\id JUD DongXiang: DongXiang Bible draft 2
\usfm 3.0
\ide UTF-8
\ide 65001 - Unicode (UTF-8)
\rem Copyright Information: For any non-Paratext use of this text, permission must be obtained from the copyright holder.
\h Yuda Huaisan Xin
\toc1 Yuda Huaisan Xin
\toc2 Yuda
\toc3 Yud
\mt Yuda Huaisan Xin
\c 1
\s Kielien Asazho
\p
\v 1 \pn Ersa\pn* Mexihani hoji, \pn Yagebu\pn*ni gaijiu \pn Yuda\pn* tande xin huaizho. Tashi Ada Huda orezhi urusan wo, \pn Ersa\pn* Mexihade oluzhi baohu giesanla wo.
\p
\v 2 Tande ubali xiiku, pinnan, orekui ologhonni ogi gie!
\s Jia Loushila
\p
\v 3 Mii orentula, matan hhantu jienliesan jiuiku shiqinni fanmiende bi yenlai tande xin huaiku hende duralazhoma, ede bi sumulase ta xianxin giekune goude bareizhi baohu gie giezhi xin huaizhi fenfulaku biyo wine. Ene xianxin giekushi Huda shentulade 1 huide ogisan wo. 
\v 4 Niezhan kunla tai dunda ghulazhi orozhezho. Enelashi xienlian witu kun wo, hhelai zuini jinjikui eqighanse huaizho. Hhela Hudai nenjienni lon kijiezhi hu giekui gholughazho. Da mai zi niekozi zhanguiji, Ezhan \pn Ersa\pn* Mexihai ulie renjine.
\p
\v 5 Ta ene shiqinyi 1 huide man mejiewoma, bi tande pse jilaghaye giezho. \pn Ersa\pn* bexinlane \png Aiji\png*se jiuidene khuinashi niezhan xianxin ulie giechen kunlai widaghawo. 
\v 6 Pse goya wizidene ulie beizhi sousan oronsene likai giesan qienxienlani fugie panjiku udu kuzhetula qieshenghala chanqi soziladene zui kharanide khazho. 
\v 7 Pse \png Sodoma\png*, \png Emola\png*, zhouwidedu chenshini kunlaye hhela mutun kunlare lon kijiezhi zhenchan wini naduzho. Ingiese hhelai faizhi ibeizi ulie xinieku khande teidene kunlade jingao giezho.
\p
\v 8 Hhe ghulazhi iresan jia loushilaye niekielien wo. Oruntan zhoujiliedene qienli wine giezho. Beyene zannanshighazho, qienlini yamacha ulie teine, da asiman jieredu famatulai sugiene. 
\v 9 Fugie qienxien \pn Mijiale\pn*liuzhe qingiezhi ese giezho. Hhe Ibilisighala \pn Musa\pn*ni fugusan beyede oluzhi jianjindukude sugieku kielienghala hhende zui ese jinjiwo. Zi ezhan chii kheila gie giewo. 
\v 10 Enela goya mejie dasanlane suibiende sugiezho. Sumula daku chushen mutun duranghala giezhi goyane qida olughazho. 
\v 11 Hhelade gou widawo! Hhela \pn Jiabi\pn*ni mode yozho. \pn Balan\pn* mutun baerde oluzhi codasande holu orowo. \pn Kela\pn* mutun zodui giedene fuguwo. 
\v 12 Ezhanni orekui jilazhi hhantulazhi ijiekude hhelashi xi jieredu zannanni wo.\f + \fr 1:12\fr* \em usu jizini tashi chonni mughuku mutun wixien wo\em* \f* Ulie shizhezhi ijiene, zi goyane chudughachen yanbashi wo. Ghura witu olien mutun kei feilie yozho. Baye xienzii alima ulie souku mutunghala niekielien wo. Icha fuguwo, lien genzi xi khizhese liancha fuguwo. 
\v 13 Haini fugie lan mutun goya shizheku momozine xirei khizheghane. Jiujia yoku hodun niekielien wo, zui khara oronni hhelade chanqi jiezho.
\p
\v 14 Jiushi enezighan kunlai zhiizhi \pn Adan\pn*ni 7 dai sunzi \pn Idileisi\pn* Hudai kielienyi deilazhi ingiezhi melie kieliewo, "Uzhe, ezhan qienwon zhiguitu qienxienlarene iredene 
\v 15 kunlai man panjine. Xienlian witu kunla giesan xienlian witu wilielani, pse xienlian witu zui fanjichen kunla Hudai fandui giezhi hu kieliesan kieliende zui jinjine." 
\v 16 Ene kunlade ibeizi kuru dazhi chan boxin kieliene. Yan duralase yan giene. Fugie kielien kieliene. Goya haochudene oluzhi kunlai bajie giene.
\s Xinyan Jiere Goyalane Hendagha
\p
\v 17 Mii orentula, mai Ezhan \pn Ersa\pn* Mexihani shitula melieshida kieliesan kielienyi ta jila. Hhela tande ingiezhi kieliezho, 
\v 18 duya barakude xienlian witu kunla khizhese goya duranghalane suibiende giezhi kunlai uzhezhi xiniene giezho. 
\v 19 Hhe jia loushilashi kunlai danxinraghachen kun wo. Hhelade Shenlin uwo, zinie ganxi beilieku zhughe wo.
\p
\v 20 Mii orentula, ta zui zhigui xianxin gieku jierene goyalane hendagha. Shenlinyi kouizhi onxian gie. 
\v 21 Huda matande oresanni chan jila. Mai Ezhan \pn Ersa\pn* Mexiha ubali xiizhi chanqiku aminni ogikui panji. 
\v 22 Niezhan kunla zhughedene inxin giese ta ubali xii. 
\v 23 Niezhan kunlai khan dundase qianlazhi jiuiku mutun jiui. Pse niezhan kunlade ubali xii. Qingiezhi giekude xioxin gie. Hhelai zuide bu hhantula.
\s Hudade Doulazho
\p
\v 24 Huda tai baohu giezhi ulie hhengereighane, tai zannannilai man widaghazhi bayasughazhi goyane fama melie beigha shidane. 
\v 25 Mai jiuichen niekozi Hudade mai Ezhan \pn Ersa\pn* Mexihai tungo giezhi kuaiku, wifen, nenli, qienli zui melieshida, ede, pse chanqi izhi wine gie! Amine.