\id EPH DongXiang: DongXiang Bible draft 2
\usfm 3.0
\ide UTF-8
\ide 65001 - Unicode (UTF-8)
\rem Copyright Information: For any non-Paratext use of this text, permission must be obtained from the copyright holder.
\h Ifuso Kunlade Huaisan Xin
\toc1 Ifuso Kunlade Huaisan Xin
\toc2 Ifuso
\toc3 Ifs
\mt Ifuso Kunlade Huaisan Xin
\c 1
\s Kielien Asazho
\p
\v 1 Hudai isighala Mexiha \pn Ersa\pn*de shitu danlasan \pn Baolo\pn* \png Ifuso\png*ni Mexiha \pn Ersa\pn*i shixinji daghasan shentulade xin huaizho. 
\v 2 Mai ada Huda, Ezhan \pn Ersa\pn* Mexiha tande nenjien pinnan ogi gie!
\s Mexihani Tungo Giezhi Iresan Fuqi
\p
\v 3 Mai Ezhan \pn Ersa\pn* Mexihani ada Hudai kuaindu. Hhe Mexihai miende matande asiman jiereshiku yanyanji ruhhertu gounii ogizho. 
\v 4 Duyai zhayaghaku melie orekughala Mexihai miende matai sunghuzhi goyane melie zhiguishighazhi jienjien witui gholughane giezho. 
\v 5 Goya isighalane bayasuzhi \pn Ersa\pn* Mexihai tungo giezhi matai goyane kewosi danlaghakui eqie jinjiwo. 
\v 6 Oresan kewonne nenjienghalane matande belien ogiwo. Ingiese Hudai famatu nenjienni matai kuaighane giezho. 
\v 7 Mexihai miende fugie nenjienghalane Kewonne chusunyi jiageghala matai shuizhi codasanni mienliewo. 
\v 8 Ene nenjienyi soyuji agheli cunminghala hhantu matande pojiezhi olon ogiwo. 
\v 9 Matande jihuane mimii mejieghawo. Eneshi Hudai gou duran wo. Mexihai miende chenjighane giesan wo. 
\v 10 Ene jihuashi shihou kurukude asiman, zemin jieredu yanyanjilai man Mexihai miende hhantulaghane. 
\v 11 Pse matan Mexihai miende nexianyi jienliewo. Eneshi duranghalane yanniliuzhe giesan Huda goya jihuaghalane eqie jinjisan wo. 
\v 12 Ingiekushi bijien zui melieshida xiwonni Mexihai jiere teisan \png Yutai\png* kunlai Hudai famani kuaighane giezho. 
\v 13 Taye zhenzhenji daoli, jiushi tai jiuiku gouxioxii chenliedene Mexihani xianxin giese Huda dain giesan Shenlinni tande ogizhi zhanzi taiwo. 
\v 14 Ene Shenlinshi matan jiachanni jienlieku yajin wo, matai shuizhi Hudai bexin gholughane, hhei famani kuaighane.
\s Baoloni Onxian
\p
\v 15 Ingiese ta Ezhan \pn Ersa\pn*i xianxin giezhi soyuji shentulade oresei bi chenliedene 
\v 16 onxian giekude tai jilazhi ese beidene tande oluzhi Hudade mafan kieliezho. 
\v 17 Bi tande mai Ezhan \pn Ersa\pn* Mexihai Huda, famatu Ada aghelitu ruhher pse mejieghaku ruhherni tande ogizhi ta hhei tani, 
\v 18 tai zhugheni nudunlai gieghereghazhi hhe tai uruzhi iresan xiwonshi yan bikui, pse shentulai dundadu hhei famatu jiachan matu olon bikui ta mejie, 
\v 19 pse Huda fugie lilianghalane matan xianxin giesan kunlade xienjighasan hhei nenli matu fugie bikui mejie giezhi onxian giezho. Ene nenlishi 
\v 20 Mexihai jiere giesan tebieji fugie lilian wo. Hhei fugusan kun dundase aminne olughazhi asiman jiere goya borun miendene soughazhi 
\v 21 yanyanji gonjisan, qienli bareisan, nenlitu, lindao danlasan, zinie edeku pusho, houshidedu yan nierelase da famashighawo. 
\v 22 Pse soyujilai Mexihai kon doura teizhi hhei jiohuini qiorun danlaghadene soyujilai gonjighazho. 
\v 23 Jiohuishi hhei beye wo. Soyujilai dunda soyujilai hulunshighasan Mexiha jiohuini hulunshighazho.
\c 2
\s Fugusanse Amiturawo
\p
\v 1 Eqighandei ta codasan dunda zui dundane fuguzho. 
\v 2 Hhe shihoude ta ene duyai xigonyi daghazhi asimanyi doghun lilianyi gonjisan hhei daghazhi zui dunda udu daozho. Hhe jiushi kielienyi ulie chenliechen kunlai sudoro wilie giesan ruhher wo. 
\v 3 Eqighandei matan man hhela mutun mai beyei nefuxinyi daghazhi udu daozho. Zui gieku duran, sumuladanni daghazhi giezho. Matan kunlare niekielien wo, olu bouzheghase Huda faichen kun wo. 
\v 4 Ingieliuzhe Hudade olon ubali xiiku wine, hhe matande oresan fugie orekughala 
\v 5 matan codasan dunda fugukudeni matanyi Mexihare hhantu aminne olughawo. Tai jiuikushi nenjienghala wo. 
\v 6 Mexiha \pn Ersa\pn*i miende matanyi Mexihare hhantu aminne olughadene asiman jiere hhere hhantu soughawo. 
\v 7 Ingiezhi giekushi Mexiha \pn Ersa\pn*i miende matande renyide ogisan hhei nenjien zhenzhen olon bikui jianlaiku kunlade man uzheghane giezho. 
\v 8 Tai jiuikushi nenjienghala wo, xianxin giedene jiuiwo. Eneshi goyase iresan pusho, Huda ogisan mure wo. 
\v 9 Giekughala pusho, pse goyane kuaine. 
\v 10 Matanshi Huda giesan wo, gou wilie gieghane giezhi Mexiha \pn Ersa\pn*i miende zhayaghasan wo. Eneshi Huda matande matugie udu dao giezhi eqighan jihua gie goudaghasan wo.
\s Mexihai Tungo Giezhi Heqishiwo
\p
\v 11 Ingiese ta jila, beyeghala kieliese eqighandei tashi niman kun wo. Hhezighan beye jiere kunni khaghala hetoune giesan kunla tai hetoune ese giesan kun giezhi uruzho. 
\v 12 Hhe shihoude tande Mexiha uwo, \png Isilie\png* kun ese danlaghazho, Huda yenjisan kielienghala gonxi uwo, duyade yama xiwon uwo, Hudaye uwo. 
\v 13 Eqighandei Hudase gholodosan ta ede Mexiha \pn Ersa\pn*i miende hhei chusunde kouizhi Hudare chadashiwo.
\p
\v 14 Mexihashi matanyi heqishighachen wo. Hhe beyene fugughazhi \png Yutai\png* kun niman kunyi dundadu danni unaghazhi chouni widaghawo. 
\v 15 \png Yutai\png* kunni guijinni minlin, kuichenlai widaghadene goyane sudoro \png Yutai\png* kun, niman kun ghualai nie shini kun gholughazhi heqishighawo. 
\v 16 Shizijiai tungo giezhi chouni widaghazhi ghualai nie beye gholughadene Hudare goudaghawo. 
\v 17 Da iredene heqishighaku gouxioxii ta gholodedu niman kunlade chonjizhi ogiwo, chadadedu \png Yutai\png* kunladeye chonjizhi ogiwo. 
\v 18 Ingiedene Mexihai tungo giezhi matan man nie Shenlinghala Hudai shida echi shidane.
\p
\v 19 Ingiese ede tashi niman kun, wigo kun pusho, shentulare nie gojia kun gholuzhi mechini kun wo. 
\v 20 Tashi shitu, xienzhilani jichu jiere beighasan gie wo, Mexiha goyaneshi gieni jichu tashi wo. 
\v 21 Mexihai kouizhi nie gie man lienjidene fugiedazhi Ezhanni zhiguitu dajien gholuzho. 
\v 22 Mexihai kouizhi taiye hhantu beighazho. Ene gieshi Huda Shenlinyi tungo giezhi souku oron wo.
\c 3
\s Baolo Niman Kunlade Chonjizho
\p
\v 1 Ingiese Mexiha \pn Ersa\pn*i yenyinghala ta niman kunlade oluzhi bafanzi sousan bi \pn Baolo\pn* tande oluzhi onxian giezho. 
\v 2 Huda tande oluzhi nenjienghalane made nie tebieji renwu ogisei ta kenjin chenliezhi daozho. 
\v 3 Huda mimii made qinsi mejieghawo. Enei bi eqighandei jiendanghan huaizhi daozho. 
\v 4 Ta onshise bi Mexihani mimii dunjiresanyi mejiene. 
\v 5 Ene mimii isii Huda ede Shenlinyi tungo giezhi zhiguitu shitu, xienzhiladene mejieghasan mutun eqighanku xienzidedu kunde ese mejieghazho. 
\v 6 Ene mimishi niman kunla gouxioxii tungo giezhi Mexiha \pn Ersa\pn*i miende hhantu caichanyi jienliechen danlazhi nie beyeni iyanzi gholuzhi hhantu Huda dain giesanyi jienliene. 
\v 7 Hudai nenjienghala bi gouxioxide hoji danlazho. Huda nenlighalane made ene nenlini ogizho. 
\v 8 Shentulai dundadu zui ganise da gajitu made Huda nenjien ogizhi Mexihani mejiezhi baragha daku olonnii niman kunlade chonji giezho. 
\v 9 Pse soyujilai zhayaghasan Hudai sudoro eqighanse izhi niuighasan mimitu jihuai olon kunlade man minbai olugha giezho. 
\v 10 Ingiekushi ede jiohuii tungo giezhi asiman jiere gonjisan, qienli bareisanlade Hudai yanyanji aghelilai mejieghane giezho. 
\v 11 Eneshi mai Ezhan Mexiha \pn Ersa\pn*i tungo giezhi gholusan Hudai chanqiku jihua wo. 
\v 12 Matan Mexiha \pn Ersa\pn*i sudoro hhei xianxin giezhi danzine fugiedaghazhi ulie inxin giedene Hudai melie echine. 
\v 13 Ingiese bi tai xiahua gieye, bi tande oluzhi shouku giewo giezhi yuchou bu gie. Eneshi tai kuaikui wo.
\s Baoloni Onxian
\p
\v 14 Ingiese bi Adai melie xiutuliezhi onxian giezho. 
\v 15 Hheshi asiman, zemin jieredu soyuji jiawulade man niere ogisan wo. 
\v 16 Hhe zhao goya olon fama, Shenlinne tungo giezhi tai sudorodu xianxin gieku zhugheni lilianghala khiduzhegha gie. 
\v 17 Xianxin giekughala Mexiha tai zhughede souzhi tai oreku dunda genzi bareighazhi undanlagha gie. 
\v 18 Ingie tande nenli bizhi soyuji shentulare Mexihani oreku matu aghui, fudu, undu, gun bikui goude mejieghadene 
\v 19 hhei oreku kunni sumulakuse daosanyi tande mejieghazhi Hudai hulunshighakughala tai hulunshigha gie.
\p
\v 20 Nenlini matanyi dunda ochirazhi matan xiahua giezhi sumulasanse pse olon chenjighasan Hudade 
\v 21 jiohui, Mexiha \pn Ersa\pn*i tungo giezhi zuzubeibei chanqi izhi kuaikui ogi. Amine!
\c 4
\s Mexihani Sudoro Heqishi
\p
\v 1 Ingiese Ezhande oluzhi bafanzi sousan bi tai sidaghaye, ta yan giese zhao Huda tai urusan mutun gie. 
\v 2 Yandeliuzhe goyane meilade uzhezhi renyide gie. Rennai giezhi oreku zhugheghala nieniedene ranji. 
\v 3 Heqighala nieniene lienjizhi Shenlin tonjie gieghasanni xiacha giezhi barei. 
\v 4 Tai urukude nie xiwonde urusan mutun nie beye, nie Shenlin, 
\v 5 nie Ezhan, nie xianxin gieku, nie xili gieku, 
\v 6 nie Huda wo. Hheshi soyujilai ada wo, soyujilai jiere soyujilai dunda soyujilai sudoro wo.
\p
\v 7 Matan jien kunde Mexiha ghughazhi ogisan nenli wine. 
\v 8 Ingiese jinwun jiere kieliezho,
\q1 "Hhe undude khireikude
\q2 olon duitoulane barei khireiwo,
\q2 kunlade nenlilai ogiwo."
\m
\v 9 Hhe khireiwo giezhi ene kielienshi yan isi wo? Hhe xien doura, jiushi zemin jiere bouzhesan pushonu? 
\v 10 Bouzhesan hheshi zui undu asimande khireisan Hhe wo. Ingiezhi giekushi soyujilai hulunshighane giezho. 
\v 11 Kun dunda niezhanlade shitu, xienzhi, gouxioxi chonjichen, mushi, loushi danlaku nenlini ogisanshi Mexiha wo. 
\v 12 Ingiezhi giekushi Mexihani wiliede oluzhi shentulai goude zhunbei gieghadene Mexihani beyeni hendaghane giezho. 
\v 13 Izhi ingiezhi giezhi matan dajiala Hudai kewonyi xianxin giezhi taniku jiere nie gholudene fugiedazhi Mexihani hulunnide daine. 
\v 14 Ingiese matan pse kewosi ulie danlazhi kunlai doghun muji, piendaku guijijighala yanyanji xiejioni inxianyi shouizhi eneman, hheman ulie gojioludene 
\v 15 oreku zhugheghala shuhua kieliezhi go fanmiende touzi danlasan Mexiha mutun hendane. 
\v 16 Mexihai kouizhi nie beyei sidasunla man chigharade lienjizho. Go iyanzi zoinlane khizheghazhi nie beyeni oreku dunda fugiedazhi hendaghazho.
\s Shini Kunni Musi
\p
\v 17 Ingiese bi enei Ezhanni miende tande khidunde kielieye. Pse niman kunla mutun qingiezhi udu bu dao. Hhelai sumuladan yama oronde uwo, 
\v 18 zhugheni kharalazho. Hhela yama ulie mejiezhi zhughene khiduzheghase Huda ogisan aminse danlinrazho. 
\v 19 Hhela shizhekui mejie dazhi hu giedene nefuxinghala yanyanji zannanni giene. 
\v 20 Ta Mexihase surusanshi intui pusho. 
\v 21 Zhendao \pn Ersa\pn*i sudoro wo. Ta \pn Ersa\pn* Mexihani chenliezhi hhense suruse 
\v 22 khuichen kunni teizhi eqighanku xigonlai widagha. Eneshi nefuxin miidene qida olusan wo. 
\v 23 Ta zhughe, sumulakune shinishighazhi 
\v 24 Hudai yanzi mutun zhenzhenji gundan, ganjinde zhayaghasan shini kunni musi.
\s Shini Udu Daoku Guijin
\p
\v 25 Ingiese ta pse ghudan bu kielie. Jien kun kunlade shuhua kielie. Matanshi nie beye jieredu iyanzi wo. 
\v 26 Hokuse zui bu fanji, hokuzhi naran bu puda. 
\v 27 Pse Ibiliside jihui ogine. 
\v 28 Ghulachenla pse bu ghula. Goyade iresei nanxin kunlade ghughazhi ogine giezhi qinsi zhendande wilie gie. 
\v 29 Zannan kielienni nie amanda bu khizheghazhi heshide kunlade banjiku kielien kielie. Ingiese chenliesan kunde haochu wine. 
\v 30 Hudai Shenlinni yuchou bu giegha. Hhe shuiku udude oluzhi tai jiere hhei zhanzii taizho. 
\v 31 Yanyanji henjiku, piqi shuaiku, hokuku, nouiku, kufurei fanjiku, pse mouxiennilai man tai dundase widagha. 
\v 32 Huda Mexihai miende tai rouliesan mutun taye renyitu zhugheghala ubali xiizhi nieniene roulie.
\c 5
\p
\v 1 Ingiese ta Hudai daghazhi suru, tashi Huda oresan kewosi wo. 
\v 2 Mexiha matande orezhi matande goyane sheidene Hudade ogisan andatu dunxi, mure danlazhi Hudade ogisan mutun taye yan giese oreku zhugheghala gie.
\p
\v 3 Lon kijieku, yanyanji zannanni gieku, tanxin giekulai tai dunda qiizhi da ulie olune. Shentula ingiezhi giese heshi uwo. 
\v 4 Shizheku kielien, hu kielieku kielien, zannan kielienlai bu kieliedene mafan gieku kielien kielie. 
\v 5 Ta goude mejie, lon kijiechen, zannanni giechen, tanxin giechenla Mexiha Hudaghalai gojiai jiachanni jienlie dane. Tanxin gieku nigiedade beiikughala niekielien wo.
\s Gonni Kewosi Mutun Gie
\p
\v 6 Enezighan shiqin jiere Hudai hokuruku hhezighan kielien ulie chenliechen kunlai jiere irene. Yama oronde witu kielienghala kiema tai bu piendagha. 
\v 7 Ingiese ta hhelare bu hhantula. 
\v 8 Ta eqighandeishi kharani woma, edeshi Ezhanyi miende gon wo. Ta yan giese gonni kewosi mutun gie. 
\v 9 Gonni jiegoshi yanyanji gouni, gundanni, zhenni wo. 
\v 10 Ezhan bayasuku shiqinshi yan wo giezhi kaoyen gie. 
\v 11 Yama haochu witu, khara shiqin giesan kunlare bu hhantula, khareidene hhezighan shiqin giesan kunlai kheila. 
\v 12 Hhela beimiende giesan shiqinlai qiise ungien hularane. 
\v 13-14 Manlai chujiegheghasanshi gon wo. Gon dunda khizheghasanlai man chujieghene. Ingiese kieliezho,
\q1 "Unturasan kunya, xierei!
\q2 Fugusanse bosizhe,
\q1 Mexiha chii zhouine."
\p
\v 15 Ingiese ta xioxin giezhi gie. Aghelitu kun mutun gie, ben kun mutun bu gie. 
\v 16 Jihuini goude barei, edeku gonyin doghun wo. 
\v 17 Ingiese ben kun bu danlazhi Ezhanni isishi yan bikui mejie. 
\v 18 Jiu ochizhi bu sudo, jiu kunni hu gieghane. Khareidene Shenlinghala goyane durugha. 
\v 19 Shige, zanmeige, ganjin donghala nieniedene doula. Zhughesene don giezhi Ezhande doula. 
\v 20 Yan shiqindeliuzhe mai Ezhan \pn Ersa\pn* Mexihani niereghala chan ada Hudade mafan kielie.
\s Zhanguiji Biereighala
\p
\v 21 Mexihai zunjiku zhugheghala nieniene shunji.
\p
\v 22 Biereila, Ezhande shunjiku mutun zhanguijidene shunji. 
\v 23 Mexihashi jiohuini qiorun biku mutun zhanguijishi biereini qiorun wo. Mexihashi ene beye, jiushi jiohuini jiuichen wo. 
\v 24 Jiohui Mexihade matugie shunjiku mutun biereiye yandeliuzhe zhanguijidene qingiezhi shunji.
\p
\v 25 Zhanguijila, Mexiha jiohuide orezhi goyane sheisan mutun biereidene ore. 
\v 26 Hhe ingiezhi giekushi Hudai kielienyi tungo giezhi usughala jiohuini waghazhi zhiguishighadene 
\v 27 famashighazhi goyadene khughoghane giezho, yama zannan jienjien chuchutu intui wizhi zhiguitu yama maobin witui gholughane giezho. 
\v 28 Niekielien wo, zhanguijiye beyedene oreku mutun biereidene orekuni wo. Biereidene orese goyadene orezho. 
\v 29 Kiemada goya beyene henjichen kun uwo, kharei guizhunde zhaogu giezhi Mexiha jiohuini zhaogu giekughala niekielien wo. 
\v 30 Matanshi hhei beye jieredu iyanzi wo. 
\v 31 "Ingiese kun ada anasene likai giedene biereighalane hhantulazhi ghuala nie beye gholune." 
\v 32 Eneshi fugie mimi wo. Bi Mexiha, jiohuighalai zhiizhi kieliezho. 
\v 33 Ingieliuzhe ta jien kunlaye goyadene oreku mutun biereidene ore. Biereiye zhanguijine zunji.
\c 6
\s Kewosi Ada Anarene
\p
\v 1 Kewosila, Ezhanyi miende ada ananughunne chenlie. Eneshi indanji wo. 
\v 2-3 "Ada anane zunji, ingiese chade gouni irezhi duyade oloncha agine." Eneshi dain giesanyi deilasan ji 1 gie minlin wo. 
\v 4 Adala, kesilane ho bu kughadene Ezhanni gonjiku banfa, pse sughakughala lai.
\s Hoji Ezhanrene
\p
\v 5 Hojila, Mexihanughunyi chenlieku mutun ayi pugharaku zhugheghala shixinji duyai ezhannughunne chenlie. 
\v 6 Zinie kunlai bayasughane giezhi kunlai melie bu gie. Khareidene Mexihade hoji danlazhi zhughesene Hudai isii zunji. 
\v 7 Kunni ushilaku mutun bu giedene Ezhanne ushilaku mutun bayasuzhi gie. 
\v 8 Bugon hoji danlasan, ziyutu kun, Ezhan jien kun giesan gou shiqinde jianli ogikui ta jila.
\p
\v 9 Ezhanla, hojiladeneye ingiezhi giezhi hhelai pse bu ayigha. Ta hhelade asiman jiere niekozi Ezhan bikui jila. Hhe kunlade pienxin ulie giene.
\s Ibilisighala Eghinduku
\p
\v 10 Zuihoude kielieye, ta Ezhanyi miende hhei fugie liliande kouizhi khiduzhe. 
\v 11 Zhan eghikude baohu gieku Hudai 1 tao jienni musi. Ingiese Ibilisini piendakui duii shidane. 
\v 12 Matan kunlare ese eghinduzho. Gonjisan, qienli bareisan, ene khara duyani lilian, asiman jieredu doghun ruhherlare eghinduzho. 
\v 13 Ingiese zhan eghikude baohu gieku Hudai 1 tao jienni musi. Ingiese ta ene doghun duyade duitoulai duizhi eghindu baludene bei shidane. 
\v 14 Bei undanlazhi nurundene zhendaoni pixilie, gundannii zhughei baohu gieku majia danlaghazhi musi, 
\v 15 heqishighaku gouxioxini heini chan zhunbei giedene kon jiere musi. 
\v 16 Enense chugo pse xianxin giekuni baohu gieku banba danlaghazhi barei. Ingiese Ibilisini khantu gunjienlai man xiniegha shidane. 
\v 17 Jiuikui toukui danlaghazhi zho. Shenlinni boujienyi barei, eneshi Hudai kielien wo. 
\v 18 Yan shihoudeliuzhe Shenlinde kouizhi olon onxian giezhi xiahua gie. Enende oluzhi jinxin giezhi chan zhazhen giezhi soyuji shentulade xiahua gie.
\p
\v 19 Madeye oluzhi onxian gie. Bi kieliekude Huda made heshini kielien ogizhi fugie danzighala gouxioxii mimii jianjizhi minbai olugha gie. 
\v 20 Ene gouxioxide oluzhi mii sozilawoma, bishi Hudai daibio enbene. Bi indan kieliekui danzine fugiedaghazhi jianjigha giezhi onxian gie.
\s Zuihoude Kielien Asazho
\p
\v 21 Mii qinkon, bi yan giesanlai \pn Tuijigu\pn* man tande mejieghane. Hheshi nie oresan gaijiu wo, Ezhande oluzhi shixinji giesan wiliechi wo. 
\v 22 Bi zhomen hhei tai hhende peizhi echighakushi bijienyi qinkonyi tande mejieghazhi tai zhughei nanranshighane giezho.
\p
\v 23 Ada Huda, Ezhan \pn Ersa\pn* Mexiha pinnan, oreku, xianxin giekui gaijiulade ogi gie. 
\v 24 Ulie bienjiku zhugheghala mai Ezhan \pn Ersa\pn* Mexihade oresan soyuji kunlade man nenjien ogi gie!