\id 2TH 2BAT 54 Soli Bible version
\ide UTF-8
\h Kalata ya cibili ya Paulo ku Batesalonika
\toc3 2 Tesalonika
\toc1 2 Batesalonika
\toc2 2 Batesalonika
\mt2 Kalata ya cibili ya Paulo ku
\mt1 Batesalonika
\imt Busansulushi
\ip Kalata yacibili ya ku Batesalonika yalalembwa ne mutumwa Paulo 1:1. Walalemba iyi kalata mpopalapitowa kacindi kang'ana panyuma pakulemba 1 Batesalonika, byaka makumi asanu ne caka cimo Panyuma pa kusemwa kwa Klistu. Paulo walikacili mu Kolinto mpwalalemba iyi kalata ku mubungano wa Batesalonika, mubungano ngwalabyala mubulwendo bwakendi bwatubili 17:1-10 Mulibuku lya Ncito mulambangeti, mu mubungano uwu mwalikuba Bayuda bang'ana, bangi balikuba Bagiliki.
\ip Mubungano wa Batesalonika walikuba wayakamwa ne cindi ca mapwililisho kayi ne kubwela kwa Klistu, pakwinga Paulo walalemba bingi byakumya ku makani awa mu makalata akendi akuli Batesalonika.Cintimbwi ca Batesalonika cilambangowa sha cindi camapwililisho. Kayi Paulo labacenjeshenga sha kulikumbatowa makasa. Uliyense wela kusebensa kwambeti acane cakulya 3:6-10.
\iot Mitwi ya makani
\io1 Paulo latatikinga kalata pakulyamba mwine ne banendi 1:1-2
\io1 Kufumapo lalumbunga Lesa cebo ca mubungano wa Batesalonika ne kubapaililako 1:3-12
\io1 Mucimpansha ca cibili, Paulo lambanga sha cindi ca mapwililisho
\io1 Kayi lambangaponga sha kulikumbata makasa, ne kuyandika kwa kusebensa ncito 3:1-15
\io1 Paulo lapwishinga pakupa kayi mitende mubungano 3:16-18
\c 1
\p
\v 1 Njame Paulo pamo ne Sailasi kayi ne Timoti. Tulalembelenga mubungano waku Tesalonika wa Lesa Bata ne Mwami Yesu Klistu.
\p
\v 2 Tulasengenga kuli Lesa Bata kwambeti amupe luse ne lumuno.
\s Sha kubeteka pacindi Yesu Klistu akesa
\p
\v 3 Twelela kulumbaisha Lesa cindi conse pacebo canjamwe mobanse. Pakwinga celela kwambeti afwe twinseco, cebo cakwambeti lushomo lwenu lulakulunga kayi ne lusuno ndomukute pakati penu lulakonempenga. 
\v 4 Eceb cakendi afwe tulatwanganga mumibungano yonse ya Lesa. Tulatwanganga cebo cakulimbikila kwenu mulushomo kulapeshengeti mulapite mumapensho nemakatasho ngomulacananga.
\p
\v 5 Byonse ibi bilaleshenga kwambeti Lesa ukute kubeteka mwabululami. Pacebo ici mulabanga belela kwingila mubwami bwa Lesa ubo mbumulapengelenga pacindi cino. 
\v 6 Lino pakwinga Lesa niwabululami nakabape cisubulo bantu abo balamupenshenga. 
\v 7 Neco amwe omulapengenga pacindi cino, nakamupe cindi cakupumwina pamo nenjafwe. Nakenseco pacindi Mwami Yesu akesanga mwilu pamo ne bangelo bakendi bangofu, 
\v 8 nakese ne mulilo ulabangilinga, kwisa kupa cisubulo batamwinshi Lesa kayi ne batanyumfu Mulumbe Waina wa Mwami wetu Yesu Klistu. 
\v 9 Nibakatambule cisubulo kayi nibakapenge kwa muyayaya. Nteti bakabone cinso ca Mwami Yesu Klistu nambi bulemu bwa ngofu shakendi. 
\v 10 Pabusuba mposhi akese kwambeti alumbaishiwe pakati pa baswepa kayi nekwambeti atambule bulemu kufuma kuli abo bashoma, nenjamwe nimukabe nabo pakwinga mwalashoma bukamboni bwetu.
\p
\v 11 Weco ncotukute kumupailila masuba onse, kwambeti mube belela kutambula buyumi mbwalamukwila. Neco ndasengenga Mwami kwambeti amupe bintu byaina byonse myoyo yenu nceilayandanga kwambeti musebense mulimo ulashininkishinga lushomo lwenu. 
\v 12 Neco lina lya Mwami wetu Yesu Klistu nilikalumbaishiwe pakati penu kayi nenjamwe nimukalumbaishiwe mulyendiye. Lino byonse ibi nibikenshike cebo ca luse lwa Lesa wetu kayi neku Mwami wetu Yesu Klistu.
\c 2
\s Muntu waipa usa
\p
\v 1 Lino mobase pamakani akwisa kwa Mwami Yseu neshakubunganishiwa kwambeti tumutambule, ndamusengengeti 
\v 2 miyeyo yenu kaitanyongana bwangu,kayi mutapenga mumyoyo yenu pamakani akwambeti, “Bushiku bwa Mwami bulashiki.” Nambi maswi awa alafumu ku Mushimu Uswepa, nambi kulinjafwe nambi kuli mushinshimi nambi twalensa kwalemba munkalata. 
\v 3 Kamutasuminisha muntu uliyense kwambeti amubepe munshila iliyonse sobwe. Pakwinga busuba ubo kabutanabushika, nikukatatike nanshi kuba bantu bangi beshikupandukila Lesa. Kayi nanshi akaboneke Muntu Waipa,Ngweshakashine Lesa. 
\v 4 Emulwani shikulisumpula pelu pacintu ciliconse ncebakute kwamba bantu eti Lesa, nambi ciliconse ncebakute kukambilila, kayi nakengile mu Ng'anda ya Lesa nekulyamba mwine eti ni Lesa. 
\v 5 Sena nkamwanuka kwambeti ndalamwambila bintu ibi mpondalikuba kwenu? 
\v 6 Pakwinga cebo ncalabulilinga kubonekela lino mucinshi, nsombi nakenshibike pacindi celela. 
\v 7 Nambi pacino cindi bwipishi bwa mushobo uyu bulatatiki kendi kwinshika mwakusolama. Nsombi byonse nibikabonekele patuba uyo lakanishinga bwipishi bakamufunyapo nanshi. 
\v 8 Lino usa Muntu Waipa emposhakabonekele, nomba Mwami Yesu nakashine ne muya ngoshakamuyoyele, bulemu buyosha bwa kwisa kwakendi nibukamushine kwakupwililila. 
\v 9 Muntu Waipa uyu nakese mungofu sha Satana. Nakense byangofu byapusana pusana ne bingashilo byeshikukankamanisha byabundengamano. 
\v 10 Neco munshila iliyonse nakabepe bantu abo beshibakonongeke pamo nendiye pacebo cakwambeti balakana kuyanda cancine ncine cela kubapulusha. 
\v 11 Neco Lesa nakatume ngofu sheti shikabapwishe mano kwambeti bakashome bundengamano.
\p
\v 12 Lino ceshi cikapulepo nicakwambeti bonse balakana kushoma cancinencine, nsombi balasamwa mubwipishi, neco nibakapewe cisubulo.
\s Kamubanga bayuma mulushomo
\p
\v 13 Weco afwe twelela kumulumbaisha Lesa cindi conse cebo canjamwe mobanse omwasunika kuli Mwami. Pakwinga Lesa walamusala kwambeti mukapuluke. Lino mwalapuluka pakwinga Mushimu Uswepa walamusandula kuba bantu ba Lesa kayi mwalashoma cancine ncine. 
\v 14 Lesa walamukuwa kupitila mu Mulumbe Waina uyo ngotwalamukambaukila. Walamukuwa kwambeti mukamantemo lubasu mu bulemelelo bwa Mwami wetu Yesu Klistu. 
\v 15 Neco mobanse kamuyumani kayi mwikatishishe bintu ibyo mbyotwalamwiyisha kupitila mukukambauka ne makalata. 
\v 16 Lino Lesa Bata ne Yesu Klistu ebalatuyanda kayi nekutupa ngofu kayi ne kupembelela kwayuma kupitila mu Luse lwakendi. 
\v 17 Bamuyuminishe nekumupa ngofu cindi conse shakwinsa ne kwamba byaina.
\c 3
\s Kamutupaililanga
\p
\v 1 Cakupwililisha mobanse kamutupailinga kwambeti maswi a Mwami amwaikile bwangu, kayi ne kwambeti bantu batambule mwa bulemu mbuli ncomwalatambula. 
\v 2 Kayi ne kwambeti Lesa atupulushe kubantu baipa ne babula kululama. Pakwinga nte bonse bakute lushomo. 
\v 3 Neco Mwami walulama, namuyuminishe ne kumukwabilila ku Muntu Waipa usa. 
\v 4 Neco twashoma kwambeti Mwami lamupanga lushomo kwambeti mucikonshe kwinsa bintu ibyo mbyotulamwambilinga. 
\v 5 Neco Lesa abike miyeyo yaina mumyoyo yenu kwambeti mucikonshe kusuna Lesa nekukonka mpapa sha Yesu.
\s Labacenjeshengeti bela kusebensa ncito
\p
\v 6 Lino tulamulaililinga mobanse, mulina lya Mwami Yesu Kilstu kwambeti mubaleyenga bantu batolo abo batasuni kwinsa bintu mbyotwalabalailila. 
\v 7 Nomba mobene mucinshi mbuli ncomwela kwinsa kwambeti mubeti njafwe. Pakwinga nkatwabanga batolo pakati penu. 
\v 8 Kayi nkatwalalya shinkwa wamuntu kwakubula kulipila, nsombi twalapulilapo nkasalo kayi twalasebensa munshi ne mashiku kwambeti tutamushupa. 
\v 9 Nteko kwambeti nkacelela kwambeti amwe mutupe, nsombi twalayandeti tube citondesho ncomwela kukonkela. 
\v 10 Pakwinga mpotwalikuba pamo twalamwambileti muntu utasuni kusebensa atalya. 
\v 11 Pakwinga twalanyumfweti bambi pakati penu nibatolo, batasuni kusebensa, nsombi basuni kulyowa byabanabo. 
\v 12 Mulina lya Yesu, tulabambilinga nekubacenjesheti, basebense nekulya byakulya byakulisebensela. 
\v 13 Nomba amwe mobansebame, kamutalema kwinsa bintu byaina. 
\v 14 Na muntu naumbi akane kwinsa bintu ibi mbyotulamwambili munkalata njotulatumu, mumulabilile ne kumusonoka kwambeti akanyumfwe insoni. 
\v 15 Necikabeco kamutamuboneti mulwani wenu, nsombi mumucenjeshe mbuli mwanse.
\s Maswi akupwililisha
\p
\v 16 Lino Mwami amupe lumuno cindi conse munshila iliyonse. Mwami abe nenjamwe mwense. 
\v 17 Ame njame paulo ndalembe nkalata iyi ne makasa akame. Ici nicishibisho ncondabikinga mumankalata akame onse. Enconkute kulemba mushobo uyu. 
\v 18 Luse lwa Mwami Yesu Klistu lube nenjamwe mwense.