\id 1TH DongXiang: DongXiang Bible draft 2
\usfm 3.0
\ide UTF-8
\ide 65001 - Unicode (UTF-8)
\rem Copyright Information: For any non-Paratext use of this text, permission must be obtained from the copyright holder.
\h Qiesalonijia Kunlade Huaisan Ji 1 Hui Xin
\toc1 Qiesalonijia Kunlade Huaisan Ji 1 Hui Xin
\toc2 1Qiesalonijia
\toc3 1Qie
\mt Qiesalonijia Kunlade Huaisan Ji 1 Hui Xin
\c 1
\s Kielien Asazho
\p
\v 1 \pn Baolo\pn*, \pn Seila\pn*, \pn Qimotai\pn* ghurelie Ada Huda, Ezhan \pn Ersa\pn* Mexihai xianxin giesan \png Qiesalonijia\png*i jiohuide xin huaizho. Tande nenjien, pinnan ogi gie!
\s Qiesalonijia Jiohuide Oluzhi Mafan Kieliezho
\p
\v 2 Bijien ta ashighalade oluzhi Hudade chan mafan kieliezho. Onxian giekude tai qiizhi kieliezho. 
\v 3 Bijien mai Ada Hudai melie tai izhigie jilazhi kieliezho. Ta xianxin giekughala giesan wilie, orezhi khishulasan, pse mai Ezhan \pn Ersa\pn* Mexihai panjizhi rennai giesei jilazhi onxian giezho. 
\v 4 Huda oresan gaijiula, tai sunghusei bijien mejiene. 
\v 5 Bijien tande gouxioxini chonjikude zinie kielienghala giesan pusho, nenli, Shenlin, hende xianxin gieku zhugheghala giesan wo. Bijien tanre hhantu bikude tande oluzhi matugie giesei ta goyalane qinchu wo. 
\v 6 Ta bijien, Ezhan mutun qingie giezhi heikui fugiede shouiliuzhe Shenlin banman giedene daolini bayasuzhi jienliewo. 
\v 7 Ingiese \png Maqidun\png*, \png Yagaiya\png*ni\f + \fr 1:7 \fr*\ft Maqidun, Yagaiyashi Xila gojiani beimien, nanmiende wo.\ft*\f* orondedu xianxin giesan kunlade yanzi uzheghawo. 
\v 8 Ezhanyi kielien tai hhense chonji khizhezhi zinie \png Maqidun\png*, \png Yagaiya\png*de pusho, gochude man chonji kuruwo. Ta Hudai xianxin giesan xioxii gochui kunla man mejiese bijien yama kielieku biyo uwo. 
\v 9 Ta matugiezhi goude bijienyi jienliesei, pse nigiedalai bendadene amitu, zhen Hudai shunjisei hhela goyane kielienduzho. 
\v 10 Pse ta asiman jierese ireku Hudai Kewonni sagheizho giene. Hheshi Huda fugusan kun dundase aminne olughasan \pn Ersa\pn* wo, jianlai ireku Hudai hokurukuse matanyi jiuine.
\c 2
\s Baolo Qiesalonijiade Giesan Wilie
\p
\v 1 Gaijiula, bijien tai oronde irese zoin ulie qiikui pusho. Enei ta goyalane qinchu wo. 
\v 2 Ta mejiesan mutun bijien \png Feilibi\png*de bikude kunla bijienyi heizhi shizheghawoma, ingieliuzhe mai Huda ogisan danzighala kunla hende fandui gieliuzhe Hudai gouxioxii tande kieliezhi ogiwo. 
\v 3 Bijien tande surughazhi kieliekude codasei, ganjin witu zhughe, piendakughala ese giezho. 
\v 4 Khareidene bijien kieliekude Huda bijienyi chenren giezhi gouxioxini deilaghasan kun wo giezhi kunlai bayasughane ese giezho. Mai zhughei uzhesan Hudai bayasughane giezho. 
\v 5 Bijien seighan kielienghala ese kieliezho, tanxin gieku zhugheghalaye ese giezho. Enei ta mejiene, Hudaye ganzhen beine. 
\v 6-7 Bijien Mexihani shitu danlachenlade tai melie qienli winema, goyane taye hao, kunlaye hao kuaighane ese giezho. Bijien tai dunda renyi zhugheghala ana kesilane qiezheku mutun giezho. 
\v 8 Bijien tande hende orezhi zinie Hudai gouxioxini ogiku pusho, lien goya aminneye ogiku duran wo. Tashi bijien ingiezhi oresan wo.
\p
\v 9 Gaijiula, bijien khishulazhi shouku giesei ta mejiene. Bijien tande Hudai gouxioxini chonjikude ta kiemade achan ulie ogine giezhi xieni udu wilie giezho. 
\v 10 Ta xianxin giesan kunlade bijien giesanshi zhigui, gundanni wo, yama kieliekuni uwo. Enende ta ganzhen bei, Hudaye ganzhen beine. 
\v 11 Ada kesiladene giesan mutun 
\v 12 bijien tande sidaghazhi surughazhi goude fenfulasei ta mejiene. Ingiezhi giekushi goyane gojiade, famade urusan Huda tai heshide gieghane giezho.
\p
\v 13 Bijien pse Hudade chan mafan kielieku dounie yenyinshi ene wo. Ta bijiense Hudai kielienyi jienliekude kunni kielien wo uye giedene Hudai kielien wo giezho. Hhe shuhua Hudai kielien enbene. Ene kielien ta xianxin giesan kunlade zoin wine. 
\v 14 Gaijiulaya, \png Yudaya\png* orondedu Mexiha \pn Ersa\pn*i xianxin giesan Hudai jiohuini kunlai \png Yutai\png* kunlase heisanyi shouisan mutun taye goya kunlase heisanyi shouiwo. 
\v 15 Ene \png Yutai\png* kunla Ezhan \pn Ersa\pn*i, xienzhilai alazhi bijienyi tou khireighawo. Hhela Hudai ese bayasughazhi jien kunlare duitou gholuwo. 
\v 16 Hhela bijienyi niman kunlade ulie chonjighazhi ulie jiuighane giezho. Hhelai zui izhi olodozhi duruse Hudai hokuku zuihoude hhelani jiere bouzhewo.
\s Baolo Pse Qiesalonijiani Jiohuii Ochirane Giezho
\p
\v 17 Gaijiula, bijien zhanshi jiere tanse danxinrase beye danxinrazhoma, zhughe ese danxinrazho. Bijien tai chujiegheku hende duralazho. 
\v 18 Ingiese bi \pn Baolo\pn* 1 lianhui tai uzhele echine giese Ibilisi bijienyi duiwo. 
\v 19 Mai Ezhan \pn Ersa\pn* pse irekude bijien hhei melie panjiku, bayasuku, kuaighaku jianlishi yan wo? Ta pushonu? 
\v 20 Tashijiu bijienyi kuaiku, bayasuku wo!
\c 3
\p
\v 1 Ingiese bijien bazilie dadene goyane \png Yajien\png*de feilieye giezhi jiejin gie, 
\v 2 \pn Qimotai\pn*ni tai hhende peizhi echighawo. Hheshi mai gaijiu wo. Bijienre hhantu Mexihani gouxioxii chonjizhi Hudade wilie giesan kun wo. Hhei echighakushi tai khiduzheghazhi xianxin gieku jiere zhichi gieghane giezho. 
\v 3 Ingiese enezighan heiku shiqin dundase tai nieda ulie gojiolughane giezho. Matande heiku shiqin jinjisei ta goyalane mejiene. 
\v 4 Bijien tanre hhantu bikude matande heiku shiqin irekui tande melieshi kieliezhi daowo. Ede qintui gholusei ta mejiene. 
\v 5 Ingiese bi pse bazilie dadene \pn Qimotai\pn*ni peizhi tai xianxin gieku matugiezho giezhi daqinlaghale echiwo. Hhe miichen tai miizhi bijien khishulasan wilielani belien gholughakuse ayizho.
\p
\v 6 Ingie \pn Qimotai\pn* jian tai hhense iredene tai xianxin gieku, oreku gouxioxini bijiende kieliewo. Da kieliezhi ta chan bijienyi bayasuzhi jilazho. Bijien tai chujieghene gieku mutun taye bijienyi chujieghene giezho. 
\v 7 Ingiese gaijiula, bijiende kunnan, heiku olon biliuzhe ta xianxin giesan yenyin jiere bijien bayasuzho. 
\v 8 Ta Ezhanyi miende beizhi undanlase bijien ede amiturawo. 
\v 9 Bijien mai Hudai melie tai yenyin jiere hende bayasuzho. Eneni Hudade matugie mafan kieliene? 
\v 10 Bijien tai ochirazhi uye kurusan tai xianxin giekuni kurughane giezhi xieni udu Hudai hende xiahua giezho.
\p
\v 11 Mai Ada Huda, mai Ezhan \pn Ersa\pn* moni keighadene bijienyi zhijie tai hhende echigha gie. 
\v 12 Pse bijien tande olon oreku mutun Ezhan tande oreku zhughei ologhan ogizhi durughadene tai nieniedene oregha gie, jien kunladeye oregha gie. 
\v 13 Ingiese zhughei tai khiduzheghazhi mai Ezhan \pn Ersa\pn* soyuji shentularene hhantu irekude mai Ada Hudai melie zhiguitu yama kielieku witu gholugha gie.
\c 4
\s Hudai Bayasughazhi Gie
\p
\v 1 Ingiese gaijiula, zuihoude kielieye, Ezhan \pn Ersa\pn*i miende bijien tai xiahua giezhi tande sughazhi kielieye. Ta bijiense surusan mutun Hudai bayasughazhi gie. Ta ijin giezhoma, pse ologhoni izhigie gie. 
\v 2 Bijien Ezhan \pn Ersa\pn*i qienlighala tande yan minlin ogisei ta mejiene. 
\v 3 Hudai isishi ene wo, tai zhiguini gholughane giezho. Lon kijieku, pse qimutu zuilase gholode beighazhi 
\v 4 jien kunde goya beyene hanshiliezhi ganjin, zhiguide giekuni mejieghane. 
\v 5 Hudai tani dasan niman kun mutun lon gieku nefuxinni daghazhi hu ulie gieghane. 
\v 6 Ene shiqin jiere xianxin giesan gaijiulade piendazhi pienyi bu zhanji. Bijien melieshi tande kieliezhi hende jingao giesan mutun Ezhan qimutu zui fanjisan kunlai faine. 
\v 7 Huda matanyi urukushi ganjin wini bu giezhi, zhiguide gie giezho. 
\v 8 Ingiese ene sughasei ulie chenliechen kunshi kunni ulie chenlieku pusho, tande goya Shenlinne ogisan Hudai uye chenliezho.
\p
\v 9 Gaijiulade oreku shiqinni kieliese tande xin huaiku biyo uwo. Nieniedene orekuni ta goyane Hudase suruzho. 
\v 10 Ta \png Maqidun\png*ni gaijiulade man shuhua ingiezhi giezho. Gaijiula, bijien tande xiahua gieye, ta pse ologhonni gie. 
\v 11 Bijien tande fenfulasan mutun ta xiacha giezhi udune nanrande daogha. Goya shiqinlane gonji. Khaghalane wilielai gie. 
\v 12 Qingiese ghadanedu kun ta giesanlai uzhese zunzhun giene, taye kiemade ulie kouine.
\s Ezhan Xiajian Gieku
\p
\v 13 Gaijiula, bijienyi duranshi hhe fugusan kunlai shiqinni ta mejiese gou wo. Ingiese hhe xiwon wichen kun mutun zhughetai ulie otune. 
\v 14 Matan \pn Ersa\pn* duya ijiedene aminne olusanyi xianxin giese \pn Ersa\pn*i xianxin giedene duya ijiesan kunlai Huda \pn Ersa\pn*ghala hhantu udurukuiye xianxin giene. 
\v 15 Bijien Ezhanyi kielienyi tande kielieye. Ezhan pse irekude matan amitu kun hhe fugusan kunlase melieshida dane. 
\v 16 Nie minlin xiaise fugie qienxien waradazhi Hudai labai shenqi dunda Ezhan asiman jierese qinsi irene. Ingiekude Mexihani xianxin giedene fugusan kun xien aminne olune. 
\v 17 Ingiedene bijien amitu kunyi hhelare hhantu olien jiere deila echi asiman jiere Ezhanyi ochirane. Ingiedene chanqi Ezhanre hhantu soune. 
\v 18 Ingiese ta enezighan kielienghala nieniedene surughazhi kielie.
\c 5
\p
\v 1 Gaijiula, ene shiqin giezhe fashen giekui tande xin huaiku biyo uwo. 
\v 2 Ezhanni udushi ghughei xienidei ireku mutun mejie dakude irekui ta qinchu wo. 
\v 3 Kunla "Pinnan wo, yama shiqin uwo." giezhi kieliekude menzhali hhelade zeinan kuzhi irene. Biereila kewosi olukude otuku niekielien wo. Kiema anda dane.
\p
\v 4 Gaijiula, ingieseye ta kharanide uwo. Hhe ireku udu tande ghughei mutun ulie irene. 
\v 5 Ta manshi gonni kewosi, uduni kewosi wo. Matanshi xieninughun pusho, kharaninughunye pusho. 
\v 6 Ingiese matan kunla mutun bu hhunturadene goude jinxin gieye. 
\v 7 Hhunturachen kun xienidei hhunturane. Sudochen kun xienidei sudone. 
\v 8 Matanshi udunughun wo, indan jinxin gieye. Xianxin gieku, oreku kuijiani musizhi jiuiku xiwonni toukuini zhoye. 
\v 9 Huda mai sunghuse faine ese giezho. Mai Ezhan \pn Ersa\pn* Mexihai tungo giezhi jiuine giezho. 
\v 10 \pn Ersa\pn* Mexiha matande oluzhi duya ijiese bugon matan amitu kun, fugusan kun man hheghala hhantu udu daoghane giezho. 
\v 11 Ingiese ta chan gieku mutun nieniedene surughazhi kieliezhi nieniene hendagha.
\s Zuihou Surughaku Kielien
\p
\v 12 Gaijiula, bijien tai xiahua gieye, tande oluzhi khishulasan kunlai zunji. Hhela Ezhanyi miende tai gonjizhi sughazho. 
\v 13 Hhela giesan wilieni yenyinghala ta hhelade orezhi goude zunzhun gie. Ta nienierene heqishi.
\p
\v 14 Gaijiula, bijien pse tande sughazhi kielieye, hhe lansunlade jingao gie, danzi widasan kunlade hunlazhi kielie, zhoreliesan kunlai fei, soyuji kunlade rennai gie. 
\v 15 Ta kienliuzhe ijinyo doghunnide doghunni bu kharei. Nieniedene, ashighalade gouni giekude chan xiacha gie.
\p
\v 16 Ta chan bayasu, 
\v 17 bu beidene onxian gie, 
\v 18 yan shiqindeliuzhe mafan kielie. Eneshi Mexiha \pn Ersa\pn*i sudoro tande olusan Hudai isi wo.
\p
\v 19 Shenlinni wiliei bu danla. 
\v 20 Hudai kielienyi kieliese uzhezhi bu xinie. 
\v 21 Yandeliuzhe shiizhi uzhe, gounii barei, 
\v 22 shiheni doghunnise gholode bei.
\p
\v 23 Pinnan ogisan Huda qinsi tai zhengiejia zhiguitu gholugha gie. Mai Ezhan \pn Ersa\pn* Mexiha irekude tai ruhher, jinshen, beyei man bouizhi yama kieliekui widagha gie. 
\v 24 Tai urusanshi kekaoni wo. Hhe ijinyo chenjighane.
\p
\v 25 Gaijiula, bijiende oluzhi onxian gie. 
\v 26 Zhughesene jien gaijiulade kielien asa. 
\v 27 Bi Ezhanyi niereghala tande minlin xiaiye. Ene xinni soyuji gaijiulade man onshizhi chenliegha.
\p
\v 28 Mai Ezhan \pn Ersa\pn* Mexihai nenjien tanre hhantu bi gie!