\id 1TI - Saafi-Saafi
\ide UTF-8
\h 1 Timoote
\toc3 1Ti
\toc2 1 Timoote
\toc1 Fiisi Pool koc kaɓɗoh Timoote
\mt Fiisi Pool koc kaɓɗoh Timoote
\is Rangsohaani
\ip Pool ɓaahee ŋ Israayel ci, ŋ cuuɓiŋ Benyaamin.\x + \xt Ɓi Rom 11:1; Ɓi Filippi 3:5\xt*\x* A nikee \w \+tl Farisen\+tl*\w*.\x + \xt Tum ci 23:6; Ɓi Filippi 3:5\xt*\x* Ŋ finho \w Paantakot\w*, wi Janguuni camb ɓaatuk, a ɓaahee ŋ ɓi tolfiɗee kosiɗ ci.\x + \xt Tum ci 7:58–8:3\xt*\x* Waaye wa raakka mbeh, a cohha na Yeesu, a kossa\x + \xt Tum ci 9:1-30\xt*\x* po a nikka \w \+tl Apootar\+tl*\w* sah. Teerndiŋ "Tum ciŋ \tl Apootar\tl* ci" teeɓohiɗ pangkiŋ ɗe wi a nik \tl Apootar\tl* ini kooɗoh ŋ saar 13.
\ip Wa miniɗ nik ne Pool hotiɗ Timoote ŋ ɗooƴ ɓaaɓaŋ ɗe yakka koc, wa a nik ŋ Listar na Derbe.\x + \xt Tum ci 14:6-7\xt*\x* Tiikiŋ Timoote, wa koc woyu ŋ ɗooƴ ɓaaɓaŋ Pool yakka kanakɗoh.\x + \xt Tum ci 16:1-5\xt*\x* Weem raak ɗe kosiɗ te a nikee ŋ ndaam.
\ip Ini kooɗoh ndeem, Timoote ɓaahee ŋ ɓi hunee na Pool. Timoote meeɗeen ɓaaɓ in laayiɗ findi wi a wikee fiis ci Pool kaɓɗohee wala cum ɗah a nikiɗ Pool ŋ ɗisik.\x + \xt Tum ci 16:1-5; 17:4-16; 18:5; 19:22; 20:4\xt*\x* Pool seede'iɗ Timoote seede moɗiɗ ŋ fiisi a kaɓɗoh ɓi Filippi.\x + \xt Ɓi Filippi 2:19-22\xt*\x* Marka tiikiŋ Timoote ŋ Limiŋ tiik ci.
\ip "Fiisi Pool koc kaɓɗoh Timoote" wa fiisu ŋ finho "Tum ciŋ \tl Apootar\tl* ci", mbaa raakiɗ in laayiɗ ci ɓo' inahɗi nga, waaye ɓoo inhiɗ ne wa raak Pool nikisɗi ŋ kaso te Timoote nikee ŋ Efes,\x + \xt 1 Timoote 1:3; 3:14\xt*\x* kon wa fiisu ŋ finho "Fiisi Pool kaɓɗoh ɓi Efes".
\iot - Fiisi Pool koc kaɓɗoh Timoote kaɗtiɗoh an :
\io1 - Kañɗohi \ior 1:1-2\ior*
\io1 - Wortuk ɓi na jangɗohe in ci raakaaɗiici \ior 1:3-11\ior*
\io1 - Pool corkiɗiɗ Kooh ŋ baahohi a baahoh ɗe \ior 1:12-17\ior*
\io1 - Nakoh ci kaɗ ŋ findi Janguuni joy tiindɗohu \ior 1:18–3:15\ior*
\io1 - Yakiɗ \w Kiristaani|lemma="Kiristaa"\w* \ior 3:16\ior*
\io1 - Wortuk jangɗoh baahaaɗi, fu nik jangɗohoh baahiɗ \ior 4\ior*
\io1 - Nakoh ci kaɗ ŋ findi ɓooɓiŋ Janguuni joy adgohohu \ior 5:1–6:2\ior*
\io1 - Findi woo ciŋ jangɗohoh ciŋ in ci raakaaɗiici joy hiñohohu \ior 6:3-16\ior*
\io1 - Nakoh ci kaɗ ŋ findi heɗ raak-raak ci joy tumoh \ior 6:17-19\ior*
\io1 - Dengkoh ci mirndoh \ior 6:20-21\ior*
\c 1
\s Kañɗohi
\p
\v 1-2 Mi yii kañiɗ ɗa, Timoote, mi yi Pool, \tl \+w Apootariŋ|lemma="apootar"\+w*\tl* \w Kiristaani|lemma="Kiristaa"\w* Yeesu. Ŋ tumuuɗ \tl Apootar\tl* ŋ nakohiŋ Kooh, Mucɗohiŋ ɓoo, na nakohiŋ Kiristaani Yeesu yi ɓoo oolkoh. Mi yii fiis kaytii ne ŋ woo na ɗa Timoote, kuɓki ŋ amb findi kuɓuuso keeh-keeh ngaŋ kos. Kooh yi Baabi baahohaat ɗa, a yirmaat ɗa, a on ɗa jam ; Kiristaani Yeesu Heɗ ɓoo baahohaat ɗa, a yirmaat ɗa, a on ɗa jam.
\s Wortuk ɓi na jangɗohe in ci raakaaɗiici
\p
\v 3 Tuma findi ŋ woyohee ɗa wa, wa ŋ kaɗee kur caŋ Maseduwaan. Tasa ŋ Efes, fu woo ɓi na jangɗohe in ci nikɗi keeh, ɓa faɗ jangɗoheem. 
\v 4 Woyaa ɓa, ɓa faɗ andiin ci ɓa na andiine ɓooɓi, na limiŋ tiik ciŋ caac ci minaaɗi reehi. In ceem na ɓeke taastiɗoh rek. Ca ɓaatɗohɗi ali ɓo' ŋ findi Kooh waaɗoh ne in ci tiindoh ɗaa ŋ ini kaɗ ŋ kos.
\p
\v 5 Ini tah ŋ woosa ineem, weɗ ne ŋ waaɗ ne ɓooɓi waaɗtiɗoh na keeñ moɗiɗ, ɓa inhisoh baahiɗ na baahaaɗi, ɓa raak kos keeh-keeh. 
\v 6 Raakiɗ ɓi ɗal waaseem, ɓa muuƴca ŋ taastiɗoh ci raakɗi haf na kose. 
\v 7 Ɓa tum haf ɓa jangɗohoh ciŋ \w waasiŋ|lemma="waasiŋ Musaa"\w* \w Musaa\w* te ɓa inahɗi ali in, wa in ci ɓa na woye haa, wa in ci ɓa na ndengɗe haa.
\p
\v 8 Ɓoo inhiɗ ne waasiŋ Musaa baahiɗ, ne findi wa na taambɗohse degu ŋ waas ɗah. 
\v 9 Inhaat inii : E yurhiɗ ci tah waasi kuruk haa waaye wa wuu tumoh moɗaaɗiici na ɓi sang taambiɗ waas, ɓi sang kerhiɗ Kooh na bakaaɗoh ci. Wa wuu ɓi bugluuɗi ŋ Kooh na ɓi eɗɗi in ciŋ Kooh cir, wa wuu ɓi na ape yaay ciŋ ɓa na baab ciŋ ɓa, wa wuu nguɗoh kiñin ci. 
\v 10 Wa wuu ɓi na faankohe faankoh sangohuuɗ, wa wuu ƴaar-ɓitiɓ ci na toontukoh \w ñaam\w* ci. Wa wuu leyoh ci na ɓi na giñe mbalay. Wa wuu ɓi na tume in ci ɗaloh na keeh ki jangɗohu.
\p
\v 11 Jangɗoheem hun hun na \w Yegɗohiŋ Muci\w* ŋ dengkohu, wi na teeɓohe yakki Kooh yi Heɗ muuɗ yak.
\s Pool corkiɗiɗ Kooh ŋ baahohi a baahoh ɗe
\p
\v 12 Mi yii corkiɗ Heɗ ɓoo Kiristaani Yeesu yi on ndo hatil, a oolukka so po a tufkiɗta so, ne ŋ nik ŋ pangkii. 
\v 13 Mi yi meeɗ ɗe ɓas, ŋ tolfiɗee ɓi kos ɗe, ŋ tumee ɓa in miskiɗ lool. Waaye ŋ miskiɗ Heɗ ɓoo, laam e inhaaɗi ɓekee so nga sagu kosaaɗi. 
\v 14 Heɗ ɓoo baahohiɗ to laayoh na laayoh, a onnda so kos na waaɗ Kooh na ɓooɓi, ŋ niki ŋ nik ŋ Kiristaani Yeesu.
\p
\v 15 Woo kii wooriɗ te wa oolkaah keeh-keeh : « Kiristaani Yeesu hayiɗ Adina ne a muciɗ bakaaɗoh ci. » Te e ñam uup nik bakaaɗoh. 
\v 16 Waaye ŋ yirmuuɗ ne Kiristaani Yeesu teeɓoh mini a min muñ jen nga so, mi yi uup nik bakaaɗoh. Te ineem misaal ne yaa nu kos ɗe ɗah, hey rahse kipes ki heyɗi reehe.
\b
\q
\v 17 Kooh yi yino-kongi,
\q Buuri genan gen,
\q yi kaananɗi po faw,
\q yi has minɗi hot,
\q a yi eɗaah cir,
\q a yi yakɗaah po faw !
\b
\q Amiin !
\b
\s Hiñohi baahiɗi
\p
\v 18 Kon Timoote, mi yii dengkoh ɗa inii kuɓu. Wa hun na woo-woosuuɗ ci woysee nga ɗa ɗeɓgaan. Taambɗa woo ceem, fu hiñoh hiñohi baah ; 
\v 19 kaɗa nga na kos na inhisoh baahiɗ na baahaaɗi. Raakiɗ ɓi faɗ in ceem po ɓa yahrohiɗ kosiŋ ɓa findi gaal suuhiɗ. 
\v 20 Ɓooɓeem Himene na Aleksaandar ɓaah nga ; ŋ faɗiɗ ɓa na Seytaani ne ɓa jang, ɓa ɗalissuu Kooh.
\c 2
\s Nakoh ci kaɗ ŋ findi ɓooɓi kiimohan Kooh
\p
\v 1 Mbaa ini uup raak njiriñ, weɗ mi na hee woye paaɗ : Mi na ñaahohe ne ɓi Janguuni nik ŋ kiim Kooh, ɓa kiimee keeh-keeh wuu ɓooɓi jen, wa hun na corkiɗ Kooh. 
\v 2 Ɓa kiimɗee buur ci na kilifaaciŋ kur ci jen ne ɓoo min raak kipes yeeɓkiɗ huniɗ na jam, ɓoo haɓɗee in yurhiɗ ŋ fiki Kooh, na mandohaaɗ baahiɗ keeh-keeh. 
\v 3 Ineem weɗ moɗ te weɗ neɓ Kooh Mucɗohiŋ ɓoo, 
\v 4 Kooh yi waaɗ ne ɓo' ci jen muc te ɓa kaɗ po ɓa min inah keeh ki. 
\v 5 Laam :
\b
\q A Kooh yino dong raak,
\q te harmbanɗoh yino nam raak
\q ŋ harmban Kooh na ɓo' ci.
\q A \w Kiristaani|lemma="Kiristaa"\w* Yeesu, te a ɓo',
\q
\v 6 yi eɗoh kiñin kiŋ ɗe haf ce
\q ne a romkoh ɓo' ci jen.
\b
\p Ineem weɗ Kooh teeɓoh wi jamanooni a gapohee wa ree. 
\v 7 Ŋ pangkiŋ Kooh weem, a tummba so yegɗohoh na \w \+tl Apootar\+tl*\w* ne ŋ jangɗee ɓi nikɗi Yawuut kosi na keeh ki. Mi na woye keeh, ŋ leyɗi.
\p
\v 8 Mbaa ŋ waaɗ ne, ŋ ɗisik nu ɗu coh ɗah, ƴaar ci kiimee Kooh, ɓa raɗsee Kooh yaah hooliɗ, wa hunuu na ayruk na taastiɗoh.
\s Ini kaɗ ŋ ɓitiɓ ci
\p
\v 9 Ŋ namiɗ waaɗ ne ɓitiɓ ci liiɓ baahiɗ ŋ kulɓaaci ɓa na ɓekke, ɓa haɓɗukee na kulɓa yiwiɗ, eɗuuɗ cir. Ɓa haɓɗukuu haɓɗuk uupiɗ ŋ haf ciŋ ɓa, na urus ci wala per ci ɓa na tokke, na kulɓaaci na care kopor laayiɗ. 
\v 10 Waaye haɓɗukiŋ ɓa nikaat tum in baahiɗ findi ɓitɓi woo ne a nikiɗ Kooh.
\p
\v 11 Ɓitiɓ joy joy kerhiɗ jangɗohoh ci, a jangee na yeeɓuk. 
\v 12 Ŋ teyɗohɗi ɓitiɓ ne a jangɗohee wala a adgiɗ ƴaar ; a joy joy ɗek. 
\v 13 Laam, a Aadama ɗeɓ mahu, Aawa taammba nga. 
\v 14 Te a Aadama ñaañohu haa, a ɓitɓa a yi ñaañohu, a kerhiɗeeɗi Kooh, a keennda ŋ bakaaɗ. 
\v 15 Waaye raakiŋ ɓitiɓ ci kuɓu hondohɗi ɓa mucɗu\f + \fr 2:15 \fr*\ft Ŋ jamanoonaam, wa raakeen ɓi ɓitiɓ nga, ɓa nikee heɗ raak-raak, ɓa raakee hot-hot wiiriis ŋ waas-Kooh, an ɓo' joyee nik liiɓ dong, faan baahɗi. Wa kaɗta po ɓa sannga sah raak kuɓu. Raakiɗ liiɓoh ci amb ne ɓitiɓ ceem jeemeen ɓek liiɓohaaɗeem ŋ Janguuni. Wa miniɗ nik ne weɗ tah po Pool woosa ini a woo ŋ ndii.\ft*\f*\x + \xo 2:15 \xo*\xt Camba 3:15-16\xt*\x* ne ɓa ris kosiɗ Kooh, ɓa waaɗ ɗe, ɓa pesee pes hooliɗ wuu ce te peseem hun na amb haf ɓa ɗah.
\c 3
\s Findi ɓi adgohan Janguuni joy mand
\p
\v 1 Woo kii woo wooriɗ : Ɓo' nu na waaɗe nik yi adgohan ɓi Janguuni ɗah, a na waaɗe panguk moɗiɗ. 
\v 2 Tahha po ɓoyi adgohan ɓooɓi, a joyɗi raak woyɗaah moɗaaɗi ; a joy top ŋ ɓitiice, a min amb haf ce, a hendɗoh pesohaaɗiŋ ɗe, a nawu. A dalɗee ɓi na haye kahan ce moɗoɗ, a min jangɗoh. 
\v 3 A joyɗi nik laaroh, wala ɓo' waaɗiɗ hiñoh, waaye a joy nik ɓo' soosiɗ, waaɗiɗ jam ; a waaɗuu kopor lool.
\p
\v 4 A raak taambkoh moɗoɗ ŋ ɓi kahan ce, kuɓuuciŋ ɗe kerhiɗ ɗe, ɓa eɗ ɗe cir mitiɗ. 
\v 5 Laam ɓoyi minɗi taambkoh kahan ce moɗoɗ, minohan taambkoh Janguuniŋ Kooh na ?
\p
\v 6 A joyɗi nik ɓoyi na hane kos. Mbaa yaksiɗuk miniɗ ɗe amb te Kooh hey ɗe atte'e findi a atte'ohee Seytaani. 
\v 7 Te a joyiɗ nam raak seede moɗiɗ ŋ fiki ɓooɓi kosɗi ne ɓa raakuu woyɗaah ɗe, a keenuu ŋ kafind ciŋ Seytaani.
\s Findi ɓi taambkohan in ciŋ Janguuni joy mand
\p
\v 8 Ɓooɓi naman kooɗu ne ɓa taambkohee in ciŋ Janguuni, ɓa nikan ɓo' eɗuuɗ cir, ɓo'-keeh, ɓa joyɗi nik ɓo' yahkiɗ ŋ sangara te ɓa joyɗi waak kopor ŋ ini lahɗi waas. 
\v 9 Ɓa joyiɗ amb keeh ki teeɓohu ŋ waasi ɓoo kos. Ɓa amba na hel daliɗ. 
\v 10 Ɓa joy joy markisku paaɗ po ɓa raakɗi woyɗaah moɗaaɗi ɗah, ɓa han camb pangkeem.
\p
\v 11 Ɓitiɓ ciŋ ɓa\f + \fr 3:11 \fr*\ft "ɓitiɓ ciŋ ɓa" : ini gerek woo ndii, wa namiɗ min tokis : "Ɓitiɓ ci na taambkohe in ciŋ Janguuni".\ft*\f* namiɗ joy eɗu cir, ɓa nikuu ɗooɓoh ɓo', ɓa min amb haf ɓa, ɓa car oolku ŋ in nu nik. 
\v 12 Ɓi kooɗu ne ɓa taambkohee in ciŋ Janguuni, yaa nu nga ɓa joy top ŋ ɓitiice, a raak taambkoh baahiɗ ŋ komaakciŋ ɗe na ɓi kahan ce.
\p
\v 13 Laam ɓi pangkan pangkeem baahiɗ, ɓa hey yakɗasse, te ɓa heyɗi neƴƴohe woo ɓooɓi ini kaɗ ŋ kosi ɓa kos \w Kiristaani|lemma="Kiristaa"\w* Yeesu.
\s Ini ɗasɗukiɗi Kooh teeɓoh
\p
\v 14 Ŋ liiɓiɗ ne ŋ hey ɗa hee marke ndii na maañaaɗi waaye ŋ fiisiɗ inii 
\v 15 ne hayiŋ ngo yiih ɗah, fu inah findi ɓi kahan Kooh joy pesoh, ɓi Janguuniŋ Koohi na pese. Janguuneem, wa kumbini na inhiɗohe keeh ki, wa \tl fondamaani\tl* amb keeh ki.
\p
\v 16 Ali ɓo' minɗi taas ne, ini ɗasɗukiɗi ŋ kosi ɓoo kos te wa teeɓohuusa, wa in yakiɗ :
\b
\q A hayiɗ findi ɓo',
\q \w Fuuɗsiŋ Kooh|lemma="Fuuɗsi Hoolohngaani, Fuuɗsiŋ Kooh"\w* teeɓohiɗ kiyurhiŋ ɗe,
\q Malaakaaci hotiɗ ɗe,
\q A yegɗohuuɗ ŋ kur ci jen,
\q A kosuuɗ ŋ Adina,
\q A rapɗuuɗ ŋ Asamaan,
\q A yakɗuusa.
\b
\c 4
\s Jangɗoh ci na muuƴɗohe
\p
\v 1 Moona \w Fuuɗsi Hoolohngaani|lemma="Fuuɗsi Hoolohngaani, Fuuɗsiŋ Kooh"\w* woyiɗ hooliɗ ne ŋ jamanooci mirndohan, ɓi ɓo' hey faɗe kosi, ɓa taambiɗ \w jiiniici|lemma="jiini"\w* na muuƴɗohe na ini jiiniiceem na jangɗohe. 
\v 2 Ɓooɓeem hey faɗe naafeehaaci leyoh ci ɓa ñaañoh ɓa. Ñaañohoh ceem, liiɓohaaciŋ ɓa ñaasuuɗ na tiwiñ dohɗuuɗ. 
\v 3 Ɓa na sangohe kilookoh, ɓa faɗɗukohee ɓooɓi ɓi kañam. Te moona a Kooh fer kañam ceem. A fer ca ne ɓi kos te ɓa inahha keeh ki njirñiɗkohee ca, corkiɗee ɗe ŋ ineem.
\p
\v 4 In ci Kooh fer jen baahiɗ, ali sangaah raakɗi nga waaye ɗu njirñiɗkohee ca ɗah, corkiɗaat ɗe nga. 
\v 5 Laam in ci Kooh fer jen, ca hooliɗ, ne ca njirñiɗkohu findi a woyoha, te wa hun na kiim Kooh ɗah.
\s Surgaaniŋ Yeesu baahiɗi
\p
\v 6 Fu jangiɗ ɓaah ciŋ ɓoo kosiɗ ci in ceem ɗah, fu hey nike surga baahiɗ, yiŋ Kiristaani Yeesu. Ŋ ineem, fu na hee pesohe woo ciŋ kosi, fu na hee pesohe jangɗohi baahiɗi fu ŋoɗ nga.
\p
\v 7 Kina sikɗuk andiin ci hunɗi na kosi, andiin ci mbalay ci, waaye meeɗɗa haf fu tum ini neɓ Kooh. 
\v 8 Meeɗiɗ faaniŋ ɗa yoonduk, wa raakiɗ njiriñ, waaye njirñiŋ wa laayɗi. Meeɗiɗ haf fu tum ini neɓ Kooh weɗ raak njiriñ ŋ in ci jen, wa hun na gapohiŋ Kooh ŋ kipes kii na wi na haye. 
\v 9 Woo keem wooriɗ te wa oolkaah jameet.
\p
\v 10 Weɗ tah ɓoo na pangke panguk miskiɗ, ɓoo lebere. Laam ɓoo oolkiɗ Koohi na pese, a yi Mucɗohiŋ ɓooɓi jen, ŋ woyisɗi ɗa kosiɗ ci.
\s Altiɗkohaah wuu kosiɗ ci
\p
\v 11 In ceem ceɗ fu joy nakoh, fu jangɗohee ca. 
\v 12 Ali ɓo' kinaat ɗa heef sagu kikomaakiikiŋ ɗa ! Waaye fu, nika altiɗkohaah ŋ kosiɗ ci ŋ woo ciŋ ɗa na pesohaaɗiŋ ɗa na waaɗi fu waaɗ ɓooɓi na kosiŋ ɗa na hool kiŋ ɗa. 
\v 13 Ndengɗuka fu jangee ŋ fiki ɓooɓi jen teereeci hooliɗ ci ; fu paysohee ca na ɓa ne fu ñaah ɓa, fu jangɗohee ca, fu tumohaah ɗaa po ŋ hay.
\p
\v 14 Kina sagankoh ini Fuuɗsi Hoolohngaani on ɗa, wi fu rahas taamboh ŋ woo-woosuuɗ ci woysee nga ɗa, wa yakak ci adgoh Janguuni degee ɗa yaah ciŋ ɓa. 
\v 15 Faɗoha ineem nof te fu tufuk nga baahiɗ po ɓooɓi jen hot ne fu yii kaɗ fiki. 
\v 16 Wortuka ŋ pesohaaɗiŋ ɗa na jangɗohiŋ ɗa. Amba nga baahiɗ. Fu tum ineem ɗah, fu hey muce, fu na ɓi na sikɗukee ɗa.
\c 5
\p
\v 1 Fu dengee yaɓko ɗah, kina woo na ɗe woo ndengiɗ, waaye woya na ɗe woo moɗoɗ po haa a yi baab ɗu. Fu dengee fiir ci po haa ɓa taambɗoh ciŋ ɗa. 
\v 2 Fu amb ɓitif ci findi yaay ciŋ ɗa, na cafaƴ ci findi taambɗoh ciŋ ɗa ɓitiɓ, wa hun na hool keeh-keeh.
\s Ɓitiɓ ci ƴaar ciŋ ɓa kaan
\p
\v 3 Ɓitiɓ ci ƴaar ciŋ ɓa kaan te ɓa raakɗi ɓi ɓaatɗohan ɓa, taambkohaa ɓa, fu eɗ ɓa cir. 
\v 4 Waaye ɓa raak ɓi kuɓu wala set ɗah, ɓeem ɓeɗ joy ɓa taambkoh, ɓa inah ne ɓa joy koc pes kosiŋ ɓa ŋ kahan ɓa. Ɓa tum ineem ɗah, ɓa hey wirnde ɓi rim ɓa ini ɓeem tumiɗ ɓa. Ineem weɗ ini neɓ Kooh.
\p
\v 5 Ɓitɓi maa woye ndii, a ɓitɓi ƴaar ce kaan, yi nik kiik ce. A raakɗi yi ɓaatɗohan ɗe, a oolkoh Kooh dong te a kiimee ɗe noh na wek ne Kooh ɓaatɗoh ɗe. 
\v 6 Waaye yi na taambɗe ini neɓ kiñin kiŋ ɗe dong, ali nik ne a ris pes sah, a kaaniɗ.
\p
\v 7 In ceem ceɗ fu joy nakoh ne ɓa woysuu ali in moɗaaɗi. 
\v 8 Ɓo' taambkohɗi ɓaah ciŋ ɗe, ŋ woyisɗi ɗa ɓi kahan ce ɗah, a faɗiɗ kosiŋ ɗe te a yi uup baahaaɗi kosaaɗi.
\p
\v 9 Ɓitɓi ƴaar ce kaan te a joyya fiisu ne Janguuni amboh ɗe, ƴissuut po ƴissuut, a joyiɗ raak kiis ndaŋkiyaah-yasna-yino (60) te a joy nik ɓitɓi topee ŋ ƴaar ce. 
\v 10 A joyiɗ inhu ŋ in ci baahiɗ ci a tum, findi : Koɗ kuɓuuciŋ ɗe baahiɗ, na daliɗ baahiɗ ɓi na haye kahan ce, na ruhsiɗ haf ce ŋ fiki \w ɓo'-Kooh ci\w* ne a ɓaatɗoh ɓa\f + \fr 5:10 \fr*\ft "ruhsiɗ haf ce ŋ fiki ɓo'-Kooh ci ne a ɓaatɗoh ɓa" : Ŋ Fiis ci ndii, gerek woo ne : "naawsiɗ ɓo'-Kooh ci kot ciŋ ɓa". Marka teerndiŋ \ft*\xt Saaŋ 13:4-17\xt*.\f*, na ɓaatɗoh ɓi nik ŋ miskiɗ, na gen tum in baahiɗ nu wa min nikoh ɗah.
\p
\v 11 Waaye kina fiis ɓi raakɗi kiis ndaŋkiyaah-yasna-yino (60), laam hel ciŋ ɓa nik ŋ raakis ƴaar ɗah, wa na ɓekee ɓa ŋ faɗ taambkoh in ciŋ \w Kiristaani|lemma="Kiristaa"\w*. 
\v 12 Ŋ ineem, ɓooɓi raak woyɗaah ɓa ŋ ini ɓa taambiɗɗi gapohi ɓa gapee Kiristaani. 
\v 13 Ɓaatta nga, ini ɓa haɓɗisɗi ali in hey tahe po ɓa genan wiltiɗoh ŋ kahan ci. Ɓa topanɗi ŋ haɓɗisaaɗi ali in, waaye ɓa hey laaye nguɓ, ɓa aasee ŋ in ci waas ɓa nikohɗi, ɓa woyee mbalay.
\p
\v 14 Ineem weɗ tah po ŋ waaɗ ne ɓi ƴaar ciŋ ɓa kaan te ɓa rissa komaaki, ɓa raakis ƴaar, ɓa raak ɓi kuɓu, ɓa taambkoh kahan ciŋ ɓa baahiɗ po sangiɗi raakuu woyaah. 
\v 15 Raakiɗ ɓi muuƴ nga ɓa po ƴutiɗ, ɓa ɗii taambiɗ Seytaani.
\p
\v 16 Ɓitiɓ kosiɗ raak ɓaah ɓitiɓ, ɓi ƴaar ciŋ ɓa kaan ɗah, a joyiɗ ɓa ɓaatɗoh. Ineem hey eɗfiɗe pangkiŋ Janguuni po wa min taambkoh baahiɗ ɓi raakɗi ɓi ɓaatɗohan ɓa.
\s Yakak ciŋ Janguuni
\p
\v 17 Yakak ci na tiindɗe Janguuni baahiɗ yeyyoo'iɗ eɗu cir kanak : Ɓa joyiɗ yakɗu, ɓa joyiɗ wirndu, te ɓi ndengɗuk ŋ paysohiŋ Woo ki na jangɗohiŋ wa, ɓeɗ uup yeyyoo cireem. 
\v 18 Laam Fiis ci Hooliɗ ci woyiɗ ne : « Kina hondoh ñam inoh fi na dake ŋ mbong ci\f + \fr 5:18 \fr*\fq inoh fi na dake ŋ mbong ci ne a yon ca \fq*\ft : ŋ jamanoonaam, ɓa meeɗeen ɓay ɓi inoh, ɓa wilɗee ca ŋ ɗafuk mbong ci, ca dakee ca po ca yon ca. Marka Rohƴiɗi 25:4\ft*\f* ne a yon ca ! » Ɓaatta nga an : « Pangkoh joyiɗ wirndu !\x + \xo 5:18 \xo*\xt Luk 10:7; Macce 10:10\xt*\x* »
\p
\v 19 Kina teyɗuk ne ɓo' ŋ yakak ci adgoh Janguuni yambu in, hanaa wa raak seede kanak wala kaahay ɗah. 
\v 20 Ɓi gen bakaaɗee, woytohaa ɓa ŋ fiki ɓooɓi jen, ŋ ineem ɓinooɓi neƴƴoh, tumuu findiiɓa. 
\v 21 Ŋ fiki Kooh, ŋ fiki Kiristaani Yeesu na ŋ fiki malaakaaciŋ Kooh, mi yii nak ɗa ne fu taambiɗ nakoh ceem te wa hunuu na talsoh : Ɓooɓi hendaat hend nga ɗa.
\p
\v 22 Kina teel deg yaah ciŋ ɗa ŋ ɓo' ne fu tufkiɗ ɗe findi njiit, fu kee ɓaaha na ɗe bakaaɗ ci a tuman. Fu ŋ haf fu, risa ŋ kihool kiŋ ɗa. 
\v 23 Kina topis ŋ an masuɓ ɓarang, ambsohaa wa na biiñ ƴissuut sagu miski rookiŋ ɗa yooɓ misik.
\p
\v 24 Raakiɗ ɓooɓi nga, bakaaɗ ciŋ ɓa na hotke fang, bala ɓa atte'san. Waaye ɓinooɓi, kaɗ po maañ ɗah, ciŋ ɓa han hotuk. 
\v 25 Wa mand ɗaa na tumohaaɗ ci baahiɗ ci. Cum na hotke fang ; ci hotukɗi ŋ saasi sah, ca minɗi ris ɗasɗukiɗ.
\c 6
\s Kosiɗ ci nik ñaam
\p
\v 1 Kosiɗ ci nik \w ñaam\w* jen joyiɗ amb ne heɗ ciŋ ɓa eɗaah cir keeh-keeh po tiikiŋ Kooh na ini ɓoo jangɗoh woysuu moɗaaɗi. 
\v 2 Ɓi raak heɗ kosiɗ, eɗaat ɓa cir, ɓa sang ɓa heef ŋ ini ɓa nik ɓaah ciŋ ɓa kotii. Ɓa joy ɓa uup ñaamuk ŋ ini ɓa nik kosiɗ na waaɗuuɗ ciŋ Kooh ne heɗ ciŋ ɓa rahas njirñiŋ pangkiŋ ɓa.
\s Jangɗoh ci nikɗi keeh na alali keeh-keehi
\p In ceem jen ceɗ fu joy jangɗoh te fu nakoh ca. 
\v 3 Wa raak ɓoyi na jangɗohe in wiiriis te a taambiɗɗi woo ci wiriɗ ciŋ Heɗ ɓoo Yeesu \w Kiristaa\w* na jangɗohi hun na yakiɗ Kooh ɗah, 
\v 4 ɓoyeem, a ɓo' riifiɗ na yeg haf ce. A ɓo' inhaaɗi, a raak kosaay woo, a na taastiɗohe ŋ ini kaɗ ŋ toksiŋ woo ci. Te ineem na rime siisoh na lahtoh na ɓasoh na liiɓ moɗaaɗi. 
\v 5 Wa ɓayee taasoh ci minɗi reeh ŋ harmban ɓo' ci fu inah ne liiɓohaaciŋ ɓa tiindisɗi. Ɓa hotisɗi keeh ki te ɓa liiɓ ne kos Kooh raakoha alal.
\p
\v 6 Wa keeh ne kos Kooh, wa raak-raak yakak, nik ne fu doyɗukiɗ ŋ ini fu raak ɗah. 
\v 7 Ɓoo hayɗi na ali in ŋ Adina te ɓoo minɗi coottoh ali in nga. 
\v 8 Kon ɓoo raak kañam na ɓekkaah na genoha ɗah, ineem joyiɗ ɓoo doy. 
\v 9 Waaye ɓi na waake raak-raak laayiɗ, ɓa na keene ŋ kafind ci na fiir ci, te waaɗ-waaɗ ciŋ ɓa naandtiɗohaaci laayiɗ ci, ca na yahrohe yahroh. Waaɗ-waaɗ ceem na ɓekee ɓooɓi ŋ sooƴ na boomu. 
\v 10 Findi ɓooɓa na woyohee wa, « Waaɗ kopor weɗ na rime moɗaaɗi nu nik. » Ɓum na waakee wa waak miskiɗ, tahha po ɓa muuƴiɗ po ɓa usiɗ kos te ɓa ɓekiɗ haf ɓa tiis laayiɗ.
\s Leberi baahiɗi
\p
\v 11 Waaye fu, ɓoyiŋ Kooh, nupa in ceem. Gena ndengɗuk ne fu nik ɓo' yurhiɗ, fu taambɗee Kooh, wa hun na kos na waaɗoh na muñ na soos. 
\v 12 Lebera leberi baahiɗi, leberi kosiŋ ɓoo meeksoh, fu raak kipes ki heyɗi reehe, weɗ tah Kooh ɓeeɗuk ɗa. Kipes keem, weɗ fu seede seede moɗiɗ ŋ fiki mboolo laayiɗ.
\p
\v 13 Ŋ fiki Kooh, yi na eɗe in ci jen kipes na fiki Kiristaani Yeesu yi seede seedeeni moɗiɗi ŋ fiki Ponse Pilaat, mi yii nak ɗa ne : 
\v 14 Amba nakohi fu rahas te fu ris hooliɗ, fu raakuu woyɗaah moɗaaɗi, po mbaɗna Heɗ ɓoo Yeesu Kiristaa teeɓkohan ; 
\v 15 te teeɓkoheem, a Kooh tumana ŋ jamanooni a amb.
\b
\q A Kooh Heɗ Jam
\q te a yi dong Heɗ Hatil,
\q Buuriŋ buur ci,
\q Heɗiŋ heɗ ci.
\b
\q
\v 16 Kaanaaɗi, a yi dong raaka.
\q A gen ŋ ɗooƴ siñaar
\q siñaari minɗi rahsu.
\q Ali ɓo' hotɗi ɗe,
\q ali ɓo' minɗi ɗe hot ;
\q cir na hatil wuu ce po faw !
\b
\q Amiin !
\b
\s In ci heɗ raak-raak ci naku
\p
\v 17 Naka heɗ raak-raak ciŋ adinaani woti ne ɓa yeguu haf ɓa te ɓa oolkohuu raak-raak ; raak-raak woorɗi. Ɓa oolkohaat Kooh, yi na one ɓoo on mitiɗ ne ɓoo min neɓsiɗuk nga. 
\v 18 Woyaa ɓa ne ɓa tumaat in baahiɗ, in baahiɗ laayiɗ. Ɓa minaat onoh te ɓa teyɗuk paysoh na ɓooɓi. 
\v 19 Ɓa tumoh ɗaa ɗah, ɓa hey nangɗohe raak-raak moɗiɗ wuu kim, jaar ɓa raak kipes ki keeh-keehi.
\s Dengkoh ci mirndoh
\p
\v 20 Kon Timoote, ɗaakkoha nof baahiɗ ini fu eɗu, fu nup woo ci naandohaaci, ci bugulɗi Kooh. Fu nup taasoh ciŋ ɓi na ndamkohe inhiŋ ɓa te wa inah haa. 
\v 21 Raakiɗ ɓi liiɓ ne ɓa inhiɗ laayiɗ ŋ ini ɓa inah weem, te ɓa muuƴ muuƴ po ɓa usiɗ kos.
\p Heɗ ɓoo baahohaat ɗu !