\id 1JN - Saafi-Saafi
\ide UTF-8
\h 1 Saaŋ
\toc3 1Sŋ
\toc2 1 Saaŋ
\toc1 Fiisi Saaŋ koc kaɓɗoh
\mt Fiisi Saaŋ koc kaɓɗoh
\is Rangsohaani
\ip Saaŋ ɓaahee ŋ \w \+tl Apootar\+tl*\w* ciŋ Yeesu. Saaŋ na Saak na Piyeer ɓeɗ \tl Apootar\tl* ci kaahay ci tiik ciŋ ɓa uup woyu ŋ teereeci nikiis ci na naandsuke kipes kiŋ Yeesu. Marka Saaŋ ŋ Limiŋ tiik ci.
\ip Ŋ finho kakaan ki na hulti na rapɗuukiŋ Yeesu, a taambkohiɗ Maryaama, yaayiŋ Yeesu.\x + \xt Saaŋ 19:25-27\xt*\x* Ŋ mirndaani a yi adgohee ɓi Jangu, ŋ ɗiska woysee Asi ŋ jamanoonaam (ɓak ngaŋ ɗiski Turki nik woti-woti). Ŋ jamanoonaam, weɗ a fiisoh "Yegɗohiŋ Muci Saaŋ fiis", na "Fiisi Saaŋ koc kaɓɗoh" wii, na fiis kanak wiiriis ci a kaɓɗoh, na teerndiŋ "Teeɓ ki", wi na woye ŋ in ci na haye ŋ fikiiri.\x + \xt Teeɓ ki 1:1\xt*\x*
\ip Saaŋ kaɓɗohɗi fiisii wuu ɓo' yino wala wuu Jangu sangam, wa mand haa a fiisa ne ɓi jangu laayiɗ mina njirñiɗkoh. Wa miniɗ nik ne a koca kaɓɗoh ŋ Janguuci a adgohee, laam a inheen nikohaaɗiŋ ɓa te a ɓaahndoheen haf ce nga.\x + \xt 1 Saaŋ 2:18-21\xt*\x* Janguuceem sah, ceɗ \w Kiristaani|lemma="Kiristaa"\w* fiis kaɓɗoh ŋ teerndiŋ \xt Teeɓ ki 2–3\xt*.
\ip Ɓi ɓo' faɗeen Janguuci, laam ɓa koseeɗi yegɗoh ciŋ \tl Apootar\tl* ci.\x + \xt 1 Saaŋ 2:18-19\xt*\x* Saaŋ fiis wuu ɓi risee nga ne a ñaah ɓa te a ñiinɗiɗ ɓa kiyooh ci etohu keeh-keeh ŋ kos.
\iot Fiisi Saaŋ koc kaɓɗoh kaɗtiɗoh an :
\io1 - Rangsohaani : Woo ki na onohe kipes ki \ior 1:1-4\ior*
\io1 - Pes ŋ siñaar na waaɗoh \ior 1:5–2:17\ior*
\io1 - Sangiɗiŋ Kiristaani \ior 2:18-27\ior*
\io1 - Nik kuɓuuciŋ Kooh \ior 2:28–3:24\ior*
\io1 - Inhisoh \w Fuuɗsiŋ Kooh|lemma="Fuuɗsi Hoolohngaani, Fuuɗsiŋ Kooh"\w* na liiɓiŋ sangiɗiŋ Kiristaani \ior 4:1-6\ior*
\io1 - Waaɗohiŋ Kooh \ior 4:7-21\ior*
\io1 - Kos seedeeni Kooh seede Yeesu \ior 5:1-15\ior*
\io1 - Reehɗohaani \ior 5:16-21\ior*
\ie
\c 1
\s Woo ki na onohe kipes ki
\p
\v 1 Ini raakee, kooɗoh ŋ camba poyi, ɓoo kerahhaa, hotoottaa na has ciŋ ɓoo, ɓoo marakkaa baahiɗ te ɓoo laallaa na yaah ciŋ ɓoo, weɗ Woo ki na onohe kipes ki. 
\v 2 Kipes keem teeɓohkiɗ te ɓoo hotiɗa. Ɓoo na seede'ee wa te ɓoo yegɗee ɗu wa, weɗ kipes ki heyɗi reehe, wi nikee na Baabi te wa teeɓukka ɓoo. 
\v 3 Mbaa ini ɓoo hot, ɓoo kerahhaa, ɓoo ɓii nam ɗu wa yegiɗ, ne ɗu nik yino na ɓoo, ɓoo hun nik yino na Baabi na \w Kuɓkiŋ ɗe|lemma="Kuɓkiŋ Kooh"\w* Yeesu \w Kiristaa\w*. 
\v 4 Te ɓoo ɓii fiis ɗu in cii ne sumiŋ ɓoo mit.
\s Pes ŋ ɗooƴ siñaar
\p
\v 5 Yegɗohi ɓoo kerah ŋ Yeesu Kiristaa te ɓoo yegɗee ɗu wa weɗ ne Kooh a siñaar te ali ñuus nikɗi nga ɗe. 
\v 6 Ɓoo woo ne ɓoo yino na Kooh, te ɓoo tiindee ŋ ñuus ɗah, ɓoo na leye te ɓoo pesɗi ŋ keeh. 
\v 7 Waaye ɓoo nik ŋ siñaar findi Kooh nikoh ŋ siñaar ɗah, ndeem, ɓoo yino ŋ harmban ɓoo te ñif miŋ Kuɓkiŋ ɗe Yeesu wa ɗii hooliɗ ɓoo ŋ bakaaɗ ci jen.
\p
\v 8 Ɓoo woo ne ɓoo raakɗi bakaaɗ ɗah, ɓoo na ñaañohe haf ɓoo, te keeh ki nikɗi nga ɓoo. 
\v 9 Ɓoo teyɗuk bakaaɗ ciŋ ɓoo ŋ fiki Kooh ɗah, Kooh cariɗ oolku te a yurhiɗ. A hey ɓoo ɗaase, a hooliɗ ɓoo ŋ yurhaaɗi nu nik. 
\v 10 Ɓoo woo ne ɓoo bakaaɗɗi ɗah, ɓoo na woye ne Kooh leyoh, te woo kiŋ ɗe nikɗi nga ɓoo.
\c 2
\p
\v 1 Komaakciŋ ngo, mi yii fiis ɗu in ceem ne ɗu bakaaɗuu. Waaye yino nga ɓoo bakaaɗ ɗah, ɓoo raakiɗ Yi ngelɗan ɓoo ŋ fiki Baabi, a Yeesu \w Kiristaa\w*, Yurhiɗi. 
\v 2 Laam, a yi eɗoh haf ce ne a seeƴkohu wuu bakaaɗ ciŋ ɓoo, te wa wuu ɓoo dong haa waaye wuu ɓi Adina jen.
\s Nakohi asi
\p
\v 3 Ini na teeɓe ɓoo ne ɓoo inhiɗ Heɗi, weɗ ne ɓoo taambiɗ nakoh ciŋ ɗe. 
\v 4 Yi na woye ne a inhiɗ Kooh, te a taambiɗɗi nakoh ciŋ ɗe, yeem leyoh te keeh ki nikɗi nga ɗe. 
\v 5 Waaye ɓoyi na taambɗe woo kiŋ ɗe, waaɗi a waaɗ Kooh na nike mitiɗ sik te wa nik keeh nga ɗe - ŋ ineem ɓoo inah ne ɓoo ɓii ŋ Kooh. 
\v 6 Yaa nu woo ne a yii ŋ Kooh ɗah, a joy pesoh findi Yeesu pesohe.
\p
\v 7 Ɓaah ciŋ ngo ŋ keeñkoh, wa nakoh as weɗ maa fiisee ɗu haa, wa nakoh maañiɗ te ɗu rahasa wa wa camb, te nakoheem, e woo ki ɗu kerah. 
\v 8 Moona ini maa fiisee ɗu, wa nakoh as keeh-keeh ŋ kipes kiŋ Kiristaani, findi wa nam nikoh as keeh-keeh ŋ kipes kiŋ ɗu, ñuusi wa ɗii coot te siñaari siñaarɗiɗ po ƴutiɗ.
\p
\v 9 Yi na woye ne a yii ŋ siñaari te a waaɗɗi yi a ɓaah na ɗe kos, a ris ŋ ñuusi poyi. 
\v 10 Ɓi waaɗ ɓaah ciŋ ɓa kosiɗ ci, ɓa gen ŋ siñaari te ali in kafndanɗi ɓa. 
\v 11 Waaye ɓi waaɗɗi ɓaah ciŋ ɓa, ɓa ɗi ŋ ñuusi ; ɓa na tiinde ŋ ɗooƴ ñuusi te ɓa inahɗi ɗiski ɓa na kaɗe, ñuusi fuulɗiɗ has ciŋ ɓa.
\s Ɓo' nu waaɗ Adina ɗah, waaɗɗi Baabi
\b
\q
\v 12 Mi yii fiis ɗu, komaakci :
\q Ɗu ɗaasuuɗ bakaaɗ ciŋ ɗu
\q sagu Yeesu Kiristaa.
\q
\v 13 Mi yii fiis ɗu, baab ci :
\q Ɗu inhiɗ Yi nik ŋ camba poyi.
\q Mi yii fiis ɗu, komaakci fiir ci :
\q Ɗu saahiɗ Seytaani.
\b
\q
\v 14 Mi yii fiis ɗu, komaakci :
\q Ɗu inhiɗ Baabi.
\q Mi yii fiis ɗu, baab ci :
\q Ɗu inhiɗ Yi nik ŋ camba poyi.
\q Mi yii fiis ɗu, komaakci fiir ci :
\q Ɗu raakiɗ hatil,
\q woo kiŋ Kooh gen nga ɗu
\q te ɗu saahiɗ Seytaani.
\b
\p
\v 15 Kinaat waaɗ Adina na in ci nik ŋ ɗooƴ Adina. Ɓo' waaɗ Adina ɗah, waaɗ Baabi nikɗi nga ɗe. 
\v 16 In ci nik ŋ Adina jen, findi taambiɗ kiñin, maɗ in ci has na hote, na yaksiɗuk ŋ raak-raak, ceem jen ca ina Baabi haa, ca ina Adina. 
\v 17 Te kat, Adina na reehe reeh na in ci na maɗse nga, waaye yi na tume ini Kooh waaɗ genan gen po faw.
\s Sangiɗ ciŋ Kiristaani
\p
\v 18 Kuɓuuciŋ ngo, ɓoo ɓii ŋ jamanooci mirndoh. Ɗu kerhiɗ ne sangiɗiŋ Kiristaani yii hay, te woti-woti, sangiɗ ciŋ Kiristaani laayiɗ, tahha po ɓoo inhiɗ ne ɓoo ɓii ŋ jamanooci mirndoh. 
\v 19 Ɓa puliɗ nga ɓoo waaye ɓa ɓaaheeɗi nga ɓoo ; laam ɓa ɓaaheen nga ɓoo ɗah, ɓa heen rise na ɓoo. Waaye ineem teeɓohiɗ ne ali yino nga ɓa ɓaahɗi nga ɓoo.
\p
\v 20 Ɗu nak, ɗu rahsiɗ \w Fuuɗsi Hoolohngaani|lemma="Fuuɗsi Hoolohngaani, Fuuɗsiŋ Kooh"\w* taamboh ŋ Yeesu Kiristaa, tahha po ɗu jen ɗu inhiɗ keeh ki ŋ ini kaɗ ŋ Kooh. 
\v 21 Mi yii fiis ɗu, wa nikɗi haa ne ɗu inahɗi keeh ki, waaye ɗu inhiɗa te ɗu inhiɗ ne ali lee na puloheeɗi ŋ keeh. 
\v 22 Ya ɓa leyohi ? E yi taas ne Yeesu a yi Kiristaani\f + \fr 2:22 \fr*\ft Ŋ jamanoonaam, raakiɗ ɓi teyɗukee ne Kiristaani nikee \+w Kuɓkiŋ Kooh\+w*, a hay hay ŋ Adina, waaye a nikeeɗi ɓo' njaay findi ɓoo, a nikee puuɗis, a aassa ɓo' njaay teeku Yeesu. Kon nga ɓa Yeesu pulohɗi Eel ci, a hayɗi Adina, te a nikeeɗi Kiristaani, a nikeeɗi Kuɓkiŋ Kooh. Saaŋ woo ndii ne ɓo' nu woo ineem ɗah, a leyoh, te ngaŋ saar 4, aaya 3, a woo ne ɓoyeem, liiɓ ciŋ ɗe, ca liiɓ ciŋ sangiɗiŋ Kiristaani. Nama marak saar 4, aaya 15 na saar 5, aaya 1.\ft*\f*. Yeem, a yi sangiɗiŋ Kiristaani, yi taas Baabi na Kuɓki. 
\v 23 Yaa nu taasuk Kuɓki ɗah, a namɗi raak Baabi. Yaa nu teyɗuk Kuɓki ɗah, a namiɗ raak Baabi.
\p
\v 24 Ini ɗu kerah ŋ camba poyi, risaat nga ɗu. Ini ɗu kerah ŋ camba poyi ris nga ɗu ɗah, ɗu naman ris ŋ Kuɓki na Baabi. 
\v 25 Te ini a gap ɓoo, weɗ kipes ki heyɗi reehe. 
\v 26 Ineem weɗ ŋ waaɗee ɗu fiis ŋ ini kaɗ ŋ ɓi na muuƴɗee ɗu.
\p
\v 27 Ini kaɗ nga ɗu, Fuuɗsi Hoolohngaani ɗu rahsoh nga ɗe hey gene nga ɗu, te ɗu etohɗi ɓo' wiiriis jangɗee ɗu ; Fuuɗsi yii jangiɗ ɗu in ci jen, te ini a na jangɗee ɗu wa keeh te wa lee haa, mbaa risaat ŋ Kiristaani, findi Fuuɗsi jangɗoh ɗu.
\s Kuɓuuciŋ Kooh na bakaaɗeeɗi
\p
\v 28 Ɗiski wa nik, kuɓuuciŋ ngo, risaat ŋ Kiristaani, po mbeha a teeɓkohan, wa raak ɓoo riifiɗ na ooluk, ɓoo raakuu kaci ŋ fikiice ne a hay ɗah. 
\v 29 Ɗu inhiɗ ne a yurhiɗ ɗah, ɗu namiɗ inah ne ɓo' nu na pese ŋ yurah ɗah, a rimkoh nga ɗe.
\c 3
\p
\v 1 Markaat findi Baabi waaɗoh ɓoo po ɓoo ɓeeɗkohsee kuɓu Kooh te weɗ ɓoo nik ! Adina inahɗi Kooh, weɗ tah wa inahɗi ɓoo. 
\v 2 Ɓaah ciŋ ngo ŋ keeñkoh, ɗiski wa nik ndii ɓoo kuɓu Kooh, te ini ɓoo nikan kim teeɓohuuɗi paaɗ. Waaye, ɓoo inhiɗ ne mbaɗna wa teeɓohsan, ɓoo mandan na ɗe, laam ɓoo hey ɗe hote findi a mand keeh-keeh.
\p
\v 3 Ɓo' nu raak yaakaareem ŋ Yeesu \w Kiristaa\w* ɗah, a na hoolɗe hooliɗ haf ce findi yeem hooloh. 
\v 4 Ɓo' nu nik tumoh bakaaɗ ɗah, a na tume ini hunɗi na waasiŋ Kooh, laam bakaaɗ, weɗ sang teyɗuk waasi. 
\v 5 Moona, ɗu inhiɗa : Ini tah Yeesu hay weɗ ne a nihis bakaaɗ ci. Te a yi, a raakɗi bakaaɗ. 
\v 6 Ɓo' nu gen nga ɗe ɗah, na bakaaɗeeɗi ; ɓo' nu na bakaaɗe ɗah, hotohɗi ɗe, inahɗi ɗe.
\p
\v 7 Kuɓuuciŋ ngo, ali ɓo' kinaat ɗu muuƴiɗ. Ɓo' nu na tume in yurhiɗ ɗah, a yurhiɗ findi Kiristaani yurhoh. 
\v 8 Ɓo' nu gen ŋ bakaaɗ ɗah, a ɓaah ŋ Seytaani, laam Seytaani bakaaɗ ŋ camba poyi. Ini tah \w Kuɓkiŋ Kooh\w* hay weɗ ne a yahroh in ci Seytaani haɓiɗ.
\p
\v 9 Ɓo' nu rimuk ŋ Kooh ɗah, a na tumeeɗi bakaaɗ, laam ini Kooh sok nga ɗe findi tisoh, genan nga ɗe ; a minɗi bakaaɗ laam a kuɓu Kooh kotii. 
\v 10 Ini ɗalohiɗ kuɓuuciŋ Kooh na kuɓuuciŋ Seytaani weɗi wii : Ɓo' nu na tumeeɗi yurhiɗ wala a waaɗɗi ɓaah ce ɗah, a wuu Kooh haa.
\s Waaɗtiɗoh
\p
\v 11 Inii weɗ yegɗohi ɗu kerah ŋ camba poyi an : Ɓoo waaɗtiɗohaat ; 
\v 12 ɓoo kinaat tum findi Kayin, yi ɓaahee ŋ Seytaani, a boommba taambɗoh ce. A boomoh ɗe ye ? E tumohaaɗ caŋ ɗe haf ce ceɗ sepƴe, caŋ taambɗoh ce nikka yurhiɗ, weɗ tah a boommba ɗe.\x + \xo 3:12 \xo*\xt Camba 4:1-16 \xt*\x* 
\v 13 Kon ɓaah ciŋ ngo, ɓi Adina sang ɗu ɗah, kinaat feyu.
\p
\v 14 Ɓoo inhiɗ ne ɓoo puloh ŋ kakaan, ɓoo hayiɗ ŋ kipes, te waaɗi ɓoo waaɗ ɓaah ciŋ ɓoo, weɗ teeɓoha. Ɓo' nu waaɗɗi ɓooɓi ɗah, a ris ŋ kakaan. 
\v 15 Yaa nu sang ɓaah ce ɗah, a apoh ɓo'. Te ɗu inhiɗ ne ali apoh ɓo' raakɗi kipes ki heyɗi reehe ŋ ɗooƴ ce.
\p
\v 16 Inii weɗ inhiɗ ɓoo waaɗoh : Yeesu eɗohiɗ kipes kiŋ ɗe wuu ɓoo. Mbaa ɓoo joyiɗ nam eɗoh kipes ciŋ ɓoo wuu ɓaah ciŋ ɓoo. 
\v 17 Waaye ɓo' raak, a hot ne ɓaah ce raakiɗ etoh, a rang keeñiŋ ɗe nga ɗe ɗah, waaɗohi puloh ŋ Kooh genoh na nga ɗe ?
\p
\v 18 Kuɓuuciŋ ngo, waaɗohiŋ ɓoo kinaat top ŋ nguɓ ci dong, waaye wa hunaat na tumohaaɗ na keeh. 
\v 19 Ŋ ineem, ɓoo hey inhe ne ɓoo ɓaah ŋ keeh ki, te ɓoo hey raake jam ŋ keeñ ciŋ ɓoo ŋ fiki Kooh. 
\v 20 Ali ɓoo atte haf ɓoo sah, ɓoo inhiɗ ne Kooh a yi uup yak liiɓ ciŋ ɓoo te a inhiɗ in ci jen. 
\v 21 Ɓaah ciŋ ngo ŋ keeñkoh, liiɓ ciŋ ɓoo ambɗi ɓoo findi yurhaaɗi ɗah, ɓoo raakiɗ ooluk ŋ fiki Kooh. 
\v 22 Te in nu ɓoo kiim ɗe ɗah, ɓoo rahasa nga ɗe, laam ɓoo ɓii taambiɗ nakoh ciŋ ɗe te ɓoo na tume ini neɓ ɗe.
\p
\v 23 Inii weɗ nakohiŋ ɗe : Weɗ ne ɓoo kos ŋ Kuɓkiŋ ɗe Yeesu Kiristaa, te ɓoo waaɗoh ŋ harmban ɓoo findi a nakoh ɓoo wa. 
\v 24 Ɓo' nu taambiɗ nakoh ciŋ Kooh ɗah, a gen ngaŋ Kooh, te Kooh gen nga ɗe ; ŋ inii, ɓoo inhiɗ ne a gen nga ɓoo : sagu \w Fuuɗsi Hoolohngaani|lemma="Fuuɗsi Hoolohngaani, Fuuɗsiŋ Kooh"\w* a eɗ ɓoo.
\c 4
\s Findi Fuuɗsiŋ Kooh na inhisohse
\p
\v 1 Ɓaah ciŋ ngo ŋ keeñkoh, kinaat kos ɓooɓi jen, ɓi na woye ne a \w Fuuɗsi Hoolohngaani|lemma="Fuuɗsi Hoolohngaani, Fuuɗsiŋ Kooh"\w* na woyɗukohee ɓa ; markisaat ɓa baahiɗ po ɗu inah andi fuuɗsi na woyɗukohee ɓa puloh ŋ Kooh wala ; laam adinaani woti-woti, ɓo' laayiɗ na tume haf ɓa woosuuɗ te ɓa nikɗaa. 
\v 2 Ɗu na hee inhisohe \w Fuuɗsiŋ Kooh|lemma="Fuuɗsi Hoolohngaani, Fuuɗsiŋ Kooh"\w* an : Ɓo' nu woo jahran ne Yeesu \w Kiristaa\w* hayiɗ na faan ɗah, ini woyɗukoh ɗe puloh ŋ Kooh ; 
\v 3 te waa nu teyɗukɗi Yeesu yeem ɗah\f + \fr 4:3 \fr*\ft Marka ini fiisu ŋ saar 2, aaya 22.\ft*\f*, wa pulohɗi ŋ Kooh, waaye wa liiɓiŋ sangiɗiŋ Kiristaani ; ɗu kerheen ne wa ɗii hay te ɗiski wa nik, wa ɗii ŋ Adina.
\p
\v 4 Ɗu ɓi kuɓuuciŋ ngo, ɗu ɓaah ŋ Kooh, te ɓooɓi tum haf ɓa woosuuɗ ɓeem, e ɗu saah ɓa, laam Yi nik nga ɗu a yi uup yak yi nik ŋ Adina. 
\v 5 Ɓeɗ, ɓa ɓaah ŋ Adina ; weɗ tah woo kiŋ ɓa woo Adina te ɓi Adina ɓa ɗii sikɗuk ɓa. 
\v 6 Ɓoo nak, ɓoo ɓaah ŋ Kooh ; ɓo' nu inah Kooh ɗah na sikɗuke ɓoo sikɗuk ; yi ɓaahɗi ŋ Kooh, na sikɗukeeɗi ɓoo. Ɓoo na inhisohe Fuuɗsiŋ keeh ki na wi na muuƴɗohe ɗaa.
\s Waaɗohiŋ Kooh
\b
\q
\v 7 Ɓaah ciŋ ngo ŋ keeñkoh,
\q ɓoo waaɗtiɗohaat ŋ harmban ɓoo ;
\q laam waaɗoh puloh ŋ Kooh,
\q te ɓo' nu waaɗ morom ce ɗah,
\q a rimkoh ŋ Kooh
\q te a inhiɗ Kooh.
\q
\v 8 Ɓo' nu waaɗɗi morom ce ɗah,
\q a moosɗi inhoh Kooh,
\q laam Kooh, a waaɗoh.
\b
\p
\v 9 Kooh teeɓohiɗ waaɗi a waaɗ ɓoo ŋ inii : Woosi a woos \w Kuɓkiŋ ɗe|lemma="Kuɓkiŋ Kooh"\w* yino-kongi ŋ Adina ne ɓoo pes taamboh nga ɗe. 
\v 10 Te waaɗoheem nikɗi haa ne e ɓoo waaɗ Kooh, waaye a yi waaɗ ɓoo te a woossa Kuɓkiŋ ɗe ne a nik seeƴkaahi nihsan bakaaɗ ciŋ ɓoo.
\p
\v 11 Ɓaah ciŋ ngo ŋ keeñkoh, Kooh waaɗiɗ ɓoo waaɗeem jen, mbaa, ɓoo joyiɗ nam waaɗtiɗoh ŋ harmban ɓoo. 
\v 12 Ali ɓo' hotohɗi Kooh. Waaye ɓoo waaɗtiɗoh ŋ harmban ɓoo ɗah, a genan nga ɓoo, te waaɗohiŋ ɗe hey mite nga ɓoo.
\p
\v 13 Inii weɗ na inhiɗe ɓoo ne ɓoo gen ŋ Kooh, te a gen nga ɓoo : eɗi a eɗ ɓoo Fuuɗsiŋ ɗe. 
\v 14 Ɓoo hotiɗ ne Baabi a yi woos Kuɓki ne a nik Mucɗohiŋ Adina te ɓoo ɓii seede wa. 
\v 15 Ɓo' nu woo jahran ne Yeesu a yi Kuɓkiŋ Kooh ɗah, Kooh gen nga ɗe, te a gen ŋ Kooh.
\p
\v 16 Te ɓoo inhiɗ waaɗi Kooh waaɗ ɓoo, te ɓoo kosiɗa. Kooh, a waaɗoh, te ɓo' nu gen ŋ waaɗoh ɗah, a gen ŋ Kooh, Kooh gen nga ɗe.
\p
\v 17 Waaɗohi mitiɗ ŋ ɗooƴ ɓoo ŋ raaki ɓoo raak hel daliɗ ŋ mbehaŋ atteena, laam findi a mand, ɓoo mand ɗaa ŋ adinaanii. 
\v 18 Waaɗoh hunɗi na neƴƴoh, waaɗoh keeh-keeh na aañe aañ neƴƴoh, laam neƴƴoh na seke mbugal, kon ɓoyi neƴƴoh, waaɗoh mitɗi nga ɗe.
\p
\v 19 Ini kaɗ nga ɓoo nak, a yi koc waaɗ ɓoo, weɗ tah ɓoo waaɗiɗ ɗe. 
\v 20 Ɓo' woo ne a waaɗiɗ Kooh, te a sang morom ce ɗah, a leyoh ; ɓo' nu waaɗɗi morom ce yi a na hote ɗah, a minɗi waaɗ Kooh yi a hotɗi. 
\v 21 Te ɓoo rahsoh nakohii nga ɗe an : « Yaa nu waaɗ Kooh ɗah, a namaat waaɗ ɓaah ce. »
\c 5
\s Kos seedeeniŋ Kooh
\p
\v 1 Ɓo' nu kos ne a Yeesu, a yi \w Kiristaani|lemma="Kiristaa"\w* ɗah, ɓoyeem, a kuɓu Kooh, te ɓo' nu waaɗ Baabi, yi na rime ɗah, a waaɗiɗ ɓi rimkoh nga ɗe. 
\v 2 Ŋ inii ɓoo inhiɗ ne ɓoo waaɗiɗ kuɓuuciŋ Kooh : Ɓoo waaɗiɗ ɓa ne ɓoo waaɗ Kooh te ɓoo taambiɗ nakoh ciŋ ɗe ɗah. 
\v 3 Laam waaɗ Kooh weɗ ne ɓoo taambiɗ nakoh ciŋ ɗe. Te nakoh ciŋ ɗe ɓitɗi, 
\v 4 laam ɓo' nu rimkoh ŋ Kooh ɗah, a miniɗ saah Adina ; te ini saah Adina, weɗ kosi ɓoo kos.
\p
\v 5 Ya ɓa a yi min Adina ɗal yi kos ne Yeesu a \w Kuɓkiŋ Kooh\w* ? 
\v 6 Yeesu Kiristaa yeem, a yi hay taamboh ŋ masuɓ na ñif ne a muciɗ ɓoo ; a taamboh ŋ masuɓ dong haa, waaye ŋ masuɓ na ñif ; te a \w Fuuɗsi Hoolohngaani|lemma="Fuuɗsi Hoolohngaani, Fuuɗsiŋ Kooh"\w* na seede'ee wa, laam Fuuɗsi a yi keeh ki. 
\v 7 Seede kaahay raakiɗ : 
\v 8 Fuuɗsi na masmi na ñif mi, te ca kaahay jen ca huniɗ.
\p
\v 9 Ɓo' seede ɗah, a na kosse kosu ; waaye seedeeniŋ Kooh weɗ uupiɗ hatil, te wii weɗ seedeeniŋ Kooh : A seede'iɗ Kuɓkiŋ ɗe. 
\v 10 Yaa nu kos Kuɓkiŋ Kooh ɗah, a raak seedeeneem ŋ ɗooƴ ce ; yaa nu kosɗi seedeeniŋ Kooh ɗah, a amb Kooh findi leyoh, a kosɗi seedeeni Kooh seede Kuɓkiŋ ɗe.
\p
\v 11 Seedeeneem weɗ ne Kooh eɗiɗ ɓoo kipes ki reehanɗi te kipes keem weɗi ŋ Kuɓkiŋ ɗe. 
\v 12 Yi raak Kuɓki a yi raak kipes ki ; yaa nu raakɗi Kuɓkiŋ Kooh ɗah, raakɗi kipes. 
\v 13 Ŋ fiis ɗu in ceem ne ɗu inah ne ɗu raakiɗ kipes ki reehanɗi, ɗu ɓi kos Kuɓkiŋ Kooh.
\p
\v 14 Oolki ɓoo raak nga ɗe, weɗ ne in nu ɓoo kiim te wa hun na waaɗ-waaɗiŋ ɗe ɗah, a kerah ɓoo. 
\v 15 Te ɓoo inah ne a yii kerah ɓoo ŋ in nu ɓoo kiim ɗe ɗah, ɓoo namiɗ inah ne ɓoo rahsiɗ in ci ɓoo kiim.
\s Kiimɗaat kosiɗ ci na bakaaɗe
\p
\v 16 Ɓo' hot yino ŋ ɓaah ciŋ ɓoo kosiɗ ci bakaaɗee, bakaaɗi ɓekɗi ɗe kakaan ɗah, a kiimɗaat ɗe Kooh, a onu kipes ; a hey wa one ɓi bakaaɗɗi bakaaɗi ɓek ɓa kakaan. Waaye raakiɗ bakaaɗi na ɓekohe kakaan. Ineem tahɗi so nakoh kiim Kooh. 
\v 17 In yurhaaɗi nu nik ɗah, wa bakaaɗ, waaye raakiɗ bakaaɗ ci ɓekɗi ɓo' kakaan. 
\v 18 Ɓoo inhiɗ ne yaa nu rimkoh ŋ Kooh ɗah, a na bakaaɗeeɗi. A Kuɓkiŋ Kooh na niiɗee ɗe, Seytaani minɗi ɗe laal.
\p
\v 19 Ɓoo inhiɗ ne ɓoo ɓooɓiŋ Kooh te Adina jen wa ɗii ŋ yaah Seytaani. 
\v 20 Te ɓoo namiɗ inah ne Kuɓkiŋ Kooh hayiɗ, te a eɗiɗ ɓoo ñaañ ne ɓoo inhisoh Kooh, Keeh-keehi ; te ɓoo ɓii ngaŋ Kooh, Keeh-keehi, ngaŋ Kuɓkiŋ ɗe Yeesu Kiristaa. Yeem, a Koohi keeh-keehi, kipes ki po faw. 
\v 21 Komaakciŋ ngo, wortukaat kooh ci nikɗi keeh.