\id JHN - Buglere NT -Panama 2008 (DBL -2013) 
\h JUAN 
\toc1 Geru Jesucristo Giti Juan Nu Chada Degaba 
\toc2 Juan 
\toc3 Jn 
\mt1 Geru Jesucristo Giti Juan Nu Chada Degaba 
\mt2 San Juan 
\ip Kwian onbre chada ai deganga kadakle Juan, Juan chagedu Jesu ole geru jwen Jesuge ule kwian na gdataboko giti gdaite ole. Juan kwian ngwe jwannga ule mo daballa kada Santiago ole mo ñenua kada Zebedeo ole gire Jesu Juan kaire Santiago kadu chage diali Jesu ole geru jwen Jesuge. Juan kaire Santiago mo ñenua chugu ngwadi gire ama gdabonate jo ule Jesu ole Jesu gatedi geru jwen Jesuge. 
\ip Juan chagedu diali Jesu ole malen Juan chada ai degu Jesu gerudu giti Jesu agedu giti nga dba ai giti ulita, ama chada ai degu kwian ulita nga ulitamu alin. Chada ai giti Juan kwian ta gbu ulia Jesu Chube Kirolla, kwian Jesu gai ulia giti kwian chege Chubenu diali dale alin kwian toi diali chui tangle Chube ole. 
\ip Juan jo juma gire ama jo gbaba ji chuge Jesu gerua trage gdale, ama kagle skage toi ngadrega bleske kada Patmoge. Juan kledu ne ngwadi gire Chube Oña ama ta gbu chada na dege, chada e kada julale El Apocalipsis. Chada e chege bdagli chada Nuevo Testamento giti. Kaire Juan amaña chada na gamai degu, chada e kada julale Primera Carta de Juan, Segunda Carta de Juan, Tercera Carta de Juan. 
\c 1  
\s1 Cristo klebi enebi gwangea Chube ole, 
\s1 Chube ama kage kwian kare nga dba ai giti 
\p  
\v 1 Gwangea nga ulita bebi dodadale Cristo klebi enebi, ama klebi Chube ole, ama Chube,  
\v 2 gwangea ama klebi enebi Chube ole.  
\v 3 Ama giti Chube nga ulita dodadu lle ulita dodadu, Chube ni lle gdaite dodadu sugekare amage.  
\v 4 Cristo alin giti lle ulita gwade kwian ulita gwade. Ama kwian ta gbe suge kwian chagedale mine Chube takalin kare, ama jichra kare kwian ulita alin, ama kwian ta gbe suge salengwli jichra kle kwian gbe ten nga jereske kare.  
\v 5 Kwian me Chube uñe chage nga jereske kare, Cristo chku jichra kare kwian ene alin, jichra chku chratigenga nga jere dbiguske, nga jere dbigu tadu jichra chra gwakalinda ene jichra me chratigenga dare, nga jere dbigu me ñadu jichra gweda.  
\v 6-7 Chube kwian onbre gdaite kada Juan-Bautista kagu gerule no jichra giti kwian ulita ole. Juan-Bautista gerudu no trate jichra giti, ene kwian geru e keruchuge, ene kwian ulita ñage jichra uñe jichra gai ulia Juan-Bautista giti.  
\v 8 Juan-Bautista me jichra, ama gerunga alin jichra giti kwian ole.  
\v 9 Jichra ulia chiu nga dba ai giti kwian ulita alin, ama kwian ta gbe Chube giti, ene suge kwiange Chube mine, jichra e Cristo. 
\p  
\v 10 Cristo nga ulita lle ulita kwian ulita dodadu, Cristo ulita mauña. Ama chku nga dba ai giti kwianske agwa me chku uñale kwian ulitage ama chema.  
\v 11 Ama chagedu mo jwiage mo bitallanuske, ama bitallanu ulita me ama gau ngwange no.  
\v 12 Agwa kwian bai kaire ama gau ngwange no kwian ama gau ulia, ama kwian ene gbu Chube oliale.  
\v 13 Kwian chege Chube oliale me salengwli kwian ulita nga dba ai giti menga chebia kote kare, kwian nga dba ai giti age mau tale ama takalin kare ene ama kirogwa molen, agwa Chube kwian ta blite age Chube takalin kare, kwian ene chege Chube oliale, Chube ama ulita Ñenua. 
\p  
\v 14 Chube Cristo kagu nga dba ai giti, ama chku kwian kare, ama toidu chagedu kwianske ama ta du no diali kwian ulita ole, ama agedu tanre no kwian alin, ene kwian gwage amadi chkedale uñale ama Ñenua mine ulia. Ama kledu kwianske agedu no ulita kwian alin gire cha chada ai deganga, cha ule cha chagemanalla ulita ole gwagedu amadi, ama agedu ulita uñale cha ulitage, uñale cha ulitage ama ulia Chube Kirolla gdaitre alin, ama mo Ñenua kirallaske agedu no ulita.  
\v 15 Juan-Bautista gerudu no no kwian ole Cristo giti, Juan-Bautista gerudu ene: “Ai cha geruadu kwian ole be chie cha nate ama ma kweri chage, ama kledu ngeru chage, gwangea ama klebi enebi Chube ole.” 
\p  
\v 16 Cristo diali age no che amanu ulita alin, diali ama kle age ma no dare che alin, ama ole age no ene diali me bidege.  
\v 17 Chube Moisés ta gbu chada dege kwian ulita alin, ene suge kwiange kwian chagedale mine Chube gwa giti nga dba ai giti, agwa chada e giti me sugedu ulia kwiange Chube mine, geru ma trate ulia Chube giti Jesucristo chiu dbe kwian alin, ene nege Jesucristo giti suge kwiange Chube no kwian ulita ole Chube agedu no kwian ulita alin.  
\v 18 Ni kwian gdaite nu gwageba Chubedi, Chube Kirolla alin giti kwian Chube uñe, Chube Kirolla gdaitre alin ama kaire Chube, ama talla kle ule diali mo Ñenua ole. 
\s1 Kwian israelita mneite kagle geru kade 
\s1 Juan-Bautistage Juan-Bautista chema 
\p  
\v 19 Kwian israelita chugagwalla ulita una Jerusalénmu kwian gau mne gdaite kagu geru kade Juan-Bautistage, kwian mne gdaite e gweale gerunga Chube ole daba alin, kwian na gerunga Chube ole daba alin chudaboanga, kwian e ulita jo chke Juan-Bautista kle ngwadi geru kadu Juan-Bautistage: 
\p —¿Ba chema? 
\p  
\v 20 Juan-Bautista gerudu trate mau giti kwian ole: 
\p —Sbali Chube gerudu be kwian jwannga siere kage kwian alin, e Cristo, ba tañachuge cha Cristo, me ene, cha me Cristo. 
\p  
\v 21 Kwian geru kadu nabitaite Juan-Bautistage: 
\p —Ba me Cristo, ¿ba chema? ¿Ba kwian Chube gerua ketanga dabage unsuialin kada Elías amaña chkuni? 
\p Juan-Bautista jaindunga: 
\p —Me ene, cha me ama. 
\p Kwian ulita jogeba chke Juan-Bautista ngwadi me ta chugu geru kade Juan-Bautistage, kwian gerudu Juan-Bautista ole: 
\p —Kwian Chube gerua ketanga dabage be chie, ¿ama ba? 
\p Juan-Bautista jaindunga: 
\p —Me dale, cha me ama. 
\p  
\v 22 Kwian gerudu Juan-Bautista ole: 
\p —Ba me ama, ¿ba chema? Ba gerule cha ole ba chema ulia. Cha geru ba giti dbadale, cha geru ba giti ketadale cha kagangage, ¿ba agali gerule mine mau giti? 
\p  
\v 23 Juan-Bautista jaindunga: 
\p —Cha kle age kwian Chube gerua ketanga dabage kada Isaías chada jigu degaba unsuialin cha giti gerule kare, cha gerunga kwian ole nga gballage Chugagwalla be chie giti, cha gerule kwian ole: “Kwian mo ta gbadale biale trate no Chugagwalla ngwange kwian kle jon lite trate biale chugagwalla ngwange kare.” Cha kle gerule ene kwian ulita ole. 
\p  
\v 24 Kwian fariseo ulita nu kwian mneite kagaba tienda Juan-Bautistadi,  
\v 25 ama geru kadu dare Juan-Bautistage: 
\p —Ba ulia me Cristo, ba me Elías, ba me kwian Chube gerua ketanga dabage be chie, ba me kwian e, ¿mineade Chube kalla giti ba kle daba ñe chiske gai ngaña chigage? 
\p  
\v 26 Juan-Bautista jaindunga: 
\p —Cha kle daba ñe chiske alin Chube kalla giti, agwa kwian gdaite kle cheske ma kweri chage, ba ulita bebi ama uñe,  
\v 27 ama be chie cha nate ama ma no ma kweri ulita chage, cha me ñanaske ama chudaboangale ama zapatolla jwennga ama serage —Juan-Bautista gerudu ene mau giti kwian una Jerusalénmu kagaba ole. 
\p  
\v 28 Boidu ene ulita una kada Betaniage, una e chege una Jerusalénge tanglegu chi Jordánge chkagu Juan-Bautista kledu kwian ñe chiske ngwadi, ne ngwadi kwian una Jerusalénmu geru kadu ene ulita Juan-Bautistage. 
\s1 Juan-Bautista gerule no Jesu giti 
\p  
\v 29-30 Nagbietege Juan-Bautista gwagedu Jesudi chie ama ngnagu, gire Juan-Bautista gerudu Jesu giti kwian ulita kledu ne ngwadi ole: 
\p —¡Gwagede, kwian e cha geruadu! Ama be mo chuge ngwadi jogeda kwian ulita alin bda cordero gwakle kwian kle age me no giti alin kare, Chube ama kagu nga dba ai giti kwian jwen siere ji chugege kwian age me no gdale. Cha gerudu ama giti kwian ole: “Be chie cha nate ama ma kweri chage, ama kledu ngeru chage, gwangea ama klebi enebi Chube ole.” Cha gerudu ene ama giti, nege ama kle chie che ngnagu.  
\v 31 Ngeru cha agalige me chku uñale be chie cha nate ama chema, agwa cha agedu cha kaganga Chube gerudu kare, Chube cha kagu cha kwian ñe chiske Chube kalla giti ene cha giti ñage chke uñale kwian israelitage chema be chie ama jwanngale siere.  
\v 32-33 Cha agali me ama uñu agwa cha kaganga Chube gerudu cha ole: “Ba be kle kwian ñe chiske cha kalla giti, gire kwian gdaite be chie mo ñeange chiske bage, ama gití ba be gwage cha Oñadi chie, cha Oña be chege ama gití. Be boi ene gire be chke uñale bage kwian e amaña be cha Oña gbe kwian tale, ene kwian be chage cha Oña ole diali.” Chube gerudu ene cha ole, boidu ene ulita Chube gerudu kare, cha ama ñeu chiske gire cha gwagedu Chube Oñadi chie ngaña ama gití beusi kare, beusi e chegu jageba ama giti ngaña.  
\v 34 Cha gwagedu Chube Oñadi chie ama gití Chube gerudu kare cha ole, e giti chku uñale chage trate ama Chube Kirolla —Juan-Bautista gerudu ene ulita Jesu giti. 
\s1 Kwian gdaboke chage gwangea Jesu ole 
\p  
\v 35 Nagbietege Juan-Bautista kledu nabitaite kwian ñe chiske gai ngaña chigage ngwadi, kwian gdaboke geru jwannga Juan-Bautistage kledu Juan-Bautista ole,  
\v 36 gire Juan-Bautista gwagedu Jesudi joge tangle kodi amage, Juan-Bautista gerudu Jesu giti: 
\p —¡Gwagede amadi! Chube ama kagu nga dba ai giti jogedaleda che ulita agedu me no giti alin bda cordero gwakle kwian kle age me no giti alin kare. 
\p  
\v 37 Kwian boke geru jwannga Juan-Bautistage Juan-Bautista keruchugu gerule ene Jesu giti, gire geru jwannga Juan-Bautistage jo Jesu ole.  
\v 38 Geru jwannga Juan-Bautistage chagedu Jesu nate, Jesu tiunda mo nate, Jesu gwagedu kwian geru jwannga Juan-Bautistage boke kle chage Jesu nate, Jesu geru kadu ama bokege: 
\p —¿Ba kle chage llema nate cha nate? 
\p Ama gerudu: 
\p —Kwian tkanga tangle geruge, ¿ba kle toi baini? 
\p  
\v 39 Jesu gerudu: 
\p —Bai cha ole tienda cha kle toi ngwadi. 
\p Ama boke jo ule Jesu ole, jo chke Jesu kle toi ngwadi, ngabi chui jo chege bate no dbi giti, nga jere malen geru jwannga Juan-Bautistage boke me joni, ama chegu Jesu ole, nagbietege ama joni. 
\p  
\v 40 Kwian boke e geru jwannga Juan-Bautistage Juan-Bautista keruchugaba gerule Jesu giti gire boke jogeba Jesu ole, gdaite kada Andrés, ama Simón-Pedro daballa.  
\v 41 Andrés jo siere Jesu kledu ngwadige gire blike Andrés jo mo daballa Simón jwen, ama takalin Jesu kaite daballage, Andrés gerudu daballa ole: 
\p —Sbali Chube gerudu be kwian jwannga siere kage kwian alin, e Mesías, nege ama kle cheske, ama skwendu chage. 
\p (Mesías amaña kada Cristo.) 
\p  
\v 42 Andrés gerudu ene Simón ole gire Andrés mo daballa Simón du Jesu kle ngwadi, Jesu gwagedu Simóndi Jesu gerudu Simón ole: 
\p —Ba kada Simón, ba ñenua kada Juan, agwa nege gwangerugu ba ka be chege jwandale Cefas, ka e amaña Pedro. 
\s1 Jesu kwian na kada Felipe kaire Natanael 
\s1 kade chage ama ole 
\p  
\v 43 Nagbietege Jesu mo ta gbu joge nga kada Galileage, nga ege Jesu tendu Felipe ngwange, Jesu gerudu Felipe ole: 
\p —Bai chagé cha ole geru jwen chage. 
\p  
\v 44 Felipe ai toinga una kada Betsaidage, Andrés kaire Pedro una Betsaidamu.  
\v 45 Felipe jo Natanael jwen Jesu kaitadale amage, Natanael skwendu Felipege undege gli kada higuera gdoge, Felipe gerudu: 
\p —Kwian gdaite skwendu chage, kwian e giti Moisés chada jigu degaba unsuialin kaire kwian Chube gerua ketanga dabage chada jigu degaba unsuialin kwian e giti, kwian e Jesu, ama José kirolla una Nazaremu. 
\p  
\v 46 Natanael gerudu: 
\p —¿Ba tañachuge una Nazaremuge kwian gweale no chada kle degaba giti kare ñage chie? 
\p Felipe me ta chugu gerule Natanael ole, Felipe gerudu: 
\p —Bai gwage cha kle kwian geruadedi, ene suge bage chema cha kle geruade. 
\p  
\v 47 Natanael jo Felipe ole tienda Jesudi, Jesu gwagedu Natanael chie kodi Jesu ngnagu, Jesu gerudu Natanael giti: 
\p —Ai ulia kwian israelita no, ama kle gerule ulia diali no daba ole, ama me chage sole daba ole. 
\p  
\v 48 Natanael Jesu keruchugu gerule ene gire Natanael gerudu Jesu ole: 
\p —¿Baini ba cha uñe? 
\p Jesu gerudu Natanael ole: 
\p —Felipe bebi gerule ba ole cha giti gire cha gwagedu badi ba kledu undege gli kada higuera gdoge. 
\p  
\v 49 Gire Natanael gerudu Jesu ole: 
\p —Kwian tkanga tangle geruge, ¡ulia ba Chube Kirolla ba kwian israelita ulita Chugagwalla! 
\p  
\v 50 Jesu gerudu Natanael ole: 
\p —Cha gwagedu badi undege gli kada higuera gdoge, e giti alin ba cha gai Chube Kirolla, suge bage ulia cha me jo badige ba kledu ngwadi, agwa uñadu bage cha kle gerule kare e ulia, chui aige gwangerugu Chube kiralla giti cha be age tanre ma no aige ba gwa giti, ba me gwagebadi ba be gwagé. 
\p  
\v 51 Kaire Jesu gerudu: 
\p —Cha gerule ulia ulia ba ole, aige gwangerugu cha giti ba ulita be gwage nga ngañadi be kle tigebanga kare, kaire ba be gwage lle boanga Chube alindige chage gwabdugu gwadbigu cha Chube Kirolla chieba kwian kare be kle ngwadi nga dba ai giti —Jesu gerudu ene ulita Natanael ole. 
\c 2  
\s1 Jesu chi blite uva chia gagere una Canáge 
\s1 nga kweri Galileage 
\p  
\v 1 Gire maikege kwian mo jwen chuia chku, kwian tanre kledu daba mo jwen chuia ollade una Caná nga kweri Galileage.  
\v 2 E suiale Jesu chebia kledu ule mo jwen chuiadi, Jesu kaire geru jwannga Jesuge jo kadaba mo jwen chuiadi.  
\v 3 Kwian ngle kledu mo jwen chuia ollade gire uva chia gage bidu. Jesu chebia chegu tañachuge tanre uva chia gage bidu giti kwian kle mo litaba chuia ollade be llema jai, gire Jesu chebia gerudu Jesu ole: 
\p —Uva chia ulita bidu, uva chia me jale kwian alin. 
\p  
\v 4 Jesu gerudu: 
\p —Cha chebia, ¿mineade ba gerule cha ole uva chia bidu? Chui be chke gire cha be lle no no boi Chube kiralla giti kwian gwa giti, ene kwiange be suge cha Chube Kirolla ulia. Agwa chui e bebi chke. 
\p  
\v 5 Jesu gerudu ene chebia ole gire chebia gerudu kwian lle boanga mo jwen chuiage ulita ole: 
\p —Jesu ba kage age ba age ulita ama gerule kare. 
\p  
\v 6 Ke dodaba kantro kare, chi ogangwa ke kantrolla ege gbaite gbaitege chi joge chke litro ngle litro cincuenta. Ke kantrolla ege kwian israelita chi ogo ko gligagda diali, ene kwian israelita tañachuge ama mo ko glige ene ama no trate Chube gwa giti. Ke kantrolla gbadereke kledu ngwale chui ege kwian mo jwen chuiage.  
\v 7 Jesu gwagedu ke kantrolla edi kle ngwale, Jesu gerudu kwian lle boanga ulita ole: 
\p —Ke kantrolla ai ulita gbe ete chi ole. 
\p Kwian lle boanga chi tku ke kantrollage gbadereke gbaite gbaite ulita gbu ete.  
\v 8 Gire Jesu gerudu kwian lle boanga ole: 
\p —Ne gire ba chi jwen sidri ba kete kwian lle gbanga biale chui ollade alinge. 
\p Kwian lle boanga agedu ene Jesu gerudu kare.  
\v 9-10 Jesu chi blitu uva chia gagere, kwian lle gbanga biale chui ollade alin chi e jau sidri, amage sugedu uva chia gage no, me uñadu amage uva chia e no kledu ogaba baini, agwa kwian lle boanga alinge uñadu, ama ulita chi jun chi tku ke kantrollage, chi e Jesu blitu uva chia gagere. Kwian lle gbanga biale chui ollade alin ta me chegu suga no, ama kwian onbre mo jwannga chui ege kadu, ama gerudu kwian mo jwannga ole: 
\p —Kwian kle chui ollade, diali chui ollade mauña kle uva chia gage no kete jondege daba kadaba ulitage, daba kadaba ulita kle uva chia no jai ngle gire chui ollade mauña kle uva chia me no kete bdagli jadale, agwa ba me agedu ene, ba uva chia ma no jigu ogaba jadale bdagli. 
\p  
\v 11 Jesu chi blitu uva chia gagere una Caná nga kweri Galileage, e gwangea Jesu agedu Chube kirallaske kwian gwa giti, e giti Jesu takalin suge trate kwiange ulia ama Chube Kirolla. Kwian geru jwannga Jesuge ama ulita Jesu gau ma no ulia Jesu chi blitu giti.  
\v 12 Boidu ene ulita una Caná nga Galileage gire Jesu jo una Capernaumge, chebia, daballa ulita, kaire geru jwannga Jesuge ulita jo ule Jesu ole chegedale una ege chui gwealege alin. 
\s1 Jesu kwian bda chbadanga kage siere 
\s1 ule bda ole u gerungwa Chube olege 
\p  
\v 13 Kwian israelita ulita kle tachke Chube kwian israelita enusulian unsuialin jun siere nga kweri Egiptoge giti, e Pascua chuia, e chuia ollade chegu kodi gire Jesu jo una Jerusalénge kwian israelita ulita be chui ollade ngwadi.  
\v 14 Jesu kledu una Jerusalénge gire ama jo u gerungwa Chube olege, u ege kwian chbi lle boagda chbadanga tanre kle, kwian bda oveja chbadanga tanre kle, kwian beusi chbadanga tanre kle, kaire kwian tanre kle toiba dba nga igi blitangwage kle igi blite daba na ole, kwian ene ulita skwendu Jesuge age ene u ege.  
\v 15 Jesu gwagedu kwiandi bda chbade u ege Jesu giska jun giska gwliu daba jegwale, giska e giti Jesu chbi, oveja ulita kagu siere u gerungwa Chube olege ule kwian bda chbadanga ole, kaire Jesu kwian igi blitanga kagu siere, Jesu igi ulita mliudba tangle kaire mesa igi blitangwa Jesu mesa e blitunga ulita.  
\v 16 Jesu gerudu beusi chbadangage: 
\p —Ba beusi ulita jwen siere u aige. U ai me bda chbadangwa, u ai me bda gigangwa, u ai me igi gangwa bda ñanale, u ai gerungwa cha Ñenua ole alin allabi. 
\p  
\v 17 Kwian geru jwannga Jesuge gwagedu Jesudi age ene, kwian geru jwannga tachku geru kle degaba sbali Jesu giti gerule ene: 
\q1 “Chube cha Ñenua, cha takalin u gerungwa ba ole kwian gai gerudale ba ole alin allabi, u e me lle na boangwa, cha mi kwian chuge ngwadi age dare ama be ta agekalin kare, e giti cha be tañachuge tanre, cha be ta lle boakalin no kwianske ba takalin kare.” 
\p  
\v 18 Jesu agedu ene kwian bda chbadanga ole u gerungwa Chube olege gire kwian israelita chugagwalla ulita kledu eni geru kadu Jesuge: 
\p —¿Chema ba kagu age ene aini u aige? ¿Bage suge Chube ba kagu? E ene ulia ba lle gweale daga ngwale no dodade Chube kirallaske cha gwa giti ene chke uñale cha ulitage ulia Chube ba kagu. 
\p  
\v 19 Jesu jaindunga ama kalen: 
\p —Noare, cha be age ene ba gwa giti, ba u ai skiendba ulita gire chui gbamaire alin cha be u gbeni naskuni no biale. 
\p  
\v 20 Kwian israelita gerudu Jesu ole: 
\p —U ai jo dodaba chura ngle chura cuarenta y seis gire u ai kweri dodadre ulita. U ai be kle skianbada gire ¿ba be u gbeni naskuni biale chui gbamaire alin allabi? 
\p  
\v 21 Kwian israelita gerudu ene ama tañachugu ulia Jesu kledu gerule u gerungwa Chube ole giti, agwa Jesu me gerudu ama ole u e giti, Jesu gerudu mau giti kwian israelita ole, gerudu ama be jogeda giti kaire ama jaba be chkeni gwade giti.  
\v 22 (Chui chku gire Jesu boidu ulia Jesu gerudu kare, Jesu jokeda, Jesu jaba chkuni gwade mongikege, boidu ene ulita gire kwian geru jwannga Jesuge ulita tachku Jesu gerudu mau giti kwian israelita ole, e giti kwian geru jwannga ulita Chube gerua degaba unsuialin Jesu giti gau ma no, kaire ama ulita Jesu gerua mau giti gau ulia.) 
\p  
\v 23 Jesu kledu Pascua chuia ollade ule kwian israelita ulita ole una Jerusalénge, chui ege Jesu lle tanre daga ngwale no dodadu Chube kiralla giti kwian me ñage dodade kare mo kiralla giti, e giti kwian tanre Jesu gau ulia, kwiange sugedu Chube ama kagu ama Cristo.  
\v 24-25 Jesuge sugedu trate kwian ulita me kle mo ta gbe ulia Jesu gai mo tale, agwa kwian Jesu gau ulia mo chugale alin Jesu lle daga ngwale no dodadu alin giti kwian gwa giti, malen Jesu kledu ta giti kwian eske, chku uñale ulita Jesuge kwian ulita talla mine. Ni kwian gdaite gerudu Jesu ole kwian ta mine, agwa Jesu tale Jesu agali kwian ulita ta uñe trate. 
\c 3  
\s1 Nicodemo joge geru trage Jesu ole 
\p  
\v 1 Kwian fariseo ulitaske onbre gdaite kada Nicodemo, onbre e daba israelita chugagwalla gdaite.  
\v 2 Chui gbaite ngajrege Nicodemo e jo tienda Jesudi gerule Jesu ole, Nicodemo gerudu: Nicodemo geru trage Jesu ole 
\p —Kwian tkanga tangle geruge, chage uñale kaire kwian na tanrege uñale Chube ba kagu cha ulita tke tangle Chube giti. Diali ba kle lle daga ngwale no dodade kwian gwa giti, e giti suge trate chage ba kle age Chube kiralla giti, Chube me kle ba ole ba me ñage age ene ba kle age kare. 
\p  
\v 3 Jesu gerudu Nicodemo ole: 
\p —Cha gerule ulia ulia ba ole, kwian me menga nabitaite me ñage joge Chube ngwadi, kwian ene me Chubenu. 
\p  
\v 4 Nicodemo geru kadu Jesuge: 
\p —¿Mine che be menga nabitaite? Che juma me ña mo blite soli menga nabitaite kirogwa kare. ¿Che juma mine ña jogeni nabitaite chebiadíge gire menga chebia kote kwaite? 
\p  
\v 5 Jesu jaindunga: 
\p —Cha gerule ulia ulia ba ole, kwian ulita menga nge jondege soli chebia kote, menga ene alin allabi giti kwian me Chubenu me ñage toi Chube ole, agwa kwian ulita mo ta chugadale ngwadi Chube Oñage mo ta blite, ene ama Chubenu, be toi Chube ole, e salengwli kwian menga nabitaite kare.  
\v 6 Kwian menga chebia kote nge jondege soli che ña gwage kwian soli mine, che ñage gwage amadi. Agwa kwian menga nabitaite Chube Oña giti Chube Oña kwian ta blite, edi che me ten mo gwagwa giti.  
\v 7 Ba me chege tañachuge mineade cha gerudu ene ba ole: “Kwian ulita medalenga nabitaite.”  
\v 8 Mledi ba me ten, agwa ba jegwalege mle suge, kaire ba mle keruchuge, agwa me uñale bage mle kle chie nga bainige kle joge nga bainige, mle tiennga ngage ulita baini kaire ta tienkalinnga ama joge. Ene kaire Chube Oña kwian ta gbe menga nabitaite kare, Chube Oña kwian ta blite Chube ole, edi kwian me ten, agwa suge kwiange mo tale kwian ta me nge kare. 
\p  
\v 9 Nicodemo geru kadu dare: 
\p —¿E ñage boi mine ene ba kle gerule kare? 
\p  
\v 10 Jesu gerudu Nicodemo ole: 
\p —Ba daba israelita tkanga tangle no geru ulita giti, ¿mineade geru ai kare cha gerudu giti me suge bage?  
\v 11 Cha ule kwian geru jwannga chage ulita ole gerule no no Chube Oña kwian ta blite giti, uñale cha ulitage Chube Oña kwian ta blite ulia, Chube Oña kwian ta blitabadi cha ulita gwagedu, kwian ene kle chage Chube takalin kare, e giti cha ulita kle gerule ba ole kaire ba bitalla ole, agwa ba, ba bitalla me kle cha ulita kerua gai ulia cha ulita kle gerule giti.  
\v 12 Cha geru ñachuge ba alin lle nga dba ai giti ba kle gwagedi gire geru e me suge bage, cha geru ñachuge giti ba me cha kerua gai ulia ba mi ñage cha kerua gai ulia cha gerule Chube giti ba ole, edi ba me kle gwagé.  
\v 13 Ni kwian gdaite nga dba ai giti jo nga ngaña giti Chube kle ngwadi gire chiuni nga dba ai giti geru kete kwian ulitage Chube giti, cha alin allabi kledu nga ngaña giti chiu nga dba ai giti gerule kwian ole Chube giti, cha ama Kirolla, ama cha kagu nga dba ai giti kwian kare.  
\v 14 Unsuialin Moisés hierro dodadu jorisire, Moisés gli dagu dbige jorisi oña e gbangwa ngaña, ene kwian lentigeba jorisige gwage jorisi oñadi ngaña ama joge chke noni. Moisés agedu jorisi oña ole kare, ene kwian be age cha ole, kwian be cha gbe kruge ngaña,  
\v 15 ene kwian ulita bai kaire cha gai ulia be toi no chui tangle diali Chube ole nga ngaña giti.  
\v 16 Chube no no kwian ulita ole, malen ama mo Kirolla gdaitre alin kagu nga dba ai giti kwian ulita alin, ene kwian ulita bai kaire Chube Kirolla gai ulia mi chege sugekare Chubege ji chuge, be toi no chui tangle diali Chube ole nga ngaña giti.  
\v 17 Chube me mo Kirolla kagu nga dba ai giti kwian ulita gbe jiske age me no giti gdale, Chube mo Kirolla kagu kwian ulita jwen siere ji chugege kwian age me no gdale.  
\v 18 Kwian ulita bai kaire Chube Kirolla gai ulia me chege jiske dale age me no giti gdale, agwa kwian ulita bai kaire me Chube Kirolla gai ulia kwian ene chege jiske age me no giti diali, ama me Chube Kirolla gdaitre alin gai ulia Chube Kirollale mo jwanngale siere ji chugege age me no gdale,  
\v 19-20 kwian ene chege jiske diali age me no gdale. Kwian kle age me no kle age nga jereske kare, Chube Kirolla chku nga dba ai giti jichra kare kwian ene ulitaske, agwa kwian mo ta gbaba age me no diali kwian ene me no jichra ole, me ta jogekalin jichra kle ngwadi, ene ama kle age giti me no me chke uñale, ama ta chegekalin nga jereske kare age me no diali ama ta agekalin kare.  
\v 21 Agwa kwian bai kaire kle chage Chube takalin kare, ama no jichra ole, ama joge jichra kle ngwadi, ene ama kle age ulita chke uñale ama kle age no Chube takalin kare. 
\s1 Juan-Bautista gerule no Jesu giti 
\p  
\v 22 Jesu gerudu ene ulita Nicodemo ole gire Jesu jo kwian geru jwannga Jesuge ulita ole nga kweri Judeage, nga Judeage Jesu chegu chui sbali ule kwian geru jwannga ole, nga ege Jesu kwian geru jwannga amage ulita gbu kwian ñe chiske gai ngaña chigage Jesu kalla giti.  
\v 23 Kaire Juan-Bautista kledu kwian ñe chiske una na kada Enónge kodi una Salimge, una ege chi tanre kle, kwian ngle jo Juan-Bautista kle ngwadi mo ñeange chiske Chube kalla giti.  
\v 24 Juan-Bautista kledu kwian ñe chiske ene, e suiale Juan-Bautista bebi joge skage. 
\p  
\v 25 Chui gbaite kwian geru jwannga Juan-Bautistage ulita kira batu kwian israelita gdaite ole kwian ñe chiske giti, kwian geru jwannga Juan-Bautistage gerudu Juan-Bautista giti Juan-Bautista kwian ñe chiske kwian chege ma trate, kwian israelita gerudu Jesu giti kwian geru jwannga Jesuge kwian ñe chiske kwian chege ma trate.  
\v 26 Kwian geru jwannga Juan-Bautistage ulita jo gerule Juan-Bautista ole: 
\p —Cha tkanga tangle geruge, cha gerule ba ole kwian gdaite giti kledu ba ole chi Jordánge tanglegu, ama giti ba gerudu no cha ole, ama ngwadi kwian ulita kle joge, ama kle kwian geru jwannga amage ulita gbe kwian ñe chiske, nege kwian ulita kle chage ama nate. 
\p  
\v 27 Juan-Bautista gerudu kwian geru jwannga amage ole: 
\p —Chube me kle kwian ole kwian me ñage age Chube kiralla giti.  
\v 28 Cha gerudu kwian ole ba gwa giti, ba ulita cha keruchugu gerule trate mau giti cha me Cristo, Chube cha kagu Cristo ngeru kwian ulita ta gbe ama gai ngwange no.  
\v 29 Nege ama chku, kwian kle chage ule ama ole, e giti nga chege suga no no chadi. E salengwli kwian onbre be mo jwen chuialla gbe, ama be skatemanalla gdaite gbe lle ulita gbe biale mo jwen chuiage alin. Mo jwen chuia chke gire onbre, muire kle ule, ulita kle no. E giti skatemanalladi nga be chege suga no no. Ene kaire nga suga no chadi Cristo chku kwian kle chage ule ama ole.  
\v 30 Cha takalin Cristo chege ma kweri chage kwian gwa giti, cha chege soli kwian gwa giti.  
\v 31 Cristo chiu nga ngaña giti Chube kle ngwadi chku nga dba ai giti, ama kwian ulita mauña. Kwian nga dba ai giti nga dba aimu, ama gerule lle nga dba ai giti alin giti. Cristo chiu nga ngaña giti Chube kle ngwadi, ama kwian ulita mauña nga ulita mauña, ama geru nga ngaña giti alin trage kwian ole,  
\v 32 amage ulita uñale ama gwagedudi ama keruchugu nga ngaña giti Chube kle ngwadige, ama geru e alin trage kwian ole, kwian bedre alin ama kerua gai ulia ama kle gerule kare.  
\v 33 Kwian bai kaire mo ta gbe Cristo kerua gai ulia ama gerule kare, kwian ene kle Chube gai ulia kaire.  
\v 34 Chube mo Kirolla kagu nga dba ai giti, Chube Kirolla kle Chube gerua trage kwian ole, Chube kle mo Oña kage diali Kirolla alin, me kle Kirolla chuge ngwadi ama gerua trage gballa.  
\v 35 Ñenua Chube no mo Kirolla ole, ama lle ulita gbu mo Kirolla kote.  
\v 36 Kwian ulita bai kaire mo ta gbe Chube Kirolla gai ulia mo alin be toi diali chui tangle Chube ole nga ngaña giti, agwa kwian ulita bai kaire me Chube Kirolla gai ulia mo alin, kwian ene be chege sugekare Chubege chui tangle diali, Chube be ji gbe mno kwian ene alin diali —Juan-Bautista gerudu ene ulita kwian geru jwannga amage ole Jesu giti. 
\c 4  
\s1 Jesu gerule muinga nga Samariamu ole 
\p  
\v 1-2 Geru chku uñale kwian fariseo ulitage kwian ngle kledu chage Jesu nate Jesu gerua jwen kaire mo ñeange chiske Jesuge (Jesu agali me kwian ñeu chiske, agwa Jesu kwian geru jwannga amage ulita gbu kwian ñe chiske). Kwian geru jwannga Jesuge kledu kwian ma ngle ñe chiske Juan-Bautista kledu kwian ñe chiskege, e me skwendu no kwian fariseoge.  
\v 3 Kwian fariseo me ta chegu no Jesudi chku uñale Jesuge, malen Jesu jo siere nga kweri Judeage Jesu kledu ngwadi, Jesu joni chage naskuni nga kweri Galilea ngnagu ule kwian geru jwannga amage ulita ole.  
\v 4 Jon joge nga Galileage joge nga kweri Samaria sketangle,  
\v 5 malen Jesu jo chke nga Samariage una kada Sicarge, una e chege kodi José dbiage, unsuialin Jacob dbi e ketu mo kirolla Josége,  
\v 6 dbi ege Jacob nu chi gwagwa dbiugalla dodaba. Chui jo chke bduke Jesu jo chke chi gwagwa e amañage, Jesu skwatigu tanre chagege jonkare, malen chi gwagwa edi Jesu toidu dba undege chi gwagwa kagdage.  
\v 7-8 Jesu chegu undege ne ngwadi gire kwian geru jwannga amage ulita jo unaske bligda gige gutadale, kwian geru jwannga ulita jo skate bligda gige gire muinga gdaite nga Samariamu chku chi gwagwadi chi jwanle, gire Jesu gerudu muinga e ole: 
\p —Cha siechie, cha takalin ba chi jwen cha alin jadale. 
\p  
\v 9 Uñadu muingage kwian israelita me no kwian nga Samariamu ole, malen muinga nga Samariamu gerudu Jesu ole: 
\p —Ba kwian israelita, ¿mineade ba chi kade chage cha muinga nga Samariamuge? 
\p  
\v 10 Jesu jaindunga: 
\p —Noare bage suge chema kle gerule ba ole, cha giti Chube ta chi no ketakalin bage. Suge trate ene bage, ba chi kade chage blike, ene cha chi gwade kete bage. 
\p  
\v 11 Muinga gerudu: 
\p —Ba ole chi jwanngwa me, dbiuga jere chi jwanngwa, ¿ba be chi jwen mine ketadale chage? ¿Ba chi gwagwa gwade molen baini?  
\v 12 Cha enusulian unsuialin Jacob kledu gwade ama chi ai jau, ama kirolla ama bdadalla kaire chi jun aini jadale, Jacob chi gwagwa ai jigu bdadalla oindalla ulita bdagli alin jadale. Cha enusulian alin ñadu chi gwagwa ai dodade, ¿ba tañachuge ba ma kweri cha enusulian Jacobge chi na ma no kete chage? 
\p  
\v 13 Jesu jaindunga: 
\p —Kwian ulita kle chi gwagwa ai Jacob nu jigaba jwen, kwian ulita chi ai jai sie ole, diali kwian be siechie nakwaite, kwian be ta chi ai jakalin diali.  
\v 14 Agwa cha chi kete kwiange jadale kwian mi siechie dare, chi e chege diali jrite ama tale, chi gwade no trate ngaintra diali, e giti kwian be toi diali chui tangle. 
\p  
\v 15 Muinga gerudu: 
\p —Ba gerule noare chi giti, ba chi e kete chage, ene cha chi e ba kle geruade jai cha mi siechie dare ni cha be chie chi jwen dare chi gwagwa aige jadale. 
\p  
\v 16 Jesu gerudu dare muinga ole: 
\p —Joga ngeru ba ñengula jwen ba chieni ama dbe ule aini. 
\p  
\v 17-18 Muinga jaindunga Jesu kalen: 
\p —Cha me mo ñengulallage. 
\p Jesu gerudu: 
\p —Ba kle gerule trate ulia cha ole ba me mo ñengulallage, ba mo jun onbre gdatiga ole gdaite gdaite, ba ama ulita gdaite gdaite chugu ngwadi, nege ba kle chage onbre na gdaite ole, onbre e ba kle chage ole me banu. 
\p  
\v 19 Muinga Jesu keruchugu gerule ene ulia muinga kle age giti, gire muinga gerudu Jesu ole: 
\p —Chage suge ba kwian kweri Chube gerua ketanga dabage. 
\p  
\v 20 Muinga gerudu ene Jesu ole gire muinga jwichuga kle kodi ama kledu ngwadi kaitu Jesuge: 
\p —Gwagede jwichuga edi, jwichuga e giti ngaña diali cha enusulian nga Samariamu unsuialin Chube olladu, kaire nege cha cha bitalla ole kle joge jwichuga e giti eni alin Chube olladadale. Agwa ba kwian israelita ulita kle gerule kwian ulita jogedale una Jerusalénge, llani alin u gerungwa Chube ole kwian ñage Chube ollade. 
\p  
\v 21 Jesu gerudu muinga ole: 
\p —Ba cha keruchuge ba cha kerua gadale ulia, chui be chke gire ba kwian nga Samariamu ulita be ñage Ñenua Chube ollade nga baini kaire ba be kle ngwadi, ba mi tañachuge dare joge jwichuga ege ni tañachuge joge una Jerusalénge Chube olladadale.  
\v 22 Nege ba ulitage me uñale trate ba kle chema ollade, agwa cha kwian israelita ulitage uñale cha kle chema gai ulia mo Chubeale cha kle chema ollade, uñale kwian israelita ulitage kwian jwannga siere be chie kwian israelitaske.  
\v 23 Nege gwangerugu kwian ulita bai kaire ta Ñenua Chube olladakalin ulia ulia, ama ulita mi tañachuge joge nga gwealege Chube ollade, amage be suge Chube Oña kle ama tale, nga baini kaire ama be kle ngwadi ama be Chube ollade be gerule no Chube ole mo tale Chube Oña ama ta gbe kare. Chube takalin kwian mo ta gbe ulia ulia Chube ollade no mo tá giti ene kare.  
\v 24 Chubedi kwian me ten, kwian tale alin suge ulia Chube kle, kwian ulita bai kaire mo ta gbe Chube ollade gerule no Chube giti ulia ulia, kwian ene gerudale mo tá giti Chube Oña kwian ta gbe kare. 
\p  
\v 25 Jesu gerudu ene gire muinga gerudu: 
\p —Unsuialin Chube gerudu be kwian jwannga siere kage kwian ulita alin, ama kada Cristo, uñale chage Cristo be chie ulia Chube gerudu kare, Cristo be chke gire ama be cha ulita tke tangle no ulita Chube giti. 
\p  
\v 26 Jesu gerudu muinga ole: 
\p —E cha ba kle gerule giti, cha amaña kle gerule ba ole. 
\p  
\v 27 Jesu kle gerule ene muinga ole gire kwian geru jwannga ulita nu jogeba bligda gige chkuni Jesu kle ngwadi, kwian geru jwannga ulita gwagedu Jesudi geru trage muinga ole, ama ulita tañachugu mineade Jesu kledu geru trage muinga nga Samariamu ole, agwa ni kwian geru jwannga gdaite su geru kade Jesuge Jesu takalin llemage o llema giti kle gerule muinga ole.  
\v 28 Jesu gerudu muinga ole ama Cristo gire muinga chi jwanngwa jigu chi jwankle ngwadi, ama jo unaske gerule kwian ngle ole Jesu gerudu giti ama ole. Muinga kwian ta gbu chie Jesu kle ngwadi, muinga gerudu kwian ole: 
\p  
\v 29 —Bai cha ole gwage onbre gdaitedi skwendu chage, ama gerudu cha ole trate cha mo ta gbu chage age me no ulita giti, suge chage ama Cristo. 
\p  
\v 30 Muinga geru ketu kwian unaskege Jesu giti, gire kwian tanre jo ule muinga ole tienda Jesudi.  
\v 31 Kwian unaske bebi chke Jesudi gire kwian geru jwannga ulita gerudu Jesu ole: 
\p —Cha tkanga tangle geruge, cha chiuni bligda dbe ba alin gutadale, cha takalin ba blire. 
\p  
\v 32 Jesu gerudu kwian geru jwannga ole: 
\p —Cha alin lle gweale kle gutale ba ulitage me uñale. 
\p  
\v 33 Kwian geru jwannga ulita gerudu modi: 
\p —¿Kwian gweale chku bligda kete amage gutale? 
\p  
\v 34 Jesu gerudu kwian geru jwannga ole: 
\p —Chube cha kagu lle boi ama alin, cha ta lle boakalin ulita ama takalin kare, lle e be kle boaba ulita gire nga be suga no chadi, cha tale be suge no salengwli che kle suge che kle unchke bligdadi kare.  
\v 35 Ba ulita kle tañachuge ba be manade gire bigwa ba be lle boi Chube alin, agwa cha gerule ba ulita ole ba me manadale, ba lle boadale Chube alin nege nege. Gwagede kwian ngle kle chie che ngnagudi, ama ulita ta kle biale Chube gerua gai, ba ulita geru Chubenu ketadale amage blike, ene ama ta blite Chube geruadi, kwian e ulita ta kle biale salengwli chude kle biale skutadale kare, ba geru ketadale blike kwian ege chude skutakle blike kare.  
\v 36 Kwian bai kaire Chube gerua kete kwiange daba nate kwian ta blite Chube geruadi, kwian ene alin Chube be age no kwian na ta blite Chube geruadi ñanale. Chube gerua ketanga ngeru ule Chube gerua ketanga daba nate ole, nga be suga no gdabonatedi kwian na Chube gerua gau ulia be toi diali chui tangle Chube ole giti.  
\v 37 Kwian gerua gerule ai kare gerule ulia: “Kwian gdaite chude tke, kwian na chude skute.”  
\v 38 Ene kaire cha ba ulita gau kagadale daba na Chube gerua ketanga nate Chube gerua kete kwian ta gbaba biale Chube geruageske, ba alin me mno geru dbadale kwian eneske, kwian ene ulita kle mo ta gbaba biale blite Chube geruadi, daba Chube gerua ketu ngeru kwiange, ba Chube gerua ketu daba e nate kwian amañage, ene daba Chube gerua ketanga kwiange ngeru giti kaire ba giti kwian tanre kle mo ta blite Chube geruadi. 
\p  
\v 39-40 Jesu gerudu ene kwian geru jwannga amage ulita ole gire kwian nga Samariamu tanre unaske chku Jesu ngwadi ule muinga ole, kwian tanre kwian e ulitaske nu Jesu gaba ulia muinga gerudu kare Jesu giti, muinga gerudu: “Ama gerudu cha ole trate cha mo ta gbu chage age me no ulita giti.” Muinga gerudu ene giti kwian tanre nu Jesu gaba ulia, kwian e ulita chku Jesudi, ama ulita gerudu Jesu ole: 
\p —Cha takalin ba chegeda cha ulitaske aini. 
\p Jesu chegu una ege chui gbaboke.  
\v 41 Kwian ngle una ege Jesu agali keruchugu kwian tke tangle Chube geruage, geru e giti kwian ma ngle ama gau ulia.  
\v 42 Kwian Jesu ganga ulita gerudu muinga ole: 
\p —Nege cha geru gai ulia ma no Cristo giti me ba gerudu alin allabi gai ulia Cristo giti, agwa nege che ulita agali Cristo keruchugu gerule no Chube giti, nege uñale chege ulia Cristo kwian ulita jwannga siere ji chugege age me no gdale. 
\s1 Jesu kwian chugagwalla gdaite toinga 
\s1 una Capernaumge kirolla oga dodade 
\p  
\v 43 Jesu chegu chui gbaboke nga Samariage gire ama chagedu dare nga Galilea ngnagu.  
\v 44 (Jesu agali geruba mau giti: “Kwian Chube gerua ketanga ama jwiage bitalla me ama gai ngwange kwian Chube gerua ketanga ulia kare.”)  
\v 45 Jesu jo chke nga ege, kwian ulita nga ege Jesu gau dage gau ngwange no, kwian nga Galileage jogeba una Jerusalénge ama enusulian nge Chube jun siere nga Egiptoge chuia ollade, chui e Pascua chuia, chui ege kwian nga Galileage gwagedu Jesudi age tanre no. 
\p  
\v 46 Jesu jo chke nakwaite una Canáge nga Galileage, eni ngeru ama chi blitu uva chia gagere. Kwian chugagwalla gdaite toinga una Capernaumge nga Galileage, ama kirolla gdaite oga,  
\v 47 chugagwalla ege chku uñale Jesu chiu nga Judeage chku una Canáge nga Galileage, gire chugagwalla jo una Canáge tienda Jesudi gerule Jesu ole mo kirolla oga giti, ama gerudu: 
\p —Cha takalin ba joge cha ullage cha kirolla oga dodade, cha kirolla oga kirale chege bedre ama ngeru ama jogeda. 
\p  
\v 48 Jesu jaindunga: 
\p —Ba kaire kwian na ulita diali takalin cha lle gweale daga ngwale no dodade Chube kiralla giti cha dodadale ba gwa giti, ene ba be cha gai ulia, ba ulita gerule ene, agwa ba ulita me ta cha gakalin ulia mo tale, ba ulita kle cha gai ngwale. 
\p  
\v 49 Agwa chugagwalla me ta chugu gerule Jesu ole: 
\p —Jesu, ¡bai blike cha ole ngeru cha kirolla bebi jogeda gire! 
\p  
\v 50 Jesu gerudu chugagwalla ole: 
\p —Jogani ba ullage, ba kirolla mi jogeda, ama kleni noni. 
\p Chugagwalla Jesu keruchugu gerule alin ene ama ole, ama Jesu kerua gau ulia, chugagwalla joni mo ullage oga kle ngwadi ngnagu.  
\v 51 Chugagwalla kle chage jonkare gudegu ngnagu gire lle boanga chugagwalla alin gweale chku ten mo chugagwalla ngwange jonke, lle boanga gerudu: 
\p —Ba kirolla jo chkeni, ama kleni noni. 
\p  
\v 52 Chugagwalla geru kadu lle boanga kledu kirolla oga olege: 
\p —¿Ngaminegire cha kirolla jo chkeni noni? 
\p Gire lle boanga gerudu mo chugagwalla ole: 
\p —Beigliga ngabi chui jwlite dbigu gire nganagda jo siere amage, ama chegu no. 
\p  
\v 53 Kirogwa oga ñenuage sugedu chui jwlite dbigu gire Jesu gerudu ama ole: “Ba kirolla mi jogeda, ama kleni noni.” Chugagwalla Jesu gerua tragu kwian gwa ulita ole Jesu agedu mine, ama kaire kwian gwa ulita Jesu gau ulia. 
\p  
\v 54 Nga Galileage lle daga ngwale no Jesu dodadu bitaboke Chube kiralla giti. Ngeru ama kledu nga Galileage lle daga ngwale no Jesu dodadu gwangea gire ama jo nga Judeage. Jesu joni siere nga Judeage jo chkeni nga Galileage gire lle daga ngwale no Jesu dodadu nabitaite, e chugagwalla kirolla oga Jesu ama dodadu. 
\c 5  
\s1 Jesu kwian onbre oga dodade chi tan 
\s1 kada Betzata ngwadi 
\p  
\v 1 Jesu kirogwa oga dodadu ene nga Galileage, chui jo tangle gire kwian israelita chui ollade una Jerusalénge chku, Jesu jo una Jerusalénge chui ollade.  
\v 2 Gere una Jerusaléndi tangle, gereka gdaite kada Oveja Ugakalla, ugaka ege kodi chi tan kle, kwian israelita kwirale chi tan e kada Betzata, chi tan e kagda giti u soli gbatiga kle.  
\v 3 U soli e ulitage gwa kwian oga tanre kle manade, kwian me ten, kwian me ña chage, kwian kwenga, kwian ene ulita kle chi onngenga manade ngwange.  
\v 4 Chui sbali sbali lle boanga Chube alin nga ngaña giti kle chke chi tan kle ngwadi chi gbe onngenga, chi kle onngenga kwian oga bai kaire joge chke ngeru chiske joge chke noni chi onngengadi.  
\v 5 Oga ngleaske onbre oga gdaite kle, chura ngle treinta y ocho ama kledu oga.  
\v 6 Jesu gwagedu amadi gbeba dba, Jesu tale uñadu oga e manadu sbali sbali eni ngwale, Jesu gerudu ama ole: 
\p —¿Ba takalin joge chkeni noni? 
\p  
\v 7 Onbre oga jaindunga Jesu kalen: 
\p —Ima, agwa cha alin cha chudaboanga me cha gbale chiske chi kle onngenga gire, chi kle onngenga cha me kle ñage joge chke blike chiske, llagire kwian na kle ñage joge chke cha ngeru chiske, ene kwian e joge chkeni agwa cha me dale. 
\p  
\v 8 Jesu gerudu ama ole: 
\p —Chke bduge, chkede gdate, gbengwa blinga, chagede gbengwa ole. 
\p  
\v 9 Jesu gerudu ene onbre oga ole gire sugeti onbre oga jo chkeni noni trate me oga. Ama mo gbengwalla gau, du, chagedu mo gbengwalla ole. 
\p Jesu kwian e dodadu kwian israelita undege chuiage.  
\v 10 Kwian israelita ulita gwagedu onbre jo chkeni nonidige chage gbengwa ole, kwian israelita gerudu onbre jo chkeni noni ole: 
\p —Nege che undege chuia, ba me ñage chage mo gbengwalla dbe chui aige. 
\p  
\v 11 Onbre jo chkeni noni jaindunga: 
\p —Onbre cha jingmea dodadu, ama gerudu cha ole: “Gbengwa blinga, chagede gbengwa ole.” 
\p  
\v 12 Kwian israelita geru kadu amage: 
\p —¿Chema gerudu ba ole: “Gbengwa blinga, chagede gbengwa ole”? 
\p  
\v 13 Kwian onbre dodadrege me uñadu chema ama dodadu, ama me ñadu Jesu kaite kwian geru kaduge, kwian tanre kledu, Jesu jonga ama gwage kwianske.  
\v 14 Bigwa Jesu tendu kwian Jesu nu dodaba ngwange u gerungwa Chube olege, Jesu gerudu ama ole: 
\p —Ba cha keruchuge, nege ba jo chkeni noni ba me oga, ba mo ta gbadale me age me no ba agedu nge kare. Ba me mo tallade ba be boi nabitaite ma tirare age naskuni e kare giti. 
\p  
\v 15 Chku uñale onbrege Jesu ama dodadu gire onbre e jo gerule kwian israelita ole: 
\p —Kwian onbre cha dodadu, ama kada Jesu. 
\p  
\v 16 Jesu kwian oga dodadu undege chuiage gdale kwian israelita ulita skochiu tanre Jesudi, e giti kwian israelita mo ta gbu age me no Jesu dollale chage Jesu nate gwaleda.  
\v 17 Jesu gerudu kwian israelita ole: 
\p —Cha Ñenua Chube kle lle no boi kwian alin chui ulitage kaire undege chuiage, cha age cha Ñenua kle age kare. 
\p  
\v 18 Jesu gerudu ene giti gdale kwian israelita ulita mo ta gbu ma kiraske chage Jesu nate gwaleda, kwian israelita gwage Jesu me kle chada kle degaba undege chuia giti gbe gdadi, kaire Jesu kle mo gbe salengwli Chube kare Jesu kle gerule ama Ñenuanu Chube, e kwian israelita alin Jesu kle gerule me no me no. 
\p  
\v 19 Jesu gerudu kwian israelita ulita ole: 
\p —Cha gerule ulia ulia ba ulita ole, cha Chube Kirolla me kle age gballa mo talla giti, cha kle age ulita cha Ñenua cha ta gbe age kare, cha Ñenua kle age ulita cha gwa giti, cha age ulita ama kle age kare.  
\v 20 Cha Ñenua no no cha ole, cha ama Kirolla, ama kle lle no boi cha gwa giti, ene cha kle lle no ene kare boi kaire kwian gwa giti. Cha Ñenua be lle ma no ma kweri boi cha gwa giti, ene kaire cha be lle ma no boi ba ulita gwa giti cha agedu ngeruge, ba ulita be chege tañachuge tanre e giti.  
\v 21 Cha Ñenua kwian jaba gbeni gwade, ene kaire cha kwian jaba gbeni gwade kwian jaba bai kaire cha ta gbakalin gwadeni kare, kaire cha Ñenua, cha kwian gbe toi diali chui tangle cha ole cha Ñenua ole.  
\v 22 Cha Ñenua agali mi kwian gdaite gbe jiske age me no gdale, agwa cha Ñenua cha gbu gerule kwian ulita giti bai jiske bai me jiske agedu giti. Cha Ñenua cha gbu age ene,  
\v 23 malen kwian ulita cha gadale dage no kwian kle cha Ñenua gai dage no kare, cha Ñenua cha kagu nga dba ai giti, kwian me cha gai dage no kwian me kle cha Ñenua gai dage no kaire.  
\v 24 Ulia ulia cha gerule ulita no trate geru ai cha kle gerule giti, kwian bai kaire geru ai gbe gdadi cha kle gerule kare, kwian bai kaire cha Ñenua cha kaganga gai ulia, kwian ene ulita be toi chui tangle diali cha ole cha Ñenua ole, kwian ene ulita mi joge ji chuge daga ngwale ngwadi sugekare chage ni cha Ñenuage, e salengwli kwian jogebada jaba chkeni gwade kare.  
\v 25 Cha gerule ulia ba ulita ole, kwian bai kaire me Chube uñe kle toi sugekare Chubege, kwian ene ulita salengwli kwian jogebada kare, chui be chke, kaire chui kle nege gire kwian ene be cha kerua keruchuge, cha Chube Kirolla be kwian tke tangle cha Ñenua giti, kwian ulita bai kaire cha kerua gai ulia ama be toi chui tangle diali cha Ñenua ole cha ole.  
\v 26 Cha Ñenua ta gwade agali molen malen ama kwian gbanga gwade, ene kaire cha ama Kirolla ama cha gbu ta gwade mauña, cha ñage age cha Ñenua age ulita kare, cha ñage kwian jogebada jaba gbeni gwade, kaire kwian me Chube uñe kle chage jogebada kare cha ñage kwian ene ta blite Chube ole, ene kwian toi chui tangle diali cha ole cha Ñenua ole.  
\v 27 Kaire cha Ñenua cha gbu gerule kwian ulita giti bai jiske bai me jiske agedu giti, cha Chube Kirolla chku nga dba ai giti kwian kare, cha ulia kwian, suge chage ulita kwian tañachuge mine, malen chui bdaglige cha be ñage gerule kwian ulita giti chema chema jiske.  
\v 28 Ba ulita me kledale alenske cha kle gerule giti, chui be chke, chui ege gire cha be gerule jaba dbia ulita ole, kwian jogebada oña ulita be cha keruchuge gerule: “¡Chkede gwadeni, bai!”,  
\v 29 gire ama jaba ulita be chkeni gwade. Kwian ene bai kaire cha gau ulia ama kledu toi gwade nga dba ai giti gire, chagedu no cha Ñenua takalin kare, kwian ene ulita be toi chui tangle diali cha ole cha Ñenua ole. Agwa kwian bai kaire me cha gau ulia me chagedu no cha Ñenua takalin kare, kwian ene ulita be chege sugekare chage cha Ñenuage chui bdaglige ji chuge chui tangle diali. 
\p  
\v 30 ’Cha me kle age ulita mo talla giti gballa, agwa cha Ñenua cha kagu, cha Ñenua kle cha ta gbe age, ulita cha age ama takalin kare, cha me kle age cha takalin kare. Kaire cha Ñenua kle cha ta gbe kwian ulita agedu giti bai jiske bai me jiske, malen cha gerule trate ulia chema chema jiske.  
\v 31 Cha alin allabi gballa gerule mau giti kwian ole cha Chube Kirolla, na me kle gerule cha giti cha kle gerule kare, ene cha kle gerule ngwale, kwian mi cha gerua mau giti gai ulia.  
\v 32 Agwa cha me kle gerule gballa mau giti cha Chube Kirolla, cha Ñenua Chube gerule kaire cha giti cha ulia ama Kirolla, uñale chage ama gerule ulia cha giti, suge ulia cha kle gerule kare.  
\v 33 Juan-Bautista kaire kledu gerule cha giti kwian ole gire ba ulita kwian mneite kagu tienda Juan-Bautistadi geru kade Juan-Bautistage cha giti, Juan-Bautista gerudu ulia trate kwian mneite e ole cha giti.  
\v 34 Cha me kle kwian onbre gweale kerua manade gerule no cha giti ene chage suge trate cha ulia Chube Kirolla, me ene, uñale chage cha ulia Chube Kirolla, agwa ba ta kwian gweale kerua keruchugakalin gerule cha giti, malen cha kle gerule ba ole ba tachkedale Juan-Bautista gerudu mine cha giti, ba Juan-Bautista gerua cha giti gai ulia, ene ba tien gitiru ji chugege ba agedu me no gdale.  
\v 35 Juan-Bautista chagedu gerule cha giti kwian ole, kwian ulita kledu nga jereske kare me geru cha giti uñu, Juan-Bautista chagedu kwian eneske jichra gwadegaba kare gerule no cha giti kwian ole, ene kwian tale sugedu age Juan-Bautista gerule kare. Kwian tanre geru e keruchugu, kaire ba, ba ulitadi nga chegu suga no Juan-Bautista gerudu giti chui bedre alin allabi.  
\v 36 Cha kle age cha Ñenua cha gbu age kare lle boi ama alin, me kwian kle age kare ni tañachuge kare, ene cha kle age giti ñage suge kwian ulitage ulia cha Ñenua cha kagu, e ulita gerule ma trate cha giti Juan-Bautista geruduge cha giti kwian ole.  
\v 37-38 Ba me cha Ñenua kerua keruchugaba kaire ba me gwageba amadi, agwa cha Ñenua gerua jo degaba unsuialin gerule no trate cha giti, ba ulita cha Ñenua gerua uñe gerule cha giti, geru e me kle ba ulita tale, ba geru batenga alin allabi mo chugale alin, agwa ba me kle cha Ñenua gerua cha giti gai ulia, kaire ba ulita me tañachuge ulia cha Ñenua cha kagu nga dba ai giti ama gerua jo degaba unsuialin gerule kare, ba ulita alin suge me ene.  
\v 39 Ba ulita kle geru jwen no trate ta gude cha Ñenua gerua kle degaba giti, ba ulita tañachuge chada batenga alin ene ta gude lle gweale skwen bage geru kle gerule giti ene ba ulita toi diali chui tangle cha Ñenua Chube ole. Chada e cha Ñenua gerua, geru e gerule cha giti,  
\v 40 geru e gerule cha gai ulia giti alin allabi kwian toi diali chui tangle Chube ole. Cha kle ba ulitaske, agwa ba ulita me ta mo ta gbakalin cha gai ulia ba gbagda toi diali chui tangle. 
\p  
\v 41 ’Kwian gerule no cha giti kwian gerule me no cha giti cha me tallade.  
\v 42 Uñale chage ba ulita ta mine, ba ulita me kle mo ta dbe no Chube ole.  
\v 43 Cha chiu cha Ñenua kalla giti nga dba ai giti ba ulita alin, ba ulita me cha gai ngwange no, ba age cha ole cha kwian ngwale kare. Agwa kwian gweale mau tale mo gbe gerule agali ba ulita ole Chube giti gire ba ulita mo ta gbe no ama ole ba ama gai ngwange no.  
\v 44 Ba ulita kle tañachuge ma no age no daba na gwa giti, ene daba gerule no ba giti daba ba gbe kweri mo gwage, ba ulita kle tañachuge ene, ba me kle tañachuge Chube giti age Chube takalin kare. Chube gdaitre alin ulia kle, ba age no ama takalin kare ene bdagli ama be gerule no ba agedu no ulita giti. Agwa ba ulita me kle tañachuge no, malen ba me ñage cha gai ulia.  
\v 45 Ba me tañachugadale chadige cha be gerule cha Ñenua ole ba ulita giti ba me cha gau ulia malen ba jiske. Cha mi gerule ene ba giti ba gbe jiske, agwa Moisés chadalla degaba be ba gbe jiske cha Ñenuage, ba ulita kle gerule ba Moisés gerua gai ulia, ba tañachuge geru e alin giti ba ñage toi diali chui tangle Chube ole.  
\v 46-47 Ba ulita kle gerule ene ba kle gerule ngwale mo kate alin, ba tale ba me kle mo ta gbe ulia Moisés gerua gai ulia, malen ba me ñage cha gerua gai ulia cha kle gerule kare. Moisés gerua gerule trate cha giti, ulia ba Moisés gerua gai ulia ene kaire ba cha gerua gai ulia, agwa ba me ta cha gerua gakalin —Jesu gerudu ene ulita kwian israelita ulita ole. 
\c 6  
\s1 Jesu kwian onbre ngle cinco mil ulle 
\p  
\v 1-2 Chui gweale na Jesu kledu chibita kweri kada Galilea kagda giti, chibita amaña kada Tiberias, eni Jesu lle daga ngwale no tanre dodadu kwian ulita gwa giti, Jesu kwian oga tanre dodadu. Jesu agedu ene gire ama jo tanglegu chibita kweri ege ule kwian geru jwannga amage ulita ole, kwian ngle chagedu Jesu nate, kwian e ulita gwageba Jesudi kwian tanre oga dodade malen kwian e chagedu Jesu nate.  
\v 3 Jesu jo chke chibita kagda giti ongoru gire Jesu jo jwichuga giti toidu dba geru jwannga amage ulita ole.  
\v 4 E suiale Chube kwian israelita ulita enusulian unsuialin jun siere nga kweri Egiptoge chuia ollade chegu kodi, e Pascua chuia.  
\v 5 Jesu kledu jwichuga giti ule geru jwannga amage ole gire Jesu gwagedu kwian ngledi chie jwichuga ama kle giti ngnagu, Jesu jo dbige jwichugage ten kwian ngle ngwange ule geru jwannga amage ulita ole, Jesu gerudu Felipe ole: 
\p —¿Che be joge bligda ngle gige baini kwian e ulita alin? 
\p  
\v 6 Jesuge uñale ulita trate Jesu be age mine no kwian ngle alin, agwa Jesu geru kadu Felipege bligda giti, ene chke uñale nate Felipe Jesu gai ulia mo tale Jesu ñage age no kwian ngle ulita alin o ulia ama bligda gigadale kwian ulita alin.  
\v 7 Felipe jaindunga Jesu kalen: 
\p —Igi kwangle giti che bligda gige kwian e ulita alin gutadale, ni bligda e ulita ñage kwian ulitage jalin jalin gutadale. 
\p  
\v 8 Gire kwian geru jwannga Jesuge na kada Andrés, Simón-Pedro daballa, gerudu Jesu ole: 
\p  
\v 9 —Kirogwa gdaite kle aini, ama cebada panlla gdatiga molen ngwe gdaboke agwa bligda e me ña kwian ulita alin gutadale. 
\p  
\v 10 Jesu gerudu kwian geru jwannga amage ulita ole: 
\p —Gerule kwian ulita ole toi dba ulita. 
\p Nga Jesu kle ngwadi ngauda tanre kledu, kwian ulita toidu dba ngauda giti, kwian e ulitaske kwian onbre ngle cinco mil kledu, kaire muinga ngle kirogwa ngle kledu ule kwian onbre ngle eske agwa muinga, kirogwa me jo teanba.  
\v 11 Kwian ngle ulita toidu dba ngauda giti gire Jesu pan gdatiga ngwe gdaboke gau kote, Jesu gerudu Chube ole bligda giti: “Cha Ñenua, noare ba bligda ai ketu kwian ai ulita alin gutadale.” Jesu gerudu ene Chube ole gire Jesu bligda girabatangu kwian ulita toiba dba ole, Jesu bligda ulita ketangu kwian ngle ulitage unchkegda kwian takalin kare, Jesu bligda gbu jriennga kwian ngle ulita alin gutadale.  
\v 12 Kwian ulita blidu kwian ulita unchku no bligdadi gire bligda bita ngle cheguda, kwian me ñadu bligda gute ulita. Gire Jesu gerudu kwian geru jwannga amage ulita ole bligda cheguda giti: 
\p —Ba bligda bita cheguda lite ole, ba oge, ba me bligda e kagenga ngwale. 
\p  
\v 13 Jesu gerudu ene gire kwian geru jwannga Jesuge bligda bita ulita litu ole ski kweri gbataboko giti gbaboke, ski e ulita chku ete bligda cheguda ole. 
\p  
\v 14 Jesu lle daga ngwale no ene dodadu kwian ngle e gwa giti, gire kwian e ulita gerudu modi Jesu giti: 
\p —Ulia ama kwian Chube gerua ketanga dabage be chie cheske aini, Chube gerudu ama giti unsuialin, ama e. 
\p  
\v 15 Jesuge kwian ulita talla chku uñale, kwian ulita tañachugu Jesu gbe mo chugagwallale, malen kwian ulita tadu kira batakalin Jesuge una ngnagu, gire Jesu jo siere kwian ulitage, Jesu joni nabitaite jwichuga giti. 
\s1 Jesu chage seradi chiga giti 
\p  
\v 16 Nga jeredu gire kwian geru jwannga Jesuge ulita joni chibita ngnagu, jo chke chi kagda giti dudi.  
\v 17 Gire Jesu nate nga chegu ta, me chieni uñale kwian geru jwannga amage nate, nga jeredu ulita, nga train giti geru jwannga Jesuge ulita jo duge chiga giti chage una Capernaum ngnagu.  
\v 18 Geru jwannga Jesuge ulita kledu chage duge chiga giti gire mle kweri chku dudi chiga giti, chi jo chite juga juga mle kwerige.  
\v 19 Gire kwian geru jwannga Jesuge ulita kledu duge me chegu ta chuge chi bage duge chiga giti mleske, ama jo bate chiga giti duge, kle chage chi bage duge mleske gire ama ulita kle chage duge gwagedu kwian gdaitedi chage seradi chiga giti du ngnagu, ama ulita kendunga tanre, ama me nu gwagebale bitaite kwiandige chage seradi chiga giti.  
\v 20 Jesu gerudu: 
\p —Ba me kennga chadi, cha amaña kle chage. 
\p  
\v 21 Jesu gerudu ene gire sugedu geru jwannga ulitage Jesu amaña kle chage, ama ulita Jesu gau ngwange no duge nga suga no ole, gire sugeti ngwale du jo chke chi kagda giti ama tadu jogekalin ngwadi ama jo chke, ama jo chke Jesu ole. 
\s1 Jesu gerule mau giti: “Cha bligda kare 
\s1 kwian gbagda gwade toi diali chui tangle” 
\p  
\v 22 Kwian geru jwannga Jesuge ulita jo ene una Capernaumge, kwian ngle ulita Jesu nu ullaba chegu kwian geru jwannga tane giti nga amañage Jesu ama ulita ullu ngwadi, ama tadu gwagekalin dare Jesudi. Kwian geru jwannga Jesuge ulita bebi joge siere nga ege gire kwian ngle e ulita gwagedu du gdaitre alin kledu chi kagdage, kwian ulita gwagedu kwian geru jwannga Jesuge alin joge du ege, kwian me gwagedu Jesudi joge ule kwian geru jwannga ole, malen kwian ngle ulita tañachugu Jesu cheguda ngmadi. Nagbietege Jesu bebi skwen nate kwian nglege, malen ama ulita chegu tañachuge tanre Jesu giti ama kle baini.  
\v 23 Kwian kledu Jesu jinade nate gire gwagedu du na tanredi chie una Tiberiage, du e ulita chku kodi Jesu kwian ngle ullu ngeru ngwadi.  
\v 24 Uñadu kwian nglege kwian geru jwannga Jesuge ulita jo, kaire Jesu me skwendu ama ulitage ama ulita kle ngwadi, malen ama ulita jo du tanre una Tiberiamuge, jo una Capernaumge Jesu jinade nate.  
\v 25 Ama ulita jo tangle chkagu chibitage, jo chke chkagu gire Jesu skwendu amage, ama geru kadu Jesuge: 
\p —Kwian tkanga tangle geruge, ¿ba chiu ngaminegire aini? Cha me gwagedu badi joge ule kwian geru jwannga bage ole. 
\p  
\v 26 Jesu gerudu kwian ngle ulita ole: 
\p —Cha gerule ulia ba ulita ole, ba ulita ta chagekalin cha nate ba takalin cha bligda na kete bage gutadale, cha bligda ketu bage ngeru, ba blidu, ba unchku. Ba kle tañachuge bligda giti alin allabi, agwa ba me kle tañachuge cha lle daga ngwale no dodadu Chube kirallaske giti ba ulita alin, ba me kle tañachuge trate cha giti, me suge bage cha chema.  
\v 27 Ba me tañachugadale lle boi bligda alin giti bligda gai mau alin gutadale ene ba blire ba me chage bli ole, bligda e bidege me chege diali. Agwa ma no ba ulita tañachuge bligda me bidege giti kaire, bligda e chege chui tangle diali ba tale, cha bligda e kete bage, ene ba be toi chui tangle diali cha Ñenua Chube ole, ama cha kagu nga dba ai giti kwian kare, ama mo kiralla ketu chage age no ba ulita alin. 
\p  
\v 28 Kwian geru kadu Jesuge: 
\p —¿Cha ulita agedale mine ene suge chage cha kle lle boi Chube takalin kare? 
\p  
\v 29 Jesu gerudu kwian ulita ole: 
\p —Chube takalin ba ulita mo ta gbe ene: Chube nu cha kagaba, ba ulita cha gadale ulia mo tale, ene ba kle age Chube takalin kare. 
\p  
\v 30 Kwian gerudu Jesu ole: 
\p —Ba kle gerule mau giti Chube ba kagu, ulia Chube ba kagu cha takalin ba lle gweale daga ngwale no dodade Chube kiralla giti cha ulita gwa giti, ene cha ulita be gwage badi age ene, gire cha be ba gai ulia.  
\v 31 Unsuialin cha enusulian ulita kledu chage nga gballage bligda me gutale ngwadi, gire Moisés bligda kadu nga ngaña giti enusulian ulita alin gutadale, chada kle degaba gerule Moisés giti: 
\q1 “Ama bligda nga ngaña giti kadu ketu kwian ulita alin gutadale.” 
\m Ene kaire cha takalin ba age ma no ama ageduge cha ulita alin. 
\p  
\v 32-33 Jesu gerudu: 
\p —Cha gerule ulia ba ulita ole, ba kle tañachuge Moisés gballa bligda nga ngaña giti ketu ba enusulian ulitage gutadale, me ene ba kle tañachuge kare, cha Ñenua bligda kagu ba enusulian unsuialin ulita alin gutadale, bligda e kira alin gbagda. Agwa kaire cha Ñenua bligda na ma no nga ngaña giti kete kwian ulitage, bligda e chiu nga ngaña giti chku nga dba ai giti, bligda e kwian ulita gbagda gwade toi diali chui tangle cha Ñenua ole. 
\p  
\v 34 Kwian ulita gerudu Jesu ole: 
\p —Ba kle gerule noare bligda giti cha ulita ole, cha takalin ba bligda e ba kle gerule giti kete chage diali gutadale. 
\p  
\v 35 Jesu gerudu kwian ole: 
\p —Ba takalin cha bligda cha kle gerule giti kete ba ulitage, bligda e cha amaña, cha bligda kare kwian gbagda gwade toi diali chui tangle. Kwian bligda gute gire bigwa ama bli ole ta bligda na gutakalin, kwian chi jai gire bigwa ama siechie ta chi na jakalin, agwa kwian bai kaire cha gai ulia mo tale, cha kwian ene ta gbe suge no diali.  
\v 36 Cha gerudu kare ba ulita ole ba kle gwage chadíge lle daga ngwale no dodade Chube kiralla giti ba ulita gwage, ni e giti ba kle cha gai ulia.  
\v 37 Cha Ñenua kwian ta gbe no cha ole, kwian ene ulita be cha gai ulia, kwian ulita bai kaire cha gai ulia cha mi ama kage siere, agwa cha be ama gai ngwange no.  
\v 38 Cha chiu nga ngaña giti cha chku nga dba ai giti, cha me ta agekalin cha takalin kare, agwa cha ta agekalin ulita cha Ñenua takalin kare, ama cha kagu.  
\v 39 Cha Ñenua cha kaganga ama takalin cha age ai kare: Cha Ñenua kwian bai ulita ta gbu no cha ole cha gai ulia, cha Ñenua takalin kwian ene ulita me jogedalenga ni gdaite chage, cha Ñenua takalin cha kwian ene ulita manade no, ene chui bdaglige cha ama ulita jaba gbadaleni gwade.  
\v 40 Cha Ñenua takalin ai kare kaire: Kwian bai ulita cha gai Chube Kirollale cha gai ulia mo tale, cha be kwian ene jaba gbeni gwade chui bdaglige toi ule cha ole cha Ñenua ole chui tangle diali. 
\p  
\v 41 Jesu gerudu ene kwian ulita ole gire kwian israelita mneite kledu chage Jesu nate ta me no ole, ama ulita Jesu keruchugu Jesu gerudu mau giti: “Cha bligda kare chiu nga ngaña giti chku nga dba ai giti.” Geru e giti kwian israelita ulita skochiu,  
\v 42 gire ama ulita gerudu jalin jalin modi Jesu giti: 
\p —¿E me José kirolla kada Jesu? Che ulita ama ñenua uñe, ama chebia kaire. Ama medunga chebia kote nga dba ai giti, ama me ña gerule che ole ama chiu nga ngaña giti. 
\p  
\v 43 Sugedu Jesuge kwian israelita ulita kle tañachuge me no ama giti, gire Jesu gerudu ama ulita ole: 
\p —Ba me gerule me no dare modige cha giti.  
\v 44 Kwian gdaite me ñage cha gai mau tale gballa, cha Ñenua cha kaganga, ama alin allabi ñage kwian ta gbe no cha ole ene kwian cha gai ulia, cha be kwian ene jaba gbeni gwade chui bdaglige toi diali chui tangle ule cha ole cha Ñenua ole nga ngaña giti.  
\v 45 Unsuialin kwian Chube gerua ketanga Chube gerua degu, chada e gerule: 
\q1 “Chube be kwian ulita ta gbe, ulita Chube gerua gerule kare be suge kwiange.” 
\m Kwian bai ulita cha Ñenua gerua keruchugu cha Ñenua gerua gau ulia, kwian ene cha gai ulia kaire.  
\v 46 Ni kwian gdaite gwageba cha Ñenua Chubedige, cha alin allabi gwageba amadi, cha chiu ama ngwadi cha chku nga dba ai giti.  
\v 47 Cha gerule ulia ba ulita ole, kwian bai kaire cha gai ulia kwian ene be toi chui tangle diali cha ole cha Ñenua ole.  
\v 48 Cha bligda kare kwian gbagda gwade toi diali chui tangle.  
\v 49 Unsuialin bligda chiu nga ngaña giti ba enusulian ulita alin gutadale nga gballage bligda me gutale ngwadi, bligda e kira alin gbagda sugeti alin, malen ba enusulian unsuialin me chegu toi diali chui tangle bligda e giti, agwa ama ulita bligda e gutu, ama me chegu toi gwade diali, ama jokeda, bligda e me ama gbu toi gwade diali.  
\v 50 Cha gerudu ba ulita ole cha bligda kare cha me kledu gerule ba enusulian bligda gutu kare giti, cha kle gerule bligda na giti, bligda cha kle gerule giti kwian gbagda toi diali chui tangle, bligda e chiu nga ngaña giti chku nga dba ai giti, kwian bai kaire bligda e gute mi chege sugekare Chubege, ama ulita be toi diali chui tangle Chube ole.  
\v 51 Cha kle gerule bligda giti, bligda e cha, cha chiu nga ngaña giti chku nga dba ai giti kwian kare kwian ulita alin, cha be mo jegwale kete gwaleda, kwian ulita bai kaire cha gai ulia mo tale be toi chui tangle diali cha Ñenua ole. 
\p  
\v 52 Jesu gerudu ene gire kwian israelita ulita ta skole ole mo ka dodadu ongoru ongoru Jesu gerudu giti: 
\p —¿Ama be age mine gire ama be mo jegwale agali kete chege gutadale? 
\p  
\v 53 Gire Jesu gerudu: 
\p —Cha gerule ulia ba ulita ole, cha chiu kwian kare nga dba ai giti, ba me cha jegwale gai ba kle bligda gute kare mo kiragda, ba me cha bea gai ba kle chi jai kare mo kiragda ba me ñage toi diali chui tangle cha Ñenua Chube ole.  
\v 54 Agwa kwian ulita bai kaire cha jegwale gai mau alin cha bea gai mau alin, suge kwian enege e ulita boidu ama alin, e giti alin allabi kwian be toi diali chui tangle cha Ñenua ole, cha be kwian ene jaba gbeni gwade chui bdaglige toi ule cha ole cha Ñenua ole.  
\v 55 Bligda ulia toigda diali chui tangle, e cha jegwale. Chi ulia toigda diali chui tangle, e cha bea.  
\v 56 Kwian bai kaire cha jegwale gai mau alin cha bea gai mau alin, kwian ene chanu, cha kwian enenu, kwian ene ta be kle cháge diali, cha ta be kle amage diali.  
\v 57 Chube cha Ñenua, ama cha kagu nga dba ai giti, ama gwade, ama gwade agali molen, cha toi ama giti gwade, ene kaire kwian bai cha gai mo tale kwian ene be toi cha giti chui tangle diali cha Ñenua ole.  
\v 58 Cha kle gerule bligda giti bligda e chiu nga ngaña giti chku nga dba ai giti, cha me kle gerule ba enusulian unsuialin bligda gutu kare giti, ama bligda kira alin gbagda sugeti alin gutu, ama toidu gire jokeda. Cha me kle gerule bligda e giti, cha kle gerule bligda na giti, bligda na kwian gbagda toi diali chui tangle, kwian bai kaire bligda e gute be toi chui tangle diali Chube ole, bligda e cha. 
\p  
\v 59 Jesu kwian ngle tku tangle ene ulita mau giti u mo litangwa Chube gerua jwanngwage una Capernaumge. 
\s1 Kwian tanre mo ta blite joge siere Jesuge 
\p  
\v 60 Kwian ngle chagedu Jesu nate geru jwanle Jesuge, baini kaire Jesu kle ngwadi ama kle Jesu ole, ama ulita Jesu keruchugu kwian tke tangle ene mau giti, gire ama ulita gerudu modi: 
\p —Mnoare che alin age ama kle gerule kare, ¿chema be ama gai ulia ama kle gerule kare? 
\p  
\v 61 Jesuge uñadu kwian kle gerule modi ta skole ole Jesu gerudu giti, gire Jesu gerudu ama ole: 
\p —¿Ba ulita ta kle skochie chadi cha gerudu giti? ¿Ba me cha gerua gai ulia?  
\v 62 Chube cha kagu nga dba ai giti kwian kare, ¿ba ulita ta chege sugamne chadi ba ulita gwa giti cha jogeni nga ngaña giti cha chiu ngwadi? ¿Ene ba be cha gai ulia o me?  
\v 63 Cha gerudu ba ole cha me gerudu ba ulita cha jegwale gutadale ulia ene ba be toi diali chui tangle, me ene dale, ba ulita tañachugadale ba ta giti ba ta mine cha ole, ba cha gadale ulia mo tale, e alin allabi giti ba ulita ñage toi diali chui tangle cha Ñenua ole.  
\v 64-65 Agwa ba gweale kle chage cha ole me kle cha gai ulia mo tale, malen cha gerudu ba ole ni kwian gdaite ñage cha gai mo tale gballa, cha Ñenua alin ñage kwian ta gbe no cha ole, ene kwian cha gai ulia. 
\p (Diali uñadu Jesuge chema mi ama gai ulia chema be ama kete gwaleda kwian me noge.) 
\p  
\v 66 Jesu gerudu ene kwian ulita ole bai kle chage ama ole, gire kwian e gweale tanre mo ta gbu joge siere Jesuge, ama Jesu chugu ngwadi me chagedu dare Jesu ole.  
\v 67 Jesu gwagedu kwian tanre kledu chage ama ole joge siere amage, gire Jesu geru kadu kwian geru jwannga amage gdataboko giti gdabokege: 
\p —¿Ba ulita kaire ta jogekalin siere chage? 
\p  
\v 68 Simón-Pedro jaindunga Jesu kalen: 
\p —Cha Chugagwalla, cha ulita gdataboko giti gdaboke mi joge siere bage dale, cha joge siere bage ¿cha be chema gai cha Chugagwallale? Chugagwalla na me ba kare, ba gerua ulita ulia, geru e kwian ta gbagda toi diali chui tangle Chube ole.  
\v 69 Cha ulita mo ta gbaba ba gerua ulita gai ulia diali, uñale trate cha ulitage ba Cristo ba Chube Kirolla. 
\p  
\v 70 Jesu gerudu geru jwannga amage ole: 
\p —Cha agali ba ulita gdataboko giti gdaboke gau, agwa baske gdaite me kle cha gai ulia, ama kle chage che dolla Satanás talla ole. 
\p  
\v 71 Jesu gerudu ene kwian geru jwannga amage gdataboko giti gdaboke ole Jesu kledu gerule Simón-Iscariote kirolla kada Judas giti, Jesuge uñale Judas-Iscariote be ama kete gwadaleda kwian me noge. Judas-Iscariote kwian geru jwannga Jesuge ule kwian na ole, agwa ama me ta du no Jesu ole. 
\c 7  
\s1 Jesu joge kwian israelita kle chui ollade ngwadi 
\p  
\v 1 Jesu kwian tku tangle ulita ene una Capernaumge, Jesu me jo nga nage, ama chegu ngmadi nga kweri Galileage chage una kaire kairege nga Galileage. Jesu me tadu jogekalin nga kweri Judeage, uñadu Jesuge nga Judeage ama joge chke nga ege kwian ulita israelita be ama jinade nate gwadaleda.  
\v 2 Unsuialin kwian israelita enusulian ulita chagedu nga gballage, u dodadu toingwa sugeti alin, e kwian israelita ulita kle chuia ollade chege kodi,  
\v 3 gire Jesu daballa ulita gerudu Jesuge: 
\p —Ba me chegedaleda aini, ma no ba joge nga Judeage, llani kwian tanre ba gaba ulia be kle mo litaba chui ollade, ama ulita gwa giti ba ñage lle no dodade llani ba lle no dodadu aini kare.  
\v 4 Uñale che ulitage kwian gweale ta mo gbakalin kweri daba na ulita gwa giti, takalin kwian na ulita ama uñe, ama me ñage chege age skwlenre alin nga gweale solige alin. Ba kle mo gbe kweri, ba takalin kwian ulita ba uñe, ba me ñage chege lle no dodade nga ainige alin, ma no ba jogedale age kwian ulita nga ulitamu gwa giti. 
\p  
\v 5 Jesu daballa gerudu ene Jesu ole ama tale ama ulita agali me kle Jesu gai ulia, ama kle Jesu gai ngwale kwian na tanre kle Jesu gai ngwale kare.  
\v 6 Jesu gerudu daballa ulita ole: 
\p —Cha chuia bebi chke jogedale nga Judeage chui ollade, agwa ba ulita alin chui ulita no jogedale baini kaire ba ulita takalin kare.  
\v 7 Kwian ulita me Chube uñe me kle mo ta dbe me no ba ole, ama ulita gwa giti ba age salengwli ama age kare. Agwa cha ole kwian ene ulita me no, cha kle gerule ama ole ama age me no giti ene ama ta suge ama kle age me no giti, me no ama alin cha gerule ene, gire ama ulita skochie chadi.  
\v 8 Ba ulita ta jogekalin, joga ngeru chui ollade nate, nege nege cha me joge, cha chuia bebi chke jogedale nga Judeage chui ollade. 
\p  
\v 9 Jesu gerudu ene daballa ole ulita, daballa jo, Jesu cheguda nga Galileage. 
\p  
\v 10 Jesu daballa ulita jo ngeru kwian ngle ulita ole chui ollade nate una Jerusalénge nga Judeage. Jesu jo kwian e ulita tane giti, Jesu me takalin kwian ulitage chke uñale Jesu kle joge kaire chui ollade ama ole, malen ma no Jesu tañachugu joge bdagli sugekare kwian ngleage.  
\v 11 Chui ollade chuiage kwian israelita mneite kledu chage Jesu jinade nate kwian nglea ulitaske, kwian israelita e ulita kledu chage kwian ngleaske geru kade Jesu giti ta me no ole, ama geru kadu: 
\p —Cha kle Jesu jinade nate, ama me skwen cha mneitege, ¿ba gwealege uñale ama kle baini? 
\p  
\v 12 Kwian me jaindu gerule Jesu giti ama kalen agwa kwian nglea ulitaske kwian gerudu tanre jalin jalin modi Jesu giti kwian israelita mneite gwa skwlenre, gweale gerudu Jesu giti: “Ama kwian no no.” Agwa na gerudu: “Ama kwian me no me no, ama kwian ulita anblitanga geru ngwaledi.”  
\v 13 Kwian tanre ulita gerudu ene modi jalin jalin Jesu giti, ama ulita kwachiu kwian israelita mneite kle Jesu jinade natedi malen kwian e ulita ni gdaite gerudu kweri Jesu giti kwian israelita mneite gwa giti. 
\p  
\v 14 Chui ollade semanalla bonga gire Jesu jo chke una Jerusalénge kwian ulita kle mo litaba chui ollade ngwadi, Jesu jo u gerungwa Chube olege kwian ngle gwa giti gire Jesu kwian ulita tku tangle Chube geruage.  
\v 15 Jesu kle kwian ngle tke tangle ene u gerungwa Chube olege gire kwian israelita chugagwalla ngle chegu tañachuge tanre Jesudi, kwian e gerudu: 
\p —¿Mineade ama ñage gerule trate Chube giti, ama me geru jwanba che kare? 
\p  
\v 16 Jesu kwian e keruchugu gire Jesu gerudu: 
\p —Cha kle kwian tke tangle gire cha me kle kwian tke tangle mó talla giti gballa, cha kle kwian tke tangle cha kaganga talla giti ama takalin kare, cha kle kwian tke tangle ama geruage.  
\v 17 Bai kaire mo ta gbakalin age Chube takalin kare, kwian ene ulitage be suge cha kle gerule Chube talla giti ulia o cha kle gerule mo talla giti.  
\v 18 Bai kle gerule mo talla giti agali, kwian ene kle age no daba na gwa giti ulita, ama takalin daba na ulita gerule no ama giti. Agwa cha me kwian ene kare, cha alin ma no kwian ulita gerule no cha kaganga giti, cha kle gerule ama talla giti, cha kle gerule ulia cha kaganga takalin kare, cha me kle sole.  
\v 19-21 Moisés Chube gerua degu unsuialin ba ulita alin, agwa ba ulita me kle geru e gai dage no ulita. ¿Mineade ba ulita ta cha gwakalinda cha kle age no undege chuiage gdale? Bage suge cha kle age me no Moisés chadalla dollale. 
\p Kwian israelita ngle gerudu Jesu ole: 
\p —Dolla kle ba tale, malen ba kle gerule ene. ¿Chema takalin ba gweda? 
\p Jesu gerudu kwian e ulita ole: 
\p —Ba ulita chege tañachuge tanre lle gdaitre alin cha bo undege chuiage, e giti suge bage cha agedu me no,  
\v 22-23 agwa ba kle lle boi undege chuiage kaire. Moisés Chube gerua degu ba ulita alin, chada e gerule kirogwa soli onbrege chuiapa chke ba kirogwa soli kwara tkadalenga sidri, age ene me Moisés e gbu, ba enusulian unsuialin ngeru Moisége agedu ene Chube gerudu kare, Moisés e degu ba ulita alin. Nege tangle ba kle kirogwa onbre soli kwara tkangenga kaire, me undege chuiage chui taneke chke kirogwage ba kirogwa kwara tkadalenga, chui e no ba alin kirogwa kwara tkangenga. Agwa chui taneke chke kirogwage undege chuiage ba kirogwa kwara tkadalenga, ba me chui taneke tke tangle kirogwa chuiage, undege chuia me no ba alin age ene, agwa chui taneke chke kirogwage undege chuiage ba agedale, ene ba kle tañachuge age diali Moisés chadalla kle gerule kare. E giti ba me kle tallade, ¿gire mineade ba skochie chadi cha kwian onbre gdaite jingmea jegwale ulita dodadu undege chuiage?  
\v 24 Ba ulita me ñage cha gbe jiske blike gwage alin allabi chadi, ba mo ta gbadale tañachuge trate no cha kle age giti, ene be suge bage cha jiske ulia o me. 
\p  
\v 25 Jesu gerudu ene kwian ngle ulita ole, gire kwian gweale toinga una Jerusalénge gerudu modi Jesu giti: 
\p —¿Onbre e me onbre amaña che chugagwalla mneite kle jinade nate gwadaleda?  
\v 26 Nege ama kle gerule kwian ulita gwa giti aini, ¿ne gire che chugagwalla ta ama gwakalinda kle llema boi? ¿Mineade ama gdaite me kle ka boi onbre e ole? ¿Nege che chugagwalla ulita kle onbre e gai ulia? ¿Suge amage onbre e Cristo Chube ama kagu ulia?  
\v 27 Che ulita onbre e uñe, chege uñale trate onbre e me Cristo, kaire uñale trate chege ama chiu baini, agwa Cristo be chie, ulia ni kwian gdaitege uñale ama chie baini. 
\p  
\v 28 Jesu kle kwian tke tangle u gerungwa Chube olege, gire Jesu kwian keruchugu gerule ama Jesu uñe gire Jesu gerudu kweri kwian ulita ole: 
\p —Ba kle gerule chadi ba cha uñe, kaire ba kle gerule chadi uñale bage cha chiu baini. Cha gerule ba ulita ole, cha me chiu mo talla giti agali, cha kaganga cha kagu, ama ulia, ba ulita ñage ama gai ulia. Agwa ba ulita me cha kaganga uñe,  
\v 29 cha ama uñe trate, cha chiu ama ngwadi, ama cha kagu. 
\p  
\v 30 Jesu gerudu ene kwian ulita gwa giti gire kwian tadu Jesu gakalin blike dbale skadi, agwa Jesu gai gwaleda chuia bebi chke malen kwian me ñadu Jesu gai.  
\v 31 Kwian tanre skochiu Jesudi Jesu gerudu giti, agwa kaire kwian na tanre Jesu gau ulia, sugedu ama ulitage Jesu e amaña Cristo, ama ulita gerudu no Jesu giti: 
\p —Uñale chage onbre e ulia Cristo, na me ñage lle daga ngwale ma no dodade onbre e kle dodadege. 
\p  
\v 32 Kwian fariseo ulita kledu eni kwian keruchugu gerule no ene Jesu giti Jesu gai ulia Cristole, gire ama ulita ule kwian gerunga Chube ole daba alin chugagwalla ulita ole guardia donga gweale kagu Jesu gai gbe skadi.  
\v 33 Guardia donga e ulita jo chke Jesudi Jesu gadale gire Jesu gerudu guardia donga ole kaire kwian kle mo litaba ulita ole: 
\p —Cha be kle aini ba ulitaske chui gwealege alin gire bigwa cha be jogeni cha kaganga kle ngwadi.  
\v 34 Chui e be chke gire ba ulita be cha jinade nate mo chudaboale, agwa chui ege ba ulitage cha mi skwen, ba mi ñage joge baini cha be kle ngwadige. 
\p  
\v 35 Kwian israelita chugagwalla ulita Jesu keruchugu gerule ene gire ama ulita geru kadu modi: 
\p —¿Ama be joge baini ama kle gerule ama be kle ngwadi che me ñage joge chke? ¿Ama kle tañachuge joge bate kwian israelita kle toi kwian nga namuske ngwadi? ¿Kaire ama be kwian me israelita tke tangle llani?  
\v 36 ¿Mineade ama gerudu: “Cha jinabe nate cha mi skwen kwiange, cha be kle ngwadi kwian mi ñage joge chke”? —kwian israelita chugagwalla ulita geru kadu ene modi Jesu giti. 
\p  
\v 37-38 Chui ollade chuia bdagli, chui e ma no chui ollade jo tangle ulitage, chui ege Jesu kle mo gbaba gdate kwian kle mo litaba ngwadi gire Jesu gerudu kweri kwian ngle ulita ole: 
\p —Bai kaire me ta suga no molen ba cha gai ulia, cha ba ta gbe suga no diali. Kwian siechie tanre kwian chi jai gire kwian sie joge tangle, ene kaire cha kwian ta gbe suga no chi gwade no jrite diali ngaintra kare, ene cha kwian ta gbe chege suga no diali. Chube gerua degaba unsuialin gerule cha giti kwian bai cha gai ulia ta chege suga no diali. 
\p  
\v 39 Jesu gerudu ene kwian ole ama kledu gerule Chube Oña giti, Chube be mo Oña kage toi diali kwian tale kwian bai kaire Jesu gai ulia, ene kwian Jesu gau ulia ta be chege suga no diali. Agwa Chube bebi mo Oña kage kwian alin, ngeru Jesu be age ulita ama agedale kare nga dba ai giti, ama be jogeni nga ngaña giti Chube kle ngwadi gire Chube be mo Oña kage kwian Jesu gau alin. 
\s1 Kwian israelita me Jesu gerua gai mo tke dole 
\s1 kwian israelita Jesu gerua gai ulia ole 
\p  
\v 40 Kwian gweale kledu kwian ngleaske, ama Jesu keruchugu gerule no mo giti gire kwian e gerudu Jesu giti: 
\p —Kwian gdaite Chube gerua ketanga dabage no no be chie, ama e. 
\p  
\v 41 Na gerudu: 
\p —Onbre e Cristo, Chube gerudu be Cristo kage che alin, ama e. 
\p Na gerudu: 
\p —Me dale, ama me Cristo, Cristo mi chie nga Galileage.  
\v 42 Chube gerua degaba unsuialin gerule Cristo giti Cristo be chie chugagwalla rey David oña oindallaske una Belénge David toidu ngwadi unsuialin. 
\p  
\v 43 Kwian ulita me gerudu salengwli Jesu giti, gire ama mo tku dole modi Jesu giti.  
\v 44 Kwian gweale tadu Jesu gakalin dbale skadi, agwa ni kwian gdaite Jesu gau dbale skadi. 
\p  
\v 45 Guardia donga ulita kagle Jesu gadale chkuni kole kwian fariseo ulita kaire kwian gerunga Chube ole daba alin chugagwalla ulita kle manade ngwadi, gire kwian e ulita geru kadu guardia donga ulitage: 
\p —¿Mineade ba ulita me Jesu gau ba me chiu ama dbe aini? 
\p  
\v 46 Guardia donga ulita jaindunga: 
\p —Cha me gwageba kwian gdaitedi gerule ta ngle ole onbre e kle gerule kare. 
\p  
\v 47 Kwian fariseo gerudu guardia donga ulitage: 
\p —¿Ba ulita kaire mo chugu ngwadi mo anblitange amage ama gai ulia?  
\v 48 ¿Suge ba ulitage che chugagwalla israelita ulita, kaire cha ulita kwian fariseo Moisés chadalla uñanga ulia, gweale kle ama gai ulia? ¿Mineade ba kle mo chuge ngwadi mo anblitange amage kwian ngle ulita kare?  
\v 49 Kwian me geru jwanba Moisés chadalla giti sidri ama ulita kle chage mo anblitange amage ama gai ulia, kwian e ulita kle age me no me no Moisés chadalla dollale, kwian ene alin Chube be ji gbe. 
\p  
\v 50 Kwian fariseo chugagwalla gdaite kada Nicodemo nu jogeba chui gbaitege geru trage Jesu ole, Nicodemo e amaña daba fariseo keruchugu gerule guardia dongage me no Jesu giti gire Nicodemo gerudu daba fariseo ulita ole: 
\p  
\v 51 —Moisés chadalla kle degaba che ulita alin gerule che me ñage kwian gai blike gbe jiske agedu gweale giti, ngeru che kwian chugadale ngwadi gerule mo giti ama agedu giti, che kwian keruchuge gerule mo giti ulita ene suge trate chege ama jiske ulia o me, ama jiske ulia gire che ñage ama gbe ji chuge. 
\p  
\v 52 Nicodemo gerudu ene daba fariseo ole gire ama ulita gerudu Nicodemoge: 
\p —¿Ba ta mo gbakalin kwian nga Galileamu, ba ta gerukalin no ama giti, kaire ba ama gakalin ulia? Ma no ba Chube gerua degaba unsuialin batenga, ba geru e jwen nabitaite, ene be chke uñale bage trate ulia kwian Chube gerua ketanga dabage ni gdaite ñage chie nga Galileage. 
\p  
\v 53 Kwian fariseo gerudu mno ene ulita Nicodemoge, gire ama ulita kaire kwian na ulita kledu ne ngwadi joni gdaite gdaite mo ullage. 
\c 8  
\s1 Kwian israelita chugagwalla mneite geru kade Jesuge muinga giti muinga skatedu ule onbre me amanu ole 
\p  
\v 1 Kwian e ulita joni mo ullage, agwa Jesu jo Ngwiskinro Jwichugallage.  
\v 2 Nagbietege nga chku ju Jesu chiuni chkuni u gerungwa Chube olege gire kwian ngle mo litu Jesudi, Jesu toidu dba gire ama kwian ngle tku tangle Chube geruage.  
\v 3 Jesu kle kwian tke tangle gire kwian gweale daba tkanga tangle Moisés chadalla giti ule kwian fariseo mneite ole jo chke muinga mo jwanba skatedu mo chuge ke giti onbre na ole dbe Jesu kle ngwadi, ama muinga e gbu kwian ngle gwa giti,  
\v 4 gire gerudu Jesu ole: 
\p —Kwian tkanga tangle geruge, cha gerule ba ole muinga ai giti, muinga ai skatedu mo chuge ke giti onbre me amanu ole.  
\v 5 Moisés Chube gerua degu unsuialin, chada e gerule muinga age muinga ai agedu kare che muinga skiadale ke giti che muinga gwadaleda. Ba kwian tkanga tangle geruge, ¿ba gerule mine muinga ai giti? ¿Che age mine ama ole? 
\p  
\v 6 Ama ulita geru kadu ene Jesuge muinga giti ama ulita tañachugu Jesu be gerule gweale me no Moisés chadalla degaba dollale, ene ama be ña Jesu gbe jiske ama ulita takalin kare, agwa Jesu me jaindunga, Jesu chegu gwage gwadbiguda dbi chada gbe kobara giti.  
\v 7 Kwian fariseo ule daba tkanga tangle Moisés chadalla giti ole me chegu ta chuge geru kade Jesuge, gire Jesu gwa gaunga ngaña Jesu gerudu muinga dbanga ulita ole: 
\p —Ba ulita chku aini muinga dbe, ba bai kaire me agenga me no sidri ba takalin ba muinga e skie ngeru ke giti. 
\p  
\v 8 Jesu gerudu ene gire Jesu chegu gwage gwadbiguda nabitaite dbi chada gbe kobara giti.  
\v 9 Kwian muinga dbanga Jesu ngwadi Jesu keruchugu gerule ene ama ulita ole gire ama ulita mo gbu joge gdaite gdaite siere, sugedu ama ulitage me ñage age Jesu gerudu kare, juma ulita mo gbu joge ma ngeru bdale ulitage. Muinga dbanga ulita jo siere muingage, muinga alin chegu gballa Jesu ole.  
\v 10 Jesu gwa gaunga ngaña gwagedu muingadi, Jesu geru kadu amage: 
\p —Kwian ulita chiu ba dbe aini, ¿ama kle baini? ¿Kwian gdaite me su ba skie ke giti gwaleda? 
\p  
\v 11 Muinga jaindunga: 
\p —Ni kwian gdaite ñadu mo ta gbe cha skie ke giti. 
\p Jesu gerudu: 
\p —Cha kaire me ba skie ke giti ba agedu me no gdale, ma no ba jogeni gudegu ba me age me no dare nge kare. 
\s1 Jesu gerule mau giti: “Cha jichra kare kwian ulita alin” 
\p  
\v 12 Jesu gerudu dare kwian ngle kle mo litaba Jesudi ole: 
\p —Cha jichra kare kwian ulita alin, kwian me Chube uñe chage nga jereske kare chage age me no Chube dollale, cha kwian ta gbe suge salengwli jichra kle kwian gbe ten nga jereske kare. Kwian bai kaire cha gai ulia mo ta gbe chage cha takalin kare, cha kwian ene ta gbe, ene suge amage Chube mine, kwian ene mi mo ta gbe chage age me no dare Chube dollale. 
\p  
\v 13 Kwian fariseo gweale kledu kwian ngleaske gerudu Jesu ole: 
\p —Ba kle gerule no mau giti agali naskuni e ngwale, ni kwian na kle gerule salengwli ba giti ba kle gerule kare. 
\p  
\v 14 Jesu gerudu kwian fariseo e ulita ole: 
\p —Cha kle gerule mau giti cha me kle gerule ngwale, ulita uñale chage cha mine, kaire uñale chage cha chema, kwian na me gerudale cha giti, uñale chage cha chiu baini kaire cha be jogeni baini, agwa ba ulitage me uñale cha chema cha chiu baini cha jogeni baini.  
\v 15 Ba ulita kle cha gbe jiske, ba kle age mo tale alin ba kle tañachuge kare, me uñale bage ulia cha mine. Cha me kwian gbe jiske ba ulita kle age kare.  
\v 16 Cha ñage gerule ulia trate kwian ulita giti, cha kwian gbe jiske cha me kwian gbe jiske gballa mo talla alin giti, cha Ñenua cha kagu nga dba ai giti, ama talla giti ule cha gerule kwian bai jiske bai me jiske, kwian ta ulita uñale chage cha Ñenuage.  
\v 17 Ba ulita alin Moisés Chube gerua degu unsuialin, chada e gerule kwian gdaboke gerule salengwli daba gweale na giti daba e jiske o me jiske, ene ñage suge trate kwian na ulitage kwian e boke kle gerule ulia daba giti.  
\v 18 Ene kare kaire cha agali gerule no mau giti, cha Ñenua cha kagu ama gerule no cha giti kaire, cha cha Ñenua ole boke gerule no salengwli cha giti, ene e giti sugedale ba ulitage cha kle gerule ulia mau giti. 
\p  
\v 19 Jesu gerudu ene kwian fariseo ole gire kwian fariseo gerudu Jesuge: 
\p —Ba kle gerule ba Ñenua giti, ¿ama kle baini? 
\p Jesu jaindunga: 
\p —Ba ulitage me suge cha giti cha chema ulia, ene kaire me suge ba ulitage cha Ñenua giti chema cha Ñenua. Agwa suge ba ulitage tale suge cha chema, ene kaire uñale ba ulitage chema cha Ñenua, ba ulita me cha gai ulia ni bage be suge chema ulia cha Ñenua. 
\p  
\v 20 Jesu gerudu ene kwian fariseo ole Jesu kle kwian nglea ulita tke tangle ngwadi, Jesu kledu u gerungwa Chube olege eni lle igi tkakle ngwadi Chube alin, eni kwian ulita Jesu keruchugu gerule kwian fariseo ole agwa ni kwian gdaite su Jesu gai dbale skadi, chui bebi chke kwiange agedale me no Jesu ole.  
\v 21 Jesu gerudu nakwaite kwian ulita ole: 
\p —Cha be jogeni gire ba ulita cha tane giti be cha jinade nate mo chudaboale, agwa ba ulitage cha mi skwen, ba ulita be jogeda age me no talla ole, gire ba be chege sugekare Chubege diali, cha be joge ngwadi ba ulita me ñage joge chke cha nate. 
\p  
\v 22 Jesu gerudu ene kwian ulita ole gire kwian israelita chugagwalla ulita gerudu modi Jesu giti: 
\p —¿Ama kle tañachuge mo gweda agali sugekare chege, malen ama kle gerule ama be joge ngwadi che me ñage joge? 
\p  
\v 23 Jesu gerudu dare: 
\p —Ba ulita nga dba aimu, cha nga ngañamu, ba ulita ta nga dba aimu, cha ta me nga dba aimu ba ulita talla kare.  
\v 24 Cha gerudu ba ulita ole ba be jogeda age me no talla ole, kaire cha gerudu tanre ba ulita ole cha chema, chema cha kagu, agwa ba me ta cha gerua gakalin ulia. Ba me cha gerua gai ulia ba be jogeda age me no talla ole, ba be chege sugekare Chubege diali. 
\p  
\v 25 Kwian israelita chugagwalla ulita geru kadu Jesuge: 
\p —¿Ba chema ulia? 
\p Jesu jaindunga: 
\p —Ngeru ulita cha gerudu tanre ba ole, ene sugedale bage cha chema.  
\v 26 Chage uñale ba ulita kwian mine, cha agali ñage gerule tanre dare ba giti, cha ñage ba gbe jiske age tanre me no gdale, agwa cha me age ene cha talla alin giti, cha kaganga gerule ulia trate diali, cha kaire, cha ama keruchuge gerule, gire cha geru amanu kete ba ulitage, ene ba ulita ñage ama gerua gai ulia cha giti ene ba me chege jiske talla me no kle ba tale giti cha kaganga gwa giti. 
\p  
\v 27 Jesu gerudu ene kwian ulita ole, agwa me sugedu kwiange Jesu kledu gerule mo Ñenua Chube giti,  
\v 28 malen Jesu gerudu kwian ulita ole: 
\p —Nege me suge bage cha chema, agwa chui be chke gire ba be cha gbange kruge ngaña, chui ege be chke uñale bage cha ulia Chube Kirolla chiu nga dba ai giti kwian kare, kaire be suge bage cha me gerudu mo talla giti gballa, cha gerudu ulita cha Ñenua cha ta gbu gerule kare.  
\v 29 Cha kaganga kle diali cha ole ule, ama cha Ñenua, ama me cha chuge ngwadi gballa dale, cha kle age ulita no diali ama gwa giti ama takalin kare. 
\p  
\v 30 Jesu gerudu ene ulita kwian ole gire kwian tanre kledu Jesu keruchuge Jesu gau ulia, sugedu Chube nu Jesu kagaba. 
\s1 Jesu gerule kwian ole chema Chube olia 
\s1 chema Satanás olia 
\p  
\v 31 Kwian israelita nu Jesu gaba ulia, ama ulita ole Jesu gerudu: 
\p —Ba me ñage gerule alin allabi ba cha gai ulia, kaire ba mo ta gbadale trate chage diali cha gerua gerule kare, ene ulia ba geru jwannga cháge ba cha gerua ganga ulia,  
\v 32 cha gerua ulia giti be chke uñale ba ulitage mo ta gbe chagé giti geru uliage, ene geru ulia be ba jwen siere mo mauña me no ngeruge, ene ba chege ngwale mo mauña no na alin agedale no. 
\p  
\v 33 Kwian israelita ulita gerudu Jesu ole: 
\p —Cha ulita Abraham oindalla, kwian na me cha ulita gau gbu lle boi mau alin. Cha ulita me mo mauña molen, lle boanga mo mauña alin me ñage joge siere mo mauñage, ¿mineade ba kle gerule cha ole geru ulia be cha jwen siere mo mauña me noge, ene cha chege ngwale mo mauña na no alin? 
\p  
\v 34 Jesu jaindunga: 
\p —Cha gerule ulia ulia ba ulita ole, ba ulita bai kaire kle chage age me no diali age me no ba kaganga age me no ba mauña, ba ene me ñage mo jwen siere age me noge, ba chege age me no diali kwian lle boanga chege lle boi mo mauña alin kare.  
\v 35-36 Kwian bai kaire chege age me no diali, kwian ene me Chube uñe dale, ama me Chubenu, ama me ñage chage diali chui tangle Chube ole. Agwa kwian Chubenu ulia ama mo ta gbe chagé diali chui tangle Chube ole. Ba ulita kle age me no diali, ba ulita me Chubenu. Cha Chube Kirolla, cha ñage ba ulita jwen siere ba kle mo ta gbe age me noge ene ba me chege mo ta gbe age me no dare, ene ba mo ta gbe chege age no sugekare age me noge, ene ba Chubenu, ene ba be ñage mo ta gbe chagé diali chui tangle Chube ole.  
\v 37 Uñale chage ba ulita Abraham oindalla, agwa ba ta mo ta gbakalin cha gweda, ba me mo ta gbakalin ulia cha gerua gai, ba alin geru e me no cha kle gerule kare, malen ba kle mo ta dbe me no cha ole.  
\v 38 Cha kle gerule ba ulita ole cha Ñenua cha tku tangle kare, agwa ba ulita kle mo ñenua keruchuge ba kle age ama ba tku tangle kare ama kle gerule kare. 
\p  
\v 39 Kwian israelita gerudu Jesuge: 
\p —¡Abraham cha ulita ñenua! 
\p Jesu gerudu: 
\p —Ulia ba ulita Abraham kirolla ba kle gerule kare, ene ba ulita agedale ama agedu kare, agwa ba me kle mo ta gbe age ama kare.  
\v 40 Agwa cha kle gerule ulia ba ulita ole Chube cha tku tangle kare gire ba ulita takalin cha gweda cha kle gerule giti ba ole, Abraham me su age ene ba kle age kare.  
\v 41 Ba me kle age Abraham agedu kare, ba ulita kle age salengwli ba ulita ñenuanu kle age kare. 
\p Jesu gerudu ene gire kwian israelita ulita gerudu: 
\p —Cha ñenua me cha jun ke giti, uñale cha ulitage cha ñenua gdaitre alin, e Chube, ama cha ulita ñenuanu. 
\p  
\v 42 Jesu gerudu: 
\p —Ulia Chube ba ulita ñenua ba kle gerule kare, ene ba ulita mo ta dbadale no cha ole cha gai dage, agwa ba ulita me kle mo ta dbe no ene cha ole. Cha chiu ulia Chube ngwadi, cha kle aini ba ulitaske, cha me chiu mo ta giti agali, agwa Chube cha kagu nga dba ai giti.  
\v 43 ¿Mineade ba ulita ole cha kle gerule ba me kle geru e gbe gdadi mo alin? Ba kle mo ta gbe tañachuge ma no ba me cha gerua keruchuge no, ba me kle mo ta gbe no geru ole cha kle gerule kare,  
\v 44 ba kle mo ta gbe tañachuge ma no age ba ñenua kle age kare, ama geru jinanga tanre ngwale, ba ñenua che dolla kada Satanás, ba ulita ama kirolla. Gwange jondege alin Satanás kwian gwangada, kaire ama geru jinganga tanre ngwale, ama me mo ta gbu no Chube gerua ulia ole, malen ama ni gerule sidri ulia, ama tale geru ulia me kle, malen ama me ñage gerule ulia, ama geru jinanga ngwale mauña, ama kwian ulita ta gbe geru jinade ngwale ama kare.  
\v 45 Agwa cha gerunga ulia diali, cha me geru jinade ngwale ni sidri Satanás kare, ba Satanánu malen ba ulita me mo ta gbe cha gerua gai ulia.  
\v 46 Ni ba gdaite ñage cha gbe jiske gerule cha giti cha agenga me no, cha diali kle age no kle gerule ulia, ¿mineade ba me kle mo ta gbe cha gai ulia?  
\v 47 Kwian bai kaire ulia Chubenu, ama ulita no Chube gerua ole, ama diali mo ta gbe Chube gerua keruchugakalin no. Agwa ba ulita me Chubenu, malen ba me kle mo ta gbe ulia Chube gerua keruchuge no jumale, agwa ba kle Chube gerua keruchuge alin allabi, ba me kle mo ta gbe Chube gerua gai ulia mo alin. 
\p  
\v 48 Kwian israelita gerudu Jesuge: 
\p —Nege suge cha ulitage cha kle gerule trate ulia ba giti, ulia ba kwian me no nga Samariamu, dolla kle ba tale ama kle ba gbe gerule ulita ngwale ama takalin kare. 
\p  
\v 49 Jesu gerudu: 
\p —Dolla me kle cha tale ni dolla kle cha gbe gerule, cha kle gerule no ulia trate cha Ñenua giti, cha ama gai dage no, agwa ba ulita kle mo ta gbe gerule cha dollale, ba me kle cha gai dage.  
\v 50 Kwian gerule cha dollale kwian me cha gai dage, cha me e tallade kwian kle age giti cha ole, agwa cha Ñenua takalin kwian ulita gerudale no cha giti cha gai dage no, kwian bai kaire me gerule no cha giti me cha gai dage no, cha Ñenua be kwian ene gbe ji chuge agedu cha ole gdale.  
\v 51 Cha gerule ulia ulia ba ulita ole, kwian bai kaire cha gerua gbe gdadi cha gerua gai dage no, kwian ene be toi diali chui tangle cha Ñenua ole cha ole, ama mi chege sugekare cháge cha Ñenuage. 
\p  
\v 52 Kwian israelita ulita Jesu keruchugu gerule ene, gire gerudu: 
\p —Nege trate uñale chage dolla kle ba tale, dolla kle ba ta gbe gerule, uñale cha ulitage cha enusulian Abraham toidu, kaire kwian Chube gerua ketanga dabage toidu, ulita jo juma gire ama ulita jokeda. Ba kle gerule kwian bai kaire ba gerua gbe gdadi ba gerua gai dage no, kwian ene be toi diali chui tangle.  
\v 53 ¿Ba kle tañachuge ba ma kweri che enusulian unsuialin Abrahamge? Che enusulian Abraham ma kweri agwa ama me chegu toi diali, ama toidu gire ama jokeda, kaire kwian Chube gerua ketanga dabage ulita, ama kaire kweri agwa ulita me chegu toi gwade diali, ama ulita jokeda, ¿ba chema gerudale ba kle gerule kare? ¿Chema be ba kle gerule kare gai ulia? Cha me ba gerua gai ulia ba kle gerule kare, ba me ma kweri cha enusulian unsuialin ulitage, cha me ba gai ulia ni ba gerua gai ulia. 
\p  
\v 54 Jesu gerudu kwian israelita ole: 
\p —Cha kle age ulita cha me kle age mo ta giti ene kwian gerudale no cha giti cha kweri, me ene, cha mo gbe ene kweri mo ta giti, e ngwale, ngwale cha agali mo ta gbe kweri kwian gwa giti, e me trate. Agwa cha gbanga kweri, ama gerunga no cha giti, ama cha Ñenua Chube. Cha Ñenua e amaña ba ulita kle gerule ba Chubea,  
\v 55 agwa ba ulita kle sole, ba me ama uñe ulia, agwa cha ama uñe trate. Cha gerule gweale ba ole cha me ama uñe, ene cha kle age ba ulita kare ba ulita kwian songa ngwale kare. Agwa cha gerule ulia ba ole, ulia ulia cha ama uñe trate, cha kle age ulita ama kle gerule kare cha ole.  
\v 56 Ba ulita enusulian unsuialin Abraham, Chube ama ta gbu cha chuia giti, uñadu trate Abrahamge cha be chke nga dba ai giti, Abraham cha chuia e manadu nga suga no ole, ama gwagedu cha chuiadi gire nga sugedu no no ama tale cha giti, ama cha uñu cha gwagedu amadi. 
\p  
\v 57 Kwian israelita gerudu Jesuge: 
\p —Abraham enusulin, e unsuialin unsuialin, gire ba kle gerule ba gwagedu amadi, ba ni chura cincuenta molen, ba me ñage gerule ba gwagedu enusulin Abrahamdi. 
\p  
\v 58 Jesu gerudu: 
\p —Cha gerule ulia ulia ba ulita ole, cha gwagedu Abrahamdi Abraham gwagedu chadi, Abraham bebi menga chebia kote gire cha klebi enebi ngeru Abrahamge. 
\p  
\v 59 Jesu gerudu ene gire kwian israelita ulita skochiu jabale Jesudi, ama ulita ke jun Jesu skiagda ta sko ole Jesu gerudu giti, agwa Jesu jwlituda kwian ngleske tangle, Jesu jongwa kwian Jesu dollale ulita gwage, Jesu jo siere u gerungwa Chube olege. 
\c 9  
\s1 Kwian onbre mebanga unalla giti me gwagwa molen, Jesu ama gwagwa gbe ten 
\p  
\v 1 Jesu kle chage nga gwealege jonkare ule kwian geru jwannga amage ulita ole Jesu gwagedu onbre gdaitedi mebanga gwagwa me.  
\v 2 Kwian geru jwannga Jesuge ulita geru kadu Jesuge onbre e gwagwa me giti: 
\p —Cha tkanga tangle, ¿mineade onbre e medunga gwagwa me? ¿Ama ñenua ama chebia agedu gweale me no malen ama medunga ene? ¿O ama agali agedu gweale me no malen ama chegu ene? 
\p  
\v 3 Jesu gerudu kwian geru jwannga ole: 
\p —Onbre e ene gwagwa me, ni ama ñenua ni ama chebia ni ama agali agedu gweale me no gdale malen ama chegu ene, me ene, ama medunga chebia kote ene gwagwa me, ene Chube ñage age no ama alin mo kiralla giti, Chube ama gwagwa dodade ene kwian ulita ñage gwage Chube kiralladi ama gwagwa dodade giti.  
\v 4 Nege cha kle nga dba ai giti che lle boadale blike cha kaganga cha kagu lle boi ama alin kare, chui kle kodi gire cha be jogeda che mi ñage lle boi dare.  
\v 5 Cha kle nga dba ai giti cha jichra kare kwian ulita alin, cha kwian ta gbe chke Chube uñe salengwli jichra kle kwian gbe ten nga jereske kare, ene cha kwian ta gbe suge chage Chube ole. 
\p  
\v 6 Jesu gerudu ene ulita geru jwannga amage ole gire Jesu jolo tku dba dbi giti, Jesu dbiuda tugu jolodi, kobara giti Jesu dbiuda e gbu onbre me gwagwa molen gwagwage.  
\v 7 Gire Jesu gerudu onbre e ole: 
\p —Joga mo gwagwa glige chi tan obengwa kada Siloége —ka Siloé e gerule: “kwian kagle”. 
\p Onbre me gwagwa molen jo mo gwagwa glige chi tan Siloége Jesu ama kagu age kare, ama mo gwagwa gligu gire ama ñadu ten, ama joni gudegu.  
\v 8 Ama chkuni ama kledu toi ngwadi gire kwian kle toi ama ullage kodi kaire kwian na tanre gwageba amadi ngeru ama me ten diali ama kle igi kade kwian nage, kwian e ulita nu gwageba amadi ene ngeru, kwian e ulita geru kadu modi: 
\p —¿Onbre e me amaña me ten kledu diali toiba dba jonke igi kade che ulitage? 
\p  
\v 9 Kwian gweale gerudu: 
\p —Ima, onbre e amaña gwagwa me. 
\p Gweale na gerudu: 
\p —Me dale, onbre e me amaña, onbre chege salengwli ama kare, agwa me amaña. 
\p Gire onbre agali gerudu mo giti: 
\p —Ima, cha amaña, ba gwagedu chadi cha me ten, agwa nege cha ñage ten no. 
\p  
\v 10 Kwian ulita geru kadu onbre ege: 
\p —¿Ba agedu mine gire nege ba ñage ten? 
\p  
\v 11 Onbre jaindunga mo giti: 
\p —Onbre gdaite kada Jesu, ama dbiuda tugu jolodi gbu cha gwagwage gire gerudu cha ole: “Joga mo gwagwa glige chi tan obengwa kada Siloége.” Cha jo Jesu gerudu kare cha ole, cha jo chke chi tange, cha mo gwagwa gligu gire cha ñadu ten. 
\p  
\v 12 Kwian ulita geru kadu dare amage: 
\p —Onbre ba dodadu, ¿ama kle baini? 
\p Ama jaindunga: 
\p —Me uñale chage ama kle baini nege. 
\p  
\v 13-14 Jesu dbiuda tugu jolodi gbu onbre me gwagwa molen gwagwage gire onbre ñadu ten, Jesu onbre e dodadu kwian israelita undege chuiage, malen kwian ulita kledu geru kade onbre ege kwian e ulita onbre du kwian fariseo ulita ngwadi gbale jiske.  
\v 15 Kwian fariseo geru kadu onbre amañage: 
\p —¿Ba agedu mine gire nege ba ñage ten? 
\p Onbre jaindunga kwian fariseo kalen: 
\p —Onbre gdaite dbiuda tugu jolodi gbu cha gwagwage gire cha mo gwagwa gligu, ene cha ñadu ten. 
\p  
\v 16 Onbre gerudu ene kwian fariseo ole gire kwian fariseo ulita gerudu modi mo kaire kaire, gweale gerudu: 
\p —Onbre kwian gwagwa me dodadu, ama kle age che undege chuiage, malen suge chage ulia Chube me ama kagu, ulia Chube ama kagu ene ama me e dodadu che undege chuiage. 
\p Kwian fariseo gweale na gerudu: 
\p —Onbre e onbre gwagwa dodadu, e me chiu Chube ngwadi ene ama me ñage lle daga ngwale no e kare dodade, kwian agenga me no me ñage gwagwa dodade ama agedu kare. 
\p Kwian fariseo ulita me gerudu salengwli Jesu giti gire ama mo tku dole modi Jesu giti,  
\v 17 geru kadu dare kwian onbre gwagwa dodabage: 
\p —Onbre gdaite ba gwagwa dodadu, nege ba ten, ¿ba tañachuge mine ama giti? ¿Bage suge ama chema? 
\p Onbre e jaindunga Jesu giti: 
\p —Cha gerule ama giti ama kwian Chube gerua ketanga dabage. 
\p  
\v 18 Onbre gerudu no ene Jesu giti agwa kwian fariseo ulita bai Jesu dollale me tadu kwian gwagwa dodaba kerua gakalin ulia ama medunga gwagwa me nege ama ñage ten, me chegu no alin kwian fariseoge, kwian fariseo onbre gwagwa dodaba ñenua, chebia kadu geru kadadale ñenuage chebiage ulia onbre medunga chebia kote gwagwa me,  
\v 19 kwian fariseo geru kadu ñenuage ene: 
\p —¿Onbre ai ulia ba kirolla? Cha takalin ba gerule cha ole, ¿ulia ama medunga gwagwa me? Ulia ama medunga gwagwa me, ¿gire mineade ama ñage ten nege? 
\p  
\v 20 Ñenua gerudu mo kirolla gwagwa dodaba giti: 
\p —Cha ama ñenua, cha muira ama chebia, uñale cha bonatege ama medunga gwagwa me, ama cha kirolla ulia, cha ama manadu, jo juma me gwagwa molen.  
\v 21 Agwa nege cha bonatege me uñale mineade ama ñage ten, kaire me uñale cha bonatege chema ama gwagwa dodadu. Ma no ba geru kade amage agali, ama juma, ama agali ñage gerule mo giti boidu mine gire ama ñage ten. 
\p  
\v 22 Ñenua, chebia gerudu ene kwian fariseo chrullale, uñadu ama bonatege kwian fariseo mneite nu mo ta gbaba ule salengwli kwian mlienga siere u mo litangwa Chube gerua jwanngwage kwian ulita bai kaire gerule no Jesu giti Jesu ulia Cristo Chube ama kagu kwian ulita alin. Kwian ulita bai kaire gerule ene kwian fariseo mneite gwa giti kwian fariseo be kwian ene mlienga siere, kwian ene me ñage mo lite dare ule ama kle mo lite ngwadi.  
\v 23 Malen ñenua gerudu kwian fariseo ole mo kirolla giti: “Ma no ba geru kade amage agali, ama juma, ama agali ñage gerule mo giti.” 
\p  
\v 24 Onbre gwagwa dodaba, kwian fariseo ama kadu nakwaite geru kadadale Jesu giti, kwian fariseo gerudu onbre gwagwa dodaba ole: 
\p —Ba gerudale no Chube giti Chube ba gwagwa dodadu, me onbre e ba kle tañachuge ama ba gwagwa dodadu, uñale cha ulitage onbre e agenga me no. 
\p  
\v 25 Onbre gwagwa dodaba gerudu fariseo ole: 
\p —Chage me uñale ama agenga me no o ama agenga no, agwa uñale chage trate cha tigedu gwagwa me cha me ñadu ten, agwa nege cha ten no, ama cha gbu ten. 
\p  
\v 26 Kwian fariseo geru kadu dare: 
\p —Onbre ba gwagwa dodadu, ¿ama agedu mine ba ole gire ama ba gbu ten? 
\p  
\v 27 Onbre gwagwa dodaba jaindunga: 
\p —Cha gerudu tanre ba ole onbre e giti onbre agedu mine cha ole, agwa ba me ta cha kerua gbakalin gdadi ulia. ¿Lledale ba takalin cha gerule nabitaite amaña giti? ¿Ba ta mo ta blitakalin ama ole ama gai ulia? 
\p  
\v 28 Kwian fariseo ulita skochiu onbre gwagwa dodaba ole ka bo ama ole: 
\p —Ba mo ta gbakalin onbre ba gwagwa dodadu gai dage, e ba mo ta gbakalin ama gai dage, agwa cha me dale, cha ulita diali be chage Moisés nu Chube gerua degaba alin gai dage.  
\v 29 Uñale cha ulitage Chube gerudu Moisés ole, malen cha Moisés chadalla degaba gai dage, cha age ama chadalla alin gerule kare. Agwa onbre e ba gwagwa dodadu me uñale cha ulitage ama chiu baini ama chema. 
\p  
\v 30 Onbre gwagwa dodaba gerudu kwian fariseo ole: 
\p —Me suge chage mineade me uñale bage ulia onbre cha gwagwa dodadu chiu baini.  
\v 31 Uñale che ulitage Chube me kwian agenga me no keruchuge, agwa kwian ulita bai kaire Chube gai dage age Chube takalin kare, Chube kwian ene alin keruchuge.  
\v 32 Ni kwian gdaite jo keruchugaba gerule kwian na giti, kwian medunga gwagwa me kwian na ngwale ñage ama gwagwa gbe ten.  
\v 33 Onbre cha gwagwa dodadu, onbre e me chiu Chube ngwadi Chube me ama kagu, ene ama me ñadu age no ene cha alin cha gwagwa gbe ten, kwian ngwale me ñage age no ene daba alin, ama cha gwagwa dodadu giti suge chage Chube ama kagu. 
\p  
\v 34 Kwian fariseo ulita gerudu ta sko ole onbre gwagwa dodabage: 
\p —Ba medunga me gwagwa molen, ba kwian agenga me no, ¿nege ba ten gire ba ta cha ulita tkakalin tangle onbre e giti? ¿Ba chema gerudale ene cha ole? Ba me mo lite dare cha ole cha kle mo litege ngwadi, ba kwian me no, ¡joga siere u aige cha ulitage, cha me gwagekalin badi dare aini! 
\p Ama jo kagaba siere u kwian ulita kle mo lite ngwadige. 
\p  
\v 35 Kwian fariseo ulita onbre e kagu siere u mo litangwa Chube gerua jwanngwage chku uñale Jesuge, Jesu tendu onbre e amaña ngwange gire Jesu geru kadu amage: 
\p —Chube mo Kirolla kagu nga dba ai giti kwian kare, ¿ba ama gai ulia? 
\p  
\v 36 Onbre gerudu: 
\p —Gerule cha ole chema ba kle gerule giti, cha ta ama gakalin ulia. 
\p  
\v 37 Jesu gerudu: 
\p —Ba kle gwagedi, ba kle gerule ole, e cha amaña, cha giti cha kle gerule ba ole. 
\p  
\v 38 Sugedu onbre ege Jesu Chube Kirolla Chube nu Jesu kagaba nga dba ai giti kwian kare, gire onbre e jo chke dba jongnagwa giti Jesu gwangnagu Jesu gai dage gerudu Jesu ole: 
\p —Cha Chugagwalla, cha ba gai ulia, ba Chube Kirolla. 
\p  
\v 39 Jesu gerudu: 
\p —Cha chiu nga dba ai giti, ene cha giti be chke uñale trate trate chema Chube gai ulia chema me Chube gai ulia. Kwian me Chube gerua uñe, Chube gerua me suge kwian enege, cha kwian ene ta gbe suge salengwli cha ba gwagwa gbu ten kare, ene Chube gerua suge trate amage. Agwa kwian bai kle gerule ama Chube gerua uñe ulita gire me age Chube gerua gerule kare, kwian enege Chube gerua me suge ama tale, cha me kwian ene ta gbe suge, ama ta be chege kwian gwagwa me ten kare, Chube gerua me suge amage. 
\p  
\v 40 Kwian fariseo gweale kledu Jesu keruchuge gerule ene, kwian fariseo e geru kadu Jesuge: 
\p —¿Kaire ba kle tañachuge cha giti cha me Chube gerua uñanga trate no kwian gwagwa me kare? Cha ten cha ta molen, uñale chage cha Chube gerua uñe. 
\p  
\v 41 Jesu gerudu kwian fariseo ole: 
\p —Ma no ba ulita gerule mo giti ba me Chube gerua uñe, ene ba me chege jiske kweri Chube gwa giti ba kle age me no gdale, agwa ba kle gerule ba Chube gerua uñe trate gire ba age me no Chube dollale, e giti ba jiske kweri Chube gwa giti ba kle age me no gdale. 
\c 10  
\s1 Jesu gerule: “Cha kwian bda oveja mananga no kare” 
\p  
\v 1 Jesu geru ñachugu kwian fariseo ulita alin: 
\m —Cha gerule ulia ulia ba ulita ole, kwian bai kaire me joge bda oveja nate gerege oveja gerea ugakallage gudegu agwa joge oveja gerea gití bdugu oveja nate oveja gai, kwian ene skwe boanga kwian me no.  
\v 2 Agwa kwian oveja mananga ulia ama diali joge oveja gerea ugakallage gudegu oveja nate.  
\v 3 Oveja mananga joge chke oveja gerea ugakallage gire kwian oveja gerea ugakalla mananga oveja gerea ugakalla degenga oveja mananga alin, gire oveja mananga oveja ulita kaire kaire ka jwen ka giti, oveja mo mananga keruchuge uñale ama ulitage ama mananga kle ama kade, ama ulita joge gdaite gdaite mananga kle ngwadi gire oveja mananga oveja ulita jwen jondoi gerege.  
\v 4 Oveja ulita tien jondoi gerege gire oveja mananga joge chage oveja ulita ngeru ngaute ovejage, oveja ulita mo mananga kerua uñe, ama me nga tallade, ama chage mo mananga nate baini be joge ngwadi.  
\v 5 Agwa kwian na oveja kade, oveja me kwian e kerua uñe, oveja mi joge kwian e kle ngwadi, uñale ovejage ama mananga me kle ngaute ovejage, oveja kwian ene keruchuge oveja kige kwian ene ngeru, oveja mi jain ama gitigu. 
\p  
\v 6 Jesu geru ñachugu ene kwian fariseo alin, agwa ama ulitage me sugedu Jesu gerudu giti ama ulita ole.  
\v 7 Jesu gerudu nabitaite dare kwian ulita ole: 
\p —Cha gerule ulia ulia ba ulita ole, cha ugaka kare kwian alin oveja gerea ugakalla oveja kle joge tangle ngwadi gudegu kare.  
\v 8 Kwian ngle chiu cha ngeru, ama daba tku tangle geru me uliage, ama ulita gerudu ama Chube uñe, agwa ama me gerudu ulia daba na ole, ama kwian skwe boanga kare, kwian me no. Kwian Chubenu ulia, ama oveja kare, ama me kwian me no kerua gbu gdadi salengwli oveja me kwian me ama mananga kerua gbe gdadi kare.  
\v 9 Cha ugaka kare kwian ulita alin, cha giti alin allabi kwian ñage Chube uñe ulia, kwian bai kaire cha gai ulia kwian ene be tien gitiru ji chugege ama age me no gdale, cha kwian ene manade no ama gbe toi no oveja mananga kle oveja manade no kare, ene oveja me boi daga ngwale oveja toi no. Oveja mananga kle oveja jwen ugakage kle dbe blire chi jai gire oveja mananga kle oveja tke naskuni ugaka amañage.  
\v 10 Kwian skwe boanga joge ovejaske skwe boi ovejage oveja gai gweda age me no oveja ole ulita, ama chage ta e kare alin ole oveja nate diali, agwa cha me ene, cha chiu nga dba ai giti kwian alin age no kwian alin ene cha giti kwian ñage toi diali chui tangle nga suga no ole, cha kwian ta gbe ene.  
\v 11 Cha kwian bda oveja mananga no kare, cha age no kwian chanu alin, cha ama manade no kwian oveja mananga oveja maunu manade no kare, oveja mananga no oveja ole ama mo ta gbe jogeda oveja dolla kote oveja giti.  
\v 12 Agwa kwian lle boanga oveja mauña alin, kwian ene tañachuge igi alin gai oveja mauñage oveja manade giti, ama gwage oveja dolla gudedi chie oveja gitigu oveja gadale gire ama kige gude ngeru oveja jige gballa, kwian ene me oveja mananga ulia, ama kle tañachuge oveja me amanu ma no ama alin oveja chuge ngwadi dolla gudege. Ama age ene oveja ulita ole gire gude ñage chke ovejadi oveja gweda gute, oveja kige gdaite gdaite gballa bate gire oveja ulita jogenga gballa.  
\v 13 Onbre kige oveja dolla gudedi ama oveja chuge ngwadi gutadale dollage, ama kle tañachuge igi alin gai oveja manade giti, agwa ama me no oveja ole, ama me mo ta gbe kira bate oveja dolla ole oveja giti oveja mananga ulia no kare.  
\v 14-15 Cha kwian oveja mananga ulia no kare. Salengwli cha Ñenua cha uñe cha cha Ñenua uñe, ene kaire cha kwian chanu ulita uñe ama cha uñe kaire, cha mo ta gbe jogedaleda ama giti.  
\v 16 Kwian na ngle chudalla me israelita chanu kaire kle, ama bebi cha Ñenua Chube uñe, cha gerua jogedale chke amage gire ama be cha gai ulia, cha giti kwian israelita kaire kwian me israelita be cha Ñenua uñe, gire kwian israelita kwian me israelita be chege mneitre alin, cha ama ulita mananga.  
\v 17-18 Cha be mo chuge ngwadi jogeda kwian chanu ulita alin, kaire cha be mo gbeni gwade, kwian gdaite me ñage cha gai cha gweda agali, agwa cha mo tale cha be mo chuge ngwadi mo gwadaleda. Cha ñage mo chuge ngwadi mo gwadaleda, kaire cha ñage mo gbeni gwade, cha Ñenua cha kagu age ene ulita, cha kle age ama takalin kare, malen ama no cha ole. 
\p  
\v 19 Kwian israelita ulita kle mo litaba Jesu kle ngwadi, ama Jesu keruchugu gerule ene gire ama ulita mo tku dole modi nabitaite Jesu gerua giti.  
\v 20 Kwian israelita mne gdaite gerudu mne gdaite nadige Jesu giti: 
\p —¿Mineade ba kle ama gerua keruchuge ba kle ama kerua gai ulia? ¿Me suge bage kwian e jwligebanga, dolla kle ama tale ama gbe gerule? 
\p  
\v 21 Agwa kwian israelita mne gdaite na jaindunga: 
\p —Ni kwian gdaite jwligebanga dolla kle ama tale ñage gerule ene ama kle gerule kare. Kaire kwian jwligebanga me ñage kwian gwagwa dodade ama kle age kare. 
\p Kwian israelita mne boke kira batu ene Jesu giti. 
\s1 Kwian israelita chugagwalla ulita alin 
\s1 Jesu kwian ngwale 
\p  
\v 22 Noi boi suiale, e suiale una Jerusalénge kwian israelita ulita kle tachke enusulian unsuialin u gerungwa Chube ole dodadu giti chuia ollade.  
\v 23-24 Chui e ollade chuiage Jesu jo chke u gerungwa Chube olege, kwian israelita Jesu dollale gwagedu Jesudi chage u e skada kada Salomónnuge, eni kwian israelita Jesu dollale ulita mo litu Jesudi tangle geru kadu Jesuge. 
\p —¿Mangire ba be kle chage cha ta gbe tañachuge ba giti ba Cristo o me Cristo? Ba Cristo ulia Chube nu ba kagaba ba gerule blike cha ole trate mo giti, ene suge chage ba ulia Cristo. 
\p  
\v 25 Jesu gerudu kwian israelita ole: 
\p —Cha gerudu trate mo giti ba ulita ole, agwa ba ulita me cha kerua gau ulia. Kaire cha kle lle daga ngwale no tanre dodade cha Ñenua kiralla giti ba ulita gwa giti, e giti sugedale bage cha chema ulia,  
\v 26 agwa ba ulita me kwian chanu, malen ba me cha gai ulia.  
\v 27 Kwian chanu cha kerua gbe gdadi, ama cha gai dage, ama ulita chage cha gerule kare, cha ama ulita uñe.  
\v 28 Cha kwian ene gbe toi diali chui tangle Chube ole, ama mi chege sugekare Chubege ji chuge, kwian ene chanu diali, ni kwian me no gdaite ni dolla ñage kwian chanu jwennga cha ngeru.  
\v 29 Cha Ñenua kwian ta gbu cha gai ulia, kwian ene ulita chanu, cha Ñenua kweri, ama kira molen tanre, malen kira na me ñage kirachke ama kiralladi, kira na me ñage kwian chanu jwennga cha Ñenua ngeru.  
\v 30 Cha Ñenua talla kle cha ole, cha talla kle cha Ñenua ole, cha Ñenua cha ole gdaitre alin. 
\p  
\v 31 Jesu gerudu ene gire kwian israelita ulita skochiu nabitaite Jesu gerudu giti ama ulita ke jun Jesu skiagda.  
\v 32 Gire Jesu gerudu ama ulita ole: 
\p —Cha Ñenua kiralla giti cha lle daga ngwale no tanre dodadu ba ulita gwa giti, ¿lle bai no cha dodadu cha Ñenua kirallaske gdale ba be cha skie ke giti? 
\p  
\v 33 Kwian israelita jaindunga Jesu kalen: 
\p —Cha ulita mi ba skie ba lle ulita no dodadu gdale, agwa ba kle gerule Chube dollale gdale cha ta ba skiakalin, cha ulitage uñale ba cha kwian onbre ulita kare gire ba agali ta mo gbakalin Chube kare cha ulita gwa giti. 
\p  
\v 34-35 Jesu gerudu: 
\p —Chube gerua jo degaba unsuialin ba ulita alin, uñale ba ulitage chada e gerule ulia diali, Chube gerua kle degaba chada ege gerule: 
\q1 “Cha gerudu ba ulita giti ba chube kare.” 
\m Chube gerudu ene Chube kledu gerule kwian ulita giti bai kairege Chube gerua jo ketaba unsuialin ngasuialin.  
\v 36 Chube gerudu ene ba enusulian unsuialin giti ama ulita chube kare, gire geru e giti ba me mo ta dbe skochie, ba kle geru e gai ulia. ¿Mineade nege cha gerule ba ole cha Chube Kirolla gire ba ta skochie? ¿Mineade suge bage cha kle gerule Chube dollale? Cha Ñenua Chube cha gau cha kagu nga dba ai giti, ba me ñage gerule cha ole cha kle age me no Chube dollale.  
\v 37 Ba gwa giti cha gerule alin cha Chube Kirolla cha me age ama age kare, ba me cha gadale ulia cha ama Kirolla,  
\v 38 agwa ba gwa giti cha lle daga ngwale no dodade Chube kiralla giti, e giti ba cha gadale ulia Chube Kirollale, sugedale bage Chube kle cha gbe e dodade. Ba me cha kerua gakalin ulia gerule mau giti cha Chube Kirolla, ma no ba cha gai ulia Chube Kirollale cha lle daga ngwale no dodade giti, e giti sugedale ba ulitage ulia cha Ñenua kle cha ole cha kle cha Ñenua ole, cha gdabonate gdaitre alin. 
\p  
\v 39 Kwian israelita ulita Jesu keruchugu gerule ene gire ama ulita mo ta gbu nabitaite Jesu gai dbale skadi, agwa ama me ñadu Jesu gai, Jesu kigedu ama ulita ngeru.  
\v 40 Jesu joni chi Jordánge tangle chkagu Juan-Bautista kwian ñeu chiske gau ngaña chigage ngwadi, eni Jesu chegu toi chui gwealege.  
\v 41 Kwian ngle jo chke Jesu kle ngwadi, kwian e ulita gwagedu Jesudi, kwian e ulita Jesu keruchugu gire gerudu Jesu giti: 
\p —Juan-Bautista ni lle daga ngwale no gdaite dodadu Chube kiralla giti kwian gwa giti, agwa Juan-Bautista gerudu onbre gdaite be chie Juan-Bautista nate giti onbre e be lle daga ngwale no dodade Chube kiralla giti, ulia nege che gwa giti onbre ai kle age Juan-Bautista gerudu kare, onbre ai amaña giti Juan-Bautista kledu gerule che ole. 
\p  
\v 42 Gire chui ege kwian ngle Jesu gau ulia Chube Kirollale nga ege Juan-Bautista kwian ñeu chiske ngeru ngwadi. 
\c 11  
\s1 Jesu Lázaro jaba gbeni gwade 
\p  
\v 1 Onbre gdaite oga kada Lázaro, ama ibotea boke kada Marta, María, ama ulita una Betaniamu.  
\v 2-3 (Lázaro ibotea María e amaña lle ñachke no tku Jesu sera giti Jesu sera unbatu mo chugaga giti.) Lázaro oga gire Lázaro ibotea gdabonate kwian kagu geru jige Jesuge, Lázaro ibotea gerudu kwian be geru kete Jesuge ole: 
\p —Ba joge chke llani ba gerule ene: “Cha Chugagwalla, ba skatemanalla no no oga kirale kirale.” 
\p  
\v 4 Kwian jritenga Lázaro chada ole jo chke Jesu kle ngwadi, gerudu Jesu ole: 
\p —Cha Chugagwalla, ba skatemanalla no no oga kirale kirale. 
\p Jesu ama keruchugu gerule ene Lázaro giti, Jesu gerudu: 
\p —Lázaro jingmea kote Lázaro mi chege jogebada diali, Chube be age no ama alin mo kirallaske, ene kwian ulita ñage gerule no Chube giti kaire gerule no cha Chube Kirolla giti. 
\p  
\v 5 Jesu no no Marta ole Marta daballa María ole, kaire Lázaro ole, agwa ama me tañachugu joge blike Lázaro oga nate.  
\v 6 Jesu geru keruchugu Lázaro giti gire Jesu chegu chui boke dare ngmadi kledu ngwadi.  
\v 7 Chui boke jo tangle gire Jesu gerudu kwian geru jwannga amage ulita ole: 
\p —Aleni naskuni nakwaite nga Judeage Lázaro kle ngwadi. 
\p  
\v 8 Kwian geru jwannga gerudu Jesu ole: 
\p —Cha tkanga tangle geruge, me sbali nga Judeage kwian israelita ba dollale tadu ba skiakalin ke giti tadu ba gweda, ¿mineade ba ta jogekalin nakwaite nga ege? 
\p  
\v 9-10 Jesu jaindunga: 
\p —Ba me tallade e giti, chui gbaite ulita nga chra che alin, che chage ngajudi che me lentige che me joge chke dba, nga chra giti che chage no, agwa che chage nga jereske che lentige che joge chke dba, nga jere dbigu nga chra me chagegda no. Kwian age me no cha ole chuia bebi chke salengwli che kle chage ngajudi kare uñale chege che ñage chage baini kaire ene che me lentige. Kwian be age me no cha ole salengwli nga jere chke kare gire kwian ulita be age cha ole ama takalin kare, agwa nga kle ju kare nege, cha ñage chage kwian me noske kwian me ñage age me no cha ole. 
\p  
\v 11 Jesu gerudu ene kwian geru jwannga ulita ole gire Jesu gerudu dare: 
\p —Che skatemanalla Lázaro kle gbe, cha be joge ama gai gdate. 
\p  
\v 12 Kwian geru jwannga Jesuge geru kadu amage: 
\p —Cha Chugagwalla, ba kle gerule Lázaro kle gbe, ¿e me gerule ama kle joge chkeni? 
\p  
\v 13 Kwian geru jwanngage me sugedu Jesu kle gerule mine ama ole, kwian geru jwanngage sugedu Lázaro kle gbe ulia, kwian geru jwannga tañachugu ulia Lázaro kle undege alin, agwa Jesuge uñadu Lázaro me kle gwade, Lázaro nu jogebada.  
\v 14 Uñadu Jesuge kwian geru jwannga kle tañachuge Lázaro kle gbe alin allabi, malen ama gerudu ma trate kwian geru jwannga ole: 
\p —Lázaro jaba giti cha kle gerule, ama me chegu.  
\v 15 Nga suga no chadi cha me kledu ama ole, e ma no ba alin, ene cha be age ama jaba ole ba ulita gwa giti, ene ba be mo ta gbe cha gai ulia ma no. ¡Ale llani Lázaro jaba kle ngwadi! 
\p  
\v 16 Jesu gerudu ene gire Tomás amaña kada Gemelo gerudu kwian geru jwannga na ulita ole: 
\p —Ale ulita mo gwangeda ule Jesu ole. 
\p Kwian geru jwannga ulita jo ule Jesu ole.  
\v 17 Jesu jo chke kodi una Betaniage gire kwian geru ketu Jesuge Lázaro jaba ogle chuia bagake chkeba.  
\v 18 Una Betania chege kodi una Jerusalénge kilómetro gdamaire alin.  
\v 19 Kwian israelita tanre una Jerusalénmu nu jogeba una Betaniage Marta, María oli gatedi.  
\v 20 Martage chku uñale Jesu chku kodi una Betaniage gire Marta jo ten Jesu ngwange jonke, agwa Marta daballa María chegu toiba dba gwa.  
\v 21 Marta jo chke Jesu kle ngwadi, Marta gerudu olire Jesu ole: 
\p —Cha Chugagwalla, ba kledu aini cha ole ene cha kobatea me jokeda. Ba me kledu, malen cha kobatea jokeda,  
\v 22 agwa uñale chage nege Chube be age ulita ba alin ba gerule kare ama ole. 
\p  
\v 23 Jesu gerudu Marta ole: 
\p —Ba kobatea jaba be chkeni gwade. 
\p  
\v 24 Marta gerudu Jesu ole: 
\p —Ima, uñale chage ama jaba be chkeni gwade, e chui bdaglige, chui ege kwian jaba ulita be chkeni gwade. 
\p  
\v 25 Jesu gerudu Marta ole: 
\p —Cha kwian jaba gbanga gwadeni, cha kwian gbanga toi diali chui tangle. Kwian bai kaire cha gai ulia, kwian ene jogeda gire ama be toi diali chui tangle Chube ole.  
\v 26 Kaire kwian ulita bai kaire kle gwade, bebi jogeda, ama cha gai ulia, ama be chege toi diali chui ulita, ama mi chege sugekare Chubege. ¿Ulita cha kle gerule kare ba gai ulia? 
\p  
\v 27 Marta gerudu: 
\p —Ima cha Chugagwalla, ba kle gerule kare cha gai ulia, uñale chage ba Cristo ba Chube Kirolla, sbali Chube gerudu Chube be gdaite kage nga dba ai giti, e ba amaña Chube gerudu giti, cha ba gai ulia. 
\p  
\v 28 Marta gerudu ene ulita Jesu ole gire Marta joni daballa María kle ngwadi, gerudu María alin ole gballa sugekare: 
\p —Che tkanga tangle geruge kle kodi aini chege, ama ta gerukalin ba ole, ¡bai, ale ama kle ngwadi! 
\p  
\v 29 María Marta keruchugu gerule ene Jesu giti María chku gdate, blike ama jo tienda Jesudi Jesu kle ngwadi.  
\v 30 Unaske Betaniage Jesu bebi joge chke, ama kle kodi una Betaniage ama skwendu Martage ngeru ngwadi, nga amañage María jo tienda Jesudi.  
\v 31 Kwian israelita ulita kledu María oli gatedi María ullage gwagedu Maríadi chke gdate blike joge jonkare, ama ulita chagedu María nate, ama ulita tañachugu María be joge olire Lázaro jaba ogle ngwadi.  
\v 32 María jo chke Jesu kledu ngwadi, María gwagedu Jesudi ama toidu dba jongnagwa giti Jesu sera ngena, María gerudu olire Jesu ole: 
\p —Cha Chugagwalla, ba kledu aini cha ole ene cha kobatea me jokeda. Ba me kledu, malen cha kobatea jokeda. 
\p  
\v 33 Jesu gwagedu Maríadi olire tanre mo kobatea oña nate, kaire kwian israelita ulita jo chke Jesu kle ngwadi ule María ole Lázaro oña suia jwennga, María talla sugedu dage Jesuge kaire kwian israelita ulita talla sugedu dage Jesuge, Jesu ta chiu olire kwian ole gwage kwian ulitadi sui jwennga Lázaro oña nate.  
\v 34 Jesu geru kadu: 
\p —¿Lázaro jaba ogle baini? 
\p Marta, María jaindunga: 
\p —Cha Chugagwalla, ¡bai! Ale tienda Lázaro jaba ogle ngwadi. 
\p  
\v 35 Jesu jo jonkare chage Lázaro jaba ogle ngwadi ngnagu Jesu olidu.  
\v 36 Kwian israelita ulita gwagedu Jesudi olire gire gweale gerudu modi Jesu giti: 
\p —Gwagede amadi, ulia ama no Lázaro ole, ama kle olire Lázaro oña nate. 
\p  
\v 37 Kwian israelita gweale na gerudu modi: 
\p —Ama kwian me ten gbu ten, ¿mineade ama me ñadu age Lázaro alin Lázaro dodade, ene Lázaro me jokeda? 
\p  
\v 38 Jesu jo chke Lázaro jaba ogle ngwadi, Jesu ta olire ole jo chke kodi Lázaro jaba ogle ngwadige, Lázaro jaba ogaba ngwadi e keuga, keuga ugakallage kle jegaba kejre ke kweri gbaite giti.  
\v 39 Jesu gerudu kwian kledu eni ulita ole: 
\p —Ke kle keugage jwennga. 
\p Marta Lázaro oña ibotea gerudu Jesu ole: 
\p —Cha Chugagwalla, cha tañachuge ama jaba ñachke me no, chui bagake nege ama jokeda. 
\p  
\v 40 Jesu gerudu Marta ole: 
\p —¿Ba me tachke cha gerudu ba ole giti? Cha gerudu ba ole ba cha gai ulia gire Chube be age no no ba gwa giti ba be gwage ama kiralladi. 
\p  
\v 41-42 Kwian kledu eni Jesu ole ke junnga gire Jesu gwagedu nga ngaña giti, Jesu gerudu Chube ole: 
\p —Cha Ñenua, cha gerule no ba giti, noare ba kle cha keruchuge diali, kaire uñale chage ba kle cha keruchuge nege gerule ba ole Lázaro oña giti, nege cha gerule ba ole ba age kwian kle mo litaba aini ulita gwa giti, ene ama ñage cha gai ulia, ñage suge ama ulitage ulia ba cha kagu. 
\p  
\v 43 Jesu gerudu ene ulita mo Ñenua ole gire Jesu ngautu kira giti Lázaro jabage: 
\p —¡Lázaro, bai jondoi! 
\p  
\v 44 Lázaro jaba chkuni gwade chiu jondoi mo jegwale ulita bliaba ñometraske, kaire chuga bliaba ulita ñometraske, ama ko ama sera ulita kle lugaba kejre, Jesu gerudu kwian na ulita ole: 
\p —Ba Lázaro skatrennga, Lázaro kleda jogeni gudegu. 
\s1 Kwian israelita chugagwalla ulita mo ta gbe salengwli chage Jesu nate gadale gwaleda 
\p  
\v 45 Kwian israelita ulita kledu María oli gatedi gwagedu Jesudi Jesu agedu no ama ulita gwa giti, kwian israelita e ulitaske kwian israelita tanre Jesu gau ulia Jesu Lázaro gbuni gwade giti,  
\v 46 agwa kwian israelita na tanre me Jesu gau ulia, kwian israelita e jo kwian fariseo ulita ngwadi geru kete kwian fariseoge Jesu agedu giti ulita Lázaro ole.  
\v 47 Gire kwian fariseo ulita kaire kwian gerunga Chube ole daba alin chugagwalla ulita mo litu kwian israelita chugagwalla ma kweri ulita ole u mo litangwa Chube gerua jwanngwage, ama ulita geru tragu modi Jesu giti: 
\p —¿Che ulita be age mine onbre e ole? Onbre e kle chage lle daga ngwale no tanre dodade che bitalla israelita ulita gwa giti, kwian ulita be mo ta gbe chage ama nate. Che onbre e chuge ngwadi age, che bitalla israelita ulita be ama gai ulia be ama gbe kweri mo chugagwallale,  
\v 48 ene chugagwalla ulita nga Romamu be mo tke dole che ole, ama be u kweri chenu gerungwa Chube ole skienda ulita, kaire ama be che jwia ulita jwennga mo alin che ulita ngeru. 
\p  
\v 49 Kwian israelita chugagwalla ngleaske chugagwalla gdaite kada Caifás, chura ege ama kwian gerunga Chube ole daba alin chugagwalla ma kweri, chugagwalla e gerudu chugagwalla na ulita ole: 
\p —Ni ba ulita gdaitege uñale che agedale mine,  
\v 50 ni suge bage ba tañachugadale mine, cha gerule ba ulita ole ma no che kwian israelita ulita alin onbre gdaitre alin jogeda kwian israelita ulita giti, ene kwian nga Romamu me mo tke dole che ole me che jwia jwennga che ulita ngeru. 
\p  
\v 51 Caifás gerudu ene ulita daba chugagwalla na ole me gerudu mo ta giti, ama gerunga Chube ole daba alin chugagwalla ma kweri chura ege, malen Chube ama ta gbu gerule Jesu be jogeda kwian israelita chudalla ulita alin,  
\v 52 me kwian israelita chudalla alin allabi, kaire Jesu be jogeda kwian chudalla na ulita alin kle toi bate nga nage kaire kaire, ene Jesu giti kwian e ulita be chege mneitre alin bai kaire Jesu gai ulia. 
\p  
\v 53 Kwian israelita chugagwalla ulita mo litu chuiage chugagwalla ulita mo ta gbu salengwli Jesu gweda. Chui ege gwangerugu chugagwalla ulita chagedu Jesu nate gadale gwaleda,  
\v 54 malen Jesu me chagedu dare kwian israelita ngleaske, Jesu jo siere nga Judeage, ama jo una kada Efraínge, una e chege kodi nga gballa kwian me kle toi ngwadige, una ege Jesu chegu toi chui gwealege kwian geru jwannga amage gdataboko giti gdaboke ole. 
\p  
\v 55 Kwian israelita ulita kle tachke Chube enusulian unsuialin jun siere Egiptoge giti, e kada Pascua chuia, Pascua chuia ollade chegu kodi gire kwian israelita ngle una soli gdaite gdaitemu jo una Jerusalénge, ngeru chui e olladege kwian e ta chegekalin trate Chube gwa giti, malen ama jo bda guge ama jo mo jegwale glige kwian israelita ulita diali kle age kare, ene amage suge ama chege trate Chube gwa giti ama kle biale chui olladadale. 
\p  
\v 56-57 Kwian fariseo ulita kaire kwian gerunga Chube ole daba alin chugagwalla ulita gerudu Jesu giti kwian israelita ngle ulita ole kle mo litaba u gerungwa Chube olege chui ollade manade ngwange, ama gerudu: 
\p —Ba gwealege chke uñale Jesu kle baini ba geru ketadale chage, ene cha ñage ama gai dbale skadi. 
\p Kwian israelita chugagwalla ulita gerudu ene kwian nglea kle mo litaba ole, malen kwian nglea e ulita kledu Jesu jinade nate ama ulita geru kadu moge Jesu giti: 
\p —¿Ba tañachuge mine? ¿Ama be chie aini chui ollade o me? 
\c 12  
\s1 María lle ñachke no tke Jesu sera giti 
\p  
\v 1 Pascua chuia ollade chegu chui dereke chkedale gire Jesu jo una Betaniage, una ege Lázaro toidu, Lázaro e amaña Jesu nu gbaba gwadeni.  
\v 2 Jesu jo chke una Betaniage gire bligda no jinadre Jesu alin. Lázaro kaire kwian geru jwannga Jesuge gdataboko giti gdaboke kledu toiba dba blingwage ule Jesu ole blire, Marta bligda dodadu ketu ama ulitage gutadale.  
\v 3 Kwian ulita kle blire gire María chiu lle ñachke no kada nardo chia dbe litro bonga tangle tkadale Jesu sera giti, nardo chia e kwangleare. María nardo chia e tku Jesu sera giti ulita, gire María Jesu sera unbatu mo chugaga giti. María nardo chia tku Jesu sera giti ene, gire u ulita gwa chegu ñachke no no nardo chia ñale.  
\v 4 Judas-Iscariote, e geru jwannga Jesuge, e amaña be Jesu kete gwadaleda, ama gwagedu Maríadi age ene, ama gerudu: 
\p  
\v 5 —¿Mineade me jo nardo chia e chbadaba kwangleare trescientos kwian bai gweale me lle molen chudaboagda nardo chia ñanalla giti? 
\p  
\v 6 Judas-Iscariote gerudu ene agwa ama me kle tañachuge ulia no kwian me lle molen giti, ama kle tañachuge igi gai mo alin giti, ama igi gdea mananga Jesu alin kaire kwian geru jwannga Jesuge ulita alin, agwa ama me igi gdea manadu no, igi gdea ege diali kwian igi tku, Judas-Iscariote kle igi e gweale jwen mo alin skwlenre Jesu ngeru kaire kwian geru jwannga na ulita ngeru, ama kwian skwe boanga.  
\v 7-8 Jesu gerudu Judas-Iscariote ole: 
\p —María kleda nardo chia tke cha giti nege, María kledu e oge cha alin cha jaba ogabe chuia alin, agwa ma no ama alin age ene nege cha kle gwade chuiage cha gbe biale cha jaba ogabe chuia ngwange. Kwian me lle molen be kle toi diali ba ulitaske, chui ngle kle ba ulita alin kwian me lle molen chudaboale, agwa cha mi chege toi diali aini baske, malen ma no María kle age ene cha alin nege —Jesu gerudu ene ulita Judas-Iscariote ole, Judas-Iscariote me gerudu dare. 
\p  
\v 9 Kwian israelita tanrege chku uñale Jesu kle una Betaniage, gire kwian e ulita jo una Betaniage tienda Jesudi, me Jesu alindi kwian israelita ulita jo tienda, agwa kwian israelita kaire jo tienda Lázarodi, Lázaro e amaña Jesu nu gbaba gwadeni.  
\v 10-11 Jesu Lázaro gbuni gwade giti kwian israelita tanre Jesu gau mo Chugagwallale, kwian israelita ene ulita jo siere mo chugagwalla israelitage, ama mo ta gbu chage Jesu ole, malen kwian gerunga Chube ole daba alin chugagwalla ulita mo ta gbu salengwli me Jesu alin gweda agwa kaire Lázaro gweda. 
\s1 Jesu joge chage burro soli giti una Jerusalénge 
\p  
\v 12 Boidu ene ulita una Betaniage gire nagbietege kwian ngle nga tanrege jogeba una Jerusalénge Pascua chuia ollade manade, ama ulitage geru chku uñale Jesu be joge chke una Jerusalénge.  
\v 13 Gire kwian ngle ulita ugananga tkunga, jo Jesu gai ngwange jonke ugananga gainga kote gbi kade Jesuge nga suga no ole, ama ulita ngautu Jesu ngwange nga suga no ole ene: 
\p —¡Nga suga no chadi ba giti! Noare ba chiu cha ulita Chugagwallale nga dba ai giti. Noare Chube ba kagu nga dba ai giti cha ulita alin, noare Chube be ba gbe cha kwian israelita ulita Chugagwallale kweri —kwian tanre ngautu ene jonkare Jesu gai ngwange no Jesu gai mo Chugagwallale kweri. 
\p  
\v 14 Jesuge burro soli nu skwenba, burro soli e giti Jesu chagedu una Jerusalén ngnagu Chube gerua degaba unsuialin gerule kare, chada e gerule: 
\q1  
\v 15 “Kwian una Siónmu (una amaña kada Jerusalén), ba ulita me mo ta dbadale kennga, gwagede mo Chugagwalla kweridi chie ba ulitaske burro soli giti.” 
\m Chube gerua degaba unsuialin gerule ene Jesu giti. 
\p  
\v 16 Kwian geru jwannga Jesuge gdataboko giti gdaboke chagedu Jesu ole, ulita kle boi Jesu ole chui ege ama gwa giti, e ulita me sugedu trate amage chui e amañage, agwa Jesu joni nga ngaña giti chuiage gire kwian geru jwannga Jesuge tachku boidu ulita Jesu ole Chube gerua degaba unsuialin Jesu giti gerule kare, ulita boidu ene ulia Jesu ole. 
\p  
\v 17 Kwian ulita bai kledu Jesu ole gwage Jesudi Jesu Lázaro kadu chie jondoi keugage Lázaro gbuni gwade gire, kwian e ulita gwagenga Jesudi age ene Lázaro ole, ama ulita geru e tragu kwian na ole,  
\v 18 ene chku uñale kwian na tanrege ulia Jesu lle daga ngwale no ene dodadu Chube kiralla giti, kwian geru e keruchugu Jesu Lázaro gbuni gwade giti, malen ama ulita mo ta gbu joge Jesu gai ngwange no nga suga no ole jonkare ule kwian na ulita ole.  
\v 19 Kwian fariseo ulita gwagedu kwian ngleadi ulita joge chage Jesu nate gire kwian fariseo gerudu modi: 
\p —Gwagede kwian ulitadi, kwian ulita kle joge ama nate ene che me ñage ama gai gwadaleda. 
\s1 Jesu gerule ama be jogeda chuia giti 
\p  
\v 20 Kwian ngle jogeba chke una Jerusalénge Pascua chuia ollade manade, kwian ngleaske kwian gweale griego kledu, kwian griego e kaire jogeba chke una Jerusalénge chui ollade gerule no Chube giti ule kwian israelita ole.  
\v 21 Felipe una Betsaidamu nga Galileage, Felipe edi kwian griego jo chke gerule Jesu giti: 
\p —Cha ta Jesu uñakalin, cha ta gerukalin ama ole. 
\p  
\v 22 Felipe geru e ketu Andrége gire ama gdabonate jo geru kete Jesuge, ama gerudu Jesu ole: 
\p —Kwian griego gweale ta ba uñakalin ta gerukalin ba ole. 
\p  
\v 23 Jesu gerudu Felipe, Andrés ole: 
\p —Chube nu cha kagaba nga dba ai giti kwian kare, cha be jogeda chuia kle kodi gire cha be jogeni nga ngaña giti cha Ñenua Chube kle ngwadi.  
\v 24 Cha gerule ulia ulia ba ole, trigo chudea gbaite me joge tkaba dbiske, chude e me tugeda, diali trigo chudea chege gbaitre alin. Agwa trigo chudea gbaite joge tkaba dbiske, trigogba giti tangle tugeda gire numachie tige gbachie ngle, chude na gbachie ma ngle chude nge gbaitre alinge. Be boi ene cha ole, cha be jogeda, cha jogeda giti kwian tanre be jrienda cha gerua gai ulia giti, kwian ene be toi diali chui tangle Chube ole.  
\v 25 Kwian bai tañachuge mo giti alin allabi toi no nga dba ai giti kwian ene mo manade no ama me tañachuge age Chube takalin kare giti, bdagli kwian ene be jogenga sugekare Chubege be chege boi daga ngwale tanre diali chui tangle. Agwa kwian bai mo ta gbe chage cha ole mo chuge ngwadi boi daga ngwale nga dba ai giti cha gerua gdale, ama me mo tallade, ama tañachuge ma no age Chube takalin kare, bdagli kwian ene be toi no diali chui tangle nga ngaña giti cha ole cha Ñenua Chube ole.  
\v 26 Kwian bai ta lle boakalin no cha alin, kwian ene mo ta gbadale diali chage cha ole age cha takalin kare, kwian ene mo ta gbadale biale boi daga ngwale cha boi daga ngwale kare. Kwian lle boi cha alin ta ene ole, kwian e alin cha Ñenua be age no no diali. 
\p  
\v 27 ’Nege nege cha kle ta olire tanre tañachuge cha be jogeda giti, chui e kle kodi cha ngeru. ¿Cha be gerule mine cha Ñenua ole cha kle ta suge olire e giti? Cha me ñage gerule ai kare cha Ñenua ole: “Cha Ñenua, cha me ta boikalin daga ngwale, cha me takalin ba kwian me no chuge ngwadi cha gweda, ma no ba cha jwen siere cha be boige.” Cha me ñage gerule ene cha Ñenua ole, cha chiu nga dba ai giti boidale daga ngwale kwian alin.  
\v 28 Ma no cha gerule cha Ñenua ole: “Cha Ñenua, cha takalin ba age mo kiralla giti cha ole ba takalin kare, ene ba be chege no kweri kwian ulita gwa giti, kwian be gerule no no ba giti cha Ñenua.” 
\p Jesu gerudu ene gire Chube gerudu nga ngaña giti sugedu nga dba ai giti, Chube gerudu Jesu ole: “Cha ba gbu age cha kiralla giti, kwian tanre gerudu no no cha giti ba agedu giti, cha be ba gbe age dare cha kiralla giti nabitaite, ene kwian be gerule no no cha giti dare.”  
\v 29 Chube gerudu ene Jesu ole gire kwian ngle kledu eni geru e keruchugu, Chube kerua sugedu kwian gweale ologe enusulindrale, kwian gweale na gerudu: 
\p —Lle boanga Chube alin nga ngaña giti gerudu Jesu ole. 
\p  
\v 30 Kwian ulita gerudu ene modi gire Jesu gerudu kwian ole: 
\p —Cha Ñenua Chube gerudu kweri ama me gerudu cha alin ene ama kerua sugedale chage, ama gerudu kweri ba ulita alin ene chke uñale ba ulitage ulia Chube cha Ñenua, ama cha kagu nga dba ai giti.  
\v 31 Chui kle kodi gire cha Ñenua be ji gbe kwian ulita alin bai me cha gai ulia Chube cha kagu, kwian ene be chege sugekare cha Ñenuage diali, cha be jogeda giti che dolla Satanás mi chege nga ulita chugagwallale dare.  
\v 32 Cha be kwian me no chuge ngwadi cha gbe kruge ngaña, cha be mo chuge ngwadi jogeda kwian ulita agenga me no alin, cha jogeda giti cha be kwian tanre nga ulitage ta gbe mo ta blite cha ole cha gai mo Chugagwallale. 
\p  
\v 33 Jesu gerudu ene kwian ulita ole, ene chke uñale kwiange Jesu gwabeda mine.  
\v 34 Kwian ulita Jesu keruchugu gerule ene gire kwian gerudu Jesu ole: 
\p —Ulia Chube ba kagu nga dba ai giti kwian kare ba gerudu kare, ¿mineade ba kle gerule ba gwabeda kruge? Moisés nu Chube gerua degaba unsuialin gerule Chube be Cristo kage Cristo be chege diali chui tangle mi jogeda. ¿Ba me Cristo, malen ba be jogeda? 
\p  
\v 35-36 Jesu gerudu: 
\p —Cha mi chege toi ba ole sbali dare nga dba ai giti, agwa nege cha kle aini ba ulitaske, nege chui kle ba ulita alin cha gai ulia. Cha kle chage nga dba ai giti jichra kare kwian ulitaske, kwian bai cha gai ulia cha kwian ene ta gbe suge cha giti ene ama me chege age me no salengwli jichra kwian gbe ten nga jereske kare ene ama chagedale mine jichra giti nga jereske. Kwian kle chage nga jereske ama me ten ama jogenga, ni uñale amage ama joge baini. Ene kaire ba bai me cha gai ulia, ba be chege chage sugekare Chubege nga jereske kare. Agwa ba cha gai ulia, ene ba be chage nga chra no ngajudi kare giti, ene ba mi jogenga Chubege ba mi chege sugekare Chubege. 
\p Jesu gerudu ene ulita mo giti kwian ole gire Jesu jo siere kwian ngle ulitage, kwian ngle ulitage me uñadu Jesu jo baini. 
\s1 Kwian israelita ulita me Jesu gai ulia Chube Kirollale 
\p  
\v 37 Lle daga ngwale no tanre Jesu dodadu kwian israelita ulita gwa giti, agwa ni lle e ulita giti kwian Jesu gau ulia Chube ama kagu.  
\v 38 Boidu ene ulita kwian Chube gerua ketanga dabage kada Isaías chada degu unsuialin gerule kare, Chube Isaías ta gbu chada dege be boi mine Jesu ole giti, chada e gerule: 
\q1 “Cha Chugagwalla Chube, cha geru ulia ba giti trage kwian ole, kwian me geru e gai ulia. 
\q1 Cha lle daga ngwale no tanre dodade kwian ulita gwa giti gire me suge kwiange cha kle lle e dodade ba kirallaske.” 
\p  
\v 39 Isaías chada degu ene, kaire Isaías chada na degu, chada e gerule kwian agali me ñage mo ta gbe Jesu gai ulia giti, chada e gerule: 
\q1  
\v 40 “Kwian gwage amadi, kwian ama keruchuge, agwa ulita me suge kwiange, kwian ta chege bate amage. 
\q1 Chube kwian ta gbu ene me suge salengwli kwian me gwagwa molen me ñage ten kare. 
\q1 Suge kwiange ama kle age giti ama kle gerule giti e me no, kwian age me no chuge ngwadi kwian mo ta gbe ama gai ulia, ene ama kwian ta blite ama uñe trate.” 
\m  
\v 41 Isaías chada degu ene Jesu giti, Isaías gwagedu mo gwagwa giti Jesu kiralladi, malen ama ñadu chada dege Jesu giti Jesu be boi bdagli giti. 
\p  
\v 42 Kwian israelita ulita me Jesu gau ulia, agwa gweale Jesu gau ulia mo tale. Kwian israelita chugagwalla tanre Jesu gau ulia agwa ama ulita mo ogoda me su mo trage ama Jesu gai ulia giti kwian na me Jesu gaba ole, ama chke uñale nate kwian fariseoge kwian fariseo ñage ama mlienga siere u mo litangwa Chube gerua jwanngwage.  
\v 43 Kwian ene tañachugu ma no ama chege no mo salengwli ole me tañachuge chege no Chube ole giti. 
\p  
\v 44 Jesu gerudu kweri kwian ole: 
\p —Kwian cha gai ulia me kle cha alin gai ulia gballa, kaire kle cha Ñenua gai ulia, ama cha kagu nga dba ai giti.  
\v 45 Kwian kle gwage chadi me kle gwage chadi alin, kaire kwian kle gwage cha kagangadige cha giti.  
\v 46 Cha jichra kare kwian ulita alin chiu nga dba ai giti, cha giti kwian ñage Chube uñe trate, kwian ulita bai kaire cha gai ulia cha kwian ene ta gbe suge Chube mine, ene ama me chege nga jereske kare sugekare Chubege.  
\v 47 Agwa kwian gweale cha keruchuge me cha kerua gai ulia me cha gerua gai dage, cha mi kwian ene gbe jiske, cha me chiu nga dba ai giti kwian gbadale jiske ama kle age me no giti gdale, cha chiu kwian alin kwian jwen siere ji chugege ama kle age me no gdale.  
\v 48 Kwian me takalin cha gai me cha gerua gakalin ngwange me cha gerua gbe gdadi cha kle gerule kare, cha agali mi kwian ene gbe jiske, agwa geru cha kle kete kwiange nege, geru e be kwian gbe jiske chui bdaglige.  
\v 49 Cha me kle gerule mo ta giti gballa agali, cha Ñenua cha kagu nga dba ai giti, ama cha ta gbu gerule ama takalin kare, ama talla giti cha kle kwian tke tangle ulita ama geruage.  
\v 50 Uñale chage cha Ñenua gerua gai ulia giti kwian ñage toi diali chui tangle cha ole cha Ñenua Chube ole, malen diali cha mo Ñenua gerua trage kwian ole cha Ñenua cha kagu kare gerule kwian ole —Jesu gerudu ene ulita kwian ole. 
\c 13  
\s1 Jesu kwian geru jwannga amage ulita sera glige 
\p  
\v 1-3 Chui ngeru Pascua ollade chuiage, chui ege ngabi Jesu kle blire ule kwian geru jwannga amage gdataboko giti gdaboke ole, kwian geru jwannga e gdaite kada Judas-Iscariote, ama Simón-Iscariote kirolla, che dolla Satanás nu Judas-Iscariote ta gbaba biale Jesu kete kwian Jesu dollalege gwadaleda. Uñadu Jesuge ama Ñenua Chube lle ulita kwian ulita gbu ama kote, ama chiu Chube ngwadi be jogeni naskuni Chube ngwadi. Jesuge uñadu Jesu mi chege dare nga dba ai giti kwianske chuia chku, ama be jogeni nga ngaña giti toi ama Ñenua ole, Jesu chagedu nga dba ai giti kwian amanu ole Jesu diali ta du no no ama ulita ole, Jesu mi kle dare kwian amanu ole nga dba ai giti, agwa Jesu talla be chege no no kwian ene ulita ole diali chui tangle. 
\p  
\v 4 Jesu kledu blingwage ama chku gdate, Jesu mo ñometralla gitiru junnga modi chegu ñometra mo ngnaru alinske, gire toalla gau bliu mo bonga tangle.  
\v 5 Ama chi tku lle gwealege gbu kwian geru jwannga sera ngena sera gligadale gire ama kwian geru jwannga gdaite gdaite sera gligu sera unbatu toalla bliabale mo bonga tangle giti.  
\v 6 Ama jo chke Simón-Pedrodi Simón-Pedro sera gligadale gire Simón-Pedro gerudu ama ole: 
\p —Ba cha Chugagwalla, ¿ba be cha sera glige? Cha alin me no ba cha sera glige. 
\p  
\v 7 Jesu gerudu Simón-Pedro ole: 
\p —Cha kle age ba alin, nege ulita me suge bage, bigwa be suge bage mineade cha ba sera gligu, nege ba mo chuge ngwadi cháge mo sera glige. 
\p  
\v 8 Pedro gerudu Jesu ole: 
\p —Cha mi mo sera chuge ngwadi gligale bage. 
\p Jesu gerudu: 
\p —Ba mi mo sera chuge ngwadi gligale chage ba me chanu ba be chege sugekare chage. 
\p  
\v 9 Simón-Pedro gerudu: 
\p —Cha Chugagwalla, ba me cha sera alin glige allabi, cha takalin ba cha ko glige kaire cha chuga glige. 
\p  
\v 10 Simón-Pedro gerudu ene Jesu ole gire Jesu gerudu Simón-Pedro ole: 
\p —Kwian bai obeba sugeti me mo gligadale blike nabitaite ulita, agwa sera alin gligale, jegwale ulita kle trate. Ba ulita ta kle trate biale salengwli kwian obeba sugeti kare, agwa ba gdaite ta me kle trate. 
\p  
\v 11 Uñadu Jesuge chema be ama kete gwadaleda, malen ama gerudu: “Ba gdaite ta me kle trate.” 
\p  
\v 12 Jesu kwian geru jwannga ulita sera gligu ulita gire Jesu mo ñometralla gitiru gbuni naskuni modi, Jesu toiduni dba blingwage, Jesu gerudu: 
\p —¿Suge ba ulitage mineade cha ba sera gligu?  
\v 13 Ba ulita kle cha kade ba tkanga tangle geruge, kaire ba kle cha kade ba chugagwalla, e ulia, cha ba chugagwalla cha ba tkanga tangle ba kle cha kade kare.  
\v 14 Cha ba tkanga tangle geruge, cha ba chugagwalla, cha ba ulita sera gligu agali, ene kaire ba ulita daba sera gligadale, ba daba na sera gligadale daba na ba sera gligadale, ene ulita. Ba ulita me ñage mo gbe ma kweri daba nage, ba ulita mo ta gbadale diali mo chudaboi ongoru ongoru.  
\v 15 Cha ba chugagwalla, cha mo ta gbu ba ulita chudaboi cha ba ulita sera gligu, ba ulita mo ta gbadale no ene kaire, ba ulita agedale cha agedu kare ba ole.  
\v 16 Cha gerule ulia ulia ba ulita ole, kwian lle boanga me ma kweri mo chugagwallage, kwian geru dbanga me ma kweri mo kagangage.  
\v 17 Uñale ba ulitage cha ba chugagwalla agedu mine ba gwa giti, ba agedale ene kaire, ba age ene cha agedu kare nga be suga no no badi diali. 
\s1 Jesu gerule Judas-Iscariote be ama kete gwaleda 
\p  
\v 18 Jesu gerudu dare kwian geru jwannga amage ulita ole: 
\p —Cha me kle gerule ba ulita be mo ta gbe age no cha agedu kare, me ene, uñale chage ba ulita mi age no cha agedu kare. Cha ba ulita gau chage cha ole, cha ba ulita ta uñe trate, uñale chage ba gdaite kle mo ta dbe cha dollale, be boi Chube gerua degaba unsuialin gerule kare cha giti, chada e gerule: 
\q1 “Cha skatemanalla gdaite blire ule cha ole, amaña mo blite cha dollale.” 
\m  
\v 19 Cha kle geru ai kete ba ulitage ngeru be boige, ene be boi cha ole chuia be chke gire be suge bage kle boi ulita cha gerudu kare, e giti ba ulita be cha gai ulia ma no dare cha Cristo cha Chube Kirolla.  
\v 20 Cha kwian chanu kage cha gerua dbe kwian nage, kwian na bai kwian chanu gai ngwange no, kwian ene me kle kwian chanu alin allabi gai ngwange no, kaire ama kle cha gai ngwange no agali kare kwian chanu giti. Kwian bai cha gai ngwange no kwian ene me kle cha alin allabi gai ngwange no, kaire ama kle cha kaganga gai ngwange no agali kare cha giti. 
\p  
\v 21 Jesu gerudu ene ulita gire Jesu ta chegu ta olire tanre Judas-Iscariote giti, Jesu gerudu trate geru jwannga amage gdataboko giti gdaboke ole: 
\p —Cha gerule ulia ulia ba ulita ole, ba ulita kle aini ule cha ole gdaite be cha kete kwian cha dollalege gwaleda. 
\p  
\v 22 Jesu gerudu ene gire kwian geru jwannga gdataboko giti gdaboke ulita chegu gwage modige, ulita gerudu modige: 
\p —¿Chema be age me no ene Jesu ole? 
\p Me uñadu ama ulitage chema giti Jesu kle gerule.  
\v 23 Kwian geru jwannga Jesuge ulita kle toiba dba blingwage blire ule Jesu ole, kwian geru jwannga gdaite kle Jesu ngena blire geru trage Jesu ole, Jesu no no ama ole,  
\v 24 kwian geru jwannga ege Simón-Pedro ko ñachugu, Simón-Pedro takalin geru jwannga gdaite e geru kade Jesuge chema giti Jesu kle gerule be age Jesu gerudu kare.  
\v 25 Gire kwian geru jwannga kle Jesu ngena jo ma Jesudige geru kadadale Jesuge, ama gerudu Jesu ole: 
\p —Cha Chugagwalla, ba gerule cha ole, ¿chema be age ba ole ba kle gerule kare? 
\p  
\v 26 Jesu jaindunga: 
\p —Cha be pan bita gbe date bligda chiaske, kwian gdaite baige cha be pan bita e kete ama be gai ngwange be gute, kwian e be cha kete gwaleda. 
\p Jesu gerudu ene gire ama pan bita gbu date bligda chiaske ketu Judas-Iscariotege, ama Simón-Iscariote kirolla.  
\v 27 Judas-Iscariote pan bita gau ngwange pan bita gutu gire blike dolla Satanás talla chku Judas-Iscariote tale age ulita Satanás takalin kare. Jesu gerudu Judas-Iscariote ole: 
\p —Ba mo ta gbaba age cha ole, agede ene blike. 
\p  
\v 28 Jesu gerudu ene Judas-Iscariote ole gire kwian geru jwannga na ulita kledu blingwage amage me sugedu mineade Jesu kle gerule ene Judas-Iscariote ole.  
\v 29 Uñadu kwian geru jwannga ulitage Judas-Iscariote ama igi gdea mananga, malen ama gweale tañachugu Jesu kle gerule Judas-Iscariote ole lle gweale gige chui ollade chuia alin gutadale, na tañachugu Jesu kle gerule Judas-Iscariote ole lle gweale gige ketadale kwian bai me igi molenge.  
\v 30 Judas-Iscariote pan bita gau ngwange pan bita gutu ene, gire blike Judas-Iscariote jo siere Jesuge, ngabi ngajrege ama jo siere Jesuge. 
\s1 Jesu gerule Pedro be gerule ama me Jesu uñe 
\p  
\v 31-32 Judas-Iscariote jo siere Jesuge ene, gire Jesu gerudu kwian geru jwannga na ulita cheguda eni ole: 
\p —Cha Chube Kirolla chiu nga dba ai giti kwian kare, nege chui chku gire kwian be gwage cha kiralladi, kaire cha giti kwian be gwage Chube kiralladi be gerule no Chube giti, Chube kira be kle cha ole, ene kwian be gwage chadi be gerule no cha giti kaire, be boi ene sugeti.  
\v 33 Ba ulita kwian chanu, cha no no ba ole, nege cha mi chege dare ba ole nga dba ai giti, cha gerudu kwian israelita ole kare cha be joge ngwadi kwian israelita me ñage joge, nege kaire cha gerule ba ulita ole ba be cha jinade nate, bage cha mi skwen, cha be joge ngwadi ba me ñage joge nege.  
\v 34 Cha be geru ai jagere kete ba ulitage, ba geru ai gbe gdadi: Ba ulita mo ta dbadale no modi cha ta dbe no ba ulita ole kare, ulia ba mo ta dbadale ulita no modi daba ole.  
\v 35 Ba mo ta dbe no ene ulita modi, kwian na gwage badi age no be chke uñale nate ulia ba kwian chanu ba kwian geru jwannga chage. 
\p  
\v 36 Jesu gerudu ene ulita kwian geru jwannga amage ulita ole gire Simón-Pedro geru kadu Jesuge: 
\p —Cha Chugagwalla, ba kle gerule ba be joge ngwadi cha ulita me ñage joge, ¿ba be joge baini? 
\p Jesu jaindunga Pedro kalen: 
\p —Cha be joge ngwadi, nege nege ba mi ñage joge cha ole, chui na ba be ñage joge cha be joge ngwadi. 
\p  
\v 37 Pedro gerudu dare Jesu ole: 
\p —Cha Chugagwalla, ¿mineade ba gerule cha ole cha me ñage joge ba ole nege? Cha kle biale joge ule ba ole baini kaire ba be joge ngwadi, kaire cha tale cha kle mo ta gbaba biale jogeda ba giti. 
\p  
\v 38 Jesu gerudu Pedro ole: 
\p —¿Ba tañachuge ba ñage jogeda cha giti ulia ba kle gerule kare? Uñale chage trate ba mi ñage age ene ba kle gerule kare, nege ngakamalin bdugu antalan bebi ngwane gire ba agali be gerule bitamai kwian na ole ba me cha uñe. 
\c 14  
\s1 Jesu gerule: “Cha alin giti kwian ñage 
\s1 joge chke cha Ñenua ngwadi” 
\p  
\v 1 Jesu gerudu ene Pedro ole gire Jesu gerudu dare kwian geru jwannga gdataboko giti gdaite ole: 
\p —Ba ulita me chegedale tañachuge tanre be boi giti, ba me ta dbadale kennga, ba me ta dbadale olire, ba mo ta gbadale Chube gai ma no, kaire ba mo ta gbadale cha gai ma no diali.  
\v 2-3 Nga ngaña giti cha Ñenua ngwadi nga tanre kle toingwa, cha be jogeni nga e gbe biale ulita ba ulita alin ba ngwange, nga e me cha me gerule ba ole cha jogeni nga e gbe biale ba ulita alin. Cha kle gerule ulia ba ulita ole, nga e be kle biale ulita gire cha be chieni ba ulita jwen dbe ule toi cha be kle ngwadi ule cha ole.  
\v 4 Uñale ba ulitage cha be joge baini, kaire uñale ba ulitage ba ñage joge mine cha be joge ngwadi. 
\p  
\v 5 Jesu gerudu ene kwian geru jwannga ulita ole gire Tomás gerudu Jesu ole: 
\p —Cha Chugagwalla, me uñale ni cha gdaitege ba be joge baini, ¿mine be chke uñale cha ulitage ba be joge jon mine giti ene cha ulita ñage joge chke kaire ba be kle ngwadi? 
\p  
\v 6 Jesu jaindunga: 
\p —Cha agali jonkare kwian ulita alin, cha giti alin allabi kwian ñage joge chke cha Ñenua ngwadi, cha giti geru ulia cha Ñenua giti chke uñale kwiange, kaire cha giti kwian ñage toi diali chui tangle cha Ñenua ole.  
\v 7 Sugedu trate ba ulitage cha chema ulia, ene ba cha Ñenua uñe kaire, nege gwangergu cha be boi giti ba ulita gwage ba be cha Ñenua uñe ulia, ba kle gwage amadi cha giti. 
\p  
\v 8 Felipe gerudu Jesu ole: 
\p —Cha Chugagwalla, ba mo Ñenua kaite cha ulitage, cha ulita ta gwagekalin amadi, cha ulita be gwage ba Ñenuadi gire be suge ulia ulia cha ulitage ba alin allabi giti cha ñage joge chke ba Ñenua ngwadi. 
\p  
\v 9 Jesu gerudu Felipe ole: 
\p —Felipe, sbali cha kle chage ba ole cha kle ba ulitaske, ¿gire ba bebi cha uñe ulia cha chema? Kwian bai kle gwage chadi me kle gwage chadi alin, kle gwage cha Ñenuadi kaire. ¿Mineade ba kle geru kade cha mo Ñenua kaitadale bage?  
\v 10 ¿Ba me cha gai ulia cha kle cha Ñenua ole cha Ñenua kle cha ole, cha gdabonate gdaitre alin? Ulita cha kle gerule ba ole cha me kle gerule gballa mo tale, cha Ñenua kle cha ole diali, ama kle cha ta gbe gerule kle cha ta gbe age ulita ama takalin kare.  
\v 11 Ba me cha gai ulia cha kle gerule kare ba ole gire ba ulita cha gadale ulia cha lle daga ngwale no dodadu giti, cha lle daga ngwale no tanre dodadu cha Ñenua Chube kiralla giti ba ulita gwa giti, e giti ba ulita cha gadale ulia, sugedale trate ulia ba ulitage cha kle cha Ñenua ole cha Ñenua kle cha ole, cha gdabonate gdaitre alin.  
\v 12 Cha gerule ulia ulia ba ulita ole, kwian ulita bai kaire cha gai ulia cha kle gerule kare be lle daga ngwale no dodade cha Ñenua kiralla giti kwian gwa giti cha kle age kare. Cha be jogeni cha Ñenua ngwadi gire kwian ene be chege kwian na tanre ta gbe cha gai Chube Kirollale.  
\v 13 Lle ulita bai kaire ba ulita kade cha Ñenuage cha giti, cha be age ba alin ba gerule kare cha ole, ene cha giti kwian be gwage cha Ñenua Chube kiralladi, be gerule no cha Ñenua giti.  
\v 14 Ba lle bai kaire kade cha Ñenuage cha giti, cha be age no ba alin ba lle kade kare cha giti cha Ñenuage. 
\s1 Jesu gerule Chube be mo Oña kage 
\s1 kwian chudaboangale 
\p  
\v 15 Jesu gerudu dare kwian geru jwannga amage ulita ole: 
\p —Ba no cha ole ulia ene ba be cha gerua gbe gdadi ba be age ulita cha gerule kare.  
\v 16 Ba age ene gire cha be Chudaboanga na kade cha Ñenuage kagadale ba ulita alin cha tanege, gire cha Ñenua Chube be mo Oña kage, Chube Oña diali no, ama be kle diali ba ulita ole ba chudaboi,  
\v 17 ama giti geru ulia Chube giti be suge trate bage. Kwian me Chubenu mi ñage Chube Oña gai ngwange mo tale, me suge amage Chube Oña mine, kwian ene me Chubenu. Ba ulita Chubenu, Chube Oña be kle ba ulita tale be ba ulita ta gbe diali.  
\v 18 Cha mi ba jige gballa kwian oli kare, cha be chieni cha be kleni ba ulita ole.  
\v 19 Chui chege kodi cha ngeru kwian me chanu mi ñage gwage chadi dare nga dba ai giti, agwa ba ulita chanu, bage be suge mo tale cha kle ba ole, cha toi diali chui tangle, kaire cha giti ba be toi diali chui tangle.  
\v 20 Cha Ñenua be mo Oña kage ba alin chuiallage, chui ege be suge trate ba ulitage cha kle cha Ñenua ole, ba ulita kle cha ole, cha kle ba ulita ole.  
\v 21 Kwian bai kaire age ulita cha gerule kare cha gerua gai dage, kwian ene ulia no cha ole, kwian no cha ole cha Ñenua be no kwian ene ole, kaire cha be no kwian ene ole, cha be kwian ene ta gbe suge cha kle ama ole. 
\p  
\v 22 Jesu gerudu ene gire Judas geru kadu Jesuge (Judas e me Judas-Iscariote), Judas geru kadu: 
\p —Cha Chugagwalla, ¿mineade ba be cha ulita banu alin ta gbe suge ba kle cha ole, agwa kwian na me banu ba mi ama ta gbe? 
\p  
\v 23 Jesu jaindunga: 
\p —Kwian bai kaire no cha ole be cha gerua gbe gdadi be age ulita cha gerule kare, cha Ñenua be no kwian ene ole, cha Ñenua ule cha ole be chieni toi kwian ene tale diali.  
\v 24 Agwa kwian bai kaire me no cha ole, kwian ene me cha gerua gbe gdadi me age cha gerule kare, mi suge kwian enege cha Ñenua takalin age no ama alin. Ba ulita kle cha keruchuge gerule cha me kle gerule gballa mo ta giti, cha Ñenua cha kagu nga dba ai giti, ama kle cha gbe gerule.  
\v 25 Cha kle gerule ene ulita ba ulita chanu ole nege cha kle aini ba ulita ole ule gire, cha bebi jogeni cha Ñenua ngwadi.  
\v 26 Cha be jogeni cha Ñenua ngwadi gire cha Ñenua be mo Oña ba Chudaboanga kage cha giti ba ulita alin, ama be ba tke tangle ulita be ba ta gbe tachke ulita cha gerudu giti ba ole.  
\v 27 Cha be jogeni cha Ñenua ngwadi gire cha be ba ulita ta jige suga no, cha ba ta gbe suga no me salengwli kwian kle ta dbe suga no sugeti alin lle gweale giti, cha ta suga no kete, e chege diali ba tale. Malen ba me chegedale tañachuge tanre be boi giti, ba me ta dbadale olire, ba me ta dbadale kennga.  
\v 28 Ba ulita cha keruchugu gerule cha be jogeni cha Ñenua ngwadi, bigwa cha be chieni cha be kleni ba ulita ole. Cha Ñenua ma kweri chage, noare cha be jogeni ama ngwadi, ulia ba no cha ole ene ba ta dbadale suga no cha be jogeni cha Ñenua ngwadi giti.  
\v 29 Cha gerule ene ba ole ngeru bebi boi cha kle gerule kare, be boi ene cha kle gerule kare gire be suge bage kle boi ulita cha gerudu kare, e giti ba ulita be cha gai ulia ma no dare.  
\v 30 Cha me ñage chege gerule tanre dare ba ulita ole, kwian me chanu ulita chugagwalla Satanás kle kwian amanu ta gbe biale chie age me no cha ole. Satanás me ma kweri chage, cha me mo chuge ngwadi amage ama me ñage age cha ole,  
\v 31 agwa cha be ama chuge ngwadi age cha ole, ene kwian ulita me chanuge be chke uñale ulia cha no cha Ñenua ole cha kle age cha Ñenua takalin kare. ¡Chkede gdate ulita, che jogedale siere aini! 
\c 15  
\s1 Jesu gerule: “Cha uva gira kare” 
\p  
\v 1 Jesu gerudu dare ngmadi kwian geru jwannga amage gdataboko giti gdaite ole: 
\p —Cha giskagba kada uva gira no no kare, cha Ñenua uva ngama gbanga kare,  
\v 2 kwian ulita chanu uva girananga kare. Uvananga me gbachie no uva ngama gbanga be uvananga tkenga be mlienga, agwa uvananga gbachie no uva ngama gbanga be uvananga litenga trate, ene uvananga gbachie ma ngle.  
\v 3 Ba ulita uvananga gbachie no kare, cha gerudu ba ulita ole, ba cha gerua gau ulia, malen cha Ñenua ba ta litu, ba ta chegu trate.  
\v 4 Ba mo ta gbadale diali chege cha gai ulia, ba ta chegedale ule cha ole cha ta ba ole kare. Uvananga sugekare uva girage me ñage gbachie, ene kaire ba ulita ta chege sugekare chage ba ulita agali me ñage age no cha Ñenua takalin kare.  
\v 5 Cha uva gira kare, ba ulita uvananga kare. Ba mo ta gbe cha gai ulia diali, ba ta chege ule cha ole diali cha ta ba ole kare, ene ba be age tanre no cha Ñenua takalin kare. Ba ta chege sugekare chage ba me ñage age sidri no.  
\v 6 Bai kaire me ta chege ule cha ole, kwian ene be chege sugekare cháge ji chuge, ama me no me ñage age no salengwli uvananga chege sugekare girage me ñage gbachie kare, uvananga ene lita ole ama mlianga sugekare uva girage, uvananga be junbate gire uvananga draba guga.  
\v 7 Ba ulita ta chege diali ule cha ole, kaire ba ulita mo ta gbe diali age ulita trate cha ba tku tangle kare, ene ba lle gweale kade cha Ñenuage cha Ñenua be age ba alin.  
\v 8 Ba ulita age tanre no cha Ñenua takalin kare gire kwian na gwage badi age no ene be gerule no no cha Ñenua giti, be suge kwiange ba ulia chanu.  
\v 9 Cha no ba ulita ole cha Ñenua no cha ole kare, sugedale bage cha no ba ole, ba ulita me ta jogedalenga ege.  
\v 10 Ba cha gerua gai dage age cha gerua gerule kare, ene be suge trate bage cha no ba ole diali cha Ñenua no cha ole kare, cha kle ama gai dage, cha kle age ama takalin kare, suge chage ulia ama no cha ole diali. 
\p  
\v 11 ’Cha kle gerule giti ba ulita ole, e giti cha takalin nga suga no chege ba tale, ene diali ba ulita be chege nga suga no no ole.  
\v 12 Cha geru ai gbu ba alin: Ba ulita mo ta dbadale no modi cha ta dbe no ba ulita ole kare.  
\v 13 Kwian no no ulia mo skatemanalla ole, ama me takalin skatemanalla jogeda, ama mo chuge ngwadi jogeda agali mo skatemanalla giti. Mo ta gbe age ene mo skatemanalla giti e ulia ta dbe no no mo skatemanalla ole, agwa kwian me ñage mo ta dbe age ma no ege mo skatemanalla alin.  
\v 14 Ba ulita mo ta gbadale age ulita diali cha gerule kare, ene ulia ba cha skatemanalla.  
\v 15 Cha me ba kade dare lle boanga alin cha alin, me uñale lle boangage ama mauña kle tañachuge mine be llema boi, cha ba ulita kade cha skatemanalla, cha Ñenua geru ketu chage, cha geru e ulita tragu ba ulita ole.  
\v 16 Cha ba ulita gau mau alin, ba ulita me mo ta gbu cha gai mau alin, cha ba ulita gau gbu cha Ñenua gerua dbe kwian nage age tanre no cha Ñenua takalin kare, ene ba giti kwian tanre be cha Ñenua uñe, cha Ñenua gerua be chege diali kwian tale. Ene cha Ñenua be age no ba ulita alin, ba ulita lle bai kaire kade ba takalin kare cha Ñenuage cha giti ama be age ba alin.  
\v 17 Cha takalin ba age diali ai kare: Ba ulita mo ta dbadale no modi diali. 
\s1 Jesu gerule geru jwannga ole: “Kwian jainchku chadi, ene kaire badi kwian be jainchke” 
\p  
\v 18 Jesu gerudu dare kwian geru jwannga amage ulita ole: 
\p —Kwian me chanu be jainchke tanre ba ulitadi, ba tachkedale cha giti, kwian jainchku chadi ngeru.  
\v 19 Ba ulita chanu age kwian me chanu kle age kare ene kwian ulita me chanu be no ba ole, ba age salengwli ama kle age kare. Agwa cha ba gau kwian ulitaske mau alin, malen kwian me chanu me no ba ole, kwian ene me chanu ulita be jainchke badi, kwian ene gwage ba me kle age ama kle age kare.  
\v 20 Ba ulita tachkedale cha gerudu kare ba ole: “Lle boanga me ma kweri mo chugagwallage.” Cha ba Chugagwalla, cha kledu toi kwianske kwian mo ta gbu age me no tanre cha ole, ene kaire kwian be mo ta gbe age me no tanre ba ole, kwian be chage ba nate age me no ba dollale. Kwian bai cha keruchugu cha gerua gbu gdadi mo alin, kwian ene kaire be ba kerua gbe gdadi cha giti.  
\v 21 Ba ulita chanu, malen kwian ulita me chanu be chage ba nate age me no ba dollale, ama me cha kaganga uñe, malen ama be age me no ba ole.  
\v 22 Cha me chieba aini nga dba ai giti gerule cha Ñenua giti kwian ole, ene kwian me jiske, geru me uñale amage. Agwa cha chiu, cha gerudu ama ulita ole, ama me cha gerua gakalin, malen ama chege jiske ama age me no giti.  
\v 23 Kwian jainchke chadi, kaire kwian jainchke cha Ñenuadi.  
\v 24 Cha me nu lle daga ngwale no tanre dodaba ama ulita gwa giti, ene ama me jiske, me uñale amage. Agwa cha lle daga ngwale no tanre dodadu ama ulita gwa giti, kwian na me ñadu age cha agedu kare ama gwa giti, e giti sugedale amage cha chema, ama cha gadale ulia, agwa ama ulita me cha gai ulia, ama diali chege ta jainchke chadi kaire cha Ñenuadi, e giti kwian ulita chege jiske kweri cha Ñenua Chube gwa giti.  
\v 25 Boidale ene ulita Chube gerua jo degaba unsuialin cha giti gerule kare ama ulita alin, chada e gerule: 
\q1 “Cha me jiske, agwa kwian jainchke chadi ngwale mo tale.” 
\p  
\v 26-27 ’Cha be jogeni cha Ñenua ngwadi gire cha be Chudaboanga kage ba ulita alin, e Chube Oña, Chube Oña diali no, ama gerule ulia diali, ama be gerule ba ulita tale cha giti diali, be ba ta gbe geru cha giti trage kwian na ole kaire. Gwangea cha chagedu kwian tke tangle cha Ñenua giti ba ulita chagedu ule cha ole, ba me cha chugu ngwadi chage gballa, nege che kle chage kaire ule, uñale bage cha agedu mine ulita ba gwa giti, e giti ba ñage gerule, Chube Oña be ba ulita ta gbe chke gerule kwian na ole cha gerudu ba ulita ole giti. 
\c 16  
\p  
\v 1 Jesu gerudu dare: 
\m —Cha gerule ene ulita ba ole ba ta gbagda, ene ba boi daga ngwale cha giti ba mi joge siere cha geruage, ba be cha gai ulia diali.  
\v 2 Kwian ba dollale be ba mlienga siere u mo litangwa Chube gerua jwanngwage, kaire chui be chke gire kwian be ba gweda cha gerua dbe gdale, kwian ba gweda ene tañachuge ama kle age no Chube alin.  
\v 3 Kwian be age ene cha kle gerule kare, kwian ene me cha uñe, kaire kwian ni cha Ñenua uñe, malen ama mo ta gbe age me no ba dollale cha gerua giti.  
\v 4 Nege cha kle gerule ba ole be boi giti ulita, chui be chke be boi ene cha kle gerule kare gire ba tachkedale cha gerudu giti ulita ngeru ba ole be boi giti. 
\s1 Jesu gerule Chube Oña be kwian ta gbe tañachuge trate 
\p Jesu gerudu dare: 
\p —Ngeru cha kledu chage ba ulita ole, cha chegu baske, malen cha me gerudu ai kare ba ole.  
\v 5 Agwa nege cha jogedaleni toi cha kaganga ngwadi, cha mi kle baske dare, malen cha kle gerule ai kare ba ole. Ni ba gdaite kle geru kade chage cha be jogeni baini,  
\v 6 ba ulita kle tañachuge tanre alin ta olire ole cha gerudu giti.  
\v 7 Cha gerule ulia ba ulita ole, ma no ba alin cha jogedaleni cha chiu ngwadi. Cha mi jogeni, ene Chube Oña mi chie ba ulita alin ba Chudaboangale, ene ama mi kle ba ole, agwa cha jogeni, ene ama be chie, cha be ama kage ba ulita alin.  
\v 8 Chube Oña be chke, gire ama be kwian me chanu ta gbe suge trate kwian ene kle age me no giti, Chube Oña be kwian ene ta gbe suge chagé no trate Chube takalin kare cha chagedu no trate kwianske kare, kaire Chube Oña be kwian ene ta gbe suge Chube ji gbe kwian agenga me no ulita alin.  
\v 9 Chube Oña be kwian ta gbe suge moge kwian agenga me no malen kwian me mo ta gbe cha gai ulia Chube Kirollale.  
\v 10 Chube Oña giti be suge kwiange cha chagedu no trate ulita kwianske, cha be jogeni cha Ñenua ngwadi, ba ulita mi gwage dare chadi, cha be jogeni gire Chube Oña be chke be kwian ta gbe suge kwian kaire ñage chage no trate Chube kiralla giti cha chagedu kare.  
\v 11 Chube Oña be kwian ta gbe suge che dolla Satanás be ji chuge tirare bdagli, Satanás kwian ulita me chanu chugagwalla, Satanás jiske kweri cha Ñenua gwa giti, cha Ñenua be ji gbe kweri ama alin, ene kaire cha Ñenua be ji gbe kwian ulita me chanu alin.  
\v 12 Geru na tanre kle cha tale tragadale ba ulita ole, agwa cha mi geru e kete bage, e ulita mi suge bage nege.  
\v 13 Agwa Chube Oña be chie be chke ba tale, ama gerule ulia diali, ama be ba ta gbe ulita geru uliage, ene geru ulia ulita suge trate bage, ama mi gerule ba tale mo ta giti gballa, ama cha Ñenua keruchuge gire ama gerule ulita cha Ñenua gerule kare, ama be ba tke tangle ulita be boi giti.  
\v 14-15 Chube Oña cha Ñenua gerua keruchuge, ene kaire Chube Oña geru e amaña keruchuge chage, cha Ñenua geru ulia mauña, ene kaire cha geru ulia mauña. Chube Oña be gerule no no cha giti ba tale, ama geru ulia cha giti uñe trate, ama be ba ta gbe suge, ene geru ulita cha giti be chke uñale ba ulitage.  
\v 16 Nege cha mi chege sbali ba ulitaske gire ba mi gwage dare chadi. Chui gweale be joge tangle gire ba be gwageni chadi nakwaite. 
\p  
\v 17 Jesu gerudu ene gire kwian geru jwannga Jesuge gweale geru kadu modi: 
\p —¿Ama kle gerule mine che ole? Ama kle gerule ama mi chege dare che ulitaske che mi gwage amadi dare gire chui gweale be joge tangle che be gwageni amadi. Ama kle gerule ama be jogeni ama Ñenua ngwadi, ¿mineade ama kle gerule be meni nakwaite chege?  
\v 18 Me suge chege mineade ama kle gerule chui gweale be joge tangle gire che be gwageni amadi. ¿E kle gerule mine? Me suge chege. 
\p  
\v 19 Kwian geru jwannga gerudu ene modi, Jesuge sugedu kwian geru jwannga ta geru kadakalin Jesuge, Jesu gerudu kwian geru jwannga ole: 
\p —Cha gerudu ba ole cha mi chege sbali ba ulitaske gire ba mi gwage dare chadi, chui gweale be joge tangle gire ba be gwageni chadi nakwaite. ¿Ba ulita ta geru kadakalin chage e giti?  
\v 20 Cha gerule ulia ulia ba ulita ole, ba ulita chanu be kle olire be chege ta olire tanre cha nate gire kwian me chanu ulitadi nga be chege suga no, agwa ba ulita be chege ta olire tanre cha nate bigwa ba ta olire be jwlite nga suga no no ole.  
\v 21 Muinga be kirogwa molen, oga chuia chke muingage gire muinga skibachie tanre mi kle nga suga no ole, kirogwa soli chke muinga kote gire nga suga no muingadi kirogwa jagere giti, muinga ta jogengwa ulita ama ogadu giti kirogwa suiale.  
\v 22 Ene kaire ba ulita mi kle nga suga no ole be kle ta olire tanre cha nate, cha be chieni gire ba be gwageni chadi cha be kleni ba ole, ba tale be nga suga no tanre molen, nga suga no ba ulita tale cha giti kwian na me ñage e jwennga, nga suga no e be chege ba tale diali.  
\v 23 Cha be jogeni cha Ñenua ngwadi, chui ege gire ba mi geru kade chage dare. Cha gerule ulia ba ole, ba ña gerule cha Ñenua ole agali, cha giti ba lle kade cha Ñenuage ama be age ba alin.  
\v 24 Sbali ba chagedu ule cha ole, ba me kle lle kade cha giti cha Ñenuage, agwa nege gwangerugu ba lle kadadale cha giti cha Ñenuage lle bai kaire ba takalinge, ene cha giti cha Ñenua be age ba alin, ene nga be suga ma no badi cha giti.  
\v 25 Cha geru ñachugu ba ulita ole tanre, e me sugedu bage cha kle gerule llema giti ulia ba ole, agwa chui be chie gire cha mi geru ñachuge ba alin cha kle geru ñachuge nege kare, chui ege cha be geru cha Ñenua giti gbe chke uñale trate ulita bage, ene be suge trate ba ulitage cha ta gerukalin mine ulia ba ole.  
\v 26 Chui be chke gire cha mi kle ba ole, chui ege ba ulita gerudale cha Ñenua ole lle kade mo alin cha giti. Cha me kle gerule ba ole ba be gerule cha ole gire cha be gerule cha Ñenua ole, me ene, ba ulita lle kadadale agali cha Ñenuage cha giti.  
\v 27 Uñale cha Ñenuage ba ulita no cha ole, uñale amage kaire ba kle cha gai ulia cha chiu ama ngwadi, malen cha Ñenua no ba ulita ole.  
\v 28 Cha kledu cha Ñenua ole gire cha chiu cha chku nga dba ai giti, nege cha be joge siere nga dba ai gitige, cha be jogeni naskuni cha Ñenua ngwadi. 
\p  
\v 29 Jesu gerudu ene kwian geru jwannga ole gire kwian geru jwannga gerudu Jesu ole: 
\p —Nege ba kle geru ba Ñenua giti gbe chke uñale trate chage, nege ba me kle geru ñachuge cha ole ngeru kare, nege suge chage ba kle gerule giti cha ole.  
\v 30 Nege suge cha ulitage ulita uñale bage, ba me geru kadu ni cha gdaitege cha kle tañachuge giti agwa ba cha ulita talla uñe, bage uñale cha ulita kle tañachuge mine, e giti cha ba gai ulia nege, suge trate chage ba chiu Chube ngwadige. 
\p  
\v 31 Kwian geru jwannga gerudu ene Jesu ole gire Jesu gerudu ama ole: 
\p —Nege ba kle gerule ba cha gai ulia,  
\v 32 agwa chui kle kodi kodi gire ba ulita gdaite gdaite be joge siere chage mo kaire kaire sugekare, ba ulita be cha chuge ngwadi gballa, agwa cha mi chege gballa ulia, cha Ñenua kle cha ole diali.  
\v 33 Cha gerudu ulita ba ole, ba tachkedale e giti ulita, ene cha giti ba be ta dbe suga no diali. Ba ulita chanu be boi daga ngwale nga dba ai giti kwian me chanuske, agwa ba me tallade e giti, ba me ta dbe kennga, ba mo ta gbadale diali cha kirallaske, cha kirachku ulita me no kiralladi. 
\c 17  
\s1 Jesu gerule mo Ñenua ole kwian amanu giti 
\p  
\v 1 Jesu gerudu ene ulita kwian geru jwannga amage gdataboko giti gdaite ole, ama gwagedu nga ngaña giti gire ama gerudu Chube ole: “Cha Ñenua, nege cha mi chege dare nga dba ai giti, cha ba Kirolla, ba age no cha alin, ba cha gbe kweri kwian ulita gwa giti, ene kwian be gwage chadi be gerule no no ba giti.  
\v 2 Ba kira ketu chage, ba cha gbu ma kweri kwian ulitage, ene kira e giti cha kwian gbe toi diali chui tangle kwian bai kaire ba ta gbu cha gai ulia.  
\v 3 Kwian ba gadale Chube gdaitre alin ulia, kaire kwian cha gadale ulia ba Kirolla Jesucristo, ba cha kagu nga dba ai giti, kwian cha uñe ene kaire kwian ba uñe, e giti kwian toi diali chui tangle.  
\v 4 Cha agedu ulita ba takalin kare kwian ulita gwa giti, ba cha kagu nga dba ai giti lle boi ba alin, cha lle e bo ulita, uñale chage nga suga no badi cha agedu giti ulita.  
\v 5 Cha Ñenua, nege cha be jogeni ba ngwadi, cha takalin ba cha gbeni naskuni kweri cha kledu ba ole unsuialin nga ulita bebi dodadale gire cha kledu ba ole, cha klekalinni naskuni eni ba ole. 
\p  
\v 6 Ba kwian ai gdataboko giti gdaite ulita gau kwian ulitaske mau alin, kwian ai ulita banu, ba ama ta gbu chage cha ole cha gai ulia, cha giti sugedu amage ba mine, cha gerudu ulita ama ole ba giti, ama ba gerua gbu gdadi ba gerua gau dage cha gerudu kare ama ole.  
\v 7 Nege uñale ama ulitage cha kle age ulita ba kirallaske cha kle gerule ulita ba kirallaske.  
\v 8 Ba geru ketu chage, cha geru e ketu ama ulitage, ama geru e ulita gau ulia, suge ama ulitage ulia cha chiu ba ngwadige, ama ulita cha gai ulia ba cha kagu.  
\v 9 Cha kle gerule ba ole ama ulita giti, ba ama ta gbu chage cha ole, ama ulita banu, ba ama manade no, ba ama chudaboi no. Kwian e alin giti cha kle gerule ba ole, cha me kle gerule ba ole kwian me banu giti.  
\v 10 Kwian banu ulita, kwian ene kaire chanu. Kwian chanu ulita, kwian ene kaire banu. Ba kwian ene ulita gbe chage no ba takalin kare kwian ulita me chenuske, ene kwian chenu giti kwian na ñage che uñe, be suge trate kwian nage cha no no.  
\v 11 Cha mi chege dare nga dba ai giti kwianske, cha be jogeni toini ba ole, agwa kwian ai kle chage cha ole ama be chege toi nga dba ai giti. Cha Ñenua, ba no trate, ba kwian ai ta gbu chage cha ole, ba ama ulita manade no ba kiralla giti, ba ama ta gbe diali chage ba geruage, ene ama ulita be tañachuge kwian gdaitre alin kare che boke kle tañachuge kare, che boke gdaitre alin.  
\v 12 Nege cha kle ama ulita ole nga dba ai giti chage ule ama ole, ba ama ulita gbu chage cha ole, cha ama ulita manadu no ba kiralla giti, ene cha ama ulita ta gbu chage no ba geruage. Ba ama ulita ta gbu chage cha ole, ama ulita mo ta gbu cha gai ulia, ama kle chage cha ole diali, ni gdaite jonga chage, agwa ama gdaitre alin me mo ta gbu cha gai ulia, ama chagedu alin cha ole agwa ama ta me kledu ule cha ole, ama jonga sugekare chage, ama gdaite e boidale ene ba gerua degaba unsuialin gerule kare.  
\v 13 Nege cha be jogeni ba kle ngwadi, agwa cha bebi joge siere nga dba ai giti cha kle kwian ai kle chage cha ole tke tangle no ba geruage, ama cha keruchuge cha kle gerule giti, ene ama ta chege nga suga no ole cha giti.  
\v 14 Kwian ai ulita kle chage cha ole, cha geru banu ketu kwian ai ulitage ba gerua gerule kare, ama kle chage cha geru banu ketu gerule kare, ama kle chage cha chage kare kwian ulitaske me kwian me chanu kle chage kare, e giti kwian me chanu jainchke amadi kwian jainchke chadi kare.  
\v 15 Cha me kle gerule ba ole ba ama jwen siere nga dba aige, agwa ba ama manade no mo kiralla giti nga dba ai giti ene ama me mo chuge ngwadi age me no che dolla Satanás takalin kare.  
\v 16 Cha me tañachuge cha me age kwian ulita nga dba ai giti kle tañachuge kle age kare, ene kaire kwian ai chanu kle chage cha ole me tañachugadale me agedale kwian ulita nga dba ai giti kle tañachuge kle age kare.  
\v 17 Cha takalin ba ama ulita ta gbe chage no trate ba gerua alin giti, ba gerua ulita geru ulia.  
\v 18 Ba cha kagu nga dba ai giti kwian me ba uñeske ba gerua dbe kwiange, ene kaire cha be kwian ai chanu kle chage cha ole jige nga dba ai giti kage ba gerua dbe dare kwian me ba uñeske.  
\v 19 Cha mo ta gbu lle boi no ba alin diali ba takalin kare nga dba ai giti, ene cha giti kwian ai ba uñu, ama banu ulia, ene nege gwangerugu ama be mo ta gbe ulia lle boi ba alin diali cha lle bo ba alin kare. 
\p  
\v 20 Cha me kle gerule kwian ai alin allabi giti ba ole, kwian ai giti kwian na tanre be cha gerua keruchuge be cha gai ulia biale, ba kwian e ulita manade no kaire, ba ama chudaboi.  
\v 21 Cha gerule ba ole kwian be cha gai ulia giti, kwian e cha gai ulia gire cha takalin ba ama ulita ta gbe ule gdaitre alin, ene ama ulita tañachuge kwian gdaitre alin kare, ene no cha Ñenua. Ba kle cha ole cha kle ba ole, che boke gdaitre alin, cha takalin ama ulita ta chege che ole ule, ene kwian me chenu gwage ama ulitadi, ama giti kwian me chenu be che gai ulia, ene be suge kwian ege ulia ba cha kagu aini nga dba ai giti.  
\v 22 Ba mo kiralla ketu chage, ene kaire cha mo kiralla kete kwian chanuge, ene kwian chanu ulita tañachuge kwian gdaitre alin kare che boke kle tañachuge kare, che boke gdaitre alin.  
\v 23 Cha kle ama ulita ole ba kle cha ole kare, cha giti ama ulita tañachuge no ulia kwian gdaitre alin kare, ene ama giti kwian me chanuge suge ulia ba cha kagu aini nga dba ai giti, kaire suge amage ulia ba no kwian chanu ole ba no cha ole kare.  
\v 24 Cha Ñenua, ba no cha ole diali, ba nodu cha ole unsuialin nga ulita bebi dodadale, malen ba cha gbu kweri ba kle ngwadi. Ba kwian ai ulita ta gbu chage cha ole, cha takalin ama ai ulita joge cha ngwadi cha be kle ngwadi, ene ama ulita be gwage chadi cha noare kweri.  
\v 25 Cha Ñenua, ba no trate, cha gerule ba ole, kwian me banu me ba uñe, me uñale ama ulitage ba mine, agwa cha ba uñe, kaire kwian ai ba ta gbu chage cha ole, amage uñale ba cha kagu,  
\v 26 cha giti ama ulita ba uñe, cha gerudu ama ole ba giti, ene chku uñale ama ulitage ba mine, cha be kle ama ole diali, cha be ama ta gbe ma no ba uñe dare. Ba noare cha ole, ta e kare cha takalin chege kwian ai ulita chanu tale, ene cha be kle ama ulita ole diali. Ene nobi cha Ñenua.” 
\c 18  
\s1 Kwian Jesu dollale Jesu gai dbale skadi 
\p  
\v 1 Jesu gerudu ene ulita Chube ole gire Jesu jo siere Jesu kledu ngwadi ule kwian geru jwannga amage gdataboko giti gdaite ole, jo tangle chi ulen kada Cedrónge, jo chke chi ulen kagda giti chkagu, eni gli gbachie no ngamalla gbaba, nga ege Jesu jo chke geru jwannga ole.  
\v 2 Judas-Iscariote Jesu ketanga gwaleda, ama nga e uñe, bitangle Jesu jogeba nga ege ule kwian geru jwannga gdataboko giti gdaboke ole, Judas-Iscariote chagedu ule Jesu ole nga ege ngeru, malen uñadu Judas-Iscariotege Jesu be joge nga ege.  
\v 3 Judas-Iscariote jo kwian ngle dbe Jesu gai nate nga ege, kwian gerunga Chube ole daba alin chugagwalla mneite kaire fariseo chugagwalla mneite, kwian e ulita kwian guardia donga ngle kaire kwian guardia u gerungwa Chube ole mananga ngle kagu ule Judas-Iscariote ole. Judas-Iscariote jo kwian e ulita dbe Jesu gai nate, ama ulita jo dogda dbe biale, jo jichra kaire jita gwagwa dbe kote nga gbagda chra jonkare chagegda, ene ama ulita ñage Jesudi Jesu gai. Kwian e ulita jo chke Jesu kle ngwadi.  
\v 4 Ulita kwian be age Jesu ole uñadu Jesuge, Jesu gwagedu kwian ulitadi kle chie Jesu kle ngwadi gire Jesu jo kwian chie Jesu gitigu ngwange, Jesu geru kadu: 
\p —¿Ba kle chage chema nate? 
\p  
\v 5-6 Kwian mneite kle chage ulita jaindunga: 
\p —Cha ulita kle chage Jesu una Nazaremu nate. 
\p Jesu gerudu: 
\p —E cha ba kle chage nate. 
\p Jesu gerudu ene gire kwian ulita kle chage modi Jesu nate mo linguda gwanaskuda, kwian ulita jo chke dba. Judas-Iscariote Jesu ketanga kwian me no e ulitage kledu ule kwian e ole ulita eni.  
\v 7 Gire Jesu geru kadu nabitaite ama ulitage: 
\p —¿Ba kle chage chema nate? 
\p Ama ulita jaindunga nabitaite: 
\p —Cha kle chage Jesu una Nazaremu nate. 
\p  
\v 8 Jesu gerudu nabitaite dare ama ulita ole: 
\p —Cha gerudu ba ole agali ba kle chage cha nate, ulia ba kle chage cha nate ba cha alin allabi gai, agwa kwian ai kle chage cha ole, ba me ama chugedi, ba ama chuge ngwadi. 
\p  
\v 9 Boidu ene ulita salengwli Jesu agali gerudu kare ngeru Ñenua ole: “Cha Ñenua, ba kwian ulita ta gbu chage cha ole cha gai ulia, ni gdaite jonga chage.” 
\p  
\v 10 Simón-Pedro kle chage sbadi dbe kwarage, ama sbadi junnga kwarage, gire ama kwian onbre kada Malco ologa taingwli tkunga ulita sbadi giti, Malco kwian lle boanga kwian gerunga Chube ole chugagwalla ma kweri alin.  
\v 11 Pedro Malco ologa tkunga ene gire Jesu gerudu Pedro ole: 
\p —Ba sbadi gbe naskuni sbadi kwarage. Ba kle tañachuge ba kira bate cha gdale ene kwian mi cha gai boadale daga ngwale, me ene, ba me ñage dole sbadi giti cha gdale, cha mo chugadale ngwadi boi cha Ñenua takalin kare kwian me noge. 
\p  
\v 12 Guardia donga ngle ule ama chugagwalla ole, kaire kwian guardia u gerungwa Chube ole mananga ngle, guardia e ulita Jesu gau Jesu ko lugu dbale skadi.  
\v 13 Guardia e ulita Jesu du Anás ngwadi, Anás Caifás bagalla, e suiale Caifás kwian gerunga Chube ole daba alin chugagwalla ma kweri.  
\v 14 Caifás ai amaña gerudu kwian israelita chugagwalla ulita ole: “Ma no che kwian israelita ulita alin onbre gdaitre alin jogeda kwian israelita ulita giti.” 
\s1 Kwian israelita chugagwalla kweri kle geru kade Jesuge Jesu gbale jiske gire Pedro chege goga gerule 
\s1 kwian na ole ama me Jesu uñe 
\p  
\v 15-16 Kwian jo Jesu dbe Anás ngwadi gire Simón-Pedro ule kwian geru jwannga Jesuge gdaite na ole chagedu kwian ngle jo Jesu dbe nate. Kwian gerunga Chube ole daba alin chugagwalla kwian geru jwannga gdaite e uñe, malen muinga ugaka mananga kwian geru jwannga gdaite e chugu ngwadi joge gudegu Jesu nate, agwa Pedro chegu goga gere ugakalla gití. Geru jwannga gdaite gerudu muinga ugaka mananga ole Pedro tke gere skieru goga, gire muinga ugaka mananga Pedro tku gere skieru goga,  
\v 17 muinga e geru kadu Pedroge: 
\p —¿Ba me geru jwannga onbre dule gudegu ege? 
\p Pedro gerudu: 
\p —Me dale, cha me geru jwannga amage. 
\p  
\v 18 Kwian lle boanga ulita kwian gerunga Chube ole chugagwalla ma kweri alin kaire guardia u gerungwa Chube ole mananga, nga skeke alin ama ulita nu jita teanba goga mo ngwachugagda, Pedro kaire kle ule kwian e ulita ole jita ngwachuge goga. 
\p  
\v 19 U amañage gwa kwian gerunga Chube ole daba alin chugagwalla ma kweri geru kadu Jesuge kwian geru jwannga Jesuge ulita giti, kaire geru kadu Jesuge Jesu kle kwian ulita tke tangle llema giti.  
\v 20 Jesu gerudu: 
\p —Cha gerudu kwian tanre gwa giti, diali cha kwian tku tangle u mo litangwa Chube gerua jwanngwage, kaire cha kwian tku tangle u gerungwa Chube olege kwian ulita kle mo lite ngwadi, cha gerudu ulita me skwlenre kwian ulitage, uñale kwian ulitage cha gerudu cha kwian tku tangle llema giti.  
\v 21 ¿Mineade ba geru kade chage? Geru kade kwian cha keruchuguge, kwian cha keruchugu ñage gerule ulita ba ole cha gerudu mine, ama ulitage uñale cha gerudu giti. 
\p  
\v 22 Jesu gerudu ene gerunga Chube ole daba alin chugagwalla ma kweri ole gire guardia gdaite u gerungwa Chube ole mananga Jesu batu gwage gerudu Jesu ole: 
\p —¿Ba kle tañachuge ba kle gerule ene no chugagwalla ole? 
\p  
\v 23 Jesu gerudu guardia e ole: 
\p —Bage suge cha kle gerule me no chugagwalla ole, gerule cha ole cha kle gerule mine me no chugagwalla ole. Bage me uñale cha kle gerule mine me no, ¿mineade ba kle cha bate? 
\p  
\v 24 Jesu gerudu ene gire Anás me gerudu dare, Anás Jesu kagu kaire ene ko lugaba Caifás ngwadi u amañage, Caifás kwian gerunga Chube ole daba alin chugagwalla ma kweri. 
\p  
\v 25 Jesu kle boi ene ulita gire Pedro kledu ngmadi goga jita ngwachuge ule kwian na ole, kwian gweale geru kadu Pedroge: 
\p —¿Ba me geru jwannga onbre dule gudegu ege? 
\p Pedro gerudu: 
\p —Me dale, cha me geru jwannga amage. 
\p  
\v 26 Bigwa kwian lle boanga gdaite gerunga Chube ole chugagwalla ma kweri alin, kwian lle boanga e bitalla Pedro ama ologa tkunga, e geru kadu Pedroge: 
\p —¿Cha me gwagedu ba amañadi llani ba tkanga tangle gale ngwadi? 
\p  
\v 27 Pedro gerudu nabitaite: 
\p —Me dale, cha me ama uñe. 
\p Pedro gerudu ene gire blike antalan ngwanedu. 
\s1 Kwian israelita chugagwalla ulita Jesu dbe 
\s1 chugagwalla Pilato ngwadi 
\p  
\v 28-29 Jesu kledu Caifás ullage, nga chku ju gire kwian israelita chugagwalla ulita Jesu du kwian chugagwalla gobernador nga Romamu ullage, ama kada Pilato. Kwian israelita chugagwalla ulita me jo gwa chugagwalla Pilato ullage ule Jesu ole, kwian israelita chugagwalla joge gwa u e kwian Romamuge ama ulita tañachuge ama chege sugaska Chube gwa giti, ene ama mi ñage Pascua chuia ollade mi ñage Pascua bligdalla gute, malen ama ulita Jesu dbangu chugagwalla Pilato ngwadi gwa, agwa ama ulita chegu manade goga, Pilato jo goga gerule kwian israelita chugagwalla ulita e ole Jesu giti: 
\p —¿Ba ulita kle onbre ai gbe jiske llema giti? 
\p  
\v 30 Kwian israelita chugagwalla jaindunga: 
\p —Ama me agenga me no cha me chie ama dbe aini kete bage gbale jiske, ama agenga me no malen cha ulita kle chie ama dbe aini gbe jiske bage. 
\p  
\v 31 Pilato gerudu: 
\p —Ma no ba ulita ama dbe siere nga aige, ba ama gbe ji chuge geru kle gbaba ba kwian israelita alin kle gerule kare. 
\p Kwian israelita chugagwalla ulita gerudu Pilato ole: 
\p —Cha ulita me ña ama gweda gballa, ba kwian Romamu me cha kwian israelita chugu ngwadi ni kwian gdaite gweda gballa. 
\p  
\v 32 (Ulita boidu salengwli Jesu gerudu ngeru kare ama be jogeda giti kwian be age ama ole giti.) 
\p  
\v 33 Pilato joni gwa, Pilato Jesu dbangu ama ulita gwa giti Pilato geru kadu Jesuge: 
\p —¿Ba kwian israelita ulita chugagwalla kweri? 
\p  
\v 34 Jesu gerudu Pilato ole: 
\p —E ba kle gerule kare cha ole, ¿ba kle gerule mo tale gballa o ba kwian na keruchugu gerule ene cha giti cha kwian israelita chugagwalla kweri? 
\p  
\v 35 Jesu gerudu ene gire Pilato gerudu Jesu ole: 
\p —¿Ba kle tañachuge cha kwian israelita, ulita kle boi ba ole uñale chage? Kwian gerunga Chube ole daba alin chugagwalla ulita ule ba chudalla israelita ulita ole, kwian e ulita kle ba gbe jiske chage. ¿Ba llema me no bo ba bitalla ulitaske ade ama kle ba gbe jiske chage? 
\p  
\v 36 Pilato gerudu ene Jesu ole gire Jesu gerudu Pilato ole: 
\p —Cha me kwian chugagwalla kwian chugagwalla nga dba ai giti ulita kare, cha kwian chugagwalla nga ngaña giti, cha kwian chugagwalla nga dba aimu alin ene kwian tanre chanu kira batadale tanre cha giti ene kwian israelita me ñage age cha ole. Agwa cha me kwian chugagwalla kwian chugagwalla nga dba ai giti kare, malen kwian chanu me kle kira bate cha giti. 
\p  
\v 37 Jesu gerudu ene Pilato ole gire Pilato geru kadu Jesuge: 
\p —Ba gerule ene, ¿e kle gerule ba ulia kwian chugagwalla? 
\p Jesu gerudu: 
\p —Ima, cha kwian chugagwalla ba kle gerule kare. Cha medunga nga dba ai giti, cha chiu geru ulia kete kwian ulitage, kwian ulita bai kaire mo ta gbe no geru ulia ole ama cha kerua gbe gdadi. 
\p  
\v 38 Jesu gerudu ene gire Pilato geru kadu Jesuge: 
\p —¿Llema geru ulia? 
\p Pilato geru kadu ene Jesuge gire blike ama jo nabitaite goga kwian israelita chugagwalla ulita ule kwian israelita tanre ole kledu manade ngwadi, Pilato gerudu kwian e ulita ole: 
\p —Cha geru tragu tanre onbre ai ole, suge chage trate ama me jiske dale.  
\v 39 Ma no ba ulita kle age kare diali Pascua chuiage chura kaire kaire ba kle kwian kle skage gweale gdaite skajwanngenga chage, ¿ba ulita takalin cha ba kwian israelita chugagwalla kweri ai skajwanngenga jige gbale nege? 
\p  
\v 40 Pilato gerudu ene Jesu giti gire kwian ulita ngautu kweri Jesu dollale: 
\p —Onbre e me skajwanngenga, ma no ba Barrabás skajwanngenga chui aige. 
\p Kwian ulita gerudu ene Pilato ole Barrabás skajwanngenga giti, Barrabás kwian agenga me no me no, ama kwian skwe boanga. 
\c 19  
\p  
\v 1 Kwian ulita gerudu ene Pilato ole gire Pilato joni gwa Jesu kle ngwadi, Pilato Jesu kwabatangu.  
\v 2 Guardia donga Pilatonu ulita Jesu kwabatu gire ama giska kobaske bliu Jesu chuga batreti gire batu Jesu chugaske, kwian e Jesu ngama tku kwian chugagwalla kweri nga dba aimu kle mo ngama tke kare ñometra chada dabere, ñometra e kareske Jesu jo ngama tkaba.  
\v 3 Gire guardia donga Pilatonu ulita chiu Jesudi, ama ngautu kweri Jesu gbe gidagda, ama gerudu Jesu ole kidere: 
\p —¡Nege ba kwian israelita ulita chugagwalla kweri, ba chege no kwian chugagwalla kweri kwian ulita gwa giti! 
\p Guardia donga ulita gerudu ene Jesu ole ta me no ole, kaire ama Jesu batu gwage kodi.  
\v 4 Kle boi ene ulita gwa Jesu ole Pilato jo goga kwaite gerule kwian israelita ulita ole Jesu giti, Pilato gerudu kwian nglea ulita ole: 
\p —Cha be ama gbe aini goga ba ulita gwa giti, ene cha takalin suge bage, chage ama me skwen jiske dale. 
\p  
\v 5 Gire Jesu dbachiu gbale kwian ulita gwa giti, Jesu chiu goga giska kobaske bliaba bataba ama chugaske, ama jo ngama tkaba ñometra chada dabereske, ama chku goga kwian israelita ulita gwa giti gire Pilato ama kaitu kwian ulitage, Pilato gerudu kwian ulita ole: 
\p —¡Gwagede onbre aidi, ama kle aini ba ulita gwa giti! 
\p  
\v 6 Kwian gerunga Chube ole daba alin chugagwalla ulita kaire guardia u gerungwa Chube ole mananga ulita, kwian e ulita gwagedu Jesudi gire ama ulita ngautu kweri Jesu dollale: 
\p —¡Ama gwangeda kruge! 
\p Pilato gerudu kwian ulita ole: 
\p —Ba ta ama gwakalinda joga ama dbe, ba ulita agali ama gweda kruge ba takalin kare, agwa chage ama me skwen jiske dale. 
\p  
\v 7 Kwian israelita ulita gerudu Pilatoge: 
\p —Cha kwian israelita ulita alin geru kle gbaba, geru e gerule kwian gweale mo gbe Chubere ama gwadaleda, onbre e kle gerule mau giti ama Chube Kirolla, malen cha ulitage suge ama jogedaleda ama kle mo gbe Chube Kirollale gdale. 
\p  
\v 8 Pilato kwian keruchugu gerule “Chube Kirolla” gire Pilato ta kendunga tanre.  
\v 9 Pilato joni gwa ule Jesu ole gire geru kadu Jesuge: 
\p —¿Ba nga bainimu? 
\p Agwa Jesu me jaindunga Pilato kalen.  
\v 10 Pilato gerudu Jesu ole: 
\p —¿Mineade ba me jainnga cha kalen? ¿Me uñale bage cha kwian chugagwalla kira molen, cha ñage kwian kage ba gweda kruge kaire cha ñage kwian gbe ba skajwennga? 
\p  
\v 11 Gire Jesu gerudu Pilato ole: 
\p —Chube kle ba chuge ngwadi age cha ole, malen ba ñage age cha ole, ba gballa me ñage age cha ole. Malen kwian ulita cha ketanga bage gwaleda, ama jiske kweri kweri age me no cha ole giti, ama ulita jiske ma kweri bage. 
\p  
\v 12 Jesu gerudu ene Pilato ole gire Pilato mo ta gbu ma dare age gweale Jesu alin Jesu chuge ngwadi gbale me Jesu kete gwaleda, agwa kwian israelita ulita gerudu kweri Pilato ole: 
\p —Ba be onbre ai chuge ngwadi gbale ba me ama kete gwaleda ba mi chege kwian chugagwalla kweri kada César skatemanalla, kwian bai mo gbe kweri kwian chugagwallale onbre ai kle mo gbe kare, kwian ene chugagwalla kweri César dollale. 
\p  
\v 13-14 Pilato kwian ulita keruchugu gerule ene Jesu giti gire Pilato Jesu jwanngu siere gwa dbadale goga kwian ulita gwa giti, Pilato jo goga nga ama gerule kwian giti kwian jiske o me jiske ngwadige, nga e keuda dodaba bate ngaña, keuda e kada Gabata kwian israelita kwirale. Ne ngwadi Pilato toidu dba geru bdagli ketadale kwian ulitage Jesu giti, ama gerudu kwian israelita ulita ole Jesu giti: 
\p —¡Gwagede ba chugagwalla kweri aidi, ama kle aini ba ulita gwa giti! 
\p Pilato gerudu ene kwian ole chui bduke chuiete ngeru Pascua chuiage.  
\v 15 Gire kwian ulita ngautu kweri: 
\p —¡Ama dbange blikare gwaleda! ¡Ama gwangeda kruge! 
\p Pilato geru kadu kwian ulitage: 
\p —¿Ba kle tañachuge cha be ba chugagwalla kweri gwangeda kruge? 
\p Pilato gerudu ene kwian ulita ole gire kwian gerunga Chube ole daba alin chugagwalla ulita gerudu Pilatoge: 
\p —Cha ulita chugagwalla na me, chugagwalla kweri gdaitre alin, ama kada César, cha chugagwalla na me cha alin César kare. 
\p  
\v 16 Kwian gerudu ene mno Pilato ole gire Pilato me ñadu gerule dare Jesu giti, Pilato Jesu ketu kwian israelita ulitage gwaleda kruge, kwian israelita jo Jesu dbe agedale dagale me no Jesu ole ama ulita takalin kare. 
\s1 Jesu jogeda kruge 
\p  
\v 17 Kwian israelita ulita Jesu du nga kada Calaverage, kwian israelita kwirale nga e kada Gólgota, nga e ngnagu Jesu jo mo krulla dbe,  
\v 18 jo chke nga ege gire kwian guardia donga Pilato alin Jesu gbu kruge ngaña. Kaire kwian na gdaboke gbere kru na gdabokege ule Jesu ole, kru gdaite Jesu ko taingwli ngnagu giti kru gdaite Jesu ko jole ngnagu giti, Jesu gbere kruge kwian boke e krulla kaskwada.  
\v 19 Pilato chada degu chada gbangu kruge ngaña Jesu chuga giti, chada e gerule: “Ai Jesu una Nazaremu, ama kwian israelita ulita chugagwalla kweri rey.”  
\v 20 Chada kle degaba gbaba kruge ngaña Jesu chuga giti, kwian israelita ngle chada e batunga, chada e kle degaba kwian israelita kwirale, kwian nga Romamu kwirale, kaire kwian griego kwirale. Jesu jo gbaba kruge ngwadi, nga e chege ngmadi una Jerusalénge, malen kwian ngle joge llani ñadu chada e batenga mo kwirale.  
\v 21 Kwian gerunga Chube ole daba alin chugagwalla ulita jo gerule Pilato ole chada kle gbaba kruge giti, kwian e ulita gerudu Pilato ole: 
\p —Ba me chada jige degaba ba chada degu kare: “Ama kwian israelita ulita chugagwalla kweri rey”, agwa ma no ba chada jige degaba gerule ai kare: “Ama agali gerudu mau giti ama kwian israelita ulita chugagwalla kweri rey.” 
\p  
\v 22 Pilato gerudu: 
\p —Cha chada degu ene, chada e chegedale ene cha chada degu kare. 
\p  
\v 23 Guardia donga Jesu gbanga kruge kwian baga, ama ulita Jesu gbu kruge ngaña gire ama Jesu ñometralla jo jwanbanga Jesudige ñometra e ulita guardia donga gdabaga girabatu modi ñometra bitaite guardia donga gdaite gdaite alin. Ñometra bitaite Jesu kle dbe ñometra na giti tangle, guardia donga ñometra e bitaite gau kaire girabatadale modi, agwa ñometra e skiaba jeike llagli, guardia donga me ñadu ñometra e girabate modi ama tañachugu kare,  
\v 24 malen guardia donga gerudu modi: 
\p —Che me ñometra ai gagenga, ma no che blachke gbe ñometra giti gire che gdaite bai blachke be chege ñometra mauñale. 
\p Boidu ene Chube gerua degaba unsuialin gerule kare Jesu giti, chada e gerule: 
\q1 “Cha ñometralla jo girabataba modi, cha ñometralla jeike llagli giti blachke jo gbaba.” 
\m Chube gerua degaba unsuialin gerule ene kwian be age giti, chui e chku gire guardia donga agedu ene ulita Jesu ñometralla ole chada e gerule kare. 
\p  
\v 25 Kodi Jesu krullage Jesu chebia kledu manade ule mo daballa kada María ole, María e Cleofas muiralla. Kaire María na kada María-Magdalena kledu ule.  
\v 26 Jesu gwagedu mo chebiadi, ule chebia ole kwian geru jwannga Jesuge gdaite kledu, geru jwannga e ole Jesu no no, Jesu gerudu chebia ole: 
\p —Cha chebia, ba geru jwannga e gai mo kirollale. 
\p  
\v 27 Jesu gerudu ene chebia ole gire gerudu kaire geru jwannga e gdaite ole: 
\p —Ba cha chebia gai mo chebiale, ba ama manade no no. 
\p Chui ege gwangerugu geru jwannga e Jesu chebia gau mo chebiale, ama Jesu chebia du mo ullage manadale diali. 
\p  
\v 28 Boidu ene ulita gire Jesuge sugedu ama lle boadale Chube alin nga dba ai giti ama dodadu ulita. Boidale Chube gerua degaba unsuialin gerule kare, malen Jesu gerudu: 
\p —Cha siechie. 
\p  
\v 29 Uva chia gage tkaba ngama gdaitege kledu eni, guardia donga lle dagli kare kagu date uva chia gageske gbu glita gwagdage gire gbu Jesu kate ngaña kruge.  
\v 30 Jesu uva chia gage junnga kate daglige Jesu jau gire Jesu gerudu: 
\p —Cha lle dodadu ulita cha Ñenua takalin kare nga dba ai giti. 
\p Jesu gerudu ene gire ama chuga gbu gwadbigu ama jokeda. 
\p  
\v 31 Jesu jokeda chuia, chui e chege chuietre alin kwian israelita undege chuia, me undege chuia alin allabi, kaire Pascua chuia. Kwian israelita me takalin kwian jaba chege gbaba ngaña kruge undege chuiage alin, malen kwian israelita chugagwalla ulita jo gerule Pilato ole: 
\p —Cha takalin ba guardia donga kage kwian gdamai kle kruge seragda skutenga, ene ama jogeda blike gire ama jaba jwanle siere kruge ogale ngeru cha kwian israelita undege chuiage. 
\p  
\v 32 Kwian israelita chugagwalla ulita gerudu ene Pilato ole gire Pilato guardia donga kagu kwian gdamai kle kruge seragda skutenga, guardia e kwian gdaite kle kruge Jesudi ongoru seragda skutunga gire ama kwian na kle kruge Jesudi ongoru seragda skutunga.  
\v 33 Guardia jo chke Jesu krulladi Jesu seragda skutalenga, guardia gwagedu Jesudi Jesu jaba alin chegeba, malen guardia me su Jesu seragda skutenga,  
\v 34 agwa guardia gdaite Jesu dagu jigwaru tangle lanza giti, lanza tanege blike be chiu kaire chi chiu. 
\p  
\v 35 Cha Juan chada ai deganga, boidu ulita Jesu ole cha gwagedudi mo gwagwa giti, cha kle gerule ulia cha gwagedudi, chage uñale trate ulia cha gwagedudi boidu ene ulia, ene ba ulita bai kaire chada ai batenga cha kle gerule giti ba ulita geru ai gai ulia.  
\v 36 Boidu ene Jesu ole Chube gerua degaba unsuialin gerule kare, chada e gerule Jesu giti: 
\q1 “Kwian mi ama gda jegwale gdaite skutenga.” 
\m  
\v 37 Chube gerua degaba amaña na gerule Jesu giti: 
\q1 “Kwian ama dagangu kwian na ule ulita ole be gwage ama jo dagabadi.” 
\s1 Jesu jaba ogakle keugage 
\p  
\v 38 Jesu jaba jo boaba ene gire José una Arimateamu Jesu jaba kadu Pilatoge jwanlenga kruge ogadale keugage, José e Jesu gaba ulia mo tale skwlenre kwian israelita chugagwalla ulitage kwian israelita chugagwalla chrullale, Pilato gerudu José ole: 
\p —Ba ñage Jesu jaba jwen dbige kruge dbe nga ogangwage. 
\p José jo Jesu jaba jwen dbige kruge, José Jesu jaba du ogadale. 
\p  
\v 39 Nicodemo jogeba chui gbaitege ngajrege geru trage bitaite Jesu ole, Nicodemo e amaña jo chke José kle ngwadi Jesu jaba ole, Nicodemo lle ñachke no ngle kilo treinta du tkale Jesu jaba giti, e kada mirra tugaba áloeske.  
\v 40 José ule Nicodemo ole Jesu jaba bliu ñometra glitaleske, ñometra Jesu jaba jo bliabaske lle ñachke no jo tkaba ngle Jesu ñometralla jaba bliabaske giti kwian israelita suiale kle age diali kare jaba gbe biale ogadale. 
\p  
\v 41 Jesu gbere kruge ngwadi, kodi nga ege gli gbachie no gutadale ngamalla gbaba, eni keuga jaba ogangwa kle, keuga ege ni kwian jaba ogaba gdaite.  
\v 42 Eni keuga ege José Nicodemo ole Jesu jaba ogo blike, nga e chege ngmadi Jesu gbere kruge ngwadi, malen José, Nicodemo Jesu jaba ogo eni gire ama joni mo ullage, ngabi, lle boi chuia dare me, chui na be chie undege chuia kwian israelita ulita alin gire ni kwian gdaite ñage lle boi. 
\c 20  
\s1 Jesu jaba chkeni gwade 
\p  
\v 1 Undege chuia jo tangle gire nagbietege chui domingoge ngabebitabi nga bebi chra chke dba no gire María-Magdalena jo Jesu jaba ogle ngwadi, jo chke Jesu jaba ogle ngwadi, gwagedu ke kweridi ke e gbaba keugage me kle kaire, ke jwanbanga keuga ugakalla chegeba ka ngwale.  
\v 2 María-Magdalena gwagedu edi gire ama jo jrite Simón-Pedro ngwadi gerule Simón-Pedro ole kaire kwian geru jwannga Jesuge gdaite na ole, geru jwannga na e Jesu no no ole, María-Magdalena gerudu ama boke ole: 
\p —Che Chugagwalla jaba dule, ama jaba me kle jaba ogle ngwadi, me uñale cha ulitage ama jaba jo gbaba baini. 
\p  
\v 3 Pedro kaire geru jwannga gdaite na María-Magdalena keruchugu gire ama gdabonate jo tienda agali Jesu jaba jo ogaba ngwadi,  
\v 4 gdabonate jo jrite ule, geru jwannga gdaite jritedu ma blike Pedroge, jo chke ngeru keugadi.  
\v 5 Jo chke ngeru, ama tiunda dbige keugage, Jesu jaba tanege gwagedu ñometra Jesu bliabadi alin, gwagedu ene, agwa ama me jo dbige.  
\v 6 Ama nate Simón-Pedro jo chke keugadi, Simón-Pedro jo dbige, ama kaire gwagedu ñometra alindi,  
\v 7 kaire ama gwagedu ñometra jo Jesu chuga bliabadi me kle ule ñometra Jesu jaba jo bliaba jegwale ole, kaire ñometra jo Jesu chuga bliabadi kle bliaba gbaba sugekare ñometra nage.  
\v 8 Gire geru jwannga jo chke ngeru Pedroge jo dbige kaire Pedro nate, gwagedu dbige, Jesu jaba me skwendu amage, sugedu amage ulia Jesu chkuni gwade.  
\v 9 Geru jwannga boke ege Chube gerua degaba unsuialin me sugeba amage, Chube gerua degaba gerule Jesu jaba chkedaleni gwade agwa geru e bebi chke uñale amage.  
\v 10 Jesu jaba me skwendu geru jwannga gdabonatege gire ama joni gudegu. 
\s1 Jesu meñe gwadeni María-Magdalenage 
\p  
\v 11-12 María-Magdalena jogeba chkeni Jesu jaba ogle ngwadi, María-Magdalena chegu goga olire Jesu jaba jo ogaba keugalla ngena, ama kle olire gire tiunda dbige keugage gwagedu lle boanga Chube alin nga ngaña giti bokedi toiba dba Jesu jaba jo gbaba ngwadi, ama boke mo ngama tkaba ñometra jutreske, gdaite kle Jesu chuga tanege gdaite kle Jesu sera tanege.  
\v 13 Lle boanga Chube alin nga ngaña giti geru kadu María-Magdalenage: 
\p —¿Mineade ba kle olire? 
\p María-Magdalena jaindunga: 
\p —Cha kle olire cha Chugagwalla jaba nate, ama jaba dule, me uñale chage ama jaba jo gbaba baini. 
\p  
\v 14 María-Magdalena gerudu ene lle boanga Chube alin kle dbige ole gire María-Magdalena tiunda mo giti, María-Magdalena gwagedu Jesudi Jesu kle jagebanga gdate ngmadi ama ngena, María-Magdalena gwagedu Jesudi, agwa María-Magdalena me chku Jesu uñe nate.  
\v 15 Jesu geru kadu María-Magdalenage: 
\p —¿Mineade ba kle olire? ¿Ba kle chema jinade? 
\p María-Magdalena tañachugu kwian kle gerule ama ole kwian e gli gbachie no ngamalla mananga kle gerule ama ole, María-Magdalena gerudu: 
\p —Ba nga ai mananga, jaba jo gbaba aini, ba jaba e du gbale nga nage ba gerule cha ole ba jaba gbu baini, cha ta jogekalin jaba jwen nate ogadale. 
\p  
\v 16 Jesu gerudu: 
\p —¡María! 
\p María-Magdalenage sugedu blike Jesu kerua gire María-Magdalena jwlituda gdate, María-Magdalena gerudu Jesu ole kwian israelita kwirale: 
\p —¡Rabuni! —geru e gerule kwian israelita kwirale “cha tkanga tangle geruge”. 
\p  
\v 17 María-Magdalena chku Jesu uñe nate, María-Magdalena be Jesu gai kodi gire Jesu gerudu María-Magdalena ole: 
\p —Ba me cha chugedi, cha bebi jogeni cha Ñenua ngwadi, agwa cha takalin ba joge kwian geru jwannga chage ulita ta gbe cha giti, ama ulita cha daballa kare, ba gerule ama ulita ole cha be jogeni cha Ñenua ngwadi, ba ulita chagedu cha ole, cha Ñenua ama ba Ñenua kaire, ama cha Chubea, kaire ama ba ulita chagedu cha ole Chubea. 
\p  
\v 18 Jesu gerudu ene María-Magdalena ole gire María-Magdalena jo geru kete kwian geru jwannga ulitage Jesu gerudu kare, María-Magdalena gerudu kwian geru jwannga ulita ole: 
\p —¡Cha gwagedu che Chugagwalladi mo gwagwa giti gwadeni! 
\p Kaire María-Magdalena geru ketu geru jwanngage Jesu gerudu ulita giti ama ole. 
\s1 Jesu meñe gwadeni geru jwannga ulitage 
\p  
\v 19 Jesu medu María-Magdalenage chuia, e chui domingoge, chui amañage ngabi nga train giti kwian geru jwannga kledu mo litaba ugaka jegaba mo giti kejre kwian israelita chugagwalla ulita chrullale, geru jwannga ulita kle gwa Jesu me chiu gda uñale gire ama chku gwa geru jwannga kle mo litabaske, Jesu gbi kadu geru jwannga ulitage: 
\p —¿Che kle mine? Cha takalin ba ulita ta dbe suga no. 
\p  
\v 20 Jesu gbi kadu ene geru jwanngage gire Jesu mo ko kaitu mo jigwaru tangle kaitu geru jwanngage. Gire geru jwannga ulita gwagedu Jesudi Jesu amaña, ama ulitadi nga chegu suga noare gwageni mo Chugagwalladi.  
\v 21 Jesu mo kaitu ene kwian geru jwanngage gire Jesu gerudu nabitaite: 
\p —Cha takalin ba ulita ta dbe suga no. 
\p Jesu gerudu dare kwian geru jwannga ulita ole: 
\p —Cha Ñenua cha kagu lle boi ama takalin kare kwianske, ene kaire cha ba ulita kage lle boi cha takalin kare kwian me cha gerua uñeske. 
\p  
\v 22 Jesu gerudu ene geru jwannga ulita ole gire Jesu juli batu ama giti ulita gire gerudu: 
\p —Ba Chube Oña gai ngwange ba tale.  
\v 23 Chube Oña kiralla giti ba be ñage gerule kwian agenga me no gweale ole: “Chube ba agedu me no talla mliunga, ba chege trate Chube gwa giti.” Kaire ba be ñage gerule kwian agenga me no na ole: “Chube me ba agedu me no talla mliunga, ba chege jiske Chube gwa giti.” 
\p Jesu gerudu ene gire Jesu jonga ama ulita gwage gwa. 
\p  
\v 24 Jesu chku ngeru chuiage kwian geru jwannga gdaite kada Tomás me kledu ule kwian geru jwannga na ulita ole, Tomás amaña kada Gemelo.  
\v 25 Geru jwannga kledu mo litabage Jesu medu, geru jwannga e ulita gerudu Tomás ole: 
\p —Cha ulita kledu mo litaba gire che Chugagwalla chku, cha gwagedu amadi mo gwagwa giti. 
\p Agwa Tomás me geru e gau ulia, Tomás gerudu: 
\p —Cha agali mo gwagwa giti me gwage ama ko lentigebadi clavo kote, cha agali me kobara chuge ama ko lentigu tanege, cha agali me ko chuge ama jo dagabale jigwaru tanglege, cha me ba gerua gai ulia ba kle gerule kare Jesu chkuni gwade giti. 
\p  
\v 26 Jesu medu chuiage jo tangle, chui apakege gire kwian geru jwannga ulita kledu mo litaba nakwaite gwa, chui ege Tomás kledu ule mo litaba, ama ulita kledu mo litaba ugaka jegaba kejre gire Jesu me chiu gda uñale Jesu chku gwa ama ulitaske, Jesu gbi kadu ama ulitage: 
\p —¿Che kle mine? Cha takalin ba ulita ta dbe suga no. 
\p  
\v 27 Jesu gbi kadu ene gire gerudu Tomás ole: 
\p —Tomás, kobara chúge aini cha koge clavo taneage, kaire ba ko du aini ko chuge cha jigwaru tangle jo dagaba taneage, ba me tañachugadale cha me chkuni gwade, mo ta gbége cha gai cha chkuni gwade ulia, ba me tañachugale cha me chkuni gwade. 
\p  
\v 28 Tomás gerudu no Jesu ole: 
\p —¡Ba amaña ulia cha Chugagwalla, ba ulia cha Chubea! 
\p  
\v 29 Jesu gerudu Tomás ole: 
\p —Nege ba cha gai ulia ba gwagedu chadi mo gwagwa giti lentigeba taneadi, agwa noare kwian alin bai kaire me gwage chadi mo gwagwa giti agwa geru cha giti gai ulia mo tale, kwian enedi nga be suga no cha giti kwian tale. 
\p Jesu gerudu ene ulita Tomás ole gire Jesu jo siere ama ulitage. 
\p  
\v 30 Jesu lle daga ngwale no tanre dodadu Chube kiralla giti kwian geru jwannga gwa giti, Jesu lle daga ngwale no tanre ulita dodadu me kle degaba chada ai giti.  
\v 31 Agwa chada ai chege degaba Jesu giti kwian ulita alin, kwian chada ai batenga ene chke uñale chada ai giti ulia Jesu Chube Kirolla, amaña kada Cristo kwian ulita jwannga siere ji chugege age me no gdale, kaire chke uñale kwiange chada ai giti kwian ulita bai kaire Jesu gai ulia kwian ene toi diali chui tangle Chube ole Jesu gai ulia giti. 
\c 21  
\s1 Jesu meñe kwian geru jwannga gdagukege 
\s1 chibita Tiberias kagdage 
\p  
\v 1 Jesu mo kaitu Tomáge ene gire chui jo tangle Jesu medu geru jwanngage nakwaite chibita kada Tiberias kagdage, e suiale boidu ene:  
\v 2 Geru jwannga gweale kledu ule: Simón-Pedro, Tomás, amaña kada Gemelo, Natanael, Natanael e kwian toinga una kada Canáge nga Galileage, kaire Zebedeo kirolla boke, kaire geru jwannga Jesuge na boke kledu. Kwian e ulita gdaguke kledu ule,  
\v 3 gire Simón-Pedro gerudu: 
\p —Cha be joge ngwe jwen. 
\p Geru jwannga na ulita gerudu Simón-Pedro ole: 
\p —Cha ulita be joge ule ngwe jwen ba ole. 
\p Gire ama ulita jo du tadi, jo ngwe jwen duge, ngajrege ulita kledu ngwe jwen agwa e suiale ama ulita me ko toidu ngwege ni gdaite. 
\p  
\v 4 Ngabebita nga train giti Jesu medu chibita Tiberias kagdage geru jwannga ulitage, agwa ama ulita me chku Jesu uñe nate tañachugu kwian na kledu eni chi kagdage.  
\v 5 Jesu gerudu geru jwannga ulita ole: 
\p —Cha skatemanalla, ¿ba me ko toidu ngwege gdaite? 
\p Ama ulita jaindunga: 
\p —Ni cha ko toidu gdaite ngwege. 
\p  
\v 6 Jesu gerudu ama ulita ole: 
\p —Ba gdeba ulita tke du kagda taingwli ngnagu giti, ene ba be ngwe gai. 
\p Ama ulita agedu Jesu gerudu kare, bigire ama gdeba jun kedagu ama me ñadu gdeba jwen keda, ngwe tanre kledu gdeba tadi.  
\v 7 Jesu no no geru jwannga gdaite ole, ngwe ngle giti sugedu geru jwannga gdaite ege e Jesu kle gerule ama ole, ama gerudu Pedro ole: 
\p —E che Chugagwalla amaña. 
\p Pedro geru jwannga gdaite keruchugu gerule ene “che Chugagwalla”, gire Pedro kledu ñometra mo ngnaru buliske, ama me kledu ñometra jeikeske, ama me manadu dare duge ama mo ta gbu blike joge Jesu kle ngwadi chi kagdage, gire ama mo ngama tku blike skwendu chiske jo blike kedagu Jesu nate.  
\v 8 Pedro skwendu chiske du kle ngwadi joge keda Jesu kle ngwadi bateno metro cien batre, geru jwannga na ulita chegu duge, ama ulita kira batu ngwe tanrege gdebage llagli chiga giti duge, ama ulita jo chke du ole chi kagdage,  
\v 9 gire ama ulita chiu dbige duge gire gwagedu jita teanbadi, kaire Jesu nu ngwe gbaba jita e giti ngwe kle biale gutale, gwagedu pandi kaire jita ngena.  
\v 10 Jesu gerudu geru jwannga ulita ole: 
\p —Ba ngwe jun sugeti gweale dú aini jitadi gugale. 
\p  
\v 11 Jesu gerudu ene gire Simón-Pedro jo ngwe nate jo chke duge ngwe gdeballa skatrennga du kagdage gire kira batu gdebage kedagu ngwe kweri ngle ole, gdeba gdaite, ngwe ulita ciento cincuenta y tres, ngwe ngle ngle kledu gdeba tadi, agwa gdeba me su dretenga ngwe ole, ngwe ulita chku keda gdebage.  
\v 12 Simón-Pedro chkuni geru jwannga na ulita kle Jesu ole ngwadi gire Jesu gerudu geru jwannga ulita ole: 
\p —Bai blire, bligda kle biale ba ulita alin gutale. 
\p Geru jwannga ulitage sugedu trate trate kwian kle gerule ama ole e ama Chugagwalla amaña, malen ama ulita me su geru kade Jesuge ama chema.  
\v 13 Jesu jo jitadi, Jesu pan gau kote ketu geru jwannga ulitage, kaire ama ngwe ketu geru jwannga ulitage gutadale, geru jwannga ulita blidu.  
\v 14 Jesu chkebani gwade, ai bitamaikedale Jesu medu kwian geru jwannga ulitage. 
\p  
\v 15 Geru jwannga ulita blidu ulita gire Jesu gerudu Simón-Pedro ole: 
\p —Simón, ba Juan kirolla, ¿ba ta dbe ma no ulia cha ole geru jwannga na ulitage? 
\p Pedro jaindunga: 
\p —Ima cha Chugagwalla, uñale bage cha no ba ole. 
\p Jesu gerudu Pedro ole: 
\p —Ulia ba no cha ole ba kle gerule kare gire ba kwian cha gerua gaba me sbali ba kwian ene manade no cha geruadi. 
\p  
\v 16 Jesu geru kadu nakwaite Pedroge: 
\p —Simón, ba Juan kirolla, ¿ulia ulia ba no cha ole? 
\p Pedro jaindunga: 
\p —Ima cha Chugagwalla, uñale bage cha no ba ole. 
\p Jesu gerudu: 
\p —Gire ba kwian chanu manade no cha geruadi. 
\p  
\v 17 Bitamaidale Jesu geru kadu Pedroge: 
\p —Simón, ba Juan kirolla, ¿ulia ba no no cha ole? 
\p Jesu geru amaña alin kadu bitamai Pedroge malen Pedro chegu tañachugu tanre ama ta olidu, Pedro gerudu Jesu ole: 
\p —Cha Chugagwalla, ulita uñale bage, ba cha ta uñe trate, uñale bage ulia cha no ba ole. 
\p Jesu gerudu Pedro ole: 
\p —Gire ba kwian chanu manade no no cha geruadi.  
\v 18 Cha gerule ulia ulia ba ole, ba biale gire ba mo ngama tku agali jogedale baini kaire ba tadu jogekalin ngwadi, agwa ba joge juma juma ba mi ñage age ba kledu biale kare, ba be mo chuge ngwadi mo ko lugange kwiange, kwian na be ba dbe baini ba me ta jogekalin ngwadi. 
\p  
\v 19 Jesu gerudu ene Pedro ole Jesu kle Pedro ta gbe suge Pedro be jogeda mine kaire Pedro jogeda giti kwian na be gerule no Chube giti. Jesu gerudu dare Pedro ole: 
\p —Ba mo ta gbadale chage diali cha ole. 
\p  
\v 20 Pedro jo chage Jesu ole, Pedro tiunda mo nate gwagedu geru jwannga gdaitedi kle chage ama nate, geru jwannga e ole Jesu no no, Jesu blidu ule bdagli geru jwannga ulita ole kwian bebi Jesu gai gwaleda gire, geru jwannga e gdaite blidu Jesu ngena, geru jwannga e geru kadu Jesuge chema be Jesu kete gwaleda.  
\v 21 E amañadi Pedro gwagedu chie Pedro nate gire Pedro geru kadu Jesuge geru jwannga e giti: 
\p —Cha Chugagwalla, agwa geru jwannga kle chie cha nate ai, ¿be boi mine ama ole bdagli? 
\p  
\v 22 Jesu jaindunga: 
\p —Cha takalin cha ñage ama jige gwade toi aini cha chieni chuiage alin, e giti ba me tañachugadale, ba tañachugadale mo alin giti mo ta gbe chage cha ole diali. 
\p  
\v 23 Jesu gerudu ene Pedro ole, Pedro tañachugu Jesu kle gerule geru jwannga gdaite e mi jogeda, gire geru e chagedu kwian ulita Jesunuske gerule geru jwannga gdaite e mi jogeda. Agwa Jesu me kledu gerule ene Pedro ole Pedro kle tañachuge kare, agwa Jesu gerudu alin allabi: “Cha takalin cha ñage ama jige gwade toi aini cha chieni chuiage alin, e giti ba me tañachugadale.”  
\v 24 Geru jwannga gdaite e, e cha kada Juan, cha chada ai deganga, cha gwagedudi boidu Jesu ole cha gwa giti cha kle e trage kwian na ole, kaire Jesu agedu giti cha degu chada ai giti, uñale chage kaire uñale kwian na tanrege cha kle gerule ulia Jesu giti.  
\v 25 Jesu lle tanre dodadu nga dba ai giti, lle e ulita me kle degaba chada ai giti, chada e ulita dege gdaite mo kaire kaire Jesu agedu giti ulita cha tañachuge chada e ulita me joge chke no nga dba ai giti. Lle tanre tanre Jesu bo nga dba ai giti, e ulita me kle degaba chada ai giti agwa geru no trate tanre Jesu giti kle degaba chada ai giti kwian ulita alin.