\id PHP - Saafi-Saafi
\ide UTF-8
\h Ɓi Filippi
\toc3 Fip
\toc2 Ɓi Filippi
\toc1 Fiisi Pool kaɓɗoh ɓi Filippi
\mt Fiisi Pool kaɓɗoh ɓi Filippi
\is Rangsohaani
\ip Pool ɓaahee ŋ Israayel ci, ŋ cuuɓiŋ Benyaamin.\x + \xt Ɓi Rom 11:1; Ɓi Filippi 3:5\xt*\x* A nikee \w \+tl Farisen\+tl*\w*.\x + \xt Tum ci 23:6; Ɓi Filippi 3:5\xt*\x* Ŋ finho \w Paantakot\w*, wi Janguuni camb ɓaatuk, a ɓaahee ŋ ɓi tolfiɗee kosiɗ ci.\x + \xt Tum ci 7:58–8:3\xt*\x* Waaye wa raakka mbeh, a cohha na Yeesu, a kossa\x + \xt Tum ci 9:1-30\xt*\x* po a nikka \w \+tl Apootar\+tl*\w* sah. Teerndiŋ "Tum ciŋ \tl Apootar\tl* ci" teeɓohiɗ pangkiŋ ɗe wi a nik \tl Apootar\tl* ini kooɗoh ŋ saar 13.
\ip Kaɗaŋ Pool koc ŋ kur kaŋ Filippi,\x + \xt Tum ci 16:12-40\xt*\x* wa nikee ŋ ɓaaɓiŋ ɗe yakki kanakɗoh.\x + \xt Tum ci 15:40–18:22\xt*\x* Kaɗi kanakɗoh na wi kaahayɗoh, ɓo' amb ne ceɗ naandsuku ŋ teerndiŋ \xt Tum ci 20:2,6\xt*. Kaɗ ceem nikee ŋ ɓaaɓiŋ ɗe yakki kaahayɗoh.\x + \xt Tum ci 18:23–21:17\xt*\x*
\ip Wi Pool na fiise kaɓɗohii, a nikee ŋ kaso ŋ kahnaŋ buur, waaye nik ne wa nikee ŋ Seesare\x + \xt Tum ci 23:23–26:32\xt*\x* wala ŋ \w Rom\w*\x + \xt Tum ci 28:16-31\xt*\x* wala ŋ ɗisik wiiriis ɗah\x + \xt 2 Korenta 11:23\xt*\x* ɓo' inahɗi, waaye wa kaɓɗohi riif na sum. Pool teeɓohiɗ harmban ce na kosiɗ caŋ Filippi findi wa neɓohe, a corkiɗta ɓa ŋ onohi ɓa kaɓɗoh ɗe taamboh ŋ Epaforodit.\x + \xt Ɓi Filippi 4:10-20\xt*\x* Te wa mand haa ne a Epaforodit na hee ɓayndohe kaɓɗohi a fiis ɓi Filippi wii ne a wiirkee ɗah. Findi a na tumohee wa ŋ kaɓɗoh ciŋ ɗe jen, Pool dengiɗ ɓa baahiɗ, a woytohha ɓa ŋ in ci ɓa joy wortuk.
\iot Fiisi Pool kaɓɗoh ɓi Filippi kaɗtiɗoh an :
\io1 - Pool kañɗiɗ ɓi Filippi te a kiimiɗta ɓa Kooh \ior 1:1-11\ior*
\io1 - Miskiɗ ci jen baahiɗ feeh \w Yegɗohiŋ Muci\w* wii kaɗ fiki ɗah \ior 1:12-30\ior*
\io1 - Ruhsiɗaat haf ɗu, ɗu nik yino, findi \w Kiristaani|lemma="Kiristaa"\w* tumoha \ior 2:1-11\ior*
\io1 - Taamboh ŋ ini Kooh tum, melciɗaat findi hor ciŋ Asamaan \ior 2:12-18\ior*
\io1 - Pool hey tuuƴe Epaforodit na Timoote ŋ kur kaŋ Filippi \ior 2:19-20\ior*
\io1 - Ini uup raak njiriñ ŋ Pool na ɓi Filippi \ior 3:1–4:1\ior*
\io1 - Sumaat ŋ niki ɗu nik ŋ Heɗi \ior 4:2-9\ior*
\io1 - Pool corkiɗiɗ ɓi Filippi ŋ onohiŋ ɓa \ior 4:10-20\ior*
\io1 - Askohi \ior 4:21-23\ior*
\c 1
\s Kañɗohi
\p
\v 1 Ɓoo ɓii kañiɗ ɗu, ɗu ɓi \w ɓo'-Kooh ci\w* nik ŋ Filippi, ɗu ɓi hoolɗu wuu Kooh ŋ niki ɗu nik ŋ \w Kiristaani|lemma="Kiristaa"\w* Yeesu. Mi yi Pool, na Timoote, \w ñaam\w* ciŋ Kiristaani Yeesu, ɓoo ɓii kañiɗ ɗu jen, ɗu na ɓi adgoh ɗu na ɓi na taambkohe in ciŋ Janguuni. 
\v 2 Kooh Baabiŋ ɓoo baahohaat ɗu, a on ɗu jam ; Yeesu Kiristaa Heɗi baahohaat ɗu, a on ɗu jam !
\s Pool kiimɗiɗ ɓi Filippi Kooh
\p
\v 3 Mi yii corkiɗ Koohiŋ ngo, waas nu ŋ liiɓ nga ɗu ɗah ; 
\v 4 te ŋ kiimɗeesa ɗu Kooh ɗah, mi na kiimɗee ɗu jen na sum, 
\v 5 sagu ɓaahi ɗu ɓaah ŋ pangkiŋ \w Yegɗohiŋ Muci\w* ŋ mbeha ɗu kosoh po woti. 
\v 6 Wa wooriɗ to ne Kooh yi camb panguk baahiɗ nga ɗu, a heya taalndiɗe po a ɗiindoha ŋ mbeha Kiristaani Yeesu hayohan.
\p
\v 7 Wa waas ŋ liiɓiɗta ɗu ineem, ɗu jen, sagu keeñkohi ŋ keeñkoh ɗu, na raaki ɗu raak jen ɓak ŋ baahohi Kooh baahoh ho ; wa nikoh ɗaa ŋ niki ŋ nik ŋ kaso, wa nikohha ɗaa ŋ teeɓohi mi na teeɓohe ne Yegɗohiŋ Muci, wa in baahiɗ te wa keeh. 
\v 8 Kooh inhiɗ ne ŋ keeñkohiɗ ɗu jen ŋ waaɗohi nik ŋ Kiristaani Yeesu.
\p
\v 9 Ini mi na kiimɗee ɗu weɗ ne waaɗohiŋ ɗu ɓaatkee, wa uupee riif na inah na inhisoh keeh-keeh. 
\v 10 Ŋ ineem, ɗu min inhisoh ini raak njiriñ ne ɗu hool te ɓo' raakuu woyaah nga ɗu ŋ mbehi Kiristaani hayohan. 
\v 11 Ɗu nam riif na ini kiyurah na rime ŋ ɓo', wa puloh ŋ Yeesu Kiristaa, te wa yakɗoha Kooh na ƴeek ɗe.
\s Yegɗohiŋ Muci na ɓaatke ɓaatuk
\p
\v 12 Ɓaah ciŋ ngo, ŋ waaɗiɗ ne ɗu inah inii : Ini rahas so tufkiɗɗi Yegɗohiŋ Muci, wa ɓaata kaɗiɗ fiki kay. 
\v 13 Laam, ɓooɓi nik ŋ kahniŋ buur wii, na ɓinooɓi jen, wa leeriɗ nga ɓa ne e Kiristaani tah ho taƴu ŋ kaso. 
\v 14 Te ini uup ŋ ɓaah ciŋ ɓoo kosiɗ ci, taƴuukiŋ ngo wii tahiɗ po ɓa ɓaatiɗ ooluk Heɗi, ɓa ɓaatta kaañ yegɗoh Yegɗohiŋ Muci te ɓa neƴƴohɗi nga. 
\v 15 Ali nik ne ɓum nga na yegɗohe Kiristaani ŋ siisoh na lahtoh, ɓinooɓi na tumee wa na liiɓ moɗiɗ. 
\v 16 Ɓeem ɓa na tumee wa sagu waaɗohi nik nga ɓa, ɓa inhiɗ ne ŋ naku ne ŋ teeɓohee ne Yegɗohiŋ Muci baahiɗ. 
\v 17 Ɓinooɓi na yegɗohe Kiristaani ŋ hundiskoh, in ci ɓa waaɗ hoolɗi ; ɓa na dabgiɗe ɓaat miskiɗ nikiŋ ngo ŋ kasooni.
\p
\v 18 Waaye ali in ! Findi wa min mand ɗah, wa nik ŋ yurhiɗ wala ŋ yurhaaɗi, Kiristaani yii yegɗohu, te ŋ sumiɗ nga. Ŋ hey ɓaate sum nga, 
\v 19 laam ŋ inhiɗ ne wa mirndohan nik faɗsuukiŋ ngo, taamboh ŋ kiim ci ɗu na kiime Kooh na ɓaatɗohiŋ Fuuɗsiŋ Yeesu Kiristaa. 
\v 20 Ini mi na seke ngaŋ seesuk, ŋ oolkiɗ ne, ŋ heyɗi nike tumaaɗi ini ŋ naku, waaye findi ŋ meeɗa tumoh rek, ŋ risan ndengiɗ po ŋ yakɗoh Kiristaani faaniŋ ngo ŋ kipes wala ŋ kakaan.
\p
\v 21 Nga so, kipes weɗ Kiristaani, ali ŋ kaan sah, wa ɓaatan ndo kaɗiɗ fiki. 
\v 22 Waaye ŋ taalndiɗ ŋ pesee ndii ɗah, ŋ hey mine panguk pangki raak njiriñ. Mbaa ŋ inahɗi andi, ŋ heen kooɗe ɗah, ŋ hee kooɗe kaan wala taalndiɗ pesee ndii. 
\v 23 Ñam yii ŋ harmban in kanak : Ŋ waaɗiɗ saɓsukoh na kipes kii ne ŋ nik na Kiristaani, weɗ ngisoh fuuf. 
\v 24 Waaye, saguuɗu ini uupiɗ njiriñ weɗ ne ŋ ris pes ndii. 
\v 25 Ineem wooriɗ to, weɗ tah ŋ inhiɗ ne, ŋ risan ŋ serooɗu jen, ne ŋ ɓaatɗoh ɗu, ɗu kaɗ fiki ŋ kosi ɗu kos, ɗu nam sum nga. 
\v 26 Ineem tahiɗ po, ŋ hayis nga ɗu ɗah, ɗu hey ɓaate ndamkoh Kiristaani Yeesu saguuso.
\s Hiñoh wuu Yegɗohiŋ Muci
\p
\v 27 Findi wa min mand ɗah, pesaat kipes huniɗ na Yegɗohiŋ Muci ŋ ini kaɗ ŋ Kiristaani ne, ŋ hay nga ɗu ŋ hayɗi nga ɗu, ŋ kerah ne ɗu ndengiɗ, ɗu yino, te ɗu na hiñohe na keeñ yino wuu kosiŋ Yegɗohiŋ Muci. 
\v 28 Kinaat faɗ sangiɗ ci ɓa ɓekee neƴƴoh nga ɗu ŋ ali in. Ineem hey teeɓe sangiɗ ci ne ɓa ɗii ŋ waas ɗumbu, wa teeɓ ɗu muc puloh ŋ Kooh. 
\v 29 Ini kaɗ ŋ Kiristaa, ɗu baahohu kos dong haa, waaye ɗu namiɗ baahohu raak miskiɗ saguuce. 
\v 30 Ɗu ɓii hun na so ŋ hiñohi ɗu hot to hiñohe, te ŋ ris nga poyi, findi ɗu kerhoha.
\c 2
\s Mand na Kiristaani
\p
\v 1 Niki ɗu nik ŋ \w Kiristaani|lemma="Kiristaa"\w* oniɗ ɗu kaañ, waaɗi a waaɗ ɗu giifiɗta ɗu, \w Fuuɗsi Hoolohngaani|lemma="Fuuɗsi Hoolohngaani, Fuuɗsiŋ Kooh"\w* oniɗ ɗu ne ɗu nik yino, keeñkoh na yirmoh raakiɗ ŋ harmban ɗu, wa ineem haa e ? 
\v 2 Kon mitɗaat sumi ŋ sum : Raakaat hotohaaɗ yino, ɗu waaɗtiɗoh ɗu nik yino, ɗu nik keeñ yino, na liiɓohaaɗ yino. 
\v 3 Kinaat tum ali in ngaŋ hundiskoh wala ŋ hotsiɗuk, waaye ruhsiɗaat haf ɗu, ɗu eɗ ɓinooɓi cir po haa ɓeɗ uup ɗu. 
\v 4 Yaa nu nga kinaat top ŋ haf ce dong, waaye, a namaat liiɓ ŋ ɓinooɓi.
\p
\v 5 Mandaat ŋ harmban ɗu findi Kiristaani Yeesu mand :
\b
\q
\v 6 Ini a moos nik keeh-keeh,
\q wa Kooh,
\q waaye niki a nik yino na Kooh weem,
\q a ambɗi wa findi ini a joy ŋoɗoh.
\q
\v 7 Waaye a woluk woluk ineem,
\q a tummba haf ce ñaam keeh-keeh,
\q a nikka findi ɓo' ci ;
\b
\q ɓo' kiŋ ɗe weɗ hotuk,
\q
\v 8 a ƴissuutiɗta haf ce,
\q a kerhiɗta Kooh po a teyɗukka kaan,
\q kaan ngaŋ kurwaa sah.
\b
\q
\v 9 Ineem weɗ tah
\q Kooh rapiɗta ɗe ŋ ɗiska uup ɗafuk,
\q a eɗta ɗe tiiki uup tiik ci jen,
\q
\v 10 ne ŋ tiikiŋ Yeesu,
\q feruuɗ ci nik ŋ Eel ci na kehƴi
\q na ooɓ kehƴi jen ƴek,
\q
\v 11 te nguɓ ci jen teyɗuk woo ne
\q Yeesu Kiristaa a yi Heɗi,
\q wa yakiɗ Kooh Baabi.
\b
\s Siñaariɗ findi hor ciŋ eel ci
\p
\v 12 Mbaa ɓaah ciŋ ngo ŋ keeñkoh, ɗu moos nik kerhiɗiɗ Kooh. Ini ŋ nikɗi na ɗu kinaat tah po wa haawsuk, ɓaataata, pangkaat na nup Kooh po muci ɗu mucɗu rim in. 
\v 13 Laam, Kooh a yi tum nga ɗu ne ɗu waaɗ tum in ci neɓ ɗe te a yi na name ɗu ca tumɗukoh.
\p
\v 14 Tumaat in ceem jen, wa hunuu na ñukumsuk, wa hunuu na ñaɗtuk. 
\v 15 Ɗu tum ɗaa ne ɓo' raakuu woyaah nga ɗu, ɗu hool, ɗu nik kuɓu Kooh raakaaɗi sikka ŋ ɗooƴ ɓooɓi nduuɗkiɗ ci, yurhaaɗiiciŋ Adina. Ɗu siñaariɗ ŋ ɗooƴ ɓa findi hor ciŋ eel ci, 
\v 16 ɗu eɗ ɓa woo kiŋ kipes ki. Wa hey tahe po ŋ ndamkoh ɗu ŋ mbehi Kiristaani hayohan. Jaar, pangkiŋ ngo miskiɗi nikuu ɓarang ɓarang.
\p
\v 17 Ali ŋ kaan sah, po kipes kiŋ ngo mand na seeƴuk aamkaah, wa yiifu ŋ seeƴki nik kosi ɗu kos sah, ŋ hey sume nga, te ŋ ɓaahan sum ki na ɗu jen. 
\v 18 Ɗu, namaat sum, ɗu ɓaah sum ki na so !
\s Pool woosiɗ Timoote na Epaforodit
\p
\v 19 Ŋ niki ŋ nik ŋ Yeesu Heɗi, ŋ oolkiɗ ne ŋ hey woose Timoote nga ɗu maañaaɗi, ne mi, ŋ nam raak ini soosɗan keeñiŋ ngo ŋ ini a woyan ndo nga ɗu. 
\v 20 Ɗal a yi ɗah, ŋ raakɗi ali ɓo' yi na yege na so in ci mi na yege, yi na liiɓee nga ɗu keeh-keeh. 
\v 21 Ɓinooɓi jen na liiɓe in haf ɓa, waaye in ciŋ Yeesu Kiristaa haa. 
\v 22 Waaye a yi, ɗu inhiɗ ne a teeɓohiɗ findi a mand : A pangkiɗiɗ \w Yegɗohiŋ Muci\w* na so, findi kuɓu ŋ sero baab. 
\v 23 A yi ŋ liiɓ ne ŋ hey ɗu ɗe woosohe, mbehi ŋ inhohan findi ŋ mirndohan. 
\v 24 Waaye wa wooriɗ to ŋ Heɗi ne ŋ hey name hay ɗiskiŋ ɗu maañaaɗi, mi ŋ haf fo.
\p
\v 25 Ŋ namiɗ hot ne wa raakiɗ etoh ŋ woosoh ɗu Epaforodit kotii. A ɓaah ɓoo ŋ kosi ɓoo ɓaah, te a huntohiŋ ngo ŋ pangki na ini ɓoo na hiñohe. A yi ɗu woosohee so, ne a ɓaatɗoh ho ŋ in ci ŋ etoh. 
\v 26 A mareen ɗu hot jen te a raakeen ini misik ɗe ŋ yegi ɗu yegee ne a kosaayeen. 
\v 27 A kosaayeen po a heeɗa kaane ; waaye a misikka Kooh, ŋ nammba misik Kooh ne ŋ raakuu keeñ reehiɗ nga.
\p
\v 28 Kon ŋ woosiɗ ɗe na seesuk ne ɗu sumis ngaŋ hot ɗe, te ŋ ineem, soosi ŋ soos reeh. 
\v 29 Taambɗukaat ɗe ŋ Heɗi, na sum keeh-keeh, eɗaat ɓi mand na ɗe cir ; 
\v 30 laam wa pangkiɗ Kiristaani tah ɗe heeɗa kaane ; a eɗohee kiñin kiŋ ɗe ne a tum ini ɗu hee so tumɗe nikee ne ɗu ɓii ŋ ndii ɗah.
\c 3
\p
\v 1 Ini tas ɓaah ciŋ ngo, weɗ ne ɗu sum ŋ Heɗi. Ŋ woyis ɗu wa, wa in ɓitiɗ nga so haa, te weɗ ngisoh nga ɗu.
\s Inah Yeesu Heɗi weɗ uup in ci jen
\p
\v 2 Kon, wortukaat tumoh baahaaɗiici, ɓuu ceem, wortukaat ɓi na nguɗe cir ciŋ faan ciŋ ɗu. 
\v 3 Laam e ɓoo \w nguɗkiɗ|lemma="nguɗuk"\w* ci keeh-keeh, ɓoo ɓi na ñaamke Kooh taamboh ŋ \w Fuuɗsiŋ ɗe|lemma="Fuuɗsi Hoolohngaani, Fuuɗsiŋ Kooh"\w*, ɓoo ndamkohee \w Kiristaani|lemma="Kiristaa"\w* Yeesu te ɓoo oolkohɗi ini kaɗ ŋ faan.
\p
\v 4 Moona mi, ŋ mineen oolkoh ini kaɗ ŋ faan. Nik ne a ɓum oolkoh ini kaɗ ŋ faan ɗah, ŋ woyisɗi ɗa mi : 
\v 5 Ŋ nguɗuk ŋ mbeha yasna-kaahayɗoh,\x + \xo 3:5 \xo*\xt Camba 17:9-14\xt*\x* ŋ rimkaŋ ngo poyi ŋ ɓo' Israayel, ŋ ɓaah ŋ cuuɓiŋ Benyaamin, ŋ Heber, ŋ rimu Heber. Ŋ ini kaɗ ŋ \w waasiŋ|lemma="waasiŋ Musaa"\w* \w Musaa\w*, ŋ \w \+tl Farisen\+tl*\w*. 
\v 6 Ŋ ini kaɗ ŋ sawar, ŋ kaɗeen po ŋ tolfiɗeeɗa ɓi Janguuni. Ŋ ini kaɗ ŋ yurhiɗi puloh ŋ nakoh ciŋ waasi, ɓo' raakeeɗi woyaah nga so.
\p
\v 7 Waaye ini ŋ ambee ne wa raak-raak wuu so, woti ŋ amb ne wa ñak sagu Kiristaani. 
\v 8 Te ɓaat nga, ŋ amb ne in ci jen ca ñak, laam in ceem jen, inhi ŋ inah Kiristaani Yeesu Heɗ to, uup ca fuuf. Saguuce tahiɗ po ŋ teyɗukiɗ faɗ in ci jen, ca mbalit nga so kotii, ne ŋ raak Kiristaani. 
\v 9 Ini ŋ waaɗ weɗ ne ŋ hotuk nga ɗe, maanaam ŋ raakuu kiyurhiŋ ngo haf fo, wi puloh ŋ nakoh ciŋ waasi, waaye ŋ raak kiyurah taamboh ŋ kosi ŋ kos Kiristaani, wi puloh ŋ Kooh te wa gaƴukka ŋ kos. 
\v 10 Ini ŋ waaɗ weɗ ne ŋ inah Kiristaani na hatiliŋ hultiŋ ɗe te ŋ raak ɓak ngaŋ miskiɗ ciŋ ɗe, ŋ mand na ɗe ŋ ini kaɗ ŋ kakaan kiŋ ɗe, 
\v 11 ne findi wa min nikoh ɗah, ŋ nam min rahas hulti.
\s Pool waaɗ nup po a ree ɗiski na kaɗse
\p
\v 12 Wa nikɗi haa ne ŋ rahsiɗ ineem jen po ƴutiɗ, wala ŋ reyiɗ ŋ mit ; waaye mi yii nup ne ŋ amba, findi mi ŋ haf fo Kiristaani Yeesu amboh ho. 
\v 13 Ɓaah ciŋ ngo, ini kaɗ nga so, ŋ ambɗi ne ŋ rahsiɗa waaye, raakiɗ ini mi na tume : Mi na alkohe alkoh ini ŋ cootuk te ŋ ndengɗukee ŋ ini ŋ fikiiri. 
\v 14 Mi yii nup nup yurhiɗ ngaŋ ɗiski na kaɗse ne ŋ min rahas aafi, aafi tah Kooh ɓeeɗuk ko taamboh ŋ Kiristaani Yeesu ne ŋ kaɗ ŋ ɗafka. 
\v 15 Mbaa, ɓoo ɓi nikisɗi komaaki jen ŋ kosi ɓoo kos, ɓoo ambaat liiɓeem ; te ɗu raak ini ɗu hunɗi na so nga ɗah, Kooh hey ɗu wa name inhiɗ. 
\v 16 Waaye ŋ ɗiski ɓoo ree ndii, ɓoo hunaat, ɓoo taalndiɗ.
\p
\v 17 Ɓaah ciŋ ngo, ɗu jen, altiɗkohaat to, te ɗu taamb ŋ kot ciŋ ɓi na taambɗe kot ciŋ ɓoo. 
\v 18 Laam, ɓi ɓo' laayiɗ, tumohaaɗ ciŋ ɓa teeɓohiɗ ne ɓa sangiɗ ciŋ kurwaaniŋ Kiristaani ; ŋ meeɗeen ɗu woo ŋ ini kaɗ nga ɓa, te woti mi woyis ɗu wa na muhun. 
\v 19 Ɓooɓeem, ɓa mirndohan ngaŋ ɗumbu ; rook ciŋ ɓa ceɗ koohiŋ ɓa, ɓa amb ne kaci ndam ; liiɓ ciŋ ɓa jen, ca in ciŋ kehƴi.
\p
\v 20 Ini kaɗ nga ɓoo nak, ɓoo ɓo' Asamaan, ɗiski Yeesu Kiristaa Heɗi pulohan, Mucɗohi ɓoo na seke na seesuk. 
\v 21 A hey ɓoƴsohe faan ciŋ ɓoo miskohiɗ cii ne a tum ca findi wiŋ ɗe, wi hun na siñaar, a tumana taamboh ŋ hatili a minoh in ci jen.
\c 4
\p
\v 1 Ineem weɗ tah, ɓaah ciŋ ngo ŋ keeñkoh, ɗu ɓi ŋ waaɗ keeh-keeh te ŋ marra ɗu hot, ɗu ɓi sumiŋ ngo na raayaaniŋ ngo, ŋoɗaat ndengiɗ ŋ Heɗi !
\s Sumaat ŋ niki ɗu nik ŋ Heɗi
\p
\v 2 Mi yii ñaah Ewodi na Sintik ne ɓa kerhiɗoh ŋ niki ɓa nik ŋ Heɗi. 
\v 3 Te fu yi ɓaah ho keeh-keeh ngaŋ pangki\f + \fr 4:3 \fr*\ft "yi ɓaah ho ngaŋ pangki", wa "sisigos" ngaŋ gerek. Ŋ peɗeem gerek, wa mand na tiik, waaye ali ɓo' inahseeɗi na tiikeem ŋ jamanoonaam. Poyi, wa miniɗ nik tiik. Nik ne wa tiik ɗah, ɓo' miniɗa toksoh an : "Ee, fu yi kooɗ tiikiŋ Sisigos keeh-keeh, mi yii kiim ɗa ne fu ɓaatɗoh ɓitiɓ ceem"\ft*\f*, mi yii kiim ɗa ne fu ɓaatɗoh ɓitiɓ ceem, ɓa ɓaahee na so hiñohi ŋ ini kaɗ ŋ \w Yegɗohiŋ Muci\w*, ɓeɗ na Kelema na huntoh ciŋ ngo ɓinooɓi. Tiik ciŋ ɓa fiisuuɗ ŋ teerndiŋ kipes ki.
\p
\v 4 Genaat sum ŋ niki ɗu nik ŋ Heɗi ; ŋ woyisa, sumaat ! 
\v 5 Ɓooɓi jen inhaat baah kiŋ ɗu. Heɗi reɓiɗ. 
\v 6 Kinaat jaahiɗ ŋ ali in ; waaye ŋ in nu wa min nik ɗah, kiimaat Kooh, woyaat ɗe etoh ciŋ ɗu, te wa hun na corkiɗ ɗe. 
\v 7 Te jamiŋ Kooh, wi cootuk liiɓ nu nik, wa hey niiɗe keeñ ciŋ ɗu na liiɓohaaɗ ciŋ ɗu ŋ niki ɗu nik ŋ \w Kiristaani|lemma="Kiristaa"\w* Yeesu.
\p
\v 8 Ɓaah ciŋ ngo, ini tas weɗ ne : In nu nik keeh, na in nu nik eɗaah cir, in nu yurah, in nu hool, in nu nik waaɗaah, in nu nik baahiɗ ŋ hot-hotkiŋ ɓooɓi, in nu nik nawaah, na in nu nik ƴeekaah ɗah, ceɗ nikaat ŋ liiɓ ciŋ ɗu. 
\v 9 In ci ɗu jang nga so, ɗu rahassa ca, ɗu kerahha ca te ɗu hotta ca nga so, tumaat ca, te Kooh yi na onohe jam hey nike na ɗu.
\s Pool corkiɗiɗ ɓi Filippi ŋ onohiŋ ɓa
\p
\v 10 Ŋ niki ŋ nik ŋ Heɗi ŋ sumiɗ lool ŋ ini ɗu min teeɓohis yegi ɗu yeg go kotii. Te yegi ɗu yeg go weem wa moos moos nik. Ɗu raakeeɗi raakeeɗi waasi ɗu min ndo wa teeɓoh. 
\v 11 Nikɗi haa ne ŋ raak etoh weɗ tah ho woo ineem ; laam ŋ jangiɗ pes ngaŋ neɓu ŋ in nu nik. 
\v 12 Ŋ inhiɗ ini nik ŋ ñak, ŋ inhiɗ ini nik ŋ raak. Ŋ in nu nik na ɗisik nu nik, ŋ jangiɗ pes na kap, ŋ jangiɗ pes na aɗuk, ŋ jangiɗ pes ngaŋ raak-raak na ɓangtu. 
\v 13 Ŋ miniɗ in nu in ŋ niki ŋ nik ŋ Yi on ndo hatil.
\p
\v 14 Waaye ɓaahi ɗu ɓaah na so miskiɗiŋ ngo, wa in baahiɗ. 
\v 15 Ɗu ɓi Filippi, ɗu inhiɗ ŋ haf ɗu ne ŋ cambiŋ Yegɗohiŋ Muci ŋ ndeem, wa ŋ puloh Maseduwaan, ali Jangu ambtiɗoheeɗi na so ŋ ini kaɗ ŋ kopor, ɗal ɗu. 
\v 16 Wa ŋ nik ŋ Tessalonik sah, ɗu woosohiɗ to ini ŋ etohe, te wa waas yino haa. 
\v 17 Wa nikɗi haa ne onohiŋ ɗu mi na rahse, weɗ nikiɗ to, waaye mi na waaɗe ne onohiŋ ɗu tum po ini kipes kiŋ ɗu rimɗan ɗu, ɓaatuk. 
\v 18 Ŋ rahsiɗ in ci ɗu woosoh jen, ɗiski ŋ nik, ŋ raakiɗ po ca uupiɗ ini ŋ etoh, Epaforodit eɗiɗ to in ci ɗu woosoh. Ini ɗu eɗ to, Kooh teyɗukiɗa findi seeƴuk eeñiɗ neɓiɗ te a sumiɗ nga. 
\v 19 Koohiŋ ngo hey ɗu paƴɗe etoh ciŋ ɗu jen ŋ raak-raak kiŋ ɗe na yaki a yak taamboh ŋ Kiristaani Yeesu. 
\v 20 Koohiŋ ɓoo yi nam nik Baabiŋ ɓoo, a yakɗaah po faw ! Amiin !
\s Askohi
\p
\v 21 Kañɗaat \w ɓo'-Kooh ci\w* nik ŋ Kiristaani Yeesu jen. Ɓaah ci nik na so ɓa ɗii kañiɗ ɗu. 
\v 22 Ɓo'-Kooh ci jen ɓa ɗii kañiɗ ɗu, ɓi nik ŋ kahan buuri yakkiŋ Rom ɓeɗ uup ɗu kañiɗ.
\p
\v 23 Baahohiŋ Yeesu Kiristaa Heɗi nikaat na ɗu !