\id TIT - Buglere NT -Panama 2008 (DBL -2013) 
\h TITO 
\toc1 Pablo Nu Chada Degaba Tito Alin 
\toc2 Tito 
\toc3 Tit 
\mt1 Pablo Nu Chada Degaba Tito Alin 
\mt2 Carta de Pablo a Tito 
\ip Pablo chada ai degangu kagale ama skatemanalla kada Tito alin, Tito Jesucristo gerua keruchugu Pablo giti gire ama Jesucristo gerua gau ulia. Tito chagedu ule Pablo ole Pablo chudaboi Jesucristo gerua dbe nga gwealege, bitaboke Pablo Tito kagu una Corintoge daba Chubenu una emu chudaboi Jesucristo gerua giti, kaire bitaite Pablo Tito jigu ngadrega bleske kada Cretage kwian Chubenu eni chudaboi kaire kwian gweale gai daba chugagwallale una kaire kairege nga Cretage. 
\ip Pablo chada ai degangu Tito alin kagale Titoge nga Cretage. Nga ege kwian tanre kledu chage geru me ulia dbe, kwian e gerudu ama kledu Chube gerua Jesucristo giti ulia dbe agwa me ene dale, ama me kledu chage geru ulia dbe ama kledu chage geru mau tale dbe kwiange. Chada ai giti Pablo Tito ta gbu kwian ene giti, kaire Pablo gerudu Tito ole Tito kwian nga Cretamu ta gbadale toi no trate me geru ngwale gai agwa diali Jesucristo gerua alin gai ulia. Kaire chada ai giti Pablo Tito ta gbu kwian tke tangle trate Jesucristo gerua giti. 
\c 1  
\s1 Pablo gbi kage chada giti Tito alin 
\p  
\v 1 Cha Pablo chada ai degange ba alin Tito: 
\m Cha kwian lle boanga Chube alin, cha kwian Jesucristo gerua ketanga. Chube nu kwian gaba Chube gerua gai ulia, Chube cha gau cha gbu kwian ene ta gbe Chube geruadi, Chube cha gbu kwian ene tke tangle Chube geruage, ene kwiange chke uñale ama chagedale mine Chube takalin kare,  
\v 2 kaire kwiange chke uñale chui be chke gire kwian Chubenu ulita be toi diali chui tangle Chube ngwadi Chube ole, kwian Chubenu ulita kle chui e manade. Ngeru ngeru Chube bebi nga dba ai ulita dodade Chube bebi kwian dodade gire Chube gerudu: “Kwian ulita bai cha gai ulia be toi diali chui tangle cha ole.” Chube gerudu ene, Chube me sodu, Chube gerule ulia diali.  
\v 3 Chube gerudu ngeru chku uñale chege chui gwealege Chube chui gbu kare. Chube che jwannga siere ama tale ama cha gau, ama mo gerua ketu chage gire ama cha kagu ama gerua trage kwian ole ulita.  
\v 4 Cha chada ai degange ba alin Tito, che boke Chubenu, cha kaire ba Chube gerua gau ulia mo tale, kaire ba cha alin ba salengwli cha kirolla kare. Cha takalin Chube che Ñenua kaire Jesucristo che jwannga siere ji chugege age me no gdale ama age no no ba alin ama ba ta gbe suga no diali. 
\s1 Tito lle boi Chube alin nga kada Cretage 
\p  
\v 5 Tito, che kledu ule nga kweri kada Cretage, che lle bo ule Chube alin, lle gweale me chegu dodaba ulita no, malen cha ba jigu nga ege ba lle ulita boadale no, kaire ba kwian Chubenu chugagwalla gbadale una kaire kaire cha gerudu ba ole kare.  
\v 6 Kwian Chubenu chugagwalla ai kare gbadale: Kwian Chubenu chugagwalla chagedale no trate kwian ulita gwa giti, ene kwian me ñage gerule me no amadi. Ama toidale muinga gdaitre alin ole. Ama kirolla Chube gadale ulia, ama kirolla chagedale no trate, kirolla ñenua kerua gadale dage age ñenua gerule kare, ene kwian na me ñage gerule me no kirolladi.  
\v 7 Kwian Chubenu chugagwalla, ama kwian lle boanga Chube alin, malen noare kwian ene chage trate no kwian ulita gwa giti. Ama me mo gbadale ma no ma kweri daba nage. Ama me kwian ta skochienga. Ama mo ta gbe me lle gage janga me chage llale. Ama me kira batanga daba ole. Ama me tañachugadale igi gai lle giti ngwale daba ngeru.  
\v 8 Ama daba basanga gadale ngwange no mo ullage. Ama kwian agenga no diali, ama no age no ole. Ama me mo chugadale ngwadi age me no sidri. Ama chagedale no trate Chube takalin kare. Ama kwian no Chube gwa giti. Ama mo ta gbadale age no diali me mo chuge ngwadi age me no.  
\v 9 Ama geru jwandale no geru uliage, ama mo ta gbadale geru e ulia gai diali, ene ama ñage kwian ulita tke tangle ñage kwian kira gbe geru uliage, kaire ñage gerule no kwian ole kwian bai kle gerule me no geru ulia dollale ene kwian gerule geru ulia dollale me ñage gerule dare. Ba kwian ene kare ulita gai gbe daba Chubenu ulita chugagwallale una kaire kairege nga Cretage. 
\p  
\v 10 Kwian nga Cretamu ngle gerule me no geru ulia dollale, ama kwian me no me Chube gerua gai dage, ama geru ngwale alin trage daba ole daba anblite geru ngwaledi. Kaire kwian israelita tanre kle daba anblite, ama gerule kwian ulita mo kwara tkadalenga sidri ene kwian chege Chubenu. E me ulia, malen noare kwian Chube uñe no no chege kwian Chubenu chugagwallale ene chugagwalla e ñage kwian ulita tke tangle no geru uliage.  
\v 11 Kwian gerunga geru ulia dollale, ama kle age me no, ba me ama chuge ngwadi daba tke tangle dare geru ngwalege. Ama kwian u gbaite tke tangle geru ngwalege gire kwian ulita geru ngwale gai ulia gire kwian ulita u ege joge siere geru uliage. Kwian daba tkanga tangle age kwian tanre ole ene u kaire kairege, ama tañachuge kwian tke tangle ene geru ngwalege ene ama igi gai ngle tke tangle geru ngwale ñanale. 
\p  
\v 12 Kwian gdaite ta molen nga Cretage, ama gerudu agali mo bitalladi: “Kwian nga Cretamu ulita diali sole, ama age me no diali, ama ulita kianle, ama tañachuge bligda ngle alin gute.”  
\v 13 Kwian e ta molen gerudu ulia mo bitalladi, kwian nga Cretamu ulia kwian me no kwian ta molen gerudu kare, malen ba gerudale no trate kwian nga Cretamu ulita ole, ba gerule ama ole ama mo ta gbadale geru ulia alin gai me geru ngwale gai ulia.  
\v 14 Ama me kwian israelita gerua unsuialin dodaba mo tale gbadale gdadi, kaire ama me agedale kwian israelita gerua gerule kare, geru e me Chube gerua, geru e kwian israelita gerua, kwian israelita geru e dodadu mo chugadi, kwian me Chube gerua gai ulia, kwian israelita gerua kwian ene gbe siere Chube geruage. 
\p  
\v 15 Kwian bai ta no trate molen, diali ama tañachuge no ama age no Chube gwa giti. Kwian bai me Chube gerua gai ulia, ama ta me no, diali ama tañachuge me no ama age me no, amage me suge kle age ulita me no, ama tañachuge kle age no.  
\v 16 Ama gerule ama Chube uñe, gire ama age nganake, ama age me no Chube dollale. Kwian ene gerule alin allabi me age ama gerule kare. Ama kwian me no, ama me Chube gerua gai dage ama me age Chube takalin kare, ama age me no diali, ama me ñage age no sidri. 
\c 2  
\s1 Tito kwian tkadale tangle geru ulia Chubenuge 
\p  
\v 1 Tito, ba kwian ulita tkadale tangle geru ulia gerule kare.  
\v 2 Ba kwian onbre juma ulita tke tangle chage ene: Ama me mo chugadale ngwadi age me no. Ama agedale no diali, ene kwian na ama gai dage. Ama me mo chugadale ngwadi age ulita ama ta agekalin kare. Ama diali ta gbadale Chube gerua gai ulia. Ama mo ta dbadale no kwian ulita ole. Ama boi daga ngwale Chube gerua giti ama me talladale, ama mo ta gbadale chage ngerugu Chube takalin kare. Ba kwian onbre juma tke tangle chage ene ulita.  
\v 3 Kaire ba muinga juma ulita tke tangle chage ene: Ama chagedale no trate diali Chube takalin kare. Ama me gerudale ngwale kwiandi. Ama me lle gage janga. Muinga juma chage no ene muinga biale ñage gwage muinga jumadi, ene chke uñale muinga bialege ama mo ta gbadale chage no Chube takalin kare.  
\v 4 Muinga juma chage no trate ñage muinga biale tke tangle muinga biale chagedale ene: Muinga biale mo ta gbadale tañachuge no onbre gdaitre alin ole ta dbadale no mo olia ole.  
\v 5 Muinga biale me mo chugadale ngwadi age ulita ama ta agekalin kare. Ama mo ta gbadale age no ulita trate. Ama kirogwa manadale no lle boi no mo ullage. Ama agedale no mo ñengula alin mo kirogwalla alin. Ama mo ñengula kerua gadale dage diali, ama agedale ñengula gerule kare. Muinga biale age no ene ulita kwian na gwage amadi me ñage gerule me no Chubedi me ñage gerule Chube gerua me ulia. 
\p  
\v 6 Ba gerule no no onbre biale ole, onbre biale mo ta gbadale tañachuge no diali me mo chuge ngwadi age me no.  
\v 7 Ba agali chagedale no trate diali onbre biale gwa giti, ba me gerule alin allabi, ene be suge onbre bialege ama chagedale ba kle chage kare. Ba kwian tke tangle ba gerudale no ta giti, ba ama tke tangle no, ba tañachugadale no ba ta gbadale no trate kwian tke tangle.  
\v 8 Ba kwian tke tangle no trate geru ulia alinge, ene kwian me ñage gerule me no badi me ñage ba gbe jiske sidri ba kle kwian tke tangle giti. Kwian gweale gerule ba dollale, amadi nga be chie ibule, be suge amage ba kle kwian tke tangle geru uliage, kwian gerule ba dollale me ñage gerule dare badi. 
\p  
\v 9 Kwian daba gai kwian daba gbe lle boi mau alin, kwian e chege diali lle boi mo mauña alin me igi gai mo alin lle boi ñanale. Tito, ba gerule kwian lle boanga ene ole, ba ama tke tangle chage ene: Kwian lle boanga mo mauña kerua gadale dage, ama lle boadale ulita no no mo mauña gerule kare. Ama me ka boadale mo mauña kalen.  
\v 10 Ama me lle jwandalenga mo mauña ngeru, ma no ama mo mauña llea manade no ulita mo mauña alin. Ama lle boadale no no diali mo mauña alin me tañachuge lle boi me no sidri. Kwian lle boanga mo mauña alin Chube uñe lle boi no ulita mo mauña alin kwian ulita gwage lle boanga mauña alin Chube uñedi ama chage no trate ulita, gire kwian ulita be gerule no Chube che jwannga siere giti, kwiange be suge Chube gerua no Chube gerua kle kwian Chubenu ta gbe chage trate. 
\p  
\v 11 Chube no no kwian ulita ole, ama agedu no kwian ulita alin mo Kirolla giti, Chube tale Chube mo Kirolla kagu nga dba ai giti kwian ulita alin, Chube Kirolla alin giti kwian tien gitiru ji chugege agedu me no gdale.  
\v 12 Chube agedu no ene che alin malen sugedale chege che chegedale sugekare age me no ulita Chube dollalege nga dba ai giti, che me mo chugadale ngwadi age me no ni sidri kwian me Chubenu kle age kare, che me mo chugadale ngwadi tañachuge age che takalin kare, che agedale ulita no, che chagedale no trate ulita Chube takalin kare.  
\v 13 Che mo ta gbadale age ene no trate Jesucristo chieni chuia manade. Uñale chege Jesucristo be chieni ama gerudu kare, malen che kledale nga suga noare ole ama chieni chuia manade. Ama be chieni mo kirallaske, be chieni mo chrallaske, ama che Chubea kweri ama che jwannga siere ji chugege age me no gdale.  
\v 14 Jesucristo mo chugu ngwadi jogeda che ulita alin, ama jokeda alin giti ama che jun siere, ene che amanu. Ama che ta blitu, ama che ta gbu nganake, ene suge chege che me agedale me no dare gire che ta agekalin no diali ama takalin kare. 
\p  
\v 15 Tito, ba kwian Chubenu tkadale tangle ulita cha gerudu kare. Ba kwian Chubenu kira gbe chage no Chube takalin kare, kwian bai me kle age no Chube gerua gerule kare ba ka boi ama ole kiraske, ba ñage age ene, Chube ba gbu kwian tke tangle Chube geruage, ba kwian tke tangle no, ene kwian ba gai dage, ba gerule ulita kwian ole kwian me ñage ba kerua gai ngwale. 
\c 3  
\s1 Kwian Chubenu ulita chagedale Chube takalin kare 
\p  
\v 1 Tito, ba gerudale kwian Chubenu ulita ole ama kwian chugagwalla ulita kerua gadale dage, ama agedale chugagwalla gerule kare, ama kledale biale lle boi no ulita chugagwalla gerule kare.  
\v 2 Kwian Chubenu me ñage gerule kwian gdaitedi me no, ama me ñage kira bate daba ole, ama toidale taingwli daba ole, ama agedale no kwian ulita alin, ama mo gadale dage kwian ulita ole. 
\p  
\v 3 Che kaire ngeru kwian me no, che agedu tanre me no malen Chube gerua me sugedu chege, che me Chube gerua gau dage, che geru ngwale gau dage. Diali che tadu agekalin che takalin kare, diali che tadu agekalin ulita me no kwian me Chube uñe kle age kare, che tañachugu age ene giti nga be suga noare chedi chui tangle. Che toidu age me no daba ole daba gbale boi daga ngwale. Daba na lle no no molen, che tadu lle kaire gakalin mau alin. Che jainchku daba nadi ulita, kaire ama ulita jainchku chedi.  
\v 4 Che kledu toi age me no ene ulita gire Chube gerua chku uñale chege, geru e gerule Chube che jwannga siere mo ta giti agedu no kwian ulita alin, ama noare kwian ulita ole,  
\v 5 ama che jun siere, ene che mi ji chuge bdagli agedu me no gdale. Ngeru che agedu me no tanre Chube dollale, ni che agedu no sidri ama alin gire ama che jun siere ji chugege age me no gdale, ama taidu dage che ulitage, ama noare che ole. Chube Oña che ta blitu, ama ta jagere ketu chege, che me toi ta ngeru kare, che toi ta jagere ole, che chage Chube takalin kare.  
\v 6 Chube mo Oña ketu chege Jesucristo che jwannga siere giti, ama mo Oña ketu chege che chudaboi tanre.  
\v 7 Chube mo ta giti agedu no che alin, Chube che jun siere ji chugege age me no gdale, ene Chube gwage chedi che no trate me jiske, kaire bdagli che be toi diali ule Chube ole chui tangle, che kle chui e manade. 
\p  
\v 8 Cha gerudu kare ulita, e ulia ulia, malen cha takalin ba me ka chite geru e trage kwian ulita ole, ba kwian tke tangle geru ege, ene be suge kwian ulitage kwian bai nu Chube gaba ulia ama mo ta gbadale age no diali Chube takalin kare. Geru e no kwian ulita alin, malen ba kwian ulita tkadale tangle no, geru e giti ba be kwian ulita chudaboi.  
\v 9 Kwian geru ngwale traganga daba ole, kwian geru unsuialin enusulin oña giti traganga kaire kwian geru traganga Moisés nu Chube gerua degaba unsuialin giti, ama ulita kle kira bate ngwale geru e ulita giti, ba me kira batadale ama ole, ba chegedale sugekare kwian kira bate geru giti daba olege, kira bate geru e giti me no ba alin, e ngwale. 
\p  
\v 10 Kwian Chubenu mneiteske kwian gweale ta daba tkakalin tangle geru ngwalege me gerule geru ulia gerule kare, gire kwian Chubenu ulita ta me chage salengwli, bonga be chage gdaite nate bonga be chage gdaite na nate. Ba kwian daba tkanga tangle ene kade, ba gerudale no no ama ole bitaite ama me ñage daba tke tangle geru ngwalege, ama me ba kerua gbe gdadi gire ba gerule no no nabitaite ama ole, ama me age ba gerule kare ba ama kage siere kwian Chubenu ulitage.  
\v 11 Ama me ba kerua gbe gdadi, ene chke uñale bage ama kwian me no, ama age ama takalin kare me age Chube gerua ulia gerule kare, ama kwian ene malen uñale bage ama be ji chuge bdagli age ene gdale. 
\s1 Pablo chada degange bdagli Tito alin 
\p  
\v 12 Tito, cha be kwian kada Artemas kage ba ngwadi, agwa ama mi ñage joge cha be kwian kada Tíquico kage ba ngwadi, ama gweale be joge chke ba ngwadi gire cha takalin ba chie blike tienda chadi una kada Nicópolis, cha chui gbu joge una Nicópolige, noi suiale cha be kle toi llani.  
\v 13 Ngeru ba kwian gerunga daba giti kada Zenas kaire kwian kada Apolos, ba ama chudaboi no ulita, ama be joge chagengwage, lle bai ama takalinge ba lle kete amage, ene lle ulita giti ama me tañachugadale, ene ama be chage no ama be joge ngwadi.  
\v 14 Che ulita Chubenu daba chudaboadale no ulita ene. Kwian Chubenu gwage daba nadi, ulia daba na me lle molen mau alin, kwian Chubenu daba ene chudaboadale. Kwian Chubenu diali age no ene daba na alin ama me kle age ngwale, ama kle age no Chube gwa giti. 
\p  
\v 15 Tito, daba ulita kle aini cha ole gbi kage ba alin chada ai giti. Kaire cha gbi kage cha skatemanalla Chube giti ulita alin kle eni ba kle ngwadi, cha noare ama ulita ole. Cha takalin Chube age no ba ulita alin. 
\p Geru ai ene ulita cha Pablo chada degangu ba alin Tito. Che kle meni.