\id 2TH - Saafi-Saafi
\ide UTF-8
\h 2 Tessalonik
\toc3 2Te
\toc2 2 Tessalonik
\toc1 Fiisi Pool kanakɗoh kaɓɗoh ɓi Tessalonik
\mt Fiisi Pool kanakɗoh kaɓɗoh ɓi Tessalonik
\is Rangsohaani
\ip Pool ɓaahee ŋ Israayel ci, ŋ cuuɓiŋ Benyaamin.\x + \xt Ɓi Rom 11:1; Ɓi Filippi 3:5\xt*\x* A nikee \w \+tl Farisen\+tl*\w*.\x + \xt Tum ci 23:6; Ɓi Filippi 3:5\xt*\x* Ŋ finho \w Paantakot\w*, wi Janguuni camb ɓaatuk, a ɓaahee ŋ ɓi tolfiɗee kosiɗ ci.\x + \xt Tum ci 7:58–8:3\xt*\x* Waaye wa raakka mbeh, a cohha na Yeesu, a kossa\x + \xt Tum ci 9:1-30\xt*\x* po a nikka \w \+tl Apootar\+tl*\w* sah. Teerndiŋ "Tum ciŋ \tl Apootar\tl* ci" teeɓohiɗ pangkiŋ ɗe wi a nik \tl Apootar\tl* ini kooɗoh ŋ saar 13.
\ip Kaɗaŋ Pool koc ŋ kur kaŋ Tessalonik,\x + \xt Tum ci 17:1-9\xt*\x* wa nikee ŋ ɗooƴ ɓaaɓaŋ ɗe yakka kanakɗoh.\x + \xt Tum ci 15:40–18:22\xt*\x* A yegɗohha \w Yegɗohiŋ Muci\w* nga, te wa raakka ɓi kos, waaye a arra aañu ne a pul kur ka. Wa jaahiɗta ɗe lool, findi ɓooɓa han kos na hee moocohe. Weɗ tah, wa a nik ŋ Ateen,\x + \xt Tum ci 17:15–18:1\xt*\x* a woossa Timoote ne a kaɗ marka findi ɓa nikoh.\x + \xt 1 Tessalonik 3:1-2\xt*\x* Ƴutta, a yi Pool, a taalndiɗta Korenta. Timoote hunnda na Silweng a kaɗta marka ɓi Tessalonik, te a wiirukka na yegɗoh neɓiɗ.\x + \xt 1 Tessalonik 3:6\xt*\x* Ɓa raakka Pool ŋ Korenta.\x + \xt Tum ci 18:5\xt*\x* Weɗ Pool fiisoh ɓi Tessalonik kaɓɗohiŋ ɗe koc.
\ip Wa mand haa ne Timoote dokkiɗ Tessalonik na fiisi Pool koc kaɓɗoh, a nikka nga ƴissuut. Ƴutta a pulohha Tessalonik a wiirukka na yegɗoh neɓiɗ. Pool sumissa ŋ kosaŋ ɓi Tessalonik\x + \xt 2 Tessalonik 1:3-4\xt*\x* waaye a hotta ne wa baahiɗ ne a ñiiniɗ ɓi in.\x + \xt 2 Tessalonik 2:1-3\xt*\x* Teemb ndeem, a fiissa ɓa kaɓɗohi kanakɗoh wii.
\iot Fiisi Pool kanakɗoh kaɓɗoh ɓi Tessalonik kaɗtiɗoh an :
\io1 - Pool kañɗiɗ ɓi Tessalonik te a corkiɗiɗ Kooh nga ɓa \ior 1:1-12\ior*.
\io1 - Ñiinɗiŋ in ci kaɗ ngaŋ hayisiŋ Yeesu na hultiŋ kosiɗ ci kaan \ior 2:1-12\ior*
\io1 - Ndeng ngaŋ kosi \ior 2:13-17\ior*
\io1 - Pool nakiɗ ɓi Tessalonik kiimɗu Kooh \ior 3:1-5\ior*
\io1 - Njirñiŋ panguk \ior 3:6-15\ior*
\io1 - Askohi \ior 3:16-17\ior*
\c 1
\s Kañɗohi
\p
\v 1 Mi yii kañiɗ ɗu, ɗu ɓi Janguuniŋ Tessalonik. Mi, Pool, na Silweng na Timoote, ɓoo ɓii kañiɗ ɗu, ɗu ɓi nik ŋ Kooh Baabiŋ ɓoo, ɗu nikka ŋ Yeesu \w Kiristaa\w* Heɗi. 
\v 2 Kooh Baabi na Yeesu Kiristaa Heɗi baahohaat ɗu, on ɗu jam.
\s Pool corkiɗiɗ ɓi Tessalonik
\p
\v 3 Ɓaah ci, ɓoo joyiɗ gen corkiɗee Kooh ŋ ini kaɗ nga ɗu, te wa waas ne ɓoo tuma. Kosiŋ ɗu wii ɓaatuk keeh-keeh, te ɗu jen, yaa nu nga ɗah, waaɗi a waaɗ morom ce na uupe uup ɓaatuk. 
\v 4 Ineem weɗ tah ɓoo na woye ɓi Janguuciŋ Kooh ne ɓoo neɓuuɗ nga ɗu, sagu muñi ɗu na muñe na kosi ɗu raak ŋ ɗooƴ tolfiɗ ci na miskiɗ ciŋ ɗu jen.
\p
\v 5 Miskiɗ ceem na teeɓohe ne findi Kooh na atte'ohe, wa ɗaa ; ca na onee ɗu ne ɗu yeyyoo Nguuriŋ ɗe, Nguuri tah ɗu muñee miskiɗ. 
\v 6 Wa in yurhiɗ ŋ has ciŋ ɗe ne a deg miskiɗ ɓi na degee ɗu miskiɗ, 
\v 7 te a iɗsiɗ ɗu, na ɓoo jen, ŋ miskiɗ ceem.
\p Ineem raakan ŋ mbehi Yeesu Heɗi teeɓohkan, a pulohan Eel ci, a hun na malaakaaciŋ ɗe, ca raakiɗ hatil keeh-keeh. 
\v 8 A hey haye ŋ ɗooƴ jaal yongkaah, a mbugal ɓi inahɗi Kooh te ɓa sannga taambiɗ \w Yegɗohiŋ Muci\w* kaɗ ŋ Heɗ ɓoo Yeesu. 
\v 9 Mbugaliŋ ɓa nikan ne ɓa ɗumbu po faw, ɓa us Heɗi na yaki hatiliŋ ɗe yak. 
\v 10 A hey haye ŋ mbeheem ne hooliɗ ciŋ ɗe yakiɗ ɗe, te ɓi kos ɗe jen hey feyse ŋ yaki a yak. Te ɗu, ɗu hey ɓaahe nga, laam ɗu kosiɗ ini ɓoo seede ŋ fikiiɗu.
\p
\v 11 Ineem weɗ tah ɓoo na genee ɗu kiimiɗ Koohiŋ ɓoo, ne a on ɗu ɗu yeyyoo ɓeeɗki a ɓeeɗuk ɗu. Te na hatiliŋ ɗe, a on ɗu, ɗu mitiɗ in baahiɗ nu ɗu waaɗ tum ɗah, ɗu mitiɗ pangki ɗu na tume sagu kosi ɗu kos. 
\v 12 Ŋ ineem, ɗu hey teeɓohe findi tiikiŋ Heɗ ɓoo Yeesu yakoh, a nam ɗu yakiɗ ŋ niki ɗu nik nga ɗe ; wa nik baahohiŋ Yeesu Kiristaa, yi Koohiŋ ɓoo na Heɗ ɓoo\f + \fr 1:12 \fr*\ft "baahohiŋ Yeesu Kiristaa, yi Koohiŋ ɓoo na Heɗ ɓoo" ini gerek woo ndii, wa namiɗ min toksu "baahohiŋ Koohiŋ ɓoo na Heɗi Yeesu Kiristaa".\ft*\f*.
\c 2
\s Ini adgan hayiŋ Heɗi
\p
\v 1 Ini kaɗ ŋ hayiŋ Heɗ ɓoo Yeesu \w Kiristaa\w*, na nangɗukohiŋ ɓoo ŋ serooce, ɓoo na kiimee ɗu inii, ɓaah ci : 
\v 2 Ɓo' hay nga ɗu, woyee ɗu ne mbehiŋ Heɗi hayiɗ po cootiɗ ɗah, kinaat gaaw jaahiɗ, kinaat mbet fit ciŋ ɗu. Ali ɓa woo ne wa puloh ŋ \w Fuuɗsiŋ Kooh|lemma="Fuuɗsi Hoolohngaani, Fuuɗsiŋ Kooh"\w*, wala nga ɓoo, wala ŋ fiis ci ɓoo kaɓɗoh sah, 
\v 3 ɓa kinaat ɗu muuƴiɗ ŋ in nu wa min nikoh ɗah.
\p Mbeheem hayanɗi muk feeh laayiɗ faɗɗi kos Kooh ɗah\f + \fr 2:3 \fr*\ft "feeh laayiɗ faɗɗi kos Kooh ɗah" : ini gerek woo ndii, wa namiɗ min toksu "feeh ɓi Adina kaɗɗi po ɓa sang kikilifaakiŋ Kooh".\ft*\f* ; na feeh Ɓoyi Baahaaɗiini, hotukɗi ɗah. Ɓoyeem mirndohan ɗumbu. 
\v 4 A hey sange Kooh na in ci na woyse kooh jen na in nu na ñaamkasse ɗah, a hey dege haf ce ŋ ɗafuk in ceem jen, a hey kee po a yi ŋ haf ce, a ɓoof ŋ kahnaŋ Kooh, a woo ne a yi Kooh. 
\v 5 Naandsukaat ŋ woyeen ɗu ineem wa ŋ nik na ɗu !
\p
\v 6 Ɗu inhiɗ ini amb ɗe ɗiski wa nik po a minanɗi teeɓohuk feeh jamanooniŋ ɗe reeɗi ɗah. 
\v 7 Ɗiski wa nik, kibaahaaɗi wa ɗii panguk ŋ kumpa. Sekaat po yi amb Ɓoyi Baahaaɗiini coot rek ! 
\v 8 Teemb ndeem, Ɓoyi Baahaaɗiini hey hotke, ŋ mirndaani Yeesu Heɗi hey ɗe fuuɗse, a kaan. Siñaarɗiŋ hayiŋ ɗe dong weɗ na hee ɗumbe ɓoyeem.
\p
\v 9 Ɓoyi Baahaaɗiineem hayee ɗah, wa hunan na hatiliŋ Seytaani, wa hunan na keemaan nu nik, na firnde na in feyohiɗ ne a ñaañoh ɓooɓi. 
\v 10 A hey haɓɗe in moɗaaɗi nu nik ne a ñaañoh ɓi nik ŋ kot muuƴ sagu teyɗukaaɗi waaɗ keeh ki joyee ɓa muciɗ. 
\v 11 Weɗ tah, Kooh woosoh ɓa ini muuƴɗan ɓa, ne ɓa kos lee, 
\v 12 ŋ ineem, ɓi kosɗi keeh ki jen te ɓa neɓuusa ŋ ini lahɗi waas, ɓa hey atte'se.
\s Ndeng ngaŋ kosi
\p
\v 13 Waaye, ɓaah ci, ɗu ɓii Heɗi keeñkoh, ɓoo joyiɗ gen corkiɗ Kooh ŋ ini kaɗ nga ɗu. Ɓoo joyiɗ ɗe corkiɗ ŋ kooɗi a kooɗ ɗu findi nguɗiŋ tohri koc ne ɗu mucɗu taamboh ŋ hoolɗi \w Fuuɗsi Hoolohngaani|lemma="Fuuɗsi Hoolohngaani, Fuuɗsiŋ Kooh"\w* hooliɗ ɗu wuu Kooh na kosi ɗu kos keeh ki. 
\v 14 A waaɗee ne ɗu rahas ineem, weɗ tah a ɓeeɗukka ɗu taamboh ŋ \w Yegɗohiŋ Muci\w* ɓoo woyee ɗu, ne ɗu min ɓaah ŋ yaki Heɗ ɓoo Yeesu Kiristaa yak. 
\v 15 Kon, ɓaah ci, ndengaat, te ɗu amb baahiɗ in ci ɗu jangɗu, te ɗu rahassa ca, wa nik ci ɓoo woo wala ci ɓoo fiis, kaɓɗohha ca.
\p
\v 16 Heɗ ɓoo Yeesu Kiristaa ŋ haf ce na Kooh Baabiŋ ɓoo, yi waaɗ ɓoo po a baahohha ɓoo ñaahi a na ñaahe ɓoo ne ɓoo ndengɗuk te wa gen gen, na oolki baahiɗi ɓoo raak ŋ in ci na haye, 
\v 17 a ñaahaat ɗu, a ndengiɗ ɗu ŋ tumohaaɗ baahiɗ nu nik na woo baahiɗ nu nik !
\c 3
\s Kooh cariɗ oolku
\p
\v 1 Ɓaah ciŋ ngo, ini tas weɗ ne ɗu kiimiɗ ɓoo Kooh ne woo kiŋ Heɗi min pasarkoh baahiɗ te wa yakɗu ŋ ɗisik laayiɗ findi wa yakɗohu ŋ ɗiskiŋ ɗu. 
\v 2 Kiimaat Kooh ne ɓoo muc ŋ yaah ciŋ ɓo' ci añaandiɗ ci, baahaaɗiici ; e ɓooɓi jen raak kos haa. 
\v 3 Waaye Heɗi cariɗ oolku : A hey ɗu ndengɗe, a niiɗ ɗu ŋ baahaaɗiini. 
\v 4 Wa hooliɗ ɓoo ŋ niki ɓoo nik nga ɗe ne ɗu na tume ini ɓoo nak ɗu te ɗu heya gene tum.
\p
\v 5 Heɗi yurhiɗaat keeñ ciŋ ɗu ŋ waaɗi Kooh waaɗ ɗu na muñi nik ŋ \w Kiristaani|lemma="Kiristaa"\w*.
\s Njirñiŋ panguk
\p
\v 6 Ɓaah ci, ɓoo na nakee ɗu ŋ tiikiŋ Heɗi Yeesu Kiristaa, ne ɗu us ɓaah nu na pese pes palañsukohiɗ ɗah. Laam, ɓaah mand ɗaa pesohɗi jangɗohi a rahsoh nga ɓoo. 
\v 7 Ɗu inhiɗ ŋ haf ɗu findi ɗu joy ɓoo altiɗkohoh, laam wi ɓoo nik na ɗu ɓoo peseeɗi pes palañsukohiɗ. 
\v 8 Ɓoo ñamɗi ali kañam ɓo' wi ɓoo wirindɗi. Ɓoo pangkee panguk, ɓoo raakeeɗa miskiɗ wek na noh ne ɓoo gaƴkuu ŋ ali ɓo' nga ɗu. 
\v 9 Wa nikɗi haa ne waas oneeɗi ɓoo ne ɓoo meeksoh in, waaye e ɓoo waaɗee ɗu teeɓ findi ɗu altiɗkohan ɓoo. 
\v 10 Wa ɓoo nik na ɗu, ɓoo eɗee ɗu nakohii : Ɓo' sang panguk ɗah, a kinaat ñam !
\p
\v 11 Ɓoo kerhiɗ ne raakiɗ ɓi ɓo' nga ɗu ɓi na pese pes palañsukohiɗ, ɓa na pangkeeɗi, ɓa na gene aas ŋ in ci ɓa rahsohɗi. 
\v 12 Ɓoo ɓii woo ɓooɓeem te ɓoo ɓii ñaah ɓa ŋ tiikiŋ Heɗi Yeesu Kiristaa ne ɓa pangkaat moɗoɗ, ɓa ñam kañam ki ɓa raakoot.
\p
\v 13 Ɓaah ciŋ ɓoo, ini kaɗ nga ɗu nak, kinaat moos yaaɓoh ŋ tum baahiɗ. 
\v 14 Ɓo' sang taambiɗ ini ɓoo woo ŋ fiisi ɓoo na kaɓɗohee ɗu wii ɗah, inhisaat ɗe baahiɗ te kinaat ɗe ɓaahndohis ŋ ali in, ne a kaci. 
\v 15 Kinaat ɗe amb findi sangiɗiŋ ɗu, waaye woytohaat ɗe findi ɓaah ɗu.
\s Askohi
\p
\v 16 Heɗi ŋ haf ce, yi Heɗ jam, onaat ɗu jam ŋ in nu nik, na findi wa min mand ɗah. A nikaat na ɗu jen !
\p
\v 17 \sig Mi Pool, ñam fiisoot kañɗohii na yaahiŋ ngo. Weɗ mandargaaniŋ ngo ŋ fiis ci mi na kaɓɗohe jen ; fiisohaaɗiŋ ngo weɗi weem.\sig* 
\v 18 \sig Heɗ ɓoo Yeesu Kiristaa baahohaat ɗu jen !\sig*