\id PHP - BLANK based on TPB 99
\ide UTF-8
\ide 
\rem 
\h 
\toc3 Pl
\toc2 Pl
\toc1 Pilipai
\mt2 Polue Pilipai
\mt xosa niki nakau xayawotai
\imt Akeri Kuna
\ip Ximuximu Polue xasi xusana Yurop masaira xowoyai yause xosa, nue xouna erewese Pilipai propinsi Masetonia xosa asinaku kuna uteiwotai. (Yesusupo Tianuwopi Teu 16.8-15 xekoa) Xurise xouna kire erewese purati kakauya atoro iyareteneai. Kakauya xosa purotai yause xosa kireu apimie Yesusure xonikisuwoteneai apimi Pilipai puroteneai nikau xonikisu pororinikepure xeteneaire kuna iyesetai. Pana pa nakau Polue Pilipai xesarinikeyai ninaxinukua, pa sapie kakeri Polupo xoukemu xoxixeki xekokixe. Xuwe. Nu Yesusureni xiri xousuna nimariri purotai.
\ip Ekime Polu nu xeara xiri xuweitauwati, Pilipai apimie nu tianuwopure xe xesauruwoneai. Pa xati Pilipai apimie kakeneai kapiaure Polue mua nakau xosa eiyaseniketai. Pa xeika, Polue kakauya xosa purinaxi xokupa nanunanu tineri xonikikemu xoxixetexina, ninipo xonikisu sokisokiwopure xetai.
\ip Xoiteue nini kokaipa sapie xoniki iwoyaire Polue nini kaniketai. Paiya ninie Kristusu Yesusu xosa pa oma ekinikioma teteneai. Nue ipaki kunauna ninie Yuta nikau tu taiwoneaire pa sapie xoniki iwoneaixe. Xuwe. Ninie Yesusure kireni xonikisuwoneai. Pilipai apimie Kristusupo kapia tepinerire Polue xiri xouweiwotai. Kristusue nanuna ye iko kirenie kokaipa apu xina nukou nanunanuni taiwotaixe. Xuwe. Nu nukoini nuko touweina pa saina Xoiteue tuwoyai tetai. Polue ipaki kunauna Kristusu xeika xiri etokeneai xuiapu paiya, nini Xoiteupo xoukuru tirouneri xati, nini pani pani nimaririrouneri.
\ip Sini mua nakau ninaxinuku paiya, Yesusure xonikisuwoteneai xuiapu Pilipai erewese poroteneai Polue xiri xouweniketaire sipaunuku.
\c 1
\ms Pilipai kinie Polu xeikani lixeri Polue xiri nimaririwowotai
\mr Pl 1—4
\p
\v 1 Sini\x - \xo 1.1 \xo*\xt YT 16.12-40\xt*\x* Poluno Timotino, sini Kristusu Yesusupo saina apimi, sinie tini Yesusu Kristusupo xokupa xuiapu erewese Pilipai purikiriai xeika tini yayakutua xeika tini saina apimi xeika xosa mua nakau xayaritikinuku. 
\v 2 Sikou Emisiki\x - \xo 1.2 \xo*\xt Ro 1.7;Ka 1.3;Pm 3\xt*\x* Xoiteu xeika, Kokaipa Yesusu Kristusu xeikae tinire xousuaxati xouwetikatia, tini xotiki kurunari purakuai.
\s Polue Xoiteu eiyasewotai
\p
\v 3 Ye xokupa yause\x - \xo 1.3 \xo*\xt Ro 1.8;1 Ko 1.4;Ep 1.15-16\xt*\x* tinire nanunanune paiya, yeu Xoiteu xosa eiyaseuroune. 
\v 4 Tini tianitikepure xokupa kunikuni kunikunixine paiya, ye sipesi nimaririne kunikuniroune. 
\v 5 Ye tinire nimaririroune, pa amure, tinie asinaku kuna uteiwopi saina xosa sini xeika lixinuku ximuximuni saina tipa kounuku kounuku mua yause xinuku. 
\v 6 Ye\x - \xo 1.6 \xo*\xt Yo 6.29;1 Ko 1.8;Pl 1.10; 2.13;1 Ts 1.3\xt*\x* panumu sipauweitiai, Xoiteu nukoini tini xosa asinaku saina sareyai xati, saina tixouna xounapa Kristusu Yesusupo Asau xosa pa saina xuweiyepina. 
\v 7 Tini yeu xoikemu tuporo purinuku, pa xati ye tinire mua asinaku nanunanu tuku xitiaia asinaku. Ye kakauya xosa puritire e ye asinaku kuna tianune sokisokiwopi saina titi rania Xoiteu nukoe yeure xousuaxati xouweina sietai saina xosa tini xokupae ye xeika lixinuku saina tikiriai. 
\v 8 Xoiteu\x - \xo 1.8 \xo*\xt Ro 1.9;2 Ko 1.23\xt*\x* nu muanumu sipa, Kristusu Yesusu nukou xousuae kakati ye saiyerati tini xokupa xeketikepure xiri xoieune.
\p
\v 9 Ye sipesi\x - \xo 1.9 \xo*\xt 1 Ts 3.12;Pm 6\xt*\x* ipakine kunikunine, tinipo ekitikioma xosa paiya kireu xotikienikepi kapiae xiri sokisoki xati, tini xokupa sipa tuku xaria, tinipo nanunanu xiri teteiwopinaxi kunikuniroune. 
\v 10 Kakatia\x - \xo 1.10 \xo*\xt Ro 12.2;Ep 5.10;Pl 1.6; 2.16;1 Ts 3.13;Ip 5.14\xt*\x* tinie xokupa kapia atinari uteinaria asinaku kapiani kutu takuai. Kakaria Kristusue xuiapu kuna xosa iyainikerepina Asau xosa, tini xiri xoseini kutu kire xu tuku purakuaixe. 
\v 11 Kakaria Yesusu Kristusue kapia kutu asinaku yararirounae tini xosa xiri koxepina. Kakati xuiapue xekerineri Xoiteu kokaipa wenumu tuneria nupo wenumu xourorepineri.
\s Polue kakauya xosa purati paie asinaku kuna tianuna
\p
\v 12 Xatai xura\x - \xo 1.12 \xo*\xt 2 Ti 2.9\xt*\x*, tini sipawakuaire ye kunaune, mua kapia ye xosai akipa xetai paiya, asinaku kuna parawatixe. Xuwe. Paie kakati asinaku kuna sokisoki xina. 
\v 13 Pa xati\x - \xo 1.13 \xo*\xt YT 28.30;Ep 3.1\xt*\x* Sisaripo ata yakuwopineri xokupa xomatua kini xeika kireu apimi xokupa xeikae rania, ye kakauya xosa nikoe iyaiyereteneai nini sipa, pa amure, ye Kristusupo saina tine. 
\v 14 Kakiti xataimana nikau kokaipa apimi kinie, ye kakauya xosa puriti nanuworineri, paie ninipo xonikikemu sokisoki xati Kokaipa xosa sokisoki xonikisuneri. Kakineri ximikepi xuweu pani sokisoki xineri Xoiteupo kuna uteineri.
\p
\v 15 Suau, kireue xekoria apimie yeu wenimi xouroreri, paire xonikikemu tatauwati, yeu wenimi xororepure xeteneai, pa xotaparei sore ninie Kristusupo kuna uteiwoteneai. Pana kireua nini asinaku nanunanu tuku xati kuna uteiwoteneai. 
\v 16 Pa apimi nini sipa, ye asinaku kunapu saina sokisokiwopure kakauya xosa purine, pa xati yeure xiri xonikieineri kuna uteineri. 
\v 17 Pana kireu apimi paiya nikou weninikini xourorepure, Kristusupo kuna uteineri. Nini nanunanu asinaku kutu tukue kakerixe. Xuwe. Ye kakauya xosa puritia kireu xu pani xosai soxepure kakineri. 
\v 18 Pana nini asinaku nanunanu tukure e xoxi tuku rania, pa xokupa apimie Kristusupo kuna uteirouneri xati, paie kakati yeu xoikemu xiri nimaririna.
\s Ye ekioma purineia Pilipai tianikepinexi Polue nanuna
\p
\v 19 Ye pani\x - \xo 1.19 \xo*\xt 2 Ko 1.11\xt*\x* nimaririwopine, pa amure, ye sipa, Xoiteue tianiyepinaure tinie sipesi kunikunirounuku xati, Yesusu Kristusupo Youyae ye sokisokirouwatia, pa imerei Xoiteue tianiyati ye kakauya wetinei somo puropine. 
\v 20 Pa xati\x - \xo 1.20 \xo*\xt Ro 5.5; 8.19;Ep 6.19-20;1 Pi 4.16\xt*\x* yei kire kapia xoxi kakerinei maya tepi xiraxine. Xuwe. Ye xokupa yause kakiroune sie, ximine xeika sewai xeika rania ye sokisokini kutu tumuneia asinaku asinaku kapia kireni kakepinexi nanune. Kakinei ekioma puropinere e xumutia, ye xokupa kapia kakitiaie Kristusu kokaipa wenumu tuwopina. 
\v 21 Yeu nanunanu\x - \xo 1.21 \xo*\xt Ka 2.20\xt*\x* paiya muanumu. Ye ekioma purineia, ye Kristusu xeika purine. Ye xumunei paiya, ye asinaku sapini kutu tepine. 
\v 22 Ye pani ekioma purineia\x - \xo 1.22 \xo*\xt Ro 1.13\xt*\x*, ye xokupa xuiapu tianikepine sie itou. Pana ye amu imerau taiwopine? Ye sipa xuwe. 
\v 23 Ye\x - \xo 1.23 \xo*\xt 2 Ko 5.8;2 Ti 4.6\xt*\x* paire aimore xoikemu tuku. Ye xounei Kristusu xeika puropineure ye xiri xoieune. Paiya xiri asinakuni kutu xepina. 
\v 24 Pana ye tini tianitikepineure, pani ouro puropinerau. 
\v 25 Panumu xati, ye sipa, ye xumopi xana xuwena, ye tini xeika puropine. Ye tini xeika puritia, tinipo xotikisue xiri sokisokina pani kokaipa xatia, tini nimaririwakauai. 
\v 26 Pa xati ye xiyeri kounei tini xosa putautia, tinie yeure nimaririnaria Kristusu Yesusupo wenumu xourorakuai.
\s Xoiteue tini xeika purinana tini sokisoki purinare xu xemeroa
\p
\v 27 Kokaipa\x - \xo 1.27 \xo*\xt 1 Ko 1.10;Ep 4.1;Pl 4.3;Kl 1.10;1 Ts 2.12\xt*\x* sapi paiya, muai. Tinipo sesepi paiya kutuni asinaku purinari Kristusupo asinaku kunani kutu taiwakuai. Kakari ye kounei xeketikinere e tinire kuna kireni iyesine rania ye xemu sipauneia tini sokisoki tumunuku kireni xotikikemu purinuku, kireni nanunanu xeika asinaku kuna xeika xosa xonikisuwoteneai xuiapu sainikepure xirini saina tinukuxi sipawopine. 
\v 28 Tini kakixanari tinipo xiwaiyatikimanaure ximikaku. Tini xeketikeri ximikepu xuweuwaria, sini xuwexepinuku xineria, sipawopineri, pana Xoiteu nukoini kakatia tini xiri atinari purakuai. 
\v 29 Iyesa\x - \xo 1.29 \xo*\xt YT 5.41;Ro 5.3;Ep 2.8\xt*\x*. Xoiteue tini atitikerina weitikitati tinie Kristusupo saina tinuku. Nue weitikitati Kristusu xosa kireni xotikisuwarixe. Xuwe. Tini weitikitati nukou wenumure xeika tatau xemenuku. 
\v 30 Ekime\x - \xo 1.30 \xo*\xt YT 16.19-40;Pl 1.13;Kl 2.1;1 Ts 2.2\xt*\x* tinie xekeyari ye xomai puritiai xoma xosa xomaxitiai, muaia ye pani xomai puriti yeu kuna tini iyesinuku. Paina tini tatau xemekiriai, pa amure, tini ye xeika lixinuku pa xoma xosa purinuku.
\c 2
\s Sini kireni xosikikemu purinuku asinaku kapia kireu apimi xosa kakepu
\p
\v 1 Kristusue tinipo xotikikemu sokisokirounare? Nue tini xiri xouwetikirouna xati paie kakati tinipo xotikikemu yoro purinare? Tini Xoiteupo Supo Youyapu ekeoma minika xosa purinukure? Tini kireu apimi xosa xotikisua xati xotikisuarei xotikienikirounukure? 
\v 2 Panumu xatia, paina tini asinaku asinaku kapia kakari, yeu nimariri paie xiri koxepina. Tini xokupae kireni nanunanuni kutu tinari kireu apimi xotikiewopi kapia kireni taiwa. Kakinari kireni xotikikemuni kutu pura. 
\v 3 Tini\x - \xo 2.3 \xo*\xt Ro 12.10;Ka 5.26;Ep 5.21;Pl 1.15-16;Ye 3.14\xt*\x* kakixanari takireni nanunanunari, takipo wenitiki xourorepi saina kireni taku. Xuwe. Tini takipo kapia ororinari, kireu apimi nikau kapiae sinipo kapia emeserinaxi nanuwa. 
\v 4 Tini\x - \xo 2.4 \xo*\xt 1 Ko 10.24; 10.33; 13.5\xt*\x* takipo xuru kireni yakuwaku. Xuwe. Tini kireni kirenie takipo kireu xuiapu nikau xuru yakunari tianikari ati puropineri.
\s Kristusue nukou wenumu ororati, Xoiteue nu xouroretai
\p
\v 5 Kristusu Yesusu nukoe tipuroyai nanunanu sieni tini\x - \xo 2.5 \xo*\xt Mt 11.29;Yo 13.15;1 Pi 2.21;1 Yo 2.6\xt*\x* panumu nanunanuni kutu tipura. 
\v 6 Nu\x - \xo 2.6 \xo*\xt Yo 1.1-2; 5.18; 10.33; 17.5;2 Ko 4.4;Kl 1.15;Ip 1.3\xt*\x* Xoiteuni kutu purotaina pana, nu Xoiteu sie puropure pa kapia soki tepure nanuwotaixe. Xuwe. 
\v 7 Nu\x - \xo 2.7 \xo*\xt Yo 1.14;2 Ko 8.9;Ka 4.4;Ip 2.14; 2.17\xt*\x* pa kapia wetina nu aipu saina apu sie sayetai. Nu apu sie putauna, 
\v 8 apuni\x - \xo 2.8 \xo*\xt Mt 26.39; 26.42;Yo 10.17-18;Ro 8.3;Ip 5.8; 12.2\xt*\x* kutu purati apimie xekoteneai. Kakina nukoini nuko ororina Xoiteupo kuna taipa xouna xumotai yause xetai, iyo, kakipa xouna na nikitoto xosa xumotai. 
\v 9 Pa xotaparei\x - \xo 2.9 \xo*\xt Yo 17.1-5;YT 2.33;Ep 1.20-21;Ip 1.3-4\xt*\x* sore Xoiteue Yesusu xourorina xiri xouroni kutu iyarati purina. Kakina Xoiteue kireu kireu weniniki emeserinikina kire wenumu xouroni kutu tuwotai. 
\v 10 Nue\x - \xo 2.10 \xo*\xt Mt 28.18;Ro 14.11;XKY 5.13\xt*\x* pa wenumu\x - \xo 2.10-11 \xo*\xt Ais 45.23\xt*\x* Yesusu tuwotai xati, xokupa sapie mena xouro puroto ouro puroto ou minika puroto woteneai sapi xeikae Yesusu xekero xonikitapa urukurouneri nu irue puropineri. 
\v 11 Kakati\x - \xo 2.11 \xo*\xt Yo 13.13;YT 2.36;Ro 10.9;1 Ko 8.6\xt*\x* nini xokupae ipaki kunauneria, “Yesusu Kristusu nu Kokaipa,” xepineri. Pa kapiarei Xoiteu Emisiki kokaipa wenumu tuwopineri.
\s Sini memeremu sie xuiapu xopuro puropu
\p
\v 12 Paina\x - \xo 2.12 \xo*\xt Siri 2.11;Ep 6.5;Pl 1.5;1 Pi 1.17\xt*\x*, yeu xatai xura ye tinire xoi xumuna, tinie yeu kuna sipesi tairounuku xati, ximine rania panumu kaka. Ye tini xeika puritia pa yause xosa kireni kuna taiwaku. Xuwe. Ximine ye xetauro purinena, tini atinarini kutu kuna taiwa. Xoiteue tini xiyeri titiketai xati, muaiya tini urewoto ximiketeunari pa xotiki iwopure xetai sapini kutu takuaire sokisoki saina ta. 
\v 13 Siko\x - \xo 2.13 \xo*\xt Yo 15.5;1 Ko 12.6; 15.10;2 Ko 3.5;1 Ts 2.13;Ip 13.21\xt*\x* sipa, Xoiteu nukoe tinipo xotikiro saina tirouna. Nukoini xouwewotai kapia tinie kakakuaire tinipo xotikikemu sarirouna.
\p
\v 14 Tini\x - \xo 2.14 \xo*\xt Ro 14.1;1 Ko 10.10;1 Pi 4.9\xt*\x* xokupa kapia kakinaria, tini peuni purinari kaka. Tini kakixanari xekepi kunaunari kuna tuwataxaku. 
\v 15-16 Tini\x - \xo 2.15-16 \xo*\xt Tu 32.5;Ais 49.4;Tan 12.3;Mt 5.14-16; 5.45; 10.16;Ka 2.2;Ep 5.1; 5.8;Pl 1.10;1 Ts 2.19; 3.5;1 Pi 2.12\xt*\x* Xoiteupo nonoe panumu kakinaria, tini ati purinari xoxixoxi kapia xuweu xu xuweu purakuai. Kakinari ekeoma tuku kuna soki tinaria, mua ouropu xuiapu xopu memeremu sie purakuai. Pa xuiapu kinie asinaku kapiani kutu wetineri xoxixoxi kapia kaketeneai. Pa xati Kristusue xiyeri kopina yause xosa yei tinipo kapiaure xiri nimaririwopine. Kakine sipauneia, yei tini xopu irereiyai saina paiya, ye aini kakepu xuwexi sipawopine.
\p
\v 17 Tinipo xotikisu\x - \xo 2.17 \xo*\xt Ro 15.16;2 Ti 4.6\xt*\x* paiya tini Xoiteu xouieunuku. Ye panumu sipaunei xisae xoniki irouneri sie yeu yawi xeika tinie Xoiteu xouikiriai kapia xeika kusaworia ye paire nimaririwopine. Ye tini xeika nimaririwopine. 
\v 18 Panumu\x - \xo 2.18 \xo*\xt Pl 3.1; 4.4\xt*\x* sie tini rania nimaririwakuai. Tini ye xeika xiri nimaririwakuai.
\s Polue Pilipai Timoti xesawopure kunawotai
\p
\v 19 Kokaipa Yesusupo nanunanu xatia, tini xosa Timoti xesawopure xenenewopixe. Nue xiyeri kouna tinire kayatia, ye xiri xoi meruxepine. 
\v 20 Timoti sie apua kire yue ye xeika puratixana xuwe. Nu sipesi ye xeika lixina tini tianitikepure nanunanuna ime xirekirouna. 
\v 21 Xokupa\x - \xo 2.21 \xo*\xt 1 Ko 10.24; 10.33; 13.5;2 Ti 4.10; 4.16\xt*\x* kireu apimie nikou xurureni eiyo xineri, Yesusu Kristusupo saina pani tipa xowopi nini xiraxirouneri. 
\v 22 Pana\x - \xo 2.22 \xo*\xt 1 Ko 4.17;1 Ti 1.2;2 Ti 1.2\xt*\x* Timotipo asinaku kapia tini sipa. Tini sipa, nonoe omo tianurouna sie nue asinaku kunapu saina tianiyeyai. 
\v 23 Pa xati ye xosai amu kapiarau yaraxepinana ye xayaka xayaka yakune siparineye, xurise tini xosa xesautia sapauni utopina. 
\v 24 Kokaipae ime taiyepinaxi xoisunena, iko rania xayaxayaka xurise kouneia xeketikepine.
\s Polue Epaprotitusi Pilipai xesawopure kunawotai
\p
\v 25 Tini xosa Epaprotitusi xesautia utopinaureni kutu ye\x - \xo 2.25 \xo*\xt Pl 4.18\xt*\x* nanune. Nu sikou xatasiki, nu pa xoma xosaupo saina emei nu liemei, nu takie xesawari ye tianiyepinaure koyai. 
\v 26 Nu tinire xiri eiyoxina xeketikepurexina. Nu supa tuku kuna tinie iyesari, paire nu siparina xoukemu tatauna. 
\v 27 Suwau, ekime xoia supa tina xiri xumopure xetai. Pana Xoiteue nure xousuawati ekemiri kusawetai. Xoiteue nure kireni xousuaxepu xuwe. Yeure rania xousuaxetai, pa amure, kokaipa xuni kutu ye xoroyepi xirarina kaketai. 
\v 28 Pa xati nu xiyeri xekerinari nimaririwakuaire, nu xesautia utopina. Kakineia iko rania ere xoikemu tatauwopuwatixe. 
\v 29 Pa xati\x - \xo 2.29 \xo*\xt 1 Ko 16.16-18;1 Ti 5.17\xt*\x* tinie Kokaipapu wenumurei Epaprotitusi sowopure xiri nimaririwa. Tini panumu apimi xosa kokaipa weniniki tinika. 
\v 30 Nue\x - \xo 2.30 \xo*\xt 1 Ko 16.17;Pl 4.10\xt*\x* Kristusupo saina tina xiri xumopurexetai. Nu nuko asinaku puropinaure nanuwotaixe. Xuwe. Ye tianiyepina saina takie tukiriai xosa kireni nanunanuna, kakina nupo supa sokau porouna pani saina tina.
\c 3
\s Apue Kristusure xousuna paiya nu apu kutu asinakuni kutu
\p
\v 1 Xatai xura\x - \xo 3.1 \xo*\xt 2 Ko 13.11;Pl 2.18; 4.4\xt*\x*, ye mua kuna xuweiyepure ipaki kunawopurexine, tini Kokaipaureni kutu nimaririwa. Ye mua kuna tini xosa xiyeri xayawopure ouyexixe. Xuwe. Pa amure, nue tini tianitikepinaxi nanune.
\p
\v 2 Apimie mamumamu sie saina xoxi tirouneri xosa sosopa epixakuai\x - \xo 3.2 \xo*\xt Siri 22.16; 22.20;Ro 2.28;2 Ko 11.13;Ka 5.2; 5.15;XKY 22.15\xt*\x*. Paiya pa apimie nanuneri Israili nikau kapiarei siko xokupa sikau mupusiki xoxixoxiwopuxi kakineri. 
\v 3 Siko\x - \xo 3.3 \xo*\xt Ro 2.29\xt*\x* kireni Xoiteupo Israili kinini kutu purinuku mupusiki kesewopi kapiani kutu tainuku. Kakinuku Xoiteupo Youyapu sokisokirei sini Xoiteure muris tinuku Yesusu Kristusupo wenumu xourorirounuku. Sini sipa, apimie mupunikire sapi kaketeneai paiya, nini xayakaxayaka tianikepuwatixe. 
\v 4 Iyesa\x - \xo 3.4 \xo*\xt 2 Ko 11.18; 11.21-29\xt*\x*. Mupusikipo sapie sini tianisikepina itou xatia, iko paiya ye atineni kutu puropine. Apimie mupunikiropu kapia xosaniki moati nimaririwoneai paiya yei xiri emeserinikine. 
\v 5 Anikae\x - \xo 3.5 \xo*\xt Lu 1.59;YT 23.6; 26.5;Ro 11.1;2 Ko 11.22\xt*\x* ye iyaiyerati, 8-teu asau xosa mari takeriyeneai. Ye Israilipo apu. Ye Pensaminipo apu kini. Ye yeu xauwa anika sieni, Ipru kuna kunauroune. Ye Parisi nikau kapiarei tuxotapa atineni kutu tairoune. 
\v 6 Ye\x - \xo 3.6 \xo*\xt YT 8.3; 22.4; 26.9-11\xt*\x* Xoiteupo saina tepure xiri sokisokine, pa xati yei ekime Yesusure xonikisuwoteneai xuiapu xosa xoxi kapia kakiyai. Apimie tuxotapapu kunaure nanuworineri yeu kapia uteineria, ye xu xuwe. 
\v 7 Ye\x - \xo 3.7 \xo*\xt Mt 13.44-46\xt*\x* kunauweitiai, ye mua mupusikipo kapia kapiapu ime taineia, yei kireu apimi xiri emeserinikepine. Pana ye mua xokupa sapi xekeutia aipu sapi sie xati, ye Kristusupo ime taine. 
\v 8 Ye\x - \xo 3.8 \xo*\xt Yer 9.23-24;1 Ko 2.2;Kl 2.2\xt*\x* mua Yuta nikau kapia kirenire kunauixe. Xuwe. Ye Kristusu Yesusu sipa, nu yeu Kokaipa xati, ye pa sapi kireni xekeuia xiri asinakuni kutuna, mua ouropu xokupa asinaku sapi paiya aipu inaina sie. Ye Kristusu kireni taiwopure ye xokupa kireu sapi wetine, Kristusu soki tineia 
\v 9 nu\x - \xo 3.9 \xo*\xt Ro 3.21-22; 9.30; 10.3-6;Ka 2.16\xt*\x* xeika lixepine. Ye tuxotapa taiwopure ikoini kakitiai kapiae apu kutu asinaku sayepinexi nanuixe. Xuwe. Ye xetau imerei apu kutu asinaku sayepurexine, paiya Kristusu xosa xoisuwopine ime. Sini Kristusure xosikisukiri Xoiteu nukoini wenisikina kutu asinaku xuiapu xirouna. 
\v 10 Ye\x - \xo 3.10 \xo*\xt Ro 6.3-5; 8.17;2 Ko 4.10-11;Ka 6.17;2 Ti 2.11-12;1 Pi 4.13\xt*\x* Kristusu sipawopureni kutuxine. Kristusue kopa upuropu saroyaina, nu kokaipa sokisoki tuku xati, pa nupo sokisoki ye xiri sipawopurexine. Ye tatau xemeropi kapiaure nu xeika lixepurexine. Kakine nue xumuna nanunanu tipuroyai sie ye panumu nanunanu sie tipuropurexine, 
\v 11 pa xati\x - \xo 3.11 \xo*\xt Lu 14.14;YT 4.2;1 Ts 4.16;XKY 20.5-6\xt*\x* ye rania kopa upuropu xiyeri saropinexi nanune.
\s Polue atu xosa sokisoki keikei xourouna
\p
\v 12 Ye\x - \xo 3.12 \xo*\xt YT 9.5-6;1 Ti 6.12; 6.19;Ip 12.23\xt*\x* Kristusupo pa kapia tieine, ye apu asinakuni kutu sainexi nanuixe. Xuwe. Pana Kristusu Yesusue soki tiyeyai sie, sipesi yei pa kapia soki tepi saina tine. 
\v 13 Xatai xura\x - \xo 3.13 \xo*\xt 1 Ko 9.24-26;2 Ko 5.16;Ip 6.1\xt*\x*, ye nanutiaiya ye pa kapia xemu titixe. Pana ye kire nanunanu tuku kireni, paiya ekimepu xokupa kapia wetinei, pa sapi sewai putawopina tepure sokisoki saina tepine. 
\v 14 Ye\x - \xo 3.14 \xo*\xt 1 Ko 9.24;2 Ti 4.7-8;Ip 3.1; 12.1\xt*\x* atu xosa putaunei asinaku misepi tepineure sokisoki keikei xouroune. Pa asinaku misepi paiya muanumu. Kristusupo saina xosa, ye xouro xounei Xoiteu nuko xeika xiri ati misepineure yaiyetai.
\p
\v 15 Sinipo nanunanue\x - \xo 3.15 \xo*\xt 1 Ko 2.6; 14.20;Ka 5.10\xt*\x* asinaku sipa tuku apimi nikau nanunanu sie xatia, paina sini xokupae ye mua uteitiai sie nanunanu taiwopu. Tini xetau nanunanu tuku xatia, paina Xoiteue pa tinipo nanunanu kutuworepina. 
\v 16 Pana\x - \xo 3.16 \xo*\xt Ro 12.16; 15.5;Ka 6.16\xt*\x* sini pa asinaku kapia tieikiriaia, sini sokisokini kutu tepu.
\p
\v 17 Xatai xura\x - \xo 3.17 \xo*\xt 1 Ko 4.16; 11.1;Pl 4.9;1 Ts 1.6-7;1 Pi 5.3\xt*\x*, tini xokupae yeu kapiani kutu taiwa. Kakinari pa apimie sinipo kapia tairouneri atinari xekenika. 
\v 18 Pana\x - \xo 3.18 \xo*\xt 1 Ko 1.23;Ka 1.7; 2.21; 6.12;Pl 1.15-16\xt*\x* xousua tuku, xokupa apimie Kristusupo na nikitotopu xiwai purineri. Xokupa yause ninipo kapia paire katikitiai xati, ximine ye xiyeri katikiti, ekirei morepi waxi kiririna. 
\v 19 Nikou\x - \xo 3.19 \xo*\xt Ro 8.5-6; 16.18;2 Ko 11.12; 11.15;2 Pi 2.1\xt*\x* mupunikie xonikiewotai kapiani tairouneri xati, pa xonikiewoteneai kapiae ninipo xoiteu sie purina. Ninie sipesi ouropu sapire kireni nanunanurouneri xati, xoxixoxi kapia maya tuku kakepure nimaririrouneri. Pa apimia nini xepi xosa xuwexepineri. 
\v 20 Pana\x - \xo 3.20 \xo*\xt Ep 2.6; 2.19;1 Ts 1.10\xt*\x* siko paiya, sini mena xouropu xuiapu purinuku. Sini Kokaipa Yesusu Kristusue mena xouro wetina xiyeri kou tisikepinaure yakunuku. 
\v 21 Nukou sokisokireini\x - \xo 3.21 \xo*\xt Ro 8.29;1 Ko 15.28; 15.43-53;Ep 1.19;Kl 3.4\xt*\x*, Kristusue kakati xokupa sapi nu irue puratia, pa sokisoki kirenie pa xu sikirouna mupusiki pirixepina, kakatia sinipo mupusiki paiya nukou mupokemu sieni xiri xoseini kutu xoseixepina.
\c 4
\s Sini kireni xosikieni nimaririnuku asinaku nanunanu tepu
\p
\v 1 Pa xati\x - \xo 4.1 \xo*\xt 1 Ts 2.19-20\xt*\x*, yeu xatai xura, ye kunautiai sie, tini Kokaipa xosa sokisokini tumuwa. Yeu xoikemu tini tikiroune xati, tinire ye xoikemu xiri pirixina. Tini paiya yei sokisoki saina tine asinaku sapi tiyai sie xati, tinire ye pani nimaririroune.
\p
\v 2 Yuotiano Sintikeno, tini iyesaxa. Tini xui axirini Kokaipapu kini xosaupo, pa xati tini kirenini xotikikemuwaxa. 
\v 3 Ne\x - \xo 4.3 \xo*\xt Siri 69.28;Lu 10.20;XKY 3.5; 20.12\xt*\x*, ne yeu saina emeini kutu, ye ne kanine, ne mua xui aimore tianike. Asinaku kuna uteiwopi saina xosa ninie ye xeika atineri lixeteneai. Klemeni xeika kireu saina emeumana xeikae sini xeika saina teteneai. Pa xokupa kini nikau weniniki paiya ekisikoma puropu nakau xosa purina.
\p
\v 4 Tini sipesi\x - \xo 4.4 \xo*\xt Ro 12.12;Pl 3.1;1 Ts 5.16;1 Pi 4.13\xt*\x* Kokaipaureni nimaririwa. Ye xiyeri kunaune, tini xiri nimaririwa.
\p
\v 5 Tinie\x - \xo 4.5 \xo*\xt Ip 10.25; 10.37;Ye 5.8-9;1 Pi 4.7;2 Pi 3.8\xt*\x* xokupa apimi peuni peuni nikari ninie tinipo asinaku kapia xekopineri. Nanuwa. Kokaipa kopure tomuroirouna. 
\v 6 Tini\x - \xo 4.6 \xo*\xt Asin 16.3;Mt 6.25-34;Lu 12.22-31;Kl 4.2;1 Pi 5.7\xt*\x* kire sapire eiyo xaku. Xuwe. Tinipo xokupa xure sipesi Xoiteu kauna. Tini Xoiteu xosa kunikuninari eiyase kuna kaunari, tianitikepinaure kotowa. 
\v 7 Xoiteue xosiki yoro\x - \xo 4.7 \xo*\xt Ais 26.3;Yo 14.27;Ro 5.1;Kl 3.15\xt*\x* sini sikirouna paiya, asinaku sapini kutu xati, sini apue paire xotapani kutu sipawopu xana xuwe. Xoiteue kakati tinipo xotikikemu yoroni purinaria, pa kapiae tini Kristusu Yesusu xeika atinari etokaria, tinipo xotikikemu xeika nanunanu xeika atina kutuni puropina.
\p
\v 8 Xatai xura\x - \xo 4.8 \xo*\xt Ro 12.17\xt*\x*, ye kire kuna pani kunawopurexine. Tini xokupa yause suau kapia kirenire nanunari, apimie asinaku kapia kaketeneaire nanunari, kutu kapiaure nanunari, asinaku teteiwoki kapiaure nanunari, sapi xoseixoseire nanunari, asinaku asinaku sapini kuture nanunari, xokupa kapia akerekire nanunari, apimie xokupa kapia kakeri siko apue xekeri xiri nimaririrounuku xeikaure nanuwa. 
\v 9 Tini xokupa kapia\x - \xo 4.9 \xo*\xt Ro 16.20;1 Ko 14.33;Pl 3.17;1 Ts 5.23;Ip 13.20\xt*\x* kakakuaire ye uworitikiyai paiya ati siparinuku, xokupa kapiaure ye kuna uteiti tinie iyesinuku pani kakiti xekeukiriai, pa xokupa kapia tini sipesi kakakuai. Kakaria Xoiteu, nu xosikemu yorowopu kapia xotapa, nue tini xeika puropina.
\s Pilipai apimie Polu xouineri xuru xesaruwoteneaire nimaririwotai
\p
\v 10 Tinie ye xiyeri tianiyepure nanunanu tari, ye Kokaipa xosa xiri nimaririne. Suau, ekime tinie ye tianiyepure nanunanukiniaina pana, ye tianiyakuai ime xuwe. 
\v 11 Ye\x - \xo 4.11 \xo*\xt 1 Ti 6.6-8\xt*\x* sapiara xuweitauyati mua kuna kunauixe. Xuwe. Ye amu kapiae xosai moatia, ye peuni puropi kapia sipauweitiai. 
\v 12 Ye\x - \xo 4.12 \xo*\xt 1 Ko 4.11;2 Ko 6.10; 11.27\xt*\x* xiri xauna purinere e ye xokupa sapi tukuxine rania, ye peuni puriroune. Ye xokupa xoye tukure e ye iriapu puropine, ye xokupa sapi tukure e ye sapiara xuweitauyepina rania ye peuni puropi kapia sipauweitiai. Xokupa sapi ye xosai putawopina, pana ye pani peuni purine xoikemu asinaku xiroune. 
\v 13 Kristusue\x - \xo 4.13 \xo*\xt Yo 15.5;2 Ko 12.9-10;2 Ti 4.17\xt*\x* ye sokisokirouna xati, nupo sokisokie ye xokupa sapi kakepine itou.
\p
\v 14 Ye ipaki kunaune tinie ye tianikiriai kapiaure ye nimaririne xitiaia, pa amure, ye xu xemetiai yause xosa tinie ye xeika lixepure nanuworinuku, mua asinaku kapia kakikiriai. 
\v 15 Tini\x - \xo 4.15-16 \xo*\xt 2 Ko 11.9\xt*\x* Pilipaipo xuiapu, takieni sipaukiriai, ye asinaku kuna uteiwopi saina xotapa taiyeine, Mesetonia Propinsi wetitia, kireu Yesusure xonikisurouneri apimie ye xeika lixineri xeara tianineri siepineri kapia xuwexetai. Xuwe. Tini kirenie panumu kakikiriai. 
\v 16 Ye Tesalonaika erewese puriyai yause\x - \xo 4.16 \xo*\xt YT 17.1\xt*\x* xosa, tinie xayaka xayaka xokupa yause tianikiriai. 
\v 17 Tini kakixanari nanunari, tinie ye xoi iwakuaire kototikine xaku. Xuwe. Tinipo asinaku kapiae pani kokaipa xati, Xoiteue tini xosa asinaku kapia kakepinaure ye xoieune. 
\v 18 Pana\x - \xo 4.18 \xo*\xt XT 29.18;Ese 20.41;2 Ko 9.12;Ep 5.2;Pl 2.25;Ip 13.16\xt*\x* tinie xokupa sapi Epaprotitusu xuporo iyari kotai paiya ye itou titiai. Kakari ye xokupa sapi tuku xine paie koirotai. Tinie xuru xesawari kotaia xokupa ekeu emeserina. Tinipo xuru paiya Xoiteu xouiwopu sapi asinaku xuri tuku sie, tini Xoiteu tukiriai. Xoiteu xouiwopure panumu kakeria nu panumu tepure xiri nimaririrouna. 
\v 19 Yeu Xoiteue\x - \xo 4.19 \xo*\xt Siri 23.1;2 Ko 9.8;Ep 1.7\xt*\x* siko Kristusu Yesusupo xuiapu sikau xokupa sapi asinaku asinaku akituworisiketai. Pa xati tini sapi xuweitautiketaia nukoe xokupa sapi xiri xousokuworitikepina. 
\v 20 Xoiteu\x - \xo 4.20 \xo*\xt Ro 16.27;Ka 1.5\xt*\x* nu sikou Xoiteu nu sikou Emisiki xati, sini nupo wenumu sipesi sipesi xourorepu. Pa suau.
\s Polue Pilipai apimi kuso kuna tiniketai
\p
\v 21 Tini Kristusu Yesusupo xuiapu xosa kuso kuna tikine. Ye xeika puroteneai xataimanae, tini xosa asinaku asau xeteneai. 
\v 22 Xoiteupo xuiapu xokupae\x - \xo 4.22 \xo*\xt Pl 1.13\xt*\x* tini xosa ipaki kuso kuna kunauneri asinaku asau xeri, Sisaripo atoro saina tirouneri pa apimi kinie, yei tini asinaku asau kuna tikepineure sokisoki kuna kayeteneai.
\p
\v 23 Kokaipa Yesusu Kristusue xousuaxina xouwesiketai kapiae tini xokupa xosa puropina.