\id 2CO 2KOR - Bible en mashi du Congo
\usfm 3.0
\ide UTF-8
\toc3 2 Kor
\toc2 2 Bakorinti
\toc1 AMARUBA GA KABIRI EMWA ABAKORINTI
\h AGA KABIRI EMWA ABAKORINTI
\mt1 AMARUBA GA KABIRI EMWA ABAKORINTI
\c 1
\s1 Enshokolezi: Paolo acîmanyîsa, abâna omusingo anavuga omunkwa
\p
\v 1 Paolo, ntumwa ya Yezu Kristu oku bulonza bwa Nyamuzinda, rhwe na mwene wîrhu Timoteyo, oku Ekleziya ya Nyamuzinda eri e Korinti n’oku batagatîfu boshi bali omu Akaya yoshi. 
\v 2 Kuli mwe enshôkano n’obuholo bw’emwa Larha Nyamuzinda na Nyakasane Yezu Kristu!
\p
\v 3 Ayâgirwe Nyamuzinda, Îshe wa Nnawîrhu Yezu Kristu, Larha w’obwonjo na Nyamuzinda wa ngasi burhûlirize; 
\v 4 ye rhurhûliriza omu mbaka zîrhu zoshi, mpu lyo nîrhu rhurhûliriza abandi omu ngasi malibuko n’obwo burhûlirize rhuhâbwa na Nyamuzinda. 
\v 5 Nêci, kulyâla amababale ga Kristu garhulugîre kwo n’oburhûlirize burhulugîre erhi Kristu orhuma. 
\v 6 Rhukalibuka erhi burhûlirize n’okucira kwinyu birhumire, bwo bamuhà oku mwalemberamwo amababale rhudwîrhe rhwalembera nîrhu. 
\v 7 N’obulangâlire bwîrhu muli mwe bwenêne bukomîre: rhumanyire oku obûla mushangîre malibuko maguma nîrhu, mukolaga mwayish’ishangîra n’okurhûlirizibwa haguma nîrhu.
\p
\v 8 Nanga, bene wîrhu, rhurhalonzizi muhabe amalibuko rhwabwîne omu Aziya, gàrhurhindibuza bwenêne, gàrhalusa emisî yîrhu, ciru rhurhali rhucilangalîre nti rhwabêramwo omûka. 
\v 9 Okuli, kwo rhwàli rhuyôsire nka abatwirîrwe okufà, lyo rhuleka okukacîkubagira emisî yîrhu rhwêne, ci rhubè Nyamuzinda ye rhucîkubagira, ye fûla abafù. 
\v 10 Yêne ye warhulîkûzagya oku lufù lungana olwo, ye wanacirhulîkûza kuli lwo; nêci, ye rhucîkubagira oku acirhuciza kandi. 
\v 11 Ninyu murhurhabâle n’ensengero zinyu, lyo eyo nshôkano bantu banji barhushobôlera erhuma omunkwa gwavugwa rhwe rhurhumire.
\ms1 I. Paolo kubêshera bamubêshîre
\s1 Ecarhumaga Paolo atamala amanalalira mpu ayisha
\p
\v 12 Irenge lîrhu bw’obûla buhamîrizi bw’omurhima gwîrhu guhamîriza oku mw’eri igulu, na bwenêne emunda muli, rhwayôsire omu butagatîfu n’omu kurhabêsha, n’okwôla rhwakuhâbagwa na Nyamuzinda. Rhwayôsire ntyo, arhali oku bwenge bw’omubiri\f + \fr 1, 12 \fr*\ft Obwenge bw’omubiri, bwo bwenge buyegemera eby’en’igulu. \ft*\f*, ci oku burhabâle bw’enshôkano ya Nnâmahanga. 
\v 13 Bulyâla omu maruba gîrhu ntà kandi kantu rhuyandikamwo okuleka ebimusomamwo n’ebi muyumvamwo. Nnangâlîre nti mwayumva lwoshi lwoshi, 
\v 14 nka kulyâla mwayumvîrhe hitya oku rhwe igwârhiro ly’obukuze bwinyu, kulya ninyu mwa yish’ibà igwârhiro ly’obwîrhu Olusiku\f + \fr 1, 14 \fr*\ft Olusiku lwa Nnawîrhu Yezu Kristu, lwo lusiku lw olubanja luzinda.\ft*\f* lwa Nnawîrhu Yezu Kristu. 
\v 15 Obwôla bulangâlire bwo bwarhumaga nnonza okurhang’ihika emwinyu, nti muhâbwe enshôkano ya kabiri\f + \fr 1, 15 \fr*\ft Enshôkano ya kabiri: masîma g’okubonakwo Paolo obwa kabiri ekarhî kâbo.\ft*\f*; 
\v 16 kurhenga emwinyu naderha nti ntwîkanye omu Macedoniya, na kurhenga e Macedoniya nshubire emwinyu, ninyu mwâli mwandusa munampise omu Yudeya. 
\v 17 Ewe, k’erhi ndalira ntyo bwifudukwe\f + \fr 1, 17 \fr*\ft Abashombanyi ba Paolo bakâg’iderha mpu anakahiga binji, ci mpu arhajira ebi ahiga.\ft*\f* nakulaliraga? Nîsi k’eyo migabo yâni erigi ya bunya-mubiri, na ntyo nâbâmwo «nêci, nêci,» na «nanga, nanga» caligumiza? 
\v 18 Nyamuzinda orhagalula akanwa kâge ye ndahîre: ebinwa mmubwîra birhabà «nêci na nanga». 
\v 19 Bulyâla olya Mugala wa Nyamuzinda, Yezu Kristu, rhwammubwîraga rhwe na Silvano na Timoteyo arhali «nêci na nanga»; arhabâmwo orhali «nêci». 
\v 20 Nêci, ebi Nyamuzinda alaganyagya byoshi, «nêci» wabyo muli Ye abà. Ye narhuma rhwaderha «Amen»\f + \fr 1, 20 \fr*\ft «Amen» kuli kuderha: «Nêci ntyo! Kwo biri ntyo, ebi odesire bisêzire».\ft*\f* w’irenge rhuhà Nnâmahanga. 
\v 21 Orhuzibuhya haguma ninyu muli Kristu n’owarhushîgaga amavurha\f + \fr 1, 21 \fr*\ft Amavurha g’obubatizo.\ft*\f*, ye Nyamuzinda, 
\v 22 ye wanarhuhiragakwo ecimanyîso\f + \fr 1, 22 \fr*\ft Ecimanyîso cirhazazika c’Obubatizo n’Obukomezo. Ecikinja ca Mûka: lyo Isakramenta ly’Obukomezo.\ft*\f* câge, anaheba ecikinja ca Mûka omu mirhima yîrhu. 
\v 23 Niehe Nyamuzinda ye ndahîre oku buzîne bwâni, oku kummufà lukogo kwarhumaga ntaciyishe e Korinti. 
\v 24 Arhali kuderha nti rhurhegeke obuyêmêre bwinyu, ci nti rhuyûshûle obusîme bwinyu; bulya omu buyêmêre muli bazibu.
\c 2
\p
\v 1 Nalalira obwôla nti ntashubira emwinyu omu burhè\f + \fr 2, 1 \fr*\ft Paolo arhalonza okushubilêrhera Abakorinti oburhè.\ft*\f*. 
\v 2 Bulyâla erhi nakammulêrhera oburhè, ndi wankacirhuma nashagaluka aha nyuma y’olya nalêrheraga oburhè? 
\v 3 N’akabà nayandisire ebi mumanyire\f + \fr 2, 3 \fr*\ft Maruba marhanzi Paolo ayandikiraga Abakorinti; ci ago maruba gahezire. Abalenga banaderhe oku aga burhanzi gahezire, gala marhanzi go gàli ga kabirhi, n’aga ga kabiri go gàli ga kasharhu.\ft*\f*, kwàli kuderha nti lyo hano nyisha ntag’ibà burhè erhi abâli bakwânîne okunsimîsa bàrhuma, bulya mmanyire oku okusîma kwâni kunali kwinyu mweshi. 
\v 4 Nêci, burhè bunji nàlimwo n’omutula omu murhima erhi mmuyandikira, erhi nnandi omu mulenge arhali kuderha nti mmujire burhè, ci nti lyo mumanya oku obuzigire; bwâni kuli mwe buli bunji bwenêne.
\p
\v 5 Akabà hali owajirîne burhè, arhali nie abujizire, ci mweshi, erhi nderhe oku baguma muli mwe abujizire lyo ntagibugera. 
\v 6 Burhali buhane bunyi obwo kuli oyo muntu\f + \fr 2, 6 \fr*\ft Omuntu wagayisagya Paolo. buno ahûnyire abakristu b’e Korinti mpu bababalire oyo mwene wâbo.\ft*\f* wahanyirwe na banji. 
\v 7 Mumubabalirage erhikwo munamuhire omurhima omu nda, oyo muhanya alek’irhogera omu burhè bulushire olugero. 
\v 8 Co cirhumire mmuhûnyire nti muyêrekane obuzigire kuli ye. 
\v 9 N’erhi nyandika, kwàli kuderha nti mmurhangule, nnandole erhi obumvi bwinyu burhali bwa bihimbi\f + \fr 2, 9 \fr*\ft Galya maruba makali ago Paolo adesire; nkaba nshonyi zarhumire bagarhera!\ft*\f*. 
\v 10 Ci kwônene oyu mubabalîre - akabà hali kantu namubabalirekwo- mwe mwarhumire namubabalira omu masù ga Kristu. 
\v 11 Mumanye rhwankarhebwa na Shetani! Emihigo yâge rhurhayihabiri.
\s1 Kurhenga e Trowa kuhika e Macedoniya. Obugo bw’entumwa
\p
\v 12 Erhi mpika e Trowa nti mpanûle Omwanzi gw’Akalembe gwa Kristu, oku bamanyigulira olumvi muli Nyakasane, 
\v 13 Omurhima gwâni ntumvagya gurhûzire, bulyâla nabula bushanga mwene wîrhu Tito. Nabasengaruka obwo, najà e Macedoniya.
\p
\v 14 Ci Nyamuzinda ayâgirwe, orhuhimira ngasi mango muli Kristu, olumîza akasûnunu k’obumanye bwâge hoshi hoshi n’omukolo gwîrhu! 
\v 15 Nêci, omu masù ga Nyamuzinda, rhuli kasûnunu kinjinja ka Kristu omu karhî k’abacira n’omu karhî k’abahera. 
\v 16 Kuli baguma rhuli kasûnunu ka lufù kahêka ebwa lufù, oku bandi rhuli kasûnunu ka buzîne kahisa oku buzîne. Omukolo mutyo ndi wankaguhasha? 
\v 17 Bulyâla rhwêhe rhurhali aka banji, bakaz’irhimbûla oluderho lwa Nyamuzinda; ci nka bantu nkana, nka bajà-bugo ba Nyamuzinda, rhuyigîriza muli Kristu embere za Nnâmahanga.
\c 3
\p
\v 1 Ewe, ka rhushub’igwîra okucîkunga rhwêne? Nîsi nkabaga kukwânîne, aka baguma, rhubè n’amaruba g’okucîmanyîsa emunda muli, erhi g’emwinyu? 
\v 2 Mw’oyo mwe maruba gîrhu, mayandike omu mirhima yîrhu, gamanyikîne n’okusomwa n’abantu boshi. 
\v 3 Nêci, kurhafulikwa, muli maruba ga Kristu rhwasiribaga rhwênene, n’ago maruba garhali mayandike n’obwîno, ci n’Omûka gwa Nyamuzinda ozîne; garhali mayandike oku mbaho z’amabuye, ci oku mbaho z’emibiri, oku mirhima yinyu. 
\v 4 Kwo rhucîkubagire Nyamuzinda ntyo, erhi Kristu orhuma. 
\v 5 Arhali kuderha mpu oku bwîrhu rhugwêrhe buhashe bwa kuderha mpu kantu kalebe kali kuli rhwe. Nanga! obuhashe bwîrhu kuli Nyamuzinda burhenga. 
\v 6 Ye wa­rhuhâga obuhashe bw’okubà bajà-bugo b’endagâno mpyâhya; n’eyo ndagâno erhali ya lwandiko\f + \fr 3, 6 \fr*\ft Olwandiko - Endagâno ya Mîra - kuyirha luyîrha, bulya luhâna amarhegeko, ci lurhahâna misî ya kugashimba. Mukà yêhe - Endagâno Mpyâhya - buzîne abâna.\ft*\f*, ci ya Mûka. Bulya olwandiko kuyîrha luyîrha, ci Mûka buzîne abâna. 
\v 7 Erhi obujà-bugo bw’olufù\f + \fr 3, 7 \fr*\ft Obujà-bugo bw’olufù: bulya amarhegeko ga mîra, owagavunaga, lufù atwîragwa. Ci ntà misî obwo bugo bwahânaga y’okugashimba bwinjà.\ft*\f*, bwàli buyandisirwe oku mabuye, bujiraga irenge lingana halya, ciru bene Israheli barhankalozire Mûsa ebusù erhi bulangashane b'obusù bwâge burhuma, n’obwo kugera bwageraga, 
\v 8 kurhi obujà-bugo bwa Mûka bwankabulaga irenge lilushire? 
\v 9 Bulyâla, erhi abâga obujà-bugo bw’olwayâga bwàli irenge, kurhi obujà-bugo bw’olwayâza bwakabulaga kubona irenge lilushire? 
\v 10 N’erhi rhwankaligerera kw’eri irenge lilushire bwenêne, irenge ly’obujà-bugo burhanzi liri ntâlyo 
\v 11 Bulyâla, ebyagera erhi bibaga byabonesire omu irenge, ebirhagera kurhi? Ka bibule bwarhalusa irenge kulusha?
\p
\v 12 Kuziga obwôla rhugwêrhe obulangâlire bwa bene obwo, rhugwêrhe aha rhucîkubagîre. 
\v 13 Arhali aka Mûsa wakâg’icîbwîka obusù mpu bene Israheli ba­nkabona oku obwo bulangashane bwàli bwa okugera bwayûrha. 
\v 14 Ci obukengêre bwâbo bwatûha. Bulya kuhika olusiku lw’ene, nka basoma Endagâno ya mîra, olwôla lusîka ho lunacibà. Lurhasâg’ikûlwa, bulya, Kristu olurhenza. 
\v 15 Nêci, kuhika olusiku lw’ene, nka basoma Mûsa, olusîka lunabasîke emirhima. 
\v 16 Erhi omuntu ahindukira, Nyakasane, lyo olusîka lutwîka. 
\v 17 Nyakasane abà Mûka, n’aha Omûka gwa Nyakasane guli, ho n’omuntu abà ntagengwa. 
\v 18 Ci rhwêhe kuno rhunali, obusù burhali bubwîke, rhudwîrhe rhwabonekamwo irenge lya Nyakasane nk’omu ndolero\f + \fr 3, 18 \fr*\ft Abashimbûlizi ba Kristu bali nka ndolero (cilolero) y’irenge lyâge; naye Kristu yo nshusho n’endolero y’irenge ly’Îshe.\ft*\f*, rhudwîrhe rhwahindulwa mpu rhushushe n’eyo nshusho, rhulangale kulusha rhunalangashane, nk’oku Nyakasane alonzize, bulya abà Mûka.
\c 4
\p
\v 1 Co cirhumire, rhwe rhwabêrîrwe obwonjo erhi rhuhâbwa obwo bugo, rhurhagonyâla. 
\v 2 Ci okuhulika erhi nshonyi zirhuma, rhurhacikubâmwo. Obwenge bw’okurhebana rhurhabubâkwo, n’oluderho lwa Nyamuzinda rhurhaluhindula. Ci omu kuyêrekana okunali mwo rhucîmanyikiza oku mirhima y’abantu omu masù ga Nnâmahanga. 
\v 3 N’akabà Emyanzi y’Akalembe rhuyigîriza eciri mifulike, balya bâhera bo enafulisirwe, 
\v 4 balya barhayêmêra, balya Nyamuzinda w’en’igulu\f + \fr 4, 4 \fr*\ft Shetani oyo ocihamba mpu yekola nn’eri igulu, ye olya wabwira Yezu mpu amuharamye! (\+xt Mat 4, 9-11\+xt*). Ntâye arhamanamanakwo.\ft*\f* ahusize obukengêre, mpu bankanabona obulangashane bw’Emyanzi y'Akalembe y’irenge lya Kristu, y’eri nshusho ya Nnâmahanga\f + \fr 4, 4 \fr*\ft rhulole amahugûlo omu \+xt 3, 18\+xt*.\ft*\f*. 
\v 5 Bulyâla arhali rhwêne rhuja rhwaciderha, ci Nyakasane Yezu Kristu rhuja rhwamanyîsa. Rhwêhe rhuli barhumisi binyu, erhi buzigire bwa Yezu Kristu burhuma. 
\v 6 Bulya Nyamuzinda waderhaga mpu omu omwizimya murhenge obumoleke, yêne ye wanamolekeraga omu mirhima yîrhu, mpu obulangashane bw’irenge lya Nyamuzinda liri ebusù bwa Kristu bumanyibwe.
\s1 Amalibuko n’obulangâlire bw’abajà-bugo
\p
\v 7 Ci kwônene obwo buhirhi omu mibiri y’obudaka rhubugwâsize, lyo bamanya oku obuhashe butyo kuli Nyamuzinda burhenga, ci arhali kuli rhwe. 
\v 8 Rhufundêrîre enyunda zoshi, ci rhurhahinangusiri; rhurhamanyiri cici rhulangâlirage, ci erhi rhunalangâlîre. 
\v 9 Barhurhindibuza, ci rhurhali balîkirire; barhukubire, ci rhurhahimirwi. 
\v 10 Amababale g’olufù lwa Yezu, rhugadwîrhe omu mubiri gwîrhu ngasi hoshi na ngasi mango, ly’obuzîne bwa Yezu nabo bubonekera omu mubiri gwîrhu. 
\v 11 Bulya, ciru rhukabà rhuzîne, ngasi kasanzi rhuli batwîre okufà erhi Yezu orhuma, ly’obuzîne bwa Yezu nabo bubonekera omu mubiri gwîrhu gwâfè. 
\v 12 Ntyo olufù ludwîrhe lwajira omukolo gwâlwo muli rhwe\f + \fr 4, 12 \fr*\ft olufù luli lwajira omukolo gwâlwo: Omukolo n’amalibuko g’obugo'bw’entumwa binyihya amagala gâzo, ci byo birhuma Nnâmahanga ashobôza abemêzi obuzîne bw’okuli. Kwo omuganda ashusha Nnawâbo Yezu ntyo; Yezu acîhânyire bunguke bw’abandi, kwo n’entumwa y’okuli ejira.\ft*\f*, ci muli mwe buzîne.
\p
\v 13 Ci kulya kubà nshôkano\f + \fr 4, 13 \fr*\ft Nshôkano ya Mûka Mutagatîfu.\ft*\f* nguma y’obuyêmêre rhugwêrhe, nka kulya biya­ndisirwe, mpu\x - \xo 4, 13 \xo*\xt Lul 116.\xt*\x*: \qt Nayêmîre, co canarhumaga nshambâla\qt*, nîrhu rhuyêmîre, co cinarhuma rhushambâla; 
\v 14 bulya rhumanyire oku owafûlaga Nyakasane Yezu, ayish’irhufûla nîrhu haguma na Yezu, anayish’irhuhira aha burhambi bwâge haguma ninyu. 
\v 15 N’ebyo byoshi mwe bibêra, mpu lyo enshôkano nyinji kulusha erhuma omunkwa gwaluga, gunaluze abaguvuga, lyo Nyamuzinda ajà irenge.
\p
\v 16 Co cirhuma rhurhagonyâla. Ci oku omuntu orhuli embuga\f + \fr 4, 16 \fr*\ft Omuntu orhuli embuga gwo mubiri, n’orhulimwo, bwo buzîne rhwashobôlaga erhi rhuhinduka bâna ba Nnâmahanga omu Bubatizo.\ft*\f* ashandâla, omuntu orhulimwo ahinduka muhyâhya ngasi lusiku. 
\v 17 Bulya okwôla kulibuka hityungunu kwa hisanzi hitya kurhurheganyiza kulusha ngasi lugero omwandu gw’irenge ly’ensiku n’amango. 
\v 18 Co cirhuma rhurhalola ebiboneka, ci ebirhaboneka; bulya ebiboneka birhashinga kasanzi, ci ebirhaboneka biri by’e­nsiku n’amango.
\c 5
\p
\v 1 Rhumanyire oku erhi eci cihando\f + \fr 5, 1 \fr*\ft Ogwo mûbako, gwo mubiri gw’irenge rhwâfûkane (\+xt 1 Kor 15, 44-45\+xt*).\ft*\f* rhubâmwo hano igulu cankashabûka, rhugwêrhe enyumpa yayûbakagwa na Nyamuzinda, mûbako gw’ensiku n’amango gurhàjiragwa na nfune za muntu, gunali omu irunga. 
\v 2 Gw’ogu mulenge rhulimwo mw’obu bwôrhere; rhudwîrhe rhwacîfinja nti omûbako gwîrhu gw’omu irunga\f + \fr 5, 2 \fr*\ft Omûbako gw’omu Irunga rhuguyambalîre oku ogwo gundi: Rhwankalonza okujà omu irenge ly’ensiku n’amango buzira okurhang’ifà.\ft*\f* rhuguyambalîre oku gundi, 
\v 3 casinga rhurhimâmwe rhuyambîrhe\f + \fr 5, 3 \fr*\ft 5, 3: Abayish’ishimânwa bayambîrhe, bo balya bâbè bacizîne, banali bajira ebijiro by’obulangashane amango Mwâmi Yezu agaluka; n’abâshangwe bashugunu, bo barhacibwisiri irenge lya Kristu kandi erhi bo balya bayish’ibà bafîre amango Kristu ayisha (\+xt 1 Kor 15, 51-53\+xt*).\ft*\f*, ci rhurhashangagwa rhuli bashugunu. 
\v 4 Nêci, oku rhunaciri mw’eci cihando, erhi omu mulenge rhunali n’omu malibuko; kulya kubà rhurhalonza okuhogolwa ogwo mwambalo, ci rhuguyambalîre oku nyanya y’ogundi, mpu omubiri gwîrhu gw’olufù guhinduke buzîne. 
\v 5 N’owarhubumbiraga okwo, anali Nyamuzinda yêne, ye wanarhuhâga Mûka Cikinja.
\p
\v 6 Kuziga, akabà ntyo, rhugwêrhe aha rhucîkubagîre, rhunamanyire bwinjà oku: «oku rhunacirimwo ogu mubiri, erhi n’emwa bene rhunali, kulî na Nyakasane; 
\v 7 bulya buyêmêre rhudwîrhe rhwagendamwo, ci arhali masù». 
\v 8 Rhurhwalihire obwo, rhurhankanabaga rhurhengemwo ogu mubiri, rhuj’ibêraho Nyakasane. 
\v 9 Na ntyo, rhubêziremwo ogu mubiri, rhubîre rhurhagubêziremwo; kumusimîsa rhulonza. 
\v 10 Bulyâla rhweshi kukwânîne rhuboneke aha lukîko lwa Kristu, lyo ngasi muguma âhâbwa amakwânane g’ebi ajizire aciri omu mubiri, binjà erhi bibî.
\s1 Omukolo gw’obugo bw’entumwa
\p
\v 11 Na ntyo, bulya rhuyishi oku kwânîne okuyôboha Nyakasane, rhudwîrhage rhwayêmêza abantu. Nyamuzinda yêhe rhulangashîne omu masù gâge. Ninyu nnangâlîre nti rhulangashîne omu mirhima yinyu. 
\v 12 Arhali kucîkunga rhwashubigwîra okucîkunga emunda muli, ci kuderha nti rhummuhè ecarhuma mwacîkuza erhi rhwe rhurhuma, lyo mubona oku mwashuza balya balimbira ebiboneka, babule bwalimbira ebiri omu murhima. 
\v 13 Akabà rhwahezize obukengêre Nyamuzinda orhumire\f + \fr 5, 13 \fr*\ft Hali abakâg’ilongôza Paolo mpu arhalusire olugero, mpu adwîrhe ajira nk’ogwêrhwe n’isirhe. Akabà ajizire nka muntu ohezire obukengêre, Nnâmahanga warhumaga ajira ntyo; n’aka obukengêre bwâge buli bugumaguma, bemêzi barholamwo obunguke. \ft*\f*, mwe kwabêra. 
\v 14 Nêci, buzigire bwa Kristu burhuminisire. Kwo rhugerêreza oku akabà muguma afirîre boshi, kuziga boshi banafîre. 
\v 15 Boshi anafirîre, mpu abalimwo omûka barhacicîbêreragamwogwo, ci babè olya wabafîraga anabafûkira ye bagubêreramwo.
\p
\v 16 Rhwêhe murhakacibona rhwamanyira omuntu ebwa mubiri, akaba rhwalimanyîre Kristu bunya-mubiri ci lero buno arhaciri kwo rhumumanyire. 
\v 17 N’omuntu erhi akabà ali muli Kristu, erhi anakola ali ciremwa cihyâhya; okwàli burhanzi kwahwîre, byoshi bikola bihyâhya. 
\v 18 Okwôla kwoshi, yo kurhenga emwa Nyamuzinda, owashubig’irhujira bîra bâge oku bulagizi bwa Kristu, anarhuhà obugo gw’okushubiza abandi omu bwîra bwâge. 
\v 19 Bulya Nyamuzinda yêne washubizagya igulu omu bwîra bwâge muli Kristu, erhi ayibagira obubî bw’abantu, n’erhi arhuheba ekanwa enderho z’okushubiza abandi omu bwîra bwâge. 
\v 20 Ntyo rhuli bajà-bugo ba kîrhu. Oku izîno lya Kristu, rhummuhûnyire, mwe mukasinga; shubiri omu bwîra bwa Nnâmahanga! 
\v 21 Orhali oyishi ecâha, amujira câha rhwe rhurhumire\f + \fr 5, 21 \fr*\ft Nnâmahanga abarhuzize Mwâmi Yezu obuhane bwoshi bw’ebyâha b’igulu.\ft*\f*, mpu lyo muli ye rhushuba bushinganyanya bwa Nyamuzinda.
\c 6
\p
\v 1 Na bulya ye rhudwîrhe rhwarhabâla, rhummuhûnyire nti murhalekaga e­nshôkano ya Nnâmahanga yagera busha. 
\v 2 Kulya kubà adesire, erhi\x - \xo 6, 2 \xo*\xt Iz 49, 8.\xt*\x*: \qt Omu mango gakwânîne nakuyumvîrhîze, n’omu lusiku lw’okucira nakurhabîre\qt*. Amango gakwânîne go gano, olusiku lw’okucira lwo luno. 
\v 3 Rhurhasârhaza ndi, nti lyo barhagayaguza obujà-bugo bwîrhu. 
\v 4 Ci omu ngasi kantu, kwo rhunaciyêrekana nka baganda ba Nyamuzinda: omu kuzibuhira bwenêne amalibuko, omu malumwa n’omu burhè; 
\v 5 omu kushûrhwa empîmbo, omu mpamikwa, omu bugome, omu mirhamo, omu kubula îrò, n’omu kubula ebiryo; 
\v 6 omu bucêse bw’omurhima, omu bumanye, omu kulembera amalibuko, omu butûdu, muli Mûka Mutagatîfu, n’omu buzigire bw’okunali; 
\v 7 omu luderho lw’okuli, n’omu buhashe bwa Nnâmahanga; omu kukolêsa amatumu gw’okufungira n’okulwîra obushinganyanya; 
\v 8 omu kukengwa n’omu kulolwa nka byâsi, omu kuderhwa kubî n’omu kuderhwa kwinjà; omu kujirwa ndyâlya, n’obwo rhurhaderha ebirhali by’okuli; 
\v 9 mpu barharhwîshi, obwo ntâye orhuhabire; mpu rhuli obufà, n’obwo rhuli mitaraga; mpu rhuli bahane, ci barhankarhuyîrha; 
\v 10 mpu rhuli burhè, n’obwo rhurhayôrha rhurhashagalusa; mpu rhuli ba buligo, n’obwo banji rhugaza; mpu rhurhagwêrhi kantu, n’obwo ntâco rhurhajira. Abakorinti nabo bayigule emirhima. 
\v 11 Ntà kantu rhummufulisire, wâni Bakorinti! Omurhima gwîrhu gwoshi guli mwigule! 
\v 12 Nanga! murhafundêriri emunda rhuli; ci omu mirhima yinyu mwo mufundêrîre. 
\v 13 Ninyu murhugalulirage! Kwo mmubwîzire nka kulya omuntu anabwîra abâna bâge: ninyu muyigule omurhima gwinyu gwoshi gwoshi!
\p
\v 14 Mumanye mwakashangîra mulindizo muguma n’abarhali bemêzi. Bici obushinganyanya bwankashangîra n’obubî? Nîsi buguma buci obumoleke bwankajira n’omwizimya? 
\v 15 Bwîra buci Kristu agwêrhe bona Beliyari\f + \fr 6, 15 \fr*\ft Beliyari ye Shetani.\ft*\f*? Nîsi bici omwemêzi ankashangîra n’orhali mwemêzi? 
\v 16 Aka-Nyamuzinda bici kankafundikira haguma n’enshusho\f + \fr 6, 16 \fr*\ft eidolos omu cigereki: «nshusho z’abazimu», kandi rhwanaderha nti «nshanga».\ft*\f* z’abazimu? Rhw’ono, nêci, rhwe rhuli nyumpa ya Nyamuzinda bici kankafundikira haguma n’enshusho z’abazimu? Rhw’ono, nêci; rhwe rhuli nyumpa ya Nyamuzinda ozîne, nk’oku Nnâmahanga aderhaga, erhi\x - \xo 6, 16 \xo*\xt Lub 29, 45.\xt*\x*: \qt Nabêra omu karhî kâbo nnankabagerageramwo\qt*. \qt Nâbà Nyamuzinda wâbo, nabo babè bantu bâni\qt*. 
\v 17 \qt Rhengagi ekarhî kâbo, munaciyegûle, kwo Nyakasane adesire\qt*. \qt Mumanye mwankahuma oku kantu karhacîri, nâni nammuyankirira\qt*. 
\v 18 \qt Nâbà nie sho, ninyu mubè bagala bâni na bâli bâni, ye kudesire Nyakasane ogala-byoshi\qt*.
\c 7
\p
\v 1 Obûla rhugwêrhe endagâno ya bene eyo, bîra bâni, rhucîkûlekwo ngasi izinga ly’omubiri erhi ly’omurhima, rhuyûkirize omukolo gw’okucîjira bimâna omu kurhînya Nnâmahanga. 
\v 2 Murhuyigulire emirhima yinyu! Ntâye rhwalenganyize, rhurhahombagya ndi, ntâye rhwalîre hyâge. 
\v 3 Ntadesiri ntyo nti mmuyagirize. Ka ntarhenzir’i­mmubwîra oku muli omu mirhima yîrhu omu kufà n’omu kulama! 
\v 4 Kurhali kunyi ncimmwikubagîre; mwe munali bukuze bwâni bunene. Omurhima gwâni gurhulwîre;, nyunjwîre bushagaluke omu malibuko gîrhu goshi.
\s1 Paolo e Macedoniya yo Tito amushiganaga
\p
\v 5 Bulyâla, erhi rhuhika e Macedoniya, rhurhaderhaga ciru mpu omubiri ogu gwamarhamûka. Ci ntâkwo rhurhalibukaga: embuga entambala, erhi nie ono, n’omu nda obwôba, erhi nie ono. 
\v 6 Ci Nyamuzinda orhûliriza abazamba arhurhûliriza omu kuyisha kwa Tito; 
\v 7 arhanali omu kuyisha kwâge mwône, ci n’omu burhûlirize abwîne ekarhî kinyu. Arhubwîzire olwifinjo lwinyu, oburhè muli, n’obushiru bwinyu kuli nie, na ntyo nasîma bwenêne kulusha.
\p
\v 8 Ciru akabà nammujizire burhè, n’amaruba gâni, ntagayiri; n’akabà nali ntanzir’igaya, -mbwîne oku ago maruba gàli gammujizire burhè, ciru akabà hyàli hisanzi hisungunu, - 
\v 9 buno nkola nsîmire, arhali okwenge mwâli burhè, ci kulya kubà obwo burhè bwarhumire mwacîyunjuza. Bulyâla oburhè mwâli bwa kuli Nyamuzinda, na ntyo ntà kantu kabî rhwammujirîre. 
\v 10 Nêci, oburhè bwa kuli Nyamuzinda, kulêrha bulêrha obucîyunjuze; ci oburhè bw’igulu bwôhe, lufù bulêrha. 
\v 11 Loli ninyu mwêne eci obwo burhè bwa kuli Nyamuzinda bwammudwîrhîre\f + \fr 7, 11 \fr*\ft Oburhè bwa kuli Nnâmahanga: Bulya buhane Abakorinti bahâga olya wagayisagya Paolo. Erhi babà bamamuhana, ahinduka mwinjà.\ft*\f*. Loli bukombêdu bunganaci! Arhanali hoshi aho. Loli kurhi mwacîngayire mpu mucîyêze! Loli burhè bunganaci! Loli bwôba bunganaci. Loli buhane bunganaci? Loli bushiru bunganaci. Muli ebyo byoshi mwayêrekîne oku muli bêru-kwêru mw’olwo lubanja. 
\v 12 N’akabà nammuyandikîre, arhali olya wagayisanyagya ye warhumire, arhanali olya bagayisagya\f + \fr 7, 12 \fr*\ft Olya bagayisagya: omuntu Paolo arhumaga e Korinti.\ft*\f*. Kwàli kuderha nti obukombêdu bwinyu kuli rhwe bubonekane embere za Nnâmahanga. 
\v 13 Okwôla kwo kwarhurhûlirize.
\p Okwo kurhûlirizibwa kwîrhu kwanacijakwo obusîme bulushire bwenêne, erhi rhubona Tito asîmire, bulyâla mweshi oku munali mwarhumire omurhima gwâge gwadêkerera. 
\v 14 N’akabà omu masù gâge hali oku nacisîmire erhi mwe murhuma, ntakubêraga nshonyi. Ci nka kulyâla rhwammubwîraga byoshi oku binali, ntyo kwo n’okucîsîma kwîrhu omu masù ga Tito kwayishirig’ibà kwa kunali. 
\v 15 N’obuzigire bwâge kuli mwe bukola bulushisize, akakengêra obumvi bwinyu mweshi, n’oku mwamuyankiriraga munayôbohire munadwîrhe mwageramwo omusisi. 
\v 16 Nsîmire obûla omu ngasi hyoshi nanacimwîkubagira mw’oyo.
\c 8
\ms1 II. Ensholôlo z’okurhabâla abemêzi b’e Yeruzalemu
\s1 Ecarhuma barhabâla
\p
\v 1 Rhulonzize okummumanyîsa, bene wîrhu, enshôkano Nyamuzinda àshobôzize Ekleziya z’e Macedoniya. 
\v 2 Omu malibuko manji babwîne, obushagaluke bwâbo bunene n’obukenyi bwâbo bunji byayunjulirîne, byahinduka buhirhi bwa kurhabâla abandi. 
\v 3 Nk’oku banali bahashire, niene mpanyire obwo buhamîrize, ciru na kurhalusa obuhashe bwâbo bwône, 
\v 4 bayish’irhuyinginga mpu rhubashobôze nabo enshôkano y’okushangîra ogwo mukolo gw’okurhabâla abatagatîfu\f + \fr 8, 4 \fr*\ft Abo batagatîfu, bo bakristu b e Yeruzalemu.\ft*\f*. 
\v 5 Balushîriza ciru aha rhwàli rhulangâlire là! Barhag’ijà aho, bacîhâna bône emwa Nyakasane, okubundi bacîhâna emwîrhu oku bulonza bwa Nnâmahanga. 
\v 6 Rhwanacihûna Tito obwo, nti obwôla ali amârho­ndêra ogwo mukolo gw’okurhabâlana aguyunjulize emwinyu. 
\v 7 Ci kulya mulushana muli byoshi: omu buyêmêre n’omu kumany’iderha, n’omu buzigire rhwammuyigîrizagya, ntyo kwo munalushanage na mw’okwo kurhabâla abandi. 
\v 8 Lirhali irhegeko mmuhîre ene nderha ntyo; ci kuderha nti mbè nkanarhangula erhi obuzigire bwinyu bunali bo omu kushîbirira abandi. 
\v 9 Murhahabiri enshôkano ya Nyakasane Yezu Kristu, oku ye wali mugale acîjiraga mukenyi mwe murhumire, mpu lyo obukenyi bwâge bummujira bahirhi. 
\v 10 Ihano kwône mmuhîre mw’okwo; okwôla kwo kunamukwânîne mwe mwarhondêraga ogo mukolo kurhenga mwâka injo. Arhanali kurhondêra okugujira kwône, ci n’okugulonza. 
\v 11 Nêci, ogwo mukolo muguyujuzagye, na ntyo kulyâla mwâli mubiduhire omu kulalira, kwo munashubig’ibiduha n’omu kujira, nk’oku munahashire. 
\v 12 Obulonza bukabiduha, eci omuntu agwêrhe co cinarhuma asîmwa, ci arhankadôsibwa eci arhagwêrhi. 
\v 13 Ntadesiri nti mukûle abandi olukoba emumiro, mucîhiremwolo, ci nti muyumanyanye. 
\v 14 Mw’okûla rhuli buno, ebimmulugîre birhabâle obukenyi bw’abinyu, lyo ebibalugîre nabo biyish’irhabâla obukenyi bw’abinyu, na ntyo muyumanyanye, 
\v 15 nka kulya biyandisirwe, mpu\f + \fr 8, 15 \fr*\ft \+xt Lub 16, 18\+xt*: Ebyo binwa biyêrekîre amâna, bene Israheli balyaga omu irungu.\ft*\f*: \qt Owali orhôzire binji birhamulugiraga, n’owali orhôzire, binyi birhamunyihiraga\qt*.
\s1 Entumwa Paolo ali arhumire e Korinti
\p
\v 16 Mushâna Nyamuzinda ayâgirwe! owahiraga obu bushiru kuli mwe omu murhima gwa Tito. 
\v 17 Ayumvîrhe izù lyâni. Ciru abà bushiru kulusha, ayishire emwinyu oku kulonza kwâge yêne. 
\v 18 Rhumurhumîre bo na mwene wîrhu muguma, olya irenge lyâge omu kulumîza Emyanzi y’Akalembe\f + \fr 8, 18 \fr*\ft Wabona Luka oyo adesire.\ft*\f* liderhwa omu Ekleziya zoshi. 
\v 19 Arhanali kwône okwo: acîshozirwe n’Ekleziya mpu anyôse rhukaz’ibalama rhwe naye mw’ogûla mukolo gw’enshôkano rhwacîhânyirekwo, lyo Nyakasane ajà irenge, lyo n’omurhima gwîrhu gurhûlûla. 
\v 20 Kulonza okwôla nti harhag’ijira owarhutumuza kw’ogûla mwandu gw’ebirugu barhubarhuzize. 
\v 21 Bulyâla rhulonza okujira aminjà, arhali omu masù ga Nyamuzinda mwône, ci n’embere z’abantu. 
\v 22 Rhubarhumîre bo n’olya mwene wîrhu\f + \fr 8, 22 \fr*\ft Oyo «mwene wîrhu» rhurhishi ye ndi; Paolo arhamudesiri izîno.\ft*\f* warhuyêresire kanji kanji oku anabà mukombêdu, na buno acîyêrekîne wa bushiru kulusha bulya acimmwîkubagire bwenêne. 
\v 23 Tito yêhe ye wîrhu rhubà rhwe naye, ye nantabâla oku mukolo ekarhî kinyu. Abandi bene wîrhu, Ekleziya zibarhumire, bali irenge lya Kristu. 
\v 24 Embere z’Ekleziya mubayêreke oku obuzigire bwinyu bunali bo, n’oku obwîkubagire rhummugwêrhemwo burhali bwa busha.
\c 9
\p
\v 1 Nago ogôla mukolo w’okurhabâla abatagatîfu, ntacirhamya nti na­mmuyandikira kuli go. 
\v 2 Bulya ntahabiri oku mubiduha, mwe ncitakîra e Macedoniya, nti: «Akaya yôhe ecirheganyize kurhenga mwâk’injo». N’obushiru bwinyu bwatuzire banji. 
\v 3 Mmurhumirage obwôla bene wîrhu, nti lyo okwo kulimba rhummulimbamwo kurhag’ibà ntâko muli okwo, lyo munabà mucîrheganyize nk’oku naderhaga, 
\v 4 erhi ab’e Macedoniya bankayisha bandusize, barhag’ishanga murhacirheganyizi, enshonyi zirhugwârhe -ntag’iderha nti mwe- muli obwôla bulangâlire. 
\v 5 Omurhima gwambwîraga obwo mpu kukwânîne ntume bene wîrhu banshokolere emwinyu, barheganye erya nsholôlo yinyu mwalaganyagya, eyôrhe eri nteganye, -enabè nsholôlo y’okuli, ci karhabaga kantu ka bujinisi.
\s1 Nyamuzinda azigira ohâna anashagalusire
\p
\v 6 Kengêri: orhwêra binyi, binyi anasarûla; n’orhwêra binji, binji, anasarûla. 
\v 7 Ngasi muguma ahâne nk’oku omurhima gwâge gunamubwîzire; arhahânaga nk’oli burhè, nîsi erhi nk’osêzîbwe; bulya Nyamuzinda azigira ohâna anashagalusire\x - \xo 9, 7 \xo*\xt Mig 22, 8.\xt*\x*. 
\v 8 Câba Nyamuzinda anahash’immushobôza enshôkano za ngasi lubero, lyo mubona ebi mmukwânîne muli byoshi na ngasi mango, mubul’isigaza ebi mwajiramwo ngasi mukolo mwinjà. 
\v 9 Ntyo kwo biyandisirwe, mpu\x - \xo 9, 9 \xo*\xt Mig 22, 9; \xt*\xt Lul 112(111), 9|link-href="PSA 112:9."\xt*\x*: \qt Agabire aminjà gâge, ashobôza abakenyi; obushinganyanya bwâge buli bw’ensiku n’amango\qt*.
\p
\v 10 Olyâla ohà omuhinzi emburho n’omugati alya, ammuhà ninyu emburho erhali nyi, anayiluze, anammuyûshulire amalehe g’obushinganyanya bwinyu. 
\v 11 Ntâho murhacigalira obwo, munakolaga mwâbona oku mwankarhabâla abà­ndi omu ngasi kantu, na ntyo Nyamuzinda avugwe omunkwa oku bulagizi bwîrhu. 
\v 12 Bulyâla ogwo mukolo Mutagatîfu kurhali kurhabâla kwône gurhabâla abatagatîfu omu bulagîrire bwâbo, ci ciru gurhuma bavuga Nyamuzinda omunkwa bwenêne. 
\v 13 Oburhabâle bwinyu bukolaga bwâbazibûla amasù, bagashânize Nnâmahanga, kulya kubà mwayêmîre okuyêrekana Emyanzi y’Akalembe ya Kristu buzira kuyibêra nshonyi, na bulya murhajiraga bujinisi omu kubarhabâla n’omu kurhabâla boshi. 
\v 14 N’okushenga bammushengera kuyêrekîne oku bwenêne bammurhonya, bulyâla enshôkano Nnâmahanga ammushobôzize eri nyinji bwenêne. 
\v 15 Nyamuzinda akonkwa oku nshôkano yâge erhankaderhwa!
\c 10
\ms1 III. Paolo ashuza balya bâli bamushobesire
\s1 Paolo arhabà ngonyi
\p
\v 1 Niehe Paolo mmuhûnyire, mwe mukasinga, obutûdu n’obwinjà bwa Kristu burhumire, nie erya ngonyi nka ndi embere zinyu, na nka ntammuliho nshube ntwâli. 
\v 2 Mmuhunyirage, mwe mukasinga, hano mpika eyo munda, ntarhengagamwo bulya burhwâli abagerêreza mpu mubiri gurhuhêka bacikêbwa mpu mbamwo. 
\v 3 Omu mubiri rhubà, nêci, ci rhurhalwa kwa mubiri. 
\v 4 Nanga, amatumu rhulwamwo garhali ga bunya-mubiri, ci oku buzibu bwa Nyamuzinda gagwêrhe obuhashe bw’okuhongola ebishagala by’entambala by’abashombanyi. Emirâli rhwe rhuyitwamwo, 
\v 5 na ngasi bucîbone buderha mpu bwacîgererakwo okumanya Nyamuzinda, na ngasi bukengêre rhubugwârha mpira nti bushige Kristu. 
\v 6 Na hano obumvi bwinyu bubà bwimâna, rhulingûzize okuhana ngasi yêshi waciderhe mpu arhenguha.
\p
\v 7 Okuli mûshi murhakubishaga! Ocîkubagire mpu ali wa Kristu, ashub’icija emurhima, amanye oku ali wa Kristu kwo nîrhu rhuli bâge. 
\v 8 Bulya, ciru obwo buhashe bwîrhu nankabulimbira okurhalusire olugero hitya, obwo buhashe Nyakasane àrhuhâga mpu rhummuyûbakemwo mwoyo, arhali mpu rhummushâbemwo ntankabubêra nshonyi. 
\v 9 Bulyâla ntalonzizi mumanye mpu kummuyôbohya nnonza okummuyôbohya n’amaruba gâni. 
\v 10 «Amaruba gâge, kwo baderha, gali ga bulume ganali makali; ci erhi wankamubona yêne, ngonyi, n’iderha lyâge liri ntâlyo»; 
\v 11 Olimw’okwo kwa bene okwo, amanye oku oku rhuyôrha omu iderha ly’amaruba gîrhu nka rhurhahali, kwo rhwanayish’iyôrha omu bijiro bîrhu hano rhubà rhukola rhuli ekarhî kinyu.
\s1 Paolo arhabà mucibonyi
\p
\v 12 Rhurhadesiri nti rhucihiremwo oburhwâli bw’okucîyumanyanya nîsi erhi obw’okucîgererakwo balya bacikunga bône. Ci omu kucîkunga bône n’omu kucîshushanya bône na nnene, ntà bukengêre! 
\v 13 Rhwêhe rhurhacîkuza kurhaluka olugero\f + \fr 10, 13 \fr*\ft Olugè lw’omukolo gw’obugo bwa Paolo, liri igulu lyoshi. Muli okwo ntâye wankaderha mpu acigerera kuli ye.\ft*\f*, ci olugero Nyamuzinda arhugereragamwo erhi arhuhisa emwinyu, lwo rhwanacîgereramwo. 
\v 14 Rhurhanagandâzizi okurhalusire olugero lwîrhu, nka kulya rhurhali rhushubig’ihika emwinyu; ci rhwammuhisireho erhi rhummudwîrhîre Emyanzi y’Akalembe ka Kristu. 
\v 15 Rhurharhalusire olugero n’okucîkungira emirimo ya bene, ci rhucîkubagîre oku, omu kuyûshûka emunda muli buzira kurhalusa olugero lwîrhu, 
\v 16 rhunalangâlîre okuhisa Emyanzi y’Akalembe omu zindi ntambi kurhaluka emwinyu, ahâli h’okulimbira emikolo mikole omu kwa bene. 
\v 17 Owalonza obukuze\f + \fr 10, 17 \fr*\ft Owalonza obukuze…: \+xt Yer 9, 22-23; 1 Kor 1, 31\+xt*.\ft*\f*, abulongeze muli Nyakasane! 
\v 18 Bulya arhali ocîkunga yêne ye gera, ci oyu Nyakasane akunga.
\c 11
\s1 Paolo asêzîbwe okucîkuza yêne
\p
\v 1 Acibâga mwankanzigira nasirâha hitya! Câba nêci mwandembera 
\v 2 Bulyâla okuyâgala munyâgîre kuli kuyâgalwa kwa Nyamuzinda. Kulya kubà nammuhîre mulume muguma yênene, nka mwâna w’obunyere orhashubig’ihumwakwo w’okuyêreka Kristu. 
\v 3 Ci kwône nyôbohire bwenêne nti e­nkengêro zinyu zakasherêra zinacîkûle omu bwimâna bwa Kristu, nka kulyâla enjoka yarhebaga Eva n’obwenguhuza bwâyo. 
\v 4 Bulyâla erhi hankajira owayish’immuyigîriza owundi Kristu okuleka olya rhwammuyigîrizagya, erhi kwa­nkaba kuhâbwa owundi Mûka okuleka olya mwahâbagwa, nîsi erhi yindi Myanzi y’Akalernbe okuleka erya mwayankiriraga, murhankabula bwayêmêra! 
\v 5 N’obwo ncîkêbirwe nti ezo «ntumwa nkulu» ntâco zindushire! 
\v 6 N’akabà ntà bulenga bw’e kanwa njira, obumanye bwoki ntabuziri muli byoshi n’embere za boshi rhwammuyêresirekwo.
\p
\v 7 Ka kubîha nabîhirage erhi nyunama nti mmulengeze, mmuyigîriza Emyanzi y’Akalembe ka Nnâmahanga buzira kuhûna kantu? 
\v 8 Zindi Ekleziya nanyazire, zo zampîre oburhabâle oku mukolo gwâni ekarhî kinyu. 
\v 9 N’obwôla nali emwinyu ntanagwêrhi cici, ntazidoheraga ndi; bene wîrhu bàhubukaga e Macedoniya bo bampîre ebi nal’indagîrirekwo. Muli byoshi nacîlanga nti ntag’immuzidohera, nanacicîlanga. 
\v 10 Okuli kwa Kristu kundimwo kwo ndahîre: ako kalimbiriro kâni ntâye wankakankulamwo omu cihugo c’Akaya! 
\v 11 Bulya kurhi? Ka mpu bulya ntammuzigira? Nyamuzinda yêne amanyire!
\p
\v 12 Oku nyôrha njira, nashub’ikakujira, lyo mbatwîra omu myanzi balya bakaz’ilonza aha bankalimbira mpu bayumanana nîrhu. 
\v 13 Bulya abantu ba bene bo liri irumbi mpu ntumwa, bakozi endyâlya bakâg’irhebana mpu ntumwa za Kristu. 
\v 14 N’okwo kurhankasomeza ndi; bulya Shetani naye anacîyôze nka malahika wa bumoleke. 
\v 15 Kuziga kurhali kudârhi abaganda bâge nabo bacîyôze nka ntumwa za bushinganyanya. Ci obuzinda bwâbo kwo nabo bwanabà ak’ebijiro byâbo.
\p
\v 16 Nashub’iderha là: harhabaga owamanya mpu ngwêrhwe n’isirhe. Na mukakuderha, yêmêragi mbè musirhe, lyo nâni mbà nka nacîkunga hitya. 
\v 17 Oku nkola naderha, ntakuderhe oku bwa Nyakasane, ci nka kula omusirhe anabà, erhi nnamanyire bwinjà oku ngwêrhe ebyankalimbirwa. 
\v 18 Kulya kubà bandi banji bacîkunga kwa mubiri, ka nâni ntang’icîkunga! 
\v 19 Mwe benge, murhahugûga amadâga mubà mweshi! 
\v 20 Nêci, banammujire bajà, munacihumbire; bakammulya babishi, munacihulikire; banammunyage, ba­mmugayaguze, ammuhè ciru n’omulimba omu irhama, murhanahinye. 
\v 21 Nkudesire nti lyo enshonyi zimmugwârha. Nkaba kwo mumanya mpu rhurhali balume!
\p Ci ngasi eci balimbira coshi, -ka nkuderhe nk’ogwêrhwe n’isirhe, - nâni, nanacîrimbira. 
\v 22 Bali Bayahudi, nâni ndi wundi! Bali b’oku nkomoka y’Abrahamu; ci nâni! 
\v 23 Bali Baganda ba Kristu, -lêro nkola naderha nka musirhe, ­ -nie ono mbalushire! Mbalushire omu kuluza emikolo, omu kushwêkwa kanji-kanji omu kushûrhwa okurhalusize olugero. Kanga nalinzir’ifà? 
\v 24 Karhanu koshi nashûrhwa n’Abayahudi erya mikoba makumi asharhu na mwenda. 
\v 25 E­mpindo nazishûsirwe kasharhu; nabandwa amabuye liguma; nazika omu nyanja kasharhu; nashinga mulegerere muguma na budufu buguma omu ndalâlà y’enyanja. 
\v 26 Kanji-kanji erhi omu njira ndi; enyîshi zampusha; nalinz’igwa omu bishumûsi; nalinz’iyîrhwa n’ab’emwîrhu; abapagani bampusha; nalinz’ifira omu cishagala; omu irungu niene niene; enyanja yalinz’impêka; nalinz’iyîrhwa n’endyâla mpu bene wîrhu. 
\v 27 mbalushire omu kukola n’omu kurhama; kanji-kanji nalazire ntanahebiri olugohe oku lundi; ishali n’enyôrha, okucîshalisa kanji-kanji, okukayûla n’okubula eci nacibwîka. 
\v 28 Ntadesiri n’ebindi… Ngasi lusiku erhi omurhima gukangalire erhi Ekleziya zoshi zirhuma. 
\v 29 Ndi ôbà ngonyi, nkanabula bwagonyâla nâni? Ndi ohirima, nkanabula bwayumva mbabîre bwenêne?
\p
\v 30 Akabâga kwo bàdesire mpu rhucîkuze, niehe buzamba bwâni nalimbira. 
\v 31 Nyamuzinda n’Îshe wa Nnawîrhu Yezu -olya okayagirwa ensiku n’amango! - arhahabiri oku ntanywerha. 
\v 32 E Damasi, omurhambo wa mwâmi Areta àrhegeka mpu balange olugo lw’e Damasi lyo bangwârha. 
\v 33 Omu cirhimbiri bampebire, bacigeza aha kabonezo, banyandagaza oku lukûta, na ntyo namufulumuka omu nfune.
\c 12
\p
\v 1 Akabà kukwânîne rhucîkuze, -ci kunali kurhamira busha.- nkolaga naderha n’oku Nyakasane ambonekeraga n’ebi ambishûlîre. 
\v 2 Nyîshi omuntu muli Kristu hamagera myâka ikumi n’ini. Oyo muntu, -erhi ali ahêsire omubiri, ntishi erhi agusiga ntishi, Nyamuzinda yêne amanyire, - erhi bamuzirundukana omu malunga, bamuhisa omu irunga lya kasharhu. 
\v 3 Nyîshi oku oyo muntu, erhi ali ahêsire omubiri, ntishi, agusga, ntishi, Nyamuzinda yêne amanyire, - 
\v 4 bamuzurundukîne omu paradizo, ayumva ebinwa birhankaderhwa; ebi ayumvîrhe omuntu arhayêmêrîrwi okubiderha. 
\v 5 Oyo muntu, nêci, nanamulimbira; ci nie niehe ntankalimbira oburhali buzamba bwâni. 
\v 6 Ncilonzagya okucîkuza, lirhankabire isirhe; bulya ntankadesire ebirhali by’o­kuli. Ci nalekeraga aho, hakanajira owacinyikebwa mukulu kulusha oku abwîne ndi, nîsi erhi oku ayumva naderha.
\p
\v 7 Lyo n’obukulu bw’ebyo banfulûliraga burhag’irhuma nacîbona, bampeba akababo omu mubiri, kali nka ntumwa ya Shetani ekaz’intimba ebifundo. 
\v 8 Namahûna Nyakasane kasharhu erhi okwôla kurhuma, nti amuntenzekwo. 
\v 9 Naye ambwîra, erhi: «Enshôkano yâni erhakunyihiri; bulya obuhashe bwâni omu buzamba mwo bucîyerekana». Nkolaga nsîmire okulimbira obuzamba bwâni, lyo obuhashe bwa Kristu bumbêramwo. 
\v 10 Okwôla kwo kurhuma nyumva nsîmire omu buzamba bwâni, omu bijâci, omu malibuko, omu kurhi­ ndibuzibwa n’omu burhè, erhi Kristu orhuma. Bulya amango ndi muzamba, lyo mbà muzibu! 
\v 11 Ka ntashubirage musirhe! Mwe mwanarhumire. Kali singa mwe mwâli gwâsirwe okunkunga! Bulya ntâco ndushirwe n’abo bali ntumwa nkulu, ciru nkaba ntali cici. 
\v 12 Ebiyêrekana oku ndi ntumwa, mwabibwîne ekarhî kinyu: okulembera ngasi malibuko, ebimanyîso, ebisômerîne n’ebirhangâzo. 
\v 13 Ezindi Ekleziya cici zahâbirwe murhahâbagwa, aha nyuma ly’okubà nie ono ntammuzidoheraga? Mumbabalire okwôla kubîha nammubîhîre! 
\v 14 Bukola bwa kasharhu obu ncîrheganyize okujà emwinyu, ntanammuzidohere. Arhali abâna bo bagwâsirwe babîkire ababusi. Ci ababusi bo babîkira abâna bâbo. 
\v 15 Niehe nnonzize okuhâna byoshi n’okucîhâna niene nieshi-nieshi erhi mwe murhuma. Obûla mmuzigire kulusha, ka kukwânîne munzigire kunyi? 
\v 16 Erhi «Kubage!» nie ono ntammuzidoheraga; ci kulya kubà nali mwengûza, nammugwârhira omu bwenge\f + \fr 12, 16 \fr*\ft Eryo iderha lyàli lya bashombanyi ba Paolo.\ft*\f*. 
\v 17 Ewe, k’abanarhumaga emwinyu bâli­ mwo muguma warhumire nammuyungukirakwo? 
\v 18 Nayinginga Tito, nanamurhuma bo n’olya mwene wîrhu\x - \xo 12, 18 \xo*\xta Lolà \xta*\xt 2 Kor 8, 18-22.\xt*\x*. Ka Tito ammuyungukirekwo? K’arhali njira nguma rhwalimwo, muguma akula okugula aha, owundi akuhebe ho?
\s1 Paolo ayôbohire okurhimâna Abakorinti omu mabî
\p
\v 19 Kurhenga mîra mucîkêbwa mpu kusamba rhusamba embere zinyu! E­mbêre za Nnâmahanga rhuderhera muli Kristu. Ebyo byoshi, bene wîrhu, kuderha nti mujè embere. 
\v 20 Bulya nyôbohire nti nkaba hano nyisha, arhali oku nnonzize mubè kwo nashanga muyôsire; nti ninyu mwakanashanga nyôsire oku murhalonzizi mbè; nti nakanashanga mulimwo ennongwè, obwâgalwa, omungo, orhudali, okuderherana kubî, okuhûranana, obucîbone n’akavuli­ndi. 
\v 21 Nyôbohire nti amango nashubira eyo, Nyamwagirwa Nyamuzinda akanambonêsa enshonyi embere zinyu, nti hakanajira banji nalakira bajizire ebyâha, banabula bwacîyunjuza oku bijiro byâbo by’okubî, by’okuhusha n’e­by’okukala enshonyi.
\c 13
\p
\v 1 Bukola bwa kasharhu obûla njà emwinyu. Ngasi lubanja lukatubwa oku cinwa ca bahamîrizi babiri erhi basharhu\f + \fr 13, 1 \fr*\ft Bahamîrizi babiri erhi basharhu: \+xt Lush 1, 15\+xt*.\ft*\f*. 
\v 2 Nakubwîzire balya bajizire ebyâha burhanzi, nakubwîra n’abandi boshi, nnabà nanashub’ikuderha kandi ene ntabalimwo, nka kulya najiraga erhi ndi eyo obwa kabiri: nkashubira eyo, lêro ntâbe bwonjo. 
\v 3 Nkabaga mulonzize mubone oku Kristu odwîrhe aderhera omu kanwa kâni? Yêhe erhabà ngonyi embere zinyu, ci ajira obuhashe muli mwe. 
\v 4 Abambiragwa oku musalaba erhi kugonyâla\f + \fr 13, 4 \fr*\ft Kugonyâla: kugonyohala.\ft*\f* kurhuma, ci azîne oku buhashe bwa Nyamuzinda. Na nîrhu, rhuli ngonyi muli ye, nêci, ci rhwayish’iyôrha rhuzîne haguma naye oku buhashe bwa Nyamuzinda muli mwe.
\p
\v 5 Ninyu mwene mubage nka mwagerêreza, mulole erhi munali omu buyêmêre; mucîrhangule mwene. Ka ninyu mwene murhamanyiri oku Yezu Kristu ammulimwo? Nkaba abage erhi muli mihera! 
\v 6 Ahâli nkaba mwamanya oku rhwêhe rhurhali mihera! 
\v 7 Rhudwîrhe rhwashenga Nnâmahanga ammurhabâle murhajiraga okubî; arhali kuderha nti lyo babona oku rhuyâzize, ci kuderha nti lyo mw’oyo mujira okwinjà, rhubè rhwe rhuyâga. 
\v 8 Bulyâla rhurhagwêrhi buhashe bwa kulwîsa okuli, ci bwa kulwîra okuli bwône rhujira. 
\v 9 Nêci, rhusîma rhw’ono rhubè ngonyi\f + \fr 13, 9 \fr*\ft Abakorinti babà bazibu olugendo lwâbo lukaba lwimâna, Paolo anabà ngonyi obwo, bulya arhacigwêrhi igwârhiro ly’okukolêsa obuhashe bwâge, na ntyo anayâga.\ft*\f*, ninyu mubè bazibu. Kwo rhunashenga omu nsengero zîrhu okwo: nti mushube bimâna. 
\v 10 Co cirhumire nayandika nnandi kuli eco, nti lyo hano mbà nkola mmuliho, ntag’ikaliha omu buhashe Nyakasane a­mpâga mpu nyûbake, ci arhali mpu nshabe.
\ms1 Enfundiko
\s1 Amahano. Omusingo. Obwangà
\p
\v 11 Ntyo, bene wîrhu, mushagaluke, mucîsêze okubà bimâna, muhânane omurhima, muyumvanye, mubè n’omurhûla, na Nyamuzinda w’omurhûla abà ninyu. 
\v 12 Mulamusanye n’ehinunugurho hitagatîfu. Abatagatîfu boshi ba­ mmulamusize. 
\v 13 Enshôkano ya Nyakasane Yezu Kristu, n’obuzigire bwa Nyamuzinda, n’omulungano gwa Mûka Mutagatîfu bibè ninyu mweshi!