\id PHP DongXiang: DongXiang Bible draft 2
\usfm 3.0
\ide UTF-8
\ide 65001 - Unicode (UTF-8)
\rem Copyright Information: For any non-Paratext use of this text, permission must be obtained from the copyright holder.
\h Feilibi Kunlade Huaisan Xin
\toc1 Feilibi Kunlade Huaisan Xin
\toc2 Feilibi
\toc3 Flb
\mt Feilibi Kunlade Huaisan Xin
\c 1
\s Kielien Asazho
\p
\v 1 Mexiha \pn Ersa\pn*ni hoji \pn Baolo\pn* \pn Qimotai\pn*ghala \png Feilibi\png*de sousan Mexiha \pn Ersa\pn*i miendedu soyuji shentu, lindao, gonjialade xin huaizho. 
\v 2 Mai ada Huda, Ezhan \pn Ersa\pn* Mexiha tande nenjien, pinnan ogi gie!
\s Baolo Feilibini Shentulade Onxian Giezho
\p
\v 3 Bi niefanie tai sumulakude bi zunjisan Hudade mafan kieliezho. 
\v 4 Bayasuku zhugheghala ta dajialade oluzhi izhi onxian giezho. 
\v 5 Ingiekushi ta kaishi giesan hhe uduse eli kutula gouxioxii chonjizhi hhantu wilie giezho. 
\v 6 Tai dunda gou wilieni kaishi giesan hhe ene wilieni \pn Ersa\pn* Mexihani udu kuzhese onchen giekui bi hende xianxin giezho. 
\v 7 Bi ingiezhi tai man sumulase indanji wo, ta mii zhughede wine. Bi bafanzi soukude, pse gouxioxide oluzhi huizhi ganzhen beikude Huda made ogisan nenjiende ta man hhantulazho. 
\v 8 Bi Mexiha \pn Ersa\pn*i zhugheghala tai matugie sanasanyi Huda made ganzhen beine. 
\v 9 Bi onxian giese tai oreku erlinji pandon gieku jiere yebeiye olodo, 
\v 10 yanshi zui gouni bikui fenjizhi Mexiha ireku udude ganjin, yama ulie sugieghachen kun danla, 
\v 11 \pn Ersa\pn* Mexihani kouizhi gou wilielai olon giedene kuaiku, zanjikuni Hudade ogi giezho.
\s Mexihade Oluzhi Amitura
\p
\v 12 Gaijiula, made penjisan shiqin kharei gouxioxii ondaghasanyi bi tande mejieghaku duran wine. 
\v 13 Bi Mexihade oluzhi bafanzi sousei hongunni soyuji budui, psedu kunla man mejiewo. 
\v 14 Mii bareise dabufun gaijiula Ezhanyi goude xianxin giedene goujida ulie ayizhi danzine fugiedagha Hudai daolii chonjizho.
\p
\v 15 Niezhanla dubiliezhi zhenjinduzhi chonjizho, da niezhanla gou zhugheghala Mexihai chonjizho. 
\v 16 Enezighan kunla Huda mii nanpei giezhi gouxioxii huighasei mejiedene oreku zhugheghala giezho. 
\v 17 Hhezighan kunla Mexihai chonjise zinie goyadene oluzhi shixinji ese giezho. Mujishi bi bafanzi soukude olon shouku gieghane giezho. 
\v 18 Ingieseye yan xiangan wo? Huai mujiye oluzho, gou mujiye oluzho, yan gieliuzhe Mexihani chonji keighase bi bayasuzho. Bi pse bayasukushi 
\v 19 tai onxian gieku, pse \pn Ersa\pn* Mexihani ruhherni banman giekui tungo giezhi mii andaghakui bi mejiene. 
\v 20 Bi hende panjizhi xiwon giesanshi mii yan shiqindeliuzhe ulie shizheghazhi eqighanku mutun edeye danzine fugiedaghazhi fugu amituliuzhe mii jiere Mexihani zhiguishighakui wo. 
\v 21 Mii kieliese bi amitushi Mexihade oluzho, fuguseye haochu wine. 
\v 22 Ingieliuzhe bi amiturazhi wilie giezhi jiego goushi bi alinie sunghukui ulie mejiene. 
\v 23 Ghuala mii jiai beizho. Bi duyase likai giezhi Mexihaghala hhantulaku duran wine. Enense pse gouni uwoma, 
\v 24 bi tande oluzhi duyade biku genjia biyo wine. 
\v 25 Bi ingiezhi hende xianxin giese duyade feiliezhi tanre man hhantu soukui mejiene. Ingiese tai xinyan jiere hendazhi bayasukui wine. 
\v 26 Ingie bi tai hhende pse echikude mii tungo giezhi Mexiha \pn Ersa\pn* giesan shiqinde kuaikui genjia olodoghane.
\p
\v 27 Zhunyonishi tashi asiman gojiani kun wo giezhi tai giekula Mexihani gouxioxi mutun izhishi. Ingiese bi tai uzhele irenu, ulie ireliuzhe tande nie muji bizhi beizhi undanladene gouxioxini xinyan fanmiende hhantu xiacha giezhi 
\v 28 tai fandui giesan kunlase goujida ulie ayikui bi mejiene. Ta ulie ayise hhelai widaku, pse tai jiuikui hhelade zhenmin giezho. Enelashi man Huda giesan wo. 
\v 29 Tande ogisan nenjienshi zinie Mexihai xianxin gieku pusho, hhende oluzhi shouku giekuye enbene. 
\v 30 Ta eghindusan zhanshi bi eghindusanghala niekielien wo. Eqighandei ta mii jiere chujieghezhi daozho, ede bi eghindusei ta chenliezho.
\c 2
\s Mexiha Mutun Goyane Meilade Uzhe
\p
\v 1 Ingiese Mexihai miende tande sughaku kielien, orezhi sidaghaku, Shenlinghala laiwon gieku, pse renyi, ubali xiiku bise 
\v 2 tai sumuladan nie gholuzhi nieniedene orezhi nie zhughe gholu. Ingiese bi hende bayasune. 
\v 3 Yan shiqinniliuzhe zinie goyadene oluzhi bu gie, minshenni tanxin bu gie, goyane meilade uzhezhi kunlai goyasene fugiede uzhe. 
\v 4 Zinie goyane shiqinni bu gui, kunlai shiqinniye gui.
\p
\v 5 Ta zhughene Mexiha \pn Ersa\pn*i zhughe mutun gholugha.
\q1
\v 6 Hhende Hudai yanzi winema,
\q2 goyane Hudaghala pindane giezhi xiacha ese giedene
\q1
\v 7 Kharei goyane yanyanjilai bendazhi
\q2 hojini yanzi gholuzhi kun mutun oluwo.
\q2 Kunni yanzi mutun irese
\q1
\v 8 Goyane meilade uzhezhi
\q2 fugutula shunjiwo,
\q2 da shizijia jiere fuguwo.
\q1
\v 9 Ingiese Huda hhei zui unduni gholughazhi
\q2 hhende yanyanji nierese fugie nierei ogiwo.
\q1
\v 10 Ingie asiman jieredu, zemin jieredu, zemin douradu yanyanjila
\q2 man \pn Ersa\pn*ni nierede xiutuliezhi
\q1
\v 11 Jien kunlai amanla \pn Ersa\pn* Mexihashi Ezhan wo giezhi chenren giedene
\q2 Huda Adade kuaikui ireghawo.
\s Duyade Gon Fai
\p
\v 12 Ingiese mii orentula, bi tanre hhantu bikude ta chan chenliesan mutun ede bi tai hhende uwokude genjia qingiezhi ayi pugharazhi tai jiuikui shiqinni xiacha giezhi chenjigha. 
\v 13 Tai sudoro wilie giezhi goya gou isine gieghane giezhi tande duranji gieku nenli ogisanshi Huda wo. 
\v 14 Ta yan shiqin gieliuzhe boxin bu kielie, bu jianjindu. 
\v 15 Tande yama kheilaku wizhi ganjintu kun gholu. Ta Hudade yama maobin witu kewosi danlazhi duyade doghun, wirulasan kunlai dunda gon fai. 
\v 16 Aminni daolii xienjizhi khizhegha. Ingiese bi Mexihani udude goyane belien ese holuzhi belien wilie ese giezho giezhi kuaine. 
\v 17 Bi tai xianxin giekude oluzhi goyane sidagha gieku teizi jiere mure danlaghazhi chusunne pojieliuzhe bayasuzhi da tanre hhantu bayasune. 
\v 18 Taye qingiezhi bayasu, da mare hhantu bayasu.
\s Qimotai Ibafuqighala
\p
\v 19 Bi Ezhan \pn Ersa\pn*i kouizhi \pn Qimotai\pn*ni tai hhende ghujighande peizhi echighaye giezho. Tai qinkonlai mejiezhi bi zhughene nanranshighane giezho. 
\v 20 Mare hhantu tande shixinji gonxin giesan kun hhense chugo nieda uwo. 
\v 21 Psedu kunla man zinie goyane shiqinyi guine, \pn Ersa\pn* Mexihani shiqinyi ulie guine. 
\v 22 Ingieliuzhe \pn Qimotai\pn*ni kunyi ta mejiene. Hhe goya adane mutun mii uzhezhi mare hhantu gouxioxide oluzhi wilie giezho. 
\v 23 Ingiese bi goyane shiqinni jiegoi mejiese deigo hhei peizhi echighane giezho. 
\v 24 Ingie oloncha ulie beidene biye echikui Ezhanyi miende xianxin giezho.
\p
\v 25 Ingiezhoma, bi sumulase \pn Ibafuqi\pn*ni tai hhende khareizhi echighaku biyo wine giezho. Hheshi mii gaijiu, lienshou, mare hhantu zhan eghindusan kun wo. Ta hhei peizhi bi xiyo bikude banman gieghale irezho. 
\v 26 Hhe ta dajialai hende sanazhi, da hhe giemeresei ta mejiese hhe hende nango giezho. 
\v 27 Shuhua hhe giemerezhi fugukude kuruwoma, ingieliuzhe Huda hhende ubali xiizhi madeye ubali xiizho. Pse bi genjia yuchou giene. 
\v 28 Ingiese bi genjia jindazhi hhei peizhi echighaye. Ta hhei chanlase bayasune, mii yuchou giekuye choghonshine. 
\v 29 Ta Ezhanyi miende hende bayasuzhi hhei jienlie. Imutu kunlai zunzhun gie. 
\v 30 Ta made banman gie dasande hhe banman giezhi Mexihai wiliede oluzhi chabudu aminni widawo.
\c 3
\s Zui Zhunyonishi Mexihani Taniku Wo
\p
\v 1 Mini gaijiula, zuihoude kielieye, ta Ezhanni miende bayasu. Bi xianxianji kielienyi pse huaise chijia uwo, tande haochu wine.
\p
\v 2 Ta hhezighan doghunni giesan kunlai fangula. Hhela nogheini xianli, beyene otolusan kun wo. 
\v 3 Zhenzhenji hetoune giesanlashi matan enezighan Hudai Ruhherde kouizhi libai giesanla wo, Mexiha \pn Ersa\pn*i kuaizho, beyede ese kouizho. 
\v 4 Biye beyede koui shidane. Kunla sumulase beyede kouine giese bi genjia ingiezhi gie shidane. 
\v 5 Mii oluzhi neimudude hetoune giewo. Bishi \png Isilie\png* minzu, \pn Bienyamin\pn* painughun wo. Zhenzhenji \png Xibolai\png* kun wo. Guijinghala kieliese bishi Falisai kun wo. 
\v 6 Rexinni kieliese bi jiohuini heizhi daozho. Guijinni yoqiughala kieliese made yama kheilakui uwo. 
\v 7 Ingieliuzhe eqighandei made gouni wo giesanlai ede bi Mexihani yenyinghala man gou wini danlaghazho. 
\v 8 Zinie ene pusho, bi soyujilai gou wini danlaghakushi bi zunjisan Ezhan Mexiha \pn Ersa\pn*ni tanikui zui zhunyoni danlaghazho. Bi hhende oluzhi soyujilane bendazhi hhagha mutun uzhekushi Mexihani goyadene ireghazhi 
\v 9 hhere hhantulane giezho. Made bisan gounishi guijinse iresan pusho, bi Mexihani xianxin giekughala Huda ogisan wo. 
\v 10 Bi Mexihani tanizhi hhei aminne olusan nenlii mejieku duran wine. Pse hhere hhantu ku shouizhi hhei fugukui daghaku duran wine. 
\v 11 Ingie bi fugusanse aminne oluse giezho.
\s Mubiode Daine Giezhi Holu
\p
\v 12 Eneshi bi ijin chengun oluwo, ijin onqienshiwo giesan pusho. Mexiha \pn Ersa\pn* made agighasanyi bi agine giezhi izhi holuzho. 
\v 13 Gaijiula, bi goyane agiwo giezhi ulie sumulane. Bi zinie nie shiqin giezho, daosan shiqinyi matadene meliedekui agine giezhi 
\v 14 mubiode daine giezhi holuzho. Ingie Huda Mexiha \pn Ersa\pn*i miende mii urudene ogine giesan asiman jieredu jianlini linlane giezho. 
\v 15 Ingiese matanyi dundadu hen kunla man ingiezhi sumulakui wo. Tande buxiantu xianfa bise Huda eneiye tande mejieghane. 
\v 16 Matan yan chendude kuruse zhao ene chenduzhe gieye.
\p
\v 17 Gaijiula, ta man mii daghazhi suru. Pse bijien tande surughasan yanzii daghazhi giesan hhezighan kunlai ta goude uzhe. 
\v 18 Bi chan tande kieliezho, ede pse wilazhi kielieye, olon kunla Mexihani shizijiai duitou mutun giezho. 
\v 19 Hhelani jiegoshi widakuni wo. Hhelani hudashi goyani kieli wo. Hhela goya shizhekune ulie mejiedene kuaine, sumulasanlashi duyani shiqin wo. 
\v 20 Matanshi asiman gojiani kun wo, hhense nie jiuichen irekui sagheizho. Hheshijiu Ezhan \pn Ersa\pn* Mexiha wo. 
\v 21 Hhe yanyanjii goyadene shunjighasan fugie nenlighala matanyi bixin beyeni goya famatu beyene mutun niekielien gholughane.
\c 4
\p
\v 1 Ingiese bi orezhi sanasan gaijiula, tashi mii bayasuku wo, mii mienzi wo. Bi oresanla, ta Ezhanni kouizhi beizhi undanla.
\s Sughaku Kielien
\p
\v 2 Bi \pn Yuyajie\pn*de xiahua gieye, pse \pn Xinduji\pn*de xiahua gieye, ta ghuala Ezhanni miende tonjie gie. 
\v 3 Mii zhenzhenji gou lienshou, bi chiiye xiahua gieye. Chi ene funilade banman gie. Hhela gouxioxini wiliede mare, pse \pn Gelimien\pn*, psedu lienshoulare hhantu khishulazhi daozho. Hhelai nierei aminni jilasan benzi jiere huaizho.
\p
\v 4 Ta Ezhanni miende chan bayasu. Bi pse kielieye, ta bayasu. 
\v 5 Jien kunlade renyine mejiegha. Ezhan chadashiwo. 
\v 6 Yamade munan bu giezhi yan shiqindeliuzhe onxian gie, xiahua giezhi kere, mafan gieku zhugheghala ta keresanlane Hudade kielie. 
\v 7 Ingiese kun lijie gie daku Hudai pinnan Mexiha \pn Ersa\pn*i sudoro tai zhughe, sumulakui baohu giene.
\p
\v 8 Gaijiula, zuihoude kielieye, ta chan zui gouni, kunla kuaikui sumula. Jien zhenni, zunjiku, gundanni, ganjinni, oreku, gou minshen enelai sumula. 
\v 9 Ta mase surusan, jienliesan, chenliesan, chanlasanlai izhigie gie. Ingiese pinnantu Huda tanre hhantu wo.
\s Feilibi Kunlai Murede Baolo Mafan Kieliezho
\p
\v 10 Bi Ezhanni miende hende bayasukushi ta mii zhaogu giekui ede pse jila irewo. Shijishan ta izhi mii zhaogu giene giezhoma jihui ese irezho. 
\v 11 Bi ingiezhi kieliekushi made yama chaisan pusho. Bi yan qinkondeliuzhe zhigan giekui suruwo. 
\v 12 Bi nanxinde matugie giekui mejiene, bayande matugie giekuiye mejiene. Chuduku, oliesuku, bayanni, chaiku, yan shiqin yan qinkondeliuzhe matugie gieku banfai bi suruwo. 
\v 13 Made lilian ogisan hhende kouizhi bi yanniliuzhe gie shidane. 
\v 14 Ingiezhoma, bi kunnan bikude ta mare hhantu danjizho, ingiese gou wo.
\p
\v 15 \png Feilibi\png* kunla, bi gouxioxi chonjizhi qiizhi \png Maqidun\png*se likai giekude baer ogiku shiqin jiere tanse chugo psedu jiohuila mare hhantu ese danjisanyi taye mejiene. 
\v 16 Bi \png Qiesalonijia\png*de bikude ta touchan erchanji bi injikulai ta khughozhi ireghawo. 
\v 17 Bi tanse mure kerene gie ese giezho. Zinie ta giesan wiliede haochu olodoghane giezho. 
\v 18 Made yanyanji wine, da feiliezho. Ta \pn Ibafuqi\pn*i tungo giezhi made khughosanlai bi jienliedene kuruzho. Eneshi Huda bayasuzhi jienlieku andatu mure wo. 
\v 19 Bi zunjisan Huda famatu bayansene Mexiha \pn Ersa\pn*i miende tai yanyanji injikulai ogizhi kurughane. 
\v 20 Matanyi ada Hudade chanqi izhi kuaikui ogi. Amine!
\s Zuihoude Kielien Asazho
\p
\v 21 Mexiha \pn Ersa\pn*i miendedu jien shentulade kielien asa. Mare hhantuku gaijiula tande kielien asazho. 
\v 22 Shentula man, tebieshi \pn Kaisa\pn* hongunni kunla tande kielien asazho. 
\v 23 Ezhan \pn Ersa\pn* Mexihani nenjien tai zhughede bi gie!