\id 2CO - Saafi-Saafi
\ide UTF-8
\h 2 Korenta
\toc3 2Ko
\toc2 2 Korenta
\toc1 Fiisi Pool kanakɗoh kaɓɗoh ɓi Korenta
\mt Fiisi Pool kanakɗoh kaɓɗoh ɓi Korenta
\is Rangsohaani
\ip Pool ɓaahee ŋ Israayel ci, ŋ cuuɓiŋ Benyaamin.\x + \xt Ɓi Rom 11:1; Ɓi Filippi 3:5\xt*\x* A nikee \w \+tl Farisen\+tl*\w*.\x + \xt Tum ci 23:6; Ɓi Filippi 3:5\xt*\x* Ŋ finho \w Paantakot\w*, wi Janguuni camb ɓaatuk, a ɓaahee ŋ ɓi tolfiɗee kosiɗ ci.\x + \xt Tum ci 7:58–8:3\xt*\x* Waaye wa raakka mbeh, a cohha na Yeesu, a kossa\x + \xt Tum ci 9:1-30\xt*\x* po a nikka \w \+tl Apootar\+tl*\w* sah. Teerndiŋ "Tum ciŋ \tl Apootar\tl* ci" teeɓohiɗ pangkiŋ ɗe wi a nik \tl Apootar\tl* ini kooɗoh ŋ saar 13.
\ip Teerndiŋ Tum ciŋ \tl Apootar\tl* ci teeɓohiɗ kaɗaŋ Pool koc ŋ kur kaŋ Korenta ŋ saar 18:1-18. A tumiɗ ndaam ini uup kiis na camban, wala kiis kanak sah. Wa nikee ŋ reehɗohaaniŋ ɓaaɓiŋ ɗe yakki kanakɗoh.\x + \xt Tum ci 15:40–18:22\xt*\x* Pool kaɗisseen Korenta kotiŋ ɗe kanakɗoh, waaye wa naandsukuuɗi ŋ teerndiŋ Tum ci\x + \xt 2 Korenta 2:1; 12:14; 13:1\xt*\x*.
\ip Kaɓɗohi kanakɗoh a fiis ɓi Korenta wii, a fiisoha kur kaŋ Maseduwaan ; a woyissa in ci a tufuk tum ŋ kaɗiŋ ɗe kaahayɗoh ŋ Korenta.\x + \xt 2 Korenta 13:1-10\xt*\x* Ŋ mirndaani a kaɗangiɗ kaɗi a woyee weem te wa teeɓohuuɗ ŋ teerndiŋ \xt Tum ci 20:2\xt*.
\ip Fu jang kaɓɗohii ɗah, fu hey hote ne raakiɗ ini raak ŋ harmban ce na ɓak ngaŋ ɓi Janguuniŋ Korenta. A na teeɓohe ne a yi ŋ keeh ŋ tumohaaɗ ciŋ ɗe na mandohaaɗiŋ ɗe, a ndengɗee ca. A na teeɓohe ne a waaɗiɗ ne ɓa eɗ ɗe cir \tl apootar\tl*, te ɓa waaɗ ɗe findi a waaɗoh ɓa. A teeɓohiɗ nik \tl apootar\tl* ini wa tokis, na ɓi na woye ne ɓa \tl apootar\tl* te ɓa nikɗaa. A rahassa yegɗoh neɓiɗ ŋ ini kaɗ ŋ ɓi Korenta, a summba nga lool. A nammba eɗoh nakoh ne kosiɗ ci raakaaɗiici nik ŋ Yerusalem nangɗohɗu kopor.
\iot Fiisi Pool kanakɗoh kaɓɗoh ɓi Korenta kaɗtiɗoh an :
\io1 - Kañɗoh na corkiɗ Kooh ngaŋ giifiɗ ci a giifɗoh \ior 1:1-11\ior*
\io1 - Pool teeɓohiɗ ne tumohaaɗ ciŋ ɗe lakiɗ waas \ior 1:12–6:10\ior*
\io1 - Nakoh wuu ɓi Korenta \ior 6:11–7:2\ior*
\io1 - Yegɗoh neɓiɗ ŋ Korenta - sumiŋ Pool \ior 7:3-16\ior*
\io1 - Dengoh na nakoh nangɗoh kopor wuu ɓi Yerusalem \ior 8:1–9:15\ior*
\io1 - Pool mineen degoh miskiɗ, waaye a waaɗ teeɓoh baah \ior 10:1–13:13\ior*
\c 1
\s Kañɗohi
\p
\v 1 Mi yii kañɗis ɗu, ɗu ɓi Janguuniŋ Kooh nik ŋ Korenta na ɓooɓiŋ Kooh ŋ Akaay jen. Mi yi Pool, \tl \+w Apootariŋ|lemma="apootar"\+w*\tl* \w Kiristaani|lemma="Kiristaa"\w* Yeesu ŋ waaɗ-waaɗiŋ Kooh, ñam na fiisee ɗu kaytii, mi na ɓaah ɓoo Timoote. 
\v 2 Kooh Baabiŋ ɓoo baahohaat ɗu, a on ɗu jam ; Yeesu Kiristaa Heɗi baahohaat ɗu, a on ɗu jam !
\s Giifɗiŋ miskiɗ ci
\p
\v 3 Kooh, yi nik Koohiŋ Heɗ ɓoo Yeesu Kiristaa, a nammba nik Baabiŋ ɗe, a yakɗaah, a yi Baabi, yi ɓooɓi jen na miske, Kooh yi na giifɗohe ŋ in nu nik. 
\v 4 A yi na giifɗe ɓoo\f + \fr 1:4 \fr*\ft Waas laayiɗ, Pool woyee ndii ɗah, a na woye "ɓoo". Fu kerah "ɓoo" ɗah, wa miniɗ nik ne a na woye haf ce dong, wala a yi na ɓi ɓo' wiiriis. Ŋ kaɓɗoh ciŋ jamanoonaam, wa mandee ɗaa.\ft*\f* ngaŋ miskiɗ ciŋ ɓoo jen ne ɓoo min giifiɗ ɓi nik ngaŋ miskiɗ nu nik ! Ŋ ineem ɓoo giifiɗ ɓa na giifɗi a giifɗoh ɓoo. 
\v 5 Findi miskiɗ ci ɓoo ɓaah na Kiristaani laayoh, giifɗi Kooh na giifɗe ɓoo taamboh ŋ Kiristaani laayoh ɗaa.
\p
\v 6 Ɓoo nik ŋ miskiɗ ɗah, ɓoo nik nga ne ɗu giifɗu, ɗu nam muc ; ɓoo giifɗu ɗah, wa giifɗohaa ɗu ne ɗu ndengɗuk, ɗu min muñ miskiɗ ciŋ ɗu mand na ciŋ ɓoo. 
\v 7 Te yaakaari ɓoo raak nga ɗu ndengiɗ, ɓoo inhiɗ ne findi ɗu na ɓaahohe ŋ miskiɗ ci, ɗu na ɓaahohe ɗaa ŋ giifɗi.
\p
\v 8 Kon ɓaah ciŋ ɓoo, ɓoo waaɗiɗ ne ɗu inah miskiɗ ci rahas ɓoo ŋ kur caŋ Asi : Ɓoo degseen miskiɗ keeh-keeh po ɓoo antalisseeɗi ca, ɓoo liiɓeeɗi sah ne ɓoo hey rise pes. 
\v 9 Ɓoo ambee ne sah ɓoo joy joy kaan ; ineem raakiɗ ne ɓoo oolkohuu haf ɓoo, ɓoo oolkoh Kooh yi na hultiɗe kaaniɗ ci. 
\v 10 A yi muciɗ ɓoo ŋ kakaan ki miskiɗeem, te a hey ɓoo mucɗisse. Ɓoo oolkiɗ ne a genan ɓoo muciɗ. 
\v 11 Kiimi ɗu kiimɗee ɓoo Kooh nam ɓaah nga ; ŋ ineem, ɓo' laayiɗ kiimɗiɗ ɓoo, tahha po ɓo' laayiɗ hey corkiɗe Kooh ŋ baahohi a baahoh ɓoo.
\s Pool oorɗiɗ ɓaaɓiŋ ɗe Korenta
\p
\v 12 Inii weɗ ɓoo na ndamkohe te liiɓ ciŋ ɓoo seede'iɗa, weɗ ne : Keeh na hool puloh ŋ Kooh, ceɗ ɓoo na pesohe na ɓi Adina, ɓoo na uupe ca pesoh na ɗu. Nikɗi haa ne wa ñaañi puloh ŋ ɓo' on ɓoo ineem, waaye wa baahohiŋ Kooh. 
\v 13-14 Ɓoo na fiiseeɗi ɗu in wiiriis ɗal ini ɗu min jang te ɗu inaha. Raakiɗ ini ɗu camb inah, te ŋ liiɓiɗ ne ɗu heya inhe jen, weɗ ne ŋ mbehi Heɗ ɓoo Yeesu dokkohan, ɗu hey neɓse nga ɓoo, te ɓoo neɓu nga ɗu.
\p
\v 15 Ineem wooreen ndo, weɗ tah po ŋ ammba ne ŋ kockohan nga ɗu ne ɗu sum ŋ kot ci kanak ci ŋ raakan ndeem. 
\v 16 Weɗ ne ŋ waaɗeen taamboh nga ɗu ne ŋ hayee Maseduwaan ndii ɗah ; te ŋ namee wiiruk ɗah, ŋ taambis nga ɗu ne ɗu ɓaatɗoh ho ŋ ɓaaɓiŋ ngo ŋ waas Yudee.
\p
\v 17 Ɗu liiɓ ne wi ŋ woyee ŋ ɗooƴ co ne ineem weɗ maa hee tume, ŋ liiɓɗi liiɓɗi nga e ? Wala ɗu liiɓ ne ŋ raak liiɓohaaɗ ɓo' dong, po "ee"-iŋ ngo miniɗ nik "a'aa" ne ŋ tufuk ne ŋ tum in ɗah ? 
\v 18 Wa wooriɗ Kooh ne, woo ki ɓoo na woyee ɗu wa "ee" na "a'aa" haa. 
\v 19 Laam \w Kuɓkiŋ Kooh\w*, Yeesu Kiristaa yi ɓoo woyee ɗu, mi na Silweng na Timoote, a "ee" na "a'aa" haa ; a moos nik "ee" dong. 
\v 20 Te in ci Kooh gapoh, ini ca laay jen, ca "ee" ŋ Yeesu Kiristaa. Ineem weɗ nam tah po wa taamboh nga ɗe, ɓoo woyee "amiin" weɗ "ee", ne ɓoo yakiɗ Kooh. 
\v 21 A Kooh ambsoh ɓoo na ɗu, a ndengiɗta ɓoo ŋ Kiristaani, a degiɗ ɓoo ne ɓoo pangkiɗ ɗe. 
\v 22 A ñaassa ɓoo, a tummba \w Fuuɗsiŋ ɗe|lemma="Fuuɗsi Hoolohngaani, Fuuɗsiŋ Kooh"\w* ŋ keeñ ciŋ ɓoo, ineem nikka firnde ne in ci a gap ɓoo jen, ɓoo hey ca rahse.
\p
\v 23 Kon Kooh miniɗ to seede, ŋ lee ɗah, ŋ kaanaat : Ŋ sang ɗu ɓek miskiɗ weɗ tah ŋ hayisɗi Korenta poyi. 
\v 24 Nikɗi haa ne ɓoo waaɗ ɗu deg yaah ŋ ini kaɗ ŋ kosiŋ ɗu laam ɗu ndengiɗ nga. Ɓoo kay, ɓoo na ɓaatɗohee ɗu ŋ sumiŋ ɗu.
\c 2
\p
\v 1 Ineem weɗ tah ŋ ambiɗ ŋ haf fo ne ŋ heyɗi dokke ŋ ɗiskiŋ ɗu feeh in ci neɓaaɗiici reehɗi ɗah. 
\v 2 Ŋ ɓek ɗu neɓaaɗi ɗah, a ya ɓa sumɗan ndo ? Ɗu ɓi ŋ ɓek neɓaaɗi e ? 
\v 3 Ineem weɗ tah ŋ fiissa ɗu kaɓɗohi mirndoh, ŋ sangee hay nga ɗu po ɗu kee so ɓeka neɓaaɗi, ɗu ɓi joyee so sumiɗ. Ɗu jen, wa wooriɗ to ne, ŋ sum ɗah ɗu sum. 
\v 4 Wi maa fiisee ɗu wa, ŋ fiisa ŋ tiis miskiɗ na keeñ reehiɗ, na muhun laayiɗ ; ŋ fiisɗaa ne ŋ ɓek ɗu neɓaaɗi, waaye ne ɗu inah waaɗi ŋ waaɗ ɗu, findi wa yakoh.
\s Pool ɗaasiɗ ɓoyi ɓekoh neɓaaɗi
\p
\v 5 Ɓoyi ɓekoh neɓaaɗi, a ɓek ko wa haa ; ŋ sang uupiɗ, waaye ŋ miniɗ woo ne, a ɓek ɗu wa jen. 
\v 6 Ini ɓi uup nga ɗu deg ɓoyeem, doyiɗ. 
\v 7 Tahha po ini ngisoh kotii, weɗ ne ɗu ɗaas ɗe te ɗu daliɗ heliŋ ɗe, ne a raakuu neɓaaɗiini a antalanɗi. 
\v 8 Mi yii kiim ɗu, teeɓaat ɗe ne ɗu waaɗiɗ ɗe.
\p
\v 9 Ŋ waaɗee ɗu nam markisuk, weɗ tah ŋ fiissa ɗu, ne ŋ inah andi ɗu hey yo kerhiɗe ŋ in nu nik. 
\v 10 Ɗu ɗaas ɓo' ɗah, ŋ ɗaas ɗe ; nik ne raakiɗ ini ŋ joyee ɗaasoh ɗah, ŋ ɗaasohiɗa saguuɗu ŋ fiki \w Kiristaani|lemma="Kiristaa"\w*. 
\v 11 Ŋ tum ineem ne ŋ onuu Seytaani waas nga ɓoo, laam ɓoo inhiɗ baahiɗ ini a waaɗ tum.
\s Pool ŋ Torowaas
\p
\v 12 Wa ŋ kaɗ Torowaas ne ŋ woo \w Yegɗohiŋ Muci\w*, wi kaɗ ŋ Kiristaani, ŋ hotiɗ ne Heɗi rangsiɗiɗ to bunta nga ne ŋ panguk. 
\v 13 Waaye heliŋ ngo daleeɗi, ŋ raakɗi ɓaah ɓoo Tit nga, weɗ tah ŋ askohha na ɓa, ŋ hayya Maseduwaan.
\s Ndami Kiristaani on ɓoo
\p
\v 14 Waaye, ɓoo corkiɗaat Kooh. A na gene ɓoo maaƴɗukoh ŋ mbehiŋ yakɗiŋ ndamiŋ ɗe ŋ niki ɓoo nik ŋ Kiristaani, te a taambohee nga ɓoo ne Kiristaani inhu ŋ ɗisik nu nik findi eeñ laackoloñ. 
\v 15 Ngaŋ Kooh, e ɓoo eeñɗiŋ Kiristaani, wa neɓiɗ findi laackoloñ. Ɓoo ɓii eeñ ɓi nik ŋ waasiŋ muci, na ɓi nik ŋ waasiŋ muuƴi. 
\v 16 Ŋ ɓum, ɓoo na ote kakaan, oti na ɓayee kaan ; ŋ ɓinooɓi, ɓoo na eeñe kipes, eeñi na ɓaye pes. A yi nde ɓo' min ineem ? 
\v 17 Ɓoo nak, ɓoo mandɗi na ɓi laayiɗ, ɓi tum woo kiŋ Kooh toontuk. Ŋ niki ɓoo nik ŋ Kiristaani, ɓoo na yegɗohe Woo ki na keeñ hooliɗ ŋ fiki Kooh, yi woos ɓoo.
\c 3
\s Surgaaciŋ Ambtiɗohi Asi
\p
\v 1 Kinaat liiɓ ne ini ŋ woo weem tokis ne ɓoo na cambise woo ne a ɓoo min pangki. Ɓoo etohɗi ne ɓi ɓo' fiisiɗ ɗu kayit ne ɓa woo ɗu ineem findi ɓinooɓi na tumohee wa, te ɓoo namɗi etoh ne ɗu tumiɗ ɓoo ineem. 
\v 2 E ɗu kayteem, kayti fiisu ŋ keeñ ciŋ ɓoo, wi ɓooɓi jen min jang, ɓa inaha. 
\v 3 Wa hooliɗ ne e ɗu kayti \w Kiristaani|lemma="Kiristaa"\w* fiis, a taambɗohhaa ŋ pangkiŋ ɓoo. Kayteem fiisohuuɗi fiisoha, wa fiisohu \w Fuuɗsiŋ Koohi|lemma="Fuuɗsi Hoolohngaani, Fuuɗsiŋ Kooh"\w* na pese. Wa fiisuuɗi ŋ atoh ɗapas,\x + \xo 3:3 \xo*\xt Pula 24:12; 31:18; 32:19; 34:1,29; 40:20 \xt*\x* wa fiisu ŋ keeñ ci. 
\v 4 Ineem weɗ oolki ɓoo ooluk Kooh taamboh ŋ Kiristaani.
\p
\v 5 Wa nikɗi haa ne ɓoo amb ne ɓoo miniɗ haɓiɗ in ngaŋ min-miniŋ ɓoo. Te ɓoo liiɓɗi ne ineem puloh nga ɓoo, min-miniŋ ɓoo puloh ŋ Kooh. 
\v 6 A yi nam on ɓoo po ɓoo minnda nik ɓi na pangkiɗe ambtiɗoh as, wi gaƴukɗi ŋ waasi fiisu waaye ŋ \w Fuuɗsi Hoolohngaani|lemma="Fuuɗsi Hoolohngaani, Fuuɗsiŋ Kooh"\w*. Waasi fiisu na apohe apoh, waaye Fuuɗsi na onohe kipes.
\p
\v 7 Nakoh ciŋ waasi fiissee ŋ atoh ɗapas dong te siñaariŋ yaki Kooh yak nikee wiliɗ ca po Israayel ci mineeɗi marak ŋ fikiiriŋ \w Musaa\w* sagu siñaara, te siñaaraam geneeɗi. Nik ne e pangkiŋ waasi fiisu, wi na ɓayohe ŋ kakaan weɗ hunee na kiyak hend ɗaa ɗah, 
\v 8 kon pangkiŋ Fuuɗsi, kiyak kiŋ wa hendan na ? 
\v 9 Nik ne pangkiŋ waasi na atte'e ɓo' tooñ weɗ raak kiyak ɗah, ŋ woyisɗi ɗa wi na tahe Kooh amb ɓo' ɓo' yurhiɗ ! 
\v 10 Ɓoo miniɗ woo ne siñaarɗiŋ kiyak ki wotɓa wa tus haa ŋ siñaarɗiŋ wi woti. 
\v 11 Nik ne wi genɗi weɗ siñaarɗee ɗah, ŋ woyisɗi ɗa wi genan gen.
\p
\v 12 Oolki ɓoo ooluk ne kiyak keem genan gen na tahe ɓoo kaañ keeh-keeh. 
\v 13 Te ɓoo tumɗi findi Musaa, yi muuree fikiiriŋ ɗe ne Israayel ci markuu reehiŋ siñaari genaaɗiini. 
\v 14 Waaye ɓa sangee sang inah. Po woti sah, ɓa jangeesa Fiis ciŋ \w Ambtiɗoha Maañɗa|lemma="Ambtiɗohi Koc na wi Asi"\w* ɗah, muureem na rise nga. Wa nihsukɗi, wa na coote rek ne fu nikka ŋ Kiristaani ɗah. 
\v 15 Po woti sah, Israayel ci jangeesa teereeciŋ Musaa ɗah, liiɓohaaciŋ ɓa na nike muurkiɗ.
\p
\v 16 Waaye ɓo' nu hay ŋ Heɗi ɗah, muuri nihsu. 
\v 17 Fu hay ŋ Heɗi ɗah, weɗ ne fu hay ŋ Fuuɗsi ; te ɗisik nu \w Fuuɗsiŋ Heɗi|lemma="Fuuɗsi Hoolohngaani, Fuuɗsiŋ Kooh"\w* nik ɗah, raak haf fu raakiɗ nga. 
\v 18 Ɓoo jen, ɓoo ɓi na fikiici raakisɗi muur, siñaariŋ Heɗi wa ɗii saañis nga ɓoo findi seetu ; Heɗi, maanaam Fuuɗsi, a yii ɓoƴsoh ɓoo po, ɓoo mandan na ɗe, wa ɓaatke, siñaariŋ ɓoo uupee nga laay.
\c 4
\s Raak-raaki tumu ŋ tumoha mahuuɗ
\p
\v 1 In ceem tah po, ɓoo misikka Kooh, a dengkohha ɓoo pangkii, weɗ tah po ɓoo faɗsukanɗi. 
\v 2 Ɓoo kay, ɓoo sangiɗ in ci ɗasɗukiɗ ci na kaci'ɗohe ; ɓoo ñaañohɗi ɓo' te ɓoo ɓoƴsohɗi woo kiŋ Kooh. Ɓoo na teeɓohe keeh ki, ne yaa nu nga min teyɗuk ŋ fiki Kooh ne ɓoo ɓo' yurhiɗ. 
\v 3 Nik ne yegɗohiŋ muci ɓoo na yegɗohe muuruk muuruk ɗah, wa muuruk ŋ ɓi nik ŋ waas sooƴ. 
\v 4 Seytaani, yi min ŋ adinaanii, a yi fuuliɗ ñaañiŋ kosaaɗiici po ɓa minɗi hot siñaariŋ \w Yegɗohiŋ Muci\w*, weɗ ne siñaariŋ yaki \w Kiristaani|lemma="Kiristaa"\w* yak, yi ñaamaariŋ Kooh.
\p
\v 5 Ɓoo yegɗohɗi haf ɓoo, ɓoo na yegɗohe ne Yeesu Kiristaa a yi Heɗi, te ɓoo sah, ɓoo \w ñaam\w* ciŋ ɗu saguuce. 
\v 6 Laam Kooh yi woo ne : « Ŋ ɗooƴ ñuusi, ñiin siñaarɗaat nga, » a yi siñaariɗ ŋ keeñ ciŋ ɓoo, ne ɓoo inah yaki a yak wi na siñaarɗe ŋ fikiiriŋ Kiristaani. 
\v 7 Ɓoo nak, raak-raakeem tumu nga ɓoo, waaye ɓoo tumoha mahuuɗ, ne wa teeɓoh ne hatili yakohngaaneem, wa wiŋ ɓoo haa, wa wiŋ Kooh. 
\v 8 Ɓoo na degse miskiɗ nu nik, waaye ɓoo na pule nga, ɓoo jaahɗiɗ waaye ɓoo ñakɗi yaakaar. 
\v 9 Ɓoo ɓii tolfiɗu waaye Kooh faɗɗi ɓoo, ɓoo ɓii folu waaye ɓoo ɗumbuuɗi.
\p
\v 10 Kakaan kiŋ Yeesu weɗi ŋ faan ciŋ ɓoo ŋ ɗisik nu ɗisik, ne kipes kiŋ ɗe nam hotuk ŋ faan ciŋ ɓoo. 
\v 11 Laam ɓoo ɓii pes waaye ɓoo gen yurhiɗkoh na kakaan sagu Yeesu, ne kipes kiŋ ɗe nam hotuk ŋ faan ciŋ ɓoo, ci kaanan. 
\v 12 Ŋ ineem a kakaan na pangke nga ɓoo, waaye a kipes na pangke nga ɗu. 
\v 13 Ɓo' woyiɗ ŋ Fiis ci hooliɗ ci ne : « Ŋ kos kos weɗ tah ŋ woyiɗ ! »\x + \xo 4:13 \xo*\xt Sabuur 116:10 \xt*\x* Ɓoo nam raak \w Fuuɗsi|lemma="Fuuɗsi Hoolohngaani, Fuuɗsiŋ Kooh"\w* ɓoyeem raak, Fuuɗsi na onohe kos, tahha po ɓoo namiɗ kos, weɗ tah ɓoo namee woo. 
\v 14 Ɓoo inhiɗ ne Yi hultiɗ Heɗi Yeesu, hey ɓoo name hultiɗ ne ɓoo nik na ɗe, a tufkiɗ ɓoo na ɗu jen ŋ fikiice.
\p
\v 15 In ceem jen, ca ɗii rahas ɓoo saguuɗu, ne baahohiŋ Kooh pasarkoh te wa ree ŋ ɓo' laayiɗ ; ɓi corkiɗan ɗe uupee nga laay, ɓa hun, ɓa yakɗee ɗe.
\p
\v 16 Ineem weɗ tah ɓoo na faɗsukeeɗi. Ali nik ne faan ciŋ ɓoo ca ɗii yahkeeɗa, keeñ ciŋ ɓoo na uupe as Kooh-nu-wiis. 
\v 17 Laam miskiɗ ciŋ ɓoo woti ɓoo hendtiɗkoh ca na yaki genan gen ɓoo yakan ɗah, ca in eɗfiɗ te ca maañɗi, ca na kooɗkiɗe ɓoo yakeem. 
\v 18 Te ɓoo na markeeɗi ŋ in ci na hotse, waaye ŋ ci minɗi hotu. Laam ci na hotse ca na maañeeɗi, waaye ci minɗi hotu genan gen.
\c 5
\s Genohaaci kanak ci
\p
\v 1 Ɓoo inhiɗ ne ɗiip ci ɓoo genoh ŋ kehƴi cii, maanaam faan ciŋ ɓoo ndii, kaɗ po ca yahuk ɗah, ɓoo raakiɗ taɓah ŋ Eel ci, maanaam faan as. E Kooh haɓiɗ ca, ca genohaaci genan gen, ci yaah ɓo' haɓiɗɗi. 
\v 2 Ɓoo ɓii iineeɗa ŋ ɗiip ci, ɓoo waaɗta lool degsoh ɓekkaah ciŋ ɓoo as ci, maanaam taɓah ciŋ ɓoo puloh ŋ Eel ci. 
\v 3 Ee, wa wooriɗ to ne ɓoo hey ca ɓekɗasse, ɓoo telsanɗi raakaaɗi faan. 
\v 4 Ee, jamanooni ɓoo nik ŋ ɗiip cii jen iinee sagu ɓituk, nikɗi haa ne ɓoo waaɗ woluk faan ciŋ ɓoo, waaye ɓoo waaɗ degsohɗu na faan as ne kipes ki keeh-keehi on do'ɗok wi kaanan. 
\v 5 Ineem, weɗ ini Kooh ŋ haf ce kooɗkiɗ ɓoo. A yi eɗ ɓoo \w Fuuɗsi Hoolohngaani|lemma="Fuuɗsi Hoolohngaani, Fuuɗsiŋ Kooh"\w*, ineem nikka firnde ne in ci a gap ɓoo jen, ɓoo hey ca rahse.
\p
\v 6 Kon ɓoo gen kaañiɗ. Waaye ɓoo inhiɗ ne feeh ɓoo ɓii gennda ŋ faan cii ɗah, ɓoo genan usiɗ Heɗi. 
\v 7 Laam ɓoo na kaɗohe kos waaye ini ɓoo na hote haa. 
\v 8 Mbaa ɗah, ɓoo kaañiɗ, te ini ngisohiɗ ɓoo weɗ ne ɓoo faɗ faan cii, ɓoo haad ŋ Heɗi.
\p
\v 9 Ineem weɗ tah ɓoo ndengɗukee ne a neɓu nga ɓoo ŋ ɗisik nu ɓoo nik ɗah, ali ɓoo ris ŋ faan cii wala ɓoo faɗ ca, haad nga ɗe sah. 
\v 10 Laam ɓoo jen joyiɗ tufuk ŋ fiki \w Kiristaani|lemma="Kiristaa"\w* ne a attee ɓoo, yaa nu nga wirndu in ci a tumee na faaniŋ ɗe, baahiɗ na baahaaɗi jen.
\s Kerhiɗoh na Kooh taamboh ŋ Kiristaani
\p
\v 11 Inhi ɓoo inah ini nik ŋ nup Heɗi, tahiɗ po ɓoo na waaɗe teeɓ ɓooɓi po ɓa inah keeh ki ; Kooh inhiɗ ɓoo baahiɗ, te ŋ namiɗ liiɓ ne ŋ ɗooƴ keeñ ciŋ ɗu, ɗu namiɗ ɓoo inah. 
\v 12 Ɓoo hayɗi ne ɓoo na woyee ɗu ne e ɓoo min pangki ; ɓoo na onee ɗu, ɗu min ndamkoh ɓoo. Ŋ ineem ɗu hey mine lof ɓi na ndamkohe ini na hotse te ɓa na ndamkoheeɗi ini nik ŋ ɗooƴ keeñ. 
\v 13 Ɓoo ambu naandiɗ ɗah, wa wuu Kooh ; ɓoo ambu ñaañiɗ ɗah, wa wuu ɗu.
\p
\v 14 Waaɗi Kiristaani waaɗ ɓoo, ɓoo minɗi ɓoof naa, ɓoo hotiɗ ne : Ɓo' yino kaan wuu ɓooɓi jen ɗah, kon ɓooɓi jen kaaniɗ ; 
\v 15 te a kaan wuu ɓooɓi jen, ne pesoh ci pesissuu wuu haf ɓa, waaye wuu Yi kaan, hulitta wuu ɓa. 
\v 16 Weɗ tah ɗiski wa nik, ɓoo markohisɗi ali ɓo' findi ɓooɓi na markohe ; ali nik ne sah wotɓa ɓoo markohee Kiristaani findi ɓooɓi markohee ɗe, woti ɓoo markohisɗi ɗe ɗaa.
\p
\v 17 Ɓo' nikka ŋ Kiristaani ɗah, a na nike feruuɗ as. In ca maañiɗ ca cootiɗ, in ci jen as kotii. 
\v 18 Te ineem jen puloh ŋ Kooh, yi taamboh ŋ Kiristaani, kerhiɗohiɗta ɓoo na haf ce, te a eɗta ɓoo pangki ne ɓoo teeɓee ɓooɓi findi ɓa kerhiɗohan na ɗe. 
\v 19 Weɗ ne Kooh nikee ŋ Kiristaani kerhiɗohɗeeɗa ɓi Adina na haf ce, te a marakɗi ɗal ciŋ ɓooɓi. A eɗ ɓoo woo kiŋ kerhiɗohi ne ɓoo yegɗoha.
\p
\v 20 Ɓoo nikiɗ Kiristaani ; wa mand haa a Kooh na ñaahee ɗu taamboh nga ɓoo : Ɓoo kiim ɗu wa kiim ŋ tiikiŋ Kiristaani : Teyɗukaat kerhiɗohɗu na Kooh ! 
\v 21 Yi moosɗi bakaaɗoh, deguuɗ bakaaɗiŋ ɓoo. Ineem raakiɗ ne, ŋ niki ɓoo nik nga ɗe, ɓoo onu kiyurah ŋ fiki Kooh.
\c 6
\p
\v 1 Ini ɓoo na pangke na Kooh tahiɗ po ɓoo na ñaahee ɗu ne rahsi ɗu rahas baahohiŋ Kooh nikuu ɓarang ɓarang. 
\v 2 Laam a woyiɗ ŋ Fiis ci ne :
\q « Ŋ jamanooniŋ wa,
\q ŋ teyiɗ kiimiŋ ɗa,
\q ŋ mbehiŋ muci
\q ŋ hirpiɗ ɗa. »\x + \xo 6:2 \xo*\xt Esayi 49:8\xt*\x*
\m Jamanooni weɗɗi ! Mbehiŋ muci weɗɗi de' !
\s Pangkoh ciŋ Kooh
\p
\v 3 Ɓoo waaɗɗi ne ɓo' raak woyaah moɗaaɗi ŋ ini kaɗ ŋ pangkiŋ ɓoo, ineem weɗ tah ɓoo waaɗɗi kafind ali ɓo' ŋ in nu wa min nik ɗah. 
\v 4 Waaye ŋ in nu nik, ɓoo na teeɓohe ne ɓoo mokɗiɗ pangkiŋ surgaaciŋ Kooh :
\b
\q Ɓoo ɓii muñ ngaŋ miskiɗ ci
\q na tolfiɗ ci keeh-keeh,
\q
\v 5 na laɓ ci ɓoo na laɓse,
\q na taƴ ciŋ kasooci,
\q na ɗuuɗ ciŋ ɓooɓi,
\q na panguk ci miskiɗ ci,
\q na aɗki, na neehaaɗiiki.
\b
\q
\v 6 Ɓoo na teeɓohee ɓooɓi ɓoo nikoh
\q na hool kiŋ ɓoo,
\q na inhiŋ ɓoo,
\q na mini ɓoo min muñ seke,
\q na baah kiŋ ɓoo,
\q na niki \w Fuuɗsiŋ Kooh|lemma="Fuuɗsi Hoolohngaani, Fuuɗsiŋ Kooh"\w* nik nga ɓoo,
\q na waaɗohi kiyooh ki.
\b
\q
\v 7 Ɓoo ɓii teeɓoha
\q na woo kiŋ keeh ki,
\q na hatiliŋ Kooh,
\q na kiyurah,
\q wi ɓoo tum ganaay,
\q ganaay songoha na naafkoha.
\b
\q
\v 8 Ɓoo yakɗu, ɓoo ƴissuutɗu,
\q ɓoo ɓii teeɓoha.
\q Ɓoo woyu in moɗaaɗi, ɓoo woyu moɗiɗ,
\q ɓoo ɓii teeɓoha.
\b
\q Ɓoo ɓii teeɓoha ŋ in nu nik :
\q Ɓoo ambu findi leyoh,
\q te ɓoo na woye keeh.
\q
\v 9 Ɓoo ambu findi inhassaaɗi,
\q te ɓoo inhuuɗ baahiɗ.
\q Ɓoo ambu findi ɓi na kaane,
\q te ɓoo ɓii pes.
\q Ɓoo ɓii torhiɗu,
\q te ɓoo apuuɗi.
\q
\v 10 Ɓoo ambu findi ɓi neɓuuɗi,
\q te ɓoo gen sumiɗ.
\q Ɓoo ambu findi ñakiɗ,
\q te ɓoo ɓii tah ɓo' laayiɗ raak.
\q Ɓoo ambu findi raakaaɗi ali in,
\q te in ci jen cuu ɓoo.
\b
\p
\v 11 Ɗu ɓi ɓaah ciŋ ɓoo gen Korenta, ɓoo woyiɗ na ɗu halang, ɓoo ɓekiɗ ɗu ŋ keeñ ciŋ ɓoo. 
\v 12 Ɗu ɓengɗi nga, e keeñ ciŋ ɗu ɓeng. 
\v 13 Mi na woye na ɗu findi ɓoyi na woye na kuɓuuciŋ ɗe, tumaat findi ɓoo, rangsukaat baahiɗ !
\s Saɓsukohaat na hoolaaɗi
\p
\v 14 Findi ɗoopaat ɓaahaaɗi minohɗi ɓaah tokiɗ sareet, kinaat nam ɓaah raanaah na kosaaɗiici. Ini yurah na ini yurahɗi ɓaah ye ? Wala siñaar na ñuus min ye ɓaah ? 
\v 15 \w Kiristaani|lemma="Kiristaa"\w* na Seytaani\f + \fr 6:15 \fr*\fq Seytaani \fq*\ft : ŋ Fiis ci ndii, gerek woo "Beliyar", wa ɓaah ŋ tiik ciŋ Seytaani.\ft*\f* min kerhiɗoh ŋ ye ? Wala kosiɗ na kosaaɗi min hunoh na ? 
\v 16 Kahan Kooh min ye kerhiɗoh na kooh ci nikaaɗiici ? Laam e ɓoo kahniŋ Koohi na pese findi a woyoha an :
\q « Ŋ hey gene na ɓa,
\q ŋ tiindee ŋ harmban ɓa,
\q ŋ nik Koohiŋ ɓa,
\q ɓa nik cuuɓiŋ ngo. »\x + \xo 6:16 \xo*\xt Lewiici 26:12; Esekiyeel 37:27\xt*\x*
\m
\v 17 Weɗ tah a woosa ne :
\q « Pulaat ŋ ɗooƴ ɓa !
\q Saɓsukohaat na ɓa !
\q Kinaat laal in hoolaaɗi\x + \xo 6:17 \xo*\xt Esayi 52:11\xt*\x*
\q te mi ŋ hey ɗu taambɗuke.\x + \xo 6:17 \xo*\xt Esekiyeel 20:41\xt*\x*
\q
\v 18 Ŋ hey nike Baab nga ɗu,
\q ɗu nik kuɓuuciŋ ngo !\x + \xo 6:18 \xo*\xt 2 Samuwel 7:14\xt*\x* »
\m Heɗi, yi Heɗ-hatil woo ineem.
\c 7
\p
\v 1 Mbaa ɓaah ciŋ ngo ŋ keeñkoh, nik ne ɓoo gapuuɗ in ceem jen ɗah, kon ɓoo farsukaat usuɓ ci jen, ci nik ŋ faan ci na liiɓ ci, te ɓoo mitiɗ hool kiŋ ɓoo ŋ nupi ɓoo nup Kooh.
\s Sum kiŋ Pool ŋ hayiŋ Tit
\p
\v 2 Ɓekaat ɓoo ŋ keeñ ciŋ ɗu ! Ɓoo tumɗi ali ɓo' in baahaaɗi, ɓoo yahrohɗi ali ɓo', te ɓoo njirñiɗkohɗi ali ɓo'. 
\v 3 Ŋ wooɗi ineem ne ŋ attee ɗu tooñ, laam ŋ woyiɗ po ƴutiɗ ne : Ali ɓoo pesee wala ɓoo kaan, ɗu ɓii ŋ keeñ ciŋ ɓoo. 
\v 4 Ɗu oniɗ to ne ŋ woo ɗu ini nik nga so keeh-keeh, te ŋ neɓuuɗ nga ɗu lool. Na miskiɗ ci ɓoo na pese jen, keeñiŋ ngo soosɗuuɗ, ŋ riifiɗ na sum.
\p
\v 5 Laam ina ɓoo reyoh Maseduwaan poyi, ɓoo raakɗi jot iɗsiɗkoha ; ɓoo cohiɗ na miskiɗ nu nik, leber ŋ hari na neƴƴoh ŋ ɗooƴ fu. 
\v 6 Waaye Kooh yi na dalɗe hel ciŋ ɓi goy, dalɗiɗ hel ciŋ ɓoo ŋ hayiŋ ɓaah ɓoo Tit. 
\v 7 Te wa hayiŋ ɗe dong haa, waaye na dalɗi ɗu daliɗ heliŋ ɗe : A naandsukiɗ ɓoo waaɗi ɗu waaɗ to hotis, na fuɗ ciŋ ɗu, na sawri ɗu sawar ŋ amboh ho. Ineem weɗ tah ho ɓaat sum.
\p
\v 8 Ŋ inhiɗ ne ɗu raakeen ini misik ɗu ŋ fiisi ŋ kaɓɗohee ɗu, waaye inwaaso ambɗi so nga. Wa keeh ne inwaaso ambeen ndo nga wa ŋ hot ne ɗu raakiɗ neɓaaɗi wa ɗu rahasa, ali nik ne wa maañɗi. 
\v 9 Waaye ɗiski wa nik ndii ŋ sumiɗ, ŋ sumɗi ŋ neɓaaɗiini ɗu raakee nga, ŋ sum ŋ ini neɓaaɗiineem ɓek ɗu ŋ ɓoƴsoh pesohaaɗ ; laam neɓaaɗiineem in baahiɗ ŋ fiki Kooh, kon ɓoo degɗi ɗu ali in baahaaɗi.
\p
\v 10 Neɓaaɗiini fu raak ŋ waaɗi fu waaɗ Kooh na ɓekee ɗa ŋ ɓoƴsoh pesohaaɗ, wi na ɓayee ɗa ŋ muc te inwaaso ambuu ɓo' nga. Waaye neɓaaɗiini fu raak ŋ waaɗi fu waaɗ Adina na ɓekee ɗa ŋ kaan. 
\v 11 Te neɓaaɗiini fu raak sagu waaɗ Kooh weem, wa in baahiɗ ŋ fiki Kooh. Markaat ini wa ɓek nga ɗu : Findi ɗu njahlafoh kotii na findi ɗu na taaskohɗe haf ɗu, findi ɗu raakoh neɓsaaɗi ; markaat findi ɗu nupoh tum in moɗaaɗi, findi ɗu waaɗoh ho hot, findi ɗu sawaroh ŋ in ciŋ Kooh, na findi ɗu na kuƴsohe ini baahɗi ! Ɗu teeɓohiɗ ŋ in ci jen ne ɗu hooliɗ ngaŋ ineem.
\p
\v 12 Wi ŋ fiisee ɗu kayteem, a ɓoyi tooñ tah ho fiisa haa, te a ɓoyi tooñu tah haa, waaye ŋ fiisiɗa ne sawri ɗu sawar nga ɓoo, ɗu mina hot ŋ fiki Kooh. 
\v 13 Ineem weɗ tah po hel ciŋ ɓoo daliɗ, te wa ineem dong haa sah, keeñ ciŋ ɓoo namiɗ soos keeh-keeh ŋ sumi Tit sum ŋ findi ɗu jen dalɗoh heliŋ ɗe. 
\v 14 Nik ne ŋ ndamkohiɗ ɗu ŋ fikiice ɗah, ŋ raakɗi kaci nga ; laam wa hooliɗ kotii ne ndamkohi ɓoo ndamkohee ɗu ŋ fiki Tit nikee keeh, findi in ci ɓoo woyee na ɗu jen nikoh keeh. 
\v 15 A naandsukka kerhiɗi ɗu kerhiɗ ɗe ɗah, waaɗi a waaɗ ɗu na ɓaatke ɓaatuk, laam ɗu taambɗukiɗ ɗe na eɗef na cir. 
\v 16 Ŋ sumiɗ ŋ oolki ŋ min ɗu ooluk ŋ in ci jen.
\c 8
\s Onoh ci wuu kosiɗ ciŋ Yerusalem
\p
\v 1 Ɓaah ci, ɓoo waaɗ ɗu woo baahohi Kooh baahoh Janguucaŋ Maseduwaan. 
\v 2 Na ini ɓa nikee ŋ miskiɗ jen, ɓa sumiɗ keeh-keeh. Te na ñaki miskiɗi ɓa ñakee jen, ɓa teeɓohiɗ waaɗ onoh keeh-keeh. 
\v 3 Ŋ miniɗa seede, ɓa eɗohiɗ ini ɓa minee eɗoh, ini uupa sah te ɓa tuma na keeñ moɗiɗ. 
\v 4 Ɓa kiim kiim ɓoo keeh-keeh ne ɓa min ɓaah ŋ ɓi na hee kaɓɗohe ɓaatɗoh wuu kosiɗ ci nik ŋ Yerusalem. 
\v 5 Ŋ waaɗ-waaɗiŋ Kooh, ɓa eɗoh haf ɓa ŋ Heɗi paaɗ, ɓa nammba eɗoh haf ɓa nga ɓoo. Ineem uupiɗ ini ɓoo sekee nga ɓa. 
\v 6 Ineem weɗ tah, ɓoo ñaahha Tit ne a ɗiindoh nangɗohiŋ in ci ɗu onoh ŋ ndeem findi a cambohee wa, pangkiŋ ɗu moɗiɗ lool.
\p
\v 7 Findi ɗu riifoh ŋ in ci jen, ŋ kos, na min woo, na inah in ciŋ Kooh, na tokɗuk ŋ in nu nik, na waaɗohi ɓoo yun nga ɗu, ndengɗukohaat ɗaa ŋ ini kaɗ ŋ onohi.
\p
\v 8 Nikɗi haa ne ɗu joya joy tum, waaye mi na woyee ɗu rek findi ɓinooɓi tokɗukoh, ne ŋ hotoot ne waaɗi ɗu waaɗ ɓooɓi, wa waaɗoh keeh-keeh. 
\v 9 Ɗu inhiɗ findi Heɗ ɓoo Yeesu \w Kiristaa\w* baahohoh ɓoo, a yi raakee, a nikka ñakiɗ wuu ɗu, ne ɗu min raak, sagu ñaki a ñak.
\p
\v 10 Wa waas ne ŋ woo ini ŋ liiɓ nga, laam yukma, e ɗu koc nangɗoh kopor ɓaatɗohoha ɓinooɓi, te a ɗu aduka waaɗ tum. 
\v 11 Kon ɗiski wa nik, ɗiindohaat ineem. Ɗiindohaata na ini ɗu min tum, findi ɗu waaɗohee wa tum.
\p
\v 12 Laam waaɗ tum nik nga ɗah, Kooh teyɗuk, a na marke ŋ ini fu raak, a marakɗi ŋ ini fu raakɗi. 
\v 13 Nikɗi haa ne e ɗu joy deguk miskiɗ ne ɗu eɗfiɗ ɓinooɓi, waaye ɓooɓi jen joy joy hend. 
\v 14 Woti, ɗu raakiɗ po ɗu gaacaacɗiɗ kon ɗu miniɗ ɓa ɓaatɗoh ŋ ñakiŋ ɓa ; kim, ɗu nam ñak te wa raak ɓa gaacaacɗiɗ ɗah, ɓa ɓaatɗoh ɗu, jaar ɗu jen ɗu hendiɗ. 
\v 15 Wa hun na ini Fiis ci woo an : « Ɓa ɓayee juuk uupɗeeɗi te ɓa ɓayee ƴissuut mitɗeen. »\x + \xo 8:15 \xo*\xt Pula 16:18\xt*\x*
\s Ɓi Tit tuuƴuuɗ ne ɓa taambkoha onoha
\p
\v 16 Ɓoo ɓii corkiɗ Kooh ŋ tokɗuki a tum ŋ keeñiŋ Tit wuu ɗu. Tokɗukeem weɗ wi a tum ŋ keeñ ciŋ ɓoo. 
\v 17 A teyɗukiɗ hay ɗiskiŋ ɗu findi ɓoo woyohee ɗe wa, wa raak ɗe sah sawriɗ nga keeh-keeh.
\p
\v 18 Ɓoo tuuƴndohiɗ na ɗe ɓaah ɓoo yi fu inah ne Janguuci jen na woye in moɗiɗ nga ɗe sagu pangkiŋ ɗe ŋ \w Yegɗohiŋ Muci\w*. 
\v 19 Te sah a yi Janguuci kooɗ ne a ɓend ɓoo ne ɓoo ɓayee ɓaatɗohi ɗah. Ɓoo heya tume yakɗoha Heɗi, wa nam teeɓoh waaɗi ɓoo waaɗa tum. 
\v 20 Ɓoo na tumohe ɗaa ne ali ɓo' raakuu woyaah ŋ findi ɓoo na taambkohe ɓaatɗohi laayiɗi nangɗohu. 
\v 21 Ɓoo na waaɗe tum in lakiɗ waas, ŋ fiki Heɗi dong haa, waaye na fiki ɓooɓi.
\p
\v 22 Ɓoo namiɗ tuuƴndoh ŋ ɓi na haye, ɓaah ɓoo yi fu inah ne ɓoo markiskiɗ ɗe waas laayiɗ ŋ findi a tokɗukoh, te waasii a uup nga sawar sagu oolki a ooluk ɗu.
\p
\v 23 Ini kaɗ ŋ Tit, a mi na ɗe na pangke, e ɓoo ɓaah pangki wuu ɗu. Waaye ɓaah ciŋ ɓoo ɓinooɓi, e Janguuci tuuƴ ɓa, e yakiɗ Kiristaani tah ɓa kuruk. 
\v 24 Kon teeɓaat ɓa ne ɗu waaɗiɗ ɓa, ɗu tuma ɗah, ɓooɓiŋ Janguuci hey inhe ineem, wa teeɓoh ne wa waas, ɓoo ndamkohee ɗu.
\c 9
\s Ŋ ini kaɗ ŋ nangɗohiŋ onohi
\p
\v 1 Ini kaɗ ŋ ɓaatɗohi na nangɗohse wuu kosiɗ ci, wa etohɗi ŋ fiisissee ne ŋ woo ɗu in nga. 
\v 2 Ŋ inhiɗ ne ɗu waaɗiɗ ɓa ɓaatɗoh lool, ŋ ndamkohiɗ ɗu ŋ fiki ɓi Maseduwaan, ŋ woo ɓa ne ɗu ɓi Akaay, ɗu ƴutiɗ ne ɗu eɗoh ɓaatɗoh yukma poyi. Te sawriŋ ɗu weem, yuniɗ ɓi laayiɗ. 
\v 3 Waaye ŋ woosiɗ ɓi Tit ne ndamkohi ŋ ndamkoh ɗu weem nikuu ŋ ɓarngi, te ɗu tum po wa nik findi ŋ woyoha.
\p
\v 4 Wa miniɗ nik ne raakiɗ ɓi Maseduwaan ɓi ɓendan ndo. Ɓoo sang ne ɓa raakuu ɗu ƴutiɗ ne ɗu eɗoh, mbaa oolki ŋ ooluk ɗu hey nike kaci nga ɓoo, ŋ woyisɗi ɗa ɗu. 
\v 5 Weɗ tah, ŋ hotta ne wa cariɗ ne ŋ tuuƴ ɓi Tit, ɓa adug ko, ɓa taambkoh ɓaatɗohi ɗu gapohee eɗoh. Ŋ ineem, wa hey ƴute bala ŋ hayan ɗah, wa nik ini ɗu onoh na keeñ soosiɗ.
\p
\v 6 Inhaat ne : Ɓoyi na soke ƴissuut, na nguɗe ƴissuut te yi na soke laayiɗ, na nguɗe laayiɗ. 
\v 7 Kon yaa nu nga eɗohaat ini a kooɗkee eɗoh ŋ keeñiŋ ɗe, inwaaso ambuu ɗe nga, keeñiŋ ɗe soos nga ; Kooh waaɗ ɓoyi na eɗohe te a sum nga. 
\v 8 Te Kooh miniɗ ɗu on in baahiɗ nu nik, ɗu genan raak in nu ɗu etoh ɗah, ɗu raak po ca gaacaac, ɗu min tum in baahiɗ nu nik. 
\v 9 Findi Fiis ci woyoha an :
\q « A na payse ñakiɗ ci laayiɗ,
\q baah kiŋ ɗe gen gen. » \x + \xo 9:9 \xo*\xt Sabuur 112:9\xt*\x*
\m
\v 10 Kooh yi na eɗe sokohi tisoh, na kañam pesoha, a hey ɗu name eɗ tisoh, a ɓaata po baah kiŋ ɗu raak rim laayiɗ. 
\v 11 Ŋ ineem, ɗu hey nike heɗ raak-raak ŋ in ci jen, ɗu min onoh keeh-keeh, ɓo' laayiɗ corkiɗ Kooh ŋ in ci ɗu eɗan ɓoo ne ɓoo eɗ ɓa ca. 
\v 12 Laam eɗohiŋ ɓaatɗohii, wa topɗi rek ŋ ɓaatɗoh kosiɗ ci ŋ etoh ciŋ ɓa, waaye wa hey tahe po corkiɗi Kooh corkiɗassan uup nga laay.
\p
\v 13 Ini ɗu tuman weem, wa hey teeɓohe findi ɗu tokɗukoh, te ɓo' laayiɗ hey yakɗe Kooh ŋ teyɗuki ɗu teyɗuk taambiɗ \w Yegɗohiŋ Muci\w* kaɗ ŋ \w Kiristaani|lemma="Kiristaa"\w*. Ɓa hey ɗe name yakiɗ ŋ ini ɗu paysoh raak-raakiŋ ɗu na keeñ soosiɗ na ɓa na ɓooɓi jen. 
\v 14 Ɓa hey ɗu kiimɗe Kooh, sagu waaɗi ɓa waaɗ ɗu laam ɓa hotiɗ baahohi yakki Kooh baahoh ɗu keeh-keeh.
\p
\v 15 Kooh corkiɗaah ŋ onohiŋ ɗe raakɗi hend !
\c 10
\s Pool langiɗ pangkiŋ ɗe
\p
\v 1 Ini kaɗ nga so mi yi Pool, ɓa na woye ne ŋ nikka ŋ fikiiɗu ɗah, mi na nike neek, ŋ ussa ɗah, ŋ kaañ. Waaye mi yii kiim ɗu inii ŋ tiikiŋ \w Kiristaani|lemma="Kiristaa"\w* yi eɗef te a baahha : 
\v 2 Ŋ kiim ɗu ne, kinaat to tah hay nga ɗu na kaañ, wa wooriɗ to ne ŋ hey tume ineem, te ɓooɓi na liiɓe ne tumohaaɗiŋ ɓoo mand na wiŋ ɓi Adina hey hote.
\p
\v 3 Wa keeh ne ɓoo ɓii pes ŋ Adina, waaye ɓoo na hiñoheeɗi findi ɓi Adina na hiñohohe. 
\v 4 Ganaay ci ɓoo na hiñohohe, ca pulohɗi Adina, ca puloh ŋ hatiliŋ Kooh, ca miniɗ yahroh taɓah naafkoha nu nik, liiɓ ci hunɗi na keeh, 
\v 5 na in nu na yakɗuke ne wa hondoh ɓooɓi inah Kooh ɗah, te ɓoo na dege liiɓ ci jen yaah ne ca kerhiɗ Kiristaani. 
\v 6 Kaɗ po kerhiɗiŋ ɗu na ɗe mit ɗah, ɓoo ƴutiɗ ne ɓoo deg kerhiɗaaɗi nu nik ŋ waas.
\p
\v 7 Markaat in ci baahiɗ ! Ɓo' nu wa woor ne a ɓaah ŋ Kiristaani ɗah, a inhaat ne ɓoo nam ɓaah ŋ Kiristaani findiice ! 
\v 8 Wa miniɗ nik ne ŋ yaksiɗkiɗ ƴissuut ŋ kikilifaaki Heɗi tum nga ɓoo, waaye ŋ raakanɗi kaci nga, ɓoo eɗu wa ne ɓoo kaɗiɗ ɗu fiki, waaye ne ɓoo yahroh ɗu haa. 
\v 9 Ŋ woyiɗ ineem laam ŋ waaɗɗi ne wa mand haa ne mi na tiitɗukee ɗu ŋ fiis ci mi na kaɓɗohee ɗu.
\p
\v 10 Raakiɗ ɓi na woye ne : « Fiis ci Pool na kaɓɗohe, a na woye woo ndengiɗ nga ca, woo ɓitiɗ, waaye a hayootta ɗah, a na mande na ɓoyi raakɗi hatil te a minɗi woo tus. » 
\v 11 Ɓo' nu na woye ineem ɗah, a ambaat ne findi woo ciŋ ɓoo mand ŋ kayit ci, ɓoo hay ɗah, tumohaaɗ ciŋ ɓoo mandan ɗaa.
\p
\v 12 Ɓoo kaañɗi mandtiɗkoh wala hendtiɗkoh na ɓi ɓo' nga, ɓi na woye ne ɓeɗ haf ɓa, ɓeɗ min pangki. Waaye ɓa na hendtiɗkohe ŋ haf ɓa, ɓa kooɗee misaal ŋ haf ɓa, ineem, wa inhaaɗi. 
\v 13 Ini kaɗ nga ɓoo nak, ɓoo heyɗi yaksiɗke yaksiɗuk uupiɗ ; ɓoo na yaksiɗkohe pangki Kooh eɗ ɓoo ŋ ɗisik ci a tuuƴ ɓoo dong, po ɗiskiŋ ɗu sah. 
\v 14 Ɓoo cootukɗi ɗiski a topiɗ ɓoo, ini ɓoo sasu hayiɗ po nga ɗu ; laam a ɓoo koc hay po nga ɗu na \w Yegɗohiŋ Muci\w* ŋ ini kaɗ ŋ Kiristaani.
\p
\v 15 Ɓoo heyɗi ndamkohe panguk ɓo' wiiriis, mbaa, ɓoo uupiɗ. Waaye ɓoo raakiɗ yaakaar ne kosiŋ ɗu ɓaatuk ɗah, ɓoo hey ɓaate angiɗ pangki ŋ harmban ɗu, te ɓoo cootkanɗi ɗiski ɓoo topɗu. 
\v 16 Ŋ ineem, ɓoo hey mine kaɗ usiɗ woya Yegɗohiŋ Muci ŋ ɗisik ci wa reeɗi, ɓoo aasuu ŋ ɗiski ɓo' wiiriis na pangke po ɓoo kee ndamkoha pangkiŋ ɗe.
\p
\v 17 Fiis ci woyiɗ ne : « Ɓo' nu na yaksiɗke ɗah, a yaksiɗkohaat Heɗi ! »\x + \xo 10:17 \xo*\xt Yeremi 9:24\xt*\x* 
\v 18 Laam ɓoyi na woye ŋ haf ce ne a yi min, a yi teyɗukaah haa, waaye a yi Heɗi woo ne a yi min !
\c 11
\s Pool na \tl apootar\tl* ci leyoh ci
\p
\v 1 Ɗu mineen ndo muñiɗ ƴissuut ŋ woo ɗu woo naandoha ɗah ! Waaye ɗu ɓii muñiɗ to sah ! 
\v 2 Ŋ waaɗ ɗu waaɗ po maa fiire'ee ɗu fiire miskiɗ, fiireeni puloh ŋ Kooh. Ŋ teyɗukiɗ ɗu ƴaar yino kut, yi nguɗ \w cakiim\w* nga ɗu ; te ŋ waaɗiɗ ɗu ɗe eɗ, a yi \w Kiristaani|lemma="Kiristaa"\w*, findi cafaƴ inhaaɗi ƴaar yi hool fec na wikohse. 
\v 3 Waaye, findi iiña ñaañohohee Aawa ŋ tumohaaɗ caŋ ɗe,\x + \xo 11:3 \xo*\xt Camba 3:1-6\xt*\x* ŋ neƴƴohiɗ ne liiɓ ciŋ ɗu nduuɗu po ɗu faɗɗukohu ambi ɗu amb ndengiɗ ŋ Kiristaani te wa hunnda na hool.
\p
\v 4 Ɓo' hay nga ɗu, teeɓee ɗu Yeesu, teeɓ ɗalohiɗ na findi ɓoo woyoh ɗu ɗah, ɗu hey ɗe teyɗuke. Wala ɓo' hay, gap ɗu fuuɗis wiiriis ɗalohiɗ na \w Fuuɗsi Hoolohngaani|lemma="Fuuɗsi Hoolohngaani, Fuuɗsiŋ Kooh"\w* ɗu rahas, wala a yegɗohee yegɗoh wiiriis ɗalohiɗ na \w Yegɗohiŋ Muci\w* ɗu teyɗuk ɗah, ɗu hey teyɗuke ɓoyeem baahiɗ. 
\v 5 Ŋ ambiɗ ne \w \+tl apootar\+tl*\w* ciŋ ɗu yakak ci ɗu na woye ɓeem, ɓa uupiɗɗi so ali in. 
\v 6 Ali nik ne ŋ minɗi woo, ŋ nikɗi inhaaɗi in ciŋ Kooh ; te ɓoo teeɓohiɗa hooliɗ ŋ in ci jen.
\p
\v 7 Ŋ ruhsiɗ ruhsiɗ haf fo, ŋ meeɓpa ɗu, ŋ wirndiɗukɗi ɗu wi ŋ woyee ɗu Yegɗohiŋ Muci, wi puloh ŋ Kooh. Ini ŋ tum weem bakaaɗ e ? 
\v 8 Ŋ ɓay kopor ŋ ɓi Jangu wiiriis, ɓi teyɗuk ko ɓaatɗoh, ne ŋ panguk wuu ɗu. 
\v 9 Te wi ŋ nik ŋ ɗiskiŋ ɗu, ŋ ñakka in ɗah, mi na hayeeɗi ŋ ali ɓo' ŋ yaaɓɗee ɗe. Wa kaɗohee ɗaa po findi ɓaah ciŋ ɓoo pulohee Maseduwaan hayoh, ɓeɗ eɗ to ini ŋ etohe. Ŋ moosɗi yaaɓɗoh ali ɓo' nga ɗu, te wa moosanɗi nik. 
\v 10 Findi wa wooroh ne keeh ki puloh ŋ Kiristaani weɗi nga so, wa wooroh ɗaa ne ali ɓo' ŋ kur ciŋ Akaay minɗi so hondoh ndamuk ŋ ineem ! 
\v 11 Wa ye tah ŋ woosa ineem ? Ŋ waaɗɗi ɗu waaɗɗi e ? Kooh inhiɗ ne ŋ waaɗiɗ ɗu ! 
\v 12 Findi mi na tumohe, ŋ faɗanɗaa, laam raakiɗ ɓi na waake naafkoha, waaye ŋ onanɗi ɓa wa, po ɓa kee hendtiɗkoha na ɓoo ŋ yaksiɗki ɓa na yaksiɗke.
\p
\v 13 Ɓooɓeem, ɓa \tl apootar\tl* leyoh, ɓa pangkoh ci na ñaañohohe, ɓa na kulɓa'kohe ne ɓa \tl apootar\tl* ciŋ Kiristaani. 
\v 14 Wa nikɗi in feyohiɗ. Seytaani sah na kulɓa'kohe kulɓa'koh malaaka leer. 
\v 15 Kon wa feyohɗi ne pangkoh ciŋ ɗe namee kulɓa'koh pangkoh yurhiɗ. Waaye ŋ reehɗohaaniŋ ɓa, ɓa hey wirndasse baahaaɗiikiŋ panguk ciŋ ɓa jen.
\s Miskiɗ ci \tl Apootar\tl* Pool coh na ca
\p
\v 16 Ŋ woyisa, ali ɓo' kinaat to amboh findi naandiɗ - wala teyɗukaat naandohaaciŋ ngo, po ŋ nam min tipuk ƴissuut ! 
\v 17 Ini mi na hee woye wii, ŋ wooɗi wa findi Heɗi na woyohe, wa ɓaah ŋ naandohaaciŋ ngo, wa tipuk rek. 
\v 18 Laam raakiɗ laayiɗ ɓi na tipke ŋ in ciŋ Adina, mi na hee name tipuk findiiɓa. 
\v 19 Ɗu ɓi ñaañiɗ ci, ŋ hotiɗ ne ɗu teyɗukiɗ te ɗu neɓuuɗ ŋ ɓooɓi naandiɗ ci ! 
\v 20 Ɗu teyɗukiɗ ne ɓa ñaamɗukohee ɗu, ɓa ɓayee in ciŋ ɗu jen, ɓa njirñiɗkohee ɗu, ɓa yaksiɗkee ŋ ɗafuk ɗu, ɓa tipee ɗu paɗ ! 
\v 21 A', mi deey, ŋ meeɗɗi tumoh ɗaa. Ŋ supkiɗa woo, waaye wa keeh ne ɓoo tasiɗ kaañ.
\p Moona in nu ɓo' kaañ ɗah, ŋ kaañiɗa - ee, mi na woye naandohaaciŋ ngo nak ! 
\v 22 Ɓa na woye ne ɓa Heber e ? Ŋ nam nik Heber. Ɓa ɓaah ŋ Israayel e ? Ŋ nam ɓaah ŋ Israayel. Ɓa set ciŋ Ibrahiima e ? Ŋ nam nik setiŋ ɗe. 
\v 23 Ɓa pangkoh ciŋ Kiristaani e ? - Faɗa ŋ woo naandoha - ñam uup ɓa wa nik. Nik panguk miskiɗ ɗah, ñam uupiɗ ɓa nga ; nik taƴ ŋ kaso ɗah, ñam uupiɗ ɓa nga ; nik laɓu ɗah, e laɓ ci ŋ laɓu uup laay fuuf ! Waas laayiɗ, ŋ hotee ŋ kakaan ki an.
\p
\v 24 Ini ree waas yatuus, Yawuut ci laɓiɗ to leraw ciŋ ɓa ndaŋkiyaah-kaahay na yasna-nikiis (39)\f + \fr 11:24 \fr*\ft \+w Waasiŋ|lemma="waasiŋ Musaa"\+w* \+w Musaa\+w* sangohiɗ ne ɓo' laɓu ini uup waas ndaŋkiyaah-nikiis (40). Yawuut ci sangee ɗal ineem, weɗ tah ɓa meeɗeen laɓ ɓo' leraw po ɓa ree waas ndaŋkiyaah-kaahay na yasna-nikiis, ɓa tufkiɗ. Marka teerndiŋ \ft*\xt Rohƴiɗi 2:1-3\xt*.\f* ciŋ ɓa, 
\v 25 ɓi \w Rom\w* laɓiɗ to na ndooɗ ciŋ ɓa waas kaahay, ŋ moosiɗ tapsohu atoh ne ŋ apu, waas kaahay \tl bato\tl* diigiɗ na so ŋ cookmi, ŋ tumiɗ noh yino na wek yino ŋ ɗooƴ masmiŋ cookmi. 
\v 26 Ŋ ɓaaɓ ciŋ ngo laayiɗ ci, ŋ cohiɗ na in wooraaɗi laayiɗ : nupɗiŋ kal ci, na nguɗndukohoh ci, cum ɗah ɓaah ciŋ ngo Yawuut ci waaɗ to tum miskiɗ, wala ɓi nikɗi Yawuut sah, cum ɗah ŋ coh na in wooraaɗi ŋ kur ci, na nduufi, na cookmi, cum ɗah sah e ɓi na woye ne ɓa ɓaah na ɗa kos na ɓekee ɗa wa. 
\v 27 Cum ɗah ŋ pangkee ɗiska panguk uup miskoh ; ŋ raak neeh laayiɗ neehaaɗi, cum ɗah ŋ aɗuk, cum ɗah ŋ sifaɗuk, waas laayiɗ ŋ raak mbeh mulnguus ñamaaɗi ; soosi hee so ape, cum ɗah ŋ ñak ɓekkaah.
\p
\v 28 Laayiɗ tasiɗ, waaye ca tahɗi so woo, ɗal wi na range hafiŋ ngo Kooh-nu-wiis, liiɓsiɗohi ŋ ini kaɗ ŋ Janguuci jen ! 
\v 29 Ŋ hotta ɓoyi ndengɗi ŋ kosiŋ ɗe ɗah, wa goyiɗ to. Ɓo' bakaaɗɗukoh morom ce ɗah, wa aay yo keeñ ! 
\v 30 Nik ne ŋ joy joy tipuk ɗah, ŋ tipkohan raakaaɗiikiŋ ngo hatil. 
\v 31 Kooh, yi nik Koohiŋ Yeesu Kiristaa Heɗi, a nammba nik Baabiŋ ɗe te a ƴeekaah po faw, a inhiɗ ne ŋ leyɗi. 
\v 32 Wa ŋ nik ŋ Damas, goornoora nikiɗee buur Aretaas nga nakoheen niiɗu buntaacaŋ miira wil kur-taaha jen ne a amb mbo, 
\v 33 waaye ŋ ɓeku ŋ pañe, ŋ taambɗuusa ŋ palaŋteeraŋ miira, ŋ yooruusa huntiɗkohiɗ naa, ŋ fussa ɗe.
\c 12
\s In ci hayɗoh Pool haa heeƴ
\p
\v 1 Nik ndii tipkee raakɗi njiriñ, waaye ŋ joyiɗa tum. Ŋ hey woye in ci hayɗoh ho haa heeƴ na ci ɗasɗukiɗ ci Heɗi teeɓ po. 
\v 2 Ŋ inhiɗ ɓo' nikiɗ ŋ \w Kiristaani|lemma="Kiristaa"\w*. Wa tumiɗ kiis ndaŋkiyaah na nikiis (14) kotii, wi Kooh ɓay ƴaareem po ŋ Asamaana kaahayɗoh. Andi a ɓay ɗe na faaniŋ ɗe ? Ŋ inahɗi. Andi na faaniŋ ɗe haa ? Ŋ inahɗi, waaye Kooh inhiɗ. 
\v 3,4 Ee, ŋ inhiɗ ne ƴaareem ɓayuuɗ po ŋ Aljana (Ŋ woyis ne, ŋ inahɗi andi wa nikee na faaniŋ ɗe wala. Kooh dong a yi inah), te ndaam, a kerhiɗ woo ci minɗi woyu te ali ɓo' onuuɗi ne a woo ca.
\p
\v 5 Ŋ hey ndamke ŋ ini kaɗ ŋ ƴaareem - waaye, ini kaɗ nga so, ŋ ndamkanɗi ɗal ŋ ñaki ŋ ñak hatil. 
\v 6 Te kat, ŋ waakeen hotaat to ɗah, ŋ heeɗi nike naandiɗ, ŋ hee woye ini raak. Waaye mi na wortuke wortuk waak hotaat to, laam ŋ waaɗɗi ne ɓooɓi liiɓ nga so ini uup ini ɓa na hotee so haɓɗe, wala wi ɓa na kerhee so woye.
\p
\v 7 Waaye, ne ŋ yaksiɗkuu ŋ haf fo ŋ in ci feyohiɗ ci ŋ teeɓu, faaniŋ ngo ɓeku rup ; rupeem, weɗ ini Seytaani woos ne wa laɓ po, Kooh sang ne ŋ hotsiɗuk. 
\v 8 Waas kaahay ŋ kiimiɗa Heɗi ne a saɓsoh ho na ineem. 
\v 9 A loffa so ne : « Baahohi ŋ baahoh ɗa doyiɗ. Hatiliŋ ngo na hotke hooliɗ ne fu ñak hatil ɗah. »
\p Kon ini uup po neɓ, weɗ ne ŋ waak hotaat to ŋ ñaki ŋ ñak hatil, ineem weɗ na hee tahe hatiliŋ Kiristaani nik nga so. 
\v 10 Ineem weɗ tah ho neɓu ngaŋ nik ndengaaɗi, ŋ neɓuusa ŋ ɓas ci, na miskiɗ ci, na tolfiɗ ci, na neƴƴoh ci, sagu Kiristaani ; laam, ŋ ñakka hatil ɗah, weɗ mi na raakohe hatil.
\s Pool waaɗ ne ɓi Korenta kaɗ fiki ŋ kosiŋ ɓa
\p
\v 11 Ŋ naandtiɗohiɗ, waaye e ɗu ɓek ko nga, ɗu ɓi joyee so meeɓ. Ali nik ne ŋ tus haa, \w \+tl apootar\+tl*\w* ciŋ ɗu yakak ci uupɗi so ŋ ali in. 
\v 12 In ci teeɓoh ne ŋ \tl Apootar\tl*, ca tumuuɗ ŋ harmban ɗu. Ca tumuuɗ na min muñ keeh-keeh na firnde na keemaan na in feyohiɗ nu nik. 
\v 13 Janguuci cinooci tumɗu ye ɗu tumɗuuɗi wa ? Ɗal degi ŋ degɗi ɗu ali in, mi ŋ haf fo. Ɗaasaat to wa !
\p
\v 14 Ŋ ƴutiɗ ne ŋ hay ɗiskiŋ ɗu waasi kaahayɗoh, te ŋ deganɗi ɗu ali in. Mi na waakee ɗu, waaye koporiŋ ɗu haa. Kuɓuuci na nangɗoheeɗi kopor wuu ɓi rim ɓa, e ɓi rim ɓa na nangɗohɗee ɓa. 
\v 15 Ini kaɗ nga so, ŋ teyɗukiɗ na keeñ soosiɗ ne ŋ eɗoh ini ŋ raak jen, te sah ŋ eɗoh haf fo jen wuu ɗu. Waaɗi ŋ waaɗ ɗu, findi wa yakoh, hanaa, waaɗi ɗu waaɗ to uupanɗi nga haawsuk ?
\p
\v 16 Ɗu teyɗukiɗ ne ŋ raanɗi ɗu ali in. Waaye ɓum amb ne ŋ lahiɗ ŋ ɗisik wiiriis ŋ ñaañohha ɗu. 
\v 17 Ɓooɓi ŋ woosee nga ɗu, ŋ njirñiɗkohiɗ ɗu taamboh ŋ yino nga ɓa e ? 
\v 18 Ŋ kiimeen Tit ne a hay nga ɗu, ŋ ambsohha ɗe na ɓaah ɓoo yi hunee na ɗe. Tit njirñiɗkoh ɗu njirñiɗkoh e ? Ŋ hot a njirñiɗkohɗi ɗu ! Andi mi na ɗe ɓoo ɓaahɗi ɓaahɗi liiɓohaaɗ wala ini ɓoo na tiinde ?
\p
\v 19 Ɗu liiɓ ne ina mi na woye poyi, mi na waaɗe hooliɗ haf ɓoo ŋ fikiiɗu e ? A'aa ! Ɓoo na woye ŋ fiki Kooh na niki ɓoo nik ŋ Kiristaani, te in ci ɓoo na woyee ɗu jen, ɓoo na woyee ɗu ca, ne ɗu kaɗ fiki ŋ kosi ɗu kos, ɗu ɓi ɓaah ciŋ ngo ŋ keeñkoh.
\p
\v 20 Laam ŋ neƴƴohiɗ ne ŋ ree ɗiskiŋ ɗu ɗah, ŋ raakanɗi ɗu findi ŋ waaɗoh, te ɗu namanɗi so hotoh findi ɗu waaɗoh. Ŋ neƴƴohiɗ ne ŋ raak ŋ harmban ɗu lahtoh na siisoh, ayrukoh, nookoh, ɓasoh, ɗooɓoh, hotsiɗuk na ɗuuɗ. 
\v 21 Ŋ neƴƴohiɗ ne ŋ ɓaaɓiŋ ngo na haye, Koohiŋ ngo ƴissuutɗis so ŋ fikiiɗu, te ɓo' laayiɗ fuɗɗukoh ho, ɓi ris bakaaɗ findi ɗeɓgaan te ɓa eɗɗi usuɓ finho, na faankoh sangohuuɗ na cakaay.
\c 13
\s Ñaahoh ciŋ Pool mirndoh
\p
\v 1 Wii weɗ waasi kaahayɗoh ne ŋ hey ɗu marke. Findi Fiis ci woyoha : « Seede kanak wala kaahay raak ɗah, in nu nik miniɗ tufkiɗu. »\x + \xo 13:1 \xo*\xt Rohƴiɗi 19:15\xt*\x* 
\v 2 Wi ŋ hay kotiŋ ngo kanakɗoh, ŋ woyeena, te woti ŋ nikɗi nga, waaye mi yii woyisa ɓi bakaaɗee waam, na ɓinooɓi jen : Ŋ hayis ɗu marke ɗah, ŋ faɗanɗi ali ɓo' ! 
\v 3 Ɗu na waake firndeeni \w Kiristaani|lemma="Kiristaa"\w* na woyohe taamboh nga so haa e ? Nga ɗu, a ñakɗi hatil, a na tume na hatil ŋ harmban ɗu. 
\v 4 A daaƴu ŋ kurwaana ŋ ñak hatil, waaye a yii pes ŋ hatiliŋ Kooh. Ɓoo namiɗ ñak hatil ŋ niki ɓoo nik nga ɗe, waaye ɗu hey hote ne ɓoo ɓii pes na ɗe taamboh ŋ hatiliŋ Kooh.
\p
\v 5 Ɓeesaat haf ɗu baahiɗ po ɗu inah andi ɗu ɓii ŋ kosi ; waakaat firndeeni ŋ haf ɗu. Wa wooriɗ ɗu ne Yeesu Kiristaa yii nga ɗu e ? Wa ɗaleen ineem ɗah, ɓeesi ɗu ɓees haf ɗu heen teeɓohe ne ɗu jallaaɗi. 
\v 6 Waaye ŋ oolkiɗ ne ɗu hey hote firndeeni ne ɓoo nikɗi jalla'aaɗi. 
\v 7 Ɓoo na kiime Kooh ne ɗu tumuu ali in baahaaɗi ; wa nikɗi haa ne ɓoo na waaɗe teeɓoh ne ɓoo \w \+tl Apootar\+tl*\w* baahiɗ. Waaye ɓoo na kiime Kooh ne ɗu tumee ini baah. Ini uup po neɓ weɗ ne ŋ etohɗi ɓees hatiliŋ ki'apootar kiŋ ngo.
\p
\v 8 Laam ɓoo raakɗi hatil hiñohoha keeh ki ; hatiliŋ ɓoo, wa hiñohoha wuu keeh ki dong. 
\v 9 Ɓoo ñak hatil te ɗu raak hatil ɗah, ɓoo hey neɓse nga, waaye ini ɓoo na kiime Kooh weɗ ne ɗu nik ɓo' mitiɗ. 
\v 10 Weɗ tah po ŋ kaɓɗohee ɗu fiisii ŋ nikaaɗiikiŋ ngo nga ; ne kaɗ po ŋ nik nga ɗah, wa etohuu ne ŋ tum nga ɗu tumohaaɗ ndengiɗ ŋ kikilifaaki Heɗi eɗ to. A eɗ to wa yahrohoha kosiŋ ɗu haa, waaye kaɗɗohaa wa fiki.
\s Askohi
\p
\v 11 Ini mirndoh, ɓaah ciŋ ngo, sumaat, haɓɗissaat pesohaaɗiŋ ɗu, ñaahtiɗohaat, kerhiɗohaat, pesaat ŋ jam, te Kooh yi riif na waaɗoh na jam hey nike na ɗu. 
\v 12 Kañɗohaat ŋ harmban ɗu, ɗu morgiɗkohee, wa hun na keeñ hooliɗ. \w Ɓo'-Kooh ci|lemma="ɓo'-Kooh ci"\w* nik ndii jen ɓa ɗii kañiɗ ɗu.
\p
\v 13 Baahohiŋ Yeesu Kiristaa Heɗi na waaɗi Kooh waaɗ ɗu na ambsukohi ɓoo raak ŋ \w Fuuɗsi Hoolohngaani|lemma="Fuuɗsi Hoolohngaani, Fuuɗsiŋ Kooh"\w* nikaat na ɗu jen !