\id 1PE - Saafi-Saafi
\ide UTF-8
\h 1 Piyeer
\toc3 1Pi
\toc2 1 Piyeer
\toc1 Fiisi Piyeer koc kaɓɗoh
\mt Fiisi Piyeer koc kaɓɗoh
\is Rangsohaani
\ip Piyeer ɓaahee ŋ \w \+tl Apootar\+tl*\w* ciŋ Yeesu. Saaŋ na Saak na Piyeer ɓeɗ \tl Apootar\tl* ci kaahay ci tiik ciŋ ɓa uup woyu ŋ teereeci nikiis ci na naandsuke kipes kiŋ Yeesu. Marka Piyeer ŋ Limiŋ tiik ci. Ŋ teerndiŋ "Tum ciŋ \tl Apootar\tl* ci", tiikiŋ Piyeer namiɗ pul nga waas laayiɗ.\x + \xt Tum ci 1–5; 8–12; 15\xt*\x*
\ip Ŋ jamanoona Piyeer na fiise kaɓɗohii, a nikee ŋ "kur-taahi na woyse Babilon",\x + \xt 1 Piyeer 5:3\xt*\x* te wa miniɗ nik ne tiikeem waaɗee woo \w Rom\w*. A nikee nga na Maarko yi fiis "Yegɗohiŋ Muci Maarko fiis".\x + \xt 1 Piyeer 5:13\xt*\x*
\ip Piyeer fiisiɗ kaɓɗohii wuu kosiɗ ci nikee ŋ ini wil ŋ ɗiski Turki nik woti,\x + \xt 1 Piyeer 1:1\xt*\x* mbaa wa miniɗ nik ne Silweng yi woosu ne a wik kaɓɗohii,\x + \xt 1 Piyeer 5:12\xt*\x* a wiliɗ ɓak ceem jen naa.
\ip Piyeer fiisiɗ kaɓɗohii ne a ñaah ɓa, ɓa ndengɗuk, ɓa ooluk Kooh te ɓa ris ɗe kerhiɗ.
\iot Fiisi Piyeer koc kaɓɗoh kaɗtiɗoh an :
\io1 - Kañɗoh na yakiɗ Kooh \ior 1:1-12\ior*
\io1 - Kipes hooliɗ wuu Kooh \ior 1:13–2:3\ior*
\io1 - \w Kiristaani|lemma="Kiristaa"\w* a yi atoh fi amb taɓahi \ior 2:4-10\ior*
\io1 - Jangɗoh findi ɓo' joy pesoh \ior 2:11–3:12\ior*
\io1 - Ndengɗuk ŋ ɗooƴ miskiɗ ci \ior 3:13–4:19\ior*
\io1 - Findi yakak ci na kosiɗ ci jen joy mand \ior 5:1-11\ior*
\io1 - Askohi \ior 5:12-14\ior*
\ie
\c 1
\s Kañɗohi
\p
\v 1 Mi yii kañiɗ ɗu, mi yi Piyeer, \tl \+w Apootariŋ|lemma="apootar"\+w*\tl* Yeesu \w Kiristaa\w*. Mi yii fiis ɗu kaytii, ɗu ɓi Kooh kooɗ te ɗu pesee findi hanhe, ŋ pasarkohi ɗu pasarkoh ŋ kur ciŋ Pontos na Galaat na Kapados na Asi na Bitini. 
\v 2 Kooh Baabi kooɗiɗ ɗu ŋ findi a inhohee in ci bala ca hayan ɗah, ŋ hoolɗi \w Fuuɗsi Hoolohngaani|lemma="Fuuɗsi Hoolohngaani, Fuuɗsiŋ Kooh"\w* hooliɗ ɗu. A kooɗiɗ ɗu ne ɗu kerhiɗ Yeesu Kiristaa te ɗu lisu ñif miŋ ɗe. Baahohsaat, ɗu onu jam te wa ɓaatkee ɓaatuk !
\s Ini ɓoo yaakaar minɗi yahuk
\p
\v 3 Kooh yakɗaah, Koohiŋ Heɗ ɓoo Yeesu Kiristaa, a nammba nik Baabiŋ ɗe. Ŋ miski ɓoo misik ɗe keeh-keeh, a tumiɗ po ɓoo rimkissiɗ, a onnda ɓoo yaakaari na pese taamboh ŋ hultiŋ Yeesu Kiristaa. 
\v 4 In ci a gap ɓoo minɗi yahuk, ca soɓe'anɗi te moɗkiŋ ca minɗi coot, ɗu ɗaakɗuuɗ ca ŋ Eel ci. 
\v 5 Te ɗu sah, Kooh a yii niiɗ ɗu na hatiliŋ ɗe taamboh ŋ kosi ɗu kos ne ɗu raak muc. Muceem ƴutiɗ ne a teeɓoha ŋ jamanooni mirndoh.
\p
\v 6 Ineem weɗ tah ɗu riifiɗ na sum, ali nik ne sah ɓi neeh ceɗɗi, ɗu ɓii ŋ miskiɗ, a Kooh na markiskee ɗu, markiskohaaɗ nu nik. 
\v 7 Miskiɗ ceem na hee teeɓohe ne kosiŋ ɗu koceet, findi koceetiŋ ursi na markohse ngaŋ yongkaah. Te urus na geneeɗi, a kosiŋ ɗu uupa fuuf. Weɗ tah Yeesu Kiristaa teeɓohuk ɗah, Kooh hey ɗu ɗaape, a yakiɗ ɗu, a meeɓ ɗu. 
\v 8 Yeesu, ɗu hotɗi ɗe te moona ɗu waaɗiɗ ɗe. Ɗiski wa nik, ali nik ne ɗu hotɗi ɗe sah, ɗu kosiɗ ɗe, ɗu sumoh na sumoh, ɗu sumiɗ sumi nguɓ minɗi woo, ɗu sumiɗ po ɗu minisɗi sum. 
\v 9 Ɗu ɓii rahas ƴin ƴin muci kosiŋ ɗu mirndohan ɗu on.
\s Woosuuɗ ci na muci
\p
\v 10 Ini kaɗ ŋ muceem, woosuuɗ ci ɗeɓgaan markiɗa, markissaa baahiɗ wi ɓa yegɗohee baahohi Kooh baahohan ɗu. 
\v 11 Ɓa markiɗa ne ɓa inah ina wala jamanoona Fuuɗsiŋ Kiristaani nikee nga ɓa woyoh na ɓa. A woyee na ɓa ŋ in ci na haye, ini kaɗ miskiɗ ciŋ Kiristaani na yaki a yakan ŋ finho miskiɗ ceem. 
\v 12 Ɓa teeɓuuɗ ne wa nikee wuu ɓa ŋ haf ɓa haa, waaye wuu ɗu. Te ɗiski wa nik, in ceem, a Fuuɗsi Hoolohngaani woosohu Eel ci woo ɗu ca, taamboh ŋ ɓi yegɗohee muci. Malaakaaci sah waaɗiɗ ca marak keeh-keeh po inah.
\s Kipes hooliɗ wuu Kooh
\p
\v 13 Kon tokɗukaat, ɗu yun hel ciŋ ɗu. Oolkiŋ ɗu jen nikaat ŋ baahohi ɗu baahohsan mbeha Yeesu Kiristaa teeɓohkan. 
\v 14 Findi kuɓuuci kerhiɗ ɓi rim ɓa, kinaat taambiɗ waaɗ-waaɗ ci ɗu raakee wotɓa wa ɗu inahɗi Kiristaani ; 
\v 15 waaye hoolaat ŋ tumohaaɗ ciŋ ɗu jen findi Yi ɓeeɗuk ɗu hooloh, 
\v 16 wa fiisuuɗ ne : « Ɗu joy joy hool, laam, mi, ŋ hooliɗ. »\x + \xo 1:16 \xo*\xt Lewiici 11:44-45; 19:2\xt*\x*
\p
\v 17 Kooh, a yi na atte'e ɓooɓi jen, yaa nu nga ŋ tumohaaɗ ciŋ ɗe, te wa raakɗi talsoh. Te nik ne Kooh yeem, a yi ɗu na ɓeeɗke Baab ne ɗu kiimee ɗe ɗah, nupaat ɗe ŋ jamanooni ɗu nikoh hanhe ŋ kehƴi. 
\v 18 Ɗu inhiɗ ne ini tos ɗu ŋ pesohaaɗi raakaaɗi njirñi ɗu lamoh ŋ caac ciŋ ɗu, wa ini na reehe findi haalis wala urus haa. 
\v 19 Waaye ɗu tosohu ñif miŋ Kiristaani wi uupiɗ njiriñ fuuf, wa mand na ñif miŋ mbaali raakaaɗi sikka wala haawsuk.
\p
\v 20 Kooh inheen ɗe bala Adina fersan, te a teeɓohiɗ ɗe ŋ mirndaaniŋ jamanooni saguuɗu. 
\v 21 Ɗu, ɗu kosiɗ Kooh taamboh nga ɗe, Kooh yi hultiɗ ɗe, yakiɗta ɗe ne kosiŋ ɗu na yaakaariŋ ɗu gaƴuk ŋ Kooh.
\p
\v 22 Ɗu kerhiɗiɗ keeh ki po ɗu hoolɗiɗ haf ɗu ne ɗu waaɗoh waaɗohi hunɗi na naafeeha, ɗiski wa nik, waaɗtiɗohaat waaɗtiɗoh keeh-keeh na keeñ hooliɗ. 
\v 23 Laam ɗu rimkissiɗ, te ɗu rimukɗi ŋ ɓoyi na kaane, ɗu puloh ŋ tisohi na yahkeeɗi, woo kiŋ Kooh, wi na pese te wa genan gen. 
\v 24 Fiis ci woyiɗ ne :
\q « Ɓo', a paangi,
\q yaki a yak jen,
\q wa pos paangi ;
\q paangi na suye suy
\q posi yaɗ,
\q
\v 25 waaye woo kiŋ Heɗi
\q risan ris po faw.\x + \xo 1:25 \xo*\xt Esayi 40:6-8\xt*\x* »
\m Te woo keem weɗ \w Yegɗohiŋ Muci\w* ɗu woyu.
\c 2
\p
\v 1 Kon saɓsukohaat na in nu nik añaand wala ñaañoh, naafeeha, siis wala ɗooɓoh ɗah. 
\v 2 Findi komaakci han rimu na waaɗohe miis koceet, waaɗohaat ɗaa woo kiŋ Kooh, weɗ min ɗu hooɗiɗ po ŋ muca. 
\v 3 Laam ɗu ƴoohiɗ po ɗu inhiɗ findi Heɗi baahoh\f + \fr 2:3 \fr*\ft Marka ŋ teerndiŋ \+xt Sabuur 34:9\+xt*.\ft*\f*.
\s Atoh fi amb taɓahi
\p
\v 4 Reɓaat ŋ Heɗi, a yi atoh fi na pese. Wa keeh ne ɓooɓi mbet ɗe mbet, waaye Kooh kooɗiɗ ɗe, te a waaɗaah keeh-keeh nga ɗe. 
\v 5 Ɗu ŋ haf ɗu, findi atoh ci na pese, nikaat atoh taɓahoha kahan Kooh. Ɗu nik cuuɓ seeƴkiɗoh hooliɗ wuu ce, ne ɗu seeƴkee ɗe na in ci baahiɗ ci \w Fuuɗsi Hoolohngaani|lemma="Fuuɗsi Hoolohngaani, Fuuɗsiŋ Kooh"\w* na tumɗukohee ɗu. Ca nik seeƴuk ci neɓ ɗe taamboh ŋ Yeesu \w Kiristaa\w*. 
\v 6 Laam inii weɗ Fiis ci woo :
\q « Mi yii yip atoh fi amb taɓahi ngaŋ Siyong.
\q Wa atoh fi ŋ kooɗ, atoh waaɗaah keeh-keeh,
\q te yaa nu taɓah kosiŋ ɗe nga ɗah,
\q a kaci'anɗi nga muk.\x + \xo 2:6 \xo*\xt Esayi 28:16\xt*\x* »
\m
\v 7 Kon, ini kaɗ nga ɗu, ɗu ɓi kosiɗ ci, atoh feem waaɗaah lool. Waaye ŋ ini kaɗ ŋ kosaaɗiici, Fiis ci woo ne : « Atoh fi taɓahoh ci mbete mirndohiɗ nik atoh fi amb taɓahi.\x + \xo 2:7 \xo*\xt Sabuur 118:22\xt*\x* » 
\v 8 Te ŋ Fiis ci poyi wa « atoh fi na kafndohe, folohe.\x + \xo 2:8 \xo*\xt Esayi 8:14\xt*\x* » Kosaaɗiici ɓa ɗii kafnduk ŋ atoh feem, laam ɓa teyɗukɗi woo kiŋ Kooh. Ineem weɗ ini joyee ɓa rahas.
\p
\v 9 Waaye ɗu nak, ɗu cuuɓ kooɗuuɗ, cuuɓ seeƴkiɗoh wuu Kooh Buuri, cuuɓ hooliɗ wuu ce, cuuɓi a raakoot. Ɗu nikiɗ in ceem ne ɗu yegɗoh in ci moɗohngaan ci a haɓiɗ. A yi ɓeeɗuk ɗu, ɗu pulla ŋ ñuusi, ɗu hayya ŋ siñaariŋ ɗe moɗohngaani.
\q
\v 10 Wotɓa, ɗu nikeeɗi cuuɓ,
\q waaye woti, ɗu cuuɓiŋ Kooh,
\q wotɓa, ɗu rahseeɗi yirmohiŋ ɗe,
\q waaye woti, ɗu rahsiɗa.\x + \xo 2:10 \xo*\xt Hose 1:6,9; 2:1,25\xt*\x*
\s Pes findi kosiɗ ŋ Adina
\p
\v 11 Ɓaah ciŋ ngo ŋ keeñkoh, ɗu ɓi genohaah findi hanhe ŋ kehƴi, mi yii ñaah ɗu, ne ɗu wortuk taambiɗ in ci neɓ kiñin ciŋ ɗu, ci na hiñohe na ini nik nga ɗu. 
\v 12 Raakaat pesohaaɗ moɗiɗ ŋ harmban kosaaɗiici, ne ɓa yambee ɗu ne ɗu tumoh moɗaaɗi ɗah, ɓa hot tumohaaɗ ciŋ ɗu moɗiɗ ci te ɓa yakiɗ Kooh ŋ mbehi a hayohan na hatil.
\p
\v 13 Teyɗukaat kikilifa nu nik, sagu Heɗi, teyɗukɗaat buuri yakkiŋ \w Rom\w*, yi adgoh kur ki, 
\v 14 na goornoor ci a na tuuƴe ne ɓa kuƴis tumoh moɗaaɗiici, ɓa ɗaap tumoh baahiɗ ci. 
\v 15 Laam, ineem weɗ Kooh waaɗ, ɗu tumee in baahiɗ ne ɗu rang nguɓ ciŋ naandiɗ ci na woye sagu inhaaɗi. 
\v 16 Ɗu tumohan ɗaa findi ɓoyi raak haf ce, te kinaat ɗasɗuk ŋ raaki ɗu raak haf ɗu, ɗu tumee in baahaaɗi, waaye tumaat findi ɓoyi na ñaamke Kooh. 
\v 17 Eɗaat ɓooɓi jen cir, ɗu waaɗ mboolndiŋ kosiɗ ci, ɗu nup Kooh, ɗu eɗ buuri cir.
\s Muñ miskiɗ ci findi Kiristaani
\p
\v 18 Ɗu ɓi \w ñaam\w* ci, kerhiɗaat heɗ ciŋ ɗu, ɗu eɗ ɓa cir keeh-keeh. Ŋ wooɗi ɓi baah, te ɓa soossa dong, waaye kerhiɗaat sah añaandiɗ ci. 
\v 19 Laam a tum in baahiɗ, ɓoyi na muñe miskiɗ ci a yeyyooɗi, te Kooh dong tah. 
\v 20 A raak wi nde ndam nga, ɓoyi muñ laɓ sagu tum ini lahɗi waas ? Waaye ɗu muñee miskiɗ ci, raak ɗu tum baahiɗ ɗah, ɗu tum in baahiɗ ŋ fiki Kooh.
\p
\v 21 Te Kooh ɓeeɗuk ɗu ŋ ineem, laam Kiristaani ŋ haf ce, a nameen raak miskiɗ wuu ɗu, a faɗiɗta ɗu taambɗaah, ne ɗu taamb ŋ kot ciŋ ɗe. 
\v 22 A moosɗi tum ali bakaaɗ, te woo ñaañoh moosɗi puloh ŋ nguɓiŋ ɗe\f + \fr 2:22 \fr*\ft Ini kooɗoh ŋ aaya 22 po 25, wa mand haa ne Piyeer na woye woo ci nik ŋ teerndiŋ woosuuɗi Esayi, \+xt Esayi 53\+xt*.\ft*\f*. 
\v 23 A ɓasuusa ɗah, a na wirndukeeɗi. A deguusa miskiɗ ɗah, a na gapkoheeɗi, waaye a na wike haf ce ŋ yaah ciŋ Atte'ohi yurhiɗi.
\p
\v 24 A yi ŋ haf ce, a yi gaduk bakaaɗ ciŋ ɓoo ŋ faaniŋ ɗe ŋ daaƴa a daaƴu ŋ kurwaana ne ɓoo reehɗukoh na bakaaɗ, aas ŋ kipes yurhiɗ. E gaañ ciŋ ɗe wiriɗ ɗu. 
\v 25 Laam ɗu muuƴee muuƴ findi mbaal, waaye ɗiski wa nik ɗu dokkiɗ ŋ niiɗohi na niiɗee ɗu.
\c 3
\s Findi kanak ci kilookoh joy pesoh
\p
\v 1 Ɓitiɓ ci, namaat teyɗukiɗ ƴaar ciŋ ɗu. Wa raak ŋ ƴaar ceem ɓi sang kos woo kiŋ Kooh ɗah, mandohaaɗiŋ ɗu miniɗ tah po ɓa kos, te wa etohanɗi sah, ɗu woyee na ɓa nga. 
\v 2 Ŋ ineem, ɓa hey hote findi ɗu eɗoh ɓa cir, na findi ɗu na pesohe pes hooliɗ. 
\v 3 Kimoɗ kiŋ ɗu kinaat nik ŋ ini min hotuk dong, maanaam ŋ maaruk, wala tokkaah urus, wala ɓekuk kulɓa moɗiɗ. 
\v 4 Waaye wa joy nik ŋ ɗooƴi, ŋ ɗooƴ keeñi ; wa nik wiŋ keeñ moɗiɗ, yeeɓkiɗ. Kimoɗ mand ɗaa, weɗ raak candoom keeh-keeh ŋ fiki Kooh te wa na yahkeeɗi.
\p
\v 5 Ɗeɓgaan, ɓitiɓ ci hooliɗ ci oolkee Kooh ŋ in ci a gapohee, meeɗ haɓɗukoh ɗaa, ɓa teyɗukɗeen ƴaar ciŋ ɓa, 
\v 6 findi Saarata kerhiɗohee Ibrahiima te a ɓeeɗkohee ɗe heɗ ce.\x + \xo 3:6 \xo*\xt Camba 18:12\xt*\x* Ɗu kuɓuuciŋ ɗe ne ɗu tumee baahiɗ te ɗu neƴƴohɗi ali in nga ɗah.
\p
\v 7 Ɗu ɓi ƴaar ci, yaa nu nga ɗu ɗah namaat liiɓ baahiɗ ŋ findi a na pesohe na ɓitiice, fu inah ne hatiliŋ ɓitiifu hendɗi na wiŋ ɗa. Eɗa ɗe cir laam a hey name ɓaah ŋ findiifu ŋ kipes ki ɓoo baahohsan. Tumohaat ɗaa ne kiim ciŋ ɗu Kooh nikuu teyɗuksaaɗi.
\s Tum baahiɗ
\p
\v 8 Kon book, ɗu jen ɓaahaat liiɓohaaɗ, ɗu ɓaahee ini neɓ ɗu na wi misik ɗu, ɗu waaɗtiɗoh findi ɓooɓi ɓaah yaay na baab, ɓooɓi miskaat ɗu, te ɗu ruhsiɗ haf ciŋ ɗu. 
\v 9 Ɓo' tum ɗu miskiɗ wala ɓa ɓas ɗu ɗah, kinaat wirnduk. Kiimɗaat ɓa barke, laam, Kooh ɓeeɗuk ɗu ne ɗu tumohee ɗaa, ɗu rahsee barke. 
\v 10 Laam, Fiis ci woo ne :
\q « Ɓo' nu waaɗ raak kipes mitiɗ
\q na mbeh neɓiɗ ɗah,
\q a niiɗaat nguɓiŋ ɗe ŋ woo moɗaaɗi,
\q po ali lee taambuu ŋ njootoot ciŋ ɗe.
\q
\v 11 A us baahaaɗi, a tumee baahiɗ ;
\q a waakaat jam te a tiindee jam.
\q
\v 12 Laam has ciŋ Heɗi ca ɗii ŋ yurhiɗ ci,
\q te a naar nof ŋ kiim ciŋ ɓa.
\q Waaye tumoh moɗaaɗiici,
\q Heɗi na ñuusɗukee ɓa ñuusɗuk.\x + \xo 3:12 \xo*\xt Sabuur 34:13-17\xt*\x* »
\s Tufuk ne seede ini fu oolkoh
\p
\v 13 Te sah, yaa tuman ɗu miskiɗ ne ɗu sawar ŋ tum baahiɗ ɗah ? 
\v 14 Ali nik ne ɗu raak miskiɗ sagu yurhi ɗu yurah sah, ɗu neɓɗiɗ. Kinaat ɓa neƴƴoh\f + \fr 3:14 \fr*\ft "Kinaat ɓa neƴƴoh" : ini gerek woo ndii, wa namiɗ min tokis : "Kinaat neƴƴoh ini ɓa neƴƴoh".\ft*\f*, te kinaat jaahiɗ.\x + \xo 3:14 \xo*\xt Esayi 8:12\xt*\x*
\p
\v 15 Waaye ambaat ŋ keeñ ciŋ ɗu ne \w Kiristaani|lemma="Kiristaa"\w* a yi hool wuu Kooh, te a yi Heɗi ; te ɓooɓi meekis ɗu ŋ oolki ɗu ooluk in ciŋ Kooh na haye ɗah, tufkaat ne ɗu lof ɓa. 
\v 16 Waaye lofaat ɓa na eɗef, wa hun na cir, hunaat na hel daliɗ po ɗu yambsee tumoh moɗaaɗi ɗah, ɓooɓi na yambee ɗu hot tumohaaɗ ciŋ ɗu baahiɗ ci ɗu raak ŋ Kiristaani, ɓa kaci.
\p
\v 17 Laam, kooɗoh miskiɗ ngaŋ tum in baahiɗ, nik ne weɗ waaɗ-waaɗiŋ Kooh ɗah, weɗ ngisoh kooɗoh miskiɗ ŋ tum in baahaaɗi.
\s Ndamiŋ Kiristaani
\p
\v 18 Kiristaani namiɗ raak miskiɗ waas yino po faw wuu ɗaasuukiŋ bakaaɗ ci. A Yurhiɗi kaan wuu yurhaaɗiici, ne a ɓay ɗu ŋ Kooh. A apuuɗ ŋ kipes kiŋ faaniŋ ɗe waaye a pesɗuuɗ ŋ kipes ki hun na \w Fuuɗsi Hoolohngaani|lemma="Fuuɗsi Hoolohngaani, Fuuɗsiŋ Kooh"\w*.
\p
\v 19 Weɗ a kaɗoh yegɗoha ŋ ruuh ca taƴu ŋ kaso. 
\v 20 Maanaam, ɓi sangee kerhiɗ Kooh ɗeɓgaan, wa a muñɗee ɓa ŋ jamanoona Noohin haɓɗohee gaala. Ɓooɓa aasee ŋ gaala laayeeɗi, ɓa nikee yasna-kaahay dong, ɓeɗ mucɗassee ŋ masma.
\p
\v 21 Wa nikee ñaamaariŋ ɓoktuki woti, wi ɓoo na rahse, ɓoo muc, wa na nihse riiɓ faan haa, waaye wa teyɗuk ɓeeɗkohiŋ Kooh na hel daliɗ\f + \fr 3:21 \fr*\ft "teyɗuk ɓeeɗkohiŋ Kooh na hel daliɗ" : ini gerek woo ndii, wa namiɗ min tokis : "kiim Kooh ne a on ɗa hel daliɗ".\ft*\f*. Wa muciɗ ɗu taamboh ŋ hultiŋ Yeesu Kiristaa. 
\v 22 A rapiɗ Asamaan, a yaa ŋ ñaahmaŋ Kooh, malaakaaci na nguurkoh ci na heɗ hatil ci jen degu ŋ yaah ce.
\c 4
\s Faɗ pesohaaɗi maañiɗi
\p
\v 1 Kon, \w Kiristaani|lemma="Kiristaa"\w* degseen miskiɗ ŋ faaniŋ ɗe. Mbaa ɗu nak, ganaaykohaat liiɓohaaɗeem, laam, ɓo' nu degu miskiɗ ŋ faaniŋ ɗe ɗah, a reehɗukohiɗ na bakaaɗ. 
\v 2 Ini a taskoh kipes ŋ kehƴi, a taambɗissuu kiñin kiŋ ɗe, waaye a pesee ŋ ini Kooh waaɗ.
\p
\v 3 Ee di', ɗeɓgaan, ɗu tumee ini neɓ kosaaɗiici. Ɗu meeɗ meeɗ cakaay, ɗu taambɗee kiñin ciŋ ɗu, ɗu laaree, ɗu mbuumbaayee na biiñ laayiɗ, ɗu ñaamkeeɗa kooh ci nikaaɗiici ñaamuk siɓaah. Ɗu maannja nga lool ; ɗiski wa nik, wa doyiɗ.
\p
\v 4 Kosaaɗiici feyuuɗ ŋ ini ɗu seeskisɗi hun na ɓa ŋ cakaayi miskiɗeem, ɓeɗi ɓas ɗu. 
\v 5 Waaye ɓa hey tahse Kooh yi ƴut ne a atte pesiɗ ci na kaaniɗ ci. 
\v 6 Ineem weɗ tah kaaniɗ ci woyuuɗ \w Yegɗohiŋ Muci\w*, ne ɓa min pes ŋ fiki Kooh ŋ kipes ki hun na \w Fuuɗsi Hoolohngaani|lemma="Fuuɗsi Hoolohngaani, Fuuɗsiŋ Kooh"\w*. Ɓa min pes, ali nik ne sah, ɓa hey atte'se findi ɓo' na atte'ohse, ngaŋ kipes ka ɓa raakee wa ɓa nikoh na faan caŋ ɓa.
\s Pes na ɓooɓi
\p
\v 7 Reehiŋ in ci jen reɓiɗ. Kon hunaat na sagoociŋ ɗu te ɗu yunuk ne ɗu min kiim Kooh. 
\v 8 Ini uup raak njiriñ weɗ \x + \xo 4:8 \xo*\xt Gonaah ci 10:12\xt*\x*ne, ɗu waaɗtiɗoh keeh-keeh ŋ harmban ɗu, laam waaɗoh na tahe po bakaaɗ laayiɗ ulu. 
\v 9 Yaa nu nga ɗah dalɗaat morom ce baahiɗ ŋ kahan ce te wa hunuu na woo ƴin-ƴin.
\p
\v 10 Yaa nu nga ɗu ɗah raakiɗ ini Kooh baahoh ɗe, a taambkohaat morom ce naa. Ŋ ineem, ɗu hey nike taambkohoh baahiɗ ŋ in ci ɗalohiɗ ci Kooh baahoh ɗu. 
\v 11 Yaa nu Kooh on min woo ŋ tiikiŋ ɗe ɗah, a woyaat ini Kooh woo. Yaa nu Kooh on a taambkohee ɓo' ɗah, a taambkohaat ɗe na hatili Kooh eɗ ɗe. Ŋ ineem, Kooh yakɗu ŋ in ci jen, taamboh ŋ Yeesu Kiristaa, yi Heɗ kiyak na hatil, te wa genan gen po faw. Amiin !
\s Ɓaah ŋ miskiɗ ciŋ Kiristaani
\p
\v 12 Ɓaah ciŋ ngo ŋ keeñkoh, kinaat feyu ŋ yongkaahi ɗu nikoh ne wa markis ɗu, kinaata amboh in feyohiɗ. 
\v 13 Neɓsaat kay ŋ ɓaahi ɗu ɓaah ŋ miskiɗ ciŋ Kiristaani. Ŋ ineem, ɗu hey riife na sum keeh-keeh, ŋ mbehi yaki a yak teeɓohsan. 
\v 14 Ɗu ɓasu sagu tiikiŋ Kiristaani ɗah, ɗu neɓɗiɗ, laam Fuuɗsi yaki, \w Fuuɗsiŋ Kooh|lemma="Fuuɗsi Hoolohngaani, Fuuɗsiŋ Kooh"\w*, a yii nga ɗu.
\p
\v 15 Ali ɓo' nga ɗu kinaat mbugalu sagu ne a ap ɓo', wala a rok rok, wala a tum in baahaaɗi wiiriis, wala a aas ŋ ini waas ce nikohɗi. 
\v 16 Waaye nik ne ɗu na mbugalse sagu ini ɗu nik \tl Kerceen\tl* ɗah, kinaat raak kaci nga, yakɗaat Kooh ŋ mini ɗu min ɓay tiikeem\f + \fr 4:16 \fr*\ft "yakɗaat Kooh ŋ mini ɗu min ɓay tiikeem" : Ngaŋ fiis ci ɗeɓgaan raakiɗ ci woo ne : "corkiɗaat Kooh ŋ ineem".\ft*\f*.
\p
\v 17 Jamanooni reyiɗ, jamanooni atteeni camboh ŋ ɓi kahan Kooh. Wa kockoh nga ɓoo ɗah, kon ɓi sang kos Yegɗohiŋ Kooh ŋ ini kaɗ ŋ Muci, ɓa mirndohan na ? 
\v 18 Fiis ci woo ne : « Nik ne mucɗuukiŋ yurhiɗi yooɓɗi ɗah, moo, bakaaɗohi kaañ Kooh moocan nde ?\x + \xo 4:18 \xo*\xt Gonaah ci 11:31\xt*\x* » 
\v 19 Mbaa, ɓi na raake miskiɗ, nik ne weɗ Kooh waaɗ ɗah, ɓa genaat tum in baahiɗ, te ɓa wik haf ɓa Kooh, a yi Ferohi, yi fu inah ne in nu a woo ɗah, a tuma.
\c 5
\s Findi yakak ci joy taambkoh kosiɗ ci
\p
\v 1 Kon, mi yii ñaah yakak ci adgoh ɗu, mi yi yakak findiiɓa, ŋ seede ngaŋ miskiɗ ciŋ \w Kiristaani|lemma="Kiristaa"\w* te ŋ raakiɗ ɓak ŋ yaki a yak, wi teeɓohsan. 
\v 2 Mi yii ñaah ɗu yakak ci, taambkohaat gati Kooh dengkoh ɗu ; kinaata niiɗ ŋ ñak pehey, waaye niiɗaata sagu waaɗi ɗu waaɗa tum, findi Kooh waaɗoh. Ɗu joyɗi waak kopor nga ŋ ini lahɗi waas waaye ɗu joy niiɗ gatiŋ ɗu na sawar. 
\v 3 Ɓooɓi Kooh dengkoh ɗu, kinaat ɓa toon kikilifa ; waaye nikaat altiɗkohaah nga ɓa. 
\v 4 Ŋ ineem, Niiɗohi yaki hay ɗah, ɗu hey rahse raayaani moɗkiŋ wa minɗi yahuk.
\s Findi kosiɗ ci joy mand
\p
\v 5 Ɗu ɓi komaakci, namaat kerhiɗ yakak ci. Ɗu ɓi kosiɗ ci jen ruhsiɗaat haf ɗu, ne yaa nu nga ɗu ɗah taambkohee morom ce, laam Fiis ci woo ne :
\q « Kooh hunɗi na yaksiɗkoh ci,
\q ɓi ruhsiɗ haf ɓa, ɓeɗ a na teeɓe baah kiŋ ɗe.\x + \xo 5:5 \xo*\xt Gonaah ci 3:34\xt*\x* »
\m
\v 6 Ruhsiɗaat haf ɗu ŋ fiki Kooh, yi raak hatil, ne a meeɓ ɗu ŋ jamanooni a waaɗoha. 
\v 7 Kaambsukaat jaahiɗ ciŋ ɗu jen nga ɗe, laam a yi na taambkohee ɗu. 
\v 8 Hunaat na sagoociŋ ɗu te ɗu yunuk ! Sangiɗiŋ ɗu, Seytaani, yii wil findi gayndeeni na ŋaare, a na waake ɓoyi a sifiñsohan. 
\v 9 Ndengsiɗkohaat na ɗe na kos ndengiɗ. Te ɗu inah ne ɓaah ciŋ ɗu kosiɗ ci ŋ adinaani jen, ɓa ɗii raak miskiɗ findiiɗu.
\p
\v 10 Miskiɗiŋ ɗu hey ɓaate maañ ƴissuut. Waaye Kooh, yi Heɗ baahoh, ɓeeɗkiɗ ɗu ŋ haf ce ne ɗu ɓaah na ɗe ndamiŋ ɗe po faw ŋ niki ɗu nik ŋ Kiristaani. Kooh yeem hey ɗu mitɗe, a ndengiɗ ɗu tir po ali in minanɗi ɗu fol. 
\v 11 A yi nikaat Heɗ hatil po faw ! Amiin !
\s Askohi
\p
\v 12 Ɓaah ɓoo Silweng, ŋ amb ɗe findi ɓaah cariɗ oolku, ŋ taamboh nga ɗe, ŋ kaɓɗohha ɗu woo ci rohƴiɗ cii, ne ŋ ñaah ɗu, ŋ seede'iɗ ɗu ne ɗu amb ŋ baahohiŋ Kooh keeh-keehi. 
\v 13 Ɓi Janguuni Kooh kooɗ findiiɗu ŋ kur-taahi na woyse Babilon\f + \fr 5:13 \fr*\fq Babilon \fq*\ft : ɓi ɓo' laayiɗ amb ne Piyeer teek \+w Rom\+w* Babilon ndii.\ft*\f*, ɓa ɗii kañiɗ ɗu. Maarko, kuɓuuso, yii kañiɗ ɗu. 
\v 14 Kañɗohaat ŋ harmban ɗu na morgiɗkoh huniɗ na waaɗoh. Ɗu ɓi nik ŋ Kiristaani jen, nikaat ŋ jam !