\id JAS - Saafi-Saafi
\ide UTF-8
\h Saak
\toc3 Sak
\toc2 Saak
\toc1 Fiisi Saak kaɓɗoh
\mt Fiisi Saak kaɓɗoh
\is Rangsohaani
\ip Raakiɗ ɓo' laayiɗ ɓi teeku Saak ŋ Fiis ciŋ \w Ambtiɗohi Asi|lemma="Ambtiɗohi Koc na wi Asi"\w*. Yeesu sah raakiɗ \w \+tl Apootar\+tl*\w* kanak teeku Saak, waaye Saak yi fiis kaɓɗohii nikee taambɗoh ŋ Yeesu.
\ip Yeesu raakeen taambɗoh ƴaar nikiis, Saak na Suseef na Simong na Yuud.\x + \xt Macce 13:55\xt*\x* Ŋ camba, ɓa koseeɗi Yeesu.\x + \xt Saaŋ 7:1-5\xt*\x* Waaye ŋ finho hultiŋ Yeesu, ɓa kossa.\x + \xt Tum ci 1:13-14\xt*\x* Yeesu teeɓkee Saak ŋ finho hultiŋ ɗe.\x + \xt 1 Korenta 15:7\xt*\x* Ŋ in gaawiɗ, Saak nikka ŋ ɓi adgoh Janguuniŋ Yerusalem.\x + \xt Tum ci 12:17; 15:13-22; 21:18\xt*\x* Pool woyiɗ tiikiŋ ɗe ŋ kaɓɗohi a fiis ɓi Galaat.\x + \xt Ɓi Galaat 1:19; 2:6-12\xt*\x* Tiik ce namiɗ woyu ŋ fiisi Yuud kaɓɗoh.\x + \xt Yuud 1:1\xt*\x* Yuud yeem namee nik taambɗoh ŋ Yeesu.
\ip Wa miniɗ nik ne Saak fiis kaɓɗohii bala Pool fiisan kaɓɗoh ciŋ ɗe koc te ini uup ŋ kaɓɗohii wa wuu Yawuut ci kosiɗ ci.\x + \xt Saak 1:1\xt*\x* Teerndii na woye ŋ in laayiɗ wa dokkisse nga ca waas laayiɗ : miskiɗ ci na kafind ci nik ŋ kipes kosiɗ, liiɓohaaɗ moɗiɗ, miskiɗ ciŋ raakiɗ ci na raakaaɗiici na etohi ɓo' etoh keeñ hooliɗ na tumohaaɗ hooliɗ.
\iot Fiisi Saak kaɓɗoh kaɗtiɗoh an :
\io1 - Kañɗoh \ior 1:1\ior*
\io1 - Ɓak naa nu nik woyuuɗ waas yino \ior 1:2-11\ior*
\io1 - Miskiɗ ci na kafind ci \ior 1:12-18\ior*
\io1 - Keeñ hooliɗ na tumohaaɗ hooliɗ \ior 1:19-26\ior*
\io1 - Miskiɗ ciŋ raakiɗ ci na raakaaɗiici \ior 2:1-13\ior*
\io1 - Keeñ hooliɗ na tumohaaɗ hooliɗ \ior 2:14-26\ior*
\io1 - Raak liiɓ moɗiɗ ŋ ini yurah ŋ woo \ior 3\ior*
\io1 - Raak keeñ hoolaaɗi na ɓekke lahtoh na maɗ raak \ior 4\ior*
\io1 - Kooh hey atte'e raakiɗ ci na torhiɗe ɓooɓi\ior 5:1-6\ior*
\io1 - Nakoh laayiɗ \ior 5:6-20\ior*
\c 1
\s Kañɗohi
\p
\v 1 Mi yi Saak, \w ñaamiŋ|lemma="ñaam"\w* Kooh na Heɗ ɓoo Yeesu \w Kiristaa\w*, mi yii fiis kaytii ne ŋ woo na ɗu, ɗu ɓi cuuɓ ci ndaŋkiyaah na kanak ci (12) nik ɓooɓiŋ Kooh, te ɗu pasarkohha ŋ adinaani. Ɗu moɗ jam e ?
\s Kos ndengiɗ
\p
\v 2 Ɓaah ciŋ ngo, miskiɗ nu ɗu min degu ɗah, ambaat ne wa jam yakak nga ɗu ; 
\v 3 ɗu inah ne kosi ɗu kos hey markiskasse, na ɓi miskiɗ, te miskiɗ ceem ceɗ na ndengɗee ɗu. 
\v 4 Ini ndengɗeem na rimɗee ɗu, joy joy kaɗ po wa ree, nde ɗu nik ɓo' mitiɗ, ali in haawsukuu nga ɗu.
\p
\v 5 Te ɓo' nga ɗu tas raak liiɓohaaɗ moɗiɗ ɗah, a kiimaat Kooh yi na one ɓooɓi jen wa moɗoɗ te a na lahtukeeɗi nga ; a hey ɗe wa one. 
\v 6 Waaye a kiimohaata kosohaaɗ mitiɗ, a raakuu hel kanak ŋ Kooh, laam ɓoyi na raake hel kanak ŋ Kooh, a mand na ginaah ciŋ cookmi puuɗsi na meeɓe, faane. 
\v 7 Ɓo' mand ɗaa, a kinaat liiɓ ne a hey rahse in ngaŋ Heɗi. 
\v 8 Ɓoyeem, a ɓo' siisndiɗohiɗ, a minɗi oolku ŋ ali in ŋ in ci a na haɓɗe.
\p
\v 9 Ɓo' nu ɓaah nga ɓoo, te yaahiŋ ɗe rahsiɗɗi finhooriŋ ɗe ɗah, a neɓsaat ŋ meeɓi Kooh meeɓ ɗe. 
\v 10 Te ɓoyi raak, a neɓsaat ŋ ruhsiɗi Kooh ruhsiɗ ɗe. A inhaat ne a hey seeye findi pos paangi na seeyohe. 
\v 11 Nohi dammba ɗah, paangfi na suye suy, pos ci yaɗ, moɗ kiŋ ca coot. Wa mand ɗaa, ɓoyi raak na yaɗohe ɗaa ŋ tiindɗohaaɗ ciŋ ɗe, a coot.
\p
\v 12 Ɓoyi gen ndengɗukee ŋ miskiɗ, a neɓɗiɗ ! A hey pule nga na ndam, a rahas raayaani, weɗ kipes ki Kooh gap ɓi waaɗ ɗe.
\p
\v 13 Ɓo' nu waaɗ-waaɗiŋ ɗe ɓek po a waaɗ tum in moɗaaɗi ɗah, a kinaat woo ne a Kooh na tumɗukohee ɗe wa. In moɗaaɗi minɗi ɓek Kooh ŋ in te Kooh ŋ haf ce na ɓekeeɗi ali ɓo' ŋ in moɗaaɗi. 
\v 14 Waaye yaa nu nga ɗah, a kiñin kiŋ ɗa na nookee ɗa, wa yurhiɗ ɗa ŋ ini fu waaɗ. 
\v 15 Waaɗ-waaɗi baahaaɗiineem weɗ na nike rook, wa ɓasil bakaaɗ ; bakaaɗeem weɗ na kaɗe po wa yak, wa eɗoh kakaan.
\p
\v 16 Ɗu ɓi ɓaah ciŋ ngo ŋ keeñkoh, kinaat ɗal ŋ inii : 
\v 17 in baahiɗ nu ɗu rahas na in mitiɗ nu ɗu eɗu ɗah, wa puloh ɗafki. Wa ruhsoh ŋ Baabi leer ci puloh nga ɗe, yi na leerɗeeɗi woti, kim a ñuusiɗ ; a na ɓoƴsukoheeɗi. 
\v 18 Ŋ waaɗ-waaɗiŋ ɗe, taambohha ŋ woo ki keeh ki, a tumiɗ ɓoo kuɓuuciŋ ɗe, ne ɓoo nik waɗiŋ ɗe koc ŋ in ci a fer jen.
\s Sikɗuk woo kiŋ Kooh te fu pesoha
\p
\v 19 Ɗu ɓi ɓaah ciŋ ngo ŋ keeñkoh, inhaat inii : Ɓo' nu nik ndengɗukaat, a sikɗuke, a gaawuu woo te a yooɓuu ayruk. 
\v 20 Laam, ɓo' ayrukiɗ na tumeeɗi in yurhiɗ ŋ fiki Kooh. 
\v 21 Weɗ tah, wolaat in ci hoolaaɗiici nik nga ɗu jen na añaand ki laayɗi. Te na eɗef, ɗu teyɗuk woo ki ɓeku nga ɗu, weɗ min ɗu muciɗ.
\p
\v 22 Kinaat top ŋ sikɗukiŋ Woo ki dong, ineem, wa ñaañoh haf fu ; waaye pesohaata. 
\v 23 Ɓoyi na sikɗuke Woo ki te a pesohuu wa, a mand na ɓoyi na seetnduke ; 
\v 24 a marak haf ce ŋ seetu po ƴutta, a pulla, a jaarra alkoh findi a mand. 
\v 25 Waaye ɓoyi na marke ŋ waasi mit te wa faɗsee ambuuɗ ci, a ŋoɗ nga, a sikɗukuu wa ne a alkoha, waaye a pesohee wa, ɓoyeem hey barke'ɗasse ŋ in ci a na haɓɗe jen.
\p
\v 26 Ɓo' nu liiɓ ne a yi ŋ waas-Kooh, raak ɗe ambɗi nguɓiŋ ɗe ɗah, a na ñaañohe haf ce, te waas-Koohiŋ ɗe ɓarang ɓarang. 
\v 27 Waas-Koohi hool te wa raakɗi riiɓ ŋ fiki Kooh, yi Baabi, weɗ ne fu taambkohee yaɗuuci na ɓitiɓ ci ƴaar ciŋ ɓa kaan ŋ miskiɗ ciŋ ɓa, te fu namee penduk in ci hoolaaɗiiciŋ Adina.
\c 2
\s Kos talsohɗi raakiɗ na ñakiɗ
\p
\v 1 Ɗu ɓi ɓaah ciŋ ngo, kosi ɗu kos Yeesu Kiristaa Heɗ ɓoo yi raak kiyak, kinaata ambsoh na talsoh ɓo'. 
\v 2 Ɓo' hayeen ŋ cohiŋ ɗu, a ɓekuk kulɓa moɗiɗ na jaaru urus ; ɓo' wiiriis ñakiɗ nam hay na daah ciŋ ɗe. 
\v 3 Ɗu eɗ cir ɓoyi na kulɓaaci moɗiɗ ci, ɗu woo ɗe ne a ɓoofaat ŋ ɗisik baahiɗ ; ɗu woo heɗ daah ci ne a tufkaat wala a ɓoof ŋ kehƴi, ŋ kot ci. 
\v 4 Ɗu tum ineem ɗah, ɗu talsoh talsoh haa e ? Teemb ndeem, ɗu nikiɗ atte'oh na liiɓohaaɗ moɗaaɗi'iɗ !
\p
\v 5 Ɓaah ciŋ ngo ŋ keeñkoh, sikɗukaat to. Ɗu inhiɗ baahiɗ ne a Kooh tan ñakiɗ ciŋ Adina ne ɓa nik raakiɗ ci ngaŋ kos, ɓa raak ɓak ŋ Nguuri a gap ɓi waaɗ ɗe. 
\v 6 Waaye ɗu, ɗu ruhsiɗiɗ ñakiɗ ci ! Ɗu hotɗi hotɗi ne e heɗ raak-raak ci na torhiɗee ɗu, ɓa ɓayee ɗu waas ne ɗu ngela e ? 
\v 7 A ɓinde na riiɓɗe tiiki moɗohngaani ɗu eɗu ? E ɓeɗ haa e ?
\p
\v 8 Fiis ci woyiɗ ne : « Waaɗa morom fu findi fu waaɗoh haf fu. » Mbaa, ɗu taambɗoh waasiŋ Kooh, Heɗ Nguuri, ɗaa ɗah, ɗu haɓiɗ in baahiɗ. 
\v 9 Waaye ɗu talsohohee ɗah, wa bakaaɗ ; te waasi hey ɗu ambe findi ɓo' yurhaaɗi.
\p
\v 10 Ɓo' nu taambiɗ waasi, a ɗal nakoh yino dong nga ɗah, a faɗiɗa jen. 
\v 11 Laam Yi woo ne : « Kina njaaloo », a yi nam woo ne : « Kina ap ɓo'.\x + \xo 2:11 \xo*\xt Pula 20:13-14; Rohƴiɗi 5:17-18\xt*\x* » Nik ne fu njaalooɗi na ɓitiɓ jaambur, waaye fu ap ɓo' ɗah, fu ɗaliɗ waasiŋ Kooh jen. 
\v 12 Ɗu inhiɗ ne ɗu hey atte'se ngaŋ waasi na faɗse ambuuɗ ci. Kon, woyohaaɗ ciŋ ɗu, na tumohaaɗ ciŋ ɗu hunaat naa. 
\v 13 Ɓo' nu yirmohɗi ɗah, a yirmassanɗi ŋ atteeni ; laam, a yirim uupiɗ atte hatil.
\s Kos hun na tum
\p
\v 14 Ɓaah ciŋ ngo, wa raak winde njiriñ ɓo' woyee ne a kosiɗ te kosiŋ ɗe hunɗi na tum ? Ɗu liiɓiɗ ne koseem miniɗ ɗe muciɗ e ? 
\v 15 Findi taambɗoh ƴaar mbaa ɓitiɓ, a ñak ɓekkaah, a raakuu kañam ki a etoh Kooh-nu-wiis ; 
\v 16 ɓo' nga ɗu woo ɗe ne : « Kaɗa na jam. Soosi faɗaat ɗa. Meeɗɗa haf fu ñam po fu kap. » Raak ɗa paƴiɗɗi ɗe ini a etoh ɗah, wa raak winde njiriñ ? 
\v 17 Kosi hunɗi na tum mand ɗaa ; wa kaaniɗ sagu niki wa nik kiik wa.
\p
\v 18 Waaye, ɓo' miniɗ woo morom ce ne : Fu raak kos-kos, ŋ raakka tum-tum. Teeɓ po kosiŋ ɗa wi hunɗi na tum, ŋ teeɓ ɗa kosiŋ ngo ŋ tum-tum. 
\v 19 Fu kosiɗ ne Kooh yino ; ineem in baahiɗ. Waaye \w jiiniici|lemma="jiini"\w* na baahaaɗiikiŋ ca sah kosiɗa po ca na saakɗohe saakɗoh nga. 
\v 20 Naandɗi ! Andi fu waaɗ teeɓu ne kosi hunɗi na tum raakɗi njiriñ ?
\p
\v 21 Ini tah po Kooh ammba caac ɓoo Ibrahiima findi ɓo' yurhiɗ, wa ina a tumee haa e ? E dega a dege kuɓkaŋ ɗe Isaahha ne a \w seeƴkoh\w* ɗe haa e ? 
\v 22 Kon, fu hotiɗ ne kosiŋ ɗe hunee na tum ! E ini a tumee tah kosaŋ ɗe mit. 
\v 23 Ŋ ineem, ini Fiis ci woo raakka, an : « Ibrahiima kossa Kooh, tahha po Kooh ammba ɗe findi ɓo' yurhiɗ ; po a na ɓeeɗkohse nawle Kooh.\x + \xo 2:23 \xo*\xt Camba 15:6\xt*\x* » 
\v 24 Ɗu hotiɗ nga, Kooh na ambe ɓo' findi yurhiɗ ŋ in ci a na tume, kon wa ŋ kos dong haa.
\p
\v 25 Rahab toonkoha nak, ini tah po Kooh ammba ɗe findi ɓo' yurhiɗ, wa ina a tumee haa e ? E ɗembɗa a ɗembɗee ɓooɓa Israayel ca tuuƴe, ƴutta, a lahiɗta ɓa ŋ waas wiiriis haa e ?
\p
\v 26 Findi faani raakɗi kiñin kaanoh, kosi hunɗi na tum kaanoh ɗaa.
\c 3
\s Peɗeem
\p
\v 1 Ɓaah ciŋ ngo, kinaat laay ɓi nikan jangɗohoh ciŋ waasi ; ɗu inhiɗ ne, e ɓoo ɓi jangɗohoh ci raakan atteeni uupan misik. 
\v 2 Laam ɓoo jen, ɓoo laayiɗ findi ɓoo na kafndukohe. Ɓo' nu kafndukɗi ŋ woo ciŋ ɗe ɗah, a ɓo' mitiɗ, yi min amb cir ciŋ faaniŋ ɗe jen.
\p
\v 3 Ɓoo na lahɓe panis ci ne ca teyɗukiɗ ɓoo, ɓoo min ca yurhiɗ na faaniŋ ca jen ŋ ɗisik nu neɓ ɓoo. 
\v 4 Namaat marak \tl batooci\tl*. Ini caa yake, te puuɗis yakak yeñee ca jen, wa \tl guweernaay\tl* ƴissuut weɗ na tahe ɓi na nupɗee ca yurhiɗ ca ɗisik nu neɓ ɓa. 
\v 5 Peɗeem mand ɗaa, wa cir ƴissuut ŋ faan, waaye wa na tipaahke ngaŋ ɓi in yakak.
\p Markaat findi melem nduuƴ ƴissuutoh, wa miniɗ hoomiɗ nduuf yakak. 
\v 6 Peɗeem, wa yongkaah. Fu maraka ŋ ɗooƴ cir ci ɗah, wa Adina riifiɗ na in baahaaɗi. Weɗ na kaɓe faani jen in baahaaɗi, wa doh kipes ki jen. Weɗ ŋ haf wa, wa kaɓoh ŋ yongkaaha yakka.
\p
\v 7 Heet ciŋ ɗoopaat ci jen, ca miniɗ koɗu, ci na tiinde, na sel ci na ci na faske ŋ kehƴi, na ciŋ cookmi, ca jen ca miniɗ koɗu te ɓo' na koɗee ca. 
\v 8 Waaye, ali ɓo' minɗi koɗ peɗeem ; wa njaajaani ɓo' minɗi amb, wa riifiɗ na daŋari na ape. 
\v 9 Weɗ ɓoo na yakɗohe Heɗ ɓoo Kooh, Baabi ; ɓoo namee wa kiimɗoh moɗaaɗi ɓooɓi Kooh fer ŋ mandohaaɗiŋ ɗe. 
\v 10 Moo nguɓi yino yakɗohe, yonjohe\f + \fr 3:10 \fr*\fq yonj \fq*\ft : kiimiɗ ɓo' Kooh in moɗaaɗi ne Kooh nikiɗa.\ft*\f* e ? Ineem joyɗi nikoh ɗaa, ɓaah ciŋ ngo ! 
\v 11 Cul yino miniɗ pulɗe masuɓ hooliɗ na masuɓ aayiɗ e ? 
\v 12 Ɓaah ciŋ ngo, ndun miniɗ rim oliiw e ? Wala reseñ miniɗ rim ndun ? Naac jemiɗ namɗi min puliɗ masuɓ neɓiɗ !
\s Liiɓohaaɗi moɗiɗi puloh ŋ Kooh
\p
\v 13 Ya ɓa raak liiɓohaaɗ moɗiɗ nga ɗu, a ñaannja ? A teeɓohaata na pesohaaɗ moɗiɗ ; tumohaaɗ ciŋ ɗe hunaat na eɗef na liiɓohaaɗ moɗiɗ.
\p
\v 14 Waaye ɓo' nga ɗu, a hot ɓo' na in, a minɗi wa raak, a raak aay-keeñ nga, wala a nik ɓoyi waaɗ ne a yi dong raakan, ɓoyeem, a kinaat yaksiɗuk nga ; a yaksiɗuk nga ɗah, a nikɗi ŋ keeh. 
\v 15 Liiɓohaaɗeem pulohɗi ɗafki. Wa inaa Adina, inaa ɓo', inaa \w jiini\w*. 
\v 16 Ɗisik nu mandohaaɗ ceem nik ɗah, wa hey raake mbalay na tumohaaɗ moɗaaɗi nu nik.
\p
\v 17 Ŋ ini kaɗ ŋ liiɓohaaɗi moɗiɗi puloh ɗafki, wa hooliɗ, wa waaɗiɗ jam, wa soosiɗ, wa huniɗ na rangsuk, wa riifiɗ na yirmoh te wa na rime in baahiɗ. Wa raakɗi langɗoh, wa raakɗi naafeeha. 
\v 18 Waas yurhiɗ, e sokoh jam ci na sokee wa ŋ jam.
\c 4
\s Waaɗ Adina
\p
\v 1 Wa ye ɓek lahtoh ci na hiñoh ci ŋ ɗooƴ ɗu ? E waaɗ-waaɗ ci na hiñohe ŋ ɗooƴ cir ciŋ faan ciŋ ɗu haa e ? 
\v 2 Ɗu na waaɗe in, ɗu raakuu wa, ɗu boomoh. Ɗu hot ɓo' na in, ɗu minuu wa raak, ɗu lahtohe, ɗu hiñohe. Ɗu na kiimeeɗi Kooh, weɗ tah ɗu raakɗi. 
\v 3 Ali ɗu kiim sah, ɗu rahsanɗi, laam kiimiŋ ɗu baahɗi. Ɗu na kiime ne ɗu taambiɗ waaɗ-waaɗ ciŋ ɗu.
\p
\v 4 Njaalo'oh ci ɗu nikoh ! Ɗu inahɗi ne ɓo' nu waaɗ Adina ɗah, a sangiɗ Kooh e ? Te ɓo' nu waaɗ nawle'koh na Adina ɗah, a sangiɗiŋ Kooh. 
\v 5 Ɗu liiɓiɗ ne ini Fiis ci woo, wa ɗi ŋ ɓarngi e ? Ne : « Kooh waaɗiɗ ruuhi a geniɗ nga ɓoo te a fiiriɗ nga lool. »\f + \fr 4:5 \fr*\ft Ini fiisu ndii ngaŋ gerek, wa raakɗi aayaani woo in mand ɗaa jok ŋ Fiis ciŋ \+w Ambtiɗohi Koc|lemma="Ambtiɗohi Koc na wi Asi"\+w*, waaye ini wa woo, ɓo' miniɗa hot ngaŋ teerndiŋ \+xt Camba 2:7; 6:3; Pula 20:5; 34:14\+xt*. Wa namiɗ min nik ne aaya 5 na 6 joyeen toksu an : "Ɗu liiɓiɗ ne ini Fiis ci woo, wa ɗi ŋ ɓarngi e ? Inhaat ne Kooh waaɗiɗ ruuhi a geniɗ nga ɓoo te a fiiriɗ nga lool. Waaye a baah kiŋ ɗe weɗ uup. Kon ini Fiis ci woo, weɗ ne : « Kooh hunɗi na yaksiɗkoh ci, ɓi ruhsiɗ haf ɓa, ɓeɗ a na teeɓe baah kiŋ ɗe. »"\ft*\f* 
\v 6 Waaye a baah kiŋ ɗe weɗ uup. Ineem, wa hunnda na ini Fiis ci woo ne : « Kooh hunɗi na yaksiɗkoh ci, ɓi ruhsiɗ haf ɓa, ɓeɗ a na teeɓe baah kiŋ ɗe. »\x + \xo 4:6 \xo*\xt Gonaah ci 3:34\xt*\x*
\p
\v 7 Mbaa ñaamkaat Kooh. Ndengsiɗkohaat na Seytaani, a hey saandohe po a us ɗu. 
\v 8 Reɓgaat Kooh, a hey ɗu reɓge. Ɗu ɓi bakaaɗoh ci, siisndiɗohiɗ ci ɗu nikoh, ɓohñukaat te ɗu hooliɗ keeñ ciŋ ɗu. 
\v 9 Miskiɗkaat, nikaat ŋ ruy, rooyaat ! Ƴen ciŋ ɗu ɓoƴsukaat muhun, sumi ɗu sum nik tiis. 
\v 10 Ruhsiɗaat haf ɗu ŋ fiki Heɗi, a hey ɗu meeɓe.
\s Woo ŋ ɓo'
\p
\v 11 Ɓaah ciŋ ngo, kanaat ɓoofoh morom ɗu. Ɓo' nu woo in moɗaaɗi ŋ morom ce wala a attee ɗe ɗah, woo keem, a woo wa waasiŋ Kooh, te atteeneem, a attee wa waasiŋ Kooh. Ŋ ineem, a tum haf ce atte'oh waasi, te a joya joy taambiɗ. 
\v 12 A yino na tufkiɗe waas a atte'e. A yi dong min mucɗoh, a yi min ɗumboh. Kon fu yi na atte'e morom fu, yaf ɓa ?
\s Yaksiɗuk
\p
\v 13 Sikɗukaat ɗu ɓi na woye ne : « Woti wala kim, ɓoo hey kee kur nangam, ɓoo tum nga kiis, ɓoo toontuk, ɓoo raak kopor. » 
\v 14 Ɗu inah inah kimiŋ ɗu findi wa moocohan e ? Kipes kiŋ ɗu ye ? Ɗu mand na maari na pule, wa maañuu, wa coot. 
\v 15 Inii kay weɗ ɗu joy woo : « Wa neɓ Heɗi ɗah, ɓoo hey pese, ɓoo haɓiɗ inii wala wii. » 
\v 16 Waaye ɗu ɓii yaksiɗuk ŋ yegi ɗu yeg haf ɗu te yaksiɗuk mand ɗaa baahɗi.
\p
\v 17 Mbaa ɓoyi inah ini baahiɗi a joy haɓiɗ, a haɓiɗɗaa ɗah, a bakaaɗiɗ.
\c 5
\s Moɗaaɗiiciŋ raak-raak
\p
\v 1 Ɗiski wa nik sikɗukaat to, ɗu ɓi heɗ raak-raak ci ! Fuɗaat ! Wililkaat sagu moɗaaɗiici rahsan ɗu ! 
\v 2 Raak-raakiŋ ɗu nopiɗ ! Kulɓaaciŋ ɗu cangndiɗ ! 
\v 3 Ursiŋ ɗu na haalsiŋ ɗu hoyiɗ, te hoyi ca hoy weɗ teeɓohan ɗu ! Hoyeem hey ambe faan ciŋ ɗu po wa ñam ca findi yongkaah. Ɗu ɓii nangɗoh raak-raak te ɓoo ɓeɗɗi ngaŋ reehiŋ Adina.
\p
\v 4 Ɗu sangiɗ wirind pangkoh ci na nguɗɗee ɗu yohon ciŋ ɗu. Sikɗukaat wirndeem ! Wa leehkiɗ, te leehuk ciŋ nguɗoh ceem reyiɗ ŋ nof ciŋ Kooh, Heɗ malaakaaci. 
\v 5 Ŋ kehƴi, ɗu na pesohe neɓiɗ na moɗiɗ, ɗu na yafalke yafaluk haa ɗoopti na sekɗohse mbehi a hoosohsan. 
\v 6 Ɗu na ambe amb ɓoyi yurah, ɗu ap ɗe, te a na ndengsiɗkoheeɗi na ɗu.
\s Min muñ
\p
\v 7 Ɓaah ciŋ ngo, muñaat, ɗu sekee po Heɗi hayis. Markaat ŋ guurohi findi a na muñohe, a sekee nguɗ ci a oolkoh, ŋ toɓ ci koc po ŋ ci mirndoh. 
\v 8 Namaat min sek te ɗu ndengɗuk ; hayisiŋ Heɗi mand na reyiɗ.
\p
\v 9 Ɓaah ciŋ ngo, ali ɓo' kanaat lahtuk ŋ morom ce wala ɗu hey atte'se ; atte'ohi a yi ŋ yahndeeri. 
\v 10 Ini kaɗ ŋ miskiɗ ci na min muñ, markaat ŋ woosuuɗ ci woyee ŋ tiikiŋ Heɗi. 
\v 11 Ɓi genee ndengɗuk, ɓeɗ ɓoo amb ne ɓa neɓɗiɗ. Ɗu kerhiɗ findi Ayooɓa\f + \fr 5:11 \fr*\fq Ayooɓa \fq*\ft : a yi farañse na woye "\+tl Job\+tl*" ; marka ŋ teerndiŋ \+xt Ayooɓa\+xt*.\ft*\f* genohee ndengɗuk, na ini Heɗi on ɗe ŋ mirndaani. Heɗi riifiɗ na baah na yirmoh.
\s Ini nik ŋ kiim Kooh
\p
\v 12 Ɓaah ciŋ ngo, kanaat giñ muk ngaŋ Eel ci wala ngaŋ kehƴi wala ngaŋ in wiiriis nu wa min nikoh ɗah. Ɗu woo "ee" ɗah, wa nikaat "ee" te ɗu woo "a'aa" ɗah, wa nikaat "a'aa" ; ne Kooh atte'uu ɗu.
\p
\v 13 Ɓo' nga ɗu nik ŋ miskiɗ ɗah, a kiimaat Kooh. Ɓo' sum ɗah, a ƴeekaat Kooh. 
\v 14 Ɓo' nga ɗu kosaay ɗah, a ɓeeɗkaat yakak ci adgoh ɗu, ɓa kiimiɗ ɗe Kooh, ɓa ambsoha na reefiɗ ɗe diw ŋ tiikiŋ Heɗi. 
\v 15 Kiimi ɓa kiiman na kos hey ɗe mucɗe. Heɗi hey ɗe kurkiɗe. Wa raak ɗe raakiɗ bakaaɗ ɗah, Heɗi hey ɗe ɗaase. 
\v 16 Mbaa, woytiɗohaat bakaaɗ ciŋ ɗu ŋ harmban ɗu, te yaa nu nga kiimɗee morom ce Kooh ne ɗu min wir. Kiim ɓo' yurhiɗ raakiɗ hatil lool. 
\v 17 \w Ilyas\w* nikee ɓo' findi ɓoo, a kiimmba na hatil ne wa kanaat toɓ. Masuɓ keenɗi ŋ kehƴi ini ree kiis kaahay na camban. 
\v 18 Ƴutta a kiimissa ne wa toɓ. Wa toɓpa, kehƴi eɗohha in.
\p
\v 19 Ɓaah ciŋ ngo, ɓo' nga ɗu muuƴ, a us keeh ki ; ɓo' wiiriis dokin ɗe nga ɗah, 
\v 20 inhaat ne a mucɗiɗ kiñin kiŋ ɓoyeem te bakaaɗ laayiɗ hey ulse saguuce.