\id TIT - Saafi-Saafi
\ide UTF-8
\h Tit
\toc3 Tit
\toc2 Tit
\toc1 Fiisi Pool kaɓɗoh Tit
\mt Fiisi Pool kaɓɗoh Tit
\is Rangsohaani
\ip Pool ɓaahee ŋ Israayel ci, ŋ cuuɓiŋ Benyaamin.\x + \xt Ɓi Rom 11:1; Ɓi Filippi 3:5\xt*\x* A nikee \w \+tl Farisen\+tl*\w*.\x + \xt Tum ci 23:6; Ɓi Filippi 3:5\xt*\x* Ŋ finho \w Paantakot\w*, wi Janguuni camb ɓaatuk, a ɓaahee ŋ ɓi tolfiɗee kosiɗ ci.\x + \xt Tum ci 7:58–8:3\xt*\x* Waaye wa raakka mbeh, a cohha na Yeesu, a kossa\x + \xt Tum ci 9:1-30\xt*\x* po a nikka \w \+tl Apootar\+tl*\w* sah. Teerndiŋ "Tum ciŋ \tl Apootar\tl* ci" teeɓohiɗ pangkiŋ ɗe wi a nik \tl Apootar\tl* ini kooɗoh ŋ saar 13.
\ip Tiikiŋ Tit nikɗi ŋ teerndiŋ Tum ci, waaye Pool woyiɗ tiik ce ŋ in laayiɗ ŋ fiis ci a kaɓɗoh. Ini Pool fiis ŋ Tit ngaŋ teerndiŋ \xt Ɓi Galaat 2:1-3\xt*, wa miniɗ teel ngaŋ pangkiŋ Pool, wa miniɗ nik ne wa nikee bala ɓaaɓaŋ ɗe yakka koc, ŋ kaɗaŋ ɗe ŋ Yudee ngaŋ teerndiŋ \xt Tum ci 11:27-30\xt*, wala ŋ finho ɓaaɓaŋ ɗe yakka koc ŋ kaɗaŋ ɗe ndaam ngaŋ teerndiŋ \xt Tum ci 15\xt*. Ŋ finho ineem, Pool woyiɗ tiikiŋ Tit ŋ Fiisi a kanakɗoh kaɓɗoh ɓi Korenta, wa a fiis ŋ ɓaaɓaŋ ɗe yakka kaahayɗoh. Wa ñiiniɗ ndeem ne Tit nikee ɓaatɗoh keeh-keeh ngaŋ Pool.\x + \xt 2 Korenta 2:13; 7:6-16\xt*\x*
\ip Ŋ finho taƴuukaŋ Pool koc ŋ Rom,\x + \xt Tum ci 28:16-31\xt*\x* Pool faɗsuusa. Ŋ jamanoonaam, weɗ a kaɗoh na Tit Keret. Wa Pool pul Keret, a faɗ Tit ndaam.\x + \xt Tit 1:5\xt*\x* Waam weɗ a fiisoh kaɓɗohii. Ŋ reehɗohaaniŋ kaɓɗohi, a woosa ne a hey woose ƴaar wiiriis ŋ Keret, a woosa Tit ne a hayaat ɗe marke ne yi na hee ɗe namsiɗe ree ɗah. Ini mirndoh kerhu ŋ Tit weɗ Pool fiis ŋ teerndiŋ \xt 2 Timoote 4:10\xt*. Ŋ ndeem, Pool taƴissuusa ŋ kaso, te a inahha ne a hey apse. Ini a woo rohƴiɗ, waaye wa teeɓoh ne ɓa risee kerhoh.
\ip Janguuniŋ Keret nikee haneeɗa camb, te nakoh ci na jangɗoh ciŋ Pool raakiɗ etoh ŋ mboolo mand ɗaa.
\iot Fiisi Pool kaɓɗoh Tit kaɗtiɗoh an :
\io1 - Pool kañɗiɗ Tit, a woosa ƴissuut ŋ pangkiŋ ɗe \ior 1:1-5\ior*
\io1 - Mandohaaɗ ciŋ ɓooɓi adgohan Janguuni \ior 1:6-9\ior*
\io1 - Miskiɗ ci raak ŋ Keret \ior 1:11-16\ior*
\io1 - Findi ɓo' joy tumoh na ɓooɓi jen\ior 2:1-10\ior*
\io1 - Njirñiŋ yegɗohiŋ baahohi \ior 2:11-15\ior*
\io1 - Nakoh ci wuu findi kosiɗ ci joy nikoh \ior 3:1-11\ior*
\io1 - Kooɗkiŋ ɓaaɓ ci, na kañɗoh ci mirndoh \ior 3:12-15\ior*
\c 1
\s Kañɗohi
\p
\v 1 Mi yii kañiɗ ɗa Tit, mi yi Pool, \w ñaamiŋ|lemma="ñaam"\w* Kooh na \tl \+w Apootariŋ|lemma="apootar"\+w*\tl* Yeesu \w Kiristaa\w*, ñam kooɗu ne ŋ woo ɓi Kooh tan, ɓa hay ŋ kosi, ŋ inhiɗ ɓa baahiɗ keeh ki, keeh ki hun na nup Kooh. 
\v 2 Ŋ ineem, ɓa hey oolke ne ɓa hey raake kipes ki heyɗi reehe. Kooh yi na leyeeɗi, a yi gapoh kipes keem bala Adina fersan. 
\v 3 Kooh Mucɗohiŋ ɓoo, wi jamanooni a gapohee ineem hay, a inhiɗohiɗ woo kiŋ ɗe weem, a dengkohha so wa ne ŋ yegɗoha.
\p
\v 4 Mi yii fiis kaytii ne ŋ woo na ɗa Tit, fu yi ŋ amb findi kuɓuuso keeh-keeh ŋ kosi ɓoo ɓaah. Kooh Baabi na Yeesu Kiristaa Mucɗohi baahohaat ɗa, on ɗa jam !
\s Ɓi adgoh Janguuni
\p
\v 5 Ŋ faɗiɗ ɗa ŋ Keret ne fu ɗiindoh in ci tasee tufkiɗu ŋ ndeem, ne fu kooɗ ŋ kur-taah nu nik yakak ci adgohan Janguuna nik nga. Tuma findi ŋ woyoh ɗa wa. 
\v 6 Yaa nu nga ɓa joy nik ɓo' raakaaɗi woyɗaah moɗaaɗi, a tok ŋ ɓitiice, komaakciŋ ɗe joyiɗ kos, ɓa joyɗi inhu ŋ tumohaaɗ mbalay wala kerhiɗaaɗi ɓo'.
\p
\v 7 Yi adgohan ɓi Janguuni, a taambkohan pangkiŋ Kooh, weɗ tah a joyɗi raak woyɗaah moɗaaɗi. A joyɗi yaksiɗuk, a joyɗi yooɓ ayruk, a joyɗi nik laaroh, a joyɗi nik ɓo' waaɗiɗ hiñoh, a joyɗi waak kopor ŋ ini lahɗi waas, 
\v 8 waaye a joy joy daliɗ baahiɗ ɓi na haye kahan ce, a waaɗ in baahiɗ, a hendoh pesohaaɗiŋ ɗe, a yurah, a hool wuu Kooh, a min amb haf ce.
\p
\v 9 A joy joy amb ndengiɗ woo ki wooriɗi, wi hun na ini jangɗohu. Ŋ ndeem a hey mine ñaah ɓinooɓi na jangɗohi wiriɗi te a teeɓ ɓi na ɗalee wa ne wa ɗaa haa.
\s Ɓi na tufkiɗe jangɗoh ci nikɗi keeh
\p
\v 10 Raakiɗ ɓo' laayiɗ nga ɗu ɓi kerhiɗɗi ali ɓo'. Ɓa na ñaañohe ɓooɓi na woo ciŋ ɓa mbalay ci ; ɓoo ɓeem uupoh ŋ Yawuut ci nik na ɗu. 
\v 11 Ranga nguɓ ciŋ ɓa, ɓa na yahrohe kos kahan limb, ɓa jangɗohee in ci ɓa joyɗi jangɗoh, sagu waaɗ raak kopor ŋ ini lahɗi waas. 
\v 12 Ɓo' Keret, ɓaah na ɓa, a woosuuɗ sah, ɓaah nga ɓa, a woyiɗ ne :
\q « Ɓi Keret moos nik leyoh ;
\q ɓa ɗoopaat saahiɗ,
\q ɓa waaɗ ñam te ɓa tiriɓpa ! »
\m
\v 13 Ini woyu nga ɓa weem, wa keeh, tahha po woytoha ɓa woytoh ndengiɗ ne ɓa min raak kos moɗoɗ, 
\v 14 weɗ ngisoh ɓa sikɗukee andiin ciŋ Yawuut ci na nakoh ci puloh ŋ ɓi suungɗuk keeh ki.
\p
\v 15 Ɓooɓi hooliɗ ci, in ci jen hooliɗ nga ɓa waaye ɓi hoolaaɗiici te ɓa sannga kos, ali in hoolɗi nga ɓa. Laam nga ɓa, liiɓ ciŋ ɓa hoolɗi, ca minɗi inhisoh baahiɗ na baahaaɗi. 
\v 16 Ɓa na woye ne ɓa inhiɗ Kooh, waaye tumohaaɗ ciŋ ɓa taasiɗ ɓa, ɓa siɓaah, ɓa kerhiɗɗi ali ɓo' te ɓa minɗi haɓiɗ ali in baahiɗ.
\c 2
\s Nakoh ci kaɗ ŋ yaɓkooci na ɓitif ci na komaakci na ñaam ci
\p
\v 1 Ini kaɗ nga ɗa nak, Tit, woya ini hun na jangɗohi wiriɗi. 
\v 2 Woya yaɓkooci ɓa min amb haf ciŋ ɓa, ɓa nik eɗaah cir, ɓa hendoh pesohaaɗiŋ ɓa, kosiŋ ɓa wir, wa hun na waaɗi ɓa waaɗ ɓooɓi na muñi ɓa muñ ɓa seke.
\p
\v 3 Wa mand ɗaa ŋ ɓitif ci, ɓa raakaat mandohaaɗi neɓ Kooh ; ɓa ɗooɓohuu, ɓa ŋoɗuu ŋ sangara, ɓa dengohee in baahiɗ, 
\v 4 ne ɓa min jangiɗ jeeg ci, ɓeem waaɗ ƴaar ciŋ ɓa na kuɓuuciŋ ɓa, 
\v 5 ɓa hendoh pesohaaɗiŋ ɓa, ɓa hool te ɓa taambkoh kahan ciŋ ɓa, ɓa nik ɓo' baahiɗ te ɓa kerhiɗ ƴaar ciŋ ɓa, ŋ ineem, ɓo' riiɓɗuu woo kiŋ Kooh.
\p
\v 6 Nama ñaah komaakci ƴaar ci ɓa hendoh pesohaaɗiŋ ɓa. 
\v 7 Te fu, ŋ in nu wa min ki nik ɗah, nika altiɗkohaah ŋ tum in baahiɗ na jangɗoh yurhiɗ. Jangɗohiŋ ɗa joyiɗ nawu, 
\v 8 wa wir, ali ɓo' minuu wa nihis. Wa kaɗoh ɗaa ɗah, sangiɗ ciŋ ɓoo hey kaci'e, ɓa raakuu ali in moɗaaɗi woyaah nga ɓoo.
\p
\v 9 Woya \w ñaam\w* ci ɓa kerhiɗ ɓi raak ɓa ngaŋ in ci jen, ɓa tumee ini neɓ ɓeem, ɓa taasohuu na ɓa, 
\v 10 ɓa rokɗuu ɓa ali in, waaye ɓa teeɓohee ne ɓa cariɗ oolku keeh-keeh. Ŋ in ceem jen, ɓa hey moɗɗe jangɗohi kaɗ ŋ Kooh, Mucɗohiŋ ɓoo.
\s Cuuɓi ɓaah ŋ Yeesu Kiristaa
\p
\v 11 Jangɗoheem raakiɗ njiriñ, laam Kooh teeɓohiɗ baahohi a baahoh ɓooɓi, baahohi rangis waasiŋ muci wuu ɓooɓi jen. 
\v 12 Baahohiŋ ɗe na ɓoo weem, wa na jangɗe ɓoo ne ɓoo penduk kaañ Kooh, na waaɗ-waaɗ ciŋ adinaani. Ŋ ineem ɓoo min pes ŋ adinaanii kipes hendohuuɗ, yurhiɗ, huniɗ na waaɗ-waaɗiŋ Kooh, 
\v 13 te ɓoo sekee mbehi neɓiɗi ɓoo oolkoh : hayiŋ Yeesu \w Kiristaa\w* ŋ yaki a yak, a yi Kooh, Mucɗohiŋ ɓoo.
\p
\v 14 A eɗohiɗ haf ce wuu ɓoo ne a tos ɓoo ŋ moɗaaɗi nu nik. Ŋ hoolɗi a hooliɗ ɓoo, a tumiɗ ɓoo cuuɓ hooliɗ, ɓoo nikka cuuɓi a raak, cuuɓi sawaran ŋ tum in baahiɗ. 
\v 15 Fu joy jangɗoh in ceem Tit, fu ñaahee ɓi na sikɗukee ɗa, fu kuƴsee ɓa, wa hun na kikilifa mitiɗ. Ali ɓo' kinaat ɗa heef !
\c 3
\s Nakoh ci wuu findi kosiɗ ci joy nikoh
\p
\v 1 Gena naandis ɓaah ciŋ ɓoo kosiɗ ci ne ɓa joy joy teyɗuk kilifaaci na ɓi adgoh kur ki ; ɓa kerhiɗ ɓa te ɓa tokɗuk ne ɓa haɓiɗ in baahiɗ nu nik. 
\v 2 Ɓa ɓasuu ali ɓo', ɓa wortuk lahtoh, ɓa nik ɓo' baahiɗ, ɓa nik ɓo' soosiɗ ŋ ɓooɓi jen.
\p
\v 3 Ɗeɓgaan ɓoo namee nik ɓo' naandiɗ, ɓooɓi kerhiɗɗi ali ɓo', ɓo' muuƴiɗ, a kiñin ciŋ ɓoo na waaɗ-waaɗ nu nik ceɗ adgiɗee ɓoo. Ɓoo peseeɗa ŋ añaand na siistiɗoh, ɓoo nikee sangaah te ɓoo sangtiɗohha ŋ harmban ɓoo.
\b
\q
\v 4 Waaye wi Kooh,
\q Yi Mucɗohiŋ ɓoo,
\q teeɓoh baahkiŋ ɗe
\q na waaɗiŋ ɗe na ɓooɓi,
\q
\v 5 a mucɗiɗ ɓoo.
\b
\q Te wa ŋ tumohaaɗ ci,
\q ciŋ ɓoo yurhiɗ ci haa,
\q waaye ɓoo misik ɗe misik,
\q a muciɗta ɓoo
\q taamboh ŋ ɓooki,
\q ɓooki tah ɓoo rimkis,
\q a onnda ɓoo kipes as
\q taamboh ŋ \w Fuuɗsi Hoolohngaani|lemma="Fuuɗsi Hoolohngaani, Fuuɗsiŋ Kooh"\w* ;
\b
\q
\v 6 a ruhsiɗta Fuuɗsi Hoolohngaani
\q laayoh na laayoh nga ɓoo,
\q taamboh ŋ Yeesu \w Kiristaa\w*
\q Mucɗohiŋ ɓoo.
\b
\q
\v 7 Ŋ baahohi a baahoh ɓoo,
\q a ambiɗ ɓoo ɓo' yurhiɗ,
\q a onnda ɓoo kipes ki reehanɗi,
\q wi ɓoo ooluk ne ɓoo heya rahse.
\b
\p
\v 8 Woo keem wooriɗ, te ŋ waaɗiɗ ne fu ndengiɗa baahiɗ, ne ɓi kos Kooh liiɓ ciŋ ɓa puluu ŋ ndengɗuk ŋ tum in baahiɗ. Ineem weɗ moɗ te wa raakka njiriñ ŋ ɓooɓi. 
\v 9 Waaye wortuka taastiɗoh ci naandohaaci, limiŋ caac ci, na lahtoh ci na taastiɗoh ci ŋ ini kaɗ ŋ \w waasiŋ|lemma="waasiŋ Musaa"\w* \w Musaa\w*. In ceem jen ca raakɗi njiriñ te ca ɓarang ɓarang.
\p
\v 10 Yaa nu ɓek saɓsukoh ŋ ɓooɓi ɗah, woytohaa ɗe waas yino po waas kanak, a ɓoƴsohɗi ɗah, aañaa ɗe ŋ Janguuni, 
\v 11 ɓo' mand ɗaa ɗah, wa wooraat ɗa ne a faɗiɗ waasi yurhiɗi. A na bakaaɗe, a atte'iɗ haf ce po ƴutiɗ.
\s Kooɗkiŋ ɓaaɓ ci na askohi
\p
\v 12 Ŋ hey ɗa woosohe Artemas wala Tisikos. A ree ɗah, ndengɗuka fu hay fu raak ko ŋ Nikopolis. Ŋ ambiɗ ne jamanooniŋ soosi ŋ nikana ndaam. 
\v 13 Ndengɗuka fu taambkoh Senas ngelohi, a yi na Apolos po ɓa raak in ci ɓa etoh jen ŋ ɓaaɓiŋ ɓa. 
\v 14 Ɓooɓiŋ ɓoo joyiɗ nam jang tum baahiɗ ne ɓa ɓaatɗoh ɓo' ŋ etoh ci keeh-keeh ci, ŋ ineem kipes ciŋ ɓa min raakiɗ ɓo' njiriñ.
\p
\v 15 Ɓooɓi nik na so jen ɓii kañiɗ ɗa. Kañɗiɗ to nawleeciŋ ɓoo kosiɗ ci. Kooh baahohaat ɗu jen !