\id COL - Saafi-Saafi
\ide UTF-8
\h Ɓi Kolos
\toc3 Kol
\toc2 Ɓi Kolos
\toc1 Fiisi Pool kaɓɗoh ɓi Kolos
\mt Fiisi Pool kaɓɗoh ɓi Kolos
\is Rangsohaani
\ip Pool ɓaahee ŋ Israayel ci, ŋ cuuɓiŋ Benyaamin.\x + \xt Ɓi Rom 11:1; Ɓi Filippi 3:5\xt*\x* A nikee \w \+tl Farisen\+tl*\w*.\x + \xt Tum ci 23:6; Ɓi Filippi 3:5\xt*\x* Ŋ finho \w Paantakot\w*, wi Janguuni camb ɓaatuk, a ɓaahee ŋ ɓi tolfiɗee kosiɗ ci.\x + \xt Tum ci 7:58–8:3\xt*\x* Waaye wa raakka mbeh, a cohha na Yeesu, a kossa\x + \xt Tum ci 9:1-30\xt*\x* po a nikka \w \+tl Apootar\+tl*\w* sah. Teerndiŋ "Tum ciŋ \tl Apootar\tl* ci" teeɓohiɗ pangkiŋ ɗe wi a nik \tl Apootar\tl* ini kooɗoh ŋ saar 13.
\ip Pool moosɗi nikoh ŋ Kolos, e Epafras, a yi yegɗoh \w Yegɗohiŋ Muci\w* ndaam.\x + \xt Ɓi Kolos 1:7\xt*\x* Pool fiisiɗ ɓi Kolos kaɓɗohii sagu kosiŋ ɓa a kerah. Wa miniɗ nik ne Tisikos na Onesim, ɓi wik fiisi Pool kaɓɗoh wii,\x + \xt Ɓi Kolos 4:7-9\xt*\x* ɓeɗ nam wik fiisi Pool kaɓɗoh Filemoon.\x + \xt Filemoon 1:10\xt*\x* Nik ne wa ɗaa ɗah, a Epafras ŋ haf ce, a yi naandsuk Pool ini kaɗ ŋ kosiŋ ɓa, laam a nikee na ɗe ŋ kasoona.\x + \xt Filemoon 1:23\xt*\x*
\ip Yakki \w Kiristaani|lemma="Kiristaa"\w* yak, ŋ niki a nik yino na Kooh, weɗ ƴohiŋ teerndii.
\iot Fiisi Pool kaɓɗoh ɓi Kolos kaɗtiɗoh an :
\io1 1 Pool kañɗiɗ ɓi Kolos a kiimiɗta ɓa Kooh \ior 1:1-11\ior*
\io1 2 Ya ɓa a yi Kiristaani ? \ior 1:12-23a\ior*
\io1 3 Pangkiŋ Pool wuu kosiɗ ci \ior 1:23b–2:5\ior*
\io1 4 Kipes ki Kiristaani onoh \ior 2:6–3:4\ior*
\io1 5 Findi ɓo' joy pesoh na Kiristaani \ior 3:5–4:6\ior*
\io1 6 Askohi \ior 4:7-18\ior*
\c 1
\s Kañɗohi
\p
\v 1-2 Mi yii kañiɗ ɗu, ɗu ɓi \w ɓo'-Kooh ci\w* nik ŋ Kolos te ɗu nikka ɓaah ciŋ ɓoo cariɗ oolku ŋ niki ɗu nik ŋ \w Kiristaani|lemma="Kiristaa"\w*. Mi yi Pool, \tl \+w Apootariŋ|lemma="apootar"\+w*\tl* Kiristaani Yeesu ŋ ini Kooh waaɗ, mi na Timoote yi ɓaah na ɓoo, ɓoo ɓii kañiɗ ɗu. Kooh Baabiŋ ɓoo baahohaat ɗu, a on ɗu jam !
\s Pool kiimɗiɗ ɓi Kolos Kooh
\p
\v 3 Ɓoo na gene corkiɗ Kooh, Baabiŋ Heɗ ɓoo Yeesu Kiristaa, ne ɓoo kiimɗeesa ɗu Kooh ɗah. 
\v 4 Ɓoo kerhiɗ kosi ɗu kos Kiristaani Yeesu na waaɗi ɗu waaɗ ɓo'-Kooh ci jen, 
\v 5 sagu oolki ɗu ooluk ne ɗu hey rahse ini Kooh ɗaakiɗ ɗu ŋ Eel ci. Oolkeem, ɗu raaka wi ɗu kerah woo kiŋ keeh ki, wi Yegɗohiŋ Muci. 
\v 6 Yegɗohiŋ Muceem reyiɗ nga ɗu, findi wa reyoh ŋ adinaani jen. Weɗi rim in baahiɗ, weɗi kaɗ fiki, wa nam nikoh ɗaa nga ɗu, wa camboh wa ɗu kerah te ɗu inahha keeh-keeh baahohi Kooh baahoh ɗu. 
\v 7 Jangɗoh ceem, ɗu rahsoh ca ŋ Epafras, nawleeso yi ŋ keeñkoh, yi nam nik \w ñaamiŋ|lemma="ñaam"\w* Heɗi, findi ɓoo ; a na pangkiɗe Kiristaani wuu ɗu te a cariɗ oolku. 
\v 8 A yi woo ɓoo waaɗohi \w Fuuɗsi Hoolohngaani|lemma="Fuuɗsi Hoolohngaani, Fuuɗsiŋ Kooh"\w* tum nga ɗu.
\p
\v 9 Ineem weɗ tah, ina ɓoo kerhoh in ceem nga ɗu poyi, ɓoo gen ɗu kiimiɗ Kooh. Ɓoo na kiimee ɗe ne a on ɗu liiɓohaaɗ moɗiɗ keeh-keeh na inhisoh, taamboh ŋ Fuuɗsi Hoolohngaani, ne ɗu riif na inah ini a waaɗ. 
\v 10 Ŋ ineem ɗu hey mine pes pesi teeɓoh ne ɗu ɓaah ŋ Heɗi te ɗu neɓ ɗe ŋ in nu in. Ɗu tumee in baahiɗ nu nik te in ci ɗu tum rim in, te ɗu ɓaat inah Kooh. 
\v 11-12 Te Kooh hey ɗu ɓaate hatil ŋ in nu in taamboh ŋ hatiliŋ yaki a yak ne ɗu min muñ in ci jen wa hun na muñ seke.
\s Kuɓki, ñaamaariŋ Kooh yi minɗi hotu
\p Corkiɗaat Kooh Baabi na sum, ŋ ini a on ɗu po ɗu minnda rahas ɓak ŋ ini a ɗaak ŋ siñaariŋ ɗe wuu ɓooɓiŋ ɗe. 
\v 13 A pulɗiɗ ɓoo ŋ hatiliŋ ñuusi, a ɓayya ɓoo ŋ Nguuriŋ \w Kuɓki|lemma="Kuɓkiŋ Kooh"\w* a keeñkoh. 
\v 14 Kuɓkeem, a yi pulɗoh ɓoo ŋ baahaaɗi, a ɗaassa ɓoo bakaaɗ ciŋ ɓoo.
\b
\q
\v 15 Kuɓkeem,
\q a yi ñaamaariŋ Kooh yi minɗi hotu,
\q a yi Saawi nik ŋ ɗafuk feruuɗi jen.
\b
\q
\v 16 Laam in ci nik ŋ Eel ci na kehƴi jen,
\q feruuɗ taamboh nga ɗe,
\q ci min hotu, ci minɗi hotu,
\q heɗ hatil ci raak nguur wala tiik,
\q min-min wala kikilifa.
\q Ca jen ca feruuɗ taamboh nga ɗe,
\q te ca feru wuu ce.
\b
\q
\v 17 A yi nik bala in nu in,
\q te in ci jen ambsukohiɗ yino
\q taamboh nga ɗe ;
\b
\q
\v 18 A yi hafiŋ faani,
\q maanaam Janguuni.
\q A yi cambohaaniŋ wa
\q te a yi koc hulit
\q ŋ kaaniɗ ci
\q ne, ŋ in ci jen
\q a nik Yi ɗeɓ.
\b
\q
\v 19 Laam Kooh waaɗa waaɗ,
\q a gennda findi a hend jen,
\q ŋ Kuɓkiŋ ɗe,
\q
\v 20 te, a taamboh nga ɗe,
\q a kerhiɗohiɗta in ci jen na ɗe,
\q in ci nik ngaŋ kehƴi
\q na in ci nik ngaŋ Eel ci,
\q te weɗ a tum wa a tumee jam
\q taamboh ŋ ñif mi a aam ŋ kurwaaniŋ ɗe.
\b
\p
\v 21 Ini kaɗ nga ɗu, ɗu nikee hanhe, ɗu raakeeɗi ɓak ŋ Kooh, ɗu nikee sangiɗ ciŋ ɗe ŋ liiɓohaaɗ ciŋ ɗu na tumohaaɗ ciŋ ɗu baahaaɗiici, 
\v 22 waaye ɗiski wa nik, a kerhiɗohɗiɗ ɗu na haf ce taamboh ŋ kakaan kiŋ Kuɓkiŋ ɗe, yi kaan ŋ faaniŋ ɗe, ne ɗu tufuk ŋ fikiice hooliɗ, raakaaɗi sikka, raakaaɗi woyɗaah. 
\v 23 Waaye ɗu joyiɗ ris ndengiɗ ŋ kosi ɗu kos te ɗu faɗuu ali in wa usiɗ ɗu ŋ oolki ɗu raak ŋ in ci na haye sagu Yegɗohiŋ Muci ɗu kerah. Yegɗoheem, feruuɗ ci ŋ ooɓ eel ci jen woyuuɗa.
\s Pangkiŋ Pool wuu kosiɗ ci
\p Yegɗohiŋ Muceem, weɗ mi na pangkiɗe, mi yi Pool. 
\v 24 Te ɗiski wa nik, ŋ sumiɗ ŋ miskiɗ ciŋ ngo wuu ɗu. Mi yii teyɗuk tolfiɗu wuu ɗu, findi Kiristaani hee wa tumohe ne a nikeen ndii, a yi ŋ haf ce ɗah. Kon mi yii tolfiɗu wuu faaniŋ ɗe, wi Janguuni. 
\v 25 Mi na pangkiɗe Janguuni, weɗ pangki Kooh dengkoh ho wuu ɗu, ne ŋ yegɗoh woo kiŋ ɗe ŋ findi wa hend jen, 
\v 26 Woo keem wa ɗasɗohsee ɗasɗohu ŋ jamanooci na gomal ci coot jen, waaye wa teeɓohuuɗ kotii ŋ ɓooɓiŋ ɗe. 
\v 27 Kooh waaɗee ɓoo inhiɗ yaki ini ɗasɗuuɗeem yak na raak-raaki nik nga wuu ɓi nikɗi Yawuut. Ini ɗasɗuuɗeem weɗ ne : Kiristaani yii nga ɗu, ɗu oolkiɗ yaki in ci na haye yak !
\p
\v 28 A yi ɓoo na yegɗohe, ɓoo ñaahee ɓo' nu nik te ɓoo jangɗee ɓo' nu nik na liiɓohaaɗ moɗiɗ nu ɓoo raak ɗah, ne ɓoo min ɓay ɓo' nu nik ŋ fiki Kooh a nik ɓo' mitiɗ ŋ Kiristaani. 
\v 29 Ineem weɗ tah ho pangkee panguk miskiɗ, ŋ hiñohohee hatiliŋ Kiristaani, wi na pangke nga so.
\c 2
\p
\v 1 Ŋ waaɗiɗ ne ɗu inah hiñohi yakki mi na hiñohe wuu ɓi moosɗi so hotoh jen, findiiɗu na ɓi Lawdise. 
\v 2 Mi na hiñohe ne ɗu ɓaat kaañ, ɗu nik yino taamboh ŋ waaɗoh. Ŋ ineem, ɗu riif tem na inhi wooriɗi wi ñaañ keeh-keeh na onohe, ɗu inah ini ɗasɗukiɗiŋ Kooh, maanaam \w Kiristaani|lemma="Kiristaa"\w*, 
\v 3 laam raak-raaki nik ngaŋ liiɓohaaɗ moɗiɗ na inah jen ɗasɗuk nga ɗe.
\p
\v 4 Mi na woye ineem ne ali ɓo' ñaañohuu ɗu na woo ci na kulɓa'kohe keeh. 
\v 5 Ali nik ne mi na faan ndo, ŋ nikɗi na ɗu, liiɓiŋ ngo wii nga ɗu, mi yii hot niki ɗu nik moɗoɗ na ndengi ɗu ndeng ngaŋ kosi ɗu kos Kiristaani, te ŋ sumiɗ nga.
\s Riif na kipes kiŋ Kiristaani
\p
\v 6 Ŋ ineem, ɗu teyɗukiɗ Kiristaani Yeesu findi Heɗi, mbaa ɗah, raakaat tumohaaɗ huniɗ na ɗe. 
\v 7 Faɗaat Kooh a jimb ɗu baahiɗ, a taɓah kipes kiŋ ɗu nga ɗe, a ɓaat ɗu ndengiɗ ŋ kosi, wa hun na in ci ɗu jangɗu, te ɗu corkiɗee Kooh keeh-keeh.
\p
\v 8 Wortukaat po ali ɓo' kinaat ɗu ñaañoh na liiɓohaaɗ moɗiɗ puloh ŋ Adina, na lee ci raakɗi haf na kose, ci gaƴuk ŋ mbaah ciŋ ɓo' ci na in ci na tiindɗe Adina waaye ŋ Kiristaani haa. 
\v 9 Laam, ini nik ŋ Kooh jen gen ŋ faaniŋ Kiristaani ; 
\v 10 te ɗu riifiɗ tem na kipes kiŋ Kiristaani, a yi nik ŋ ɗafuk ki'adug nu nik na kikilifa nu nik.
\p
\v 11 Ŋ niki ɗu nik nga ɗe, ɗu \w nguɗkiɗ|lemma="nguɗuk"\w* sah, nguɗki yaah ɓo' haɓiɗɗi. Nguɗkeem puloh ŋ Kiristaani, weɗ ne a nihis faani na taambɗe waaɗ-waaɗiŋ kiñin ki. 
\v 12 Findi ɗu ambsukoh na ɗe, ɗu uumbuusa wa ɗu ɓoktu, ɗu nam hultoh ɗaa na ɗe taamboh ŋ kosi ɗu kos hatiliŋ Kooh, yi hultiɗ ɗe. 
\v 13 Ɗu ɓi nikee ɓo' kaaniɗ sagu ɗal ciŋ ɗu na ini ɗu nikeeɗi Yawuut, Kooh ambsohiɗ ɗu na ɗe, a onnda ɗu kipes ŋ ɗaasi a ɗaas ɓoo ɗal ciŋ ɓoo jen. 
\v 14 Kayti ɗal ciŋ ɓoo fiisohse, wi atte'ee ɓoo tooñ sagu nakoh ciŋ waasi, a moosiɗa ; a nihsiɗa ŋ daaƴi a daaƴa ŋ kurwaana. 
\v 15 A naafiɗ ganaay ciŋ adgoh ci nik ŋ ɗafki na kilifaaci nik nga ; a winnja ɓa ŋ fiki ɓooɓi jen, a saahha ɓa taamboh ŋ kurwaana.
\p
\v 16 Mbaa, ali ɓo' kinaat ɗu atte sagu in ci ɗu na ñame wala ane, wala ini kaɗ ŋ feet ci, wala ŋ in ci na haɓɗasse ne caɓni pul ɗah wala \w mbehi na iɗsiɗkohse\w*. 
\v 17 In ceem jen ca saangniŋ in ci joyee hay, waaye ci joyee hay keeh-keeh, ca in ciŋ Kiristaani. 
\v 18 Ɓooɓi na neɓse ŋ ƴissuutiɗ haf ɓa, ɓi na ñaamke malaakaaci, kinaat ɓa faɗ ɓa rokee aafiŋ ɗu ; ɓooɓeem, ɓa liiɓ haa ne ɓa inhiɗ, sagu in ci hayɗoh ɓa haa heeƴ, ɓa hotsiɗkiɗ ŋ ɓarang ɓarang sagu liiɓohaaɗ ciŋ ɓa te ɓa ɓo' dong. 
\v 19 Ɓa ŋoɗisɗi ŋ Kiristaani, yi hafi te moona hafi tah po faani jen pesee, ambsukohha taamboh ŋ pok ci na sir ci ndengiɗa, jaar wa hooɗee hooɗi puloh ŋ Kooh.
\s Kaan na hulit ŋ Kiristaani
\p
\v 20 Ɗu kaaniɗ na Kiristaani ŋ ini kaɗ ŋ in ci na tiindɗe Adina, mbaa wa ye tah ɗu pesee po haa ɗu ɓii ŋ Adina, ɗu teyɗukee degu ɓi sangoh, findi cii : 
\v 21 « Kina ɓay, kina ƴooh, kina laal... » 
\v 22 In ci sangohu ndii jen, ca ñamu rek ɗah, ca na raakisseeɗi njiriñ ! Ca nakoh na jangɗoh ci puloh ŋ ɓo' dong. 
\v 23 Wa keeh ne ca mand na liiɓohaaɗ moɗiɗ, findi ɓooɓi na taambɗe waas-Koohi ɓa feroot, wa hun na ruhsiɗ haf fu na torhiɗ haf fu ; waaye in ceem raakɗi ali njiriñ ɗal tum ini neɓ kiñin ciŋ ɗu.
\c 3
\p
\v 1 Kon nik ne ɗu hultiɗ na \w Kiristaani|lemma="Kiristaa"\w* ɗah, waakaat in ca nik ŋ ɗafka, ɗiska Kiristaani ɓoof ŋ ñaahmiŋ Kooh. 
\v 2 Liiɓ ciŋ ɗu nikaat ŋ in caŋ ɗafka, waaye ŋ in ciŋ kehƴi haa. 
\v 3 Laam ɗu kaaniɗ te kipes kiŋ ɗu ɗasɗukiɗ na Kiristaani ngaŋ Kooh. 
\v 4 Kiristaani, a yi kipes kiŋ ɗu, te mbehi a teeɓohkan, ɗu hey name teeɓohuk na ɗe, ɗu ɓaah ŋ yaki a yak.
\s Kiɓo' ki asi
\p
\v 5 Mbaa tumohaaɗ nu nik nga ɗu te wa ɓaahha ŋ Adina ɗah, apaata ; findi : Njaaloo, usuɓ, maɗ kaci'ɗohiɗ, maɗ tum in baahaaɗi na waaɗ kopor maanaam ñaamuk kooh nikaaɗi. 
\v 6 In ceem ceɗ na tahe ayrukiŋ Kooh hay [ŋ sangoh ci]. 
\v 7 Ɗu namee tum in ceem wa ɗu pesohee ca ɗeɓgaan. 
\v 8 Waaye kotii, namaat saɓsukohis na in cii jen : Ayruk, añaand, tum ɓo' miskiɗ, ɗooɓoh na woo moɗaaɗi. 
\v 9 Kinaat leytiɗohis, ɗu wolkiɗ kiɓo' kiŋ ɗu maañiɗa na tumohaaɗ caŋ wa. 
\v 10 Ɗu ɓekkiɗ kiɓo' as, wi na doknasse as ŋ mandohaaɗiŋ Yi fera ne ɗu rahas ki'inah keeh-keeh. 
\v 11 Wa \w Gerek\w* haa, wa Yawuut haa, wa \w nguɗkiɗ|lemma="nguɗuk"\w* haa, wa nguɗkaaɗi haa, wa kerhaaɗi gerek haa, wa jangaaɗi ali in haa, wa \w ñaam\w* haa, wa nikaaɗi ñaam haa ; waaye Kiristaani a yi jen nga ɗu jen.
\p
\v 12 Ŋ ineem, ɗu ɓi Kooh kooɗ ne ɗu hool wuu ce te a waaɗta ɗu, raakaat keeñ moɗiɗ, ɗu baah, ɗu eɗef, ɗu soos te ɗu min muñ seke. 
\v 13 Yaa nu nga muñɗaat morom ce, ɗu ɗaastiɗohe ; raak yi ambiɗ morom ce in ɗah, a ɗaasaat ɗe ; findi Heɗi ɗaasoh ɗu, namaat tum ɗaa. 
\v 14 Waaye ini uupiɗ in ceem jen etoh, weɗ ne ɗu waaɗtiɗoh, te waaɗoh weɗ ambtiɗohi mit.
\p
\v 15 Jamiŋ Kiristaani adgohaat keeñ ciŋ ɗu, ɗu ɓeeɗku ŋ jameem ŋ niki ɗu nik faan yino. Genaat corkiɗ Kooh ! 
\v 16 Woo kiŋ Kiristaani genaat nga ɗu na raak-raakiŋ wa jen ; jangɗohaat ŋ harmban ɗu te ɗu ñaahtiɗohee na liiɓoha moɗiɗ nu nik, wa hun na ƴeek ciŋ Sabuur na ƴeek corkiɗoha Kooh, na ƴeek ci puloh ŋ \w Fuuɗsi Hoolohngaani|lemma="Fuuɗsi Hoolohngaani, Fuuɗsiŋ Kooh"\w* jen ; ɗu ƴeek ca na keeñ ciŋ ɗu ne ɗu corkiɗ Kooh. 
\v 17 In nu ɗu na tume ɗah, wa nik ŋ woo wala ŋ tumohaaɗ, tumaata ŋ tiikiŋ Yeesu Heɗi, ɗu corkiɗee Kooh Baabi saguuce.
\s Findi ɓi kahan joy pesoh
\p
\v 18 Ɓitiɓ ci, teyɗukɗaat ƴaar ciŋ ɗu, findi wa joy nikoh ŋ niki ɗu nik ŋ Heɗi. 
\v 19 Ƴaar ci, waaɗaat ɓitiɓ ciŋ ɗu te kinaat raak aay-keeñ nga ɓa. 
\v 20 Komaakci, kerhiɗaat yaay ciŋ ɗu na baab ciŋ ɗu ŋ in ci jen, ineem weɗ neɓ Kooh. 
\v 21 Baab ci, kinaat ayrukiɗ kuɓuuciŋ ɗu, po ɓa kee faɗsuka.
\s Ñaam ci na heɗ ciŋ ɓa
\p
\v 22 Ñaam ci, kerhiɗaat heɗ ciŋ ɗu ŋ adinaanii, kerhiɗaat ɓa ŋ in ci jen, wa nikuu ŋ has ciŋ ɓa dong po haa ɗu na waake ini neɓ ɓa, te ɓa ɓo' dong, waaye kerhiɗaat ɓa te wa nik keeh nga ɗu, wa hun na nup Heɗi. 
\v 23 In nu ɗu na tume ɗah, pangkaat nga na keeñ hooliɗ findi ɓoyi na pangkiɗe Heɗi waaye findi ɓoyi na pangkiɗe ɓo' haa. 
\v 24 Te inhaat ne, Heɗi hey ɗu aafohe ini a gapee ɓooɓiŋ ɗe, laam Heɗ ɗu Kiristaani, a yi ɗu na pangkiɗe. 
\v 25 Waaye yi na tume yurhaaɗi, a hey aafohse yurhaaɗiini a tum. Kooh na talsoheeɗi ɓo'.
\c 4
\p
\v 1 Heɗ ci, tumɗaat \w ñaam\w* ciŋ ɗu ini yurah, ini hend, ɗu inah ne, ɗu namiɗ raak Heɗ ŋ Eel ci.
\s Nakoh
\p
\v 2 Genaat kiim Kooh, wa hun na yunuk na corkiɗ ɗe. 
\v 3 Namaat ɓoo ɓaahndoh ŋ kiim ciŋ ɗu Kooh, ne a rangsiɗ ɓoo waas, ɓoo min yegɗoh Woo ki, ini ɗasɗukiɗi ŋ ini kaɗ ŋ \w Kiristaani|lemma="Kiristaa"\w* ; yegɗohiŋ Woo keem, weɗ tah ho ambu ŋ kaso. 
\v 4 Kiimaat Kooh ne ŋ jangɗoha hooliɗ findi ŋ joya tumoh.
\p
\v 5 Ɗu nik na ɓi ɓaahɗi na ɓoo kos ɗah, nikaat na ɓa na liiɓohaaɗ moɗiɗ, tondkaat ŋ jamanooni Kooh on ɗu ne ɗu haɓiɗ in ci ɗu min. 
\v 6 Woo kiŋ ɗu genaat neɓ, wa raak meɗa, ne ɗu min inah findi ɗu lofohan yaa nu nga.
\s Askohi
\p
\v 7 Tisikos, ɓaah ɓoo yi ŋ keeñkoh, a cariɗ oolku ŋ pangkiŋ Heɗi, a huntohiŋ ngo ŋ Heɗi ngaŋ kiñaam, a hey ɗu woye ini kaɗ nga so jen. 
\v 8 Ŋ woosiɗ ɗe nga ɗu, ne a woo ɗu ini ɓoo nikoh te a soosiɗ keeñ ciŋ ɗu. 
\v 9 Ŋ woos ɗe na Onesim, yi puloh ndeem, nga ɗu. A ɓaah ɓoo ŋ kos, a cariɗ oolku te ŋ keeñkohiɗ ɗe. Ɓa hey ɗu naandsuke in ci raak ndii jen.
\p
\v 10 Aristarka, yi nik na so ŋ kasooni, a yii kañiɗ ɗu. Maarko, yi nik taambɗoh ngaŋ Barnabaas yii nam ɗu kañiɗ. Ɗu rahsiɗ nakoh ci ŋ ini kaɗ nga ɗe po ƴutiɗ ; a hey ɗu marke ɗah, taambkohaat ɗe moɗoɗ. 
\v 11 Ƴaari teeku Yeesu, yi na name woyu Yustus, yii nam ɗu kañiɗ. Ngaŋ Yawuut ci, ɓeɗ ɓi kaahay cii dong, ɓeɗ na pangke na so wuu Nguuriŋ-Kooh. Ɓa ambohiɗ to keeh-keeh !
\p
\v 12 Epafras, yi nam puloh ndeem, nga ɗu, yii kañiɗ ɗu. A ñaamiŋ Kiristaani Yeesu, a gen ɗu hiñohɗe ŋ kiim ciŋ ɗe Kooh, ne ɗu gen ndeng ŋ kosi ɗu kos, ɗu mit te ɗu hun keeh-keeh na ini Kooh waaɗ jen. 
\v 13 Ŋ miniɗ ɗe seede ne a na pangke panguk miskiɗ wuu ɗu ɓi Kolos na ɓi Lawdise na ɓi Hiyerapolis.
\p
\v 14 Luk, paƴohi ŋ keeñkoh, yii kañiɗ ɗu. Demaas yii nam ɗu kañiɗ. 
\v 15 Kañɗiɗaat ɓoo ɓaah ciŋ ɓoo kosiɗ ci ŋ Lawdise, kañɗiɗaat ɓoo Nimfa na ɓi Janguuni na cohe ŋ kahan ce.
\p
\v 16 Ɗu jangɗu fiisi ŋ kaɓɗoh ɗu wii ɗah, tumaat po ɓi Janguunaŋ Lawdise nama jangɗu, te ɗu nam jangɗu wi ɓi Lawdise eɗu.
\p
\v 17 Woyaat Arsip ne a tufkohaat pangki a teyɗukiɗ Heɗi, ne a mina tiindiɗ baahiɗ.
\p
\v 18 \sig Mi Pool, ñam fiisoot kañɗohii na yaahiŋ ngo. Liiɓaat nga so ŋ niki ŋ nik ŋ kaso. \sig*
\p \sig Baahohiŋ Kooh nikaat na ɗu !\sig*