\id JAS DongXiang: DongXiang Bible draft 2
\ide UTF-8
\ide 65001 - Unicode (UTF-8)
\rem Copyright Information: For any non-Paratext use of this text, permission must be obtained from the copyright holder.
\h Yagebu Huaisan Xin
\toc1 Yagebu Huaisan Xin
\toc2 Yagebu
\toc3 Yag
\mt Yagebu Huaisan Xin
\c 1
\s Kielien Asazho
\p
\v 1 Huda, Ezhan \pn Ersa\pn* Mexihani hoji \pn Yagebu\pn* xin huaizho. Gochude sandazhi sousan 12 gie paini kunlade kielien asazho. 
\v 2 Mii gaijiula, tande yanyanji chijia shiqinyi penjise hende bayasundu. 
\v 3 Tai xianxin giekui shiizhi daose rennai irekui ta mejiene. 
\v 4 Ta rennaini xiogoni man khizhegha. Ingiese ta fugiedazhi hulunshidene yama ulie chaine.
\p
\v 5 Tai dunda kiende agheli chaizhoshi soyuji kunlade dafande ogizhi ulie kheilaku Hudase xiahua gie, tande ogine. 
\v 6 Ta xiahua giekude xianxin giezhi goujida inxin bu gie. Inxin giechen kun haini lan mutun kei matugie feiliese qingie furane. 
\v 7 Intu kunla Ezhan yan ogine giezhi bu sumula. 
\v 8 Soyuji shiqin jiere zhuyine barei dazhi undanla dazho.
\p
\v 9 Boghoni gaijiula goya undunine kuai. 
\v 10 Bayan kunla goya boghonine kuai. Bayan kunla banche jieredu chizhe mutun widane. 
\v 11 Naran khizhe nie shase osun ghone, chizheni xiniezhi seighanni widane. Bayan kunye giesan dundane ingiezhi widane.
\p
\v 12 Chijia shiqinyi shoui shidachen kunlade fuqi wine. Shiizhi daosan kunde jianli wo giezhi aminni maghalai ogine. Eneshi Hudade oresan kunlade ogine giezhi dain giesan wo. 
\v 13 Kunyi shiise, "Mii Huda shiizho." giezhi bu kielie. Doghunni Hudai shii dane. Hheye kienmai ulie shiine. 
\v 14 Kunyi shiise goyani nefuxin miidene miighazho. 
\v 15 Nefuxinghala kieli fugiedase zui olune, zui fugiedase fugukui olune. 
\v 16 Bi oresan gaijiula, shandan bu gie. 
\v 17 Yanyanji gouni, onqienni nenjienlashi man jierese iresan wo. Gonqini Adai hhense irezho. Hhe goujida ulie bienjine, izhi niekielien wo. 
\v 18 Hhe goyane isighala zhendaoi tungo giezhi matande ada danlawo. Ingiedene matanyi hhe zhayaghasanla dundadu zui zhunyoni gholughawo.
\p
\v 19 Bi oresan gaijiula, enei mejie, kienliuzhe chenliekude ghujighan, kieliekude lalaghan, hokukude lalaghan. 
\v 20 Kunni hokuku Hudai gundanni khizhegha dane. 
\v 21 Ingiese yanyanji zannanni, olodosan doghunnilai man benda. Tai zhughede Huda zeilasan kielienni renyide jienlie. Ene kielien tai ruhherni jiui shidane.
\p
\v 22 Ta goyane piendazhi kielienyi zinie chenliechen bu gholudene zunjichen gholu. 
\v 23 Kun kielienyi zinie chenliedene ulie zunjise belijide goya uxinne uzheku niekielien wo. 
\v 24 Uzhedene yo daose goya yanzine deigo matawo. 
\v 25 Zinie kunlade ziyu ogisan onqientu guijinni xianxide uzhedene chenliesei uye matazhi zunjizhi giesan kunlade yan shiqin gieliuzhe fuqi wine.
\p
\v 26 Kun goyane xienlian wo giedene kielienne gonji dase goyane goya piendazho. Ene kunni xienlian yama oronde uwo. 
\v 27 Ada Hudai melie ganjin, zannan witu xienlianshi oliechen, guafulade kunnan bikude hhelai zhaogu giezhi da goyane baohu giezhi duyani zannanyi ulie cheiqighakui wo.
\c 2
\s Kunlade Pienxin Bu Gie
\p
\v 1 Mii gaijiula, ta mai famatu Ezhan \pn Ersa\pn* Mexihai xianxin giese kunlade pienxin bu gie. 
\v 2 Bilase nie kun antan geizhi zhozhi huaralasan jien musidene tai huitande orowo. Pse nie nanxin kun po jien musidene ye orowo. 
\v 3 Ingiese ta hhe huaralasan jien musisan kunde kieliene, "Ene gou wizhi jiere sou." Pse nanxin kunde kieliene, "Chi hhetoro bei, pse mii kon shida sou." 
\v 4 Eneshi ta goya kunne pienxin giezhi doghun mujighala pandon gieku pushonu?
\p
\v 5 Bi oresan gaijiula, chenlie. Huda duya jieredu nanxin kunlai sunghudene xinyan jiere ese bayazheghawu? Da Hudade oresan kunlade dain giesan hhe gojiani hhelade ese jienlieghawu? 
\v 6 Ta dou nanxin kunlai jiuren gieghazho. Tai qifulazhi fayende lai echisanshi baertu kunla pushonu? 
\v 7 Hhelashi ta jienliesan zhiguitu nierei sugiesanla pushonu?
\p
\v 8 Jinwun jiere goyadene mutun giebeidene ore giesan ene nie zui zhunyo guijinni ta zunjizhoshi oluzhoma, 
\v 9 kunlade pienxin giese zui fanjizho, guijin ta fanjisande zui jinjine. 
\v 10 Kien guijinni man zunjidene niei fanjise soyujilai man fanjizho. 
\v 11 "Piofen bu gie." giezhi kieliesan Huda "Kun bu ala." giezhi ye kieliezho. Ingiese piofen ese giedene kun alase guijinni fanjizho. 
\v 12 Ingiese ta yan kielie, yan giene giese ziyushighaku guijinghala panjiku mutun gie.
\p
\v 13 Ubali ulie xiichen kunyi ubali ulie xiikughala panjine. Ubali xiiku panjikuse injiwo.
\s Gieku Uwoshi Xianxin Giekushi Fugusanni Wo
\p
\v 14 Mii gaijiula, kunde xianxin gieku wine giezhi kieliedene yama giekui uwoshi yan zoin wo? Ene xianxin gieku hhei jiui shidanu? 
\v 15 Tai dunda gaijiu eghechijiulade niudunie musiku, ijiuni uwokude 
\v 16 ta hhelade, "Pinnande echi, musizhi khalun, ijiezhi chudu." giezhi kieliedene beyede injikui ulie ogise yan zoin wo? 
\v 17 Niekielien wo. Gieku witu zinie xianxin giekushi fugusei wo.
\p
\v 18 Ingiese niezhan kunla kieliene, "Chade xianxin gieku wine, made gieku wine." Chi gieku witu xianxin giekune made uzhegha. Bi giekughalane xianxin giekune chade uzheghaye! 
\v 19 Huda niekozi wo giezhi chi xianxin giese oluzho. Sheitanlaye hhei xianxin giedene ayizhi pugharazho. 
\v 20 Chi ene men kun, gieku witu xianxin giekushi yama zoin wituni chi mejieku duran winu? 
\v 21 Matanyi xienren \pn Iburaheimu\pn* \pn Isaghei\pn* kewonne sidagha gieku teizi jiere teikude giekughala gounide sanasan pushonu? 
\v 22 Chi uzhe, hhei xianxin gieku hhei giekughala hhantu wilie giezho. Giekughala xianxin giekui hulunshighawo. 
\v 23 Ingiese jinwun jiere \pn "Iburaheimu\pn* Hudai xianxin giedene Huda hhei gounide sanazho." giezhi kieliesan mutun gholuwo. Pse hhei Hudai zhanlien wo giezhi uruzho. 
\v 24 Ingie uzhese kunni gounide sanase giekughala wo, zinie xianxin giekughala pusho. 
\v 25 Niekielien wo, biozi \pn Lahe\pn* peizhi ireghasan kunlai jienliedene psedu mo jierese echighawo. Eneshi giekughala gounide sanasan pushonu? 
\v 26 Ingiese ruhher witu beye fugusan mutun gieku witu xianxin giekushiye fugusan wo.
\c 3
\s Kielienne Gonjiku
\p
\v 1 Mii gaijiulaya, ta olon kunla man loushi danlane bu gie. Loushi danlasan kunyi psedu kunlase gundude panjikui ta mejiene. 
\v 2 Matan dajiala go fanmiende cowu fanjine. Nie kun kielien jiere yama cowu ulie fanjise hheshi hulun kun wo. Goya hunshenne man kunzhi gie shidane. 
\v 3 Matan moreii amande ghada teizhi hhei hanshiliese hunshenyini kunzhi giene. 
\v 4 Pse chonni nie sumula, hhe fugie woma, honfen kei eghizhi chonni gojiolughaliuzhe siji niekozi ga banbaghala fanxianyi goyane isighala suibiende zhanwo giene. 
\v 5 Kielienye niekielien wo. Beye jieredu nie ga iyanzi woma, fugie kielien kielie shidane. Uzhe, zui gaji khanliuzhe nie linkoni sideragha shidane. 
\v 6 Kielienshi khan wo. Nie gou witu duya wo. Mai beye jiere teidene hunshenni zannanshighane. Dozoheini khanghala mai shenholai man sideraghane. 
\v 7 Kun yanyanji yewo, bunzhu, ghughei, zhaghasunlai hanshilie shidane, ede ijin hanshiliezho. 
\v 8 Zinie goya kielienne hanshilie dane. Kielienshi ulie beiku doghunni wo, alaku du duruzho. 
\v 9 Hheghala matan Ezhan, Adani doulazho. Pse hheghala Hudai yanzighala zhayaghasan kunyi kharazho. 
\v 10 Doulaku, kharaku nie amanse khizhezho. Mii gaijiula, ene ese oluzho. 
\v 11 Nie bula nudunse qien usu, kou usu khizhe shidanu? 
\v 12 Mii gaijiula, uhuago mutun jiere ganlan alima sou shidanu? Putou mutun jiere uhuago sou shidanu? Sou dane, kou bulase qien usu khizhe daku niekielien wo.
\s Hudase Iresan Agheli
\p
\v 13 Tai dunda kiende agheli, jienzha wine? Hhe kun aghelise iresan renyitu zhugheghala goude giezhi kunlade zhenmin gie. 
\v 14 Tai zhughede hende dubilieku, zisitu zhughe bise goyane bu tungulie. Ghudanghala zhendaoni fandui bu gie. 
\v 15 Ene aghelishi asiman jierese iresan pusho. Duya, nefuxin, sheitanse iresan wo. 
\v 16 Jien dubilieku sunsigheilieku winetu oronde londaku, yanyanji doghunni gieku shiqin wine. 
\v 17 Zinie asiman jierese iresan aghelishi xien ganjinni wo. Pse heqi, renyi, ranji, olon ubali xiizhi gounii gie, pienxin ulie gie, jiani wikui wo. 
\v 18 Heqishighachen kunla heqini tareidene gundanni ghurane.
\c 4
\s Duyaghala Zhanlien Bu Gholu
\p
\v 1 Tai dundadu sugienduku eghinduku khalase irezho? Tai sudorodu nefuxin khudoghozhi khizhesan pushonu? 
\v 2 Ta tanxin giesanne kerezhi echi dase kunlai alane. Dubiliezhi yama kerezhi echi dase eghinduzhi sugiendune. Ta kerezhi echi dakushi xiahua ese giezho. 
\v 3 Xiahua giedene kerezhi echi dakushi tai muji ese oluzho. Ta keresanne goya nefuxin jiere injine giezho.
\p
\v 4 Ta ene piofen giechen kunla, ta duyaghala zhanlien gholuse Hudaghala duitou gholusei ulie mejienu? Kienliuzhe duyaghala zhanlien gholune giese Hudaghala duitou gholuzho. 
\v 5 Pse ta sumulase Huda matai sudoro teisan ruhherde neiizhi dubiliekude kuruzho giesan jinwunni kielien yama isi uwonu? 
\v 6 Ingieliuzhe Huda ogisan nenjien genjia olon wo. Jinwun jiere kieliesan mutun,
\q1 "Huda goyane undude uzhesan kunlai fandui giene.
\q2 Goyane meilade uzhesan kunlade nenjien ogine."
\p
\v 7 Ingiese ta Hudai shunji. Ibilisii danla. Ibilisi tanse piine. 
\v 8 Ta Hudai shigha. Huda tai shighane. Zuirenla, khane ganjinragha. Zhuine barei dasan kunla, zhughene ganjinragha. 
\v 9 Ta yuchou giezhi nango giezhi wila. Tai xiniedunyi nango gholugha. Bayasukui yuchou gholugha. 
\v 10 Ta Ezhanyi melie goyane boghonide uzhe, ingiese hhe tai undudaghane.
\s Kunlai Bu Kielie
\p
\v 11 Gaijiula, ta nieniene bu sugie. Kien gaijiune sugiezhi kieliese guijinni sugiezhi kieliezho. Ta guijinni kieliese guijinni zunjisan kun pusho, panjiku noyen gholuwo. 
\v 12 Guijinni jinjichen, panjichen zi niekozi wo. Hheshi kunni jiui shidaku, widagha shidaku Huda wo. Kunlai kieliezhi chishi kien wo?
\s Goyane Bu Kuaizhi Hudade Kouizhi Gie
\p
\v 13 "Enedu, maghashijie matan khalakhala chenshide echi, niehon souzhi meimei giezhi baer zhenjiye." giezhi kieliesan kunla, chenliendu. 
\v 14 Ta maghashijie matui gholukui ulie mejiene. Tai aminshi yan wo? Khizhese deigo widaku tuman wo. 
\v 15 Ta indan ingiezhi kieliekuni wo, "Ezhan duran bise matan aminne olune, enei giene, hheiye giene." 
\v 16 Ingieliuzhe ta goyane undude uzhezhi kuaine. Qingiezhi kuaikushi man doghunni wo.
\p
\v 17 Ingiese kun gouni giekui mejiedene ulie giese zui fanjizho.
\c 5
\s Bayan Kunlai Jingao Giezho
\p
\v 1 Ta bayan kunla chenliendu. Tai jiere bouzheku zeinande tunku giezhi fugiede wila. 
\v 2 Tai boubeila qida oluwo, tai jienlai ghughei ijiewo. 
\v 3 Tai antan, miengu xiuqirawo. Ene xiuqi tai zhaku zhenji gholune. Khan mutun tai beyeni sidera widaghane. Ta duya baraku xienzide boubei sunjizho. 
\v 4 Uzhe, kunla tai ghazhade wilie giesan gunzini ta ese ogizho. Ene gunzi waradazhi boxin kieliezho. Hhezighan zhonjia ghurasan kunlai boxin giesan shenqi waradazhi Qienwon Buduini Ezhanni chighinde orowo. 
\v 5 Ta duyade futande udu daozhi zhomen xianshou giezho. Goyane ijiezhi taghulaghadene alane giesan hhe udude zhunbei giezho. 
\v 6 Ta gou kunyi zui jinjizhi alawoma, hhe fandui ese giezho.
\s Rennai Giezhi Onxian Gie
\p
\v 7 Ingiese gaijiula, Ezhan iretula ta rennai gie. Uzhe, zhonjia kun rennai giezhi eqie udan ghurai panjizhi ghazhase gou taran khizhekui sagheizho. 
\v 8 Taye rennai giezhi zhughene khiduzhegha. Ezhan ireku udu ghujinlazho. 
\v 9 Gaijiula, ta nieniedene boxin bu kielie. Pse ta panjikui shouine. Uzhe, panjiku Ezhan wijien konde beizho. 
\v 10 Gaijiula, ta Ezhanni niereghala kielien kieliesan xienzhilai shouku giezhi rennai giesan yanzii suru. 
\v 11 Uzhe, rennai giesan kunlade matan fuqi wine giezho. \pn Eibu\pn* rennai giesei ta chenliezhi daozho. Ezhan hhende zuihoude ogisei taye mejiene. Ezhande ubali xiiku, unbasaku olon wo.
\p
\v 12 Mii gaijiula, zui zhunyonishi fayen bu gie. Asiman, zemin, yanniliuzhe zhiizhi fayen bu gie. Ta kielien kieliekude enbeneshi enbene gie, pushoshi pusho gie. Ingiese tai ulie panjine.
\p
\v 13 Tai dunda kien chijia shiqin penjise onxian gie. Kien bayasuse zanmeishi doula. 
\v 14 Tai dunda kien giemerese jiohuini zhanlaolani uruzhi Ezhanni niereghala hhende oluzhi tosun moizhi onxian gie. 
\v 15 Xianxin giezhi onxian giekughala giemeresan kunyi goudaghane. Ezhan hhei bosizheghane. Hhe zui fanjizhoshi mienliene. 
\v 16 Ingiese ta nieniene zuini renjizhi nieniedene oluzhi onxian giema, tai gien goudane. Gou kun onxian giese zoin fugiede wine. 
\v 17 \pn Iliya\pn*shi matanre niekielienji kun woma, hhe hende onxian giezhi ghura bu bou giese 3 nienban zemin jiere ghura ese bouwo. 
\v 18 Khuina pse onxian giese asiman jierese ghura bouzhezhi zemin jiere zhonjia osiwo.
\p
\v 19 Mii gaijiula, tai dunda nie kun zhendaose likai giese kien hhei khareighazhoshi 
\v 20 zuirenyi miisan mo jierese khareighachen hhe kun hhe nie kunni fugukuse jiuizhi olon zuini kha widaghasei mejiekui wo.