\id 1TI Sakachep: Bible Translation 1st Edition
\ide UTF-8
\ide Unicode (UTF8)
\h 1 Timothy
\toc1 TIMOTHY kôma Paul Lekhamuthuon Inkhatna
\toc2 1 Timothy
\toc3 1 Tim
\mt1 TIMOTHY
\mt2 Kôma Paul Lekhamuthuon Inkhatna
\imt1 Chongmaruoi
\ip Timothy, Asia Te taka khristien ruotharte, hi a nu chu Juda ania, a pa chu Greek ani. Paul missionary sinthona hin Timothy hih a champui le nuoidoi a hongni. \bk Paul'n Timothy kôma Lekhamuthuon Inkhatna\bk* hin abipuitak inthum akhîn uola.
\ip Amotontaka hi lekhamuthuon hih koiindanga minchuna dikloi aom ngâi roia inningna ani. Hi minchuna, dikloi hih Judangei le Juda niloi ngei ânpolngei mindonnangei, taksatienga rammuol hih asaloi ania, sanminringna chang theina rangin chu rietna inthup liek dôna, sâk ngâi senkhat ngei ngêia, in khom neiloi rang ani ti iemna chunga ânngam ani. Hi lekhamuthuon hin koiindang inpêlna roi le Pathien biek rang roi ngei le koiindang ruoipungei le an insanpuingei nunchan dôn rang tie ngei khom a chuongsa ani. Azoinataka Jisua Khrista tîrlâm asa Timothy hih a hongni rang tie le iempungei pâl tamtak ngei tienga a roipêlnangei chungroia rilna ani.
\is1 Asûnga chongtângpuingei
\io1 Chongmaruoi \ior 1:1-2\ior*
\io1 Koiindang le ulienngei ta ranga rilnangei \ior 1:3—3:16\ior*
\io1 Timothy kôm a sintho chungroia rilnangei \ior 4:1—6:21\ior*
\c 1
\p
\v 1 Paul, Pathien mi Sanminringpu Khrista Jisua ei sabeina chongpêka Khrista Jisua tîrton renga han,
\p
\v 2 Taksônna jâra ka nâipasal diktak, Timothy kôm:\x - \xo 1:2: \xo*\xt Sin 16:1\xt*\x*
\p Pathien ei Pa le ei Pumapa Khrista Jisua han moroina, inriengmuna le inngêina nang pêk rese.
\s Minchuna dikloi doia inningnangei
\p
\v 3 Macedonia rama ke se rang lâia Ephesus taka om ranga nang ke ngên anghan atûn khom nang ke ngên nôk. Mi senkhat chongrin dikloi ngei minchu an oma, male an mong ngêt rangin chongpêk ngei roh. 
\v 4 Thurchimuruongei le suizoijât niloi richibulngei thurchi hah mâk rangin ril ngei roh; ma ngei han taksônna min rieta om, Pathien mintuo hih sin minsa nêkin inkhalnangei vai kêng an musuo ngâi. 
\v 5 Ma chongpêkin a neinunkhîn tak hih chu mulungrîl inthieng, sielesarietna ânthâr le taksônna diktak renga hong suok ngâi lungkhamna hah an dôn theina rangin ani. 
\v 6 Mi senkhatngei chu mangei lampui renga hah an pêta, amo ngei injêknangei tieng lam an invâi zoi ani. 
\v 7 An chongngei aninônchu ngamtaka an thurchi misîr nanâk luo hah riettheina dôn loiin Pathien balam minchupungei ni rang an nuom ngâi.
\p
\v 8 Balam hih mîn ani rang anghan a mangin chu asa ngâi ti ei riet. 
\v 9 Mahi riettit rang ani, balamngei chu misa ngei ranga sin nimaka, hannirese, balampalpungei le mipuoloingei rang, pathien dônloingei le mi nunsiengei rang, sakhuotienga mi niloi ngei aninônchu rathatienga mi niloi ngei rang, pangei mo nûngei mo athatngei rang, mithatngei rang, 
\v 10 nunchan saloingei rang, pinkuohurngei rang, mimurukpungei rang, milak thoa an thurchi dikloi taka misîr ngei rang, chongrin dik minchuna aletienga ti le sintho murdi ngei ranga sin ani. 
\v 11 Pathien roiinpuitak le satvura ompu renga Thurchi Sa phuong ranga, mi minkolpu renga ha minchuna hah man ani.
\s Pathien inriengmu chunga râisânachong
\p
\v 12 Ki sinthona râtna ni pêkpu, Khrista Jisua ei Pumapa kôm han râisânchong ki misîr. Achuk angin mi bêa, male a sinthopu'n mi phun sikin a kôm râisânchong ki misîr sa ani, 
\v 13 tiena han chu a rokôk minnapu le a nunuomlopu le a êropu lei ni khom ronga. Aniatachu taksônna ka la dôn mâna riet loia ko tho ani sikin Pathien'n inrieng mi la mu ani.\x - \xo 1:13: \xo*\xt Sin 8:3; 9:4-5\xt*\x* 
\v 14 Male ei Pumapa'n a moroina tamtak hah taksônna le lungkhamna Khrista Jisua leh inzoma eita hah ku chunga a bun zoi. 
\v 15 Khrista'n mi nunsiengei sanminring rangin rammuola hin a juong ti hih iem a omin pomthei tatak ania: mangei lâia nunsie tak chu keima ki ni, 
\v 16 hannirese hi sika hin ani, inrieng mi mua, Jisua Khrista'n mi nunsie tak keima hin a diertie murdi minlang a nuom ani, atûn renga kumtuong ringna man ranga ama la hong iem rang ngei minenna rangin. 
\v 17 Kumtuong Rêngpa, thitheiloi le mutheiloi, Pathien kôm vai — han miritna le roiinpuina tuonsôt tuonsôtin om rese! Amen.
\p
\v 18 Ka nâi, Timothy, tiena nu chungroia chongphuong lei ti sai chongbâingei dungjûia hi chongpêk hi nang ki minkol ani. Indoina no doi minsa theina rangin hi chongbâingei hi râlrovongeiin mang inla, 
\v 19 male na taksônna le sielesarietna ânthâr hah dôn tit roh. Mi senkhat ngeiin an sielesarietna rangâi loiin an oma, an taksônna an siet ngâi. 
\v 20 Ma ngei lâia han Hymenaeus le Alexander ngei hah an nia, Pathien rilsiet an bângna rangin; Soitan sinthotheina kuta pêkin dûk ko tho ngei ani.
\c 2
\s Koiindang inkhômna chang
\p
\v 1 Hanchu, amotontaka, ngênna chubaithonangei, invûinangei, le râisânchong rilnangei hih mingei murdi ta rangin Pathien kôm pêk pe ngei rangin nangni ke ngêna; 
\v 2 rêngngei le adang rachamnei ngei murdi ta rang khom, dâiriem le inngêitaka Pathien tienga mân thona murdi le nunchan diktak leh ringnun manga ei om theina rangin. 
\v 3 Mahi asa, le Pathien mi Sanminringpu râisân ruo piel ania: 
\v 4 ama'n mi murdi sanminringa an om rang le chongtak an riet rangin a nuom ngâi ani. 
\v 5 Pathien hih inkhat vai aoma, male Pathien le miriemngei minchunpu inkhat vai aom nôka, miriem Khrista Jisua hah, 
\v 6 miriem jât pumpui ratanna ranga ân pêkpu hah ani. Maha Pathien'n mi murdi sanminring rangin a nuom ti azora taka riet minthâr ani, 
\v 7 male masika han kêng keima hi taksônna le chongtak thurchi phuong rangin, Jentailngei kôm tîrton le minchupua tîr ki ni. Milak tho mu unga; chongtak kêng ki ril!\x - \xo 2:7: \xo*\xt 2 Tim 1:11\xt*\x*
\p
\v 8 Koiindang inkhôm tina pasal Pathiena ânpêk ngeiin an kut inthieng ngei pharin, takminsi loiin le inkhal loiin chubaitho senla ngei ku nuom ani. 
\v 9 Ma angdênin, nupangngei khom sillebomngei ahundôr le satak le balam takin invo senla ngeia, samphierin mini, rângkachakin mini, lungmantamin mini, rovo mantamin mini invo no rese ngei ku nuom sa,\x - \xo 2:9: \xo*\xt 1 Pet 3:3\xt*\x* 
\v 10 hannirese, nupang sakhuotienga mi inti ngei ha chu an inhoi lam takin sin sân invo rese ngei. 
\v 11 Nupangngei chu dâirekin le rangâiinchîna murdi'n an inchu rang ani. 
\v 12 Mi minchu rangin mini, aninônchu pasal chunga rachamnei rangin mini phal mu unga; an dâirek ngêt rang ani. 
\v 13 Asikchu Adam hah sin bak ania, male kêng Eve hah sin ani.\x - \xo 2:13: \xo*\xt Aph 2:7; 2:21,22\xt*\x* 
\v 14 Male huonga om hah Adam nimaka; nupang ha ke huongin aoma, Pathien balam a siet ani.\x - \xo 2:14: \xo*\xt Aph 3:1-6\xt*\x* 
\v 15 Aniatachu nupang hah nâingei\f + \fr 2:15: \fr*\fq nâingei a nei sikin sanminringin om atih; \fq*\ft aninônchu \ft*\fq nâi a neina jârin minring nîng atih.\fq*\f* a neina sikin sanminringin om atih, taksônna le lungkhamna male inthiengna ngei leh inpâkpuiloiin duoiloiin a tuongdier ngâiin \f + \fr 2:15: \fr*\fq a tuongdier ngâiin chu; \fq*\ft aninônchu \ft*\fq an tuongdierin chu.\fq*\f* chu.
\c 3
\s Koiindanga ruoipungei mizie
\p
\v 1 Tukhom koiindang ruoipu chang rang a nuomin chu, sin satak tho a nuom ani: ti chong hih adik ani. 
\v 2 Koiindang ruoipu chu demnaboi ani ngêt rang, lômnu inkhat\f + \fr 3:2: \fr*\fq lômnu inkhat vai dôn; \fq*\ft aninônchu \ft*\fq voikhat vai innei.\fq*\f* vai dôn ani ngêt rang, mi harvang, indînthei, le balam taka om mi; a ina khuolmingei min tung ngâi; mi minchu thei;\x - \xo 3:2-7: \xo*\xt Tit 1:6-9\xt*\x* 
\v 3 ju inrûi ngâiloi aninônchu mi leh insuol ngâiloi, phûkinchuol le mi leh inngêi mi; sum midit mi ani tet rang nimak; 
\v 4 a insûng jêk thei mi le a nâingei a chong an jôm mi le an jâ ngâi mi ani ngêt rang ani. 
\v 5 A insûng luo jêk theiloi mi han inmo Pathien koiindang a enkol thei ranga? 
\v 6 Taksônna tienga mitungsuo ani ngêt rang ani, masikin inpâknân a sipa Diabol theiloi a chang anghan, theiloi a chang loina rangin. 
\v 7 Koiindang pêntienga mingei khomin an jâ ngâi mi ani rang ani, masikin mâimôkinsakin le Diabol chânga an ôk loina rangin.
\s Koiindanga sanpungei
\p
\v 8 Koiindanga sanpungei khom nunchan sa le takintâi mi an ni ngêt rang ania; ju mudu ngâi loi le suma inruok mi an ni rang nimaka; 
\v 9 sielesarietna ânthârtak le taksônna chongtak hah an mutu mindet tit rang ani. 
\v 10 Amotona minsin bak nisenla ngeia, male minsina han an kaiin chu, sin min tho ngei nirse. 
\v 11 An lômnungei\f + \fr 3:11: \fr*\fq an lômnungei; \fq*\ft aninônchu \ft*\fq sanpungei nupangngei.\fq*\f* khom nunchan sa mi ani ngêt rang ani, mi mûrtam an ni rang nimaka; neinuntina mi harvang le mi indik anni ngêt rang ani. 
\v 12 Koiindang sanpu chu lômnu inkhat vai dôn ngêt,\f + \fr 3:12: \fr*\fq lômnu inkhat vai dôn; \fq*\ft aninônchu \ft*\fq voikhat vai innei.\fq*\f* male a nâingei le a insûng asadima jêk thei mi ani rang ani. 
\v 13 Ha sanpungei lâia an sin sataka thopu ngeiin chu anninanâk rangin dingmun asa changin Khrista Jisua an taksônna roi hah hâitakin an misîr thei ngâi ani.
\s Chonginthup ânlal
\p
\v 14 No kôma hi lekhamuthuon ki miziek anghin, honga nang hong mu lai rangin ka sabei. 
\v 15 Aniatachu ko hong innu duoiin chu, Pathien insûngmi ngei kho angin mo eininanâkin ei om rang, hi lekhamuthuon hin nang min riet atih, ma hih Pathien ring koiindang, chongtak chopui le ânngamna hah ani. 
\v 16 Ei sakhuo chonginthup ânlal tie hih tutên dem thei no ni ngei:
\q1 Ama hah miriemin a juong inlanga,
\q2 Ratha'n\f + \fr 3:16: \fr*\fq Ratha'n adik ti a minlanga; \fq*\ft aninônchu \ft*\fq male, rathatieng adik ti minlangin aoma.\fq*\f* adik ti a minlanga,
\q2 male vântîrtonngeiin an mua.
\q1 Ama hah namtinngei lâia phuong ani zoia,
\q2 rammuol pumpuia mingeiin an iema,
\q2 male invân tieng khin lâkpaiin aom zoi.
\c 4
\s Minchupu dikloingei
\p
\v 1 Nûka chu mi senkhatngei chu an taksônna la mâk an tih tiin Ratha'n ânthârtakin a misîr ania; ratha milakngei chong la jôm an ta, male ramkhoringei minchuna la jûi an tih. 
\v 2 Ma anga minchunangei hah milakngei mi huongna renga hônjôt ania, an sielesarietna hah athi ani, thîr inling bel anghan ani. 
\v 3 Ma anga mingei han innei le i-ih mini sâk hih dikmak tiin mi an minchu ngâia. Aniatachu ha sâkngei hah a iem ngei lâia chongtak rietsai ngeiin râisânchongril suole sâk thei rangin Pathien'n a sin ani. 
\v 4 Neinuntin Pathien sin ngei murdi hi asa; chubaithoa râisânchong misîra sâk ani ngânin chu, ite pai rang reng om mak, 
\v 5 Pathien chong le chubaithona han Pathien kôm pomtheiin a sin sikin.
\s Khrista Jisua tîrlâm asa
\p
\v 6 Ma rilnangei hah iempungei kôm ne pêkin chu, Khrista Jisua tîrlâm satak nîng ni tih, taksônna chongngei le minchuna dik nu jûi sai rathatienga nên vâi tit anghan. 
\v 7 Aniatachu pathienboi thurchimuruo misîrna ngei hah nûksong roh. Ni ringnun hah Pathien'a inpêk rangin inchu roh. 
\v 8 Taksatienga insepna hin a lekti chu asena aoma, rathatienga insepna vâng chu lam tina asena aom ok ani, asikchu atûnlâia ringna le sûnmotona ringna pêk ranga inkhâmnangei aom ani. 
\v 9 Hi chong hih adikin, iem aoma pomthei tatak ani. 
\v 10 Ranak ei songa\f + \fr 4:10: \fr*\fq ranak song; \fq*\ft miziek senkhat ngei an dôn chu \ft*\fq ei pût.\fq*\f* male sin ei tho tatak ani, Pathien ring chunga han ei sabeina ei bâng sikin, mi murdi le aliekin iempu ngei Sanminringpu chunga han.
\p
\v 11 Ma rilnangei le minchunangei hih pêk ngei roh. 
\v 12 Nâipang na ni sikin tutên nang enminnuoi no rese ngei, no chonglam, nu nunchan, nu lungkhamna, na taksônna, le nên thiengna ngeia iempungei minenna ni roh. 
\v 13 Ko hong mâka chu, mipui makunga Pathien Lekhabungei porên, thurchi misîr le mi minchunân no zora le na ranak mang roh. 
\v 14 Dêipungei thurchi an misîra male upangei nu chunga an kutngei minngama rathatienga neinunpêk na chang hah itên bê loiin tho no roh. 
\v 15 Mi murdi makunga na masôna ânlang theina rangin hima neinunngei nâm hi inpêk lakin tho roh. 
\v 16 Nangma le ni minchuna han indîn inla, ma neinunngei ha tho tit roh, asikchu ma neinunngei hah no thôn chu nangma le no chong rangâi ngei hah anruonin sanminring ni tih.
\c 5
\s Iempungei tienga roipêlnangei
\p
\v 1 Pasal atar uol ngei chu ngo nônla, na pa angin en inla ngênin ngên roh. Pasal ânnoi uol ngei hah na lâibungngei angin bê inla, 
\v 2 nupang atar uol ngei hah nu nungei angin bê inla, male nupang ânnoi uol ngei hah inthiengna murdi leh na sarnungei angin bê roh.
\p
\v 3 Meithâingei anthei vaia omngei hah jâ ngei roh. 
\v 4 Aniatachu meithâi han nâingei mini, tungei mini, a dônin chu ha ngei hah sakhuotienga an sintumngei hah an insûngmi ngei chunga sinin inchu bak rese ngei, ma anghan sinin an nulepangei le pilepungei khom donsûi thei an tih; maha Pathien râisân lam khom ani sikin. 
\v 5 Meithâi athei mamanga om, a donsûi rang boitet ngei ha chu Pathien kôm an sabeina bângin, sûn le jân chubaitho le a sanna zongin an om tit ngâi. 
\v 6 Aninâkchu meithâi amananâkin hoina tieng riempeta ânpêk ngâi chu la ring bang khom senla, athisai piel kêng ani zoi. 
\v 7 Masikin tutên an minchâina an man loina rangin, ma rilnangei hih pêk ngei roh. 
\v 8 Tukhom a sûngsuokngei, aliekin an insûngmingei an donsûi nônchu taksônna hah an minlêma iemloipu nêkin asiet uol an ni.
\p
\v 9 Meithâi kum sômruk ânlei loi le voikhat inneia\f + \fr 5:9: \fr*\fq voikhat vai innei; \fq*\ft aninônchu\ft*\fq a lômpa chunga taksônomtak.\fq*\f* pasal dôn sir khâiloi ngei chu meithâi ngei riming mintângna han minchuong no roh 
\v 10 male sin sa thona lama minpâk lei lo sai, a nâingei asadima lei donsûi sai, a ina khuolmingei lei mintung ngâi, a khristien champuingei ta ranga ngâihoi sin lei tho sai, mi intak ngei lei san sai, sin sa tho ranga ân pêksai ani rang ani.
\p
\v 11 Aniatachu meithâi nâipang uol ngei ha chu riming mintângna han minchuong no roh; an ôinangei han innei rang amin nuom ngei lehan chu Khrista nûk an song ngâi, 
\v 12 motona a kôma an chonginkhâm hah an sieta theiloi changin an om ngâi. 
\v 13 In tin lôrrin zora minhek an inchu ngâia, manêka sie uol an tho ngâi chu, mûrtamngei le mi sintho dem an inchua, an misîr loiruo khom an misîr sa ngâi. 
\v 14 Masikin ei râlngeiin asaloi ti theina rang zorânchum an man loina rangin, meithâi nâipang uol ngei han innei rese ngei, nâingei dôn rese ngei, male an inngei hah donsûi rese ngei ku nuom uol ani. 
\v 15 Asikchu meithâingei senkhat chu Soitan jûi rangin an pêt sai ke ani zoi. 
\v 16 Aniatachu khristien nupangin a insûnga meithâingei a dônin chu, ama'n a donsûi ngêt rang ania, koiindang chunga puokrik bâng no rese, masikin meithâi anthei vaia omngei hah an donsûi theina rangin.
\p
\v 17 Koiindang upangei sin sa thona tienga ruoipu chang ngei ha chu thalo bâknik man ranga ânhoia bê rang an nia, aliekin thurchi misîr le mi minchuna tienga ranak song ngei hah. 
\v 18 Pathien lekhabu'n, “Serâtchal hah bu ni minchîl lâitak a mûr khit pe no roh,” male “Sinthopungei chu an thalo pêk rang ani,”\x - \xo 5:18: \xo*\xt Bal 25:4; Mat 10:10; Luk 10:7\xt*\x* ati sikin. 
\v 19 Koiindang upa chunga an nônna hah adik ti rietpuipu inik chung tieng an om nônchu rangâi no roh.\x - \xo 5:19: \xo*\xt Bal 17:6; 19:15\xt*\x* 
\v 20 Midang ngei khom an chi sa theina rangin, nunsie tho ngei chu mipui makunga ngo ngei roh.
\p
\v 21 Pathien le Khrista Jisua le vântîrton inthieng ngei mitmua hi rilnangei hih tute chunga zenuol aninônchu lungkham uol minlang loiin, ni sinthona tina tute thop nâng uol loia, mulung lût takin no jôm rangin inngartakin nang ki min riet ani. 
\v 22 Pumapa sintho ranga mi inpêkna han nu kutngei an chunga minngam rangin innot no roh. Midangngei sietnangei an sinna han kop nônla; ânthiengin om tit roh.
\p
\v 23 Tui vai nêk ngâi no roh, na damthei ngâi loi sikin na sâkjôina san rangin uain alektiti nêk sa ngâi roh.
\p
\v 24 Mi senkhat sietnangei chu ânlang-iema mu theiin aoma, male an motona roijêkna atung bak ngâia; hannirese midangngei sietnangei rêk chu nûka kêng mu theiin aom ngâi. 
\v 25 Ma angdên han sintho asa ngei ânlang-iema mu thei aoma, ânlang-iem loi ngei khom thup thei ni ngâi mak.
\c 6
\p
\v 1 Pathien riming le ei minchuna tutên an êro loina rangin suokngeiin an pumangei hah lam tina an jâ ruo pielin bê rese ngei. 
\v 2 Suokngei Khristien puma dôn ngei han an pumangei enminnuoi tet no rese ngei, asikchu, anni ngei hah khom an iempu champuingei an ni sikin. Manêkin, an sin asa uolin tho pe rese ngei, an sinthona renga âikalna an man ngei hah an lungkham iempungei an ni sikin.
\s Minchuna dikloi le neinangei adik
\p Hi neinunngei hih ni misîra ni minchu ngei ngêt rang ani. 
\v 3 Tukhom chongrin dang a minchua, ei Pumapa Jisua Khrista chong dikngei leh ei sakhuo tienga minchuna dik hah a pom jôt nônchu 
\v 4 ama hah inpâknân a sipa ite riet loi ani. Ama han insuolna le inkhalna chongngei tieng nuomna saloi a dôn ani, male ma renga han narsanangei, bâiinkhamnangei, inêronangei, sietna taksôn zoiloinangei, 
\v 5 male mulungbôkngei sêttak le chongtak mindonna reng dôn khâiloi mingei han inkhal râtna ngei an musuo ngâi. Anni ngei han sakhuo hih hong neina lampui ani tiin an mindon ani.
\p
\v 6 Ani, sakhuo hin mi min nei sabak ngâi, ei dôn chunga han ei mulungachukin chu. 
\v 7 Imo rammuola hin ei juong chôi lût? Ite nimak! Imo rammuol renga ei jôkpui thei rang? Ite nimak! 
\v 8 Masikin, sâknêk le sillebomngei ei dônin chu eini rangin ahun. 
\v 9 Aniatachu nei rang bôk ngei chu huongna han an tâka, ôinangei saloitak le mi sietthei chânga han an inôk ngâi, mahan sietna le ramna tieng akaithâk ngei ngâi. 
\v 10 Asikchu sum miditna hi saloi ngei murdi bulpui ani. Maha senkhatin an râivala, taksônna renga an invâia, ngâisietnangei tamtakin an mulungrîlngei asunkhoi ngâi ani.
\s Misang rilnangei
\p
\v 11 Aniatachu, nangma Pathien mi, ma neinunngei murdi hah lôi inla, dikna, Pathien angna, taksônna, lungkhamna, tuongdierna, le nunnêmna ngei hah rujûl tit roh. 
\v 12 Taksônna tâninsietna han ranak songin tân inla, male nangma rangin kumtuong ringna hah man roh; maha chang rangin Pathien'n nang a koi ani, rietpuipungei tamtak mitmua hâitaka na taksônna nu phuong lâihan. 
\v 13 Pathien makunga, neinunngei murdi ringna pêkpu le Khrista Jisua, Pontius Pilat, makunga a taksônna hâitaka a phuongpu mitmua han chong nang ke pêk\x - \xo 6:13: \xo*\xt Joh 18:37\xt*\x* 
\v 14 ei Pumapa Jisua Khrista a juong inlâr nôkna Nikhuo dêna chongpêkngei hah taksônomtaka jôma male dar rangin. 
\v 15 Ânlârna ha chu azora taka Pathien satvura ompu le Roijêkpu vai han, rêngngei Rêng le pumangei Pumapa han mintung atih. 
\v 16 Ama vai ke athitheiloi ania; tute nâi theiloi vâra han a om ngâi. Ama chu tutên la mu mak ngeia; tute khomin mu thei mak ngei. Ama kôm han miritna le kumtuong sinthotheina chu om rese! Amen.
\p
\v 17 Hi rammuola anei ngei hih inpâk loi rang le rochon inthîkloia hin an sabeina minngam loia, ei râisânna ranga neinun murdi manartetloia mi pêk ngâipu Pathien chunga han minngam rangin chong pêk ngei roh. 
\v 18 Sin sa tho rangin chongpêk ngei inla, sin sa thoa nei rangin, manarloia midangngei sem sa rangin. 
\v 19 Ma anghan thôn, anta rangin rochon mintûp an ta, maha sûnmotona rangin lungphûm dettak nîng atih. Hanchu ringna hah chang thei an tih, ringna tatak hah.
\p
\v 20 Timothy, no kôma minkola om hah hôih roh. Pathien ngikloina chongti le amo inkhalnangei, mi senkhatin dikloi taka “Rietna” an ti hah lôi roh. 
\v 21 Maha senkhat ngeiin an dôn mini intîn, male an taksônna lampui hah an minmang zoi.
\p Pathien moroina hah nin rênga nin kôm om rase.