\id PHP - Saliba Translation (SBE) 
\ide UTF-8
\h Pilipi 
\toc1 Paulo yona leta ye lau ekalesiya Pilipi magaina unai taumiya udiyedi 
\toc2 Pilipi 
\toc3 Plp 
\mt1 Pilipi  
\mt2 Paulo yona leta ye lau ekalesiya Pilipi unai taumiya udiyedi  
\imt1 Leta ta hededehemasalahana  
\ip Teina buka ta meta apostolo Paulo yona leta ye lau ekalesiya Pilipi magaina unai taumiya kalidiyena. Paulo yona huyaena Pilipi meta magai saesaena teha Masedoniya unai. Bolimai 46 o 48 \sc ad\sc* unai Paulo dubu ye hetubu Pilipi unai (\xt Apostolo 16:12-40\xt*). Teina leta ta Paulo ye kuli bolimai 61 \sc ad\sc* unai, huyana iya se kabihekahini magai lakilakina Loma unai (\xt Apostolo 28:16,30, Pilipi 1:13\xt*).  
\ip Lahinaidi ekalesiya Pilipi unai Paulo se sagui kai yo gogo udiyedi (\xt Pilipi 4:18\xt*), yo hinage yona se tapwatapwalolo (\xt Pilipi 1:19\xt*). Na leta ta unai Paulo ye lautokiyeidi, yo hinage ye hededehemasalaha meta ye gadosisikaliliyeidi (\xt Pilipi 4:1\xt*). Nuwanuwatu hekadiyo leta ta unai meta teina:  
\ili (1) Paulo ye hekatadi nuwadobidobi mamohoina kana kao doha saha (\xt Pilipi 2:3-4\xt*).  
\ili (2) Lauhekatalupolupo debadiyena Paulo ye guguyaidi (\xt Pilipi 3:2\xt*).  
\ili (3) Paulo ye hededehebayaodi bena yodi sunuma se tolekesegai Yesu unai (\xt Pilipi 1:29\xt*).  
\iot Buka ta hedehededena lakilakidi  
\io1 • Lautoki yo tapwalolo \ior 1:1-11\ior*  
\io1 • Paulo yona henuhenuwa saesaena meta taba Yesu wasana ye laulau \ior 1:12-30\ior*  
\io1 • Keliso ye hekitada nuwadobidobi meta saha \ior 2:1-18\ior*  
\io1 • Timoti yo Epapolodaitasi wasadi \ior 2:19-30\ior*  
\io1 • Idohagi kabo Yaubada ye kitahenamwada \ior 3:1—4:9\ior*  
\io1 • Paulo ye lautokiyeidi yodi kainauya hesabana \ior 4:10-20\ior*  
\io1 • Lautoki \ior 4:21-23\ior*  
\c 1  
\s1 Lautoki  
\po
\v 1 Paulo yo Timoti, kai meta Keliso Yesu yona heyayai tauhaidi na leta ta ka kuli ye lau Keliso Yesu taukawamamohoina kalidiyena, siya dubu babadadi yo dubu diyakonadi yo Yaubada yona tamowai maudoidi Pilipi unai taumiya.   
\p
\v 2 Taba Yaubada Tamada yo Guiyau Yesu Keliso yodi kabinamwa yo nuwadaumwali se laowa kalimiuwai.   
\s1 Paulo yona lautoki yo yona kaibwada Yaubada unai  
\p
\v 3 Huyana ya nuwatuigomiu meta Yaubada ya laulautokiyei hesabamiu.  
\v 4 Maudoimiu yomiu ya tapwatapwalolo na yogu tapwalolo maudoidi udiyedi ne meta ya tapwatapwalolo ma gwaugwauyalagu,  
\v 5 matawuwuna ede yomi haisagusagu wasa namwanamwana paisowana ta unai meta huya bagubaguna wa unai na ye laoma ee teina.  
\v 6 Yaubada kalimiuwai paisowa namwanamwana ye hetubu, na nuwagu ta ye bayao meta iya kabo paisowa ne ye hekesegai ye lau ee gehena ne, yo ye lau ee Keliso Yesu yona uyoma mayadaina ye lage.   
\p
\v 7 Ye dudulai ede maudoimiu ne doha teina ya nuwatuigomiu, kaniyona ede komiu meta nuwagu ta unai, huyana numatutugudu unai ya miyamiya ta o wasa namwanamwana ya laulaugudugudui yo ya hedehededehemasalaha. Huya maudoina meta komiu yo yau Yaubada yona kabinamwa unai ta miyakesega.  
\v 8 Yaubada kabigu ye kata ede Keliso Yesu yona gadosisiyena meta ya nuwanuwatukaliliyeigomiu.   
\p
\v 9 Na yogu tapwalolo ede teina, taba yomi haigadogadosisi ne ye laki ye lau yo yomi nuwatulobai yo nuwanuwatu gabwagabwatumdi nuwamasalahadi kalimiuwai.  
\v 10 Unai kabo gonowana kwa hekasa ginauli saha se namwakalili. Kabo yomi miyamiya se aꞌa yo nige kabahegilugomiu hesau Keliso yona huyaꞌuyoma mayadaina ne unai,  
\v 11 na miyamiya dudulaidi Yesu Keliso unai se laoma ne se hemwayaugomiu. Unai kabo noko yo hedebasae se sae Yaubada unai.   
\s1 Paulo se tole numatutugudu unai wa meta wasa namwanamwana ye sagui  
\p
\v 12 Kagu kahao, ya henuwa bena kabina kwa kata, saha ye tubu kaliguwai ta meta kabo unai wasa namwanamwana lauguguyaeina ta ye laki ye lau.  
\v 13 Na inai tauꞌiyala tamowaidiyao siya Sisa yona numa taukitahetetena\f ** \fr 1:13 \fq Siya Sisa yona numa taukitahetetena: \ft Magai Loma unai, yodi wasawasa Sisa yona numa gunina ne unai meta numatutugudu hesau, na Paulo se tole temenai. Unai numatutugudu wa tautologuduina wa, siya ede Sisa yona numa taukitahetetena. \f* yo tamowai maudoidi wasagu kabina se kata ede yau ta meta Keliso sunumaeina debanaena se tolegau numatutugudu ta unai.  
\v 14 Numatutugudu unai se tolegau ta debanaena ede kagu kahao se bado yodi bayao se lobai Guiyau unai na Yaubada kalinana ta se hedehededehemasalaha na kalidiyena meta nige matausi hesau.   
\p
\v 15 Na luwadiyena meta tamowai hekadi Keliso wasana se lauguguyaei ma kaikalomagigilidi yo ma haihaikabidi, na hekadiyo meta laulau namwanamwadi yo dudulaidi udiyedi se lauguguya.  
\v 16 Tamowai ta meta se lauguguya ma gadosisidi, kabigu se kata meta yau ede numatutuguduyena, matawuwuna wasa namwanamwana ta kabalauguduguduina debanaena.  
\v 17 Na tamowai bagubagunadiyao wa meta se bom se nuwatuꞌuyoidi, nige ma nuwamamohoidi na Keliso wasana se lauguguyaei, na yodi nuwanuwatu ede numatutugudu ta unai ya miyamiya na bena taba se hepilipiligau.  
\v 18 Na yau meta nige ya modekalili. Kabo taulaulupolupo o tauhedehededemamohoi, na nuwanuwatu saesaena ede Keliso wasana se lauguguyaei. Unai ede ya gwauyala.  
\p Na yau meta taba ya gwaugwauyala huya maudoina,  
\v 19 matawuwuna kabina ya kata meta saha ye tubu kaliguyena ta meta ye hemala kabayailihaigau, yomi tapwalolo debadiyena yo Yesu Keliso yaluwana ye saguigau.  
\v 20 Yogu henuwa lakilakikalilina ede taba tabu ya mwadine, na ya nuwabayao doha huya maudoina, na Keliso ya hedebasaei taugu ta unai, yogu maumauli ta unai o yogu boita unai.  
\v 21 Matawuwuna yau meta Keliso unai ya miyamiya, na ya boita ede kabo namwanamwa ya lobai.  
\v 22 Na ena taba sola ma maumauligu teina taugu ta unai, kabo yogu paisowa ta sola ma kaniyona ye laulau.  
\p Unai saha bena ya kaisunuwai?  
\v 23 Nuwanuwatu labui ta udiyedi meta nuwagu ta ye haikabikalili: Ya henuwakalili bena taba ya lau Keliso unai – iya meta ye namwakalili ede.  
\v 24 Iyamo ye namwakalikalili ede taba komiu hesabamiu yau bena ya maumauli.  
\v 25 Teina kabina ya katakalili, unai ede kabo sola ya miyamiya na lauhekata ta unai ya hebahebayaogomiu na maudoimiu kwa kini kwa sae yo kwa gwauyala sunuma ta unai.  
\v 26 Na yogu henuhenuwa ede taba yogu uyowa yo yogu miya kalimiuyena ne unai kabo kwa gwauyaladikwakalili Keliso Yesu yona sagu debanaena.   
\s1 Ekalesiya yodi miyamiya bena se namwa  
\p
\v 27 Na nuwatu saesaena ede teina: Bena yomi miyamiya kwa miyahedudulaidi na unai kabo Keliso wasana namwanamwana ta kawanamwanamwaeina yo hekasisina ye masalaha. Ena kabo ya laowa ya kitagomiu o yogu miyabasi ta unai na wasamiu mo ya lapui, meta kabo kabina ya kata ede komiu kwa tolobayao yaluwamiu kesega yo nuwamiu kesega, na maudoimiu kwa iyalagogoi wasa namwanamwana sunumana ta hesabana,  
\v 28 yo tauhewaiunugomiu yodi hineli maudoidi meta nige gonowana kwa matausiyeidi. Teina unai kabo se kitalobaiꞌuyoidi meta se laulau yodi heyababa hesabana, na komiu meta kabo kabihemauli kwa lobai Yaubada unai.  
\v 29 Yaubada ye kainauyaigomiu ede yomi sunuma kwa tole Keliso unai, na nige tenem ye bom mo, na hinage Keliso hesabana kwa kamkamna.  
\v 30 Matawuwuna haikabi kesekesegadi udiyedi kwa haihaikabi ta meta kwa kitadiko siya ede hinage kaliguwai yo wasa kwa lapui meta yau ede sola udiyedi ya haihaikabi.   
\c 2  
\s1 Bena ta nuwadobidobi doha Keliso  
\p
\v 1 Wasamiu meta ye namwakalili: Keliso unai kwa patulau ne unai hededehebayao kwa hai, yona gadosisi ne unai henuwabiga kwa lobai, Yaluwa unai kwa labininamwanamwa, yo gadosisi yo katekamkamna kalimiuwai.  
\v 2 Na ya henuwa bena yogu gwauyala kwa helaki nuwakesega unai, yo gadosisi kesegana ta unai yo yaluwamiu kesega yo nuwanuwatu kesega unai.  
\v 3 Tabu kwa bom nuwanuwatumiu yo nuwasaesaegaibu unai na saha hesau kwa ginauli, na bena nuwadobidobiyena kami kahao kwa nuwatukaliliyeidi na kabo komiu.  
\v 4 Tabu komiu kwa bom yomi namwanamwa hesabadi kwa modekalili, na taba kami kahao yodi namwanamwa modedi bena kwa kitalau udiyedi.   
\p
\v 5 Yomi miyamiya meta taba gonogonowadi ede doha Keliso Yesu yona miyamiya.   
\q1
\v 6 Keliso Yesu meta Yaubada,  
\q2 na iyamo nige ye tolobayao unai na taba iya maiyana Yaubada gonogonowadi.   
\q1
\v 7 Yona dudulai maudoina ye tolehesuwala  
\q2 na ye hemala heyayai tauhaina.  
\q1 Kana kao gonogonowana doha tamowai hekadiyo  
\q2 na se kitalobai meta iya tamowaimolosi.   
\q1
\v 8 Teina unai ye toledobidobiyeiꞌuyoi  
\q2 na ye kawakabi ye lau ee ye boita,  
\q2 iya sataulo unai ye boita.   
\q1
\v 9 Tenem debanaena Yaubada ye toleisini kabatuli saesaekalilina unai  
\q2 na hesana ye mosei meta hesa maudoidi ye saedikwaidi,   
\q1
\v 10 na galewa ne unai yo kaiyaulina ta yo gunina ne unai meta  
\q2 Yesu hesanaena tuli maudoidi kabo se tulibono,   
\q1
\v 11 yo memena maudoidi kabo se hededehemasalaha ede Yesu Keliso iya Guiyau,  
\q2 na unai noko yo hedebasae ye sae Yaubada Tamada unai.   
\s1 Ekalesiya meta doha mala tanoubu ta unai  
\p
\v 12 Kehaguwao, huyana yau maidamiu ta miya meta huya maudoina kwa kawakabi, na huyana ya miyasuwalaegomiu meta kwa kawakabikalili. Unai bena Yaubada kwa matausiyei yo kwa hekasisiyei na taba yomi mauli unai kwa hemasalahaꞌuyoigomiu meta ye gilihaigomiu,  
\v 13 matawuwuna Yaubada iya kalimiuyena ye paipaisowa, unai ede yona nuwatu kwa talamyeidi yo hinage kwa ginauliwatanidi.   
\p
\v 14 Ginauli maudoidi kwa ginaulidi meta tabu ma hetahetalapilimiu yo tabu ma haihaikawayagalamiu.  
\v 15 Unai kabo nige gonowana kabahededehegilugomiu, yo kwa aꞌa, yo komiu Yaubada natunao nige yomi laupwano hesau, na kwa miyamiya tamowai yodi nuwanuwatu gewagewadiyao yo yodi miyamiya se yababakalili luwadiyena. Teina unai kabo yomi mala kwa hesinadi kalidiyena doha kipwala masigili unai,  
\v 16 matawuwuna ede mauli hedehededena unai kwa tolobayao. Kabo gonowana unai ya gwauyala Keliso yona mayadai ne unai, kaniyona ede yogu paisowa\f ** \fr 2:16 \fq Paisowa: \ft Paulo heyaheyasoni ye hepaisowa, iya ede \fqa ya kailakwa\ft , yo hinage hedehedede dudulaina ye hepaisowa ede, \fqa ya paisowabayao\ft . Na nuwanuwatudi meta kesega, unai hedehedede dudulaina mo ka kuli lausoisoi ne unai.\f* luwamiuyena meta nige ya ginauligaibuidi.  
\v 17 Na ena taba yau doha numanuma kaitalasamna se inigabaei yomi sunuma yo yomi paisowa kaitalasamdi kewadiyena,\f ** \fr 2:17 \fq Ena taba yau doha numanuma kaitalasamna se inigabaei yomi sunuma yo yomi paisowa kaitalasamdi kewadiyena: \ft Numa Tabuna unai Dius yodi kaitalasam meta suisui se unuhemwaloi na se gabu, maiyana pwalawa yo oela yo waina. Ginaulidi ne nowonowoidi meta Yaubada ye hinelinonohaidi \xt Numela 15:3-10\ft unai. Na Paulo ye wane, ekalesiya Pilipi unai yodi kainauya meta doha kaitalasam suisuina, na iya yona apostolo paisowana ye heyaheyasoniyei waina unai, na ginauli labui se paisowagogoi meta kabo kaitalasam namwanamwana Yaubada matanaena na unai Yaubada se hedebasaei.\f* meta unai kabo nuwagu ye namwa na ya henuwa bena yau yo komiu ta gwauyalagogoi.  
\v 18 Yo gonogonowana doha hinage komiu bena nuwamiyao se namwa na komiu yo yau ta gwauyalagogoi.   
\s1 Timoti yo Epapolodaitasi wasadi  
\p
\v 19 Teina nuwatu ta debanaena yogu midi ya tole Guiyau Yesu unai na nige bayaona kabo Timoti ya hetamaliyawa kalimiuyena. Na ya henuwa ede taba ye uyoma ne unai kabo wasamiu yogu ye hedehedede na unai nuwagu ye hebayao.  
\v 20 Matawuwuna kaliguwai ta nige tamowai hesau doha Timoti. Iya meta yomi miyanamwanamwa nuwanuwatuna ye lakikalili kalinawai.  
\v 21 Na tamowai maudoidi meta se bom mo se nuwatuꞌuyoidi na nige se modelau Yesu Keliso yona nuwanuwatu udiyedi.  
\v 22 Na Timoti yona hemasalahaꞌuyoina kalimiuyena meta kabina kwa kata iya taupaisowa namwanamwana. Matawuwuna maiyagu ka paisowagogoi na wasa namwanamwana ka lauguguyaei doha natu ma tamana se paisowagogoi.  
\v 23 Unai yogu nuwanuwatu ede, ena saha kabo se tubu kaliguwai ne kabidi ya kata, kabo iya ya hetamaliyawa.  
\v 24 Na yau yogu nuwabayao Guiyau unai meta nige bayaona kabo hinage ya laowa ya kitagomiu.   
\p
\v 25 Na ya nuwatui taba Epapolodaitasi ya hetamali ye uyowa kalimiuwai. Iya kagu kaha yo maiyagu taupaisowa yo tauꞌiyala, yo hinage wasamiu iya yogu tauhedehedede ede, kwa hetamaliyama bena yogu deha unai ye saguigau.  
\v 26 Ye nuwayababa matawuwuna kwa lapui meta iya ye kasiyebwa, na ye henuwakalili bena taba ye kitagomiu.  
\v 27 Na mamohoina meta ye kasiyebwa ye lau ee musamusana kabo ye mwaloi, na Yaubada iya ye katekamkamnaei. Nige iya ye bom mo, na yau hinage ye katekamkamnaeigau, matawuwuna nige ye henuwa bena nuwakamkamna lakilakina hesau ya hekaloꞌuyoi.  
\v 28 Unai ede ya henuwakalili bena taba ya hetamaliyawa kalimiuyena, na kwa kitaꞌuyoi meta kwa gwauyala na yau kabo nuwagu ye talu.  
\v 29 Guiyau hesanaena Epapolodaitasi taba kwa hailobai yo kwa yogaisini ma gwauyalamiu. Tamowai doha iya taba kwa hekasisiyeidi,  
\v 30 matawuwuna Keliso yona paisowa unai musamusana kabo ye boita. Komiu ye lauhedamaigomiu na yona mauli ye talamgabaei na ye saguigau.   
\c 3  
\s1 Taba Yesu sunumaeina ta kabihekahini ye lau ee ta lage yoda kabakitalau unai  
\p
\v 1 Kagu kahao, Guiyau debanaena bena kwa gwauyala. Nuwanuwatu kesekesegadi ya kulidiko wa na ya kuliꞌuyoidi se laowa kalimiuyena meta nige yona pilipili hesau kaliguwai. Teina ta meta kabasaguigomiu.   
\p
\v 2 Kwa kitahetetegomiu tamowai bikibikidi kadi kao doha kedewa yo yababa tauginaulidi udiyedi, siya tatao yaudi taunigwanigwahaidi.\f ** \fr 3:2 \fq Tamowai bikibikidi kadi kao doha kedewa: \ft Paulo ma kouyalayalana na hedehedede bayabayaona ye tole taulauhekatalupolupo wa udiyedi. Ye kataidi siya kedewa, kaniyona ede tamowai bikibikidi. Dius tamowaidi kalidiyena kedewa meta suisui siusiuna, na hesa kedewa se tolelaei nige Dius tamowaidi kalidiwai. Paulo nuwanuwatu ta ye bui na ye hedede taulauhekatalupolupo Dius tamowaidi udiyedi se laoma wa, siya bena \fqa kedewa. \ft Yo hinage ye wane siya \fq tatao yaudi taunigwanigwahaidi. \ft Teina unai yodi \+w \ft pelitome\+w* lauhekataena yo kabikabina ye hededeheyaheyababa. Matawuwuna se lauhekata ena dagela tamowaina loheya hesau ye nuwabui meta nige gonowana iya Yaubada yona tamowai kana siga pelitome ye haibagunaei.\f*  
\v 3 Matawuwuna kita meta \w pelitome\w* dudulaina tauhaina ede. Kita meta Yaubada ta tabaꞌohui Yaluwanaena, yo Keliso Yesu saha ye ginauliyako hesabada wa unai ta gwauyala. Na nige ta nuwabayao tauda yodi kabikabi namwanamwadi ne udiyedi.   
\p
\v 4 Iyamo yau gonowana ya nuwabayao taugu yona kabikabi namwanamwadi ne udiyedi. Ena tamowai hesau ye nuwatui meta iya gonowana yona sunuma ye tole tauna yona kabikabi udiyedi, meta yau ya bagunakalili.  
\v 5 Matawuwuna mayadai hehaligigi-haiyonana unai se hepelitomegau, yau Isalaela bodana hesau, kagu kulutubu ede Beniyamina, unai yau Hebelu tamowaina mamohoina. Laugagayo yona tehawai meta yau Paliseya bodana  
\v 6 na ya kaipatekalili bena laugagayo maudoidi ya miyawatanidi. Unai ekalesiya bodadi ya hekamkamnadi. Laugagayo miyawatanina laulauna dudulaina unai meta nige kabahegilugau hesau.   
\p
\v 7 Na ginauli maudoidi ne ya kitahesaeꞌuseidi wa meta Keliso debanaena ya kitadobidobiyeidi.  
\v 8 Yo hinage ya kitadi meta nige gonowana se saguigau, matawuwuna saha ye saekalili kaliguwai ede bena yogu Guiyau Keliso Yesu kabina ya kata. Iya debanaena ginauli maudoidi wa ya kabigabaeidi. Nuwanuwatudi kaliguyena meta se hemala mosomosogaibu, na saha ya henuwakaliliyei ede Keliso,  
\v 9 yo bena ya patunamwanamwa iya unai. Nige bena laugagayo unai ya tolo na ya bom yogu bayaoyena yogu miyamiya se dudulai Yaubada matanaena, na yogu sunuma Keliso unai debanaena Yaubada ye kitahenamwagau. Teina meta Yaubada yona kainauya kaliguwai Keliso sunumaeina\f ** \fr 3:9 \fq Keliso sunumaeina: \ft Hedehedede ta kalina Giliki unai kaniyona hesau hinage, iya ede, \fqa Keliso yona kawakabi\ft . Lausoisoi unai hedehededena kabo doha teina: \fqa Teina meta Yaubada yona kainauya kaliguwai Keliso yona kawakabi debanaena. \f* debanaena.  
\v 10 Ya henuwa bena Keliso kabina ya kata yo yona toloꞌuyo gigibwalina kabina ya kata yo hinage bena Keliso ya kamkamnasagui na yogu mauli ya talamgabaei na ya boita doha iya,  
\v 11 na unai taba boita unai kabo Yaubada ye hetoloꞌuyoigau.  
\v 12 Nige doha bena \add [toloꞌuyo kainauyana ya haiyako o ginauli hekadiyo ne se masalahako]\add* o ya lageko yogu kabakitalau unai. Na sola ya kaikaipate na saha Yaubada ye kabinonohai wa hesabana ya heloi na bena ya hai, matawuwuna teina hesabana Keliso Yesu ye haigauko.  
\v 13 Kagu kahao, nige ya kitaꞌuyoigau doha heloi kainauyana ne ya haiyako. Na ginauli kesega kabo ya ginauli ede, nuwanuwatu beyabeyadi ya nuwagabaeidi na ya heloi ya lau saha matagu ne unai hesabana.  
\v 14 Ya kaipate yo nuwagu ya tolekesegai yogu heloi ta unai. Kaniyona ede Keliso Yesu debanaena Yaubada ye yoganeigau bena kainauyana ne ya hai, iya ede mauli nige kana siga galewa ne unai.   
\p
\v 15 Na kaiteyadi komiu kwa matuwako bena ginauli ta yomi nuwatulobaidi doha yau. Na ena nuwanuwatu hekadi kwa nuwatuꞌudoiyeidi, meta Yaubada kabo hinage ye hemasalahadi kalimiuwai.  
\v 16 Na saha kabina ta katako wa meta bena udiyedi ta miya.   
\s1 Paulo yona miyamiya bena se miyawatanidi  
\p
\v 17 Kagu kahao, kwa haihebahebayaoꞌuyoigomiu na saha ya miyamiyaeidi ta kwa miyawatanidi. Yo tamowai miyamiya saha se kitahaidi kalimaiyena na udiyedi se miyanamwanamwa hinage kwa miyawatanidi.  
\v 18 Beyabeyana yomiu ya hedehededeko na teina hinage ya hedehededeꞌuyoi ma matasulugu, meta tamowai se bado Keliso yona sataulo ne se hewaiunu yodi miyamiya udiyedi.  
\v 19 Siya se laulau kadi heyababa hesabadi. Yodi yaubada meta bogadi, yo yodi didiga ede yodi laulau nuwamwadimwadinedi udiyedi. Yodi nuwanuwatu ede tanoubu ta ginaulidiyao mo udiyedi.   
\p
\v 20 Na kita yoda magai mamohoina ede galewa ne unai. Ta nayanaya bena temenai kabo taugilihaida ye laoma, iya ede yoda Guiyau Yesu Keliso.  
\v 21 Yona gigibwaliyena kabo ginauli maudoidi ye laedima yona loina guninaena.\f ** \fr 3:21 \xt Pilipi 2:10-11 \ft ku hasili.\f* Gigibwali ta unai kabo tauda dobidobidi yo basabasadiyao ta ye ginauliꞌuyoidi doha iya tauna didididigana ne.   
\c 4  
\s1 Paulo ekalesiya ye hededehebayaodi  
\p
\v 1 Kagu kahao, ya gadosisiyeigomiu yo ya henuwakalili bena ya kitaꞌuyoigomiu. Komiu meta yogu kabagwauyala yo yogu \w kolona\w*.\f ** \fr 4:1 \fq Kolona \ft meta heloikailakwa unai taulagebaguna, iya yona kainauya. Paulo yona leta tauhaina Pilipi unai kolona unai ye heyaheyasoniyeidi matawuwuna siya meta yona paisowa namwanamwana tauhemasalahana. \f* Kehaguwao, taba kwa tolobayao na tabu Guiyau kwa sigisigigabaei.   
\p
\v 2 Yodiya yo Sinitiki ya kaibwadaidi bena se nuwakesega Guiyau debanaena.  
\v 3 Na kowa, Sisigasi,\f ** \fr 4:3 \ft Hesa \fq Sisigasi \ft kaniyona ede, \fqa helegu taupaisowa\ft . Buka hekadiyo hesa ne nige se hai doha tamowai hesana, na kaniyona mo se kuli lausoisoi unai. \f* ya henuwa taba sinesineo labui ta ku saguidi, matawuwuna maidaguwao ka paisowagogoi na Yesu wasana namwanamwana wa ka wasaduwaiyei – yodi labui ta yo Kelementi yo maidagu taupaisowa hekadiyo wa. Hesadi ede mauli bukana unai.   
\p
\v 4 Guiyau debanaena taba kwa gwaugwauyala huya maudoina. Kabo ya hededeꞌuyoi ya wane, kwa gwauyala.   
\p
\v 5 Huya maudoina yomi miyamiya bena se namwa yo kwa gadogadosisi tamowai matadiyena.  
\p Guiyau yona laoma ede ye hanahanauma.   
\p
\v 6 Tabu ginauli saha hesau hesabana kwa nuwanuwatukalili, na ginauli maudoidi udiyedi kwa tapwalolo na kwa kaibwada ma laulautokimiu na ginauli saha kwa henuwadi ne kwa hemasalahasaeidi Yaubada unai.  
\v 7 Na nuwadaumwali Yaubada unai ye laoma na kita maudoida nige gonowana ta nuwatulobai ne, iya kabo nuwamiu yo yomi nuwanuwatu ne ye kitahetetedi Keliso Yesu debanaena.   
\p
\v 8 Kagu kahao, yogu guguya hedehedededi gehegehedi ede teina: Nuwanuwatu mamohoidi, hekahekasisi, nuwanuwatu dudulaidi, nuwanuwatu aꞌadi, tamowai kabahenuwanamwadi nuwanuwatudi, miyamiya tamowai kabo se kitahenamwadi, yo mauli miyamiyadi hekadi se namwakalili yo gonowana ta nokoeidi, meta bena kwa nuwatulobaidi yo kwa nuwanuwatuidi.  
\v 9 Na saha ya hekatagomiu o kaliguyena kwa hai o kwa lapuhai o kwa kitahai meta bena kwa haidi na kwa kaipate bena kwa miyawatanidi. Na nuwadaumwali Yaubadana meta iya kabo maidamiu.   
\s1 Paulo ye lautokiyeidi yodi kainauya hesabana  
\p
\v 10 Guiyau debanaena meta ya gwauyalakalili, kaniyona ede gonowana kwa nuwatuiꞌuyoigau. Mamohoikalili, hesabagu meta kwa nuwanuwatukalili, iyamo nige yomi solasola gonowana unai kabo bena kwa saguigau.  
\v 11 Teina ta ya hedede nige bena kaniyona ede ya henuwasagu, matawuwuna ginauli saha kaliguwai o nige kaliguwai meta miyamiyadi udiyedi ya manasako.  
\v 12 Deha meta kamnana kabina ya kata, yo huyagogo meta kamnana kabina ya kata. Hinage miyamiya udoiꞌudoi yodi namwa yo yababa meta kabidi ya kata, ya kaikai bogagu ye sese o ma hasaligu, yogu gogo se bado o ya deha.  
\v 13 Yau gonowana ginauli maudoidi ta ya ginaulidi Keliso debanaena, iya yogu bayao tauhaiyamana ede.   
\p
\v 14 Iyamo komiu kwa namwakalili ede yogu pilipili ta udiyedi kwa saguigau.  
\v 15 Na komiu Pilipi kabina kwa kata meta lahinaidi wasa namwanamwana ta ya laeiyawa kalimiuyena yo huyana teha Masedoniya ya laugabaei meta nige dubu hesau kaliguyena ye haisagusagu na komiu kwa bom mo kwa saguigau.  
\v 16 Hinage huyana yau Tesalonika unai na sagu ya henuwadi meta komiu kabasaguigau kwa hetahetamalidima.  
\v 17 Nige yogu nuwatu ede bena kabo tamowai se kainauyaigau, na yau ya henuwa ede bena yomi kaikainauya ne maisana namwanamwana kwa hai.  
\v 18 Na yau meta ginauli maudoidi ya henuwadi wa ya haidiko yo hinage hagahagadi. Epapolodaitasi unai yogu kainauya kwa hetamalidima wa ya haidi meta udiyedi ede yogu lobai wa kwa koisinikaliliyeidi. Na se hemala kaitalasam panena namwanamwana na Yaubada ye kawanamwanamwaei yo ye henuwanamwa.  
\v 19 Na yogu Yaubada kabo iya yona gogo saesaedi udiyedi kami henuhenuwa maudoidi ne ye haidiwa Keliso Yesu debanaena.   
\p
\v 20 Noko yo hededetausae taba se sae Yaubada Tamada unai huya maudoina ye lau ee nige kana siga. Mamohoi.   
\s1 Lautoki gehegehedi  
\p
\v 21 Yogu lautoki se lau Yaubada yona tamowai maudoidi udiyedi, siya Keliso Yesu unai tausunuma.  
\p Yo hinage kada kahao siya maidaguwao taumiya yodi lautoki se laowa kalimiuwai.   
\p
\v 22 Yaubada yona tamowai maudoidi yodi lautoki se hetamalidiwa yo siya Sisa yona numa tamowaidiyao hinage.   
\p
\v 23 Yoda Guiyau Yesu Keliso yona kabinamwa bena yaluwamiu ne udiyedi. Mamohoi.