\id COL KOL - Bible en mashi du Congo
\usfm 3.0
\ide UTF-8
\toc3 Kol
\toc2 Bakolosi
\toc1 AMARUBA EMWA ABAKOLOSI
\h AMARUBA EMWA ABAKOLOSI
\mt1 AMARUBA EMWA ABAKOLOSI\f + \fr 1, 0 \fr*\ft Abakolosi: Bantu b’e Kolosi; Banya-Kolosi; bantu bayûbaka e Kolosi.\ft*\f*
\imt1 Enshokolezi oku Maruba emwa Abakolosi
\ip Nnâmahanga warhurhenzagya omu bujà bw’omwizimya, aj’irhudêkereza omu Bwâmi bwa Mugala wâge muzigirwa, warhucungulaga anarhukûlira ebyâha. Oyo Mugala ye Mwâmi mukulu w’ebintu byoshi: \iqt Ye nshusho ya Nyamuzinda orhaboneka, ye Nfula omu biremwa byoshi.\iqt* \vp 16\vp* \iqt Bulya byoshi muli ye byalemagwa, emalunga n’en’igulu, ebiboneka n’ebirhaboneka, Entebe n’Amarhegesi, Amâmi n’Amahashe: byoshi byoshi ye wabilemaga, ye byanalemeragwa;\iqt* \vp 17\vp* \iqt n’embere bibêho byoshi, yêhe erhi ho abà, ye nabihereza okubâho byoshi.\iqt* \vp 18\vp* \iqt Kandi yêne y’irhwe ly’omubiri, yo Ekleziya; y’Imerero, ye Nfula omu bafîre; na ntyo ye murhanzi muli byoshi.\iqt* \vp 19\vp* \iqt Bulya Nyamuzinda alonzize okumuhiramwo obwimâna bwoshi,\iqt* \vp 20\vp* \iqt na muli ye alonzize okugalula ebintu byoshi omu bwîra bwâge, ebiri en’igulu n’ebiri emalunga, alêrha omurhûla n’omukò gw’omusalaba gwâge.\iqt*
\ip Paolo acîhânyire oku alwîra obwo buyêmêre lyo ahisa abandi bantu oku bwimâna buli muli Kristu. Ngasi mukristu agwêrhe ecâge cigabi c’amababale ga Kristu bulya ali cirumbu c’omubiri gwa Kristu, yo Ekleziya.
\ip Nka kulya abà mîra bakâg’ijà omu Ndagâno ya Nnâmahanga olusiku lw’okukembûlwa, muli Kristu, Muhimanyi kuli byoshi, hali obukembûle buhyâhya, buyêrekîre abalume n’abakazi, bwo bubatizo: aha \xt 2, 11-15\xt* na \xt 3, 10-14\xt* harhuhugwîre ebyo \iqt « Muli ye mwakembwîrwe obukembûle burhajiragwa na nfune za muntu, mwahogola omubiri gwinyu gw’ecâha: obwôla bwo bukembûle bwa Kristu.\iqt* \vp 12\vp* \iqt Mwabishirwe haguma naye omu nshinda erhi mubatizibwa, kandi mwafûsire haguma naye omu nshinda erhi muyêmêra obuhashe bwa Nyamuzinda wamufûlaga omu bafù.\iqt* \vp 13\vp* \iqt Mwe mwâli mufîre erhi byâha binyu n’okurhakembûlwa kw’emibiri yinyu birhuma, ashubir’immuhà obuzîne haguma naye, arhubabalira ebyâha bîrhu byoshi,\iqt* \vp 14\vp* \iqt azaza ecêrhè c’omwenda rhwalimwo n’ebigabi byâco, acirhenza, acibamba oku musalaba.\iqt* \vp 15\vp* \iqt Nago Amâmi n’Amabashe aganyaga, agabonêsa enshonyi omu masù g’igulu lyoshi, anagagwârha mpira zâge.»\iqt*
\ip Abemêzi bakola biremwa bihyâhya: \iqt «3, 10 mwacîhundikira omuhyâhya, olya ocîsêza okuhinduka nshusho y’Omulemi wâge, mpu lyo ahika oku bumanye bw’okunali.\iqt* \vp 11\vp* \iqt Aha harhaciri Mugereki erhi Muyahudi; harhaciri mukembûle erhi ntakembûlwa, harhaciri ba-ntamanywa n'Abashita\iqt*; \iqt harhaciri bajà erhi bantagengwa: akola Kristu yêne, ye byoshi muli boshi\iqt*. \vp 12\vp* \iqt Nka kulya binakwânîne abîshogwa ba Nnâmahanga, n’abatagatîfu n’abarhonyi bâge, mucihundikire omurhima gw’olukogo, n’obwonjo, n’obwîrhôhye, n’obutûdu, n’okulembera amalibuko.\iqt* \vp 13\vp* \iqt Mukâlemberana munababalirane aka­ba hali owagayîsize owâbo. Nyakasane ammubabalire: mumuyankirekwo olwiganyo.\iqt* \vp 14\vp* \iqt Ci kulusha okwo kwoshi, muzigirane, bulya obuzigire ly’ishwinjiro ly’obwimâna.»\iqt*
\c 1
\s1 Omusingo
\p
\v 1 Paolo, ntumwa ya Kristu Yezu oku bulonza bwa Nyamuzinda, na mwene wîrhu Timoteyo, 
\v 2 oku batagatîfu na bene wîrhu bemêzi muli Kristu bali e Kolosi. Kuli mwe engalo n’omurhûla gwa Larha Nnâmahanga!
\s1 Omunkwa n’omusengero
\p
\v 3 Rhurhahusa okuvuga Nyamuzinda omunkwa, Îshe wa Nnawîrhu Yezu Kristu, nka rhwammukengêra omu nsengero zîrhu, 
\v 4 bulya rhwayumvîrhe obuyêmêre bwinyu muli Kristu Yezu n’obuzigire bwinyu oku batagatîfu boshi, 
\v 5 kulya kubà mucîkubagire obulangâlire mubîkîrwe omu mpingu. Obwôla bulangâlire mwabuyumvîrhe omu Luderho lw’okuli, yo Myanzi y’Akalembe; 
\v 6 eyo Myanzi y’Akalembe yahisire emwinyu nk’oku yalumîre omu igulu lyoshi: yayâna emburho yanagandâza. Emwinyu nayo kwo na kwo, kurhenga lulya lusiku mwayumvagya mwanamanya enshôkano ya Nyamuzinda nk’oku enali, 
\v 7 bulya muyigîrizibwa n’Epafra, murhabâzi wîrhu muzigirwa omu mukolo na murhumisi wa Kristu okwânîne okucîkubagirwa. 
\v 8 Yêne warhumanyîsagya obuzigire bwinyu muli Mûka Mutagatîfu.
\p
\v 9 Co cirhumire, kurhenga lulya lusiku rhwayumvagyamwo ogwo mwanzi, rhurhahusa okummusengerera n’okushenga Nyamuzinda nti ammushobôze okumanya kwinjà obulonza bwâge, omu bushinganyanya bwoshi n’omu bumanye bwa Mûka Mutagatîfu. 
\v 10 Na ntyo mubè n’olugendo lushingânîne Nyakasane, munamusimîse muli byoshi; muyâne amalehe omu ngasi bijiro binjà, munayûshûke omu kumanya Nnâmahanga.
\p
\v 11 Obuhashe bw’irenge lyâge bwâmmuzibuhya, muhash’ilembera amalibuko goshi n’oburhwâli haguma n’obushagaluke, 
\v 12 munavuge Larha Nyamuzinda omunkwa n’enshagali, owammushobôzagya enshôkano y’okushangîra iragi ly’abatagatîfu omu bulangashane. 
\v 13 Ye warhurhenzagya omu bujà bw’omwizimya\f + \fr 1, 13 \fr*\ft Bujà bw’omwizimya gwa shetani.\ft*\f*, aj’irhudêkereza omu Bwâmi bwa Mugala wâge muzigirwa 
\v 14 warhucungulaga anarhukûlira e­byâha.
\ms1 I. Amahwe g'okuyêmêrwa
\s1 Kristu ye Mwâmi mukulu w’ebintu byoshi
\q1
\v 15 Ye nshusho ya Nyamuzinda orhaboneka, ye Nfula omu biremwa byoshi.
\q1
\v 16 Bulya byoshi muli ye byalemagwa, emalunga n’en’igulu, ebiboneka n’ebirhaboneka, Entebe n’Amarhegesi, Amâmi n’Amahashe: byoshi byoshi ye wabilemaga, ye byanalemeragwa;
\q1
\v 17 n’embere bibêho byoshi, yêhe erhi ho abà, ye nabihereza okubâho byoshi.
\q1
\v 18 Kandi yêne y’irhwe ly’omubiri, yo Ekleziya; y’Imerero, ye Nfula omu bafîre; na ntyo ye murhanzi muli byoshi.
\q1
\v 19 Bulya Nyamuzinda alonzize okumuhiramwo obwimâna bwoshi,
\q1
\v 20 na muli ye alonzize okugalula ebintu byoshi omu bwîra bwâge, ebiri en’igulu n’ebiri emalunga, alêrha omurhûla n’omukò gw’omusalaba gwâge.
\s1 Abakolosi nabo bakola bîra ba Nnâmahanga
\p
\v 21 Ninyu mwe mwâli bigolo\f + \fr 1, 21 \fr*\ft Bigolo omu masù ga Nnâmahanga na bashombanyi bâge embere bamanye Kristu.\ft*\f* mîra na bashombanyi erhi nkengêro zinyu n’ebijiro binyu bibî birhuma, 
\v 22 lêro bunôla ashubir’immujira bîra bâge omu mubiri gw’Omugala, erhi afà, mpu lyo mubonekana batagatîfu, bêru-kwêru na banwererwa\f + \fr 1, 22 \fr*\ft omunwererwa: orhaliko ecakarhuma abulanwa, atumuzibwa\ft*\f* omu masù gâge, 
\v 23 caziga musêre buzibu omu buyêmêre, mumere emizî, mukomere munabè ntadungagana omu bulangâlire bw’Emyanzi y’Akalembe mwayumvagya; eyo Myanzi y’Akalembe yayigîrizîbwe ngasi ciremwa cibà en’igulu, hano idako ly’amalunga, nâni, nie Paolo, nahindusire mujà-bugo wayo.
\s1 Omukolo gwa Paolo
\p
\v 24 Bunôla nsîmire omu malumwa ndwîrhe nabona mwe murhumire, nnandwîrhe nayunjuza omu mubiri gwâni ebibuzire oku mababale ga Kristu\f + \fr 1, 24 \fr*\ft Ngasi mukristu agwêrhe ecâge cigabi c’amababale akwânîne ayûshûle oku mababale ga Kristu; bulya rhuli birumhu by’omubiri gwâge, yo Ekleziya.\ft*\f*, nti lyo nkwânana omubiri gwâge, yo Ekleziya. 
\v 25 Nie ono nahindusire murhumisi w’eyo Ekleziya obujà-bugo Nyamuzinda ampâga muli mwe burhuma, mpu ndumîze Oluderho lwâge, 
\v 26 ly’ihwe lyàli lifulike kurhenga emyâka n’emyâka n’oku bantu ba mîra, na buno likola limanyirwe n’ahatagatîfu bâge. 
\v 27 Nyamuzinda alonzize okubayêreka obuhirhi bw’irenge bw’eryôla ihwe emwa abapagani: Kristu ali ekarhî kinyu, ye bulangâlire bw’irenge! 
\v 28 Oyôla Kristu ye rhuhanûla, omu kurhonda ngasi muntu n’omu kuyigîriza ngasi muntu n’obusinganyanya boshi, nti lyo rhuhindula ngasi muntu abè mwimâna muli Kristu. 
\v 29 Eco co ntamira, omu kulwa entambala n’oburhabâle bw’emisî mpâbwa n’obuhashe bwâge.
\c 2
\s1 Obushiru bwa Paolo oku Bakolosi
\p
\v 1 Nnonzize mumanye ntambala ndârhi ncindwîrhe nalwa mwe murhuma, nab’e Laodiceya, na ngasi bandi barhasâg’ibona obusù bwâni menemene. 
\v 2 Nnonzize emirhima yâbo erhûlûle, balungane bwenêne omu buzigire, banayunjule obuhirhi bw’obumanye, na ntyo bamanye ihwe lya Nyamuzinda, ye Kristu, 
\v 3 ye bamwo obuhirhi bwoshi bw’obushinganyanya n’obumanye. 
\v 4 Ndesire okwo nti lyo harhajira owammurheba n’ebinwa bw’obwengûza. 
\v 5 Bulya ciru akabà ntali muli mwe n’omubiri, ndi muli mwe n’omurhima, nnansîmire okubona muyôsire bwinjà buzira kavulindi munasêzire buzibu omu buyêmêre bwinyu muli Kristu.
\ms1 II. Mumanye mwankahabuka
\s1 Obuzîne bw’okuli muli Kristu
\p
\v 6 Ntyo mulame muli Nyakasane Yezu Kristu nka kulya mwamuyigîrizibagwa. 
\v 7 Mumumerekwo emizî munamusêrekwo, musimikire oku buyêmêre nka kulya mwayigîrizibagwa, munayôrhe mwavuga omunkwa. 
\v 8 Mumanye hankanajira owammujira bajà n’obwengûza bw’efilozofiya y’obunywesi\x - \xo 2, 8 \xo*\xta Lolà \xta*\xt Gal 4, 3.\xt*\x*, erya eyegemêra emigenzo y’abantu n’ebiremwa by’en’igulu, ci arhali Kristu. 
\v 9 Bulya muli ye mwo obwimâna bwoshi bw’obunyamuzinda bubà omu mubiri, ninyu mushangîre obwo bwimâna muli ye, 
\v 10 ye irhwe lya ngasi Mâmi na ngasi Mahashe. 
\v 11 Muli ye mwakembwîrwe obukembûle burhajiragwa na nfune za muntu\f + \fr 2, 11 \fr*\ft Bwo bubatizo\ft*\f*, mwahogola omubiri gwinyu gw’ecâha: obwôla bwo bukembûle bwa Kristu. 
\v 12 Mwabishirwe haguma naye omu nshinda erhi mubatizibwa, kandi mwafûsire haguma naye omu nshinda erhi muyêmêra obuhashe bwa Nyamuzinda wamufûlaga omu bafù. 
\v 13 Mwe mwâli mufîre erhi byâha binyu n’okurhakembûlwa kw’emibiri yinyu birhuma, ashubir’immuhà obuzîne haguma naye, arhubabalira ebyâha bîrhu byoshi, 
\v 14 azaza ecêrhè c’omwenda rhwalimwo n’ebigabi byâco, acirhenza, acibamba oku musalaba. 
\v 15 Nago Amâmi n’Amabashe aganyaga, agabonêsa enshonyi omu masù g’igulu lyoshi, anagagwârha mpira zâge.
\s1 Abakristu barhankaziga babà bajà b’ebiremwa by’en’igulu
\p
\v 16 Lêro irhondo harhacijiraga owammuderha oku biribwa n’oku binyôbwa, nîsi erhi oku biyêrekîre ensiku nkulu, erhi okubaluka kw’omwêzi, erhi olwa Sabato\f + \fr 2, 16 \fr*\ft Sabato lwo luzira.\ft*\f*. 
\v 17 Ebyo byoshi biri cizunguzungu cône c’ebyaciyîsha; ci okuli kwônene guli mubiri gwa Kristu. 
\v 18 Ntâye ommurhebage mpu ammunyaga entanda yinyu omu kucîkungira obwîrhôhye bwâge bw’okugashâniza bamalahika. Ebyo byoshi biri bilôrho bya balya obucîbone bwâbo burhagwêrhi nsimiko n’obukengêre bw’ecinyamubiri burhunza. 
\v 19 Abôla bantu barhasêra oku irhwe\f + \fr 2, 19 \fr*\ft irhwe: Irhwe ly’Ekleziya, ye Kristu: Lolà \+xt Efz 4, 15-16\+xt*.\ft*\f* lilîsa omubiri gwoshi n’okugusimbanya, oku burhabâle bw’enungo n’emisî, mpu lyo gushunjûka muli Nyamuzinda. 
\v 20 Akabà mwafîre haguma na Kristu oku biremwa by’en’igulu, cici cicirhumaga mwayêmêra emiziro nka kulya muciri b’en’igulu? 
\v 21 Mpu: «Omanye wankahumakwo, omanye wankalabulakwo, omanye wankamamarhakwo!» 
\v 22 Kali ebyo byoshi byalemeragwa okusherêra omu kukolêsibwa! Agôla marhegeko n’ezôla nyigîrizo ziri za bantu! 
\v 23 Amarhegeko ga bene ago ganahash’ibonekana nka ga bantu bashinganyanya balonza obulyo bw’okugashâniza, n’obw’okucîrhohya, n’okubabaza omubiri; n’obwo ntà kamalo kâgo, na ntâkwo kankahash’ihima iralà ly’omubiri.
\c 3
\s1 Obuzîne buhyâhya muli Kristu
\p
\v 1 Obu mwafûsire haguma na Kristu, mukâg’ishwîra eby’enyanya, yo Kristu abutamîre ekulyo kwa Nyamuzinda; 
\v 2 mukânunirwa n’eby’enyanya, muleke okukalalikira eby’en’igulu. 
\v 3 Bulya mwafîre, n’obuzîne bwinyu bukola bubà bubishe haguma na Kristu muli Nyamuzinda. 
\v 4 Amango Kristu, ye buzîne bwinyu, acîyêrekana, ninyu mwayish’ilabuka mwe naye omu bukuze.
\ms1 III. Okushwinja
\s1 Amarhegeko ngasi mukristu akwânîne okushimba
\p
\v 5 Kuziga mubabaze ebirumbu by’omubiri gwinyu gw’en’igulu: obugonyi, eby’enshonyi, amasîma mabî, enyifinjo mbî, n’amagene g’eby’en’igulu, kwo kuli nka kufukamira ebiremwa; 
\v 6 ebyôla byo birhuma Nyamuzinda akunira. 
\v 7 Ninyu mw’ene ntyo kwo mwâli muyôsire mîra, amango mwacikâg’ikashimba ezo ngeso mbî. 
\v 8 Ci kwônene lêro bunôla ebyo byoshi mubijugucirage ninyu: obukunizi, ennongwè, obulyâlya, ebijâci n’enshambâlo mbî, birhahîra bikaciyumvikana omu kanwa kinyu. 
\v 9 Murhacikâg’irhebana mwene na nnene, bulya mwahongwîre omuntu wa mîra haguma n’engeso zâge, 
\v 10 mwacîhundikira omuhyâhya, olya ocîsêza okuhinduka nshusho y’Omulemi wâge, mpu lyo ahika oku bumanye bw’okunali. 
\v 11 Aha harhaciri Mugereki erhi Muyahudi; harhaciri mukembûle erhi ntakembûlwa, harhaciri ba-ntamanywa n'Abashita\f + \fr 3, 11 \fr*\ft Abashita bâli bantamanywa (bashenzi) babaga eburhambi bw’Enyanja Nyirabula.\ft*\f*; harhaciri bajà erhi bantagengwa: akola Kristu yêne, ye byoshi muli boshi. 
\v 12 Nka kulya binakwânîne abîshogwa ba Nnâmahanga, n’abatagatîfu n’abarhonyi bâge, mucihundikire omurhima gw’olukogo, n’obwonjo, n’obwîrhôhye, n’obutûdu, n’okulembera amalibuko. 
\v 13 Mukâlemberana munababalirane aka­ba hali owagayîsize owâbo. Nyakasane ammubabalire: mumuyankirekwo olwiganyo. 
\v 14 Ci kulusha okwo kwoshi, muzigirane, bulya obuzigire ly’ishwinjiro ly’obwimâna. 
\v 15 Ntyo omurhûla gwa Kristu gugandâze omu mirhima yinyu: bulya ogwôla murhûla gwo mwahamagaliragwa mpu mubè mubiri muguma. Murhahusagya okukâvuga omunkwa! 
\v 16 Oluderho Lwa Kristu lusêre bwenêne omu mirhima yinyu. Mukaz’ilubwirizanya, munakaz’ihanûlana n’obushinganyanya. N’omurhima gwinyu gwoshi mukâyimbira Nnâmahanga ennanga, ebîtakîro n’enyimbo z’obunya-mûka, munakamuvuga omunkwa. 
\v 17 Na ngasi ci­nwa mwankaderha erhi cijiro mwankajira, byoshi mubijire oku izîno lya Nyakasane Yezu, bibè munkwa emwa Larha Nyamuzinda oku bulagizi bwâge.
\s1 Oku abakristu bakwânîne okuyôrha omu mwa bâbwè
\p
\v 18 Bakazi, mukâyumva babalo, nka kulya bikwânîne muli Nyakasane. 
\v 19 Ba­lumè, muzigire bakinywi, murhanabayôrheraga kubî. 
\v 20 Bâna, mukâyumva ababusi binyu muli byoshi, bulya okwôla kwo kusîmîsa Nyakasane. 
\v 21 Babusi, murhakâg’isholoshonza abâna binyu, mwakarhuma bârha omurhima. 
\v 22 Mwe bashizi, mukaz’iyumva bannawinyu b’en’igulu muli byoshi, arhali bulya mudwîrhe mwabonwa; nka kulya abalonza okusîma abantu bayôrha, ci n’omurhima nkana, bulya murhînyire Nyakasane. 
\v 23 Ngasi mukolo mwankajira, mugukole n’omurhima gwinyu gwoshi; Nyakasane abè ye mukolera, ci arhali ba­ntu. 
\v 24 Mumanye oku Nyakasane ayish’immuhemba, ammujire mîmo yâge. Kaz’imurhumikire Nyakasane Kristu! 
\v 25 Bulya okola obubî ayish’ihâbwa oluhembo lw’obubî bwâge; na ntà kulola oyu ye ndi.
\c 4
\p
\v 1 Mwe bashigwa, mukâhà bambali binyu ebishingânîne n’ebikwânîne. Mumanye oku ninyu mugwêrhe Nnawinyu omu mpingu.
\s1 Omurhima gw’okulumîza Emyanzi y'Akalembe
\p
\v 2 Muyôrhe muharâmya; mukâyîza omu kuvuga Nnâmahanga omunkwa. 
\v 3 Murhusengerere nîrhu, lyo Nyamuzinda ayigulira oluderho lwîrhu olumvi, rhuhash’ihanûla ihwe lya Kristu; lyo lirhumire ndi omu nkoba. 
\v 4 Mâshi mbone obulyo bw’okulimanyîsa nk’oku nkwânîne okuliyigîriza! 
\v 5 Mubè bashinganya­nya omu lugendo lwinyu haguma n’ab’embuga; mukolêse bwinjà amango muhîrwe. 
\v 6 Iderha linyu libè lya kusîmîsa ensiku zoshi, linunîrire nka munyu, munamany’ishuza ngasi yêshi okukwânîne.
\s1 Emyanzi ya Paolo
\p
\v 7 Emyanzi yâni yoshi, mwene wîrhu muzigirwa Tikiko, muganda okwânîne okucîkubagirwa na murhabâzi wâni omu mukolo muli Nyakasane, ammubwîrayo. 
\v 8 Co cirhumire mmurhumirage, nti amuhè emyanzi yîrhu anammurhûlirize emirhima\f + \fr 4, 8 \fr*\ft milongo 8-9, lolà Amaruba Mutagatîfu Paolo ayandikiraga Filemoni.\ft*\f*. 
\v 9 Murhumire bo na Onezimo, mwene wîrhu muzigirwa onakwânîne okucîkubagirwa; ali w’emwinyu. Bammushambalira emyanzi y’eno munda yoshi.
\s1 Omusingo n’obwangà
\p
\v 10 Aristarko rhubà rhweshi omu nkoba ammulamusize, bona Marko, muzâla wa Barnaba. Y’olya bammubwîraga; akayisha emwinyu mumuyankirire kwinjà; 
\v 11 Yezu naye, oderhwa Yusto, mpu asingi. Omu bakembûle boshi, abo bônene bantabâla okulumîza Obwâmi bwa Nyamuzinda; bàbîre burhûlirize bwâni. 
\v 12 Epafra, oburhwa emwinyu, mwambali wa Kristu Yezu, ammulamusize; arhahusa okummulwîrakwo omu nsengero zâge, mpu lyo muzibuha, muyôrhe muli bimâna, munasêre oku ngasi ebi Nnâmahanga alonzize byoshi. 
\v 13 Nêci, mmuhîre obu buhamîrize: arhagohya erhi mwe murhuma, mwe n’ab’e Laodiceya n’e Hiyerapoli. 
\v 14 Luka, mufumu muzigirwa, na Dema, bammuhîre omusingo.
\p
\v 15 Mulamuse bene wîrhu b’e Laodiceya, na Ninfa haguma n’endêko y’abemêzi babugânana aha mwâge. 
\v 16 Aga maruba hano muyûs’igasoma, mugend’igasomêkeza n’omu Ekleziya y’e Laodiceya\f + \fr 4, 16 \fr*\ft Wabona go galya rhuderha nti ayandikiraga Abefezi.\ft*\f*. Ninyu kwo na kuguma, muhûne ag’e Laodiceya, mugasome. 
\v 17 Mumbwîrire Arkipo, erhi: «Mpu omanye obugo wahâbagwa muli Nyakasane, onacisêze okubuyunjuza». 
\v 18 Ogu musingo guli gwa kuboko kwâni niene Paolo. Mukâkengêra enkoba zâni! Enshôkano ya Nnâmahanga ebè ninyu!