\id NAM NAH - Bible en mashi du Congo
\ide UTF-8
\toc3 Nah
\toc2 Nahumu
\toc1 NAHUMU, NAHUM
\h Nahumu
\mt1 NAHUMU, NAHUM
\imt1 Enshokolezi
\ip Ecitabu ca Nahumu cirhangira n’olulanga lw’oburhè bwa Nyamubâho n’okutwîrwa olubanja kw’ababî. Abantu b’omu Asûru bayishihanwa na ab’omu Yûda bayishicungulwa (\xt 1, 2—2, 3\xt*).
\ip Nahumu alonzagya okumanyîsa oku Ninive âyishiherêrekezibwa. Nyamuzinda âyishimuhà obuhane bwenêne erhi kulibuza Israheli n’agandi mashanja kurhuma.
\ip Ninive ahanwa omu mwâka gwa 612 embere Kristu aburhwe. Ntyo Nahumu ayandikaga ecitabu câge myâka misungunu embere ly’ago mango. Abayahudi b’enyuma ly’ago mango barhàcilangaliraga okuhima abashombanyi bâbo b’en’igulu. Balangâlira okucungulwa kw’iroho.
\ip Nahumu kuli kuderha LUHÛMA, abalibuzibagwa bahûmuke bulya owalibuzagya abandi akola alyûla amabî gâge, Nnâmahanga akola amuhana.
\iot EBIRIMWO
\io1 1. Oburhè bwa Nyakasane: cigabi \ior 1\ior*
\io1 2. Okurhêrwa kwa Ninive: cigabi \ior 2\ior*
\io1 3. Okuhanwa kwa Ninive: cigabi \ior 3\ior*
\c 1
\p
\v 1 Aka kali kanwa k’obulêbi buyêrekîre Ninive, myanzi Nyamubâho àfulûliraga Nahumu w’e Elkoshi.
\ms1 Enshula-mwanzi
\s1 Lulanga: Oburhè bwa Nyakasane
\p
\v 2 Kàli Nyamubâho abà wa mitula, Nyamubâho abà mwihôzi! Nyamubâho anacihôle, abà wa burhè bwenêne! Nyamubâho anacihôlere abashombanyi bâge, anabike omujina oku babisha.
\p
\v 3 Nyamubâho arhabà burhè duba, ci kwônene arhahimwa budârhi, Nyamuzinda arhankaleka okuhana endyâlya eyâzire. Analambagire omu mpûsi n’omu mulaba, n’omu cihonzi, ebitù, ko katulo enshando zâge zibalaza.
\p
\v 4 Anarhalabanye enyanja, ayiganye, anaganye enyîshi zoshi. Bashani na Karmeli bayumvîrhe erhi okwo kurhuma, ehibala by’omu Libano hyagokomba!
\p
\v 5 Entondo zinajugume emalanga gâge, orhurhondo rhugeremwo ogwa nyegenye; idaho likunduke, igulu n’abaliyûbakakwo.
\p
\v 6 Obukali bwâge wâni! Ndi wankabulindira? Ndi wankafukunya amango adârhabîre? Obudârhi bwâge kwo buyâka nka muliro, n’amabuye ganashanguke embere zâge. 
\v 7 Nyamubâho abà mwinjà abà lwâkiro amango g’amalibuko oku bamuhizirekwo omurhima, abamuyegemera n’abamuyishi, 
\v 8 amango ecihônzi cizûsire\f + \fr 1, 8 \fr*\ft mango ecihônzi cizûsire: Amango obuhanya buzûsire… Eci cinwa cikengezize enkuba y’ecihônzi cinene (Nûhu ali murhûliriza aka Nahumu nk’oku kuyandisirwe omu citabu c’Omurhondêro 5, 29; ago mazîno gombi kulikuderha LUHÛMA).\ft*\f*. Anatulikanye abamuhizirekwo akamêne, alukirîze abashombanyi bâge kuhika omu mwizimya.
\s1 Obulebi kuli Yûda na Ninive
\s2 (Kuli Yûda)
\p
\v 9 Bici ogererîze kuli Nyamubâho? Kàli ye Kaheza, obujà burhâshubirire kabirhi 
\v 10 Bâjamo eciri nka câhirà, bâhungumuka nka lubala! Omu, boshi bâhungumke.
\s2 (Kuli Asûru)
\p
\v 11 Emwâwe, wâni Ninive, yo yârhengaga omuntu w’emihigo y’obulyâlya, omuntu w’omurhima guli nka gwa Beliyali\f + \fr 1, 11 \fr*\ft Oyu mubisha warhengaga emwa Asûru, anabà Senakeribu. (Rhulole \+xt 1 Bâm 18—19\+xt*), \ft*\f*.
\s2 (Kuli Yûda)
\p
\v 12 Nyamubâho adesire ntya, erhi: «Ciru bakarhabâla, ciru bakaluga kurhi, bagûkumuka, baherêrekere. Akabà nakugânyaguzize, ntakacikugânyaguza bundi. 
\v 13 Na bunôla nkolaga nakuhûmûla kuli ogwo muzigo, nâtwa emigozi ekushwêsire.»
\s2 (Kuli mwâmi w’e Ninive)
\p
\v 14 Wâni Ninive, lolà oku Nyamubâho akuhigîre: ntà bûko bwâcihêke izîno lyâwe, nâshâba engombe y’abazimu bâwe, nkûlemwo enshushano mbinjè n’emmumbe, n’enshinda yâwe nyishandâge bulya wahehêrîrwe.
\s1 (Kuli Yûda)
\p
\v 15 K’obwîne! Omuganda ola walibirha oku ntondo, ayisha ayâkûza mpu «Obucire!» Ojire ensiku nkulu, wâni Yûda, oyunjulize ebiragâne byâwe, bulya lêro Beliyali\f + \fr 2, 1 \fr*\ft Beliyali liri izîno lya muzimu.\ft*\f* arhakaciyêrekeza emwâwe, yêshi aherêrekîre.
\c 2
\ms1 Okushâbûka kwa Ninive
\s1 Okurhêrwa
\p
\v 1 Kashâba ola okuyishire, hira abalanzi omu mihanda, ja ebulâbi omu mirimbwa, kabika omukaba, ocîgurumanye wêshi. 
\v 2 Nêci, Nyamubâho oshubîrigwika omuzâbîbu gwa Yakôbo n’omuzâbîbu gw’Israheli. Abanyazi bâli erhi bacîhireyo, bâli erhi bàyitwîre amashami. 
\v 3 Empenzi z’entwâli zâge zajà zalabuka, abasirika bâge bayambîrhe e­by’omugôla, ebiterusi bicihîsize byalingija oku bîrha, abasirika bali oku ndogomi bajà bahama. 
\v 4 Omu njira ebiterusi bicihîsize, byamâhârha omu mpandagazi: owabilangira anamanya mpu bibêye; byajà byalaza eyi n’eyi nka nkuba. 
\v 5 Bamâhamagala engabo y’abîshoge, entondo zamâkorana, zamâciyôha oku muhanda, mîra zagwikaga ihêma. 
\v 6 Emihango eyêrekîre oku lwîshi yamâpamuka, akayuguyugu omu bwâmi mpu «enhî!» 
\v 7 Bamarhuluba omugoli, bamamugendana, abajà-nyere bâge bali bàbanda endûlù nka kulya engûkù ziyâhiza; bali bacidirhibula. 
\v 8 Ninive kwo ali nka luganizo lwa cidêka. Badwîrhe bayakuza, mpu: «Kafè, kafè, kafè!» Ci ntâye wakabagana kwo kunyi. 
\v 9 Mucihagule amarhale! Mucihagule amasholo! Biri birugu birhankahwa, biri mwandu mwandu, ecishagala ciyunjwîre birugu bya citwîro. 
\v 10 Buhagwe, kavango n’akashâba! Omurhima gwadûrhusire, enjingo zamârhà, amadwî gamakomanya, ntà ntêra bacigwêrhe, amalanga gazinzibîre.
\s1 Ninive ali nka ngoromora yahimirwe
\p
\v 11 Kurhi càbîre cirya cishagala-bulumba bw’engoromora? Abâna b’e­ ngoromora bakàgihâbirwamwo ebiryo byâbo. Erhi wangoromora ajâga ebwa kuhiva, ntâye wakâgidûnda abâna bâyo. 
\v 12 Wampangaza akâgigabira orhwâna rhwâge ebihembo, agabânye n’empangaza-kazi zâge; akâgiyunjuza enyâla zâge mishoko, n’ebirâlo byâge misimbisimbi. 
\v 13 Nyakasane w’Emirhwe amâderha, erhi: «Ninive, nkolaga nâkuhana, nâvungunyula engâlè zâwe z’ebîrha, emisole yâwe yâkumba oku matabâro. Obuhagwe ojira hano igulu nkolaga nâbuherêrekeza, na ntâye wâciyumve izù ly’abaganda bâwe.»
\c 3
\s1 Ninive amininisirwe oku mabî gâge
\p
\v 1 Yajêwe! ecishagala c’obulyâlya, ngasi mwêzi ciyunjwîre bunyazi, mangaci weki wâgokôla okwâwe! 
\v 2 Yumva! Obuhiri bwahukuza! Yumva emidindiri. Endogomi zikûzire omulindi, ebiterusi byajà byahukuza n’okuhama; 
\v 3 basirika bali eruhya, engôrho ziri nka ngulumira, amatumu nka milazô. Abayagalisire buli buvu, abafîre byo byâsi, emifù eri ntuliranye, bajà bayigerakwo. 
\v 4 Ebyo bwo bunguke amabî galêrhera omukala-nshonyi, omwâlikwa mwihisa ahindwîre ebishagala bajà b’amabî gâge. 
\v 5 Co cirhumire nkolaga nâkuhana, kwo Nyakasane w’Emirhwe adesire. Nâkubarhuza omwambalo gwâwe, nkugendêse bushugunu omu masù g’abantu, nkubonêse nshonyi embere z’amâmi. 
\v 6 Nâkubulula omu bijondo, nkubonêse za mêmè: nâkujira obè lwîganyo oku bâgera boshi. 
\v 7 Ngasi bankakubona boshi banakule omulindi bajà baderha, mpu: «Ninive ashâbûsire, ndi wâmufà bwonjo?» Ndi wâcikufe bwonjo! Ngahi owakurhûliriza ankaciboneka?
\s1 Olwiganyo lwa Tebesi
\p
\v 8 Ewani Ninive, ka we muzibu kulusha No-Amoni\f + \fr 3, 8 \fr*\ft No-Amoni luli lugo lw’e Tebesi, lugo lunene bwenêne lw’e Mîsiri: \+xt Eze 30, 14-16\+xt*. Olwo lugo lukola lugosirwe na Asurbanipali mwâmi w’e Asûru mwâka gwa 663 embere Kristu aburhwe.\ft*\f* wayûbakaga oku burhambi bwa Nili? Ecôgo câge yali nyanja, n’amîshi gàmujirira ecirhangorhango. 
\v 9 Obuhashe bwâge àbâga Etiyopiya na Mîsiri, bo bàkâgimuhà obuhirhi bwa ngasi lubero. Abantu b’e Puti n’ab’e Libiya bâli bâge. 
\v 10 Naye kurharhumaga arhalulizibwa anahêkwa bujà; abâna bâge boshi bànigwa omu ngasi mashango g’enjira. Abaluzi bâge boshi bàshwêkwa n’obudagulè, n’abarhwâli bâge boshi bàgendibà bajà omu kuyêshwa cigole. 
\v 11 Nâwe Ninive, okolaga wâlonza aha wâyâkira mpu lyo ofulumuka abashombanyi bâwe.
\s1 Busha Ninive acîrheganyiza oku mushombanyi
\p
\v 12 Ebyôgo byâwe bizibuzibu kwo biri nka malehe gayêzire oku murhi. 
\v 13 Emwâwe erhaciri abarhali nka bakazi, emihango mihamikize y’ecihugo ekola ecîyigula yône embere z’omushombanyi: orhuhamikizo rhwâyo rhwo rhwalîrwe n’omuliro. 
\v 14 Doma amîshi muhako Ninive, bulya okola wâgorhwa; zibuhya ebyôgo byâwe, olabarhe ibumba onarheganye enformo y’amadafâli. 
\v 15 Ci kwône wâfà, wâhîra omu bwokêre bw’ecishagala câwe, erhi ofîre oku matabâro. Wâherêrekera nka byâsi byàlîbirwe n’ebizindêre.
\s1 Olubaga lugumagumà lwahirigirha
\p Olubaga lwâwe kwo lwakâgivanda nk’irumbu lya nzige. 
\v 16 Abarhimbûzi bo bâli banji kulusha enyenyêzi z’oku nkuba. Bàkâgiyôrha nka kula ebizindêre bibalala, lêro bahirigisirage. 
\v 17 Abajà-bulâbi bâwe kwo bàkâgiyandala nka nzige, n’abakozi bâwe nka kula amalumbu g’enjuci gajà gacîlunda oku mashaka amango g’e­mboho. N’erhi izûba lishalâla ntâye wacimanya aha zàgezire. Ngahigi bâgezire obwo? 
\v 18 We mwâmi w’e Asûru, abarhambo bâwe bagwîshîre burhazûka, abakulu bâwe b’abasirika barhacihinya. Olubaga lwâwe lwashandabîne omu ntondo zoshi, na ntâye wacilushûbûliza haguma. 
\v 19 Wajîrekwo ibala lirhankabukwa, ebibande byâwe biri bya lufù. Ngasi boshi badwîrhe bayumva olwâwe badwîrhe baheba orhusheka, bulya ndigi yeki orharhindibukaga wâni n’obulyâlya bwâwe?