\id PHP Sakachep: Bible Translation 1st Edition
\ide UTF-8
\ide Unicode (UTF8)
\h Philipi Mingei
\toc1 PHILIPI Mingei kôma Paul Lekhamuthuon
\toc2 Philipi
\toc3 Phili
\mt1 PHILIPI
\mt2 Mingei Kôma Paul Lekhamuthuon
\imt1 Chongmaruoi
\ip \bk Philipi mingei kôma Tîrton Paul Lekhamuthuon\bk* hih European rama Roman ramhuola Macedonia sunga Paul'n koiindang a phun masatak kôma miziek ani. Mahi tîrton intâng ina aom lâitak le Khristien sinthopu dang ngeiin ama an doina, ama khom bâiinkhama a om lâia le Philipi koiindanga khom minchûna dikloingei sika an beidong lâitaka miziek ani. Hankhoma hi lekhamuthuon hin Paul'n Jisua Khrista taksônna inthûktak vaiin kêng phûksânin râisânna le ngamriemna a rilminthâr thei ani.
\ip Hi lekhamuthuon a miziek ânrangna abi chu san anâng zora ama ranga neinunpêk an muthuon sika Philippia Khristienngei kôm râisânchongrilna ranga ani. A bâiinkhamna le an bâiinkhamna kâra khom hâina le ngamna an dôn theina rangin zorânchum hih anningei mindet nôknân a mang ani. Ranghuolna rokin le inpâkna jêka an om nêkin chu Jisua rangâiinchîna mulungrîl dôn rang a misîrpui ngei ani. Khrista leh inzoma an ringna hah Pathien lungkhamna neinunpêk, Judangei Balam tho ngâi balamngei an jôm sika an man niloiin, taksônna sika an man ani, ti hih a minriet nôk ngei ani. Khrista leh inzoma ringngei kai chu Pathien'n râisânna le inngêina a pêk ngâi tiin a miziek ani.
\ip Hi lekhamuthuon hih Khristien ringnuna taksônna, râisânna, ngamna, inruolna le doirâtnangei alieka minlut uolin sîn atho ani. Philipi koiindangngei ta ranga Paul moroina inthûk tie khom a minlang sa ani.
\is1 Asûnga chongtângpuingei
\io1 Chongmaruoi \ior 1:1-11 \ior*
\io1 Paul Misang Chungroi \ior 1:12-26 \ior*
\io1 Khrista taka ringna \ior 1:27—2:18 \ior*
\io1 Timothy le Epaphroditus ranga mintuona \ior 2:19-30 \ior*
\io1 Râlngei le chiruoingei renga inningnangei chong \ior 3:1—4:9 \ior*
\io1 Paul le Philipi taka a malngei \ior 4:10-20\ior*
\io1 Chongkhârna \ior 4:21-23 \ior*
\c 1
\p
\v 1 Paul le Timothy, Khrista Jisua tîrlâmngei renga,
\p Philipi khopuiliena Pathien mi Khrista Jisua taka inruol ngei, le koiindang ruoipungei le sintho sanpungei:\x - \xo 1:1: \xo*\xt Sin 16:12\xt*\x* 
\v 2 Pathien, ei Pa le Pumapa Jisua Khrista'n moroina le inngêina nangni pêk rese.
\s Aporepungei ta ranga Paul chubaithona
\p
\v 3 Nangni ki mindon racham ka Pathien kôm râisânchong ki mintung ngâia; 
\v 4 nin rênga rangin chubai ko tho zora racham, kên zongna ngeia mulung râisânin asip ngâi ania 
\v 5 asikchu sûn motontak renga atûntena thurchisa phuong minzar sinthona hin mi nin la thop tit sikin. 
\v 6 Male nangma taka sin sa, Pathien'n nang a phutpui anghan, Khrista Jisua Nikhuo, nikhuo mongni dênin nang ruoi tit atih, tiin khom ki iempam ani. 
\v 7 Ku mulunga nin om tit ngâia! Hi anga nin chungroia adiktaka ki mindon rang piel khom ani. Atûna intâng ina ko om sûngin le thurchisa rung rang le adettaka ki minding lâi ngei han khom Pathien mi pêk zora sa ngei khom nin chang sa. 
\v 8 Ku mulungrîl tataka nangni ki ti ngei hih khom Jisua Khrista mulung renga nanâk ani, ti hih Pathien hih rietpuipu ani.
\p
\v 9 Nin lungkhamna hah, rietna diktak le roijêkna diktak leh ahong pung u-uol theina rangin chubai ko tho ngâi, 
\v 10 masikin asatna nin thang thei ani. Hanchu, Khrista Nikhuoa han inthieng le demnaboi hongni nin tih. 
\v 11 Jisua Khrista vaiin a pêk thei, nin ringna hah satna diktakin nangni minsip atih, Pathien roiinpuina rang le minpâkna rangin.
\s Khrista ranga ring
\p
\v 12 Ku sûngsuokngei, ku chunga neinun hongtung ngei hah thurchisa minzarna taka mi san tatak ani ti nin riet rang ku nuom. 
\v 13 Khrista tîrlâm ki ni sikin intâng ina minkhum ti hih munpui rungpungei nâm le midang hitaka om ngei nâmin an riet zoi\x - \xo 1:13: \xo*\xt Sin 28:30\xt*\x* 
\v 14 Male intâng ina kên tâng sika ei khristien champui tamtak ngeiin Pumapa taka phûkdâiin an oma, an ngam teteta chiloi riekin Pathien thurchi\f + \fr 1:14: \fr*\fq Thurchi \fq*\ft ti hih miziek senkhat ngei chu \ft*\fq Pathien thurchi \fq*\ft tiin an dôn\ft*\f* an misîr zoi.
\p
\v 15 Ani, senkhatin chu Khrista thurchi hih keima mi narsana sika le mi makhalna sikin an misîra, aniatachu adangngeiin chu mulungbôk diktakin an misîr ngâi. 
\v 16 Hi ngei hin chu thurchisa muphuong rang piela Pathien'n sintum mi pêk ani ti rietpumin, lungkhamna sika misîr ngâi an ni. 
\v 17 Senkhat ngeiin chu Khrista thurchi hih, ranghuolna mulungbôk ratha mangin, jêlina ko om sûngin mi minjêl sabak rangin an mindon ani.
\p
\v 18 Hannisenla ite injêl mak! asikchu, asa khomin, asie khomin, ikhomnirese Khrista thurchi an misîr sikin ka râiasân ani. Ma angdên han râiminsân tit ki tih, 
\v 19 nin chubaithona sika le Jisua Khrista renga Ratha sanna sikin mojôkin la om ki tih, ti ki riet ani. 
\v 20 Masikin ko ôina inthûktak le sabeina chu ki sintum châi tet loiin, aliekin atûn lâitak le zoratina khom hâina sipin ko om theia, ringna nirse, thina nirse, ka takpumpui leh Khrista kôm miritna ki mintung theina rangin. 
\v 21 Aring hih imo ania? Ka ta rangin chu Khrista ani. Hanchu, thi hih inlâpna mintung uol atih. 
\v 22 Aniatachu ka la ringin chu chuonsin kâmom la sin uol thei ki tih, aniatachu kho tak hi mo ka thang rang riet thei mu-ung. 
\v 23 Kâng inikin kaiphirînin ko om ani. Hi ringnun hih mâkin Khrista leh om ta rong chu ko jôt tataka, ma neinun ha asa uol ok ani; 
\v 24 aniatachu nangni jâra aringa ka la om hi kâmnâng uol ok ani. 
\v 25 Mahi tak ko sônchêt sikin ka la om rang ti ki rieta, nin taksônna han masônna le râisânna nangni bôk pe rangin nin rênga nin kôm ka la om bang rang, 
\v 26 masikin nin kôm ko hong tika, Khrista leh inzoma ring nin ni, tiin mi nin minpâkna abi nin dôn uol theina rang ani.
\p
\v 27 Atûna, nin ringnunna neinun kâmnâng tak chu Khrista thurchisa'n anânglam angtak hah nîng atih, masikin nangni ko hong en theiin khom, en theiloiin khoma, thurchisa taksônna rangin neinunkhîn munkhat le ôina munkhata inding deta doi nin ni, tiin lei riet thei ki tih. 
\v 28 Nin râlngei chi no ungla; zoratin hâitakin om roi, male mahi an ta rangin dokna rang ani tiin minlangna nîng a ta, nin rât rang ania, mahi Pathien'n menêna nangni pêk sikin ani. 
\v 29 Khrista sin tho ranga zora sa pêkin nin oma, ama nin iem vai niloiin, tuongsa rang khom phal nin ni. 
\v 30 \x - \xo 1:30: \xo*\xt Sin 16:19-40\xt*\x* Atûn indoina takah ko kôm nin kop thei zoi. Zora vunsaia indoina kên doipui nin mu ngâi angdên ha, atûn tena khom ka lân doipui bang nin riet anghan.
\c 2
\s Khrista rangâiinchîna le inlalna
\p
\v 1 Khrista taka nin ringna han nangni a min râta, male a lungkhamna han nin ratha a minngama. Ratha\f + \fr 2:1: \fr*\fq Ratha leh inlopkhômna nin dôna; \fq*\ft aninônchu \ft*\fq Ratha han inkhat le inkhat inlopkhômna han nangni a hong tuong.\fq*\f* leh inlopkhômna nin dôna, inkhat le inkhat inriengmuna le inkan inlômna nin dôn ani. 
\v 2 Hanchu mindona munkhat dônin, lungkhamna munkhata insem suom rangin, mulungrîl le ratha munkhata omin ka râisânna mikhipphar rangin nangni ke ngên ani. 
\v 3 Ranghuolna oîna renga aninônchu insongna ôinangei renga ite sin no ungla, inkhat le inkhat chunga rangâiinchîna dônin zoratin nangni nanâk nêkin mi dangngei asa uolin be roi. 
\v 4 Male nangni nin nuomlam vai en loiin mi dangngei an nuomlam khom en sa roi. 
\v 5 Hi mulungbôk nin dôn rang hih Khrista Jisua'n a dôn hah ani:
\q1
\v 6 Ama chu zoratin Pathien nina a dôna,
\q2 aniatachu rangrâtin Pathien leh inangbanga ombang\f + \fr 2:6: \fr*\fq ombang; \fq*\ft aninônchu \ft*\fq hongni.\fq*\f* rangin pût rang mindon mak.
\q1
\v 7 Hima nêkin, ama lungdôn a dônngei murdi a mâk rieia,
\q2 male tîrlâm nina hah a lâk zoi.
\q1 Miriem angin a juong oma
\q2 male miriem mêl angin ânlang zoi.
\q1
\v 8 Ama chu rangâiinchînin chongjômna lampuia a lôna, thina lampuingei dênrakin,
\q2 khros chunga a thina hah.
\q1
\v 9 Masika han Pathien'n ama chu mun insângtak chunga a domsânga
\q2 male riming dang dangngei nêkin riming inchungtak a pêk zoi.
\q1
\v 10 \x - \xo 2:10,11: \xo*\xt Isa 45:23 (LXX)\xt*\x*Masikin, Jisua riming miritnân
\q2 invâna omngei murdi, pilchunga omngei, le rammuol nuoia omngei\f + \fr 2:10: \fr*\fk rammuol nuoia: \fk*\ft Ajîngna nuoia rammuola han mithi ngei ha an la ring bang rangin mindon ani.\ft*\f*
\q2 khûk an inbilna rangin,
\q1
\v 11 male mitinin Jisua Khrista hih Pumapa ani tiin ânlangin
\q2 Pa, Pathien roiinpuina rangin phuong an tih.
\s Vârngei anghan rammuola vâr rang
\p
\v 12 Masikin, ruol moroitakngei, nin kôm ko om lâia zoratin ko chong nin don ngâi anghan, atûn nin kôm ko om loi kâr hin vâng chu nin don uol rang anâng ani. Chi le innîk pumin nin sanminringna minzoi rangin sintho tit ungla, 
\v 13 a neinunkhîn nin jôm theina rang le nin sin nuomna rangin Pathien'n zoratin nin sûnga sin a tho sikin. 
\v 14 Neinuntin chierna le inkhalna boiin tho roi, 
\v 15 \x - \xo 2:15: \xo*\xt Bal 32:5\xt*\x* han kêng hi rammuola mi nunsiengei le murûkmeret tho ngei lâia Pathien nâi diktak, sietnaboi le inthienghieia om anghan nin ni duoi thei, ârsingeiin invân an êlminvâr angin an lâia nin vâr ngêt rang, 
\v 16 an kôm ringna chongbe nin pêk ngei anghan. Ha anghan nin thôn chu, Khrista Nikhuo han ke dengtheina le sinthona ngei murdi mâkana chang mak, tiin minlang theiin nangni minpâk theina rang abi dôn thei ki tih. 
\v 17 Ani, ki ringna thisen hih nin taksônna inbôlna ngei Pathien kôm nin pêk angin, bunpai rang nikhom ronga ka râiasâna male ka râisânna nin rêngin nangni kên sempui sa ani. 
\v 18 Ma angdên han, nangni khom nin râiminsân ngêt ungla, kei khom nin râisânna mên sempui sa roi.
\s Timothy le Epaphroditus
\p
\v 19 Masikin nin roi ki rieta mohôkin ko om theina rangin Pumapa lungdo anînchu, Timothy hih nin kôm hongtîr lai thei rangin kên sabei ani. 
\v 20 Ama vai hih ki mindona mên sempui ngâi le nin chungroi adiktaka donsûi ngâi ani. 
\v 21 Adangngei nâm chu an siksika rang vai an mindona Jisua Khrista rangin chu mindon mak ngei. 
\v 22 Male ama chu alut tie minsina aom hah nangni rengin nin rieta, ama le keima hih kho angin mo kin ni, nâipasal le a pa angin kin nia, thurchisa rang jâra munkhata sintho ngâi kin ni. 
\v 23 Masikin keima rangin neinunngei kho angin mo a hong inhei ki riet lehan nin kôm hongtîr kelen rangin ka sabei ani. 
\v 24 Male keima reng khom nin kôm ânranga hong thei rangin Pumapa han iemna ko dôn ani.
\p
\v 25 Ki sinthopui le ki tienga mi doipui ngâi, nin tîrton anga sintho, mi san ngâipu ei lâibungpa Epaphroditus hih nin kôm hongtîr rang anâng tiin mindona ko dôn ani. 
\v 26 Ama hih nin rêngin nangni mu rang a jôt sabaka, a damloi nin riet sikin ânngûikhak ani. 
\v 27 Ataktakin ama chu damloiin a thi vânga. Aniatachu Pathien'n inrieng a mua, ama chung vai niloiin, keima khom inngûina lien uola ko om loina rangin mi thop sa ani. 
\v 28 Masikin ama nin mu tika nin râisân nôkna rang le ka inngûina ânmang theina rangin nin kôm hongtîr rang ka ngâklal sabak ani. 
\v 29 Pumapa jârin ama hah lâibungpa anghan râisânin lei modôm roi. Ama anghan mingei murdi kôm miritna minlang ungla, 
\v 30 nangni'n sanna mi nin pêk thei loi, mi pêk rangin Khrista chuonsina jâra a thi vâng dôr a ringna phalin alei inpêk sikin.
\c 3
\s Dikna tatak
\p
\v 1 Chongkhârnân, ka lâibungngei le sarnungei, Pumapa leh nin inzomna han nin râiminsân roi. Motona ke lei mizieksai avêla miziek hih kei rangin ningchiel om nimaka, ma anga ko tho hah nangni rangin ânlâp uol ani. 
\v 2 Neinun saloi tho ngei, uingei, taksa mortan\f + \fr 3:2: \fr*\fq taksa mor tan \fq*\ft ti hih \ft*\fq sertan \fq*\ft khom ei ti thei\ft*\f* lunghâng tho mingei renga han indîn roi. 
\v 3 Anni ngei niloiin, eini ngei hih ama Ratha jâra Pathien chubaimûk ngei le Khrista Jisua leh inzoma ringna râisânna man ngei hih kêng sertan diktak eini. Eini chu pêntieng neinuna ei taksônna minngam mak me. 
\v 4 Nuom ronga chu kei khom ma anga neinunngei chunga taksônna minngam thei kêng ki ni. Mi dang ngeiin pêntienga neinuna an taksônna minngam theiin an mindonin chu, keima vâng chu ma lampui han ma nêkin abi ko dôn uol ani. 
\v 5 Haptakhat ki ni han sertan ki ni. Israelmia inzir ki nia, Benjamin jât mi, Hebrew thisen inthienghiei ki ni. Juda Balam jûina tieng chu Pharisee ki nia,\x - \xo 3:5: \xo*\xt Rom 11:1; \xt*\xt Sin 23:6; 26:5\xt*\x* 
\v 6 male koiindang nuomlona tieng asân ningsiet ngâi ke lei ni. Miriemin Balam chongpêkngei jôma adik chang theina tieng chu demnaboi ki ni. \x - \xo 3:6: \xo*\xt Sin 8:3; 22:4; 26:9-11\xt*\x* 
\v 7 Aniatachu inlâpna ranga ke tel thei neinunngei murdi hah atûn hin Khrista jârin machânin ke be zoi ani. 
\v 8 Ma neinunngei vai hah niloiin; ku Pumapa Khrista Jisua rietna luttak jârin neinun murdi khom machân rieiin ke be zoia; ama jârin neinun murdi ko vôrpai leta, Khrista ka man theina rangin mangei nâm hah ânnim, ânnok anghan ke be zoia, 
\v 9 male ama leh inpumkhat tatakna rangin. Balam jôm sika man thei ngâi jât dikna hah keima hin dôn khâi mu-ung. Atûn chu taksônna chunga ânngam, Pathien renga hongsuok ngâi dikna, Khrista taksôn sika pêka om ngâi hah ko dôn zoi ani. 
\v 10 Anrênga ku nuom tak chu Khrista rieta, ânthoinôkna sinthotheina riet mindika, a tuongnangei tuongpuia, a thina angin thi rang hih ani. 
\v 11 Keimananâk khom thina renga inthoia, ring rangin insabei ki ni.
\s Tenkung tienga tân
\p
\v 12 Keima chu ko zoisai ke ani zoi, aninônchu achukphar ko hongni zoi ki tina khom nimak. Khrista Jisua'n ama nanâkin mi lei mansaina râisânman hah ka man thei duoi mo tiin ku rujûl ani. 
\v 13 Ani, ka lâibungngei le sarnungei, adiktakin ka man saiin la mindon mu-ung\f + \fr 3:13: \fr*\fq la mindon mu-ung \fq*\ft miziek senkhata chu mahih \ft*\fq la mindon tak mu-ung: \fq*\ft tiin an dôn ani\ft*\f* nikhomrese, neinun khat ko tho ngâi chu, ku nûktienga om neinunngei mingilin motontienga om neinunngei phâk rangin ka pharidôr ko tho ani. 
\v 14 Masikin râisânman man rangin tenkung tieng ânjîkzatin ka tâna, hima hih Khrista Jisua sika chungtienga ringna Pathien koina ani.
\p
\v 15 Eini ratha taka mitungsuo ngeiin ei rêngin hima anga mulungrîl munkhat hih ei dôn rang ani. Aniatachu mi senkhatin mulungrîl dang nin dôn duoiin chu Pathien'n nin kôm la minthâr atih. 
\v 16 Maha kho angin khom nirse, atûn tena ei lei jûisai balamngei dungjûiin motontieng panin se ei ti u.
\p
\v 17 \x - \xo 3:17: \xo*\xt 1 Kor 4:16; 11:1\xt*\x*Ka champuingei, ku nunchan inchupungei ni roi. Nangni ranga minenna dik kin dar ajûipungei hah lunghâng tho ngei roi. 
\v 18 Mi tamtak ringnun hah Khrista khros chunga a thina râlin a sin ngeia, tiin motona vêltamtak nangni ke lei ril angin, atûn khom avêlin mitrithi tâkpumin: nangni ki ril ani. 
\v 19 Anningei sêna hah amongna chu meidil ania, an pathien hah an taksa ôinangei ani sikin. An inzakna rang hah an inpâkpuia, male hi rammuol neinunngei vai hih an mindon ngâi ani. 
\v 20 Nikhomrese, eini chu invân mingei einia, ei Sanminringpu Pumapa Jisua Khrista invân renga a juong rang ôtlaltakin ei ngâk ani. 
\v 21 A sinthotheina mangin neinun murdi ama racham nuoia hongchôi thei han, ei takpum thithei adokngei hih thûlin ama takpum roiinpuitak angin minchang ngei atih.
\c 4
\s Rilnangei
\p
\v 1 Masikin, ka lâibungngei le sarnungei, keima rangin idôra moroiom le ka rangâi ngei mo nin ni zoi! Nangni jâra idôrmo ka râisân le minpâka om mo ki ni zoi! Hanchu mahi, moroiomtak lâibungngei le sarnungei, Pumapa taka han nin ringna nin minding det rang ani.
\p
\v 2 Euodia le Syntyche, rangâihoitakin, Pumapa han zuorpuisa anghan jôt inruol rangin nin pût rangin nangni ke ngên. 
\v 3 Nangma, ka champui taksônom tak khom, hi nupangngei hih na san ngei rangin ko jôt sa; thurchisa phuong minzarna sinthona han Clement le ki sintho champui adadangngei, Pathien ringna lekhabua an riming chuongngei lehan munkhata intaktakin sin min thopui ngâi sikin.
\p
\v 4 Zoratin Pumapa leh nin inpumkhatna han nin râiminsân roi. Ti nôk ki tih; nin râiminsân roi!
\p
\v 5 Mitin chunga nin nuninnêmna minlang roi. Pumapa chu a juong lai rang kêng. 
\v 6 Ite chungroia nin kângmindoi no ungla, hannirese nin chubaithona murdia imo nin nâng Pathien kôm zong ungla, mulung râisântakin a kôm zong tit ngâi roi. 
\v 7 Hanchu Pathien'n inngêina, munisi ngeiin an riet phâk ngâiloi, Khrista Jisua leh nin inzomnân nin mulungrîlngei le nin mulungbôkngei hah aringin nangni a dar pe rang ani.
\p
\v 8 Chongkhârnân, ka ruolngei, asa le minpâkna manrangrohoi neinunngei lehan nin mulungbôkngei hah minsip ungla: hima neinunngei hah, atak, misang asa nina, adik, ânthieng, miditruoi, le miritom ngei hah an ni. 
\v 9 Keima renga anruona, ko chongbâingei renga le ki sinthongei renga nin inchu le nin manngei hah tho rangin inchu ngâi roi. Male inngêina mi pêkpu Pathien hah nangni ompui rang ani.
\s Neinunpêk sika râisânchongrilna
\p
\v 10 Ki ringnun hin Pumapa leh inzomin zora sôttak suonûkin keima ranga nin mindona vêl khat hong minlang nôk thei rangin zorânchum nin dôn sikin kei rangin râisânna lientak ani. Mi nin mindona hah nin mong zoi ki tina nimaka, a minlang rang zorânchum nin dôn loia kêng ani. 
\v 11 Mahi lunghâng nin tho loi sika ki ti nimaka, ko dôn chunga mulungchuka om rang kên chusai sika ani. 
\v 12 Imo ahong nâng rang, imo ahundôr nêka atam dôn rang khom ki riet. Hi omlam inthup hih kên chua, masikin, kho muna khom, kho zora khom, khopin mo aninônchu vonchâmin mo, dôn mintam okin mo, atômte ko dôn khomin ku mulung achuk ani. 
\v 13 Khrista'n mi pêk, sinthotheina han intaknangei nâm hah tong theina ranak ko dôn zoi.
\p
\v 14 Aniatachu ke dengtheina ngeia mi nin san hih nin tho minsa sabak ani. 
\v 15 Nangni Philipi mingei, Thurchi Sa misîra aom phut nikhuo ngeia Macedonia ram ka mâk lâihan nangni nin koiindang vai ke mi san nin ni; nangni inkhat vai kêng ka âikalnangei le ki insûmnangei mên sempui ngâi ninni, tiin nin riet minthâr sabak ani.\x - \xo 4:15: \xo*\xt Sin 17:1\xt*\x* 
\v 16 Thessalonica sûnga ko om lâia, voikhat nêka tam sanna ka nâng han, mi nin hong muthuona.\x - \xo 4:16: \xo*\xt 2 Kor 11:9\xt*\x* 
\v 17 Neinunpêk man rang ko jôt vai niloiin; manêk han, nangni tienga âikalna molopa aom mu rang ko jôt ani. 
\v 18 Hanchu, mahi, neinun mi nin pêk ngei murdi ka manna lêkha ani, male ahundôr nêka tam aom zoi! Epaphroditus'n nin neinunpêkngei anrêngin mi hongchôi pea, atûn chu ka nâng nâm ko dôn zoi. Mangei hah mirimhoi Pathien kôma pêk, inbôlna a pomtheiruo le a lungdo angin an ni. \x - \xo 4:18: \xo*\xt Jôk 29:18\xt*\x* 
\v 19 Ka Pathien'n nin nângngei murdi Khrista Jisua renga, a neina ânniengrakin nangni a pêk bang rang ani. 
\v 20 Ei Pathien le Pa kôm han tuonsôt tuonsôtin roiinpuina om rese! Amen.
\s Azoina chibaimûkna
\p
\v 21 Jisua Khrista taka, Pathien mingei murdi hah chibai mi mûk pe roi. Hi taka keima leh om ei lâibungngei le sarnungei chibai nangni an hong muthuon ani. 
\v 22 Hi taka Pathien mingei murdi'n chibai an hong muthuona, aliekin Rêng ina ompu ngei hin.
\p
\v 23 Pumapa Jisua Khrista moroina hah nin rênga nin kôm om rese!