\v 18 ತುಮಾರಾ ಪಾಪೊನಾ ಹುತಿ ಕ್ರಿಸ್ತ ಯಕ್ಕಸಲಾ ತ್ರಾಸ ಖೈನ ಮರ‍್ಯೊ ಕ್ಹರಿಕ್ಹು ರ‍್ಹಯಲ ತೆ ಅಪರಾದಿಯೊನಾ ಹುತಿ ಜ಼ಲಮ ದಿದ್ಯೊ. ತುಮೊನೆ ಕ್ಹಾರಾವೊನೆ ಕ್ಹುದಾ ಕನ ಚ಼ಲಾವಾನಾಹುತಿ ತೆ ತಿಮ್ಮ ಕರ‍್ಯೊ. ತಿನೊ ಅಂಗ ಖಲಾಸ ಕರಾಯಾ. ತೆನೈಸೊ ತೆ ಆತ್ಮಾನಿ ಸಂಭದಮಾ ಜಿವ್ತೊ ಥಯೊ. 
\v 19 ಪಾಚಲ್ತೊ ತೆ ಆತ್ಮಾನಾ ರುಪಮಾ ಗೈನ ಜೆಲ್ಮಾ ರ‍್ಹಯಲ ಆತ್ಮಾವೊನೆ ಕ್ಹುದಾನಿ ವಾತ ಕದ್ಯೊ. 
\v 20 ಘನ ದಿನ್ನ ಪಾಚಾ಼ ನೊಹಾನಾ ದಿನೊಮಾ ಕ್ಹುದಾನೆ ಅವಿದೆಯ ಥಯಲವಾಲಾಜ಼ ತ್ಯುನೆ. ನೊಹಾ ಹಡ್ಗೊ ಭಾಂದತಾಮಾ ಕ್ಹುದಾ ಸಮಾದಾನಕ್ಹು ಕೈದಾಡ್ಯೊತೊ. ದಕ್ಹುಜ಼ನಾ ಕದ್ಯಾಮ ಕ್ಹಾಲಿ ಆಟ್ ಜ಼ನಾ ತೆ ಹಡಗಾಮಾ ಪಾನಿಕ್ಹು ವಾಚ್ಯಾ. 
\v 21 ತೆ ಪಾನಿ ಹಮ್ನಾ ತುಮೊನೆ ವಚಾ಼ಡಾನು ರ‍್ಹಯಲ ತೆ ದಿಕ್ಕಷಾಸ್ನಾನ ರ‍್ಹಯಲ ಲಿಂಗತ ಛೆ. ಬಾಪ್ತಿಸ್ಮ ಅಂಗನಿ ರಾಡಿ ಧ್ವಯಲ ಲಿಂಗತ ನ್ಹವೈ. ತೆ ಚೊ಼ಕಿ ಮನಸ ಸಾಕ್ಷಿ ಚಾ಼ಯೆ ಕೈನ ಮಾಂಗಿಲಿದಲ ಲಿಂಗತ ಛೆ. ಯೆಸು ಕ್ರಿಸ್ತ ಮರಣಕ್ಹು ಉಟಿನ ಆಯಲಕ್ಹು ತೆ ತುಮೊನೆ ವಚಾ಼ಡಸ್. 
\v 22 ಹಮ್ನಾ ಯೆಸು ಸ್ವರಗೆ ಗಯೊಸ ತೆ ಕ್ಹುದಾನಾ ಬಾಜು಼ಮಾ ಛೆ. ತೆ ಕ್ಹುದಾನಾ ದುತೊನೆ ಅದಿಕಾರಿಯೊನೆ ತಾಕತನೆ ಆಳಾಡ್ಯೊಸ.
\c 4
\s ಜಿವಿತ ಬದಲಿ
\p
\v 1 ಕ್ರಿಸ್ತ ಮನಕ್ಹನು ಅಂಗ ಲಿದಲ ಟೈಮ್ಮಾ ತ್ರಾಸ ಅನುಭವಿಶೊ. ತಿನಾಹುತಿ ಕ್ರಿಸ್ತಮಾ ರ‍್ಹಯಲ ಮನಸ ತುಮೆ ವ್ಹಂದಲಿನ ತುಮಾರಾ ಕ್ಹು ತುಮೆ ತಾಕತ ಭರಲಿವೊ. ಅಂಗಕ್ಹು ತ್ರಾಸ ಖಾದಲ ಮನಕ್ಹ ಪಾಕ್ಹು ಮುಕ್ತ ಥಯೊಸ. 
\v 2 ತಿನಾಹುತಿ ಎ ಜಗತ್ಮಾ ಮನಕ್ಹೊನಿ ಮರ್ಜಿ ಲಿಂಗತ ಕೆಟ್ಟ ಕಾಮೊ ಕರ‍್ಯಾವಾಚಿ, ಕ್ಹುದಾನಿ ಮರ್ಜಿ ಲಿಂಗತ ಕಾಮೊ ಕರತಾ ಜಿವ್ನಾ ಕರತಾ ತುಮಾರಾ ಕ್ಹು ತುಮೆ ತಾಕತ ಭರಲಿವೊ. 
\v 3 ಪೈಲಾ ಬರೊಕ್ಹೊ ನೈಸೊ ಮನಕ್ಹೊ ಕರಾನಾ ಕಾಮೊ ಕರತಾ ಘನ್ನು ಟೈಮ ಹಾಳ ಕರ‍್ಯಾ. ತುಮೆ ಲೈಂಗಿಕ ಪಾಪೊ ಕರಾಡಾಸ. ತುಮೊನೆ ಚೊ಼ಕುಲಾಗಲ ಕಾಮೊ ಕರಾಡಾಸ; ಪಿದೊಡಾ ಥಯಾಸ, ಕ್ರುರಿಯೊ ಥಯಾಸ, ಹಸೈ ರ‍್ಹಯಲ ನೈಸೊಕರಾನಾ ವರಿ ಮತ್ಲಬನಾ ಕಾಮೊ ವರಿ ಪಿವಾ ಖಾವಾನು ಚ಼ಲಾವಡ್ಯಾಸ. ಮೊರ್ತಿಯೊನೆ ಆರಾಧನಾ ಕರಾಡ್ಯಾ. 
\v 4 ತುಮೆ ಹಸೈ ರ‍್ಹಯಲ ವರಿ ನೈಸೊ ಕರಾನಾ ಕಾರ‍್ಯೊ ನೈಕಾರುನು ದೆಕಿನ ಬರೊಕ್ಹೊ ನೈಸೊವಾಲಾ ತುಮಾರಾ ಹುತಿ ಘಾಬ್ರಾಥಾವಸ. ತಿನಾಹುತಿಜ಼ ತ್ಯುನೆ ತುಮೊನೆ ಕೆಟ್ಟವಾತೊ ಕವಸ. 
\v 5 ತೆನೈಸೊ ಬರೊಕ್ಹೊ ನೈಸೊವಾಲಾ ತ್ಯುನೆ ಕರಾನಾ ಕಾಮೊನಾ ಹುತಿ ತ್ಯುನೆಜ಼ ಕೌ ಲಾಗಸ. ಮರಿಗಯಲ ಮನ್ಹೊನೆ ವರಿ ಜಿವ್ತಾ ರ‍್ಹಯಲ ಮನಕ್ಹೊನೆ ಫೈಸ್ಲೊ ಕರಾನೆ ತಯ್ಯಾರ ರ‍್ಹಯಲ ಕ್ರಿಸ್ತನೆ ತ್ಯುನೆ ತಿನೆ ವಿಚಾರಣೆ ದ್ಯು. 
\v 6 ಮರಿಗಯಲ ಮನಕ್ಹೊನೆ ಸುವಾರ್ತೆ ಕವಾಲಗಾಡ್ಯಾ. ತ್ಯುನೆ ಅಂಗನಾ ಸಂಭಂದಕ್ಹು ಮರವಾನಿ ಶಿಕ್ಷಾ ಮಳಿತಬಿ ಅತ್ಮಾನಾ ಸಂಬಂದಮಾ ಕ್ಹುದಾನಾ ಲಿಂಗತ ಜಿವ್ತಾ ರ‍್ಹೌಕೈನಜ಼ ಉಪದೆಶ ಕವಾಲಗಾಡ್ಯಾ.
\s ಕ್ಹುದಾನಾ ವರಾವೊನೆ ಚೊ಼ಕೊ ಚಲಾವಾಲೊ
\p
\v 7 ಕ್ಹಾರಾ ಕಾಮೊನೆ ಮುಗ್ಸಾನೊ ಟೈಮ ನಜಿ಼ಕ ಆಯೊಸ. ತುಮೆ ಗ್ಯಾನವಾಲಾ ಥೈನ ತುಮಾರಾಕ್ಹು ತುಮೆ ತುಮೊನೆ ಹತೊಟಿಮಾ ಮ್ಹೆಲ್ಲಿವೊ. ತುಮೊನೆ ಪ್ರಾಥನಾ ಕರಾಹುತಿ ಎ ತುಮೊನೆ ಸಹಾಯಾ ಕರಸ. 
\v 8 ತುಮೆ ಯಕ್ಲಾನ ಯಕ್ಲೊ ಹಮೆಶಾಬಿ ಮಯಾ ಕರಾನು ಘನು ಖಾಸ ವ್ಹೈ. ಮಯಾ ಘನಾ ಪಾಪೊನೆ ಝಾಕಿಪಾಡಸ. 
\v 9 ಗುಣ ಗುಟ್ಯಾವಾಚಿನ ಮಕ್ಹೊನೆ ಅತಿಥಿಸತ್ಕಾರ ಕರೊ. 
\v 10 ತುಮೊಮಾ ಹರಿ ಯಕ್ಲೊ ಕ್ಹುದಾ ಕಂತೊ ಆತ್ಮಿಕನಿ ವರಾ ಪಡ್ದಿಲಿದ್ಯಾಸ. ಕ್ಹುದಾ ತುಮೊನೆ ಘನ್ನಿತರಾಮಾ ತಿನಿ ಕೃಪಾಕ್ಹು ದಿದ್ಯೊಸ. ತುಮೆ ಕ್ಹುದಾನಿ ವರಾ ಉಪಯೊಗ ಜವಾಬ್ದಾರಿವಾಲಾ ಥೈನ ಸೆವಕೊ ಥಯಾಸ. ತಿನಾಹುತಿ ಚೊ಼ಕಾ ಸೆವಕೊ ಥಾವೊ. ಯಕ್ನಾ ಯಕ್ಕ ಸೆವೆ ಕರಾನೆ ತುಮೊನೆ ದಿದಲ ವರಾ ಉಪಯೊಗ ಕರೊ. 
\v 11 ಭೊದನೆ ಕವಾಲೊ ಕ್ಹುದಾನಿಯೊ ವಾತೊಜ಼ ಕವಾದೆ. ಸೆವೆ ಕರಾಲೊ ಕ್ಹುದಾ ದಿದಲ ತಾಕತಕ್ಹುಜ಼ ಸೆವೆ ಕರಾದೆ. ತುಮೆ ಇಮ್ಮ ಕರ‍್ಯಾಮ. ತುಮೆ ಕರಾನು ಹರಿಯಕ್ಕಮಾ ಯೆಸು ಕ್ರಿಸ್ತನಾ ಮುಲಕ ಕ್ಹುದಾನೆ ಸ್ತುತಿ ಥಾವಸ. ಅದಿಕಾರ ವರಿ ಮಹಿಮಾ ಯುಗೊ ಯುಗೊಮಾ ತಿನೆಜ಼ ಮಳಲ ವ್ಹೈ. ಆಮೆನ್.
\s ಕ್ರೈಸ್ತ ಥೈನ ಅನುಭವಿಸಾನು ತ್ರಾಸ
\p
\v 12 ಮಾರಾ ಮಯಾನ ದೊಸ್ತೊ, ತುಮೆ ಹಮ್ನಾ ಅನುಭವಿಸಾನು ಕಷ್ಟನಾ ಹುತಿ ಘಾಬ್ರಾ ಥಾವೊನಕೊ. ತೆ ತುಮಾರಾ ಬರೊಕ್ಹೊ ಪರಿಕ್ಷಾ ಕರಾಹುತಿ ಆವಸ. ಘನ್ನೊ ತ್ರಾಸ ಆವಸ ಕೈನ ತುಮೆ ವಿಚಾರ ಕರೊನಕೊ. 
\v 13 ತೆನೈಸೊ ತುಮೆ ಕ್ರಿಸ್ತನೊ ತ್ರಾಸ ವಾಟಿಲಿವಾಡ್ಯಾಸ ಕೈನ ತುಮೆ ಖುಶಿಕ್ಹು ರ‍್ಹವೊ. ಕ್ರಿಸ್ತ ತಿನಿ ಮಹಿಮಾ ದೆಕಾಡಾನಾ ಹುತಿ ತುಮೆ ಖುಶಿ ಕರೊಶಿ. 
\v 14 ತುಮೆ ಕ್ರಿಸ್ತಮಾ ರ‍್ಹಯಲ ಹುತಿ ತುಮಾರಾ ಹುತಿ ಮನಕ್ಹೊ ಕೆಟ್ಟ ಬೊಲ್ಯಾಮ ತುಮೆ ಭಾಗ್ಯವಂತವಾಲಾ ವ್ಹೈ. ಘನ್ನು ಉಜಾಲಾನು ಆತ್ಮಾ ತುಮೊಮಾ ಛೆ. ತೆ ಕ್ಹುದಾನಿ ಆತ್ಮಾ ವ್ಹೈ. 
\v 15 ತುಮೆ ಕೆಟ್ಟ ಮನಕ್ಹೊ ಥೌ ನೈ. ಮನಕ್ಹೊನೆ ಖಲಾಸ ಕರಾಲಾ ಥೌ ನೈ, ಚ್ವಟ್ಟಾ ಥೌ ನೈ, ವರಿ ಬಿಜಾ಼ವೊನೆ ತ್ರಾಸ ಕರು ನೈ. ಹೆವು ಕರಾಲಾ ತ್ರಾಸಮಾ ಪಡಸ. 
\v 16 ತುಮೆ ಕ್ರೈಸ್ತರೊ ಥಯಲಕ್ಹು ತ್ರಾಸ ಖಾದ್ಯಾಮ, ಸರಮಕ್ಹು ರ‍್ಹೌನೈ. ತೆ ( ಕ್ರೈಸ್ತ ) ನಾಮನಾಹುತಿ ತುಮೆ ಕ್ಹುದಾನೆ ಸ್ತೊತ್ರಾ ಕರೊ. 
\v 17 ತುಮಾರೊ ಫೈಸಲಾನೊ ದಿನ್ನ ಆಯೊಸ. ತೆ ಕ್ಹುದಾನಾ ಘರತು ಶುರು ಥಾವಸ. ತುಮೊಮಾಜ಼ ತೆ ಶುರು ಥಯುಮ್, ಕ್ಹುದಾನಿ ಸುವಾರತಾನೆ ವಿಧೆಯ ನೈ ಥಾವಾನಾ ಮನಕ್ಹೊನೆ ಸು ಥಾಸ? 
\v 18 "ಕ್ಹರಿಕ್ಹು ರ‍್ಹಯಲವಾಲೊ ರಕ್ಷಣೆ ವ್ಹಂದಾನೆ ಕಷ್ಟ ಥಯುಮ. ಭಕ್ತಿಮಾ ಕಮ ರ‍್ಹಯಲವಾಲೊ ವರಿ ಪಾಪಿನಿ ಗತಿ ಸುವೈ? \rq ಜ್ಞಾನೊಕ್ತಿ 11:31\rq* 
\v 19 ತಿನಾಹುತಿ ಕ್ಹುದಾನಿ ಆಸ ಲಿಂಗತ ತ್ರಾಸ ಕ್ಹಾವಾಲಾ ತ್ಯುನೆ ಜ಼ಲಮನಿ ಆತ್ಮಾ ತಿನೆ ವಪ್ಸಿನ ದ್ಯು. ತ್ಯುನೊನೆ ತಯ್ಯಾರ ಕರಲವಾಲೊ ಕ್ಹುದಾಜ಼ ವ್ಹೈ. ತಿನಾಹುತಿ ತ್ಯುನೆ ತಿನಾಮಾ ಬರೊಕ್ಹೊ ಮ್ಹೆಲೊ. ಇಮ್ಮ ರ‍್ಹತಾಮಾ ತ್ಯುನೆ ಚೊ಼ಕುಜ಼ ಕರತಾಜ಼ ರ‍್ಹೌ.
\c 5
\s ಕ್ಹುದಾನಾ ಮನಕ್ಹೊನು ಹಿಂಡ
\p
\v 1 ತುಮಾರಿ ಸಬೆಮಾ ಮ್ಹೊಟಾ ರ‍್ಹಯಲವಾಲಾವೊನಾ ಮಿ ದಕ್ಹಿಯೊ ವಾತೊ ಕೌ ಕೈನ ಛೆ. ಮಿ ಯಕ್ಲೊ ಮ್ಹೊಟೊ ಥಯೊಸ. ಮಿ ಕ್ರಿಸ್ತನೆ ತ್ರಾಸ ದಿವಾನು ಡೊಳೆ ದೆಕ್ಯೊಸ. ಹಮೊನೆ ದಿಕ್ಹಾನಾ ಟೈಮ್ಮಾ ಮಿ ತಿಮಾ ಭಾಗಿದಾರ ಥಯೊಸ. 
\v 2 ತುಮೆ ಸಬೆನಾ ಜವಾಬದಾರಿಲಿದಲವಾಲಾ ಸಬೆನೆ ರಾಕು ಕೈನ ಮಿ ಮಾಂಗಿಲ್ಯುಸ್. ತ್ಯುನೆ ಕ್ಹುದಾನಾ ಹಿಂಡ ವ್ಹೈ. ತುಮೆ ತೆ ಹಿಂಡನೆ ಕೈದೊ. ಕಾಕದ್ಯಾಮ ತೆ ತುಮಾರಿ ಆಸ ವ್ಹೈ. ತೆ ವಜ್ಜು಼ ಜ಼ಬರದಸ್ತಿಕ್ಹು ಉಚಾಯಲ ವಜ್ಜು಼ ನ್ಹವೈ. ಕ್ಹುದಾ ತೆಜ಼ ಆಸ ಕರಸ; ತುಮೆ ತೆ ಹಿಂಡನೆ ಕೈದಾನು ದೊಕ್ಕಡಾಹುತಿ ನ್ಹವೈ, ಕ್ಹುದಾನಿ ಸೆವೆ ಕರಾನು ತುಮೊನೆ ರ‍್ಹಯಲ ಕ್ಹುಶಿನಾ ಹುತಿ ವ್ಹೈ. 
\v 3 ತುಮೆ ಜವ್ದಾರಿರ‍್ಹಯಲವಾಲಾ ತೆ ಹಿಂಡಪರ ಜ಼ಬರದಸ್ತಿ ಕರೊ ನಕೊ. ತುಮೆ ತ್ಯುನೊನೆ ಚೊ಼ಕಿ ಸಾಕ್ಷಿ ಥಾವೊ. 
\v 4 ಮ್ಹೊಟೊ ಕುರಬುರ‍್ಯೊ (ಕ್ರಿಸ್ತ) ದಿಕ್ಹತಾಮಾ, ತುಮೊನೆ ಮಾತಾಪರ ಕಿರಿಟ ಮಳಸ. ಮ್ಹೊಟಿ ತಾಕತಮಾ ರ‍್ಹಯಲ ತೆ ಕಿರಿಟ ತಿನೆ ಕಳಾ ಜ಼ವೈಲಿತಿಜ಼ ನೈ. 
\v 5 ಜಾಂಜಿಮಾನೊ ಮಿ ತುಮೊನೆ ದಕ್ಹಿಯೊವಾತೊ ಕೌ ಕೈನ ಛೆ. ತುಮೆ ಮ್ಹೊಟಾವೊನೆ ಅಧಿನ ಥೈನ ರ‍್ಹವೊ. ತುಮೆ ಯಕ್ನಾ ಯಕ್ಕ ಮಯಾಕ್ಹು ಚಾ಼ಲಿಲಿವೊ. ಕ್ಹುದಾ ಸ್ವಕ್ಕ ರ‍್ಹಯಲವಾಲಾವೊನಾ ವಿರುದ್ದ ವ್ಹೈ. ತೆ ನೈ ತಗ್ಗಿನ ರ‍್ಹಯಲ ಮನಕ್ಹೊನೆ ಮರಗಾ ದೆಕಾಡಸ್" \rq ಜ್ಞಾನೊಕ್ತಿ 3:34\rq* 
\v 6 ತಿನಾಹುತಿ ಕ್ಹುದಾನಾ ಹತೊನಾ ತಾಕತನಾ ಹೆಟಾ ರ‍್ಹಯಲವಾಲಾ ತಗ್ಗಿನ ರ‍್ಹವೊ. ಚೊ಼ಕೊ ದಿನ್ನ ಆಯಲಪರ ತುಮೊನೆ ಉಪ್ಪರ ಉಚಾವಸ. 
\v 7 ತೆ ತುಮೊನೆ ರಾಕಲ ಹುತಿ ತುಮಾರಿ ಚಿಂತಾ ತಿನೆ ವಪ್ಸಿನ ದಿವೊ. 
\v 8 ಯಕ್ಕಜ಼ ಮನಸ ವಾಲಾರ‍್ಹವೊ ವರಿ ಹುಶಾರ ಥೈನ ರ‍್ಹವೊ. ಸೈತಾನ ತುಮಾರೊ ದುಶ್ಮನ ವ್ಹೈ. ತೆ ವದ್ರಾನೊ ಶಿಯ್ಯಾ ಲಿಂಗತ ಕಿನೆ ಖೌ ಕೈನ ಹುಡ್ಕತೊ ರ‍್ಹವಸ ತೆ ಮನಕ್ಹೊನೆ ಹುಡ್ಕಾಡ್ಯೊಸ. 
\v 9 ತುಮಾರಾ ಬರೊಕ್ಹಾಮಾ ಘಟ್ಟರ‍್ಹೈನ ತಿನೆ ದೆಕೊ. ಕಾಕದ್ಯಾಮ ಜಗತ್ಮಾ ರ‍್ಹಯಲ ತುಮಾರಾ ಭಾಯೊ ಭೆನೊ ತುಮೊನೆ ರ‍್ಹಯಲ ತ್ರಾಸ ಖಾವಾಡ್ಯಾಸ ತುಮೊನೆ ಗ್ವತ್ತ ಛೆ. 
\v 10 ಹೊ, ತುಮೆ ದಕ್ಹಾಜ಼಼ ದಿನ್ನ ತ್ರಾಸ ಖಾವೊಸಿ, ತೆ ಥಯಲಪರ ಕ್ಹುದಾ ಕ್ಹಾರು ಕರೆಟ್ಟ ಕರಸ. ತೆ ತುಮೊನೆ ತಾಕತ ದಿವಸ. ತುಮೆ ಹೆಟಾ ಪಡೆನೈಸೊ ತೆ ತುಮೊನೆ ಅಸ್ರೊ ಥೈನ ರ‍್ಹವಸ. ಕ್ಹಾರಾವೊನೆ ಮರಗಾ ದೆಕಾಡಾಲೊ ಕ್ಹುದಾ ತೆಜ಼ ವ್ಹೈ. ತಿನಾ ತಾಕತಮಾ ಪಾಲ ಲಿವಾಲಾ ಕ್ರಿಸ್ತಜ಼ ತುಮೊನೆ ಬಲಾಯೊ. ತೆ ತಾಕತ ಹಮೆಶಾ ರ‍್ಹಯಲ ವ್ಹೈ. 
\v 11 ಕ್ಹಾರೊ ಅದಿಕಾರ ತಿನೊಜ಼ ವ್ಹೈ. ಆಮೆನ್.
\s ಲಾಸ್ಟನಿಯೊ ವಂದನೆ
\p
\v 12 ಮಿ ಆ ನ್ಹಾನು ಪತ್ರ ಸಿಲ್ವಾನನಾ ಆಸ್ರಾಕ್ಹು ಬರ್ದ್ಯೊ. ತೆ ಕ್ರಿಸ್ತಮಾ ರ‍್ಹೈನ ಬರೊಕ್ಹಾವಾಲೊ ಭೈ ವ್ಹೈ ಕವಾನು ತುನೆ ಗ್ವತ್ತ ಛೆ. ಮಿ ತುನೆ ಪೊಕ್ಹಾಲಾವಾನೆ ವರಿ ಅಗೊ ಬಡಾನೆ ಎ ಪತ್ರ ಬರ್ದ್ಯೊಸ. ಎಜ಼ ಕ್ಹುದಾನಿ ಕ್ಹರಿನಿ ಮರಗಾ ಕವಾನು ತುಮೊನೆ ಕೌ ಕೈನಜ಼ ಮಾರಿ ಆಸ ವ್ಹತಿ. ತೆ ಮರಗಾಮಾ ಘಟ್ಟ ಥೈ ರ‍್ಹವೊ. 
\v 13 ಬಾಬಿಲೊನಮಾ ರ‍್ಹಯಲ ಸಭೆವಾಲಾ ತುಮೊನೆ ನಮಸ್ಕಾರ ಕದ್ಯಾಸ. ತುಮೊನೆ ಇನಿಲಿದಲ ಲಿಂಗತಜ಼ ತೆ ಮನಕ್ಹೊನೆ ಇನಿಲಿದ್ಯಾಸ. ಕ್ರಿಸ್ತಮಾ ಮಾರೊ ದಿಕ್ರೊ ಥಯಲ ಮಾರ್ಕ ತುಮೊನೆ ನಮಸ್ಕಾರ ಕದ್ಯೊಸ. 
\v 14 ತುಮೆ ಮಳಲ ಟೈಮ್ಮಾ ಯಕ್ನಾ ಯಕ್ಕ ಮಯಾಕ್ಹು ಮಟ್ಟಿ ದಿವೊ. ಕ್ರಿಸ್ತಮಾ ರ‍್ಹಯಲ ತುಮೊನೆ ಕ್ಹಾರಾವೊನೆ ಸಮಾಧಾನ ಥಾವಾದೆ.