\id 2PE - Saafi-Saafi
\ide UTF-8
\h 2 Piyeer
\toc3 2Pi
\toc2 2 Piyeer
\toc1 Fiisi Piyeer kanakɗoh kaɓɗoh
\mt Fiisi Piyeer kanakɗoh kaɓɗoh
\is Rangsohaani
\ip Piyeer ɓaahee ŋ \w \+tl Apootar\+tl*\w* ciŋ Yeesu. Saaŋ na Saak na Piyeer ɓeɗ \tl Apootar\tl* ci kaahay ci tiik ciŋ ɓa uup woyu ŋ teereeci nikiis ci na naandsuke kipes kiŋ Yeesu. Marka Piyeer ŋ Limiŋ tiik ci. Ŋ teerndiŋ "Tum ciŋ \tl Apootar\tl* ci", tiikiŋ Piyeer namiɗ pul nga waas laayiɗ.\x + \xt Tum ci 1–5; 8–12; 15\xt*\x*
\ip Wa Piyeer na fiise kaɓɗohii, a inheen ne kakaan kiŋ ɗe usisɗi.\x + \xt 2 Piyeer 1:14\xt*\x* Wa miniɗ nik ne wa raak ɗe ŋ \w Rom\w*, laam findi Janguuna ɗeɓgaan naandsukoha, a apohu ndaam. A fiis kaɓɗohii wuu kosiɗ ci jen.\x + \xt 2 Piyeer 1:1\xt*\x*
\ip A fiis kaɓɗohii ne a ñaah kosiɗ ci te a nak ɓa ne ɓa wortuk jangɗohoh ci baahaaɗiici. A namiɗ woo ŋ dokkiŋ Yeesu na reehiŋ Adina.
\iot Fiisi Piyeer kanakɗoh kaɓɗoh kaɗtiɗoh an :
\io1 - Kañɗohi \ior 1:1-2\ior*
\io1 - Piyeer ñaahiɗ kosiɗ ci ne kosiŋ ɓa kaɗ fiki\ior 1:3-11\ior*
\io1 - Keeh kiŋ yegɗohi kaɗ ŋ Yeesu \w Kiristaa\w* \ior 1:12-21\ior*
\io1 - Jangɗohoh ci leyoh ci \ior 2\ior*
\io1 - Ini kaɗ ŋ dokkiŋ Kiristaani na reehiŋ Adina \ior 3:1-16\ior*
\io1 - Askohi \ior 3:17-18\ior*
\ie
\c 1
\s Kañɗohi
\p
\v 1 Mi yii kañiɗ ɗu, mi yi Simong Piyeer, \w ñaamiŋ|lemma="ñaam"\w* Yeesu \w Kiristaa\w*, yi ɓaah ŋ \w \+tl Apootar\+tl*\w* ciŋ ɗe, mi yii fiis ɗu kaytii, ɗu ɓi rahas kosi car waaɗu findi wiŋ ɓoo. Ɗu rahasa taamboh ŋ yurhi Kiristaani yurah, a yi Koohiŋ ɓoo na Mucɗohiŋ ɓoo. 
\v 2 Baahohsaat, ɗu onu jam te in ceem gen ɓaatke, ŋ inhi ɗu inah Kooh na Heɗ ɓoo Yeesu !
\s In ci ɓoo etoh ne ɓoo raak kipes ŋoɗiɗ ŋ Kooh
\p
\v 3 Ŋ hatiliŋ ɗe, Heɗi eɗiɗ ɓoo in ci ɓoo etoh jen ne ɓoo raak kipes ŋoɗiɗ nga ɗe. A eɗiɗ ɓoo ca taamboh ŋ inhi ɓoo inah Kooh yi ɓeeɗuk ɓoo. A ɓeeɗuk ɓoo taamboh ŋ yaki a yak ŋ haf ce na baah kiŋ ɗe. 
\v 4 Ŋ ineem, a gapeen ɓoo gapoh baahiɗ ci ɓo' inahɗi findi ca hend te ɓoo rahsiɗ ca. A tumiɗ ineem ne ɗu fus ŋ maɗaah ci baahaaɗiici na yahrohe ɓi adinaanii, ɗu raak ɓak ŋ kipes kiŋ ɗe.
\li
\v 5 Ineem, weɗ tah, ndengɗukaat keeh-keeh,
\li te ŋ kosiŋ ɗu, ɗu ɓaat nga tumohaaɗ baahiɗ,
\li ŋ tumohaaɗi baahɗeem, ɗu ɓaat nga inah Kooh,
\li
\v 6 ŋ inhiŋ Kooh weem, ɗu ɓaat nga min amb haf ɗu,
\li ŋ min kiŋ ɗu amb haf ɗu weem, ɗu ɓaat nga muñ miskiɗ,
\li ŋ muñiŋ miskiɗeem, ɗu ɓaat nga ŋoɗ ŋ Kooh,
\li
\v 7 ŋ ŋoɗiŋ ɗu ŋ Kooh weem, ɗu ɓaat nga waaɗtiɗoh ŋ ɗooƴ ɗu,
\li te ŋ waaɗtiɗohiŋ ɗu weem, ɗu ɓaat nga waaɗ ɓooɓi keeh-keeh.
\p
\v 8 Laam in ceem jen nik nga ɗu te ca gen ɓaatuk ɗah, inhi ɗu inah Heɗ ɓoo Yeesu Kiristaa hey tume po ɗu nikanɗi yoondɗukaaɗi wala raakaaɗi njiriñ. 
\v 9 Waaye ɓo' nu in ceem nikɗi nga ɗe ɗah, a mand na fuuliɗ, has ciŋ ɗe na hoteeɗi usiɗ. A alkohiɗ ne a hoolɗuuɗ ŋ bakaaɗ ciŋ ɗe ɗeɓgaan.
\p
\v 10 Ineem weɗ tah, ɓaah ciŋ ngo, ndengɗukaat po ɓeeɗki Kooh ɓeeɗuk ɗu na kooɗi a kooɗ ɗu nik in wooriɗ nga ɗu ; ɗu tuma ɗah, ɗu keenanɗi muk. 
\v 11 Te ŋ ineem, ɗu hey rangsiɗasse baahiɗ buntaaciŋ Nguuri genan po faw, Nguuriŋ Heɗ ɓoo Yeesu Kiristaa, Mucɗohiŋ ɓoo.
\s Woo ciŋ \tl Apootar\tl* ci na woosuuɗ ci oolkaah
\p
\v 12 Ineem weɗ tah, ŋ genan ɗu naandis in ceem, ali nik ne ɗu inhiɗ ca po ƴutiɗ sah te ɗu tufkiɗ po ɗu ndengiɗ ngaŋ keeh ki ɗu teeɓu. 
\v 13 Ŋ amb ne wa ini ŋ joy tum feeh mi yii pes ɗah ne ŋ yunee ɗu ŋ naandsoh ceem. 
\v 14 Laam, ŋ inhiɗ ne ŋ hey saɓsukohe na faanii maañaaɗi, findi Heɗ ɓoo Yeesu Kiristaa ŋ haf ce teeɓoh ho wa. 
\v 15 Waaye, ŋ hey ndengɗuke po, ŋ finho cootiŋ ngo, ɗu genee naandsuk in ceem.
\p
\v 16 Wi ɓoo yegɗee ɗu hayiŋ Heɗ ɓoo Yeesu Kiristaa ŋ hatiliŋ ɗe, ɓoo gaƴkeeɗi ŋ andiini feru ŋ hereñ ɓo', ɓoo hotoot hotoot yaki a yak. 
\v 17 Laam Kooh Baabi a yi eɗ ɗe cir, yakiɗta ɗe, wa nikee wa hoosooraŋ Kooh yi Heɗ kiyak hay nga ɗe, woosa ne : « Yii a yi \w Kuɓkiŋ ngo|lemma="Kuɓkiŋ Kooh"\w* ŋ waaɗ keeh-keeh, yi neɓ po ŋ keeñ.\x + \xo 1:17 \xo*\xt Macce 17:5; Maarko 9:7; Luk 9:35\xt*\x* » 
\v 18 Ɓoo kerhootiɗ hoosooreem puloh Asamaan, wa ɓoo nik na Yeesu ŋ tangooraŋ Kooh.
\p
\v 19 Wa ɓaatta ɓoo woor ne woo ciŋ woosuuɗ ci tufkiɗ, te wa baahiɗ ne ɗu faɗoh ca nof. Ca mand na laampaani na siñaarɗe ŋ ɗisik ñuusiɗ, po ŋ wiisaaɗi, jaar mbeedi pul, hori na ɓaaɓ. Wa siñaariɗ ŋ keeñ ciŋ ɗu.
\p
\v 20 Bala ali in, inhaat ne, ŋ woo-woosuuɗ ci nik ŋ Fiis ci, ali woosuuɗ moosɗi woyoh woo ciŋ ɗe haf ce\f + \fr 1:20 \fr*\ft "ŋ woo-woosuuɗ ci nik ŋ Fiis ci, ali woosuuɗ moosɗi woyoh woo ciŋ ɗe haf ce" : ini gerek woo ndii, wa namiɗ min tokis : "ali ɓo' minɗi tokis woo-woosuuɗ ci nik ŋ Fiis ci ŋ findi a na liiɓohe ŋ haf ce."\ft*\f*. 
\v 21 Laam ali woosuuɗ moosɗi woyoh ŋ ini a waaɗ ŋ haf ce. A \w Fuuɗsi Hoolohngaani|lemma="Fuuɗsi Hoolohngaani, Fuuɗsiŋ Kooh"\w* hiiree ɓa, ɓa yegɗoheeɗa woo kiŋ Kooh.
\c 2
\s Jangɗohoh ci leyoh ci
\p
\v 1 Ɗeɓgaan, ɓi woosuuɗ leyoh nikeen ŋ ɗooƴ cuuɓiŋ Israayel ; wa nam mand ɗaa, ɓi jangɗohoh leyoh hey name nik ŋ harmban ɗu. Jangɗohoh ceem hey ɓeke, ŋ ɗooƴ jangɗoh ciŋ ɓa, liiɓohaaɗ ci na ɓaye ɓo' ŋ muuƴ ; ɓa hey kee po ɓa taas Heɗi tos ɓa. Ŋ ineem, ɓa ɓek haf ɓa ŋ muuƴi gaawan ɓa sooƴiɗ. 
\v 2 Laayiɗ hey ɓa taambɗe ŋ tumohaaɗ ciŋ ɓa sepƴiɗ ci. Ɓa hey tahe po waasiŋ keeh ki ɓasu. 
\v 3 Waaɗi ɓa waaɗ kopor hey tahe po ɓa feree lee, ɓa ñaañohee ɗu na ca. Atte'uukiŋ ɓa cambiɗ maañ, te sooƴɗuukiŋ ɓa tufkiɗ.
\p
\v 4 Laam Kooh faɗɗi sah malaakaaci bakaaɗe\f + \fr 2:4 \fr*\fq malaakaaci bakaaɗe \fq*\ft : ɓum liiɓ ne e safaal ciŋ teerndiŋ \ft*\xt Camba 6:1-4\xt*, ɓum liiɓ ne e malaakaaci hunee na Seytaani (marka ini fiisu ŋ \xt Macce 25:41\xt*).\f*, a njaf ca ŋ nunga topaaɗiina, a tokka ca na ceen ŋ ñuus tuɗ po ŋ mbaɗnaŋ atteena. 
\v 5 A faɗɗi sah adinaana ɗeɓgaan, waaye ŋ jamanoona a ruhsiɗoh masma laayɗa ŋ adinaani riifee na sangiɗ ciŋ ɗe, a mucɗiɗ Noohin na ɓo' yasna-kanak wiiriis, Noohin yi woyee ɓooɓa ne ɓa yurhaat.\x + \xo 2:5 \xo*\xt Camba 6–9\xt*\x* 
\v 6 Kooh atte'iɗ kur-taah ci kanak ci Sodom na Gomor, a hoomiɗta ca, po ca nikka misaal ŋ sangiɗ ciŋ ɗe na haye. 
\v 7 Waaye a mucɗiɗ Loot yurhiɗi, yi raakee ini misik ɗe lool ŋ cakaaya ɓooɓa yurhaaɗiicaam nikohe. 
\v 8 Loot genee ŋ ɗooƴ ɓa, a yi a nikee ɓo' yurhiɗ. A meeɗta raak miskiɗ noh na wek sagu tumohaaɗ caŋ ɓa moɗaaɗiica a hotee, a kerheeɗa ca.\x + \xo 2:8 \xo*\xt Camba 18:16–19:29\xt*\x*
\p
\v 9 Mbaa Heɗi inhiɗ findi a mucɗohan ɓi ŋoɗ nga ɗe po ɓa pul ŋ miskiɗ ci, te a ambiɗ yurhaaɗiici, ɓa na sekɗohse mbehaŋ atteena ne ɓa mbugalu. 
\v 10 A uupan mbugal ɓi na taambɗe kiñin ciŋ ɓa ŋ waaɗ-waaɗ usɓiɗ, ɓa heeffa kikilifaakiŋ ɗe. Jangɗohoh ci leyoh ceem, ɓa ɓo' yegiɗ haf ɓa, te ɓa yaksiɗukka, ɓa nupɗi sah ɓas yakɗuuɗ ci. 
\v 11 Te ŋ hot malaakaaci sah na yambeeɗi yakɗuuɗ ceem na woo ɓaseeh ŋ fiki Heɗi, te moona malaakaaci ceɗ uupiɗ yakɗuuɗ ceem doole na hatil.
\p
\v 12 Waaye ɓeɗ, ɓa mand na ɗoopaat ci raakɗi hel, ci na taambɗe yeg-yeg ciŋ ca, ca rimu ne ca ambu, ca apu ; ɓa na ɓase in ci ɓa inahɗi. Ɓa hey name sooƴ, 
\v 13 wa nik wirndiŋ yurhaaɗiikiŋ ɓa.
\p Mbalay na noh cong, weɗ ini neɓ ɓa. Ɓa cohha na ɗu ne ɗu ɓaah kañam ɗah, ɓa na kaci'ɗohe kaci'ɗoh, ɓa sepeƴnukaah, ɓa na raake neɓiɗ ngaŋ lee ciŋ ɓa. 
\v 14 Has ciŋ ɓa na gene waak ɓitɓi ɓa njaaloo'an na ɗe, te ɓa minɗi doyiɗ bakaaɗ, ɓa na ñaañohe ɓooɓi kos ciŋ ɓa ndengɗi. Ɓa mokɗiɗ waaɗ kopor ; ɓa alku'iɗ. 
\v 15 Ɓa faɗiɗ waasi yurhiɗi, ɓa muuƴiɗ, ŋ taambɗi ɓa taambiɗ waasiŋ Balaam, kuɓkiŋ Bosor\f + \fr 2:15 \fr*\fq Bosor \fq*\ft : ŋ teerndiŋ Kind ci, a teeku Beyor (\ft*\xt Kind ci 22:5\xt*).\f*, yi waaɗee eɗu kopor po a tummba yurhaaɗi. 
\v 16 Waaye a ngasuusa ŋ ɗali a ɗal waasi : A mbaam, yi minɗi woo, a yi woo findi ɓo', a faɗɗukohha woosuuɗeem naandohaaɗi a waaɗee tum.\x + \xo 2:16 \xo*\xt Kind ci 22:5–24:25; 31:16\xt*\x*
\p
\v 17 Jangɗohoh ci leyoh ceem, ɓa cul raakaaɗi masuɓ, suti puuɗsi na coottohe, Kooh kooɗkiɗiɗ ɓa ɗisik ñuusiɗ tuɗ. 
\v 18 Ɓa na ñaañohe ɓi ɓa na muuƴɗe na woo ciŋ ɓa yaksiɗkohaaci, woo ci ɓo' minɗi kooɗoh in. Na woo ceem, ɓa nookee ɓi han puloh ŋ mboolndiŋ muuƴiɗ ci, ɓa ɓekee ɓa ŋ cakaay. 
\v 19 Ɓa gapee ɓa raak haf ɓa, te ɓeɗ ŋ haf ɓa ɓa \w ñaam\w* ciŋ waaɗ-waaɗ ci na yahrohee ɓa, laam in nu min ɗa ɗah, fu ñaamiŋ wa.
\p
\v 20 Nik ne ɓa inheen Yeesu \w Kiristaa\w*, Heɗi na Mucɗohi, po ɓa pulla ŋ hoolaaɗiiciŋ Adina, po ƴutta, ɓa longissa ŋ hoolaaɗiiceem, ca minnda ɓa ɗah, mirndohaaɗiŋ ɓa uupan moɗaaɗi cambohaana. 
\v 21 Ɓa inah waasi yurhiɗi po ƴut, ɓa suungɗuk nakoh ci hooliɗ ci ɓa rahas ɗah, e inhaaɗi wa ngisohee nga ɓa. 
\v 22 Woyohaaɗii keeh nga ɓa : Ɓuu fi dokkissiɗ ŋ in ca a huke.\x + \xo 2:22 \xo*\xt Gonaah ci 26:11\xt*\x* Na wii : Mbaam-huk, ali fu ɓook ɗe ɓook, a walañkis ŋ ndapalaaƴ mi.
\c 3
\s Maañ maañ Heɗi hey hee
\p
\v 1 Ɓaah ciŋ ngo ŋ keeñkoh, wii weɗ fiisi kanakɗoh, wi maa kaɓɗohee ɗu. Ca kanak jen mi na naandsee ɗu in ci ɗu jangɗasse, ne ŋ yun kiñaañ kiŋ ɗu po ɗu liiɓee hooliɗ. 
\v 2 Ŋ waaɗ ne ɗu naandsuk woo ci woosuuɗ ciŋ Kooh woyee ɗeɓgaan, na nakoh ciŋ Heɗi Mucɗohi, ci \w \+tl Apootar\+tl*\w* ciŋ ɗu woyee ɗu.
\p
\v 3 Bala ali in, inhaat ne ŋ jamanooci mirndoh, wa hey raake ɓi njembtohoh, ɓa na hee taambɗe kiñin ciŋ ɓa. 
\v 4 Te ɓa hey woye ne : « A gapohee ne a hey haye haa e ? Wa nikan kiɗa ? Laam ina baab ci kaanoh poyi, in ci jen ris findi ca mandee ŋ cambaŋ feraŋ Adina. »
\p
\v 5 Ɓooɓeem na alkoh alkohɗuke ne ɗeɓgaan, Kooh fereen Eel na keheƴ taamboh ŋ woo kiŋ ɗe, kehƴeem pulohee ŋ masuɓ, wa nikee ŋ leero masuɓ.\x + \xo 3:5 \xo*\xt Camba 1:6-9\xt*\x* 
\v 6 Te masmeem weɗ riifɗee adinaana ɗeɓgaan, wa ɗummbaa.\x + \xo 3:6 \xo*\xt Camba 6–8\xt*\x* 
\v 7 Te woo keem, weɗ ɗaak Eel ci na kehƴi woti ndii, ca na sekɗohse yongkaahaŋ mbehaŋ atteena, wi sangiɗ ciŋ Kooh ɗumbohsan.\x + \xo 3:7 \xo*\xt Esayi 66:15-16; Sofooni 1:18\xt*\x*
\p
\v 8 Ɓaah ciŋ ngo ŋ keeñkoh, raakiɗ ini ɗu joyɗi alkoh, weɗ ne mbeh yino ŋ Heɗi mand na kiis junni (1000) te kiis junni (1000) mand na mbeh yino nga ɗe. 
\v 9 Heɗi raɓuuɗi ŋ ini a gapohee tum, findi ɓum liiɓoha. A na muñɗee ɗu, a waaɗɗi ne ali ɓo' nga ɗu sooƴ, waaye a waaɗ ne ɓooɓi jen ɓoƴsoh pesohaaɗ.
\p
\v 10 Waaye mbehiŋ Heɗi hayan findi rokoh. Ŋ mbeheem, eel ci hey coote na ɗuuɗ tiitɗohiɗ, in ci nik nga doh po ca yahrukoh, kehƴi na in ci haɓɗu nga jen hey atte'se\f + \fr 3:10 \fr*\ft Raakiɗ fiis ŋ fiis ci ɗeɓgaan, ci woo ne : "kehƴi na in ci nik nga jen hey sooƴe" ; cinooci nammba woo inii : "kehƴi na in ci nik nga jen hey naaye".\ft*\f*. 
\v 11 Nik ne in ci jen yahrukohan ɗaa ɗah, ɗu joyiɗ pes pes hooliɗ wuu Kooh, te ɗu ŋoɗ nga ɗe. 
\v 12 Ɗu sekee te ɗu seesuk mbehiŋ Kooh, wi eel ci jaalohan, ca yahrukoh, te in ci nik nga doh po ca naay. 
\v 13 Ɓoo nak, ɓoo ɓii sek eel as na keheƴ as, ɗiski yurah gen, findi Kooh gapoha.
\p
\v 14 Ineem weɗ tah, ɓaah ciŋ ngo ŋ keeñkoh, ŋ seki ɗu na seke mbeheem, ndengɗukaat po Kooh raak ɗu raakaaɗi sikka, a raakuu woyaah nga ɗu, ɗu raak jam na ɗe. 
\v 15 Te ambaat ne : Sekɗohi Heɗi na sekɗohe, a waaɗ ne ɓooɓi muc, findi Pool, ɓaah ɓoo yi ɓoo keeñkoh namoh ɗu wa woo ŋ fiisi a kaɓɗoh ɗu, ŋ liiɓohaaɗi moɗiɗi Kooh on ɗe.
\p
\v 16 Ineem weɗ a na woye ŋ fiis ci a na kaɓɗohe jen, ci a na woyohe in ceem. Raakiɗ ɓak nga ca, ca yooɓɗi inhu, tahha po inhaaɗiici na ɓi mokiɗɗi baahiɗ waasi na ɓoƴsohe ɓoƴsoh ini ca tokis. Ɓa na name tum ɗaa na Fiis ci cinooci. Ineem na ɓayee ɓa ŋ ɗumbu.
\s Nakohi na askohi
\p
\v 17 Waaye ɗu, ɓaah ciŋ ngo ŋ keeñkoh, ŋ woyiɗ na ɗu ŋ in ceem. Wortukaat, kinaat faɗ yurhaaɗiici ɓa nookee ɗu na ɗal ciŋ ɓa po ɗu ndengissuu ŋ kosi ɗu kos. 
\v 18 Baahohi Heɗ ɓoo Yeesu \w Kiristaa\w*, Mucɗohiŋ ɓoo baahoh ɗu, na inhi ɗu inah ɗe, ɓaatkaat ɓaatuk. A yi yakɗaah woti po faw ! [Amiin !]