\id JON - Saafi
\ide UTF-8
\h Yunus
\toc3 Yun
\toc2 Yunus
\toc1 Yunus
\mt Yunus
\c 1
\s Yunus waaɗ penduk nakohiŋ Kooh
\p
\v 1 Yunus, a nikee kuɓu Amitay. Raakka mbeh, Nikiɗi woosa ɗe ne : 
\v 2 « Kaɗa win-win Niniw, kur ka yakka, looƴkaa ɓa ne aƴaarkaŋ ɓa reyiɗ nga so. » 
\v 3 Waaye Yunus taambohha ndeem a saandohha Tarsis, ne a fus Nikiɗi. A reesa ŋ Joppa, a raakka nga \tl batoona\tl* na kaɗe Tarsis, a wirinnda, a aassa na ɓi ɓo' ŋ \tl batoona\tl* na hee ɓa coottohe nga ne a min ki us Nikiɗi.
\p
\v 4 Waaye, wa ɓa nik ŋ ɗooƴ cookma, Nikiɗi fuuɗissa ŋ ɗafuk cookma puuɗis ayrukiɗ, pahul yakak yoppa cookma po \tl batoona\tl* waaɗeeɗa ɓaltukoh. 
\v 5 Ɓooɓa ambohee \tl batoona\tl* neƴƴohha ; yaa nik nga ɓa looƴukka tiikaŋ koohaŋ ɗe, ɓa aammba unung caŋ ɓa ŋ cookma ne ɓa eɗfiɗ \tl batoona\tl*.
\p Raakka waam Yunus ruhsiɗ ngaŋ tasaŋ \tl batoona\tl* ; a nikee faankiɗ, a neeheeɗa pani nooɗiɗ. 
\v 6 Ƴaara adgiɗee amboh ca reɓpa ɗe, woosa ɗe ne : « Fu neehang ye ? Kurka, koolɗa hooso po ŋ koohiŋ ɗa ! Wa miniɗ raak Kooh liiɓsiɗoh ɓoo po ɓoo sooƴuu. »
\p
\v 7 Ŋ ndeem, ɓa woytiɗohha an : « Ɓoo markiskaat ŋ petaaw ci, ɓoo marak miskiɗi rahas ɓoo puloh nga ɓa. » Ɓa markisukka, petaaw ca teeɓohha Yunus. 
\v 8 Ɓa woyissa ɗe ne : « Teeɓa ɓoo ɓoyi ɓek ɓoo inii ! Fu na haɓɗe ye ? Fu kurkoh nde ? Kur ɗu teeku na ? Fu ɓaah ngaŋ winde cuuɓ ? » 
\v 9 A loffa ɓa ne : « Ŋ Heber, Nikiɗi, a yi mi na yakɗe, Kooh ŋ ɗafki, yi fer cookmi na kehƴi. » 
\v 10 Wa ɓa kerah woo kaŋ ɗe, amboh ca neƴƴohha, ɓa tummba ɗe ne : « Fu haɓiɗ ye an ? » Ɓa inheen ɓal ne a na saandohe fusoha Nikiɗi laam a naandsukeen ɓa wa. 
\v 11 Ɓa meekissa ɗe ne : « Ɓoo na hee na tumtiɗohe na ɗa po cookmi yeeɓuk ? » Laam raak cookma koolɗukeeɗa koolɗuk. 
\v 12 A loffa ɓa an : « Meeɓaat to ɗu biir ro ŋ cookmi, ɗah cookmi hey yeeɓke. Laam ŋ inhiɗa, wa nga so findi wa taamboh po pahuli ayrukiɗii bipukka ŋ ɗafuk ɗu. »
\p
\v 13 Joy ne ɓa tum ini a woo, amboh ca joowwa ne ɓa teer ŋ tefsa, waaye ŋ ɓarang ɓarang, laam cookma nikee uupeeɗa ɓa uup ayruk.
\p
\v 14 Ŋ ineem, ɓa kiimmba Nikiɗi ne : « Cey ! Nikiɗi, kana ɓoo ap sagu ƴaarii ! Te kan ɓoo yamb kakaan ɓo' yurhiɗ. Laam a yaf, Nikiɗi, tum findi wa neɓoh ɗa. » 
\v 15 Ɓa jaarra, ɓa meeɓpa Yunus, ɓa njaffa ɗe ŋ cookma, cookma hannda seemiɗ ɗuuɗaŋ wa. 
\v 16 Ɓooɓa neƴƴohha ŋ Nikiɗi ; ɓa \w seeƴkiɗta|lemma="seeƴuk"\w* ɗe, ɓa giñiɗta ɗe ne ɓa hey ɗe tumɗe in, ɓa cooteeɗa.
\s Kiimaŋ Yunus ŋ rookaŋ cuurnda
\p
\v 17 Yunus, ŋ tasaŋ ɗe ŋ ɗooƴ cookma, Nikiɗi kerhiɗ ɗe. A tummba po cuurund duu'in pulla a onnda ɗe. Yunus nikka ngaŋ rookaŋ cuurnda neeh kaahay na wek kaahay. 
\c 2
\p
\v 1 Ngaŋ ɗooƴ rookaŋ cuurnda a kiimmba Nikiɗi, Koohiŋ ɗe. 
\v 2 A woosa ne :
\q « Wa ŋ nikoh ngaŋ mbugala, ŋ looƴkiɗ po ngaŋ Nikiɗi, te a tahsiɗ to ;
\q ŋ ɗooƴ oon caŋ Jaanim, ŋ leehkiɗ,
\q fu kerhiɗ hoosooriŋ ngo.
\q
\v 3 Fu juleen ndo ngaŋ nooɗ-nooɗa, ŋ ɗooƴ cookma,
\q te masma wileen ndo.
\q Ginaah caŋ ɗa jen na wal-wal ca mburfuñeen ndo.
\q
\v 4 Mi nak ŋ woyee ne :
\q “ Fu aañiɗ to, fu waaɗisɗi so deg has. ”
\q Hondohɗi ŋ ambiɗ ne ŋ hey hotisse Kahnaŋ ɗa Hoolɗa.
\q
\v 5 Masuɓ ca goɗeen mbooh kiŋ ngo,
\q nooɗaŋ masma wileen ndo.
\q Paangi-cookom duluurkeen hafiŋ ngo.
\q
\v 6 Ngaŋ tasaŋ tangooca ŋ ruhseen,
\q ŋ rangseen po faw ngaŋ kur caŋ fiɗaaf ca, ŋ ɓak ɓooɓa ɗeɓgaan.
\q Waaye fu tumiɗ po kipes kiŋ ngo pulla ruy-ruya,
\q Nikiɗi, Koohiŋ ngo.
\q
\v 7 Wa maa waaɗe ñak kiñin,
\q ŋ haltuk ɗa, Nikiɗi
\q te fu kerhiɗ kiimaŋ ngo
\q ŋ Kahnaŋ ɗa Hoolɗa.
\q
\v 8 Ɓi na taambkohe ɓonaah ci,
\q ɓa na fañe muuɗiŋ ɓa.
\q
\v 9 Mi, faan ndo, ngaŋ ɓi hooso jangtuk, ŋ hey ɗa \w seeƴke|lemma="seeƴuk"\w* ɓi hoosuuɗ.
\q Ini ŋ giñ, ŋ heya reytine.
\q A Nikiɗi naafohi. »
\p
\v 10 Nikiɗi woossa cuurnda, cuurnda hukka Yunus ŋ sereendaŋ cookma.
\c 3
\s Ɓi Niniw ɓoƴsohiɗ tumohaaɗ, Kooh ɗaasiɗ ɓa
\p
\v 1 Wa a pul ŋ cuurnda, Nikiɗi kanakɗukka woo Yunus ne : 
\v 2 « Kaɗa win-win Niniw, kur ka yakka. Kataa ɓa ini ŋ woo ɗa. » 
\v 3 Yunus gooñukka, kaɗta Niniw findi Nikiɗi woyoha. Niniw nikee kur yakoh na yakoh, a neeh kaahay onan ɓo' a tiinda ɓak po ɓak. 
\v 4 Wa a kaɗ po a aassa Niniw, a hooɓukka wil nga. A huflukka ɓi Niniw na hoosoocii : « Tasiɗ neeh ndaŋkiyaah-nikiis (40), Niniw ɗumbu ! »
\p
\v 5 Wa ɓi Niniw kerah woo keem, ɓa kossa Kooh ; ɓa katohha or, ɓa ɓekukka ɓi daah, ambohha ŋ ya uup yak po ŋ ya uup ƴin. 
\v 6 Wa woo ka ree ŋ nofaŋ buuraŋ Niniw, a kurukka ngaŋ ɓoofohaanaŋ ɗe, a wolukka lipkohaaɗaŋ ɗe, a ɓekukka daah, a baffa ŋ wet, 
\v 7 a woosohha ŋ ɗooƴ kur ka jen ne : « Buur na yakak ci sangohiɗ ɓooɓi na ɗoopaat ci, yakak na ƴin, ne ɓa kanaat ñam, ɓa kanaat an masuɓ, 
\v 8 yaa nu nga ɗah, ɓekkaat daah. Ɓi hooso meeɓuuɗ koolɗu, po ngaŋ Kooh, te yaa nu nik suungɗuk tiindohaaɗiŋ ɗe sepƴiɗi, na tumohaaɗ ci otiɗ ciŋ yaah ciŋ ɗe. 
\v 9 Yaa inah andi Kooh ɓoƴsanɗi liiɓohaaɗ, andi inwaaso ambanɗi ɗe, andi a heyɗi dokne paa finho dohɗiŋ aay-keeñiŋ ɗe, po ɓoo sooƴuu ? »
\p
\v 10 Ŋ ineem, Kooh inhisohha in ca ɓa haɓɗe ne ɓa pul ngaŋ tiindohaaɗ ca moɗaaɗiicaŋ ɓa. Taambohha nga inwaaso ammba Kooh ŋ in ca a kooɗkiɗee ɓa, te a mirndohɗi ca raakiɗ.
\c 4
\s Neɓsaaɗiinaŋ Yunus na lofaŋ Kooh na ɗe
\p
\v 1 Wa Kooh ɗaas ɓi Niniw, wa neɓaaɗiisa Yunus lool, a ayrukka. 
\v 2 A woosa Nikiɗi : « Eey Nikiɗi, ina ŋ woyee wa ŋ nikoh ŋ kur ɓoo weɗi wii haa e ? E ineem tahee po ŋ ɗeɓgohha saandoh Tarsis ; ŋ inhangangeen ne, fu Koohi na baahohe, yi na yirmohe, yi yooɓɗi ayruk, yi riif na waaɗohaaɗ te inwaaso na ambee ɗa amb ŋ tum miskiɗ. 
\v 3 Teemb ndii, Nikiɗi, ɓaya kiñin kiŋ ngo, laam nga so, ŋ kaan ngisoh ŋ pes. » 
\v 4 Nikiɗi loffa : « Wi fu ayruk wii, fu nik ŋ kiyooh e ? » 
\v 5 Yunus pulla kur ka, a ɓooffa ŋ ɓak pulohaaɗ-noh ; a ɗiippa nga, a saangnukka nga a sekeeɗa ini na hee raake na kur ka.
\p
\v 6 A nikka nga po, Nikiɗi Kooh paariɗta kidig, wa njopukka Yunus ne wa saangin hafiŋ ɗe, tee ɗah wa naaf ɗe ŋ miskiɗiŋ ɗe. Keeñaŋ Yunus soosootta ngaŋ kidga.
\p
\v 7 Hondohɗi, ngaŋ wiisaaɗiina, Kooh tummba cangind aassa kidga wa suyya. 
\v 8 Ɓaatta nga, wa noh pul, Kooh kurkiɗta mbooyo ; noha dammba hafaŋ Yunus po a minisɗi. A kiimmba kaan, a woosa ne : « Ŋ kaan ngisoh ŋ pes. » 
\v 9 Kooh meekissa Yunus : « Fu yii ŋ keeh weem oo, na ayruki ŋ ini na kidgii ? » A loffa : « Ee di' ! Ñam ɓur, ŋ ayruk po ŋ hee kaane. » 
\v 10 Nikiɗi dokkissa ŋ woo ka : « Fu, kidgii miskiɗ ɗa. Nikɗi haa ne ya fu taambkoha, te ya fu hooɗiɗa haa. Wa paar na wek yino, wa leeɓpa na wek yino. 
\v 11 Fu waaɗta ne mi, ŋ heeɗi miskasse ŋ ini hee rahse Niniw, kur ki yakki fu inah ne ɓo' junni-teemet na junni-ndaŋkiyaah-kanak (120.000) ɓii nga ɓi inhisohɗi yaah-ñaahum na yaah-sing, ɓaatta nga ɗoopaat ci minɗi reeh ! »