\id 2CO DongXiang: DongXiang Bible draft 2
\usfm 3.0
\ide UTF-8
\ide 65001 - Unicode (UTF-8)
\rem Copyright Information: For any non-Paratext use of this text, permission must be obtained from the copyright holder.
\h Gelindo Kunlade Huaisan Ji 2 Hui Xin
\toc1 Gelindo Kunlade Huaisan Ji 2 Hui Xin
\toc2 2Gelindo
\toc3 2Gel
\mt Gelindo Kunlade Huaisan Ji 2 Hui Xin
\c 1
\s Kielien Asazho
\p
\v 1 Hudai isighala Mexiha \pn Ersa\pn*de shitu danlasan \pn Baolo\pn* \pn Qimotai\pn* gaijiughala \png Gelindo\png*ni Hudai jiohui, pse \png Yagaiya\png*ni shentulade man xin huaizho. 
\v 2 Mai ada Huda, Ezhan \pn Ersa\pn* Mexiha tande nenjien, pinnan ogi gie!
\s Sidaghazhi Kieliechen Hudade Mafan Kieliezho
\p
\v 3 Mai Ezhan \pn Ersa\pn* Mexihani ada Hudade doula. Hheshi ubali xiichen ada wo, shiheni sidaghazhi kieliechen Huda wo. 
\v 4 Hhe olon kunnan dunda matai sidaghazhi kieliezhi hhe ogisan sidaghaku kieliesanghala matan psedu kunnan shouisan kunlai sidaghazhi kielie shidane. 
\v 5 Matan Mexihai kui olon shouisan mutun Mexihai tungo giezhi sidaghaku kielienye olon wo. 
\v 6 Bijien kunnan shouise tai sidaghazhi jiuikude oluzho. Bijienyi sidaghazhi kieliese tai sidaghazhi kieliekude oluzho. Ene sidaghazhi kielieku bijien shouisan xianlitu kunnanni ta shouikude tai rennai gieghane. 
\v 7 Ta bijien mutun ku shouise sidaghaku kielienyiye jienliekui bijien mejiene, ingiese bijien tande xiwon giesan goujida ulie bienjine.
\p
\v 8 Gaijiula, bijien \png Yaxiya\png*de shouisan kunnanni tande ulie mejieghaku duran uwo. Hhe shihoude bijien danjisan achanshi bijien danji dakui wo, lien amituraku xiwon da widazho. 
\v 9 Bijien sumulase bijienyi ijin sixin panjiwo giezho. Ingiekushi bijienyi goyadene ese kouighazhi fugusan kunyi aminne olughasan Hudade kouighane giezho. 
\v 10-11 Huda bijienyi fuguku wixiense jiuiwo, da izhi jiuine. Taye onxian giezhi bijiende banman giema, hhe pse bijienyi jiuikui bijien hende xiwon giezho. Ingiezhi olon kunla bijiende onxian giedene Huda dain giese olon kunla bijienyi yenyin jiere Hudade mafan kieliene.
\s Baolo Jihuane Bienjighawo
\p
\v 12 Bijien duyade giekude, tebieshi tanre laiwon giekude Huda ogisan zhijieji shixinji zhugheghala giezho. Kunni jienzhaghala ese giezhi Hudai nenjienghala giezho. Enende bijienyi lianxin ganzhen beine. Ingiezhi giesande bijien goyane kuaine. 
\v 13 Bijien ede tande huaisanshi zhao ta onshizhi dunjireku mutun huaizho. Ta ede bijienyi man dunjire dazhoma, bi xiwon giese man dunjire. 
\v 14 Ingiese Ezhan \pn Ersa\pn*i udude bijien tai kuaiku mutun taye bijienyi kuaine.
\p
\v 15 Made intu xinxin bise sumulazhi xien tai hhende echizhi tande ghuareifa nenjien ireghaye giezho. 
\v 16 Jiushi tai hhense jingo giezhi \png Maqidun\png*de echine, ingie \png Maqidun\png*se khareizhi tai dunda iredene ta mii \png Yudaya\png*de khughose giezho. 
\v 17 Bi ingiezhi jihua giese suibiende giezhou? Bi duyai banfaghala jihua giezhi enbene giekude pusho giezhi kielienu? 
\v 18 Bi kekaotu Hudai zhiizhi kielieye. Bijien tande kieliese yu enbene yu pusho giezhi ulie kieliene. 
\v 19 Bi, \pn Seila\pn*, \pn Qimotai\pn* ghuralie tai dunda chonjisan Hudai kewon, \pn Ersa\pn* Mexihashi enbene giekude pusho giekui pusho. Hhende zinie enbekui wine. 
\v 20 Hudai dain giesanla giedughanliuzhe Mexihai sudoro man enbekui wo. Ingiese matan Mexihai tungo giezhi amine kieliezhi Hudai kuaine. 
\v 21 Mexihai miende bijienyi tanre hhantu khiduzheghazhi teshu wiliede oluzhi matanyi sunghusanshi Huda wo. 
\v 22 Hhe matai jiere zhanzi taizhi Shenlinni mai zhughede ogizhi yajin daruwo.
\p
\v 23 Bi \png Gelindo\png*de pse ese irekushi tande oluzho. Enende Huda made ganzhen bei giezhi bi kielie shidane. 
\v 24 Bijien tai xinyanni gonjine gieku pusho, tai bayasughane giezhi tanre hhantu wilie giezho. Ta xinyan jierene beizhi undanlazho.
\c 2
\p
\v 1 Bi tai hhende echise pse nangoni deilazhi ulie echine giezhi jiejin giewo. 
\v 2 Bi tai nango gieghazhoshi bi nango gieghasan tanse chugo kien mii bayasughane? 
\v 3 Bi eqighandei xinni huaikushi bi irekude indan mii bayasughaku kunla khareidene mii nango gieghakuse ayizho. Bi bayasuse ta dajialaye bayasukui bi xianxin giezho. 
\v 4 Bi eqighandei zhughedemi otuzhi yuchou giezhi wilazhi tande xin huaikushi tai nango gieghane ese giezho, bi tande matugie oresei mejieghane giezho.
\s Zui Fanjisan Kunni Mienlie
\p
\v 5 Kunni nango gieghasan hhe kun zinie mii nango gieghakui pusho, ta dajialaiye man ezighan nango gieghazho. Bi ingiezhi kieliese hende gofen uwo. 
\v 6 Intu kunyi ta olon kunla qingie faise kuruwo, 
\v 7 ede khareidene hhei rouliezhi sughazhi kielie, pse nango olon giese bazilie dane. 
\v 8 Ingiese bi tai xiahua gieye, ta hhe kunde oreku zhughene goude mejiegha. 
\v 9 Bi eqighandei xinni huaikushi ta yan shiqindeliuzhe shunjinu ulie shunjikui shiizhi mejiene giezho. 
\v 10 Ta kienyi mienliese bi kienyi mienliene. Bi kienyi mienliese Mexihai melie tande oluzhi mienliezho, 
\v 11 pse Ibilisi matanyi pienyi zhanjine. Matan hhei mujii ulie mejiekui pusho.
\s Baolo Teloyade Munan Giezho
\p
\v 12 Bi Mexihani gouxioxide oluzhi \png Teloya\png*de echise Ezhan made gouxioxi chonjiku wijienni niewoma, 
\v 13 bi oresan gaijiu \pn Qido\pn*i chanla dase zhughedemi nanran uwo. Ingie hhendedu kunlade salan gie \png Maqidun\png*de echiwo.
\s Mexihai Tungo Giezhi Injine
\p
\v 14 Hudade mafan kielieye, hhe Mexihare hhantu matanyi chan uduruzhi zhan eghizhi injighazho. Pse matai tungo giezhi Mexihai taniku andatui gochude funqieghazho. 
\v 15 Bugon jiuisan kun, widachen kun dunda matanshi Hudade ogiku Mexihani andatu widao wo. 
\v 16 Ene widao widachen kunlade fugughaku fumughei wo, jiuisan kunlade aminni andatui wo. Kien intu renwuni gie shidane? 
\v 17 Bijien olon kunla mutun Hudai daolii baer huiku dunxi ese danlaghazho. Bijien jianjise Huda peisan mutun Hudai melie Mexihai kouizhi shixinji giezho.
\c 3
\s Shini Yenjisan Kieliende Gonjia Danlaku
\p
\v 1 Bijien pse goyane jieshao gie qiiwu? Bijien niezhan kunla wo giezhi bijienyi jieshao xinni tande oginu? Tanse jieshao xin keredene kunlade oginu? 
\v 2 Tashijiu bijienyi jieshao xin wo, bijienyi zhughede huaizhi kunla man tanizhi onshizho. 
\v 3 Ta minminjishi Mexihani xin wo, bijienyi tungo giezhi huaisan wo. Meshuighala huaisan pusho, chanqiku Hudai Ruhherghala huaisan wo. Tashi jiere ese huaizho, kunni zhughe jiere huaizho.
\p
\v 4 Bijien Mexihani tungo giezhi Hudai melie qingiezhi xianxin giezho. 
\v 5 Ingiezhi kieliese bijien goya nengandene kouizho giesan pusho. Bijienni nenganshi Hudase iresan wo. 
\v 6 Huda bijiende shini yenjisan kieliende gonjia danlaku nengou ogizho. Ene yenjisan kielienshi uroughala giesan pusho, ruhherghala giesan wo. Urou kunni fugughane, ruhher kunde amin ogine.
\p
\v 7 Tashi jiere uroughala huaisan fuguku wilie irekude fama bizhi \png Isilie\png* kunla \pn Musa\pn*i khizha jieredu widaku gonni uzhe dazhoma, 
\v 8 Shenlinni wiliei famani genjia fugie uwonu? 
\v 9 Kunde zui jinjiku wiliede fama bise kunni gounide sanaku wiliede fama genjia fugie wo. 
\v 10 Ene tebieji fugie famani yenyinghala eqighanku fama widawo. 
\v 11 Hhe zhanshi jiere bidene widakude fama bise hhe chanqikude fama genjia olon wo.
\p
\v 12 Ingiese matande intu xiwon bise fugie danzighala kieliene. 
\v 13 Matan \pn Musa\pn* wo giezhi shoujinghala khizhane huighazhi \png Isilie\png* kunlai hhe niechaku famani widakui ulie chanlaghane gie ese giezho. 
\v 14 Ingieliuzhe hhelai zhughe khiduzhezhi eli kutula khuichen yenjisan kielienni onshikude ene shoujinni da ese agizho. Ene shoujinni Mexihare hhantulase agi widaghane. 
\v 15 Eli kutula niefanie \pn Musa\pn*i shuni onshikude shoujin hhelai zhughede wo. 
\v 16 Hhelani zhughe giezhe Ezhande shunjise shoujin giezhe widane. 
\v 17 Ezhanshi hhe ruhher wo, Ezhanni ruhher khalashi khala ziyu wine. 
\v 18 Matan man shoujin ese khaghasan khizhaghala Ezhanni famani uzhezhi, Ezhanyi yanzi mutun bienjizhi yebeiseye fugie famatu gholuzho. Ene Ezhanyi ruhherse irezho.
\c 4
\s Wagangan Sudorodu Boubei
\p
\v 1 Ingiese Huda bijiende ubali xiizhi ene renwui ogise bijien zhughe ulie widane. 
\v 2 Khareidene niuighazhi giesan shizheku shiqinyi bendawo. Piendaku shiqin ulie giezhi Hudai daolii ulie wirulaghane. Zhendaoni qinchude kieliezhi Hudai melie jien lianxintu kunlade goyane jieshao giene. 
\v 3 Bijien chonjisan gouxioxii khaghazhoshi widachen kunlade khaghazho. 
\v 4 Ene duyai Ibilisi enezighan xianxin ulie giechen kunlai nudunyi sugho gholughazhi gouxioxii gonni ese chanlaghazho. Ene gouxioxide Mexihai famani kieliezho. Mexihashi Hudai yanzi wo. 
\v 5 Bijien chonjisanshi goyane pusho. \pn Ersa\pn* Mexihashi Ezhan bikui, pse \pn Ersa\pn*de oluzhi tande hoji danlasanni chonjizho. 
\v 6 "Kharanise gon khizhe" giezhi kieliesan Huda \pn Ersa\pn* Mexihai khizha jieredu goya famane mejieghaku gonni mai zhughede zhouighazho.
\p
\v 7 Bijiende ene boubei winema, bijienshi zinie boubei teiku wagangan wo. Ingiekushi tebieji fugie nenlishi bijiennughun pusho Hudanughun bikui mejieghane giezho. 
\v 8 Bijienyi simiense daruzhoma, daruzhi yama giegha dazho. Zhughede kunnan winema, xiwon ese widazho. 
\v 9 Heizhoma, Huda bijienyi ese bendazho. Eghi unaghazhoma, eghizhi ala dazho. 
\v 10 Bijien beye jierene \pn Ersa\pn*ni duya ijiekui chan deilakushi \pn Ersa\pn*ni aminni bijienyi jiereye xienjizhi khizheghane giezho. 
\v 11 Bijien amitukude \pn Ersa\pn*ni yenyinghala chan fuguku wixien dunda wo. Ingiekushi \pn Ersa\pn*ni aminyi bijienyi fuguku beye jiere xienjizhi khizheghane giezho. 
\v 12 Ingie uzhese fuguku bijienyi jiere ochirazho, amin tai jiere ochirazho.
\p
\v 13 Jinwun jiere, "Bi xianxin giezho, ingiese bi kieliezho." giezhi huaisan mutun bijiendeye xianxianji xianxin gieku wine, ingiese bijien xianxin giedene kieliezho. 
\v 14 Ezhan \pn Ersa\pn*i aminne olughasan hhe bijienyiye \pn Ersa\pn*re hhantu aminne olughazhi bijienyi tanre hhantu hhei melie beighakui bijien mejiene. 
\v 15 Enelashi man tande oluzhi giezho. Ingiese nenjien yebeiseye olon kunlade echizhi mafan gieku zhughe olodozhi kuaikui Hudade ogine.
\s Xianxin Giekui Kouizhi Udu Dao
\p
\v 16 Ingiese bijien zhughe ulie widane. Bijienyi beye goujijia qida olunema, zhughe niudunie shinishizho. 
\v 17 Bijienyi zhanshi jieredu gongien kunnan jianlai ireku hashu witu chanqiku fugie famani chenjighane. 
\v 18 Bijien gonxin giekushi chanlaku pusho, chanla daku wo. Chanlakushi niechaku wo, chanla dakushi chanqiku wo.
\c 5
\p
\v 1 Mai zemin jieredu zhanfanyi chei widaghase Hudai hhense ireku gie matande winekui matan mejiene. Kunni khaghala giesan pusho, asiman jieredu chanqiku gie wo. 
\v 2 Matan ene zhanfande shonholozhi asimanse iresan gieghala jien musiku mutun arunzhakui panjizho. 
\v 3 Qingie musise hulan muchughun ulie gholune. 
\v 4 Matan ene zhanfande gunduni beiliezhi shonholokushi teine ese giezho, musine giezho. Ingiezhi ene fuguku beyei amin yenji boughane. 
\v 5 Ene mujide oluzhi matai nanpeilasanshi Huda wo. Hhe matande Shenlinni yajin danlaghazhi ogiwo.
\p
\v 6 Ingiese, matan beyede bikude Ezhanse gholo bikui mejienema, matande chan fugie danzi wine. 
\v 7 Matan yan giese chanlakughala ese giezho, xianxin giekughala giezho. 
\v 8 Matande fugie danzi wine. Beyese likai giezhi Ezhanghala hhantu souku genjia duran wine. 
\v 9 Ingiese matan beyedeye olune beyese likai gieye olune matanyi mujishi hhei bayasughane. 
\v 10 Matan man bixi Mexihani shenpantai melie xienjizhi khizheghadene zhao jien kun giesan gouni, doghunni mutun kharulune.
\s Kunlai Hudaghala Goudaghaku Renwu
\p
\v 11 Ezhanshi indan zunjikui bijien mejiese kunlade sughazhi kieliene. Huda bijienyi mejiene, bi xiwon giese taye zhughedene bijienyi mejie. 
\v 12 Bijien pse tande goyalane jieshao ese giezho, bijienyi kuaiku jihuini tande ogine giezho. Ingiese hhezighan zhughei ulie uzhedene mienzii uzhezhi kuaisan kunlai melie kieliekui wine. 
\v 13 Bijien fenjiulise Hudade oluzho, zhenchanshi tande oluzho. 
\v 14 Ingiekushi Mexihani oreku bijienyi biizho. Nie kun soyuji kunlade oluzhi duya ijiese soyuji kunla duya ijiesanyi bijien mejiene. 
\v 15 Mexiha soyuji kunlade oluzhi duya ijiekushi amitu kunla pse goyadene oluzhi ulie amiturazhi hhelade oluzhi duya ijiedene aminne olusan Ezhande oluzhi amituraghane giezho.
\p
\v 16 Ingiese enedu khuinase matan kienniliuzhe kunni uzhedanghala ulie uzhene. Eqighandei Mexihaniye kunni uzhedanghala uzhewoma, ede pse qingiezhi ulie uzhene. 
\v 17 Kien Mexihai miende bise hheshi shini giesan kun wo, khuichennila daozhi man shinii gholuwo. 
\v 18 Enelashi man Hudase iresan wo. Hhe \pn Ersa\pn* Mexihai tungo giezhi matanyi goyarene goudaghazhi pse kun Hudaghala goudaghaku renwuni matande ogiwo. 
\v 19 Eneshijiu Huda duyai kunlai zuini ese asadene Mexihai tungo giezhi goyarene goudaghazho. Pse goudaghaku daolini matande jiuizhi ogiwo. 
\v 20 Ingiese matan Mexihai daibio giezho. Huda matai tungo giezhi kunlade sidaghazhi kieliezho. Matan Mexihai oronde ta Hudare gouda giezhi tai xiahua gieye. 
\v 21 Huda hhe zui wituni matande oluzhi zuitu gholughakushi matanyi hhei sudoro Hudai gouni gholughane giezho.
\c 6
\p
\v 1 Hudare hhantu wilie giesan bijien tai xiahua gieye, Hudai nenjienni jienliezhi belienni bu gholugha. 
\v 2 Huda kieliezhi,
\q1 "Heshitu shihoude bi chinughunyi chenliewo.
\q2 Jiuiku udude bi chade banman giewo."
\m giezho. Uzhe, ede zhen heshitu shihou wo, uzhe, ede zhen jiuiku udu wo!
\p
\v 3 Bijien giesan wiliene ulie sugieghane giezhi jinlianji kiendeliuzhe chijia ese teizho. 
\v 4 Khareidene goyaneshi Hudai hoji wo giezhi yanyanji shiqin jiere uzheghazho. Jiushi olon rennai gieku, kunnan, chijia shiqin, zeinan, 
\v 5 eghiku, khaku, nouiku, khishulaku, kijie daku, ijie daku dunda 
\v 6 bijien ganjinde giezhi erlin, rennai gieku, renyi, Shenlin, zhenzhenji oreku, 
\v 7 shuhua kielieku, Hudai nenlighala giezho. Borun soghei khade gundan uqi bareidene 
\v 8 bugon bijienyi zunjiye hao, shizheghaye hao, sugieye hao, kuaiye hao bijien ingiezhi giezho. Kunla kieliese piendachen wo giezhoma, bijien shuhua kieliezho. 
\v 9 Bijienyi kiema ulie mejiene giezhoma, niere fugie no wo. Fuguwo giezhoma, amitu wo. Bijienyi faizhoma, ese alazho. 
\v 10 Bijien yuchou giesanyi xianlima, chan bayasuzho. Nanxin wo giezhoma, olon kunlai bayazheghazho. Uzhese yama uwoma, yanliuzhe wine.
\p
\v 11 \png Gelindo\png* kunlaya, bijien tande zhijie kieliezhi zhughene keighazho. 
\v 12 Bijien tai zhughei ese meilashighazho, ta goyalane meilashighazho. 
\v 13 Bi kewosidene kielieku mutun kielieye, bijien giesan mutun taye bijiende zhughene keigha.
\s Chanqiku Mechi
\p
\v 14 Ta xianxin ulie giechen kunlare nie jiabanyi bu zho. Gouni mouxiennighala matugie hhantulane? Gon kharanighala matugie laiwon giene? 
\v 15 Mexiha \pn Bilie\pn*ghala\f + \fr 6:15\fr* \em Ibilisi\em* \f* matugie heqishine? Xianxin giesan, ulie xianxin giesanghala matugie hhantu giene? 
\v 16 Mechi nigiedaghala matugie hhantulane? Matanshi chanqiku mechi wo. Zhen Huda kieliesan mutun,
\q1 "Bi hhelai dunda souzhi hhelare laiwon giene.
\q2 Bi hhelade Huda danlane.
\q2 Hhela made bexin danlane."
\m
\v 17 Ezhan kieliezho,
\q1 "Ingiese ta hhelai dundase khizhezhi hhelase danxinra.
\q2 Zannan dunxilai bu shighama, bi tai jienliene.
\q1
\v 18 Bi tande ada danlane.
\q2 Ta made kewon oqin danlane.
\q1 Eneshi nenlitu Ezhan kieliesan wo."
\c 7
\p
\v 1 Ingiese mii orentula, matande enezighan dain giesan bise beye, zhughe jieredu zannannilane waghazhi man widaghadene Hudai zunjiku zhugheghala onqienji zhiguishighaye.
\s Jiohuini Kunla Geise Baolo Bayasuzho
\p
\v 2 Ta aghui zhugheghala bijienyi jienlie. Bijien kiemai ese kuighazho, kiemai ese heizhi pienyi ese zhanjizho. 
\v 3 Bi ingiezhi kieliekushi tai kheilane ese giezho. Bi eqighandei kieliezhi daosan mutun ta chan bijienyi zhughede bizhi bijien tanre amiturazhi fuguliuzhe hhantulaku duran wine. 
\v 4 Bi tande xinxin fugie wo, tai ologhonni kuaizhi zhughedemi futan no wo. Bijien shouisan olon kunnan dunda bi hende bayasuzho.
\p
\v 5 Bijien \png Maqidun\png*de kurudeneye hhamura dazhi gochuse kunnan shouizho. Ghadane maodun wo, sudoro ayizho. 
\v 6 Ingieliuzhe xiwon widasan kunlai sidaghazhi kieliesan Huda \pn Qido\pn*i irekui tungo giezhi bijienyi sidaghazhi kieliewo. 
\v 7 Zinie hhei irekughala pusho, hhe tai hhense jienliesan sidaghazhi kieliekughala bijienyi sidaghazhi kieliewo. Ta mii sanasan, goya nango giesan, pse ta made rexinde giesei hhe made man kieliese bi genjia bayasuzho. 
\v 8 Bi tande hhe xinni huaizhi tai zhanshi jiere nango gieghasei mejiedene houhui giezhoma pse houhui ulie giene. 
\v 9 Ede bi bayasukushi tai nango gieghasande pusho, nango giedene geiikude echighasande wo. Ta Hudai isi mutun nango giedene bijien tai ese shanjizho. 
\v 10 Zhao Hudai isi mutun nango giese houhui ulie giezhi geidene jiuine. Duyai nango gieku kunyi fugughane. 
\v 11 Ta nie uzhe, ta zhao Hudai isi mutun nango giedene ede tai dunda imegheni rexinde gieku, goyane huiku, doghunnide hokuku, jinshen khizheku, mini sanaku, bayasuzhi gieku, codasanni faiku wine. Ene shiqin jiere go fanmiende ta goyalane gou bikui zhenmin giezho. 
\v 12 Ingiese bi tande hhe xinni huaise pienyi zhanjisan kunde ese huaizho, kuighasan kundeye ese huaizho. Khareidene ta bijiende rexin bisei Hudai melie tande zhenmin giene giezho. 
\v 13 Ingiese bijienyi sidaghazhi kieliewo.
\p Ene sidaghasanse chugo ta olon kunla \pn Qido\pn*ni zhughei futanshighazhi bayasughase bijien genjia bayasuzho. 
\v 14 Bi \pn Qido\pn*de tai kuaizhi daozhoma, ta mii ese shizheghazho. Bijien tande kieliesan kielienshi man zhenni bikui mutun bijien \pn Qido\pn*de tai kuaisanshi zhenni bikui zhenmin giewo. 
\v 15 Ta manla hhei shunjizhi ayi pugharazhi goude jienliesei hhe sumula irese tande oreku zhughe genjia hhereizho. 
\v 16 Bi tande onqienji zhughene teise bayasuzho.
\c 8
\s Bayasuzhi Ogi
\p
\v 1 Gaijiula, Huda \png Maqidun\png* jiohuilade ogisan nenjienni bi tande mejieghaye. 
\v 2 Kunnan dunda hhelai fugiede shiikude hende bayasuzhi tebieji nanxin bikude kunlade tebieji dafande ogizho. 
\v 3 Hhela banman giekude zhao nenlighalane, pse nenlisene chaogo giezhi goyalane ogisei bi ganzhen bei shidane. 
\v 4 Hhela bijienyi haojihui hende xiahua giezhi shentulade banman gieku shiqin jiere jihui ogizhi guzi beigha giezho. 
\v 5 Hhela giesan bijien sumulasanse olon chaogo giezho. Hhela goyane xien Ezhande ogizhi pse Hudai isighala bijiende ogizho. 
\v 6 Ingiese bijien \pn Qido\pn*de ene gou shiqinyi chi kaishi giese tai dunda giezhi chengun olugha giezhi sughazhi kieliewo. 
\v 7 Ta xianxin gieku, kielien kielieku, erlin, rexin, bijien tande oreku jiere man kunlase zui goude giesan mutun nanxin kunlade banman gieku shiqin jiereye zui goude giekui bijien xiwon giezho.
\p
\v 8 Bi ingiezhi kieliese tande ese fenfulazho, kunlai rexinghala tai oreku zhugheshi shixinji enbenu pusho bikui uzhene giezho. 
\v 9 Mai Ezhan \pn Ersa\pn* Mexihani nenjienyi ta mejiene. Hhe yenlai bayan wo, tande oluzhi nanxinshikushi hhei nanxinnighala tai bayazheghane giezho. 
\v 10 Kunlade ogiku shiqin jiere bi tande sumulakune kielieye. Ta ingiezhi giese gou wo. Ta udai honse ene shiqinyi zui melie giezho, zui melie duralazhoma, 
\v 11 giezhi qiikude bisan rexin mutun ede ene shiqinyi giezhi chengun olugha. Zhao nengou biku mutun gie. 
\v 12 Ta duranghalane ogise Huda jienliene. Uwokulane ogi ese giezho, winekulane ogi giezho. 
\v 13 Bi kunlai gongienshighazhi tande kunnan ireghane ese giezho, manlai izhishighane giezho. 
\v 14 Edeku tai bayan hhelai chaisande banman gie shidaku mutun hhelai bayan jianlai tai chaisande banman giene, ingiese izhishiwo. 
\v 15 Jinwun jiere jilasan mutun, "Olon ghurasanlade feiliekui uwo, choghon ghurasanlade chaikui uwo."
\s Qido Lienshoularene
\p
\v 16 Bi tande oluzhi rexintu zhughei \pn Qido\pn*i zhughede teisan Hudade mafan kielieye. 
\v 17 \pn Qido\pn* bijien fenfulasei chenliezhoma, goyane genjia rexin bizhi yenyizhe tai hhende echiwo. 
\v 18 Bijien da nie gaijiui peizhi hhere hhantu echighawo. Ene kunyi gouxioxi chonjiku jiere olon jiohuila man kuaizho. 
\v 19 Zinie ene pusho, jiohuila hhei sunghudene peizhi bijienre hhantu echighazhi bijiende jiuizhi ogisan baerni khughoghazho. Bijien ene gou shiqinyi giese Ezhanni famade oluzho, bijien gou zhughene mejieghazho. 
\v 20 Bijien ingiezhi giekushi ene olon baerni gonjikude kunlai ulie sugieghane giezho. 
\v 21 Bijien gou shiqin giese zinie Ezhanni melie gieku pusho, kunlai melieye ingiezho. 
\v 22 Bijien pse nie gaijiui peizhi hhelare hhantu echighawo. Bijien olon shiqin jiere hhei kaoyen olon giedene hhende rexin bikui mejiewo. Ede hhe tai hende xianxin giedene genjia rexinshizho. 
\v 23 \pn Qido\pn*i kieliese hheshi mii nokie wo, tande oluzhi mare lienshou gholuzho. Pse hhe ghua gaijiushi jiohuila peisan wo, Mexihani fama wo. 
\v 24 Ingiese ta jiohuilai melie oreku zhughene, pse bijien tai kuaisei hhelade zhenmin gie.
\c 9
\s Nanxintu Shentulade Ogiku
\p
\v 1 Shentulade banman gieku shiqinyi kieliese bi tande xin huaiku biyo uwo. 
\v 2 Tande gou zhughe bikui bi mejiene. Bi \png Maqidun\png* kunlade \png Yagaiya\png* kunla udai honse zhunbei giezho giezhi tai kuaizho. Tai rexin olon kunlai zhughei gojiolughazho. 
\v 3 Ede bi hhe giedun gaijiulai peizhi echighakushi zhao mii kielienzhe tai zhunbei gie goudaghane giezho. Pse bijien ene shiqin jiere tai kuaisan belienni gholune. 
\v 4 Babuchu \png Maqidun\png* kunla mare hhantu echizhi ta ese zhunbei giesei chanlase ta shizhekui pse bu kielieye, bijien tai xianxin giesan shizhekui gholune. 
\v 5 Ingiese bi sumulase hhe giedun gaijiui xien peizhi tai hhende echighazhi ta dain giesan olon mureni zhunbei gie goudagha giezhi goude kielieku biyo wine. Ingiezhi giese ta khireighasanshi biisan pusho, duranzhe giesan wo.
\p
\v 6 Eneshijiu choghon tareisan choghon ghurane, olon tareisan olon ghurane giesan wo. 
\v 7 Jien kun zhughedene jiejin giesan mutun ogikuni wo. Chijia bu tei, ye bu bii. Duranzhe khireighasan kunlade Huda xiqi wo. 
\v 8 Huda yanyanji nenjienlai tande olon ogizhi yandeliuzhe chan kurughazhi yanyanji gou shiqinni tai olon gieghane. 
\v 9 Jinwun jiere jilasan mutun, "Hhe dafande nanxin kunlade ogizho, hhei gundan chanqi wine." 
\v 10 Tareisan kunde fure ogisan, kunde ijiuni ogisan Huda tareiku fureni tande ogizhi olodoghane, ta giesan gundan wiliede jiego olon khizheghane. 
\v 11 Tai gofanmiende bayazheghazhi suishisui dafande kunlade ogighane. Ingiezhi bijien giesan wiliei tungo giezhi Hudade mafan kielieghane. 
\v 12 Ene banman gieku shiqinyi giezhi zinie shentulade chaisei buisan pusho, olon kunlai Hudade mafan kielieku tebie olodoghazho. 
\v 13 Ta Mexihai gouxioxii chenren giezhi shunjizhi hhelade, pse olon kunlade dafande ogiku wiliei hhela kaoyen giedene Hudai kuaizho. 
\v 14 Huda tande tebieji fugie nenjien ogizho. Ingiese hhela tande oluzhi onxian giezhi tai sanazho. 
\v 15 Nenjienyini kieliezhi baragha daku Hudade mafan kielieye!
\c 10
\s Baolo Goyane Huizho
\p
\v 1 Bi \pn Baolo\pn* qinsi Mexihani renyi, gou zhugheghala tande goude kielieye. Kunla kieliese bi tai chujieghekude goyane meilade uzhezho, tai hhende uwokude wizha wo giezho. 
\v 2 Bi xiahua gieye, bijien duyani banfaghala giezho giezhi sumulasanlade bi wizhade gienema, bi tai hhende echikude mii biizhi wizhade bu giegha. 
\v 3 Bijien duyade udu daozhoma, duyani banfaghala zhan ese eghinduzho. 
\v 4 Bijien eghinduku uqishi duyanughun pusho, Hudai nenlitu wo, khidun chenqianni unaghane. 
\v 5 Bijien kun zhenjindusan, pse kunni danlazhi Hudai ulie tanighazhi goyane fugiede uzhesan yanyanjilai man widaghane. Yanyanji sumuladanlai man barei iredene Mexihade shunjighane. 
\v 6 Ta onqienji shunjikude soyuji ese shunjisan kunlai faikui bijien zhunbei gie goudaghazho.
\p
\v 7 Ta shiqin uzhese zinie mienzii uzhene. Niezhan kun goyaneshi Mexihanughun wo giese hhe goude sumulakui wo, hheshi Mexihanughun mutun bijienshiye Mexihanughun wo. 
\v 8 Ezhan bijiende qienli ogikushi tai qida olugha ese giezho, hendagha giezho. Bijienyi qienlii bi goujinie gofende kuaise shizhene ulie giene. 
\v 9 Bi ingiezhi kieliekushi bi xin huaizhi tai ayighane giezhi tai ulie sumulaghane giezho. 
\v 10 Niezhan kun kieliese hhei xin yenge wo, khidun wo, kunni chujieghese zholien wo. Hhe jianjisan yama jiazhi uwo giezho. 
\v 11 Intu kunla indan mejiekui wo. Bijien tai hhende uwokude xin jiere matugie kieliezhoshi chujieghese matugie giene.
\p
\v 12 Bijien hhezighan goyane jieshao giesan kunghala ulie bilane. Hhela goyane goya nanjizho, goyane goya bilazho, hhela men no wo. 
\v 13 Bijienyi kieliese bijien kuaise kamasene ulie daone. Zhao Huda bijiende nanjizhi ogisan kamaghala giene. Ene kama tai hhendeye kuruzho. 
\v 14 Bijien tai hhende echise kamasene daoku pusho. Shijishan bijien Mexihani gouxioxii lien tai hhendeye echizhi chonjizho. 
\v 15 Bijien kamasene ese daozhi kunlai khishulasanghala ese kuaizho. Bijien xiwon giese tai xianxin gieku fugiedakude tai dundadu bijienyi kamaye daghazhi hende fugiedase giezho. 
\v 16 Ingiese kunlai oronde kunla giesan wiliede ulie kuaizhi gouxioxini tanse chugo psedu oronlade chonjine giezho. 
\v 17 "Kien kuaise Ezhanyi kuai!" 
\v 18 Kaoyen giedene olusan kunshi goyane jieshao giesan pusho, Ezhan jieshao giesan wo.
\c 11
\s Baolo Jia Shitulare
\p
\v 1 Bi goujinie ben kun danlayema, ta rennai gie. Bi xiwon giese ta rennai gie. 
\v 2 Hudai dubilieku zhugheghala bi tande hende orezho. Bi tai nie zhanguijide boluwo. Ganjin oqin wo giezhi Mexihade ogiwo. 
\v 3 Moghei jienzhaghala \pn Hhawa\pn*i piendasan mutun ta Mexihade olusan zhenzhenji oreku zhughe widakuse bi ayizho. 
\v 4 Niezhan kunla irezhi bijien ese chonjisan da nie \pn Ersa\pn*i tande chonjise, pse ta jienliezhi ese daosan buxiantu ruhherni jienliezhi ta jieshou giezhi ese daosan buxiantu gouxioxii jieshou gieghase ta jienliezho! 
\v 5 Bi sumulase bi hhezighan famatu shitu wo giesanlase goujida bixin uwo. 
\v 6 Mii koucai hen uwoma, unhua boghoni uwo. Enei bijien gofanmiende olon banfaghala tande zhenmin giewo.
\p
\v 7 Bi tai undudaghane giezhi goyane boghonidaghazhi Hudai gouxioxii tande belien chonjise zui fanjizhou? 
\v 8 Bi psedu jiohuilase gunzi bareidene tande lilian khighase qianlakughala niekielien wo. 
\v 9 Bi tai hhende bikude made chaikude kiemade chijia ese teizho. \png Maqidun\png*se iresan gaijiula made chaisei ogizhi kughazho. Bi gofanmiende goyane tande achan ese gholuzho, jianlaiye ulie gholune. 
\v 10 \png Yagaiya\png* oronde bi ingiezhi kuaikui kiemada danla dane. Mii sudoro bisan Mexihai zhendaoi zhiizhi bi ingiezhi kielie shidane. 
\v 11 Yangiezhi? Bi tande ulie orenu? Bi orekui Huda mejiene.
\p
\v 12 Bi ede giesanne izhi giene. Ingiekushi goya kuaisan bijienre niekielien wo giesan hhezighan jihui ereisan kunlade jihuini siraghane giezho. 
\v 13 Hhe izhun kunlashi jia shitu wo, piendachen wiliechi wo, Mexihani shitu wo giezhi jiazhon giezho. 
\v 14 Ene hunerei uwo. Ibilisiye gieghantu qienxienni jiazhon giezho. 
\v 15 Ingiese Ibilisini hojilaye gundanni hoji jiazhon gieseye ghudure uwo. Hhelai jiego hhela giesan mutun gholune.
\s Baolo Shouku Giesanne Kieliezhi Huizho
\p
\v 16 Bi pse kielieye, kiemada mii ben kun mutun bu uzhe. Ben kun mutun uzheliuzhe bi goyane goujinie kuaikui ta jienlie. 
\v 17 Bi ingiezhi kieliese Ezhanni qienlighala ese giezho, nie ben kun wo giezhi fugiede tunguliezho. 
\v 18 Olon kunla duyani biozhunghala kuaise biye kuaiye. 
\v 19 Ta zhenzhenji jienzha wo, bayasuzhi ben kunlai jienliezho! 
\v 20 Kien tai hoji danlaghazhi qianlazhi pienyi zhanjizhi meilade uzhezhi khizha jieretai eghise ta rennai giezho. 
\v 21 Bi ingiezhi kieliese shizhenema, bijien zholienshi qingiezhi gie dane.
\p Ingieliuzhe kun yan shiqin jiere kuai shidase biye kuai shidane. Enei bi ben kun mutun kieliezho. 
\v 22 Hhelashi \png Xibolai\png* kun onu? Biye enbene. \png Isilie\png* kun onu? Biye enbene. \pn Iburaheimu\pn*ni houdei onu? Biye enbene. 
\v 23 Mexihani hoji onu? Bi ingie kieliese fenjiulizhoma, biye genjia enbene. Bi hhelase olon khishulazhi bafanzi olon souzhi olon mabienzi neizhi haojihui aminde wixien khizhezho. 
\v 24 Bi \png Yutai\png* kunlase 39 gie mabienzi eghikui 5 hui neizho. 
\v 25 Mii banbanghala 3 hui eghizho, 1 hui tashidazho, hai jiere 3 hui zeinan penjizhi chon qida oluzho, 1 hui hai jiere niudu nie xii hheliezho. 
\v 26 Olonfa mo yokude moronni wixien, qiandaoni wixien, goya kunlai wixien, niman kunlai wixien, chenshii wixien, hontanni wixien, haini wixien, jia gaijiulani wixienyi penjizho. 
\v 27 Khishulazhi shouku giezho, olonfa hhuntura dazho, oliesuzhi undasuzho, olonfa ijiuni chaizho, gonjiezho, musiku jien uwo. 
\v 28 Psedulase chugo go jiohuilade zhughe chilazhi niudunie mii jiere achan daruzho. 
\v 29 Kien zholierese bi ulie zholierenu? Kien zui fanjise bi ulie jindanu?
\p
\v 30 Ijinyo kuaine giese bi zholiennine kuaine. 
\v 31 Ezhan \pn Ersa\pn*ni ada Huda bi ghudan ese kieliesei mejiene. Hhei chanqi doulakui wo. 
\v 32 Bi \png Damashige\png*de bikude \pn Yalida\pn* honshanni kha douradu fugie noyen \png Damashige\png* chenshini sagheighazhi mii bareine giezhoma, 
\v 33 kunla mii nie lanlande teidene chenqian jieredu chongunse jiuzhilie bouzheghase hhei khase andawo.
\c 12
\s Baolo Zholiennine Kuaizho
\p
\v 1 Kuaise yama haochu uwoma, bi ijinyo kuaine. Ede bi Ezhan made zhoujin mutun uzheghazhi mejieghasei kielieye. 
\v 2 Bi Mexihai miende nie kunyi tanine. Hhei 14 nien qien ji 3 cen asiman jiere qila khireiwo. Beyere hhantu khireiwu beyese likai gie khireisei bi ulie mejiene, zinie Huda mejiene. 
\v 3 Bi intu kunyi tanine. Beyere hhantu khireiwu beyese likai gie khireisei bi ulie mejiene, zinie Huda mejiene. 
\v 4 Hhei qientande qila khireise kielie daku kielienyi sonosuwo. Enei kun kieliese ulie olukui wo. 
\v 5 Ene kunde oluzhi bi kuainema, goyadene oluzhi zholiennisene chugo yama ulie kuaine. 
\v 6 Bi kieliesanshi zhenni wo, ingiese bi kuaine gieliuzhe guazi pusho. Ingieliuzhe bi goyane ulie kuaine, pse kunla mase uzhezhi chenliesansene gofende mii uzhene. 
\v 7 Made uzheghasan tebie famashi bi goyane kondakuse ayizhi mii beye jiere nie eghesun teizho. Eneshi Ibilisi peisan wo, mii zayalazhi ese kondaghazho. 
\v 8 Ene shiqinde oluzhi bi Ezhande ene eghesunyi mii jierese widagha giezhi 3 hui xiahua giese 
\v 9 hhe made kieliewo, "Mii nenjien chade kuruzho. Mii nenli kunni zholienni jiere onqienshine." Ingiese bi goya zholiennine kuaikude hende xiqi bizhi Mexihani nenlii goya jierene huighane giezho. 
\v 10 Bi Mexihani yenyinde oluzhi zholien, shizheghaku, kunnan, heiku, chijia bikude bayasuzho. Bi yan shihoude zholienshi yan shihoude khidun wo.
\s Baolo Shitu Bikui Zhenmin Giezho
\p
\v 11 Bi ene nie guazi kunshi ta biisan wo. Shijishan ta indan mii jieshao giekuni wo. Bi yama pushoma, hhezighan famatu shitu wo giesanlase goujida bixin uwo. 
\v 12 Bi tai dunda hende rennai giezhi ghudureqi, fugie shiqin, nenlitu shiqinni giezhi bishi shitu bikui zhenmin giewo. 
\v 13 Zinie bi tande achan ese danlasan ene shiqinse chugo bi tande psedu jiohuilase bixinde giezhou? Mii ene codasanyi ta rouliesha.
\p
\v 14 Ede bi zhunbei giezhi ji 3 hui tai hhende echine giezho. Tande yama achan ulie danlane, bi keresanshi tai dunxi pusho, tai zhughe wo. Kewosila ada anadene oluzhi baer cunjikui pusho, ada ana kesiladene oluzhi baer cunjikui wo. 
\v 15 Bi tande oluzhi bayasuzhi bisanlane ogizhi lien goyane man ogiku duran wine. Bi tande ye olon orese ta made ye choghon orenu? 
\v 16 Bi tande achan ese danlasei man mejiekui woma, niezhan kunla kieliese bishi nie jienzha kun wo, piendakughala tai bareizho giezho. 
\v 17 Bi tai hhende peizhi echighasan alinie kunyi tungo giezhi tai pienyi zhanjiwo? 
\v 18 Bi \pn Qido\pn*i tai hhende echighazhi hhere hhantu hhe nie gaijiui echighawo. \pn Qido\pn* tai pienyi zhanjiwu? Bijien wilie giese nie zhugheghala ese giezhi nie korolonghala ese yozhou?
\p
\v 19 Ta sumulase bijien izhi tai melie goyane huizho giezhou? Bijien Mexihai miende Hudai melie kieliezho. Mii orentula, bijien giesanlashi man tai hendaghane giezho. 
\v 20 Bi echikude bi xiwon giesande ta ese daizhi ta xiwon giesande bi ese daisei mejiekuse ayizho. Zhenjinduku, dubilieku, piqi shuaiku, goyadene oluku, sugieku, xienhua kielieku, goyane undude uzheku, londaku shiqin winekuse ayizho. 
\v 21 Bi pse echikude bi zunjisan Huda tai melie mii shizheghakuse ayizho. Eqighandei olon kunla zui fanjizhi zannanni giezhi lon kijiezhi hu giedene ulie geisande bi nango giekuse ayizho.
\c 13
\s Zuihoude Jingao Giezho
\p
\v 1 Eneshi bi ji 3 hui tai hhende echine giezho. Ingiese "jien zhasan shiqinlai ghua, ghuran kunni ganzhenghala shidaghane". 
\v 2 Bi ji 2 hui tai hhende irekude hhezighan melieshida zui fanjisan kunji psedu soyuji kunlade jingao giezhi daosan mutun ede bi tai hhende uwokude pse jingao gieye, bi pse irese jiedui ulie rouliene. 
\v 3 Ingiekushi Mexiha mii tungo giezhi kieliesan zhenjini ta ereizho. Mexiha tande zholiende ulie giene, khidunde giene. 
\v 4 Hhei zholiennii yenyinzhe shizijia jiere ghada fugughawoma, Hudai nenlighala amitu wo. Bijien hhere hhantu zholien woma, tai hhende echikude Hudai nenlighala hhere hhantu amiturane.
\p
\v 5 Ta xinyan dunda udu daozhoye giezhi goyane jiencha gie. Goyane nie kaoyen gie. \pn Ersa\pn* Mexiha tai sudoro bikui ta ulie mejienu? Enei mejie dase ta kaoyen giezhi dao dazho. 
\v 6 Bi xiwon giese bijien kaoyen giezhi daokui ta mejiene. 
\v 7 Bijien Hudase onxian giezhi tai yama codasei ulie gieghane. Bijien kaoyen giezhi daokui uzheghaku pusho. Kunla uzhese bijien shibai gieliuzhe tai gounii gieghane giezho. 
\v 8 Bijien yan shiqindeliuzhe zhendaoni duizhi gie dane, hhende oluzhi giene. 
\v 9 Bijien zholien bizhi ta khidun bikude bijien bayasuzho. Ta onqientu gholu giezhi bijien ingiezhi onxian giezho. 
\v 10 Ingiese bi tai hhende wikude ene kielienyi tande huaikushi bi tai chanlakudei zhao Ezhan made ogisan qienlighala tande gundude ulie giene giezho. Ene qienli kunni bixindaghaku pusho, hendaghaku wo.
\p
\v 11 Gaijiula, zuihoude kielieye, ta bayasundu. Onqientu kun gholuzhi bijien surughasei chenlie. Maodun bu khizhezhi heqishi. Ingiese oreku winetu, pinnantu Huda chan tanre hhantu wo. 
\v 12 Ta zhughesene nieniedene kielien asa. Shentula man tande kielien asazho.
\p
\v 13 Ezhan \pn Ersa\pn* Mexihani nenjien, Hudai oreku, Shenlinni laiwon gieku chan tanre hhantu bi gie!