\id PHM - Saafi-Saafi
\ide UTF-8
\h Filemoon
\toc3 Fim
\toc2 Filemoon
\toc1 Fiisi Pool kaɓɗoh Filemoon
\mt Fiisi Pool kaɓɗoh Filemoon
\is Rangsohaani
\ip Pool ɓaahee ŋ Israayel ci, ŋ cuuɓiŋ Benyaamin.\x + \xt Ɓi Rom 11:1; Ɓi Filippi 3:5\xt*\x* A nikee \w \+tl Farisen\+tl*\w*.\x + \xt Tum ci 23:6; Ɓi Filippi 3:5\xt*\x* Ŋ finho \w Paantakot\w*, wi Janguuni camb ɓaatuk, a ɓaahee ŋ ɓi tolfiɗee kosiɗ ci.\x + \xt Tum ci 7:58–8:3\xt*\x* Waaye wa raakka mbeh, a cohha na Yeesu, a kossa\x + \xt Tum ci 9:1-30\xt*\x* po a nikka \w \+tl Apootar\+tl*\w* sah. Teerndiŋ "Tum ciŋ \tl Apootar\tl* ci" teeɓohiɗ pangkiŋ ɗe wi a nik \tl Apootar\tl* ini kooɗoh ŋ saar 13.
\ip Filemoon nikee nawle Pool, te findi Pool, a pangkee wuu \w Yegɗohiŋ Muci\w*. Kahan ce nikee cohohaaniŋ ɓi Janguuni.\x + \xt Filemoon 1:1-2\xt*\x* Filemoon a yi heɗ \w ñaami|lemma="ñaam"\w* na woyse Onesim,\x + \xt Filemoon 1:16\xt*\x* waaye Onesim saandohha. Onesim cohha na Pool, a kossa Yeesu. Pool woosa Onesim ne a wiirkaat ŋ heɗ ce na kaɓɗohi a na hee ɗe fiisɗe. Ini uupiɗ etoh ŋ fiisi Pool kaɓɗoh weem, a kiim Filemoon ne a taambkoh Onesim moɗoɗ, findi taambɗoh ce yi ɓaah na ɗe kos. Ŋ jamanoonaam ñaam saandoheen ɗah, a meeɗ atte'u findi ɓoyi ap ɓo', a miniɗ sah apu.
\ip Filemoon genee Kolos, te wa mand haa ne Onesim hunee na Tisikos wi a kee wika kaɓɗohii na kaɓɗohi Pool fiis ɓi Kolos.
\iot Fiisi Pool kaɓɗoh Filemoon kaɗtiɗoh an :
\io1 - Kañɗoh na kiimiɗ barke \ior 1:1-3\ior*
\io1 - Waaɗi na kosiŋ Filemoon \ior 1:4-7\ior*
\io1 - Pool kiimiɗ Filemoon ne a teyɗuk Onesim \ior 1:8-22\ior*
\io1 - Askohi \ior 1:23-25\ior*
\ie
\c 1
\s Kañɗohi
\p
\v 1 Mi yii kañiɗ ɗa Filemoon, mi yi Pool, yi ambu ŋ kaso sagu taambiɗ woo kiŋ \w Kiristaani|lemma="Kiristaa"\w* Yeesu, mi na ɓaah ɓoo Timoote, e ɓoo na fiise kaytii wuu fu, fu yi ɓoo keeñkoh te ɓoo ɓaahha na ɗa pangkiŋ Kooh, 
\v 2 ɓoo ɓii kañiɗ ɗa fu na Apiyaa ɓaah ɓoo ɓitiɓ, na Arsip yi ɓaah na ɓoo hiñohi ɓoo na hiñohe, na ɓaah ciŋ ɓoo kosiɗ ci na cohe ŋ kahan fu jen.
\p
\v 3 Kooh Baabiŋ ɓoo baahohaat ɗu, a on ɗu jam, Yeesu Kiristaa Heɗi baahohaat ɗu, a on ɗu jam.
\s Waaɗi na kosiŋ Filemoon
\p
\v 4 Mi na gene corkiɗ Koohiŋ ngo, ne ŋ kiimee po ŋ woo tiikiŋ ɗa ɗah. 
\v 5 Ŋ kerhiɗ kosi fu kos Yeesu Heɗi na waaɗi fu waaɗ \w ɓo'-Kooh ci\w* jen. 
\v 6 Mi na kiime Kooh ne kosi ɓoo ɓaah rim in nga ɗa, fu uup inah in ci baahiɗ ci jen, ci ɓoo min tum wuu Kiristaani. 
\v 7 Laam, ŋ sumiɗ lool ƴaariŋ ngo te heliŋ ngo daliɗ ŋ findi fu na teeɓohe waaɗi fu waaɗ ɓooɓi, fu soosɗiɗ keeñ ciŋ ɓo'-Kooh ci.
\s Pool kiimiɗ Filemoon ne a teyɗuk Onesim
\p
\v 8 Weɗ tah, ini maa hee ɗa woye, ŋ degɗaa ŋ kikilifaaki ŋ eɗu ŋ Kiristaani ne ŋ woo ɗa fu tum ini lah waas, 
\v 9 waaye ŋ waaɗ ɗa wa kiim sagu waaɗohi nik ŋ harmban ɓoo. E ñam na kiimee ɗa wa, mi yi Pool, ŋ niki ŋ nik yakak, ɓaatta nga ŋ ambi ŋ ambu wii sagu taambiɗ woo kiŋ Kiristaani Yeesu.
\p
\v 10 Mi na kiimee ɗa wuu Onesim, yi ŋ amb findi kuɓkiŋ ngo yi ŋ raakoh ŋ kasooni. 
\v 11 Ɗeɓgaan a raakɗeeɗi ɗa njiriñ, ali nik ne tiikiŋ ɗe tokis njiriñ\f + \fr 1:11 \fr*\ft "ali nik ne tiikiŋ ɗe tokis njiriñ" : ngaŋ gerek, woo kii nikɗi ŋ Fiis ci ndii, waaye weɗ toksiŋ Onesim.\ft*\f*, waaye ɗiski wa nik a raakɗiɗ ɓoo njiriñ mi na ɗa. 
\v 12 Mi yii wik ɗa ɗe, a yi fu inah ne a usiɗ ŋ keeñiŋ ngo.
\p
\v 13 Ŋ waaɗeen ɗe amb ŋ serooso ne a tufkiɗ ɗa ndii a ɓaatɗohee so, fu hot nga mi yii ŋ kasooni sagu \w Yegɗohiŋ Muci\w*. 
\v 14 Waaye ŋ woyee ŋ haf fo ne ŋ waaɗɗi tum ali in te fu hunɗi nga, ne ini baahiɗi fu tuman nikuu ne fu ɓeku ɓeku nga waaye wa ini fu waaɗoot tum.
\p
\v 15 Te wa miniɗ nik ne a saɓsohseen na ɗa ƴissuut ne fu wikuu ɗe a nik yiŋ ɗa kotii po faw. 
\v 16 A nikissanɗi findi \w ñaam\w* dong, waaye a hey uupe ineem, a nikan ɓaahi keeñkohu ; weɗ a nik keeh-keeh nga so, mi yi sah, kon mbaa a uupan nik ineem nga ɗa fu yi heɗ ce, fu yi ɓaah ce ŋ Heɗi ! 
\v 17 Kon nik ne fu ambiɗ to findi nawleefu ɗah, teyɗukaa ɗe po mand haa a ñam.
\p
\v 18 Nik ne a tumiɗ ɗa in yurhaaɗi wala nik ne a raakɗohiɗ ɗa kombot ɗah, ŋ deggiɗ ca. 
\v 19 Mi Pool, mi yii fiis na yaahiŋ ngo ne : \sig Ñam na hee ɗa wa wirnde, mi ŋ haf fo.\sig* Ŋ sang ɗa woo rek ne fu ŋ haf fu, fu raakɗohiɗ to kombot ; fu raakɗohiɗ to kipes kiŋ ɗa. 
\v 20 Ee, ɓaah ho, raakiɗ to njiriñ sagu Heɗi ɓoo ɓaah, dalɗa heliŋ ngo ŋ Kiristaani.
\p
\v 21 Ɗiski mi na fiise kaytii, wa wooriɗ to ne fu hey tume ini ŋ kiim ɗa, ŋ inhiɗ ne fu hey tume ini uup sah ineem. 
\v 22 Namaa so kooɗkiɗ daloha ; ŋ ambiɗ yaakaar ne ŋ hey ɗu wikse sagu kiim ciŋ ɗu Kooh.
\s Askohi
\p
\v 23 Epafras, yi taƴu na so sagu niki a nik ŋ Kiristaani Yeesu, yii kañiɗ ɗa, 
\v 24 a yi na Maarko, na Aristarka, na Demaas na Luk, ɓi ɓaah na so pangki. 
\v 25 Yeesu Kiristaa Heɗi baahohaat ɗu.