\id ROM - Buglere NT -Panama 2008 (DBL -2013) 
\h ROMANOS 
\toc1 Pablo Nu Chada Degaba Kwian Chubenu Una Romamu Alin 
\toc2 Romanos 
\toc3 Ro 
\mt1 Pablo Nu Chada Degaba Kwian Chubenu Una Romamu Alin 
\mt2 Carta de Pablo a los Romanos 
\ip Gerukle Pablo kledu una Corintoge gire Pablo chada ai degangu kagale kwian Jesucristo gerua gabage una Romage, una kweri Roma chege nga Italiage, kwian chugagwalla kweri emperador kada César toinga una Romage. 
\ip Pablo tadu jogekalin basale kwian Jesucristo gerua ganga una Romamudi kwian tke tangle dare Jesucristo gerua giti, kwian Jesucristo gerua ganga una ege kwian gweale israelita kwian gweale na me israelita. Pablo bebi joge chke llani una Romage gire Pablo chada ai kagu mo ngeru kwian tkagda tangle Jesucristo agedu kwian alin giti. 
\ip Chada ai giti Pablo gerule kwian israelita kwian me israelita ulita salengwli Chube gwa giti, kaire Pablo gerule Chube gerua Moisés nu degaba unsuialin geru e alin allabi gai ulia giti kwian me chege no trate Chube gwa giti, agwa kwian Chube agedu Jesucristo giti kwian geru e gai ulia giti alin allabi kwian tien gitiru ji chugege agedu me no gdale, ene kwian chege no trate me jiske Chube gwa giti. 
\c 1  
\s1 Pablo gbi kage chada giti kwian Chubenu 
\s1 una Romamu alin 
\p  
\v 1 Cha Pablo lle boanga Jesucristo alin chada ai degange ba kwian Chubenu ulita una Romage alin: 
\p Chube cha gau Chube cha gbu geru amanu ketangale kwian ulitage, geru e kwian jwangda siere ji chugege age me no gdale.  
\v 2 Unsuialin Chube geru e tragu kwian Chube gerua ketanga ole, Chube gerudu Chube be kwian jwannga siere kage kwian ulita alin, kwian Chube gerua ketanga Chube gerua e degu.  
\v 3 Kwian jwannga siere e Jesucristo che Chugagwalla, ama Chube Kirolla, ama medunga nga dba ai giti kirogwa kare kwian israelita chugagwalla unsuialin kada David oindalla giti. Jesucristo kwian ulia,  
\v 4 agwa kaire ama Chube, ama no trate ulita. Kwian gwagedu amadi jogeda, kaire kwian gwagedu amañadi chkeni gwadeni, e giti sugedu trate kwiange ulia ama Chube Kirolla ama kira molen tanre. 
\p  
\v 5 Jesucristo giti Chube agedu no cha alin, ama cha gau geru Jesucristo giti ketangale kwian ulitage, ene geru Jesucristo giti ñage joge kwian me israelita ulitaske, ene kwian me israelita tanre be geru Jesucristo giti gai ulia be Jesucristo gai dage be age Jesucristo takalin kare.  
\v 6-7 Ba ulita me israelita kle toi una Romage bai kaire nu geru Jesucristo giti gaba ulia, ba Jesucristonu, Chube ba ulita ta gbu Jesucristo gai ulia ene ba ulita chege kwaitre alin amanu. Ba ene ulita alin cha kle chada ai degange, kaire ba kwian israelita ulita Jesucristonu kle una Romage alin cha kle chada ai degange, cha gbi kage chada ai giti ba ulita alin. Ba ulita israelita kaire me israelita, Chube no no ba ulita ole, Chube ba ulita gau mau alin, Chube takalin ba ulita chage trate Chube ole. Cha takalin Chube che Ñenua kaire Jesucristo che Chugagwalla age no no ba ulita alin, ama nga gbe suga no ba ulita tale. 
\s1 Pablo ta jogekalin una Romage kwian Chubenu 
\s1 kira gbe Jesucristo geruadi 
\p  
\v 8 Ngeru cha geru ai kete ba ulita kwian Chubenu una Romamuge: Jesucristo giti ba Chube gau ulia mo tale, ba kle mo ta gbe chage diali ama ole, geru e ba giti kle chke uñale kwiange nga kweri ulitage, e giti nga suga no chadi malen cha kle gerule no no Chube ole ba ulita giti.  
\v 9 Cha kle mo ta gbe no no ulita lle boi Chube alin Chube takalin kare, cha geru Chube Kirolla giti traganga kwian ole. Chubege uñale diali cha kle gerule Chube ole gire cha kle tachke ba ulita giti, cha gerule ba ulita giti Chube ole: “Chube, cha takalin ba kwian banu una Romamu chudaboi, ba ama manade no.  
\v 10 Sbali cha tadu jogekalin tienda ama ulitadi, ba takalin ba ñage cha kage ama ngwadi, cha alin e no Chube.” Cha kle gerule tanre ene Chube ole joge ba ngwadi giti, cha tañachuge bdagli cha be ñage joge chke ba ngwadi.  
\v 11 Cha ta jogekalin ba ngwadi ba chudaboi, cha ta ba ulita tkakalin tangle ma no Jesucristo giti, ene ba ulita chege mo ta gbaba Jesucristo alin gai ulia diali.  
\v 12 Cha mo ta gbu Jesucristo gai ulia, ba ulita kaire mo ta gbu Jesucristo gai ulia, cha ta klekalin ule ba ole e ma no cha alin, ene che kira gai moge ule geru giti, ba cha ta gbe chage ngerugu Jesucristo ole cha ba ulita ta gbe chage ngerugu Jesucristo ole.  
\v 13 Cha takalin chke uñale ba ulita cha daballa cha ibotea Jesucristo gitige, bitangle cha mo ta gbu joge ba ngwadi tienda badi, sbali kledu boi ene cha ole, nege kle boi ene kaire, diali lle gweale kle cha jonllage gire cha me ñage joge chke. Cha klekalin ba ulita ole llani baske ba ulita Jesucristonu tke tangle Jesucristo giti, ene kwian gweale na kle toi baske ña geru Jesucristo giti keruchuge geru Jesucristo giti gai ulia kwian me israelita nga nage geru Jesucristo giti gau ulia kare.  
\v 14 Suge chage Chube cha gau cha kagu geru Jesucristo giti tragadale kwian ulita ole, cha me tañachuge kwian giti kwian kwira mine kwian suia mine, cha me tañachuge kwian giti kwian geru jwanba tanre o me geru jwanba, agwa cha Chube gerua Jesucristo giti tragadale kwian ulita ole Chube cha kagu age kare.  
\v 15 Cha ta jogekalin blike ba ngwadi geru Jesucristo giti trage ba ulita Chubenu ole kle toi una Romage, kaire cha ta geru Jesucristo giti tragakalin kwian na me Jesucristo uñe ole kle toi una Romage.  
\v 16 Cha no no geru Jesucristo giti ole, nga suga no chadi geru e trage kwian ulita ole, cha me ibule geru Jesucristo giti trage kwian ulita ole, e Chube gerua kiraske, geru e no, kwian ulita bai kaire geru Jesucristo giti gai ulia Chube kwian ene ulita jwen siere ji chugege age me no gdale. Geru Jesucristo giti chku kwian israelitaske ngeru agwa kaire geru e kle chage nege kwian me israelitaske, ene kwian ulita israelita me israelita bai kaire Jesucristo gai ulia kwian ene tien gitiru ji chugege age me no gdale.  
\v 17 Chube gerua Jesucristo giti che ta be suge Chube che jwen siere mine che agedu me no giti ene che chege no trate Chube gwage. Che mo ta gbe Jesucristo alin gai ulia, e giti alin allabi che me chege jiske Chube gwage che chege no Chube gwage. Chube gerua degaba unsuialin gerule: 
\q1 “Kwian bai kaire mo ta gbe Chube gerua gai ulia mo tale, kwian ene no trate Chube gwage, kwian ene be toi chui tangle Chube ole.” 
\s1 Kwian mo ta gbe sugekare Chubege age nganake me age Chube takalin kare, kwian ene jiske Chube gwage 
\p  
\v 18 Chube agali nga ngaña giti ji gbe mno kwian ulita agenga me no alin. Kwian mo ta gbe age Chube dollale mo ta gbe age me no alin diali, age me no talla tanre kle kwian ene tale malen kwian me Chube gerua gai dage ulia, kwian ene me tachke geru ulia gbe gdadi, ulita tañachuge age me no alin allabi. Chube ji gbe mno kwian ene ulita alin.  
\v 19-20 Kwian agenga me no me ñage gerule: “Chube me kle”, ama me ñage gwage Chubedi agwa ñage gwage Chube nu nga ulita dodabadi. Chube nga ulita dodadu, ege gwaiguda kwian ulita ñadu gwage edi ñadu suge trate trate kwiange Chube kle Chube nga ulita dodadu mo kiralla giti. Chube kiralla me bidege, Chube kiralla chege diali chui tangle, e giti ñage suge trate trate kwian ulitage Chube mine malen ni kwian gdaite ñage gerule: “Chube me kle”. Kwian agenga me no ulita jiske Chube gwa giti.  
\v 21 Uñale kwiange Chube kle, agwa me gerule no Chube giti me Chube gai no kweri mo Chugagwallale me gerule no Chube ole Chube agedu no no giti ulita. Kwian tañachuge nganake Chube agedu no gitige, kwian mo ta gbe tañachuge age lle ngwale giti. Kwian tañachuge lle ngwale giti, malen tañachuge tanre age me no giti ta chege nga jereske geru uliage, geru ulia me suge me ñage age geru ulia gerule kare.  
\v 22 Kwian ene gerule mau giti: “Cha geru ulia uñanga tanre.” Ama gerule ene ama kle gerule ngwale, ama me geru ulia uñanga.  
\v 23 Chube gwade, ama me jogeda, ama me boi. Agwa kwian boi, bda boi, ulita me chege gwade diali, ama ulita jogeda. Kwian lle e kare ngwale oña dodade mo kodi gai mo chubeale, kwian mo salengwli oña dodade, kwian bda ji giti oña dodade, kwian bda ko giti oña dodade, kwian bda chage dba kde kwara giti oña dodade. Lle oña e ulita ngwale me gwade, lle oña e kare ole kwian mo ta gbe no, kwian lle oña e kare gai mo chubeale, agwa Chube gwade ulia ole kwian me mo ta gbe, kwian me Chube ulia gwade gai mo Chubeale me gerule no Chube ulia gwade giti.  
\v 24 Kwian ene ulita me mo ta blitakalin Chube ole malen Chube kwian ene ulita chuge ngwadi age me no ulita ama ulita takalin kare, ene kwian chege age ta me no tanre ole ulita diali kwian takalin kare, ta tanre me no ene ole kwian mo ta gbe jrite mo salengwlidi age me no tanre sugaska.  
\v 25 Kwian ulita mo ta dbadale no Chube ulia ole gerudale no no ama alin giti diali, ene nobi Chube alin. Agwa kwian ta me no tanre me tañachuge ene Chube giti, ama geru ulia blite nganake Chube nu lle dodaba gai mo chubeale, ama gerule no lle e giti, agwa ama me Chube agali gai ulia mo Chubeale, ama me Chube gai dage, ama me gerule no Chube giti.  
\v 26 Chube nu lle dodaba kwian lle ene gai mo chubeale, kwian me mo ta blitakalin Chube ulia ole malen Chube ama chuge ngwadi age ulita kwian takalin kare. Kwian onbre mo ta gbe age nganake, muire mo ta gbe age nganake, muinga me takalin onbrege, muinga jrite mo muire salengwlidi.  
\v 27 Kaire kwian onbre me takalin muingage, kwian onbre jrite mo onbre salengwlidi, onbre salengwli mo ta gbe ule jrite modi. Kwian onbre kaire muinga age me no tanre ene modi, ene ama agali mo gbe jingme chienga ama age tanre me no giti, jingme e kote ama chege toi oga kaire jogeda.  
\v 28 Kwian agenga me noge uñale Chube kle, agwa kwian ene me tañachuge Chube giti me Chube gai dage me mo ta blite Chube ole. Chube kwian ene chuge ngwadi chege tañachuge me no me no diali, ene kwian chege age me no tanre ama kle tañachuge kare.  
\v 29 Kwian ene ulita agenga tanre daga ngwale me no ai kare: Muire onbre mo chuge ke giti. Kwian chage ta me no ole age me no diali. Kwian mo ta dbe lle tanre gai mau alin. Kwian mo ta gbe age tanre me no daba dollale. Kwian takalin lle dabanuge mau alin. Kwian daba gwangada. Kwian mo ta dbe kira bate daba na ulita ole diali. Kwian daba anblitanga agedale me no daba ole. Kwian me tañachuge no ni sidri. Kwian geru jinanga ngwale dabadi daba na ulita ole.  
\v 30 Kwian gerunga tanre ngwale me no daba ulitadi. Kwian me no me no Chube ole. Kwian gerule me no daba gwaske. Kwian tañachuge mo giti ma no daba nage. Kwian mo gai dage mo giti daba na ole. Kwian mo ta gbe age me no dare diali. Kwian me mo ñenua mo chebia kerua gbe gdadi me age ñenua chebia gerule kare.  
\v 31 Kwian me ta suge age no. Kwian me age ulia gerule kare. Kwian me mo ta dbe no daba ole, me uñalege daba ta ñedba ni tachke gerule taingwli daba ole agedu giti. Kwian me mo ta dbe tai dage dabage age no daba alin.  
\v 32 Kwian mo ta dbe age me no ai kare ulita, kwian ene tale suge amage Chube me no ama kle age giti ole agwa gire ama kle age gwangerugu, kwiange suge chegé age me no ulita giti ama be chege sugekare Chubege diali chui tangle. E uñale trate kwiange agwa kwian me tañachuge Chube be ji gbe ama alin age me no giti, kwian mo ta gbe diali age dare me no, kaire nga suga no amadi kwian na giti kle age me no kaire. 
\c 2  
\s1 Chube be ji gbe trate kwian ulita agenga me no alin 
\p  
\v 1 Ba ulita bai kaire kle gwage daba nadi age gweale me no gire ba kle gerule daba e giti: “Daba e kle age me no me no, ama jiske Chube gwage”, ba gerule ene ba kle mo agali gbe jiske kaire, ba agali kle age me no kaire salengwli daba kle age kare, ba me ñage gerule mau giti: “Cha me agenga me no, cha me jiske Chube gwage.”  
\v 2 Uñale kwian ulitage Chube kwian ulita talla uñe trate, Chubege uñale kwian kle age me no ulita mine malen Chube alin ñage gerule trate ulia kwian kle age me no giti, Chube kwian ene gbe ji chuge kwian kle age giti.  
\v 3 Ba bai kaire gerule daba agenga me nodi daba gbe jiske daba nage ba kaire agenga me no daba agenga me no kare, ba me ñage tañachuge Chube be ji gbe daba alin allabi giti gire ba be chege gitiru Chube be ji gbege. Agwa me ene, Chube be ji gbe ba alin kaire ba age me no giti.  
\v 4 Chube no no ba ole malen ama me kle age blike ba kle age me no giti. Chube kle manade tanre, ama me kle ji gbe ba alin blike, ene ama takalin suge bage ama no ba ole ba mo ta blitadale ama ole ba jogedale siere ba kle age me noge. Chube ta ene no ba ole, agwa kaire chui be chke gire Chube mi manade dare ji gbale kweri ba alin, malen tirare ba alin chege age me no Chube gwage ba kle age kare. Agwa ba ulita me kle e tallade,  
\v 5 ni ba ta mo ta blitakalin Chube ole, ba ta chegekalin age dare mo ta gbe age me no. Ba me mo ta blite joge siere age me noge Chube be ji chuge kweri gbe ba kle age me no tanre giti chui bdaglige, chui ege Chube be ji gbe kwian agenga me no ulita alin.  
\v 6 Chui bdagli ege Chube be kwian gdaite gdaite gbe jiske agedu kaire kaire giti. Chubege uñale kwian ulita ta mine, Chube be gerule trate ulia bai mo ta gbu age no Chube takalin kare bai me mo ta gbu age no Chube takalin kare.  
\v 7 Kwian ulita bai kaire nu mo ta blitaba Chube ole, kwian ene toikalin no diali chui tangle Chube ole nga noge, takalin Chube gerule no ama giti, malen kwian e mo ta gbe chage no Chube ole age no Chube takalin kare diali. Bdagli Chube be kwian ene ulita gbe toi diali chui tangle mo ole ule.  
\v 8 Agwa kwian ulita me nu mo ta blitaba Chube ole, kwian ene me Chube gerua gbe gdadi me age no geru e gerule kare, mo ta gbe ma no age me no ole, mo ta gbe age me no Chube dollale ulita kwian takalin kare. Kwian ene me mo ta blite Chube ole, bdagli Chube be skochie tanre kwian enedi be ji gbe tirare ama ulita alin.  
\v 9 Chube be ji gbe kwian israelita kaire kwian me israelita agenga me no alin, kwian agenga me no ulita be boi tanre daga ngwale be ta olire tanre ni be takalin chege Chube be ji gbeske. Kwian israelita be ji chuge ngeru, bigire kwian me israelita be ji chuge kaire ule.  
\v 10 Agwa kwian israelita kwian me israelita bai kaire ulita agenga no Chube takalin kare Chube gerua gbanga gdadi, bdagli Chube be kwian ene ulita gbe toi no nga noge, Chube be gerule no kwian ene giti, Chube be kwian ene ta gbe suga no. Chube be age no ene kwian israelita alin ngeru, gire Chube be age no kwian me israelita alin kaire ule.  
\v 11 Chube gwage kwian israelita me ma no kwian me israelitage, kwian israelita kwian me israelita salengwli Chube gwage, Chube age salengwli kwian israelita kwian me israelita alin.  
\v 12 Kwian israelita Moisés nu Chube gerua degaba unsuialin molen, kwian me israelita me Moisés nu Chube gerua degaba unsuialin molen, agwa Chube me tallade e giti, Chube kwian israelita me israelita agenga me no gbe jiske salengwli, kwian israelita me israelita age me no giti ulita be chege sugekare Chubege.  
\v 13 Kwian israelita me ñage tañachuge: “Cha Moisés chadalla molen, cha geru e keruchuge alin, ene cha no trate Chube gwage, cha me agedale no ulita.” Agwa me ene, geru e keruchuge alin e me kwian ta blite no Chube ole me kwian ta gbe no trate Chube gwage. Kwian Moisés chadalla gai dage age no geru e gerule kare, kwian ene no trate Chube gwage, Chube mi ama gbe jiske.  
\v 14 Kwian me israelita me Moisés chadalla molen, agwa mo tale kwian me israelita gweale kle age salengwli geru kle degaba kwian israelita alin kare, kwian me israelita ulita bai kaire kle age ene, e salengwli ama kle gwage chadadige degabale batenga kare, amage agali suge mo tale ama agedale mine Chube gwage Chube takalin kare.  
\v 15-16 Ama me geru degaba kwian israelita alin molen agwa agalige suge mo tale ama agedale no Chube takalin kare. Ama age no, age me no, agalige suge mo tale bai no bai me no. Chui bdaglige Chube be Jesucristo gbe gerule kwian ulita giti bai jiske bai me jiske Chube gwage, chui ege kwian me israelita agali be ta suge ama agedu ulita giti, chui ege Jesucristo giti be chke nate uñale kwian agedu me no ulita skwlenre giti, kwian ene be chege jiske Chube gwage. Chube be age ulita Jesucristo giti cha kle geru Jesucristo giti trage kare kwian ole. 
\s1 Moisés nu Chube gerua degaba, kwian israelita geru e molen, agwa ama me kle age ulita geru e gerule kare 
\p  
\v 17 Ba kwian israelita ulita ole cha gerule: Ba kwian israelita, Moisés nu Chube gerua degaba unsuialin ba israelita ulita alin, ba geru e molen, e giti ba tañachuge ba no trate Chube gwage, bage suge ba kwian israelita alin Chube uñe trate.  
\v 18 Ba geru jun no trate Chube gerua kle degabage, ene uñadu bage Chube takalin mine, geru e ñage ba ta gbe suge bai no bai me no Chube gwage.  
\v 19-20 Ba Chube gerua degaba molen, e giti geru ulia Chube giti chku uñale bage, ba geru e jwanba giti suge bage ba ña kwian me Chube gerua uñe tke tangle Chube geruage, ba tañachuge ba ñage kwian kle chage sugekare Chubege ta gbe chage Chube takalin kare, kwian me ta molen me suge amage bai no bai me no Chube gwage, ba kle kwian ene tke tangle chage no.  
\v 21 Ba kle kwian na tke tangle chage no Chube gerua gerule kare, ¿mineade ba agali me kle mo ta gbe age ba kle kwian na tke tangle kare? Ba kle gerule kwian na ole me no skwe boi, ¿mineade ba agali kle skwe boi?  
\v 22 Ba kle gerule me no ko chuge muinga dabanudi, ¿mineade ba agali kle age ene? Kwian me israelita lle oña dodaba mo kodi gai mo chubeale, ba me no lle oña e ole, bage suge e me Chube ulia. Ba kle gerule ba Chube ulia uñe, agwa ba me kle age Chube takalin kare, ene ba kle age salengwli kwian me israelita kle age kare, mo tale ba agali me kle Chube ulia gai mo Chubeale.  
\v 23 Chube gerua degaba, ba geru e uñe trate, diali ba kle gerule no no geru e giti, agwa ba me kle Chube gai dage, ba me kle age Chube gerua gerule kare.  
\v 24 Age ene giti Chube gerua degaba unsuialin gerule trate, chada e gerule: 
\q1 “Ba kwian israelita ulita age me no giti kwian ulita na me israelita gerule me no Chube dollale ba ulita kle age giti.” 
\m  
\v 25 Ba kwian israelita ulita bai kaire Moisés nu Chube gerua degaba gai dage ulia, ba mo kwara tkangenga sidri, e no ba alin, ba kle Moisés chadalla gai dage. Agwa ba kwian israelita ulita bai kaire me Moisés chadalla gai dage me age geru e gerule kare, ba ene kle age ngwale, ba mo kwara tkangenga sidri gire ba me age geru gerule kare, ngwale ba mo kwara tkangenga sidri, ba me kle mo ta gbe geru gai dage ulia, e salengwli me mo kwara tkabanga kare.  
\v 26 Agwa kwian me israelita me mo kwara tkabanga, kwian e kle mo ta gbe age ulita mo tale Moisés chadalla gerule kare, kwian e ulia nu mo kwara tkabanga kare, kwian me israelita me mo kwara tkabanga ulia agwa mo tale ama mo ta gbe geru gai dage ulia, kwian ene kle age ulita geru degaba kle gerule kare, kwian ene ulia salengwli mo kwara tkabanga kare.  
\v 27 Moisés nu Chube gerua degaba ba kwian israelita alin, kwian me israelita me Chube gerua degaba molen agwa ama mo tale kle mo ta gbe age Moisés nu Chube gerua degaba gerule kare, kwian e me mo kwara tkabanga ba kwian israelita mo kwara tkangenga kare, agwa ama kle mo ta gbe age ulita Moisés nu Chube gerua degaba gerule kare, ama me geru e molen agwa ama kle mo ta gbe age ama geru e uñe kare, ba geru molen ba me kle geru gai dage ba me kle age geru gerule kare, malen ba be jiske kweri Chube gwage chui bdaglige. Kwian me israelita me Chube gerua degaba molen ba ulita kwian israelita geru degaba molen kare, agwa ama mo ta gbe ma no ba kwian israelita geru molenge.  
\v 28-29 Moisés nu Chube gerua degaba, ba kwian israelita geru e molen, kaire ba mo kwara tkangenga sidri, ba age ene ba tañachuge ba kwian Chubenu ba kwian israelita ulia, agwa kwian israelita ulia me mo ka jwen israelita alin allabi, agwa kwian israelita ulia ama mo ta gbe ulia Chube ole. Chube gwage kwian ulita tadi, Chubege kwian ulita talla uñale, kwian ulita bai kaire Chube Oña chuge ngwadi ama ta blite no Chube ole, kwian ene ulia israelita Chubenu, kwian ene giti kwian salengwli me gerule ama no, Chube alinge suge kwian ene no kle age no ulia, kwian ene giti Chubedi nga suga no. 
\c 3  
\p  
\v 1 Cha ba kwian israelita ulita ta gbe chke ai giti: Ba kwian israelita suia mo kwara sidri tkangenga, agwa e giti ba me chege Chubenu, Chube gwage kwian israelita me israelita ulita talladi kwian ulita talla mine Chube ole, e giti ba ulita israelita ñage geru kade moge: “¿Lledale cha mo kwara sidri tkangenga? ¿Mineade ma no cha kwian israelita chudalla alin kwian me israelita chudallage?”  
\v 2 Sugedale ba ulitage Chube agedu tanre no kwian israelita ulita alin, ngeru Chube kwian israelita gau Chube mo gerua ketu kwian israelitage, geru e jo degaba, kwian israelita geru e molen, kwian me israelita me geru e molen, geru e giti ñage suge trate kwian israelitage chagedale mine Chube ole.  
\v 3 Kwian israelita Chube gerua molen agwa kwian israelita ulita me Chube gerua gai ulia me age Chube gerua gerule kare, ¿e giti Chube be mo ta blite nganake Chube mi age Chube gerule kare?  
\v 4 Me dale, Chube be chege diali ama gerule kare. Kwian ulita ñage sole agwa Chube gerule ulia diali. Chube gerua degaba unsuialin gerule Chube me sole giti, chada e gerule: 
\q1 “Chube diali chege trate, ama age ulita ama gerule kare, ama me sole. 
\q1 Kwian gweale gerule: ‘Chube me gerule ulia’, kwian gerule ene kwian kle gerule ngwale, kwian me ñage Chube gbe jiske, Chube no trate, Chube gerule ulia diali.” 
\m Chube gerua degaba gerule ene Chube giti. 
\p  
\v 5-6 Che age me no Chube dollale gire suge trate che tale Chube no Chube age no ulita diali, e giti kwian tañachuge mo tale: “Cha age me no giti suge kwian nage Chube alin allabi no Chube age no ulita diali, e no malen Chube me ji gbadale cha alin cha age me no ulita gdale.” Me no tañachuge ene, Chube me ji gbe che alin che age me no gdale, ñage suge chege kaire kwian nage Chube no che kle age me no ole, Chube ene ama mi ñage gerule chui bdaglige kwian ulita giti bai jiske bai me jiske, agwa Chube me ene, Chube diali trate, Chube me age me no ni sidri, malen ama kwian agenga me no gbe jiske.  
\v 7 Kaire kwian tañachuge mo giti mo tale: “Cha diali me gerule ulia, cha diali sole, ene cha giti suge kwian nage Chube alin allabi gerule ulia diali, kwian enege suge Chube ene malen ama gerule no no Chube giti, e ene ¿mineade Chube kle cha gbe jiske sole gdale?, ¿mineade Chube gwage cha agenga me no?”  
\v 8 Kwian tañachuge ene ama kle tañachuge ama age me no giti ama kle Chube chudaboi, ama tañachuge ama age me no giti kwian na kle mo ta gbe ma no Chube ole, e ulia kwian e tañachuge kare ¿mineade che ulita me age ulita me no diali? Agwa me ene, kwian e me kle tañachuge no, kwian e me tañachuge geru ulia gerule kare. Kwian ene ulita alin Chube be ji gbe, kaire Chube be ji gbe kwian alin kwian kle geru jinade ngwale cha dollale, kwian e kle gerule me no kwian na ole cha giti kle gerule cha kle kwian tke tangle kwian ai kle tañachuge kare. 
\s1 Chube gwage kwian israelita me israelita ulita agenga me no, ni kwian gdaite age no trate Chube gwage 
\p  
\v 9 ¿Che kwian israelita mine Chube gwage? ¿Che ñage tañachuge che ma no kwian na me israelitage? E me ene, cha gerudu kare ngeru, Chube gwage che kwian israelita me israelita ulita agenga me no, ulita jiske age me no giti, ni gdaite agali gballa ñage joge siere age me noge.  
\v 10 Chube gerua degaba unsuialin gerule kwian ulita giti, chada e gerule: 
\q1 “Kwian ulitaske kwian agenga no me, ni malen kwian gdaite age no, ulita agenga me no. 
\q1  
\v 11 Kwian ulita me Chube uñe, ni gdaitege suge Chube mine, ni gdaite tañachuge chage Chube ole age Chube takalin kare. 
\q1  
\v 12 Kwian ulita mo ta gbu chage age me no sugekare Chubege. 
\q1 Kwian ulitaske kwian agenga no me, ni malen gdaite age no, ulita agenga me no. 
\q1  
\v 13 Diali kwian gerule me no sugaska, diali kwian gerule sole, ka me skate gerule me no dabadi. 
\q1  
\v 14 Kwian ta skochie tanre, ta skochie ole ama daba oña boi tanre me no. 
\q1  
\v 15 Kwian me no daba na ole, diali ama kle biale daba na gweda. 
\q1  
\v 16 Baini kaire kwian joge ngwadi kwian ene age me no daba na ole, kwian ene daba na gbe ta olire tanre boi daga ngwale. 
\q1  
\v 17 Kwian ene diali tañachuge age me no alin giti daba na ole, kwian ene ni tañachuge sidri daba na ta gbe nga suga no giti. 
\q1  
\v 18 Kwian ulita age me no ene, kwian ulita ene me mo ta dbe kwachie Chube ngeru ama kle age giti.” 
\m  
\v 19 Chube gerua degaba unsuialin gerule ene kwian ulita giti, geru e jo degaba che kwian israelita ulita alin, geru e giti chke uñale che kwian israelitage kwian israelita me israelita ulita agenga me no, ulita jiske Chube gwage, ene ni kwian gdaite ñage gerule: “Cha me agenga me no, cha me jiske Chube gwage.” Ulia kwian ulita agenga me no, kwian ulita jiske Chube gwage.  
\v 20 Moisés nu Chube gerua degaba kwian geru e gai dage, kwian age geru e gerule kare, e alin allabi giti ni kwian gdaite be chege no trate Chube gwage, e giti kwian mi tien gitiru ji chugege ama age me no gdale, geru e jo degaba che ulita alin ta gbagda, ene chke uñale chege che kwian ulita agenga me no.  
\v 21 Nege uñale trate che ulitage Chube kwian jwen siere mine ji chugege kwian agedu me no gdale, ene kwian chege no trate Chube gwage. Moisés nu Chube gerua degaba gerule no e giti, kaire kwian Chube gerua ketanga nu Chube gerua degaba gerule no e giti, geru e ulita no, agwa uñale trate chege kwian me chege no trate Chube gwage age Moisés chadalla alin gerule kare giti, me ene,  
\v 22 Jesucristo alin giti Chube kwian jwen siere ji chugege kwian agedu me no gdale, kwian ulita bai kaire mo ta gbe Jesucristo gai ulia mo tale, kwian ene ulita israelita me israelita chege no trate Chube gwage.  
\v 23 Kwian israelita kwian me israelita ulita agenga me no, ni kwian gdaite age no trate ulita diali Chube takalin kare.  
\v 24-25 Kwian agenga me no agali me ñage age lle gwealege ene ama tien gitiru ji chugege ama agedu me no gdale ene ama no trate Chube gwage. Chube ta du no kwian ulita alin, malen Chube Jesucristo kagu kwian ulita alin, Jesucristo jokeda kwian ulita alin kwian agedu me no giti, ene kwian mo ta gbe Jesucristo gai ulia kwian ene tien gitiru ji chugege ama agedu me no gdale, kwian ene chege no trate Chube gwage, Jesucristo giti Chube gwage kwian enedi kwian me agedu me no kare. E giti ñage suge kwiange Chube kwian ulita gbe jiske kwian agedu me no gdale, agwa kwian bai kaire Jesucristo gai ulia, Chube kwian ene jwen siere ji chugege age me no gdale. Unsuialin nga unsuialin Jesucristo bebi chie chuiage Chube ta du no kwian toidu e suiale ole kaire, kwian e agedu me no Chube me skochiu blike ama ole, Chube taidu dage amage malen Chube me ji gbu blike kwian alin kwian agedu me no gdale.  
\v 26 Chube trate ulita, unsuialin nga unsuialin Chube mo ta gbu no kwian agenga me no ole, Chube amaña kle nege, ama gwage kwian agenga me no bai kaire Jesucristo gai ulia kwian ene chege trate Jesucristo giti.  
\v 27 Kwian ulita bai kaire Jesucristo gai ulia, kwian ene alin allabi chege trate Chube gwage Jesucristo alin giti, malen ni kwian gdaite ñage tañachuge mo tale mo giti: “Cha agali kle age no, cha kle age ulita Moisés chadalla gerule kare, malen cha no trate Chube gwage.”  
\v 28 Me no tañachuge ene, uñale chege kwian Jesucristo gai ulia, Jesucristo giti Chube kwian ene jwen siere ji chugege kwian agedu me no gdale, ene kwian chege no trate Chube gwage, Moisés chadalla alin giti kwian me ñage tien gitiru ji chugege agedu me no gdale.  
\v 29 Che kwian israelita ulita me ñage tañachuge: “Chube che kwian israelita alin allabi Chubea, Chube me kwian me israelita Chubea.” Me ene, Chube kwian me israelita Chubea kaire, Chube amaña kwian ulita chudalla Chubea,  
\v 30 Chube na me kle, Chube gdaitre alin kle, Chube e kwian jwen siere ji chugege age me no ulita gdale bai kaire mo ta gbe Jesucristo gai ulia. Kwian israelita, me israelita, Chube me tallade e giti, ulita bai kaire mo ta gbe Jesucristo alin gai ulia chege no trate Chube gwage.  
\v 31 Che kwian israelita mo ta gbe Jesucristo gai ulia, e me gerule che kle Moisés chadalla gai ngwale me ñanaske che me age dare chada e gerule kare, me ene, che mo ta gbe Jesucristo gai ulia, ene kaire che ñage mo ta gbe age ma no Chube takalin kare Moisés chadalla gerule kare. 
\c 4  
\s1 Abraham chegu no trate Chube gwage Abraham 
\s1 Chube gau ulia giti me Abraham agedu no giti 
\p  
\v 1-2 Ale tañachuge Abraham che enusulian unsuialin giti, ama kwian israelita che kare, agwa ama me chegu no trate Chube gwage ama agedu no giti, Abraham agedu no giti Abraham chegu no trate Chube gwage ene Abraham ñadu gerule no mo giti Abraham agedu giti, agwa me boidu ene, Abraham agedu no giti Abraham me chegu no trate Chube gwage, Abraham chegu no trate Chube gwage Abraham mo ta gbu Chube gai ulia giti.  
\v 3 Chube gerua degaba unsuialin gerule e giti, chada e gerule: 
\q1 “Abraham mo ta gbu Chube alin gai ulia mo tale, e alin giti Chube gwagedu Abrahamdi Abraham no trate.” 
\m Chube gerua degaba unsuialin gerule ene Abraham giti. 
\p  
\v 4 Kwian gweale lle boi daba alin, daba e igi kete lle boangage, kwian lle boanga me kle igi gai ngwale, kwian e igi gai ko ñanale lle bo giti.  
\v 5-6 Me boi ene kwian ole Chube gai ulia giti, kwian me lle gweale no boi Chube alin ngeru gire kwian chege no trate Chube gwage kwian lle no bo ñanale, me ene, kwian mo ta gbe Chube gai ulia, e alin allabi giti kwian chege no trate Chube gwage, Chube kwian ene jwen siere ji chugege kwian agedu me no ulita gdale, kwian ene mo ta dbe nga suga no ole. Unsuialin David gerudu kwian ene giti,  
\v 7 David gerudu: 
\q1 “Nga suga no kwiandi Chube giti, Chube kwian agedu me no ulita talla mliunga, kwian ene chege no trate Chube gwage, Chube me tañachuge kwian e agedu me no ulita giti dare. 
\q1  
\v 8 Chube kwian ene jwen siere ji chugege kwian agedu me no ulita gdale, kwian enedi nga suga no diali.” 
\m  
\v 9 David gerudu kare e ulia, Chube age no me kwian ulita israelita mo kwara tkabanga alin allabi, me ene, kwian me israelita me mo kwara tkabanga alin Chube age no kaire. Chube age no kwian ulita alin kwian israelita kwian me israelita bai kaire mo ta gbe Chube gai ulia, Chube kwian ene ulita jwen siere ji chugege kwian agedu me no gdale. Cha gerudu kare Abraham giti Abraham mo ta gbu Chube gai ulia, e alin giti Abraham chegu no trate Chube gwage Abraham me jiske kare.  
\v 10-11 Abraham me chegu no trate Chube gwage Abraham mo kwara tkangunga giti, me ene, Abraham chegu no trate Chube gwage ngeru mo kwara tkangengage, Abraham mo ta blitu Chube gai ulia ma ngeru ama mo kwara tkangungage, Abraham Chube gau ulia giti Chube gwagedu Abrahamdi Abraham no trate me jiske kare, gire e nate Chube gerudu Abraham ole mo kwara tkangenga. Abraham mo kwara tkangunga, ene ama chegu egdage chke gda uñale amage ama Chubenu ama mo ta gbu Chube gai ulia giti. Ene Abraham chegu kwian ulita ñenua bai kaire mo ta gbe Chube ole mo tale Chube gai ulia kwian bai ulita me mo kwara tkabanga mo ta gbe Chube gai, kwian ene ulita chege no trate me jiske Chube gwage Abraham chegu no trate Chube gwage kare.  
\v 12 Kaire Abraham kwian ulita mo kwara tkabanga ñenua kwian kle mo ta gbe age Abraham agedu kare, Abraham mo ta gbu Chube gai ulia, kwian mo kwara tkabanga ulita bai kaire mo ta gbe Chube gai ulia Abraham Chube gau ulia kare, kwian ene kaire chege no trate me jiske Chube gwage Abraham chegu no trate Chube gwage kare.  
\v 13 Chube gerudu Abraham ole nga kweri ulita giti Abraham oindalla alin: “Cha be nga ai ulita kete bage ba alin kaire ba oindalla alin toingwa.” Chube gerudu ene Abraham ole Chube be age giti Abraham alin kaire Abraham oindalla alin. E suiale Moisés chadalla me, Abraham mo ta gbu Chube alin gai ulia mo tale, ene Chube gwagedu Abrahamdi Abraham no trate me jiske, e giti Chube agedu ulita Abraham alin Chube gerudu kare. Abraham mo ta gbu age kwian mo ta gbu Moisés chadalla kledu degaba chuiage tangle kare age geru e gerule kare, age ene me Abraham chudabo Chube gwa giti, Abraham Chube gau ulia mo tale giti Chube gwagedu Abrahamdi Abraham no trate, e giti Chube agedu no Abraham alin kaire Abraham oindalla alin.  
\v 14 Kwian tañachuge Moisés chadalla alin gai dage age Moisés chadalla gerule kare, e alin giti kwian tañachuge Chube age no kwian ulita alin, e ulia kwian kle tañachuge kare, gire ngwale Abraham mo ta gbu Chube gai ulia ngeru Moisés chada deguge kwian alin, ngwale Chube gerudu ngeru Abraham ole Chube be age no giti Abraham alin kaire Abraham oindalla alin. Agwa me ene, Chube me age no kwian alin kwian Moisés chadalla alin gai dage giti, ni kwian gdaite ñage age no ulita diali Moisés chadalla gerule kare, malen Chube gerudu Abraham ole Chube be age no Abraham alin kaire Abraham oindalla alin Abraham mo ta gbu Chube alin gai ulia giti ngeru Moisés chada degu kwian ulita alinge.  
\v 15 Geru gbaba kwian ulita alin kwian agedale no ulita, agwa diali kwian kle age gweale me no geru e dollale, ni kwian gdaite ñage age no ulita diali geru e gerule kare. Ene kaire kwian me ñage age no ulita diali Moisés nu Chube gerua degaba kwian israelita alin gerule kare, geru e kwian gbe jiske Chube gwage kwian bai kaire age me no geru e dollale agwa geru e me ña kwian chudaboi ta gbe chke.  
\v 16 Malen ma no kwian ulita mo ta gbe Chube gai ulia mo tale ta blite Chube ole Abraham agedu kare, Abraham Chube gau ulia giti Chube agedu no ulia diali Abraham alin kaire Abraham oindalla ulita alin Chube gerudu kare. Ene kaire Chube age no kwian ulita alin israelita me israelita bai kaire mo ta gbe Chube gai ulia mo tale Abraham Chube gau ulia kare, kwian ene ulita chege no trate me jiske Chube gwage Abraham kare, kwian mo ta gbe mo ta blite Chube ole Abraham kwian ene ulita ñenua kare.  
\v 17 Chube gerua degaba unsuialin gerule e giti, chada e gerule: 
\q1 “Chube gerudu Abraham ole: ‘Cha ba gbu kwian ngle nga ulitage ñenua kare.’ ” 
\m Chube gerudu ene Abraham ole Abraham Chube gerua e gau ulia, uñadu Abrahamge Chube kwian jaba gbanga gwade, kaire lle me boale dodadale Chube lle ene dodade. Uñadu Abrahamge Chube kira ene molen, malen sugedu trate trate Abrahamge Chube ñage kirogwa kete ama kwian juma jumage Chube gerudu kare. 
\p  
\v 18-19 Abraham juma juma, kodi chura cien chke Abrahamge, ama muingalla Sara kaire juma juma, Sara me kirogwage, ama bonate juma agwa Abraham me tañachugu e giti, uñadu Abrahamge Chube be kirogwa kete amage Chube gerudu kare, Abraham Chube keruchugu gerule: “Cha ba gbu kwian ngle nga ulitage ñenuale, cha be ba oindalla gbe jriennga ngle nga ulitage.” Abraham mo ta gbu Chube gai ulia diali Chube gerudu kare Abraham ole.  
\v 20 Abraham me mo ta du chkenga, ama me Chube kerua gau ngwale Chube gerudu kare be age, agwa Abraham mo ta gbu Chube gai ma no ulia diali, uñadu Abrahamge Chube be age ulita ama alin Chube gerudu kare, e giti Abraham gerudu no no Chube ole.  
\v 21 Kaire sugedu trate Abrahamge Chube kira molen age ulita Chube gerudu kare ama ole.  
\v 22 Abraham Chube gau ulia, e giti Abraham chegu no trate me jiske Chube gwage.  
\v 23 Chada jo degaba Abraham giti gerule Abraham chegu no trate me jiske Chube gwage Abraham Chube gau ulia giti, chada e me jo degaba Abraham alin giti allabi,  
\v 24-25 kaire chada e jo degaba che ulita alin che ta gbagda chke uñale Chube agedu giti Abraham alin, ene kaire che ulita mo ta gbadale Chube gai ulia Abraham Chube gau ulia kare. Chube che Chugagwalla Jesu kagu nga dba ai giti kwian ulita alin, Jesu jokeda che agedu tanre me no giti. Jesu jokeda che agedu me no ulita giti gire Chube ama jaba gbuni gwade, e giti che Chube gadale ulia, ene Jesu jokeda chkuni gwade giti che chege no trate Chube gwage che mi ji chuge che agedu me no ulita gdale. 
\c 5  
\s1 Che mo ta gbe Jesucristo gai ulia giti 
\s1 che chege no trate me jiske Chube gwage 
\p  
\v 1 Mo ta gbe Jesucristo gai ulia giti mo tale che me chege jiske Chube gwage che agedu me no ulita giti, noare Chube che ta gbu ene no Jesucristo ole, che Chugagwalla Jesucristo giti che ta chege no Chube ole.  
\v 2 Che Jesucristo gau ulia, ene Jesucristo giti che chege no trate Chube gwage, kaire Jesucristo giti Chube kle age no che alin diali, che kle toi nga dba ai giti gire Chube kle che ulita ole diali, kaire chui bdagli che be joge toi Chube ole nga noge, che kle chui e manade nga suga no ole.  
\v 3 Nga suga no chedi me chui e manade alin giti, kaire nga suga no chedi che kle boi nege giti, nege che kle boi daga ngwale Jesucristo gai ulia giti kwian me Jesucristo gaba ulia kote, uñale chege boi daga ngwale giti che mo kira gbaleda ma no boi daga ngwale na darege, ene bdagli che boi daga ngwale tanre che mi tallade, che be mo ta gbe jage boi daga ngwale ulitage.  
\v 4 Che boi daga ngwale Jesucristo gai ulia giti, che mo ta gbe jage boi daga ngwale e ulitage, ene Chube gwage che kle age no Chube takalin kare, ene kaire che be kle chui manade diali nga suga no ole, chui ege che be joge toi Chube ole nga noge.  
\v 5 Uñale chege che me kle chui e manade ngwale, Chube mo Oña ketu chege, Chube Oña kle che tale kle che ta gbe diali suge Chube no no che ole Chube be age no che alin be che dbe toi ama ole chui gwealege. 
\p  
\v 6 Che ulita agali ngeru me ñadu mo jwen siere ji chugege che agedu me no gdale, Cristo chuia chku jogedaleda gire ama jokeda che agedu me no ulita giti.  
\v 7 Kwian gdaite me mo chuge ngwadi jogeda daba na giti ni malen daba agenga no giti, daba no no me jiske giti kwian gweale ñage mo ta gbe jogeda, agwa e mno, kwian no daba na ole me age ene daba na alin, kwian me mo ta dbe no no ene daba na ole.  
\v 8 Agwa Chube ma no che ole ulia, che ulita agenga me no gire Chube Cristo kagu jogedaleda che ulita giti, e giti suge chege Chube no che ole ulia.  
\v 9 Cristo jokeda che ulita agedu me no giti, ene Cristo gai ulia giti nege gwangerugu che ulita chege no trate me jiske Chube gwage, ene kaire Cristo giti bdagli che ulita mi ji chuge Chube be ji gbe chuiage.  
\v 10 Ngeru che kledu age me no ulita Chube dollale, che ene gire Chube mo ta gbu no che ole, Chube agali mo Kirolla Cristo kagu jogedaleda che giti, Cristo jokeda giti Chube che gbu ama skatemanallale, ene nege Cristo giti che ta chege no Chube ole. Cristo jokeda che agedu me no giti gire ama chkuni gwade, e giti che ulita tiun gitiru ji chugege che agedu me no gdale, suge chege che me Chube dollale nge kare, nege che Chube skatemanalla.  
\v 11 Nga suga no no chedi Chube ole che Chugagwalla Jesucristo giti, Jesucristo giti che me Chube dollale nge kare, nege Jesucristo giti che Chube skatemanalla. 
\s1 Kwian ulita chege agenga me no jiske Chube gwage onbre gdaitre alin Adán giti, ene kaire 
\s1 kwian ñage chegeni no trate Chube gwage 
\s1 onbre gdaitre alin Jesucristo giti 
\p  
\v 12 Ngeru kwian onbre gdaitre alin kada Adán kledu, onbre e agedu me no Chube dollale, ene ama chegu sugekare Chubege kaire ama jokeda. Adán giti kwian ulita chegu agenga me no Adán kare, kwian ulita chegu sugekare Chubege kaire kwian ulita jogeda age me no gdale.  
\v 13-14 Chube agali geru ketu Adánge Adán me agedale lle gwealege, Adán mo ta gbu age Chube gerudu kare dollale, e giti Adán chegu jiske chegu sugekare Chubege kaire jokeda. Adán chuiage gwaiguda Adán chudalla tanre kledu ngeru Moisés chuiage, Adán chudalla e ulita me agedu me no Chube gerua dollale Adán agedu kare, Chube me gerudu kwian e ole Chube gerudu Adán ole kare ni Chube gerua degaba kledu, agwa kwian e ulita tale age me no kledu. Kwian e me chegu jiske Moisés nu Chube gerua degabage, Moisés bebi geru e dege, Chube gerua degaba me kledu kwian ta gbagda agwa kwian ulita tale age me no kledu, e giti kwian ulita chegu jiske kwian ulita chegu sugekare Chubege age me no gdale, kwian ulita jokeda Adán jokeda kare. Kwian ulita chegu agenga me no onbre gdaitre alin Adán giti, ene kaire onbre gdaite be chie be age giti kwian ulita alin kwian be chegeni no trate Chube gwage, onbre gdaite e Jesucristo.  
\v 15 Che me ñage tañachuge Jesucristo agedu me no salengwli Adán agedu kare, me ene, Adán agedu me no, ama alin giti kwian ulita chegu agenga me no chegu sugekare Chubege age me no gdale. Adán agedu me no kwian ulita alin, agwa Chube agedu no no kwian ulita alin kwian gdaitre alin giti, e Jesucristo, Chube no kwian ulita ole malen Chube Jesucristo kagu nga dba ai giti kwian alin.  
\v 16 Chube agedu no kwian ulita alin Jesucristo giti, e me salengwli Adán agedu kwian alin kare, Adán agedu me no gdaitre alin giti kwian ulita chegu jiske Chube gwage, agwa Jesucristo agedu giti kwian chege no trate me jiske Chube gwage, Jesucristo giti Chube kwian jwen siere ji chugege kwian agedu tanre me no gdale.  
\v 17 Onbre gdaite kada Adán agedu me no giti kwian ulita chegu jiske chegu sugekare Chubege age me no gdale, kaire Adán giti jogeda chegu kwian ulita alin. Ene kaire Jesucristo onbre gdaitre alin, agwa ama ma kweri Adánge, Jesucristo alin giti Chube agedu no no tanre kwian ulita alin, kwian ulita bai kaire Jesucristo gai ulia kwian ene chege no trate Chube gwage me jiske, kwian ulita ene me chege sugekare Chubege, kwian ene be toi diali chui tangle Chube ole.  
\v 18 Onbre gdaitre alin agedu me no giti kwian ulita chegu jiske Chube gwage, ene kaire onbre gdaite agedu no kwian ulita alin, ama jokeda kruge kwian ulita agedu me no giti, e Jesucristo, Jesucristo giti kwian chege no trate me jiske Chube gwage, Jesucristo agedu giti kwian ulita tien gitiru ji chugege agedu me no gdale, Jesucristo giti kwian ene toi diali chui tangle Chube ole.  
\v 19 Adán kwian gdaitre alin, ama me Chube kerua gbu gdadi, ama agedu me no Chube dollale, age ene giti kwian ulita chegu agenga me no. Ene kaire Jesucristo kwian gdaitre alin, ama agedu ulita Chube takalin kare, ama jokeda kwian ulita alin Chube takalin kare, ene Jesucristo agedu giti kwian e gai ulia, ene kwian chege no trate me jiske Chube gwage. 
\p  
\v 20-21 Chube Moisés gbu chada dege kwian alin, ene Chube gerua degaba giti chku uñale kwiange ama kle age me no Chube dollale, agwa kwian me talladu e giti, kwian mo ta gbu age ma me no dare, ene age me no jrienduda ngle, age me no giti kwian ulita chegu sugekare Chubege, ene kaire kwian jogeda sugekare Chubege. Kledu ene gire Chube mo ta gbu age ma no kwian ulita alin Jesucristo giti, che Chugagwalla Jesucristo giti Chube agedu no no che ulita alin, Chube che ulita jun siere ji chugege che agedu me no gdale, Jesucristo giti che ulita toi diali chui tangle Chube ole. 
\c 6  
\s1 Che Jesucristonu che me mo ta dbadale toi dare 
\s1 age me no, ma no che mo ta dbadale age no 
\s1 trate Chube takalin kare 
\p  
\v 1 Chube agedu no ene che ulita alin, Jesucristo giti Chube che jun siere ji chugege che agedu me no gdale, agwa e me gerule nege che mo ta dbale age me no ngeru dare, ene Chube ñage mo ta gbe age ma no diali che alin.  
\v 2 ¡Me ene dale! Ngeru che ulita mo ta du diali age me no, nege Jesucristo gai ulia giti che ulita mo ta ene age me no diali chugu ngwadi, nege che me mo ta dbale toi dare age me no.  
\v 3-4 Che ulita Jesucristo gaba ulia che mo ñeangu chiske mo gangu ngaña chigage, e giti suge che Jesucristonu ulia che mo ta blitu ama ole. Che mo ñeangu chiske, e salengwli che jokeda ule Cristo ole che jaba ogle ule ama jaba ole kare, e gerule che age me no talla chugu ngwadi che me kle mo ta dbe toi dare age me no che agedu ngeru kare. Che chku ngaña chigage, e salengwli che jaba chkuni gwade Chube kiralla giti ule Cristo ole kare, ene kaire Chube kiralla giti Chube che ta gbu chage nganake ta no jagere ole.  
\v 5 Ulia che Cristonu che age me no talla chugu ngwadi che mo ta gbu me age me no dare ngeru kare, e salengwli che jokeda ule Cristo ole kare, ene kaire Chube che ta gbu chage nganake ta jagere ole e salengwli Chube Cristo jaba gbuni gwade kare.  
\v 6 Uñale che ulitage Cristo jokeda kruge che ulita age me no ulita giti, che e gau ulia mo alin, e salengwli che agali jokeda ule Cristo ole kare. Che Cristo jokeda gau ulia mo alin, e giti Chube che ta blitu jagere, ene nege che me mo ta dbe age me no dare che diali tadu agekalin ngeru kare, nege che tachke age no Chube takalin kare.  
\v 7 Che age me no talla chugu ngwadi, e salengwli che jokeda ule Cristo ole kare, Cristo giti Chube che jun siere ji chugege che agedu me no gdale, ene che me chege jiske Chube gwage che agedu me no giti.  
\v 8 Uñale chege che Cristo gau ulia che age me no talla chugu ngwadi e salengwli che jokeda ule Cristo ole kare, ene kaire uñale chege salengwli Chube Cristo gbuni gwade kare Chube che ta gbe toi nganake diali age no ama takalin kare.  
\v 9-10 Uñale chege Cristo jokeda bigire chkuni gwade, Cristo jokeda bitaitre alin che ulita alin che agedu me no giti gire chkuni gwade toidale ule Chube ole, ama mi jogeda dare, ama kle toi gwade diali chui tangle ule Chube ole.  
\v 11 Jesucristo jokeda bitaitre alin kare mi jogeda dare, ene kaire ba ulita age me no talla chugu ngwadi, diali ba mo ta gbadale me jogeni naskuni age me no dare. Ba ulita Jesucristonu, Jesucristo giti ba mo ta gbadale diali toi age no Chube takalin kare.  
\v 12 Ba me agedale me no dare ba agedu diali ngeru kare, ba mo ta gbadale chege siere age me noge diali, ba me mo chugadale ngwadi age me no ba agali ta agekalin kare.  
\v 13 Ba age me no talla chugu ngwadi gire Chube ba ta gbu toi nganake age no ama takalin kare, ba me ta ene jagere chugadale ngwadi, ba me mo ta chugadale ngwadi age me no diali ba ta agekalin kare, ma no ba mo ta chugadale ngwadi age no diali Chube takalin kare, ba mo ta gbadale diali Chubege, ene Chube be ba ta gbe age no ama alin diali,  
\v 14 ene Chube kirallaske ba mi mo ta dbe diali age me no ba ta agekalin kare. Ba ulita me ñage tañachuge ba ñage chege siere age me noge Moisés nu Chube gerua degaba giti, me ene, Chube agedu no ba alin Jesucristo giti, e alin giti ba ñage chege siere age me noge.  
\v 15 Nege che me kle toi Moisés chadalla giti, nege che kle toi Chube talla no che ole giti, e me gerule che agedale ma me no dare, ene Chube mo ta dbe age ma no che alin, me ene dale. 
\p  
\v 16 Ba ulitage uñale ba mo gbe lle boi no mo mauña alin ba agedale ulita mo mauña alin ama takalin kare. Boi ene kaire ba mo ta gbe age diali me no Chube dollale o ba mo ta gbe age diali no Chube takalin kare, e salengwli ba kle lle boi mo mauña alin kare. Ba mo ta gbe age me no Chube dollale ba takalin kare, ene ba jogeda ba be chege sugekare Chubege diali, ba mi ñage joge toi Chube ole nga ngaña giti. Agwa ba mo ta gbe age no Chube takalin kare ba mo ta gbe Chube gai dage, ba be toi Chube ole nga ngaña giti diali chui tangle.  
\v 17 Cha gerule no no Chube ole ba ulita kle mo ta blite Chube ole Chube gai dage giti. Ngeru ba ulita mo ta gbu age me no tanre, ba mo ta gbu age me no ole alin allabi, agwa nege ba ta ngeru ulita chugu ngwadi ba mo ta blitu geru ulia gai ba ulita jo tkaba tanglege geru ulia gerule kare.  
\v 18 Ba ulita kledu age me no diali ba tadu agekalin kare, ba agali gballa me ñadu joge siere age me no enege, agwa ba Jesucristo gau ulia giti ba mo ta blitu, Jesucristo ba gbu age nganake, ene ba me chege age me no ba agedu diali ngeru kare, nege ba ulita kle mo ta gbe no trate Chube ole toi trate Chube gwa giti Chube takalin kare.  
\v 19 Ba ulita kwian, cha gerule ba ole Chube gerua alin giti geru e me suge blike bage, malen cha gerule lle gweale ba uñe giti, ene suge trate bage cha kle gerule mine. Ngeru ba ulita mo chugu ngwadi age me no diali ba tadu agekalin kare, ba mo ta gbu diali age tanre me no, nege ba mo ta blitu age no Chube takalin kare malen ba mo ta gbadale diali Chubege, ene ba be ta dbe age no trate Chube gwage ama takalin kare diali.  
\v 20 Ngeru ba ulita kledu mo ta dbe age me no me no diali, ba agali gballa me ñadu joge siere age me no enege, ba ulita kledu ene, e suiale ba ulita me Chube uñu, ba me tachku age no Chube takalin kare.  
\v 21 Ba ulita kledu age me no tanre giti ¿llema no ba ulita gau age me no ene ñanale? Age me no ulita ñanalla gdaite no me. Nege suge ba ulitage age me no ulita kwian gbe sugekare Chubege, ene kwian me ñage joge toi Chube ole nga ngaña giti. Ba ulita tachke ba agedu me no ulita ngeru giti, nga chie ibule tanre ba ulitadi ba agedu giti.  
\v 22 Nege ba me kle mo ta dbe age me no ba agedu ulita ngeru kare, ba jo siere age me no tallage, nege ba kle mo ta gbe Chubege, Chube kle ba ta gbe age no trate ama takalin kare, mo ta dbe trate giti ba be toi diali chui tangle Chube ole.  
\v 23 Age me no ñanale kwian be chege ji chuge diali chui tangle sugekare Chubege, agwa Chube Jesucristo kagu kwian ulita alin, kwian che Chugagwalla Jesucristo gai ulia giti Chube kwian gbe toi diali chui tangle ama ole ule. 
\c 7  
\s1 Jesucristo giti kwian me chege tañachuge age 
\s1 Moisés chadalla alin gerule kare 
\p  
\v 1 Ba ulita cha daballa cha ibotea Jesucristo giti, ba ulita Moisés nu Chube gerua degaba uñe, uñale ba ulitage kwian kle toi gwade Moisés chadalla ñage kwian ene alin kage age chada e gerule kare, kwian jogeda gire Moisés chadalla me ñage ama kage ama me kle gwade.  
\v 2 Ale gerule sidri muinga mo jwanba giti, geru kle degaba gerule muinga ene alin muinga me ñage mo onbrella chuge ngwadi mo onbrella kle toi gwade gire, ni ñage chage onbre na ole. Agwa muinga mo jwanba onbrella jogeda geru kle degaba me ñage muinga gbe jiske muinga chege sugekare onbrella jogebadage, muinga ña onbre na gai mo alin.  
\v 3 Muinga joge onbre na nate gai mo alin onbre ngeru mo jwanba kle toi gwade gire, muinga e kle age me no, e salengwli muinga kle mo chuge ke giti onbre na ole kare, muinga onbrella ngeru kle gwade muinga ene kle age me no geru kle degaba dollale. Agwa muinga mo jwanba onbrella jogeda gire muinga ña mo jwen onbre na ole, geru me muinga ene alin, e me mo chuge ke giti kare, muinga onbrella ngeru me kle gwade ama ñage mo jwen toi onbre na gdaitre alin ole diali.  
\v 4 Ene kaire ba ulita cha daballa cha ibotea Jesucristo giti, ngeru ba kledu Moisés chadalla alin gai mo alin, ba me ñadu joge siere ege salengwli muinga mo jwanba me ñage joge siere mo onbrella kle toi gwadege. Cristo jokeda gire chkuni gwade, Cristo giti ba me chege tañachuge age Moisés chadalla alin gerule kare, nege ba Cristonu, Cristo giti ba chege siere Moisés chadallage, nege ba kle Chube chuge ngwadi ba ta gbe age no ama takalin kare.  
\v 5 Ngeru che me Cristonu, che ene gire che ulita mo ta du age me no tanre diali che takalin kare, Moisés chadalla me che chudabo age no, Moisés chadalla gerudu che ole che me agedale me no, agwa che mo ta gbu age me no chada e dollale, che agedu ene giti che chegu sugekare Chubege.  
\v 6 Agwa Cristo chku che alin, nege Cristo giti Moisés chadalla me kle che kage dare ngeru kare, nege Cristo giti Chube ta jagere ketu chege toigda age Chube takalin kare me toi geru juda kle gbaba kare alin giti. Malen nege che ta me nge kare tañachuge Moisés chadalla alin giti, nege Chube Oña kle che tale, ama kle che ta gbe diali che chagedale mine, ene che ña age no Chube takalin kare. 
\s1 Pablo gerule mo giti ama ta agekalin no agwa ama tale ama talla me no kle, talla e kle ama ta gbe age me no 
\p  
\v 7 Che me ñage gerule Moisés nu Chube gerua degaba unsuialin giti geru e me no, me ene dale, geru e no che alin, Moisés me geru jigu degaba, ene me chke uñale chege che kle age mine me no. Geru e me, ene me chku uñale chage cha kledu age me no tañachuge lle dabanu nate mo alin, agwa geru e kle degaba, geru e cha ta gbu suge, geru e gerule: 
\q1 “Me no tañachuge lle dabanu nate mo alin: ‘¿Mineade cha me e molen?’ ” 
\m  
\v 8 Geru e giti sugedu trate chage cha me agedale me no, agwa cha tale cha tachku age ma me no. Geru e me, ene me sugedu chage cha kledu age me no tañachuge lle dabanu nate mo alin.  
\v 9 Ngeru cha me geru e uñu trate, cha kledu age ulita cha tañachugu cha kledu age trate Chube gwa giti, agwa me ene, geru e chku uñale trate chage gire sugedu chage cha kledu age me no cha chegu jiske sugekare Chubege cha kledu age me no gdale.  
\v 10 Chube geru e ketu Moisége degadale kwian ulita alin, ene chke uñale kwiange kwian chagedale mine Chube takalin kare, geru kle degaba ene agwa cha me ñadu age no trate ulita geru e gerule kare, malen cha chegu jiske sugekare Chubege cha kledu age me no gdale.  
\v 11 Ngeru cha tale cha tañachugu cha ñadu age no ulita Moisés nu Chube gerua degaba gerule kare, cha tañachugu cha chegu no trate Chube gwage cha kledu age giti, agwa me ene, cha chegu mo anblitaba kare, cha me kledu age no ulia Chube takalin kare, Chube gwage cha kledu age me no, e gdale cha chegu jiske sugekare Chubege.  
\v 12 Moisés nu Chube gerua degaba, geru e no trate ulita, geru e ni gbaite me no, geru e gbaite gbaite ulita gerule no trate Chube takalin kare.  
\v 13 Geru e no me cha gbu age me no, cha agali agedu me no, cha ta age me no molen, cha mo ta ene gbu age me no geru e dollale, age me no cha gbu jiske sugekare Chubege, Moisés nu Chube gerua degaba me cha gbu jiske sugekare Chubege. Geru e cha ta gbu chkedale uñale cha me kledu age no Chube takalin kare, ene sugedu chage cha chegu jiske sugekare Chubege cha kledu age me no gdale. Moisés nu Chube gerua degaba me cha ta gbu age me no, geru e cha ta gbu suge trate cha kledu age me no me no tanre giti.  
\v 14 Chube agali Moisés ta gbu mo gerua dege kwian ulita alin, malen uñale che ulitage geru e no trate ulita, e Chube gerua. Cha kwian, cha me no, cha me ñage age no Chube gerua gerule kare, cha tale cha kle mo gbe age me no diali, cha agali me ñage joge siere cha kle age me noge.  
\v 15 Me suge chage mineade cha kle age me no, cha ta agekalin no Chube takalin kare agwa cha me kle age ene, cha me ta mo ta gbakalin age me no agwa cha kle age me no.  
\v 16 Cha me ta agekalin me no Moisés nu Chube gerua degaba kle gerule kare dollale, agwa cha kle age me no geru e dollale. E me gerule cha me no geru e ole, me ene dale, cha no geru e ole, uñale chage geru e no ulita malen cha me ta agekalin geru e dollale agwa cha kle age me no geru e dollale.  
\v 17 Cha kle age me no, e me gerule cha ta agekalin me no, agwa cha tale talla me no kle, talla e kle cha gbe age me no.  
\v 18 Uñale chage cha tale cha kwian onbre agenga me no diali, age no talla me kle cha tale, cha ta agekalin no agwa cha me ñage age no cha tañachuge age no kare.  
\v 19 Diali cha kle age me no cha me ta agekalin kare, cha ta agekalin no agwa cha me kle age no.  
\v 20 Cha kle age me no ene, e me gerule cha ta agekalin me no, agwa cha tale talla me no kle, talla e kle cha gbe age me no.  
\v 21 Cha ta agekalin no agwa cha tale cha talla me no kle, cha mo ta gbe age no ulita, gire talla me no me cha chuge ngwadi age no cha ta agekalin kare, mnoare cha alin age no.  
\v 22 Cha tale suge chage Chube gerua ulita no, cha geru e keruchuge nga suga no chadi geru e giti, cha ta agekalin no ulita geru e gerule kare,  
\v 23 agwa cha me ñage age no ulita cha tañachuge kare, age me no talla kle cha tale kaire, talla e kle cha ta gbe tañachuge nganake, talla me no diali kle kira bate talla no ole, ene cha me ñage mo ta gbe age no cha ta agekalin kare Chube gerua gerule kare.  
\v 24-25 Cha tale suge trate chage cha agedale no Chube gerua gerule kare, cha ta agekalin ene agwa diali cha kle nga dba ai giti talla me no be kle cha tale cha ta gbe age me no. Cha tañachuge tanre mo giti, diali cha talla me no kle cha ta gbe age me no, cha me ñage age no cha ta agekalin kare, cha ta olire tanre e giti, ni kwian gdaite ñage cha ta blite cha chudaboi Chube kare. Chube alin ñage cha chudaboi che Chugagwalla Jesucristo giti, Jesucristo giti Chube cha jun siere ji chugege cha kle age me no gdale, ene Jesucristo giti cha me chege jiske Chube gwage, cha gerule no no Chube ole e giti. 
\c 8  
\s1 Che Chube Oña chugale ngwadi che ta gbe, 
\s1 ene che ñage age no Chube takalin kare 
\p  
\v 1 Nege kwian ulita bai kaire Jesucristonu, Jesucristo giti kwian ene me chege jiske Chube gwage kwian agedu me no gdale, kwian ene mi ji chuge Chube be ji gbe gire.  
\v 2 Chube Oña che ta gbu Jesucristo gai ulia, ene che Jesucristonu, Jesucristo che jun siere ji chugege che agedu me no gdale, nege Jesucristo giti che me chege sugekare Chubege, Jesucristo giti che me chege mo ta dbe age me no diali che agedu nge kare.  
\v 3 Che kwian, che agali gballa me ñadu age ulita Moisés nu Chube gerua degaba gerule kare, malen che chegu jiske Chube gwage, geru degaba me ñadu che jwen siere ji chugege che agedu me no gdale. Chube mo Kirolla Jesucristo kagu nga dba ai giti kwian kare, ene Jesucristo ñadu kwian age me no ulita dbe mo ole llagli jogedaleda, Jesucristo jokeda giti ene che me chege jiske Chube gwage.  
\v 4 Chube agedu Jesucristo giti che alin ene che ulita ñage age Chube gerua gerule kare, Jesucristo giti Chube Oña kle che tale. Che me mo chugale ngwadi age me no dare talla age me no diali che ta gbu age ngeru kare, ma no che Chube Oña chugale ngwadi che ta gbe, ene che ñage age no Chube gerua gerule kare.  
\v 5 Kwian talla age me noge, kwian mo chuge ngwadi mo kage talla me noge, kwian ene be tañachuge age me no alin diali, agwa kwian Chube Oña chuge ngwadi mo ta gbe, kwian ene be tañachuge age no Chube takalin kare.  
\v 6 Kwian Chube Oña chuge ngwadi mo ta gbe tañachuge age no Chube takalin kare, kwian ene ta chege no Chube ole ule diali, ama toi nga suga no ole mo tale diali, agwa kwian mo chuge ngwadi tañachuge age me no giti talla me no kwian gbe tañachuge kare, kwian ene chege sugekare Chubege diali jogebanga.  
\v 7 Kwian mo ta gbe age talla me no kle ama gbe age kare, kwian ene talla kle age me no Chube dollale, kwian ene ni takalin mo ta gbe Chube ole ni ñage mo ta gbe age Chube gerua gerule kare.  
\v 8 Kwian ene diali talla age me no ole toi ama takalin kare, kwian ene me ñage age no Chube takalin kare, ta me suga no Chubedi kwian ene giti. 
\p  
\v 9 Agwa ba ulita me kle toi mo ta gbe age me no ngeru kare, nege ba ulita kle mo ta gbe age Chube takalin kare, Chube Oña kle ba ta gbe age no, Chube Oña kle toi ulia ba tale ba Cristonu. Chube Oña me kle kwian tale kwian me Cristonu.  
\v 10 Jogeda chegu kwian ulita alin age me no gdale, chui gwealege ba be jogeda agwa ba ulia Cristonu ba oña mi chege sugekare Chubege, ba oña be chege diali Chube ole, ba Cristo gau ulia giti ba no trate Chube gwage.  
\v 11 Chube Jesucristo jaba gbuni gwade, Chube e amaña Oña kle toi ba tale, ama giti Chube be ba jaba gbeni gwade kaire. 
\p  
\v 12 Cha daballa cha ibotea ulita Jesucristonu, che ulita Chube Oña molen mo tale malen che me mo ta gbadale tañachuge age me no diali che tañachugu ngeru kare.  
\v 13 Ba ulita mo ta gbe chage talla me no ole age ba takalin kare, ba me mo ta gbe chage Chube ole ulia, ene ba ulita be chege sugekare Chubege, agwa ba ulita mo ta gbe age Chube takalin kare, Chube Oña ba ulita ta gbe talla me no ulita chuge ngwadi, ene ba ulita toi diali Chube ole age Chube takalin kare.  
\v 14 Kwian ulita bai kaire mo ta chuge ngwadi Chube Oñage, Chube Oña kwian ene ta gbe age Chube takalin kare, kwian ene Chube olia.  
\v 15 Ba Chube olia, Chube Oña me ba ta gbe kennga ba mo ta du kennga ngeru kare tañachuge Chube be ji gbe ba alin, me ene, Chube Oña ba ta gbe no Chube ole, ene Chube Oña giti suge trate bage Chube no ba ole Chube ba gau mo oliale, ene ba gerule Chube ole ta me kennga ole: “Chube, ba cha Ñenua.”  
\v 16 Chube Oña kle che tale, diali ama kle che ta gbe suge trate trate che ulia Chube olia.  
\v 17 Che Chube olia, malen Chube age no che alin Chube age no mo Kirolla Cristo alin kare, Cristo kle toi nga ngaña giti Chube kle ngwadi, kaire bdagli che ulita Chube olia be toi diali chui tangle Cristo ole nga ngaña giti Chube kle ngwadi. Cristo boidu tanre daga ngwale nga dba ai giti, che kaire boi daga ngwale nga dba ai giti Cristo gerua giti, che me talladale, bdagli che be kle ule Cristo ole nga ngaña giti, Chube be gerule no che giti Chube gerule no mo Kirolla Cristo giti kare. 
\s1 Boi daga ngwale Jesucristo gerua giti e sugeti alin, 
\s1 e me ñage che gbe siere Chubege 
\p  
\v 18 Ulia che kle boi daga ngwale Jesucristo gerua giti nga dba ai giti, e sugeti alin me salengwli che be kle ule Jesucristo ole kare, malen cha me tañachuge tanre boi daga ngwale giti. Ma no diali cha kle tañachuge chui be chie giti gire che be kle ule Jesucristo ole diali chui tangle nga ngaña giti Chube kle ngwadi, chui ege che mi boi daga ngwale dare, che be kle no ulita Jesucristo ole.  
\v 19 Chube nu nga ulita dodaba lle ulita dodaba, nga e ulita lle e ulita kle chui manade gire Chube be kwian maunu ulita dbe siere boi daga ngwale ulitage toi diali chui tangle ama ole nga ngaña giti.  
\v 20-21 Nga ulita lle ulita kle chui e manade, uñale amage chui ege ama be chege no ulita ngeru kare Chube ama dodadu no no jondege kare. Nga ulita lle ulita tadu chegekalin diali no Chube ama dodadu kare, agwa Adán agedu me no Chube dollale, e giti Chube nga ulita lle ulita gbu boi daga ngwale. Nga ulita lle ulita kle chui manade gire Chube be kwian maunu ulita dbe nga ngaña giti toi no ama ole, uñale nga ulitage lle ulitage chui ege Chube be age no ama ulita alin kaire, Chube be ama ulita gbe no naskuni Chube ama dodadu kare.  
\v 22 Uñale chege nege nga ulita lle ulita kle sui jwennga kle skibachie boi tanre daga ngwale kote, kle chui manade, chui e be chke gire Chube be ama ulita gbe no naskuni, ene ama ulita mi boi dare salengwli muinga sui jwennga skibachie kirogwa jingmea kote kare kirogwa menga chebia kote gire muinga me boi dare.  
\v 23 Me nga ulita lle ulita alin allabi kle boi ene chui manade, che kwian Chubenu kaire kle chui e manade, che ta klekalin blike Chube ole. Chube Oña kle che tale che ta gbe suge chui be chie giti, chui e be chke gire che be kle ule Chube ole ama oliale, chui ege jogeda mi kle che alin, Chube be che jaba gbeni gwade, che be joge toi diali chui tangle Chube ole nga ngaña giti.  
\v 24-25 Chube che jun siere ji chugege che agedu me no gdale agwa che bebi joge siere boi daga ngwalege nga dba ai giti. Joge toi nga ngaña giti Chube ole, che kle chui e manade, chui ege Chube be che jwen siere boi daga ngwalege ulita. Joge siere boi daga ngwalege chuia be chke gire che mi chegedale chui e manade dare, agwa chui e bebi chke malen che kle chui e manade diali, che me ñage skwatige chui e manade, che mo ta gbadale chui e manade diali nga suga no ole.  
\v 26-27 Chui gweale che kle skwatige boi tanre daga ngwale, che ta olire, che kira me, ni ñage chudaboi kade no Chubege mau alin che takalin kare. Che ene gire Chube Oña che chudaboi, uñale Chube Oñage che kle tañachuge mine, ama agali che talla ulita trage Chube ole. Suge Chube Oñage che talla mine, kaire suge amage Chube takalin mine che kwian Chubenu alin, malen ama ñage gerule trate Chube ole che giti. Chube gwage che ulita talladi, uñale amage ama Oña kle gerule trate che giti.  
\v 28 Chube nu kwian ulita bai kaire gaba mau alin, kwian mo ta dbe no Chube ole, kwian ene boi daga ngwale ñage tañachuge me no kle boi ulita giti. Agwa me ene, uñale chege boi daga ngwale ulitaske Chube diali age no kwian amanu alin. 
\p  
\v 29 Gwangea unsuialin Chube bebi kwian dodade gire uñadu Chubege kwian bai ulita be ama gai ulia, Chube kwian ene gau mau alin mo kirollale mo jianle, ene kwian e talla chege salengwli Chube Kirollanu Jesucristo talla kare, ene Chube Kirollanu chege kwian na tanre ulitage daballa juma kare.  
\v 30 Kwian me kledu gire Chube kwian gau mau alin unsuialin Chube mo ta gbu kwian gai kare, kwian ene kle gire Chube kwian ta gbe suge ama gai, gire kwian ama gai Chube kwian ene jwen siere ji chugege agedu me no gdale, ene kwian chege trate Chube gwage, ene kwian ñage toi ama ole ama kle ngwadi.  
\v 31 Chube agedu no tanre ene che alin, Chube no che ole, malen che me tañachugadale dare kle boi mine che ole. Lle na me salengwli kiraske Chube kare, Chube kle che ole, Chube kle che manade malen ni kwian gdaite ñage age me no che ole che gbe siere Chube agedu che alinge.  
\v 32 Chube mo ta du no che ulita alin, ama mo Kirollanu gdaitre alin Jesucristo ketu gwadaleda che agedu me no giti, Chube agedu no tanre ene che ulita alin Jesucristo giti, ene kaire Chube be age no dare che alin, che me ñage tañachuge Chube be che jige gballa Chube mi che chudaboi dare.  
\v 33 Che me kledu gire Chube che ulita gau mau alin, che amanu, ama che jun siere ji chugege che agedu me no gdale, ama gwage chedi che no trate. Chube agedu no ene che alin, ¿chema ñage che gbe jiske Chube gwage?,  
\v 34 ¿chema ñage che gbe ji chuge che agedu me no gdale? ¡Ni gdaite! Jesucristo jokeda che agedu me no ulita giti, chkuni gwade, joni nga ngaña giti Chube kle ngwadi, nege ama kle Chube ole Chube ko taingwli giti gerule Chube ole che giti.  
\v 35 Jesucristo agedu no che alin ama no che ole, ¿chema ñage che gbe siere amage? Che boi tanre daga ngwale, che ta olire tanre boi daga ngwale giti, kwian na age me no che ole che Jesucristo gerua dbe giti, che bli ole, che me ñometra molen, che chage boi tirarege, che jogeda, e ulita me ñage che gbe siere Jesucristoge, Jesucristo no che ulita ole diali, ama me ta jogenga chege.  
\v 36 Chube gerua degaba unsuialin gerule che kwian Chubenu ulita giti, chada e gerule: 
\q1 “Che Chubenu malen kwian me Chubenu me no che ole, diali ama chage che nate gwadaleda. 
\q1 Kwian ene tañachuge che giti che me ñanaske, ama che gweda ngwale bda kare.” 
\m Chube gerua degaba unsuialin gerule ene che giti.  
\v 37 Che me tallade boi tanre daga ngwale giti, uñale chege che Jesucristonu Jesucristo no no che ole ama agedu tanre no che alin, e giti che mo ta gbe no ama ole, boi daga ngwale me ñage che ta gbe siere amage.  
\v 38 Uñale chage trate trate Chube kle che ulita monu manade diali, ni ulita kle boi che ole ñage che gbe siere amage, kwian che gwakalinda, kwian che gbe boi daga ngwale, che chugagwalla nga dba ai giti age me no che ole, dolla Satanás mo chudaboangalla ulita ole age me no che ole, lle kle boi nege, lle be boi chui chiege,  
\v 39 lle nga ngaña giti, lle nga dba ai giti, lle na ulita Chube nu dodaba, ni e ulita gdaite ñage che gbe siere Chubege. Chube no che ulita ole, Chube agedu no tanre che alin che Chugagwalla Jesucristo giti, Jesucristo giti Chube kle che ole diali Chube no che ole diali. 
\c 9  
\s1 Chube kwian israelita chudalla gau mo alin, agwa 
\s1 kwian israelita ulita me Chube gau mo Chubeale 
\p  
\v 1-3 Cha gerule ba ulita ole, cha tale cha suge moge ta olire tanre cha bitalla israelita giti bai ulita me Cristo gau ulia, cha me ñage ta chege suga no e giti, kwian e ulita cha bitalla, cha no no ama ole malen cha agali takalin mo gbe ji chuge sugekare Cristoge ama ulita jiale me Cristo gai giti, cha age ene giti ama ulita alin ene ama me ji chuge Chube be ji gbege, agwa cha me ñage age ene. Ulia cha no no cha bitalla israelita ulita ole, cha kle ta olire tanre ama me Cristo gau ulia giti, cha gerule ene ba ole cha me kle sole, cha Cristonu malen cha gerule ulia diali, kaire Chube Oña kle cha tale cha ta gbe suge cha kle gerule ulia ba ulita ole.  
\v 4 Cha bitalla kwian israelita chudalla, unsuialin Chube kwian israelita gbu mo oliale, Chube kledu ama ole ama manade mo kiralla giti, Chube gerudu Chube be age no ama alin, Chube geru ketu Moisége degadale ama alin, Chube gerudu ama ulita mo litadale gerule no Chube giti, Chube gerudu Chube be kwian gdaite kage amaske kwian jwanle siere ji chugege kwian agedu me no gdale.  
\v 5 Kwian israelita ulita enusulian kada Abraham kada Isaac kada Jacob oindalla, ama ulitaske Cristo chiu, Cristo Chube Kirolla, Cristo amaña Chube, ama kweri, ama lle ulita nga ulita kwian ulita Chugagwalla, kwian ulita gerudale no ama giti diali, ene no no gerule no ama giti. 
\p  
\v 6 Chube gerudu Chube be age, e me Chube gerudu alin allabi, me ene, Chube agedu ulita Chube gerudu kare, Chube Cristo kagu kwian israelitaske Chube gerudu kare agwa kwian israelita ulita me Cristo gau ulia mo jwanngale siere, malen kwian ene me Chubenu ulia.  
\v 7-8 Kwian israelita ulita me kwian Chubenu ulia mo chuda giti, ni enusulian Abraham oindalla ulita kwian Chubenu mo chuda giti, me ene, ni kwian gdaite Chubenu mo chuda giti. Chube gerua Cristo giti, kwian geru e gai ulia, e giti kwian chege Chubenu ulia, Cristo alin giti kwian chege Chubenu ulia. 
\p Unsuialin Chube gerudu Abraham ole: “Ba kirolla Isaac alin giti ba chudalla ngle be jriennga.”  
\v 9 Kaire Chube gerudu Abraham ole Isaac be menga chebia kote giti, Chube gerudu: “Cha be age no ba alin ba muira Sara alin, chura be chiege Sara be kirogwa molen.”  
\v 10 Isaac medunga Sara kote Chube gerudu kare, Isaac tigedu jo juma mo jun Rebeca ole, Rebeca chagedu gaba kirogwa bolo suiale.  
\v 11-13 Kirogwa boke bebi chke Rebeca kote, kirogwa boke bebi age no o me no gire Chube gerudu Rebeca ole kirogwa boke giti: “Kirogwa juma be chege lle boangale mo daballa nate alin, daballa nate be chege daballa juma chugagwallale.” Isaac kirolla Rebeca giti kirolla daba nate kada Jacob Chube ama gau gbu daballa juma kada Esaú chugagwallale, Chube agedu no ene Jacob alin me Jacob agedu gweale no giti malen Chube agedu Jacob alin, me ene, Jacob kle Rebecadíge bebi age no o me no, Chube tale Chube Jacob gau Chube takalin kare. Chube gerua degaba unsuialin gerule Chube agedu Jacob alin giti, chada e gerule: 
\q1 “Cha no no Jacob ole, cha agedu ma no Jacob alin me salengwli cha agedu Esaú alin kare.” 
\m Chube agedu ene unsuialin Jacob ole Esaú ole, e giti suge chege Chube me kwian gai kwian age gweale no giti ngeru gire Chube kwian ene gai mo alin, me ene. Chube kwian gai mo alin Chube me tañachuge kwian ageba ulita giti, Chube age kwian alin no Chube takalin kare.  
\v 14 Chube kwian gai me tañachuge kwian ageba no o me no, agwa Chube ama gai, e giti che me ñage tañachuge Chube kle age me no, me ene,  
\v 15 ama Chube, ama ñage age ama ta agekalin kare. Unsuialin Chube gerudu Moisés ole: “Cha me age kwian tañachuge kare, cha age cha tañachuge kare, cha kwian gai cha takalin kare, cha tai dage amage cha age no ama alin.” Chube gerudu ene Moisés ole.  
\v 16 Chube tai dage kwiange me kwian tañachuge kare me kwian age no giti, kwian me ñage tañachuge ama age no giti Chube be tai dage amage, me ene, Chube tale Chube tai dage mo tale kwiange age no kwian alin.  
\v 17-18 Chube ñage age kwian ole Chube takalin kare, kwian bai kairege Chube takalin Chube tai dage kwian enege. Kaire kwian mo chuga gbe mno Chubege, Chube takalin Chube kwian ene chuga gbe ma mno me jain age no Chube takalin kare. Boidu ene unsuialin kwian nga Egiptomu chugagwalla kada Faraón ole, Chube gerua degaba unsuialin gerule e giti, chada e gerule: 
\q1 “Chube gerudu Faraón ole: ‘Ba kle age cha dollale, e gdale cha ñage ba gweda agwa cha ba jige kwian Egiptomu chugagwallale, ene ba age cha dollale giti cha age mo kirallaske ba ole, ene ulita boi ba ole giti chkedale uñale kwian nga ulitage ulia cha Chube kira molen tanre.’ ” 
\m Chube gerua degaba unsuialin gerule ene. 
\p  
\v 19 Chube Faraón chuga gbu ma mno Chube dollale, e giti ba gweale ñage geru kade: “Chube kwian chuga gbe mno agedale me no, ¿mineade Chube kwian ene gbe jiske kwian kle age giti? Kwian ene kle age Chube agali kle kwian gbe age kare.”  
\v 20 Ba geru kade ene Chube giti, e me no, ama Chube, ba kwian, ba me ñage geru kade Chube kle age kwian ole giti, Chube kwian dodadu Chube age kwian ole Chube takalin kare. Dbi unlla me ñage gerule mo dodanga ole: “¿Mineade ba cha dodadu ene?”  
\v 21 Kwian dbi unlla dodanga age dbi ole ama takalin kare, dbi unlla dodanga dbi gweale dodade únle no trate un manade no me lle boi ege, dbi unlla dodanga dbi amaña dodade únle lle tanre boangwa. Ene kaire Chube age kwian ole Chube takalin kare, ba me ñage geru kade Chube kle age giti.  
\v 22 Chube age kwian ole giti Chube takalin suge kwiange Chube mine, Chube takalin suge kwiange Chube kira molen kaire Chube me no age me no ole be ji gbe mno kwian agenga me no alin. Agwa Chube me kle age ene blike kwian ole, Chube kle manade tanre ta no ole, kwian me mo ta blite Chube ole, bdagli kwian ene be ji chuge sugekare Chubege diali kwian agedu me no gdale.  
\v 23 Kaire Chube takalin suge kwiange Chube no kwian ole Chube age no no kwian alin, malen Chube tai dage chege bai kaire Chube nu che gaba ngeru gwangea mau alin, chui bdaglige che be joge toi ama ole nga ngaña giti.  
\v 24 Chube che ta gbu suge ama gai ulia, che Chubenu, Chube kle tai dage chege Chube kle age no no che alin. Chube kle age no ene che kwian israelita alin, kaire Chube kle age no no kwian me israelita alin bai kaire Chube nu kwian me israelita ta gbaba ama gai ulia, kwian me israelita ene Chubenu kaire.  
\v 25 Unsuialin Chube kwian kada Oseas gbu chada dege Chube talla mine unsuialin kwian me israelita ole, chada e gerule ene kwian me israelita giti: 
\q1 “Kwian me chanu cha be kwian ene gai chanu. Cha me ta du no kwian ole, kwian ene ole cha be mo ta dbe no. 
\q1  
\v 26 Kwian ene lle ngwale gau mo chubeale, cha gerudu ama ole: ‘Ba me kwian chanu.’ 
\q1 Chui be chke gire cha be kwian ene ta blite cha ole, ama be tachke cha Chube ulia gwade, ama be cha gai mo alin, cha be ama ulita ene gai mo oliale.” 
\m Chube Oseas ta gbu chada dege ene kwian me israelita giti.  
\v 27 Kwian israelita giti Isaías gerudu unsuialin: 
\q1 “Jacob chudalla be jriennga ngle ble ubaudalla kare, agwa Jacob chudalla bedre dare be Chube gai dage be tien gitiru Chube be ji gbege, Jacob chudalla ngle me Chube gai giti jogenga sugekare Chubege. 
\q1  
\v 28 Ji gbe chuia be chke gire Chube che Chugagwalla mi manade dare, ama be age kwian me ama gai ulia ole ama gerudu kare sbali, ama be ji gbe mno blike kwian ene ulita alin me Chube gai ulia gdale, ene kwian ene ulita be chege ji chuge diali mi ñage joge siere ege.” 
\m  
\v 29 Kaire Isaías gerudu mo bitalla israelita giti: 
\q1 “Chube che Chugagwalla kweri, ama kira molen tanre, ama tadukalin ama ñadu che chudalla ulita kagenga, ene che chudalla ni gdaite chegu salengwli boidu una Sodomage una Gomorrage kare, Chube kwian toinga una e bokege kagunga ulita, ni gdaite chegu. 
\q1 Agwa Chube me agedu ene che ole, ama taidu dage che chudalla gwealege malen ama me che chudalla ulita kagunga.” 
\m Isaías gerudu ene kwian israelita chudalla giti. 
\p  
\v 30 Geru ai ulita cha kle gerule kare, geru e gerule kwian chege trate Chube gwage Cristo alin giti. Kwian me israelita me tañachugu chege no trate Chube gwage age gweale no giti kwian israelita tañachuge kare, agwa kwian me israelita bai kaire mo ta gbe Cristo gai ulia, e alin giti kwian ene chegu no trate me jiske Chube gwage agedu me no gdale.  
\v 31 Agwa kwian israelita, diali ama tañachugu ta dbe age Moisés nu Chube gerua degaba unsuialin gerule kare, ene ama tañachugu ama me chegu jiske Chube gwage ama agedu me no gdale, agwa me ñadu age no ulita Chube gerua degaba gerule kare, malen me boidu ene ama tañachugu kare.  
\v 32 Kwian israelita me mo ta gbu ulia Chube ole mo tale ene ama me chege jiske Chube gwage, ama me tañachugu ene, ama tañachugu age alin giti, ene ama tañachugu ama chege trate Chube gwage. Chube Cristo kagu kwian alin agwa kwian israelita me Cristo gbu gdadi me Cristo gau mo jwanngale siere ji chugege age me no gdale ene ama chege trate Chube gwage, ama me Cristo alin gau ma kweri lle na ulitage malen kwian israelita ene chege sugekare Chubege.  
\v 33 Chube gerua degaba unsuialin gerule Cristo giti, kwian me mo ta gbe Cristo gbe gdadi kwian ene be boi daga ngwale be chege sugekare Chubege ta olire, agwa kwian bai kaire mo ta gbe Cristo ole Cristo gbe gdadi, kwian ene be chege no diali, Chube gerua degaba unsuialin gerule e giti, chada e gerule: 
\q1 “Cha ke kweri gbe una Jerusalénge, kwian ke e gbe gdadi kwian me lentige, kwian me ke e gbe gdadi kwian tanre be lentige ke ege. 
\q1 Kwian bai kaire mo ta gbe ama ole ama gai ulia, kwian ene be kle no diali, nga be suga no kwian enedi, kwian ene mi ta chege olire.” 
\c 10  
\p  
\v 1 Cha daballa cha ibotea Cristo giti, cha gerule ba ole, cha no no cha bitalla israelita ulita ole, cha takalin cha bitalla ulita Cristo gai ulia ene ama tien gitiru ji chugege age me no gdale, diali cha gerule ene Chube ole cha bitalla israelita me Chubenu ulita giti.  
\v 2 Uñale chage cha bitalla israelita me Chubenu kle mo ta gbe age no Chube alin, agwa ama me kle age no ulita Chube takalin kare, ama kle mo ta gbe nganake geru ulia Cristo gitige.  
\v 3-4 Ama geru Cristo giti uñe, agwa ama me geru e gbe gdadi ama me mo ta gbe Cristo gai ulia Chube takalin kare, kwian tañachuge ma no age agali kwian tañachuge kare ene ama tañachuge ama chege no trate Chube gwage. Kwian ene me tañachuge Cristo gai ulia giti, ama tañachuge age Moisés nu Chube gerua degaba gerule kare ene ama tañachuge ama chege no trate Chube gwage, agwa kwian me ñage age no ulita chada e gerule kare. Kwian mo ta gbe Cristo gai ulia mo tale, kwian ene alin allabi chege no trate me jiske Chube gwage, Chube kwian ene jwen siere ji chugege age me no gdale.  
\v 5 Chube geru gbu kwian alin Moisés giti, kwian kle tañachuge age geru e alin gerule kare ene ama tañachuge ama chege no trate Chube gwage, Moisés Chube gerua degu, chada e gerule: 
\q1 “Kwian ulita bai kaire age ulita diali Chube nu geru gbaba gerule kare, kwian ene alin be toi no diali chui tangle Chube ole.” 
\m Moisés chada degu ene, agwa kwian me ñadu age no ulita diali chada e gerule kare,  
\v 6 malen Chube Cristo kagu kwian alin, ene Cristo gai ulia giti kwian chege no trate me jiske Chube gwage. Ba me ñage tañachuge mo tale: “¿Chema be joge nga ngaña giti Cristo jwen dbadale nga dba ai giti che jwanle siere?” Me ñage tañachuge ene, Cristo chku nga dba ai giti, ama jokeda che agedu me no giti.  
\v 7 Ni ñage tañachuge mo tale: “¿Chema be joge nga dbigu giti Cristo jaba gbeni gwade?” Me ñage tañachuge ene, Cristo jaba me kle nga dbigu giti, Cristo chkuni gwade.  
\v 8 Geru ulia Cristo giti chku uñale trate ba ulitage, nege ba kle gerule geru e giti, kaire geru e kle ba tale. Cha kle geru Cristo giti trage ba ole kaire kwian na ole diali, uñale bage Cristo agedu giti che ulita alin, che mo ta gbadale geru Cristo giti gai ulia diali, geru e alin giti che tien gitiru ji chugege che agedu me no gdale.  
\v 9 Ba agali gerule kwian na ole Jesu ba Chugagwalla, kaire ba geru gai ulia mo tale Jesu jokeda Chube Jesu gbuni gwade, ene Chube ba jwen siere ji chugege age me no gdale.  
\v 10 Mo tale kwian Jesu gai ulia, e giti kwian chege no trate me jiske Chube gwage, kwian ene gerule no Jesu giti kwian na ole, ama gerule: “Cha Jesu gau ulia, ama cha Chugagwalla.” Chube kwian ene jwen siere ji chugege agedu me no gdale. 
\p  
\v 11 Chube gerua degaba unsuialin gerule kwian bai Jesucristo gai ulia giti, chada e gerule: 
\q1 “Kwian bai kaire mo ta gbe ama ole ama gai ulia, kwian ene be kle no diali, nga be suga no kwian enedi, kwian ene mi ta chege olire.” 
\m  
\v 12 Geru e jo degaba kwian israelita kaire kwian me israelita ulita giti, Jesucristo giti kwian ulita israelita me israelita salengwli Chube gwage, Jesucristo kwian ulita Chugagwalla, kwian ulita israelita me israelita bai kaire Jesucristo gai ulia mo Chugagwallale gerule no ama giti, kwian ene ulita alin Chube age no no.  
\v 13 Chube gerua degaba unsuialin gerule Jesucristo giti, chada e gerule: 
\q1 “Kwian ulita bai kaire ama gai ulia mo Chugagwallale gerule no ama giti, kwian ene be chege sugekare ji chugege agedu me no gdale.” 
\m  
\v 14 Chube gerua degaba unsuialin gerule ene. Ulia geru Jesucristo giti kwian ulita alin, agwa me uñale kwian ulitage Jesucristo gai ulia mine. Kwian me Jesucristo gai ulia ngeru, kwian me ñage ama gai mo Chugagwallale gerule no ama giti. Kwian me geru Jesucristo giti keruchuge ngeru, kwian me ñage ama gai ulia. Kwian geru uñanga me joge geru Jesucristo giti trage kwian ole ngeru, kwian me ñage geru keruchuge me ñage geru Jesucristo giti uñe.  
\v 15 Chube me kwian geru dbanga kage ngeru geru Jesucristo giti dbe kwian me geru uñege, geru dbanga me ñage joge geru dbe, ama kaganga me. Chube gerua degaba unsuialin gerule Jesucristo gerua dbanga giti, chada e gerule: 
\q1 “Kwian bai kaire mo ta gbe no geru no kwian jwannga siere giti gbe chke uñale kwianske, kwian ene no no lle no boanga.” 
\m Chube gerua degaba unsuialin gerule ene.  
\v 16 Kwian geru Jesucristo giti trage kwian ole, agwa kwian ulita me geru e gbe gdadi me geru e gai ulia mo alin. Boidu ene kaire unsuialin Isaías ole, Isaías Chube gerua ketanga, Isaías gerudu Chube ole: 
\q1 “Cha Chugagwalla, ba cha gbu kaire ba kwian na gbu ba gerua kete kwiange, kwian tanre ba gerua keruchugu, agwa kwian ulita me ba gerua gau ulia.” 
\m  
\v 17 Isaías gerudu ene Chube ole unsuialin, ene kaire nege kwian ulita me geru Cristo giti gai ulia, agwa kwian geru ketanga kwian nage mo ta gbadale geru trage gwangerugu kwian ulita ole, ene kwian geru Cristo giti keruchuge, ene kwian ñage mo ta gbe Cristo gai ulia, kwian me geru Cristo giti keruchuge me ñage mo ta gbe Cristo gai ulia, kwiange me uñale Cristo giti, Cristo gerua me uñale kwiange. 
\p  
\v 18 Kwian israelita me Cristo gau ulia giti cha geru kade: “¿Ama me geru Cristo giti keruchugu malen ama me Cristo gau ulia mo jwanngale siere?” Me dale, kwian israelita nga ulitage geru keruchugu. Chube gerua degaba unsuialin gerule e giti, chada e gerule: 
\q1 “Kwian Chube gerua dbanga jo Chube gerua trage kwian israelitaske nga ulitage, nga ulitage kwian israelita kle toi ngwadi geru jo chke kwian israelitage.” 
\m Chube gerua degaba unsuialin gerule ene kwian israelita giti.  
\v 19 Kwian israelita ulita geru Cristo giti keruchugu, agwa ama me Cristo gau ulia, ¿e gerule geru Cristo giti me sugedu trate amage? Me dale, e gerule kwian israelita geru keruchugu, geru sugedu amage, agwa ama agali mo ta gbu me Cristo gai ulia. Kwian israelita mo ta gbu ene me Cristo gai ulia mo jwanngale siere, malen Chube mo ta gbu kwian me israelita chudaboi, Chube kwian me israelita ta gbu Cristo gai ulia, unsuialin Chube Moisés ta gbu gerule e giti kwian israelita ole: 
\q1 “Chube gerudu: ‘Cha be kwian chudalla na kwian me chanu ta gbe cha gai ulia mo Chubeale, ba tañachuge kwian chudalla na ulita me no ama ta me ama me Chube ulia uñe. 
\q1 Cha be age no kwian e alin, cha be ama ta gbe no cha ole, e giti ba be mo ta dbe skochie tanre, ba be takalin cha me age no ene dare kwian e alin, ba be tañachuge ma no cha age no naskuni ba alin allabi me age no kwian na alin.’ ” 
\m  
\v 20 Chube Moisés ta gbu Chube gerua ene kete kwian israelitage kwian me israelita giti, gire ma bdagli Chube Isaías ta gbu chada dege trate kwian me israelita giti, chada e gerule: 
\q1 “Chube gerudu: ‘Kwian lle na gau mo chubeale, ama me cha gau mo Chubeale ni tañachugu cha giti, cha kwian ene ta gbu suge trate cha Chube ulia, kwian ene cha gau ulia mo Chubeale.’ ” 
\m  
\v 21 Chube Isaías ta gbu chada dege ene kwian me israelita giti, kaire Chube Isaías ta gbu chada dege kwian israelita giti, chada e gerule: 
\q1 “Chube gerudu: ‘Diali chui tangle cha kledu ama ulita manade ngwange mo ta blite cha ole, agwa ama ulita me mo ta gbu age cha gerudu kare, ama mo ta gbu age me no cha dollale.’ ” 
\m Isaías Chube gerua degu ene unsuialin kwian israelita giti. 
\c 11  
\s1 Kwian israelita me geru mo jwannga siere Jesucristo giti gai ulia, malen geru e joge chke nga na 
\s1 ulitage kwian me israelitaske 
\p  
\v 1 Kwian israelita mo ta gbu age me no Chube dollale, ¿e giti Chube kwian israelita ulita chugu ngwadi sugekare? Me ene dale. Cha kwian israelita, cha kwian kada Benjamín mnealla, cha kwian israelita enusulian unsuialin Abraham oindalla, cha ene Chube me cha chugu ngwadi sugekare.  
\v 2 Chube kwian israelita chudalla gau gwangea mo alin, Chube no, Chube me ta jogenga kwian amanu chudallage, Chube me kwian ene amanu chudalla chuge ngwadi sugekare. Uñale ba ulitage boidu mine unsuialin Elías suiale, e suiale kwian israelita agedu me no tanre Chube dollale, Elías gerudu Chube ole kwian e giti kwian e gbale jiske Chubege, Chube gerua degaba unsuialin gerule Elías gerudu Chube ole kwian israelita giti, chada e gerule: 
\q1  
\v 3 “Cha Chugagwalla, cha bitalla israelita ulita agedu tanre me no, ama lle bda gugangwa ba alin ulita skiundba, ama kwian ba gerua ketanga guda ulita, cha alin allabi chegu gwade, kaire kwian kle chage cha nate cha gwaleda.” 
\m  
\v 4 Elías gerudu ene Chube ole kwian israelita ulita giti gire Chube jaindunga Elías kalen: 
\q1 “Elías, ba me kle tañachuge trate, cha takalin chke uñale bage ba me kle gballa, cha ba bitalla israelita kwian siete mil manadu no mo alin, kwian e ulita kle mo ta dbe no cha ole ba no cha ole kare, kwian e ulita me nu Baal gaba mo chubeale ni ama jongnagwa skutaba dba amadi gale dage mo chubeale.” 
\m Chube gerua degaba unsuialin gerule ene Elías giti.  
\v 5 Unsuialin Elías suiale Chube kwian israelita mneite manadu no mo alin, kwian mneite e mo ta du no Chube ole, ene kaire nege tangle kwian israelita mneite kle mo ta dbe no Chube ole, Chube mo ta gbu no mneite e manade no ama nu kwian mneite gaba mo alin, kwian ene kle mo ta gbe diali ama ole.  
\v 6 Kwian israelita mneite e me agedu gweale no gire e giti Chube ama gau manadu mo alin, me ene, Chube taidu dage amage, Chube ta no ole tadu agekalin no ama alin, malen Chube ama gau mo alin. Chube kwian gai kwian age no giti ene Chube kle age kwian alin kwian age ñanale, ene Chube me kle tai dage kwiange me kle age no kwian alin. Agwa me ene, Chube ta no ole taidu dage kwiange kwian gau mo alin, ama me kwian gau kwian agedu gweale no giti.  
\v 7 Chube nu kwian israelita mneite gaba mo alin, kwian ene mo ta blitu Chube ole, kwian ene ulita chegu trate Chube gwage. Agwa kwian israelita na ulita tañachugu ama age gweale no, e giti ama chege no trate Chube gwage, agwa me ñadu chege no trate ama tañachugu kare, ama ulita ta kledu bate Chubege, ama mo chuga gbu mno me mo ta blite Chube ole.  
\v 8 Chube gerua degaba unsuialin gerule kwian ene giti, chada e gerule: 
\q1 “Kwian me tadu mo ta blitakalin Chube ole, malen Chube ama ta gbu me suge geru ulia giti, ene geru ulia chku ama ologe agwa ama me ñadu geru keruchuge no, geru me ñadu suge trate ama tale, ama chegu kwian olo me kare kwian gwagwa me kare.” 
\m Boidu ene unsuialin Chube gerua degaba unsuialin gerule kare, kaire kle boi ene nege tangle kwian israelita ole.  
\v 9 Unsuialin Chube David ta gbu gerule kwian israelita me mo ta blite Chube ole giti: 
\q1 “Kwian lle tanre molen, kwian kle toi no kle tañachuge lle ngle molen alin giti, kwian me kle tañachuge Chube giti, malen cha takalin Chube ji gbe kweri ama alin. 
\q1  
\v 10 Cha takalin kwian ene ta chege me suge geru ulia giti, kaire cha takalin kwian ene chege boi tanre daga ngwale ta olire ole diali chui tangle.” 
\m David geru e degu unsuialin kwian israelita giti. 
\p  
\v 11 Kwian israelita agedu tanre me no Chube dollale, ¿e giti Chube ama chugu ngwadi sugekare diali? Me ene ulia, Chube ama chugu ngwadi sugeti alin ene Chube mo ta gbu kwian me israelita chudaboi, Chube takalin geru Jesucristo giti chke uñale kwian me israelitage ene kwian me israelita ñage Jesucristo gai mo jwanngale siere. Ene chke uñale kwian israelitage Chube kle age no kwian me israelita alin, ene kwian israelita be takalin Chube age no ama alin naskuni Chube kle age no kwian me israelita alin kare, ene kwian israelita be ta mo ta blitakalin Chube ole.  
\v 12 Kwian israelita agedu tanre me no Chube dollale, ama me geru mo jwannga siere Jesucristo giti gau ulia, kwian israelita me geru e gau ulia, malen geru e jo chke nga na ulitage kwian me israelitaske, ene kwian me israelita ñadu Jesucristo gai ulia mo jwanngale siere. E no no, agwa ma no chui be chke gire kwian israelita ulita be mo ta blite Jesucristo ole be Jesucristo gai ulia mo jwanngale siere kwian me israelita Jesucristo gau ulia kare. 
\p  
\v 13 Cha gerule ba kwian me israelita ulita ole, Chube cha gbu geru amanu dbe ba ulita kwian me israelitaske, Chube gerua dbe giti ba ulitaske e giti nga suga no no chadi lle boi ene, cha ta mo ta gbakalin lle e boi no diali.  
\v 14 Cha kwian israelita, geru dbe giti kwian me israelitaske e giti cha takalin cha bitallage suge me no ama alin cha kle geru dbe ba ulita kwian na me israelitaske, ene ama be ta geru Jesucristo giti keruchugakalin, ene ama ñage Jesucristo gai ulia mo jwanngale siere ba kwian me israelita Jesucristo gau ulia kare.  
\v 15 Kwian israelita geru Jesucristo giti keruchugu, agwa ama me geru gau ulia, e giti Chube kwian ene chugu ngwadi sugekare moge sugeti alin, ene geru Jesucristo giti jo kwian na nga ulitageske, ene kwian na nga ulitage mo ta gbu no Chube ole Jesucristo giti. Chui be chke gire kwian israelita bai kaire kle bate Chubege be tachke Chubege be mo ta blite Jesucristo gai ulia, kwian kle bate Chubege ama jaba kare, gire ama tachkeni Chubege, e salengwli jaba chkeni gwade kare. 
\p  
\v 16 Unsuialin Chube kwian israelita enusulian Abraham gau mo alin Chube Abraham gbu lle boi mo alin, Abraham mo ta gbu Chube gai ulia ene Abraham chegu no trate Chube gwage, Abraham giti kwian israelita chudalla chegu Chube alin. E ulita gli kare, Abraham glichuga dbige no kare, Abraham chudalla israelita ulita glinanga no kare. Abraham kwian no, ama mo ta gbu Chube gai ulia no, ene kaire ama chudalla israelita ulita mo ta gbadale Chube gai ulia Abraham Chube gau ulia kare.  
\v 17 Agwa Abraham chudalla israelita gweale me Chube gau ulia, Chube kwian israelita ene chugu ngwadi sugekare, gire Chube ba kwian me israelita gau gbu israelita tanege mo alin. E salengwli kwian gli mananga glinanga me no me gbachie tkenga mlienga kare, gire kwian gli mananga glinanga chudea na gai gbe glinanga tkunga taneage, ene gli chege gdaitre alin. Chube agedu ene ba alin, ba kwian na chudalla me gaba mo alin, Chube ba gau mo alin ene ba chegu Chubenu.  
\v 18 Chube ba gau kwian israelita taneage mo alin, ba me tañachugadale mo giti ba ma no kwian israelitage ba Chube gau ulia giti, ba tañachuge ba ma no kwian israelitage ba Chube gau ulia giti ba tachkedale e me ba enusuliannu giti ba Chubenu, kwian israelita enusulian giti ba Chubenu. E salengwli glinanga tkabanga taneage glinanga chudea na jo gbaba gli ege, glinanga chudea na e me ma no glinanga jo tkabangage, me ñage suge glinanga e ulita me kle gli ulita gbe tige, glichuga dbige giti kle gli ulita gbe tige.  
\v 19 Ba gweale tañachuge mo tale mo giti: “Cha ma no kwian israelitage, malen Chube kwian israelita chugu ngwadi sugekare gire Chube cha gau mo alin israelita tanege.”  
\v 20 Ba kle tañachuge ene ba me kle tañachuge no, Chube kwian israelita chugu ngwadi sugekare glinanga tkabanga mliabanga kare kwian israelita me mo ta gbu Chube ole Chube gai ulia giti. Ba mo ta gbu Chube gai ulia, e alin giti Chube ba gau mo alin, e me gerule ba kwian no age no giti, me ene, Chube ba gau ba mo ta gbu ama ole gai ulia giti. Ba me ñage tañachuge mo gai dage mo giti kwian israelitage, ma no ba mo ta gbe chage ta giti Chube ole Chube gai ulia diali.  
\v 21 Chube kwian israelita chudalla ulita gaba mo alin, kwian e me mo ta gbu Chube ole Chube gai ulia, e giti Chube kwian e chugu ngwadi sugekare, ene kaire ba kwian na chudalla Chube me gaba ngeru mo alin, ba me mo ta gbe ama gai ulia diali Chube be ba chuge ngwadi sugekare ma blike ama kwian israelita chugu ngwadige.  
\v 22 Suge bage Chube no kwian ulita ole, agwa kaire Chube me no age me no ole, Chube takalin kwian mo ta dbadale ama gai ulia ama gai dage diali. Kwian israelita me agedu ene, malen Chube ama chugu ngwadi sugekare. Agwa ba kwian me israelita mo ta gbu Chube ole ama gai ulia, e giti Chube agedu no ba kwian me israelita alin, ba mo ta gbadale chage no ama ole diali age ama takalin kare, ene ama be age no ba alin diali, agwa ba mo ta gbe chage nganake sugekare amage ama be ba chuge ngwadi sugekare ama kwian israelita chugu ngwadi kare.  
\v 23 Kwian israelita me Chube gau ulia, agwa ama ulita bai kaire mo ta bliteni Chube ole Chube gai ulia, Chube be kwian ene gai ngwangeni naskuni mo alin, ama Chube, ama ñage age ene.  
\v 24 Ba me kwian israelita chudalla, Chube ba gau mo alin gbu kwian israelita me Chube gau tanege salengwli gli mananga glinanga chudea na gbe glinanga na tkabanga taneage kare, Chube agedu ene ba kwian me israelita alin, kaire me mno Chube alin kwian amanu ama nu chugaba ngwadi sugekare gai naskuni mo alin, ene Chube age kwian israelita ole kwian israelita bai kaire mo ta gbe no naskuni Chube ole. 
\p  
\v 25 Cha daballa cha ibotea Jesucristo giti, cha takalin Chube mo ta gbabage unsuialin chkedale uñale trate bage nege, ene ba me ñage tañachuge mo giti ba ma no kwian israelitage malen Chube ba gau, me ene, kwian israelita me Chube gau ulia giti Chube kwian israelita chugu ngwadi sugeti, ene geru ulia amanu Jesucristo giti ñadu chke ba kwian me israelita ulitaske. Kwian me israelita ulita bai kaire be geru Jesucristo giti gai ulia,  
\v 26-27 kwian ene geru gai ulia gire Chube be kwian israelita gaini naskuni, ene geru Jesucristo giti be joge naskuni kwian israelitaske, ene kwian israelita be ñage mo ta blite Jesucristo gai ulia mo jwanngale siere, Chube mo ta gbu ene unsuialin kwian israelita alin, Chube gerua degaba unsuialin gerule e giti, chada e gerule: 
\q1 “Chube gerudu unsuialin kwian israelita enusulian ole: ‘Cha be kwian jwannga siere gdaite kage kwian israelita alin, ama giti cha be kwian israelita jwen siere ji chugege age me no gdale. 
\q1 Kwian jwannga siere e be chie kwian israelita chudallaske, ama be kwian israelita ta gbe joge siere kle age me noge.’ ” 
\m Chube gerua degaba unsuialin gerule ene. 
\p  
\v 28 Kwian israelita me geru Jesucristo giti gau ulia, e giti ama Chube dollale, e giti Chube mo ta gbu no ba kwian me israelita ole, ene geru Jesucristo giti chku ba kwian me israelitaske ene ba ñage geru e gai ulia. E me gerule Chube mo ta blitu me no kwian israelita chudalla ole, me ene, unsuialin Chube israelita enusulian gau mo alin, e giti Chube no kwian israelita chudalla ulita ole.  
\v 29 Unsuialin Chube gerudu kwian israelita enusulian ole: “Cha ba oindalla ulita gau mo alin, ba kwian chanu, cha be age no ba alin kaire ba oindalla ulita alin.” Chube gerudu ene, Chube age ulita ama gerudu kare, Chube me mo ta blite ama gerule kare.  
\v 30 Ngeru ba kwian me israelita bebi Chube uñe gire ba ulita me Chube gau dage me agedu Chube tadukalin kare, agwa nege kwian israelita mo ta blitu me Chube gai dage salengwli ba kledu age ngeru kare. Kwian israelita me kle Chube gai dage giti Chube mo ta gbu no ba kwian me israelita ulita ole Chube taidu dage ba ulitage, Chube ba ta gbu ama gai ulia.  
\v 31 Nege kwian israelita me kle Chube gai dage me kle age Chube takalin kare salengwli ba kledu age ngeru kare, ba ene gire Chube taidu dage bage Chube ba ta gbu ama gai ulia, ene kaire Chube be tai dage kwian israelitage, Chube be kwian israelita ta gbe Chube gai naskuni Chube taidu dage ba kwian me israelitage kare.  
\v 32 Kwian ulita israelita me israelita chagedu age me no Chube dollale me Chube gau ulia, e giti ama ulita chegu jiske Chube gwage, ama agali me ñadu mo ta gbe trate Chube gwage. Kwian ulita ene, Chube tai dage ama ulitage israelita me israelita. 
\p  
\v 33 Chube agedu tanre no kwian agenga me no alin, kwian me ama gau ulia agwa Chube taidu dage amage, ni kwian gdaitege suge mineade Chube mo ta gbu no ene kwian agenga me no ole. Ulia Chube no no, ama ta ngle molen, ulita uñale amage, ni kwian gdaitege suge Chube talla mine ulita, ni kwian gdaite ñage Chube talla ulita trage, Chube age no ulita me suge ni kwian gdaitege.  
\v 34 Chube gerua degaba unsuialin gerule e giti, chada e gerule: 
\q1 “¿Chema che Chugagwalla Chube talla ulita uñe? ¿Chema ama ta gbe ama age giti? Ni kwian gdaite. 
\q1  
\v 35 ¿Chema lle gweale ketu Chubege ngeru, ene Chube lle ketadaleni kwiange gau ñanale? Chube me jiske ni kwian gdaitege lle giti.” 
\m Chube gerua degaba unsuialin gerule ene Chube giti.  
\v 36 Chube mo kirallaske kwian ulita lle ulita nga ulita dodadu, Chube kle e ulita gbe tige kle e ulita manade, Chube e ulita dodadu mo alin. Chube no no, ama alin kweri, ama alin ñage age kwian alin no, ama alin giti kwian gerudale nobi diali chui tangle, enebi no ama alin. 
\c 12  
\s1 Kwian Chubenu mo ta gbadale chege sugekare age 
\s1 me no ulitage mo ta gbe chage Chube takalin kare 
\p  
\v 1 Cha daballa cha ibotea Jesucristo giti, ba ulita Chubenu, Chube taidu dage bage agedu tanre no ba alin Jesucristo giti, malen cha gerule ba ole ba ulita agali mo ta gbadale lle boi no ulita Chube alin, ba mo ta gbadale joge siere age me no ulitage mo ta gbe Chube alinge lle boi no ama alin ama takalin kare. Age ene, Chube gwage ba kle age no ulia ama alin ama takalin kare.  
\v 2 Ba ulita Chube uñe me toidale dare ba toidu ngeru kare kwian me Chube uñe kle toi kare, ma no ba mo ta gbadale tañachuge diali nganake Chube takalin kare, ene ba be toi Chube takalin kare, ene kaire be suge trate bage Chube takalin mine, ene ba ñage age no ama alin ulita no trate ama takalin kare ama gwage. 
\p  
\v 3 Chube mo ta gbu no cha ole, ama cha gbu ama gerua ketangale. Cha gerule ba ulita ole, ba gweale me ñage tañachuge mo tale mo giti: “Cha ma no daba nage, cha kle lle boi Chube alin ma no daba na ulitage.” Me no tañachuge ene mo giti, agwa ma no gdaite gdaite tañachuge trate mo kaire kaire Chube ba ta gbu kare ba mo ta gbu Chube gai kare, ba gdaite gdaite mo kaire kaire tachkedale lle boi no Chube alin, gweale lle ma kweri boi, gweale lle soli boi Chube ba ta gbe lle boi kare, Chube ba ta gbe mo kaire kaire lle boi ama alin ama takalin kare.  
\v 4 Che tañachuge mo jegwale giti, che jegwale mo jegwale tanre molen, che jegwale ulita me ñage age che ko kare che sera kare, agwa jegwale ulita kle no ule gdaitre alin.  
\v 5 Ene kaire che ulita Chube gaba ulia, che ngle Cristonu, agwa Cristo giti che ulita mo kaire kaire kle ule kwaitre alin kwian jegwale ulita kle ule gdaitre alin kare.  
\v 6 Chube ta ketu che ulita gdaite gdaitege lle kaire kaire boadale ama alin ama takalin kare, che mo ta gbadale lle boi no ama alin ama ta ketu chege kare. Chube ta kete che gwealege ama gerua kete daba nage che Chube gerua ketadale no trate daba nage, che mo ta gbe Chube gai kare che gerudale ta ene giti daba na ole.  
\v 7 Chube ta kete che gwealege daba na chudaboi che mo ta gbadale daba na chudaboi no. Chube ta kete che gwealege daba na tke tangle Chube geruage che mo ta gbadale daba na tke tangle no.  
\v 8 Chube ta kete che gwealege daba na ta gbe suge chage no Chube takalin kare che mo ta gbadale no diali daba na ta gbe suge chage no Chube takalin kare. Chube ta kete che gwealege lle gweale monu kete daba nage chudaboagda che mo ta gbadale lle kete ta no ole dabage. Chube ta kete che gwealege lle boi daba Chubenu chugagwallale che mo ta gbadale lle boi ulita no ta giti. Chube ta kete che gwealege ta gbe suge daba na giti daba oga daba me lle molen daba ta olire che mo ta gbadale daba ene ulita chudaboi daba kira gbe nga suga no ole ta no giti. Che ulita mo ta gbadale lle boi no Chube alin Chube ta kete chege kare lle boi. 
\p  
\v 9 Ba me gerule alin ba no daba na ole, ba mo ta dbadale ulia no daba na ulita ole. Ba jogedale siere me no ulitage mo ta gbadale chege age no diali.  
\v 10 Ba mo ta dbadale no modi mo daballanu kare daba ulita ole. Ba daba na gadale dage ma kweri moge salengwli ulita. 
\p  
\v 11 Ba mo kira gbadale lle boi no diali me mo ta dbe kianchie sidri lle boi mo Chugagwalla Jesucristo alin. 
\p  
\v 12 Chui be chke gire Jesucristo be ba dbe ule ama ole toi ama kle ngwadi diali chui tangle, ba mo ta dbadale nga suga no ole e giti chui e manade ngwange. Ba mo ta gbadale jage boi daga ngwalege. Ba gerudale Chube ole diali. 
\p  
\v 13 Daba gweale me lle molen toigda no, ba daba ene Chubenu chudaboadale lle monu girabate ama ole ene ama ñage lle molen toigda. Ba daba na gadale ngwange no ba ullage. 
\p  
\v 14 Ba Jesucristo gerua gai ulia giti kwian age me no ba dollale, ba gerudale no kwian ene giti Chube ole me ama oña boi daga ngwale. 
\p  
\v 15 Ba sugedale daba na kle ta suge kare, ama kle nga suga no ole ba mo ta gbadale nga suga no ole ule ama ole, daba na kle ta olire boi daga ngwale giti ba mo ta gbadale ta olire ule ama ole. 
\p  
\v 16 Ba mo ta gbadale tañachuge salengwli daba na ulita ole kwian gdaitre alin kare. Ba me tañachugadale mo giti mo tale: “Cha kwian no, cha kwian kweri, cha ta suge ma ngle daba nage malen cha me ñage mo ta gbe ule daba na ole daba me kweri daba me ta molen cha kare ole.” Me no tañachuge ene, ma no mo ta gbe ule daba na ulita ole me tañachuge mo giti ma no daba nage. 
\p  
\v 17 Daba na age me no ba ole ba me agedale me no ama ole ama age kare, ma no ba age no ulita kwian ulita gwa giti, kwian kle age no ba ole kwian kle age me no ba ole ba mo ta gbadale age no diali.  
\v 18 Ba me mo ta gbadale kira bate ni daba gdaite ole, agwa ba mo ta gbadale toi no taingwli daba na ulita ole ta no giti.  
\v 19 Cha daballa cha ibotea Jesucristo giti, cha no ba ulita ole, cha gerule ba ole ba ulita agali me daba gbadale ji chuge daba age gweale me no ba dollale giti, ma no kwian ene jige Chube kote Chube kwian ene gbe ji chuge, Chube gerua degaba unsuialin gerule e giti, chada e gerule: 
\q1 “Cha alin allabi ñage ji gbe trate kwian agenga me no alin, cha be age kwian ene ole, kwian ene chege cha kote gbale ji chuge.” 
\m  
\v 20 Kaire Chube gerua degaba unsuialin gerule: 
\q1 “Bage suge kwian agenga ba dollale bli ole ba taidale dage amage ba ama ulladale, kwian ene siechie ba chi ketadale amage jadale, ba mo ta dbadale age no kwian agenga ba dollale ole, ene ba dolla be ibule tanre mo giti ba ngeru ba kle age no giti ama alin.” 
\m Chube gerua degaba unsuialin gerule ene.  
\v 21 Ba me mo ta gbadale mo ta chuge ngwadi mo tke dole kwian bai kle age ba dollale ole, agwa ma no ba mo ta gbadale age no ulita kwian bai kaire kle age me no ba ole, ba agedale no diali mo dollale alin. 
\c 13  
\p  
\v 1 Kwian chugagwalla nga dba ai giti, Chube ama ulita chuge ngwadi chege kwian chugagwallale, ni kwian gdaite mo gbu kwian chugagwallale gballa, Chube kle kwian chuge ngwadi chege kwian na ulita chugagwallale. Ulia Chube kwian chugagwalla e ulita chuge ngwadi chege malen ba mo chugagwalla ulita nga dba ai giti gadale dage age ama gerule kare.  
\v 2 Kwian mo ta gbe mo chugagwalla nga dba ai giti dollale me mo chugagwalla gai dage me age chugagwalla gerule kare, kwian ene me kle age mo chugagwalla nga dba ai giti alin dollale, kle age Chube dollale, Chube kwian chugagwalla e ulita chuge ngwadi chege, kwian bai kaire me mo chugagwalla nga dba ai giti gai dage, kwian ene be ji chuge age ene giti.  
\v 3 Chugagwalla ulita nga dba ai giti kwian kaganga, kwian age no ama me kwachie chugagwalla ngeru, chugagwalla me kwian ene gbe jiske. Agwa kwian me age no ama kwachie chugagwalla ngeru, chugagwalla kwian ene gbe jiske, kwian ene kwachie chugagwalla ngeru. Ba toikalin no me kwachie chugagwalla nga dba ai giti ngeru ba mo ta gbadale toi no chugagwalla gerua gai dage me age me no chugagwalla dollale, ene chugagwalla me ba chugedi,  
\v 4 Chube ama gbu ba chudaboangale, ene suge bage ba toidale age no. Agwa ba mo ta gbe toi me no age me no, age ene giti ba mo ta gbale kwachie chugagwalla ngeru ba agedu giti, me ngwale dale chugagwalla kle, Chube ama gbu kwian agenga me no ulita gbangale ji chuge kwian age me no gdale.  
\v 5 Ba ulita mo chugagwalla nga dba ai giti gadale dage ta boke giti: Gdaite, ba chugagwalla gai dage, ene ama me age ba ole me ba gbe jiske. Na, bage sugedale ama ba chugagwalla, ba ama gadale dage nga dba ai giti.  
\v 6 Chube kwian chugagwalla gbu ba alin nga dba ai giti, chugagwalla e kle ba kage kle ba chudaboi, ba agedale chugagwalla gerule kare, ama ba chugagwalla malen lle gweale giti chugagwalla geru gbe ba igi ketadale, ba igi ketadale lle giti chugagwalla gerule kare.  
\v 7 Chugagwalla igi kade mangire batre ba igi ketadale, ba mo chugagwalla ulita gadale dage mo chugagwallale, ama ba chugagwalla malen ba agedale ene chugagwalla kaire kaire alin. 
\p  
\v 8 Ba me chegedale jiske ni daba gdaitege lle gweale giti. Ba ulita mo ta gbadale ta dbe no diali daba na ulita ole, ba ulita bai kaire kle mo ta dbe no ene daba na ole ba kle age no ulita Moisés nu Chube gerua degaba unsuialin gerule kare,  
\v 9-10 chada e gerule: 
\q1 “Ba onbre mo jwanba me mo chuge ke giti muinga na ole, ba muinga mo jwanba me mo chuge ke giti onbre na ole. 
\q1 Ba me daba na gweda. 
\q1 Ba me skwe boi daba ngeru. 
\q1 Ba me tañachuge lle dabanu giti mo alin.” 
\m Chube geru gbu ene, kaire Chube geru na tanre gbu kwian alin, geru e ulita no, agwa geru gbaite gerule ma no ma kweri kwian ulita alin geru na gbaba ulitage, geru e gerule: 
\q1 “Ba mo ta dbadale no daba na ulita ole salengwli ba no mo ole naskuni kare.” 
\m Chube geru gbu ene kwian ulita alin. Ba age geru e gbaite gerule kare, ba mo ta dbe no ulia daba na ole ba mi age ni sidri me no ama ole, malen che ña gerule kwian bai kaire mo ta dbe no ulia daba na ole kle age Chube nu geru gbaba ulita gerule kare.  
\v 11 Ba ulita mo ta gbadale ta dbe no ene daba na ulita ole, uñale bage chui kle kodi gire Jesucristo be chieni che kwian amanu dbadale ama kle ngwadi, ba me kledale alenske me tañachuge mo giti kwian kle gbe kare, ba ulita mo ta gbadale chage no trate Chube takalin kare Jesucristo chieni manade ngwange, Jesucristo chieni chuia kle ma kodi ba Jesucristo gau chuiage.  
\v 12 Age me no tanre kle nga dba ai giti, agwa chui be chke gire Jesucristo be chieni che jwanle siere age me no ulitage che dbale toi ama ole nga ngaña giti, chui e kle kodi malen che mo ta gbadale siere age me noge chage no Jesucristo chagedu kare nga dba ai giti, ene che kle biale trate Jesucristo alin Jesucristo chieni chuiage. Che kledale biale Jesucristo chieni ngwange salengwli guardia donga kle mo gbe biale ama dolla ngwange kare.  
\v 13 Che mo ta gbadale chage no trate diali Chube takalin kare kwian ulita gwa giti, che me chagedale ai kare: Che me chagedale llale lle gage kote. Che me nga olladale lle gage giti. Me no muinga onbre mo chuge ke giti mo ta gbe diali chege age me no ene. Me no mo ta gbe chage kira bate daba na ole. Me no tañachuge lle dabanuge mo alin.  
\v 14 Che me chagedale age me no ene, agwa ma no che ulita mo ta gbe chege sugekare age me no ulitage chage no che Chugagwalla Jesucristo chagedu kare kwianske nga dba ai giti, che ulita tale che talla me no kle, che me mo chugadale ngwadi age me no che ta agekalin kare. 
\c 14  
\s1 Me no gerule modi ongoru ongoru kle age giti, 
\s1 ma no mo chudaboi modi 
\p  
\v 1 Kwian Chubenu gweale me Chube gerua uñe trate, me uñale trate amage bai no age bai me no age Chube gwage, ba geru uñe ma gití dare daba enege, daba e me geru uñe ene, daba ene ole ba me ka boi daba kle tañachuge kare, ma no ba ama gai ngwange no ta no ole ba daba ene chudaboale mo daballanu kare.  
\v 2 Kwian Chubenu gweale tañachuge lle ulita no gutadale, agwa kwian Chubenu gweale nage me suge ene trate, ama me Chube gerua uñe trate, ama tañachuge me no samla gute, amage suge ama samla gute ama kle age me no Chube dollale, malen ama mo ta gbe bligda me samla ni sidri ole gute.  
\v 3 Kwian bai kaire samla gute me ñage gerule daba nadi daba me samla gute giti, ene kaire kwian bai kaire me samla gute me ñage gerule daba nadi daba samla gute giti. Me no gerule dabadi ongoru ongoru blire giti, sugedale ba ulitage ba ulita Chubenu, Chube ba ulita gau mo alin, ba ulita salengwli Chube gwage.  
\v 4 Jesucristo ba ulita Chubenu Chugagwalla, ba ulita kwian salengwli malen ni ba gdaite gerudale me no daba na Chubenudi daba kle samla gute giti o daba me kle samla ene gute giti. Che salengwli me ñage gerule dabadi chugagwalla kare, daba kle age no kle age me no giti Chugagwalla Jesucristoge alin allabi uñale, Jesucristo kira molen kwian ta gbe age no mo gwage. 
\p  
\v 5 Kaire kwian na gweale tañachuge chui giti chui gweale ma no chui nage mo litangwa gerule Chube ole, kwian na tañachuge chui ulita salengwli no mo litangwa gerule Chube ole, kwian ene ulita kle gerule dabadi ongoru ongoru chui giti. Ma no kwian ulita gdaite gdaite mo kaire kaire mo ta gbe suge chui bai no mo litangwa gerule Chube ole, mo kaire kaire ñage age tañachuge kare.  
\v 6 Kwian gwealege suge trate Chube takalin ama chui gweale gai ma no chui nage mo litangwa gerule Chube ole, kwian e chui gweale ene gai gerungwa no Chube giti kwian ene kle Chube gai dage kle age Chube takalin kare mo alin. Ene kaire kwian nage suge trate chui ulita no salengwli Chube gwage mo litangwa gerule Chube ole, kwian e chui ulita gai salengwli gerungwa no Chube giti kwian ene kle Chube gai dage kle age Chube takalin kare mo alin. Kwian gwealege suge trate Chube lle ulita ketu amage gutadale, agwa kwian nage suge lle gweale me no ama alin gutadale, kwian ene ulita blire ama gerule no Chube ole bligda bai ama kle gute giti, kwian e ulita kle Chube gai dage kle age Chube takalin kare. 
\p  
\v 7-8 Che ulita Chubenu me ñage toi mo alin che takalin kare, che mo ta gbadale toi Chube takalin kare diali, che ulita kle toi Chube giti, Chube kle che manade toi gwade, Chube takalin gire che be jogeda, che me ñage chui gbe mo alin toi gwade chui gbe mo alin jogeda. Cristo che Chugagwalla, che kle toi nga dba ai giti che mo ta gbadale toi age che Chugagwalla Cristo takalin kare diali, kaire che me talladale jogeda giti, che Chugagwalla takalin gire che be jogeda, ama me takalin gire che mi jogeda, che toi gwade kaire che jogeda che mo Chugagwalla Cristonu diali.  
\v 9 Cristo jokeda gire chkuni gwade, malen ama chegu kwian gwade kaire kwian jogeda oña Chugagwallale, che me tañachugale mo giti, ma no che tañachugale ai kare: Che toi gwade che Cristonu ama che Chugagwalla, che jogeda che Cristonu ama jogeda oña Chugagwalla.  
\v 10 Cristo che Chugagwalla, ama alin gerule trate ulia kwian kle age giti bai no bai me no, ¿mineade ba kle gerule daba nadi daba kle age giti? ¿Mineade ba kle mo ta dbe me no daba ene ole? Che salengwli me ñage gerule dabadi chugagwalla kare. Chui bdaglige che ulita be kle Chube ngwadi Chube gwa giti ama be gerule che ole che agedu giti ulita nga dba ai giti.  
\v 11 Chube gerua degaba unsuialin gerule chui bdagli giti, chada e gerule: 
\q1 “Chugagwalla gerudu: ‘Cha gerule ulia ulia chui be chke gire kwian ulitage be suge cha kweri cha ama Chugagwalla, gire kwian be joge chke dba jongnagwa giti cha ngeru be gerule no cha ole: Ulia ba no ba kweri ba kwian ulita Chugagwalla.’ ” 
\m Chube gerua degaba unsuialin gerule ene.  
\v 12 Cha gerule ulia ba ulita ole, bdagli che ulita be kle Chube gwa giti gerule Chube ole che ulita mo kaire kaire be gerule mo giti che agedu giti nga dba ai giti.  
\v 13 Bdagli che agali mo kaire kaire be gerule Chube ole mo giti che agedu giti, malen nege che me chagedale gerule dare ongoru ongoru modi kle age giti, ma no ba mo ta gbadale daba na ulita chudaboi, ba chagedale age ta giti daba na gwage, ba age gweale giti ñage suge daba nage e me trate ama alin, daba gwage badi age ene ama ñage joge siere geru uliage ba kle age giti, malen ba mo ta gbadale age trate daba na gwa giti.  
\v 14 Cha che Chugagwalla Jesu gaba ulia, chage mo tale suge trate trate bligda ulita no cha alin gutadale, chage suge ni bligda gdaite me no cha alin gute Chube gwa giti. Agwa daba gweale Chubenuge suge mo tale bligda gweale me no ama alin gutadale, suge amage ene agwa ama bligda e gute ama kle age me no Chube dollale, ulia daba e alin e me no gutadale.  
\v 15 Ba bligda gweale gute daba na gwage, daba e alin bligda e me no gutadale, suge amage ama bligda e gute gire ama kle age me no Chube dollale. Bligda e gute giti daba na ta me chege no, uñale bage daba na alin me no agwa ba lle ene gute dare daba gwage, ba age ene diali, amage suge ba me kle mo ta dbe no ama ole. Daba e Cristonu, Cristo jokeda ama alin, me no daba ene ta gbe siere Cristoge ba kle blire giti daba me kle blire kare.  
\v 16 Suge bage age gweale no ba alin agwa uñale bage daba nage suge me no age ene, ba me agedale daba gwa giti, ene daba me gerule me no ba giti ba kle age giti.  
\v 17 Me no tañachuge kwian Chubenu ulita bligda salengwli gutadale lle amaña jai, ene kwian Chubenu, ene Chube ama Chugagwalla. Me ene, me no tañachuge lle e kare giti, ma no mo tale mo ta gbe chage no trate Chube takalin kare, mo ta gbe toi trate daba na ulita ole, mo ta gbe toi nga suga no ole Chube Oña ba ta gbe kare.  
\v 18 Ba ulita bai kaire mo ta gbe no ene lle boi Cristo alin ta no ene ole kle age no Chube gwage, nga suga no Chubedi ba kle age giti, kaire kwian na be gwage badi ba kle age no.  
\v 19 Ma no che ulita Chubenu mo ta gbadale age no daba ulita ole, ta ene giti che ulita ñage mo chudaboi ongoru ongoru salengwli ta gbe suge ma ngle geru Cristo gitige, ene che ulita ta chege ule kwaitre alin.  
\v 20 Daba na me lle gute ulita, ama tañachuge lle gweale me no ama alin gutadale agwa bage suge lle ene no gutadale, ba me daba ene ta gbe joge siere geru Cristo gitige me blire salengwli giti, daba e Chubenu, bedre bedre Chube kle ama ta gbe suge ma trate agwa daba bebi geru ulita uñe trate, me no daba ene ta gbe joge siere geruge ba kle blire giti, ba tachkedale daba na giti ba kle lle ulita gute giti, ulia lle ulita no gutadale agwa bage suge daba me no lle ene ole ma no me lle ene gute daba bai me kle lle gute gwa giti.  
\v 21 Daba gweale Chubenuge suge mo tale Chube me takalin ama bligda gweale gute, suge amage Chube me takalin ama lle gage jai, suge amage Chube me takalin ama age gwealege, uñale bage daba ta suge ene ba ta chkedale daba e giti ba mo ta gbadale me bligda e gute me lle gage jai, ba mo ta gbadale me age gweale daba ta suge dollale, ene ba me kle daba ta gbe joge siere geruge me kle daba ta gbe age me no ama ta suge dollale.  
\v 22 Bage suge trate mo tale lle ulita no ba alin gutadale, ba ta suge ba ñage lle ulita gute Chube gwa giti, agwa ba ta suge ene manadale mo alin Chube gwa giti me gerule daba na me lle ulita gute ole: “Ba me kle tañachuge trate, uñale chage Chube gwa giti lle ulita no che alin gutadale.” Ba me gerudale ene daba ole, ma no ba mo ta gbadale age no daba ene ole me lle gweale gute daba ta suge dollale, ene nga be suga no badi, be suge trate bage mo tale ba agedu no Chube gwage daba na alin.  
\v 23 Kwian Chubenu gwealege me suge trate mo tale Chube gwa giti ama ñage lle gweale gute o me lle gweale gute, ma no me gute, kwian ta suge ene ma no me gute, kwian lle gute ta ene ole me kle lle gute Chube talla giti. Me lle gute Chube talla giti, ta ene me no Chube gwage. Kwian me age ulita Chube talla giti, kwian ene kle age me no mo ole Chube gwage. 
\c 15  
\p  
\v 1 Che ulita Chubenu bai kaire Chube gerua uñe ma trate gití dare daba Chubenu nage, daba na me geru uñe taneke geru uliage, che geru uñe ma trate daba na me geru uñe tanekege, che mo ta gbadale daba ene chudaboi no no, che me tañachugadale mo giti age che ta agekalin kare, ma no diali che tañachugadale daba me geru uñe taneke giti age no daba ene alin me age gweale daba ene gwa giti daba ta gbe joge siere geru uliage.  
\v 2 Che ulita mo ta gbadale age no daba na me geru uñe taneke alin me tañachuge mo giti che ta agekalin mine mo alin, ene che giti geru ulia ñage suge ma trate dabage, ene daba ñage mo ta gbe ma no diali geru uliage.  
\v 3 Ba ulita mo ta gbadale suge Cristo giti Cristo agedu mine nga dba ai giti kwianske, Cristo mo ta gbu age kwian ulita alin Chube takalin kare, Cristo me tañachugu mo giti age no mo alin, agwa kwian ulita me agedu no Cristo ole, kwian Chube dollale agedu me no tanre Cristo ole, Cristo gerudu e giti Chube ole, Cristo gerua e jo degaba unsuialin, chada e gerule: 
\q1 “Kwian gerudu me no badi ba dollale, kwian ene agedu me no cha ole kaire.” 
\m  
\v 4 Ulita Chube gerudu unsuialin Chube gerua e jo degaba che alin, ene che geru e jwen, e giti che tachke Chube takalin mine che ulita alin, kaire geru e giti suge chege chui be chke gire che be joge siere boi daga ngwale ulitage che be toi ule Cristo ole diali chui tangle, geru e che ta gbe kiraske nga suga no ole, ene che boi daga ngwale che ñage jage che me joge siere Cristoge.  
\v 5 Chube agali che ta gbe jage boi daga ngwaleske, ene che me joge siere Cristoge boi daga ngwale giti, kaire Chube che ta gbe kiraske nga suga no ole, cha takalin ama age ene ba ulita alin, kaire cha takalin ama ba ulita ta gbe toi no no modi daba ole, ba ulita mo ta dbadale no ene daba na ulita ole Cristo agedu kare, Cristo kledu nga dba ai giti ama mo ta du no kwian ulita ole, ene kaire ba ulita mo ta dbadale no kwian ulita ole.  
\v 6 Ba ulita mo ta dbe no modi ene ba ulita ta kle ule gerule no no Chube che Chugagwalla Jesucristo Ñenua agedu giti. 
\p  
\v 7 Ba ulita mo ta gbadale no daba ole daba gai ngwange no ta no ole mo daballanu kare modi salengwli Cristo mo ta dbe no ba ulita ole kare, Cristo no ba ulita ole, Cristo ba ulita gau mo alin ene ba ulita ñage gerule no no Chube giti.  
\v 8 Cha gerule ba ole trate Cristo giti, Cristo chiu nga dba ai giti agedale cha kwian israelita ulita alin agedale ulita Chube gerudu kare unsuialin, unsuialin Chube gerudu cha enusulian ole ama be kwian jwannga siere kage kwian israelita ulita alin, Cristo chku, Cristo agedu ulita Chube gerudu kare unsuialin, e giti suge chege Chube gerule ulia ama age ulita ama gerule kare.  
\v 9 Cristo chiu nga dba ai giti cha kwian israelita ulita alin kaire kwian me israelita ulita alin, ene Cristo giti kwian me israelitage suge Chube no ama ole, ene Cristo giti kwian me israelita ulita gerule no Chube ole Chube taidu dage amage giti. Unsuialin Chube David ta gbu chada dege Cristo be gerule no Chube giti ule kwian me israelita ole, chada e gerule: 
\q1 “Cha be gerule no no ba giti ule kwian me israelita ole, cha be mo gate no ba giti.” 
\m  
\v 10 Kaire Moisés nu Chube gerua degaba, chada e gerule: 
\q1 “Kwian me israelita mo ta gbadale nga suga no ole gerule no ule kwian israelita ole Chube giti.” 
\m  
\v 11 David nu Chube gerua degaba unsuialin, chada e gerule: 
\q1 “Kwian israelita chudalla kwian me israelita chudalla nga ulitage gerudale no no Chugagwalla Chube giti, kaire mo gatadale no no ama giti.” 
\m Chube gerua degaba unsuialin gerule ene.  
\v 12 Chube kwian jwannga siere kagu kwian israelita alin agwa kaire kwian me israelita alin, Chube kwian jwannga siere kagu, Isaías nu Chube gerua degaba unsuialin gerule e giti, chada e gerule: 
\q1 “Isaí oindalla giti kwian jwannga siere gdaite be chie, ama be chege kwian me israelita Chugagwalla, ama giti kwian me israelita be ñage Chube uñe be Chube gai mo jwanngale siere.” 
\m  
\v 13 Isaías Chube gerua degu ene unsuialin Cristo giti, Chube kwian jwannga siere Cristo kagu nga dba ai giti kwian alin, ba ulita Cristo gau ulia mo jwanngale siere, cha takalin Chube ba ulita ta gbe nga suga no ole diali e giti, kaire Chube ba ulita ta gbe no modi daba bai ulita nu mo ta gbaba Cristo gai ole. Cha takalin Chube mo Oña kiralla giti ba ulita ta gbe tachke diali ma ngle ba jwannga siere giti, ene diali ba be chege chui manade nga suga no ole, chui ege ba jwannga siere be ba gbe siere boi daga ngwale ulitage. 
\s1 Pablo geru Jesucristo giti dbanga kwian me israelitaske 
\p  
\v 14 Cha daballa cha ibotea Jesucristo giti, uñale chage trate ba giti ba ulita kle mo ta gbe age no modi ulita daba alin, ba geru ulia uñe trate, uñale bage trate ba chagedale mine Chube takalin kare, ba ñage tachke ngle daba tke tangle modi ongoru ongoru chage no Chube takalin kare.  
\v 15-16 Uñale chage trate ba giti ba kwian ene, agwa cha kle chada ai dege trate ulia ba alin ba ulita ta gbadale tachke e giti, ene ba me ta jogenga ba mo ta gbadale chage ene diali gwangerugu. Cha kle chada ai dege ene ba alin Chube cha ta gbu kare, Chube agedu no cha alin, ama cha gau cha gbu lle boangale Jesucristo alin kwian me israelitaske, Jesucristo kwian jwannga siere ji chugege kwian age me no gdale, Chube cha gbu geru ene Jesucristo giti trage kwian me israelitaske, ene cha giti kwian me israelita Jesucristo gai ulia mo jwanngale siere ji chugege age me no gdale, Chube Oña kwian ene ta lite kwian ene ta gbe trate Chube alin, chui bdaglige kwian ene be kle ule cha ole toi nga ngaña giti Chube gwa giti Chube kle ngwadi, nga be suga no Chubedi kwian be kle ule cha ole giti. 
\p  
\v 17 Cha Jesucristo gau ulia giti nga suga no chadi lle boi no Chube alin kwianske.  
\v 18 Cha tale suge cha me ñage gerule kwian na agedu Cristo kare cha alin giti, Cristo agedu no cha alin agali, ama cha gbu geru ama giti dbe kwian me israelitage ene chke uñale kwian me israelitage kwian me israelita Chube gai dage Chube gai ulia Cristo giti. Cha geru Cristonu tragu giti kwian me israelita tanre Chube gau ulia. Cha geru Cristo giti ketu kwian me israelitage, cha agedu no kwian gwa giti,  
\v 19 kaire cha lle daga ngwale no tanre dodadu Chube Oña kiralla giti kwian gwa giti. Cristo cha ta gbu geru ama giti dbe nga ulitage, cha geru Cristo giti du ngeru una Jerusalénge gire cha jo geru dbe nga na ulitage cha jo chke bdagli nga kweri Iliriage, ene cha giti kwian nga e ulitage geru Cristo giti keruchugu, ene chku uñale kwiange Cristo kwian jwannga siere ji chugege kwian age me no gdale.  
\v 20 Cha mo ta gbu ene geru Cristo giti dbe kwian nga ulitage baini kwian gdaite me geru Cristo giti keruchugaba ngeru baini kwian na geru dbanga bebi joge chke ngwadi, ene cha me kle geru dbe daba na nate.  
\v 21 Cha kle geru Cristo giti dbe gwangea kwian ni geru keruchugabage, ene cha geru dbe giti kle boi Chube gerua degaba unsuialin gerule kare, chada e gerule: 
\q1 “Kwian me geru keruchugaba ama giti ni bitaite, kwian ene be geru ama giti keruchuge, geru e be suge kwiange kwian be ama gai ulia.” 
\s1 Pablo mo ta gbe joge tienda kwian Chubenu 
\s1 una Romamudi 
\p  
\v 22 Cha chagedu tanre geru Jesucristo giti dbe kwian nga ulitage baini kwian me geru keruchugaba, kwian enege cha geru Jesucristo giti du, malen cha me ñadu joge tienda badi blike, cha mo oña gbu joge tienda badi sbali agwa e suiale lle tanre kledu cha alin boale Jesucristo alin.  
\v 23 Agwa nege cha geru Jesucristo giti du kwian ulitage nga aini cha kle ngwadige, lle na me cha alin boale Jesucristo alin aini cha kle ngwadi, malen nege cha kle tañachuge joge ulia ulia baske cha mo oña gbu sbali chura ngle joge kare.  
\v 24 Noare cha joge nga kweri na kada España ngnagu cha kle tañachuge joge badi jonle tangle una Romage, ene cha ñage gwage ba ulitadi. Cha ñage chege chuiete baske jendalenga geru Jesucristo gitidi, gire cha joge dare cha takalin ba cha chudaboi, ba gweale ñage cha gatedi joge dare nga España ngnagu.  
\v 25 Agwa nege cha be joge ngeru una Jerusalénge igi dbe kwian Chubenu gweale una ege alin.  
\v 26 Kwian Chubenu nga kweri Macedoniage nga kweri Acayage mo ta gbu ule daba me lle molen una Jerusalénge chudaboi, malen ama mo ta gbu ule igi lite ole daba Chubenu una Jerusalénmu gweale me lle molen alin.  
\v 27 Daba Chubenu nga kweri boke emu me israelita, noare ama mo ta gbu daba Chubenu israelita una Jerusalénmu chudaboi igi giti, kwian israelita giti geru Jesucristo giti chku uñale kwian me israelitage, ene kwian me israelita chegu Chubenu Jesucristo gai ulia giti, malen noare kwian Chubenu me israelita daba israelita bai Chubenu me lle molen chudaboadale no igi giti kwian israelita agedu no ama alin ñanale kare.  
\v 28 Cha joge una Jerusalénge, cha be daba Chubenu nga Macedoniamu daba Chubenu nga Acayamu igia kete daba Chubenu una Jerusalénge gire cha be joge tangle dare nga kweri España ngnagu cha be joge badi jonle tangle, cha be chege chuiete baske.  
\v 29 Uñale chage Cristo be age no cha alin kaire ba ulita alin cha kle baske gire. 
\p  
\v 30 Jesucristo che Chugagwalla kaire Chube Oña che ulita ta gbanga mo ta dbe no modi, che ta ene no molen modi, ta no ene giti cha takalin ba ulita cha daballa cha ibotea Jesucristonu mo ta gbe ule cha ole gerule Chube ole cha giti cha kle geru dbe giti kwianske, ene cha ñage geru dbe no kwianske.  
\v 31 Ba gerudale Chube ole cha be joge ngwadi nga kweri Judeage giti, ene Chube be cha manade kwian Jesucristo gerua dollale ngeru nga kweri Judeage, ene kwian geru dollale me ña age me no cha ole Jesucristo gerua dbe giti. Kaire ba gerudale Chube ole kwian Chubenu una Jerusalénge giti, ene daba Chubenu israelita una emu daba me israelita igia gai ngwange no.  
\v 32 Ba ulita gerudale ene Chube ole, ene Chube takalin cha me boi jonkare cha be ñage joge chke nga suga no ole baske, cha be chege chui gweale baske undege, ene no cha alin, ene cha ña chege ba ulita ole, ene che ñage kira gai modi geru giti.  
\v 33 Chube ta suga no mauña, diali cha gerule ama ole ba ulita giti cha takalin ama ta suga no ene kete ba ulitage ama ba chudaboi ama age no ba alin diali. Ene nobi. 
\c 16  
\s1 Pablo gbi kage chada giti daba Chubenu 
\s1 ulita una Romamu alin 
\p  
\v 1 Muinga kada Febe che ibotea Jesucristo giti, ama kwian Chubenu ulita chudaboanga una Cencreage, ama be joge chke baske.  
\v 2 Cha takalin ba ama gai ngwange no che Chugagwalla Jesucristo giti, ama no Jesucristo ole. Ba daba na nu Jesucristo gaba ulia gai ngwange no kare ba muinga ai gai ngwange no ta ene ole, ba ama chudaboi no ulita ama takalin kare, ama daba na chudaboanga tanre no, kaire ama cha chudabo tanre, ene ba ama chudaboale kaire. 
\p  
\v 3 Ba gbi kade cha alin onbre kada Aquilage kaire ama muiralla kada Priscage, ama boke cha chudaboanga no no lle boi Jesucristo alin,  
\v 4 ama biri jogeda cha giti age cha alin, malen cha gerule no no ama ole ama agedu giti cha alin, me cha alin gerule no ene ama ole, kaire daba Chubenu ulita me israelita gerule no ama ole, nga suga no daba me israelitadi Prisca giti Aquila giti ama agedu giti cha alin, ene cha giti Jesucristo gerua ñadu joge chke kwian me israelitaske. 
\p  
\v 5 Daba ulita Chubenu kle mo lite Jesucristo geruadi Prisca Aquila ullage, ba gbi kade cha alin ama ulitage. 
\p Ba gbi kade cha alin Epenetoge, ama cha skatemanalla no no, cha no no ama ole, ama kledu nga kweri Asiage, cha jo chke geru Cristo giti dbe nga ege ama Cristo gerua gau ngeru kwian na ulitage. 
\p  
\v 6 Ba gbi kade cha alin Maríage, ama lle bo tanre agedu tanre no che ulita alin. 
\p  
\v 7 Ba gbi kade cha alin Andrónicoge kaire Juniage, ama boke cha bitalla chuda giti, ama kledu skage ule cha ole, ama kle mo ta gbe no diali Cristo gerua ole malen kwian Jesucristo gerua ketanga ulita gerule no no ama boke giti, ama geru Cristo giti gau ulia ma ngeru chage. 
\p  
\v 8 Ba gbi kade cha alin Ampliatoge, ama cha skatemanalla no no che Chugagwalla Cristo giti, cha no no ama ole. 
\p  
\v 9 Ba gbi kade cha alin Urbanoge, ama lle boanga ule che ole Cristo alin. 
\p Ba gbi kade cha alin Estaquige, ama cha skatemanalla no no, cha no no ama ole. 
\p  
\v 10 Ba gbi kade cha alin Apelege, ama boidu tanre daga ngwale Cristo gerua giti agwa ama mo ta gbu no chage ngerugu Cristo ole. 
\p Ba gbi kade cha alin kwian ulitage kle toi Aristóbulo ullage. 
\p  
\v 11 Ba gbi kade cha alin Herodiónge, ama cha bitalla chuda giti. 
\p Ba gbi kade cha alin Narciso bitalla ulitage bai kaire nu mo ta gbaba che Chugagwalla Cristo gai ulia. 
\p  
\v 12 Ba gbi kade cha alin Trifenage kaire Trifosage, ama bonate lle boanga che Chugagwalla Cristo alin. 
\p Ba gbi kade cha alin Pérsidage, muinga e lle boanga no no che Chugagwalla Cristo alin, cha no ama ole. 
\p  
\v 13 Ba gbi kade cha alin Rufoge, ama kle mo ta gbe no no diali age no che Chugagwalla Cristo takalin kare daba Chubenu na gwa giti. 
\p Ba gbi kade cha alin Rufo chebiage, Rufo chebia cha alin cha chebia kare, cha no no ama ole mo chebia kare, ama no no cha ole mo kirolla kare. 
\p  
\v 14 Ba gbi kade cha alin Asíncritoge Flegontege Hermege Patrobage Hermage kaire kwian Chubenu na kle ama ulita ole ba gbi kade cha alin ama ulitage. 
\p  
\v 15 Ba gbi kade cha alin Filólogoge Juliage Nereoge Nereo iboteage Olimpage kaire kwian Chubenu na kle ama ulita ole kle mo ta gbe Jesucristo geruadi, ba gbi kade cha alin ama ulitage. 
\p  
\v 16 Ba ulita gbi kade no no moge ta no ole dabage ulita. 
\p Daba ulita Cristo gerua gaba aini tanre gbi kage ba ulita alin. 
\p  
\v 17 Cha daballa cha ibotea Jesucristo giti, ba geru ulia jun tanre, kwian Jesucristo gerua ketanga ba tku tangle no geru ulia Jesucristo gitige, ba ulita geru e gau ulia, nege kwian gweale kle chage baske geru nganake dbe, ba mo lingadale siere kwian enege, ama takalin ba ulita kira bate modi geru giti kaire ama takalin ba joge siere geru uliage, cha gerule trate trate ba ulita ole cha takalin ba kledale ta giti kwian ene ulitage.  
\v 18 Kwian ene chage geru nganake ole me kle mo ta gbe che Chugagwalla Jesucristo ole me kle age che Chugagwalla Jesucristo takalin kare, agwa ama kle age me no ama agali tañachuge kare, ama tale ama kwian me no me no ama kwian anblitanga agwa ama gerule no kwian na ole ta no giti, ene kwian na tañachuge ama gerule ulia, ene kwian na me tachke mo giti mo anblitange amage.  
\v 19 Uñale chage kwian ulita Chubenu nga na ulitage kle gerule no ba ulita giti ba kle mo ta gbe giti chage no Chube ole diali ba ulita kle age Chube takalin kare, e giti chadi nga suga no no ba ulita giti, cha takalin ba ulita mo ta gbe suge age no diali Chube takalin kare, agwa ba me mo ta gbale nganake age me no.  
\v 20 Ba ulita mo ta gbadale chege Chube gai ulia diali age no ama takalin kare, ene Chube ta suga no mauña be ba gbe kirachke blike Satanádi, ene dolla Satanás me ñage ba ta gbe age nganake me no. Cha takalin che Chugagwalla Jesu ba ulita manade no age no ba ulita alin diali. 
\p  
\v 21 Timoteo lle boanga Jesucristo alin ule cha ole gbi kage chada ai giti ba ulita alin, kaire Lucio kaire Jasón kaire Sosípater ama gdamai kle cha gatedi, ama cha bitalla chuda giti, ama gbi kage chada ai giti kaire ba ulita alin. 
\p  
\v 22 Cha kada Tercio, cha chada ai degu Pablo alin Pablo kle gerule kare kagadale ba ulita alin, cha kaire che Chugagwalla Jesucristo gau ulia, Chugagwalla Jesucristo giti cha gbi kage chada ai giti ba ulita alin. 
\p  
\v 23 Cha Pablo kle toi daba kada Gayo ullage, daba Gayo gbi kage chada ai giti ba ulita alin, ama kle daba Chubenu ulita gai ngwange no mo ullage kle daba Chubenu ulita chudaboi no. 
\p Kaire daba Erasto ama igi mananga una aige, ama gbi kage chada ai giti ba ulita alin. 
\p Kaire daba kada Cuarto gbi kage chada ai giti ba ulita alin. 
\p  
\v 24 Cha takalin che Chugagwalla Jesucristo ba ulita manade no no age no ba ulita alin diali. Ene nobi. 
\s1 Pablo daba Chubenu una Romamu ulita jige Chube kote 
\p  
\v 25-26 Cha kle ba jige Chube kote, ama ñage ba kira gbe mo ta gbe kiraske diali geru uliage cha ba tku tangle kare Jesucristo giti. Chube me boi, ama chege gwade diali chui tangle, unsuialin Chube kwian tanre Chube gerua ketanga ta gbu chada dege be boi Jesucristo ole giti, boidu ene ulita Chube kwian ta gbu mo gerua dege kare. Ngeru Chube nga dodaduge Chube mo ta gbu Jesucristo kage nga dba ai giti kwian jwanle siere ji chugege age me no gdale, geru e chegu ogaba kare skwlenre ba kwian me israelitage, agwa nege geru e chku uñale bage kaire kwian na nga ulitage, ene kwian nga ulitage ñage mo ta gbe Chube gai ulia mo Chubeale Jesucristo giti age Chube takalin kare.  
\v 27 Chube alin allabi gdaitre alin, ama ta ngle molen, ama agedu tanre no che ulita alin Jesucristo giti, che ulita gerudale no no Chube ole e giti diali chui tangle. Ene nobi. 
\p Geru ai ene ulita cha Pablo chada degangu ba ulita kwian Chubenu una Romage alin. Che kle meni.