\id 2JN - Saafi-Saafi
\ide UTF-8
\h 2 Saaŋ
\toc3 2Sŋ
\toc2 2 Saaŋ
\toc1 Fiisi Saaŋ kanakɗoh kaɓɗoh
\mt Fiisi Saaŋ kanakɗoh kaɓɗoh
\is Rangsohaani
\ip Saaŋ ɓaahee ŋ \w \+tl Apootar\+tl*\w* ciŋ Yeesu. Saaŋ na Saak na Piyeer ɓeɗ \tl Apootar\tl* ci kaahay ci tiik ciŋ ɓa uup woyu ŋ teereeci nikiis ci na naandsuke kipes kiŋ Yeesu. Marka Saaŋ ŋ Limiŋ tiik ci.
\ip Ŋ finho kakaan ki na hulti na rapɗuukiŋ Yeesu, a taambkohiɗ Maryaama, yaayiŋ Yeesu.\x + \xt Saaŋ 19:25-27\xt*\x* Ŋ mirndaani a yi adgohee ɓi Jangu, ŋ ɗiska woysee Asi ŋ jamanoonaam (ɓak ngaŋ ɗiski Turki nik woti-woti). Ŋ jamanoonaam, weɗ a fiisoh "Yegɗohiŋ Muci Saaŋ fiis", na "Fiisi Saaŋ kanakɗoh kaɓɗoh" wii, na fiis kanak wiiriis ci a kaɓɗoh, na teerndiŋ "Teeɓ ki", wi na woye ŋ in ci na haye ŋ fikiiri.\x + \xt Teeɓ ki 1:1\xt*\x*
\ip Saaŋ fiisiɗ teerndii "ɓitɓi Kooh kooɗ na kuɓuuciŋ ɗe", waaye ɓo' laayiɗ amb ne ɓitɓi na woyse ndii na kuɓuuciŋ ɗe, wa Jangu, na ɓooɓi ɓaah ŋ Janguuneem. Wa mand haa ne Saaŋ liiɓ ne jangɗohoh ci baahaaɗiici a woyee ŋ kaɓɗohiŋ ɗe koc, ɓa hey haye ŋ Janguunii. Ŋ ineem, a waaɗ woytoh ɓi Janguuni ne ɓa taalndiɗ ɓa pesee ŋ keeh, na kerhiɗ Kooh, na waaɗoh. A waaɗɗi ne ɓa teyɗuk jangɗohoh ci baahaaɗiiceem findi ɓa meeɗ tumoh na jangɗohoh ci \tl Apootar\tl* ci tuuƴe.
\iot Fiisi Saaŋ kanakɗoh kaɓɗoh kaɗtiɗoh an :
\io1 - Kañɗoh \ior 1:1-3\ior*
\io1 - Pes ŋ keeh na waaɗoh na kerhiɗ \ior 1:4-6\ior*
\io1 - Wortuk ɓi na ñaañohe \ior 1:7-11\ior*
\io1 - Askohi \ior 1:12-13\ior*
\ie
\c 1
\s Kañɗohi
\p
\v 1 Mi, yakkiŋ Janguuni, mi yii fiis ɗa, fu yi Ɓitɓi\f + \fr 1:1 \fr*\ft Ɓo' laayiɗ amb ne ɓitɓi na woyse ndii na kuɓuuciŋ ɗe, wa Jangu na ɓooɓi ɓaah nga.\ft*\f* Kooh tan na kuɓuuciŋ ɗa. Ŋ keeñkohiɗ ɗu keeh-keeh. A mi dong waaɗ ɗu haa, waaye na ɓi inah jen keeh ki kaɗ ŋ Kooh. 
\v 2 Ɓoo waaɗiɗ ɗu sagu keeh ki ɓoo jen ɓaah te wa nikan nik ngaŋ keeñ ciŋ ɓoo po faw. 
\v 3 Kooh Baabi hey ɓoo baahohe, ɓoo misik ɗe, a on ɓoo jam. Yeesu \w Kiristaa\w* kuɓkiŋ Baabi hey ɓoo baahohe, ɓoo misik ɗe, a on ɓoo jam. Ŋ ineem ɓoo pesee ŋ keeh na waaɗoh.
\s Nakohi rahsohu ŋ Baabi
\p
\v 4 Ŋ sumiɗ lool ŋ hotiɗ ɓum ngaŋ kuɓuuciŋ ɗa ɓii pes ŋ keeh ki findi nakohi ɓoo jen rahas ŋ Baabi. 
\v 5 Te ɗiski wa nik, mi yii kiim ɗa fu yi Ɓitɓi ne ɓoo jen waaɗtiɗohaat. Ini ŋ fiis ɗa wii, wa nakoh as haa, waaye wa nakohi ɓoo rahas ŋ cambohaana. 
\v 6 Te waaɗoh weɗ ne ɓoo pesee ŋ nakoh ciŋ Kooh. Wii weɗ nakohi, findi ɗu kerhoha ŋ cambohaana poyi : Ɓoo pesaat ŋ waaɗtiɗoh.
\s Wortukaat ɓi na ñaañohe
\p
\v 7 Ɓo' laayiɗ pasarkohiɗ ŋ adinaani te ɓa na ñaañohe ñaañoh ɓo', ɓa teyɗukɗi ne Yeesu Kiristaa hayiɗ ŋ Adina na faan, findi ɓo'. Ɓoyi na taase ineem, a ñaañohoh ɓo', a sangiɗiŋ Kiristaani. 
\v 8 Tufkaat ŋ haf ɗu, ne ɗu ñakuu ini pangkiŋ ɓoo rim, waaye ɗu rahas aaf mitiɗ. 
\v 9 Ɓo' nu kaɗ ini uup us ndeem te a topɗi ŋ jangɗohi ŋ ini kaɗ ŋ Kiristaani ɗah, a raakɗi Kooh ; ɓo' nu top ŋ jangɗoheem ɗah, a raakiɗ Baabi na \w Kuɓki|lemma="Kuɓkiŋ Kooh"\w*.
\p
\v 10 Kim ɓo' hey ɗu marke a kom ɗu jangɗoh wiiriis wi ɗaloh na jangɗoheem ɗah, kinaat ɗe daliɗ ŋ kahan ciŋ ɗu, kinaat sah tahas kañɗohiŋ ɗe. 
\v 11 Laam ɓo' nu tahas ɗe ŋ kañɗohiŋ ɗe ɗah, a hun hun na ɗe ŋ tumohaaɗ ciŋ ɗe baahaaɗiici.
\s Askohi
\p
\v 12 Raakiɗ in laayiɗ ci ŋ joy ɗu woo waaye ŋ waaɗɗi ca fiis ŋ kayit findi an ; ŋ oolkiɗ ne ŋ hey ɗu hee marke, ŋ woo na ɗu ɓo' na ɓo' ne ɓoo uup sum.
\p
\v 13 Kuɓuuciŋ taambɗoh fu ɓitiɓ yi Kooh nam tan, ɓii kañiɗ ɗa.