\id 1TH - Saafi-Saafi
\ide UTF-8
\h 1 Tessalonik
\toc3 1Te
\toc2 1 Tessalonik
\toc1 Fiisi Pool koc kaɓɗoh ɓi Tessalonik
\mt Fiisi Pool koc kaɓɗoh ɓi Tessalonik
\is Rangsohaani
\ip Pool ɓaahee ŋ Israayel ci, ŋ cuuɓiŋ Benyaamin.\x + \xt Ɓi Rom 11:1; Ɓi Filippi 3:5\xt*\x* A nikee \w \+tl Farisen\+tl*\w*.\x + \xt Tum ci 23:6; Ɓi Filippi 3:5\xt*\x* Ŋ finho \w Paantakot\w*, wi Janguuni camb ɓaatuk, a ɓaahee ŋ ɓi tolfiɗee kosiɗ ci.\x + \xt Tum ci 7:58–8:3\xt*\x* Waaye wa raakka mbeh, a cohha na Yeesu, a kossa\x + \xt Tum ci 9:1-30\xt*\x* po a nikka \w \+tl Apootar\+tl*\w* sah. Teerndiŋ "Tum ciŋ \tl Apootar\tl* ci" teeɓohiɗ pangkiŋ ɗe wi a nik \tl Apootar\tl* ini kooɗoh ŋ saar 13.
\ip Kaɗaŋ Pool koc ŋ kur kaŋ Tessalonik,\x + \xt Tum ci 17:1-9\xt*\x* wa nikee ŋ ɗooƴ ɓaaɓaŋ ɗe yakka kanakɗoh.\x + \xt Tum ci 15:40–18:22\xt*\x* A yegɗohha \w Yegɗohiŋ Muci\w* nga, te wa raakka ɓi kos, waaye a arra aañu ne a pul kur ka. Wa jaahiɗta ɗe lool, findi ɓooɓa han kos na hee moocohe. Weɗ tah, wa a nik ŋ Ateen,\x + \xt Tum ci 17:15–18:1\xt*\x* a woossa Timoote ne a kaɗ marka findi ɓa nikoh.\x + \xt 1 Tessalonik 3:1-2\xt*\x* Ƴutta, a yi Pool, a taalndiɗta Korenta. Timoote hunnda na Silweng a kaɗta marka ɓi Tessalonik, te a wiirukka na yegɗoh neɓiɗ.\x + \xt 1 Tessalonik 3:6\xt*\x* Ɓa raakka Pool ŋ Korenta.\x + \xt Tum ci 18:5\xt*\x* Weɗ Pool fiisoh ɓi Tessalonik kaɓɗohii.
\ip Ŋ fiisi a kaɓɗoh wii, Pool corkiɗiɗ Kooh nga, a teeɓohha sumi a sum ŋ risi ɓi Tessalonik ris pes ŋ \w Kiristaani|lemma="Kiristaa"\w*, na maɗi a maɗ ɓa hotis. A nammba ɓa ñaah na ɓi woo, a teeɓohha in ci kaɗ ŋ wiirkiŋ Kiristaani. Wa degga ɓi caɓin, a fiisissa ɓa kaɓɗoh, wa nikka 2 Tessalonik.
\iot Fiisi Pool koc kaɓɗoh ɓi Tessalonik kaɗtiɗoh an :
\io1 - Pool kañɗiɗ ɓi Tessalonik, a kiimiɗta ɓa Kooh \ior 1:1-10\ior*
\io1 - Pool naandsukiɗ jamanoona a nikoh ŋ Tessalonik \ior 2:1-16\ior*
\io1 - Pool mariɗ hot ɓi Tessalonik, a rahsiɗ kerahne neɓiɗ nga ɓa \ior 2:17–3:11\ior*
\io1 - Kiim Kooh wuu ɓi Tessalonik \ior 3:12-13\ior*
\io1 - Pes findi Kooh waaɗoh \ior 4:1-12\ior*
\io1 - Ini kaɗ ŋ wiirkiŋ Kiristaani \ior 4:13–5:11\ior*
\io1 - Nakoh ci mirndoh na askohi \ior 5:12-28\ior*
\c 1
\s Kañɗohi
\p
\v 1 Mi yii kañiɗ ɗu, ɗu ɓi Janguuniŋ Tessalonik. Mi, Pool, na Silweng na Timoote, ɓoo ɓii kañiɗ ɗu, ɗu ɓi nik ŋ Kooh Baabi na Yeesu \w Kiristaa|lemma="Kiristaa"\w* Heɗi. Baahohsaat, ɗu onu jam !
\s Kipes ki na kosiŋ ɓi Tessalonik
\p
\v 2 Ɓoo na gene corkiɗ Kooh ŋ ini kaɗ nga ɗu jen ne ɓoo ɓaahndohha ɗu ŋ kiim ciŋ ɓoo ɗah. 
\v 3 Ŋ ineem, ɓoo na gene naandsuk ŋ fiki Kooh Baabi tumohaaɗ ciŋ ɗu sagu kosi ɗu kos Heɗ ɓoo Yeesu Kiristaa, na pangkiŋ ɗu miskiɗi sagu waaɗi ɗu waaɗ ɗe na mini ɗu min muñ sagu oolki ɗu ooluk in ci a gapoh. 
\v 4 Ɓaah ciŋ ɓoo, Kooh waaɗiɗ ɗu te ɓoo inhiɗ ne, a taniɗ ɗu, a tummba ɗu wuu ce. 
\v 5 Ɓoo inhiɗa, laam, wa ɓoo kom ɗu Yegɗohiŋ Muci, wa nikeeɗi woo dong, waaye wa namee hun na ɓaatɗohi na hatiliŋ \w Fuuɗsi Hoolohngaani|lemma="Fuuɗsi Hoolohngaani, Fuuɗsiŋ Kooh"\w*, te ineem wooreen ɓoo keeh-keeh. Te ɗu inhiɗ findi ɓoo mandee ŋ harmban ɗu, wa nikee ini baah nga ɗu.
\p
\v 6 Ini kaɗ nga ɗu, ɗu taambɗiɗ kot ciŋ ɓoo na ciŋ Heɗi, ŋ teyɗuki ɗu teyɗuk woo kiŋ Kooh ŋ ɗooƴ miskiɗ laayiɗ ; Fuuɗsi Hoolohngaani sumɗukohha ɗu. 
\v 7 Ini ɗu tum weem, kosiɗ ciŋ Maseduwaan na Akaay jen miniɗ marak nga ɗu, ɓa taambiɗ ɗu. 
\v 8 Laam woo kiŋ Heɗi puloh nga ɗu kaɗta kur caŋ Maseduwaan na caŋ Akaay jen, waaye wa topɗi ndeem, kosiŋ ɗu Kooh reyiɗ ɗisik nu ɗisik. Wa kaɗiɗ po wa etohɗi sah ɓoo woyee ŋ ini kaɗ nga, 
\v 9 laam ɓooɓi jen ɓa ɗii laamtoh findi ɗu taambɗukoh ɓoo wi ɓoo hay nga ɗu, na findi ɗu faɗoh kooh ci nikaaɗiici, ɗu hayya ŋ Kooh, ne ɗu ñaamuk ɗe. A yi Koohi na pese, yi keeh-keehi. 
\v 10 Ɓa ɗi nam woo findi ɗu na sekohe \w Kuɓkiŋ ɗe|lemma="Kuɓkiŋ Kooh"\w* pulohan Eel ci, yi a hultiɗ, Yeesu yi na mucɗe ɓoo ŋ ayruki na haye.
\c 2
\s In ci Pool haɓiɗ ŋ Tessalonik
\p
\v 1 Ɓaah ciŋ ɓoo, ɗu ŋ haf ɗu, ɗu inhiɗ ne hayi ɓoo hayee nga ɗu nikeeɗi ɓarang ɓarang. 
\v 2 Ɗu namiɗ inah ne bala ineem, ɓoo torhiɗuuɗ, ɓasuusa ngaŋ kur-taahaŋ Filippi. Waaye Kooh tufkohiɗ ɓoo po ɓoo minnda ɗu woo \w Yegɗohiŋ ɗe ŋ ini kaɗ ŋ Muci|lemma="Yegɗohiŋ Muci"\w*, ngaŋ hiñoh miskiɗ. 
\v 3 Ŋ ineem, ɓeeɗkohi ɓoo na ɓeeɗke ɓooɓi jen degukɗi ŋ ini raakɗi wala ŋ liiɓohaaɗ moɗaaɗi, te ɓoo waakɗi ñaañoh ali ɓo' nga. 
\v 4 Kooh hotiɗ ne ɓoo cariɗ oolku, a dengkohha ɓoo Yegɗohiŋ Muci, weɗ tah ɓoo waakɗi ini neɓ ɓooɓi, waaye ini neɓ Kooh yi na markiske keeñ ciŋ ɓoo.
\p
\v 5 Ɗu inhiɗa baahiɗ, ɓoo moosɗi jayoh ɓo' ne raak in nga ɗe ; te ɓoo moosɗi leyoh ɓo' sagu waaɗ raak, Kooh seede'iɗ ineem. 
\v 6 Ɓoo waakɗi ne ɓo' ɗaap ɓoo, wa nga ɗu haa, wa ŋ ɓinooɓi haa ; 
\v 7 te kat, ɓoo mineen ɗu teeɓ ne ɓoo kilifaaciŋ ɗu ŋ niki ɓoo nik \w \+tl Apootar\+tl*\w* ciŋ \w Kiristaani|lemma="Kiristaa"\w*. Waaye ɓoo tumɗaa, ɓoo soos soos nga ɗu findi yaayi ɓop kuɓuuciŋ ɗe. 
\v 8 Waaɗi ɓoo waaɗ ɗu topeeɗi ŋ woo ɗu Yegɗohiŋ Muci dong, waaye, ɓoo teyɗukeen ɓaah na ɗu kipes kiŋ ɓoo\f + \fr 2:8 \fr*\ft "ɓoo teyɗukeen ɓaah na ɗu kipes kiŋ ɓoo" : ini gerek woo ndii, wa namiɗ min tokis : "ɓoo teyɗukeen eɗoh kipes kiŋ ɓoo wuu ɗu".\ft*\f*. Ɓoo keeñkoheen ɗu lool !
\p
\v 9 Ɓaah ciŋ ɓoo, ɗu naandsukiɗ panguk ciŋ ɓoo miskiɗ ci na yaaɓi ɓoo yaaɓ. Ɓoo pangkee noh na wek ne ɓoo deguu ali ɓo' nga ɗu in, ɓoo woo ɗu Yegɗohiŋ Kooh ŋ ini kaɗ ŋ Muci. 
\v 10 Ɗu seedeeciŋ ɓoo, Kooh namiɗa nik : Ɗu ɓi kosiɗ ci, findi ɓoo mandee nga ɗu, wa hooliɗ, wa yurhiɗ te wa raakɗi sikka. 
\v 11 Ɗu namiɗ inah ne ɓoo tumohee na yaa nu nga ɗu findi baabu na tumohe na kuɓuuciŋ ɗe. 
\v 12 Ɓoo ñaahiɗ ɗu, ɓoo giifɗiɗ ɗu, ɓoo woyiɗ na ɗu keeh-keeh ne ɗu pes findi ɓoyi nik na Kooh na pesohe, Kooh yi ɓeeɗuk ɗu ne ɗu ɓaah ŋ yaki Nguuriŋ ɗe yak.
\p
\v 13 Ɓoo gen ŋ corkiɗ Kooh sagu inii : Wa ɗu rahas woo kiŋ Kooh ɓoo woo ɗu, ɗu teyɗukɗi wa findi woo ɓo', waaye ɗu teyɗuka findi woo kiŋ Kooh, te weɗ wa nik keeh-keeh. Ŋ ineem, weɗi ɓay ɓoƴsoh nga ɗu, ɗu ɓi kosiɗ ci.
\p
\v 14 Ɓaah ciŋ ɓoo, ɗu taamb ŋ ɗiski Janguuciŋ Yudee taamb, Janguuci ɓaah ŋ Kooh te ca kossa Kiristaani Yeesu. Laam, ɓi gen na ɗu namiɗ ɗu torhiɗ torhiɗ miskiɗ, findi Yawuut ci torhiɗohee Janguucaam. 
\v 15 Ɓeɗ ap Yeesu Heɗi, ɓeɗ namee ap woosuuɗ ci, te ɓeɗ tolfiɗee ɓoo. Ɓa neɓɗi Kooh te ɓa sangiɗ ciŋ ɓooɓiŋ Adina jen. 
\v 16 Ɓa sangiɗ ciŋ ɓooɓi ŋ ini ɓa na jeeme hondoh ɓoo woo Yegɗohiŋ Muci ɓooɓi nikɗi Yawuut ne ɓa mucɗu. Ŋ ineem, ɓa na mitɗe bakaaɗ ci ɓa tum ŋ jamanooci jen. Waaye ayrukiŋ Kooh mirndohiɗ keen ŋ ɗafuk ɓa.
\s Pool waaɗiɗ hotis ɓi Tessalonik
\p
\v 17 Ini kaɗ nga ɓoo, ɓaah ci, ɓoo saɓsohuuɗ na ɗu ɓi jamano ɓoo hotohisɗi, waaye ɗu ɓii ŋ keeñ ciŋ ɓoo. Ɓoo waaɗiɗ ɗu hotis lool te ɓoo tumiɗ in nu in ne wa nik. 
\v 18 Ɓoo waaɗeen hayis ɗiskiŋ ɗu, te mi ŋ haf fo, ŋ jeemiɗ ɗu hay marke waas laayiɗ. Waaye Seytaani hondohha ɓoo tuma. 
\v 19 Mbehi Heɗ ɓoo Yeesu hayissan, ya ɓa nikan yaakaariŋ ɓoo, wala sumiŋ ɓoo, wala raayaaniŋ ɓoo po ɓoo min neɓu ŋ fikiice ? Ali wa mand na, ɗu ɓaah nga ! 
\v 20 Ee, e ɗu ndamiŋ ɓoo na sumiŋ ɓoo !
\c 3
\p
\v 1-2 Wa kaɗ kaɗ po ŋ mirndaani, ɓoo minisɗi sek. Weɗ ɓoo woyoh ne ɓoo hey faɗe Timoote a kaɗ, ɓoo tas ŋ Ateen kiik ɓoo. Ɓoo woossa ɗe nga ɗu. Timoote a ɓaah ɓoo keeh-keeh ; a na pangke na Kooh ŋ \w Yegɗohiŋ Muci\w*, ŋ ini kaɗ ŋ \w Kiristaani|lemma="Kiristaa"\w*. Ɓoo nakiɗ ɗe ne a ndengiɗ ɗu, a ñaah ɗu ŋ ini kaɗ ŋ kosiŋ ɗu, 
\v 3 po ali ɓo' nga ɗu naarkuu, sagu miskiɗ ci ɗu na degse woti-woti. Ɗu ŋ haf ɗu, ɗu inhiɗ ne in ceem ɓaah ŋ in ci rahsan ɓoo ŋ kosi ɓoo kos. 
\v 4 Laam wa ɓoo nik na ɗu sah, ɓoo woyeen ɗu ne ɓoo hey raake miskiɗ ; te wa raakoh ɗaa, findi ɗu inhoha. 
\v 5 Wa wa kaɗ po ŋ minisɗi sek, ŋ woossa Timoote ne a markiɗ to ini kaɗ ŋ kosiŋ ɗu, laam ŋ neƴƴoheen ne Seytaani fiir ɗu po pangkiŋ ɓoo kee nika ɓarang ɓarang.
\p
\v 6 Waaye ɗiski wa nik, Timoote kaɗiɗ po a hayiɗ, te a eɗiɗ ɓoo yegɗoh neɓiɗ ŋ ini kaɗ ŋ kosiŋ ɗu, na waaɗohi ɗu waaɗoh ŋ harmban ɗu, na sumi ɗu na sume ɗu naandsukka ɓoo ɗah, na waaɗi ɗu waaɗ ɓoo hotis findi ɓoo namoh ɗu waaɗ hotis. 
\v 7 Ŋ ineem, ŋ ɗooƴ tiis ci na miskiɗ ci ɓoo nikoh jen, hel ciŋ ɓoo daliɗ nga ɗu, ɓaah ci, sagu kosiŋ ɗu. 
\v 8 Kon ɗiski wa nik, ɗu ris ndengiɗ ŋ niki ɗu nik ŋ Heɗi, weɗ tah ɓoo ɓii iik kotii.
\p
\v 9 Ɓoo joyiɗ corkiɗ Kooh laayoh na laayoh ŋ ini kaɗ nga ɗu, ŋ sumi ɓoo sum lool saguuɗu ŋ fikiice. 
\v 10 Noh na wek ɓoo ɓii kiim ɗe keeh-keeh ne a on ɓoo, ɓoo hotis ɗu te ɓoo mitiɗ ini tas ŋ kosiŋ ɗu. 
\v 11 Kooh, Baabiŋ ɓoo ŋ haf ce, na Heɗ ɓoo Yeesu rangsiɗaat ɓoo waasi kaɗ nga ɗu ! 
\v 12 Heɗi genaat ɓaat keeh-keeh waaɗohi nik ŋ harmban ɗu, na waaɗi ɗu waaɗ ɓooɓi jen, wa nikaat findi ɓoo waaɗoh ɗu. 
\v 13 A on keeñ ciŋ ɗu hatil ne ɗu nik hooliɗ wuu ce, raakaaɗi sikka ŋ fiki Kooh Baabiŋ ɓoo, ŋ mbehi Heɗ ɓoo Yeesu hayan, na hooliɗ ciŋ ɗe jen. [Amiin !]
\c 4
\s Pes findi Kooh waaɗoha
\p
\v 1 Ɗiski wa nik, ɓaah ci, ɗu jangiɗ nga ɓoo findi ɗu joy pesoh ne ɗu neɓ Kooh, te ɗu ɓii tuma, waaye ɓoo ɓii kiim ɗu te ɓoo ɓii ñaah ɗu ŋ tiikiŋ Yeesu Heɗi, ɓaataat ineem. 
\v 2 Ɗu inhiɗ nakoh ci ɓoo eɗ ɗu ŋ tiikiŋ Yeesu Heɗi. 
\v 3 Waaɗ-waaɗiŋ Kooh, weɗ ne ɗu hool wuu ce, ɗu wortuk faankoh sangohuuɗ, 
\v 4 yaa nu nga ɗu ɗah ambaat cir ciŋ faaniŋ ɗe, wa hun na hool wuu Kooh na eɗoh cir. 
\v 5 Wa hunuu na taambiɗ waaɗ-waaɗiŋ kiñin kiŋ ɗa, findi cuuɓ ci inahɗi Kooh na tumohee wa. 
\v 6 Ŋ inii, ali ɓo' nga ɗu kinaat ñaañoh morom ce wala a njirñiɗkohee ɗe. Inhaat ne Heɗi na atte'e atte in ceem, ɓoo woyiɗ ɗu wa, woyissa ɗu wa.
\p
\v 7 Kooh ɓeeɗukɗi ɓoo ne ɓoo nik hoolaaɗi, waaye a ɓeeɗuk ɓoo ne ɓoo hool wuu ce. 
\v 8 Ŋ ineem, yi na hee sange teyɗuk woo ceem, a sang ɓo' haa, waaye a sang Kooh, yi eɗ ɗu \w Fuuɗsiŋ ɗe Hoolohngaani|lemma="Fuuɗsi Hoolohngaani, Fuuɗsiŋ Kooh"\w*.
\p
\v 9 Ini kaɗ ŋ waaɗoh ŋ harmban ɗu, ɗu ɓi ɓaah kos, ɗu etohɗi fiisu ŋ ini kaɗ nga, Kooh jangɗiɗ ɗu waaɗtiɗoh ŋ harmban ɗu. 
\v 10 Ɗu na tiindɗohe ɗaa na ɓaah ci nik ŋ Maseduwaan jen. Waaye, ɓoo ɓii ñaah ɗu ɓaah ci, ɓaataat ineem. 
\v 11 Waakaat pes ŋ jam na ɓooɓi, yaa nu nga nik ngaŋ in ciŋ ɗe haf ce, ɗu pangkoote na yaah ciŋ ɗu, ɓoo nakohee ɗu wa ɗaa. 
\v 12 Ŋ ineem, ɗu etohanɗi ali ɓo', te ɓi kosɗi hey ɗu mine eɗ cir ŋ findi ɗu na pesohe.
\s Kaaniɗ ci na hayisiŋ Heɗi
\p
\v 13 Ɓaah ci, ɓoo waaɗɗi ne ɗu nik inhaaɗi ŋ ini kaɗ ŋ ɓi kuruk nga, po ɗu kee raaka tiis findi ɓinooɓi, ɓi raakɗi yaakaar. 
\v 14 Ŋ ineem, findi ɓoo kosoha, Yeesu kaaniɗ te a hultiɗ, ɓi kaan te ɓa kossa ɗe, Kooh ɓayndohohan ɓa ɗaa taamboh ŋ Yeesu, ɓa hun na Yeesu. 
\v 15 Inii weɗ ɓoo na woyee ɗu te wa puloh ŋ Heɗi : Ɓoo ɓi risan pes po ŋ hayisiŋ Heɗi, ɓoo adganɗi ɓi kuruk nga. 
\v 16 Laam nakoh hey leehkasse, hooso kilifa malaaka kerhuk, kuluɓ kiŋ Kooh kerhuk, ŋ ineem, Heɗi ŋ haf ce hey pulohe ŋ Eel ci, ruhse, te kaaniɗ ci nik ŋ \w Kiristaani|lemma="Kiristaa"\w* hey koce kuruk. 
\v 17 Ƴut ɗah, ɓoo ɓi risan ndii pese, ɓoo hey ambsohse na ɓa, coottohse ŋ ɗooƴ eel, ɓoo kaɗ taambɗuka Heɗi, ngaŋ jawuuni. Ini kooɗoh ndeem, ɓoo nikan na ɗe po faw. 
\v 18 Kon, yaa nu nga ɗu giifɗaat morom ce na woo ceem.
\c 5
\s Sek mbehiŋ Heɗi
\p
\v 1 Ɓaah ci, ini kaɗ ŋ jamanooni wala mbehi, wa etohɗi ɗu fiisu ŋ ini kaɗ nga ca. 
\v 2 Ɗu ŋ haf ɗu, ɗu inhiɗ baahiɗ ne mbehiŋ Heɗi hayan findi rokoh na wek.\x + \xo 5:2 \xo*\xt Macce 24:42-44; Luk 12:39-40\xt*\x* 
\v 3 Ɓooɓi hey woye ne : « Ɓoo ɓii ŋ jam te ɗiski ɓoo nik, wa wooriɗ ! » Jaar naamo hay nga ɓa, tel ɓa findi miskiɗ ciŋ ɓitɓi na ɓasle, te ɓa fusanɗi nga muk.
\p
\v 4 Waaye ɗu, ɓaah ci, ɗu nikɗi ŋ ñuus, po mbeheem kee ɗu tela findi rokoh. 
\v 5 Ɗu jen, ɗu ɓo' siñaar, ɗu ɓo' noh. Ɓoo ɓaahɗi ŋ wek, ɓoo ɓaahɗi ŋ ñuus. 
\v 6 Ɓoo kinaat neeh findi ɓinooɓi, ɓoo yunkaat, ɓoo hun na sagoociŋ ɓoo. 
\v 7 Ɓi na neehe, na neehe na wek, te ɓi na laare na laare na wek.
\p
\v 8 Waaye ɓoo ɓi ɓaah ŋ nohi, ɓoo hunaat na sagoociŋ ɓoo ; ɓoo ɓekuk waaɗoh na kos findi kulɓa hiñohoha, te kong ci ɓoo ɓekuk nik oolki ɓoo ooluk ne ɓoo hey mucɗasse. 
\v 9 Ini Kooh waaɗiɗ ɓoo, wa ayrukiŋ ɗe haa, waaye a waaɗ ne ɓoo rahas muci taamboh ŋ Heɗ ɓoo Yeesu \w Kiristaa\w*. 
\v 10 Yeesu, a yi kaan wuu ɓoo, ne a hay ɗah, ɓoo ɓaah na ɗe kipes ki, wa raak ɓoo pesee, wa raak ɓoo kaaniɗ, wa ɗaa. 
\v 11 Ineem weɗ tah, ñaahtiɗohaat, yaa nu nga amboh morom ce ne a kaɗ fiki, findi ɗu na tumohee wa an.
\s Nakoh ci mirndoh na askohi
\p
\v 12 Ɓoo ɓii kiim ɗu ɓaah ci, ne ɗu eɗ cir ɓi na ndengɗuke ŋ ɗooƴ ɗu, ɓi adgoh ɗu ŋ Heɗi te ɓa woytohee ɗu. 
\v 13 Eɗaat ɓa cir keeh-keeh, ɗu waaɗ ɓa sagu ini ɓa na haɓɗe, pesaat ŋ jam ŋ harmban ɗu. 
\v 14 Ɓoo ɓii ñaah ɗu ɓaah ci : Woytohaat ɓi waaɗɗi yaaɓ, ɓaatɗohaat ɓi hot ne ɓa minɗi raak ini ɓa etoh, ɗu amboh ɓi raakɗi hatil, ɗu muñɗee ɓooɓi jen. 
\v 15 Wortukaat po ali ɓo' nga ɗu kinaat wirndoh miskiɗ in miskiɗ ; genaat ndengɗuk ŋ tum in baahiɗ ŋ harmban ɗu na ini kaɗ ŋ ɓooɓi jen.
\p
\v 16 Genaat ŋ sum. 
\v 17 Genaat ŋ kiim Kooh. 
\v 18 Corkiɗaat Kooh ŋ in nu nik, in ceem ceɗ a waaɗ nga ɗu ŋ niki ɗu nik ŋ Kiristaani Yeesu. 
\v 19 Kinaat hondoh \w Fuuɗsi Hoolohngaani|lemma="Fuuɗsi Hoolohngaani, Fuuɗsiŋ Kooh"\w* panguk. 
\v 20 Kinaat heef in ci Kooh na woye taamboh ŋ ɓo', 
\v 21 waaye markisaat in ci jen, ɗu amb ci baah nga. 
\v 22 Wortukaat in moɗaaɗi na findi wa min mand ɗah.
\p
\v 23 Kooh yi na onohe jam hoolɗaat ɗu wuu ce jameet ; a niiɗaat kiɓo' kiŋ ɗu jen, liiɓohaaci na ruuh ci na faan ci, ca nik raakaaɗi sikka ŋ hayiŋ Heɗ ɓoo Yeesu Kiristaa. 
\v 24 Kooh yi na ɓeeɗkee ɗu cariɗ oolku, a hey tume ineem.
\p
\v 25 Ɓaah ci, kiimɗaat ɓoo Kooh. 
\v 26 Kañɗaat ɓaah ci jen na morgiɗkoh huniɗ na keeñ hooliɗ. 
\v 27 Mi yii nak ɗu ŋ tiikiŋ Heɗi ne fiisi ɓoo kaɓɗoh ɗu wii, wa jangsaat ŋ fiki ɓaah ci jen ! 
\v 28 Heɗ ɓoo Yeesu Kiristaa baahohaat ɗu !