\id 2TI - Saafi-Saafi
\ide UTF-8
\h 2 Timoote
\toc3 2Ti
\toc2 2 Timoote
\toc1 Fiisi Pool kanakɗoh kaɓɗoh Timoote
\mt Fiisi Pool kanakɗoh kaɓɗoh Timoote
\is Rangsohaani
\ip Pool ɓaahee ŋ Israayel ci, ŋ cuuɓiŋ Benyaamin.\x + \xt Ɓi Rom 11:1; Ɓi Filippi 3:5\xt*\x* A nikee \w \+tl Farisen\+tl*\w*.\x + \xt Tum ci 23:6; Ɓi Filippi 3:5\xt*\x* Ŋ finho \w Paantakot\w*, wi Janguuni camb ɓaatuk, a ɓaahee ŋ ɓi tolfiɗee kosiɗ ci.\x + \xt Tum ci 7:58–8:3\xt*\x* Waaye wa raakka mbeh, a cohha na Yeesu, a kossa\x + \xt Tum ci 9:1-30\xt*\x* po a nikka \w \+tl Apootar\+tl*\w* sah. Teerndiŋ "Tum ciŋ \tl Apootar\tl* ci" teeɓohiɗ pangkiŋ ɗe wi a nik \tl Apootar\tl* ini kooɗoh ŋ saar 13.
\ip Wa miniɗ nik ne Pool hotiɗ Timoote ŋ ɗooƴ ɓaaɓaŋ ɗe yakka koc, wa a nik ŋ Listar na Derbe\x + \xt Tum ci 14:6-7\xt*\x*. Tiikiŋ Timoote koc woyu ŋ ɗooƴ ɓaaɓaŋ Pool yakka kanakɗoh.\x + \xt Tum ci 16:1-5\xt*\x* Weem raak ɗe kosiɗ te a nikee ndaam.
\ip Ini kooɗoh ndeem, Timoote ɓaahee ŋ ɓi hunee na Pool. Timoote meeɗeen ɓaaɓ in laayiɗ findi wi a wikee fiis ci Pool kaɓɗohee wala cum ɗah a nikiɗ Pool ŋ ɗisik.\x + \xt Tum ci 16:1-5; 17:4-16; 18:5; 19:22; 20:4\xt*\x* Pool seede'iɗ Timoote seede moɗiɗ ŋ fiisi a kaɓɗoh ɓi Filippi.\x + \xt Ɓi Filippi 2:19-22\xt*\x* Marka tiikiŋ Timoote ŋ Limiŋ tiik ci.
\ip "Fiisi Pool koc kaɓɗoh Timoote" wa fiisu ŋ finho "Tum ciŋ \tl Apootar\tl* ci", mbaa raakiɗ in laayiɗ ci ɓo' inahɗi nga, waaye ɓoo inhiɗ ne wa raak Pool nikisɗi ŋ kaso te Timoote nikee ŋ Efes.\x + \xt 1 Timoote 1:3; 3:14\xt*\x*
\ip Wi Pool na fiise "Fiisi a kanakɗoh kaɓɗoh Timoote" wii, wa tel ɗe doknissuuɗ ŋ kasoonaŋ \w Rom\w*, raak wa wooriɗ ne a hey atte'se ne a apu.\x + \xt 2 Timoote 2:9; 4:6-8\xt*\x*
\ip Ŋ kaɓɗohi a fiis Timoote wii, a ñaahiɗ ɗe ŋ in laayiɗ te a teeɓpa ɗe in ci a joy wortuk, a woosa ɗe ne a hayaat gaaw ne a hot ɗe bala a kaanan ɗah.
\iot Fiisi Pool kanakɗoh kaɓɗoh Timoote kaɗtiɗoh an :
\io1 - Pool kañɗiɗ Timoote, te a corkiɗta Kooh ŋ ini kaɗ nga ɗe \ior 1:1-5\ior*
\io1 - Pool ɓaatiɗ Timoote fit \ior 1:3-11\ior*
\io1 - Pool ñaahiɗ Timoote ne a taambiɗ \w Kiristaani|lemma="Kiristaa"\w* \ior 2:1-14\ior*
\io1 - Pool ñaahiɗ Timoote ne a tum panguk baahiɗ \ior 1:18–3:15\ior*
\io1 - Findi ɓooɓi mandan ŋ jamanooci mirndohan \ior 3:1-9\ior*
\io1 - Pool ñaahiɗ Timoote ne a taamb ŋ kot ciŋ ɗe \ior 3:10-17\ior*
\io1 - Pool ñaahiɗ Timoote ne a taalndiɗ a yegɗohee \w Yegɗohiŋ Muci\w*. \ior 4:1-8\ior*
\io1 - Nakoh ci mirndoh na Askohi \ior 4:9-22\ior*
\c 1
\s Kañɗohi
\p
\v 1-2 Mi yii kañiɗ ɗa, Timoote, mi yi Pool, \tl \+w Apootariŋ|lemma="apootar"\+w*\tl* \w Kiristaani|lemma="Kiristaa"\w* Yeesu. Ŋ tumuuɗ \tl Apootar\tl* ŋ waaɗ-waaɗiŋ Kooh ne ŋ yegɗoh gapohiŋ kipes ki nik ŋ Kiristaani Yeesu. Mi yii fiis kaytii ne ŋ woo na ɗa Timoote, kuɓkiŋ ngo ŋ keeñkoh. Kooh yi Baabi baahohaat ɗa, a yirmaat ɗa, a on ɗa jam ; Kiristaani Yeesu Heɗ ɓoo baahohaat ɗa, a yirmaat ɗa, a on ɗa jam.
\s Pool corkiɗiɗ Kooh sagu Timoote
\p
\v 3 Kooh, yi mi na ñaamke na hel daliɗ findi ɓooɓi rim mbo na caacuuciŋ ngo, mi na genee ɗe corkiɗ nga ɗa ; ŋ ɓekee tiikiŋ ɗa ŋ kiim ciŋ ngo wek na noh. 
\v 4 Mi yii naandsuk muhun caŋ ɗa, ŋ mariɗ ɗa hot lool, ne ŋ riif na sum. 
\v 5 Mi yii naandsuk kosi keeh-keehi nik nga ɗa. Koseem kockoh ŋ caac fu ɓitiɓ Loyiis na yaay ɗu Onis, te wa wooriɗ to ne weɗi nammba nik nga ɗa.
\s Pool ñaahiɗ Timoote
\p
\v 6 Ineem weɗ tah mi yii naandis ɗa ne fu humbis ini Kooh tum nga ɗa findi jaal yongkaah, ini fu rahas wa ŋ deg ɗa yaah ciŋ ngo. 
\v 7 Kooh eɗɗi ɓoo fuuɗsi tuman ɓoo neek, waaye a eɗ ɓoo \w Fuuɗsi|lemma="Fuuɗsi Hoolohngaani, Fuuɗsiŋ Kooh"\w* riifɗan ɓoo na hatil na waaɗoh na amb haf ɓoo. 
\v 8 Kon nak kina supuk seede ŋ ini kaɗ ŋ Heɗ ɓoo, te kinaa so supuk mi yi ambu saguuce. Waaye, ngaŋ hatiliŋ Kooh, ɓaaha na so miskiɗi sagu \w Yegɗohiŋ Muci\w*.
\p
\v 9 Wa cariɗa keeh-keeh, laam Kooh mucɗiɗ ɓoo te a ɓeeɗkiɗ ɓoo ne ɓoo nik ɓo' hooliɗ wuu ce. A tumɗi ineem sagu in ci ɓoo tum, waaye a tuma ŋ ini neɓ ɗe ne a baahoh ɓoo ; a baahohiɗ ɓoo ŋ niki ɓoo nik ŋ Kiristaani Yeesu, bala Adina nikan. 
\v 10 Baahoheem hotkiɗ kotii, wi Kiristaani Yeesu, Mucɗohi hay. A yi fol hatiliŋ kakaan, a taamboh ŋ Yegɗohiŋ Muci a eɗ ɓoo, a teeɓohha kipes ki kakaan miniɗɗi in.
\p
\v 11 Ne ŋ teeɓoh muceem, weɗ tah po Kooh tummba so yegɗohoh na \tl Apootar\tl* na jangɗohoh. 
\v 12 Ineem weɗ tah po ŋ raakee miskiɗ woti. Waaye ŋ supukɗi nga, laam ŋ inhiɗ Yi ŋ kos te wa wooriɗ to ne a raakiɗ hatili a niiɗohan ini a dengkoh ho po ŋ mbehaŋ atteena. 
\v 13 Marka ŋ woo ci keeh ci fu kerhoh nga so. Fu tiindɗoh ca kosi na waaɗohiŋ ɓi nik ŋ Kiristaani Yeesu. 
\v 14 Taambkoha in ci baahiɗ ci Kooh dengkoh ɗa, taamboh ŋ \w Fuuɗsi Hoolohngaani|lemma="Fuuɗsi Hoolohngaani, Fuuɗsiŋ Kooh"\w* nik nga ɓoo.
\p
\v 15 Fu inhiɗ ne ɓiŋ kur caŋ Asi jen faɗiɗ to, te Fijel na Hermojen ɓaah ŋ ɓooɓeem. 
\v 16 Onesifoor nak, Heɗi yirmaat ɓi kahan ce, a meeɗ to meeɗ ɓaatɗoh, te a supkeeɗi ceen ciŋ ngo. 
\v 17 Waaye kay, wa a ree \w Rom\w* rek, a waakeeɗa so ɗisik nu ɗisik po a hotta so. 
\v 18 A miskaat Heɗi ŋ mbehaŋ atteena ! A fu uup inah pangki a panguk ŋ Efes jen.
\c 2
\s Soldaariŋ Kiristaani
\p
\v 1 Ini kaɗ nga ɗa kuɓkiŋ ngo Timoote, ɓaatka hatil ŋ baahohi Kooh baahoh ɗa, ŋ niki fu nik ŋ \w Kiristaani|lemma="Kiristaa"\w* Yeesu. 
\v 2 Ini fu kerah ho jangɗoheeɗa ŋ fiki seede laayiɗ, dengkohaa ɓi ɓo' oolkuuɗ, ɓi namana min jangiɗ ɓi ɓo' wiiriis. 
\v 3 Teyɗuka ɓakiŋ ɗa ŋ miskiɗi findi soldaar baahiɗ ŋ soldaar ciŋ Kiristaani Yeesu.
\p
\v 4 Soldaar waaɗ ne yi adgoh ɗe neɓu nga ɗe ɗah, a taambkohanɗi in ciŋ kipes ki. 
\v 5 Te leberoh waaɗ saah ɗah, a hey taambe in ci leber nakoh. 
\v 6 Panguk guuroh miskiɗ lool, tahha po a yi joy koc rahas ɓakiŋ ɗe ŋ ruundiɗ ci. 
\v 7 Liiɓa baahiɗ ŋ ini ŋ woo ɗa, Heɗi hey ɗa one fu min inah in ci ŋ woo ceem jen.
\s Naandsuka Yeesu Kiristaa yi hulit
\p
\v 8 Liiɓa ŋ Yeesu Kiristaa, findi ŋ yegɗohee ɗu wa wi ŋ woyee ɗu \w Yegɗohiŋ Muci\w*. A puloh ŋ cuuɓiŋ Dawuuda, a kaaniɗ, a hultiɗuusa. 
\v 9 Yegɗoheem weɗ tah ho raak miskiɗ po ŋ ceenu haa tumoh moɗaaɗi. Waaye woo kiŋ Kooh ceenuuɗi. 
\v 10 Weɗ tah ho muñee miskiɗ ci jen sagu ɓooɓi Kooh kooɗ ne ɓa min rahas muci ŋ niki ɓa nik ŋ Kiristaani Yeesu ; ɓa nam yakɗu po faw.
\p
\v 11 Woo kii wooriɗ :
\b
\q Ɓoo kaan na ɗe ɗah,
\q ɓoo hey pese na ɗe.
\q
\v 12 Ɓoo muñ ndengɗukee ɗah,
\q ɓoo hey nguurke na ɗe.
\q Ɓoo taasuk ɗe ɗah,
\q a hey ɓoo name taasuk.
\q
\v 13 Ɓoo faɗ ini ɓoo woo ɗah,
\q a risan tum ini a woo,
\q laam a minɗi taas haf ce.
\b
\p
\v 14 In ceem ceɗ fu joy naandsoh. Ŋ fiki Kooh, woya ɓi na taastiɗohe ŋ ini kaɗ ŋ toksiŋ woo ci, ɓa faɗ ineem. Wa raakɗi njiriñ, ɗal yahroh ɓi na sikɗuke.
\s Pangkohi neɓ Kooh
\p
\v 15 Ndengɗuka po fu neɓ Kooh findi pangkoh baahiɗ, yi na supkeeɗi ŋ ini a na haɓɗe, yi na jangɗohe hooliɗ woo kiŋ keeh ki.
\p
\v 16 Kina ɓaah ŋ woo mbalay, ci hunɗi na kos. Ɓi na tume ineem uupan uup us Kooh. 
\v 17 Woo ciŋ ɓa mandan na puusi minɗi faɗ wi na ɓaatke ɓaatuk kaɗe. Himene na Fileet ɓaah ŋ ɓooɓeem. 
\v 18 Ɓa usiɗ keeh ki ŋ ini ɓa na woye ne kosiɗ ci hultiɗ po ƴutiɗ ; ŋ ineem ɓa ɗii yahroh kosiŋ ɓum.
\p
\v 19 Waaye ɓooɓi Kooh tufkiɗ, kosiŋ ɓa ndengiɗ tir findi atoh ci raan taɓah. Woo kii fiisuusa nga ca : « Heɗi inhiɗ ɓi a raak.\x + \xo 2:19 \xo*\xt Kind ci 16:5\xt*\x* » Na woo kii : « Ɓo' nu woo ne a ɓaah ŋ Heɗi ɗah, a wortukaat in nu nik in baahaaɗi ɗah ! »
\p
\v 20 Ŋ ɗooƴ kahan yakiɗ, e pangkoha haɓɗohuuɗ urus na haalis dong nik nga haa, wa namiɗ raak pangkoha haɓɗohuuɗ ndooɗ na ɗok. Cum njirñiɗkoha ŋ ceeke, cum njirñiɗkoha ŋ in ci ƴin ƴin ci. 
\v 21 Ɓo' nu hooliɗ haf ce ŋ in ci baahaaɗiici ɗah, a mandan na pangkohaani hoolɗu wuu Kooh, wi eɗu cir. A hey raakɗe heɗ ce njiriñ, te a hey mine panguk panguk baahiɗ nu nik.
\p
\v 22 Nupa waaɗ-waaɗ ci baahaaɗiici kikomaaki na waaɗɗukohee ɗa. Ndengɗuka po fu nik ɓo' yurhiɗ, fu min oolku, fu waaɗ ɓooɓi, fu raak jam na ɓa. Pesoha ɗaa na ɓi na kiime Heɗi na keeñ hooliɗ. 
\v 23 Sanga taastiɗoh ci naandohaaci, dofohaaci, fu inhiɗ ne ca na ɓeke lahtoh. 
\v 24 Te \w ñaamiŋ|lemma="ñaam"\w* Heɗi joyɗi lahtoh. A joy joy baah ŋ ɓooɓi jen, a min jangɗoh, a min muñɗoh ; 
\v 25 a kuƴsee ɓi na taasee ɗe na yeeɓuk, ya ɓa inah andi Kooh onanɗi ɓa ɓa ɓoƴsoh pesohaaɗ po ɓa inah keeh ki. 
\v 26 Ŋ ineem ɓa hey dokke ŋ sagoociŋ ɓa, ɓa fus ŋ fiir ciŋ Seytaani yi ambee ɓa ñaam te a tumɗukoheeɗa ɓa waaɗ-waaɗiŋ ɗe.
\c 3
\s Findi ɓooɓi mandan ŋ jamanooci mirndohan
\p
\v 1 Inha inii baahiɗ, Timoote : Ŋ mbeh ci mirndohan, jamano hey miske. 
\v 2 Ɓooɓi waaɗan haf ciŋ ɓa dong, ɓa waaɗ kopor, ɓa waaɗ teeɓohuk, ɓa waaɗ hotsiɗuk ; ɓa nikan ɗaloh Kooh, ɓa kerhiɗanɗi ɓi rim ɓa, ɓa inhanɗi corkiɗoh te ɓa eɗissanɗi cir in ciŋ Kooh. 
\v 3 Ɓa hey suusse keeñ, ɓa waaɗanɗi jam, ɓa nikan yahoh tiik, ɓa minanɗi amb haf ɓa, ɓa nikan añaandiɗ te ɓa sang in baahiɗ. 
\v 4 Ɓa nikan woroh, ɓa nik ɓo' yeeɓkaaɗi'iɗ, ɓa yaksiɗuk lool, e waaɗi ɓa waaɗ kiñin ciŋ ɓa ngisohɗan ɓa waaɗ Kooh.
\p
\v 5 Ɓa nikan ɓo' kosiɗ ŋ has ciŋ ɓooɓi, waaye raakan ɓa faɗiɗ hatili nik ŋ kosi. Ɓooɓeem, usaa ɓa !
\p
\v 6 Raakiɗ nga ɓa ɓi na kaɗe ŋ kahan ci, ɓa ñaañohee ɓitiɓ ci yooɓ ñaañohu, ɓi fu inah ne ɓa ɓitiɗ dis na bakaaɗ, ɓa minɗi saɓsukoh na waak in neɓiɗ nu nik 
\v 7 te ɓa na gene jang waaye ɓa moosanɗi min inhisoh keeh ki.
\p
\v 8 Ñaañohoh ceem mand na Janes na Jamberes\f + \fr 3:8 \fr*\fq Janes na Jamberes \fq*\ft : wa nikee mbaah ŋ Yawuut ci, ɓa naandsukeesa ini naandsuku ŋ teerndiŋ \ft*\xt Pula 7:11-12,22; 8:7,18,19\xt* ɗah, ɓa na ɓeeɗkohe luhusoh ci nik ŋ naandsukeem Janes na Jamberes. \f* ɓi hiñohee \w Musaa\w*. Ɓooɓeem na hiñohe na keeh ki, liiɓohaaciŋ ɓa yahkiɗ te kosiŋ ɓa kos haa. 
\v 9 Waaye ɓa kaɗanɗi usiɗ, naand kiŋ ɓa hey hotke ŋ fiki ɓooɓi jen findi wa raakohee ŋ Janes na Jamberes.
\s Pool dengiɗ Timoote ne yeem ris ŋ kosi a kos
\p
\v 10 Waaye fu nak, fu kerhiɗ jangɗohiŋ ngo baahiɗ, fu markiɗ baahiɗ findi maa pesohe, na ini tah ho kuruk, na kosiŋ ngo, na findi maa muñohe, na waaɗi ŋ waaɗ ɓooɓi, na maañi ŋ maañ ndengɗuk. 
\v 11 Fu hotiɗ tolfiɗ ci ŋ tolfiɗu na miskiɗ ci ŋ muñ ŋ Añcos-Pisidi na Ikoñum na Listar. Raakɗi tolfiɗi ŋ tolfiɗuuɗi. Te Heɗi pulɗohiɗ to nga ca jen.
\p
\v 12 Te sah ɓooɓi nik jen ŋ \w Kiristaani|lemma="Kiristaa"\w* Yeesu, ɓo' nu waaɗ pes pes yurhiɗ na Kooh nga ɗah, a hey tolfiɗasse. 
\v 13 Waaye ɓo' ci baahaaɗiici, leyoh ci, uupan uup diig ŋ baahaaɗi, ɓa muuƴɗe ɓinooɓi te ɓa namee muuƴɗu.
\s Njirñiŋ Fiis ci Hooliɗ ci
\p
\v 14 Ini kaɗ nga ɗa, amba baahiɗ ini fu jang te fu teyɗukka ne wa in wooriɗ. Fu inhiɗ ɓi jangiɗ ɗa wa. 
\v 15 Ina fu nikoh komaaki po wi, fu inhiɗ Fiis ci Hooliɗ ci ; ca miniɗ ɗa on ki'inhi na ɓaye ɗa ŋ muc, taamboh ŋ kos Kiristaani Yeesu.
\p
\v 16 Fiis ci Hooliɗ ci jen a Kooh ɓek ca ŋ ɓi fiis ca. Ca raakiɗ njiriñ ŋ jangɗohi ca na jangɗohe keeh ki, ca teeɓohee ini nikɗi keeh, ca kuƴsee ɓoyi tumɗi baahiɗ, ca jangɗee ɓooɓi kipes yurhiɗ, 
\v 17 ne ɓoyiŋ Kooh min mit te a tufuk ne a haɓiɗ panguk baahiɗ nu nik.
\c 4
\s Pool nakohiɗ ne Woo ki yegɗohu
\p
\v 1 Ŋ fiki Kooh na fiki \w Kiristaani|lemma="Kiristaa"\w* Yeesu, yi atte'an pesiɗ ci na kaaniɗ ci te a yii hayis findi buur, mi yii nak ɗa inii keeh-keeh : 
\v 2 Yegɗoha woo kiŋ Kooh te kinaa faɗ. Wa yooɓ, wa yooɓaaɗi, yegɗohaa. Dokna muuƴiɗ ci ŋ keeh ki, woytoha ɓi nikɗi ŋ waas, ñaaha ɓooɓi, fu jangɗee ɓa te wa hun na muñ ŋ in ci jen.
\p
\v 3 Laam jamano hey haye wi fu inah ne ɓooɓi waaɗissanɗi kerah jangɗohi wiriɗi. Waaye ŋ ini neɓ ɓa, ɓa hey nangɗohe ɓi jangɗohoh laayiɗ ɓi na hee ɓa woye ini ɓa waaɗ kerah. 
\v 4 Ɓa hey ɗikɗuke keeh ki, ɓa sikɗukee andiin. 
\v 5 Waaye fu, amba haf fu ŋ in nu wa min nik ɗah, teyɗuka miskiɗ ci, yegɗoha Muci, fu mitiɗ pangki Kooh nak ɗa.
\p
\v 6 Ini kaɗ nga so, mi yii Pool, ŋ seeƴkohuuɗ po ƴutiɗ ; te jamanooni ŋ joy kurkoh nga reyiɗ. 
\v 7 Ŋ leberiɗ leberi baahiɗi, ŋ nupiɗ po ɗiska nupaahi top, ŋ ris na kosiŋ ngo. 
\v 8 Ɗiski wa nik, aafiŋ ndamiŋ ngo sagu yurhi ŋ yurah wa ɗii sek ko. Heɗi, atte'ohi yurhiɗi, hey yo wa eɗe ŋ mbehaŋ atteena, te a eɗan ndo mi dong haa, waaye na ɓi waaɗ ɗe jen te ɓa sekee hayiŋ ɗe.
\s In ci Pool nak Timoote
\p
\v 9 Ndengɗuka po fu hay yo raake ndii findi wa uup gaawoh. 
\v 10 Demaas faɗiɗ to sagu waaɗ Adina, a cootiɗ Tessalonik ; Keresanse cootiɗ Galaat, Tit cootta Dalmati. 
\v 11 Luk dong a yi tas na so. Ɓaya Maarko, fu hay na ɗe, a raakɗiɗ to njiriñ lool ŋ pangkiŋ ngo. 
\v 12 Tisikos ŋ woos ɗe Efes. 
\v 13 Fu hayee ɗah, kom mbo paltooni ŋ faɗ ŋ Torowaas, ŋ kahan Karpos, na fiis ci ; ci fiisu ŋ und, caɗ ŋ uup etoh. 
\v 14 Aleksaandar tiɓohi tumiɗ to miskiɗ laayiɗ. Heɗi hey ɗe wirnde in hend na in ci a tum. 
\v 15 Fu yit, wortukaa ɗe baahiɗ. A hiñohiɗ laayiɗ ini ɓoo na jangɗohe.
\p
\v 16 Ali ɓo' ambohɗi so ŋ ngelaŋ ngo koc, ɓa jen ɓeɗ faɗ to. Kooh kinaat ɓa amboh ineem ! 
\v 17 A Heɗi amboh ho, a eɗta so hatil po ŋ minnda yegɗoh woo kiŋ ɗe jen, cuuɓ ci kerahhaa. Te Heɗi mucɗiɗ to ŋ nguɓ gaynde. 
\v 18 Heɗi hey yo pulɗohe ŋ in moɗaaɗi nu nik te a hey yo niiɗe po a ɓek ko ŋ Nguuriŋ ɗe ŋ ɗafka. A yi yakɗaah po faw ! Amiin !
\s Askohi
\p
\v 19 Kañɗiɗ to Piriska na Akilaas na ɓi kahan Onesifoor. 
\v 20 Erasta tas ŋ Korenta. Te ŋ faɗiɗ Torofiim ŋ Mileet, a kosaayee kosaay. 
\v 21 Ndengɗuka fu hay bala soosi hayan ɗah. Obulos na Pudensa na Linus na Koloja na ɓaah ciŋ ɓoo kosiɗ ci jen ɓa ɗii kañiɗ ɗa. 
\v 22 Heɗi niiɗaat ɗa ! A baahoh ɗu jen !