\id EPH - Sumau Garia Bible - Unicode
\ide UTF-8
\h 
\toc3 Ep
\toc2 Ep
\toc1 Epesesi
\ide 
\rem 
\rem 
\mt Polue Epesesi
\mt2 xosaniki xayawotai nakau
\imt Akereki kuna
\ip Mua nakaupo nanunanu xotapa paiya muanumu Xoiteue xokupa sapi Kristusu xosa kununuwopurexina, paiya mena xouropu xokupa sapi xeika ouropu xeika kununuwatia, Kristusue xokupa sapi xiri tapaxi puropina. (1.10) Xoiteue nukou xuiapuni sainikerepurexina, kakatia ninie Kristusu xeika xiri etokineria kirenini xonikikemu puropineri.
\ip Akereki kuna masa paiya Xoiteupo xousua xeika xouwesikepi kapia xeikae kakati xokupa xuiapue Kristusure xonikisuwoteneaie xirini kunununeri kireni xuiapu kini sayeteneaire Polue xokupa kuna kunawotai. Yesusupo saina paie Xoiteue xuiapu xiyeri tinikina Xoiteupo Supo Youya tiniketai. Nukoe sokisoki kuna kunawoyai siena paiya nukoe xokupa asinaku kapia nini xosa kakepine xeyai. (1.14) Xoka axiri nakaupo kuna masa xosa Polue ipaki kunauna Yesusure xonikisuwoteneaie Kristusu xeika etokineri, pa xati ninie xiri kireni xonikikemu xineri Xoiteupo kapiani kutu taiwopineri.
\ip Mua nakau xosa paiya xuiapu nini Kristusu xeika etokineri kireni xuiapu kini xineri xina yarani atarinikepure Polue kunaurouna. Nue ipaki kunauna Xoiteupo xuimiapimi paiya nini kireni mupuniki xati Kristusue pa mupunikipo tapakemu sie xetai. (4.1-16) Pa xeika Xoiteupo xuimiapimi paiya nini kire ata sie xati Kristusu nukoe atapu akereki xai xetai. (2.19-22) Xoiteupo xuimiapimi paiya nini kire xui sie xati Kristusue pa xuipo xamu sie xetai. (5.22-32) Mua nakau xosa paiya asinaku asinaku kapia Xoiteue nukou xuiapu xosa kakepure xetai xosa sikoe atinukuni kutu xekeurounuku.
\c 1
\ms Kristusu xosa Xoiteue sini oma xuiapu saisiketai
\mr 1—3
\d
\p
\v 1 Ye\x - \xo 1.1 \xo*\xt YT 18.19-21; 19.1;Ro 1.1; 1.7;1 Ko 1.1;Kl 1.1\xt*\x* Polu, ye Kristusu Yesusupo tianuwopi. Nukoe ye xouweyati Xoiteue ye Yesusupo tianuwopi tumuyeretai. Tini Xoiteupo xuiapue Epesesi erewese purinuku Kristusu Yesusu taiwopi menamenaukiriai xosa mua nakau xayaritikine. 
\v 2 Sikou Emisiki Xoiteu\x - \xo 1.2 \xo*\xt 2 Ko 1.2;Ka 1.3;Kl 1.2;Ta 1.4\xt*\x* xeika Kokaipa Yesusu Kristusu xeikae, tini xonikietikineri xonikikemu tikeria tinipo xotikikemu yoroara puropina.
\s Xoiteue Kristusu xosa xokupa mena xouropu asinaku sapi siketai
\p
\v 3 Sini \x - \xo 1.3 \xo*\xt Ep 2.6\xt*\x*Xoiteupo wenumu xourorepu, nu sikou Kokaipa Yesusu Kristusupo Omo xeika nukou Xoiteu xeika. Sikou xenisiki tianuwopure, nukoe Yesusu wenumurei mena xouropu xokupa asinaku sapi siketai. 
\v 4 Sini\x - \xo 1.4 \xo*\xt Yo 15.16; 17.24;Ro 8.28;Ep 5.27;Kl 1.22;2 Ts 2.13;2 Ti 1.9;Ye 2.5;1 Pi 2.20\xt*\x* xeseu puropure Xoiteue ou iyarepu xuweu yauseni, sini Kristusu xeika etokepure tumusikeretai. Kakeki xati sini nukou ekero kutu asinaku xu xuweu xuiapu puropu. 
\v 5 Yesusu Kristusue\x - \xo 1.5 \xo*\xt Yo 1.12;Ro 8.29-30;2 Ko 6.18;Ka 4.5\xt*\x* saina tina siko xiyeri tisikepinaure, ekimeni kutu nukoe xouwesikina nukou nononi kutu sayepure tumusikeretai. Xoiteue nukou nanunanuni nimaririeina taina panumu kaketai. 
\v 6 Nukoe pa Nono xiri xouwewotai wenumurei\x - \xo 1.6 \xo*\xt Mt 3.17;Yo 3.35;Ro 3.24; 5.15;Kl 1.13\xt*\x*, Xoiteue xiri xouwesikina xoukemu sikeyai. Pa xati nue ere xouwesikina xoukemu siketaire nanunuku Xoiteupo wenumu xourorepu.
\p
\v 7 Xoiteue xouwesikina xoukemu sikepu kapia\x - \xo 1.7 \xo*\xt YT 20.28;Ep 2.7;Kl 1.14; 1.20;Ip 9.12;1 Pi 1.18-19\xt*\x* xiri xokopexina. Pa xati Kristusue sini xiyeri isayasikepure xumotai xati, nupo yawie sikou xokupa xunu Xoiteue xesauwetai. 
\v 8 Xoiteue xouwesikina xoukemu siketai kapia siko xosa panipani kusauna, xokupa xetaxetau sipa xeika asinaku nanunanu xeika siketai. 
\v 9 Ekime\x - \xo 1.9 \xo*\xt Ro 16.25;Ep 3.4; 3.9-11;Kl 1.26;2 Ti 1.9\xt*\x* Xoiteue Kristusupo saina xosa mua kapia kakepure nanunanuwoyai. Pana nupo pa nanunanu paiya ximiaki puriyai xati ximine nupo nanunanu itou atarisikina. 
\v 10 Pa\x - \xo 1.10 \xo*\xt 1 Ko 3.22-23;Ka 4.4;Pl 2.9-10;Kl 1.16; 1.20;Ip 1.2;1 Pi 1.20\xt*\x* sapi kakepure xetaia muanumu. Xokupa sapi taitai xouna xouna, pa yause iyaretai xosa paiya, xokupa sapi mena xouropu xeika ouropu xeika rania Kristusu xosa kununuwopina. Kakatia Kristusue xokupa sapi tapaxi puropina.
\p
\v 11 Xoiteu\x - \xo 1.11 \xo*\xt Ro 8.17; 8.28-29;Kl 1.12;Ta 3.7;Ye 2.5;1 Pi 1.4\xt*\x* nukou xouweni nukou nanunanu taina xokupa sapi kakati marouna, kakina ekime nukou xouweni apimi Kristusu xeika etokinuku nupo xuiapu sayepinukure tumusikereyai. 
\v 12 Sinie akerinuku Kristusure xosikisunuku taikiri, nukou kokaipa memeremu xeika sokisoki xeika xosa sipesi nanunuku nukou wenumu xourorepinukure sini Xoiteue tumusikeretai.
\p
\v 13 Tini\x - \xo 1.13 \xo*\xt 2 Ko 1.22; 6.7;Ep 4.30;Kl 1.4-6\xt*\x* xetau xuiapu kini tinie rania suau kuna iyesieikiriai, paiya pa Xoiteupo asinaku kunae tini xiyeri titiketai. Kakati Kristusure xotikisunuku. Tinie nukou xuiapu kinini kutu purinuku, Kristusu xeika etokari, ekime Xoiteue sokisoki kuna kunawoyai taina Xoiteupo Supo Youya tiketai. 
\v 14 Sini\x - \xo 1.14 \xo*\xt Lu 21.28;Ro 8.23;2 Ko 1.22;1 Pi 2.9\xt*\x* Xoiteupo Supo Youya tieikiriai, pa xati siko sipa, Xoiteue kireu asinaku sapi nukou xokupa xuiapu tinikepure sokisoki kuna kunawoyai sie xurise sini rania tepu. Xoiteue xiyeri tisikati nuko xeika somoni kutu puropu yause xosa pa sapi tepure yakunuku. Kakinuku pa sokisoki saina tixanauwoyaire nanunuku nukou kokaipa wenumu xourorepu.
\s Xoiteue Epesesi sipa tinikepinaure Polue kunikuniwotai
\p
\v 15 Tinie\x - \xo 1.15 \xo*\xt Kl 1.4\xt*\x* Kokaipa Yesusure xotikisunuku Xoiteupo xokupa xuimiapimi xosa xotikikemu tinikirounuku kuna ye iyesitiai. 
\v 16 Pa xati\x - \xo 1.16 \xo*\xt Pl 1.2-4;Kl 1.3;1 Ts 1.2\xt*\x* ye kunikuninepa, sipesi tinire nanunanune Xoiteu eiyaseuroune. Kakine 
\v 17 ye Xoiteu kotoutiai\x - \xo 1.17 \xo*\xt Kl 1.9\xt*\x*, nu Kokaipa Yesusu Kristusupo Xoiteu, nu kokaipa memeremu xeika sokisoki xeika nikau Eminiki. Nue asinaku nanunanu tikatia tinie nukou kuna xotapani kutu sipawari, nukoini kakatia, tini nupo xiri sipawakuai. 
\v 18 Nue\x - \xo 1.18 \xo*\xt YT 26.18;Ep 2.12; 4.4;Kl 1.12\xt*\x* tinipo nanunanu xosa memeremu tikepinaure xoiyeune, kakatia tini takuai sapire yaitikatia atinari sipawakuai xine, paiya tinie yaku purikiriai sapire kunaune. Kakinaria Xoiteue sini nukou xuiapu xosa asinaku asinaku sapi iyarerisiketai sipawakuai. 
\v 19 Kakinari\x - \xo 1.19 \xo*\xt Ep 3.7;Kl 1.11; 1.29; 2.12\xt*\x* ipaki sipaunaria, mua Xoiteupo sokisokie sini nure sipesi xosikisuwopi saina tikiriai xuiapu xosa pani kokaipa saina tina xakuai. Sini nupo sokisoki uteiwopu xana xuweni kutu. Pa Xoiteupo kokaipa sokisoki sini xosa saina tirouna, 
\v 20 paie\x - \xo 1.20 \xo*\xt Siri 110.1;2 Ko 13.4;Kl 1.16; 2.10-12; 3.1;Ip 1.3\xt*\x* sore ekime Kristusu xosa saina tetai. Kristusue xumurati, pa Xoiteupo kokaipa sokisokie sarina mena xouro sou xouna nukou xupo meruira miseretai. 
\v 21 Pa xati\x - \xo 1.21 \xo*\xt Ro 8.38;Pl 2.9-10;Kl 2.10; 2.15;Ip 1.4\xt*\x* Kristusue xokupa xetau xetau yaniyani xouroni kutu puroto, xokupa tumu teu xouro puroto, xokupa kapmani xouro puroto, xokupa sapi sokisoki tuku teu xouro purotouna. Nue xokupa apimi mua yause xosa weniniki tuku xeika sewai yausepu xeika tuku xouro purina. 
\v 22 Xoiteue\x - \xo 1.22 \xo*\xt Siri 8.6;Mt 28.18;Kl 1.18;Ip 2.7\xt*\x* xokupa sapi Kristusu\x - \xo 1.22-23 \xo*\xt Kl 1.18\xt*\x* turo iyarina kawati, nue xokupa sapi tapaxi purati, pa kapiarei nu Yesusure xonikisuwoteneai nikau tumu purina. 
\v 23 Kristusure xonikisuwoteneai apimi\x - \xo 1.23 \xo*\xt Ro 12.5;Ep 4.10; 4.15;Kl 2.9; 3.11\xt*\x* paiya nini Kristusupo mupokemu. Kristusue xokupa sapi minika purina xiri xokopexina, nue Yesusure xonikisuwoteneai apimi xosa xokope xetai.
\c 2
\s Xoiteue kakati sini xumuweikiriai apimie Kristusu xeika ekisikioma purinuku
\p
\v 1 Tinie\x - \xo 2.1 \xo*\xt Ep 4.18;Kl 1.21\xt*\x* ekime\x - \xo 2.1-5 \xo*\xt Kl 2.13\xt*\x* xonuxonu xonuxonu xunu erari paie outikiati xumurounuku. 
\v 2 Pa yause xosa\x - \xo 2.2 \xo*\xt Yo 12.31;Ep 5.6; 6.12;Kl 1.21; 3.6-7;Ta 3.3\xt*\x* tinie mua ouropu kapia xoxi xosa texikiniai. Kakinuku mena xouro puroteneai xoxi yaniyani nikau tumupo kapia tinie taikiniai, paiya pa sokisoki yaniyanie Xoiteupo kuna sokau porourouneri xuiapimi nikau kamunikiro xemu saina tina. 
\v 3 Ekime\x - \xo 2.3 \xo*\xt Ro 5.12;Ka 5.16;Kl 3.6;Ta 3.3;1 Pi 4.3\xt*\x* siko xokupae pa apimi kini xeika purinuku, sikou xipiki xosikie xouweurouna xoxi kapia kireni sini taikiriai. Sini pa xipiki xosikie xouweurouna kapia kireni tainuku sikou nanunanue xouwewotai kapia taiwotoukiriai. Sini panumu kaki purikiriai yause xosa panumu xoxi kapia xokupa xuiapue kakeri Xoiteue xoxi yause tinikepure ireyetai sini tiku.
\p
\v 4-5 Suau\x - \xo 2.4-5 \xo*\xt Lu 15.24; 15.32;YT 15.11;Ro 5.6-10; 6.4-5; 6.13; 10.12;Ep 1.7; 2.1; 2.7;Kl 2.12-13\xt*\x*, sikou xoxi kapiae sini ousikiati xumuweikiriai. Sini xiri xumuweteneai apimi sie purinuku. Pana Xoiteue sini xouwesikina xoukemu siketai kapiae xiri koxetai. Nukoe kakati sini Kristusu xeika ekisikioma purinuku. Iyo, Xoiteue sini xouwesikina xoukemu siketai kapia kirenie tini xiyeri titiketai. 
\v 6 Nue\x - \xo 2.6 \xo*\xt Ep 1.20;Kl 2.12\xt*\x* Kristusu Yesusu xeika siko saisikeretai. Nue mena xouro nukou kokemu sai xosa Kristusu xeika miseisikeretai. 
\v 7 Kristusu Yesusupo saina\x - \xo 2.7 \xo*\xt Ep 1.7\xt*\x* paie kakati nue mua asinaku kapia siko xosa kaketai, pa amure, xurise xokupa yause xosa xokupa apimi nukoe xiri xouwenikina xoukemu tiniketai kapia atarinikepurexina. 
\v 8 Tinie\x - \xo 2.8 \xo*\xt Yo 4.10;Ro 4.16; 10.14-17;Pl 1.29;2 Ti 1.9;Ip 6.4\xt*\x* Kristusure xotikisuxari, Xoiteue tini xouwetikina xoukemu tiketai kapia kirenie, Xoiteue tini xiyeri titiketai. Paiya tini takieni kakikiriai sapixe. Xuwe. Xoiteue tini aini tiketai. 
\v 9 Paiya\x - \xo 2.9 \xo*\xt Ro 3.20; 3.27; 4.2;1 Ko 1.29-31;2 Ti 1.9\xt*\x* tini saina tinuku xe tikiriai sie xuwe. Pa xati kire apue nukou wenumuni xourorepuwatixe. 
\v 10 Kristusu Yesusue\x - \xo 2.10 \xo*\xt 1 Ko 3.9;2 Ko 5.5; 5.17;Ep 4.24;Ta 2.14\xt*\x* kakati Xoiteue sini oma xuimiapimi saisikeretai, paiya siko asinaku kapiapu imerei texepure ekimeni Xoiteue ireiyerisikeyai ime.
\s Kristusue xiwai kapia xuweiyati aimore kinie kireni tutuxineri
\p
\v 11 Tini\x - \xo 2.11 \xo*\xt Ro 2.28-29;1 Ko 12.2;Ep 5.8;Kl 1.21\xt*\x* sipa, Yuta apimie apimi nikau mupuniki ipisa kakirounerie, tini ipaki kakikirouneri, “Nini mupuniki ipisa katiwopu xuweu apimi,” xirouneri. Paiya apimie nikou mupuniki masaureni mamarikaurounerire kunawotai. Paina tini atinari nanuwa, ekime tini xetau xeteneai xuiapu purinuku, 
\v 12 pa yause xosa\x - \xo 2.12 \xo*\xt Ro 9.4; 9.8;Ka 4.8;Ep 4.18;Kl 1.21;1 Ts 4.5; 4.13\xt*\x* Kristusu nutiemu puropu xuwe. Tini Israili kini xeika puropu xuwena kisau purikiniai. Xoiteue Israili xeika sokisoki kuna kunarina nini xeika kuna ouna xoniki tumareyaina tini paiya nini xeika purarixe. Tini mua ouro purinuku, sewai kire asinaku sapi purotai putawopina tini yakuwarixe. Pa xeika tini Xoiteu sipa xuwe. 
\v 13 Ekime\x - \xo 2.13 \xo*\xt Ka 3.28;Ep 2.17;Kl 1.20\xt*\x* tini xetauroni kutu purikiniai. Pana muaiya Kristusupo yawie sotiki koati, Xoiteu nuko nutiemuni kutu purinuku. 
\v 14 Kristusu\x - \xo 2.14 \xo*\xt Ais 9.6;Mai 5.5;Yo 16.33;YT 10.36;1 Ko 12.13;Kl 1.20; 2.14\xt*\x* nukoini kakirouwati sini xosikikururei xirini ati misinuku. Ekime Yuta kinie xetau xeteneai apimi xeika xiwaixirouneri, kakeri pa xiwai kapia paie sepuri sie Yuta kini xeika xetau xeteneai apimi kini xeika purotai. Pana Kristusu nukou mupoini pa sepuri kereuweina pa xiwai kapia xuweiyeina, pa aimore kini kunununikerina kireni kini nikeretai. 
\v 15 Nue\x - \xo 2.15 \xo*\xt 2 Ko 5.17;Ka 6.15;Ep 4.24;Kl 1.20-22; 2.14; 2.20\xt*\x* Mosesipo tuxotapa xeika xokupa kuna masa xeika nupo kireu xetau tuxotapa xeika xesauwetai. Nue aimore kini kunununikerina, kireni apu sieinikerepure pa kapia kaketai. Nue pa kapia kaketai xati sini xosiki tumaxi purinuku. 
\v 16 Kireni\x - \xo 2.16 \xo*\xt Sek 9.10;Ro 6.6; 8.3;Kl 1.20; 2.14\xt*\x* mupoe pa aimore kinie Xoiteu xeika xoniki tumaxi puropinerire na nikitoto xosa xumotai. Kakina ekime puroyai xiwai kapia na nikitoto xosa xumuwetai. 
\v 17 Nue\x - \xo 2.17 \xo*\xt Ais 57.19;Sek 9.10;YT 2.39;Ro 5.1\xt*\x* kouna asinaku kuna ipaki uteina, “Tini ximine xotikikemu kirenini pura,” xetai. Nue mua asinaku kuna tini xetauro wese purixanaukiriai apimi kini xosa uteiwotowotai, tomuroni puroteneai xuiapu xosa rania uteiwotai. 
\v 18 Xoiteue\x - \xo 2.18 \xo*\xt Ro 5.2;1 Ko 12.13;Ep 3.12;Ip 4.16;1 Pi 3.18\xt*\x* wesikitati nukou xosa xouwopure, Kristusue panumu kakati Xoiteupo Youyae sini aimore tutuni tianisiketai.
\s Sini Yesusu taikiriai sini Xoiteupo atani kutu
\p
\v 19 Muaia\x - \xo 2.19 \xo*\xt Ka 6.10;Ep 3.6;Pl 3.20;Ip 12.22-23\xt*\x* tini ou xuweu kamariorio puroteneai apimi siexe. Xuwe. Tini Xoiteupo xuiapu tuku kireni kinipu purinuku. Tini Xoiteupo xuiapuni kutu purinuku. 
\v 20 Tini\x - \xo 2.20 \xo*\xt Mt 16.18;1 Ko 3.9-11;Ka 2.9;XKY 21.14\xt*\x* Xoiteue xuwotai ata sie. Mua atapu xai sie nue sini Yesusupo tianutianuwopi xeika kunatureture xeika waisikereyai. Yesusu Kristusu nuko paiya akereki xaini kutu. 
\v 21 Mua atapu xokupa\x - \xo 2.21 \xo*\xt 1 Ko 3.16-17;2 Ko 6.16;Ep 4.15-16;Kl 2.19\xt*\x* arawae Kristusu xosa wawaiwoki, kakineri xokupani atineri wawaiwoteneai. Xoiteue pani pa ata xuwati, Xoiteu nukou atani puropinaure pa ata xiri kokaipa xepurexina. 
\v 22 Tini\x - \xo 2.22 \xo*\xt 1 Pi 2.5\xt*\x* rania Kristusu xosa wawaiwari, Xoiteue nukou kireu xuiapu xeika kununuwati, tini Xoiteupo atani kutu xatia, nuko xeika Xoiteupo Supo Youya xekae pa atoro puropineri.
\c 3
\s Polue xetau xeteneai apimi xosa asinaku kuna uteiwopina saina tuku
\p
\v 1 Xoiteue\x - \xo 3.1 \xo*\xt Ep 4.1;Pl 1.7; 1.13;Pm 1; 9\xt*\x* tini xiri asinakuni kutu saitiketai xati, pa xotapaure sore ye Polu ye kakauya xosa purine pa amure, tini xetau xeteneai xuiapu tianitikepure Kristusu Yesusupo saina tiroune. 
\v 2 Tini\x - \xo 3.2 \xo*\xt Kl 1.25\xt*\x* xosa rania pa saina kakina xouwetikina xoukemu tiketai sie, yei pa saina tepineure Xoiteue ye xouweina xoukemu sierina tumuyeretaire, tini iyesikiriaixi nanune. 
\v 3 Mua\x - \xo 3.3 \xo*\xt Ep 1.9-10;Kl 1.26\xt*\x* kuna Xoiteue ekime kakeyai kapiaure paiya ximiaki puroyaina pana, Xoiteu nukoini ye xosa yarareyai paiya, ye xayaka xayaka kunauweitiai. 
\v 4 Kristusue\x - \xo 3.4-6 \xo*\xt Kl 1.26-27\xt*\x* ximiarei pa saina tetaire kuna ye xiri sipani kutuna, tinie mua kuna ninaxinaria tini panumu sipawakuai. 
\v 5 Ekime xokupa yause xosa, Xoiteue mua ximiaropu kuna atina uteiwopu xuwe. Pana muaia Xoiteupo Supo Youya xosa, Xoiteue sini Yesusupo tianuwopi xeika Xoiteupo kunatureture xeika xosa atina kuna uteiwotai. 
\v 6 Mua\x - \xo 3.6 \xo*\xt Ka 3.14; 3.28-29;Ep 2.13-19\xt*\x* kuna paiya muanumu. Asinaku kuna xosa paie tini xetau xeteneaipo apimi kinie sini xeika kireni kini xinuku kireni mupusiki sainuku. Kakinuku siko xokupae Kristusu Yesusu xosa Xoiteue xokupa sapi akituworisikeyai tirounuku. 
\v 7 Yei mua asinaku kuna uteiwopineure Xoiteue\x - \xo 3.7 \xo*\xt Kl 1.23-25\xt*\x* kakati ye saina apu saitiai. Nue ye xouweina xoukemu sierina, nue sokisokiyati pa saina tepineure, nupo sokisoki ye sietai. 
\v 8 Ye\x - \xo 3.8 \xo*\xt 1 Ko 15.9-10;Ka 1.16;Ep 1.7;Kl 1.27;1 Ti 1.13-15\xt*\x* paiya Xoiteupo kireu xuiapu irueni kutu purinena pana, nue ye xouweina xoukemu sierina pa saina sietai, paiya xetau xeteneai apimi xosa kuna uteiwopineure. Mua asinaku kuna paiya, asinaku sapi nikau, paiya Kristusu taiwoteneai xuiapue tepineri. Mua xokupa sapi paiya sini apue uteinuku ninaxepu sie xuwe. 
\v 9 Xoiteue\x - \xo 3.9 \xo*\xt Ro 16.25;1 Ko 2.7;Ep 1.9;Kl 1.16; 1.20;Ip 1.2\xt*\x* xokupa sapi iyarina, ximuximuni nukoe kapia kakepurexeyai nanunanu ximiakereyai. Kakati ekime pa nanunanu sipesi ximiaki purotai. Pana muaia yei nupo nanunanu yarani uteiwopineure saina sietai. 
\v 10 Ekime\x - \xo 3.10 \xo*\xt Ro 8.38; 11.33;Ep 1.21;1 Pi 1.12\xt*\x* ximiakereyaina pana, muaia nukoe kakati nukoure xonikisuwoteneai xuiapu putawori, pa kapiarei nupo xokupa xokupa asinaku nanunanu xeika sipa xeika yaraxeri, mena xouropu sokisoki yaniyani xeika tumu xeikae Xoiteupo nanunanu sipawopineri. 
\v 11 Ekimeni Xoiteue mua saina kakepure nanuwoyai xati, ximine sikou Kokaipa Kristusu Yesusupo sainae saina tietai. 
\v 12 Kakati \x - \xo 3.12 \xo*\xt Yo 14.6;Ro 5.2;Ep 2.18;Ip 4.16\xt*\x*sini Kristusure xosikisunuku, sini ximikiroukirixe. Sini xiri sipa, Kristusu nu Xoiteu xosa putawopu ime. 
\v 13 Pa xati\x - \xo 3.13 \xo*\xt Kl 1.24\xt*\x* ye ximine tini katikine, tini tianitikepure mua tatau xemetiaire xekepi nanunanuwari, tinipo xotikisu oro koxete. Xuwe. Mua sapi yaraxetaire tini nimaririwa, pa amure, tini Xoiteu xeika ati purakuaire tianitikepina.
\s Epesesie sokisoki puropinerire Polue kunikuniwotai
\p
\v 14 Xauwae kakeyai kapiaure nanune nure xoitapa ukurouroune. 
\v 15 Nue\x - \xo 3.15 \xo*\xt Ep 1.10;Pl 2.9-11\xt*\x* xokupa kini mena xouro puroto ouro purotowoteneai nikau Eminiki xati, nukoini nini xokupa weniniketai. 
\v 16 Yei\x - \xo 3.16 \xo*\xt Ro 9.23;2 Ko 4.16;Pl 4.19;Kl 1.11; 1.27\xt*\x* xoitapa ukuroune ipaki kunikunine, Xauwae tini asinaku asinaku sapini kutu tikepure akituworitiketai, pa xati nukou Supo Youya tinipo xotikiro koratia tini xiri sokisokini kutu purakuai xiroune. 
\v 17 Tinipo xotikisue\x - \xo 3.17 \xo*\xt Yo 14.23;Ep 2.22;Kl 1.23; 2.7\xt*\x* kakatia Kristusue tinipo xotikiro puropina. Kakatia kireu xiri xonikiewopi kapia paie, tinipo xotikikemu tuporo xiri sokisokina paiya ouwe na poru soki tati nae soki tumurouna sie kakatia tini sokisoki tumuwakuai. 
\v 18-19 Pa xati\x - \xo 3.18-19 \xo*\xt Yo 1.16;Ro 10.3; 10.11-12;Ep 1.18; 1.23;Kl 2.2; 2.9-10\xt*\x* tinie Xoiteupo xuiapu xeika sokisoki takuai, kakinari Kristusue kireu xiri xouwenikepi kapia paiya, xiri kokaipani kutu xati, tini xokupae atinari sipawakuai, paiya pani xuwau xouna, xouroni kutu xouna, taipa toupaini xouna. Iyo, Kristusue kireu xouwenikepi kapia paiya xokupa sipa xiri emeserinikinana pana, tini nu xiri sipawakuai. Kakinaria xokupa asinaku sapi Xoiteu nuko xosauni koxetai paiya, tini xosa rania koxepineri.
\p
\v 20 Xoiteupo sokisokieni\x - \xo 3.20 \xo*\xt Ro 16.25;1 Ko 2.9;Kl 1.29\xt*\x* sikou xosikiro saina tirouna xati, pa sokisokie sikou nanunanu xiri emeserina. Xoiteue xokupa sapi kakepinaure kotourounukua, nini Xoiteupo sokisoki sieni kutu xepuworixe. 
\v 21 Pa xati\x - \xo 3.21 \xo*\xt Ro 11.36; 16.27;Ip 13.21\xt*\x* Yesusure xonikisuwoteneai xuiapue, sipesi sipesi Kristusu Yesusupo wenumurei Xoiteupo wenumu xokupa yause rania xourorepineri. Pa suau.
\c 4
\ms Sini Kristusupo mupokemu purinuku sini Xoiteu nukou kapiani taiwopu
\mr 4—6
\d
\s Sini Yesusure xosikisukiriai apimi xosiki tumaxi puropu
\p
\v 1 Ye\x - \xo 4.1 \xo*\xt Ep 3.1;Pl 1.27;Kl 1.10;1 Ts 2.12;Pm 1; 9\xt*\x* Polu ye kakauya xosa purine, pa amure, ye Kokaipapu saina tiroune. Xoiteue nukoni kutu taiwakuaire yaitikeyaire ye nanune, pa xati nukoe xouwewotai asinaku kapiarei texakuaire xakumetikepurexine. 
\v 2 Kireu apimi nini\x - \xo 4.2 \xo*\xt YT 20.19;Ka 5.22-23;Kl 3.12-13\xt*\x* Yesusure xonikisuwoteneai irueni kutu tini purinari, asinaku kapia nini xosa kaka. Tini xosa kapia xoreiyereri kakixanari nini xosa kisamairatikexete. Tini kireni kirenie tinipo xotikikemu nini tinikinari ninie tini tiketeneai xu xemeroa. 
\v 3 Xoiteupo Supo Youyae\x - \xo 4.3 \xo*\xt Kl 3.14-15\xt*\x* xosikikemu kirenini tumaxi puropu kapia sikati, pa kapiae muri sie taisikerati kireni kinipuere sini purinuku. Pa xati tini pa kapia soki tepure sokisokixa. 
\v 4 Mupusiki kireni tuku\x - \xo 4.4 \xo*\xt Ro 12.5;1 Ko 12.4; 12.11-12;Ep 1.18; 2.16-18\xt*\x*, Xoiteupo Supo Youya kireni tuku. Panumu sie tini kireni sapi kireni yakuwakuaire Xoiteue yaitikina, paiya Xoiteue siko xosa kakepurexetai asinaku sapi xousokuwopina. 
\v 5 Kireni Kokaipa kireni purina\x - \xo 4.5 \xo*\xt Yo 10.16;1 Ko 1.13;2 Ko 11.4;Ka 3.27-28;Ip 6.6\xt*\x*, xosikisuwopi kapia kireni, Xoiteupo wenumurei ene isepi kireni. 
\v 6 Kireni Xoiteu tuku\x - \xo 4.6 \xo*\xt Ro 11.36;1 Ko 12.6\xt*\x*, nu siko xokupa sikau Emisiki. Nue xokupa xuiapu oronikina, nue xokupa xuiapu xopuro saina tina, xokupa xuiapu xosa purina.
\p
\v 7 Kristusue\x - \xo 4.7 \xo*\xt Ro 12.3; 12.6;1 Ko 12.11\xt*\x* kokaipa sokisoki xeika sipa xeika siko siketai xati, panumu sieni Xoiteue siko xokupa kireni kireni xouwesikina xoukemu siketai. 
\v 8 Xoiteupo nakaue\x - \xo 4.8 \xo*\xt Siri 68.18;Kl 2.15\xt*\x* ipaki kunauna,
\q1 “Nue xouroni kutu xouna,
\q2 kokaipa kakauya apimi kini sonikati
\q3 nuko xeika xowoteneai.
\q1 Kakina sokisoki xeika sipa xeika
\q3 apimi tiniketai,” xetai.
\m
\v 9 Mua\x - \xo 4.9 \xo*\xt Yo 3.13\xt*\x* kuna “nu xouro xowotai” paiya Kristusu nu xouro kireni xowopu xuwexi atarisikina. Xuwe. Ximuximua nu ou toupai miniminikani kutu purotai xosa xowotai. 
\v 10 Pa\x - \xo 4.10 \xo*\xt Ip 4.14; 9.24\xt*\x* apue ximuximu ou minika xowotaieni, xouro rania xowotai. Nue xokupa sapi inainawopure, xokupa mena xouroni kutu xowotai. 
\v 11 Nue\x - \xo 4.11 \xo*\xt Ro 12.7;1 Ko 12.28;2 Ti 4.5\xt*\x* sore muanumu sokisoki xeika sipa xeika siketai. Kireu apimi xosa paiya Yesusupo tianutianuwopi saina tiniketai. Kireu apimi xosa paiya kunatureture saina tiniketai. Kireu xosa paiya xuiapu xosa asinaku kuna uteiwopineri saina tiniketai. Kireu xosa paiya yayakunikepi saina tinikete Xoiteue xouwewotai kapia xuiapu taitainikepineri saina tiniketewotai. 
\v 12 Sini Xoiteupo xuiapue nukou asinaku saina tepuxati Kristusue\x - \xo 4.12 \xo*\xt 1 Ko 12.7;Ep 1.23;2 Ti 3.17\xt*\x* sokisoki xeika sipa xeika tianisikepure siketai. Pa xati Kristusupo mupokemu sokisoki xinapa ati puropina. 
\v 13 Mua\x - \xo 4.13 \xo*\xt 1 Ko 14.20;Kl 1.28; 2.2\xt*\x* sainae xowoki xowoki wati xosikisukiri paie kakatia, sini xiri xosikikemu tumaxi purinuku siko xokupani Xoiteupo Nono sipawopu. Kakinuku Yesusure xosikisunuku sokisokixinukua Kristusu nuko sieni asinaku kapia tepu. 
\v 14 Sini\x - \xo 4.14 \xo*\xt Ais 28.9;1 Ko 14.20;2 Ko 2.17;Ip 13.9\xt*\x* nono misiarara sie pani puropuxe, pa xakuxakutua nikau kuna paiya nini xoreixepineri xokupa kapia xiri sipani kutu, paie kakati xupeu xeika xasi xeikae sini xosa sokau porourouna sie porosikepuwatixe, ousoe xasi ukauro kamariorio tiririkixanauna xowopurexetai wese xowopu xuweurouna sie xuwe. 
\v 15 Sini\x - \xo 4.15 \xo*\xt Ep 1.22; 4.25;Kl 1.18;1 Yo 3.18\xt*\x* panumu kuna xosa xakusiki iyarepuxe. Xuwe. Sini kireu xiri xonikiewopi kapia tainuku nini xosa suau kuna kireni kunawopu. Kakinuku sokisoki xuiapu sainuku, siko tapusiki Kristusu xeika xiri lixepu, 
\v 16 nue\x - \xo 4.16 \xo*\xt Kl 2.19\xt*\x* kakati sikou mupusikipo xokupa xupusiki siasiki ekisiki paiya nukoe siko kireni kireni saina siketai xati asinaku saina tirounuku. Nue kakati siko xokupa xosikitapapu tunie xiri kiritinuku kireu xatasikimana xosikienikepi kapia tairouna, pa kapia paie kakati mupusiki kokaipaxina sokisokixirouna.
\s Yesusure xonikisuwoteneai xuiapu nini oma kapia xosa texepineri
\p
\v 17 Pa xati\x - \xo 4.17 \xo*\xt Ro 1.21;1 Pi 1.14\xt*\x* ye tini xosa kire kuna kunawopure xine. Kokaipapu wenumurei ye ipaki sokisoki kuna kunaune, tini xukumi nikau kapia xosa pani texaku. Ninipo nanunanu paiya turutaruwati, 
\v 18 ninipo sipa paiya\x - \xo 4.18 \xo*\xt YT 26.18;Ka 4.8;Ep 2.12;1 Ts 4.5\xt*\x* ukumu sie xina. Nini sipa xiri xuwe xati, xonikikemu kitiere, pa xati nini Xoiteupo misepirei purorixe. 
\v 19 Nini\x - \xo 4.19 \xo*\xt Kl 3.5\xt*\x* xoxixoxi kapia kakerineri paire mayaxirouworixe. Nini ayaka kapia kamatupo xosa maneri, xoxixoxi kapia kakepure xonikemu sana.
\p
\v 20-21 Tini Kristusupo kuna iyesari, Yesusu xosa purotai suau kuna taitaitiketeneaixi nanune. Paina ye sipa, tinie pa xukumi nikau kapia xoxi kakakuaire taitaitikepu xuwe. 
\v 22 Tini rania ekime\x - \xo 4.22 \xo*\xt Ro 6.6; 8.13;Ep 2.2-3; 4.17;Kl 3.9;Ip 12.1;1 Pi 4.3\xt*\x* xipiki xotikikemupo kapia xosa texikiniai, paiya xoreiyeri xosiki saroati xoxi kapia kakepi xotapa, pa kapiae apu xoxixepina ime yatawotai. Pana ximine tini mua xipiki kapia kakepi xotapa xesauwari, 
\v 23 tinipo nanunanu\x - \xo 4.23 \xo*\xt Ro 12.2;Kl 3.10\xt*\x* oma xepina. 
\v 24 Tini\x - \xo 4.24 \xo*\xt Stt 1.26;Ro 6.4;Ep 2.10;Kl 3.10\xt*\x* oma xuiapu saya, paiya Xoiteu nukoini kakati oma xuiapu saineri Xoiteu nuko sieni purineri, pa amure, Xoiteu nuko ekero ninipo kapia paiya xiri teteiwoki xoseini kutu.
\p
\v 25 Pa xati\x - \xo 4.25 \xo*\xt Sek 8.16;Ro 12.5;Kl 3.8-9\xt*\x* tini xoreixepi kapia weta. Tini xokupae kireu xuiapu Yesusure xonikisuwoteneai xosa suau kuna kireni kunawa, pa amure, siko xokupa paiya kireni mupusikipo masa purinuku. 
\v 26 Tini kisamairatikatia\x - \xo 4.26 \xo*\xt Siri 4.4;Ye 1.19-20\xt*\x*, tini sosopa epixakuai. Panumu tini xunu eraku. Panumu tini kisamaira xosa purariporoni asau munoxete. 
\v 27 Panumu\x - \xo 4.27 \xo*\xt 2 Ko 2.10-11;Ye 4.7;1 Pi 5.9\xt*\x* tini Satanipo isima taiyaku. 
\v 28 Petuae\x - \xo 4.28 \xo*\xt 1 Ts 4.11;2 Ts 3.8; 3.11-12\xt*\x* pani pexeni. Xuwe. Nini mua saina ati tineri, xokupa sapi tineria, kireu apimi xuru xuweu puroteneai tianikepineri. 
\v 29 Tini\x - \xo 4.29 \xo*\xt Ep 5.4;Kl 3.8; 3.16; 4.6;1 Ts 5.11\xt*\x* kakixanari xoxixoxi ninia tinipo suputikerei wetari koxete. Xuwe. Apimi irerewoteneai sokisokinikepure, asinaku kuna kireni kopina. Muanumu kuna paie kuna iyeseteneai apimi xosa Xoiteue xouwesikina xoukemu sikirouna kapia kopina. 
\v 30 Tinie\x - \xo 4.30 \xo*\xt Ais 63.10;Ro 8.23;Ep 1.13-14;1 Ts 5.19\xt*\x* Xoiteupo Supo Youya kakixari xoukemu tutumuriwaku. Xoiteu nukou xuiapuni kutu purakuaire yekutikina Xoiteupo Supo Youya tiketai, kakina xiyeri sotikati somoni kutu purakuai yause ataritikepurexina. 
\v 31 Tini\x - \xo 4.31 \xo*\xt Kl 3.8; 3.18-19;Ta 3.2-3;1 Pi 2.1\xt*\x* xokupa xotikikemu xoxixoxixepi kapia wetinari, makawopi wetinari, kisamaira wetinari, xatiki kopuwopi wetinari, pire wetinari, xokupa kapia xoxi weta. 
\v 32 Tinie\x - \xo 4.32 \xo*\xt Mt 6.14; 18.22-35;Mk 11.25;2 Ko 2.10;Kl 3.13\xt*\x* Yesusure xonikisuwoteneai xuiapu xotikikemu tinikinari nini xosa asinaku kapia kakinari, takitaki tianuwataxa. Xoiteue Kristusu wenumurei tinipo xunu wetetai sie, tinie ninipo xunu wetakuai.
\c 5
\s Sini memeremu xosauni kutu texepu
\p
\v 1 Xoiteue\x - \xo 5.1 \xo*\xt Mt 5.48;Lu 6.36\xt*\x* tini xiri xouwetikirouna xati, tini nupo nono purinuku. Pa xati nukoe kakirouna kapiani tini taiwa. 
\v 2 Kristusue siko xiri xouwesikina tianisikepure nukou ekeomani siketai. Nue Xoiteu xosa xouiwori asinaku xurituku sapie somu xuri pukaurouna sie nukou ekeoma Xoiteu tuwotai. Pa xati\x - \xo 5.2 \xo*\xt XT 29.18;XS 1.9;Siri 40.6;Yo 13.34;Ro 14.15;2 Ko 2.15;Ka 2.20;Ip 7.27; 10.10;1 Yo 3.11; 3.23\xt*\x* tinie kireu xiri xoutikieninikepi kapiani kuturei texa.
\p
\v 3 Tini\x - \xo 5.3 \xo*\xt Ro 6.13;1 Ko 5.1;2 Ko 12.21;Kl 3.5;1 Ts 4.3\xt*\x* kakixanari ayaka ayaka kapia kakinari xokupa xoxixoxi xunu kapia kakinari, kireu apimi nikau sapire ekitikie netewaku. Pa xoxixoxi kapiapu kuna rania tini xopuro xayaka xayaka moxete. Tinie panumu kapia kakinari ime taiyaria xuiapue tini kuna xosatiki suwopineri. 
\v 4 Tini\x - \xo 5.4 \xo*\xt Mt 12.35;Ro 1.28;Ep 4.29\xt*\x* kakixanari xunu kuna kunaunari nanana kuna kunaunari neraunari ninia kuna kunawaku. Sini panumu kapia xoxi kakepuxe. Xuwe. Xoiteu xosa kireni eiyase kuna kunawa. 
\v 5 Tini\x - \xo 5.5 \xo*\xt 1 Ko 6.9-10;Ka 5.19-21;Kl 3.5\xt*\x* panumu atinari sipawa, ayaka kapia kakineri xunu kapia kakepineri xuiapu xeika ekinikie sapi nirouneri xuiapu xeika nini xorei xoiteu xosa muris tepi sie kapia kakineri, nini panumu xuiapu kinia nini Kristusuno Xoiteunoe xuiapu yakunikepineri yause xosa manepuworixe.
\p
\v 6 Tini\x - \xo 5.6 \xo*\xt Ro 1.18;Kl 2.4; 2.8;2 Ts 2.3\xt*\x* sosopa epixa, apimie purutikeri pa xoxi kapia xona kakakuaire katikeri ninipo inainaropu aipu kuna xoxi taiwaku. Panumu kapia sore kakeri Xoiteue xasese maneteneai apimi xosa kisamairauna. 
\v 7 Pa xati tini panumu apimi xeika kakixanari lixaku. 
\v 8 Tini ekime\x - \xo 5.8 \xo*\xt Yo 12.36;YT 26.18;Ro 1.21;2 Ko 3.18;Ep 2.11-13;Kl 1.13;1 Pi 2.9;1 Yo 2.9\xt*\x* ukumu xosa purikiniai, pana muaia Kokaipae memeremu xosa iyaitikeretai. Pa xati tini memeremu xosaupo xuiapu sie xosa texa. 
\v 9 Memeremu\x - \xo 5.9 \xo*\xt Ka 5.22\xt*\x* paie xokupa asinaku kapia xeika kutu asinaku kapia xeika suau kunapu kapia xeika yararirouna. 
\v 10 Tini\x - \xo 5.10 \xo*\xt Ro 12.2;Pl 1.10;1 Ts 5.21;1 Ti 2.3\xt*\x* Kokaipae xouweurouna kapia sipawopure xaute sokisokixa. 
\v 11 Tini\x - \xo 5.11 \xo*\xt Ro 6.21;1 Ko 5.9-11;Ka 6.8;2 Ts 3.6; 3.14;2 Yo 10-11\xt*\x* ukumu xosaupo kapia kakirouneri apimi xeika lixaku. Panumu kapiae asinaku xoye erirouwatixe. Xuwe. Xeuxana, tinie apimi panumu atarinikinari, muanumu kapia xoxi nika. 
\v 12 Ninie ximiakineri kakirouneri kapiaure ye kunawopure xuwe. Ye panumu kapiaure kunawopinepa ye mayaxine. 
\v 13 Pana\x - \xo 5.13 \xo*\xt Yo 3.20-21;Ip 4.13\xt*\x* memeremue xokupa kapia xotapa yararatia yarani purirouneri. 
\v 14 Memeremue\x - \xo 5.14 \xo*\xt Ais 26.19; 60.1;Ro 13.11\xt*\x* kakati kire sapi yarani puratia, pa sapi rania memeremu siexina. Pa xati mua kuna purina,
\q1 “Apu ne mua xinitiaia, ne sarouwo.
\q1 Ne kopa upurei saroaua
\q2 Kristusue ne memeremu
\q3 tinepina,” xetai.
\p
\v 15 Pa xati tini sesepi texinaria tini sosopani epixakuai. Tini nanana xinari sipa xuweu apue teiyewaku. Xuwe. Tini sipa tuku apue teiyewa. 
\v 16 Tini\x - \xo 5.16 \xo*\xt Ka 6.10;Kl 4.5\xt*\x* Xoiteupo kapia kakakuai yause muai. Pana sini mua yause xosa purikiriai paiya xoxi yause, pa xati sosopa xakuai, panumu mau yause aini xuwexete. 
\v 17 Tini\x - \xo 5.17 \xo*\xt Ro 12.2;Kl 1.9;1 Ts 4.3; 5.18\xt*\x* kakixanari nanana kapia kakaku. Xuwe. Tini Xoiteue xouwewotai nanunanu atinari sipawakuai.
\p
\v 18 Tini\x - \xo 5.18 \xo*\xt Asin 20.1;Ais 5.11; 5.22;Lu 21.34\xt*\x* kakixanari xisa ere ninari nanana xaku. Xuwe. Panumu kapiae tini xoxirounuku. Tini Xoiteupo Youya wetari tini xosa koxepina. 
\v 19 Tini\x - \xo 5.19 \xo*\xt Siri 34.1;YT 16.25;1 Ko 14.26\xt*\x* \x - \xo 5.19-20 \xo*\xt Kl 3.16-17\xt*\x*Xoiteupo kireu xuiapu xeika kunaunari paiya, siri Siri Nakau xosa puroteneai kuna tete muris tepupo kireu siri tete, Xoiteupo Supo Youyae xotikiro saretai siri teteunari, tinipo kuna xosa iyara. Kakinari tinipo suputikirei xeika xotikirei xeika rania, tini Kokaipaure siri wawaiwa. 
\v 20 Kakinari\x - \xo 5.20 \xo*\xt Siri 34.1;Ais 63.7;Ip 13.15;1 Pi 2.5\xt*\x* sikou Kokaipa Yesusu Kristusupo wenumurei, tini sipesi xokupa sapire Xauwa Xoiteu eiyasewa.
\s Polue xuiapue tiwataxeteneaire kunawotai
\p
\v 21 Tini\x - \xo 5.21 \xo*\xt Pl 2.3;1 Pi 5.5\xt*\x* Kristusu sinipo Kokaipaxi nanunari, tini kireni kirenie Xoiteupo kireu xuiapu irue pura.
\p
\v 22 Tini\x - \xo 5.22 \xo*\xt Stt 3.16;Ep 6.5;Kl 3.18;1 Pi 3.1\xt*\x* xuia, tini Kokaipa irue purikiriai sie takipo xamutikimana irue pura. 
\v 23 Pa amure\x - \xo 5.23 \xo*\xt 1 Ko 11.3;Ep 1.22-23;Kl 1.18\xt*\x*, Kristusue nukoure xonikisuwoteneai nikau tumu sie, apue nupo xui tapaxina. Yesusure xonikisuwoteneaia Kristusupo mupokemu xati, Kristusue xiyeri sowotai. 
\v 24 Yesusure xonikisuwoteneaia Kristusu irue purineri. Panumu sie tini xui rania, xokupa yause tinipo xamutikimana irue pura.
\p
\v 25 Kristusue nukoure xonisuwoteneai tianikepure xiri xouwenikina nupo ekeoma wetetai sie, tini apue\x - \xo 5.25 \xo*\xt Ka 1.4;Kl 3.19;1 Pi 3.7\xt*\x* rania tinipo xui xiri xotikienika. 
\v 26 Nukou ene xeika kuna xeika xosa\x - \xo 5.26 \xo*\xt Yo 15.3; 17.17;Ta 3.5;Ip 10.10; 10.22;1 Yo 5.6\xt*\x* Kristusue nikoure xonikisuwoteneai ene iserinikati nupo ekero asinaku teteiwoteneai. Panumu kapiae nukoe Yesusure xonikisuwoteneai ikou xetai. 
\v 27 Nukoe\x - \xo 5.27 \xo*\xt 2 Ko 11.2;Ep 1.4;Kl 1.22\xt*\x* nukou ekeroni kutu Yesusure xonikisuwoteneai xuiapu atinikati xiri xoseiyeri, panumu xunu xeika kesi xeika tukuxepuwatixe. Xuwe. Yesusure xonikisuwoteneai paiya xu xuweu xeseu puropineri. 
\v 28 Panumu sie tini apu tini takipo muputikini xotikieukiriai sie, tini takipo xuimi xotikienika. Apue nukou xui xiri xouwewotai paiya, nu nukoini nuko xiri xouweuna. 
\v 29 Siko sipa, kire apue nukou mupokemuni xiwairouwatixe. Xuwe. Nu xoye tuna ati yakurouna. Kristusue nukoure xonikisuwoteneai xuiapu yakunikirouna sie, 
\v 30 pa amure\x - \xo 5.30 \xo*\xt Ro 12.5;1 Ko 6.15; 12.27;Ep 1.22-23\xt*\x*, siko paiya Kristusupo mupokemupo siau xeika xupo xeika ekekemu xeika sie. 
\v 31 Xoiteupo nakaue\x - \xo 5.31 \xo*\xt Stt 2.24;Mt 19.5;Mk 10.7-8;1 Ko 6.16\xt*\x* ipaki kunauna, “Pa xati apue omo ana wetina nupo xui xeika lixirouna, kakina nini kireni mupuniki sairouneri,” xetai. 
\v 32 Mua\x - \xo 5.32-33 \xo*\xt Kl 3.19;1 Pi 3.6;XKY 19.7\xt*\x* ximiaropu kuna paiya nu kokaipa nanunanu tuku. Ye ikoni nanune, paiya Kristusu xeika nukoure xonikisuwoteneai xuiapu xeikaure kunaunaxine. 
\v 33 Pana mua kunae rania kunauna tini apu kireni kirenie takire xirounuku sieni tinipo xui xiri xotikienika. Xui paiya nupo xamu irue purina ati yakuwopina.
\c 6
\s Polue nono xeika eminikimana aninikimana xeikaure kunawotai
\p
\v 1 Tini\x - \xo 6.1 \xo*\xt Asin 23.22;Kl 3.20\xt*\x* nonomi, Xoiteue xouweiwotai kapia tinie emitikimana xeika anitikimana xeika nikau kunani kutu taiwa. Tini panumu kapia kakinaria, tini asinaku kapia kakinuku. 
\v 2 Xoiteupo nakaue\x - \xo 6.2 \xo*\xt Mt 15.4\xt*\x* ipaki kunauna, \x - \xo 6.2-3 \xo*\xt XT 20.12;Tu 5.16\xt*\x*“Ne eminianinipo kuna tainau nini irue puro,” xetai. Mua tuxotapa paiya akereki tuxotapa sokisoki kuna xeika purina, 
\v 3 paiya sokisoki kunae ipaki kunauna, “Ne panumu kakinaua, xokupa saina sie kakitiai asinaku xatia, ne mua ouro xuwau yause purowai,” xetai.
\p
\v 4 Tini\x - \xo 6.4 \xo*\xt Tu 4.9; 6.7; 6.20-25;Siri 78.4;Asin 19.18; 22.6;Kl 3.21\xt*\x* eminikimana, tini kakixanari niretikimana nikau nanunanu xoxixoxiwaku. Panumu nini kisamairanikexete. Xuwe. Tini Kokaipa ekero asinaku kapia kakinari, tinipo nono atinari kutunikinari Xoiteupo kuna xosa taitainika.
\s Polue saina apu xeika tumu xeikaure kunawotai
\p
\v 5 Tini\x - \xo 6.5 \xo*\xt 2 Ko 7.15;Pl 2.12;Ta 2.9-10;1 Pi 2.18\xt*\x* aipu saina xuimiapimi, tinie\x - \xo 6.5-8\xo*\xt Kl 3.22-25\xt*\x* tinipo saina yayaku kokaipaure nanunari ninipo kuna taiwa. Tini kakixanari xoreire pa kapia kakaku. Xuwe. Tini Kristusupo kuna iyesinuku tairounuku sieni ninipo kuna xiri taiwakuai. 
\v 6 Ninie tini nutietiki purori ai niraniranikinari ekiniki tepure nanuwori asinaku saina taku. Pa xuwe. Tinie ipaki nanunaria sini Kristusupo aipu saina apuni purinukuxinari, Xoiteupo nanunanu taiwopure xotikikemu nimaririwa. 
\v 7 Pa xati tini xotikikemu nimaririrei saina ta. Tini apu nikau saina tarixe. Xuwe. Tini Kokaipa nukou sainani tinuku. 
\v 8 Tini nanuwa\x - \xo 6.8 \xo*\xt 2 Ko 5.10;Ka 3.28;Kl 3.11\xt*\x*. Kire apu nu aipu saina apure e nu somo purotaie asinaku saina tatia, Kokaipae nu asinaku xe tuwopina.
\p
\v 9 Tini\x - \xo 6.9 \xo*\xt Tu 10.17;Ro 2.11;Kl 3.25; 4.1\xt*\x* saina yayuku teu, tinie rania tinipo aipu saina apimi xosa asinaku kapia kaka. Tinie nini ximikepineri kapia kakaku. Mena xouro purotai Kokaipa paiya nu tinipo Kokaipa nini rania ninipo Kokaipa, nu kireni kapiareini xokupa xuiapu nikau kapia uteirouna.
\s Yesusure xonikisuwoteneai xuiapue xomatua sie purineri
\p
\v 10 Paina\x - \xo 6.10 \xo*\xt 1 Ko 16.13;Ep 1.19; 3.16;Kl 1.11\xt*\x* muaia yeu kuna ipaki xuweiyepure xine, tini Kokaipa xeika lixikiriai, pa xati tini nupo xokupa kokaipa sokisokire nanunari tini sokisoki tumuwa. 
\v 11 Tini\x - \xo 6.11 \xo*\xt Ro 13.12;2 Ko 6.7; 10.4;Ep 4.14;1 Ts 5.8\xt*\x* Xoiteue xokupa xomapu nekei sikirouna nekei nekeiyerinari, sokisoki tumunaria Satanie ximiakina kakirouna xokupa xoreixorei kapia sokau porowakuai. 
\v 12 Atinari nanuwa\x - \xo 6.12 \xo*\xt Yo 12.31; 14.30;Ro 8.38;1 Ko 15.50;Kl 2.15;1 Pi 5.8-9\xt*\x*, sini xuiapu xeika waraxiroukirixe. Xuwe. Sini xokupa tumu teu xouro puroteneai xeika, kokaipa weniniki tuku yaniyani xeika, xokupa sapi sokisoki xeika waraxinuku, ninie ukumupo yause xosa ou yakurouneri. Pa xeika xokupa sokisoki xoxixoxi yaniyani xouro puroteneai xeika rania sini waraxinuku. 
\v 13 Pa xati\x - \xo 6.13 \xo*\xt 2 Ko 10.4;Ep 5.16\xt*\x* tini Xoiteue xokupa xuiapu xoma xakuai nekei tikirouna tinari xoxi yause xosa tini sokisoki tumunari xoma xakuai. Kakinari xoma xuwexatia, tini sokisoki tumunaria purakuai.
\p
\v 14 Tini\x - \xo 6.14 \xo*\xt Ais 11.5; 59.17;2 Ko 6.7;1 Ts 5.8\xt*\x* sokisoki tumuwopurexinari paiya suau kuna tinipo kikai sie takerinari, kutu asinaku kapiae marimasa sokisoki sie tototikiro ererari xotorepina, 
\v 15 kakinari\x - \xo 6.15 \xo*\xt Ais 40.9; 52.7;Na 1.15;Ro 10.15\xt*\x* Xoiteupo xuiapu xonikikemu tumaxepurexetaire asinaku kuna uteinari ireinaria, tinipo erieri sie pa kapia erera. 
\v 16 Tini\x - \xo 6.16 \xo*\xt 1 Yo 5.4\xt*\x* pa xokupa xomaxakuai sapi tinari, xotikisuwopi kapia rania, kupira masa sie sokisoki tinari paiya, pa apu xoxi Satanie xokupa xepi xori piti xati tini xosa kourouna xukuwakuai. 
\v 17 Tini\x - \xo 6.17 \xo*\xt Ais 49.2; 59.17;1 Ts 5.8;Ip 4.12;XKY 19.15\xt*\x* Xoiteue xiyeri titiketaire nanunanuwari, pa nanunanue koike kapa kuroreki sie xepina. Kakinari Xoiteupo Supo Youyapu saripripiri nu Xoiteupo kuna takuai. 
\v 18 Tini\x - \xo 6.18 \xo*\xt Mt 26.41;Lu 18.1;Ro 12.12;Kl 4.2;1 Ts 5.17;1 Ti 2.1\xt*\x* sipesi Xoiteupo Supo Youyapu sokisokirei kunikuniwa. Kakinari Xoiteue tianitikepinaure nu kotounari xonuxonu kunikuni kunikuniwa. Tini sipesi sosopa epinari tini panumu kapia wetakuaixe. Tini kakixanari arikaku. Xoiteue nupo xokupa xuiapu tianikepinaure tini sipesi kunikuninari Xoiteu kotowakuai. 
\v 19 Kakinari\x - \xo 6.19 \xo*\xt YT 4.29;2 Ko 3.12;Kl 4.3-4;2 Ts 3.1\xt*\x* ye rania Xoiteu kotounari tianiya. Tini panumu kakinari kunikuniwaria, Xoiteue yeu supiro kuna iyaratia ye ximikepi wetinei asinaku kunapu ximiaropu kuna xiri uteiwopine. 
\v 20 Yei mua asinaku kuna uteiwopineure Xoiteu nukoini\x - \xo 6.20 \xo*\xt 2 Ko 5.20;Pl 1.20;Pm 9-10\xt*\x* xesayati xoutiai xati, ye pa xotapaure kakauya xosa purine. Ye kuna uteiwopine saina tuku, pa xati tinie Xoiteu xosa kunikuniwari ye sokisoki yatia ximikepi wetinei xuiapu xosa sokisoki kunawopine.
\s Nini tianikepinaure Polue Xoiteu kotowotai
\p
\v 21 Yei xokupa saina titiaire Tikikusie\x - \xo 6.21 \xo*\xt YT 20.4;Kl 4.7-8;2 Ti 4.12;Ta 3.12\xt*\x* tini xakumetikepina. Tikikusi\x - \xo 6.21-22 \xo*\xt Kl 4.7-8\xt*\x* nu sikou xatasikini kutu, nu Kokaipapu asinaku saina apuni kutu. 
\v 22 Sinipo puropi purikiriai tini sipawakuaire, yei tini xosa nu xesauti utuna, nu utuna paiya tinipo xotikikemu sokisokiwopina.
\p
\v 23 Xoiteu Emisiki xeika Kokaipa Yesusu Kristusu xeikae tini xatasikimana tikau xotikikemu yorowatia kuruwopina, nue kakatia tini sokisoki xotikisunaria kireu apimi xotikienikakuai. 
\v 24 Xokupa apue sikou Kokaipa Yesusu Kristusu xiri xonikiewopi kapia wetepu xuweurouneri paiya, Xoiteue\x - \xo 6.24 \xo*\xt 1 Pi 1.8\xt*\x* nini xosa xouwenikina xousuaxepi kapia kakepina.