\id 1TH - Sumau Garia Bible - Unicode
\ide UTF-8
\h 
\toc3 1 Ts
\toc2 1 Ts
\toc1 1 Tesalonaika
\ide 
\rem 
\rem 
\mt2 Xoka kireni nakau
\mt Polue Tesalonaika xosaniki xayawotai
\imt Akereki kuna
\ip Erewese Tesalonaika paiya propinsi Mesetoniapu kokaipa erewese purina. Polue Pilipai weti Tesalonaika xouna pa erewese xosa Yesusure xonikisuwoteneai xuiapu sainikereyai. (Yesusupo Tianuwopi Teu 17.1-9) Pana xokupa xuiapue Polupo kuna iyeserineri xonikisuneri Yesusu taiwori, Yuta apimie xekeri Polure xonikikemu xoxi xati xesawori Tesalonaika wetetai. Xurise, Polue xouna erewese Korin purotai yause xosa, nupo saina emeu Timotie kouna Tesalonaikapue Yesusure xonikisuwoteneai xosa kapia yaraxeteneaire Polu kawotai.
\ip Polue Timotipo asi iyeserina Polu nuko xeika Sailasino Timotino xeikae ninipo xonikisu sokisokiwopure mua nakau xayawoteneai. Kireu sipa apimie nanuneri mua nakau paiya Polupo xokupa nakau kokaipa nakau yoira xosa puroteneaipo akereki nakau xeteneai. Mua nakau xosa Yesusure xonikisuwoteneaie Tesalonaika puroteneai nikau xonikisu xeika asinaku kapia xeikaure Polue nimaririwotai.
\ip Pa xuiapue Yesusure xonikisuwoteneai paiya Kristusu nu amakina xiyeri kopina nini sipa xuwe. Ninie sipawopure kunauneri Kristusu xiyeri kopu xuweuni apimi xumuweteneai paiya, nini rania sipesi puropineri ekinikioma tepinerire? Kristusu nu amu yause yauseni kutu kopinana? Polue ninipo koto xapa ipaki kanikina, tini asinaku kapia tainari Kokaipa kopina yauseure ireiwa niketai.
\c 1
\ms Polue nupo saina emeumanapu Tesalonaika kinire xiri eiyoxeteneai
\mr 1—3
\d
\p
\v 1 Sini\x - \xo 1.1 \xo*\xt YT 17.1-13;2 Ts 1.1\xt*\x* Polu xuno Sailasi xuno Timoti xunoe, mua nakau tini Tesalonaika erewesepu xuiapu xosa xayaritikinuku. Paiya tinie Emisiki xeika Kokaipa Yesusu Kristusu xeikaure xotikisinuku etokipurikiriai xosa.
\p Xoiteue tinire xousuaxina xouwetikatia, tinipo xotikikemu yoroni purakuai.
\s Tesalonaika nikau xonikisure Polue nimaririwotai
\p
\v 2 Xokupa\x - \xo 1.2 \xo*\xt Ep 1.16;Pl 1.3-4;Kl 1.3;2 Ts 1.11\xt*\x* yause sinie tinire nanunanunuku Xoiteu eiyaseurounuku. Sinipo xokupa kunikuni xosa tinipo wenitiki tirounuku. 
\v 3 Tinipo xotikisue\x - \xo 1.3 \xo*\xt 1 Ko 13.13;Ka 5.6;Kl 1.4-6;Ip 6.10\xt*\x* saitikerati asinaku kapia kakakuaire, kireu xotikikemu tinikinuku asinaku saina tinuku, xotikikemu sokisoki xinuku sikou Kokaipa Yesusu Kristusu yakukiriaire, sinie sikou Xoiteu Emisiki xosa eiyaseurounuku. 
\v 4 Tini\x - \xo 1.4 \xo*\xt Kl 3.12;2 Ts 2.13\xt*\x* xatasikimana, Xoiteue tini xiri xouwetikina, tini nukouni kutu tumutikeretai xati, sini paire sipauweikiriai.
\p
\v 5 Mua\x - \xo 1.5 \xo*\xt 1 Ko 2.4-5; 4.20;Kl 2.2;Ip 2.3\xt*\x* asinaku kuna sinie tini xosa tikoukiniai paiya, aipu kuna sie tini xosa putawoyaixe. Xuwe. Nue sokisoki xeika Xoiteupo Supo Youya xeika putawati tinie atinuku sinipo sokisoki xosikisu xekeukiniai. Sinie tini xopu purinuku tini tianitikepure, asinaku kapia kakikiriai paiya tini takieni sipa.
\p
\v 6 Tinie\x - \xo 1.6 \xo*\xt YT 17.1-9;1 Ko 4.16; 11.1;Pl 3.17;2 Ts 3.9\xt*\x* Xoiteupo kuna tari, xokupa xu tini xosa putawotai sorena, tinie sinipo kapia xeika Kokaipapu kapia xeika taiwari, Xoiteupo Supo Youyae tini saitikerati tinie nimaririnuku. 
\v 7 Pa xati\x - \xo 1.7 \xo*\xt 1 Pi 5.3\xt*\x* Mesetonia propinsi xeika Akaia propinsi xeika xosa xokupa xuiapue Kristusure xonikisuwori tinie asinaku kapia nini atarinikikiniai. 
\v 8 Tinie\x - \xo 1.8 \xo*\xt Ro 1.8\xt*\x* Kokaipapu kuna uteikiniai paie kiroma miria sie xouna xounawotai. Paiya Mesetonia xeika Akaia xeika masaira kireni xosa xowotaixe. Xuwe. Tinie Xoiteure xotikisuwari xokupa wesewesei tinire kuna iyesieteneai xati, sini pani nini kanikepinuku saina xuwe. 
\v 9 Sinie\x - \xo 1.9 \xo*\xt YT 14.15;1 Ko 12.2;Ka 4.8;1 Ts 2.1\xt*\x* tini xosa putaukiniai yause xosa kapia akipaxeyaire nikoini asiwarouneri. Tinie xoreixorei xoiteu teu wetinuku, nu sipesi purotai Xoiteuni kutu xosa xotikipirixikiriaire asiworoteneai. Tinie Xoiteupo aipu saina apu sainuku, 
\v 10 nupo\x - \xo 1.10 \xo*\xt YT 17.31;1 Ts 4.16; 5.9;Ta 2.13;2 Pi 3.12\xt*\x* Nono xumati Xoiteue xiyeri saretaie mena xouro wetina koati tinie yakuari ninie asiworoteneai. Nu Yesusu, nue sini xiyeri sosikatia Xoiteupo kisamaira kopina yause xosa sini atinuku puropu.
\c 2
\s Polu nukoe Tesalonaika saina teyaire kunawotai
\p
\v 1 Yewapu xura\x - \xo 2.1 \xo*\xt 1 Ts 1.5; 1.9\xt*\x*, takieni sipa, sinie tini xopu purinuku saina tikiniai paiya, aini xuwexepu xuwe. 
\v 2 Tini\x - \xo 2.2 \xo*\xt YT 16.19-24; 17.1-9;Pl 1.30;Kl 2.1\xt*\x* sipa, sini tini xosa kopu xuweu yauseni, sini Pilipai erewese purikiri sinipo mupusiki xoxixoxiwori, tatau tikiniai. Pana sinie tini xosa koukiria, sikou Xoiteue sinipo xosikikemu sokisokiwati pa xiwayasikimanaure ximikinikikirixe. Xuwe. Sini sokisoki tumunuku tini xosa Xoiteupo asinaku kuna uteinuku. 
\v 3 Tinie Yesusure xotikisuwakuaire, tini yaitikinukua, sini kuna xoreiyerinuku, sini xunu kapiare e xorei kapia kakekixe. Xuwe. 
\v 4 Pana Xoiteue\x - \xo 2.4 \xo*\xt Yer 11.20;Ka 1.10;1 Ti 1.11\xt*\x* sini uteisikieina nukou xouweni sini asinaku kuna uteiwopi saina siketai. Pa xati xuiapue sinipo sainaure xonikiewopineri xinuku nanuwori kuna uteikirixe. Xuwe. Xoiteueni sinipo xosikikemu uteirouna xati, nukoini sinipo saina xouwewopina xinuku. 
\v 5 Tini\x - \xo 2.5 \xo*\xt YT 20.33;Ro 1.9;1 Ts 2.10;2 Pi 2.3\xt*\x* sipauweikiriai xati Xoiteue rania panumu kunani kunawopina, sinie tini niraniratikepi sie kuna kunawopu xuwe, pa xeika sinie tinipo sapire ekisikie ninuku asinaku kuna katikepu xuwe. 
\v 6 Sinie\x - \xo 2.6 \xo*\xt Yo 5.41; 5.44;1 Ko 9.1-6;2 Ko 11.9;2 Ts 3.8-9\xt*\x* tini xosare kireu xuimiapimi xosa kokaipa wenisiki tepure saina tepu xuwe. 
\v 7 Suau\x - \xo 2.7 \xo*\xt 1 Ko 2.3;2 Ko 13.4;2 Ti 2.24\xt*\x*, sini Kristusupo tianuwopi purikiriai. Pa xati sini sapi xosikieukiriai xakua sini tianisikakuaire tini katikiku. Pana sini tini xeika purikiniai yausepa, sini nono misiarara sie peuni purikiniai. Sini xuie nupo nonomi apuri tiniki purotai siei purikiriai. 
\v 8 Sini tinire xiri xosikieunuku, pa xati sini Xoiteupo asinaku kuna tini tikepure xinuku. Pa xeika sinipo ekisikioma tini tikepure rania sini ireinuku, pa amure, tinie sinipo marouni kutu saikiriai.
\p
\v 9 Yewapu xura\x - \xo 2.9 \xo*\xt YT 20.34;1 Ko 4.12;2 Ko 11.9; 12.15\xt*\x*, sinie tini xeika purinuku Xoiteupo asinaku kuna uteinuku irereikiniaia tini sipauweikiriai. Tinie sini xoyeara sikakuai paiya tini xu tikepi xirarinuku, sini asau xeika ukumu xeika xosa sokisoki sainani kutu tikiriai.
\p
\v 10 Tini sipa xati, Xoiteu rania sinie tini Kristusure xotikisukiriai xuiapu xosa kakikiriai kapia nu sipa. Sinie Xoiteu ekero asinaku asinaku kapia kakikiniaina sini xoxi kapia kakepu xuwe. 
\v 11 Tini\x - \xo 2.11 \xo*\xt YT 20.31\xt*\x* sipa, eminikie nupo nonomi xosa kakirouna kapia sieni, sinie tini xosa panumu kapia kakinuku, 
\v 12 tinipo nanunanu\x - \xo 2.12 \xo*\xt Pl 1.27;Kl 1.10;2 Ti 1.9;1 Pi 5.10\xt*\x* sarinuku xotikikemu sokisokiwopure sinie kunaukiriai. Tini Xoiteupo kapiarei itouni texakuaire kakinuku kunaukiriai, tinie Xoiteue xuiapu yakunikirouna yause minika manari mena xouro asinaku misepini kutu takuaire nu Xoiteue tini yaitikeyai.
\s Yesusure xonikisurouneri apimie xiri xonikisuneri sokisoki tumuneri xu xemeneri
\p
\v 13 Pa sapire rania sipesi\x - \xo 2.13 \xo*\xt Ka 1.11-12; 4.14;1 Ts 1.2-3;2 Ts 2.13;2 Pi 3.2\xt*\x* sinie Xoiteu eiyaseurounuku. Tinie Xoiteupo kuna sinipo supusikiropu tikiriaia, tini apupo kuna sie tekixe. Xuwe. Tini Xoiteupo kunani kutu sie tikiniai. Kakari pa kuna paie tini Kristusu xosa xotikisukiriai xuiapu xotikiro sokisoki saina tina. 
\v 14 Yewapu xura\x - \xo 2.14 \xo*\xt YT 17.5;Ip 10.33-34\xt*\x*, tinie Xoiteupo Yesusure xonikisuwoteneai xuiapu, Yutia puroteneai sie saikiriai, nini Yesusu Kristusu xeika etoketeneai xuiapu. Tinie emetikimana nikau xupunikiro kokaipa xuni kutu tikiriai sieni, Yutiapu Xoiteupo xuiapue Yuta xupunikiropu xu teteneai. 
\v 15 Yuta apimie\x - \xo 2.15 \xo*\xt YT 2.23; 3.15; 7.52; 9.23; 9.29; 13.45; 13.50; 14.2; 14.5; 14.9; 17.5; 17.13; 18.12\xt*\x* Kokaipa Yesusu ouweineri kunatureture rania ounikieineri, sini xesasiketeneai. Xoiteue xouwewotai kapia nikiniki tuneri, xokupa apimi xiwaixiwainikineri. 
\v 16 Sinie\x - \xo 2.16 \xo*\xt Mt 23.32-33; 24.6;Lu 11.52;YT 13.50\xt*\x* xetau xeteneai xuimiapimi xosa kuna uteiwopinuku paiya, ninie sinipo saina ime parauneri, pa amure, Xoiteue pa xuiapu xiyeri tinikepi nini xiraxineri. Pa xati ninie sipesi kakirouwori ninipo xunue pani kokaipa xati, Xoiteupo kisamairae nini xosa kotai purina.
\s Polue Tesalonaika apimi xiyeri xekenikepure xiri xouweuna
\p
\v 17 Yewapu xura\x - \xo 2.17 \xo*\xt 1 Ts 3.10\xt*\x*, Yuta apimie kakeri tini xayaka xayaka weitikiteri nanukiria, eminikie nupo nonomi weinikiteri xetauro purieuna. Sini tinipo moatikikemu xekeukiri xana xuwena pana, sinipo xosikikemu paiya tini xeikani purina. Pa xati tini xiyeri kounuku xeketikepure ime xirekepi saina pani sokisoki tinuku. 
\v 18 Sinie tini kounuku xeketikepure xikiriai, ye Polu, ye kopure xokupa yause eruruyai. Pana Satanie taiyerisiketai. 
\v 19 Sikou Kokaipa Yesusue xiyeri koati yause\x - \xo 2.19 \xo*\xt Pl 2.15-16; 4.1;2 Ts 1.4\xt*\x* paiya, amu sapie sini sokisokisikati nu ekero tumunuku nimaririwopinukuna? Sini amu tikou atarunuku sinie sinipo saina ati tikiniai xepinukuna? Paiya tini kireni. 
\v 20 Iyo\x - \xo 2.20 \xo*\xt 2 Ko 1.14;1 Ts 3.13;XKY 1.7\xt*\x*, sini tinire nimaririroukiri, takieni kakari sini xosikikemu asinaku purinuku.
\c 3
\s Timotie xouna Tesalonaika sokisokinikepinaure Polue xesawotai
\p
\v 1 Sinie\x - \xo 3.1 \xo*\xt YT 17.15\xt*\x* tinire xiri eiyorinuku, xurise sini ere xenenewopuxexi nanukiriai. Pa xati kuna ouwori kunaunuku sio Atensi puraxauna, 
\v 2 Timoti \x - \xo 3.2 \xo*\xt YT 16.1-3\xt*\x*xesauyati tini xosa utopinaxi kuna oukiriai. Timoti nu sikou xatasikina nu Kristusupo asinaku kuna uteiwopina Xoiteupo saina apu. Nue tinipo xotikisu tianitikina sokisokiwopinaure xesauyati utotai, 
\v 3 pa\x - \xo 3.3 \xo*\xt Ep 3.13;2 Ti 3.12\xt*\x* xu xeika tatau xeika tini xemekiriaie kakatia tini kireue xokupa nanunanu taku. Takieni sipa, sinie muanumu xu xemeropure Xoiteue tumusikereyai. 
\v 4 Sini\x - \xo 3.4 \xo*\xt YT 14.22; 20.24\xt*\x* tini xeika purikiriai yauseni ipaki katikinuku, xu xana xu siko xosa kopina xikiriai. Pa xati itou takieni sipaunuku, pa xu xoxi itou motai. 
\v 5 Pa xotapaure\x - \xo 3.5 \xo*\xt Pl 2.16\xt*\x* sore ye pani xenenewopu xuwe. Ye tinipo xotikisu sipawopure, pani Timoti xesauti tini xosa utotai. Tinipo xotikisu eruruwopina apue xakuxakutikiati, sinipo saina aini xuwexinaxi ye nanune.
\s Timotie asinaku kuna tikoati, Polue nimaririwotai
\p
\v 6 Paina\x - \xo 3.6 \xo*\xt YT 18.5\xt*\x* Timotie tini weitikiterina mukatie sini xosa kouna putauna. Nue asinaku kunani kutu sini kasikina. Tinie sokisoki xotikisunuku kireu xiri xonikieurounukure kunawotai. Sipesi tinie sinire nanunanuku asinaku xotiki tuku xirounukure, nu kunauna. Kakinuku tinie sini xekesikepure eiyoxari sinie rania tini xeketikepure eiyoxinuku. 
\v 7 Yewapu xura\x - \xo 3.7 \xo*\xt 2 Ts 1.4\xt*\x*, tinie xotikisuwopi sokisoki purari sinie iyeserinuku, paie xokupa xu xemekiriaia sinipo xosikikemu sokisokina. 
\v 8 Tinie\x - \xo 3.8 \xo*\xt Pl 4.1\xt*\x* Kokaipa xosa sokisoki purari sini sipaukiriai xati, ximine sinipo ekisikiomae xiri asinakuni kutu saina. 
\v 9 Sinie tinire nanunanuworinuku sikou Xoiteu ekero xiri nimaririnuku xekeukiria, sinie Xoiteu eiyasewopi kapia paiya nue sini sikeyai nimariri xiri itouwati xana xuwe. 
\v 10 Xoiteue\x - \xo 3.10 \xo*\xt YT 26.7;Ro 1.10;Kl 4.12;2 Ti 1.3\xt*\x* sini weisikitati utunuku tini xeketikepinukure asau xeika ukumu xeika xosa sini kunikuniwoki kunikuniwokinuku. Pa xati tinipo xotikisu xayaxayaka xatia, sinie xemu sokisokiworitikepinuku.
\s Xoiteue Polu nini xosa sou xowopinaure Xoiteu xosa kunikuniwotai
\p
\v 11 Sikou\x - \xo 3.11 \xo*\xt 2 Ts 2.16\xt*\x* Emisiki Xoiteu xeika, Yesusu, sikou Kokaipa xeikae tini xosa sosikiutopinerire xosikieunuku. 
\v 12 Kokaipae\x - \xo 3.12 \xo*\xt 1 Ts 4.9-10; 5.15;2 Pi 1.7\xt*\x* tini xosa kireu xonikiewopi kapia xiri korepinaure sini xosikieunuku, kakatia tini kirenikirenie Xoiteupo xuiapu xosa xeika xokupa xuiapu xosa xeika xiri xotikikemu tinika, paiya sinie tini xosa xosikikemu tikirounuku sie kaka. 
\v 13 Pa\x - \xo 3.13 \xo*\xt Sek 14.5;1 Ko 1.8;Pl 1.10;2 Ts 1.7; 1.10; 2.17\xt*\x* kakaria Kokaipa Yesusue nukou xokupa xuiapu xeika xiyeri kopina yause xosa paiya, tini muputiki xokumo purari xeketikepina. Tinie asinakuni kutu xu xuweu sikou Emisiki Xoiteu ekero purakuai. Pa suau.
\c 4
\ms Nini Tesalonaika ninipo asinaku kapia sokiteria ninipo ekinikoma sokisokixepina
\mr 4—5
\d
\s Sini ayaka kapia kakepuxe
\p
\v 1 Yewapu xura\x - \xo 4.1 \xo*\xt Pl 1.27;Kl 1.10; 2.6;1 Ts 2.12;2 Ts 3.6\xt*\x*, tinie Xoiteupo nanunanu tainari texakuaire sinie tini xokupa kapia ataritikikiri, tinie pa kapia tairounuku. Pana muaia tinipo xotikikemu xiri sokisokinuku Kokaipa Yesusu wenumurei mua kapia pani kakakuaire tini katikepure xinuku.
\p
\v 2 Xokupa kuna Kokaipa Yesusupo wenumurei sinie tini tikikiriai tini sipa. 
\v 3 Xoiteupo xoukemu\x - \xo 4.3 \xo*\xt 1 Ko 6.15; 6.18;Ep 5.3; 5.17; 5.27;Kl 3.5;1 Ts 5.23;Ip 10.10;1 Pi 1.16\xt*\x* paiya muanumu. Tinipo ekitikiomani kutu xiri tuworinari muputiki xokumo saya. Kakinari xokupa ayaka kapia emeseruwa. 
\v 4 Tini\x - \xo 4.4 \xo*\xt Ro 6.19;1 Ko 6.13-15; 6.18\xt*\x* kirenikirenie xotikiropu xoxixoxi kapiapu nanunanu kourouna atinari yakuwakuai, kakinari Xoiteue xouwewotai kapia xeika asinaku kapia xeika taiwakuai. 
\v 5 Pa\x - \xo 4.5 \xo*\xt Siri 79.6;Ka 4.8;Ep 2.12; 4.17-18;2 Ts 1.8\xt*\x* xotikiropu xoxixoxi kapiapu nanunanue purutikati, xukumie Xoiteu sipawopu xuweue xoxixoxi ayaka kapia kakirouneri sie kakaku. 
\v 6 Tini\x - \xo 4.6 \xo*\xt XS 19.11-13;Siri 94.1;1 Ko 6.8;2 Ts 1.8\xt*\x* kakixanari Yesusure xonikisurouneri xatatikimana xosa xu kakerinari, pa xoxi kapia kakinari ekinikiworaku. Muanumu kuna ekime sinie tini sokisoki katikinuku, muanumu kapia xokupa apimie kaketeneai paiya, Kokaipae nini xaro tinikepuwatixe, xikiriai. 
\v 7 Sini\x - \xo 4.7 \xo*\xt 1 Ko 1.2;2 Ts 2.13-14;Ip 12.14;1 Pi 1.14-16\xt*\x* xoxi kapia kakepure Xoiteue yaisikepu xuwe. Xuweni kutu. Xoiteue sini xokumo kapia taiwopure yaisikina. 
\v 8 Pa xati\x - \xo 4.8 \xo*\xt Ese 36.27; 37.14;Lu 10.16;1 Ko 2.10;2 Ko 1.22;1 Yo 3.24\xt*\x* apue mua kuna supo wana paiya nu apupo kuna kireni supo woratixe. Xuwe. Nu Xoiteupo kuna supo wana, nu nukou Supo Youya tini tikirouna Xoiteu.
\s Sini asinaku kapia kakikiri sokisoki xepina
\p
\v 9 Tinipo xotikikemu Xoiteupo xuiapu tinikepi kapiaure yei tini xosa kireu kuna xayawopixe, pa amure, pa kapiaure Xoiteue tini taitaitikietai. 
\v 10 Kakati\x - \xo 4.10 \xo*\xt 2 Ts 3.4\xt*\x* Yesusure xonikisuwoteneai xuiapue Mesetonia propinsipo xokupa sanawayau puroteneai tinipo xotikikemu tinikirounuku. Pana yewapu xura, tinie pa kapia pani pani kakakuaire, tinipo xotikikemu sokisokiwopure xinuku. 
\v 11 Tini\x - \xo 4.11 \xo*\xt Ep 4.28;2 Ts 3.8; 3.12;1 Pi 4.15\xt*\x* peuni misepi kapia sokisoki xinari takipo sainani ta. Sinie ekime tini katikikiniai sie tini takipo xuputikieni sokisoki saina tinari paiya, tini takieni sokisoki tumuwakuai. 
\v 12 Kakinaria\x - \xo 4.12 \xo*\xt Ro 13.13;2 Ko 8.21;Kl 4.5\xt*\x* tini kire sapi xuweitautikepuwatixe, kakaria Yesusure xonikisuwopu xuweuwoteneai xuiapue, tinipo kapiaure nimaririwopineri.
\s Kokaipae xiyeri kouna kununusikepina
\p
\v 13 Yewapu xura\x - \xo 4.13 \xo*\xt Ep 2.12\xt*\x*, xumuweteneai xuimiapimi xosa amuwaurau putawopina paiya, tini atinari sipawakuaire xinuku. Yesusure xonikisuwopu xuweuwoteneai xuiapu kinie xumoteneai xuiapue xiri eiyoxirouneri. Kakineri Xoiteue kopa upuropu sainikerepina yause yakuworixe. Pa xati, sini ninie eiyoxenteneai sie kakepuxe. Sini Xoiteue kopa upuropu saisikeperina yause yakuwopu. 
\v 14 Yesusue\x - \xo 4.14 \xo*\xt Ro 14.9;1 Ko 15.3-4; 15.12-13; 15.18; 15.23\xt*\x* xumuna xiyeri sarotaire sini xosikisunuku. Pa xati sini sipa,Yesusupo sokisokie Xoiteue Yesusure xonikisuwoteneai xuimiapimi xumuweteneai xiyeri sainikeratia ninie Yesusu xeika xiyeri kopineri.
\p
\v 15 Sinie\x - \xo 4.15-17 \xo*\xt 1 Ko 15.51-52\xt*\x* Kokaipapu kuna tini xosa ipaki uteinuku. Kokaipae xiyeri kopina yause paiya, sini ekisikioma tuku xuiapue pani purikiria, xumuweteneai xuiapue purori sinixite akeri xowopuxe. Xuwe. 
\v 16 Xoiteue\x - \xo 4.16 \xo*\xt Mt 24.30-31;YT 1.11;1 Ko 15.23; 15.52;1 Ts 1.10;2 Ts 1.7\xt*\x* sokisoki kunawati, akereki xenikorokoroe uru yaxatia, Xoiteupo narie miriaxepina. Kakatia Kokaipae Xoiteupo xaixai wese wetina oro kopina. Kakatia Yesusure xonikisuneri xumuweteneai apimie akerineri saropineri. 
\v 17 Pa yause xosa\x - \xo 4.17 \xo*\xt Yo 12.26;YT 1.9;XKY 11.12\xt*\x* sini pani ekisikioma purikiriai xuiapue mena xouro pa xuimi apimi xeika xounukua, siko xokupae Kokaipa tutumawopu. Kakinuku paiya sini Kokaipa xeika sipesi sipesi puropu. 
\v 18 Pa xati Xoiteupo kireu xuiapu nikau xonikikemu sokisokiwopure tinie mua kuna takitaki xotikikemu sokisokiwata xakuai.
\c 5
\s Sini kokaipa kopina yauseure ireiwopu
\p
\v 1 Yewapu xura\x - \xo 5.1 \xo*\xt Mt 24.36\xt*\x*, sinie katikinuku panumu asau xosa panumu yause xosa pa sapi akipa xepinaxinuku kuna xayaunuku katikepukirixe. 
\v 2 Takieni\x - \xo 5.2 \xo*\xt Mt 24.42-44;Lu 12.39;2 Pi 3.10;XKY 3.3\xt*\x* sipauweikiriai, Kokaipa kopina asau paiya petuae ukumani marouna sie sapauni kopina. 
\v 3 Xuiapue\x - \xo 5.3 \xo*\xt Ese 13.10;Os 13.13;Mt 24.39;Lu 21.34-35;Yo 16.21-22\xt*\x* ipaki kunauneri, “Ximine asinaku yauseni kutu. Xosikikemu yoroni puropu,” xeria, xuie nono iyarepure xeri tatau marouna sie nini xoxi nikepina sapie sapauni nini xosa mopina. Ninie pa sapi emeseriwopuworixana xuwe. 
\v 4 Pana\x - \xo 5.4 \xo*\xt Ro 13.12-13;1 Yo 2.8\xt*\x* tini yewapu xura tini ukumu xosa purinuku xati, petuae moati apue xekeri urewotai sie tinie pa asau moati xekeri xoxi ure urewakuaixe. Xuwe. 
\v 5 Tini\x - \xo 5.5 \xo*\xt Ro 13.12;Ep 5.8-9\xt*\x* xokupa paiya tini memeremu xeika asau xeika xosaupo apimi. Sini ukumu xeika xori xeikapu kini xuwe. 
\v 6 Pa xati\x - \xo 5.6 \xo*\xt Mt 24.42; 25.5; 25.13;1 Pi 5.8\xt*\x* kireu apimi sie sini xinexekini. Xeuxana ekisikie pereu purati, nanusikie teteiwopina. 
\v 7 Sini\x - \xo 5.7 \xo*\xt Lu 21.34-36;Ro 13.13;Ep 5.14\xt*\x* sipa, xinepineri apimi paiya, nini ukumani xinirouneri. Xisa xukoriwopineri apimi paiya, nini ukumani xisa xukorineri puturouneri. 
\v 8 Pana\x - \xo 5.8 \xo*\xt Ais 59.17;Ep 6.13-17\xt*\x* sini asaupo kinia, sini atinuku nanunanu tepu. Sini Xoiteure xosikisunuku, kireu xiri xonikiewopi kapia tinuku, pa kapiae xomatua nikau nekei sie erepu. Kakinuku Xoiteu yakukiri xiyeri sosikepina kapia paiya, xomatua nikau koike sie kurorinuku, sini sokisoki tumunuku ati yakuwopu. 
\v 9 Sini\x - \xo 5.9 \xo*\xt Ro 9.22;1 Ts 1.10;2 Ts 2.13-14;1 Pi 2.8\xt*\x* Xoiteu nukou kisamaira tepure sini tumusikerepu xuwe. Sikou Kokaipa Yesusu Kristusue xiyeri sosikepinaure nue sini tumusikeretai. 
\v 10 Yesusue\x - \xo 5.10 \xo*\xt Ro 14.8-9;2 Ko 5.15;1 Ts 4.14\xt*\x* sini tianisikepure xumotai, pa xati sini ekisikioma purinukure e sini xumunukua, sini nu xeika ekisikioma puropu. 
\v 11 Pa xati\x - \xo 5.11 \xo*\xt Yu 20\xt*\x* tini mua kakirounuku sie, tini kirenikirenie takitaki xotikikemu sokisokiwata akuai.
\s Tini Yesusure xotikisurounuku xuiapue takitaki tianuwata aukuai
\p
\v 12 Yewapu xura\x - \xo 5.12 \xo*\xt 1 Ko 16.18;Pl 2.29;1 Ti 5.17;Ip 13.7; 13.17\xt*\x*, sinie tini ipaki katikepure xinuku, apimie tini tianitikepi saina teteneai irue pura. Kokaipae nini tinipo tumu iyainikerati purineri, tinipo kapia kutuwopure ninie tini kuna tikirouneri. 
\v 13 Ninie pa saina tirounerire, tinie nanunanunari xotikikemu xiri asinaku xinari xiri xotikienika. Kakinari tini xokupae kireni xotikie pura.
\p
\v 14 Yewapu xura\x - \xo 5.14 \xo*\xt Ka 5.22; 6.1-2;Kl 3.12;2 Ts 3.6; 3.11; 3.15;Ip 12.12\xt*\x*, ouyeouye xirouneri apimi nikau kapia kutunari ximikirouneri apimi nikau xonikikemu sokisokinari sokisokixepu xuweu woteneai apimi tianikinariwakuaire tini saitikerepure xinuku. Kakinari tinie xokupa apimi peuni peuni nika.
\p
\v 15 Ninie\x - \xo 5.15 \xo*\xt Asin 20.22;Mt 5.39;Ro 12.17;1 Ko 6.7;1 Pi 3.9\xt*\x* tini xosa xoxixoxi kapia kakeria, tinie kaki xanari xapa taku. Xokupa yause tinie Xoiteupo xokupa xuiapu xeika kireu xuiapu xeika xosa asinaku kapiani kakepure sokisokixa.
\p
\v 16 Xokupa yause\x - \xo 5.16 \xo*\xt 2 Ko 6.10;Pl 4.4\xt*\x* tinie xiri nimaririnari, 
\v 17 sipesi\x - \xo 5.17 \xo*\xt Lu 18.1;Ep 6.18;Kl 4.2;1 Pi 4.7\xt*\x* kunikuniwakuai. 
\v 18 Tini\x - \xo 5.18 \xo*\xt Ep 5.20;Kl 3.17\xt*\x* xuiapu Kristusu Yesusu xeika etokikiriaie panumu kapia tini xosa yaraxatia tini Xoiteu eiyasewakuai. Xoiteu nu panumu kapia xouweuna.
\p
\v 19 Tinie kire sapi kakakuaire Xoiteupo Supo Youyae saitikerepure xatia\x - \xo 5.19 \xo*\xt Ep 4.30;1 Ti 4.14;2 Ti 1.6\xt*\x*, tini kakixinari nu paraunari, 
\v 20 apimie tini\x - \xo 5.20 \xo*\xt 1 Ko 14.1; 14.39\xt*\x* xosa kunatureture kuna uteiwopure xeria kakixanari pa kunaure xotikikemu xoxixoxixaku. 
\v 21 Pana\x - \xo 5.21 \xo*\xt 1 Ko 2.11; 2.15;Pl 4.8;1 Yo 4.1\xt*\x* xokupa kuna xeika kapia xeika ati erurunari uteiwakuai. Kakinari asinaku kapia kireni sokisoki tinari, 
\v 22 xokupa\x - \xo 5.22 \xo*\xt Yop 1.1; 1.8; 2.3\xt*\x* xoxi kapia emeseriwa.
\p
\v 23 Xoiteu\x - \xo 5.23 \xo*\xt Ro 15.33;1 Ko 1.8;Pl 4.9;1 Ts 3.13;2 Ts 3.16\xt*\x* nu xoukemu yorowopi xotapa, nue kakati tinie tinipo ekitikioma xiri tuwaria tini xiri xokumo saitikerepina. Kakina tinipo xenitiki xeika muputiki xeika nanunanu xeika ati yakuwati, tini xiri asinaku purinaria sikou Kokaipa Yesusu Kristusue xiyeri kopina yause xosa tinipo xu xuwexepina. 
\v 24 Xoiteue\x - \xo 5.24 \xo*\xt 1 Ko 1.9; 10.13;2 Ts 3.3\xt*\x* tini yaitikeyaina, nue pa xokupa sapi tini xosa kakepina, pa amure, nukoe xokupa kuna kunawoyaini kutu tairouna.
\p
\v 25 Yewapu xura\x - \xo 5.25 \xo*\xt Kl 4.3;2 Ts 3.1\xt*\x*, tinie Xoiteu kunikuniwarini kutu sini tianisikepina.
\p
\v 26 Siko Xoiteupo xuiapu sikau kapia paiya\x - \xo 5.26 \xo*\xt Ro 16.16\xt*\x*, tini kirenikirenie kireu uritoko nikakuai.
\p
\v 27 Kokaipapu wenumurei ye tini xosa sokisoki kunaune, mua nakau tinie Xoiteupo xokupa xuiapu xosanikini kutu xosa ninaxakuai.
\p
\v 28 Sikou Kokaipa Yesusu Kristusue xousuaxina xouwesiketai kapia tini xosa purina.