\id 3JN 3YWN - Bible en mashi du Congo
\ide UTF-8
\toc3 3 Ywn
\toc2 3 Yowane
\toc1 AMARUBA GA KASHARHU GA YOWANE
\h MARUBA GA KASHARHU GA YOWANE
\mt1 AMARUBA GA KASHARHU GA YOWANE
\c 1
\s1 Omusingo
\p
\v 1 Nie ono, Kamîra, kuli mwîra wâni Gâyo, nzigira okuli. 
\v 2 Muzigirwa wâni, nkulongîze nti byoshi bikubêre, ozibuhe omu mubiri nk’oku ozibuhire omu murhima.
\s1 Yowane akunga Gâyo
\p
\v 3 Nasîmire bwenêne erhi mbona bene wîrhu bayisha n’erhi nyumva bahamîriza oku osêzire oku by’okuli, oku oshimba okuli omu lugendo lwâwe. 
\v 4 Ntà kundi kwankansîmîsa kulusha okuyumva oku abâna bâni bashimba okuli. 
\v 5 Mwîra wâni, kw’okola nka muntu okwânîne okucîkubagirwa omu kujira ebi odwîrhe wajirira bene wîrhu, ciru bakabà bigolo. 
\v 6 Bakungîre obuzigire bwâwe omu ndêko y’abemêzi. Wâjira kwinjà erhi wankabashanira olwîko nk’oku binashingânîne omu masù ga Nnâmahanga. 
\v 7 Bulya barhenzire emwâbo Izîno lya Nyakasane lirhuma, na ntà kantu abapagani bàbahîre. 
\v 8 Kuziga rhw’ono rhukwânîne rhuyankirire abantu ba bene abo, lyo rhurhabâlana okukolera okuli.
\s1 Olugendo lubî lwa Diyotrefi
\p
\v 9 Nayandikîre Ekleziya, ci Diyotrefi olonza okubâmwo wa burhanzi arharhuyankirira. 
\v 10 Co cirhumire, erhi nankisha, nanamulongôza oku bijiro byâge n’oku binwa bibî akaz’irhuderhera. Arhanali hoshi aho: arhankaderha mpu ayankirira bene wîrhu, n’abalonza okubayankirira, anakabahanza, abarhenze omu Ekleziya. 
\v 11 Mwîra wâni, orhashimbaga olwiganyo lubî, ci oshimbe o­lwîganyo lwinjà. Ojira aminjà ali wa Nyamuzinda; naye ojira amabî erhi a­rhabonaga Nyamuzinda.
\s1 Olugendo lwinjà lwa Demetriyo
\p
\v 12 Demetriyo yêhe, boshi kukunga bamukunga, ciru n’Okuli nakwo kunamukunge. Nîrhu rhumuderhîre obuhamîrizi, nâwe wêne omanyire oku obuhamîrizi bwîrhu buli bw’okuli.
\s1 Ebinwa by’okufundika
\p
\v 13 Binji ncigwêrhe nankakubwîzire, ci ntalonzizi okukolêsa obwîno n’akalamu. 
\v 14 Nnangâlîre nti rhuli hôfi rhubonane, rhushambâle n’akanwa. 
\v 15 Omurhûla kuli we! Abîrhu mpu asinge. Olamuse abîrhu, ngasi muguma omu izîno lyâge.