\id JUD - Saafi-Saafi
\ide UTF-8
\h Yuud
\toc3 Yuu
\toc2 Yuud
\toc1 Fiisi Yuud kaɓɗoh
\mt Fiisi Yuud kaɓɗoh
\is Rangsohaani
\ip Yuud yi fiis kaɓɗohii nikee taambɗoh Yeesu, ali nik ne sah a woo ŋ rangsohaani ne a "\w ñaamiŋ|lemma="ñaam"\w* Yeesu \w Kiristaa\w*", te a "taambɗoh Saak".
\ip Yeesu raakeen taambɗoh ƴaar nikiis, Saak na Suseef na Simong na Yuud.\x + \xt Macce 13:55\xt*\x* Ŋ camba, ɓa koseeɗi Yeesu.\x + \xt Saaŋ 7:1-5\xt*\x* Waaye ŋ finho hultiŋ Yeesu, ɓa kossa.\x + \xt Tum ci 1:13-14\xt*\x* Taambɗoh ce Saak nikee kilifa ŋ Janguunaŋ Yerusalem, a yi Yuud, a nammba nik pangkiɗoh Heɗi, a hotta ne wa raakiɗ etoh ne a fiis kaɓɗoh wuu kosiɗ ci jen.\x + \xt Yuud 1:1\xt*\x*
\ip Yuud inheen ne raakiɗ ɓooɓi nga, ɓa ɗii ŋ ɗooƴ Janguuci waaye ɓa kosɗi. Ɓa na yahrohe te atteeniŋ Kooh hey keene ŋ ɗafuk ɓa. Yuud fiis kaɓɗohii ne a woytoh kosiɗ ci, a ñaah ɓa ne ɓa amb ŋ kosi keeh-keehi.
\iot Fiisi Yuud kaɓɗoh kaɗtiɗoh an :
\io1 - Kañɗoh \ior 1:1-2\ior*
\io1 - Tumoh moɗaaɗiici nik ŋ ɗooƴ kosiɗ ci \ior 1:3-4\ior*
\io1 - Kooh hey atte'e tumoh moɗaaɗiici \ior 1:5-16\ior*
\io1 - Nakoh wuu kosiɗ ci \ior 1:17-23\ior*
\io1 - Yakiɗ Kooh \ior 1:24-25\ior*
\ie
\c 1
\s Kañɗohi
\p
\v 1 Mi yii kañiɗ ɗu, mi yi Yuud, \w ñaamiŋ|lemma="ñaam"\w* Yeesu \w Kiristaa\w*, ŋ nammba nik taambɗoh Saak, mi yii fiis kaytii wuu ɗu, ɗu ɓi Kooh ɓeeɗuk ŋ haf ce, ɗu ɓi Kooh Baabi waaɗ, ɗu ɓi Yeesu Kiristaa na niiɗe. 
\v 2 Miskaat Kooh, a on ɗu jam na waaɗ-waaɗ te in ceem gen ɓaatke !
\s Tumoh moɗaaɗiici nik ŋ harmban kosiɗ ci
\p
\v 3 Ɓaah ciŋ ngo ŋ keeñkoh, ŋ waaɗeen ɗu fiis lool ŋ ini kaɗ ŋ muci ɓoo ɓaah. Waaye ini uup tufuk weɗ ne ŋ ñaah ɗu, ɗu leber wuu kosi Kooh eɗ ɓooɓiŋ ɗe te koseem, findi wa nikohee, wa risan ɗaa. 
\v 4 Laam raakiɗ ɓooɓi ɗemb aassa nga ɗu, ɓi fu inah ne atteeniŋ ɓa fiisuuɗ maañ. Ɓa ɓo' kaañiɗ Kooh. Ini ɓoo yeyyooɗi baahohi Kooh baahoh ɓoo, weɗ ɓa nduuɗ po ɓa taambɗee kiñin ciŋ ɓa, ɓa mbalaye, ɓa taasee Yeesu Kiristaa yi Heɗ ɓoo ; te a yi dong ɓoo kerhiɗ.
\s Kooh hey atte'e tumoh moɗaaɗiici
\p
\v 5 Ɗu inhiɗ in ci maa hee ɗu woye jen po ƴutiɗ waaye mi na naandsee ɗu ca rek. Wa Heɗi muciɗ cuuɓiŋ Israayel ŋ \w Misra\w*,\x + \xo 1:5 \xo*\xt Pula 12\xt*\x* wa kaɗta po wa raakka ɓi sang kos, a ap ɓa ap.\x + \xo 1:5 \xo*\xt Kind ci 14:26-35\xt*\x*
\p
\v 6 Naandsukaat malaakaaci topeeɗi ŋ hatili Kooh onee ca, ca faɗta ɗiska ca gene.\x + \xo 1:6 \xo*\xt Camba 6:1-4\xt*\x* Kooh ceenɗuk ca ceenɗuk ceeni genan gen, a taƴca ca ŋ ñuus tuɗ po mbeha yakka, mbehaŋ atteena.
\p
\v 7 Namaat naandsuk ɓi Sodom na Gomor na kur-taah ca nikee ŋ serooca tumee moɗaaɗi findi ɗaa, ɓa nikohee faankoh sangohuuɗ, ɓa jeemeeɗa faankoh faankohi ɗaloh na faankohi Kooh teyɗuk, Kooh attee attee kur ceem, ca nikka firndeeni ɓooɓi jen min hot, te ca ris ŋ ɗooƴ yongkaahi genan gen.\x + \xo 1:7 \xo*\xt Camba 19:1-29\xt*\x*
\p
\v 8 Ɓooɓi ɗemb aassa nga ɗu na name tum ɗaa ; ɓa na heeƴe in ci na ɓekee ɓa ŋ usɓiɗ faan ciŋ ɓa, ɓa sang teyɗuk kikilifaakiŋ Heɗi, ɓa ɓase yakɗuuɗ ciŋ Asamaan. 
\v 9 Mikayel yi ɓaah ŋ kilifaaciŋ malaakaaci sah, a tumɗaa. Wa a lahtohee na Seytaani, a nookoheeɗa na ɗe fiɗaafiŋ \w Musaa\w*, a kaañeeɗi ɗe atte wala a ɓas ɗe, a woo ɗe ne : « Heɗi ngasaat ɗa ! »
\p
\v 10 Waaye ɓooɓi mi na woye ɓeem, in nu ɓa inahɗi ɗah, ɓa na ɓasee wa ɓas, te in ci ɓa inah, ɓa inhoh ca findi ɗoopaat na inhohe ; inheem na ɓayee ɓa ŋ ɗumbu. 
\v 11 Mas ɓooɓeem ! Ɓa taambiɗ waasiŋ Kayin.\x + \xo 1:11 \xo*\xt Camba 4:1-16 \xt*\x* Te sagu waaɗ kopor, ɓa tumiɗ po ɓa muuƴiɗ haf ɓa findi Balaam\x + \xo 1:11 \xo*\xt Kind ci 22:5–24:25; 31:16 \xt*\x* ; ɓa kaaniɗ laam ɓa na ndengsiɗkohe na Kooh findi Kore.\x + \xo 1:11 \xo*\xt Kind ci 16:1-35\xt*\x*
\p
\v 12 Ɓooɓeem ɓeɗ na ɓekee ɗu kaci ne ɗu cohha ne ɗu ɓaah kañam ɗah. Ɓa na ñame ñam po ɓa uupiɗ te ɓa supkuu nga, ɓa na liiɓe haf ɓa dong. Ɓa mand na ngaaɓi na toɓeeɗi, wi puuɗsi na coottohe ; ɓa mand na kidig ci na raakeeɗi ali kuɓu ŋ jamanooni ca na rimohe ; kidig ci kaan, kaanissa, ɗofuusa ; 
\v 13 ɓa mand na ginaah ci ayrukiɗ ciŋ cookmi, ci na pulɗe soñiŋ kaciikiŋ ca ; ɓa mand na hor ci tufukɗi ɗisik yino. Kooh kooɗkiɗiɗ ɓa ɗisik ñuusiɗ tuɗ, ɗiski ɓa nikan po faw.
\p
\v 14 Henok caaciŋ ɓoo yasna-kanakɗoh, camboh ŋ Aadama,\x + \xo 1:14 \xo*\xt Camba 5:1-24\xt*\x* a woyeen findi woosuuɗ ŋ ini kaɗ nga ɓa an : « Marka, ŋ hotiɗ Heɗi hayeeɗa huniɗ na malaakaaciŋ ɗe hooliɗ ci junni-junniici ! 
\v 15 A hay ne a atte ɓi Adina jen, a mbugal bakaaɗoh ci jen ŋ moɗaaɗiici ɓa tum jen sagu ndengsiɗkohi ɓa ndengsiɗkohee na ɗe. A nam ɓa mbugal ŋ woo ci ɓaseeh ci ɓooɓeem woyee ɗe jen, ɓooɓi fu inah ne ɓa sang ɗe sang. »
\p
\v 16 Ɓooɓeem genan ayrukiɗ, ɓa lahtukee ŋ ini rahas ɓa te ɓa na taambɗe kiñin ciŋ ɓa. Ɓa minootiɗ woo, ɓa na woye in ci neɓ ɓi ɓa amb ne ɓa miniɗ raak in nga ɓa.
\s Nakoh wuu kosiɗ ci
\p
\v 17 Waaye ɗu ɓi ɓaah ciŋ ngo ŋ keeñkoh, naandsukaat in ci \w \+tl Apootar\+tl*\w* ciŋ Heɗ ɓoo Yeesu Kiristaa woyee maañiɗ. 
\v 18 Ɓa woyeen ɗu ne : « Ŋ jamanooci mirndohan, wa hey raake ɓi njembtohoh, ɓa kerhiɗanɗi Kooh, ɓa taambɗan kiñin ciŋ ɓa. » 
\v 19 Ɓooɓeem ɓeɗ na saɓsohe kosiɗ ci, \w Fuuɗsiŋ Kooh|lemma="Fuuɗsi Hoolohngaani, Fuuɗsiŋ Kooh"\w* nikɗi nga ɓa, ɓa amboh liiɓ ɓo' dong.
\p
\v 20 Waaye ɗu ɓi ɓaah ciŋ ngo ŋ keeñkoh, yipaat kipes kiŋ ɗu ŋ kosiŋ ɗu hoolohngaani. Kiimaat Kooh taamboh ŋ \w Fuuɗsi Hoolohngaani|lemma="Fuuɗsi Hoolohngaani, Fuuɗsiŋ Kooh"\w*, 
\v 21 genaat amb ne Kooh waaɗiɗ ɗu, ɗu sekee na ooluk oni Heɗ ɓoo Yeesu Kiristaa na hee ɗu one, kipes ki heyɗi reehe sagu miski ɗu misik ɗe.
\p
\v 22 Ɓooɓi na liiɓsiɗohe ŋ kosiŋ ɓa, miskaat ɗu ; 
\v 23 ɓinooɓi ɗu kooɗoh ɓa ŋ yongkaahi, ɗu muciɗ ɓa ; ɓum miskaat ɗu waaye wortukaat, sangaat sah reɓ kulɓaaciŋ ɓa ci tumohaaɗ ciŋ ɓa moɗaaɗiici usɓiɗ.
\s Yakiɗ Kooh
\p
\v 24-25 Yakɗaat Kooh yi min ɗu amb po ɗu kafndukuu, yi min tum po, mbehi ɗu tufkan ŋ fiki yaki a yak, ɗu raakuu sikka te ɗu hey sume keeh-keeh. Yakɗaat Koohi yino-kongi, a yi Mucɗohiŋ ɓoo taamboh ŋ Yeesu Kiristaa, Heɗ ɓoo. A yi yakɗaah, a yi eɗaah cir, a yi Heɗ hatil na nguur, bala Adina raakan na woti na po faw ! Amiin !