\id JAS - Buglere NT -Panama 2008 (DBL -2013) 
\h SANTIAGO 
\toc1 Santiago Nu Chada Degaba 
\toc2 Santiago 
\toc3 Stg 
\mt1 Santiago Nu Chada Degaba 
\mt2 Carta de Santiago 
\ip Jesucristo daballa soli chebi giti kadakle Santiago ama chada ai degu ama bitalla kwian israelita Jesucristo gerua ganga alin kwian ta gbagda toidale Chube takalin kare. Santiago kledu toi una Jerusalénge, ama daba Chubenu ulita chugagwalla una ege. Santiago bitalla israelita kledu toi nga tanrege chagengale daba na jwiage, Santiago chada ai degu kagadale nga kaire kairege ulita kwian israelita Chubenu kledu toi ngwadi. 
\ip Chada ai giti Santiago kwian Chubenu ta gbu ai kare: Kwian bai kle mo ta gbe ulia ulia Chube ole kle mo ta gbe ulia ulia Jesucristo gerua gai ulia, kwian ene me ñage toi kwian me Chubenu kare, kwian ene mo ta gbadale toi no trate Chube takalin kare toidale no daba ulita ole daba chudaboi diali. Kwian Chubenu me ñage gerule alin allabi ama Jesucristo gerua gaba agwa kaire ama toidale no trate Chube takalin kare age no diali daba alin, ene be suge trate kwian na ulitage ama Chubenu ulia ama Chube gau mo Chugagwallale. 
\c 1  
\s1 Santiago gbi kage chada giti kwian israelita 
\s1 Chubenu nga ulitamu alin 
\p  
\v 1 Cha Santiago chada ai dege ba ulita kwian israelita mne gdataboko giti gdaboke alin nga baini kaire ba ulita kle toi ngwadige: 
\p Cha lle boanga Chube alin kaire cha Chugagwalla Jesucristo alin cha ama gerua dbanga kwiange, cha gbi kage ba ulita kwian israelita Chubenu alin. 
\s1 Kwian ulita Chubenu me ta dbadale olire ama kle 
\s1 boi daga ngwaleske, ma no ama ulita mo ta dbadale 
\s1 jage ta no ole Chube kirallaske 
\p  
\v 2 Cha daballa cha ibotea Jesucristo giti, cha no no ba ulita ole, ba ulita Chube gerua Jesucristo giti gaba ulia, cha takalin suge bage ba kle boi daga ngwaleske ba ulita me mo ta gbadale olire, agwa ba mo ta gbadale nga suga no Chube ole ba ulita kle boi tanre daga ngwaleske.  
\v 3 Ba ulita mo ta gbadale jage boi daga ngwaleske mo ta gbe chege chage Jesucristo gerua gai diali gwangerugu, ba ulita mo ta gbe chege ene jage boi daga ngwaleske, be suge bage boi dagaleske Chube kle ba chudaboi diali ba kira gbe, ene ba ulita geru jwen jage ba kle boi dagaleske Chube takalin kare, ene ba mi tañachuge diali tanre ba kle boi giti.  
\v 4 Boi daga ngwaleske ba me ta chegedale skwatige ni skochie, ma no ba mo ta gbadale jage diali ta no ole Chube kirallaske, e ba chudaboi chage ma no Chube ole gire ene ba ta be chege ulita no trate Chube takalin kare, ene ba ta be kle biale diali jage ulita ta no ole ba boi ulitaske. 
\p  
\v 5 Kaire cha gerule ba ulita ole, ba baige me chke uñale nate ba agedale mine lle kle boi gweale giti, bage suge ba ta me chke ngle mine age ma no, ba mo ta gbadale tangle e kade Chubege, ene Chube ta e kete bage, ene ba tachke ba agedale giti ulita, ene Chube be ba ta gbe chke ngle be ba chudaboi ba ta ngle kadu kare amage, ene ba be mo ta gbe age Chube takalin kare. Chube mi tañachuge gweale me no badi ba ta kadu amage giti, Chube me ta skwatige ba chudaboi ta kete bage ba kade amage gire, ama diali takalin ba gerule ama ole chudaboi kade amage.  
\v 6 Ba kle chudaboi kade Chubege, ba e kadadale ta giti, ba mo ta gbadale suge ulia Chube be ba chudaboi be lle kete bage ba kle lle kadege kare, agwa ba me tañachugadale Chubedi mo tale: “Cha kle lle kade Chubege agwa me uñale chage Chube be age cha alin o me.” Ba me tañachugadale ene, ba me mo ta gbe tañachuge gwangerugu gwanaskuda ba lle kade giti Chubege. Cha gerule ulia ba ole, kwian bai kaire kle lle kade Chubege me mo ta gbe ta gbaitre alin ole, kwian ene salengwli mleuda kle ble chuga dbe chite ongoru ongoru kare.  
\v 7-8 Kwian bai kaire ta salengwli cha kle gerule ble giti kare, kwian ene diali kle tañachuge nege dale nganake suialin dale nganake diali kle mo ta blite. Kwian me kle mo ta gbe tañachuge lle gdaitre alin giti allabi, kwian e me kle Chube gerua gai ulia ama me kle mo ta gbe Chubege age Chube takalin kare. Ulia ulia kwian e alin Chube me age no, Chube me kwian chudaboi kwian kle tañachuge ta gbaboke kbiale tañachuge gwangerugu tañachuge gwanaskuda giti. 
\p  
\v 9 Cha gerule ulia ba cha bitalla Jesucristo giti ole, kwian ulita bai kaire me lle molen daba na lle tanre molen kare, kwian ene ulita me mo ta gbale olire ama me lle molen giti, sugedale amage Jesucristo giti Chube kle age no ama alin negege tangle ama kle boi daga ngwaleske Chube ama chudaboi kaire chui bdaglige ama be kle Chube ole chui tangle dale Chube be age no ama alin. Chube gwa giti kwian ene ñanaske tanre, malen e giti kwian ene mo ta gbale toi nga suga no ole diali.  
\v 10-11 Kaire kwian ulita bai kaire lle molen tanre mo ta dbadale nga suga no modi ama kle boi daga ngwaleske. Ama me mo ta dbadale olire lle gweale monu kle chege me no ama ole gire. Sugedale kwian enege lle ulita kle ama ole e kle sugetidale alin nga dba ai giti, lle e me ñanaske Chube gwa giti, agwa kwian ta ma ñanaske Chube gwa giti. Kwian ulita bai kaire lle molen tanre ama chege tañachuge lle e alin giti kwian e salengwli ngaudajralla kare. Ngauda kle jrachie ngaudajralla me ñage chege diali ngauda ole. Chui gbaite chui boi jute chuira kote ngauda kwenga, ngaudajralla kle junbatenga gire jwatenga dba, ngaudajralla e me ñage chege no diali, ngaudajralla tige sugetidale no, sugeti ngaudajralla kwenga me kle chege no ngeru kare. E kare ene kwian bai kaire lle molen tanre me kle tañachuge ama be boi mine giti chui gwealege, me kle mo ta gbe tañachuge Chube giti, gire ama jogeda chuiage ama llea ulita chege ama nate dbia giti, ama llea e ulita chege sugekare amage. 
\p  
\v 12 Kwian bai kaire nu Chube gerua Jesucristo giti gaba kle mo ta gbe jage ta no ole Chube kirallaske ama kle boi daga ngwale ulitage ama me kle ta jogenga Jesucristo geruage, kwian ene alin Chube age no. Kwian e kle mo ta gbe me skochie me skwatige, agwa ama kle jage ulita ama kle boi gitige ta no ole, kaire ama kle mo ta gbe me age me no gweale ama takalin kare, kwian e kle mo ta gbe ene ñanale Chube be kwian e gbe toi diali chui tangle Chube ole ule nga ngaña giti Chube nu geruba kare kwian bai kaire mo ta gbe Chube ole giti. Malen nga suga noare kwian edi Chube be age giti ama alin. 
\s1 Ni bitaite Chube kle mo chuge kwian amanu ole 
\s1 kwian ta gbe age me no 
\p  
\v 13-14 Kwian gweale Chubenu kle boi daga ngwale, boi daga ngwale eske ama me tañachugadale ai kare Chubedi: “Chube kle cha gbe boi daga ngwale, ama kle mo chuge cha ole age me no giti malen cha kle tañachuge age me no.” Kwian me tañachugadale ene Chubedi. Chube me suge moge mo gbe age me no ni sidri, Chube no trate ulita. Malen Chube me takalin kwian amanu age me no, gire che me ñage tañachuge ¿mineade Chube be mo chuge kwian amanu ole age me no giti? Chube me mo chuge kwian ole age me no. Agwa kwian agali kle mo ta gbe age me no mau tale, ama kle tañachuge age me no gire ama age me no ama kle tañachuge kare. Gire e me kle gerule Chube kle kwian ta gbe age me no, me dale, kwian agali talla me no kle tale e kle kwian ta gbe age, Chube me kwian ta gbe age me no malen Chube me takalin ni kwian gdaite amanu age me no ama dollale.  
\v 15 Kwian kle tañachuge mo tale age gweale me no, gire bdagli kwian kle age me no Chube dollale ama agali kle tañachuge kare. Age me no e giti ama kle mo gbe jiske agali Chube gwa giti, ama be chege boi daga ngwale sugekare Chubege ama mo ta gbu age me no gdale. 
\p  
\v 16 Cha gerule ba ulita cha bitalla Jesucristo giti ole, cha no ba ulita ole cha me takalin ba agali mo anblite ngwale tañachuge Chube kle ba ta gbe tañachuge age me no, Chube me age ene.  
\v 17 Ulia Chube me kle age ene dale, Chube no trate malen ulita kle boi no che ole, e che Ñenua Chube kle age che alin, lle ulita no bai chke chege, e chie Chubege, diali Chube kle age no che alin kle lle no kete chege. Chube nga ulita dodanga ama nga gbu chrale nga ngaña giti ama dai gbu ama beu gbu ama chui gbu chratigenga nga ulitage nga dba ai giti, Chube agedu ene no che alin ulita. Chube diali no ama me kle mo ta blite nganake, ama kle chege amaña diali, ama diali kle age no che kwian amanu alin.  
\v 18 Malen Chube mo gerua ulia Jesucristo giti gbu che alin, che geru e gai ulia gire Chube che gai mo oliale che gbe toi diali chui tangle ule ama ole. Chube takalin che chege amanu ngerutabi lle ulita ama dodaduge, Chube takalin talla no ene che alin malen ama geru ulia amanu jigu che ulita alin. 
\s1 Kwian Chubenu agedale ulita Chube gerua 
\s1 kle gerule kare 
\p  
\v 19 Cha bitalla ulita Jesucristo giti, cha noare ba ole, ba ulita ole cha gerule, ba gdaite gdaite kaire kaire mo ta gbadale me gerule blike daba ole ba kle tañachuge kare, ma no ba kledale biale diali daba keruchuge no ngeru, daba kle ba tke tangle Chube geruage ba ama keruchuge no Chube gerua jwen no amage. Kaire ba me mo ta gbe skochie blike daba na ole,  
\v 20 kwian mo ta gbe skochie diali, kwian ene me age no Chube takalin kare, Chube me no kwian talla ene ole.  
\v 21 Malen cha gerule ba ulita ole, ba mo ta gbadale age me no ulita chuge ngwadi sugekare bage, ba kle age gweale me no ba e ulita chugadale ngwadi gire mo ta gbadale kiraske ta no ole trate Chube gerua jo ketaba bage kle ba tale giti, ba mo ta gbadale gwangerugu geru e gai ulia, Chube gerua e kle ba tale, geru e ulia kiraske, geru e giti Chube ba jwen siere ji chugege age me no gdale, ama gerua ba ta gbe chage sugekare age me noge. 
\p  
\v 22 Ba me Chube gerua keruchuge alin allabi, me dale, kaire ba mo ta gbadale age ulita geru e gerule kare. Ba geru e keruchuge alin allabi ba kle tañachuge ba kle age ulita no trate Chube gwa giti, gire ene ba agali kle mo anblite, ba me kle age geru ulia gerule kare.  
\v 23-24 Kwian bai kaire kle geru keruchuge alin allabi me kle age geru e gerule kare, kwian ene salengwli kwian kle gwage mo gwadi chi oñage kare kle joge siere chi oñage gire kle ta jogenga ulita ama gwa mine, e kare ene kwian bai kaire kle Chube gerua keruchuge alin allabi me kle Chube gerua gbe gdadi, ama ta jogenga geru kle gerule mine ama alin.  
\v 25 Agwa kwian bai kaire kle Chube gerua keruchuge gire me kle ta jogenga geru e kle gerule giti, ama mo ta gbe age ulita diali geru e no trate kle gerule kare, kwian ene ulita be toi nga suga no ole ama kle mo ta gbe age no Chube gerua kle gerule kare giti, Chube be age no ulita kwian e alin. Chube gerua e kle kwian ta gbe nga suga no ole, geru e kiraske, geru e giti kwian tien gitiru ji chugege age me no gdale. 
\p  
\v 26 Kwian bai kaire kle suge moge kle age no trate Chube gwa giti Chube gerua kle gerule kare, agwa kwian me kle mo tallade ama kle gerule me no sugaska ama kle gerule me no daba nadi ama takalin kare, kwian kle age ai kare, kwian ene kle mo anblite naskuni agali. Ama me kle age no trate dale Chube gerua kle gerule kare, ama kle mo gbe age me no Chube gwa giti, me kle age no ulia.  
\v 27 Che agekalin no trate ulia Chube che Ñenua gwa giti, che agedale ai kare: Kirogwa oli chegeba che ama chudaboadale kaire muinga chegeba oli mo ñengulallage che muinga ene chudaboadale. Che kwian oli ulita chudaboale ta giti ama manadale no, kwian ai kare ulita kle boi daga ngwale che kwian ene ta gbale nga suga no ole ama chudaboi diali ta no ole. Kaire che agali chagedale ta giti nga dba ai giti, che mo manadale no trate me age me no ni sidri kwian me Chubenu kle age me no kare. Che ta agekalin diali Chube takalin kare, gire ene che agedale chada ai kle degaba gerule kare. 
\c 2  
\s1 Kwian Chubenu mo ta dbadale no 
\s1 daba ulita ole salengwli 
\p  
\v 1 Cha bitalla Jesucristo giti, ba ulita kle che Chugagwalla kweri Jesucristo gai ulia mo Chugagwallale, ba me ñage mo ta dbe no kwian gweale alin ole gire kwian na ole ba me mo ta dbakalin no, ba me takalin ni sidri mo oinnga amage. Ba me ñage age ene, ba agedale no kwian ulita alin salengwli.  
\v 2 Ale gerule ba ulita kle mo lite Chube geruadi gire kwian gdaboke joge chke ba kle mo litaba ngwadi. Kwian gdaite mo ngama tkaba ñometra no noske kaire ama kle chage lle orole ñanaske gwadenga no dbe mo koge. Kwian na gdaite me kle chage mo ngama tkaba no kwian gdaite kare, ama kle chage ñometra judaske ama me lle molen dale.  
\v 3 Gire ba kwian mo ngama tkaba noare gai ngwange no, ba gerule ama ole ene: “Ba toi dba aini nga no tratege.” Agwa kwian na me lle molen kle chage mo ngama tkaba ñometra judaske, ama ole ba gerule ene: “Ba chege jagenga gdate aini ugakage o kaire ba ñage toi dba dbiske.” Ba gerule ene gire ba me kle ama gai ngwange no ba kle kwian lle molen gai ngwange kare.  
\v 4 Ba age ene ba me kle age Chube takalin kare. Ba kle mo ta dbe no daba lle molen kle chage mo ngama tkaba no ole agwa ba me kle mo ta dbe no daba me lle molen ole. Ba age ene, ba kle age me no Chube gwa giti mo gbe jiske age giti. Ba me mo ta dbe me no daba ole ba gwage amadi giti alin allabi gire. Chube me takalin ene, Chube takalin ba mo ta dbadale no ulita salengwli daba ulita ole me mo gbe ma kweri daba na me lle molenge. 
\p  
\v 5 Cha bitalla ulita Jesucristo giti, ba ulita cha keruchuge no cha be gerule giti ba ole. Kwian bai kaire me lle molen tanre nga dba ai giti kwian e Chube nu gaba ama alin ama gerua Jesucristo giti gai ulia, kwian e me kle chege dale me lle molen. Chube gwa giti kwian e lle molen ma ngle kwian lle molen tanrege nga dba ai giti. Kwian e me lle molen ñage chege lle molen nga ngaña giti Chube nu geruba kare kwian ulita unsuialin tangle ole kare, kwian bai kaire no Chube ole kaire kle age Chube takalin kare kwian ene alin Chube be age no nga ngaña giti, kwian e be toi Chube ole diali chui tangle.  
\v 6 Agwa ba ulita kle age nganake daba Chubenu me lle molen ole ba ulita me kle daba gai dage dale, ba kle kwian me lle molen gbe soli me ñanaske kwian na gwa giti, ba kle ama gbe ibule kwian ngeru. Agwa kwian igi molen tanre me Chubenu ba kle ama gai dage ba diali chegekalin no amage. ¿Mineade me suge bage kwian lle molen tanre me Chubenu kle mo gbe ma kweri bage, ama kle ba gbe boi daga ngwale jiske ba chugagwalla kweri nga dba ai giti gwa giti? ¿Ni suge bage ama kle age ba ole giti? Kwian lle molen tanre kle age diali ba ole ene, agwa ba kle mo ta dbe no diali ama ole ama gai dage, kwian bai kaire me lle molen me kle age me no ba ole ene, agwa ba me kle mo ta dbe no ama ole, ba kle mo ta dbe ama dollale.  
\v 7 Kaire sugedale bage kwian lle molen tanre kle mo tke dole che Chugagwalla Jesucristo ole ama kle Jesucristo kalla jwen kate gerugda me no kwian na ole. 
\p  
\v 8 Ba ulita Chubenu mo ta dbadale no daba ulita ole salengwli, ba age ene ba kle age Chube gerua degaba unsuialin gerule kare, chada e gerule: 
\q1 “Ba mo ta dbadale no daba na ulita ole salengwli ba no mo ole naskuni kare.” 
\m Chube gerua degaba unsuialin gerule ene. Ba age no ulita geru e kle gerule kare ba kle age no Chube takalin kare.  
\v 9 Agwa ba me mo ta dbe no salengwli daba ulita ole ene ba kle age me no, kaire ba kle mo gbe jiske Chube gwa giti ba me kle age Chube gerua gerule kare.  
\v 10 Ulia kwian gweale mo ta gbe age ulita Chube gerua degaba kle gerule kare, agwa ama age me no geru gbaitre alin dollale, kwian ene kle chege jiske, ama age me no geru gbaitre alin dollale agwa e giti ama kle chege jiske geru ulita giti salengwli ama age me no geru ulita dollale kare.  
\v 11 Chube agali geru gbu kwian ulita alin ai kare: 
\q1 “Ba onbre mo jwanba me mo chuge ke giti muinga na ole, ba muinga mo jwanba me mo chuge ke giti onbre na ole.” 
\m Kaire Chube geru na gbu ai kare: 
\q1 “Ba me daba na gweda.” 
\m Chube geru gbu ene kwian ulita alin. Cha gerule ba ulita ole, ba ulita mo ta gbe me chage ke giti muinga onbre ole onbre muinga ole, agwa ba mo ta gbe daba gweda, ba kle age me no geru ai gbaboke dollale, ba age ene ba chege jiske Chube gwa giti. 
\p  
\v 12 Ba ulita gerudale ta giti kaire tañachugadale ta giti toi no Chube gerua degaba kle gerule kare. Ba ulita Chube gerua gaba ulia Chube gerua e giti ba tien gitiru ji chugege agedu me no gdale, agwa kaire sugedale bage ba age gweale me no daba na ole Chube gerua dollale gire Chube be ba gbe ji chuge ba agedu giti. Malen ba mo ta gbadale toi no daba ulita ole kaire gerule no trate diali ulia daba ulita ole. Ba age ene daba ulita ole Chube takalin kare gire Chube mi ji gbe ba giti dale.  
\v 13 Kwian bai kaire me kle tai dage dabage ama kle daba chuge ngwadi boi daga ngwale gballa, kwian ene giti Chube be ji gbe chui bdaglige, ji chuge chuia chke gire ni Chube be tai dage kwian ege salengwli kwian e me taidu dage daba nage kare, kwian e daba chugu ngwadi boi daga ngwale gballa e gdale Chube be ji gbe ama giti mno. Agwa kwian bai kaire tai dage dabage ama age no daba alin daba kle boi daga ngwale gire, kwian ene be chege nga suga no ole Chube gwa giti chui bdaglige. 
\s1 Kwian gerule ama Chube gai ulia kaire kwian 
\s1 agedale Chube takalin kare 
\p  
\v 14 Cha bitalla ulita Jesucristo giti, cha geru kade bage, ¿ba be llema no gai gerule alin ba kle mo ta gbe ulia Chube ole gire ba me kle age Chube gerule kare? Ba mo ta gbe ulia Chube ole alin agwa me mo ta gbe age no, ¿ba tañachuge ta e ba jwen siere ji chugege age me no gdale? Me dale. Ba kle gerule ba mo ta gbaba ulia Chube ole gire ba me daba chudaboakalin, ene ba kle gerule ngwale ba me age ba gerule kare.  
\v 15 Ba gwage daba gweale Jesucristo gabadi me lle molen me ñometra molen mo ngama tkagda ni bligda molen gutale, gire ba me ñometra no kete amage mo ngama tkagda ni ba bligda kete amage gutadale,  
\v 16 gire ba gerule alin ama ole: “Ba joge no, ba ñometra no tke modi kaire ba blire no ba toi no.” Ba gerule alin allabi ene ulita ama ole agwa ba me lle kete amage dale ba me takalin ama chudaboi ama gbe toi no, gire ¿lledale ba gerule ba kle mo ta gbe ulia Chube ole? Ba kle gerule ngwale.  
\v 17 Ba kle gerule ba mo ta gbe ulia ulia Chube ole agwa gire ba me kle age Chube takalin kare me daba chudaboakalin ene ba kle gerule ngwale alin, ulia ba mo ta gbaba ulia Chube ole, gire ba agedale ulita Chube gerua gerule kare.  
\v 18 Ba gweale ñage gerule ai kare daba ole: “Ba kle mo ta gbe ulia Chube alin ole agwa me kle age gweale daba alin. Cha kle mo ta gbe age no daba na alin allabi agwa me kle mo ta gbe ulia Chube ole.” Ba ñage gerule ene, agwa ba kle gerule ngwale. Cha gerule ba ole, cha takalin ba kwian gdaite kaite nate chage ama kle mo ta gbe ulia ulia Chube ole alin allabi agwa me kle age no daba na alin Chube takalin kare. Cha tañachuge ni kwian gdaite e kare kle. Agwa cha kle age no daba na alin giti Chube takalin kare, e giti bage suge trate cha kle mo ta gbe ulia ulia Chube ole.  
\v 19 Ba ulita kle gerule Chube gdaitre alin ulia allabi kle, e giti ba kle tañachuge trate, agwa tañachuge e kare giti alin allabi me kle gerule ba kle mo ta gbe ulia Chube gdaitre alin ole. Cha gerule ba ole, che dolla Satanás chudaboangalla ulitage suge trate Chube gdaitre alin ulia kle, ama ulita kle kennga tanre Chubedi ama kle jirenga Chube chrullale ama kle age me no giti, agwa ama me no Chube ole. 
\p  
\v 20 Cha gerule ba ulita ole, nga ngwale ba chuga giti ba kle tañachuge nga jereske. ¿Ulia ngamangire nga be suge ba chuga giti? Che mo ta gbe ulia Chube ole alin gire che me age no daba alin daba chudaboi gire ene ulia chege salengwli che me kle Chube gai ulia kare mo Chugagwallale. Che me ñage tañachuge che mo ta gbe ulia Chube ole alin allabi gire ene che ta kle no Chube gwa giti. Sugedale chege che kle mo ta gbe ulia Chube ole kaire agwe che agedale no daba na alin Chube takalin kare.  
\v 21 Ba tañachugadale che enusulian oña unsuialin tangle Abraham giti, ¿ama agedu mine gire ama chegu no Chube gwa giti? Abraham mo ta gbu age ulita Chube gerudu ama ole kare gire e giti Abraham chegu no trate me jiske Chube gwa giti. Abraham mo gbu biale ama kirolla Isaac gweda Chube gwa giti bda kare Chube gerudu Abraham agedale kare.  
\v 22 E giti suge chege Abraham mo ta gbu ulia Chube ole Chube gai ulia kaire agwe Abraham agedu ulita Chube tadukalin kare. Malen Abraham agedu giti Chube Abraham kira gbu Chube gagda ulia ma kiraske gwangerugu.  
\v 23 Chube gerua degaba unsuialin gerule Abraham mo ta gbu Chube gai ulia giti, chada e gerule: 
\q1 “Abraham mo ta gbu ulia Chube ole Chube gai ulia malen Chube gwagedu Abrahamdi no trate me jiske Chube gwa giti.” 
\m Chube gerua degaba unsuialin gerule ene Abraham giti. Abraham mo ta gbu ulia Chube ole malen Chube Abraham gau mo skatemanallale no. 
\p  
\v 24 Abraham giti sugedale trate bage Chube kle kwian gbe no trate mo gwa giti kwian kle ama gai ulia giti kaire kwian kle age no Chube takalin kare giti.  
\v 25 Kaire agwe ba ñage tañachuge muinga chagenga kwian onbre tanre ole unsuialin tangle kada Rahab giti. Chube gwagedu Rahabdi me jiske kare no trate Chube gwa giti Rahab agedu giti. Rahab kwian israelita gweale jo nga chra ite nate gau ngwange no mo ullage, Rahab kwian e chudabo no ama kwian e ta gbu joge skwlenre jon na kareni ama dolla ngeru. E giti sugedu no Chubege Rahab agedu ene giti.  
\v 26 Ulia cha gerule ba ole, kwian jogekeda gire ama kwara alin chege ama ta me ama lle ngwale kare. E kare ene kwian bai gerule ama kle mo ta gbe ulia Chube ole gire me kle age Chube takalin kare, kwian ene chege salengwli kwian jogebakeda ta me chege jwate kare. Ngwale ama kle gerule ama mo ta gbe ulia Chube ole gire me age no daba alin Chube takalin kare, kwian ene me chege trate Chube gwa giti dale. 
\c 3  
\s1 Kwian Chubenu mo talladale geru ulita 
\s1 ama kle gerule giti 
\p  
\v 1 Cha bitalla ulita Jesucristo giti, cha gerukalin ba ole ulita ta no giti ba ta gbe, che me mo gbadale daba na tkanga tangle Chube gerua giti che takalin kare gire me age Chube gerua kle gerule kare. Che me daba na ulladalenga lle gweale ama kle age giti gire che me kle age kaire agwe no trate Chube takalin kare che kle daba na tke tangle kare. E me no. Uñale chege che bai kaire daba tke tangle Chube gerua giti gire me toi no trate age ulita Chube gerua kle gerule kare, che ene giti be joge ji gbaba ma tirare kwian nage chui bdaglige.  
\v 2 Sugedale chege che ulita diali kle age gweale me no kle gerule gweale me no, ulia diali che kle boi ene. Agwa cha gerule ulia ba ole, kwian bai me kle gerule me no ni sidri, kwian ene kare ulia no trate Chube gwa giti, kwian ene kare kira molen mo ta gbe age no no ulita me mo chuge ngwadi age me no ni sidri. 
\p  
\v 3 Cha geru gbamai ñachugeda ai kare bage ba ta gbe geru che gerule giti: Che chage ja giti che takalin ja age ulita che takalin kare gire che kle giska gbe ja kate ene che ñage ja dbe baini kaire che takalin ja joge ngwadi. Ulia giska soli agwa che ñage ja jegwale gateda ulita giska e giti.  
\v 4 Che ñage tañachuge kaire agwe du kweri kwian kle chage bleske giti, du e kweri kweri kaire mleuda kle tiennga tanre kira giti kle du e dbe nganake ngnagu gire kwian du dbanga kle du e bliteni gwanaskudani, ama kle du gbe chage lle soli sidri mebi kada timón giti baini kaire ama takalin du joge kare.  
\v 5 E kare ene kaire agwe che kle boi che kwira ole. Ulia che kwira sidri mebi agwa che kwira giti che kle mo gbe gerule gweale me no diali, che gerua giti che kle mo gbe jiske tanre Chube gwa giti. Che kwira salengwli jita kare. Jita tan soli sidri mebi giti che ñage nga bataba kweri guge ulita kaire ñage gli kweri guge ulita ni che ñage jita gweda.  
\v 6 E kare ene che kwira giti che kle gerule tanre me no daba nadi ene che kle chege jiske tanre Chube gwa giti che gerua e kbiale. Che dolla Satanás kle che ta gbe gerule me no diali, che kle gerule me no giti che agali kle boi daga ngwale che kle chage toi gwade gire, kaire che kle gerule me no giti che kle daba gbe boi daga ngwale, daba chege skochie diali che gerudu giti. Lle ulita kle joge me no che kwira kbiale. 
\p  
\v 7 Ulia kwian ñage lle bdale tanre kle toi ngaske gbe anleda, bda ko giti, bda ji giti, bda chage dba kde kwara giti, lle ngwere toinga chiske, lle bdale e kare ulita kwian ñage gbe anleda.  
\v 8 Agwa ni kwian gdaite ñage mo kwira gbe ngwedi diali me gerule ni geru gbaite me no daba nadi. Chui gwealege kwian ulita kle mo chuge ngwadi gerule me no dabadi, kwian gerule giti kwian kle daba gbe boi tanre daga ngwale tirare salengwli jorisi age kwian ole kare. Jorisige kwian lentige kare, ene kwian daba gbe boi dagale gerule me no dabadi giti. 
\p  
\v 9 Che kwira giti che kle gerule no che Ñenua Chube che Chugagwalla giti kaire che kle mo gate ama giti. Agwa kaire che kwira e amaña giti che kle gerule me no dabadi, ni che kle tañachuge Chube kwian ulita dodadu mau kare, gire che kle gerule me no kwian edige.  
\v 10 Che kle gerule no Chube giti kaire agwe che kle gerule me no daba nadi ama oña tke daga ngwale me no. Ba cha bitalla Jesucristo giti, cha gerule ba ole, che kwian Chubenu me gerudale ene ai kare dabadi, e me no me no Chube gwa giti.  
\v 11-12 Che tañachugadale ai giti, ¿chi no trate kle chie ule chi sugaska me no ole chi gwagwa gbaitre alinge? Me dale, chi gwagwa gbaitre alinge chi no trate me ñage chie ule chi sugaska ole. Kaire gli kada higuera amaña gba kadakle higo, ¿ba tañachuge gli amaña ñage gbachie gligba kada aceitunale? ¿Kaire ba tañachuge uva giskalla ñage gbachie higole? Me dale, gli gdaite kaire kaire kle gbachie. E kare ene che Chube gerua gaba ulia che gerudale no diali Chube giti kaire daba giti, che mo kwira manadale no ene che me gerule me no dabadi. 
\s1 Chube alin allabi ñage ta kete kwiange 
\s1 toi no Chube takalin kare 
\p  
\v 13 Cha gerule ba cha bitalla ulita Jesucristo giti ole, ba gweale suge moge ba ta ole tanre gire ba mo ta gbadale toi no trate ulita kwian na gwa giti, ba mo gbadale ta no ole suge moge me ma kweri daba nage, bage sugedale ba gballa me ñage mo ta gbe chke uñale age no ulita Chube takalin kare, Chube alin allabi ñage ba ta gbe ngle.  
\v 14 Agwa ba mo chuge ngwadi mo ta dbe me no daba nadi lle dabanu giti, ba takalin chege lle dabanu ole mau alin, kaire ba kle mo chuge daba ole ta me no ole kwian gwa gbagda modi alin allabi, ba kle age ene gire ba me ta ole. Ba ene ba me sugedale moge nga suga no ole mo sobade daba nadi gerule ba kwian ta ole, ba gerule ene ba kle sole ngwale ba me kle geru ulia gbe chke uñale.  
\v 15 Ba mo ta dbe age ulita ene gire sugedale bage Chube me kle ba ta gbe ene dale ba kle tañachuge kare, ta e ulita ngwale sugetidale alin ba kle nga dba ai giti gire, ba kle tañachuge kwian me Chubenu kle tañachuge diali kare, che dolla Satanás kle ta e kete bage.  
\v 16 Kwian Chubenu bai kle mo ta gbe chage kwian me Chube uñe kare Satanás kle ama ta gbe kare, kwian ene kle mo ta dbe me no daba nadi lle dabanu giti, ama takalin lle dabanuge mau alin, kaire ama kle mo chuge daba na ole ta me no ole kwian gwa gbagda modi alin allabi. Kwian Chubenu mo ta dbe ene daba Chubenu na ulitaske gire ama kbiale lle ulita be joge me no kwian Chubenu ulitaske, kwian Chubenu ulita be kle mo tke dole modi ongoru ongoru mi takalin toi no ule modi daba na ole, be age tanre me no daga ngwale. 
\p  
\v 17 Agwa kwian Chubenu bai kle Chube chuge ngwadi ta kete amage toi trate ta ole Chube takalin kare, kwian ene kle mo ta gbe toi no trate daba na ulita gwa giti Chube takalin kare, me age me no ni tañachuge me no mo tale, kwian ene kle age ai kare: Ama mo ta gbe chege ta no ole daba na ulita ole, me kira bate daba ole. Ama mo ta gbe age no daba na alin diali daba gai dage daba chudaboi no. Ama mo ta gbe suge tai dage daba nage age no diali daba na alin. Ama kle mo ta gbe daba ulita gai dage no salengwli, age no daba ulita alin salengwli. Ama mo ta gbe gerule ulia ta no ole daba ole diali, me gerule sugekare dabadige.  
\v 18 Kwian Chubenu bai kaire takalin daba Chubenu ulita toi no modi, kwian ene mo ta gbadale toi no ulita cha kle gerule kare chada ai giti, gire ene daba na be gwage kwian edi kwian e kle toi mine gire daba ulita be mo ta gbe toi no modi ongoru ongoru ta no ole kwian e kle toi kare, gire ene kwian Chubenu ulita be chege toi no modi ule kwaitre alin. 
\c 4  
\s1 Kwian Chubenu me chegedale age me no 
\s1 kwian me Chubenu kare 
\p  
\v 1 Ba Chubenu ulita tachkedale ba kle toi giti, ba ulita tañachugadale ¿mineade ba ulitaske kle toi kira bate modi diali toi ta skochie daba ole? Ba ulita tale talla me no tanre kle, talla e kle ba ta gbe age diali ba takalin kare, talla me no e me ba chuge ngwadi age no daba ulita ole Chube takalin kare.  
\v 2 Ba takalin llege agwa me ñage ko toi lle ba takalinge kare, gire ba kle mo ta gbe age me no daba dollale lle e gai mau alin, ba mo ta gbe daba gweda ene ba tañachuge ba ñage lle molen. Ba ulita mo ta gbe age ene me no daba na ole, agwa ba me ñage ko toi llege mo alin. Ba kle mo ta dbe semale daba ole lle gweale dabanu giti, ba kle tañachuge me no dabadi lle gweale gdale, gire ba me ñage lle e gai ba kle tañachuge kare malen ba kle mo kirachuge daba ole kaire mo bate daba ole lle e giti, agwa ba me ñage ko toi lle ba takalinge. Cha gerule ulia ulia ba ole, ¿mineade ba me kle lle kade Chubege ta giti ta no ole? Ba ulita me kle lle kade Chubege mau alin Chube takalin kare malen ba me lle e molen ba takalin kare.  
\v 3 Chui gwealege ba kle lle kade Chubege agwa ba me kle lle kade jumale ta ole, ba kle lle kade Chubege ta me no ole malen ba me kle ko toi llege ba takalin kare. Ba takalin lle ege mau alin allabi mo ta gbagda nga suga no ole kaire kwian gwa gbagda modi, Chubege uñale trate ba ta mine malen e giti Chube me kle lle kete bage ba kle kade kare.  
\v 4 Cha gerule ba ole, ba ulita kwian Chube gerua ganga ulia agwa ba kle age me no Chube dollale ba kle chage age nganake Chube tallage, ba ta skatekalin kwian me Chube uñe ole, ba ta chegekalin age diali kwian me Chube uñe kle age kare, ba kle age ene ba kle mo tke dole Chube ole.  
\v 5 Ba tañachugadale Chube gerua degaba unsuialin giti, geru e me kle degaba ngwale, geru e che ta gbe ulia, chada e gerule: 
\q1 “Chube mo Oña gbu toi che tale, Chube Oña e no che ole, ama me takalin che age ama dollale, ama takalin che mo ta gbe no ulia ama ole.” 
\m  
\v 6 Chube gerua degaba gerule ene. Chube no che ole ama takalin che age ulita ama takalin kare, malen Chube kle che chudaboi ama talla no giti kle che kira gbe toi no ama takalin kare. Chube gerua degaba unsuialin kaire gerule ene: 
\q1 “Chube kle mo tke dole kwian ole kwian bai kaire kle mo sobade daba nadi ole, agwa Chube kle tai dage kwiange ama kle kira kete kwiange kwian bai kaire me kle mo sobade daba nadi me kle mo gbe kweri daba na gwa giti, kwian e kle mo gbe daba chudaboanga. Kwian e kare alin Chube kle age no.” 
\m  
\v 7 Chube gerua degaba gerule ene, malen cha gerule ba ole, ba Chube chuge ngwadi age ba tale ba ta gbe age ulita Chube takalin kare. Ba me che dolla Satanás chuge ngwadi ba ta gbe age me no, ba mo tke dole Satanás ole Chube kirallaske gire Satanás me ñage age ba ole, ba chege Chube kirallaske Satanás be kige badi, Chube ma kweri Satanáge.  
\v 8 Ba mo ta gbadale diali Chube ole gerule diali Chube ole, ama be ba kira gbe toi no trate ama takalin kare. Ba bai kle age me no ba mo ta gbadale toi no ulita trate Chube takalin kare, ba kle age me no ba e chugale ngwadi salengwli ba kle mo ko sugaska glige jige trate kare. Ba bai takalin chege Chube ole agwa kaire chegekalin toi kwian me Chubenu agenga me no kare, ba ole cha gerule, ba mo ta blitadale Chube ole. Ba bai kaire kle mo ta gbe chege no Chube ole ba mo ta gbadale chege ma no trate ulita Chube ole toi Chube takalin kare.  
\v 9 Ba mo ta gbadale ta olire ole ba kle age me no giti. Ba me ñage chege mo ta gbe gide nga suga ole ba kle age Chube dollale giti, ba mo ta dbadale olire ibule Chube ngeru ba kle age giti, ba me chagedale dare me no ngwale ba ulita takalin kare.  
\v 10 Ba mo ta gbadale Chube gai mo Chugagwalla kweri ene Chube be tai dage bage be ba chudaboi ba ta gbe nga suga no ole. 
\s1 Kwian Chubenu me gerudale me no dabadi 
\s1 daba gbe jiske 
\p  
\v 11 Cha bitalla ulita Jesucristo giti, cha gerule ba ole, ba me gerudale modi me no ongoru ongoru. Kwian bai kaire kle gerule me no dabadi kaire kle daba gbe jiske gweale daba nage, ama kle age ene kle age me no Chube gerua dollale. Chube gerua kle gerule che nodale daba ole ulita, agwa che geru e gai geru ngwale kare gire ene che kle age me no geru e dollale. Ma no mo ta gbe Chube gerua gai dage ulia age diali ulita geru e kle gerule kare.  
\v 12 Chube alin allabi geru jigu gbaba kwian ulita alin kwian toidale mine, kaire ene agwe Chube alin allabi ñage gerule kwian ulita giti kwian bai jiske kwian bai me jiske. Chube alin ñage kwian jwen siere ji chugege age me no gdale, kaire ama alin ñage kwian gbe ji chuge tirare kwian age me no giti. Agwa cha geru kade ba ulitage, ¿chema ba gbu daba gbanga jiske? Ba me mo ta gbale daba gbe jiske dare gerule me no dabadi ngwale. 
\s1 Kwiange me uñale kwian be toi mine 
\s1 chui gwangeruguge 
\p  
\v 13 Cha takalin ba ulita cha gerua ai gbe gdadi no no. Ba gweale kle gerule diali ai kare: “Nege o suialin che be joge nga gwealege, ne ngwadi che be chegeda chura gdaite lle boi igi tanre gai mau alin.” Ba gweale kle mo ta gbe gerule ene.  
\v 14 Cha gerule ba ole, ¿chemage uñale chui suialinge be joge tangle mine? Chege me uñale chui be chiege be boi mine che ole. Cha gerule ba ole, che salengwli bogakwa kare. Bogakwa ñage chke dba sugeti gire blikare bogakwa ñage jogenga, e kare ene che ulita talla.  
\v 15 Malen che me tañachugadale mau tale agali chui gbe che be lle gweale boi che takalin chui be chiege suialinge. Ulia ma no che gerudale ene: “Che Chugagwalla Chube takalin che age ene, gire che be age ama che ta gbe age kare.”  
\v 16 Ulia cha gerule ba ole, che ulita tañachugadale Chube giti Chube be che ta gbe age Chube takalin kare, agwa ulia ba me kle mo ta gbe tañachuge age ene. Diali ba kle suge moge kweri ba ñage age gballa ulita, ba kle gerule nga suga no ole mau tale agali gballa ba takalin kare, suge moge ma kweri mau tale, ai ulita me no Chube gwa giti.  
\v 17 Cha gerule ba ole, kwian Chubenu bai kaire uñale amage age no trate agwa me kle mo ta gbe age suge amage kare, kwian ene kle mo ta gbe agali age me no me no, ama ta suge agwa me age. Chube me no me no ta ene ole. 
\c 5  
\s1 Kwian lle molen tanre mo ta gbale 
\s1 tañachuge ama kle age giti 
\p  
\v 1 Cha gerule ba ulita ole kwian lle tanre molen giti, kwian e ulita cha gerua ai keruchugadale no, kwian e mo ta dbale olire sui jwennga ama ulita be boi daga ngwale tirare bdagli giti.  
\v 2 Kwian lle molen tanre agwa lle e ulita ngwale, kwian e llea ulita me ñage ama chudaboi ama llea ulita kle boi, lle ulita nga dba ai giti be jogenga ngwale blikare ama ngeru, ama ñometralla no ñanaske ulita loko be kage me no ama ngeru loko be mo ulla gbe kwian e ñometrallaske. Lle ulitage kwian e be chege kole me lle molen dale.  
\v 3 Ama igia ulita mi chege ñanaske dale Chube gwa giti, ulita be joge tangle mi chege ama ole diali dale alin. Ama llea ulita be chege ngwale Chube gwa giti, e giti be suge kwian e kledu toi gire ama lle tanre ngwale litu ole ogadale no agwa ama me mo ta gbu ulia jumale Chube ole. Ulia nga dba ai giti bebi joge tangle ulita Jesucristo chieni chuia bebi chke gire chui ege kwian e be ji chuge tirare ulia jitaske ama agedu me no kbiale.  
\v 4 Ulia cha gerule ba ole, kwian e me agedu no lle boanga ama alin ole, lle boanga chude skutu kwian e alin deage gire kwian me igi ketu lle boangage ama lle bo ñanale. Geru e kle kwian lle tanre molen giti, Chube che Chugagwalla kweri kiraske ulita kwian lle boanga kwian lle molen alin e keruchugu gerule mo giti kwian me igi ketu amage giti. Chube be kwian lle boanga e keruchuge gerule mo giti gire Chube be lle boanga chugagwalla e gbe ji chuge.  
\v 5 Ulia nga dba ai giti kwian kle mo gbe chege lle molen tanre, kwian takalin lle ulitage ene ama chege nga suga no ole, malen ama kle mo ta gbe lle ulita gige mau alin ama takalin kare. Ama lle tanre ulita ama tadukalinge ama litu ole mau alin, lle ngle kle ama ole ni ama kle tañachuge daba na giti ni Chube giti, ama kle toi diali ta kibale tanre ole, agwa chui bdaglige ulia kwian ene be ji chuge boi daga ngwale tirare ama agedu giti gdale. Kwian kle toi ulita ai kare e ulita chege salengwli chbi kle joge blodi kare bigire chbi blodi e gwakleda. E kare ene ulita kwian ene be boi.  
\v 6 Kaire cha gerule ba ole, kwian e daba me jiske gbu ji chuge boi daga ngwale, daba e me kledu kira bate kwian e dollale agwa kwian mo ta gbu me no dabadige kwian e daba guda. Kwian agedu ene giti Chube be kwian e gbe ji chuge tirare. 
\s1 Kwian Chubenu mo ta gbadale jage ta no ole 
\s1 boi daga ngwalege 
\p  
\v 7 Cha bitalla ulita Jesucristo giti, cha gerule ba ole, ba gbakle boi tanre daga ngwale gire ba mo ta gbadale jage ta no ole ba kle boi daga ngwalege me skwatige me skochie, ba manadale ta ngwedi ole eruda taleda che Chugagwalla Jesucristo be chieni chuia manade ngwange. Ba Jesucristo manadale ngwange salengwli kwian kle chude skie kle chude skute chuiage manade ngwange kare. Kwian kle nga bate chude ngama alin kle chude skie, gire ama kle noi chuia manade ngwange ta no ole tañachuge ama be chude no jwen gudegu tanre chude skute suialege.  
\v 8 E kare ene ba mo ta gbadale diali gwangerugu kiraske che Chugagwalla Jesucristo chieni chuia manade ngwange ta no ole. Ulia Jesucristo be chieni chuia kle kodi ama be chieni blikareni malen ba mo ta gbadale diali kiraske gwangerugu Jesucristo geruadi. 
\p  
\v 9 Kaire cha gerule ba ulita ole, ba me ñage mo jwannge giti dabage ongoru ongoru daba na kle age giti ba ole, ene ba giti mi jogeba ji gbaba. Ulia me sbali Chube be gerule kwian ulita giti kwian bai jiske kwian bai me jiske, ama bebi ji gbe kwian giti kwian agedu me no gdale.  
\v 10 Daba Chubenu, ba mo ta gbadale tañachuge kwian Chube gerua ketanga unsuialin giti, ama boidu tanre daga ngwale Chube gerua kete kwiange gdale gire ama jagedu ta no ole me skwatigu boi daga ngwale agwa ama diali mo ta gbu nga suga no ole.  
\v 11 Ulia uñale chege kwian bai kaire ñadu mo ta gbe jage ta no ole boi daga ngwale ulitaske kwian enedi nga sugadu noare ama mo ta gbu giti ulia age ulita Chube takalin kare. Ama boidu tanre daga ngwale jere jere agwa ama me mo talladu ama chegu ta no ole diali. Bage geru jo tragaba kwian unsuialin tangle kada Job giti, ba geru keruchugaba Job boidu giti ama mo ta gbu jage ta no ole ama boidu tanre daga ngwaleske, kaire uñale bage bdagli Chube agedu no tanre Job alin, ulia Chube diali no, ama kle tai dage chege ama no che ole, ama me takalin che boi me no daga ngwale tanre. 
\p  
\v 12 Kaire cha gerule ba cha bitalla Jesucristo giti ole, ba cha keruchuge no. Ba gerule daba ole Chube gwa giti ba be age gweale ulia, ba me gerudale lle gweale kalla giti ba ta geru gbakalin egdage gire. Ba me gerudale ni nga ngaña kalla giti ni nga dba ai kalla giti, ni lle na ulita kalla giti. Ulia ba ta geru gbakalin egdage daba na ole ba be age gweale daba alin, ba gerudale daba ole ene: “Ima, cha be age cha kle gerule kare.” Ba gerule ene gire ulia ba agedale ba gerudu kare. Kaire ba ta geru gbakalin egdage daba ole ba me age gweale, ba gerudale ene: “Me dale, ulia cha mi age.” Ba gerule ene gire ulia ba me age nganake. Ba me age ulia ba gerule kare, Chube be ba gbe ji chuge e gdale. 
\p  
\v 13 Ba ulitaske daba gweale kle boi daga ngwale ta olire tanre, daba e gerudale Chube ole ta no ole ama kle boi giti. Kaire daba gwealedi nga suga noare gire ene ama mo gatadale no Chube giti gerule no ulita Chube giti.  
\v 14 Daba gweale oga gire ene ama kwian Chubenu chugagwalla ulita kadadale chie ama kle ngwadige gerule ama oga giti Chube ole, gire kwian Chubenu chugagwalla be kin gbe daba oga chuga giti gire gerule Chube ole che Chugagwalla Jesucristo kalla giti ene daba joge chkeni noni.  
\v 15 Kwian Chubenu chugagwalla e mo ta gbe ulia Chube ole Chube ñage daba oga dodade, kwian Chubenu chugagwalla e mo ta gbe gerule no Chube ole ta giti, gire ama mo ta gbu Chube ole giti daba oga be joge chkeni noni. Chube ñage daba oga gbeni noni trate, kaire daba nu ageba me no Chube be ama agedu me no talla mlienga Chube mi tañachuge dare daba oga agedu me no giti, Chube daba oga ene dodade.  
\v 16 Che gdaite gdaite kaire kaire gerudale daba ole ongoru ongoru che agedu me no giti ene daba che agedu me no talla mlienga. Kaire che gerudale Chube ole daba giti ongoru ongoru chudaboi kade Chubege ene daba oga be joge chkeni noni kaire daba ta be chege no trate Chube gwa giti salengwli kwian oga kle joge chkeni jingme gwealegeni kare. Kwian bai mo ta gbe ulia age no trate Chube takalin kare, kwian ene gerule Chube ole chudaboi kade Chubege Chube kwian ene keruchuge Chube age kwian e kle mo ta gbe gerule kare Chube ole ene Chube ama chudaboi no no kwian kle mo ta gbe trate ulia Chube ole giti. 
\p  
\v 17 Unsuialin tangle kwian Chube gerua ketanga kada Elías, ama kwian che ulita kare, agwa ama mo ta gbu Chube gai ulia ama mo ta gbu gerule no no tanre Chube ole Chube noi gateda Elías kle toi ngwadige. Elías gerudu ene Chube ole gire noi me boidu ama kledu ngwadi ama kadu Chubege kare, chura gdamai giti dai gdadereke chku ni noi boidu sidri e suiale.  
\v 18 Bigire Elías gerudu nakwaiteni Chube ole noi giti, gire noi boiduni nakwaite ngeru kareni nga ege, nakwaite chude tigeduni no naskuni. 
\p  
\v 19-20 Cha bitalla ulita Jesucristo giti, cha gerule ba ole, daba Chubenu gweale baske joge siere Chube gerua uliage mo ta gbe toini me no naskuni kwian me Chubenu kare, gire kwian Chubenu na mo ta gbaba chage trate Chube ole daba e chudaboadale. Kwian mo ta gbaba trate daba kle age me no ta gbadaleni Chube geruadi geru gai naskuni me age dare me no. Daba agenga me no mo ta blite joge siere age me noge ama mo ta bliteni naskuni Chube ole, gire ene chkedale uñale ba ulitage kwian Chubenu mo ta gbaba trate daba na Chubenu kle age me no ta gbeni chage no naskuni Chube ole, kwian ene mo ta gbaba ulia Chube ole kle daba na jwen siere ji chuge tirarege, Chube daba agedu me no talla mlienga ulita, Chube ni be tañachuge daba e agedu me no giti Chube ta dbe no daba ene ole. 
\p Geru ai ene ulita cha Santiago chada degu ba ulita kwian israelita nga ulitage alin. Che kle meni.