\id REV - Buglere NT -Panama 2008 (DBL -2013) 
\h APOCALIPSIS 
\toc1 Jesucristo Geru Gbu Chke Uñale Juange Giti Juan Nu Chada Degaba 
\toc2 Apocalipsis 
\toc3 Ap 
\mt1 Jesucristo Geru Gbu Chke Uñale Juange Giti Juan Nu Chada Degaba 
\mt2 El Apocalipsis 
\ip Kwian geru jwannga Jesuge kada Juan chada ai degu ama kledu skage ngadrega bleske ka jwankle Patmoge Jesu gerua dbe gdale. Juan chagedu ule Jesu ole geru jwen Jesuge Jesu kledu toi nga dba ai giti gire. Jesu joni nga ngaña giti, chura jo tangle sbali gire Juan chada ai degu Jesu tane giti. 
\ip Jesucristo geru ai ulita gbu chke uñale Juange gbire, Jesucristo Juan ta gbu chada dege ulita Juan gwagedudi kare, geru ulita Chube gerudu giti Juan ole gbire Jesucristo Juan ta gbu geru e ulita dege trate. Gwangea Jesucristo mo kaitu Juange gbire Jesucristo geru ketu Juange degadale ketale kwian Chubenu mne gdagukege kle mo lite Jesucristo geruadi una gdaguke nga kweri Asiage. 
\ip Kaire Jesucristo gbi gbu Juan gwage lle ulita be boi chui ege gwangerugu giti, Juan geru e ulita degu chada ai giti ene ñage suge trate kwian ulitage Chube kaire ama Kirolla Jesucristo be kirachke ulita che dolla Satanádi Satanás chudaboangalla ulitadi chui bdaglige. 
\c 1  
\s1 Jesucristo geru gbe chke uñale Juange be boi chui gwangerugu giti ulita 
\p  
\v 1 Geru ai ulita kle degaba chada ai giti kle gerule be boi chui bdagli ngnagu giti, me sbali e be boi ulita. Chube geru ai gbu chke uñale Jesucristoge, Jesucristo tadukalin geru ai chke uñale kwian ulita ama gerua gangage malen Jesucristo lle boanga Chube alin nga ngaña giti kagu gerule cha kada Juan ole cha ta gbe ulita chui bdagli ngnagu be boi giti, lle boanga Chube alin e cha ta gbu chui e ulita giti ene cha Juan ñage geru ai jige degaba kwian ulita Jesucristo gerua gaba ulia alin ene chke uñale kwian ulitage chui bdagli ngnagu be boi giti, lle boanga Chube alin giti Jesucristo geru tanre gbu chke uñale cha tale.  
\v 2 Cha Juan chada ai dege cha gwagedudi ulita giti mo gwagwa giti kaire geru Chube gerudu giti cha ole, e ulita giti cha chada dege chada ai giti. Jesucristo cha ta gbu suge geru ulita Chube gerudu cha ole giti geru e ulia.  
\v 3 Kwian ulita bai kaire chada ai batenga nga be suga no kwian enedi chada ai giti, kwian ulita bai kaire geru ai keruchuge mo olodi, kwian enedi nga be suga no Chube gerua kle degaba chada ai giti ole. Kaire kwian ulita bai chada ai batenga kaire kwian ulita bai kaire geru ai keruchuge kwian ene ulita Chube gerua ulita degaba chada ai giti gbadale gdadi no diali. Chkedale uñale kwian enege geru ulita kle degaba chada ai giti chuia kle kodi, me sbali be boi ulita geru ai kle degaba gerule kare. 
\s1 Juan gbi kage kwian Jesucristo gerua ganga mne gdaguke toinga nga Asiamu alin 
\p  
\v 4 Cha Juan kle chada ai ulita dege Chube talla giti ba ulita kwian Chubenu Jesucristo giti mne gdaguke toinga nga Asiamu alin, cha gbi kade ba ulita alin chada ai giti. Cha takalin Chube che Ñenua age no no ba ulita alin kaire cha takalin Chube che Ñenua ba ulita ta gbe nga suga no ole. Chube amaña klebi lle ulita gwangeage, kaire ama kle nege tangle kle chui diali dale alin. Kaire Chube Oña kle Chube ole Chube che Chugagwalla kle toiba dba ngwadi nga ngaña giti, Chube Oña no trate ulita, cha takalin Chube Oña age no ba alin ba ta gbe nga suga no ole.  
\v 5 Kaire cha takalin Jesucristo age no ba alin ba ulita ta gbe nga suga no ole. Jesucristo kledu toi nga dba ai giti kwianske gire ama diali gerudu salengwli ulita ama Ñenua Chube ama kagu gerule kare. Jesucristo jokeda gire Chube ama jaba gbu chkeni gwade ngerutabi kwian jaba na darege, ama mi jogekeda dareni ama be chege toi chui tangle diali. Kaire ama kwian chugagwalla ulita nga dba ai giti Chugagwalla kweri. Jesucristo no che ulita ole, malen ama mo chugu ngwadi mo boange daga ngwale ama jokeda kruge che age me no giti. Che ama gerua gai ulia gire ene che tien gitiru ji chugege che agedu me no gdale.  
\v 6 Jesucristo che gau mau alin ama chegu che Chugagwalla kweri, Jesucristo che gau gerungale ama Ñenua Chube ole daba na alin lle boi no Chube alin Chube takalin kare. Cha takalin kwian ulita gerule no chui tangle diali Jesucristo giti Jesucristo agedu no ulita giti, cha takalin kwian ulita Jesucristo gai mo Chugagwallale Jesucristo gbe kweri kwian na gwa giti ulita. Ene nobi. 
\p  
\v 7 Cha gerule ulia ba ole, Jesucristo be chieni bogakwaskeni nga dba ai giti gire kwian ulita be gwage amadi, kwian bai agedu Jesucristo dollale Jesucristo guda Jesucristo kledu nga dba ai giti gire, kwian e kaire be gwage Jesucristodi chieni. Kwian nga ulitamu nga dba ai giti be nga dbe suga olire modi chru ole kennga Jesucristo chuia be chke gire. Ai ulia be boi ulita cha kle gerule kare. Ene nobi. 
\p  
\v 8 Chube che Chugagwalla kweri ama kiraske ama ñage age ulita, ama klebi lle ulita gwangeabi, kaire ama kle nege tangle be kle chui diali dale alin, Chube ai amaña kle gerule ene: “Cha Chube cha lle ulita Chugagwalla gwangea ngerutabi, kaire cha lle ulita Chugagwalla nege tangle, kaire cha be chege lle ulita Chugagwalla chui bdaglige diali chui tangle.” Chube kle gerule ene mau giti naskuni. 
\s1 Juan gwage Jesucristodi Jesucristo chege kweri no trate 
\p  
\v 9 Che ulita Jesucristo gau mo Chugagwallale gire ene Jesucristo giti che ulita Chubenu. Cha Juan ba daballa Jesucristo giti kaire agwe kle boi daga ngwale ba ulita Chubenu kle boi kare Jesucristo gerua gai gdale. Jesucristo kle kira kete che ulitage ene che ñage jage boi daga ngwaleske, ene che ñage chege ta no ole che kle boi ulita tanre daga ngwalege. Jesucristo cha ta gbu geru ulia Chubenu giti gire cha Jesucristo gerua du gdale cha dule skadi ngadrega bleske ka jwankle Patmoge.  
\v 10 Nga ege chui undege chuia kwian Chubenu Jesucristo giti kle mo lite chuiage, chui ege Chube Oña chku chadige, cha chegu ama kirallaske. Gire cha nate cha geru keruchugu gerule cha ole kweri kiraske salengwli lle ngwanegda ka jwankle trompeta kle gdade kare.  
\v 11 Geru e sugedu chage gerule ene: “Ba Juan chada degadale chada giti lle ulita ba kle gwagedi nege kaire lle ulita ba be gwagedi dare ba degadale ulita. Ba chada e kagadale kwian Chubenu kle mo lite Chube geruadi mne gdaguke toinga una gdagukege nga kweri Asiage alin, ba chada kage kwian Chubenu una gdaguke ai kare alin: kwian Chubenu toinga una Efesoge, kwian Chubenu toinga una Esmirnage, kwian Chubenu toinga una Pérgamoge, kwian Chubenu toinga una Tiatirage, kwian Chubenu toinga una Sardige, kwian Chubenu toinga una Filadelfiage, kwian Chubenu toinga una Laodiceage. Kwian Chubenu una e ulita gdaguke alin ba chada degadale lle ulita ba kle gwagedige giti, ba chada dege ba kage kwian Chubenu una emu ulita alin.” 
\p  
\v 12 Keru sugedu ene chage gerule cha nate gire cha tienduda mo nate chema kle gerule cha ole gire cha gwagedu lle gdaguke orole dodaba jichra gbangwa ngwadi,  
\v 13 lle e ulita gdagukeske tainkwli bonga cha gwagedu gdaitedi medu kwian kare cha gwage, ama mo ngama tkaba ñometra jeikeske ngaña joge dba ama serage ñometra bitaitre alin jeike llagli. Bonga tangle ama mo lugaba giska oro kare giti kaire ta giti tangle joge ngaña kudegda batreti lle oro kare kwa kweri kle gbaba.  
\v 14 Kaire ama chugaga jutre noare salengwli dagli jutre kare salengwli bogakwa kle chege jutre kare kaire ama gwagwa gwadenga tanre salengwli jita kare.  
\v 15 Ama sera gwadedunga no salengwli lle mno kadakle bronce mliakle jige kle gwadenga kare kaire ama kerua sugedu mno kweri kiraske chege salengwli chi kle skwen kekwadi kle gdade kare.  
\v 16 Kaire ama ko taingwli giti beu gbaguke kledu ama kote kaire sbadi gaitre alin sbadi dau ka bonga dau degaba no no kledu ama kate. Ama gwa gwadedunga no salengwli chui chratigenga no trate kare. 
\p  
\v 17 Cha gwagedu kwiandi ene gire cha kendunga cha jo chke dba chru ole ama sera ngena kwian jaba kare, agwa ama mo ko taingwli gbu cha giti gire ama gerudu cha ole ene: “Ba me kennga, cha Jesucristo, cha amaña lle ulita Chugagwalla gwangea ngerutabi kaire cha amaña be chege lle ulita Chugagwalla chui bdaglige diali chui tangle.  
\v 18 Cha amaña kle toi gwade nege diali, cha jokeda cha jaba chkuni gwade, nege cha be chege toi diali chui tangle. Kaire cha amaña ñage kwian chuge ngwadi toi gwade nga dba ai giti kaire cha ñage kwian jwen siere nga dba ai gitige kaire cha ñage kwian jogebakeda oña kage chege toi sugekare Chubege nga kada Hadege. Cha kiraske cha ñage age ulita cha takalin kare. 
\p  
\v 19 Cha gerule ba ole, ba kle gwagedi nege giti ulita ba chada degadale kaire be boi ulita aige dare giti ba chada degadale.  
\v 20 Ba kle gwage beu gbagukedi cha kote cha ko taingwli giti, kaire ba kle gwage lle gdaguke orole dodaba jichra gbangwa cha giti tangle. Nege cha geru ñachuge ba ole lle gdaguke giti. Beu gbaguke kle cha kote chege salengwli kwian Chubenu chugagwalla gdaguke kle Chube gerua kete kwian Chubenu mne gdaite gdaite una gdagukege. Kaire agwe lle gdaguke orole dodaba jichra gbangwa chege salengwli kwian Chubenu ulita mne gdaguke toinga una gdaite gdaite kaire kaire gdagukege nga kweri Asiage.” Jesucristo gerudu cha ole ene. 
\c 2  
\s1 Jesucristo geru ai gbe uñale Juange ketadale kwian ulitage kle mo lite Chube geruadi una Efesoge 
\p  
\v 1 Jesucristo gerudu dare cha ole: “Ba chada dege kwian Chubenu chugagwalla daba mananga Chube geruadi una Efesomu alin, ene ama ñage geru ai ulita kete kwian ulita Chubenu una emuge. Ba chada dege kwian alin cha gerule ai kare ama ole: 
\p ‘Cha kle beu gbaguke ole kote mo ko taingwli giti kaire lle orole dodaba jichra gbangwa gdaguke lle eske cha kle chage, cha amaña kle gerule ba ulita kle mo lite Chube geruadi una Efesoge ole,  
\v 2 cha gerule: Chage uñale ulita ba ulita kle age giti, chage uñale ba kle mo ta gbe lle boi mno tanre Chube alin ta no ole kaire ba kle boi tanre daga ngwale Chube gerua gai gdale, ba me kle lle ba kle boi Chube alin chuge ngwadi boadale, ba kle chege diali lle boi no Chube takalin kare. Chage uñale ba me no age me no ole malen ba me kle kwian agenga me no chuge ngwadi chege baske geru ngwale dbe. Kwian gerudu ba ole ama Jesucristo gerua dbanga ba mo chugu ama ole geru ulia giti gire chku uñale trate bage ama me geru ulia Chubenu dbanga ama kle chage ta sole ole, kwian e ulitage ba me skatedu dare. Cha gwa giti skwendu no ba agedu giti kwian e ole.  
\v 3 Diali ba kle mo ta gbe chage gwangerugu kaire ba kle boi tanre daga ngwale cha gerua giti, ba me kle skwatige ba me kle olire ba kle boi daga ngwaleske, ba kle mo ta gbe chage diali gwangerugu ta no ole.  
\v 4 Agwa ulia cha gerule ba ulita ole, lle gweale me skwen no chage ba kle age giti. Ba me ta ngeru kare cha ole, ngeru badi nga sugadu no no cha giti, ba ta du no cha ole diali. Agwa nege ba me kle mo ta dbe no cha ole ba mo ta du ngeru kare.  
\v 5 Ba tañachugadale ba mo ta du ngeru kare cha ole ba tachkedale ngeru ba toidu mine cha gwa giti. Ba mo ta blitadale noni naskuni cha ole ngeru kare, ba toidale no ba toidu ngeru kare ba cha gerua gau gwangeabi kare. Agwa ba me takalin age cha kle gerule kare ba ole, cha be mo ta gbe joge ji gbe ba giti, cha be ba gbe me chege kira molen mo lite ule cha geruadi, e salengwli cha jichra jwennga ba ngeru kare. Agwa ba mo ta blite naskuni Chube ole, ene cha mi age ba ole cha kle gerule kare.  
\v 6 Agwa kaire chadi nga suga no ba giti ba kle gwage me no me no kwian geru jwannga Nicolágedi kwian ene ulita kle age me no giti ama kle chage geru ngwale nate. Kaire cha gwa giti kwian e kle age me no tanre. 
\p  
\v 7 Ulia cha gerule trate geru ai cha kle gerule giti, kwian ulita bai kaire geru ai batenga kwian ulita bai kaire geru ai keruchuge, geru sugedale trate kwian ege Chube Oña takalin gerule mine geru ai giti kwian Chubenu mne gdaguke nga Asiamu ole. Kaire kwian e ulita geru ai gbadale gdadi geru ai kle gerule kare. Chube Oña kle gerule ene geru ai giti: Kwian bai mo ta gbe kiraske gwangerugu Chube gerua giti me chege age me no agwa diali age Chube takalin kare, kwian ene ulita cha be gbe toi diali chui tangle nga ngaña giti Chube kle ngwadi, nga noare ege kwian e be ñage gli no gba gute, gligba e kwian gbe toi diali dale alin.’ Ba Juan chada degadale ene ulita kagadale kwian Chubenu una Efesomu alin.” Jesucristo gerudu ene ulita cha ole ama cha gbu chada dege ene kwian Chubenu una Efesomu alin. 
\s1 Jesucristo geru ai gbe uñale Juange ketadale kwian ulitage kle mo lite Chube geruadi una Esmirnage 
\p  
\v 8 Jesucristo gerudu dare cha ole: “Kaire ba chada dege kwian Chubenu chugagwalla daba mananga Chube geruadi una Esmirnamu alin, ene ama ñage geru ai ulita kete kwian ulita Chubenu una emuge. Ba chada dege kwian alin cha kle gerule ai kare ama ole: 
\p ‘Cha amaña lle ulita Chugagwalla gwangea ngerutabi kaire cha amaña be chege lle ulita Chugagwalla chui bdaglige diali chui tangle. Cha jokeda gire cha jaba chkuni gwade, nege cha kle gwade chui tangle diali. Cha amaña kle gerule ba ulita kle mo lite Chube geruadi una Esmirnage ole,  
\v 9 cha gerule: Chage uñale ba kle boi daga ngwale tanre cha gerua gai gdale kaire uñale chage ba me lle molen nga dba ai giti agwa ulia ba lle no no ole cha giti, Chube agedu no no ba alin cha giti. Uñale chage kwian kle gerule me no badige, kwian e kle gerule ama kwian israelita malen ama Chubenu, agwa ama kle sole ngwale, ulia ama kwian israelita agwa ama che dolla Satanánu.  
\v 10 Cha gerule ulia ba ole, ba me ta dbe kennga ba kle boi giti kaire ba be boi aige dare giti, cha be kle ba ole diali ba chudaboi. Che dolla Satanás be kwian ta me no ta gbe ba gweale cha gerua gaba tke skage cha gerua gai gdale, Satanás takalin mo chuge ba ole ene ba ta jwlite me chege cha gerua ulia gai dare. Ba be kle boi daga ngwale skage chui gbataboko allabi. Kaire kwian ñage ba gweale gweda cha gerua gai gdale agwa ba ulita mo ta gbadale cha gerua gai ulia gwangerugu kiraske gire ene cha be ba ulita gbe toi chui tangle diali nga ngaña giti Chube ole ba cha gerua gau ulia giti. 
\p  
\v 11 Ulia cha gerule trate geru ai cha kle gerule giti, kwian ulita bai kaire geru ai batenga kwian ulita bai kaire geru ai keruchuge, geru sugedale trate kwian ege Chube Oña takalin gerule mine geru ai giti kwian Chubenu mne gdaguke nga Asiamu ole. Kaire kwian e ulita geru ai gbadale gdadi geru ai kle gerule kare. Chube Oña kle gerule ene geru ai giti: Kwian bai mo ta gbe kiraske gwangerugu Chube gerua giti me chege age me no agwa diali age Chube takalin kare, kwian ene mi boi daga ngwale ji chuge chui bdaglige ama agedu me no gdale, ama mi chege sugekare Chubege ama mi jogekeda bitaboke tangle uñe.’ Ba Juan chada degadale ene ulita kagadale kwian Chubenu una Esmirnamu alin.” Jesucristo gerudu ene ulita cha ole ama cha gbu chada dege ene kwian Chubenu una Esmirnamu alin. 
\s1 Jesucristo geru ai gbe uñale Juange ketadale kwian ulitage kle mo lite Chube geruadi una Pérgamoge 
\p  
\v 12 Jesucristo gerudu dare cha ole: “Kaire ba chada dege kwian Chubenu chugagwalla daba mananga Chube geruadi una Pérgamomu alin, ene ama ñage geru ai ulita kete kwian ulita Chubenu una emuge. Ba chada dege kwian alin cha kle gerule ai kare ama ole: 
\p ‘Cha kle sbadi ole, sbadi gaitre alin sbadi dau ka bonga dau degaba no no, sbadi e kle cha kate. Cha amaña kle gerule ba ulita kle mo lite Chube geruadi una Pérgamoge ole,  
\v 13 cha gerule: Chage uñale ba ulita kle toi ngwadi che dolla Satanás kle kwian me Chubenu ta gbe age me no me no Chube dollale, Satanás kwian ta me no chugagwalla nga ege ba kle toi ngwadi. Satanás kwian ta gbu kwian gdaite kada Antipas gweda cha gerua gdale, Antipas kwian gerunga no kwian ole cha giti, e giti ama guleda una ba kle toi ngwadige, agwa ba ulita me cha gerua mliunga. Ulia ba kle mo ta gbe gwangerugu cha gai mo Chugagwallale ba kle toi cha takalin kare kwian me no Satanánuske.  
\v 14 Agwa ulia cha gerule ba ulita ole, lle gweale me skwen no chage ba kle age giti. Baske kwian gweale kle chage kwian unsuialin ka junlen Balaam gerua nate, kwian e ulita kle age salengwli Balaam kwian tku tangle age unsuialin tangle kare. Balaam kwian ka junlen Balac ta gbu kwian israelita gbe age me no. Balac kwian gbu bligda kaitaba lle oña ngwale kwian kle gai chuberege gute kaire ama kwian muire kwian onbre ta gbu mo chuge ke giti. Balac kwian gbu age ene Chube dollale unsuialin tangle. E kare ene kwian gweale kle baske kle age salengwli Balac kwian gbu age kare. E giti cha gwage ba kle age me no kwian ene chuge ngwadi mo lite ba ole ule Chube geruadi.  
\v 15 Kaire baske kwian gweale kle, ama me ta Nicolás gerua ngwale mliakalinnga, e me skwen no chage ba kle skate amage, ama kle ba kwian Chubenuske, ba kle age me no salengwli ama kle age kare.  
\v 16 Cha gerule ba ole, ba mo ta blitadale Chube ole me chege kwian Balacnu bale ni kwian Nicolánu bale me chege ama skatemanale. Agwa ba me mo ta bliteni Chube ole, gire ene cha be joge blikare baske ji gbe kwian kle ba gbe age me no giti, sbadi kle cha kate giti cha be kira bate mo tke dole kwian kle ba gbe age me no ole. 
\p  
\v 17 Ulia cha gerule trate geru ai cha kle gerule giti, kwian ulita bai kaire geru ai batenga kwian ulita bai kaire geru ai keruchuge, geru sugedale trate kwian ege Chube Oña takalin gerule mine geru ai giti kwian Chubenu mne gdaguke nga Asiamu ole. Kaire kwian e ulita geru ai gbadale gdadi geru ai kle gerule kare. Chube Oña kle gerule ene geru ai giti: Kwian bai mo ta gbe kiraske gwangerugu Chube gerua giti me chege age me no agwa diali age Chube takalin kare, kwian enege cha be bligda no kada maná kete ama kira gbagda, bligda e kle ogaba nga ngaña giti Chube kle ngwadi. Kaire cha be ke jutre kete amage, ke e giti kwian kalla jagere be kle degaba. Kwian bai be ke gai kwian ene nu Chube gerua keruchugaba, ama alin allabige be suge kwian kalla kle degaba ke e giti kle gerule mine.’ Ba Juan chada degadale ene ulita kagadale kwian Chubenu toinga una Pérgamoge alin.” Jesucristo gerudu ene ulita cha ole ama cha gbu chada dege ene kwian Chubenu toinga una Pérgamoge alin. 
\s1 Jesucristo geru ai gbe uñale Juange ketadale kwian ulitage kle mo lite Chube geruadi una Tiatirage 
\p  
\v 18 Jesucristo gerudu dare cha ole: “Kaire ba chada dege kwian Chubenu chugagwalla daba mananga Chube geruadi una Tiatiramu alin, ene ama ñage geru ai ulita kete kwian ulita Chubenu una emuge. Ba chada dege kwian alin cha kle gerule ai kare ama ole: 
\p ‘Cha Chube Kirolla, cha gwagwa gwadenga tanre salengwli jita kare, kaire cha sera gwadenga no salengwli lle mno kadakle bronce mliakle jige kle gwadenga kare. Cha amaña kle gerule ba ulita kle mo lite Chube geruadi una Tiatirage ole,  
\v 19 cha gerule: Chage uñale ulita ba kle age giti ba kle toi mine kwianske ba kle mo ta gbe gwangerugu cha gai ulia mo Chugagwallale, ba ta no daba ole, ba kle mo chudaboi ongoru ongoru ta no giti, ba kle mo kira gbe jage ulita ba kle boi daga ngwale giti kaire uñale chage ba kle age no ulita ma ngle ngeruge.  
\v 20 Agwa ulia cha gerule ba ole, lle gweale me skwen no chage ba kle age giti. Ba kle muinga kada Jezabel chuge ngwadi gerule geru ngwale me ulia giti ba kwian Chubenu ole. Muinga e kle gerule ama kle kwian tke tangle Chube gerua ulia giti agwa ama kle kwian Chubenu anblite geru ngwale giti, kaire muinga e kle kwian Chubenu muirenu onbrenu ta gbe chage ke giti Jezabel kle age kare, ama kle kwian Chubenu ta gbe bligda kaitaba lle oña ngwale kwian me Chubenu kle gai chuberege gute. Ama kle sole ngwale kwian ole gire kwian kle mo ta blite age me no Chube dollale. Ba kle muinga e chuge ngwadi age me no ene ulita baske.  
\v 21 Cha chui tanre ketu muinga ege ama mo ta blitadale ama kle age giti agwa ama me takalin ama kle age me no chuge ngwadi, ama kle age dare me no cha gwa giti kle chage ke giti onbre ngle ole.  
\v 22-23 Cha gerule ulia ulia ba ole, muinga me takalin ama kle age me no chuge ngwadi malen cha be ama gbe boi daga ngwale tanre. Cha be jingme gbe kwian ulita chagenga muinga e gerua natedi ene ama jogekeda ulita. Kwian onbre bai kle chage muinga e ole ke giti, onbre e be mo ta gbe age salengwli gwangerugu muinga e kle age kare ama mi mo ta blite gire kwian ene giti kaire cha be ji gbe tanre. Cha be age ene ulita cha kle gerule kare gire be suge kwian Chubenu ulitage cha kwian ulita ta uñe, chage uñale kwian ulita kle tañachuge mine, kaire cha be age ba ulita alin ba agedu batre.  
\v 24 Ba tanre Chubenu una Tiatiramu kle tañachuge geru e muinga kle dbe geru e no trate, agwa ulia geru e ulita kle chie che dolla Satanás talla giti muinga e tale. Agwa ba gweale Chubenu me kle muinga e gerua ngwale gai ulia malen cha mi gerule ba ole ba agedale ma no gweale dare, ba kle age cha takalin kare.  
\v 25 Agwa cha gerule sidri ba ole, ulia ba mo ta gbadale gwangerugu ba kle mo ta gbe nege kare me chage geru ngwale nate, ba kledale mo ta gbe kiraske gwangerugu Chube gerua giti cha be jogeni kaire baske.  
\v 26-27 Kwian bai kaire kle mo ta gbe kiraske cha gerua giti me kle kwian na gerua ngwale gbe gdadi agwa diali kle chege cha geruadi, kwian bai kaire kle age cha takalin kare ama kle gwade gire, gire ene chui bdaglige cha be kwian ene gbe kwian nga ulitamu chugagwallale salengwli Chube cha Ñenua cha jigu kwian nga ulitamu Chugagwalla kare. Cha be kwian ene gbe kiraske kwian na ulita chugagwallale gerunga kwian ulita giti Chube alin, gire kwian chugagwalla ene ulita be ñage kwian ulita kle mo tke dole Chube gerua ole gbe ji chuge, kwian chugagwalla e be ji gbe kwian giti ama be kwian Chube dollale kagenga ulita salengwli kwian kle dbi dodaba ñmale glogenga kare ulita chege me no.  
\v 28 Kwian ulita cha gerua gbe gdadi age ulita cha gerule kare, kwian enege cha be beu ngliaña kete, cha be age no no ama alin ama cha gerua gau ulia ñanale. 
\p  
\v 29 Ulia cha gerule trate geru ai cha kle gerule giti, kwian ulita bai kaire geru ai batenga kwian ulita bai kaire geru ai keruchuge, geru sugedale trate kwian ege Chube Oña takalin gerule mine geru ai giti kwian Chubenu mne gdaguke nga Asiamu ole. Kaire kwian e ulita geru ai gbadale gdadi geru ai kle gerule kare.’ Ba Juan chada degadale ene ulita kagadale kwian Chubenu una Tiatiramu alin.” Jesucristo gerudu ene ulita cha ole ama cha gbu chada dege ene kwian Chubenu una Tiatiramu alin. 
\c 3  
\s1 Jesucristo geru ai gbe uñale Juange ketadale kwian ulitage kle mo lite Chube geruadi una Sardige 
\p  
\v 1 Jesucristo gerudu dare cha ole: “Kaire ba chada dege kwian Chubenu chugagwalla daba mananga Chube geruadi una Sardimu alin, ene ama ñage geru ai ulita kete kwian ulita Chubenu una emuge. Ba chada dege kwian alin cha kle gerule ai kare ama ole: 
\p ‘Cha beu gbaguke ole kote, kaire Chube Oña kle cha ole ama no trate ulita. Cha amaña kle gerule ba ulita kle mo lite Chube geruadi una Sardige ole, cha gerule: Chage uñale ulita ba kle age giti. Kwian na gwage badi ama tañachuge ba ta no trate Chube gwa giti ba kle toi Chube takalin kare, agwa ulia cha gwa giti ba kwian jogebakeda kare ba kle age me no giti, ba ta kle sugekare Chubege.  
\v 2 Cha gerule ulia ba ole, ba mo ta gbadale tañachuge ulita ba kle age giti. Ba bebi geru Chubenu chuge ngwadi ulita ba mo kira gbadale kiraske naskuni blike geru Chubenu ole, ba mo ta gbale chage ta giti geru Chubenu kle ba tale ole. Cha kle gwage ba kle age me no gitidige e ulita me no Chube gwa giti.  
\v 3 Ba tachkedale geru Chubenu ba tkere tangle giti, geru e ba gaubi gwangeabi ulia. Ba geru e gadale ngerugu mo tale, ba geru e gbadale gdadi, ba mo ta blitadale naskuni Chube ole me age me no dare ba kle age nege kare. Agwa ba me jain age cha kle gerule ba ole kare, gire ene cha be joge ji gbe ba giti salengwli kwian skwe boanga kle joge skwe boi kwian ngeru me kle chke uñale kwiange kwian skwe boanga be chke ngaminegire ama llea jwen ulita, ene kaire me chke uñale bage ngamangirege cha be joge ji gbe ba giti ba kle age me no gdale.  
\v 4 Cha gerule ba ole, kwian Chubenu gweale kle toi una eni Sardige me kle age me no daba Chubenu dare kle age kare cha gwa giti, ama ta kle no trate. Ama kle age Chube takalin kare malen e giti chui bdaglige ama ñage mo ngama tke ñometra jutreske, ama be toi cha ole ule.  
\v 5 Kwian bai kaire me kle age me no Chube dollale daba na kare ama kle mo ta gbe gwangerugu age no trate Chube takalin kare, kwian ene be chege mo ngama tkaba ñometra jutreske chui diali dale, kwian ene kalla cha mi jwennga dale chada chanu giti. Ama kalla be kle degaba diali chada chanu giti chui diali dale ama be toi diali cha ole kaire cha Ñenua Chube ole nga ngaña giti. Kaire agwe kwian ene giti cha be gerule no cha Ñenua Chube gwa giti kaire lle boanga Chube alin ulita gwa giti nga ngaña giti. 
\p  
\v 6 Ulia cha gerule trate geru ai cha kle gerule giti, kwian ulita bai kaire geru ai batenga kwian ulita bai kaire geru ai keruchuge, geru sugedale trate kwian ege Chube Oña takalin gerule mine geru ai giti kwian Chubenu mne gdaguke nga Asiamu ole. Kaire kwian e ulita geru ai gbadale gdadi geru ai kle gerule kare.’ Ba Juan chada degadale ene ulita kagadale kwian Chubenu una Sardimu alin.” Jesucristo gerudu ene ulita cha ole ama cha gbu chada dege ene kwian Chubenu una Sardimu alin. 
\s1 Jesucristo geru ai gbe uñale Juange ketadale kwian ulitage kle mo lite Chube geruadi una Filadelfiage 
\p  
\v 7 Jesucristo gerudu dare cha ole: “Kaire ba chada dege kwian Chubenu chugagwalla daba mananga Chube geruadi una Filadelfiamu alin, ene ama ñage geru ai ulita kete kwian ulita Chubenu una emuge. Ba chada dege kwian alin cha kle gerule ai kare ama ole: 
\p ‘Cha Chube Kirolla cha kle age ulita diali cha kle gerule kare, cha gerule ulia diali, cha no trate ulita. Cha kwian ulita Chugagwalla kweri kwian chugagwalla unsuialin David kare agwa kaire cha chege ma kweri ma kiraske Davige. Cha gerule chema ñage toi Chube ole diali nga ngaña giti chema me ñage toi Chube ole, e salengwli kwian u mauña kle kwian kade gwa kare o kaire kle kwian chuge ngwadi sugekare goga kare, cha ñage age ulita cha takalin kare. Cha amaña kle gerule ba kwian ulita kle mo lite Chube geruadi una Filadelfiage ole, cha gerule:  
\v 8 Uñale chage ulita ba kle age giti. Uñale chage ba ta me kiraske agwa ba cha gerua gau ba kle age cha gerua kle gerule kare, kaire ba me kle ibule gerule ba cha gerua gaba ba kwian chanu malen e giti cha be ba gbe cha gerua ketangale kwian nage ni kwian na be ñage ba jwen siere geru chanu dbe kwian nage.  
\v 9 Baske ba kle ngwadi kwian tanre agenga me no che dolla Satanás takalin kare kle gerule ama kwian israelita malen ama Chubenu agwa ama kle sole ngwale, ulia ama ulita che dolla Satanánu. Cha be kwian e kare ene gbe mo jongnagwa skute dba ba ngnagu ama be ba gai dage chugagwalla kweri. Be suge ama ulitage ulia cha no ba ole ba cha gerua ganga ole.  
\v 10 Ba ulita kle mo ta gbe age diali cha takalin kare ba ulita kle mo ta gbe jage ta no ole ba kle boi daga ngwaleske, malen cha be ba ulita manade no be boi tirage nga ulitage nga dba ai giti, cha mi ba chuge ngwadi boi daga ngwale kwian na me cha gerua gaba be boi kare, cha be boi daga ngwale gbe kwian ene ulita ta chugagda, ene be chke nate uñale kwian ene ulita kwian mine.  
\v 11 Cha gerule ulia ulia ba ole, cha chieni chuia kle kodi malen ba ulita mo ta gbadale gwangerugu cha gerua giti lle boi ulia no cha alin diali. Ba mo ta gbale lle boi no cha takalin kare ba mo ta gbale cha gerua manade no, ene kwian na mi ñanalla jwennga ba ngeru, ba mo ta gbe no ñanale cha be lle no kete bage.  
\v 12 Kwian ulita bai kaire kirachke che dolla Satanádi ama mo ta gbe kiraske age ulita cha takalin kare, kwian ene be toi diali cha ole kaire cha Ñenua Chube ole nga ngaña giti, kwian e be toi jwire Chube kle toi ngwadi una jagere ka jwankle Jerusalénge una e be chie nga ngaña giti gwadbiguda nga dba ai giti. Una Jerusalén kalla cha be gbe kwian e giti kaire cha Ñenua Chube kalla cha be gbe kwian e giti, ama be chege cha Ñenua Chubenu. Kaire cha be mo ka na jagere gbe kwian e giti. 
\p  
\v 13 Ulia cha gerule trate geru ai cha kle gerule giti, kwian ulita bai kaire geru ai batenga kwian ulita bai kaire geru ai keruchuge, geru sugedale trate kwian ege Chube Oña takalin gerule mine geru ai giti kwian Chubenu mne gdaguke nga Asiamu ole. Kaire kwian e ulita geru ai gbadale gdadi geru ai kle gerule kare.’ Ba Juan chada degadale ene ulita kagadale kwian Chubenu una Filadelfiamu alin.” Jesucristo gerudu ene ulita cha ole ama cha gbu chada dege ene kwian Chubenu una Filadelfiamu alin. 
\s1 Jesucristo geru ai gbe uñale Juange ketadale kwian ulitage kle mo lite Chube geruadi una Laodiceage alin 
\p  
\v 14 Jesucristo gerudu dare cha ole: “Kaire ba chada dege kwian Chubenu chugagwalla daba mananga Chube geruadi una Laodiceamu alin, ene ama ñage geru ai ulita kete kwian ulita Chubenu una emuge. Ba chada dege kwian alin cha kle gerule ai kare ama ole: 
\p ‘Cha Jesucristo gerunga diali ulia cha me geru blite gire age nganake, cha diali geru ulia kete kwiange cha Ñenua Chube giti, kaire lle ulita Chube dodadu gwangeabi unsuialin tangle, cha lle e ulita Chugagwalla. Cha amaña kle gerule ba ulita kle mo lite Chube geruadi una Laodiceage ole,  
\v 15 cha gerule: Chage uñale ulita ba kle age giti. Ba me kle mo ta gbe kiraske cha gerua giti cha takalin kare. Ba me kle cha gerua tallade, ba kle toi ba me cha gerua uñe kare. Ba takalin chege cha dollale ba ñage chege, ba takalin chege cha skatemanallale age ulita cha takalin kare, ba ñage chege. Agwa cha me takalin ba mo ta gbe gbaboke ai kare chadi, ma no ba lle gdaitre alin gadale. Ba mo ta gbe gbaboke chadi gire cha be ba jige sugekare chage kaire cha Ñenua Chubege salengwli kwian chi me no jwen kate uneda kare.  
\v 16 Agwa ulia cha gerule ba ole, ba chege diali age ba kle age kare, gire cha be ba gbe sugekare chage chui tangle ni cha be tachke ba giti dare.  
\v 17 Ba kle gerule ba lle tanre molen, ba diali kle toi no ni lle gdaite me kle ba ole, ulita kle ba ole, ba lle ulita molen. Ba kle gerule ene mo giti no. ¿Agwa mineade ba kle tañachuge mau giti ene? Ulia lle kle ba ole ba kle gerule kare agwa ulia ba ta me trate Chube gwage, malen ba me ñage gerule ba lle ulita molen. Ba me kle mo ta gbe toi Chube takalin kwian amanu toi kare gire e giti ba kwian llea me kare, ba kwian me ñometra ole mo ngama tkagda kare. Chube me ñage age ulita ba alin ama takalin kare, ama me ñage ba chudaboi. Ba me kle tañachuge mo giti naskuni ba ta mine Chube ole malen e giti ba kwian gwagwa me kare.  
\v 18 Malen cha gerule ba ole, ba mo ta gbe gwangerugu Chube gerua gai ulia mo tale kiraske gire cha be age no ba alin lle no kete bage, e chege salengwli cha lle ñanaske kada oro kete bage kare. Cha ba ta blite, ene cha kiralla giti ba ñage age no cha takalin kare, ene ba mi ibule ba agedu me no giti, ba be chege mo ngama tkaba ñometra jutre noske kare, Chube be ba ta gbe joge siere ulita ba kle age me noge kaire Chube gerua be ba ta gbe toi trate Chube gwa giti, e chege salengwli cha gdege jrite ba gwagwa ogage ba gbe ten kare.  
\v 19 Cha gerule ba ole, kwian bai kaire cha no no ole, kwian e kle age gweale me no cha dollale, gire cha kle ka boi ama ole ama kle age me no giti kaire cha kle ama chuge ngwadi boi daga ngwale, e giti cha kle ama ulita tke tangle ama toidale mine Chube gwa giti, gire ene ama ñage mo ta blite Chube ole Chube takalin kare. Cha gerule ba ole, ba mo ta gbadale diali kiraske gwangerugu Chube geruadi, ba mo ta blitadale Chube ole age Chube takalin kare.  
\v 20 Cha diali kle kwian keru manade, cha takalin kwian Chubenu ulita mo ta gbe ule cha ole diali. Kwian Chubenu bai kle mo ta dbe bate chage, cha takalin kwian ene mo ta bliteni naskuni cha ole, ene cha chege kwian e ole, kwian e talla chege cha ole kaire cha talla chege kwian e ole.  
\v 21 Cha gerule ba ole, kwian bai mo ta gbe kiraske Chube gerua gai ulia mo tale, cha be kwian ene gbe daba chugagwale daba na kaganga chui bdaglige cha ole ule. Cha be age no ene ama alin salengwli Chube cha Ñenua agedu cha alin kare. Cha kirachku lle ulitadi nga dba ai giti gire cha joni nga ngaña giti Chube ngwadi, Chube cha gbu kwian kaire lle na ulita Chugagwalla kweri. 
\p  
\v 22 Ulia cha gerule trate geru ai cha kle gerule giti, kwian ulita bai kaire geru ai batenga kwian ulita bai kaire geru ai keruchuge, geru sugedale trate kwian ege Chube Oña takalin gerule mine geru ai giti kwian Chubenu mne gdaguke nga Asiamu ole. Kaire kwian e ulita geru ai gbadale gdadi geru ai kle gerule kare.’ Ba Juan chada degadale ene ulita kagadale kwian Chubenu una Laodiceamu alin.” Jesucristo gerudu ene ulita cha ole ama cha gbu chada dege ene kwian Chubenu una Laodiceamu alin. 
\c 4  
\s1 Juan gwage nga ngaña gitidi Chube kle toi ngwadi, 
\s1 ne ngwadi ulita kle gerule no Chube giti 
\p  
\v 1 Cha chada degu ene ulita Jesucristo gerudu cha ole kare gire cha gwagedu ngaña bdugu nga ngaña giti, cha gwagedu ugaka degabangadi nga ngaña giti joge Chube kle ngwadi. Cha geru keruchugaba gerule cha ole nga ngaña giti ngeru gdade kweri trompeta kare, amaña gerudu cha ole nakwaite: “Bai aini nga ngaña giti, lle ulita be boi aige gwangerugu ulita cha be kaite bage.”  
\v 2 Cha geru keruchugu gerule ene cha ole gire blikare cha chegu Chube Oña kirallaske, cha sugedu moge Chube Oña cha du nga ngaña giti, gire cha gwagedu nga ngaña giti toigda dba no nodi kledu gbaba, toigda e giti cha gwagedu kwiandi gdaite kledu toiba dba.  
\v 3 Kwian cha gwagedudi toiba dba ama chegu cha gwage gwadenga noare salengwli kechuga gwadenga no ñanaske ka jwankle jaspe kare kaire salengwli kechuga dabere no ñanaske ka jwankle cornalina kle gwadenga no kare. Kwian e toigdalla nodi tangle cha gwagedu kebita manedi chratigenga no trate kechuga lerere ka jwankle esmeralda chra gwadenga kare.  
\v 4 Kaire kwian e toigdalla nodi tangle cha gwagedu toigda na veinticuatrodi. Toigda ulita e giti cha gwagedu kwian daba Chubenu chugagwalla juma kledu toiba dba ama ulita veinticuatro kledu, kaire ama ulita kledu mo ngama tkaba ñometra jutreske. Ama nu lle orole sombrero kare gwadenga no gbaba mo chugage.  
\v 5 Toigda gdaite kwian chugagwalla ma kweri kle toiba dba ngwadi nga kledu ko chrachienga enusulindra kledu gdade tirare. Chugagwalla kweri toigdalla dba ngwadi ngerudba jichra gdaguke kledu chratigenga no, jichra gdaguke e Chube Oña kare.  
\v 6 Chugagwalla kweri toigdalla ngerudba cha gwagedu lle nodige ble ngwedige kare, ble e chi oña che kle gwage mo gwadi kare, ene ble. Toigda kweridi tangle kodi lle gwade gdabaga kledu, gdaite toigda kweri ngeru, gdaite toigda nate, gdaite toigda ko jole ngnagu giti, gdaite toigda ko taingwli ngnagu giti, lle gdabaga e gwagwa molen ngle mo ngeru mo nate.  
\v 7 Lle gwade gdaite kle ngeru ama chege salengwli gude kweri kare, lle na gdabokedale ama chege chbi ñenua kare, lle na gdamaidale gwa chege kwian kare, lle na gdabagadale chege mu kweria kle jichienga kare.  
\v 8 Lle gdabaga e gdaite gdaite kaire kaire ama ulita jiga molen gdadereke kaire ama gwagwa ngle molen jegwale ulita. Ama ulita gdabaganate me kle ka chite ngajrege ngajudige gerule no Chube giti diali: 
\q1 “Chube no no trate ulita, Chube agenga no diali ulita, Chube kwian ulita Chugagwalla kweri kiraske tanre. 
\q1 Chube lle ulita Chugagwalla gwangea ngerutabi, kaire Chube amaña lle ulita Chugagwalla nege tangle kaire Chube amaña be chege lle ulita Chugagwalla chui bdaglige diali chui tangle, Chube no trate diali.” 
\m Lle gwade gdabaga diali kledu gerule no ene Chube giti Chube gbe kweri. 
\p  
\v 9-10 Chube toinga diali chui tangle ama kledu toiba dba toigda kweri giti gire lle gwade gdabaga e kledu gerule no diali Chube giti Chube gbe kweri ama Chugagwalla. Lle gdabaga kledu gerule no diali ene Chube giti gire kwian daba Chubenu chugagwalla juma veinticuatro, ama ulita kledu jongnagwa skute dba Chube gwangnagu Chube gai dage kaire kwian e ulita kledu lle no orole dodaba sombrero kare gbaba mo chugage jwennga, ama kledu lle e gbe ulita Chube gwangnagu, gire ama kledu gerule no Chube ole ene: 
\q1  
\v 11 “Chube, ba cha ulita Chugagwalla, ba no trate kweri, ba giti cha ulita gerule no. 
\q1 Cha gerule ba giti ba cha Chugagwalla kweri ba kira molen tanre, ba mo ta gbu lle ulita dodade unsuialin tangle, ba lle ulita dodadu no trate, ba giti lle ulita ba dodadu kle gwade kle toi no ulita.” 
\m Kwian daba Chubenu chugagwalla juma veinticuatro kledu gerule no ene Chube ole. 
\c 5  
\s1 Gerudre no kaire mo gatre no Bda Cordero giti 
\p  
\v 1 Chube kledu toiba dba toigdalla kweri giti, Chube ko taingwli giti cha gwagedu ama kote chada bliabangadi, chada bliabanga e kledu degaba skieru ngnaru kaire giti ngnaru, chada gáge dba kledu jegaba kejre bitaguke tangle lle chada gatagda giti, ene kwian na me ñage chada e trennga chada batenga.  
\v 2 Gire kaire agwe cha gwagedu lle boanga Chube alin nga ngaña giti gdaitedi ama lle boanga no kiraske ama gerudu kweri ene: “¿Chema ta no trate ulita ñage lle chada gatagda gdaguke jwennga chada bliabanga trennga gire chada batenga? ¿Chema no trate ñage age ene?”  
\v 3 Lle boanga Chube alin kledu gerule ene gire ni kwian gdaite kledu chada treannganga. Ni kwian gdaite nga ngaña giti ni kwian gdaite nga dba giti ni kwian gdaite jogebakeda oña kle nga kada Hadege ñadu chada e trennga ni gwagedi.  
\v 4 Cha gwagedu ene ulita gire cha olidu tanre, cha me ñadu mo ta gate oli ole. Cha me gwagedu ni kwian gdaite ta no trate chada kweri treannganga ni batanga, e giti cha olidu tanre.  
\v 5-6 Cha ta kledu olire gire kwian daba Chubenu chugagwalla juma veinticuatro ama gdaite gerudu cha ole ene: “Ba me olire dare. Gwage kwian edi kwian na kle ama ka jwen Gude chieba kwian israelita unsuialin kada Judá oindallage, kaire kwian gdaite amaña ama kwian unsuialin tangle chugagwalla David oindalla. Ama kira molen, ama ñage age ulita. Ama ñage lle chada gatagda gdaguke jwennga ulita, ama ñage chada ai trennga, kaire ama ñage chada ai batenga. ¿Mineade ba kle olire? Kwian gdaite e ñage age ulita.” Kwian daba Chubenu chugagwalla juma gdaite gerudu ene cha ole gire cha gwagedu kwiandi gdaite bda cordero kare. Ama lentigeba trate jegwale ama gwabada kare, agwa ama kledu jagebanga gdate tainkwli Chube kledu toiba dba ngwadi ngnagu, kaire lle gwade gdabaga kledu amadi tangle kaire kwian daba Chubenu chugagwalla juma veinticuatro kledu amadi tangle. Kuda gdaguke chieba Bda Cordero e chuga giti kaire ama gwagwa gbaguke molen, gwagwa e ulita salengwli Chube Oña no trate ulita kare, Chube kle mo Oña kage nga dba giti ulita kwian ta gbe Chube giti. Cha gwagedu Bda Corderodi e Jesucristo.  
\v 7 Bda Cordero e jo Chube gitigu gire ama chada bliabanga gau Chube ko taingwli giti.  
\v 8 Bda Cordero chada e gau kote gire lle gwade gdabaga kaire kwian daba Chubenu chugagwalla juma veinticuatro ama ulita jongnagwa skutu dba Bda Corderodi ama gwangnagu Bda Cordero gai dage. Lle gwade gdabaga kaire kwian daba Chubenu chugagwalla juma veinticuatro ama ulita gdaite gdaite kledu lle gitarale kada arpa ole kote dagalenga. Kaire ama ulita kote lle orole dodabale jogdale kledu, lle jogdale e toli lle kinre ñachke no kada incienso tkaba ngle. Lle ñachke no e chege salengwli geru kwian Chubenu kle gerule no giti Chube ole kare.  
\v 9 Kwian mangire batre ulita kledu ne ngwadi ama ulita mo gatu biale geru no jagere giti Bda Cordero alin ene: 
\q1 “Cha ulita no ba ole. 
\q1 Ba ulia no trate malen ba ñage chada e gai kote lle chada gatagda gdaguke jwennga. 
\q1 Ba jo boaba daga ngwale gwabada kwian agedu me no giti. 
\q1 Ba boidu daga ngwale ba jokeda kruge kwian ulita alin ene kwian ulita ba gai ulia ñage chege Chubenu, ba agedu ene kwian chudalla ulita alin kaire kwian gerunga kwira ulita alin kaire kwian toinga nga ulitage alin. 
\q1 Ene ba jokeda giti kwian ulita ñage Chube uñe. 
\q1  
\v 10 Ba giti kwian ulita ba gerua ganga chege Chubenu, ba ama ulita Chugagwalla, ba kwian e ulita gbu gerungale Chube ole daba na alin, kaire ba ama gbu kwian lle boangale Chube alin. 
\q1 Gire ama be chege kwian na ulita chugagwallale ba ole ule nga dba giti. 
\q1 Ba kweri trate ba ñage age ulita.” 
\m Kwian daba Chubenu chugagwalla juma veinticuatro kaire lle gwade gdabaga ulita mo gatu gerudu no ene Bda Cordero ole. 
\p  
\v 11 Gire sugetibi allabi cha gwagedu lle boanga Chube alin tanre tanredi lle boanga tanre ma ngle millonge ni cha ñadu ama ulita ten. Lle boanga e ulita kledu mo litaba kwian daba Chubenu chugagwalla juma veinticuatrodi tangle kaire lle gwade gdabagadi tangle kaire toigda kweri gdaitedi tangle ama ulitadi tangle lle boanga tanre tanre kledu.  
\v 12 Cha lle boanga ulita keruchugu gerule no kweri kiraske Bda Cordero giti: 
\q1 “Bda Cordero jo gwabada kwian agedu me no giti, cha gerule no ama giti cha no no ama ole. 
\q1 Ama kiraske tanre ulita, ama ñage age ulita, ama ma kiraske lle ulitage, ama lle ulita mauñale, lle ulita amanu, kaire amage kle chke uñale lle ulita giti. 
\q1 Ama no trate ulita malen cha ama gai dage, cha ama gai mo Chugagwallale no, cha gerule no no ama giti.” 
\m Lle boanga Chube alin tanre ulita gerudu no ene Bda Cordero giti. 
\p  
\v 13 Kaire lle ulita Chube nu dodaba cha ama keruchugu gerule, lle ulita kle nga ngaña giti kaire lle ulita kle nga dba giti kaire kwian ulita oña kle nga kada Hadege kaire lle ulita kle bleske, lle ai ulita Chube nu dodaba kledu gerule no ene: 
\q1 “Kwian kle toiba toigda kweri no gdaite giti kaire Bda Cordero kle ama ngena, ama gdabonate giti cha gerule no no diali. 
\q1 Cha no no ama ole, cha ama gai dage, ama kira molen ulita, ama no trate ulita diali. 
\q1 Ama gdaboke chege kweri kiraske lle ulita Chugagwalla chui tangle diali.” 
\p Lle ulita Chube nu dodaba kledu gerule no ene Chube giti kaire Bda Cordero giti,  
\v 14 gire lle gwade gdabaga gerudu ene: 
\q1 “Cha takalin ulita chege lle ulita kle gerule kare Chube giti kaire Bda Cordero giti. Ene nobi.” 
\m Lle gwade gdabaga gerudu ene gire kwian daba Chubenu chugagwalla juma veinticuatro ulita jongnagwa skutu dba Chube kaire Bda Cordero gai dage mo Chugagwallale kweri. 
\c 6  
\s1 Bda Cordero lle chada gatagda gdadereke jwennga 
\s1 ama chada trennga 
\p  
\v 1 Gire sugetibi allabi cha gwagedu Bda Corderodi ama lle chada gatagda gdaite ngerutabi junnga, gire cha ologe lle gwade gdabaga gdaite kerua sugedu, ama gerudu kweri enusulindra kle gdade kare, ama gerudu cha ole ene: “¡Bai aini gwage kle boidi!”  
\v 2 Lle gwade gdaite gerudu ene cha ole, cha jo ama gitigu gire cha gwagedu ja jutredige, ja jutre e giti kwian gdaite kledu skwenba, kwian e kledu chage jwategda dbe kote. Kaire amage lle no ketre gbadale mo chugage lle e kada corona salengwli sombrero kare jo ketaba amage ama kirachku ama dolladi ñanale, ama kirachkenga ulita, ama jo chage ja jutre giti kirachkedale dare lle ulitadi. 
\p  
\v 3 Kwian gdaite e jo chage ja jutre giti gire Bda Cordero lle chada gatagda gdabokedale junnga gire lle gwade gdabokedale ngautu chage: “¡Bai aini gwage kle boidi!”  
\v 4 Lle gwade gerudu ene cha ole, gire sugetibi cha gwagedu ja na gdaite daberedi, kwian kledu chage skwenba ja dabere e giti, amage sbadi kweri jeike ketre, ama gbere kiraske tanre ene ama ñage kwian ulita nga dba giti gbe kira bate modi ongoru ongoru mo gweda, kwian nga dba giti mi ñage toi dare ule nga suga no ole, boi tirare ulita nga dba giti. 
\p  
\v 5 Bda Cordero lle chada gatagda gdamaidale junnga gire lle gwade gdamaidale ngautu chage: “¡Bai aini gwage kle boidi!” Lle gwade ngautu chage ene gire cha gwagedu ja na jereredi, kwian kledu skwenba ja jerere e giti kledu chage lle pesa kare dbe kote, lle e kwian kle bligda ñachugege gire bligda e kle chege egdage bligda e gaba mangire ulita.  
\v 6 Cha ologe keru sugedu chage gerule lle gwade gdabagaske: “Kwian bligda sidri gige igi tanre giti. Kwian lle boi chui gbaite, igi ama lle boi ñanale igi e giti ama ñage bligda kada trigo gige lata soli gdaitre alin allabi, o ama ñage bligda na kada cebada gige lata soli gdamaire alin allabi igi ama lle boi chui gbaite ñana giti. Bligda me kle ngle nga dba giti, malen bligda sidri mebi chbadakle kwangleare ulita, kwian ulita kle bli chuge tanre. Agwa lle kinre kaire lle gage me kagadalenga ngwale ene mi bidege.” Keru sugedu chage gerule ene. 
\p  
\v 7 Bda Cordero lle chada gatagda gdabagadale junnga gire lle gwade gdabagadale ngautu chage: “¡Bai aini gwage kle boidi!”  
\v 8 Lle gwade ngautu chage ene gire cha gwagedu ja na gdaitedi, ja e sugaskare chegeba lenrensa jegwale. Ja ne giti kwian kledu skwenba ama ka gbaba Jogekeda, kaire kwian na chagedu seradi ama nate ama ka jwankle Hades. Kwian e gdabonate chugle ngwadi age me no kwian tanre toinga nga dba giti ole. Kwian gdaboke e ole gerudre ama ñage kwian toinga nga dba giti ulita gbaba mne gdabagage ama ñage mne gdaitre alin gweda ama takalin kare agwa kwian na ulita mne gdamai ama me chugale ngwadi age me no kwian mne e ulita ole, malen kwian boke e ñadu kwian mne gdaitre alin gbe jogekeda ulita. Gire ama kwian gweale gbu jogekeda sbadi giti, ama kwian gweale gbu jogekeda bli ole, ama kwian gweale gbu jogekeda jingme tira kote, ama kwian gweale gbu boi daga ngwale bda tirare ngaske ama gute. Ene kwian toinga nga dba giti mne gdaite jokeda ulita. 
\p  
\v 9 Gire Bda Cordero lle chada gatagda gdatigadale junnga gire cha gwagedu kwian Chubenu tanre guleda oñadi ama ulita kledu lle gugangwa Chube gwa giti ngwadi gwaru, ama nu Chube gerua gaba ulia ama nu Chube gerua tragaba kwian na ole nga dba giti, e gdale ama ulita guleda nga dba giti.  
\v 10 Ama ulita ngautu kweri kira giti ene: “Chube, ba cha ulita Chugagwalla, ba kweri trate agenga no ulita, ba diali kle gerule ulia, ba kle age ulita ba kle gerule kare. Cha ulita geru kade bage, ¿ngamangire ba be kwian ulita nga dba giti cha bo daga ngwale cha guda gbe ji chuge cha gdale? ¿Ngaminegire ba be cha jia jwennga kwiange? ¿Mineade ba me ama gbe ji chuge nege ama agedu giti? ¿Mineade ba kle manade tanre?” Kwian Chubenu guleda oña ulita gerudu ene Chube ole.  
\v 11 Ama geru kadu ene Chubege gire ñometra jutre ketre amage tkadale modi, gire gerudre ama ole ama mo undegadale kaire manadale chui sugetidale, gire ene kwian na Chubenu nga dba giti kaire gwabeda ama kare Chube gerua Jesucristo giti dbe gdale, kwian gwabeda be joge chke kwian e kle ngwadi nga ngaña giti ule ulita kwataneke Chube takalin kare, kwian ulita kle ene gire Chube ñage kwian ulita nga dba giti bai kaire kwian Chubenu guda gbe ji chuge daga ngwale ama agedu giti. 
\p  
\v 12 Gire kaire agwe nakwaite Bda Cordero lle chada gatagda gdaderekedale junnga gire sugetibi nga dba giti nga jwliendu tirare kweri kaire kegde chitedu tanre. Kaire chui jwlitu nga jerere ñometra jere jere kare, ngajrege dai chegu dabere be kare.  
\v 13 Kaire agwe beu jaindu nga ngaña giti chku nga dba giti salengwli gligba kada higo lere kle jain mle kle tiennga kiraske kote kare, ene beu jaindu.  
\v 14 Nga ngaña chegu jwanbanga chada jwanklenga bliaklenga kare, kaire agwe jwichuga kaire ngadrega bleske ama ulita onskiendunga chegu me ngeru kare, ulita me chegu nga amañage ngeru kare.  
\v 15-16 Ai ulita boidu ene nga dba giti gire kwian ulita toinga nga dba giti kendunga tanre, ama ulita mo ogoda dbiugage mo ogoda keugage mo ogoda ngaske chru ole. Kwian daba chugagwalla, kwian ulita bai kle mo gbe kweri, guardia donga chugagwalla ulita, kwian lle molen tanre, kwian kle mo sobade daba nadige ama kira molen, kaire kwian ulita lle boanga chugagwalla alin kaire kwian na ulita mo ogoda ene gire gerudu jwichugage kaire kechugage: “Chitede cha ulita giti cha ógeda, ene Chube kle toiba dba toigda kweri no giti nga ngaña giti mi ñage ten chadige kaire ene Bda Cordero mi ñage ji gbe cha ulita giti cha agedu me no gdale.  
\v 17 Uñale chage chui tirare ji chugege chku, Chube kaire Bda Cordero kle ta skochie cha ole cha agedu me no gbale, ¿chema ñage mo jwennga siere agali ama kle ji gbe boi daga ngwale kwian alinge? ¿Chema ñage chege toi gwade ji chuge daga ngwale aige? Ni kwian gdaite ñage kige mo giti.” Kwian ulita gerudu ene jwichuga ole kechuga ole ama kle mo ogabada ngwadi. 
\c 7  
\s1 Kwian israelita chudalla mne gdataboko giti gdaboke kwian ngle mne e ulitage chege 
\s1 gbaba egdage Chube alin 
\p  
\v 1-2 Boidu ene ulita gire cha gwagedu lle boanga Chube alin nga ngaña giti gdabagadi. Lle boanga e kledu jagebanga gdate nga dba giti kagda giti ongoru ongoru. Chui chie ngwange lle boanga gdaite kledu, chui joge ngwange lle boanga gdaite kledu, ñagu lle boanga gdaite kledu, siagu lle boanga gdaite kledu. Ama ulita mle mauñale ñage mle gbe tiennga nga dba giti ama takalin kare nga ulita gbe me no. Agwa ama ulita gdabaga kledu mle gatedadi, ene mle me ñage tiennga nga dba giti nga gbe boi me no, ni bleske gbe boi me no ni gliske gbe boi me no. Ama bebi mle gbe tiennga age me no gire cha gwagedu lle boanga gdaite nadi chie chui chie ngwangege. Lle boanga e kledu chage lle kwian gbagda egdage Chube alin dbe kote, gire ama ngautu kiraske lle boanga na gdabagage kledu biale nga ulita dba gbe me no ulita, ama gerudu:  
\v 3 “¡Manade sugeti! Ba me ñage age me no dbi ole ni ble ole ni gli ole cha bebi kwian Chubenu ulita gbe egdage Chube alin. Cha be chada gbe kwian Chube gerua ganga skadagda giti ama gbe egdage Chube alin gire ba ñage age ba takalin kare lle ulita ole kaire kwian na ulita ole kaire nga dba ulita ole.” 
\p  
\v 4 Lle boanga Chube alin gdaite gerudu ene lle boanga na gdabaga ole gire sugeti cha ologe geru sugedu gerule ene: “Kwian ngle chegu gbaba egdage Chube alin kwian ngle ngle ciento cuarenta y cuatro mil kwian e ulita chieba kwian israelita chudalla mne gdataboko giti gdabokege.” Geru sugedu ene cha ologe gire kwian israelita gbere egdage Chube alin mne gdaite gdaite kaire kaire ene: 
\q1  
\v 5 Kwian israelita unsuialin kada Judá oindalla, mne e kwian ngle doce mil kledu gbaba egdage. 
\q1 Kwian israelita unsuialin kada Rubén oindalla, mne e kwian ngle doce mil kledu gbaba egdage. 
\q1 Kwian israelita unsuialin kada Gad oindalla, mne e kwian ngle doce mil kledu gbaba egdage. 
\q1  
\v 6 Kwian israelita unsuialin kada Aser oindalla, mne e kwian ngle doce mil kledu gbaba egdage. 
\q1 Kwian israelita unsuialin kada Neftalí oindalla, mne e kwian ngle doce mil kledu gbaba egdage. 
\q1 Kwian israelita unsuialin kada Manasés oindalla, mne e kwian ngle doce mil kledu gbaba egdage. 
\q1  
\v 7 Kwian israelita unsuialin kada Simeón oindalla, mne e kwian ngle doce mil kledu gbaba egdage. 
\q1 Kwian israelita unsuialin kada Leví oindalla, mne e kwian ngle doce mil kledu gbaba egdage. 
\q1 Kwian israelita unsuialin kada Isacar oindalla, mne e kwian ngle doce mil kledu gbaba egdage. 
\q1  
\v 8 Kwian israelita unsuialin kada Zabulón oindalla, mne e kwian ngle doce mil kledu gbaba egdage. 
\q1 Kwian israelita unsuialin kada José oindalla, mne e kwian ngle doce mil kledu gbaba egdage. 
\q1 Kwian israelita unsuialin kada Benjamín oindalla, mne e kwian ngle doce mil kledu gbaba egdage. 
\m Kwian e ulita kwian israelita chudalla, ama ulita skadagda giti chada gbere ama gbe egdage Chube alin, ama Chube gerua traganga kwian na ulita ole. 
\s1 Kwian Chubenu guleda nga dba giti Jesucristo gerua gdale ama ulita mo ngama tkaba jutre kle gerule 
\s1 no Chube giti nga ngaña giti 
\p  
\v 9 Kwian israelita e ulita gbere egdage Chube alin nga dba giti gire cha gwagedu kwian na tanredi nga ngaña giti, ama ngleare ni che ñage ama ten. Kwian gweale chudalla nga ulitamuge kaire kwian gweale gerunga kwira ulita kaire kwian gweale toinga nga ulitage, kwian e ulita kledu mo litaba toigda Chube kle toiba dba giti ngnagu kaire Bda Cordero kle toigda e ngena ngnagu. Kwian e ulita kledu mo ngama tkaba ñometra jutreske kaire ama ulita kledu ugananga dbe kote.  
\v 10 Ama ulita ngautu kiraske ene: 
\q1 “Che Chugagwalla Chube kle toiba dba toigda kweri giti kaire Bda Cordero ama gdabonate alin allabi ñage che jwen siere ji chuge daga ngwalege che agedu me no giti. 
\q1 Ama gdabonate kiraske ulita ama ñage age no ulita.” 
\m Kwian ngle gerudu no ene Chube giti kaire Bda Cordero giti.  
\v 11 Lle boanga Chube alin nga ngaña giti ulita kledu jagebanga gdate kwian daba Chubenu chugagwalla juma veinticuatro giti tangle. Kwian daba Chubenu chugagwalla juma e ulita kledu lle gwade gdabaga giti tangle. Ama ulita bongaske Chube kledu toiba dba toigda kweri no giti. Lle boanga Chubenu ulita jongnagwa skutu dba ama mo gwa ñeu gwadbigu dbidi Chube gai dage nga suga no ole,  
\v 12 lle boanga ulita gerudu ene Chube giti: 
\q1 “Che gerudale no che Chubea giti, che no no ama ole, ama ta kle chke uñale lle ulita giti, ama diali agenga no che alin, ama che mananga no. 
\q1 Ama no trate ulita malen che ama gadale dage, ama che Chugagwalla no. 
\q1 Ama kiraske tanre ulita, ama ñage age ulita, ama ma kiraske lle ulitage. 
\q1 Ama be chege lle ulita Chugagwalla kweri diali chui tangle. Ene nobi ulita.” 
\m Lle boanga ulita kle Chubedi tangle gerudu no ene Chube giti. 
\p  
\v 13 Gire kwian daba Chubenu chugagwalla juma veinticuatro gdaite ama geru kadu chage: 
\p —¿Kwian ngle kle mo ngama tkaba ñometra jutreske e chema? ¿Uñale bage e chema? ¿Ama chiu baini? 
\p  
\v 14 Kwian daba Chubenu chugagwalla juma gdaite geru kadu chage ene gire cha jaindunga ama kalen: 
\p —Chage me uñale ama chema, agwa bage uñale. 
\p Gire kwian daba Chubenu chugagwalla juma gdaite gerudu nakwaite cha ole: 
\p —Kwian ai ulita ba kle gwagedi kwian e mo boangu tanre daga ngwale Jesucristo gerua giti ama kledu toi nga dba giti gire, agwa ama chagedu gwangerugu Jesucristo geruadi, ama guleda Jesucristo gerua gai gdale, agwa nege ama kle trate ta no ole Chube gwa giti salengwli ñometra gligakle no kare. Bda Cordero ama Jesucristo ama jokeda salengwli bda cordero gwabada unsuialin tangle kwian age me no giti Chube gwa giti kare. Jesucristo bechiu ama boidu daga ngwale ama jokeda kruge kwian alin. Kwian ñometra jutreske e Jesucristo gerua gau ulia, gire Jesucristo bea giti Chube kwian e ta litu kwian ta gbe trate Chube gwa giti, gire nege ama kle trate ta no ole Chube gwa giti salengwli ñometra gligakle kle chege no trate kare.  
\v 15 Malen kwian e ulita kle Chube gwangnagu Chube kle toiba dba toigda kweri no giti ngwadi, ama ulita kle Chube ole gerule no Chube giti chui ulita ngajudi ngajrege, me kle ka chite gerule no Chube giti. Chube kle toiba dba toigda kweri no giti ama be kwian e ulita manade no be kwian e chudaboi kwian mi boi daga ngwale dare, ama be kle diali Chube ole.  
\v 16 Kwian e ulita mi bli chuge dare, ama mi jogenga dare sie ole kaire ama mi kuge chuira kote dare kaire nga mi chie jute amadi dare. Ama mi boi daga ngwale ama boidu nga dba giti kare.  
\v 17 Bda Cordero kle Chube ngena Chube kle toiba dba ngwadi, Bda Cordero be kwian e ulita manade no salengwli kwian kle bda oveja manade kare. Kwian oveja mananga kle oveja dbe nga noge chi no jai, ene kaire Bda Cordero be kwian e manade no, Chube be kwian e ta gbe nga suga no ole me ta olire dare —kwian daba Chubenu chugagwalla juma gdaite gerudu ene cha ole kwian mo ngama tkaba ñometra jutreske giti. 
\c 8  
\s1 Bda Cordero lle chada gatagda bdagli 
\s1 gdagukedale jwennga 
\p  
\v 1 Gire Bda Cordero lle chada gatagda bdagli gdagukedale junnga gire nga ngaña giti Chube kle ngwadi nga chegu ngwedige ni lle ni nga chegu gdade sidri hora bonga.  
\v 2 Cha gwagedu lle boanga Chube alin nga ngaña giti gdagukedi jagebanga gdate Chube gwangnagu, lle ngwanegda gdaguke ka jwankle trompeta jo ketaba lle boanga gdagukege gdaite gdaite.  
\v 3 Bigire lle boanga na gdaite chku oro dodaba incienso gbangwale giti dbe kote. Lle boanga amaña jagedunga gdate tainkwli oro dodaba lle gugangwale Chube gwa giti kwian age me no giti ngwadi, lle gugangwa e chege tainkwli Chube gwangnagu. Ne ngwadi lle ñachke no kada incienso tanre jo ketaba lle boanga ege. Lle ñachke no e ama gbu lle gugangwa giti gugadale Chube gwa giti. Kwian Chubenu ulita kledu lle gugangwa ngwadi gerule Chube ole gire lle boanga lle ñachke no gbu lle gugangwa giti Chube gwa giti.  
\v 4 Gire lle boanga amaña e lle ñachke no gugu gire lle ñachke no jiangwalla jo Chube gitigu ule kwian Chubenu kerua ole kwian Chubenu gerudu suiage kledu boi daga ngwale nga dba giti gire.  
\v 5 Bigire lle boanga Chube alin amaña jita tan gau lle gugangwage, lle ñachke no gbangwa ama kle dbe kote ama lle e gbu ete jita tan ole, gire ama lle e mliunga ulita gwadbiguda nga dba giti. Jita tan e jwatedunga nga dba giti gire enusulindra gdadu kweri nga ngaña giti kaire nga ko chrachiunga nga gdadu kaire nga jwliendu kote kegde kweri chitedu tanre nga dba giti. 
\s1 Lle boanga Chube alin nga ngaña giti gdaguke ngwane trompetage gdaite gdaite kaire kaire 
\p  
\v 6 Lle boanga Chube alin nga ngaña giti gdaguke kledu lle ngwanegda ka jwankle trompeta dbe kote, ama gdaguke ulita mo gbu biale gdaite gdaite ngwanedale trompetage.  
\v 7 Lle boanga gdaite ngwanedu ngeru trompeta amanuge gire sugeti allabi noi sklieba kweri kweri bialin nga skeke kote kaire jita kledu gwade ule be ole noi eske gire e ulita jo mliaba nga dba giti. Gire nga dba giti nga gweale bonga nate kugedu ngle, kaire gli nga dba giti nga gweale bonga nate kugedu ule ngauda lere ulita ole.  
\v 8 Ai bitaite boidu ene ngerutabi gire lle boanga na gdabokedale ngwanedu trompeta amanuge gire sugeti allabi cha gwagedu lle salengwli jwichuga kweri karedi jwichuga e kledu gwade jitaske jo mliaba bleske, gire e giti ble gweale bonga nate chegu bere ulita,  
\v 9 gire lle ulita kle toi bleske ama ngle bonga nate jokeda be kote kaire du chagegda bleske ngle bonga nate ulita jo skianbada bleske. 
\p  
\v 10 Boidu ene ulita nga dba giti gire lle boanga Chube alin nga ngaña giti na gdamaidale ngwanedu trompeta amanuge gire sugeti allabi beu kweri gbaite jaindu nga ngaña giti chrachiunga jichra kare, beu e jo chke dba chi kweri ngle bonga ngnagu ulitaske kaire beu e jo chke chi gwagwa ngle bonga ngnagu ulitaske.  
\v 11 Beu e kada Beu Gage, beu e jo chke chi kweri batre chi gwagwa dbige batre chi chegu gage ulita me no, kwian chi gage e jau gire kwian tanre jokeda chi kote. 
\p  
\v 12 Boidu ene ulita nga dba giti gire lle boanga Chube alin nga ngaña giti na gdabagadale ngwanedu trompeta amanuge gire sugeti allabi chui gwa jo jere ngle bonga ngnagu, chui me chegu chrachienga no chui kle chrachienga kare. Kaire dai gwa jo jere ngle bonga ngnagu, dai me chegu chrachienga no dai kle chrachienga kare. Kaire beu gwa jo jere ngle bonga ngnagu me chegu chrachienga beu kle chrachienga kare. Ngajudi ngle bonga ngnagu chegu jere ni chui chrachiunga sidri. Ngajrege ngle bonga ngnagu chegu jere dbire ngiskinre ni dai chrachiunga sidri.  
\v 13 Bigire cha gwagedu mu kweria gbaitedi ji chienga nga ngaña giti sui jwennga kweri kwian be boi giti, mu e gerudu kiraske: “Ay, ay, ay, cha tai dage kwian nga dba giti ulitage. Lle boanga Chube alin na gdamai ulita be ngwane trompetage gdaite gdaite gire be boi tirare ulita nga dba giti.” 
\c 9  
\p  
\v 1 Mu e ngautu kiraske ene gire lle boanga Chube alin nga ngaña giti na gdatigadale ngwanedu trompeta amanuge gire cha gwagedu beu gbaitedi jainba nga ngaña giti chkeba nga dba giti, beu e kwian kare. Beu ege nga ugaka degagdanga ketre, ene ama ñage ugaka nga tira dbiugage degenga, dbiuga jere ege ni che gwa joge dbiuga ege bdagli. Gire ene beu e ñage chege nga tira dbiugage chugagwallale.  
\v 2 Bigire beu ugaka nga tira dbiugage degunga gire ne ngwadi cha gwagedu jiangwa tanredi chie bdugu nga dbiugage, jiangwa tanre chiu jondoi salengwli jita teankle ngle jiangwa kle chie kare. Jiangwa tanre e chui gbu gwajoge kaire jiangwa chegu skateba tanre mleske, nga chegu gwajogeba ngaña.  
\v 3 Jiangwa eske sri tanre chiu jo nga dba ulitage, sri e gbere kiraske kwian gbe boi daga ngwale salengwli jebda kle kwian skie kare.  
\v 4 Kaire jo geruba sri e ole ama me ñage age me no ngauda ole me ñage ngauda gute kaire lle ulita kle tige dbiske ngaudale kaire glire ama me ñage gute, agwa kwian bai kaire me kle chage mo gbaba egdage Chube alin me chada Chubenu gbaba ama skadagda giti, kwian ene giti jo geruba sri ole sri ñage age me no kwian gbe boi daga ngwale agwa ngauda ole me agedale sidri age me no.  
\v 5 Kaire jo geru ñachugaba sri ege ama kwian gbe boi daga ngwale tanre dai gdatigage agwa me kwian gdaite gweda. Kwian ulita bai kaire sri kledu gbe boi daga ngwale kwian enedi nga chiu olire tanre, ama skibachiu tanre sri kote salengwli jebda kle kwian skie kwian kle skibachie jebda kote kare.  
\v 6 E suiage kwian tadu jogekalinda blike ama kle ji chugege agwa ama me ñadu jogeda ama tadukalin kare, kwian chegu ji chuge boi daga ngwaleske kwian me jokeda dale.  
\v 7 Sri e kwian gbanga boi daga ngwale chegu salengwli ja dogda gbakle biale dole kare, sri chugage sri oro dodaba sombrerole du mo chugage, ama gwa chegu salengwli kwian gwa kare.  
\v 8 Kaire agwe ama chugaga jeike salengwli muinga chugaga kare, ama dau tirare salengwli gude kweria dau kare.  
\v 9 Kaire sri jegwale ulita lle mno hierro kare giti sri mo ngama tkaba ta ngnagu mo ta managda, sri ulita kledu ji chienga ama jiga gdadu kweri salengwli carro ngle lugakle jadi ja kle kira batege joge dole kle gdade kare ene sri jiga kerua chegenga.  
\v 10 Sri sune kweri kweri bialin jebda sune kare, sune e kiraske sune e giti ñage kwian lendege kwian gbe skibachie tanre sune kote, sri kwian gbe boi daga ngwale sune giti dai gdatigage.  
\v 11 Beu jainba nga ngaña giti chkeba nga dba giti ama sri ulita chugagwalla, beu e ñadu ugaka nga tirare dbiugage degenga sri ulita alin. Kwian kwira hebreole sri chugagwalla ka jwen Abadón, kwian kwira griegole sri chugagwalla ka jwen Apolión, ka e gerule “lle ulita gbanga me no lle ulita skianngadba”. 
\p  
\v 12 Boidu ene tirare ngeru bitaitege tangle, kaire bebi na bitabokege tangle boidale tirare. 
\p  
\v 13 Lle boanga Chube alin nga ngaña giti na gdaderekedale ngwanedu trompeta amanuge gire cha geru gweale keruchugu chie lle dodaba kuda kare gdabaga e kledu oro dodaba lle gugangwale giti, e kledu Chube gwangnagu.  
\v 14 Keru e gerudu lle boanga gdaderekedale trompeta ole kote: “Dolla gdabaga kle lugaba chi kweri ka jwankle Eufrates kagda giti ba ama ulita skajwennga.”  
\v 15 Gerudre ene lle boanga Chube alin ole gire lle boanga Chube alin dolla e gdabaga skajunnga, ene dolla gdabaga ñadu age me no tanre kwian ngle bonga nate ole nga dba giti kwian e ulita gbe jogekeda ulita. Dolla e kledu ogaba biale age me no kwian ole chui ege dai ege chura ege.  
\v 16 Guardia donga tanre chiu chage ja giti dolla gdabaga e nate, gire cha ologe geru sugedu gerule cha ole guardia donga ulita mangire kle chage ja giti, ama ulita ngle ngle ama doscientos millones.  
\v 17 Cha gwagedu ja ulitadi kaire kwian nu skwenba ja gitidi, ama ulita ta giti ama kledu chage lle gweale mno lugaba bonga tangle mo ta managda, lle mno mo ta managda e dabere lenrenre moloinre. Kaire agwe ja chuga salengwli gude chuga kare, jita kle chie ja e kate, kaire jiangwa kle chie ja e kate kaire lle mnuñale kada azufre gwatige jita kare kle chie ja e kate.  
\v 18 Jita kaire jiangwa kaire azufre, ji gdamai e gbere kwian alin ene nga dba giti, gire kwian ngle bonga nate jokeda jita kote kaire jiangwa kote kaire lle mnuñale kada azufre kote. Ji e ulita jo gbabale kwian alin chiu ja kate.  
\v 19 Ai kledu boi tirare ene, kwian tanre kledu lentigeba ji e chiu ja kate giti, ja kate kira tanre kledu, kaire ja skugdage kira tanre kledu. Ja skugda boli giti kwian chegu ji chuge daga ngwale lentigeba, ja skugda salengwli jorisi chuga kare, skugda giti ja kledu kwian gbe lendege salengwli kwian kle lendege jorisige kare.  
\v 20 Kwian tanre jokeda ene ja e agedu me no kote, kwian na dare chegu gwade, ama ulita me mo ta blitu age me no chuge ngwadi, ama ulita chegu age dare me no, ulita chegu che dolla Satanás chudaboangalla gai kweri mo chugagwallale kaire ama chegu lle dodaba mo kodi gai dage chubere, oro dodaba igi dodaba bronce dodaba kechuga dodaba gli dodaba lle e ulita dodaba mo kodi ole ama mo ta gbu no gai dage, lle ngwale e ulita ni ña kwian kerua keruchuge ni ña ten kwiandi ni ña chage, agwa kwian kledu chage lle e ulita dodaba mo kodi ngwale gai dage mo chubea kare.  
\v 21 Kaire kwian me tañachugu mo ta blite Chube ole, ama kledu mo ta gbe age ma me no tanre ngeruge, ama chegu daba gweda gwangerugu ama chegu daba gbe boi daga ngwale dolla kiralla giti kaire ama ulita chegu mo ta gbe mo chuge ke giti diali muinga onbre ole onbre muinga ole, kaire ama mo ta gbu chege skwe boi daba ngeru. Ni kwian talladu boidu me no kwian na ole giti agwa ama chegu toi gwangerugu me no ama tadukalin kare. 
\c 10  
\s1 Juan gwage lle boanga gdaite Chube alin nga ngaña gitidi chie chada na dbe kote nga ngaña giti 
\s1 chke nga dba giti 
\p  
\v 1 Cha gwagedu lle boanga Chube alin na gdaite kiraske tanredi chie nga ngaña giti bogakwaske, ama chuga giti kebita mane kledu chratigenga no ama chuga giti tangle, lle boanga gwa gwadenga chui gwagwa chra kare, ama seragda jita kwira kle urachienga kare.  
\v 2 Lle boanga e kledu chada soli gaite treanbanga ole kote, kaire ama mo sera taingwli gbu ble giti ama sera jole gbu dbi giti,  
\v 3 gire ama ngautu kweri kiraske gude kweri kle lie siroge kare. Ama ngautu kweri ene gire enusulindra gdadu bitagukege, gerudre enusulindraske,  
\v 4 enusulindra gdadu bitaguke e tane giti cha biri chada dege cha geru keruchugu giti gire cha geru keruchugu nga ngaña giti gerule cha ole: “Ba geru keruchugu enusulindra bitagukeske, ba me geru e degadale, ba geru e keruchugu ba geru oge mo tale mo alin.” Gerudre ene cha ole. 
\p  
\v 5-7 Cha gwagedu ene lle boanga gdaitedi kledu sera gdaite gbaba ble giti gdaite gbaba dbi giti, lle boanga e amaña ko taingwli ngnagu gaunga nga ngaña ngnagu geru gbe egdage Chube gwa giti, gire ama gerudu: “Chube toinga chui diali dale chui tangle, Chube nga ngaña dodadu ama nga dba dodadu ama ble dodadu, Chube lle ulita kle nga ngaña giti kaire nga dba ai giti dodadu ulita. Cha gerule Chube gwa giti, chui kle kodi boidale ulita Chube takalin kare. Lle boanga Chube alin gdagukedale be ngwane trompetage gwangea, gire sugeti allabi be chege ulita Chube gerudu kwian Chube gerua ketanga unsuialin tangle ole kare, geru e ulita me sugedu trate kwiange unsuialin tangle agwa nege tangle geru e ulita be chke uñale kwian ulitage.” 
\p  
\v 8 Lle boanga Chube alin gdaite gerudu ene gire keru e amaña gerudu nga ngaña giti cha ama keruchugu gerule cha ole me chada dege giti, gerudu cha ole nakwaite: “Lle boanga kle sera gdaite gbaba ble giti kle sera gdaite gbaba dbi giti kote chada kle treanbanga, joga amadige chada ga kote.”  
\v 9 Gerudre ene cha ole gire cha jo lle boanga gitigu, cha chada soli kadu lle boanga ege, gire lle boanga e gerudu cha ole: “Ba chada ai gai kodi, kaire ba chada ai gute. Ba be chada ai gute, ba kate chada be skwen bage bale likin kare, bigwa ba tadi chada ai be chege gage.”  
\v 10 Lle boanga gerudu ene cha ole gire cha chada soli gau lle boanga kote, cha chada soli e gutu, gire cha kate chada e skwendu bale likin kare, cha chada e gutu gire bigwa chada e chegu gage cha tadi, cha ta jwlitu chada gagedi.  
\v 11 Kaire agwe gerudre cha ole ene: “Ba geru na dbadale nakwaite kwiange Chube be age giti kwian nga tanremu ole kwian chudalla kwira tanremu ole kaire daba chugagwalla nga ulitamu ole. Chube be age kwian e ulita ole giti ba gerudale.” Gerudre ene cha ole ulita. 
\c 11  
\s1 Juan gwage kwian gerunga Chube giti gdabokedi 
\s1 gerule kwian ulita ole una Jerusalénge 
\p  
\v 1 Gerudre ene cha ole gire eskegda gdaite ketre chage nga ñachugagda gire gerudre cha ole ene: “Joga nga ñachugeda u gerungwa Chube olege kaire ba lle gugangwa Chube gwa giti ngwadi ñachugeda kaire ba kwian ten mangire ulita kle mo lite gerule no Chube giti eni u ege.  
\v 2 Agwa ba me nga goga tangle u gerungwa Chube ole ugakallage ñachugeda. Nga e jo ketaba kwian me israelitage malen ba me nga e amanu ñachugadaleda. Kwian me israelita e be chage age me no tanre una no Chubenu kada Jerusalénge dai ngle dai cuarenta y doge (dai e salengwli chura gdamai giti dai gdaderekege kare).  
\v 3 Kaire cha be kwian gerunga cha giti gdaboke kage mo ngama tkaba kwian oli kle mo ngama tke ñometra jereske kare. Ama gdabonate be cha gerua trage kwian ole una ege chui ngle chui mil doscientos sesentage (chui e salengwli chura gdamai giti dai gdaderekege kare).” Gerudre ene cha ole kwian gdaboke giti. 
\p  
\v 4 Kwian gerunga Chube giti gdaboke e ama gli kada olivo kare kaire ama chege salengwli lle jichra gbangwa gdaboke kle che Chugagwalla nga ulita mauñale gwangnagu kare.  
\v 5 Kaire kwian gdaboke e kate jita kledu, jita e ñadu kwian bai kaire mo tke dole age me no ama ole guge, jita e giti ama gdaboke ñadu mo jia jwennga ama dollage ama dolla ulita gweda.  
\v 6 Kwian gerunga Chube giti gdaboke ñadu age kiraske, ama ñadu noi gateda nga ngaña giti ene noi me ñadu boi ama kle Chube gerua trage kwian ole suiage gire. Kaire ama kira molen tanre ama ñadu chi blite bere kaire ama ñadu kwian nga dba giti gbe boi daga ngwale tanre lle tanre me noge ama takalin age kare.  
\v 7 Ama gdaboke e lle bo ulita ama kagle kare ama Chube gerua tragu ulita kwian ole gire nga tira dbiugage lle gdaite me no tirare chiu kira bate gerunga Chube giti gdaboke e ole, lle tirare kirachku gerunga Chube giti gdabokedi lle tirare gerunga Chube giti gdaboke e guda.  
\v 8 Ama gdaboke e guleda ama jaba chegu jon kweri kwian ulita kle chagege una kweri Jesucristo guleda kruge ngwadige una Jerusalénge, kwian toinga una ege agedu me no tanre, malen e giti una e chegu salengwli una unsuialin tangle kada Sodoma kare kaire una e chegu salengwli nga Egipto kare. Kwian una ege agedu me no me no kwian gdaboke gerunga Chube giti e ole malen e kada una Sodoma kare kaire nga Egipto kare kwian kledu age me no giti.  
\v 9 Chui gbamai bongage gire kwian toinga una ege ulita kaire kwian chudalla na ulita kwian gerunga kwira nale ulita nga ulitamuge nga dba ai giti kwian ulita gwagedu kwian gerunga Chube giti gdaboke e jabadi jonke nga ngwalege gire kwian me tadukalin ama gdaboke jaba tkange dbige oge.  
\v 10 Kwian ulita kledu toi nga dba ai gitidi nga sugadu no kwian gerunga Chube giti gdaboke jokeda giti, kwian ulita chegu ta no ole gire kwian lle no ketu moge ongoru ongoru nga suga no ole. Kwian gerunga Chube giti gdaboke e guleda ama kledu gerule Chube gerua giti gdale, malen kwian ulita ta chegu no ama gdaboke jokeda giti, kwian ulitage me skwendu no onbre gdaboke kledu gerule Chube gerua giti kwian jainchku tanre kwian boke edi. 
\p  
\v 11 Agwa chui gbamai jo tangle chui na bonga gire Chube kwian gerunga ama giti gdaboke e gbuni gwadeni, onbre gdaboke e chkuni gdate gire kwian bai kaire ulita gwagedu boidu gitidi kwian ulita e kendunga tanre.  
\v 12 Bigire kwian gdaboke gerunga Chube gitige geru sugedu, amage ngautre kiraske nga ngaña giti, geru sugedu amage ene: “¡Bai aini nga ngaña giti!” Gire ama gdabonate jo nga ngaña giti bogakwaske, ama dolla ulita nu ama gbaba boi daga ngwale ama gwagedu onbre gdabokedi jogeni nga ngaña gitini bogakwaske. 
\p  
\v 13 Kwian gdaboke e joni ene nga ngaña gitini gire sugetibi allabi nga jwliendu kegde chitedu kweri tirare, nga una ege gweale gdaite ulita jo skianbada gire kwian ngle siete mil jokeda nga jwliendu kegde chitedu kbiale. Kwian bai kaire chegu gwade ama ulita chegu ta kennga ole tanre, kaire ama gerudu no Chube giti chru ole ta kenngaske ene: “Chube toinga nga ngaña giti ba kweri kira molen ulia, ba ñage age ulita.” Kwian gerudu no ene Chube ole ta kenngaske. 
\p  
\v 14 Nga boidu tirare bitabokege tangle agwa kaire sugetibi me sbali gire nga be boi tirare na bitamaidale tangle. 
\s1 Lle boanga Chube alin gdagukedale bdagli 
\s1 ngwane trompetage 
\p  
\v 15 Lle boanga Chube alin nga ngaña giti na gdagukedale bdagli ngwanedu trompeta amanuge gire nga ngaña giti keru ngle sugedu gerule kweri kiraske ene: 
\q1 “Nga dba giti ulita kle chege nege Chube che Chugagwalla kote kaire ama Kirolla Jesucristo kote ama kledu gwangea lle ulita dodadubi kare. 
\q1 Chube Jesucristo gbu gwangea kwian ulita nga ulita Chugagwallale ene Chube kaire Jesucristo chege kwian ulita Chugagwalla chui tangle diali.” 
\m  
\v 16 Geru sugedu chage ene gire kwian daba Chubenu chugagwalla juma veinticuatro kledu toiba dba toigda amanu giti Chube gwangnagu, gire ama ulita mo gwa ñeu kaboge ñage dba dbidi gire ama gerudu no Chube ole nga suga no ole,  
\v 17 ama ulita gerudu no Chube ole ene: 
\q1 “Chube, ba cha ulita Chugagwalla kweri, cha gerukalin no ba giti, ba no trate agenga no ulita, ba kiraske tanre. 
\q1 Ba Chube ulia, ba kledu ngeru lle ulita ba dodaduge, kaire ba kle chege diali kira molen lle ulitage. 
\q1 Ba ma kiraske che dollage nege ba kle mo kiralla kweri kaite ba kle chege lle ulita kaire kwian ulita Chugagwalla kweri aige gwangerugu. 
\q1  
\v 18 Kwian toinga nga dba giti me ba gerua ganga ama ulita mo ta gbu skochie badige, agwa kaire chui chku ba mo ta gbe skochie amadige ama kle age me no giti gdale. 
\q1 Nege ba chuia chku ji gbangwa kwian giti, ba be kwian jogebakeda oña bai kaire me ba gerua gaba gbe ji chuge, ba be kwian ulita kagenga kwian bai agedu me no tanre ba dollale ama tadukalin kare nga dba giti, ba be kwian ulita gbe jiske. 
\q1 Agwa kaire kwian bai ulita banu ba be age no ama alin, ama kwian banu ama ulita ba gau dage ulia, ama gweale ba gerua ketanga kaire ama gweale kwian lle boanga no ba alin, kwian e ulita alin kwian juma kaire kirogwa ama ulita alin ba be age no ama agedu no ba takalin kare ñanale.” 
\m Kwian daba Chubenu chugagwalla juma veinticuatro ulita gerudu ene Chube ole nga ngaña giti. 
\p  
\v 19 Gire u gerungwa Chube olege nga ngaña giti u e ugakalla chegu degabanga, gire ne ngwadi gwa u ege cha gwagedu glidrega dodaba unsuialin tangle kwian israelita alin lle ogangwadi, lle ogangwa e toli lle gbaba egdage Chubenu kledu, lle e giti kwian tachke Chube agedu giti ama alin kaire tachke Chube kle diali ama ole. Glidrega dodaba e giti nga kledu ko chrachienga nga gdadu kweri tirare, enusulindra gdadu kaire nga dba giti nga jwliendu kegde chitedu kweri kaire noi boidu tanre noi chegu sklieba mno kweri kweri bialin nga skeke kote chku nga dba giti. 
\c 12  
\s1 Juan gwage muinga gdaitedi kaire ama gwage 
\s1 lle jorisi kare tiraredi 
\p  
\v 1 Cha gwagedu nga ngaña giti be boi tiraredi, muinga gdaite medu chage mo bliaba chuira chrallaske mo ñometra kare, dai kledu ama sera gwaru, muinga chugage lle sombrero kare kledu gbaba, lle sombrero ga giti tangle beu gbataboko giti gbaboke kledu.  
\v 2 Muinga kledu kirogwa suiale ama ole kirogwa be menga, ama kledu ngaute kweri skibachie kote.  
\v 3 Gire cha gwagedu nga ngaña giti nabitaite be boi tiraredi, lle kweri dabere jegwale jorisi kare medu chage, lle e jiga molen sera molen, ama chuga gbaguke molen, ama kuda gdataboko molen kaire lle sombrero kare kledu gbaba chuga gbaite gbaitege.  
\v 4 Ama skugda giti ama beu nga ngaña giti ngle bonga ngnagu mongonga, beu e ulita jo chke dba nga dba giti ulita. Lle jorisi kare tirare beu mongonga ene gire ama jo chke manade biale muinga gwangerudba, kirogwa be menga muinga kote gire lle jorisi kare be kirogwa gute blike.  
\v 5 Muinga e kote kirogwa chku, kirogwa onbre soli, kirogwa e be chege kwian ulita nga dba giti Chugagwalla kiraske tanre. Kirogwa jo jwanbanga muinga kote kirogwa jo dbaba nga ngaña giti Chube kle toiba dba toigda kweri no giti ngwadi Chube alin ene lle jorisi kare tirare me ñadu kirogwa gute ama tadukalin kare.  
\v 6 Gire muinga jo kige nga gballage Chube nu nga gbaba biale muinga alin kigengwa eni. Ama manabe ama ullabe bligdadi chui nglege chui mil doscientos sesenta. 
\p  
\v 7 Bigire lle boanga Chube alin nga ngaña giti kira molen tanre kada Miguel kaire ama chudaboangalla ulita dodu kweri nga ngaña giti lle jorisi kare tirare ole kaire lle jorisi kare tirare chudaboangalla ulita ole dodu lle boanga Chube alin ole.  
\v 8 Agwa lle jorisi kare tirare me ñadu kirachke lle boanga Chube alindi, ama me ñadu chege dare nga ngaña giti kaire ni ama chudaboangalla ñadu chege.  
\v 9 Gire lle jorisi kare tirare jo mliaba siere nga ngaña gitige chku dba nga dba giti ule ama chudaboangalla ulita ole. Lle jorisi kare tirare e ka jwankle Satanás kaire amaña ka jwankle Diablo. Che dolla Satanás e amaña ama kwian Chube dodadu gwangea anblitu gbu age me no unsuialin tangle, che dolla Satanás kwian nga dba giti ulita anblitanga ama kwian ta gbanga age me no. 
\p  
\v 10 Lle jorisi kare jo mliabanga nga dba giti gire cha ologe geru sugedu kweri nga ngaña giti, gerudre ene che dolla Satanás giti: 
\q1 “Ngeru che dolla daba Chubenu ulita gbanga jiske Chubege ngajudi ngajrege Chube gwa giti nga ngaña giti. 
\q1 Agwa nege che dolla jo mliabanga siere nga ngaña gitige sugekare gire ama me ñage daba Chubenu gbe jiske Chubege dare. 
\q1 Noare ulia che Chugagwalla Chube kirachku ene che dolladi. 
\q1 E giti nege chku uñale kwian ulitage Chube ma kweri ulitage Chube kiraske tanre, kaire kwian ulitage chku uñale Jesucristo Chube nu kagaba nga dba giti ama kwian Chugagwalla kiraske tanre. 
\q1  
\v 11 Nga dba giti Jesucristo jo gwabada kwian ulita age me no giti salengwli kwian bda cordero guda kare kwian agedu me no giti ene kwian ñage chege trate Chube gwa giti. 
\q1 E kare ene kaire agwe Jesucristo jokeda kruge, e giti daba Chubenu ñadu kirachke che dolladi, daba e Chube gerua ulia tragu kwian na ole Chube tadukalin kare ama me kendunga kwian be age daga ngwale ama ole Chube gerua gdale giti agwa ulia ama ulita mo ta gbu biale kwian ama gwakalinda Chube gerua gdale. Jesucristo giti ama ñadu age ene kirachke che dolladi. 
\q1  
\v 12 Nga ngaña giti lle ulita kaire kwian ulita mangire batre kle toi nga ege Chube ole, ba ulita nga dbadale suga no ba ulita ñage kirachke che dolladi giti. 
\q1 Agwa ba ulita mangire batre kle toi nga dba giti kaire lle ulita kle toi bleske, ba ulita be olire tanre ba be boi daga ngwale giti. 
\q1 Che dolla chku age me no ba ole nga dba giti, uñale amage chui jo tigenga ulita amage ama tkabe skage gire, malen e giti ama skochie tanre tirare ama agekalin me no ulita.” 
\m Geru sugedu chage ene ulita. 
\p  
\v 13 Lle jorisi kare tirarege sugedu ama jo mliabanga siere nga ngaña gitige chku nga dba giti, gire ama chagedu muinga kirogwa soli onbre manadu nate ama gdea gbe age me no ama ole.  
\v 14 Agwa muinga ege jo jiga ketaba gdaboke kweri salengwli mu kweria jiga kare. Jo jiga e ketaba muingage, ene muinga e ñage kige bate lle jorisi kare ngeru, ama ñage ji chienga nga gballage Chube nu nga gbaba biale ama alinge, ne ngwadi muinga be chege bate sugekare lle jorisi kare tirarege ama manabe bligda ketabe amage ama ullabe chura gdamai giti dai gdaderekege.  
\v 15 Muinga jo kige nga gballage Chube nu gbaba biale ama alin gire lle jorisi kare tirare chi mliunga kate muinga ngnagu ama tadu chi e gbakalin muinga giti, ene chi ñage muinga dbe muinga unjoge chiske.  
\v 16 Agwa dbi gbere skiennga, ene lle jorisi kare chi mliunga kate jo dbi eske ulita, gire ene muinga me boidu dale chi kote.  
\v 17 E giti lle jorisi kare skochiu tanre muingadi ama me ñadu age ole giti. Gire lle jorisi kare muinga chugu ngwadi jo sko ole kira bate muinga oindalla na ole muinga oindalla ulita mangire batre kle age Chube gerua gai dage kle degaba kare, kaire muinga oindalla e kle Chube gerua ulia Jesucristo giti gai dage ulia, muinga oindalla e ama kle age ulita Chube takalin kare. Kwian e kare nate lle jorisi kare chagedu, ama tadu muinga oindalla e kare jwen siere Chube gerua uliage.  
\v 18 Boidu ene ulita gire lle jorisi kare jo jimo ble kagda giti manade. 
\c 13  
\s1 Juan gwage lle bdale ngaske tirare gdabokedi 
\p  
\v 1-2 Lle jorisi kare kledu manade ene jimo gire cha gwagedu bleske lle gude karedi chie ama chadale gude ngaskere, lle e chiu ble kagda ngnagu, ama chuga molen gbaguke kaire ama kuda chieba gdataboko. Ama kuda gdaite gdaite kaire kairege ama kledu lle dodaba sombrero kare gbaba gdaite gdaite mo kuda ulitage. Kaire agwe ama chuga gbaguke giti gbaite gbaite ama kledu chage chada gweale gbaba Chube dollale gerule me no Chubedi. Ama jegwale ulita gude chadale kare agwa ama ko bda ngaske ka jwankle oso ko kare, kaire ama ka ulita chegu salengwli gude kweria ka kare. Lle jorisi kare mo kira ketu lle gude chadale kare ege, kaire ama lle gude chadale kare gbu chege kwian chugagwallale kare age ulita me no ama takalin kare.  
\v 3 Lle gude chadale kare e chuga gbaguke gbaitege medunga chage solale sugaska salengwli ama lentigeba tirare kare ama chege jogebakeda kare agwa ama chuga sola tirare e jo dodaba jo chkeni. Gire kwian ulita toinga nga dba giti ama ulita chegu tañachuge tanre boidu giti ta kennga ole, gire e giti kwian ulita me Chubenu lle gude chadale kare gau mo chugagwallale chagedu ama gerua nate.  
\v 4 Lle jorisi kare lle gude chadale kare gbu chege kweri kiraske age ulita ama kirallaske, malen e giti kwian toinga nga dba giti me Chubenu ulita chagedu lle jorisi kare gai dage gerule no ama giti. Kaire kwian ulita lle gude chadale kare gau dage gerudu no ama giti ene: “¿Chema ñage chege kiraske lle gude chadale e kare? ¿Chema ñage age ulita ama dollale kirachke amadi? Ni kwian gdaite kweri kiraske ama kare.” Kwian ulita lle gude chadale kare gau dage gerudu no ene ama giti.  
\v 5 Kaire lle gude chadale kare tirare ama jo chugaba ngwadi mo sobade dabadi gerule me no jain jain sugaska Chube dollale ama tadu mo gbakalin kweri kwian chugagwallale, kaire ama jo chugaba ngwadi chege kwian chugagwallale age ama takalin kare ama chugagwalla lle jorisi kare kirallaske dai ngle cuarenta y doge.  
\v 6 Lle gude chadale kare agedu ulita ama gbere age kare. Ama gerudu me no Chube dollale ama Chube kalla jun kate ngwale me no, ama gerudu me no Chube ulla dodadre gerungwa Chube oledige kaire ama gerudu me no kwian Chubenudi kwian bai kaire ulita kle toi nga ngaña giti Chube oledi.  
\v 7 Kaire lle gude chadale karege jo kira ketaba age me no mo tke dole kira bate kwian Chubenu ulita toinga nga dba giti ole ama kirachke batre kare, kaire ama chegu kwian chudalla ulita nga ulitamuge kwian gerule kwira na tanrere ulita chugagwallale.  
\v 8 Kwian ulita bai kaire me kle kalla gbaba Bda Cordero chadalla giti kwian e ulita lle gude chadale kare kwian anblitanga gai dage. Gwangeabi Chube bebi nga ulita dodade gire Chubege uñadu kwian bai be Bda Cordero gerua gai ulia kwian bai be geru Bda Cordero jo gwabada kwian age me no ñanale giti gai ulia, kwian e kalla gbere chada giti unsuialin tangle, ene kwian e ñage toi chui tangle diali dale Chube ole. 
\p  
\v 9 Kwian bai kaire geru ai keruchuge, geru sugedale kwiange geru ai kle gerule giti:  
\v 10 Kwian bai kaire daba dbe skage, ama bdagli tkabe skage agedu daba ole ñanale. Kwian bai kaire daba gweda sbadi giti, kwian ene bdagli be joge gwabada sbadi giti ama agedu daba na ole kare. Ai giti sugedale kwian ulita Chubenuge Chube be ama jia gbe kwian bai agedu me no ama ole giti. Malen e giti ulia kwian ulita Chubenu diali kledale nga suga no ole ama kle boi giti, kaire ama mo ta gbadale no trate Chube gwa giti ama kle boi giti Chube ñage ama chudaboi, ama tañachugadale diali Chube giti me e chuge ngwadi. 
\p  
\v 11 Bigire cha gwagedu lle bdale tirare nadi chie bdugu dbiske, ama kuda molen gdaboke ama kuda chke salengwli bda cordero kudadi, agwa ama kerua chegu salengwli lle jorisi kare tirare kerua kare.  
\v 12 Lle bdale e chegu age ulita lle gude chadale tirare kare, agwa ama mo gbu ma soli lle gude chadale kare chudaboangale. Lle bdale e kwian nga dba giti ulita ta gbu lle gude chadale kare gai dage kwian chugagwallale, lle gude chadale kare e amaña solale ama jogebakeda kare agwa ama jo chkeni, gire kwian ulita gbere gerule no ama giti ama gai dage mo chugagwallale.  
\v 13 Kaire lle bdale tirare chieba dbiske ama mo gbu kiraske age tanre daga ngwale kwian gwa gbe modi kwian anblitagda. Ama jita kweri kadu nga ngaña giti chke nga dba giti kwian ulita gwa giti, ulita boidu ama gerudu kare.  
\v 14 Lle gude chadale kare kledu ne ngwadi gire lle bdale tirare jo chugaba ngwadi age tanre daga ngwale ene kwian nga dba giti ulita gwa giti. Lle bdale agedu alin giti allabi ama ñadu kwian ulita anblite ama gerua gai ulia gire ama gerudu kwian ole kwian lle oña dodale mo kodi lle gude chadale oña kare, lle gude chadale kare e kledu lentigeba jabale sbadi kote agwa ama kledu chage toi gwade, kwian lle gude chadale kare e oña dodadale salengwli ama kare ene kwian ulita ñage lle oña e gai chubere gerule no ama giti.  
\v 15 Lle bdale tirarege jo kira ketaba, ene ama lle gude chadale kare oña dodaba mo kodige gbu gwade gire lle oña gerudu kwian bai mi jain lle oña e gai dage lle oña kwian e gwanguda.  
\v 16 Kaire lle bdale tirare ama gerudu kwian ulita ole kirogwa ole kaire kwian juma ole, kaire kwian igi molen tanre ole kaire kwian igia me ole, kwian lle boanga ole kaire kwian chugagwalla ole, lle bdale tirare gerudu kwian ene ulita ole ama ulita ko taingwli giti o ama skadagda giti ama ulita mo chugale ngwadi chada gbange, ene ama chege gbaba egdage ama chugagwalla lle gude chadale kare alin.  
\v 17 Kwian bai kaire mo chugu ngwadi chada gbange mo koge o mo skadagdage kwian ene ñadu lle gige kaire lle chbade. Agwa kwian bai kaire me mo chugu ngwadi chada gbange mo koge ni mo skadagdage ama gbe egdage kwian ene me ñadu lle gige ni lle amanu chbade. Chada gbaba kwian ko giti o kwian skadagda giti chada gdaite e kle gerule lle gude chadale kare kalla mine kaire kle gerule lle gude chadale kare númerolla mine.  
\v 18 Lle gude chadale kare númerolla ene kare: seiscientos sesenta y seis (666). Número e chege kwian númerolla kare, ulia kwian mo ta gbadale tañachuge trate lle gude chadale kare númerolla seiscientos sesenta y seis giti, ene be suge kwian ege número seiscientos sesenta y seis kle gerule mine. 
\c 14  
\s1 Juan gwage kwian ngle ciento cuarenta y cuatro mildi mo gate no Chube giti 
\p  
\v 1 E ulita boidu ene ngeru bigire cha gwagedu Bda Corderodi, Bda Cordero e kledu jagebanga gdate jwichuga kada Sión giti. Bda Cordero ole kwian ngle ciento cuarenta y cuatro mil kledu ama ole ule, kwian ulita e kledu gbaba egdage skadagda giti Chube alin, ama ulita skadagda giti Bda Cordero kalla kledu kaire Bda Cordero Ñenua Chube kalla kledu gbabale kwian giti.  
\v 2 Bigire cha ologe nga keru sugedu chage chie nga ngaña gitige, nga e kledu gdade cha ologe salengwli chi kle ka jwen kare kaire enusulindra kle gdade tirare kare. Kaire kwian tanre kle lle gitarale kada arpa dagenga kare nga kledu gdade salengwli ulita ene lle ai kare.  
\v 3 Gire kwian ngle kledu Bda Cordero ole ama ulita kledu mo gate no geru jagere giti Chube kle toiba dba toigda kweri no giti gwangnagu, kaire kwian e kledu mo gate lle gwade gdabaga gwa giti kaire kwian daba Chubenu chugagwalla juma veinticuatro ulita gwa giti. Kwian ngle e ciento cuarenta y cuatro mil alin allabi ñadu geru mo gatakle giti e jagere jwen, ni kwian na gdaite ñadu jwen. Kwian ciento cuarenta y cuatro mil e jo jwanbanga kwian me no nga dba gitiske Jesucristo giti, ama jo dbaba nga ngaña giti Chube kle ngwadi, kwian e alin allabi ñadu mo gate no ene.  
\v 4 Kwian ngle e mo gatanga geru no jagere giti ama ulita me chageba muinga ole mo muingalla kare ni bitaite, ama ulita e toiba trate Chube gwa giti, ama ulita kledu chage Bda Cordero gerua nate ama jo baini kaire Bda Cordero jo ngwadi. Ama ulita jo jwanbanga Bda Cordero giti kwian agenga me noske ngerutabi, ene kwian e chegu gbaba egdage Chube alin kaire Bda Cordero alin.  
\v 5 Kwian e ni geru jinadu bitaite ngwale dabadi, ulia Chube gwa giti ama ulita trate ni ama jiske sidri Chube gwa giti. 
\s1 Juan gwage lle boanga Chube alin nga ngaña giti gdamaidi Chube gerua kete kwiange 
\p  
\v 6 Kaire cha gwagedu lle boanga Chube alin gdaitedi ji chienga ngaña tangle, ama kledu chage Chube gerua chui tangle dale kwian jwangda siere ji chuge age me no gdale ole, ama kledu chage geru e dbe ketadale kwian ulita toinga nga dba gitige kwian chudalla nga ulitamuge gerunga kwira na ulitamulege, ama ulitage lle boanga Chube alin kledu Chube gerua e kete.  
\v 7 Ama kledu gerule kiraske ene: “Ulia chui ji chugalege chkubi Chube be ji gbe kwian ulita agenga me no giti, malen ba Chube gadale dage ba Chube gerua gbadale gdadi. Ma no ba mo ta blite ba mo gate no Chube giti gerule no Chube giti, ama nga ngaña dodanga ama nga dba dodanga ama ble dodanga ama chi gwagwa dodanga, ama lle ulita dodanga ba ama gadale dage ba gerudale no ama giti.”  
\v 8 Lle boanga Chube alin ngeru gdaite gerudu ene, gire lle boanga na gdabokedale lle boanga ngeru ka junnga gerule dare, ama gerudu ene: “Ulia ulia una kweri una Babilonia chegu skianbanga ulita, chegu me no kwian agedu me no kbiale, kwian toinga una ege ama kwian na nga ulitamu gbu boi daga ngwale age me no tanre gire e giti Chube ji gbu kwian una Babiloniamu giti.”  
\v 9-10 Lle boanga gdabokedale gerudu ene gire lle boanga na gdamaidale gerudu kaire agwe kiraske kweri ene: “Kwian ulita bai kaire lle gude chadale kare gai dage gerule no ama giti kaire lle gude chadale kare oña dodadre mo kodi gai dage mo chubeale kaire kwian mo chuge ngwadi gbange egdage lle gude chadale kare alin chada gbe kwian skadagda giti o kwian koge, kwian ene kare ulita be ji chuge me no tirare. Chube skochie kwian kle mo tke dole ama ole giti gire Chube be ji gbe kwiange tirare mno, kwian be ji chuge tirare jitaske kaire lle mnuñale kada azufreske kwian e be chege salengwli kwian kle lle gage jai kle joge llale kare, ama be chege ji chuge tirare ene. Ji be kle gbaba kwian giti ene lle boanga Chube alin ulita gwa giti kaire Bda Cordero gwa giti, ji be kle chui tangle kwian agenga me no giti.  
\v 11 Jita tirare be kwian gbe boi daga ngwale jita e jiangwalla be chege bdugu diali chui tangle ni chui gbaite be kle kwian alin undege ji chugege, ni ngajrege ni ngajudi kwian be ñage undege ji chugeske, ji chuge jitaske be chege diali chui tangle kwian alin. Kwian bai kaire be lle gude chadale kare gai dage gerule no ama giti kaire be lle gude chadale kare oña dodadre gale dage mo chubeale kaire kwian mo chuge ngwadi gbange egdage dolla e kalla giti, kwian e ulita giti ji gbabe tirare ene.” Lle boanga gdamaidale gerudu ene ulita. 
\p  
\v 12 Cha gerule ba ole, be boi ene ulita malen kwian Chubenu ulita bai kaire kle age Chube gerua kle gerule kare kaire kle mo ta gbaba Jesucristo gerua gai gwangerugu diali, kwian ene ulita mo ta gbadale jage ta no ole ama kle boi daga ngwaleske. 
\p  
\v 13 Gire cha ologe geru sugedu chage nga ngaña giti gerule cha ole kiraske ene: “Ba kle geru keruchuge ba ai degadale: Nga suga nodale kwiandi aige gwangerugu kwian bai kaire Jesucristo gai ulia jogekeda ama be toi no Jesucristo ole.” Cha gbere chada dege ene ulita gire Chube Oña jaindunga gerudre cha ole kalen: “Ima ba gerudu ulia, kwian bai kaire Jesucristo gai ulia jogekeda ama be joge toi nga noge undege ama lle bo no Chube alin giti, kaire Chube be age no ama alin ama lle bo no Chube alin ñanale.” Chube Oña gerudu ene ulita. 
\s1 Juan chada dege chude giti kaire uva giti, geru ai 
\s1 kle gerule kwian me Chubenu be boi giti bdagli 
\p  
\v 14 Cha gerule ba ole, Chube cha ta gbu chada dege chude giti kaire uva giti, geru ai kle gerule Chube be age mine kwian ole ji chuge tirare chuiage bdaglige ene: Cha tienduda ngaña gire cha gwagedu bogakwa jutredige, bogakwa e giti kwian kledu gdaite toiba dba, ama kledu oro dodaba sombrerole gbaba mo chugage, kaire ama kledu sbadi dau degaba no trate dbe mo kote.  
\v 15 Gire cha gwagedu nga ngaña giti u gerungwa Chube olege lle boanga Chube alin gdaite chiu jondoi, ama ngautu kweri kiraske kwian kledu bogakwa gitige ene: “Chude skute chuia chku, chude ulita jo dabe nga dba giti, ba mo sbadilla gai, joga chude e skute ulita.”  
\v 16 Gerudre ene gire kwian kledu toiba bogakwa giti ama mo sbadilla gau ama chude skutu ulita nga dba giti gire ama chude dabe ulita litu ole.  
\v 17 Gire lle boanga Chube alin na nga ngaña giti chiu jondoi u gerungwa Chube olege ama kaire jo sbadi kweri dau degaba trate dbe mo kote.  
\v 18 Bigire lle boanga Chube alin na chiu jondoi lle gugangwa Chube gwa giti ngwadige, ama jita mananga ne ngwadi, ama ngautu kweri kiraske gerudu lle boanga na kledu chage sbadi dau degaba trate olege ene: “Uvagba ulita jo dabe nga dba giti, ba uvagba litadale ulita.”  
\v 19-20 Gerudre ene gire lle boanga Chube alin gdaite agedu gerudre ama ole kare, ama uvagba nga dba giti litu ole ulita gire ama uvagba e gbu ule ulita uvagba ugakle ngwadige una kweri gwagda giti, ene uvagba uganga ñadu uvagba uge ne ngwadi gire uva chia ulita chiu ngle. Geru uvagba giti ai kle gerule ene: Chube be ji gbe tirare kwian agenga me no giti salengwli lle boanga uvagba litu ole kare. Uvagba ugle gire uva chia chiu tanre, e salengwli Chube be ji gbe tirare kwian be bechieda tanre ji Chube be gbe kote, be be chege jrite ngle chi kweri kare bega ñage ngaña ja ka ole salengwli, kaire be e be chege jrite kwa kweri jeike jondoi kilómetro trescientos. Chube be ji gbe ene ulita kwian be ji chuge tanre daga ngwale ama agedu me no giti. 
\c 15  
\s1 Juan gwage lle boanga Chube alin gdagukedi chie jondoi u gerungwa Chube olege nga ngaña giti 
\p  
\v 1 Bigire cha gwagedu nakwaite nga ngaña giti be boi tiraredi, cha gwagedu lle boanga Chube alin gdagukedi lle boanga e kledu biale ji tirare gdaguke gbe bdagli kwian ulita nga dba giti alin agedu me no giti, ege dare Chube mi mo ta gbe ji tirare gbe kwian giti dare.  
\v 2 Kaire cha gwagedu lle nodige ble ngwedige kare e chegu chi oña kare, kaire ble eske jita kledu, lle ble kare e kagda giti kwian ngle kledu jagebanga gdate. Kwian e ulita mo ta gbubi me lle gude chadale kare me no gai mo chugagwallale kaire ama mo ta gbubi me lle gude chadale kare oña ngwale gai dage chubere kaire ama me mo chugu ngwadibi mo gbange egdage lle gude chadale kare chadalla seiscientos sesenta y seis (666) ni lle gude chadale kare kalla gbe mo koge ni mo skadagdage, ama ulita mo ta gbubi Chube giti. Kaire kwian e kledu lle gitarale dagalenga kada arpa Chube nu ketaba amage dbe mo kote.  
\v 3 Ama ulita Bda Cordero gerua ganga kledu mo gate no Chube giti Chube ama jun siere ama dollage giti salengwli kwian unsuialin tangle Chube gerua Moisés nu degaba ganga mo gatu no Chube giti Chube ama jun siere ama dollage giti kare, ama ulita kledu mo gate no Chube alin ai kare: 
\q1 “Chube, ba cha ulita Chugagwalla kweri, ulia ba noare ba kweri ba kiraske ba agenga no diali, ba kle age ulita ba kle gerule kare, ba ulia no, cha gerule no ba giti diali. 
\q1  
\v 4 Ba cha Chugagwalla kweri, kwian ulita mo ta dbe kwachie ba ngeru, kwian ulita be tachke ba gai dage, gire kwian be gerule no ba giti ba gai dage, ni kwian gdaite be chege kamne ba ngeru. 
\q1 Cha gerule ulia no ba giti ba alin allabi kweri no trate agenga no diali, kaire kwian nga ulitamuge be mo lite be gerule no trate ba giti.” 
\p  
\v 5 Kwian mo gatu no ene ulita Chube alin gire cha gwagedu u gerungwa Chube oledi nga ngaña giti, u e ugakalla kledu degabanga ulita, u skieru nga no no kledu, ne ngwadi lle kwian ta gbagda Chube agedu no kwian alin giti kledu gbaba eni.  
\v 6 U gerungwa Chube olege lle boanga Chube alin gdaguke chiu, ama gdaite gdaite chiu ji tirare gdaguke dbe gbadale kwian ulita nga dba gitige alin. Ama ulita chiu u gerungwa Chube olege mo ngama tkaba ñometra jutre gwadenga no noske kaire oro dodaba kwa kweri ama giti mo lugabada bonga tangle joge ngaña kudegda giti.  
\v 7 Lle gwade gdabaga ama gdaite oro dodaba jogda kare ketu gdaite gdaite lle boanga Chube alin gdaguke ulitage. Chube toinga chui tangle ji amanu tirare gbaba lle jogda kare gbaguke tadi jo ketaba lle boanga gdaite gdaitege kwian boagda daga ngwale kwian agedu me no gdale.  
\v 8 Chube jiangwa gbu u gerungwa Chube olege nga ngaña giti gwa, Chube ulia ama kweri kiraske tanre, malen Chube kledu ngwadi jiangwa skatedu tanre uge skieru ama kiralla giti, nga ege ulita chegu jiangwaske, gire ni gdaite ñadu joge nga ege. Lle boanga Chube alin gdaguke be ji tira gdaguke gbe ulita kwian giti, e ulita be bidege gire ulita ñage joge gwa u ege nga ngaña giti. 
\c 16  
\s1 Chube lle boanga amanu gdaguke kage ji tirare gbaba lle jogda kare tadi gbe kwian agenga me no giti 
\p  
\v 1 Cha geru keruchugu gerule kweri kiraske, geru e kledu chie u gerungwa Chube olege nga ngaña giti, geru sugedu chage gerule lle boanga gdaguke ole ene: “Ba ulita gdaguke gdaite gdaite jogedale nga dba giti ji gdaguke Chubenu ulita jo gbaba lle jogda kare gbaguke tadi dbe gbale kwian ulita giti.” Cha geru keruchugu gerule ene ulita lle boanga Chube alin gdaguke ole.  
\v 2 Gire lle boanga Chube alin gdaite jo nga dba giti ngeru ji tirare Chubenu dbe gbale kwian giti, ji tirare e kledu jogda tadi lle boanga ji e otoda dbi giti. Ama ji Chubenu gbu kwiange kwian bai ulita kaire mo chugaba ngwadi gude chadale kare chadalla gbange ama koge o ama skadagdage, kaire bai lle gude chadale kare oña ngwale gau dage mo chubeale, kwian ulita edi jingme tirare sugaska chku, jingme ama ulita gbu tuge chege solale skibachie tanre. 
\p  
\v 3 Ngeru boidu ene gire lle boanga Chube alin na gdabokedale jo nga dba giti ji tirare Chubenu dbe gbale kwian giti, ji tirare e kledu jogda tadi, lle boanga ji e otoda bleske gire chi bleske chegu bere kwian jaba kle bechie kare, gire lle bdale ulita kledu toi bleske ulita jokeda be e kote. 
\p  
\v 4 Boidu ene gire lle boanga Chube alin na gdamaidale jo nga dba giti ji tirare Chubenu dbe gbale kwian giti, ji tirare e kledu jogda tadi, lle boanga ji e otoda chi kweria ulitaske kaire chi gwagwa ulitaske gire chi kweria ulita kaire chi gwagwa dbige ulita chegu bere. 
\p  
\v 5-6 Boidu ene nga dba giti gire lle boanga Chube alin chi mananga cha ama keruchugu gerule Chube ole ene: 
\q1 “Chube, ba no trate, ba kledu ngeru lle ulita ba bebi dodadege kaire ba amaña kle nege tangle trate, ba kle age ulita trate ba takalin kare. 
\q1 Ba kle ji gbe kwian ulita giti ama ulita agedu me no ba dollale giti ama ulita ji chugadale nege agedu me no gdale. 
\q1 Kwian me no ba dollale kwian ngle banu guda kaire agwe kwian ba dollale kwian ngle ba gerua ketanga dabage guda agwa nege ba kle kwian banu jia gbe kwian me no ulita giti, nege ba kle kwian me no gbe boi daga ngwale kwian banu jokeda gdale, ba chi ulita gbu jwlite bere kwian age me no alin jadale. 
\q1 Ba kle ji gbe kwian me no giti ene, e no kwian agedu me no ulita alin, nege ba kle kwian banu ulita jia jwennga. 
\q1 Kwian me no agedu me no kwian banu ole e ñanale ama ulita ba kle gbe ji chuge.” 
\p  
\v 7 Lle boanga Chube alin chi mananga gerudu ene Chube ole, kaire cha geru keruchugu chie lle gugangwa Chube gwa giti ngwadige gerule ene: 
\q1 “Chube cha Chugagwalla, lle boanga ngeru chi mananga gerudu ba ole kare e ulia, cha ama ka chudaboi, cha gerule ama kare ba ole. 
\q1 Chube, noare ba kle age no ene ulita, ba kweri kiraske ba agenga no kwian agenga no alin, ba kle kwian me no gbe ji chuge ama agedu me no ulita giti, ba ulia ñage ji gbe trate kwian ulita giti ama agedu me no ñanale.” 
\m Gerudre ene Chube ole. 
\p  
\v 8 Bigire lle boanga Chube alin na gdabagadale jo ji tirare Chubenu dbe gbale kwian giti, ji tirare e kledu jogda tadi, lle boanga ji e otoda chui giti, chui chratigunga jita kare kwian ulita kugedu chui chralla kote.  
\v 9 Gire kwian ulita chegu kugeba tirare jabale jita kote agwa ni kwian mo gbu mo ta blite Chube ole Chube gai dage ni mo ta gbu gerule no Chube giti. Chube ji gbu tirare giti gdale kwian ulita ta skochie tanre gerudu me no Chube dollale sugaska dare. 
\p  
\v 10 Gire lle boanga Chubenu na gdatigadale jo ji tirare Chubenu dbe gbale kwian giti, ji tirare e kledu jogda tadi, lle boanga ji e otoda lle gude chadale kare kle toi ngwadige giti gire kwian ulita amanu chegu nga jereske ji e kote. Kwian ulita chegu boi daga ngwale skibachie tanre ji e kote, ama mo gutu kwirage skiba kote,  
\v 11 kwian e ulita chegu solale skibachie tanre, ulita boidu ene tirare agwa ni kwian mo ta blitu age no, kwian chegu age dare me no, kaire kwian gerudu me no Chube toinga nga ngaña giti dollale, ama ulita gerudu me no Chube dollale Chube ji gbu ama giti gdale. 
\p  
\v 12 Boidu ene ulita gire lle boanga Chube alin na gdaderekedale jo nga dba giti ji tirare Chubenu dbe gbale kwian giti, ji tirare e kledu jogda tadi, lle boanga ji e otoda chi kweria kada Eufratege, gire chi kweria e chegu junbatebanga. Chi e kledu ngwadi nga chegu ulen chegu tkaba jonle chagegda, ene kwian chugagwalla ulita be chie chui chie ngwange ngnagu ñage joge tangle chi kweria ege mo litadale Chube dolla na ulita ole.  
\v 13 Kaire cha gwagedu dolla oña me no gdamaidi, dolla oña me no e ulita chegu salengwli bodrega kare. Dolla oña me no gdaite chiu lle jorisi kare tirare kate, na gdaite chiu lle gudere kate, na gdaite chiu lle bdale kate, lle bdale e ama lle jorisi kare ka chudaboanga ama kwian anblitanga ngwale geru ngwaledi. Dolla oña me no gdaite gdaite chiu bodregale lle gdamai me no e kate.  
\v 14 Dolla oña me no gdamai e nu chieba che dolla Satanáge, ama ulita kledu age tanre mo chugagwalla Satanás kirallaske ama ulita lle daga ngwale no tanre dodadu kwian gwa giti. Dolla oña gdamai e jo nga ulitage kwian chugagwalla nga ulitamu ta gbe mo lite ule kwaitre alin mo gbe biale Chube dollale kira batale Chube chuiage Chube ole. Chui ege Chube gdaitre alin kiraske tanre be mo kira kaite nate kwian ulitage Chube kira molen tanre be kirachke dolla kiralla ulitadi. 
\p  
\v 15 Cha gerule ba ole, ba tachkedale Jesucristo gerudu kare ene: “Ba kledale biale ni be uñale kwiange gire cha be chieni nga dba ai giti blike kwian skwe boanga kle chie kare. Kwian bai kaire be skwen chage gwade me gbeba ama be kle biale cha manade ngwange cha be chieni chuiage, ama kle biale kare mo ngama tkaba ñometraske kare, kwian edi nga be suge noare ama mi chege ibule mo giti kwian kle chage taglale kwian na gwa giti kare.” Jesucristo gerudu ene ulita ama be chieni chuia giti. 
\p  
\v 16-17 Dolla oña bodrega kare gdamai kwian chugagwalla nga ulitamu litu ole ulita kwaitre alin nga kadakle kwian israelita kwirale Armagedón. Nga ege kwian chugagwalla ulita litre ole gire lle boanga Chube alin na gdaguke bdaglidale jo ji tirare Chubenu dbe gbale kwian giti, ji tirare e kledu jogda tadi, lle boanga ji e otoda ngaña mleudage, gire u gerungwa Chube ole nga ngaña gitige gerudre kweri kiraske, Chube kle toiba dba ama toigdalla kweri giti amaña gerudu ene: “Cha Chube cha ji ai gdaguke ulita gbu oteda kwian ulita gbe ji chuge.”  
\v 18 Chube gerudu ene ulita gire sugetibi nga ko chrachiunga, kaire enusulindra gdadu kweri gire kaire dbi jwliendu kweri tirare kegde chitedu kweri ni nu boiba ngeru ene bitaite Chube kwian gwangea gbu toi nga aige gwaigudage.  
\v 19 Chube nga gbu jwlien tirare ene gire una kweri Babiloniage skiendunga bitamaige tangle, Chube me ta jonga una Babiloniage kwian una ege kle age me no me no giti, Chube ta skochiu tanre kwian agedu me no tanre sugaska Chube dollale gdale, gire Chube ji gbu tirare kwian una emu giti ene. Kaire una nga dba giti ulita skiendunga ulita jo dba chegu me no.  
\v 20 Gire ngadrega ulita kledu bleske kaire jwichuga ulita jonga me chegu ngeru kare.  
\v 21 Kaire nga ngaña giti noi sklieba nga skeke kote tanre bolole kweri kweri jaindu tirare chku dba kwian giti. Noi sklieba gbaite gbaite kweri kweri gaba tanre, ama gbaite gbaite gaba lle quintal gdaite llagli kare. Chube ji gbu tirare ene kwian ulita giti agwa kwian me mo ta blitu Chube ole. Kwian gerudu ma me no gwangerugu Chube dollale Chube noi gbu jain kechuga kare nga ngaña giti gdale. Chube ji e tirare gbu kwian ulita alin, e giti kwian ulita ta skochiu tanre Chubedi. 
\c 17  
\s1 Juan gwage muinga chagenga onbre tanre oledi 
\s1 ji chuge age me no giti gdale 
\p  
\v 1 Lle boanga Chube alin gdaguke chagedu lle jogda kare gbaguke dbe kote gdaite gdaite ama agedu ulita ama kagle kare, gire lle boanga e gdaite chiu cha gitigu gerudu cha ole: “Bai aini cha be ji kweri Chubenu kaite bage, ji kweri tirare cha be gbe muinga gdaite chagenga kwian onbre tanre ole giti, muinga e kle toiba dba chi tanre giti nga dba giti, muinga e chege salengwli una kweri gdaite kare kwian chugagwalla kweri ulita una emu chege kwian chugagwalla nga dba giti ulita kaganga kare.  
\v 2 Kwian chugagwalla ulita nga ulitamu nga dba giti chageba muinga e ole ke giti mo muira kare, kaire kwian na ulita kle toi nga dba giti ama ulita kle chege kwian llale kare age me no muinga e ole ke giti mo muira kare.”  
\v 3 Lle boanga gdaite gerudu ene cha ole, gire Chube Oña chku chadige, cha chegu ama kirallaske. Gire lle boanga gerudu cha ole ngeru amaña cha du nga gballage. Ne ngwadi cha gwagedu muingadi skwenba lle gude chadale dabere kare giti, lle gudere e chuga molen gbaguke kaire ama kuda molen gdataboko, lle gudere e jegwale ulita chada kledu degaba chada e gerule me no sugaska Chube dollale.  
\v 4 Muinga cha gwagedudi muinga e kledu mo ngama tkaba ñometra chada drega bokeske ñometra chada lénrenngaske kaire ñometra chada dabereske, muinga e kledu mo gbagataba lle no ulita giti, oro chrachienga no kwangle kaire lle igigwale gba kweri kada perla kaire kechuga soli ñanaske tanre ama nu tkaba mo jegwale ulita, ama kledu mo dodaba no trate ulita ene. Muinga e kote muinga kledu oro dodabale jogdale dbe, lle jogda kare e tadi lle tanre me no sugaska tañachugagda jain jain me no onbre giti muire giti kledu. Muinga e agenga me no tanre mo chuge onbre tanre ole ke giti.  
\v 5 Muinga e skadagda giti chada gweale kledu degaba, chada e kwian gbu tañachuge, me sugedu kwian nage chada e kle gerule llema giti, chada kledu degaba muinga e skadagda giti ene: “Muinga ai kada una kweri Babilonia kare. Muinga ai chege muinga na chagenga onbre tanre ole chebiale, kaire muinga ai kwian ulita agenga me no sugaska chebiale age me no giti.” Chada kledu degaba ene muinga e amaña skadagda giti.  
\v 6 Bigire sugedu chage muinga agedu me no kwian Jesucristo gerua ganga ulia ole, muinga kwian Jesucristo ganga tanre guda nga suga no ole Jesucristo gerua gdale. Gire muinga e chegu kwian llale kare kwian Jesucristo gerua ganga ulita beadi. Cha gwagedu ulita muinga edi boi ene, gire cha chegu tañachuge tanre muinga giti mineade kle boi ene.  
\v 7 Lle boanga Chube alin gwagedu chadi tañachuge tanre gire lle boanga gerudu cha ole ene: “¿Mineade ba kle tañachuge tanre ba gwagedudi giti? Cha be ba ta gbe suge moge muinga e giti chada kle gerule mine ama giti, cha ba ta gbe lle gude chadale kare kle muinga dbe giti, lle gudere e chuga gbaguke molen kaire ama kuda gdataboko molen, e ulita giti cha be ba ta gbe.  
\v 8 Lle gude chadale kare ba gwagedudi e amaña kledubi toi unsuialin tangle agwa nege lle gude chadale kare me kle toi, agwa ulia lle gude chadale kare e kle nga tira dbiuga jerege ama be chie bdugu nga ege, gire ama kagabe bdagli boi daga ngwale ma tirare ama gwabeda. Kwian ulita toi nga dba giti bai kaire ama kalla me kle degaba chada Chubenu giti Chube nga ulita dodadu gwangeabi gire, kwian e me Jesucristo gerua ganga me ñage toi chui diali dale chui tangle Chube ole, kwian e kare ulita be chege tañachuge tanre lle gude chadale kare e giti ama toiba ngeru giti, nege ama me kle toi agwa amaña be meñe nate gwade chui bdaglige. E giti kwian me Chubenu be tañachuge tanre. 
\p  
\v 9 Nege ba geru ai keruchugadale no cha be gerule ba ole giti, geru ai cha be gerule giti ba mo ta gbadale chke uñale trate geru ai giti. Lle gude chadale kare chuga gbaguke molen, chuga e ulita chege jwichuga gdaguke kare muinga kle toiba dba giti. Kaire e amaña chuga gbaguke e chege chugagwalla nga dba giti gdaguke kare.  
\v 10 Chugagwalla gdaguke ege gdatiga me kle chege kwian chugagwallale nege tangle ngeru kare agwa gdaite kle chege kwian chugagwallale nege, agwa na gdaite be chke bdagli ama bebi chege kwian chugagwallale, ama be chie agwa ama mi chege kwian chugagwallale chui sbali.  
\v 11 Lle gude chadale kare toidu gwade ngeru agwa nege me kle toi, agwa chui bdaglige ama be chkeni gwade chugagwalla gdapadale, ama gdaite be chie chugagwalla na gdagukege. Ama be chege kwian ulita chugagwallale sugetidale alin allabi me chui tangle, gire ama kagabe boi daga ngwale tirare gwabeda bdagli. 
\p  
\v 12 Agwa kaire agwe lle gude chadale kare tirare kuda gdataboko molen ba gwagedudi, kuda e chege salengwli kwian chugagwalla gdataboko kare nga dba giti, chugagwalla e ulita bebi chege kwian chugagwallale, ama ulita gbabe kwian chugagwallale sugeti hora gbaitre alinge ule lle gude chadale kare ole, ama ulita gbabe kiraske tanre kwian ulita chugagwallale nga dba giti sugetidale alin.  
\v 13 Chugagwalla gdataboko ulita e be tañachuge ule salengwli ulita, ama ulita be lle gude chadale kare gai mo chugagwallale ama be lle gude chadale kare gbe ma kweri moge kwian ulita chugagwallale be ama chuge ngwadi age ama takalin kare.  
\v 14 Lle gude chadale kare tirare kaire chugagwalla gdataboko ulita ama skatemanallale, ama ulita be kira bate Bda Cordero dollale, agwa ama mi ñage kirachke Bda Corderodi. Bda Cordero kweri kiraske ama kwian Chugagwalla kweri ma no chugagwalla na ulitage, malen lle gude chadale kare kaire lle gude chadale kare skatemanalla ulita mi ñage kirachke Bda Corderodi. Bda Cordero be kirachke lle gude chadale karedi kaire lle gude chadale kare skatemanalladi. Kaire kwian mangire batre bai kaire Chube nu gaba mau alin, ama ulita Jesucristo gerua gau ulia ama kle age Chube takalin kare, ama ulita be kle ule Bda Cordero ole kirachke dolladi.” Lle boanga gerudu ene ulita cha ole. 
\p  
\v 15 Gire lle boanga gerudu dare chage ene: “Chi ai ulita ba gwagedudi muinga chagenga kwian onbre tanre ole kle toiba dba giti, chi e ulita salengwli kwian ulita toinga nga dba giti kare, kwian chudalla nga ulitamu gerunga kwira na ulitamule, ama ulita chege salengwli chi e muinga kle toiba dba giti kare.  
\v 16 Kaire agwe lle gude chadale kare kuda gdataboko ba gwagedudi, kuda e chege salengwli kwian daba chugagwalla kare. Chugagwalla ulita e kaire lle gude chadale kare be mo tke dole muinga e dollale, kaire ama ulita be muinga e chuge ngwadi gballa be lle ulita jwennga ama ngeru kaire muinga e jigabe me ngamaske gire muinga e be chege boadalenga daga ngwale, ama uda jegwale ulita gutabe, ama gugabe ulita jitaske.  
\v 17 Chube be kwian chugagwalla gdataboko e ta gbe ule ulita age Chube takalin ama age kare muinga ole, Chube be kwian ta gbe lle gude chadale kare gbe mo chugagwallale ene be chege boiba ulita Chube gerua kle gerule kare.  
\v 18 Muinga ba gwagedudi muinga e chege salengwli una kweri gdaite kada Babilonia kare ama chugagwalla na ulita nga dba ai giti kaganga.” Lle boanga Chube alin gerudu chage ene ulita una Babilonia giti. 
\c 18  
\s1 Chube ji kweri gbe kwian ulita una Babiloniamu giti kwian una emu agedu me no gdale 
\p  
\v 1 Bigire cha gwagedu lle boanga Chube alin nadi lle boanga e chiu dbige nga ngaña giti chie nga dba ai giti, ama kiraske tanre, ama chralla tiendunga nga ulitage gire nga dba ai giti ulita chegu nga chra no giti lle boanga e chralla giti.  
\v 2 Lle boanga e ngautu kiraske kweri ene: 
\q1 “Ulia ulia una kweri Babilonia chegu skianbanga ulita, chegu me no kwian toinga una ege agedu me no kbiale. 
\q1 Una e chegu dolla oña me no ngle che dolla Satanás chudaboangalla toingwallale kaire una e chegu bdada ulita ji giti me no sugaska jwiale. 
\q1  
\v 3 Una bebi joge skianbanga gire kwian toinga una Babiloniage age salengwli muinga chagenga onbre tanre ole kare, kwian una Babiloniamu kwian na nga ulitamu gbu boi daga ngwale age me no tanre ama kledu age kare. 
\q1 Kwian chugagwalla ulita nga ulitamu kwian una Babiloniamu suia jun toidu salengwli ulita ama kare age me no tanre. 
\q1 Kwian una Babiloniamu tadukalin lle tanre ñanaskege ama diali igi kagakalinnga ngwale lle tanre tanre gige gire kwian lle chbadanga lle tanre ñanaske chbadu kwian una Babiloniamuge, e giti kwian lle chbadanga chege igi molen tanre. 
\q1 Kwian una Babiloniamu kwian na nga ulitamu gbu age ene me no ama kledu age kare gire e kbiale Chube ji gbu kwian toinga una Babiloniage giti.” 
\m Lle boanga Chube alin e gerudu ene ulita cha ole una Babilonia giti. 
\p  
\v 4 Kaire cha keru na keruchugu gerule nga ngaña gitige ene: 
\q1 “Ba ulita chanu jogedale siere una Babiloniage, ene ba ulita chanu mi mo ta gbe age me no kwian toinga una ege kle age kare ene ba kwian chanu mi ji chuge age me no kbiale. 
\q1  
\v 5 Kwian una Babiloniamu agedu me no tanre cha dollale, ama agedu me no tanre cha gwa giti, ulita uñale chage. 
\q1 Sugedale bage cha me ta jonga ama ulita agedu me no gitige, malen cha be ji gbe kwian e giti.” 
\p  
\v 6 Kaire cha geru keruchugu gerule dare gerule lle boanga Chube alin kwian gbanga ji chuge ole, gerudre ene: 
\q1 “Ba agedale kwian una Babiloniamu ole ama agedu kwian na tanre ole kare. 
\q1 Ba ama gbadale boi daga ngwale bitaboke tangle ma ngle tira ama agedu daba olege. 
\q1 Ba lle gage tugenga moske bitaboke tangle ma tirare ama lle gage tugunga kwian na alin jadalege. 
\q1  
\v 7 Kwian ulita toinga una Babiloniage mo gbu kweri mo sobadu kwian toinga nga nagedi, ama toidu lle ñanaske tanre giti lle ulita ama tadukalinge ama gigu, ama mo gbu kweri e giti. 
\q1 Ama mo sobadu mangire batre dabadi ama toidu lle ñanaske tanre ole mangire batre, e batre kaire ene agwe ba ama gbadale boi daga ngwale chege ta olire tanre ole. 
\q1 Diali kwian ulita una Babiloniamu tañachugu mo tale mo giti naskuni ene: ‘Cha ulita una Babiloniamu cha kwian nga ulitamu chugagwalla kweri, cha ulita no trate. 
\q1 Cha me chege dale muinga kle chege gballa kare, cha mi chege ta olire ole, lle ulita kle cha ole, cha mi boi daga ngwale dale.’ 
\q1 Kwian toinga una Babiloniage tañachugu ene mo gbe tangle kwian nadi suge moge kweri. 
\q1  
\v 8 Malen e giti blikare chui gbaitre alinge ji be kle gbaba ama giti ene: Ama gweale be jogekeda, na be chege ama oliade, ama be bli chuge tanre, kaire ama be joge gugaba jitaske. 
\q1 Ulia cha Chube no trate kiraske cha kwian Chugagwalla kweri ji gbanga kwian giti age me no gdale, cha be ji gbe tirare kwian una Babiloniamu giti kwian agedu cha dollale kbiale.” 
\m Keru sugedu chage nga ngaña giti gerudu ene ulita lle boanga Chube alin kwian gbanga ji chuge ole. 
\p  
\v 9 Kwian chugagwalla nga ulitamu kwian una Babiloniamu suia jun toidu salengwli ulita ama kare age me no tanre nga suga no ole mo chuge ke giti onbre muinga ole muinga onbre ole. Kaire kwian chugagwalla ulita e sui jun toi lle tanre ñanaske ole salengwli kwian una Babiloniamu kare. Chube ji gbu kwian una Babiloniamu giti gire kwian chugagwalla nga ulitamu gwagedu una Babiloniadi boi tirare daga ngwale gwagedu una kuge jiangwalladi chie bdugu jitaske, gire kwian chugagwalla nga ulitamu ta olidu tanre kwian una Babiloniamu giti.  
\v 10 Kwian una Babiloniamu boidu tirare daga ngwale ene agedu me no gdale gire kwian chugagwalla ulita ama skatemanallale chegu ta kennga gwage amadi bate, ama gerudu ene: 
\q1 “Ulia ulia cha ulita tai dage bage ba ulita toinga una Babiloniage, una Babilonia kweri noare agwa sugetibi allabi hora gdaitre alinge ji chku gbaba ba ulita giti ba agedu me no me no Chube dollale kbiale.” 
\m Kwian chugagwalla nga ulitamu kwian una Babiloniamu skatemanallale gerudu ene kwian toinga una Babilonia giti. 
\p  
\v 11 Kaire kwian ulita lle chbadanga kwian una Babiloniamuge ama olidu mo suia junnga ta olire ole kwian una Babiloniamu kledu boi giti, sugedu kwian lle chbadangage kwian una Babiloniamu me ñadu lle gige amage dare, malen e giti kwian lle chbadanga chegu ta olire tanre.  
\v 12 Ama lle ulita chbadu kwian una Babiloniamuge, ama lle ai kare chbadu: Lle ñanaske kada oro, igi dodaba llere, kechuga ñanaske gwadenga no, lle igigwa gba kweri kare kada perla, ñometra noare ñanaske tanre, ñometra chada lénrennga kaire ñometra chada dabere, gli tanre no ñanaske, gli e ñachke no, lle ai ulita chbadre kwian una Babiloniamuge. Kaire bda elefante dau kweri, gli ñanaske, lle mno kada bronce, hierro, kechuga noare kada mármol, lle ai ulita ñanaske jo dodabale lle tanrere. Lle ai ulita ñanaske chbadre kwian una Babiloniamuge. Kaire agwe lle na tanre chbadre kwian una Babiloniamuge lle e ulita kada ene:  
\v 13 Lle tanre ñachke no kada canela kaire mirra kaire olíbano kaire lle kinre gugadale ñachke no kada incienso, lle e ulita chbadre. Kaire lle bligdale tanre chbadre ene: Lle gage jadale kada vino, gli kada olivo kin, chude gutale kada trigo, kaire trigo mnuñale. Kaire lle bdale chbadre ene: Chbi, bda oveja, ja kaire carro lugakle jadi ja kle carro e dbe. Kaire kwian lle boanga tanre onbrenu muirenu chbadre kwian una Babiloniamuge. Lle ai ulita kwian lle chbadanga chbadu kwian una Babiloniamuge agwa me ñadu chbade dare. Kwian una Babiloniamu chegu me lle giganga dare.  
\v 14 Kwian lle chbadanga ulita gerudu kwian una kweri Babiloniamu giti ene: 
\q1 “Nege ba una Babiloniamu me kle chege toi ngeru kare. 
\q1 Lle ulita ba tadukalinge ba lle tanre ñanaske e gigu chage, agwa lle ulita e jonga ngwale. 
\q1 Nege ba me chegu lle molen ngeru kare, ba chegu kwian me lle molen kare diali chui tangle.” 
\m Kwian lle chbadanga gerudu ene ulita kwian una Babiloniamu giti. 
\p  
\v 15 Kwian lle chbadanga kledu lle tanre ñanaske chbade kwian una Babiloniamuge, lle e ñana giti kwian lle chbadanga ulita chegu igi molen tanre. Kwian una Babiloniamu ji chugu chuiage kwian lle chbadanga chegu batre kwachie, ama ulita olidu ta chegu dage ulita kwian una Babiloniamu kledu boi giti,  
\v 16 gire ama ulita gerudu ene: 
\q1 “Ulia ulia una Babilonia una kweri, agwa cha tai dage kwian una emuge ama kle ji chuge giti. 
\q1 Kwian toinga una ege kle chege salengwli muinga mo ngama tke no kare muinga kle mo ngama tke ñometra no kwangleare giti ñometra e chada lénrennga kaire chada dabere, ama kle chage mo gbagataba no oro chrachienga no kwangle giti, kaire ama mo dodaba ulita jegwale lle ñanaske giti lle igigwa gba kweri kare kada perla giti kaire kechuga soli gwadenga no giti. 
\q1 Muinga e kare ene kwian una Babiloniamu ulita kledu toi. 
\q1  
\v 17-18 Agwa ulita sugetibi allabi hora gdaitre alinge ji gbere una e giti kwian toinga una ege agedu me no kbiale, una e chegu skianbanga ulita, kwian toinga una ege llea ulita jonga ngwale.” 
\m Kwian lle chbadanga ulita gerudu ene ulita kwian una Babiloniamu giti. 
\p Kwian ulita du dbanga kaire kwian ulita chagenga du e ulitage, kaire kwian ulita du mananga kaire kwian ulita kle lle boi blege ene ama ñage igi gai toigda, ama ulita kaire agwe gwagedu una Babiloniadi bole daga ngwale gugle, gwagedu una jiangwalladi chie bdugu jitaske, gire ama chegu bate una Babiloniage chru ole. Ama ulita gerudu ene: “Ni una na gdaite chege no kweri una Babilonia kledu kare.”  
\v 19 Ama ulita gerudu ene, gire ama ulita dbi mnuña batu mo chuga giti ta olire tanre ole, ama mo suia junnga ta olire ole kwian una Babiloniamu giti, gire ama ulita ngautu kweri gwangerugu ene: 
\q1 “Ulia cha tai dage bage ba ulita toinga una kweri ege. 
\q1 Ba ulita kledu lle molen tanre, ba giti kwian du mauña chegu igi molen tanre agwa ulia sugetibi allabi hora gdaitre alinge ji gbere ba giti ba agedu me no Chube dollale kbiale, ba toingwa chegu skianbada ulita chegu me no, ba llea ulita jonga ngwale.” 
\m Kwian e ulita gerudu ene una Babilonia giti. 
\p  
\v 20 Chube ji gbu kweri kwian toinga una Babiloniage giti kwian e agedu me no kwian Chubenu dollale gdale, malen e giti kwian ulita kle toi nga ngaña giti Chube ole kwian Jesucristo gerua ganga ulita, kwian ulita Jesucristo gerua ketanga dabage, kwian ulita Chube gerua ketanga, ama ulitadi nga sugadale no Chube agedu kwian una Babiloniamu ole giti. Chube kwian ulita amanu jia junnga kwian una Babiloniamuge. 
\p  
\v 21 Lle boanga Chube alin gdaite kiraske tanre ama kechuga gbaite kweri gau ngaña kodi, kechuga e chege salengwli kechuga kweri kweri lle gweale ugagda kare. Lle boanga kechuga e mliu bleske, ama gerudu ene: 
\q1 “Ke ai cha mliu bleske e kare ene una Babilonia be chege skianbada ulita chege me no diali dale alin, ni una e be chege naskuni ngeru kare. 
\q1  
\v 22 Ni una ege dare kwian be lle gitarale kada arpa dagenga, ni kwian be ngwane dare una ege lle ngwanegda gdaite kada flautage ni lle ngwanegda gdaite kada trompetage, ni kwian gdaite be chege lle boanga una ege, ni kwian be chege lle gweale uge kechuga giti dare una ege. 
\q1  
\v 23 Ni jichra be gwadenga dare una ege, ni kwian be mo jwen chuia ollade dare una ege. 
\q1 Kwian lle chbadanga ulita kledu toi una Babiloniage ama chegu ma kweri kwian lle chbadanga nga na ulitamuge, agwa nege ama kle ji chuge daga ngwale. 
\q1 Kwian una Babiloniamu kwian nga na ulitamu anblitu ngwale geru me nodi, ama kwian ta gbu age me no dolla Satanás kirallaske daba na gbe jiske. 
\q1 E giti ama ulita kle ji chuge tirare.” 
\m Lle boanga Chube alin kechuga mliu bleske gerudu ene ulita una Babilonia giti. 
\p  
\v 24 Una Babilonia ege kwian Chube gerua ketanga guleda tanre kaire kwian Chubenu na guleda tanre una ege. Kaire kwian ulita mangire batre jo gwabada nga ulita nga dba ai giti ama ulita guleda ne ngwadi, e kbiale Chube be ji gbe tirare kwian toinga una ege giti. 
\c 19  
\s1 Kwian ulita nga ngaña giti gerule no 
\s1 nga suga no ole Chube giti 
\p  
\v 1-2 Chube ji gbu kwian una Babiloniamu giti ene, bigire kwian ngle kerua sugedu chage kiraske nga ngaña giti, ama ulita kledu gerule ene: 
\q1 “Alelulla, Chube noare, cha ulita gerule no no Chube giti. 
\q1 Chube cha Chugagwalla kweri kira molen ama ñage age ulita mo kirallaske, Chube no trate agenga no. 
\q1 Chube cha ulita jun siere ji chugege Chube kirachku cha dolladi, e giti cha gerule no no Chube giti. 
\q1 Chube diali gerule trate, ulia Chube kle age kwian ole kwian kle age mangire batre, Chube kle kwian gbe ji chuge kwian kle age me no giti. 
\q1 Chube kweri e amaña ji gbu muinga gdaite giti muinga e chagenga kwian onbre tanre ole, muinga e amaña kwian nga ulitamu gbanga age me no Chube dollale, muinga e kwian Chubenu gbu boi daga ngwale kaire ama kwian Chubenu tanre guda, Chube kwian maunu jia junnga ulita muinga ege, Chube muinga e gbu ji chuge jabale muinga agedu me no ulita giti.” 
\p  
\v 3 Geru sugedu ene chage gire cha geru keruchugu nakwaiteni gerule ene: 
\q1 “Alelulla, Chube kweri, Chube kira molen tanre. 
\q1 Chube ji gbu kwian una Babiloniamu giti, una e kle gugaba ulita gire una e jiangwalla be kle chie bdugu diali chui tangle.” 
\p  
\v 4 Kwian ulita kle nga ngaña giti kerua sugedu chage gerule no ene Chube giti gire kwian daba Chubenu chugagwalla juma veinticuatro kaire lle gwade gdabaga ama ulita jongnagwa skutu dba mo ñeu kaboge gwadbiguda skadagda gbu dba Chube kle toiba dba toigda kweri giti gwangnagu, gerudu: 
\q1 “Alelulla, Chube che Chugagwalla kiraske ulita, noare ama ji gbu kwian me no una ege giti ulita.” 
\p  
\v 5 Kwian daba Chubenu chugagwalla juma ulita kaire lle gwade gdabaga gerudu ene ulita Chube giti, bigire geru chiu Chube che Chugagwalla kweri toigdalla ngwadige, gerudre ene: 
\q1 “Ba mangire batre ulita bai kaire kle mo ta gbe lle boi Chube alin ama takalin kare kle Chube gai dage, ba ulita kwian juma kaire kirogwa ulita gerudale no che Chugagwalla Chube giti, Chube kle age no ulita.” 
\m Cha geru keruchugu ene ulita. 
\p  
\v 6 Gire cha kwian tanre tanre keruchugu gerule, ama kerua sugedunga chage chi kweri kle gdade kare kaire keru sugedu salengwli enusulindra kle gdade kweri kare, gdade eneske cha geru keruchugu gerule ai kare: 
\q1 “Alelulla, Chube che Chugagwalla kle chege nege kwian ulita Chugagwalla, che Chubea noare kweri kira molen tanre. 
\q1  
\v 7 Nga sugadale no che ulitadi, che ta kledale no nga suga no ole kaire che gerudale no Chube giti, che Chube gbadale kweri no kwian na ulita gwa giti. 
\q1 Ulia chui chku Bda Cordero Chubenu kada Jesucristo be mo jwen chuiage, Bda Cordero muingalla e kle gerule kwian Jesucristo gerua gaba ama kle biale mo jwen. 
\q1  
\v 8 Chube ñometra no jutre jagere trate ketu muinga ege mo ngama tkagda mo jwen chuiage alin. 
\q1 Ñometra no jutre jo ketaba muinga ege chege salengwli kwian Jesucristo gerua ganga ulita kle age ulita no trate Chube gwa giti kare. 
\q1 Malen e giti nege che ulita chui olladale nga suga no ole.” 
\p  
\v 9 Lle boanga Chube alin gerudu nakwaite cha ole ene: “Ba chada degadale ene: ‘Kwian ulita mangire batre jo kadaba Bda Cordero be mo jwen chuia ollade ulita, ama ulitadi nga suga nodale.’ ” Lle boanga gerudu dare ene: “Geru ai ulita Chube gerua ulia.” 
\p  
\v 10 Lle boanga gerudu ene cha ole gire cha jongnagwa skutu dba lle boanga sera ngena ama gai dage mo chugagwalla kare, agwa lle boanga gerudu chage ene: “Ba me jongnagwa skute dba chadige. Cha lle boanga Chube alin salengwli ba kare salengwli kwian ba daballale ulita Jesucristo gerua ganga ulia kle toi no trate Jesucristo takalin kare, cha ama kare. Che ulita salengwli che ulita lle boanga Chube alin, che Chube alin gadale dage mo Chugagwallale. Geru ulita Jesucristo ketu kwiange, ba kaire kwian ba daballale ulita geru e gau ulia, geru e kle chege salengwli kwian Chube gerua ketanga ulita unsuialin geru ketu kare. Geru e ulita kle boi nege tangle, malen e giti che Chube gadale dage che gerudale no Chube giti.” Lle boanga Chube alin gerudu ene cha ole. 
\s1 Juan gwage kwian gdaitedi skwenba ja jutre giti 
\p  
\v 11 Gire cha gwagedu nga ngañadi nga kledu degabanga gire ja jutre gdaite kledu ne ngwadi, kwian kledu chage ja e giti kwian e ka gbere KWIAN GERUNGA ULIA NO TRATE, kaire ama ka gbere KWIAN AGENGA ULITA AMA KLE GERULE KARE. Ama chegu kwian ulita Chugagwalla no, ama kledu age mangire batre kwian ole kwian kle age giti no o me no. Ama kledu kira bate kwian ulita ole kwian bai kaire mo tku dole Chube ole.  
\v 12 Kaire agwe ama gwagwa kledu gwadenga salengwli jita teankle kle gwatige kle gwadenga kare. Kaire ama chugage ama kledu lle no tanre sombrerolla kare dbe, kaire ama kledu chage ka gweale dbe, ka e kledu gbaba ama giti, amage alin allabi sugedu geru e kle degaba mine.  
\v 13 Kaire ama kledu chage ñometraske ñometra e kledu ulita bere. Ama kledu chage ka na dbe ka e kledu gerule ene: GERU ULIA CHUBENU.  
\v 14 Lle boanga Chube alin nga ngaña giti tanre tanre kledu chage ule kwian gdaite kle skwenba ja jutre giti nate. Kaire agwe lle boanga e ulita gdaite gdaite kledu skwenba ja na jutre giti, ama ulita kledu mo ngama tkaba ñometra no trate jutreske.  
\v 15 Kwian gdaite kledu skwenba ngeru ja giti ama kate sbadi gaite kledu chie, sbadi e dau degaba no trate, sbadi e ama kledu chage dbe kwian nga ulitamu Chube dollale boagda daga ngwale. Ama be chege kwian e ulita Chugagwalla kweri kiraske ama be chege kwian ulita kaganga gbe boi ama takalin kare. Ama be kwian gbe boi daga ngwale tanre be ji gbe tirare kwian kle age me no Chube dollale giti. Chube ta skochiu tanre kwian kle age me no ama dollale gdale, malen e giti Chube kwian gdaite kle chage ja giti e kagu kwian nga ulitamu gbe ji chuge tirare. Chube kiraske tanre ama ma kiraske ulitage ama kwian gdaite e kagu age kwian ole salengwli kwian kle age uvagba ole kare. Kwian kle skite uvagba giti uvagba chia jwennga ulita kare, gire kwian ñage uvagba chia jwanbanga jai. E kare ene kwian gdaite kle chage ja giti sbadi ole kate be age kwian ole kwian gbe boi daga ngwale kwian kle age me no giti gdale.  
\v 16 Kwian gdaite ji gbanga kledu skwenba ja giti, ama ñometralla giti kaire ama skwagda giti ama kledu chage ka degaba ene: CHUGAGWALLA MA KWERI MA KIRASKE CHUGAGWALLA NA ULITAGE. Chada kledu gbaba ene ama ñometralla giti ama skwagda gitige. 
\p  
\v 17-18 Gire cha gwagedu lle boanga Chube alin nga ngaña giti gdaitedi jagebanga gdate chuira giti, ama kledu ngaute kiraske junten ulitage ene: “Bai ulita mo lite ole ule, Chube be bligda kete bage gutadale. Ene ba ñage kwian chugagwalla ulita uda gute kaire guardia donga chugagwalla uda gute, kaire kwian kle suge moge kiraske ama uda gute, kaire ja samlalla gute, kaire guardia donga skwenba ja e giti uda gute, kaire kwian lle boanga mo mauña alin ama uda gute, kaire kwian lle boanga igi gai mau alin naskuni ama uda gute, kaire kwian juma kaire kirogwa uda gute ulita.”  
\v 19 Lle boanga Chube alin ngautu ene juntenge gire cha gwagedu lle gude chadale karedi kaire ama skatemanalla kwian chugagwalla ulita nga ulitagedi ama ulita kledu chage donga tanre dbe ule kira bate mo giti, ama ulita kledu mo gbaba ule biale kira batadale kwian gdaite skwenba ja jutre giti ole kaire kwian e chudaboangalla ulita ole.  
\v 20 Kwian gdaite chage ja jutre giti ama chudaboangalla ulita ole ama kirachku lle gude chadale karedi kaire lle gude chadale kare chudaboangalla ulitadi. Lle gude chadale kare jo gaba ji chugadale ule lle bdale ama ka chudaboanga geru jinanga ngwale ole. Lle gude chadale kare ka chudaboanga e ageba tanre lle gude chadale kare kirallaske kwian na gwa giti kwian gwa gbagda lle gude chadale kare giti. Lle gude chadale kare ka chudaboanga gerunga ngwale, ama agedu giti kwian ulita mo anblitangu kwian bai kaire mo chugu ngwadi mo gbange egdage lle gude chadale kare kalla giti ama ulita lle gude chadale oña dodadre mo kodi gau dage mo chubeale, gire e kbiale lle gude chadale kare kaire ama ka chudaboanga ama gdabonate jo mliaba gwade jitaske, jita e kle gwade chege salengwli lle mnuñale kada azufre kare.  
\v 21 Agwa kwian na ulita lle gude chadale kare gatudige mo tke dole kwian kle chage ja jutre giti dollale, ama ulita jo gwabada sbadi giti, sbadi e chiu kwian gdaite kle skwenba ja jutre giti kate, sbadi e giti kwian jo gwabada gire junten ulita kwian gwabada e uda gutu, junten e ulita unchku kwian udadi. 
\c 20  
\s1 Chura ngle mil Satanás be kle skage gire Jesucristo 
\s1 be chege kwian ulita Chugagwalla nga dba giti 
\p  
\v 1 Bigire cha gwagedu lle boanga Chube alin gdaitedi ama kledu nga ngaña giti chiu nga dba giti, lle boanga e chiu lle ugaka nga tira dbiugagenu jegagda dbe kaire giska hierrole ama lle boanga chiu dbe kote.  
\v 2 Lle boanga Chube alin e lle jorisi kare tirare gatuda, lle jorisi kare amaña e ka jwankle Diablo kaire amaña ka jwankle Satanás. Satanás e amaña mo blitu jorisire gire ama kwian gwangea Chube dodadu unsuialin tangle anblitu gbu age me no Chube dollale. Lle boanga Chube alin lle jorisi kare e luguda giska hierrole giti tku skage chura ngle chura milge.  
\v 3 Lle boanga Chube alin lle jorisi kare gbu dbiuga jere tirarege, ne ngwadi ama lle jorisi kare tku chiga, ama dbiuga ka jegu, dbiuga tirare e giti jondoi lle boanga chada gweale gbu ene ugaka e chegu gbaba egdage, ene lle jorisi kare me ñage chege kwian nga ulitamu anblite ulita chura milge. Chura mil be joge tangle ulita gire tane giti lle jorisi kare tirare e skajwanbenga sugetidale me sbali dale. 
\p  
\v 4 Bigire cha gwagedu toigda no ngledi, toigda e giti kwian kledu toiba dba, kwian e ulitage jo kira ketaba geru gbagda kwian giti bai jiske bai me jiske. Kaire cha gwagedu kwian oña ulitadi kwian bai jo chuga tkabanga Jesucristo gai ulia mo Chugagwallale gdale, ama ulita oñadi cha gwagedu. Ama ulita ni gdaite nu lle gude chadale kare gaba dage kaire ni lle gude chadale kare oña kwian dodadu mo kodi gau mo chubeale ni ama nu mo chugaba ngwadi mo gbange egdage skadagda giti ni koge, agwa ama diali chegu gerule no Jesucristo gerua giti ama kledu gwade gire, malen e giti ama guleda, ama ulitadi cha gwagedu Chube ama ulita jaba gbeni gwade kaire chegu daba chugagwallale ule Jesucristo ole chura ngle chura milge.  
\v 5 Ama ulita chkuni gwade ngeru kwian na ulita jogebakedage. Kwian bai ulita jaba me chkuni gwade ule kwian ngeru ole kwian ama jaba be chkeni gwade chura mil joge tangle gire jaba ene be chkeni gwade.  
\v 6 Nga suga noare kwian ulitadi bai kaire nu jogebakeda Jesucristo gerua gdale chkuni gwade ngerutabi, ama Chubenu amadi nga suga noare. Ama mi jogekeda bitabokege tangle dale, e kle gerule ama mi joge ji chuge daga ngwale ngwadi age me no gdale. Ama be chege kwian ulita chugagwallale Jesucristo ole ule chura ngle milge, ama be chege gerunga Chube ole kaire Jesucristo ole kwian na alin, ama be toi Chube ole diali nga suga no ole. 
\s1 Satanás be chege boalenga daga ngwale 
\s1 chui diali dale alin 
\p  
\v 7 Chura mil ulita be joge tangle gire Satanás be jogeba skajwanbanga ama kledu skage ngwadige.  
\v 8 Ama be joge skajwanbangani gire ama be jogebi kwian nga ulitamu nga dba ai giti anblite tanre, kaire ama be joge nga kada Magogge kwian toinga ne ngwadi anblite kaire kwian chugagwalla nga emu kada Gog anblite, ama be kwian ulita ulita nga dba ai giti me no me Chubenu lite ole mo gbe biale mo tke dole Jesucristo ole, kwian ulita ama be lite ole be chege ngle ni che ñage ten nate, ama be chege ngle salengwli ubauda gbaite gbaite kaire kaire ble kagda giti kare.  
\v 9 Ama ulita joge kwian Chubenu ulita kle ngwadi una e Chube no ole una e kada Jerusalénge. Kwian ulita Satanás skatemanalla agenga ama takalin kare ama ulita be mo lite una edi tangle mo tke dole kwian Chubenu ole. Agwa Chube be jita kage nga ngaña giti chke nga dba giti kwian Chubenu dollale alin, gire kwian ulita mo tku dole kwian Chubenu ole chege kugeba boi tirare ji chugege be jogekeda ulita.  
\v 10 Satanás amaña kada Diablo kwian e anblitanga, ama joge mliaba jitaske ji chuge ngwadi, jita e gwade tirare kaire jiangwa kle chie salengwli lle mnuñale kada azufre kare. Jita e amañaske lle gude chadale jo mliababi kaire ama ka chudaboanga gerunga ngwale jo tkababi jita eske, ne ngwadi ngajudi ngajrege ama boke ule Satanás ole be kle ji chuge tirare chui tangle diali. 
\s1 Chube gerule bdagli kwian ulita jiskenga giti 
\p  
\v 11 Bigire cha gwagedu toigda kweri jutredi toigda e giti Chugagwalla kweri Chube kledu toiba dba. Chugagwalla Chube gwa giti nga ulita jo tangle blikare, nga dba giti kaire nga ngaña giti nga jonga me gda uñale, nga ulita chegu blitaba nganake chui tangle dale alin.  
\v 12-13 Gire cha gwagedu kwian me Chubenu jogebakeda ulitadi kwian jalinnu kwian jumanu kaire kwian ulita bai kaire jogebakeda chi kote ble kote kaire kwian ulita jogebakeda oña kledu nga kada Hadege, ama jaba ulita chkuni gwade kledu jagebanga gdate Chube kaire Jesucristo gwangnagu Chube kerua manade ngwange Chube be ji gbe ama alin giti. Gire chada degaba kweri ngle jo treanbanga ulita, chada e kledu gerule kwian nu ageba ulita giti, kaire chada na gdaite jo treanbanga, chada e Bda Corderonu, chada e giti kwian ulita Jesucristo gerua ganga be toi Chube ole chui tangle diali dale alin kalla kledu degaba. Kwian ulita nu ageba giti mangire batre kledu degaba chada kweri ngle giti, gire Chube ji gbu kwian ulita giti chada kledu degaba ama agedu ulita giti mangire batre.  
\v 14 Kwian ulita jogebakeda ama jaba chkebani gwade bai kaire me Jesucristo gerua gaba, ama ulita jo mliaba jita tirareske ji chuge daga ngwale ngwadi, ama chegu sugekare Chubege diali dale alin, kwian e ulita chege salengwli ama jogekeda bitabokege tangle kare agwa ama be chege gwade ji chuge tirare diali dale alin.  
\v 15 Kwian ulita bai kaire kalla me kledu degaba chada Bda Corderonu giti kwian e ulita jo mliaba jitaske boi daga ngwale tanre chui diali dale alin. 
\c 21  
\s1 Chube nga ngaña dodade jagere 
\s1 Chube nga dba dodade jagere 
\p  
\v 1 Chube kwian gbu ji chuge boidu ene ulita gire chage sugedu nga ngaña giti nga dba giti ulita jonga me gda uñale kaire ble me kledu dare, nga chegu blitaba jagere. Cha gwagedu nga ngaña giti na jageredi kaire nga dba na jageredi. Cha gwagedu nga ulita chegu blitaba jagere nga me chegu ngeru kare.  
\v 2 Gire cha Juan gwagedu una noare Chubenudi una jagere ka jwankle Jerusaléndi. Una jagere e kledu chie nga ngaña giti Chube kle ngwadi gwadbiguda chke nga dba ai giti. Cha gwagedu no una edige, una e chegu cha gwage salengwli muinga kle mo jwen kle mo ngama tke no kare ama skatemanalla onbre ama be mo jwen ole manade ngwange kare, ene una e kare medu chage.  
\v 3 Cha kledu gwage ene gire cha geru keruchugu kweri nga ngaña giti Chugagwalla Chube kle toiba dba ngwadige, gerudre ene: “Nege Chube kle toi kwianske kwian e ulita Chube gau no mo Chugagwallale, kwian e ulita chegu kwian Chubenu, Chube be toi ama ole chui diali dale alin.  
\v 4 Malen kwian Chubenu ulita boidu daga ngwale ngeruge e ulita be joge tangle, mi kle dare ngeru kare. Chube be kwian amanu ulita ta olire jwennga kwian amanu mi chege ta olire ole dare, Chube be ama ta gbe nga suga no ole, kaire agwe kwian ulita Chubenu mi jogekeda dare ni be kle ta olire ole dare ni kwian be kle mo suia jwennga boi gwealege ni kwian be skibachie ulita be kle nga noge ulita be kle toi nga suga no ole diali Chube ole ule.” Keru e sugedu chage ene ulita.  
\v 5 Gire cha gwagedu Chube kledu toiba dba toigda no kweri giti ama gerudu ene: “Cha kle lle ulita gbe jagere.” Kaire Chube gerudu ngerugu ene dare cha ole: “Juan, ba chada degadale cha gerule ba ole giti. Geru ai ulita ulia, ba geru ai gai dage, ba mo ta gbe geru ai giti geru ai ulia no.”  
\v 6 Chube gerudu ene cha ole ulita, bigire ama gerudu dare cha ole ene: “Ulita boidu cha geru gbu kare, cha Chube, cha klebi lle ulita gwangeabi, kaire cha be kle chui diali dale alin. Cha lle ulita Chugagwalla gwangea ngerutabi kaire cha be chege lle ulita Chugagwalla chui bdaglige diali chui tangle. Kwian bai cha gerua gakalin ulia, ama ñage geru gai ulia alin allabi me lle ketadale chage geru e ñanale, gire geru gai ulia giti cha be kwian gbe toi nga suga no ole cha ole chui tangle diali. E salengwli kwian siechie gire cha ñage chi gwagwa no kwian gbagda toi chui tangle kete amage jadale sie ole kare.  
\v 7 Kwian bai mo ta gbe kiraske gwangerugu cha gerua giti age no diali cha takalin kare, kwian ene ulita cha be gbe toi chui tangle diali cha ole, cha be chege ama Ñenuale kaire agwe ama ulita be chege cha oliale.  
\v 8 Agwa kwian bai kaire ta kennga kwian ngeru me mo ta gbe kiraske ulia cha geruadi, kaire kwian bai me kle cha gerua ulia gai dage, kaire kwian bai me kle chage no cha takalin kare kle chage age me no tanre, kaire kwian bai daba gwangada, kaire kwian onbrenu muirenu bai kle mo chuge ke giti, kaire kwian bai kle tañachuge me no daba nadi dolla Satanás kirallaske daba gbe boi gweale, kaire kwian bai batre kle lle oña ngwale gai dage mo chubeale, kaire kwian bai songa ngwale, kwian ai kare ene ulita be joge tkaba jitaske ji chuge daga ngwale ngwadi, jita e gwade tirare kaire jiangwa kle chie salengwli lle mnuñale kada azufre mnuña kare. Kwian e be chege ne ngwadi sugekare chage, kwian e chege salengwli ama jogekeda bitabokege tangle kare agwa ama be chege gwade ji chuge tirare diali chui tangle.” Chube kledu toiba dba toigda kweri amanu giti gerudu cha ole ulita ene. 
\s1 Juan gwage una no jagere Chubenu una Jerusaléndi 
\p  
\v 9 Lle boanga Chube alin gdaguke chagedu ji Chubenu gdaguke bdagli dbe lle jogda kare tadi gbaite gbaitege gbale kwian giti, lle boanga e gdaite chiu cha gitigu gerudu cha ole ene: “Salengwli kwian onbre kle mo jwen muinga ole kare, e kare ene Bda Cordero kada Jesucristo kle kwian maunu jwen dbadale toi mau ole nga noge. Bai, cha be nga e kaite bage.”  
\v 10 Lle boanga gerudu ene cha ole, gire Chube Oña chku chadige, cha chegu ama kirallaske. Gire lle boanga amaña cha du jwichuga kweri jeike gwagda giti ngaña gire ama una kweri no Chubenu kada Jerusalén kaitu chage, una e chiu nga ngaña giti gwadbiguda chiu Chube gwa giti nga dba giti.  
\v 11 Una e gwadedunga no Chube chrallaske, una e chralla kledu salengwli kechuga no kada jaspe chralla kle gwadenga no chi oña kare.  
\v 12 Una kweri edi tangle ulita gere kledu tkaba kweri jeike ngaña, gere e gerekalla gdataboko giti gdaboke kledu, gereka ege gdaite gdaite lle boanga Chube alin gdaite kledu gereka manade. Gereka gdaite gdaitege kwian israelita chudalla mne gdataboko giti gdaboke kalla kledu degaba gdaite, gire ene kwian israelita chudalla mne gdataboko giti gdaboke kalla kledu degaba ulita ugaka kaire kairege.  
\v 13 Gereka gdamai kledu chui chie ngwange ngnagu, gereka gdamai kledu chui joge ngwange ngnagu, gereka gdamai kledu siagu ngnagu, gereka gdamai kledu ñagu ngnagu.  
\v 14 Kechuga kweri kweri gbataboko giti gbaboke kledu gbaba gbaite gbaite unadi tangle, kechuga e ulita kledu gere ulita una edi tangle gatedi kiraske. Kechuga gbataboko giti gbaboke giti kwian Jesucristo gerua ketanga dabage kalla kledu degaba gdaite gdaite, kwian e ulita chagedu Bda Cordero amaña Jesucristo ole ule Jesucristo kledu toi nga dba ai giti kwianske gire, kwian e kalla gdaite gdaite kledu degaba kechuga gbaite gbaite giti. 
\p  
\v 15 Lle boanga Chube alin kledu gerule cha ole ama kledu chage oro dodabale lle ñachugagda dbe una no e ñachugagda kaire una e gerella kaire gerekalla ñachugagda.  
\v 16 Una medu kwale cha gwage ama sketangle dba monole salengwli ongoru ongoru kaire ama sketangle bdugu chege jeike salengwli ulita ni jeike ni buli. Lle boanga una e ñachuguda lle orole giti, una e kweri kweri ama kilómetro dos mil doscientos una eske tangle dba monole, una e jegwale dba sketangle monole salengwli jeike sketangle bdugu.  
\v 17 Kwian lle ulita ñachugebi kare, e kare ene lle boanga Chube alin gere ñachuguda, gere e ama ñachuguda chegu kweri metro sesenta y cinco.  
\v 18 Kechuga chrachienga noare kada jaspe kledu dodaba gerere, kaire agwe oro dodaba una e ulitale, oro e chrachienga no salengwli chi oña chrachienga kare.  
\v 19 Kechuga gbataboko giti gbaboke kledu gbaba dba una gerella kira gbagda, kechuga e giti kechuga soli na tanre no ñanaske kledu gbaba, kechuga soli e ulita gwadenga no. Kechuga kweri gbataboko giti gbaboke gbaite gbaite kledu gbaba ene: Kechuga gbaite gbaba ngeru kada jaspe, kechuga e gwadenga chi oña kare. Kechuga na gbabokedale kada zafiro gbaba, kechuga e gwadenga lenrenre no. Kechuga na gbamaidale kada ágata gbaba, kechuga e chada gwadenga no tanre. Kechuga na gbabagadale kada esmeralda gbaba, kechuga e gwadenga lerere no.  
\v 20 Kechuga na gbatigadale kada ónice gbaba, kechuga e gwadenga no. Kechuga na gbaderekedale kada cornalina gbaba, kechuga e gwadenga dabere no. Kechuga na gbagukedale kada crisólito gbaba, kechuga e gwadenga moloinre no. Kechuga na gbapadale kada berilo gbaba, kechuga e gwadenga lénrennga no. Kechuga na gbainkadale kada topacio gbaba, kechuga e gwadenga moloinnga no. Kechuga na gbatabokodale kada crisoprasa gbaba, kechuga e gwadenga lerere no. Kechuga na gbataboko giti gbaitedale kada jacinto gbaba, kechuga e gwadenga lenrenre no. Kechuga na gbataboko giti gbabokedale kada amatista gbaba, kechuga e gwadenga lénrennga no. Kechuga kweri gere kira gbagda gbataboko giti gbaboke kledu gbaba ene ulita.  
\v 21 Ke igigwale gba kweri kada perla gbaite jo dodaba gerekale gdaite gdaite ulita, gereka e ulita gdataboko giti gdaboke kledu una edi tangle. Kaire oro dodaba no jonle ulita kwian kle chage jegwale una ege, oro no e chege salengwli chi oña chrachienga kare. 
\p  
\v 22 Una ege Chube kaire Bda Cordero amanu amaña Jesucristo kledu kwianske, malen cha me gwagedu u gerungwa Chube oledi, ulia u e kare me kledu una ege. Agwa una e ulitage kwian kledu mo gate no gerule no Chube no kweri giti kaire Bda Cordero giti.  
\v 23 Una ege ni chui ni dai chratigenga una ege, Chube chralla kledu chratigenga kaire Bda Cordero jichra kare, Chube chralla kaire Bda Cordero chralla giti kwian ulita una ege kledu toi nga chra Chube agalinu giti.  
\v 24 Kwian ulita nga ulitamu nga dba giti bai kaire nu Jesucristo gerua gaba, Chube kaire Bda Cordero kwian e gbu ten mo chrallaske ene kwian ñadu chage no una ege. Kaire agwe kwian chugagwalla nga ulitamu nga dba giti Jesucristo gerua gaba chegu kweri nga dba giti daba chugagwallale, agwa una ege kwian chugagwalla e sugedu moge ama me kweri Chube kare agwa Chugagwalla gdaitre alin allabi ñage chege kweri.  
\v 25 Una ege nga jere me kle dale, nga ju alin diali kle malen gereka una ege ni bitaite kle jegaba, gereka e kle degabanga diali.  
\v 26 Kwian nga ulitamu mo gatu ulita no Chube giti Chube gai dage, kwian e sugedu moge kweri ulita ngeru nga dba giti agwa e suiage una ege gire Chube kaire Jesucristo chegu ma kweri ama ulitage, ama ulita Chube kaire Jesucristo gbu ma kweri mauge.  
\v 27 Kaire una ege ni lle sugaska me no gdaite kle, ni kwian gdaite ta me no agenga me no ni kwian gdaite geru jinanga ngwale ñage joge una ege. Agwa kwian ulita bai kaire kalla kle degaba chada no Bda Corderonu giti ama alin ñage toi ule una no ege chui tangle diali Chube kaire Jesucristo chrallaske ulita. 
\c 22  
\p  
\v 1 Kaire lle boanga Chube alin chi no trate kaitu chage una ege, chi e kwian gbe toi chui tangle, chi e kle chie toigda no kweri Chubenuge kaire Bda Cordero ngwadige.  
\v 2 Chi e kledu jrite tainkwli jon kweri chagegda kaskwada una kweri e bongage, chi e kagda giti ongoru ongoru gli kle kaire, gli e no trate kwian gbe toi chui tangle dale, gli e kle gbachie no dai kaire kairege, kle gbachie bitataboko giti bitaboke tangle chura gdaite kaire kairege, gli e ga no kwian nga ulitamu dodagda.  
\v 3 Una ege ni kwian gdaite ni lle gdaite kle boidale daga ngwale. Chube kaire Bda Cordero amaña Jesucristo kledu una ege toiba dba toigda kweri giti kwian ulita Chugagwallale, gire kwian ulita Jesucristo gerua gaba agedu Chube tadukalin kare kwian e kle gerule no Chube giti kaire Jesucristo giti kwian ulita Chube gai kweri Jesucristo gai kweri mo Chugagwallale.  
\v 4 Kwian e ulita mangire batre gwagedu mo gwagwa giti mo Chugagwalla Chubedi, kaire kwian ulita kledu chage Chube kalla degaba mo skadagda giti ole.  
\v 5 Nga ege nga jere me kle dale. Kwian ulita kledu toi eni ama me jichra gbadale dale kaire me toidu dare chuira chralla giti, Chube kwian ulita Chugagwalla ama kwian ulita gbu toi nga chra Chube agalinu giti. Kaire kwian ulita e chegu chugagwallale Chube ole ule chui tangle diali. 
\p Lle boanga Chube alin cha ta gbu ulita ene be boi giti. 
\s1 Jesucristo chieni chuia kle kodi 
\p  
\v 6 Kaire agwe lle boanga Chube alin gerudu dare cha ole ene: “Juan, geru ai ulita cha gbu chke uñale bage geru ai ulita ulia, kwian ulita mo ta gbadale geru ai giti, ulia be kle boi ulita geru ai kle gerule kare. Chube che Chugagwalla mo Oña gbu kwian Chube gerua ketanga unsuialin tale ama gerua kete daba nage, Chube e amaña cha kaire lle boanga na gdaite amanu kagu kwian ulita nu ama gerua gaba ta gbe chke uñale lle ulita be boi sugeti giti.” Lle boanga Chube alin gerudu ene cha ole. 
\p  
\v 7 Jesucristo gerule ene: “Cha be chieni blike. Nga be suga no kwiandi kwian bai kaire kle Chube gerua gbe gdadi Chube gerua kle degaba chada ai giti kare.” Jesucristo gerule ene. 
\p  
\v 8 Cha Juan geru ai ulita keruchugu kaire cha gwagedu ai ulita be boi gitidi gire cha jongnagwa skutu dba lle boanga Chube alin gerudu cha ole lle ulita kaitu chage sera ngena ama gai dage.  
\v 9 Gire lle boanga gerudu cha ole ene: “Ba me jongnagwa skute dba chadi sera ngena. Cha me Chube, cha lle boanga alin Chube alin salengwli ba kare kaire kwian ba daballale ulita Chube gerua ketanga kare, kwian bai ulita kle age geru ulita kle degaba chada ai giti gai dage kwian ene ulita lle boanga Chube alin, che Chube gadale dage mo Chugagwalla ma kweri.” 
\p  
\v 10 Lle boanga gerudu dare cha ole ene: “Geru ai ulita kle degaba chada ai giti be boi chuia kle kodi, malen ba me ñage geru ai gate mo tale, ba geru ai ketadale gbe chke uñale kwian ulitage be boi giti.  
\v 11 Agwa kwian bai agenga me no chugene age gwangerugu me no kaire kwian tañachuge me no sugaska mo tale chugadale ngwadi tañachuge ene dare, kaire agwe kwian ulita kle age no chegedale age ma no gwangerugu, kwian bai kle mo ta gbe lle boi no Chube alin kwian ene mo ta gbadale gwangerugu chage no trate Chube gwa giti age diali Chube takalin kare.” Lle boanga Chube alin gerudu ene cha ole ulita.  
\v 12 Gire Jesucristo gerule nakwaite: “Ulia cha be chieni sugeti, cha be chieni lle no dbe kwian ulita alin kwian agedu no ñanale bai kaire cha gau ulia agedu no cha tadukalin kare, kaire cha be ji gbe kwian ulita giti bai kaire me cha gau ulia agedu me no cha dollale ulita giti.  
\v 13 Che klebi lle ulita gwangeabi, kaire cha be kle chui diali dale alin. Cha lle ulita Chugagwalla gwangea ngerutabi kaire cha be chege lle ulita Chugagwalla chui bdaglige diali chui tangle. Cha ulia ma kiraske ma kweri lle ulitage.” Jesucristo gerule ene ulita. 
\p  
\v 14 Cha gerule ba ole, nga be suga noare kwiandi bai kaire kle mo ñometralla gbababi biale trate kare, ene ama ñage gli kwian gbagda toi chui tangle gba gute kaire ama ñage joge una no Chubenu ugakallage tangle ñage joge chiga.  
\v 15 Agwa kwian bai kaire agenga me no tanre kaire kwian bai kaire tañachuge me no dabadi che dolla Satanás kirallaske daba gbe boi daga ngwale, kaire kwian onbrenu muirenu ulita bai kaire kle mo chuge ke giti, kaire kwian bai kaire kle daba gweda, kaire kwian bai kaire kle lle oña ngwale gai dage mo chubeale, kaire kwian bai kaire no geru jinade ole kle sole ngwale diali, kwian agenga me no ai kare ene ulita ama mi ñage joge una no Chubenu eske. 
\p  
\v 16 Jesucristo gerule nakwaite ene: “Cha Jesu, cha lle boanga cha alin nga ngaña giti gdaite kagu geru ulia chada ai giti gbe chke uñale ba kwian ulita cha gerua gangage. Cha amaña kwian israelita chugagwalla unsuialin tangle kada David oindalla kaire cha beu ngliaña kle gwadenga no ngabebita bduge kare.” Jesucristo gerule ene ulita. 
\p  
\v 17 Chube Oña kaire Bda Cordero muingalla amaña kwian ulita Jesucristo gerua ganga, ama ulita kle gerule kwian me Jesucristo gerua ganga ole ene: “¡Bai Jesucristo gerua gai ulia!” Kaire kwian ulita bai geru Jesucristo giti ai keruchugu geru gbu gdadi, ama gerudale kwian me Chubenu ole geru ai giti: “¡Bai Jesucristo gerua gai ulia mo alin!” Kwian bai kaire agwe siechie ama chiedale chi kwian gbagda toi chui tangle jai, ama chi e jai ama me lle ketadale chi e no ñanale dale.  
\v 18 Kwian ulita bai kaire kle Chube gerua kle degaba chada ai giti keruchuge, kwian ene ulitage cha ama ta gbe geru ai giti ene: Ba bai kaire geru kle degaba chada ai giti gbe ma ngle geru kle degabage, gire ene Chube be ji gbe tirare ba giti salengwli kle degaba chada ai giti kare.  
\v 19 Kaire agwe kwian bai kaire geru kle degaba chada ai giti jwennga siere sidri me geru kete ulita kwiange kle degaba kare gire ene Chube be ama jwen siere jige sugekare Chubege, kwian e me ñage gli kwian gbagda toi chui tangle gba gute, ama me ñage toi una no Chubenuge. Una ai giti kaire gli ai giti geru kle degaba ulita chada ai giti. 
\p  
\v 20 Jesucristo lle boanga mo alin nga ngaña giti kagu cha ta gbe geru ulia ai ulita giti, ama kle gerule ene: “Ulia cha be chieni sugeti.” Gire cha jainnga Jesucristo kalen: “Cha Chugagwalla Jesu, cha takalin chege ulita chada ai kle gerule kare. Cha takalin ba chieni blikare ba kle gerule kare. Ene nobi.” Cha gerule ene Jesucristo chieni giti.  
\v 21 Cha gerule ulita bdagli ba ole chada ai giti, cha takalin che Chugagwalla Jesucristo age no no ba ulita nu Jesucristo gerua gaba ulia alin.