\id 3JN - Saafi-Saafi
\ide UTF-8
\h 3 Saaŋ
\toc3 3Sŋ
\toc2 3 Saaŋ
\toc1 Fiisi Saaŋ kaahayɗoh kaɓɗoh
\mt Fiisi Saaŋ kaahayɗoh kaɓɗoh
\is Rangsohaani
\ip Saaŋ ɓaahee ŋ \w \+tl Apootar\+tl*\w* ciŋ Yeesu. Saaŋ na Saak na Piyeer ɓeɗ \tl Apootar\tl* ci kaahay ci tiik ciŋ ɓa uup woyu ŋ teereeci nikiis ci na naandsuke kipes kiŋ Yeesu. Marka Saaŋ ŋ Limiŋ tiik ci.
\ip Ŋ finho kakaan ki na hulti na rapɗuukiŋ Yeesu, a taambkohiɗ Maryaama, yaayiŋ Yeesu.\x + \xt Saaŋ 19:25-27\xt*\x* Ŋ mirndaani a yi adgohee ɓi Jangu, ŋ ɗiska woysee Asi ŋ jamanoonaam (ɓak ngaŋ ɗiski Turki nik woti-woti). Ŋ jamanoonaam, weɗ a fiisoh "Yegɗohiŋ Muci Saaŋ fiis", na "Fiisi Saaŋ kaahayɗoh kaɓɗoh" wii, na fiis kanak wiiriis ci a kaɓɗoh, na teerndiŋ "Teeɓ ki", wi na woye ŋ in ci na haye ŋ fikiiri.\x + \xt Teeɓ ki 1:1\xt*\x*
\ip Saaŋ fiis kaɓɗohii ƴaar na woyse Gayus. A fiiseen kaɓɗoh wuu Janguuna Gayus nikohe, waaye Joteref, ƴaar ɓaah ɓi adgoh Janguuna, teyɗukeeɗi wa, te a dalɗeeɗi sah ɓi hayee wa wike, a degga ɓooɓaŋ Janguuna inaa miskiɗ. Wa miniɗ nik ne fiisi kaɓɗohsee weem wa 1 Saaŋ wala 2 Saaŋ, waaye ɓo' inahɗi.
\ip Raakeen ƴaar teeku Demetiriyus, a ɓaah ŋ ɓi na pangke na Saaŋ. A joyeen taamb ŋ ɓak caam. Saaŋ eɗta ɗe kaɓɗohii, kaɓɗohiŋ ɗe kaahayɗoh, te a woosa Gayus ne a dalɗaat Demetiriyus baahiɗ. A nammba ɗe woyndoh in ca raak ŋ Janguuna.
\iot Fiisi Saaŋ kaahayɗoh kaɓɗoh kaɗtiɗoh an :
\io1 - Kañɗoh \ior 1:1-4\ior*
\io1 - Ñaahoh wuu Gayus na mini a min daliɗ ɓo' \ior 1:5-8\ior*
\io1 - Wortuk Joteref \ior 1:9-11\ior*
\io1 - Dengkoh ŋ ini kaɗ ŋ Demetiriyus \ior 1:12\ior*
\io1 - Askohi \ior 1:13-15\ior*
\ie
\c 1
\s Kañɗohi
\p
\v 1 Mi yii kañiɗ ɗa, Gayus, mi yi yakkiŋ Janguuni, mi yii fiis kaytii wuu fu nawleeso, fu yi ŋ keeñkoh keeh-keeh. 
\v 2 Nawleeso, mi na kiime Kooh ne fu raak jam ŋ in ci jen. Findi kipes kiŋ ɗa na Kooh wiroh, Kooh onaat ɗa wir faan mand ɗaa. 
\v 3 Ɓaah ciŋ ɓoo kosiɗ ci hayya ndii ɗah, ɓa na seede'e seede keeh ki nik nga ɗa na findi fu na pesohe ŋ keeh ki ; ineem, ŋ neɓuuɗ nga lool. 
\v 4 Ŋ kerahha ne komaakciŋ ngo ŋ \w Kiristaani|lemma="Kiristaa"\w* na pese ŋ keeh ki ɗah, sumi mi na sume ŋ ineem, ŋ minɗi raak sum ki uupa.
\s Findi Gayus na tumohe na ɓaaɓoh ci
\p
\v 5 Nawleeso, in ci fu na tumɗe ɓaah ciŋ ɓoo kosiɗ ci na ɓaaɓe, po ɓi fu inahɗi sah, fu na tumee wa tum wooriɗ. 
\v 6 Ɓa seede'iɗ waaɗi fu waaɗ ɓooɓi, ŋ fiki ɓi Janguunii. Te wa heen baahe lool ne fu ɓaatɗohee ɓaah ciŋ ɓoo ɓeem ŋ ɓaaɓiŋ ɓa findi \w ɓo'-Kooh|lemma="ɓo'-Kooh ci"\w* na tumohe. 
\v 7 Laam e tiikiŋ Kiristaani tah ɓa kuruk te ɓa heelkuu ali in ŋ ɓooɓi kosaaɗiici. 
\v 8 Kon ɓoo, kosiɗ ci, e ɓoo joy ɓaatɗoh ɓaaɓoh ceem ne ɓoo hun na ɓa, ɓoo pangkiɗ keeh ki.
\s Joteref na Demetiriyus
\p
\v 9 Ŋ fiisiɗ kayit, ŋ kaɓɗohhaa ɓi Janguuniŋ ɗu, waaye Joteref taambkohɗi woo kiŋ ɓoo te a waaɗ ne a yi adgohan ɓooɓi jen. 
\v 10 Weɗ tah ŋ hay ɗah, ŋ hey woye in ci a na tume, in ci moɗaaɗiici naandohaaci a na woyɗe ɓoo. Ineem doyɗi ɗe, a yi ŋ haf ce, a na taambɗukeeɗi ɓaah ciŋ ɓoo kosiɗ ci na haye ndeem te ɓaat nga ɓi na waaɗe wa tum a yi na hondohee ɓa tuma, ɓa sanga ɗah a aañ ɓa ŋ Janguuni.
\p
\v 11 Nawleeso, kina altiɗkoh in baahaaɗi, waaye altiɗkoha in baahiɗ ; ɓoyi na tume in baahiɗ, a ɓaah ŋ Kooh ; ɓoyi na tume in baahaaɗi, a moosɗi inah findi Kooh mand. 
\v 12 Demetiriyus nak, ɓooɓi jen na woye in baahiɗ nga ɗe te ɓo' miniɗ hot ne wa keeh. Ɓoo namiɗ ɗe seede'iɗ te fu inhiɗ ne in nu ɓoo seede ɗah, wa keeh.
\s Askohi
\p
\v 13 Raakiɗ in laayiɗ ci ŋ joy ɗa woo, waaye ŋ waaɗɗi ca fiis ŋ kayit findi an. 
\v 14 Ŋ oolkiɗ ne ŋ hey ɗa hote maañaaɗi te ɓoo hey woye ɓo' na ɓo'. 
\v 15 Jam nikaat na ɗa ! Nawleeci ɓa ɗii kañiɗ ɗa ! Kañɗa nawleeciŋ ɓoo, yaa nu nga ŋ tiikiŋ ɗe.