\id 2TH - Sumau Garia Bible - Unicode
\ide UTF-8
\h 
\toc3 2 Ts
\toc2 2 Ts
\toc1 2 Tesalonaika
\ide 
\rem 
\rem 
\mt2 Xoka Axiri nakau
\mt Polue Tesalonaika xosaniki xayawotai
\imt Akereki kuna
\ip Yesusure xonikisuwoteneai xuiapu Tesalonaika erewese puroteneaie Kristusu xiyeri kopina yause xosa amu sapini kutu yaraxepinana xineri xokupa nanunanu teteneai. Kireue ipaki kunauneri Kokaipapu Asau itou kotai xeteneai. Pa xati Polu nuko xeika Sailasino Timotino xeikae ninipo nanunanu kutuwopure mua nakau xayawoteneai.
\ip Polue ipaki kunauna pa Asau putawati xana xemu xetai. Ximuximua xuimiapimie xiri poripori ereria xokupa xoxixoxi kapia paie pani sokisoki xepina. Kakeria kire apu tu sokau porowopinae mana paiya, Kristusu xiri xiwaiwopina.
\ip Xuiapue xonikisu xosa sokisoki tumuneri xu xemeropinerire Polue kaniketai. Nuko xeika saina emeumana xeikae kakirouneri sie, nini niko yakunikepi saina sokisoki tepineri xetai. Nini saina tepure ouyexeni nini kireu tianikepure ouyexeni.
\c 1
\ms Kokaipapu Asau sewai putawopina
\mr 1—2
\d
\p
\v 1 Sini\x - \xo 1.1 \xo*\xt YT 17.1;1 Ts 1.1\xt*\x* Polu xuno Sailasi xuno Timoti xuno, sinie tini Yesusure xotikisukiriai xuiapu Tesalonaika erewese purikiriai xosa mua nakau xayaritikinuku, paiya tini xuiapue sikou Emisiki Xoiteu xeika Kokaipa Yesusu Kristusu xeika etokipurikiriai.
\p
\v 2 Xoiteu\x - \xo 1.2 \xo*\xt Ro 1.7\xt*\x* sikou Emisiki xeika, Kokaipa Yesusu Kristusu xeikae xonikisuaxati xonikietikeria tini xotiki kurunari purakuai.
\s Tesalonaika apimie xu yause sokisoki tumurouneri
\p
\v 3 Yewapu xura\x - \xo 1.3 \xo*\xt 1 Ts 1.2-3;2 Ts 2.13\xt*\x*, xokupa yause sinie tinire nanunanunuku Xoiteu eiyaseurounuku. Sinie panumu kakepinuku xiri asinaku, pa amure, tinipo xotikisue xiri sokisoki xati, tini xokupa kirenikirenie kireu xatatikimana xotikikemu tinikirounuku xati, pa kapiae xiri kokaipa xina. 
\v 4 Pa\x - \xo 1.4 \xo*\xt 2 Ko 7.4; 7.14;1 Ts 2.19;XKY 1.9\xt*\x* kapia xotaparei sore, sinie Xoiteure xonikisuwoteneai xuiapu xosa xouxanaunukua, tinipo wenitiki xourorirounuku. Xiwaie kakeri xokupa xu tini xosa moyaire sinie nini kanikirounuku. Paire sinie ipaki kunaunuku, “Tesalonaika kinie sokisoki tumuneri ninipo xonikisu soki tineri pa xokupa xu xeika tatau xeika xemeneri,” xirounuku.
\s Xoiteue asinaku kapia xosa uteisikirouna
\p
\v 5 Pa\x - \xo 1.5 \xo*\xt Pl 1.28\xt*\x* xokupa kapia tini xosa motai paiya. Xoiteue asinaku kapiani kutu kireni kakina nukoe sinipo kapia uteipopouna sini panumu atarisiketai. Tini tatau xemekiriaia, pa amure, tinie Xoiteue xuiapu yakunikepina yause sarepurexinukuna, kakaria pa yause xosa Xoiteue atina yakutikepina. 
\v 6 Xoiteue\x - \xo 1.6 \xo*\xt Ro 12.19;XKY 18.6-7\xt*\x* muanumu asinaku kapiani kutu kakepina. Apimie tini xu tikirouneri paiya nue xu xapa teritikepina. 
\v 7 Kakina\x - \xo 1.7 \xo*\xt Mt 25.31;1 Ts 3.13; 4.16\xt*\x* nue pa xu ximine tinie xemekiriai xuweiyeinapa, tini xeika sini xeikani arikepi sikepina. Kokaipa Yesusu xeika nupo xokupa sokisoki xenikorokoro xeikae mena xouro wetineri yarani putawopineri yause xosa Xoiteue panumu kakepina. Nue kokaipa xepireini kutu kounapa 
\v 8 apimie\x - \xo 1.8 \xo*\xt Siri 79.6;Ais 66.15;Yer 10.25;Ro 2.8;1 Pi 4.17\xt*\x* Xoiteu sipawopi xiraxineri, Yesusu sikou Kokaipapu asinaku kuna taiwopu xuweuwoteneaia xaro tinikepuwatixana manimani tinikepina. 
\v 9 Pa\x - \xo 1.9 \xo*\xt Ais 2.10; 2.19-21;Pl 3.19;2 Pi 3.7\xt*\x* apimie panumu kakineria xoxiaki xepineri. Ninie Kokaipa xeika nupo sokisoki kokaipa memeremu xeika wetineri, xetauro purineria sipesi sipesi xoxixepineri. 
\v 10 Xoiteue iyareyai Asau xosa\x - \xo 1.10 \xo*\xt Siri 68.35; 89.7;Kl 3.4;1 Ts 3.13\xt*\x*, Kokaipae kouna paiya manimani tinikepina, pana Xoiteupo xokupa xuiapu nini xokupae nure xonikisuwoneaia ninie nupo wenumu xourorineria nure xiri nimaririwopineri. Kakeria tinie rania nini xeika nimaririwakuai, pa amure, sinie tini xopu Xoiteupo kuna uteikiri tinie xiri xotikisukiniai.
\s Xoiteue Tesalonaika kini sokisokinikepinaure ninie kunikuniwoteneai
\p
\v 11 Pa sapi putawopure xetaire nanuworinuku\x - \xo 1.11 \xo*\xt Kl 1.9;1 Ts 1.2-3\xt*\x*, sikou Xoiteu kotoukiri tianitikepinaure sinie xokupa yause kunikunirounuku. Tinie kakakuai kapiaure nukoe yaitikeyai xati nukoe pa kapia xiri atina tianitikepinaure sini xinuku. Nue tini sokisoki tikepinaure sinie kunikunirounukuna, tinipo xotikisue kakati tinie xokupa asinaku kapia kakepure xikiniaia kaka. 
\v 12 Pa\x - \xo 1.12 \xo*\xt Ais 24.15;Mal 1.11;1 Pi 1.7; 4.14\xt*\x* kapia xosa tinie Kokaipa Yesusupo wenumu xourorari nue rania tinipo wenitiki xourorepina. Sikou Xoiteu xeika Kokaipa Yesusu Kristusu xeikae tinire xonikisuaxati xonikietikineria pa xokupa kapia tini xosa kakepineri.
\c 2
\s Tu sokau porowopina apu putawopina
\p
\v 1 Yewapu xura\x - \xo 2.1 \xo*\xt Mt 24.31;1 Ts 4.13-17\xt*\x*, sikou Kokaipa Yesusu Kristusue, xiyeri koati sini nu xeika kununuwopure sini ximine kunawopure xinuku. Sinipo mua kuna xosa tini atinari xakutiki iyarakuaire xinuku. 
\v 2 Kireu\x - \xo 2.2 \xo*\xt Mt 24.4;Ep 5.6;1 Yo 4.1\xt*\x* apimie rau katikineri Kokaipapu Asau putawotai xeteneai. Kire apue rau nanuna Xoiteupo Supo Youyae kunatureture kuna ye sietai xepinare, e kire apue Xoiteupo kuna uteina pa kuna kunaunare, e kire apue kunauna sinie panumu kuna purotai sie xosa nakau xayaukiriai xepina. Pana tinie muanumu kuna anayau rau iyesikiriai xatia, tini sapauni xoxi ure ureuweinari tinipo nanunanu ere xaku. 
\v 3 Tini\x - \xo 2.3 \xo*\xt Yo 17.12;1 Ti 4.1;1 Yo 2.18; 4.3;XKY 13.11-14\xt*\x* kakixanari kire apu wetari nupo kunare e nuko kaketai kapiaure xoreitikexete. Iyesa. Pa Asau paiya aini mopuwatixe. Xuwe. Xokupa apimie akeri wou erineria Xoiteu nikiniki tuwopineri. Kakeria tu xasese marouna apue yarani mopina, pa apua nu sokisoki xepi xosa xoxixepina. 
\v 4 Apimie\x - \xo 2.4 \xo*\xt Tan 7.25; 11.36;Ese 28.2;1 Ko 8.5;XKY 13.6\xt*\x* xokupa sapi xosa muris tirouneri paiya nue xiwaixiwai nikina ye xoiteu paxinapa weninikepina. Kakina wouerina paiya nukou wenumu xourorina pa xokupa sapi ororepina. Kakina nukoe Xoiteupo ata minika misina paiya, ipaki kuna uteina, “Ye ikoini Xoiteu xepine,” xetai.
\p
\v 5 Ye tini xeika puritiai yause xosa yei tini pa sapire katikieitiai. Tini nanunanu wetikiriaire, wo? 
\v 6 Ximine pa sapie pa apupo ime parawotai tini sipa, kakatia nu sapauni yaraxepuwatixe. Nu yaraxepina yause paiya Xoiteue iyareyai yause xosa nu putawopina. 
\v 7 Tini\x - \xo 2.7 \xo*\xt 1 Yo 2.18; 4.3\xt*\x* sipa, ximine paiya tu sokau porowopi kapia ximiaki purina. Nu ximiaki purati paiyeye, pa apu nupo ime parau purotaie kereu xonopina. 
\v 8 Kakatia\x - \xo 2.8 \xo*\xt Yop 4.9;Ais 11.4;Tan 7.10;Ip 10.27;XKY 19.15\xt*\x* pa yause xosa pa tu sokau porourouna apue yarani putawopina. Kakatia Kokaipa Yesusue nukou xa youyae ouwatia xumopina. Kokaipae nukou kokaipa memeremu xeika yarani putauna paiya, pa memeremueni pa apu tu sokou porourouna xiri xoxixoxi wopina. 
\v 9 Pa\x - \xo 2.9 \xo*\xt Mt 24.24;Yo 8.41;Ep 2.2;XKY 13.11-13\xt*\x* apu nu tu sokau porowopina paiya Satanipo sokisokie yarani putawopina. Kakinapa Satanipo xorei xorei kapiae xokupa sokisoki saina xeika xonuxonu xeika erepina. 
\v 10 Kakina\x - \xo 2.10 \xo*\xt 2 Ko 2.15; 4.3\xt*\x* paiya xokupa xoxi kapiapu xorei xoreie pa xuiapu xoreinikatia xoxixepineri imerei texepineri. Pa xuiapu nini xoxixepineri, pa amure, Xoiteue kunani kutu tinikepina yause xosa, nini xiyeri sonikepina xati, ninie mua kuna xiri xiraxineri. 
\v 11 Pa xati\x - \xo 2.11 \xo*\xt Mt 24.5; 24.11;Ro 1.24;1 Ti 4.1;2 Ti 4.4\xt*\x* ninie xoreixorei kunaure xonikisuwopinerire, Xoiteue ninipo nanunanu turutaruwetai. 
\v 12 Pa xati\x - \xo 2.12 \xo*\xt Ro 1.32\xt*\x* xokupa apimie kunani kuture xonikisuwopuxuweuneri, nini xoxi kapia kireni kakepure nimaririwoteneai, nini Xoiteupo kuna xosa tumuwopineri yause xiri manimani tinikepina.
\s Xoiteue tini xiyeri titikepinaure akitutikietai
\p
\v 13 Pana\x - \xo 2.13 \xo*\xt Lu 1.75;Yo 15.16;Ep 1.4;1 Ts 4.7; 5.9;2 Ts 1.3\xt*\x* xatai xura, Kokaipae tini xiri xouwetikirouna xati sinie sipesi xosikirei nanunanunuku tinire Xoiteu eiyasewopinuku xinuku. Xoiteue xuiapu xiyeri tinikepure xina tinie akereki xuiapu kini xopu xosa purakuaire akitutiketai. Xoiteupo Supo Youyae tini Xoiteu nukou asinaku xuiapu sie akitutiketai xati, tinie suau kuna xotikisuwari, pa kapiarei Xoiteue xiyeri titikina. 
\v 14 Sikou Kokaipa Yesusu Kristusupo kokaipa memeremu xeika sokisoki xeika xosa purakuaire kakina, pa xati, pa asinaku kuna sinie uteikiniai xosa nue tini yaitiketai. 
\v 15 Pa xati\x - \xo 2.15 \xo*\xt 1 Ko 11.2; 16.13;Pl 4.1;2 Ts 3.6\xt*\x*, yewapu xura, tini sokisokini kutu tumuwa. Kakinari Xoiteupo xokupa kuna sinie tini xosa uteikiniaire e taitaitikepure nakau xayaukiniai paiya, tini atinarini kutu taiwa.
\p
\v 16 Sikou Kokaipa Yesusu Kristusu xeika sikou Emisiki Xoiteu xeikae sini xiri xonikiesikineri. Kakina nupo xousuae xouwesikati sinipo xosikikemu sipesi sipesi yoroni asinaku purina. Kakati xosikisunuku Xoiteu yakukiri xiri atiatisikepinaure tianisikina. 
\v 17 Nue\x - \xo 2.17 \xo*\xt 1 Ko 1.8;1 Ts 3.13;1 Pi 5.10\xt*\x* tinipo xotikikemu sokisokiwati paiya, tinie xokupa asinaku kapia xeika asinaku kuna xeika kunawakuaire tianitikepina.
\c 3
\ms Tesalonaika apimie ouyetutua apimi atineri kutunikepineri
\mr 3
\d
\s Tinie Xoiteu xosa kunikuniwaria sini tianisikepina
\p
\v 1 Yewapu xura\x - \xo 3.1 \xo*\xt Ep 6.19;Kl 4.3;1 Ts 5.25\xt*\x*, sini pani kire kuna tuku. Kuna paiya muai. Xoiteue sini tianisikepinaure tinie kunikuniwari, Kokaipapu kunae xokupa sanawayau oupapaina taki xopu kokaipa wenumu teyai sie tepina. 
\v 2 Apimie\x - \xo 3.2 \xo*\xt YT 28.24;Ro 10.16; 15.31\xt*\x* xoxixoxi kapia kakirouneri xati, tinie Xoiteu xosa kunikuniwari nue apimi xoxi xupunikiropu sini xiyeri tisikepina. Tini sipa, xokupa apimie Kristusu xosa xonikisuworixe.
\p
\v 3 Pana\x - \xo 3.3 \xo*\xt Yo 17.15;1 Ko 1.9;1 Ts 5.24;2 Pi 2.9\xt*\x* Kokaipae suau kapiani kutu kakirouna. Pa xati sinie nureni kutu xosikisuwopu itou. Kakari nue tini sokisokitikina yakutikatia, Satanie tini xosa kire kapia kakepuwatixe. 
\v 4 Tinie\x - \xo 3.4 \xo*\xt 2 Ko 7.16;Ka 5.10;1 Ts 4.10\xt*\x* xokupa kapia kakakuaire sinie katikikiriai sie kakari, Kokaipae kakati sini paire atinuku sipaunuku. Pa xati sewai rania tini panumu kapia kireni kakakuai.
\p
\v 5 Kokaipae tinipo nanunanu taitaitikati, Xoiteue xuiapu xiri xouweniketaipo kapia xiri sipaunari, Kristusue sokisoki tumuna xu xemerotaipo kapia sipaunariwakuaire xinuku.
\s Xokupa apimi tini saina ta
\p
\v 6 Yewapu xura\x - \xo 3.6 \xo*\xt Mt 18.17;Ro 16.17;1 Ko 5.11-13;2 Ts 3.11-14;1 Ti 6.5;2 Yo 10\xt*\x*, sikou Kokaipa, Yesus Kristusupo wenumurei sinie tini xosa sokisoki kuna ipaki kunaunuku, kireu xatasikimanae aini purineri pa kuna sinie tikiriai taiwopu xuweurouneria, tini weniki xetauro pura. 
\v 7 Tini\x - \xo 3.7 \xo*\xt 1 Ko 4.16;Pl 3.17;1 Ts 1.6\xt*\x* sipa, tini sinipo kapiani kutu taiwa. Sinie tini xeika purikiriai yause xosa, sini aini puriroukiri xana xuwe. 
\v 8 Sinie\x - \xo 3.8 \xo*\xt 2 Ko 11.9;1 Ts 2.9\xt*\x* tini xuputikiropu xoye aini tekixe. Xuwe. Sini isayaxirounuku. Sinie tini xu tepi xirarinuku, sokisoki saina tinuku asau ukumu irereiwowoukiriai. 
\v 9 Sinie\x - \xo 3.9 \xo*\xt 1 Ko 9.4-6;1 Ts 1.6\xt*\x* tini xosa xoye tepu xuweuwopinuku sie xuwe. Sini xoye tepinukuni kutu itouna pana sini tepu xuwe, pa amure, takieni asinaku kapia taiwakuaire sini ataritikinuku.
\p
\v 10 Tini\x - \xo 3.10 \xo*\xt 1 Ts 4.11\xt*\x* sipa, sini taki xeikani purikiriai yause xosa, tini ipaki katikinuku, apue saina tepu xiraxina paiya, nu xoye tepuwatixana xuwe xikiriai. 
\v 11 Pana\x - \xo 3.11 \xo*\xt 1 Ti 5.13;1 Pi 4.15\xt*\x* kireu tini xosaupoe aini ouye purori sini pa kuna iyesinuku. Ninie kire saina terixe. Nini kireu apimi nikau xokupa sapire kunau xanauwopi saina kireni tineri, paiya ninipo sapi xuwe. 
\v 12 Pa xati\x - \xo 3.12 \xo*\xt 1 Ts 4.11\xt*\x* ximine Kokaipa Yesusu Kristusupo wenumurei sinie pa apimi mua sokisoki kuna ipaki kanikinuku, nini atinerini kutu misineri, saina tineri, nikou xoye sapini nepineri.
\p
\v 13 Yewapu xura\x - \xo 3.13 \xo*\xt Ka 6.9\xt*\x*, tini kakixanari asinaku kapia kakepire ouyexaku. 
\v 14 Sinie\x - \xo 3.14 \xo*\xt 1 Ko 5.9-11\xt*\x* mua xokupa kuna nakau xosa xayaukiriai kire apue taiwopu xuweuna paiya, pa apu ati tumuworinari tini weu xetauro purari, nuko kaketai kapiaure mayaxepina. 
\v 15 Paiya tini\x - \xo 3.15 \xo*\xt 1 Ts 5.14;Ta 3.10\xt*\x* nupo xiwai xinari nanuwakuaire sini kunaukirixe. Xuwe. Sinipo xatasiki xinari, nupo nanunanu kutuwakuaire kuna tuwakuai.
\s Polue kuso kuna kaniketai
\p
\v 16 Kokaipa\x - \xo 3.16 \xo*\xt 1 Ts 5.23\xt*\x* nu xoukemu yorowopi kapia xotapa, nue sipesi kakatia tinie xokupa sapi xosa xotikikemu yoroni purakuai. Kokaipae tini xokupa xeika puropina.
\p
\v 17 Ye\x - \xo 3.17 \xo*\xt 1 Ko 16.21\xt*\x* Polu ye ikoini mua kuso kuna tini xosa xayaune. Ye nakau xayaunepa muanumu kuna xokupa nakau xosa xayauroune. Muaia ye yekuworitiai xupisui.
\p
\v 18 Sikou Kokaipa Yesusu Kristusue xousuaxati xouwesikirouna kapiae tini xokupa xeika puropina.