\id PHM - BLANK based on TPB 99
\ide UTF-8
\ide 
\rem Consultant Checked July 2024
\h Pilemoni
\toc3 Pm
\toc2 Pm
\toc1 Polue Pilemoni Xosa Xayawotai Nakau
\mt2 Polue Pilemoni
\mt Xosa Xayawotai Nakau
\imt Akereki kuna
\ip Pilemoni nu kire kokaipa apu. Nu Kolosi erewesepue Yesusure xousuwotai. Nupo kire aipu saina apu, nupo wenumu Onesimusi, nue nupo tumu wetina kire erewese ximi xowotai. Pa erewese xosa Onesimusue Polu tutumauna Yesusure xousuwotai.
\ip Pa yause xosa Polue kakauya xosa puripopouna xou Pilemoni xekopina paiya itou xuwe xetai. Pa xati mua nakau xayaurouna Onesimusi tuworina xesawati, Onesimusue nupo tumu xosa xiyeri xowotai. Pa nakau xosa Polue Pilemoni ipaki kauna ne kakixanau neu saina apu auwou. Mua saina apu nu Yesusure xousuwotai xati, Pilemoni nei nu nakipo xatanini kutu sie xiyeri sowo wotai.
\c 1
\ms Pilemonipo aipu saina apue ximi xoworina xurise Yesusupo apu sayati Polue Pilemoni xosa xiyeri xesawotai
\p
\v 1 Ye\x - \xo 1.1 \xo*\xt Ep 3.1\xt*\x* Polu, ye Yesusu Kristusupo kakauya apu. Ye xeika sikou xatasiki Timoti xeikae, mua nakau ne Pilemoni xosa xayaunua, ne sinipo asinaku marou xeika saina emesiki xeika. 
\v 2 Sinipo\x - \xo 1.2 \xo*\xt Kl 4.17;2 Ti 2.3\xt*\x* ukusiki Apia xosa rania mua nakau xayaunua, Arkipusi xosa rania xayaunua, sikoe mua Xoiteupo xoma xosa purikiriai xosa nue xomatua purina. Pa xeika Yesusure xonikisuneri taiwoteneai xuiapue neu atoro kununurouneri xosa xayaunua.
\p
\v 3 Sikou Xoiteu\x - \xo 1.3 \xo*\xt Ka 1.3\xt*\x* Emisiki xeika Kokaipa Yesusu Kristusu xeikae xonikisuaxete xonikietiketewori tinipo xotikikemu yoroni puropina.
\s Pilemonipo asinaku kapiae kakati Polue nimaririxina
\p
\v 4 Xokupa\x - \xo 1.4 \xo*\xt Ro 1.8-9\xt*\x* yause ye yeu Xoiteu xosa kunikuninepa, ye neure nanunanune Xoiteu xosa eiyaseuroune, 
\v 5 pa amure, ninie ye sipesi ipaki kairouneri, nei Kokaipa Yesusu xonikemu tune nure xiri xonisune, Xoiteupo xokupa xuiapu xonienikiroune xirouneri. 
\v 6 Ne\x - \xo 1.6 \xo*\xt Pl 1.9;Kl 1.9\xt*\x* sini xeika etokau sini Kristusure xosikisukiriai xati, sikou xosikisu xosa Xoiteue kakati sikou asinaku sipa yararatia Kristusu xosa xokupa asinaku sapi tirounuku ati sipawopure ye kunikunine. 
\v 7 Iyo\x - \xo 1.7 \xo*\xt 2 Ko 7.4; 7.13\xt*\x*, yewapu, nei Xoiteupo xokupa xuiapu xonienikiroune xati, pa kapiarei ninipo xonikikemu nei sokisokinikitiai. Nei kakau paire ye xiri nimaririti yeu xoikemu yoroarani purina.
\s Pilemonie Onesimusi nukou xatau sieni kutu tepina
\p
\v 8 Ne kire sapi kakewaire ye kunaunena, Kristusu wenumurei kaniti ne pa sapi kakewairau. Pana neu kapia asinaku asinaku ye sipa xati, 
\v 9 ye\x - \xo 1.9 \xo*\xt Pm 1\xt*\x* ne sokisoki kuna kanepixe xi nanune. Kireu xiri xonikiewopi kapiae sini axirini paraisirouna, pa xati ye ne yopini kanepurexine. Ye Polu, ye Kristusu Yesusupo kuna tikoutiai apu xati mua Kristusupo saina xosa sakau xine ye rania kakauya xosa purine, 
\v 10 yeu\x - \xo 1.10 \xo*\xt 1 Ko 4.15;Kl 4.9\xt*\x* nono Onesimusi xosa, asinaku kapia kakewaire ye ne kotonepurexine. Ye kakauya xosa puritiai yause xosa, Onesimusue kouyeyati Kristusure xiri xousuwopinaure tianutiai. Pa xati ye kunaune, nue yeu nononi kutu sayetai. 
\v 11 Ekime nue atina ne saina tianirouwati xana xuwe. Pana muaia nu sio axirini saina tianisiepina sie itou.
\p
\v 12 Ximine yeu xoikemueni nu xesauti, ne xosa xiyeri utuna. 
\v 13 Yei\x - \xo 1.13 \xo*\xt Pl 2.30\xt*\x* nu taiyeruti ye xeika puropina rania ye xiri nimaririwopine, ye kakitia nue neu sainani tina paiya, ye asinaku kuna uteiwopi sainapu kakauya apu puritiai yause xosa tianiyepina. 
\v 14 Pana\x - \xo 1.14 \xo*\xt 2 Ko 9.7;1 Pi 5.2\xt*\x* paire ne iyo kuna kunawauweyexine, pa xati ye nu taiyeruixe. Nei amu sapirau kakewaire ye kanepi xiraxine. Xuwe. Ye nanutiaia, nei ye tianiyepure asinaku kapia kakepurexinaua, xeuxana nakipo xonieni kakewai.
\p
\v 15 Suau, Onesimusue xayaka xayaka weinitetai. Pana mua kapia yaraxetai paiya, nei nu xiyeri sowau, ne xeika sipesi puropinarau. 
\v 16 Muaia\x - \xo 1.16 \xo*\xt 1 Ti 6.2\xt*\x* nei nanunau nu aipu saina apu xeu. Xuwe. Suau, nu neu aipu saina apu purotaina pana, muaia neu xatanini kutu sayati nei xiri xoniewowai. Nue yeu xataini kutu puriewati xekeuroune xati nu xosa yeu xoikemu tune. Pana ye sipa, nei nu xiri xoniewowai. Nue aipu saina apue kakiewati kapia xoniewowai, Kristusu xosa paiya xatanini kutu xekeuyeunaua, nu xiri xoniewowai.
\p
\v 17 Pa xati\x - \xo 1.17 \xo*\xt 2 Ko 8.23\xt*\x* ne ye xekeyau Kristusupo saina xosa ye neu emenini kutu sie xitia, paina iko titiai kapia sieni Onesimusi xiyeri tewai. 
\v 18 Nu kireu kapia xoreiyeretaire e ne xosa xapa tuku xatia, paina nupo wenumu pirixinau pa xapa xosa yeu wenimi iyarewai. 
\v 19 Ye\x - \xo 1.19 \xo*\xt Ka 6.11\xt*\x* Polu, ye ikou xupieni mua kuna xayautiai. Ye ikoini pa sapi xapa iyarepine. Ye ipakine rania kunaune ne ye xosa xapa\x - \xo 1.19 \xo*\xt 1 Ko 16.21\xt*\x* tuku, paiya nakipo ekiniomapu xapa. Pana ye paire kunawopi xiraxine. 
\v 20 Xatai, iyese. Kokaipapu wenumurei nei pa asinaku kapia ye xosai kakewai. Sini Kristusupo apu purinua, pa xati pa kapiarei ne yeu xoikemu asinakuworewai.
\p
\v 21 Nei yeu mua kuna taiwowai xati ye panumu ati sipautiai, pa xati mua nakau ne xosa xayaune. Ye sipa, nei Onesimusi xosa kakewai kapia paiya, nei kakewai xine mua yei kotonitiai kapia xiri emeseriwopina. 
\v 22 Ye\x - \xo 1.22 \xo*\xt Pl 1.25; 2.24\xt*\x* pani kire kuna tuku. Ye ipakine xoisutiaia Xoiteue tinipo kunikuni iyeserina paiya ye weitati tini xosa xiyeri utopine. Pa xati neu atoro xinepineure ye kire ata kama ireiyeriyewai.
\s Polupo saina emeumanae Pilemoni kusouneri
\p
\v 23 Epaprasie\x - \xo 1.23 \xo*\xt Kl 1.7; 4.12\xt*\x* ne kusonina. Nu kakauya xosa purati, sioxororoni Kristusu Yesusupo kakauya xosa purinua. 
\v 24 Yeu emeimana\x - \xo 1.24 \xo*\xt YT 12.12; 12.25; 13.13; 15.37-39; 19.29; 27.2;Kl 4.10; 4.14;2 Ti 4.10-11\xt*\x*, paiya Maki xuno Aristakusi xuno Temasi xuno, Luku xuno, ninie rania ne kuso tinineri.
\p
\v 25 Kokaipa Yesusu Kristusue xousuawati xouwetiketai kapia tini xeika purina.